كاتب الموضوع :
♫ معزوفة حنين ♫
المنتدى :
القصص المكتمله
الرياض يوم الأثنين الساعه 7 مساءً
حامل الاكياس بيده ويناظرها: ها نجول باقي بتاخذين اغراض
نجلاء وهي تناظره: لاحبيبي لاحقين نجي بكره اليوم تعبت
مشعل يتبسم: ان شاء الله حبيبتي
نجلاء: وش رايك نروح نشرب شي
مشعل: اللي تامرين فيه بس انا اقول نروح نتعشى وش رايك
نجلاء بدلع: براحتك حبيبي
مشعل مبسوط : اممممممم خلاص دامه براحتي نروح نتعشى مشينا
:
:
:
ومرت الايام بأبطالنا سريعه وكأنها عقرب الثواني سرريع يتسابق في عجل لينهي دورته سريعاً بدقيقه واحده..
البنات ( نوف,,العنود,,نوره) قبلوهم بالجامعه بعد مااحتاجت نوف لدفه بسيطه عشان القبول ..
نوره كانت كل يوم تكلم بندر بالساعات ووعدته انها مع بداية الدراسه راح تخليه يشوفها ..
نوف روتين حياتها القاسي اخوانها اللي كاتمين انفاسها هذا كله كان يزيد شواقها للدراسه..
اما العنود شافت لها دوام ثاني قبل الدراسه وهو مراقبة ولد الجيران خخخخخخخخخخخخخخخخ وحبت هالانسان اكثر من ورى مراقبتها له وصارت تعرف متى يشغل سيارته لما يطلع وكيف ينطلق بسيارته وتأكدت انه يشتغل لأنه كل يوم يطلع من بيته الساعه 7:10 الصبح ويوقف يشرب شي الاكيد انه شاهي هههههه ويرجع البيت حول الساعه 4 العصر بس ماعرفت وين يروح من الساعه 10:30 الى الساعه 1 بعد نص الليل بس اللي تعرفه انها حفظت تحركاته وان الدريشه صارت صديقتها الوفيه وحبها له تمكن منها ولازم تشوف طريقه تقربها منه وهذا قرارها الاكيد
لجين زاد تعلقها بأحمد هالانسان الحنون عليها واللي يخاف عليها لقت فيه اللي عمرها مالقته بأنسان ورغم انها مستغربه عطفه الزايد عليها الا انها مو مهتمه المهم وجوده بحياتها لانها ماراح تلقى احن منه عليها سجلة بدورة لغه انجليزيه مدتها شهر وطبعاً روحاتها وجياتها مع احمد ماانتهت وكان مدلعها على الاخررررر
مشعل صار متيم بنجلاء كل يوم يحبها اكثر كل مايناظر ملامحها الحلوه وضحكتها الساحره يحس انه هايم فيها ونجلاء ماقصرت استغلت طلعاتهم مع بعض المستمره يوم تلمس يده بالغلط ويوم تدفه يعني انها تمزح غير ريحة العطر والكحل اللي راسم عيونها بأتقان كلها عوامل جذبة مشعل لها اكثر واكثر وحمسته لموعد السفر اكثر
سلمان ماراح اقول لكم كيف محترق من الداخل وكل يوم يرسل مسجات للعنود منها( انا اسف,,وصدقيني ماكان قصدي ,,افهميني يابنت عمتي ,,حنا بيننا دم والمفروض نكون مثل الاخوان,,) كان يحاول برسايله يجبرها ترد عليه لكن بدون فايده
فهد بين المستشفى والبكا على الاطلال عايش مع الحزن الدفين والحب اللي حرمه يعيش حياته طبيعي النسيان اللي عجز يعلمه لنفسه
فارس واغانيه وشقاوة حور وحبه للعود والفن وكرهه للعام الدراسي اللي على ابوابه
:
:
:
الرياض يوم السبت 6/ شعبان /1426للهجره
بداية العام الدراسي..
الساعه صارت 6:10صباحاً
بعد ماضبط شماغه اخذ عطره وصار يرش بكل مكان تحت شماغه وبثوبه وعند رقبته ناظر نفسه بالمرايا بتمعن ..وفجأه سمع صوت طق على الباب
سلمان :ايوه
نوره تفتح الباب وهي متكشخه على الاخر والابتسامه شاقه وجهها: صباح النور لأحلى اخو بالعالم
سلمان يناظرها بأستغراب ويناظر ساعته الفضيه: بتروحين الحين؟
نوره : لاباقي
سلمان يضحك: يعني كل هذا حماس
نوره تضحك: تقدر تقول
سلمان : غريبه اذكرك ماكنتي متحمسه ولاتبين تدرسين
نوره وهي تفكر: غيرت رايي وتحمست بعدين بروح مع بنت عمتي عجبني الموضوع
سلمان بسرعه: مع العنود؟
نوره: لااختها
سلمان: يعني هي بتجي تاخذك
نوره تهز راسها ايه: بتمر تاخذ صديقتها بعدين بتجي تاخذني
سلمان بعد تفكير: اها طيب بعدي عن وجهي وراي دوام
نوره تبعد وهي تضحك: الله معاك الشرهه ع اللي تبي تتصبح بوجهك
سلمان يضحك وهو يمشي: واللي ماوده يتصبح بوجهك وش يسوي
نوره : مااااااااالت عليك
:
:
وبجزء اخر من الرياض وبالفيلا الراقيه ..
كانت لابسه مريولها الصغير وشنطتها الورديه وتناقز بفرح: ياسلام ياسلام ياسلام
فارس ينزل الدرج بملل: كل هذي وناسه
حور بدلع الاطفال: ايه ايه ياللا ابي اروح المدرسه
فارس بعد ماوصل عندها: بالاول قولي خلاص
حور بكل براءه: خلاث
فارس يضحك: يابنت قولي خلاص بيطردونك من اول يوم
حور: فروس مالك شغل
فارس يناظرها بعيون حاده: حور وش مالك شغل هذي
حور وهي زعلانه وباقي شوي وتبكي وبصوت عالي: مامي شوفي فروس يزعلني
ام فارس جات عندهم: فارس ليه تزعلها
فارس مقهور: انا ماقلت لها شي هي تقولي مالك شغل
ام فارس: انت تحط عقلك بعقل طفله
حور متخبيه ورى امها بدلع: ايه طفله
فارس بقهر: هذي طفله هذي اعقل مني
حور تضحك وتمسكه من يده وتشده: ياللا فروس لانتأخر على المدرسه
فارس يضحك: ياللا وبسامحك عشان حماسك هذا
باس جبين امه واخذ اخته وطلع ..
وهم بالطريق لمدرسة حور.. الحماس كان ماخذها وماهي راضيه تسكت
حور : فارس كيف شكل الأبله وكيف الطالبات
فارس:...............
حور بحماس: تتوقع المدرسه كبيره والاصغيره
فارس ببرود: مدري
حور: انا مره احب الدراسه ولما اكبر بصير دكتوره نفس عمو فهد و...
فارس يقاطعها: حور واللي يرحم امك اسكتي صدعتي براسي ان ماسكتي والله لخلي السواق بكره يوديك المدرسه
حور تكتف يدينها وهي مبرطمه: بسكت خلاث
فارس يضحك: خلاص يابنت اسمها خلاص
حور تسوي زعلانه وتسكت
فارس: ابرك اسكتي راسي صار وش كبره من هذرتك
:
:
طلعت من البيت بعد ماصارت الساعه 7:7 ..
اول ماركبت السياره شغل السواق السياره
العنود بسرعه :وقف لاتمشي
السواق: اوكي
كانت تراقب ولد الجيران طلع من البيت شغل سيارته ونزل ووقف وراها يشرب الشاهي مثل كل يوم ..السياره كانت مضلله وهي واثقه انه مايشوفها ..بعد ماخلص الكاسه اللي بيده دخل البيت بسرعه وطلع ركب سيارته ومشى
العنود: الحين تقدر تمشي
السواق تحرك وهو يتحلطم مو عارف سبب وقفتهم اللي مالها داعي
اول ماوصلو لنوف طلعت بسرعه ومن اول بوري..
نوف: شفيك تأخرتي
العنود تضحك: كل يوم بجيك هالوقت
نوف بأستغراب: ليه
العنود وهي منحرجه: اشوف ولد جيرانا الى ان يروح شغله
نوف فاطسه: ياليل ولد الجيران
العنود منقهره :انطمي بس ياويلي عليه ماشفت بحياتي مثله
نوف :والله بجد شوقتيني اشوفه
العنود : قلت لك قبل انقلعي مافيه
نوف تضحك وتراقب الشارع بفرح حاسه نفسها مثل عصفور طلع من قفص
وصلو عند نوره وبرضو طلعت بسرعه وماتأخرت اول ماركبت :كيفكم بنات
نوف والعنود: تمام وانتي
نوره وهي تضحك: تمام بس مدري شفيني متحمسه
العنود: بيني وبينك حتى انا متحمسه
نوف تضحك عليهم: اجل انا وش اقول
اول ماوصلو الجامعه وقفو بعد المدخل الرئيسي بمسافه يفصخون عباياتهم
نوره وهي تناظر العنود كانت لابسه قميص احمر وتنوره جينز وحاطه براسها شريطه حمرا وتاركه شعرها بحريه راسمه عيونها بالكحله ومكثره المسكره وحاطه شدو خفيف وقلوس احمر : عنودي طالعه حلوه مره
عنود وهي تبتسم لدرجه بانت غمازاتها : عيونك الاحلى
نوف وهي تناظر نوره وتاضحك : نوره انا وانتي متفقات
نوره وهي تناظر نوف اللي لابسه قميص ابيض وتنوره جينز مثلها وتضحك: بجد متفقات
دخلو للمبنى الرئيسي زحمة البنات وكل وحده كاشخه من جهه شكل المبنى واللبس البعيد تماماً عن لبس المدارس شد البنات للدراسه الجامعيه ونوره حبت البدايه رغم انها كانت ماتفكر بالدراسه
:
:
بأحد المدراس الثانويه للأولاد بالرياض بحي السفارات بالتحديد
رقى الدرج وهو ماسك كتابين بيده ..
دخل على صف 2/3 ..اول مادخل وبصوت عالي وبكل ثقه وثبات: صباح الخير
الطلاب بصوت واحد : صباح النور
سلمان بعد ماتسند على طاولة الاستاذ ناظر بالطلاب بأبتسامه واثقه: انا طبعاً راح اكون المشرف على الصف وبعطيكم مادة اللغه الانجليزيه احب نتعامل بالانجليزيه على طول حتى بالاستأذان بس اليوم استثنائي واضح هالشي
الطلاب بصوت عالي: واضح
ياسر وهو يناظرهم: طبعاً فيه منكم اعرفهم لاني سبق ودرستهم بالمرحله السابقه وفيه جديدين علي اممممممم اشر على يساره للطاوله الاولى على الجدار اعرف محمد طالب مجتهد وناظر لأخر الصف واشر بيده واعرف سعد طالب مشاكس نوعاً ما
الطلاب يضحكون بصوت واحد
سلمان وهو مبتسم ويناظر بالصف اشر للي قدامه بالوسط: اعرف مشاري طالب متميز بحظوره وناظر اقصى اليمين اعرف فارس تربطني فيه صلة قرابه
الطلاب كلهم التفتو لـفارس يناظرون فيه
سلمان يضرب على الطاوله بقوه : ناظروني هنا مو شي غريب تجمعني صلة قرابه بأحد الطلاب .. عدل وقفته واخذ الكتب هذا كل شي لليوم وان شاء الله نبتدي الجد بعدين.. ومشى طالع من الصف: السلام عليكم
الطلاب بصوت واحد: وعليكم السلام
عبد الله يلف لفارس: جد يقرب لك
فارس: ايه وليه مستغرب
عبد الله : مدري وش يقربلك
فارس: ولد عمي
عبد الله:لاجد بلامزوح
فارس: والله ولد عمي
عبد الله: من طريقته وهو يقول تربطني فيه صلة قرابه قلت الحين بتقول جدتك اخت جدته بالرضاع
فارس يضحك: لاعاد
عبد الله: اسمح لي ولد عمك مغرور
فارس بسرعه: لا بالعكس والله انه حبوب يمكن هذا اسلوبه بالتدريس
عبد الله: أي اسلوب يارجال لو هذا ولد عمي تبريت منه
فارس: بالعكس انا نمت معاه 3 ليالي بغرفه وحده وكنا سوالف وضحك ووناسه
عبد الله بعد تفكير: مااتخيل انام معه ليله وحده وشلون 3 ليالي
فارس : لانك ماشفته برا المدرسه
عبد الله : يمكن بس انا حاقد عليه صراحه السنه اللي راحت كل حصه له يوقفني بداية الحصه
فارس ميت ضحك: اكيد مسوي شي ماراح يوقفك بس كذا
عبد الله يضحك: يارجال مابي اتكلم عليه دامه ولد عمك
:
:
:
الشرقيه الساعه صارت 8 الصبح ..
طلعت من البيت وركبت سيارة احمد وهي متكاسله : احمد
احمد يتبسم: هلا والله بنونه امري
لجين: مايامر عليك ظالم بس مالي مزاج اروح
احمد : كان ودي اخدمك بس غصب تروحين مو كيفك
لجين بتذمر:اف ماحب الانقلش
احمد: تحبينه ان شاء الله ولايجي براسك بسكت عن سالفة الدراسه لازم بشوف حل لعمك تكملين دراسه يعني تكملين
لجين: عادي مو مهتمه ماحب الدراسه
احمد: انا مهتم وابيك تكملين
لجين وهي تناظر بالشارع: انت ماعندك دوام ؟
احمد: الا عشان كذا متوهق مدري شلون اوديك واجيبك
لجين بفرح: خلاص مو لازم اروح
احمد: قلت لك غصب
لجين بقهر: اف ياربي
احمد يضحك: ياكسوله
لجين بسرعه: مو كسوله بس ماحب الدراسه
احمد: تحبينها ان شاء الله ياللا انزلي وصلنا
لجين:اف بسرعه وصلنا
احمد : 10:30 بجي اخذك
لجين: اووووووكي
فتحت الباب ونزلت بتكاسل اكثر وكانت تمشي ببرود وماعندها شوية حماس واحمد يراقبها ويضحك على شكلها
:
:
الرياض والساعه تشير للـ9 صباحاً
ابو مشعل يمشي لمكتبه وهو معصب: هذا تسيب واهمال وانا مااحب هالتقاعص بأداء العمل ..وهز الورقه اللي بيده بقوه: مثل هالخطأ لايمكن اتغاضى عنه
سيف يلحقه بسرعه وهو خايف: صدقني طال عمرك مايتكرر هالخطأ
ابو مشعل يفتح باب مكتبه بقوه: لايمكن اتسامح مع هالنوع من الاخطاء
سيف يدخل وراه المكتب: طال عمرك مو انا المسؤول الوحيد عن هالخطأ
ابو مشعل يجلس على كرسيه وبكل عصبيه: سيف انت اخر واحد تراجع الورق ومااحبك ترمي اغلاطك على الغير
سيف بأسف: والله طال عمرك مايتكرر الغلط اوعدك
ابو مشعل يتنهد: طيب ياسيف بس والله ثم والله أي غلطه ثانيه ماتلوم الا نفسك
سيف: ان شاء الله طال عمرك
ابو مشعل انسان صارم بالعمل وماوصل لثروته بسهوله وممكن يتهاون بأي شي الا العمل ومعارفه كثير وكلهم واصلين ومناصبهم عاليه
:
:
:
الشرقيه والساعه تشير للـ10:30 صباحاً
وصل ولقاها واقفه بالشارع ..اول ماوقفت السياره فتحت الباب وركبت بسرعه..
لجين بسرعه: امشي احمد بسرعه
احمد حرك السياره بسرعه: وش صاير؟
لجين: احمد الله يخليك مابي اجي هنا طفش وملل وماحب الانقلش وحده خبله تتفلسف فوق راسي
احمد فطس ضحك: نونه هذي وحده فاهمه وبتوصل لك اللغه بطريقه حلوه
لجين بتذمر: طريقه خايسه احمد مابي اجي هنا
احمد: اسف ودي اخدمك بعدين خاطري اسمعك تحكين انقلش
لجين: احمد والله ادرس ارحم من دورة الانقلش الغبيه
احمد متبسم على الاخر: بكره تتعودين
لجين تكتف يدينها: ياربي مابي اجي
احمد مد يده فتح غطاها وناظر فيها: احد قالك قبل ان فيك براءة الاطفال
لجين ارتبكت مره وغطت وجهها بسرعه: وخر احمد مابي اجي هنا
احمد: الحين خلينا من هالسالفه ليه خليتيني اتحرك بسرعه
لجين : فيه وحده اعرفها تاخذ دوره هنا ومابيها تشوفني اركب معك
احمد بهدوء: اها قولي لها عمي او خالي هي وش دراها
لجين : لامابي
احمد: طيب نونه انا اليوم مستأذن وش رايك نتغدا سوا؟
لجين: لابروح البيت بغدي جدتي
احمد بحماس : وش بتغديها
لجين وهي تضحك: معكرونه ماعرف غيرها ههههههههه مدري ليه متعب نفسك وشاري رز
احمد يسوي متحطم : افا
لجين تضحك: وجدتي ماتقدر تدخل المطبخ زين تشيل عمرها المسكينه
احمد بعد تفكيرك: بجي اتغدا معكم
لجين بسرعه:تحلم
احمد: والله اني بدخل غصب عنك
لجين بأرتباك: لا وجدتي وش اقول لها
احمد يفكر: قولي لها موظف الجمعيه يبي يسألك كم سؤال وانا بعد خاطري اشوفها بجلس معها الى ان تخلص المعكرونه حقتك وسوي فيها حنيتي علي بصحن
لجين وهي مستحيه من احمد تستحي يشوف البيت: لااحمد مابي
احمد بكل برود: اسف انا حلفت
لجين: احمد قول شي يدخل العقل مايصير
احمد: مالي شغل يصير والا مايصير بجي معك وش المعكرونه اللي بتسوينها
لجين : معكرونه بالباشميل
احمد بحماس: ياسلاااااااااااااااام اقدر هالاكله جاي جاي الله لايعوقني بشر
لجين بعد ماحلف: امري لله بس لاتستغرب من البيت
احمد بهدوء: ماراح استغرب واضح على البيت انه قديم من برا
اول ماوصلو فتحت الباب وهي نازله: احمد بروح اقول لجدتي وانت وقف سيارتك بعيد عن البيت شوي لايشوفونها الجيران شكلها نهائي مو شكل سيارة موظف بالجمعيه
احمد يضحك :ان شاء الله
دخلت البيت وراحت لجدتها : جده بيجي موظف الجمعيه عشان يشوف البيت ويسألك كم سؤال
الجده بتعب: ان شاء الله
جابت لها لجين عبايتها ولبستها وراحت فتحت الباب لأحمد وهي منحرجه ليه ماتدري ..
دخل البيت كان باب الشارع يفصله عن باب الصاله ممر صغير مره دخل مع باب الصاله وكان فيه ممر 2x2 تقريباً قباله الصاله اللي جالسه فيها الجده يساره درج قديم نوعاً ما وبجنبه باب وبعد الزاويه باب ثاني وعلى يمين الممر باب برضو وبعد الزاويه باب ثاني هذا البيت كله راح للصاله وقرب من الجده باس جبينها بحب: كيفك يمه
ام سالم: بخير ياوليدي تحب الكعبه ان شاء الله
احمد يناظرها بحب: وياك يمه ان شاء الله
ام سالم بحزن: لاوين ياوليدي بموت وانا ماشفت بيت الله
احمد : لابعيد الشر عنك ان شاء الله تروحين
ناظر فيها وجهها الشاحب الكرسي المدولب ولف للجين يناظرها بنظره كأنه يقول ليه ماقلتي جدتك تعبانه لهالدرجه
لجين نزلت راسها بسرعه
احمد بعد تفكير: ممكن اختي تتركيني مع جدتك شوي
لجين تهز راسه لا: ليه يعني
احمد بحزم: شوفي شغلك وانا بسألها كم سؤال
لجين : طيب ..راحت المطبخ وهو اللي يصير بعد الزاويه يسار دخلت وقفلت الباب وفصخت عبايتها عشان تسوي المعكرونه..البيت قديم وماكان فيه عوازل وكانت تسمع صوت احمد وجدتها وخايفه من اسألته
احمد: يمه مين يصرف عليكم
ام سالم: ولدي عم لجين بس مايجينا الا نادر ومرات ينسانا وانا اتصل عليه اذكره بأمه وبنت اخوه اليتيمه
احمد يفكر: اها..طيب كيف عايشين
ام سالم: والله ماادري كيف هالمسكينه تجيب فلوس يمكن تروح عند عمها تهاوشه بس عايشين الحمد الله واهل الخير مايقصرون
احمد: طيب وش ناقصكم يمه
ام سالم تناظر المكان: الحمد لله على كل حال شوفة عينك
احمد : ممكن اشوف البيت
ام سالم : ايه عادي بس مافيني حيل اوريك البيت
احمد يوقف: انا بحرك الكرسي انتي بس دليني
لجين بالمطبخ لبست عبايتها بسرعه وفتحت الباب: لا ليه تشوف البيت
احمد كان حرك الكرسي ووصلو للغرفه بالزاويه يمين: احمد اختي لازم اشوف البيت
لجين تروح عند غرفه بجنب المطبخ يسار الدرج وتقفلها بالمفتاح: بس غرفتي لا
احمد راح عندها بسرعه وسحب المفتاح: بشوفها
لجين تناظره وهي فاتحه عينها: مابي
احمد بصوت واطي نوعاً ما وهو عاض شفته: روحي كملي معكرونتك مالك دخل
لجين راحت المطبخ وهي مقهوره
شاف المجلس بالاول اللي كان عباره عن جلسه عربيه وضح عليها انها قديمه وطاوله خشب صغيره بعدها غرفة الجده سرير نفرين ودولاب ملابس صغير وطاولتين وبرضو كان واضح عليها قديمه بعدها راح لغرفة لجين سرير خشب عادي جداً وتسريحه صغيره طاوله صغيره يسار السرير شنطتين كبار واكياس ماليه المكان ودبادب بكل مكان قفل الباب وهو متأزم باقي باب واحد اللي هو باب المطبخ وماراح يكون احسن حال رجع للصاله اللي عباره عن كنب ناعم جداً وقديم وطاوله تحمل تلفزيون ورسيفر
جلس مع الجده يسولف عن حالهم وعن لجين ومتى ماتو اهلها وكيف وخوالها وينهم عنها ومن هالكلام وبعد حوالي الساعه طلعت لجين وبيدها صحن مستطيل وعليه ورق قصدير
لجين تمد الصحن: تفضل قلت مايصير تشم الريحه وماتاكل
احمد ماسك ضحكته من كلامها وياخذ الصحن: مشكوره انا استأذن
لجين : الله معك
بعد ماطلع احمد التفتت لجدتها: جده مايصير تقولين له كل شي
ام سالم مستغربه: يابنيتي هذا من الجمعيه لازم يعرف كل شي
لجين تفكر وبينها وبين نفسها: صح من الجمعيه ضحكت وبعدها حركت جدتها : ياللا ناكل يااحلى ام سالم بالدنيا
قربتها لطاولت الطعام الخشب الصغيره اللي بالمطبخ وكانت عليها صينية المعكرونه وصحنين بكل صحن قطعة معكرونه وهم ياكلون سمعت صوت مسج اخذت جوالها اللي حاطته على الطاوله بجنب صحنها وفتحت المسج
:
رررررررررررررررررررررررررررررررهيبه تسلم يدك
:
بعد ماقرتها ضحكت وكملت اكلها
:
:
:
الرياض بيت العم سلطان والساعه تشير للـ 1:30 ظهراً
دخلت البيت وهي مبتسمه بفرح..
ام سلمان تكلمها من المطبخ وبصوت عالي: نوره بدلي ملابسك وانزلي بسرعه اخوك له ساعه حايسني بالمطبخ جوعان
نوره تضحك: طول عمره مفجوع
سلمان وهو يفتح القدر وياخذ بطاطا من الكبسه ويصارخ: المفجوعه انتي وانقلعي بدلي ملابسك
ام سلمان تضرب يده: اصبر قلت لك
سلمان وهو يسوي مسكين: جوووووووووووعان ياناس مااقدر اتحمل الجوع اتمرن حديد انا ..الجوع مايناسبني
نوره من باب المطبخ: عشان لايموت هالمفجوع علينا بتغدا وبعدين ببدل ملابسي
ساعدت امها بتجهيز الطاوله وبعد ماجلسو..
نوره: اليوم كانت العنود روعه صراحه انا اللي كاشخه صرت عاديه بجنبها لابسه احمر وطالع عليها رهيب
عهود: ايه عنوده حلوه
ريم بقهر: مدري وش عاجبكم بهالعنود
سلمان يناظر ريم: وراك تقولينها بحقد
ريم بدون لاتناظره: لاحقد ولاشي ولاهمتني
سلمان انبسط من طاري العنود وبنفس الوقت تذكر كرهها له وناظر بنوره وهو يحس انها الوحيده اللي راح تساعده بس لازم يختار الوقت المناسب
:
:
بيت ابو مشعل والساعه صارت 10 مساءً
جالسه مع ابوها وامها بالصاله يسولفون ويضحكون وبعد حول 10 دقايق دخل مشعل: السلام عليكم
الكل بصوت واحد: وعليكم السلام
جا مشعل وجلس بجنب العنود: ها عنودتي وربي اني بشتاق لك
العنود بحزن: من جد مشعل رحلتك بكره مااتخيل الرياض بدونك
مشعل: لاتحزنيني تكفين انا بعد ماادري كيف بفارق الرياض
ام مشعل وعيونها بدت تدمع: وش لك بهالسفر
ابو مشعل بسرعه: لاتحبطون الولد خلوه يشوف مستقبله عشان كذا مابي اخذكم معاي المطار
العنود بسرعه: لاخلاص اتوب بودعه بكل روح رياضيه بس بروح معكم
ابو مشعل يناظر ام مشعل بنص عين
ام مشعل: حتى انا بروح رياضيه
ابو مشعل يضحك:طيب نشوف
العنود ناظرت الساعه شافتها 10:30 وقفت بسرعه دقيقه وبجي راحت تركض للدرج وامها وابوها واخوها يناظرون بعض مستغربين..رقت الدرج بسرعه وراحت غرفتها وفتحت الستاره ومالقت سيارة ولد الجيران
العنود بصوت مسموع: افففففففففففف مالحقت عليه
نزلت الستاره ورجعت للصاله ..
مشعل يناظر فيها بعد ماجلسة : وين رحتي مستعجله
العنود بأرتباك: رحت رحت الحمام(وانتم بكرامه)
الكل بنفس الوقت: ههههههههههههههههههههههههههههههههههههههه
مشعل وهو فاطس: كل هالاستعجال عشان حمام
العنودتصفقه: اسكت اترك التريقه المفروض تفارقنا بريحه طيبه
مشعل فطس: من وين تجيبين هالكلام
العنود برطمت: بسامحك بس عشانك بكره مسافر
ام مشعل وابو مشعل كانو يناظرون عيالهم بحب ويضحكون وكل واحد يخبي عبرته بصدره
:
:
:
الشرقيه والساعه تشير للـ12 نصف الليل ..
تكلمه مثل العاده ومنسدحه على فراشها
احمد: ودي افهم ليه ماقلتي لي ان جدتك على كرسي
لجين تحاول تفهمه: ياأحمد جدتي تمشي مو ماتمشي يعني تروح الحمام وانت بكرامه وزي كذا لحالها بس انها ماتقدر طول الوقت تمشي رجلها ماتساعدها
احمد: طيب ليه ماقلتي لي البيت محتاج ترميم
لجين بتساؤل:ولو قلت لك بترممه؟
احمد: ليه لا
لجين تضحك: لا هالبيت ماينفع فيه ترميم
احمد: تدرين وش ودي
لجين: وش؟
احمد: ودي اروح معك البحرين نشوف فيلم
لجين بفرح: واااااااو وناسه
احمد: عندك جواز؟
لجين :طبعاً لا
احمد: طيب قولي لعمك يطلع لك جواز
لجين تضحك: اوراق للجامعه مو راضي يعطيني تبيه يطلع لي جواز خاف ربك بس وحتى لو طلع لي جواز وهذا لو صارت معجزه ..ماراح يطلع لي تصريح لو اموت يعني مااستفدنا شي
احمد:ياليل عمك ذا شفيه عليك
لجين:مدري
احمد: بس تصدقين احس خوالك لو يدرون يسوون لك أي شي
لجين: بالكم مره اللي شفتهم فيها عطوني مبلغ وقدره بس لما اشوفهم وغير كذا مايدرون عني كل واحد مشغول ببيته وعياله
احمد: حتى لو مشغولين انتي بنت اختهم المفروض ماينسونك
لجين:ماادري
:
:
:
الرياض الساعه صارت 1بعد نصف الليل
واقفه عند الدريشه تراقب بيت الجيران..
وصل وهو يسوق بسرعه وقف سيارته ونزل منها وضرب الباب بقوووووووووه مره ودخل البيت بسرعه وكان واضح عليه انه معصب
نزلت الستاره وراحت سريرها عشان تنام بكره لازم تلحق على اخوها بتروح معاهم المطار انسدحت على فراشها وصارت تفكر وش معقوله يخليه يعصب كذا معقوله يحب وحده ومتزاعل معاها طردت هالافكار من راسها وغمضت عينها عشان تنام..
:
الساعه صارت 7 والمنبه يرررررررررن وهي ماصحت عليه..كملتها نومه ..ولما صارت الساعه 8 جات امها تصحيها..
ام مشعل تهزها: عنوده حبيبتي قومي نبي نروح مع اخوك المطار
العنود تفز بسرعه : ليه الساعه صارت كم
ام مشعل: بسم الله عليك الساعه 8
العنود بقهر: يااااااااااااربي
ام مشعل: شفيك
العنود: الحين بأخركم
ام مشعل :قومي بسرعه غسلي وصلي والبسي على السريع ننتظرك تحت
العنود: طيب
قامت بسرعه غسلت وفرشة اسنانها بسرعه غصب عنها ..توضت وصلت ولبست بنطلون جينز وتي شرت بني كيوت مره ولبست عبايتها ونزلت بسرعه طلعت مع الباب الخارجي وكانو ينتظرونها بسيارة ابوها..
مشعل بكرسي الراكب وامها ورى ركبت بسرعه:ادري تأخرت
مشعل بعد ماتحرك ابوه بالسياره: ادري تبين الطياره تفوتني
العنود ببراءه: لاوالله بس راحت علي نومه
مشعل بخبث: صدقتك
:
ابو مشعل خلص اجرائات مشعل كلها بنفسه اما نجلاء اخذت مبلغ وقدره من مشعل وقالت له انا بخلص اموري واتفقت معاه انهم يلتقون بالطائره ..
:
بعد ماوصلو المطار وخلص اجرائاته صار لازم يجتاز حاجز التفتيش ناظر ابوه وباس جبينه وناظر امه وباس جبينها لف للعنود: ابوس جبينك انتي بعد؟
ام مشعل وهي تحاول تكتم عبرتها: الله يردك سالم ياوليدي
مشعل يتبسم ويقرب من اخته ويبوس جبينها : اشوفك على خير عنوده
العنود انفجرت بالصياح وصارت تناشق : لــ ــ اــــ تــرووح
مشعل يضمها : ياغبيه لاتبكين بنزل الرياض بالاجازات وهذا مستقبل
العنود وهي تناشق:مااتخيل يمر يوم مااشوفك ياخوي
مشعل تو يبي يتكلم تكلم ابوه: خلي اخوك يسافر يشوف مستقبله
ابو مشعل خانقته العبره بس كان مسوي نفسه عادي مايبي يوقف بطريق ولده ويدري ان الدراسه بالخارج مستقبل
مشعل ياخذ شنطته الصغيره : فمان الله
ام مشعل وابو مشعل: فمان الكريم
اما العنود ماتكلمت كانت تناشق
توه مشى خطوتين وسمع صوت عالي:مشعل مششششششششششششعل وقف
مشعل وقف مكانه يناظر والا هذا منيف جاي يركض
اول ماوصل عنده حط يدينه بركبته وصار ينافخ بعدين رفع نفسه:جيت اودعك
مشعل بفرح: فيك الخير ياخوي
منيف سمع صوت المناشف والتفت للصوت
مشعل: ماعليك هذي اختي مره شايفه فرقتي صعبه
منيف: والله حتى انا شايفها صعبه الله المعين بس
مشعل: ماعليك راجع لكم بالشهاده
منيف: امين يارب
ضم صديقه بحراره وراح لنقطة التفتيش مرر شنطته ومر هو وبعد مااخذ الشنطه التفت لهم يودعهم لاخر مره ركب الطياره وراح للدرجه الاولى كانت الدرجه الاولى عباره عن 4 كراسي كبيره كان هو بأول كرسي على اليمين ونجلاء بأول كرسي على اليسار اقنع الرجال بعد ماقاله ان هذي قريبته انهم يبدلون المقاعد وجلس بجنب نجلاء
مشعل بفرح: كيفك حبي
نجلاء مبسوطه: فرحانه مره
مشعل: دوم الفرح يارب
بعد ما حيا كابتن الطائره الركاب طلب منهم ربط حزام الامان واقلعت الطائره
مشعل كان مبسوط مره وماعرف ان هالطائره راح تقوده للمجهول اللي يمكن يحمل كل عذابه والمه
:
:
:
الشرقيه الساعه 10:30 صباحاً
لجين مع احمد بالسياره: ياربي احمد احس انك تعذبني
احمد يضحك:ليه
لجين: غصب اتعلم انقلش
احمد:طيب كيف كان يومك ؟
لجين بقهر: نفس امس
احمد يضحك: طيب وراك منقهره؟
لجين: ابد سلامتك وانت كل يوم تبي تستأذن
احمد:لاطبعاً لازم اشوف حل
لجين : احسن حل اترك الانقليزيه لان مالي فيها
بعد ماخلصت جملتها لاحظت انهم وصلو البيت مسكت باب السياره: ياللا مع السلامه
احمد بسرعه:اصبري بقول لك شي
لجين مستغربه:وشو
احمد:انا لقيت حل لكل شي
لجين:وش الحل؟
احمد بعد تفكير:تتزوجيني لجين؟.
لجين حست دورة الدم عندها انعكست وكل شراينها انسدت والمخ ماعاد يقوم بوظايفه وقلبها صار ينبض بسرعة 200/ث وكل وظايفها الحيويه اختل توازنها
احمد يحرك يده عند عينها:جاوبيني
لجين بأستغراب وهي تأشر على نفسها:تتزوجني انـــــــــــا؟
احمد ببرود: بس زواج صوري عشان اصير ولي امرك وترتاحين من سلطة عمك واقدر اسويلك أي شي بعيد عن عيون الناس
لجين حست بتبلد بالمشاعر وبرود غير طبيعي وبكل هدوء: اها
احمد:انتي انزلي الحين مابي جوابك فكري بالموضوع بجديه وعقلانيه ورديلي خبر وكمل بضحك: وياللا انقلعي وراي دوام
لجين تتصنع الضحكه :اوووووووووكي
نزلت من السياره ودخلت البيت وراحت غرفتها بسرعه رمت نفسها على السرير ودخلت بنوبة بكاء حاده حست برعشه بكل جسمها وبحرقه بقلبها نــــــــــــــــــــــار تغلي بصدرها وبصوت مسموع وهي تضرب المخده: ليــــــــــــــــــــــــــــــــــه احمد هاليتيمه الحقيره ماتستاهل تصير زوجتك صدق ماتستاهل تكون ام عيالك ليــــــــــــــــــــــــــــه ياربي يعني اللي مثلي حرام تكمل حياتها طبيعي وش ناقصني عشان مايشوفني احمد زوجه تستاهله.. سألت نفسها: زواااااااااااااااج صوري ليه انا حجر والا مجرد يتيمه تنتظر شفقه قامت بعصبيه رمت كل شي فوق السرير وفوق التسريحه وراحت لزاوية الغرفه وحطت راسها بحجرها وصارت تبكي بحرقه
:
:
من هنا تكون البدايه الحقيقيه لروايتي فما سبق لم يكن الا احداث بسيطه
تعرفنا من خلالها على ابطال قصتي
من هنا قد تكون البدايه الحقيقيه لألامهم واحزانهم وقد تكون بداية افراحهم
.
.
كانت هذه نهاية الفصل اتمنى يعجبكم
|
14-03-10, 11:36 AM
جديد مواضيع قسم القصص المكتمله
العرض العادي
