الفصل السابع
((الجزء الثاني))
الساعه صارت 8 صباحاً وقف السياره بمواقف المستشفى ونزل
دخل المستشفى وراح الرسبشن ..
سلمان وهو ممسك بطاولة الرسبشن وباين عليه الاستعجال: وين غرفة الدكتور فهد
موظف الرسبشن :الدور الاول بعد المصعد يسار بيجيك نافذ مكتوب عليه عيادات الاطفال ادخل عليه عياده رقم ((1)) عيادته
سلمان :مشكور ياخوي
الموظف :العفو
راح للمصعد ضغط رقم واحد وبعد ماطلع من المصعد راح يسار وشاف العيادات ووصل عند عياده رقم واحد طق الباب
طلعت له السستر:yas(نعم)
سلمان: kan you cool d.fahad(ممكن تنادين دكتور فهد)
السسترlez witang (ارجوك انتظر)
سلمان:tel hm salman (قولي له سلمان)
فجأه علا صوت دكتور فهد وهو يتقدم للباب:هلا والله
سلمان: هلا بك زود
فهد: دقايق اجيب لك العذر لأن عندي حاله
سلمان : اوكي
راح فهد مكتبه اخذ ورقة العذر ورجع لسلمان اعطاها له
سلمان وهو ياخذها: مشكور
فهد يتبسم :العفو
رجع فهد لحالته بعد ماراح سلمان واول ماخلص الحاله وكتب له الدوا المناسب..
الرجال يوقف:مشكور دكتور
فهد:العفو
فتح ملف بيده وصار يكتب بالوقت اللي راحت فيه السستر تنادي المريض اللي بعده ..
وهو يكتب سمع صوت نسائي:السلام عليكم
فهد بدون لايرفع راسه: وعليكم السلام استريحي
الحرمه: كيفك فهد
فهد رفع وجهه يناظر الحرمه المتنقبه وحس بأحساس غريب وهو يناظر فيها كان مستغرب وماقدر حتى يعلق
الحرمه: انا قلت يمكن تشابه اسماء يوم شفت اسم الدكتور بس يوم شفتك سبحان الله ماغيرتك الايام للحين مثل ماانت
فهد يناظر بالملف بعد ماحطته السستر وبسرعه يقرا الاسم: شهد سعد ..رفع راسه يناظر فيها بتساؤل: شذا؟
شذا بهدوء:ايه
بعد ماقالت ايه حس الدنيا تدور فيه حس انه بردان رغم اعتدال الجو حس بتشنج ..ضربات قلبه صارت بتسارع حس بكل اعراض الجلطه جاته حاول يتمالك نفسه وبكل هدوء: شفيها البنوته
شذا :ماادري لها كم يوم ماتاكل زين وعندها سعله قويه وعلى طول تبكي
فهد: كم صار عمرها
شذا:9 سنوات
فهد وهو يناظر الطفله: ها شهد وين يوجعك
شهد بتعب: حلقي وبطني
فهد:طيب ياحلوه تعالي على السرير
راح معها عند السرير رفعها للسرير بحب: ياللا ياشاطره افتحي فمك
شهد تفتح فمها بحماس..كشف على بطنها وصدرها
فهد نزلها وراح للمغسله يغسل يده بالصابون: لا لا مافينا شي شوية دلع بس
بعد ماخلص جلس على مكتبه ومسك قلمه وبثقه واتزان: احتقان بالحلق وجفاف من قل الاكل انا بكتب لها على ادويه وان شاء الله تصير احسن وراح اعطيها موعد نرجع نشوفها فيه
شذا : ان شاء الله
رفع عينه عن الورقه اللي يكتب فيها وهو يتبسم للطفله: هالادويه تخلين البابا يجيبها لك عشان تصيرين احسن ..كمل جملته ورجع يكمل كتابه
شذا بهدوء: ابوها متوفي
الخبر كان مثل الصاعقه عليه وقف عن الكتابه وحس يده انشلت وصار يكلم نفسه: لاتصير غبي انت دكتور وهذا وقت العمل عطها الوصفه بسرعه وخلاص .. تمالك اعصابه وخلص الوصفه بسرعه ومدها لشذا:الله يخليها لك ان شاء الله
شذا وهي تاخذ الوصفه: الله يسلمك
بعد ماطلعت نادا السستر: لاتدخلين الحاله اللي بعدها عطيني كم دقيقه
السستر:اوكي
راح للمغسله فتح المويه البارده وحط راسه بلل شعره ورفع راسه وصار يحركه بقوه يمين ويسار والمويه تطير انا مو مراهق عشان يهزني هالكلام وش دخلني انا مات او عايش مرر اصابعه بشعره بقوه :معقوله الصدفه جابتها لي لازم اطرد هالافكار من راسي
تسند على الجدار فصخ نظارته وغمض عينه بقوه: ياربي بعد كل هالسنين
:
:
:
الشرقيه سنة 1414 للهجره يوم الثلاثاء الساعه 12 ظهراً ..
مدرسة البنات الابتدائيه بالتحديد
عند باب المدرسه واقفين ينتظرون السواق ..
حنان بلسانها الطويل: وانتي كل يوم تركبين بسواقنا
لجين: بابا قال اركب معكم
حنان: هذا مو ابوك هذا جدنا
لجين بأصرار:لا بابا
حنان: ابوك مات هذا جدنا
لجين والدموع تجمعت بعينها: انتي اسكتي هذا بابا
حنان رفعت راسها لفوق تناظر بالسما ومتكتفه :كيفك
بعد ماجا السواق ووصل لجين للبيت
دخلت البيت وهي تبكي بصوت عالي مثل أي طفله
جاتها جدتها: شفيك يابنيتي
لجين مقهوره وتناشق: حنان تقول بابا مو بابا وهو جدنا
ام سالم: ماعليك منها
لجين تصايح: لاهي قالت بابا مات
ام سالم مرتبكه وموعارفه وش ترد عليها: ابو ابوك يعني ابوك
لجين تبكي اكثر: يعني كلامها صحيح بابا مات زين وين ماما
ام سالم بحزن: راحت مع ابوك
لجين: ليه يروحون ويتركوني بدون ماما او بابا كل البنات عندهم
ام سالم وهي تمسح على راسها: راحو للي ارحم مني ومنك
:
:
:
الشرقيه الزمن الحالي ..الساعه 10 صباحاً
سمعت صوت الجوال وراحت بسرعه غرفتها اخذت الجوال من سريرها:الووو
احمد:هلا والله
لجين: هلا بك
احمد:اشوفك مبسوطه عشانك مارحتي هاه
لجين: أي والله مالي مزاج دراسه صراحه
احمد: اف منك انا ماقدرت استأذن اليوم المدير مستقعد
لجين:احسن
احمد:لازم اشوف حل بس مااقدر استأذن كل يوم ماودي يفصلوني تعرفين وراي زواج
لجين:.............
احمد يضحك:سكتت يعني ينقال لها استحت
لجين بسرعه:لا استحيت ولاشي
احمد بسخريه:ايه احسب صدقتي نفسك عروس
لجين حست برجفه بقلبها من كلامه بس حاولت تكون طبيعيه: لاماعليك ماصدقت
احمد:نونه
لجين :هلا
احمد: حددنا موعد مع عمك
لجين مستغربه:امدى؟
احمد:ايه ابوي كلمه قبل نص ساعه وحددنا الخميس وتراه فهم ان الموضوع خطبه
لجين: اكيد فهم الخطبه لوحده من بناته
احمد :خليه يفهم مثل مايبي يوم الخميس تتوضح الامور
:
:
:
الرياض الساعه 12 ظهراً
جامعة الملك سعود بالتحديد..
واقفين قبل البوابه يلبسون عباياتهم
نوف :وينها بنت خالك
العنود ببرود: الحين تجي
نوف: وش سويتي على ولد الجيران
العنود بيأس :ولاشي ماغير اراقبه
نوف تضحك:ياشيخه ماعندك سالفه تصرفي
العنود تفكر:اتصرف شسوي
نوف وهي تاخذ نفس :أي ولد الجيران انا عجبني ولد خالك صراحه عليه رزه والا ريحة العطر حقه ياويلي بس انا لو عندي ولد خال نفسه مااشوف احد غيره
العنود: انتي شفتي ياسر عشان تحكين كذا
نوف : ياشيخه مااعتقد انه ازين من ولد خالك ولد خالك حكااااااااااايه
العنود تصفقها: هي بنت ماتستحين تغازلين ولد خالي قدامي
نوف وهي تتخصر: اعتبري ولد الجيرن ولد خالي هذا انتي تغازلينه قدامي
العنود تضحك: ياربي هالبنت غبيه شوفي لي حل بس مع ولد جيرانا تعبت بس اراقب
نوف وهي تناظر بنوره اللي جايه من بعيد وتناظر العنود بسرعه: شوفي هذي بنت خالك جايه خلي السواق ينزلها قبلي وانا بالطريق اعلمك خطه جهنميه
العنود تتبسم مبسوطه:خلاص صار
نوره بعد ماوصلت لهم: ضحكوني معاكم
العنود:نضحك بالسياره اكيد السواق جا ياللا
مشو للسياره وهم يسولفون اول ماوصلو عند السياره فتحت العنود الباب اللي ورى الراكب وهي تضحك على كلام نوره اما نوف راحت من الجهه الثانيه ونوره كانت ورى العنود..
سلمان وهو يناظر العنود بالمرايا بعد ماركبت: ماشاء الله كل يوم تركبون مع السواق وانتم تضحكون
نوره وهي مدخله راسها من الباب ومستغربه:سلووووم؟
سلمان: تعالي قدام
نوره مستانسه:طيب
بعد ماركبو السياره وتحرك سلمان قالها بثقه: ايوه محد جاوبني على سؤالي
نوره بأرتباك: أي سؤال
سلمان بنبره تحمل شوية عصبيه: كل يوم تركبون كذا وانتم تضحكون
نوره: لا بس اليوم
سلمان وهو يلف الدركسون يسار ويرفع حاجبه: اها احسب بعد نسيتم ان السواق رجال
نوف وهي تناظر العنود وحابسه ابتسامتها وبكل خبث وبصوت شبه مسموع: هاه اقول خطتي والا ماعاد ينفع
العنود وهي تقرصها بيدها وتهمس لها: انطمي
سلمان سمع كلامهم :وبينهم وبين نفسه ياربي وش يخططون عليه اكيد العنود تبي ترد لي حركة المزرعه ياااااااااااويلي لكن دامها فكرة تردها لي يعني تحبني تفكر فيني ..لاتتوهم ياولد البنت قالت لك تكرهك
نوره تشده من كم الثوب:سلوم سلوم
سلمان يصحى من شروده :هاه قصدي نعم
نوره :ممكن اعرف وين رايح؟
سلمان مو مستوعب:وين رايح؟
نوره بقهر: انـــــــا اسألك
سلمان ببرود وبكل غباء: بوديكم يعني وين بروح
نوره تهز راسها: وانت تدل بيت البنت عشان تنطلق كذا
سلمان توه يحس انه مايدل وانه متجه مايدري وين وسرحان ويفكر وكأنه لحاله بالسياره ..التفت لنوره يتبسم ورجع يناظر الشارع: صح ماادل البيت وين يصير
نوف والعنود يحاولون يكتمون ضحكتهم ..
نوره تضحك: سلامتك ياخوي وش جاك
سلمان مرتبك:لابس كان مشغول بالي بشغله..وبسرعه: ايوه وين يصير بيت البنت
نوره تحاول قد ماتقدر توصف لأخوها بيت البنت وبعد ماوصلو البنت لبيتها..ونزلت..تحرك سلمان والتفت لأخته:اسمعي نوره بوصلك انتي قبل عشاني بنزل العنود وبعطي السياره لسواقهم وانا بيجي واحد من اخوياي ياخذني من هناك ماله داعي اخذك معي وسالفه والرجال بيجيني
نوره بهدوء: طيب
وصل اخته البيت وبعد مانزلت وتحرك من عند البيت ..
سلمان بعد تردد: عنود
العنود ساكته وممسكه بيدينها مرتبكه تحس انه تعمد ينزل اخته قبل عشان يصير معاها لحاله
سلمان بصوت عالي: عنود اكلمك
العنود تفكر اتكلم او اسكت ياربي وش يبي مني اللي مسوي حركه نذله نفس حركته قبل يسوي أي شي لابس هذا ولد عمي ..
صوته العالي وهو يصارخ معصب طلعها من سلسلة افكارها:عنود والله تسفهيني ماارجعك البيت بلف بك الرياض كلها
العنود خايفه: وش تبي
سلمان : ماتعرفين تسامحين
العنود: سامحتك خلاص
سلمان بعد مااخذ نفس وحاول يكون هادي:خوفتك؟
العنود بكل هدوء وباين على صوتها الخوف: لا ماخفت
سلمان وقف على جنب ولف بكل جسمه لها سند يدينه على الكرسيين وكان يناظر فيها وباين الاسف بوجهه: عنود والله انا اسف ماكان قصدي ماادري وشلون تصرفت هالتصرف الغبي انتي من جدك تتوقعين يعني بسوي هالحركه وبشوفك طايحه وبنبسط والله تمنيت الموت ولمت نفسي الف مره
العنود زاد خوفها وحست بقلبها بيطلع من صدرها من قوة ضرباته قالتها بصوت اقرب للهمس: خلاص ماصار شي
صوت انفاسها العاليه السريعه والرجفه اللي بصوتها خلته يحس انه مسوي جريمه ببنت عمه اعتدل بجلسته وحرك السياره: لاتخافين مني ماقصدت شي غير اني اعتذر واشرح موقفي انتي بنت عمي انا اخاف عليك من الهوا لاتخافين امانه ثقي كل الثقه انك تهميني
العنود:..........
حس بكتمه مايدري وشلون يتصرف معاها مره متوهق اعتذر لها طيب وبعدين وده يصرخ لها أنا أحبك بس لا يمكن تصده كبريائه مايسمح ..جاه صوت قوي من داخله: رجعنا للكبرياء ياسلمان
رد على نفسه وهو يحاول يسكت هالاحساس اللي ذابحه: لا لا وشو اقول لها احبك اخاف تقولي انت مو مراهق يوم انك تحب استح على وجهك
نفس الصوت جا من داخله: يعني الحب بس للمراهقين
سلمان يحاول يركز بالطريق : ماراح اقول لها اخاف من صدها
وصلو البيت وقف السياره بجنب البيت وطفاها ..
نزلت العنود بسرعه وقبل تدخل البيت ناداها سلمان بسرعه: عنووووووود
العنود وقفت: نعم
سلمان وهو يدخل جسمه للسياره ويجيب كيس ويطلع قفل السياره وحط المفتاح داخل الكيس:انتي لادخلتي طلعي المفتاح ..ومد الكيس لها :خذي
العنود تاخذ الكيس من الطرف وهي تناظره: كيس وشو هذا
سلمان: ماادري وحده منكم ناسيته الصبح يمكن خويتك
العنود مستغربه:نوف مااذكر كان معها شي
سلمان : ماادري انتي تأكدي منه يمكن لأمك او شي المهم انه كان بالسياره
العنود: طيب طيب ..وراحت بسرعه لداخل البيت
سلمان وهو يطلع جواله من مخباته: ولا قالت مع السلام تفضل داخل عن الشمس ابد ولاهميتها
دق على خويه بسرعه وبعد ماجاه الرد قالها بطفش: وينك ماقلت لك اوقف انتظرني مابي اوقف بالشمس
تركي: خلاص دقيقه وانا عندك قربت اوصل
سلمان: طيب انتظرك
:
:
بالبيت وقبل لاتوصل لباب الصاله الرئيسي وعند الـ3 درجات اللي يفصلونها عن الباب وقفت وفتحت الكيس تبي تطلع المفتاح وتفاجأت باللي بالكيس علبه حمرا فخمه مره واصله لأخر الكيس من كبر حجمها جلسة على الدرجه وطلعت العلبه من الكيس كان ملمسها جلد وباين عليها الفخامه العلبه كانت ملفوفه بشكل زائد بشريطه فضيه عليها دوائر حمر ومكتوب على العلبه بالزاويه اليمين Patchi وحتى الشريطه كان مكتوب عليها Patchi بسرعه ناظرت الكيس الفضي وبرضو لقت عليه علامة Patchiانقهرت من نفسها وشلون مالاحظة انه كيس باتشي وهي تاخذه كل هذا من الارتباك رجعت تناظر بالعلبه اللي بحظنها وشافت بطاقه مستطيله عليها رسمة دبدوب مدخله بعنايه تحت الشريطه ناظرت بالبطاقه وبعدها حست بالحررر دخلت العلبه بالكيس ورقت الـ3 درجات ودخلت البيت ..
اول مادخلت شافت امها بوجهها كانت متجهه للدرج قالتها وهي تتبسم:هلا بالغاليه
ام مشعل :هلا ببنيتي الحلوه
العنود بعد ماقفلت الباب وهي تمد المفتاح لأمها:خذي مفتاح السياره
ام مشعل وهي تاخذ المفتاح وشلون جبتيه السياره يسوقها ولد خالك
العنود: ايه ادري هو وقف السياره ونزل قفلها وعطاني المفتاح
ام مشعل بسرعه: وهو؟
العنود: قال بيجي خويه ياخذه
ام مشعل مقهوره: ياربي منك يالعنود ليه ماقلتي له يدخل
العنود مستغربه : يدخل ليه لاابوي ولامشعل هنا
ام مشعل: ايه ادري بس مو حلوه يوقف بالحر وهو عند بيتنا
العنود بلا مبالاة: لاحر ولاشي الجو حلو
ام مشعل تضحك: أي حلو على بالك امريكا الله يذكرك بالخير يامشعل ولاكلمتنا
العنود بسرعه: لاكلمني البارح وقال انه توه واصل وتعبان وبينام تلاقينه نايم فرق التوقيت تعرفين
ام مشعل بسرعه : وليه مادق علي او على ابوك
العنود: يقول دق بس مارد بابا عليه
ام مشعل وهي تناظر الكيس اللي بيد العنود: اها ..ماشاء الله مين جايب لك باتشي
العنود وهي تناظر الكيس وتناظر امها وتحاول تخفي ارتباكها : وحده صديقتي ..وبسرعه: بروح ابدل ملابسي
ام مشعل: حتى انا بروح اتروش عشان ننزل نتغدا بعدين ابوك مو جاي على الغدا اليوم
العنود: طيب
راحت غرفتها بسرعه واول مادخلت قفلت الباب علقت عبايتها وجلست على السرير طلعت العلبه وحطتها على جنب واخذت البطاقه وفتحتها وبدت تقراها..
كان مكتوب فيها
:
You have gone and made me such a fool,
I cry, watching the days
Won't you believe in my song?
You have come into my life and made me whole.
In my eyes I see no one else but you.
and beside me is where I want you to be.
'Cause, my love, there's something I want you to know
you're the love of my life, you're my lady.
Here I stand alone
With this weight upon my heart
But if I could girl I'd make you see
That I'm sorry, and that I need you here with me
My lady in red (I love you)
الترجمه,,
بعد رحيلك اصبحت كالحمقى
ابكي وانا اراقب الايام و هي تمضي
الن تصدقي كلماتي؟
انتِ دخلتي حياتي و جعلتي مني شخصاً اخر
عيناي لا ترى احداً سواكِ
واحتاج اليكِ بقربي
لأنني حبيبتي اريدك ان تعلمي
انك حب حياتي..انك سيدتي
هنا اجلس لوحدي
مع هذا الثقل على قلبي
ولكن اذا استطعت سوف أجعلك ترين
بأني أسف و أني أريدك هنا بجانبي
سيدتي يا ذات الرداء الاحمر ( احبك )
:
خطه بالانقلش كان مره روعه وحست ان سلمان مره رومنسي و ذوق
مافهمت محتوى الرساله زين هي اخذت دورة انقلش قبل بس ماكانت الدوره اللي هي يعني مااستفادة منها مره وتعرف كم كلمه ..فهمت انه يقول انا اسف وتكلم عن حياته وعن قلبه وعن عينه الزبده انه كان يسولف عن نفسه ومادرت انها فاهمه كل الرساله غلط وان سلمان بهالرساله كان يشرح لها حبه بس اللي لفتتها الجمله الاخيره حاولت تترجمها وش يعني أنا احب اللون الاحمر وبعد تفكير طيب انا وش دخلني ان كان يحب اللون الاحمر حاولت مره ثانيه تترجمها وبعد تفكير lady يعني سيدات فكرت شوي لا لا ماحط حرف الـ sيعني ماهو جمع وبعد محاوله قويه اهااااااااا حط قبلها my يعني قصده
سيدتي ابتسمت بفرح ياعيني عليك يالعنود اها يعني سيدتي انا احب اللون الاحمر ..فكرت بسخافة الجمله :انا وش دخلني وبعد تفكير اكثر:اهـــــــــــــــــا يبي يعلمني انه عشان كذا جاب لي علبة شوكلاته حمرا انا لازم اشوف لي طريقه عشان اشكره على طريقته الراقيه بالاعتذار,,(راحت عليك ياسلمان مادريت ان العنود مابراسها الا الدجه)
:
:
الرياض الساعه 1:30 ظهراً وبأحد افخم المنازل بالرياض
فتح الكراج بالريموت كنترول ودخل بسيارته لوسط البيت ونزل وترك السياره بدون لايطفيها ونادا الحارس..
بندر بصوت عالي: ياعصماااان تعال وقف السياره زين وطفيها وغطيها
عصمان وهو جاي بسرعه: حاظر بندر
بندر وهو منقهر: وش اللي بندر اشتغل عندك انا
عصمان: اسف استاذ
بندر:اف والله مشكله لاعطاكم الواحد وجه
مشى مسافه بسيطه وفتح الباب الرئيسي الكبير ودخل الصاله اللي كأنها قاعة حفلات ..
صاح بصوت عالي: يــــــــــــــــــــــاأهل البيت
وبعد ماسكت دقيقه وبكل تذمر: ياربي بهالبيت محد يشوف الثاني
كرر المحاوله مره ثانيه وبصوت اعلى: يـــــــــــــــــــــــــاأهل البيت
جود بعد ماطلعت من المطبخ البعيد نوعاً ما: وش تبي تصارخ
بندر وهو يتقدم للمطبخ: ابي احد يرد علي
جود: تعال انا وجنا بالمطبخ
بندر بعد مادخل المطبخ: وش تسوون بالمطبخ
جنا وهي تدهن التوست بجبنه وبكل دلع: ابد والله نسوي لنا توست الغدا اللي مسويه الطباخ ماعجبني
بندر : الا من دلعكم الزايد
جنا: من حقنا ولايق علينا الدلع دامنا بنات متعب
بندر وهو يسوي مالت: مالت عليكم
جود وجنا بنفس الوقت: مالت عليك انت
بندر:الزبده
جود وجنا يضحكون بنفس الوقت وبعدها تتكلم جود: والله قلت مهوب جاي لله العاده مانشوف وجهه الا بالشهر مره
بندر :اقول انطمي بس المهم مافيكم وحده تدرس بجامعة الملك سعود
جود وهي تتبسم: ياغبي انا بسنه ثالثه ثانوي باقي ماخلصت
بندر معصب : الغبيه انتي وش دراني شايفتني ولي امرك بعدين لاتتعودينها لا ا ذبحك
جود وهي تتخصر: جررررررررب واعلم بابا واشوف مين ينذبح بالاخير
بندر وهو مقهور: طسي بس طسي
جنا تقاطعهم وبكل هدوء: انا ادرس فيها ليه؟
بندر بحماس: احلفي
جنا مستغربه: والله بس علمني ليه
بندر وهو يمشي: خلاص خلاص بعدين اعلمك
جنا وجود يناظرون بعض وتتكلم جنا: جن هذا؟
جود : شكله ..وتأشر على التوست :كملي التوست بس اخوك ماعنده سالفه
راح للدرج وهو يرقى الدرج الفخم دق عليها وبعد ماجاه صوتها..
بندر بكل رومنسيه: هلا حبي هلا حياتي
نوره بدلع: هلا قلبي
بندر: وحشتيني يابعد روحي
نوره وهي مستحيه: انت بعد وحشتني
بندر: يابعد قلبي امووووووووت انا باللي تستحي
نوره بدلع : يوه بندر لاتفشلني
بندر: يالبيه بس نوره متى بشوفك
نوره تفكر:امممممممم يمكن قريب
بندر: متى قريب انا تعبت ابي اشوفك
نوره: والله بخليك تشوفني
بندر: نشوف
:
:
:
الساعه 2 الظهر بعد ماتغدت راحت الصاله عند التلفزيون ودقت رقم نوف..
نوف بحماس: هلا والله
العنود: هلا بك ..بنت مو قادره اصبر لبكره علميني وش خطتك
نوف تضحك: ذابحك ولد الجيران هذا مدري وش مسويلك
العنود : اقول اخلصي علميني
نوف بكل دهائها: اسمعي
العنود بكل تركيز: معك
نوف: بكره خلي السواق يجيني قبلك وانا بخليه يروح لنوره على اساس انك باقي ماخلصتي
العنود تفكر: طيب وبعدين
نوف: بهالوقت انتي اطلعي مثل كل يوم وسوي مصدومه انك ماشفتيه وسوي فيها محتاسه والباب مقفول عليك ومفتاح ماعندك المهم انك تشدين انتباهه
العنود بسرعه: لا لا نوف اخاف
نوف : اقول اسمعي الكلام ياكذا ياتجلسين بس تراقبين
العنود بتردد : لانوف وش يبي يقول عني
نوف وهي مقهوره: يابنت لاترفعين ضغطي هو وش دراه على اساس ان السالفه جد
العنود بعد تفكير وتردد كبير: لا لا نوف اخاف اسوي هالحركات
نوف : الولد عاجبك
العنود: ايه
نوف بأصرار: خلاص سويها لاتصيرين جبانه او انسي سالفة ولد الجيران للأبد
العنود بعد تفكير: لا وش انسى خلاص بسويها يعني اللي يحبون وش عندهم زود عني
نوف بحماس: ايوه تعجبيني
العنود: طيب ياللا باي بكلم خالي
نوف : باي
قفلت منها ودقت على فهد..
العنود: هلا والله بخالي الغالي هلا بهالصوت الحلو
فهد يضحك: لاتتمصلحين
العنود بدلع: شدعوه خالي
فهد بحماس : افا عليك انا كلي لك كم عنوده عندي امري بس
العنود بفرحه: يابعد عمري ياخالي ايه هذا فهودي اللي اعرفه
فهد يسوي معصب: بنت وجع وش اللي فهودي قولي خالي فهد دكتور فهد
العنود بدلع: وجع يوجعني؟
فهد فطس: شف البنت نست كل الموضوع مالفتتها غير هالكلمه
العنود : جاوب بس وجع يوجعني؟
فهد :لا يوجع عدوك الله يعين اللي يبي ياخذك يالدلوعه
العنود: اساساً امه داعية له
فهد بثقه: ايوه ايوه اكيد
العنود: المهم خالو
فهد: ياعيون خالو
العنود مستحيه: احم لاانا كذا استحي
فهد يضحك: شكلك مطوله عشان تقولين وش تبين وانا وراي شغل مو فاضيلك
العنود متحطمه: افا توك تقول امري
فهد : ايه امري بس على السريع هههههههههههههه
العنود تضحك: طيب فيه وحده خويتي زعلتني بشغله وارسلت لي شوكلاته وكرت كتبت عليه انا اسفه وزي كذا وانا ابي ارد عليها
فهد مستغرب ومافهم وش المطلوب منه: طيب ردي عليها مين ماسكك
العنود بكل براءه: لاابي ارد عليها بالانقلش لانها كاتبه بالانقلش وانت مايرضيك انها تتفلسف علي
فهد مسوي مقتنع: ايه طبعاً مايرضيني وش تبين تكتبين لها
العنود: ابي اكتب أي شي يعبر عن شكري وزي كذا
فهد:اها طيب الحين ارسل لك رساله على جوالك
العنود: طيب انتظرك
:
:
الساعه 2:30 الظهر..
سلمان كان جالس بالصاله ومعاه ريم وعهود ويسولفون معاه وكل تعليقاته كانت ايه وصحيح ابد ماكان معاهم كان متوتر مررره ينتظر ردة فعلها تعليقها أي شي يبي يشوف تبادله الحب او لا منتظر منها بس كلمه عشان يفاتح ابوه بالموضوع ويقول له ابي اتزوج بنت عمتي اماله مره كبيره ومتوقع انها ترسل له رساله تشبه رسالته لا اكيد احلى ..
ريم بصوت عالي: سلمان وين وصلت
سلمان واللي اخذ باله منها: هاه وش تبين
ريم مقهوره: اسولف من ساعه والحين تقول وش تبين
سلمان ببرود: شردت شوي والتفت للدرج يناظر: الا وين نوره
ريم طنشته وهي ميته قهر انها كانت تسولف مع نفسها
عهود ترد عليه: جالسه بغرفتها ماادري وش تسوي
سلمان وهو يهز راسه بأيه: اها ..وجاه صوت المسج اللي ميزه بسعاده اخذ جواله بسرعه وفتح الرساله متحمس وغصب عنه بانت الفرحه بوجهه فتح المسج وبعد ماقراه بدت ملامح الفرحه تتبدل شوي شوي وتتحول لأحباط كبير ..الرساله كانت من العنود
:
Thank alot for the nice gift
شكراً جزيلاً للهديه الرائعه
:
قفل الرساله وحط يده على جبينه ومسح وجهه ووقف: بروح غرفتي
عهود: خير سلمان
سلمان وباين عليه القهر: لابس بنام تعبان
وراح بسرعه بدون لايسمع منها رد
عهود تناظر ريم: شفيه اخوك
ريم بلامبالاة : وش دراني عنه
اول مادخل غرفته قفل الباب وهو معصب رمى جواله على السرير وبصوت مسموع: معقوله ماهزتها رسالتي ولاكلماتي وشو هذي جماد او ماتقبلت حبي لها والا للحين حاقده علي ..
ضرب التسريحه بقوه: انا رجعت مراهق علشانها وهي ولاهمها
فسخ التي شرت بعد ماحس بالحر ورمى جسمه بقوه بالسرير على ظهره وحط يدينه فوق راسه وغمض بسرعه يبي يجبر عينه تنام ويبي يحاول يتناسى برود العنود
:
:
الساعه 3 الظهر ببيت ابو فارس وبعد ماخلصو غدا
بالصاله جالس يغني ..دلوعتي كل الحلا فيها احترت انا مدري شسميها ..راشد الماجد دلوعتي..كان يغنيها وهو يعزف على العود ويضرب بجزمته وانتم بكرامه على الأرض بحمااااااس
وحور بكل دلع تصفق وتتمايل وهي واقفه قباله ..
بعد ماخلص اغنيته جلسة بجنبه: انا دلوعتك صح
فارس يناظرها: لا انتي سبب الصداع براسي
حور بدلع: مالت فروس
فارس يضحك ويجلسها بحظنه : شوفي انتي دلوعتي وحبيبتي وكل شي بس ياليت تخففين سوالف
حور بعد مانزلت من حظنه ووقفت قباله وبكل تذمر:لامابي ..وتحط اصبعها الصغير بين اذنها وعينها : كيفي
فارس يوقف ويسوي مقهور : تعالي يافصعونه
حور تركض بسرعه وهي تضحك: انا مو فعثونه
فارس يوقف ويجلس على الارض وهو فاطس: ترجع تقول فعثونه اسمها فصعونه
حور توقف وتلف وجهها عنه: زعلانه
فارس يقرب منها: يافديت الزعلانين لاكله ولازعلك
حور بعد تفكير وببراءة الاطفال: ماتبيني ازعل
فارس واللي عرف وراها شي: ايوه؟
حور: خذني للسوبر ماركت
فارس يضحك: بس كذا غالي والطلب رخيص بس بشرط
حور متحلطمه :وشو بعد
فارس يضحك على اسلوبها:ماتفتحين حلقك بكلمه راسي مصدع
حور : موافقه
:
:
:
الساعه 4 مساءً بتوقيت السعوديه 7 صباحاً بتوقيت امريكا
صحى من النوم اول مافتح عينه ناظر بساعة يده اللي ضبطها على توقيت امريكا قبل ينام شافها الساعه 7 ولاحظ النور اللي يخترق الستاره البيضا الشفافه الاقل من عاديه بعد الغطى عن جسمه وقام من مكانه متوجه للباب واول مامسك المقبض يبي يفتح الباب تذكر ان هذا ماهو باب الحمام (وانتم بكرامه) وانه مو في البيت وماهو لحاله..
ناظر بنفسه كان لابس قميص البيجامه والبوكسر بس ..متوعد بالبيت ينام كذا راح بسرعه عند شنطته اخذ سروال البيجامه ولبسه وطلع ..
شافها جالسه بالصاله تشوف تلفزيون ..
رافعه رجلينها بشكل ضرب على الطاوله ولابسه شورت مررررررره قصير لنص فخذها ماقدر يمنع عينه وهو يشوف بياضها ..
نجلاء كانت ماخذه بالها منه بس مسويه مندمجه بالتلفزيون
مشعل وهو يلف وجهه للجهه الثانيه ويتحمحم
نجلاء تسوي فيها تو تشوفه وتنزل رجلينها وتوقف بسرعه:مشعل صحيت
مشعل وهو باقي مدور وجهه: ايه
نجلاء بعد ماقربت منه: صباح الخير
مشعل وهو يحس فيها قريبه منه ريحة عطرها القوي بخشمه وصوت انفاسها بأ ذنه ..بينه وبين نفسه :استغفر الله وبصوت عالي ياللا البسي خل نروح نفطر
نجلاء بتساؤل:ويييييين؟
مشعل :مدري المهم البسي
نجلاء:طيب صار
راحت غرفتها لبست بنطلون اسود وبدي احمر فوقه جاكيت اسود خفيف وجزمه وانتم بكرامه حمرا..حطت لها عطر وطلعت
وقفت بالصاله وبعدها بدقيقه طلع مشعل لابس جينز اسود وبلوزه بيضه اكمامها طويله وجزمه وانتم بكرامه بيضا ..
ناظرت فيه جسمه مره حلو وشعره الكثير زاده وسامه
مشعل تبسم لها الى ان بانت غمازاته: شفيك تناظريني كذا
نجلاء تناظره وبكل هدوء: احبك
مشعل تلعثم وتوهق: حتى انا احبك ..مشينا؟
نجلاء:مشينا
مشعل ناظر بشعرها اللي رافعته ذيل حصان: ماراح تحطين شي على راسك
نجلاء بسرعه: طبعاً لامشعل حنا بأمريكا
مشعل بعدم اقتناع: طيب ياللا
بعد ماطلعو ناظرت فيه نجلاء: وين نروح
مشعل يضحك: اقرب سوبر ماركت
نجلاء واللي ماعجبها: امااااااا
مشعل: معليه الحين ناخذ اشياء من السوبر ماركت نفطر فيها والغدا نروح مطعم بس لازم اكلم المرشد اشوف وين ينصحني اروح تعرفين مابي اكل شي ماهو شرعي
نجلاء منقهره وتحاول تخفي قهرها: طيب
:
:
الشرقيه الساعه 8 مساءً
احمد يحاول يقنعها: يعني وش تغير
لجين: قلت لك مابي اخاف
احمد بقهر: ياغبيه باقي ماجا يوم الخميس
لجين: حتى ولو خلاص يوم الخميس بتكلمونه تخيل الحين انت جاي عند البيت وصدفه هو تذكرني وجاويشوفك مايمديه ينسى شكلك من هنا ليوم الخميس
احمد :ياربي منك نونه عليك تفكير
لجين: عاد هذا تفكيري خلاص مابي يعني مابي
احمد: خلاص بلاها نقضيها تلفونات الى ان يعدي هالموضوع على خير وانتي طبعاً مبسوطه
لجين مستغربه: ليه
احمد: سااااااااحبه على الدوره
لجين تضحك: ايه احلى شي
:
:
:
الرياض يوم الثلاثاء الساعه 7 صباحاً..
طلعت من البيت بعد ماقالت للسواق يروح لنوف لأنها ماخلصت تأكدت ان الباب مقفول ومسكت جوالها حطته عند ا ذنها ووقفت مقابل بيت الجيران تمثل انها تكلم احد وتنتظر طلعت ولد الجيران عشان تبدا تعلي صوتها
.
.
.
نهاية الفصل السابع
اتمنى يعجبكم
14-03-10, 06:39 PM
جديد مواضيع قسم القصص المكتمله
العرض العادي
