الجزء الـ 18
الصبح .. في بيت السفير ..
يدوه غريسه: الله ينطب ابليس البشكارة هاي ... يايبتلي اونها ريوق ... هذا ريوق الحين هذا ريوق .........
بدر واقف فوق ... ويطالع يدته كيف تتحرطم تحت .. نزل وفي ايده مجلة ... وتم يتصفحها ..
يدوه غريسه: عنبوه ... نازل من فوق قول السلام عليكم
بدر: ليش اسلّم ؟ مب كل يوم جنّي اشوفج ؟
يدوه غريسه: الله ياخذ ابليسك ... انا يدتك يالهرم
بدر: انزين خلاص ... السلام عليج
يدوه غريسه: وعليك السلام .. ما نباه هالسلام .. مالت عليك .. بالغصب الواحد يسلّم في هالبيت
بدر: ما سلمنا هزبتينا .. سلمنا هزبتينا ... ما عرفنا لج .. شوه نسوي لج يعني ؟!
يدوه غريسه: الله لا اييب اليوم اللي انا احتايك فيه .. والا ابا من جداك شي
بدر: الحمدلله .. زين بعد
يدوه غريسه: انا ما ابا اسبّك الحين ولا اقولك شي .. ما ابا اييب كلام وصخ ع لساني
بدر ... بعد بتسبّين ! ... ولا تفكرين فالموضوع بعد ! ... جنّج من الصبح يالسه تمدحين .. ثرج من تصبحين لين تمسين وانتي تسبين كل اللي فالبيت ... والله حاله .. مشكلة هالعيوز ...
يدوه غريسه: وين هند .. ما اتصلتوا بها
بدر: وليش نتصل ؟
يدوه غريسه: عنبوكم ما صدقتوا سارت عنكم ؟
بدر: والله هي اللي تبا تسير
يدوه غريسه: وانته جيه ما سرت ؟
بدر: انا ما انزل مستواي واسير ويا ناس قحط
يدوه غريسه: ويهك القحط
بدر: شوووووه ؟
يدوه غريسه: هيه ويهك القحط . عنبوك استح ع ويهك خيّل .. كيف تقول عن هلك . خالتك وخالك قحط ؟!
بدر: انا ما اقصد خالتيه .... وخالي انا اقصد عيالهم
يدوه غريسه: وجيه قحط ؟
بدر: ما ادري .. يوم بتيلسين وياهم بتعرفين هم ليش قحط
يدوه غريسه: والله محد قحط غيرك
بدر: اوكيه شكراً
يدوه غريسه: قم قم .. قم سر صب لي حليب
بدر: انا اصب لج حليب !
يدوه غريسه: وليش ما تصب لي ان شاء الله ! ..
بدر: ازقري الخدامه والله تصب لج .. هاللي ناقص بعد
ونش بدر من مكانه وسار فوق .. ويدوه غريسه ردت تتحرطم .. صدق انه قحط !! ..
سعيد: بقول حق فريد اييب الريوق
بدور: وين؟ هني بيدخل ؟!
سعيد: هيه .. انتي لابسه شيلتج
بدور: لا بسير داخل .. خل يحطه وعقب بظهر
سعيد: بدور
بدور ( بارتباك ): هلا
سعيد: شوه السالفه ؟
بدور: أي سالفة ؟
سعيد: انا من يوم رديت امس ... وانتي ما تبين لا تشوفين فريد .. ولا ان يدخل هني الفلة وانتي موجودة
بدور: لا عادي .. ما فيني شي ... بس جذه
سعيد: متأكده ؟!
بدور: يا اخي ما يحرم لي ... جيه يدخل الفلة وانا موجوده
سعيد: انتي بشيلتج ...
بدور: حتى ولو
سعيد: قبل كان عادي .. الحين ليش لا ؟
بدور: ها !
سعيد: بدور مستوي شي !
بدور .. يا ربي الحين شقول له .. اذا قلت له جذه .. بيقول انا الغلطانة ... وليش طالعه اصلا وهو مب موجود وليش واسئلة وتحقيق ما له اول ولا تالي .. وانا مب ناقصة ...
سعيد: بدور ارمسج انا
بدور: بقولك بس ع شرط
سعيد: قولي الحين
بدور: لا اول شي توعدني
سعيد: شوه ؟
بدور: تسمعني لين ما اخلص
سعيد: شوه مستوي ؟ رمسي !
بدور: امس نسيت مبايلي هني فالصاله ...
سعيد: انزين
بدور: وظهرت اييبه ... دخل عليه فريد
انصدم سعيد ..
سعيد: انتي شوه تقولين ؟!
بدور: اصبر .. اسمعني ..
سعيد: شوه اسمع بعد ؟
بدور: اسمع اسمع ...
سعيد: قولي شوووه خلصيني
بدور: بس ... انا من شفته ركظت حجرتيه وقفلت البيبان ... ويلست اترياك
سعيد: يعني هو ما طلع يوم شافج ؟
بدور: لا ..
سعيد ( شهق ): وقف ولا ظهر ؟!
بدور: هيه ..
سعيد: وانتي بليّا شيلة !
بدور: قلت بييب مبايلي وبرد فما له داعي للشيـ
سعيد ( قطع عليها ): انتي غبية والا تتغابين ... كيف تظهرين بدون شيلة هني .. وفي ريال فالبيت .. اصلا جيه ظهرتي من هني
بدور: قلت لك نسيت مبايلي برع
سعيد: مره ثانية .. يوم انا محد ما اطبين برع القسم ... ان شاء الله شوه ما يكون اللي ناستنه برع
بدور: وليش تصرخ عليه انا يعني
سعيد: عيل تبيني اصرخ ع منوه ان شاء الله ! .. البشكارة اللي ظاهره جدام فريد والا انتي حرمتيه ؟!
بدور: والله هو ما كان له حق يدخل الفلة يوم انته مب هني
سعيد: هو يدخل ينظف ويسوي ... انته جيه تظهرين من القسم
بدور: هو ليش يتم واقف .. جان صدق مخلص ع قولتكم ... ظهر من الفلة يوم شافني .. مب خلاني انا اربع وايي الحجرة هني ...
سكت سعيد وسكتت بدور ...
بدور: ما تباني اييب لك ريوق
سعيد: لا .. انسدت نفسي
بدور: ما تسوى السالفه ..
سعيد صد صوب بدور واطالعها بنظرة .. خلتها صدق تخاف منه هالمرة .. كان معصب .. و شكله مب مشتهي أي شي .. لا ياكل ولا يرمس .. ولا حتى يناقش في أي موضوع ...
في المزرعة ..
من هذربان امس .. و ظحك امس .. وسوالف امس .. ونكت امس .. وتعليقات امس ..
طبعا لا احمد .. ولا سالم .. ولا عمران .. ولا مروان .. ولا هزاع .. ولا ثاني .. بينشون هالحزّه ..
الا الباجين اللي مب متعودين ع المكان .. فـ بينشون بسرعه شرات راشد .. وعمر .. وزايد .. وعبدالعزيز اللي عمر قومه غصبا عنه ...
اما الباقين .. فـ ناشين .. بس آمنة ويا بنتها .. وسلامة ويا ولدها ويالسات فالصاله ..
والباقين برع ...
عذيجة: طارق تبا حليب
طارق: هيه عموه صبي لي
زايد: عموه انا بعد ابا
ام زايد: زايد وين ثاني ؟
زايد: راقد ..
ام زايد: هالولد ما يشبع رقاد .. لا فالبيت ولا هني
عفرا: جيه بس ثاني اللي راقد .. كلهم راقدين
عذيجة: عبدالعزيز .. عبدالعزييييييييز
عمر ( حرك جتف اخوه ): قم
غاليه: حرااااااام راقد
عبدالعزيز كان حاط راسه ع جتف عمر وراقد ... صدق من الخاطر فيه رقاد ..
بو زايد: يوم فيه رقاد .. جيه موعينه ؟
راشد: هههههه عمر موعنه
علي: حليله اطاعوه والله مدوخ
عمر: خل يتأدب قلت له امس ارقد ارقد .. ولا يرقد
بو هزاع: ارحم حاله يا عمر
عمر: لا خله ... لو رقد الحين .. فالليل ما بيرقد بعد ...
راشد: عبدالعزيز اشرب لك كوب حليب بينشطك
عفرا: اوه صدق نحن اونه مسوين نسكافيه .. بسير اييبه
غاليه: بيي وياج
عذيجة: عفرا وين هند ؟
عفرا: داخل .. ويا أمون وسلامة
فالصاله ..
آمنة: يعني الاسبوع الياي بعد في سفرة
هند: هيه ... بس انا ما ابا اسير
سلامة: وين بيسافر ابوج ؟
هند: ما ادري .. تركيا .. يمكن
آمنة: سيري .. تركيا حلوة
سلامة: هيه سامعه عنها حلوة
هند: هي حلوة ... بس بالنسبة لي عادية استوت ...
آمنة: وين لو انا منج جان سافرت
هند: ههههه تتبادلين الاداور .. سافري وياهم بس خليني ابات في بيت خالوه عذيجة
آمنة: ههههههه لا لا ما اقدر .. ريلي وبنتي وين اخليهم
هند: وديهم وياج
سلامة: لو ع امون تباها من الله ...
هند: والله لو تكونون مكاني بتملّن ... سفر .. وكل يوم برع البلاد ... تلوع جبدج .. حتى ان ما يكون عندج ربيعات ثابتات .. تحسين انهم في داخلهم يقولون عنج خقاقه .. او انج شايفه عمرج ... مثل ما استوى امس ... انا ما زعلت من رمستهم .. بالعكس .. توقعتها .. لان الكل يتحسبني خقاقه ... ورافعة خشمي ... بس انا عن نفسي .. والله لو بايدي .. جان ما سافرت ولا بلاد من هالبلدان .. و لو كانت شغلة ابويه عادية فالبلاد افضل لي من انه يكون سفير و كل يوم والثاني ساحبة شنطتيه ورايه ... ومسافرة برع البلاد ..
سكتت هند .. ما ردت لا آمنة ولا سلامة عليها .. حسّت صدق ان هند شاله في قلبها هم ..
هند: هههه وايد رمست عطشت .. بسير اييب ماي ..
آمنة: حليلها ..
سلامة: وين عفاري تيي تسمعها
آمنة: ههه لو عفاري سمعتها .. جان قالت لها احمدي ربج .. احمدي ربج
سلامة: لانها خبله عسب جذه ..
آمنة: منوه الخبلة ؟!
سلامة: عفاري .. يا رب اييها واحد يادبها
آمنة: حرام علييييج
سلامة: تستاهل .. عيل حاطين عليه انا حليلي هالكثر .. هي واخوها
آمنة: اللي يقول عديلتج ... مب اختج ...
سلامة: هيه تتمنى عفاري .. واحد شرات ريلي
آمنة: هههههههه حشى .. ما يسوى عليها .. لا تيوزينها ولا تختارين لها .. بييها نصيبها .. روحها
ظهر سالم من الحجرة ...
آمنة: صباح الخير
سالم: وينهم ؟
سلامة: اصبحنا واصبح الملك لله
آمنة: برع كلهم برع .. احمد ما نش ؟
سالم: لا .. راقد
آمنة: انا عيل بسير برع
سلامة: بتودين بنتج ؟
آمنة: هيه ..
سلامة: امون حرام عليج
آمنة: ملحفتنها عدل .. الجو حلو ... بوديها ...
سالم: ييبي انا بشلها
سلامة: بيعقها صدقينيييييييي لا تعطينه في ايده
سالم: خالوه سلامة اعرف اشلها والله
آمنة: ما عليه انا وياه .. يالله تعال
نرد عند ربعنا اللي برع ...
عفرا: منوه يبا كابتشينوووووووو
حصه: صبي كوب حق عبدالعزيز عسب يتنشط
سالم : انا انا ابا صبي لي
غاليه: نشيت ...
سالم: هيه نشيت ... هنقي سنقي برنقي حدد موقعك ... يا عبدالعزيز ... بلاك مدوخ ؟
عبدالعزيز: هذا عمر موعني من وقت ...
سالم: محد قالك ترقد حذال اخوك
آمنة: ييبها سالم
بو زايد: كيف معطيه البنيه في ايد هذا ..
سالم: افا يدي عبيد مب واثق فيني
بو هزاع: انته محد يثق فيك ...
سالم: ما عليه لو عقيتها .. خطيبتي فالمستقبل .. بتكبر وبتنسى
آمنة: لا تعقها ولا تكبر وتنسى ييبها ..
سالم: ما ابا ما ابا
حصه: سالم حرام عليك لا تلعوزها
شسمة: ييبها عندي
سالم: ما اباااااا
عبدالعزيز: اصلا هي بتحبني انا يوم بتكبر .. انته محد بيصد صوبك
سالم: بنشوووووووف ..
صالح: عطها حق امها بتعقها
حصه: ما يسمع الرمسة
صالح: ساااالم
سالم: ما بعقها والله ما بعقها
راشد: ييبها عندي ..
سالم: هااااااا .. حطيت عينك عليها
راشد: شوه اسوي فيها ؟ اربيها ... ييبها
زايد: ههههه والله انك حركات
عبدالعزيز: راشد لا تشلها وتحبها ... عقب تكبر .. تكون حرمتيه .. وانته شالنها وبايسنها يوم صغيرة
عمر: استح ع ويهك !
سالم: اوه تصدقون ما فكرت في هذا .. اييييه محد يشلها عيل .. للأسف عموه عفاري بتكون خالتيه انا وخالة حرمتيه من الصوبييييين
نقعوا من الظحك ع رمسة عبدالعزيز وسالم ... عبدالعزيز وسالم .. ما شاء الله عليهم وع تفكيرهم اللي يفوق سنهم ....
في بيت يوسف ..
يالس روحه في حجرته .. يذكر ... اللي دار بينه وبين اخوانه .. هذاك اليوم .. طبعا جواهر ما حظرت الجلسة .. لانها كانت مسافرة ...
سيف .. وعبيد .. وعذيجة ..
يوسف: اذا انتوا تطالبوني بنصيبكم عندكم المحاكم
عذيجة: مب نحن اللي ندخل المحاكم يا يوسف
يوسف: عيل ما لكم حق عندي
بو زايد: لنا حق .. كيف ما لنا بس نحن ما نبا حقنا ... حلال عليك .. لكن حق سيف عطه اياه .. اخوك متوهق يا يوسف لازم تساعده
يوسف: قلت له عنده بيتي .. ايي يسكن عندي
سيف: يوسف انته شوه تقول .. لو انا رضيت حرمتيه ما بترضى .. بيت شكبره عندها .. تيي تسكن هني .. ما بترتاح
يوسف: وليش ما ترتاح .. انا 24 في حجرتيه هني .. والخدم تارسين الفلة ... والحجر وايد تتنقى .. وكل واحد من عيالك له حجرة .. عادي
عذيجة: يوسف أي حرمة ما بترضى .. هي لها بيتها
سيف: يوسف افهمني .. قدر موقفي ...
يوسف: قلت لك ما عندي ولا شي لك
سيف: آخر كلام عندك ؟
سيف: انا من قبل قلتها .. ورديت في رايي .. والحين آخر مره اسألك .. هذا آخر كلام عندك ؟
يوسف: هيه
سيف: عيل ... شوف .. لا انا ولا حرمتيه .. ولا حتى عيالي يطبون هالبيت مره ثانية .. لو كنا بنبات ع رصيف الشارع ما ييناك هني
وظهر سيف من عندهم
بو زايد: سيف يا سيف
عذيجة: يوسف شوه سويت ؟
يوسف:انا ما سويت شي .. وبعيدن استحوا ع ويوهكم انا اخوكم العود ربيتكم وتعبت عشانكم .. والحين كل واحد من صوب .. يرمسني وكأني اصغر عياله ..
ونش يوسف وسار داخل هو الثاني ....
عذيجة: شوه نسوي ؟
بو زايد: ما ادري
عذيجة: ما في غير نرمس جواهر
بو زايد: الا جواهر وريلها ... انا بشوف ... وبحاول اوفر له المبلغ
عذيجة: كم بتوفر ؟ وكم بتقدر تيمع ؟
بو زايد: بشوف عاد ... روحي ما ادري
عذيجة: انا برمس بو هزاع
بو زايد: لا .. لا ترمسينه .. خلي السالفة بينا رواحنا الحين ..
عذيجة: كيف ؟ ع الاقل بيساعد
بو زايد: استغفر الله .. والله ما ادري شقولج ... سوّد ويوهنا يوسف .. ما يبا يساعد اخوه
عذيجة: هو كله حاط في باله ان سارة حرمت سيف هي اللي اونه مترسه راس سيف ايي يطلب نصيبه
بو زايد: من حقها الحرمة .. ما تبا تخسر بيتها
عذيجة: عاد منوه بيفهم يوسف هالشي !
ومره وحده يدقون الباب ...
يوسف: تعال كمال
كمال: اييب الريوق؟
يوسف: ييبه .. بسم الله
ونش يوسف سار يغسل ايده .. عسب يسير يتريق
فالمزرعة .. كلهم نشوا .. واحمد من امس ناوي ينش الصبح .. ويسير يسبّح فالحوض ..
وفعلاً سوى اللي في راسه ... والكل تخبّل وياه ..
صوب الحوض ..
رملة: حراااااام .. ابا اسبّح
آمنة: احمد خلها تسبح
احمد: يا ويلها لو دخلت الماي ..
رملة: افففففف
سالم: وه وه وه .. تراااااااب ما خلوج تسبحين
شمسة: سالم .. لا تسير صوب الغزير
صالح: والله هالولد يباله ظرب
عفرا: انته ابوه ..
صالح: هههههه عاد ما صدقتي انتي انا قلت جذه .. سالم لا تسير هذاك الصوب
شمسة: اففففف يا ربييي .. خبلني
زايد: ها عبدالعزيز .. تنشطت الحين ؟
عبدالعزيز: هيه والله .. جان من الصبح قمتوا ويبتوني الحوووووووض
عمر: عاد انته ما تصدق ..
مروان: ايه دبوووووو
سلامة: لقب منوه هذا بعد ...
شمسة: يديد فالقايمة
مروان: منوه غيرها ام الدويس .. دبه ونحسه .. وخسفة
عفرا: ودك انته .. حرمتك الخسفة
مروان: يعلج تفدينها
عفرا: اتخسي الا هي
مروان: هيه مضيعه عموه ترمسين جذه .. وتحطين ع حرمتيه ..
عفرا: والله جدامها حتى بقول ..
هند: ايه سالم لا ترش ماي ..
سالم: اننا نتسبح ..
هزاع: ماتت اللغة الام ..
مروان: لغتنا العربية تستغييييييييث فهل من مغيييييث
احمد: انتوا بس الله يخليكم اطالعوا ثاني وعلي ..
ثاني: شوه فيناااااااااااااا
مروان: مصدقين عمارهم .. السباحين الماهرين .. سيروا الاولمبيات بعد
علي: ههههه جان سرنا بنغلبهم كلهم
حصه: بعد بتحسدون ريليييييي
مروان: اففففف بدينا ..
عبدالعزيز: اقول بنسوي سباق يالله
سالم: يالله يالله ..
ظهروا كلهم من الحوض ..
واصطفوا ... عبدالعزيز .. سالم .. احمد .. مروان .. ثاني .. هزاع .. علي .. طارق
وعمر وزايد وصالح يالسين يطالعونهم .. والحريم والبنات .. كل وحده فيهن تشجع حد ..
هند: انا انا بعد
مروان: الاخت متخصصه .. كل ما سوينا سباق هي تعد عايبتنها السالفة
هند: ههههههه لا مب جذه .. بس دام اني ما بشترك وياكم .. فـ بعد لكم ..
رملة: لا لا انا .. الله يخليج
هند: هههه انزين يالله عدّي
عبدالعزيز: يالله تراب بتغش
عمران : في شوه بتغش البنيه يعني ؟
راشد: الا هو 1 2 3
سالم: لا لا ما نباها
علي: ع كيفكم جنه
احمد: انته وهو .. ايييييه .. اصطلبوا .. ثركم وايد حاطين ع اختيه من امس .. تأدبوا احسن لكم
مروان: اشتغلوا محامين الدفاااااااااع ههااااااااي
صالح: صباح الخير ... توك تدري ان اختك ويانا هني
عفرا: يتأدبون .. من امس حاطين ع البنيه صدق
هزاع: والله اخوها ساااااكت
احمد: ثرني رمست الحين
طارق: ع قولت صالح صباح الخير
مروان: قصدك ظهر الخير الحين بيأذن .. ياللللللللله عدي
عبدالعزيز: تعالوا صدق ... انا كيف نسيت
عمر: شوه نسيت ؟
عبدالعزيز: هاي تراب تستوي عمة بنت امون واحمد .. وع وع وع .. يعني عمت حرمتيه المستقبلية
سالم: اوييييييه انا بعد نسيت
زايد: هههههههههههه صدق انكم حركاااااااااااااااااااات
آمنة: انته وهو .. بنتي ما بتاخذكم
عبدالعزيز: هي الخسرانه
عمران: رملة عدي عدي
رملة: واااااااااااااااحد .. اثنيييييييييييييييييين
عبدالعزيز: صبري صبري ..
رملة: شوه ؟
عبدالعزيز: باخذ نفس
رملة: سخيف ... خربت عليه
طارق: خلوا البنيه تعد ..
رملة: 1 2 3
وتسابقوا ...
وهم فالسباق ..
مروان ير ريل سالم .. وسالم ير ريل احمد .. واحمد ير ريل عبدالعزيز .. وعبدالعزيز عفد ع علي ..
و اللي فاز طارق ...
حصه: ويه ويه .... ذبحوووووووه ذبحوووووووووه
آمنة: اييييييييييييييه ريلي ...
راشد: اخوانييييييييي
عفرا: ههاااااااااااااااااااااااااااااي ... غرقوا كلهم
سالم ( ظهر ) : غشاشيييييين ... انته كله منك
مروان: هههههههههههههههههههه
رملة: احسن تتادبون
عبدالعزيز: احمد جيه غرقتنييييييييييييي
احمد: والله ربيعك هكونا متاتا ... ير ريلي ... تبا تغلبني عيل
مروان : لحظة لحظة ....
وسار صوب طارق ... وحط ايده ع راسه .. وتم يقرا !!
عمران: هههههه مروان عن الاستهبال
طارق: هههههههه عن الاستعباط قم عني ...
هند: هههههه جنه فيه ينّي ..
عمر: مروان هد الريال عاد
زايد: ط شكل طارق هههههههه
مروان: اطالعوا شكل حرمت طارق قبل
سلامة .. صدق عايشه الموقف ... ان حسدوا ريلها .... عسب انه فاز ...
طارق: هههه يالسخيف حرمتيه رقيقة ... ما تتحمل يعني ان يصيبني مكروه
سلامة: هيه والله ...
سالم: واااااااااااااااااااااااء اونه استاذ لغة عربية
ثاني: اصلا انا كنت بفوز .. بس انتوا غشيتوا
عبدالعزيز: هذا احمد ير ريلييييي
احمد: ذليتني يا اخيييييي ..
عمر: عبدالعزيز يالله خلاص ..
عبدالعزيز: ليش؟
عمر: بس قلت لك
عبدالعزيز: عمّور بس شويه الله يخليك ..
زايد: عمر خلّه كلهم يسبحون
عمر: لا .. بسّه .. ما فيه يمرض علي عقب بعد
عبدالعزيز: الله احلى شي .. عقب بدلعني شرات ما دلعت مروانووو
مروان: هـــه ع هالكم يوم اللي مرضنا فيه حسدونا بعد
ثاني: انتوا بلاكم ؟ من اول ما يينا وانتوا حسد وحسد ...
مروان: خوات هزاع .. علمونا
هزاع: احم ... حد طراني
عفرا: قالوا خوات هزاع .. بس الحمدلله انا بعدني ما معرسه ... يعني ما طريتوني .. لاني مب خبلة وكل دقيقة حسدوا وحسدوا ( ورن مبايلها ) ... هيه هني .. انزين الحين بقولها ......... هند امايه تقول تعالي تباج
زايد: عفرا وين غاليه اختيه ؟
عفرا: فالفلة اكيد .. عند الشياب ... ثرها عيوز
ثاني: لو سمحتي ... عن الغلط ع اختيه
عفرا: السموحه السموحه نسيت انك هني
مروان: اوووووونه عاد ثاني .. اوووووونه
عمر: راشد وين ساير ؟
راشد: الحين بيي ...
فالدرب لين الفلة .. هند تمشي بتسير تشوف خالتها شوه تبا .... وسمعت حد يزقرها ووقفت ..
صدت ورا .. وشافته .... وصل لين عندها الحين ما يعرف كيف يبدأ ...
هند تمت تطالعه وساكته ...
وهو بعد ساكت ..
هند: نعم ..
راشد: اممم .. لا .. بس .. بغيت اقولج
هند: هيه ؟!
راشد: اممم .. عن شي
هند: وشوه هو هالشي ؟
راشد: امس يوم حطيت عليج فالمطبخ ما كان له داعي ... وادري اني غلطان .. وانا روحي ما ادري ليش قلت لج هالرمسة فـ انا آسف .. واسمحي لي ..
هند تمت تطالعه شوي .. وراشد قااافط ومنزل راسه ....
هند( ابتسمت ): مسموح .. وحصل خير ..
رفع راشد راسه .. مب مصدق .. هو كان مستعد لاي كلمة تجرحه اكثر من هند .. ولا توقع ان ردة فعلها بتكون جذه ... كلها ادب واخلاق ... ومبتسمه ...
راشد: صدق؟ مب ماخذه في خاطرج عليه
هند: يمكن امس شويه .. بس عادي ..
راشد: مشكوووووووورة
هند: على ؟
راشد: انج تقبلتي اعتذاري ..
هند: العفو ..
ابتسم راشد ... ومشت عن هند .. وهند كملت طريجها سايرة عند خالتها ...
رن مبايل عمر ....
عمر: الو ... هلا سعيد
سعيد: اهلين عمر .. شحالك ؟ شخبارك ؟
عمر: الحمدلله بخير .. انته شحالك ؟
سعيد: الحمدلله ... وشحال الربع
عمر: الحمدلله كلنا بخير ....
سعيد: يالله متى بتردون ؟
عمر: ههههههه شوه مليت
سعيد: شكلها يازت لكم اليلسه هناك
عمر: تبا الصراحه .. والله حلو وكشخه .. تمنيتك لو ويانا
سعيد: يالله المره اليايه ان شاء الله
عمر: ان شاء الله ...
سعيد: متى بتردون ؟
عمر: ما ادري بعدهم يالسين ..
سعيد: انتوا قلتوا يوم واحد
عمر: ههههه لا تخاف بنرد اليوم ان شاء الله ... حتى لو هم بغوا ييلسون نحن بنرد .. ما اقدر اصبر يا اخي ما شايفنك من امس
سعيد: اونه عن العيارة .... جييييييه عبدالعزيز !
عمر: هههههه سعيد يالسخيف استويت شرا راشد ومروان وعمران يوم يغارون من عبدالعزيز
سعيد: لا طبعا انا اعقل عن هالخبايل .. وواثق بغلاتي عندك
عمر: يا عيني ع الثقه ههههههه
سعيد: وجيه يعني
عمر: شوه فيك ؟
سعيد: ما فيني شي ..
عمر: سعيد صدق !! انا حاس ان فيك شي
سعيد: عمر متضايق شويه
عمر: شوه مستوي ؟
سعيد: يوم بترد بخبرك
عمر: سعيد .. مستوي شي جايد وعود ؟!
سعيد: عمر خلاص قلت لك يوم بترد
عمر: انزين .. خلاص ع راحتك
سعيد: بخليك الحين .. مع السلامه
عمر: اوكيه ...فمان الله
صالح : يالله شباب رياييل حريم بنات .. بسكم يلسه هني .. نسير الفلة .. بسكم سبوح
شمسة: سالم يالله اظهر ..
سالم: هو ما زقرنا
عفرا: شوه تباه يقولك ؟ الشيخ سالم ؟
عبدالعزيز: لا لا .. صاحب السمو الشيخ سالم
هزاع: هيه مرّه يحلم هو بعد يستوي صاحب السمو اونه
احمد: ههههههههه حليله ..
صالح: يالله سالم
سالم: انته ما زقرتناااااااااااااااااااااا ما حددت نحن من أي فئة .. شباب والا رياييل
عبدالعزيز: ونحن لا من الشباب ولا من الرياييل
سالم: نحن اطفال ..
عفرا: هاهاها .. لا الله يخليكم انتوا الاثنين .. ما اقدر اظحك
راشد: انتوا اطفااااال !! ...
عمران: هههههههههههه .. الله يرحم اطفال العالم عيل كلهم
سالم: هنقي سنقي برنقي .... حدد موقعك .. نحن من أي فئة ؟!
مروان: فئة الوحوش الاليفة ... يالله اطلع
حصة: علي يالله
مروان: لا والله ! حلفي عاد !
سلامة: هههههههههه حلوة
حصة: هههههه هيه كل واحد يزقر حرمته ... وكل وحده تزقر ريلها ..
مروان: واللي مب معرس
آمنة: يختار له في 3 بنات مب معرسات
مروان: وع وع وع
عفرا: ماااااااالت
مروان: عرفتي عمرج
عفرا: هــــه .. تتمنى
مروان:قالوا لج مينون !
آمنة: بس خلاااااااااااااااااااااااااااااااااااااااااااص .. جملة وسحبناها وبعد مره ثانية ما بنقولها .. بس صخوا
مروان: والله اختج
هزاع: قالوا لكم بس
ونشوا كلهم سايرين صوب الفلة ... يسبحون ... ويتلبسون ... ويصلون و يتغدون ..
في بيت السفير ...
يدوه غريسه يالسه روحها فالصاله .. يت جواهر ...
جواهر: عموه
يدوه غريسه: خير
جواهر: اقولهم يحطون لج الغدا الحين ؟
يدوه غريسه: وانتوا ما بتتغدون ؟
جواهر: بو بدر الحين ما بيرد .... وبدر محّد ... وانا ما ابا
يدوه غريسه: وجيه ان شاء الله ما تبين ؟
جواهر: عموه مب مشتهية اتغدى
يدوه غريسه: حليلها الا هند كانت تتغدى ويايه ... وينها متى بترد ؟
جواهر: اليو مان شاء الله
يدوه غريسه: متى ؟
جواهر: ما ادري
يدوه غريسه: عيل عن شوه تدرين يا حرمة .. بنتج هاي .. ضناج ما تدريبها من يومين
جواهر: اختيه عذيجة وياها ... واخويه ... وانا اتصلت بها مساعه ... بس هي شدراها متى بترد ؟ متى ما هم يردون هي بترد
يدوه غريسه: مبردج انتي وولدج وريلج فوقكم
جواهر: الحين ما قلتي لي تبين الغدا والا ؟
يدوه غريسه: قولي لهم اييبون لي الغدا .. عيل ما تبين تغديني عسب اموت وتفتكون !
جواهر ( تنهّدت): ان شاء الله الحين بسير حجرتيه وبتصل المطبخ اقولهم اييبون لج الغدا لـ هني .. اسمحي لي بسير ارقد شويه ..
ونشت جواهر بسرعه سارت حجرتها ..
جواهر .. لا اله الا الله ... الله اكبر عليها من عمه ... سايرة لها واقولها ما تبين غدا ؟ وآخر شي تقول بتجتلوني !! ... خل اتصل في بدر اشوفه وينه ...
ومسكت مبايلها واتصلت في بدر ...
بدر: هلا بـ القلب
جواهر: عن الطفاسة
بدر: اتغزل في اميه حرام ؟
جواهر: وينك ؟
بدر: انا !! ... ام بدر متصله في بدر تسأله وينه
جواهر: ليش حبيبي ؟ وجيه ما اتصل ؟
بدر: ما ادري ... شوه طاري عليج اليوم
جواهر: تولهت عليك حرام ؟
بدر: ههااااي حلوة منج .. توج امس فالليل شايفتني
جواهر: واااايد عليك
بدر: وما تولهتي ع هنّود ؟
جواهر: بلى .. فديت روحها وكيف ما اتوله عليها ..
بدر: متى بترد ؟
جواهر: ما ادري ...
بدر: وع .. كيف مستحملة اللي وياها يومين
جواهر: بدر !!
بدر: خلاص خلاص .. بسكت ... خوالي وخالاتي .. وعيالهم وهلك وووو .. شكرأً على هالنسب اللي يشرف .. الحين تبين شي ؟
جواهر: صدق انا اللي ما عندي سالفة متصله بك
بدر: لا لا والله خلاص الغاليه .. بنسكت ...
جواهر: يالله انزين فمان الله
بدر: زعلتي ؟!
جواهر: لا لا ... بس بتصل في هنّوده اشوفها متى بترد
بدر: عيل خلاص .. مع السلامه ...
في بيت ام فهد ...
سعيد و بدور ساروا حق الغدا بيت اهل بدور ..
فالصاله ... سعيد وبدور يالسين ...
سعيد: انتي بتمين هني ؟
بدور: ليش تسأل ؟ شكلك الا تبا ترد
سعيد: هيه انا برد البيت ..
بدرو: جيه ان شاء الله ؟
سعيد: بسير البيت ارقد شويه ...
بدور: الحين بيأذن العصر ...
سعيد: ما باقي شي انزين وانا طالع بسير المسيد بصلي وبرد البيت
بدور: انزين رد هني وارقد فالميلس
سعيد: ما احب ارقد برع البيت ..
بدور: عيل وانته مدوّخ بتسوق
سعيد: عادي ... واخواني بيردون
بدور: اها .. قول جذه .. اخوانك بيردون .. امممم متى ؟
سعيد: ما ادري .. بس العصر او المغرب بيكونون هني
بدور: عيل سر توكّل ع الله ..
سعيد: ما بتين ؟
بدور: لا
سعيد: بسير اقول حق فريد يسوي لهم عشا بعد ..
بدور ( تنهدت) : سر .. انا بتم هني
سعيد: فمان الله ..
بدور: مع السلامه ..
وظهر سعيد ساير المسيد وعقب بيسير البيت ...
وديمة نازلة من فوق
وديمة: وين سار سعيد ؟
بدور: بيرد البيت
وديمة : آآآآآه زين .. احسن .. ( وعقت الشيلة )
بدور: ما صدقتي يعني
وديمة: لا مب جذه .. بس تدري بي ما احب الف الشيلة وانا آكل .. وبعدين شعري خل يتنفس
بدور: الله والشعر اللي يشوفج يقول مول يزحف ع الارض
وديمة: جان زين لو يخلوني اقصه
بدور: قصيه عسب فهد يقص راسج
وديمة: افففف ويا هالـ فهد .. الصراحه يقهر . خل يعرس ويتحكم في حرمته
بدور: لا تحشين في اخويه
وديمة: اووووووووونه عاد
بدور: ودّوم .. بقولج شي
وديمة: شوه ؟
بدور: هذاك اليوم ... امس سعيد حوّطني فالفلة بكبرها
وديمة: واخيييييييرا .. كلولولولولويييييي بالمبارك
بدور: الصراحه
ديكور يخبّل ..
وديمة: اونه ... وسرتي الحجر كلها بعد ؟
بدور: هيه دخلني كل الحجر .. حتى حجرته اللي كان مشاركنه فيها اخوه قبل ما ياخذني
وديمة: اونه هههاااااااااي حلوة .. انزين بس اكيد احلى حجرة حجرتج اللي انتي الحين يالسه فيها
بدور: يا ريت ... ويين يا حسرة .. فوق كان في حجرة وايد غاوية وحلوة .. سألته مالت منوه ؟ قال مات عمر وعبدالعزيز اخوه
وديمة: عمر اخوه العود ؟
بدور: هيه ..
وديمة: انزين
بدور: لكن شفت الحجرة اللي تحت .. يا ودّوم .. بس تسد النظرة فيها .. تخبّل تخبّل .. ديكور واثاث وووو كل شي راقي ومن الزيييين
وديمة: تحت ؟
بدور: هيه
وديمة: جيه ما خذتيها عيل ؟
بدور: حجرة امه وابوه
وديمة: هييييييييييييييه
بدور: بس ما عليج .. انا حطيتها هني ( واشرت ع مخها)
وديمة: شوه قصدج ؟
بدور: يعني اباها
وديمة ( فتحت عيونها ع الاخير): تخبلتي انتي مينونه ؟ تبين تقولين حق سعيد انج تاخذين حجرة امه وابوه ؟
بدور: وشوه فيها ؟
وديمة: يا غبية عندج قسم بكبره شوه تبين ؟
بدور: اقولج الحجرة هاي اكبر عن حجرتيه اللي يالسه فيها واكبر عن الصاله اللي جنها صندقه !
وديمة: شكلها وايد عوده
بدور: هيه
وديمة: بس ما اعتقد سعيد بيوافق
بدور: لا حبيبتيه .. بيوافق .. وانا اللي بقنعه
وديمة: واذا ما وافق
بدور: عاد ذيج الحزة يا حبيبتيه .. يظهرني في بيت بروحي
وديمة: بعد رديتي ع سالفة البيت ؟
بدور: وجيه انا نسيتها عسب ارد لها ؟!
وديمة: بدور انتي اللي وافقتي تسكنين ويا سعيد في بيت ابوه وويا اخوانه قبل ما ياخذج
بدور: لكن مب معناته اني اعيش هناك طول عمريه
وديمة: هو قالج يوم ظروفه تتحسن .. بيفكر في هالشي .. وهو فالاساس .. يالس يجاهد عسب يلبي لج كل شي
بدور: والله كيفه .. محد قاله ايي ياخذني . يوم انه ما يقدر ع مصاريف حرمه وحده بس .. كيف باجر بيقدر ع مصاريف عيال ..
وديمة: انتي شكلج ... مب ناويه ع خير
بدور: اقولج .. سكتي ما باقي الا اليهال بعد يدخلون في حياتي
وديمة: انتي ييتي رمستيني
بدور: ما عندي سالفه
وديمة: احسن ..
و لفت وديمة عن بدور وتمت تجلب فالقنوات .. اما بدور زخت لها مجلة من المجلات وتمت تصفحها ...
هند ... لا ويهي مستحيل .. توني انتبه ... يا ربي .. نسيت احط الكريم ... ابويه بيذبحني .. امايه بتهزبني .. بدر ما بيقصّر بعد ... بس الحين المهم مب بدر .. ابويه لو شافني جذه .. بيحرّم مره ثانية يخليني اطلع وياهم ... هو يالله اقتنع بهالطلعه .. وين وين الكريم ... هذووووووو حصلته ..
هند كانت فالحجرة .. وفي هاليومين لهت عن نفسها .. وعن نصايح امها طبعا ... وهي بشرتها من النوع الحساسه .. فاسمرت شويه ... الحين السمارة عادي! .. بتقول لهم الجو وجذه ومزرعه فلازم يعني لونها يتغير وبيرد ... لكن بدا جلدها يتقشّر ...
تمت تفرك ايدها وويها وريلها بالكريم ..
دخلت عليها غاليه ...
غاليه: شوه تسوين ؟
هند ( شوي وبتصيح): جلدي .. جلدييييي
غاليه: بلاج ؟ ( ومسكت ايدها ) ... شوه هذا ؟ ليش جذه ؟
هند: فيني حساسيه ... نسيت احط الكريم امس واليوم بعد ... وبدا جلدي البايخ يتقشّر
غاليه: اويه
هند: يا ويلي من ابويه .. يا ويلي من امايه
غاليه: بس ما اعتقد بيتم .. اكيد بيرد مثل ما كان صح
هند: هيه اكيد .. لكن يباله يومين ثلاث ... او اكثر
غاليه: بس ما عليه ..
هند: هو ما عليه .. انا عادي عندي ... لو يتم جذه كم اسبوع عادي .. لكن ابويه الحين شقول له ... بالغصب مقتنع اني ايي وياكم بعد انسى الكريم ... بيجتلني
ووصلت عفرا ...
عفرا: بسم الله .. شوه تسوّن ؟
غاليه: هند حليلها فيها حساسية وناسية تحط الكريم .. وبدا جلدها يتقشر
عفرا: اويه ... بس بيرد صح
غاليه: تقول هيه .. بس لو ابوها شافها بيعصب
هند: انقذووونييييي
عفرا: ويه بسم الله بلاج تصرخين ..
هند ( وقفت جدام المنظرة ): كيف اسير اجابل ابويه جذه .. والا امد ايدي اسلم عليها .. اوايهه ! .. اخاشمه ... لااااا
عفرا: ههههه هند تظحكييين
غاليه: حرام عليج عفااااااري
عفرا: والله شوفيها شوه تسوي ...
هند: لو تعلمين بالمصيبة التي انا فيها يا اختاه
غاليه: هههههه تعلمتي من عزوز وسالم
عفرا: ههههههه بس بس ما اقدر ..
هند: لا تدرون شوه بسوي .. اول ما بوصل .. بسير حجرتيه .. بقفل الباب .. اوني راقده ... لين باجر
غاليه: ولو يو دقوا الباب
هند: ما بفتح بقولهم باجر اني كنت مرهقه وراقده
عفرا: خيبة ... اصحاب الكهف رقود وانا ما ادري
هند: شسوي والله .. لو شافوني جذه بيطيحون فيه طيحه
غاليه: هند ما كملتي الجامعة ؟
هند: لا
عفرا: ليش ؟ مع ان يبين عليج شاطرة ما شاء الله
هند: شاطرة ع الفاضي ... خلصت الثانوية ويبت نسبة .. بس ما كملت
عفرا: ليش ؟
هند: لاني ابا اكمل في جامعة من جامعات البلاد ..
غاليه: وليش ما كملتي ؟
هند: ابويه يباني اكمل برّع البلاد ... ومصر ... ويفضّل ع قولته لو اكمل في كندا ..
عفرا: اونه ووين بتيلسين ان شاء الله في كندا ؟
هند: عمي هناك ... فـ يقولي سيري كملي دراستج هناك ويلسي عند عمج وكل اجازة بقص لج تذكرة تيينا .. سواء كنا في البلاد .. او برع ... بقص لج تذكرة تيينا البلد اللي نحن فيها
عفرا: ويييييييييييييييييه سالفة هاي ...
غاليه: وليش يعني جامعات البلاد بلاها ؟
هند: ع قولته .. جامعات البلاد شهاداتها .. اونه شهادات ثانوية عامه وما يعترف بها
عفرا: لا والله ! . حلفي عاد !
هند ( ابتسمت ): مب انا اللي اقول .. هو اللي يقول .. ولو عليه انا جان والله كملت فالبلاد ... انا ما احب اسافر وايد خلاص مليت ... كل يوم سفر وكل يوم بلاد .. تحسين انج مب مستقرة ولا مرتاحه ...
غاليه ( ابتسمت ): كملي حطي الكريم ع ويهج
هند: اوه ذكرتيني ... خل اكمّل صدق .. ( وصدت صوب المنظرة مره ثانية )... آآآآه ويهي لاااااا
عفرا: هههههههه تخبلت خلاص ...
سالم: هدوووووووووووء عندي اقتراح ...
ام هزاع: محد يبا يسمع اقتراحك
سالم: افااااااا
احمد: هههههه وييييييه قفطوه ...
سالم: عادي عادي بالرغم من ان جدتي العجوز قفطتني ولكن سأقول الاقتراح
ام هزاع: عيز حيل امك وابوك قول آمين
صالح: عمووووه قوية ..
طارق: هههههه حليلك يا صالح دوم تاكلها
ام هزاع: عيل هذا ولد مظهرينه
ام زايد: ههه حليله يتغشمر
ام هزاع: غشمرته ما نتقبلها
سالم: كنت بقول اقترااااح
سلامة: قول قول .. سمعنا
سالم: شكرا خالوه سلامة ام ربيعي
مروان: يالله قول
سالم: شرايكم نبات لين باجر
بو هزاع: وانا اقول .. شرايكم تنشون بسرعه و كل واحد يلم اغراضه وبنسير
عبدالعزيز : لااااا عمييييي
بو هزاع: ورانا درب ...
عمر: هيه نسير ..
مروان: عاد عمر ما صدق
زايد: واحد منكم في البيت لازم يرد يطمن عليه
مروان: الا قول اشتاق حق القطو .. وابو القطو
احمد: منوه القطو ومنوه ابوه ؟
مروان: سعيد وفريد ...
علي: ههههه الله ياخذ عدوك ...
شمسة: ليش يعني قطاوة ؟
مروان: ثر عيون سعيد شرا عيون عبدالعزيز والقطوة اللي داخل بعد ... فـ يمكن هم عيال فريد .. وفريد حليله مخلينه يشتغل بشكار في بيتنا
ام هزاع: مروااااانووووو يالمعرس عن الرمسة الزايدة
مروان: يعني عموه تصدقين عيل انتي فريد من يوم عمر صغير وهو في بيتنا
ام هزاع: عادي .. امين الريال ومخلص
عمران: اصلا لو تقولون بنغير فريد انا ما بوافق
عمر: ما ينغيره عسب توافق والا
راشد: شوه اونه تغيرونه ! ...
احمد: ويه ويه .. لهالردجة هالفريد تحبونه
راشد: هههههه والله فنان فريد حليله .. اشتقت له
ام هزاع: الحين سيروا بتشوفون البيت فوق تحت
ويا بو زايد ..
بو زايد: يالله نشوا
مروان: وين ثاني ؟
بو زايد: ثاني وهزاع كانوا يرتبون ويايه الاغراض .. الخضرة والفواكة
زايد: غرييييبة اول مره
علي: حليله ادبوه هالمره ..
آمنة: خل اسير عيل اخلي الاغراض فالسيارة
احمد: آمنة وين رملة ؟
آمنة: رملة راقده داخل ..
احمد: سيري وعيها يالله
طارق: سلامة لا تنسين اغراض الولد ..
سلامة: ان شاء الله
حصه: علي حطيت الاغراض فالسيارة ؟
علي: لا .. ما يبتي شي
مروان: اللي يتأخر بنودره
حصه: محد قالك اتريانا ههههههه
مروان: لا لا ما بنودرج انتي ... بنودر ريلج روحه هني
علي: اللي بيخليك تشل حرمتيه .. وانا لا
حصه: انا ما اودّر ريلي .. لازم يكون ويايه
مروان: عيل تمي هني وياه .. جابلوا بعد وركبوا ناقة من الناقات ... وسووا جولة استكشافية ... فمان الله
نقع علي من الظحك ع رمسة حصه ... والكل نش عسب يسير يزهب اغراضه .. ويتحركون رادين كل واحد لـ بيته
عيسى: ناعمه .. ناعممه .. ناعمووووووه
ناعمه: شوه شوه ؟
عيسى: احمد اتصل يقول رادين ... رتبي حجرة رملة وحجرتهم
ناعمه: لا والله !
عيسى: يعني ما تدرين ان آمنة ما تحب البشكارة تسير فوق ترتب حجرتها ...
ناعمه: اصلا الحجرة رتبة .. ورملة من يوم سارت والخدامة نظفت الحجرة .. وبعدين جيه كم يوم هم محد ؟ الا امس واليوم الحين بيردون
عيسى: والله اشتقت حق ميثانييييييي
ناعمه: فديت روحها ...
عيسى: الحين رملة بترد وبتم تهذرب فوق روسنا
ناعمه: انا بسير اقول حق الخدامة تسوي العشا من الحين عيل
عيسى: سيري الله يخليج .. خل تزهب من الحين ما فينا ع حشرة رملة
ناعمه: بترد .. بتم تقول يوعانه ويوعانه
عيسى: بتستهبل مب يوعانه
ناعمه: خل اسير اشغل المكيف مال حجرتها
عيسى: بررررد الممر ...
ناعمه: بترد بتقول حر
عيسى: وامايه الحين راقده ... وين بتخلينها تثلج ..
ناعمه: عيل بشغله عقب نص ساعه ..
عيسى: اللي يسمعنا يقول رملة الحين راده من السفر ..
ناعمه: ههههههه شوه نسوي .. مسويه لنا فلم مكسيكي هالبنيه فالبيت
ناعمه: قصدك فلم رعب
عيسى: في عينها رعب ... والله مب خوفا منها نسوي اللي تبغيه .. بس لانها حشرة ..
ناعمه: هي من ناحية حشرة .. فـ هي حشرة ..
عيسى: ناعمه ولد عمي بعد امس رمسني
ناعمه: افففف هذا شوه يبا
عيسى: انا قلت له .. اونه يمكن غيرت رايها
ناعمه: هذا يباله احمد ... مصخها خلاص قلنا ما نباه
عيسى ( بدا يستهبل): حليله شوه فيه ؟وافقي عليه
ناعمه: ما فيه شي بس دمه ثجيل شويه شويه بسسس
عيسى: ههههههههه ما يسوى عليه
ناعمه: محد قاله ... الناس يردون يقفطون هذا ابد ولا يحس
عيسى: والله انتي واخوج كييفكم
ناعمه: طبعا كيفنا ...
فالسيارة ....
سالم وعبدالعزيز وعمران وزايد ركبوا ويا عمر .. اما الباقين فـ توزعوا ...
زايد: عمران وين مقدم اوراقك الحين ؟
عمران: قدمت التقنية بس ما ابا
زايد: عيل وين تبا ؟
عمر: يبا الشرطة وانا مستحيل اخليه يسير الشرطة
عمران: عمر انزين ليش؟
سالم: اونه تبا تستوي شرطي
عبدالعزيز: كشخه صح
سالم: هيه والله فننننن
زايد: ليش ما تخليه عمر ؟
عمر: كيف يسير الشرطة
عمران: كيف يعني اسير ؟ مثل ما كل الشباب سايرين
عمر: الشرطة الدورة مالتهم 4 شهور ...
عمران:انزين وشوه فيها
زايد: عمر خله دام انه يبا ... ونسبته تساعد ...
عمران: انا تقنية ما ابا ...
عمر: التقنية احسن ..
عمران: ما اباها
زايد: انزين قدم أي جامعة ثانية
عمر: اقوله قدم الشارجه .. الامريكية اللي تبا .. انا بتكفل بمصاريفك يقولي ما ابا
عبدالعزيز: منوه قد يقولون لك الامريكية ... وما تبا
عمران: انا مب مرتاح للجامعات والكليات ولا ابا اكمل دراسة ابا الشرطة
سالم: احمد ربك حد معبرنك بعد
عمران: هههههههههه ليش ؟ متعقد الاخ محد يعبره
سالم :لا لا انا وحيد امي وابويه ... أي مكان ابا بدرس فيه
عبدالعزيز: لا تصدق عمرك ... عادي امك باجر تييب لك اخو والا اخت
سالم: حتى ولو .. بكون اكبر واحد ...
زايد: هههههه الله ع الوثوق ...
سالم: لازم لازم .. دام اني ولد صالح ..
عمر: سالم جيه ما تيي بيتنا ؟
سالم: انتوا جيه ما تييون بيت يدي
عمر: انته تعال هناك احسن ...
عبدالعزيز( يهمس في اذن سالم) : لا لا قوله انته تعال
سالم: هيه انته جيه ما تيي
عمران: هههههههههههه عبدالعزيز يلقن سالم الكلام
زايد: معروفه حركاتهم ومكشوفة ...
سالم: صلة الارحام لازم
عمر: خلاص يا بوي لا تيي بيتنا ولا شي .. ههه بس لا تقترح اقتراحات ما تستوي
في سيارة هزاع .. هند تعودت عليهم ... ففي الرده ام هزاع سارت ركبت وين ريلها ركب وويا سلامة .. اما عفرا وهند ويا هزاع ومروان ...
هزاع: اصلا بعدهم ما نزلوا الجداول
مروان: اففف مب متفيج ابدا ... اداوم
هزاع: ولا انا
عفرا: يلسوا فالبيت
مروان: هيه شراتج .. وشرات ربيعتج
هند: هـــه .. كل واحد يرمس عن عمره ... وشوه يريحه
عفرا: هيه والله ...
هزاع: عفاري
عفرا: شوه ؟
هزاع: شوفي الخضرا اللي حاطينها ورا
عفرا: شوه اشوف فيها ؟
مروان: ويييوووو خيسوا موتره ههااااااي
هزاع: هيه والله ... اول ما ارد بخلي فريد يغسله حقي
مروان: وليش ان شاء الله فريد ؟ يشتغل عند ابوك هو
هزاع: والله ولد فريد راكب ويايه
مروان: ها ها ها ما يظحك . مشكلتك والله خل سايقكم وبشاكيركم ينظفون لك الموتر
هزاع: بل ... خلاص ما نبا فريد يغسلها حقنا
مروان: ومنوه قال اصلا ان فريد بيغسلها
هند: الحين منوه هذا فريد ؟
عفرا: هذا اللي يشتغل في بيت قوم مروان
مروان: والله حليله فريد ... اشتقنا له
هند: انا بعد اشتقت حق بشكارتنا ميري
هزاع: الناس يشتاقون حق افراد مهمين وهالاثنين !!
مروان: مب ع فريد ها
هند: هيه والله حليلها ميري .. يوم برد اسمي بتستانس
مروان: جيه ما يبتيها وياج ؟
هند: وين اييبها !! ... جيه وين سايرة انا . هو لو ع ابويه قال انها تسير ويايه بس انا ما طعت
عفرا: اونه !! .. ليش
مروان: الحرس الحرس مالها ...
هند: شوه نسوي قوانين ونظم ما لها اول ولا تالي في بيتنا
مروان: اخوج جيه ما يا؟
هند: منوه بدر ؟
مروان: عندج اخو غيره ؟
هند: لا .. يا ريت لو عندي اخو غير بدر
هزاع: لا الله يخليج .. بس يكفينا بدر
مروان: بعد اذا واحد ثاني شرات بدر .. بنتحر انا
عفرا: ايه انتوا !!
عفرا رمست ع اساس ان مب جنه اخوها وولد خالها حطوا ع اخو هند وهند يالسه بينهم ؟!
هند: انا ادري انكم ما تتوالفون وياه ولا هو يتوالف وياكم ... وهو صح انه خقاق .. بس والله طيب ..
مروان: وييييين الطيبة ما ادل طريج اخوج !
هزاع: مروان بس بس
هند: خله يرمس .. عادي ( وابتسمت) ... ما قال شي .. ولا غلط ع بدر ... بدر هو اللي مسوي في عمره جذه .. بس لو سمحت شوي شوي .. ومب تغلط فالرمسة ... ثرني موجوده ههههه
مروان :اميييييه زغت
عفرا: غيروا غيروا السالفه ...
هزاع: انا بعد اقول احسن
كل واحد فيهم راد بيته ... عقب ما استمتعوا بالرحلة ... اللي في ناس اول مره يحضرون مثل هالتجمعات ... ويرمسون هالاشخاص ... وياخذون ويعطون وياهم ...
**********
29-06-09, 11:10 AM
جديد مواضيع قسم القصص المكتمله
العرض العادي
