أحبتي من هم..أنهم مجموعه من الأشخاص أحبوني وساندوني وأخلصو لي أثق دائماً أنهم سيحبوني حتى الممات
أطفالي هم نجومي الساطعه في سماء حياتي انهم نوري واملي واشراقتي التي اراها صباح كل يوماً جديد
صفحة الــ word التي اكمل فيها فصول روايتي إنها جسر العبور اللذي يوصلني لأشخاص احبو حروفي واسعدوني
الفصل الثاني والعشرين
((الجزء الأول))
نفس الزمن الماضي
١٢/ذو الحجه سنة 1426 للهجره
ومن زاويه اخرى..بيت ابو مشعل بالتحديد..
ملت البانيو بالمويه الدافيه حطت رجلها بهدوء الى ان غطست جسمها بالكامل كانت تحس درجة حرارة المويه اخف بكثير من البركان اللي بداخلها دمعه ورى الثانيه يتسابقون لخدها كانت تحس الدمعه دافيه عكس ايامها اللي مافيها دفى حاسه بهالوحده تقتلها ٤جدران تخنقها وتضيق عليها كل يوم اكثر ..صارت تبكي بصوت عالي وتلوم حاله وبصوت مسموع: كله منك عنود ياغبيه دفعتي ثمن غلطتك غالي..استهتارك بأمور كان لازم تحاسبين فيها وصلك لهنا
بدت تبكي حالها بألم العنود طول عمرها عايشه صح لانظره ولا كلمه غلط و ماتسمح لأي شخص يتجرأ عليها مهما كان ويوم اللي تجرأت وسمحت لياسر يتجرأ داس عليها بجرأته
:
:
:
الرياض ..الزمن الحالي
حيث توقفنا
رجع للمطعم وهو مرتبك خايف ومتخرع مجموعة احاسيس تجمعت بداخله ..اشر على مكان سيارته وهو يناظر بالمحاسب وينافخ وبصوت عالي:سيارتي كانت هنا واختفت
واحد من الموجودين: مرسيدس ابيض؟
فهد يلتفت له:ايه هو.. شفته ؟
الرجال: شفته يتحرك قبل شوي
فهد بسرعه وهو مصدوم وبصوت عالي: وش قلت تحرك من هنا
الرجال : روح بلغ بسرعه تبي اوصلك؟
فهد بخوف: ياليت
الرجال يوقف : ياللا مشينا
:
:
:
الساعه ١١:٣٠ مساء
رجع البيت فتح الباب وصار يناظر بالمكان اللي فضى عليه دخل البيت وكل مامشى خطوه يضيق عليه النفس اكثر واكثر حاس هالبيت قبره من يوم اللي لجين تركته..
لجين كانت حياته ملت دنيته رغم كل شي ورغم ماضيها اللي عذبه كان يحس بفرحه غريبه لقربها منه..
جلس على الكنبه بتعب كان حاط شماغه على كتفه بأهمال سند راسه لورى وغمض عيونه وراح في النوم والسبب تعبه
:
:
:
الساعه ١٢ بعد منتصف الليل
فهد يناظر الضابط اللي جالس على كرسيه بلا مباله..
فهد يتكلم بكل عصبيه: يعني وشلون
الضابط وهو يلعب بالقلم اللي بيده:ماأقدر اسوي بلاغ غير لما يمر على أختفاء السياره ٢٤ ساعه
فهد معصب: اقول لك زوجتي وبنتي بالسياره وش اللي ٢٤ ساعه وانا مدري وينهم
الضابط بهدوء: انت عندك اعداء
فهد بسرعه وهو مقهور:لا
الضابط : يمكن اللي سرق السياره نزلهم بأي مكان مااقدر اخدمك او اسجلها حالة اختطاف غير لما تمر٢٤ ساعه
فهد بصوت عالي وهو معصب: وانا اجلس على احتمالات الين تمر الـ ٢٤ ساعه حقتك
الضابط مقهور: ياليت تحترم رجل الأمن وانت تكلمه
فهد يناظره بحده: احترمه لو كان يستحق الاحترام انا دكتور بمستشفى خاص ومع هذا مااوقف حاله طارئه عشان فلوسهم تأخرت
الضابط بعد ماارتبك: خلاص بسوي بلاغ ع السياره واي جديد ببلغك اترك بيانات السياره وبياناتك
فهد بهدوء : طيب
:
:
:
الساعه ١٢:٣٠ بعد منتصف الليل بتوقيت السعوديه ٣:٣٠ الظهر بتوقيت امريكا
انسدح مثل القتيل حاس بتعب مهوب طبيعي ألم بكل جسمه ذبحه الأرهاق غير الأدمان اللي مفقده تركيزه وتوازنه كان يمسح خشمه بأصبعه الخنصر بعنف وهو حاس بدوخه غريبه غير الروأيه اللي بدت تتشوش عنده ا لدوام الكثير والنوم القليل والمشي للجامعه والمخدر اللي يمشي بدمه كل هذا مرهقه ..قالها وعينه تغمض غصب عنه مستسلمه للنوم: يارب متى يجي يوم الأثنين واشوف
عبير وش بتسوي يارب تساعدني..خلص كلمته الأخيره وراح بنوم عميق
:
:
:
الرياض ..الساعه ١ الفجر
دخل البيت ..قفل الباب وسند جسمه عليه حاس بأنهيار وده يصرخ بصوت عالي معقوله بعد ماوصل للسعاده يضيعها كذا راح للحمام وانتم بكرامه فتح صنبور المويه البارد وحط راسه بالمغسله وبعد مابلل شعره بالكامل رفع راسه وصار يحركه بسرعه يمين ويسار بحيث تطير قطرات المويه وهو يصارخ: شسوي شسوي..مرر يده بشعره وهو ينافخ: ياربي وشلون اتصرف..ناظر بنفسه بالمرايا وهو يفكر:ياربي وشلون ماخطر لي عم شهد طلع جواله من مخباته بسرعه وضغط الزر الأخضر طلعت عنده الأرقام الصادره كان اول رقم رقم احمد ..ناظر بالأسم وبعد تفكير دق عليه ولما قربت الرنه تخلص رد عليه احمد بتعب: الو
فهد منحرج: اسف احمد ازعجتك
احمد بسرعه :لاازعاج ولاشي امر
فهد:تقدر تجيني هالحين ؟
احمد بأنفعال: لجين فيها شي؟
فهد واللي مايبي يطولها بالتلفون: لا حرمتي تعبانه
احمد بسرعه: دقايق وانا عندك
فهد بهدوء: ماتقصر
:
:
:
الساعه 1:30 الفجر ..
تقلبت كثير وحاولت اكثر لكن عجزت تنام..فتحت جوالها تقلب برسايل بندر وتبكي بصمت ..قالتها بداخلها المجروح : وحشتني يابندر وشلون بعيش بدونك الله يصبرني ..قربت نور الجوال من الساعه وصارت تناظر اسمه اللي يتحرك مع كل ثانيه وبدت تبكي بحسره ..صارت تنافخ وصوت انفاسها كل ماله ويعلى ..حاسه بكتمه غريبه..
عهود بعد ما سمعت صوت انفاس نوره العالي: نوره تبكين؟
نوره وهي تنافخ: لا
عهود قامت بسرعه شغلت النور وقربت من اختها..ناظرت فيها وهي جالسه على السرير وبخدها دمعه وتتنفس بصعوبه..جلست بسرعه بجنبها وحطت يدها على كتفها: نوره شفيك
نوره تقرب من عهود وتحط راسها على صدرها : ماادري شفيني احس بثقل بصدري ..
سندت عهود نوره على المخده وقامت تركض للباب وبصوت عالي: بقول لماما
:
:
:
الساعه 1:50 الفجر
فهد يكمل كلام بداه من فتره: وهذي كل السالفه ياطويل العمروالسلامه عشان كذا انا اقول زوجتي وبنتي عنده
احمد بهدوء: خلاص انزل شوفه واي مساعده تحتاجها نادني
نزل فهد بسرعه طق الباب الحديدي بقوه والجرس بسرعه : افتح الباب انت يازفت
فتح الباب وهو يترنح وناظر فهد ببرود: نعم وش تبي
فهد بقهر: وين حرمتي والبنت
ماجد يضحك ويحط يده على مخباته: دورهم بمخباتي يمكن تلقاهم
فهد مسكه من ملابسه وسحبه بقوه: قولي وين حرمتي ازين لك
ماجد يفلت نفسه من يدين فهد: وخر عني ولاتهدد ماعاد ينفعك التهديد وان كان ودك تبلغ بلغ أي شي تقوله للشرطه بنكره لا وبقول لهم يوم البنت جاته مخدره ليه مابلغ
فهد يناظره مستغرب: انت مين مكبر راسك؟
ماجد بخبث: محد وان كنت تبي حرمتك عطني 10 الاف واسلمك الحرمه او ادوس ببطنها واحرمك الأبوه ..خلص جملته وضحك بسخريه
فهد مقهور: وش جالس تخربط انت بسرعه طلعهم يالتعبان
ماجد وهو ماله مزاج يتكلم: قلت لك كلامي وانت اختار وان فكرت تبلغ بسلمها لك جثه ماعندي شي اخسره.. خلص كلامه ودف فهد بسرعه وقفل الباب
فهد يضرب الباب بقوه: انا اعلمك ياحقير
رجع السياره وهو مقهور اول ماقفل الباب التفت له احمد بسرعه: هاه وش صار
فهد بحزن ويأس: يقول يبي فلوس ويطلعهم لي المشكله حقير مثل هذ ا مااضمنه والا كنت عطيته المبلغ
احمد بعد تفكير: ان كانو عنده معناها السياره بمكان قريب من هنا اول شي نسويه ندور السياره واول مانشوفها ببلغ عنها انا وبعدها اكيد الشرطه بيسلمونك السياره ..ثاني شي نسويه بكره نستعين بالشباب ونربي هالكلب
فهد بتساؤل: وشلون؟
احمد وهو يحرك السياره: ماعليك انا اتصرف
فهد يهز راسه بالقبول: بس خل نروح اول شي المستشفى بقدم اجازه يوم اطراري
احمد : ابشر
:
:
:
الساعه 2:30 الفجر..
كانت تمسح على شعر بنتها ..اللي منسدحه على فراش المستشفى الأبيض وبيدها ابرة المصل ..تناظر نوره اللي مغمضه عينها اللي تنزل منها دمعاتها غصب عنها ..
دخلت شروق الغرفه وهي تتبسم بهدوء
ام سلمان بخوف: وش قال الدكتور انا خايفه على اختك مره
شروق بهدوء: لاتخافين الدكتور قال انه مافيها شي
كله من قل الاكل وسألنا ان كان فيه احد مزعلها قلنا له لا بالعكس هي فرحانه عشان عرسي قريب وزي كذا
ام سلمان وهي تناظرها بحزن: والله البنت مو عاجبتني
شروق واللي قربت منها ومسحت دموعها : نوره صرتي احسن
نوره بهدوء: ايه الحمد لله
شروق : شفيك وش اللي صار عليك
نوره تتبسم: مافيني شي بس فجأه كذا ضاق صدري
شروق بهدوء: طيب الحين ليه تبكين
نوره وهي تخفي حزنها وتبتسم: ابكي من ابرة المغدي توجعني
شروق تضحك: مالت عليك يالبزره ماما خايفه عليك
نوره تضحك رغم البركان اللي بداخلها: شسوي توجعني مره
ام سلمان تناظرها بحب: بسم الله عليك من الوجع
:
:
:
الساعه 2:40 الفجر..
احمد حاط يدينه الثنتين على الدركسون ومركز بالطريق يدور سيارة فهد
فهد يأشر يمين ويصارخ: هنا احمد شف هذي هي السياره
احمد التفت بسرعه : اي والله حلو مكانها ي مديني ابلغ وين المفتاح اللي جبناه
فهد يطلع مفتاح السياره (السبير): خذ بس وش تبي تسوي
احمد ياخذه وينزل من السياره:اصبر
راح للسياره وفتح كل ابوابها ورجع سيارته ودق على ثلاث تسعات : الو ..السلام عليكم ..انا ابي ابلغ على سياره غريبه مفتوحه كل ابوابها وواقف عند بيت مهجور انا خايف اروح عندها ويطلع فيها قتيل والا شي ..ايه طيب خلاص ..ان شاء الله طال عمرك..
قفل الخط وحرك سيارته بسرعه
فهد يناظره : وش قال لك ؟
احمد يتبسم: قال انتظر مكانك الى ان اجيك
فهد مستغرب: وانت ليه مشيت
احمد : فاضي انا يفتح لي تحقيق ليه جيت هنا وكيف شفتها ومدري وشو انا بس ابيهم يلقون السياره لك
فهد يتبسم: والله منت بهين
احمد بهدوء: طيب وش رايك تروح تنام والظهر اصحيك نكمل باقي السالفه
فهد: لاماراح يجيني نوم وشو للظهر
احمد يتبسم بهدوء: معليه تحمل للظهر عشان يصحون الشباب لاتنسى هالحين اجازه
فهد يتنهد: الله يصبرني
احمد : معليه هانت والله لنعلمه هالتعبان
:
:
:
السبت ..الرياض.. الساعه 12:30 الظهر..
فتح باب غرفة اخوه بعد ماطقه وماجاه رد دخل للممر اللي يساره الحمام وانتم بكرامه ويمينه يدخل للغرفه .. دخل الغرفه وشاف اخوه منسدح على جنبه اليسار بدون لحاف وحاط يدينه الثنتين تحت خده..
تركي بهدوء: بندر نايم.؟
بندر: لا
تركي واللي موعاجبه حال اخوه : بتجلس بغرفتك كثير
بندر: ايه
تركي بعد تفكير: طيب ماتبي تاكل
بندر وهو على نفس الوضعيه: لا
تركي: نعسان يعني تبي تنام
بندر بدون نفس: ايه
تركي قرب منه: ياربي بندر مايصير كذا تحبس نفسك بالغرفه لااكل ولاشرب وياليتك تنام
بندر جلس وصار يصارخ: تركي اتركني بحالي يرحم امك اتركني بحالي اللي فيني مكفيني
تركي يأشر بيده (خلاص) : طيب طيب خلاص بتركك ..تنهد من ضيقته على اخوه وطلع من الغرفه بهدوء
:
:
:
الساعه 1الظهر..
احمد واقف بسيارته عند الباب ويدق على فهد وبعد ماجاه الرد قالها بسرعه :الو ..فهد انا برا
فهد : دقيقه وانا عندك
قفل الجوال وحطه على جنب وناظر بالباب وبأقل من دقيقه طلع فهد ومشى للسياره وركب بسرعه
احمد قبل لايتحرك: كلمتهم؟
فهد : ايه كلمت سلمان وفارس وراح سلمان اخذ فارس واهم ينتظرونا عند بيت عم شهد ..وكمل بخوف: والله انا خايف
احمد وهو يحرك السياره :وش تخاف منه
فهد: اخاف يسوي بالحرمه شي
احمد بسرعه: لاماعليك من كلامك عنه اضمن لك انه مايسوي شي
وصل عند بيت عم شهد وكان سلمان واقف بسيارته قبل باب البيت بشوي ..وقف احمد سيارته قدامهم بحيث صارت قدام الباب ..نزل فهد واحمد بالوقت اللي نزل فيه سلمان وفارس..
سلمان يناظر احمد: والحين وش نسوي نروح نضربه ونلعن خيره
احمد يضحك: وش فيك مستعجل على الضرب وانا اخوك لا اهدى من كذا الحين اللي نبي نسويه فهد يشغله عند الباب قد مايقدروانا وانت ندخل البيت
سلمان بخوف: مثل الحراميه
احمد : عندك حل افضل؟
سلمان بعد تفكير : لا بس مافيه حريم داخل هالبيت؟
احمد: حسب كلام عمك مافيه الا جدة شهد
سلمان : هذي حرمه ومايصير ندخل البيت كذا وهي داخل
احمد بعد تفكير : وش الحل اجل
سلمان : نجيب وحده من الحريم تسأل عليها ان كانت موجوده بالبيت نراقب البيت الى ان تطلع وبعدها نقتحمه ..قال جملته الاخيره وضحك بعدها: والله احس اني مجرم
فهد بسرعه: لا لا مااقدر انتظر واراقب اكيد حرمتي للحين بدون اكل وهي حامل
سلمان : خلاص مالنا الا نجيب وحده من الحريم تنفذ هالعمليه معناحرمتي او حرمتك
احمد نزل راسه بحزن: لاحرمتي ماينفع
سلمان واللي فكر بالعنود وحس انه تكهرب: ولاانا حرمتي ماتنفع
فهد: صاحي انت وياه بتخلون حرمه ترقى الطوفه
احمد يفكر : وش الدبره اجل
فارس بسرعه: عطوني كم دقيقه بجيب الحل وبرجع
ناظرو بفارس اللي حرك السياره بسرعه وهم مستغربين ..فهد كان متوتر ينتظر رجعت فارس ..وسلمان واحمد يراقبون الطريق يبونه يرجع ودهم يعرفون وش يبي يجيب ..وبعد حول 8 دقايق رجع وقف سيارة سلمان مكانها ونزل وبصوت مسموع : ياللا ازلي
احمد وسلمان يناظرون بالمكان اللي جايه منه صوت الخطوات مستغربين واول ماشافو حور فطسو ضحك: هذي مساعدتك
فارس مبتسم على الاخر: هاللي موعاجبتكم تحل ازمه اول شي سهل ترقى الطوفه ثاني شي تبي تعلمكم الغرفه فاضيه والا لا وغير ذا تعرف شهد زين
احمد يضحك : أي والله تفك ازمه
فهد بسرعه: ياجماعه والله مهوب وقت مزوح والله
احمد بسرعه: ايه صح خلو المزوح لبعدين ..فارس انت حرك السياره للطوفه اللي بنرقاها وراقب المكان أي حركه غلط اضرب بوري بقووووه ..انا وسلمان ندخل البيت ..ياللا فهد روح اشغله
فهد يتحرك للباب : اوكي
سلمان يمد يده: ياللا ياحلوه تعالي
حور تقرب من ولد عمها: طيب
راحو لجانب البيت اليسار اللي كان بجنبه ارض فاضيه والسياره كانت واقفه فيها بعد ماسمعو صوت فهد العالي: ايوه كم قلت لي تبي؟
راحو بسرعه للسياره رقى احمد الكبوت وبعده سطح السياره مسك حور من يدينها وطمرها معه وبعده سلمان اللي رقى من سطح السياره للطوفه واخذ حور من احمد ..رقى احمد الطوفه وبعد مانزل البيت مسك حور ونزلها ..نزل وراهم سلمان وهو حاس بمغص ببطنه يتذكر كيف حط الهديه للعنود وتعب نفسه على الفاضي
احمد يدفه وبصوت واطي مره: وش تفكر فيه مو وقته ياللا امشي
مشت حور لأقرب باب ونادتهم بصوت واطي: تعالو هنا باب
قرب سلمان واحمد للباب فتحوه ودخلو بهدوء كان باب المطبخ الخارجي ..مسك سلمان حور وصارو يمشون بهدوء اول ماوصلو لباب المطبخ اللي ياخذهم للصاله ناظر سلمان بحور: شوفي فيه احد
احمد حط يده على فمه يكتم ضحكته: اول مره اشوف حرامي مؤدب
سمان يصفقه على كتفه بشويش وهو مبتسم ع الأخر : انطم بس انطم
مدت راسها بهدوء وصارت تناظر بالصاله وبصوت واطي:تعالو مافيه احد
دخل سلمان ومعاه احمد للصاله اللي كانت عاديه جداً ومهجوره كأنه مافيه احد منظفها من سنه ..
احمد بهدوء: فهد قالي انهم كانو ينومون حرمته بغرفه بجنب المطبخ يعني لو هي هنا اكيد بيحطونها بنفس الغرفه
سلمان يناظر فيه غرفه يمين المطبخ وغرفه يساره
احمد : ياللا نبدا باليمين
سلمان : ياللا حور روحي افتحي الباب
حور تناظر الباب بخوف: تعال انت افتحه لي
قرب سلمان من الباب وفتحه بشويش وحور ناظرت بداخل المكان والتفتت لهم ذا كأنه مجلس وريحته خايسه
احمد حط يده على فمه مايبي يضحك: مين سألك عن ريحته تعالو نشوف الغرفه اليسار
فتح احمد الغرفه بهدوء وقربت حور ناظرت بالغرفه ودخلت بسرعه
احمد وسلمان يناظرون ببعض وبصوت واحد: وين راحت ذي
احمد يحك شعره: وشلون نناديها هالحين
سلمان: مدري حلها انت ياعبقري زمانك
احمد بهدوء: والله والوهقه اخاف الحرمه جدة فهد صادتها
سلمان بخوف: تهقى.؟ هالبيت والغبره اللي فيه والريحه محسسني انه بيت الاشباح
احمد يضحك: ماهقيتك خواف
سلمان يضحك: مو خواف بس مابي اخر عمري تمسكني الشرطه متلبس والتهمه سرقه
احمد يضحك بهدوء: هنا والبيت عاد عشان نسرقه
حور طلعت وهي ممسكه بشهد اللي وضح عليها النعس والتعب : هذي شهد وامها بعد داخل
احمد بسرعه: ياللا خليها تجي ونمشي
حور: قلت لها وحاولنا نقومها بس ماتقوم
احمد يناظر بسلمان: وش نسوي هالحين
سلمان مبتسم على الاخر: كله منك يافالح انا وسلمان نقتحم البيت مبسوط بالأقتحام حقك كنت انت سويت دور فهد وهو جا معي عشان يشيل حرمته الحين وش نسوي اخاف نطلع وتجي امه و تكون متفقه مع ولدها
احمد بسرعه: خلاص دامنا لقيناهم اطلع انت من هالباب وامسك هالتعبان اللي برا وخلي عمك يجي يشيل حرمته بس لاتطول علي ..ايه صح ولاتضربه ولاضربه
سلمان : طيب..طلع سلمان بسرعه من باب الصاله وراح ركض لماجد اللي التفت يناظر سلمان بأستغرااب ..دفه بقوه على الارض وجلس عليه وثبت يدينه بالارض: عمي روح لأحمد من الباب اللي انا طلعت منه
فهد يدخل بسرعه وهو يتعداهم: طيب
ماجد يحاول يفك نفسه من قبضة سلمان القويه : وخر عني
فهد دخل البيت وناظر بأحمد : وين وين
احمد يأشر على الباب: هنا
دخل فهد للغرفه المضلمه اللي منورتها اشعة الشمس المخترقه النوافذ الخاليه من الستاير ..الغرفه كانت فاضيه تماماً مافيها غير مرقد واحد بنهاية الغرفه وشذا كانت ممدده جسمها عليه بأهمال وهي لابسه عبايتها حتى وجهها مغطيته
فهد فتح وجهها وناظر بعيونها الذبلانه :شذا انا هنا لاتخافين
شذا فتحت عينها بتعب: تعبانه يافهد
فهد حط يده تحت ظهرها واليد الثانيه تحت رجلينها وشالها ..طلع من الغرفه وبصوت مسموع: ياللا مشينا
طلعو كلهم بسرعه ..
احمد بعد ماوقف عند سلمان : فهد حط حرمتك بالسياره ونادي فارس
فهد حط حرمته بسرعه بالسياره ونادى فارس ..ورجع بسرعه وقف يناظر ماجد :وش بتسوون فيه هالحين
احمد : ابد نبي نشتكي عليه
فارس يناظر: بتقولون خطفهم بعد ماطلعتوهم برا البيت ماتجي
احمد يتبسم : لانبي نقول هاجمك مثل المجنون وضربك وبعدها الشرطه بيشوفون وش سالفته وليه سوا كذا وبيكتشفون انه مدمن وحاله
فارس مستغرب:بس انامو مضروب
احمد مبسوط : هالحين يضربك سلمان كم بوكس
فارس بسرعه: ياسلام جايبيني هنا انضرب
فهد يقرب من ماجد ويمسكه هو واحمد بدال سلمان ..
سلمان يوقف متحمس: ياللا تعال بصفقك شوي
فارس بخوف: ياعمي روح سلامات
فهد وهو ممسك بماجد بقوه : ياللا فارس ضحي عشان عمك
ماجد واللي انكتم نفسه: خلصونا بسرعه
فارس بعد مااستعد: ياللا ..اول ماقرب منه سلمان غطى وجهه بيدينه ورجع لورى : لا لا مااقدر ليه يعني انا اللي انضرب ليه مو احمد
فهد يناظراحمد: ايه جد قوم انضرب انت وبعدها قول لـ لجين انه حادث يمكن تشفق عليك
احمد يفكر: رايك كذا؟
فارس بسرعه: ايه ايه يعني انت تنضرب بفايده انا وش استفيد
احمد : طيب تعال امسك مع عمك
بعد ماجا فارس ومسك ماجد راح احمد مقابل سلمان: المشكله انت عضلك يخوف
سلمان يضحك : لاتخاف ماراح اعورك
احمد بسرعه: لا لا ابيك تعورني الا تدميني دام فيها رجعت المدام لي
سلمان يضحك : خلاص ابشر
قرب من احمد وضربه ضربتين بقوه على وجهه سال الدم من شفته ..قرب احمد يناظر بأنعاس وجهه بالدريشه اللي كانت قبالهم : لا لا ماضبطها مااحس اني طالع من حادث ابيك توجعني وضح الضربات على وجهي اكثر عشان اخذ اجازه من الدوام بعد
سلمان فاطس: خلاص تم بس لاتبكي من الوجع بعدها
احمد : ماعليك بايعها بتراب
ماجد واللي انكتم من فارس اللي مسويه كرسي: اخلصو علي حلا لكم الضرب الحين
بعد ماضرب سلمان احمد ضربه على بطنه وضربه على رجله وضربه بوجهه وقف احمد وهو ينافخ والدم يسيل من خشمه وشفته : الحين ضبطتني
سلمان يناظره بخوف : ياويلي احس اني وجعتك بجد
احمد : ماعليك احسن عشان يلبس هالتعبان قضيه بجد ..عطا جواله لسلمان بعد مادق ثلاث تسعات : خذ بلغ وانت فهد خذ حرمتك للبيت حنا نتصرف بباقي السالفه
قرب سلمان من ماجد وجلس فوقه مع فارس عشان مايقدر يتحرك قبل تجي الشرطه
:
:
:
الساعه 2:30 الظهر..
جالسه على الأرض بغرفتها فاتحه دولاب الملابس وفاتحه الدرج اللي فيه الشغلات اللي من بندر ..كانت تقرا الكلام اللي يكتبه بكل مره يهديها شي وتتبسم ابتسامة حزن مكسوره..
فتحت عهود الباب بسرعه ناظرت باب دولاب الملابس على يمينها واللي مخفي نوره اللي جالسه وراه ..
عهود تتلفت وبصوت مسموع: نــوره
نوره تمسح دمعتها بسرعه وتحط اللي بيدها بالدرج وتقفله : نعم عهود
عهود تقرب منها تمسك باب الدولاب وتناظرها: وش تسوين هنا
نوره بهدوء: اطلع لي ملابس بتروش
عهود : لا لا تعالي تغدي سلمان يبي يتأخر
نوره تبتسم : مالي نفس تغدو انتم انا بتغدى مع سلوم لما يجي
عهود : لاسلمان يبي يتغدى برا
نوره بهدوء: عادي انا مابي اتغدى
عهود بسرعه: لا ماما قالت لي جيبيها معك نوره لازم تاكل ..وكملت بهدوء: نوره تكفين تعالي معي ماما خايفه عليك مره لاتزيدينها عليها
نوره توقف بهدوء: طيب ياللا
نزلو الدرج في صمت ..اول ماوصلت للطاوله جلست وهي تتبسم بوجه امها
ام سلمان مبسوطه: الله يرضى عليك يابنتي ياللا كلي
حطت رز كثير ودجاج بصحن نوره
مسكت نوره الملعقه وبدت تاكل بشويش تغصب نفسها على الاكل وتلعب شوي بالملعقه بس عشان امها تحسها تاكل ويرتاح بالها والا هي مالها نفس تحط لقمه وحده بفمها
:
:
:
الساعه 2:45 الظهر..
طلعت من الحمام لافه فوطه صغيره على شعرها ولابسه بيجامه قطن صفرا ناعمه ..جلست على السرير بتعب ..بالوقت اللي دخل فيه فهد وهو يدف الباب بجسمه وماسك صينية اكل كبيره ..
ناظرها بحب وهو يتبسم : ياللا حبيبتي ريحي على السرير عشان تاكلين حط الصينيه على كرسي التسريحه المربعي اللي بدون مسند ..غرفة فهد وشذا كانت فخمه مره اعمده اسطوانيه في الاربع الزوايا من السرير ..دولابين واحد بأبواب والثاني عباره عن ادراج موزعين واحد يمين الغرفه يسار باب الحمام وانتم بكرامه والثاني يسارالغرفه .. السرير الفخم يتوسطهم قدامه صوفه تحوي مساند باللون الاحمر الدموي..التسريحه كانت تحوي نفس الاعمده الاسطوانيه على جانبيها..
قرب منها بسرعه عدل المخدتين ورى ظهرها ومسك رجلينها رفعهم على السرير ..
مددت رجلينها ورجعت لورى شوي وسندت جسمها على المخدتين: وش هالدلع كله لايكون بعد انت اللي طابخ لي
فهد بعد مااخذ الصينيه وهو يضحك: لا مالي بالطبخ
شذا بهدوء ودلع: كنت بصدق نفسي لو انت طابخ لي
فهد وهو يحط الصينيه اللي لها 4 قواعد بين رجلين شذا: ابيك تنظفين الصحون ماتخلين فيها ولاشي ..صح مو انا طابخ بس اخترت لك الاكل زين
شذا مبسوطه : تامر يالغالي
فهد جلس يراقبها وهي تاكل كان مبسوط ومرتاح وجودها يرد له روحه ..رفع راسه لفوق وقالها بداخله: يارب لاتحرمني هالفرحه
:
:
:
الساعه 3 الظهر وبأحد مطاعم الرياض..
غرس الشوكه بالبطاطاوحطها بفمه وبعد ما اكلها ناظر بأحمد اللي جالس يضغط على خده بشويش مكان النفخ..
سلمان بعد ماعض شفته السفله : وجعتك مره ؟
احمد واللي موقادر يفتح عينه اليمين زين من النفخ : عادي ياشيخ بس ان ماطلعت بفايده بجلدك
سلمان يضحك : الله يستر
احمد بعد ماعدل جلسته : سلمان ممكن اسألك سؤال شخصي شوي
سلمان يتبسم : خذ راحتك
احمد بعد تردد : اليوم لما جبنا طاري حرمتك تغيروجهك بينكم مشكله ودك تفضفض فيها
سلمان بينه وبين نفسه : اقول لك حرمتي كانت مع غيري ..وبصوت مسموع : لا مافيه شي بس عشاني باقي ماتزوجت وعلاقتي معها فيها حدود
احمد يهز راسه : اها
سلمان بسرعه: طيب انا بسألك وش المشكله بينك وبين بنت عمتي
احمد بينه وبين نفسه : اقول لك حرمتي كانت مع غيري وهذا سبب المشكله هالحين والا اقول لك اني ماشفت السعاده هالحين ولاقدرت انسى زلتها
سلمان يهزه : احمد وين وصلت
احمد بسرعه : هاه ..لا كنت اتذكر اللي صار..مشكلتي تهاوشت معها هوشه عاديه تصير بين أي زوجين وحنا طالعين صادها الحادث وزعلت ..كمل وهو يضحك : عشان كذا بقول لها حاشني حادث كود ترضى
سلمان يتبسم: والله هالحريم مشكله
كملو غداهم بصمت وكل واحد حاس انه فيه بينهم شي مشترك شي يتشابهون فيه ..احمد كان ياكل وهو يفكر بينه وبين نفسه: بعيونك نظره ياسلمان محسستني انك مثلي
سلمان كان مركز نظره بالصحن يحاول يتفادى أي لقاء بين عينه وعين احمد حاس ان احمد يقاسمه شي معين وشهو مايدري
:
:
:
الساعه 4:30 الظهر بتوقيت السعوديه 7:30 الصبح بتوقيت أمريكا ..
دخل غرفتها بعد ماطق الباب وماجاه رد منها شافها نايمه بعمق راح عند سريرها وهزها وهو يحك بجسمه رقبته ويدينه :نجول قومي ابي ابرا ..هزها بقوه اكبر وبصوت اعلى : قومي موقادر اتحمل
نجلاء تحط يدها تحت المخده وتضبط نومتها وبكل كسل : اوووووه مشعل خلني انام
مشعل واللي ذبحه الالم : عطيني الأبره ونامي
نجلاء بكسل والنوم غالبها ماتبي تقوم : شوف الشنطه الحديد هناك على اليمين فيها أبره خذها
مشعل بخوف وهو يتألم : ماعرف قومي انتي
نجلاء بطفش وهي تعطيه ظهرها : انقلع ابي انام تبي والا كيفك
راح للشنطه المربعه الحديد فتحها بزرين بالزوايا كانت عباره عن مستطيلين اثنين يتحركون عكس بعض شاف الأبره بالمستطيل اليمين حرك المستطيلين شاف بالمربع اللي تحتهم علب زجاج صغيره بداخلها محلول مثل اللي يستخدمونها بالتطعيم ناظر فيها وبعد ماحس بالعوار يزيد وماعاد يقدر يسيطر على نفسه اخذ الأبره وقفل الشنطه راح غرفته بسرعه قفل الباب وجلس على سريره ..حط الأبره على الطاوله اخذ مسحه بسرعه ومسح المكان اللي بيغرس الأبره فيه اخذ الأبره وناظر بيده قرب الأبره وهو يرجف حطها عند العرق اللي بان معه ..حس بخوف بس احساس الألم كان اقوى غرس الأبره بقوه وضغط بأصبعه الأبهام عشان ينزل المخدر وبعد ماحس بالمحلول دخل جسمه طلع الأبره ورماها وانسدح وهو حاس بدوخه فضيعه
:
:
:
الرياض الساعه 7 المغرب..
طق الباب بهدوء وبعد ماسمع صوتها فتح الباب وتقدم لها بأبتسامه جلس بجنبها وناظرها بحب: كيفك اليوم
لجين بهدوء : عادي مثل كل يوم
فهد يمسح على شعرها: لجين احمد برا ويبي يكلمك
لجين بقهر: مابي اكلمه خلاص اللي بيننا انتهى وهو قالي بيطلقني
فهد بهدوء: معليه اسمعيه اخر مره اسمعيه بهدوء وروقي معاه وحاولي تسامحينه احمد يحبك وكلنا نغلط وتراها رجال والنعم وقف معاي وقفت رجال
لجين بهدوء وبعد تفكير: اللي تشوفه خالي
فهد بصوت عالي: ادخل احمد
بعد مادخل احمد ناظرت بوجهه المتورم ومشيته الغير متزنه وشهقت وهي تحط يدها على فمها : ياربي شفيك
احمد يمثل الألم بزياده : صادني حادث شكلك داعيه علي
لجين بسرعه وهي تناظره بخوف : ينقطع لساني لو ادعي علي
احمد قرب منها ناظرها بحب : يعني تخافين علي
فهد لما شاف الجو كذا انسحب بهدوء وقفل الباب عشان ياخذون راحتهم
لجين استحت ومانطقت بكلمه
احمد يمسح بظاهر كفه على خدها وبكل رومنسيه : ترضين اموت من قهري يالجين
لجين تحط يدها على فمه : بسم الله عليك جعل يومي قبل يومك
احمد بسرعه : الله لايقولها عمرك اطول من عمري ان شاء الله
لجين وغصب عنها بدت تبكي : احمد وش تبي مني اتركني بحالي
احمد يمسح دموعها : لاتبكين قلبي والله تقطعين قلبي دموعك غاليه عندي لجين انا احبك وابيك من يوم تركتيني وحياتي ظلمه
لجين بهدوء : لا انت ماتحبني
احمد بحب : والله احبك واموت فيك بعد.. انا اعترف غلطت كان لازم اثق بزوجتي واحترمها بس كنت غبي سامحيني الله يخليك لجين انا مالي غيرك انتي حياتي
لجين واللي ماقدرت تكابر اكثر لفت يدينها حوله وضمته بقوه وهي تبكي : حتى انا احبك احمد ومحتاجتلك
احمد يمسح على شعرها : يابعد عمري والله اشتقت لك لجين
بعد عنها ومسك وجهها بيدينه وناظر فيها وهو مقرب منها مررررررره : حبيبتي ترجعين معي طيب
لجين تمسح بأصابعها خده المتورم: ياربي احمد شكله يوجعك ياليته فيني ولافيك
احمد بسرعه: بسم الله عليك عادي مايوجعني بس اذا مابترجعين لي بطلع الحين وبخلي اقرب تريله تاخذني
لجين تضحك : الله لايقولها عشان انتحر
احمد مبسوط: يعني بترجعين معي
لجين مستحيه: ايه بس مواليوم بعد بكره
احمد بسرعه : وليه مو الحين
لجين بهدوء: ابي اجهز اغراضي وغير هذا شذا اليوم ارجعت وهي تعبانه ابي اجلس معاها بكره قبل ارجع بيتي وبعد بكره وانت راجع من دوامك مر علي وخذني
احمد يتنهد: الله يصبرني خلاص اللي تبينه بعد بكره بعد بكره
وقف وباسها على جبينها : قلبي توصين شي
لجين : سلامتك خذ بالك من الطريق
احمد يتبسم: ان شاء الله يــا بعد روحي
طلع من الغرفه وهو مبسوط حاس انه كان ميت والحين رجع للحياه ناظر فهد وهو مبسوط وموقادر يخفي فرحته
فهد يضحك: مايحتاج تقول شكلها رضت عليك
احمد يضحك: الحمد لله بعد بكره بترجع البيت
فهد مبسوط: الحمد لله الله لايفرقكم
مشى احمد وهو يفكر وش لازم يسوي لها بمناسبة رجعتها لازم يفاجأها وهي بترجع معاها بعد بكره يعني يقدر يسوي شي مرتب ..فتح باب سيارته وبعد ماركب دق على سلمان ..
سلمان: هلا والله بالمجرم
احمد يضحك: هلا بالحرامي
سلمان بسرعه: حرامي بخشمك مدري من علمني الأقتحام وحركات الأكشن
احمد يضحك : اللي يسمعك يقول محتاج تعلوم انت كنت تبي الفرصه بس
سلمان فاطس: ايه بذي صدقت ابي اجرب العضلتين اللي عندي صراحه
احمد بحماس: بس تسلم يدينك لازم اشتريلك هديه
سلمان يضحك: هاه يابو الشباب شكلها المدام رضت
احمد مبسوط: أي والله حنت علي بعد ماشافت النفخ اللي بوجهي يالمجرم
سلمان : انت المفروض تشكرني طول عمرك قال مجرم قال
احمد وهو يشغل سيارته: شكرناك خلاص والا تبي اجي ابوس راسك
سلمان بكل غرور : ماعندي مشكله
احمد بسرعه : تخسي ابوس راسك ..وضحك بصوت عالي
سلمان يسوي فيها يهدد: طاااااايب طااااااايب ان ماقلت لحرمتك هذا لاحادث ولاشي ماكون سلمان اوريك اعلمك النذاله انا
احمد يتمسكن : افا واهون عليك
سلمان يضحك : لاماتهون يالدب
:
:
:
17-03-10, 10:35 PM
جديد مواضيع قسم القصص المكتمله
العرض العادي
