يوم ورى الثاني كان يمر على ابطالنا ..
بين عذاب فارس اللي خسر من كل الجهات ..والم مشعل وعذابه ..
الفرحه الجميله اللي ماليه حياة فهد..والدمعه اللي ملازمه العنود ونوره ..
بندر اللي رغم المه بدا يصارع احزانه .. وسلمان اللي ضايع بين حبه ورجولته المجروحه ..
طيش جود اللي وصل اقصى حدوده.. خبث نوف ودهاء نجلاء..
بعد مرور 3 اسابيع,,
يوم الثلاثاء ..28\6\1427 للهجره
الساعه 4 العصر
ابو سلمان بقهر: لاتكبر راسك وخلني اشوف لك شقه
سلمان بأصرار: قلت لك بجيب عروستي هنا بغير بس الأثاث اللي بالغرفه وخلاص
ابو سلمان بقهر: عروس ومتعوده على العز تسكنها بغرفه
سلمان بهدوء: مين قال غرفه بيت وش كبره ولاعندي اخوان عشان ماتاخذ راحتها ..ماعندي بهالبيت غيرك رجال وانت خالها
ابو سلمان وهو يحاول يقنعه: ياوليدي مايصير البنت تبي تاخذ راحتها تحس انها ببيتها اواي شي
سلمان بعد ماوقف قالها بهدوء: بابا انا ماراح اسكنها بمكان غير غرفتي عجبها اهلاً وسهلاً ماعجبها بكيفها
ابو سلمان يهز راسه: الله يهديك راسك يابس ..طيب وشلون على الفرش والاثاث الجديد
سلمان بعد ماأخذ مفاتيحه: أنا بتصرف ماعليك بضبط الغرفه
ابو سلمان يهز راسه بالأيجاب : خير ان شاء الله
:
:
:
الساعه 5 المغرب ..
منسدحه على سريرها وتضحك بصوت عالي : احلف سامي قالك كذا
سامي وهو يضحك: والله غبي جودي لو تشوفين شكله
جود : هو مو غبي بس حبيبي اللي ذكي
سامي بحب: حبيبتي متى بشوفك؟
جود بدلع: متى تبي
سامي: لو علي ابي اليوم وكل يوم
جود مبسوطه: اليوم اليوم اللي تبيه ياعمري بس كل يوم صعبه شوي
سامي بكل رومنسيه: ماعليك يابعد قلبي بيجي وقت اشوفك كل يوم ومتى مابغيت
جود بحب : ياربي متى يجي هاليوم تدري سامي ماحب افارقك دقيقه
سامي بهدوء: انا يعني اللي اقدر على فراقك الود ودي ماافارقك دقيقه
:
:
:
الساعه 6 مساءً بتوقيت السعوديه 9 صباحاً بتوقيت السعوديه ..
فتحت باب البيت شافته جالس على الدرجه الوسطى ويدخن ..جلست بجنبه وقالتها بهدوء: ماتبي تبطل تدخين؟
مشعل : لا مااقدر انتي ماتدرين وشلون الصداع اللي ملازمني من بعد مابطلت الزفت اللي كنت اخذه
عبير بدلع: بقول للبودي قارد ماعاد يجيبون لك دخان
مشعل بسرعه: لايرحم امك الا ذي صدقيني بتركه لحالي
عبير تناظره : وعد؟
مشعل يتبسم: وعد
عبير بعد ماوقفت : قوم نفطر
مشعل يهز راسه: لا مابي مالي نفس
عبير تتخصر : شف كل وجبه تفوتها افوت بدالها وجبتين وانت بكيفك
مشعل يوقف ويرمي السقاره بالأرض ويدوسها : لا وانا اقدر
بعد ماوصلو للمطبخ وجلس على الطاوله اللي مجهز الفطور فيها ..شرب شوية حليب وبعدها اخذ توست دهنه جبنه ومربى وبدا ياكله ..
الدكتور بعد ماوصل وهو يتبسم: صباح الخير
عبير وهي تتبسم: صباح الورد
مشعل بدون نفس: صباح الخير
الدكتور بعد ماجلس: هاد الفطور والا بلاش واللهي ميت جوع
مشعل قرب من
عبير اللي جالسه على يساره والدكتور كان مقابلهم ..قالها بصوت واطي : هذا الى متى بينشب هنا انا والحمد لله ماعاد احتاجه
عبير تتبسم: هو دكتور وانت للحين تجيك نوبات غريبه خليه
مشعل بقهر: خل ياكل تبن بس..وقف وقالها بصوت عالي: بروح اتمشى عبير تجين
عبير توقف: ايه ياللا
الدكتور وهو يناظرهم: ياللا شوي تانيه وبلحأكم
بعد ماطلعو برا البيت ..ناظر فيها: بذمتك وش يحس به هالدكتور
عبير وهي تضحك: وانت ليه مقهور منه
مشعل ببرود: مو سالفة قهر بس كذا ماواطنه
عبير تناظره بطرف عين: اها ماتواطنه
مشعل وهو يناظر بالمسافه اقصى اليسار : تركضين؟
عبير مستغربه: نركض ليه
مشعل يرفع حاجبه : كذا مابي هالدكتور الغبي يلحقنا
عبير فاطسه: طيب ياللا
بدو يركضون بسرعه ..عبير سبقته بمسافه ..هو كان ينافخ وعجز يلحقها مايدري وش السبب يمكن ادمانه السابق او لأنه من زمان ماركض ..صارخ بصوت عالي: يابنت انتظريني
عبير وهي تركض وتصارخ: مابي انتظرك انت الحقني
مشعل وهو ينافخ: طيب طيب اصبري اوصلك بس
عبير تصارخ: طيب اوصلي بشوف
بعد ماابتعدو مسافه انسدح مشعل بسرعه وهو ينافخ : خلاص تعبت
عبير جلست بجنبه وهي تنافخ: ياكسول
مشعل بعد مابدت انفاسه تهدى ناظر فيها وبشعرها الناعم اللي جاي على عينها وقالها بهدوء: تدرين عبير
عبير بهدوء: وشو
مشعل: انا مو من زمان اكتشفت اني مااحب نجلاء ولا حبيتها بيوم يمكن كنت جديد ع الحب او اختلطت المشاعر بداخلي ..مالي فتره عرفت الفرق بين الحب الحقيقي ولعب المبزره
عبير تتبسم: وشلون عرفت
مشعل يناظر بالخضار اللي حولهم ويحاول قد مايقدر يبعد نظره عنها: عرفت منك انتي
عبير مستغربه: مني انا وشلون ؟
مشعل بعد ماتنهد: بالاول كنت استغرب حركاتي وشلون اغار من هالدكتور الغبي وبعدها وطول فترة علاجي كنت افكر اكون قوي عشان اهلي وعشانك وكنت استغرب ليه تجين دايم ببالي بس الحين وقلبي يخونني وينبض بقوه غصب عني عرفت الجواب
عبير بهدوء: ووش الجواب
مشعل يناظرها : الجواب انا احبك
عبير واللي استحت وقفت بسرعه وصارت تركض بطريق البيت
مشعل وقف بسرعه يلحقها ويصارخ: عبيير تعالي دقيقه سحبتها لاتروحين
عبير كملت طريقه تركض ولا كأنها تسمعه
:
:
:
الساعه 7 المغرب ..
لفت حول نفسها للمره الخامسه : ياربي احس فيه شي غلط
نوره وهي تناظرها بملل: يابنت لك ساعه تلفين بهالفستان وكل شوي تقولين لهم يعدلون شي اخلصي علي
العنود بقهر: يابنت احسه مو عاجبني فيه شي غلط
نوره تناظره: والله حلو ولا ناقصه شي انتي اللي شكلك ناويه على فستان من الزي الفرعوني
العنود تضحك: لاشدعوه بس ماادري انتي وش رايك
نوره وهي تحط يدها على خدها بملل : قلت لك رايي حلو مره يجنن خلاص لاتسوين عليه أي تعديل
العنود بهدوء: طيب خلاص ببدل ملابسي
غيرت ملابسها وبعد مالبست عبايتها ناظرت باللبنانيه : خلاص مابي ازيد عليه أي تعديل
اللبنانيه واللي مو مصدقه: اكيده انتي مابدك اعملو تعديلات زياده
نوره تناظرها : شفتي حتى اللبنانيه مو مصدقه
العنود وهي تضحك : اسكتي بس ..وناظرت باللبنانيه : اكيد مابدي أي تعديل
نوره تدفها : وش عندها ياللي بتحكي لبناني
العنود تضحك: شسوي عشان تفهم علي
نوره: امشي بس اللي يسمعك يقول لهجتنا صوماليه عشان ماتفهم عليك
بعد ماطلعو من المشغل ..ركبت العنود بجنب سلمان ونوره ركبت ورى ..
سلمان بدون نفس وهو معصب: ساعه وش تسوون
نوره : لابس المقاس ماكان مضبوط
سلمان يحرك السياره وهو معصب: حركاتكم يالحريم لازم فستان وحوسه يعني انا لوعلي بلاه هالعرس كله
العنود حست بأحباط وهي تسمع كلامه ..
نوره بسرعه: ايه صح ماتبي هالعرس مدري مين اللي كان متيم
سلمان واللي انقهر من كلام نوره: اكرمينا بسكوتك
نوره فتحت فمها تبي تتكلم ..بس قطعها صوت الجوال ..فتحت شنطتها وبعد ماطلعت الجوال شافت الرساله اللي من بندر
:
أحبك ولاتفكرين بنساك ياروحي
:
تنهدت بعد ماقرت الرساله اللي تشبه كثير رسايل بندر له فتره يرسلهم لها ..سوت حذف للرساله وحطت الجوال بالشنطه
:
:
:
الساعه 8 مساءً ..
ديوانية ابو الحميد بالتحديد..
دخل الديوانيه وجلس مقابل تركي اللي كان يناظره بنظرة احتقار ..
اما باقي الرياجيل اللي بالديوانيه صارو يرحبون ويهلون فيه
بندر وهو يتبسم: اخبارك فروس
فارس: بخير الحمد لله
بندر: وينك من زمان ماتجي لتركي
فارس واللي ارتبك: هاه لابس مشاغل
بندر يضحك: احلى يالمهم
فارس يضحك رغم احاسيسه اللي تكهربة بداخله اول ماشاف تركي: ايه مهم وش على بالك
بندر : ياللا دامك وصلت ومعاك العود ياللا سمعنا شي حلو
فارس يضبط العود: من عيوني وش تبي تسمع
بندر يفكر:اممممممممم ابي جديد راشد
فارس : طيب ..بدا يعزف على العود بأتقان مثل عادته واول مابدا يغني بصوته المميز الكل سكتو ودخلو جو معاه
( عشان الحب واللي بيني وبينك عشان الحب عشان ايامي وسنينك ابيك تراجع احساسك وتنسى جروحي والامك حرام انه في هذا البعد تضيع ايامي وايامك .. انا أترجاك لاتنسى ليالي الحب وسنيني وحاول لجل حبي لك انك ماتخليني..)
بندر دخل جو مع الاغنيه وبدا يفكر بنوره اللي ماقدر لحظه ينساها ..
تركي واللي اخذ باله من شرود بندر قالها بصوت عالي: مانبي حزين غني شي فرايحي
بندر بسرعه: لا لا كمل وربي انك بطل جبتها على الجرح
فارس يغير اللحن ويدخل بأغنيه ثانيه : جبتها ع الجرح وكنك مادريت وانت قاصد ماهي عني اصدفت والدليل انك تبسمت ومشيت وانا نادي لك ولا يمي التفت ..
سلطان بحماس: الله عليك الله غني شي لعبد المجيد
تركي قرب من فارس: انا بقول له وش يغني ..قرب له اكثر وقالها بصوت واطي: بندر مايدري بشي ياويلك تجرب تدخله بالسالفه اخوي اللي فيه مكفيه ..خلص كلامه ورجع مكانه وهو يناظر فارس بنظره ملاها الحقد
فارس ضحك وهو يخفي ارتباكه وبدا يغني لأبو نوره بصوته الساحر
:
:
:
الساعه 11 مساءً بتوقيت السعوديه 2 ظهراً بتوقيت امريكا..
الغدا كان جاهز ..جلس على الطاوله هو والدكتور وعبير ماشرفت ..
مشعل وهو يناظر بزوجة الحارس: عبير وينها
زوجة الحارس: ناديتلا بتقول مابدهاش تاكول
مشعل وقف: مهوب على كيفها
رقى الدرج بسرعه واول ماوصل غرفتها صار يطق الباب بسرعه وبصوت عالي: عبير افتحي الباب
انتظر شوي ولما ماجاه رد طق الباب مره ثانيه: عبير والله ماتفتحين الباب مااتغدى وادخن علبة السقاير كلها
عبير قامت بسرعه وفتحت الباب ..
مشعل وهو مسند جسمه على الباب : تخافين علي؟
عبير نزلت راسها مستحيه ومسكت الباب تبي تقفله: روح
مشعل مسك الباب بسرعه: خلاص يابنت نمزح معاك وسحبت كل كلامي بنات دلوعات
عبير : اها يعني الكلام اللي قلته اليوم وحنا برا مزوح
مشعل بأصرار: لا أحبك وغصب عنك أحبك وتبين تتغدين وبلا دلع لاأفقع وجهك
عبير تضحك: طيب بتغدا بس اسحب كلمتك
مشعل يسوي موفاهم: أي كلمه فيهم
عبير : هذي اللي قلتها تو
مشعل يستهبل: عن الدخان يعني خلاص سحبتها ماراح ادخن الباكيت كله
عبير متنرفزه: لا مشعل مو هذي اللي بعدها
مشعل : أي كلمه وضحي كلامك
عبير وهي مستحيه: يوم تقول احبك
مشعل فاطس: ادري بس استهبل ومو ساحبها
عبير تسوي زعلانه : ياثقل دمك
مشعل يسوي قوي: بتنزلين تتغدين والا شلون
عبير بدلع: بنزل
مشعل رافع حاجبه: بنات مايجون الا بالعين الحمرا
عبير بتردد: ايه صح مشعل
مشعل مستغرب: وشو
عبير: بالفتره اللي انت كنت تعبان نجول ارسلت رساله على جوالك
مشعل بسرعه: وش الرساله
عبير: كانت كاتبه مفكر نفسك ذكي بوصلك يعني بوصلك
مشعل بأنفعال: وان شاء الله رديتي على الرسال
عبير بخوف: ايه ارسلت
مشعل يحاول يكون هادي: ايوه وش ارسلتي
عبير: ارسلت ايه اذكى منك وكل شي عندك بليه واشربي مويته انا بلغت اهلي بكل السالفه وانتي ماعاد تهميني
مشعل بقهر: الله لايعطي الشيطان عافيه
عبير تناظره بحده: وانت ليه منقهر حنيت لها يعني
مشعل يتنهد: لا طبعاً بس جوازي عندها اخاف تسوي شي بالجواز
عبير بهدوء: انا ارسلت لها كذا عشان لاتهدد بالمقاطع نسيت سالفة الجواز
مشعل يهز راسه: طيب خير ان شاء الله
:
:
:
الرياض ..يوم الأربعاء
الساعه 2 الظهر ..
منسدحه على فراشها وتفكر :اكيد رجع لطبيعته والدليل الرسايل اللي يرسلها ..ياللا كلها فتره ويتخطى هالأزمه ..مستحيل ارد على رسايله عشان يتخطاني وينساني ..تنهدت وهي تفكر : ياربي وش كثر احبك يابندر
:
:
بنفس الوقت وبزاويا ثانيه ..
كان منسدح على فراشه ويفكر: معقوله نوره تنساني معقوله ماتحبني لا لا اكيد فيه شي قوي خلاها ترفضني ..تنفس بعمق وهو يفكر : وش سبب رفضك يانوره انا لازم اعرف لازم اكلمك
اخذ جواله وكتب لها بسرعه
:
انا جالس افكر فيك وافكر وش سبب رفضك لي رغم حبي لك
:
اول ماسمعت صوت الجوال اخذته وبعد ماقرت الرساله حست بقلبها ينبض وهي تفكر وتتبسم: ياربي يابندر تحس فيني يابعد قلبي
سوت مسح للرساله وحاولت ماتفكر بكلامه ابد
:
:
:
الساعه 5:30 المغرب
اول مادخل من الباب شافها بالصاله تبسم وقرب منها وبعد مامسح على شعرها بحنان: يابعد قلبي تدرين انك وحشتيني مره
لجين بهدوء: ايه صح تبي تعلمني انك تحبني .؟ انت بس شفقان علي والا ليه مااعترفت لي بحبك الا بعد ماصرت عاجزه امشي على رجلي
احمد ياخذ نفس بعمق: ياربي ماراح نخلص من هالسيره يالجين ..ارحميني وارحمي نفسك ..كفايه الكوابيس اللي تشوفينها كل ليله ..كمل بنبره حازمه: انا احبك وشيلي هالاوهام من راسك تكفين تراي تعبت
لجين بقهر: تعبت مني ماعاد تتحملني تتحمل مكالمات اللي اخر الليل
احمد قرب منها وبكل هدوء: لجين ادري انك مصدومه وتعبانه نفسيتك من وضعك بس تراي عشت ظروف اقسى من ظروفك وكنت قوي تكفين خلك قويه
لجين ضمته بقوه وبدت تبكي: تعبت يااحمد وانت بعد احسك متغير علي
احمد يمسح على شعرها بحنان: لامتغير ولاشي انا احبك وبتم احبك طول عمري
:
:
:
الساعه 6المغرب بتوقيت السعوديه 9 الصبح بتوقيت امريكا ..
نزل الدرج بهدوء بعد ماصحى من النوم سمع الفوضى اللي برا البيت ..ناظر بزوجة الحارس اللي واقفه عند الباب الخارجي وهي تناظر من خلال الباب المفتوح بتوتر ..
قالها وهو مستغرب: خير وش فيه؟
زوجة الحارس وهي تفرك يدينها بتوتر: عبير فوق الفرس والفرس هايج
مشعل صرخ بسرعه وهو يركض: وشلون ..
اول ماطلع ناظر بمكان الخيول وشافها ممسكه بعنق الفرس بقوه وهي تصارخ من الخوف والبودي قارد يحاولون يهدون الخيل الهايج
مشعل يصارخ من بعيد : مهوب كذا انتم تخوفون الفرس زياده ..قرب منهم بسرعه ومسك لجام الخيل وبدا يشده بحركات متقنه وهو يطلع اصوات هادئه من فمه ..وفجأه حطت الفرس رجلينها على الارض بهدوء وانقادت لمشعل ..
مشعل وهو يمد اللجام للبودي قارد: امسكه
مد يده لعبير اللي تبكي وقالها بحنان: عطيني يدك لاتخافين
ساعدها تنزل وناظر فيها وهي ترجف وتبكي بخوف قرب يده من شعرها وقبل يلمسها وقف يدينه بعيد عنها : بسم الله عليك
عبير بخوف: مشعل مره يخوف
مشعل يتبسم : معليه قلبي ..وكمل بسرعه: اصبري دقايق وبجي
راقبته وهو يدخل داخل البيت ويرجع بسرعه وبيده علبة مويه اعطاها لها: اشربي مويه
عبير بعد ماشربت المويه: مدري وش جاها اول مره اشوفها تثور كذا
مشعل بهدوء: يمكن فيه شي علق برجلها او شي
عبير تتبسم له: اشوفك تعرف للخيول
مشعل وهو يفكر وبصوت مسموع:ايه بابا كانت عنده مزرعه وفيها خيول وكنت احبهم كثير
عبير: حركات والله ماقلت لك ولد نعمه
مشعل يضحك: تقدرين تقولين كذا ..ناظر بالخيول وقالها بحماس: تجين نتمشى بالخيل شوي؟
عبير بخوف: بس اخاف مشعل
مشعل بحب: ماعليك انا معاك بمشي بالفرس بجنب ونبي نمشي بشويش
عبير بهدوء:طيب
بعد ماضبطو البودي قارد لهم الخيول ..مشى بفرسه بجنب عبير وفرسها ..
عبير تناظر فيه: مشعل ماكلمتني عن نفسك
مشعل يفكر : وش اقول لك بابا رجل اعمال معروف بالسعوديه وماعندي اخوان ماعندي غير اخت وحده اسمها عنود ..ماعندي شغلات بحياتي احكيها غير قصتي مع نجول واللي انتي تعرفينها
عبير تتبسم: وش اسمه ابوك
مشعل: خالد الـ..........
عبير تفكر: مااعرفه بس دامه معروف بالسعوديه يمكن لوقلت لبابا يعرفه
مشعل بعد تفكير: عبير الحين شسوي ابي انزل السعوديه عشان زواج اختي
عبير : بنجيب لك جواز مزور روح للسعوديه وارجع فيه
مشعل وقف الفرس وناظرها بذهول : نعم اروح بجواز مزور سلامات والله مااسويها مستحيل وش تقولين انتي
عبير بهدوء: مشعل المشكله لوطلعت بدل فاقد يمكن يسحبون فيزتك وماعاد ترجع لأمريكا تكمل دراسه
مشعل ببرود : عادي مابي اكمل دراسه هنا ولاابي ارجع
عبير بسرعه: مشعل الدراسه هنا مستقبل تضيع مستقبلك
مشعل بهدوء: المستقبل اللي بيجي كذا مابيه
عبير بحزن : طيب وأنا؟
مشعل سكت وماعرف وش يرد عليها
عبير بسرعه : طيب خلني انا مومهمه ومولازم ترجع عشاني لكن لو طلعت بدل فاقد يبون يفتحون لك سين وجيم وماراح يطلع الجواز الا بعد 3 شهور ويمكن اكثر وانت ماتبي تقول لأبوك
مشعل بعد تفكير: خلاص مافيه غير اننا نروح للسكن وندور جوازي هناك
عبير بخوف: لاهناك يمسكونا
مشعل يناظرها : تبيني اروح وارجع لك مافيه الا هالطريقه جواز مزور مالك امل اطلع فيه
عبير بعد تفكير : طيب بس بشرط انا اللي ادخل شقتك وانت تدلني بالجوال وبس
مشعل بسرعه: نعم مالك امل اخاف يمسكونك
عبير : وانا اخاف عليك يمسكونك مشعل انا اللي بدخل والا تروح بالجواز المزور
مشعل بقهر: اسمعي كلامي
عبير واللي بدت تبكي : وانت بعد اسمع كلامي مشعل انا اخاف عليك انا ..سكتت شوي وكملت: احبك مشعل واحسك مليت علي دنيتي امانه لاتخليني
مشعل بعد ماتنهد : ياربي عبير لاتبكين تكفين بدون شي اللي فيني مكفيني
عبير : خلاص ماابكي بس اسمع كلامي
مشعل بهدوء: امري لله
:
:
:
الرياض الساعه 8مساءً ..
ابو سلمان يوقف وهو معصب: انت مجبور على البنت والا وش سالفتك
سلمان بنبره حاده: مااقدر اسافر معها دوامي يبتدي بعد زواجي بفتره بسيطه
ابو سلمان : خلاص روح معاها دبي 5 ايام
سلمان بهدوء: وليه المخاسير مايحتاج بجلس معاها هنا الفرحه والسعاده ماتعرف مكان
ابو سلمان بنبره حازمه: شف لاترفع ضغطي قلت تسافر مع عروستك يعني تسافر هذا مو كلام بنت اختي متعوده على العز ولاتقول بلا مخاسير انا اللي بدفع
سلمان بهدوء: خلاص طيب بسافر معها
ابو سلمان يقرب من سلمان ويجلس بجنبه: علمني ياوليدي وش فيك ماتبي تتزوج؟
سلمان وهو يضحك: لابابا الا ابي اتزوج ومستعجل على الزواج بس سالفة السفر
ابو سلمان: خلاص دام كذا بحجز لكم وماعليك السفره على حسابي
سلمان بهدوء : اللي تشوفه
:
:
:
الساعه 5الفجر بتوقيت السعوديه 8 الليل بتوقيت أمريكا..
بعد مشوار طول كم ساعه وصلو عند السكن اللي كان مشعل ساكن فيه ..اخذت مفتاح الباب وحطت جوالها بمخباها اللي ورى وحطت السماعه بأذنها ..اول مافتحت الباب قالها مشعل بسرعه: عبير خذي بالك من نفسك
عبير تتبسم : ماعليك
اول مانزلت وبدت ترقى الدرج للشقه حست انها تسمع نبضات قلبها من كثر خوفها ..فتحت باب الشقه ودخلت بخطوات بطيئه كل خطوه تجر الثانيه ..قالتها بصوت واطي: الو مشعل وين تصير الغرفه ..
اول ماوصلت للغرفه صارت تدور بكل مكان بالطاوله وبالادراج بدولاب الملابس رمت كل شي بعدت فرش السرير وصارت تدور تحته ..مالقت شي بكل الغرفه ..
قالتها بصوت واطي :مشعل مالقيت شي
مشعل بسرعه:طيب خلاص انزلي
عبير بخوف : مشعل فيه صوت بالشقه
مشعل : صوت كيف يعني
عبير واللي قربت تبكي من الخوف : صوت الخطوات قربت من الغرفه
مشعل بسرعه: تخبي تحت السرير
عبير وهي تدخل تحت السرير: مشعل لو شافو الغرفه كذا بيعرفون ان فيه احد هنا
مشعل : ياربي انا قلت لك طيب ياللا اسكتي لايسمعونك
صارت تنافخ من الخوف وهي تسمع صوت الخطوات تقرب منها ..ناظرت بالظلام تحت السرير وشافت شنطه حديد مستطيله مثل اللي يحفظون فيها الأسلحه حاولت تفتحها وماقدرت مسكت الشنطه وقررت تاخذها معها ..
حست ان الصوت اختفى طلعت من الغرفه بهدوء وهي ضامه الشنطه بيدينها ركضت للباب ونزلت الدرج بسرعه ركبت السياره وهي تنافخ :تحرك بسرعه احس فيه احد وراي
حرك السياره بسرعه وهو يناظر من المرايا: ياربي شكلهم رجالها لاحقينا
وفجأه وبعد ماانعطف للطريق الرئيسي اللي ياخذهم للمزرعه بدا طلق الرصاص ..على السياره ..عبير صارت تصارخ: ياربي مشعل اخاف
مشعل يصارخ: تمسكي زين
فجأه انحرفت السياره بسبب طلق الرصاص اللي صاب كفر السياره ..عبير مسكت الكرسي بقوه وصارت تصارخ ..مشعل صرخ بسرعه : انزلي من السياره ..مسكت الشنطه ونزلت بسرعه تركض معاه ..كانو يركضون والرجال وراهم يطلقون رصاص عليهم ..المكان كان مثل الغابه ومظلم كانو يتخطون الزرع بصعوبه ..
سمع صوت طلق نار انهارت من بعده عبير اللي كان ممسك بيدها بقوه ..مشعل نزل لمستواها حط يده تحت ظهرها وصار يهزها وهو يناظر بالرجال اللي قربو يوصلون لهم : عبير وش فيك
عبير بألم : مشعل لاتترك هالشنطه مدري شفيها
مشعل سحب يده اللي كان حاطها ورى ظهرها وشاف الدم وصرخ وهو يهزها بألم :لاعبير لاتموتين انا احبك انتي اللي لي بهالغربه تكفين لاتخليني
.
.
.
.
.
نهاية الفصل
اتمنى يحوز على رضاكم
17-03-10, 10:44 PM
جديد مواضيع قسم القصص المكتمله
العرض العادي
