لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 29-07-10, 04:13 PM   المشاركة رقم: 21
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,330
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت الثامن عشر **

- بالليل بغرفة روان –
( روان منسدحه ومغمضه عينها ودموعها تنزل )

روان : ( بصوت واطي ) يارب سهل علي وخلني أنساه .. يارب خله يعيش مرتاح ويتوفق بدراسته

- اليوم الثاني –
( روان مانامت الا الساعه 6 الصبح وكانت طول الوقت تبجي وتدعي )

- هلا دشت الغرفه –
هلا : روان .. روان قوومي ( تهزها ) .. والله آنا يوم ملجتي فزيت مع أذان الفير وانتي للحين نايمه؟؟
روان : ( تبطل عينها وغصب تستوعب ) اشتبين؟
هلا : شنو اللي اشتبين ؟؟ اليوم زواجج يا حلوة
روان : ( انقمت قلبها ) جم الساعه الحين ؟
هلا : الساعه 10 يللا قومي ( تغمز لها وتبتسم ) وراج سباحه وتسنع وتزقرت
روان : بس تو الناس
هلا : شنو تو الناس يللا قومي وراج شغل واايد و تراه اخوي الوحيد وانتي فاهمه شقصد
روان : ( ساكته )
هلا : هذا سكوت مستحى ؟ ولا شي ثاني ؟
روان : ( اتطالعها ) خلاص كاني قمت وحرام اليهال نايمين لا نقعدهم
هلا : ( تقصر صوتها ) زين انا بروح وأي شي تحتاجينه قوليلي
روان : ( قامت ) اوكي
--

- بيت ابو محمد –

ام محمد : يارب توفقها وترزقها بالعيال الصالحين يارب آمين .. وانتي بعد اذا يالج نصيب زين خل انزوجج
فجر : لا انا مابي اتزوج بكمل دراستي
ام محمد : اي هذا آخر كورس لج
فجر : لا بكمل ماجستير ومابي اتزوج
ام محمد : لا والله ؟؟ يبتج عشان تقعدين على جبدي ؟
فجر : شنو يعني يبتيني بس عشان اتزوج وافرّخ ؟
ام محمد : فجور عدلي اسلوبج وانتي تكلميني عيب عليج
فجر : ( بعصبيه ) وانا اشقلت الحين
ام محمد : شوف ؟؟ وهم تصرخين ؟
فجر : ( شوي وتبجي ) يمه الله يخليج لا تزعلين والله مادري اشفيني احس مختنقه واي شي يعصبني
ام محمد : ( طيبه ونست بسرعه ) ادري يا يمه مبين عليج انج مو على بعضج .. كل هذا عشان روان بتتزوج اليوم ؟
فجر : اخاف ماترتاح بزواجها
ام محمد : وليش تقولين جذي اهي شاكيتلج من جاسم ان ممكن يكون موزين؟
فجر : لا .. بس انا خايفه عليها
ام محمد : ادعيلها بالتوفيق ولا تقبسين عليها بضيقتج اللي مالها داعي
فجر : الله يوفقها
--

( روان خلصت سباحه واقعدت تستشور شعرها وفيها بجيه بس كل شوي تحاول تفكر بشي ثاني عشان ما تبجي )
- رن تلفونها بسرعه طفت الاستشوار وقلبها يرقع خايفه يكون بدر بس اطلعت فجر اهي اللي داقه –

فجر : الو قوه حبيبتي اشلونج؟
روان : الحمدلله بخير
فجر : ( صوتها مقموت ) شدي حيلج ادري انج قويه وقدها وربي يوفقج
روان : ( دموعها انزلت ) فجر انا خايفه
فجر : من شنو؟
روان : خايفه اني ما انسى بدر واني اتعذب كل يوم
فجر : حبيبتي والله حاسه فيج بس الزواج ينسيج صدقيني
روان : ان شاءالله
فجر : ( شوي وتبجي ) اوكي اخليج الحين .. اكيد مشغوله مع السلامه
روان : مع السلامه ( سكرت التلفون )
منال : ( اقعدت ) صباح الخير
روان : ( امسحت دموعها من غير ماتشوفها ) هلا صح النوم
منال : بتروحين مكان ؟
روان : ( اسكتت مده ) .... ملجتي اليوم
منال : اليوم في عرس ؟
روان : لا بس نملج ماكو عرس
منال : ( ماكو أي تعبير ) زين بقوم اغسل ( اطلعت وخلتها بالغرفه )
--
- بعد الغدى –
( الكل قاعد بالصاله ماعدا ام جاسم كانت بغرفتها )
ابو جاسم : يبه اليوم تملجون ماعندج شي تبين تقولينه لنا ؟
روان : ( متضايقه ) ابي نسكن في بيتنا ويكونون معاي اليهال
ابو جاسم : اليهال احسن لهم لو اقعدو عندي
روان : ( انصدمت وطالعت جاسم )
جاسم : ( ابتسم لها ) لا يبه انا كلمتك من قبل بهالموضوع وقلت ان ماعندك مانع لاتغير رايك الحين
ابو جاسم : خلاص على خير
روان : تسلم عمي .. مشكور جاسم
ابو جاسم : العفو يبه .. تبين شي بعد ؟
روان : لا مابي شي
جاسم : جهزتوا اغراضكم ؟
روان : اي بس باقي جم شغله
هلا : ( اتلاعب فراس ) قول جب
ابو جاسم : هلا اشهالتعليم ؟
هلا : ( تظحك ) عادي كل اليهال يقولون جذي
جاسم : عيل الله له حكمه ان مارزقج للحين
هلا : ( انقلب ويهها وراحت الظحكه ) الحمدلله على كل حال
روان : ( طالعت جاسم متضايقه منه بس ماقالتله شي ) عندي شغل فوق عن اذنكم ( قامت وخلتهم )
---

- بعد صلاة العشى وعقب ماراح الملاج –

ام جاسم : ( اتيبب ) الف الف الف مبروك
جاسم : ( يبوس راسها ويبتسم ) الله يخليج لنا يارب .. عاد ماتوقعتج بتفرحين لي
ام جاسم : اشلون ما افرحلك وانت وحيدي
هلا : ( تبوس اخوها ) اول شي مبروك منك المال ومنها العيال .. ( اتطالع امها ) ثاني شي شنو وحيدي ؟ عيل انا بنت منو ؟
ام جاسم : ( تظحك ) يمه انا قصدت ولدي صبيي الوحيد
هلا : اهااا .. اوكي الحين استوعبت
ابو جاسم : يبه تره روان واخوانها يتامى مايحتاي اوصيك عليهم
جاسم : بعيوني يبه
هلا : مو ناوي تصعد حق العروس ؟
جاسم : لا قوليلها تنزل بنتمشى بالسياره ونرجع
هلا : شنو نرجع؟ وين قاعدين ؟!! ابروحك مو مسوي عرس .. آنا اقولك اخذها ورحوا وين ماتروحون وقعدوا جم يوم .. وانا ادير بالي عاليهال
جاسم : انتي الحين روحي ناديها تره وايد قرقتي
هلا : اي يحقلك معرس مانقدر انقول شي
--

- غرفة روان –
منال : ( تسمع يباب ام جاسم ) الحين يعني تزوجتوا ؟
روان : ( ماسكه نفسها ماتبي تبجي ) اي
منال : ( راحت لمت اختها ) مبروك

- دشت هلا –
هلا : مبروووك يا عرووسه
روان : الله يبارك فيج
هلا : ( معصبه ) معقوله للحين مو جاهزه ولا متكشخه ؟؟ ريلج ناطرج تحت بياخذج
روان : ( منصدمه ) وين بياخذني ؟
هلا : روان اشفيج ؟ توكم مالجين واشدراني وين بياخذج
روان : اذا ماراح نرجع ما اروح معاه مكان ماقدر اخلي اخواني
هلا : ( بعصبيه ) روان اشدعوه عليج !! مخليتهم بالغابه انتي ؟ وبعدين عيب اللي تقولينه انتي توج متزوجه والمفروض تتصرفين بطريقه احسن من جذي
روان : بس ..
هلا ( قاطعتها بنفسيه ) لا تبسبسين ويللا جهزي اخوي ناطرج تحت ( اطلعت وخلتها )
منال : اشفيها جذي كلمتج ؟
روان : ( بضيق ) ماكو شي حبيبتي
منال : بس كانت تصرخ عليج
روان : خلاص قلتلج ماكو شي .. انا بلبس الحين واطلع مع جاسم ديري بالج على اخوانج
منال : اوكي

- دش مشاري -
مشاري : شنو صاير ؟
روان : ماصار شي روح كمل لعب فروس وخيريه بغرفتك ؟
مشاري : اي
روان : خلاص روح لهم
مشاري : اوكي ( طلع )
--

( روان البست جينز و قميص حلو ناعم والبست ملفع مناسب وخذت جنطتها وانزلت )
- اول مادشت الصاله –

روان : السلام عليكم
جاسم : ( وقف ) وعليكم السلام .. ( سلم عليها خد بخد ) مبروك
روان : ( حست ريلها ترجف ) الله يبارك فيك
جاسم : يللا عيل احنا ماشين عن اذنكم
ام جاسم : خذ راحتك يمه الله معاك
--

- اركبو السياره –
جاسم : ( قعد يطالع روان ) مبروك حبيبتي
روان : ( اسمعت حبيبتي انقمت صدرها )
جاسم : اشفيج روان ؟
روان : لا ماكو شي
جاسم : ( شغل السياره ومشى ) بنتمشى بعدين نتعشى اشرايج ؟
روان : ( ساكته ماقالت ولا حرف )
جاسم : روان معاي؟
روان : هلا ؟ شنو قلت
جاسم : سرحانه بشنو ؟
روان : لا ماكو شي
جاسم : اقول الحين بنتمشى بعدين نتعشى اوكي؟
روان : اليوم راح نروح بيتنا صح ؟
جاسم : لا يمكن باجر
روان : اوكي
--
( تمو يتمشون مده واهو ماسك ايدها بعدين راحوا مطعم عالبحر )

جاسم : ليش ماتاكلين
روان : مادري ماشتهي
جاسم : اكلي شوي عالاقل
روان : ( كلت شوي وهدت الصحن )
جاسم : انتي مرتبكه ولا متضايقه ؟
روان : ( ابتسمت عشان لا تضايقه ) لا مافيني شي بس افكر بأمي كنت ابيها معاي بهاليوم
جاسم : ( ابتسم لها وحط ايده على ايدها ) الله يرحمهم برحمته

- اطلعوا من المطعم وردو البيت –
( أول مادشو البيت )

هلا : مو منصجك ؟؟!!
جاسم : ( يظحك ) اشفيج ؟
هلا : رادين مبجر ؟ لا انت مو طبيعي
جاسم : روان تعبانه ماقدرنا نطول
هلا : زين شكو رادين اهني روحو ارتاحو ببيتكم
روان : باجر انروح ان شاءالله
هلا : اوكي موفقين يارب
روان : انا صاعده اشوف اخواني ( راحت )
جاسم : و انا رايح ابدل عن اذنكم ( خلاهم وراح غرفته )
هلا : يمه شنو هذي مو طبيعيه ؟ خلته واصعدت
ام جاسم : وتلوميني اذا ماحبيتها
هلا : زين وين ينامون ؟
ام جاسم : بغرفته بعد وين
هلا : يحلييله جسوم والله وتزوج
ام جاسم : الله يهنيه
هلا : آمين
--

روان : ( قاعده مع اخوانها بغرفتها ) باجر نرجع بيتنا
( منال ومشاري استانسو ولموها )
روان : ( تظحك ارتاحت وايد لأنها اقدرت اتونسهم ) بس راح اضيق خلقكم واقولكم ان المدرسه الاسبوع الياي
منال : عادي احسن من البيت
مشاري : لا والله البيت احلى
روان : ( تمت اتسولف معاهم مده وماحست بالوقت )
فراس : ( قاعد يفرك عينه ويحن )
روان : ( اتطالع الساعه ) الساعه 12 وللحين مانومت فروس وانتو بعد متى تنامون يعني ؟
منال : اي والله حدي دايخه لأن انتي اليوم قعدتيني الصبح والسبه استشوارج
مشاري : عادي العب شوي بليستيشن بعدين انام ؟
روان : لا مو عادي ويللا روح نام بعد شوي واطل عليك اذا مو نايم يويلك
مشاري : زين قمت خلاص ( قام راح غرفته )
منال : ( انسدحت ) تصبحين على خير
روان : ( اتسوي حق فراس حليبه ) وانتي من اهله
فراس : ( يبجي ) اتييني
منال : سكتييه بناام
روان : ( عطته وقعد يشرب ) الحين ينام

- بعد نص ساعه واهي منسدحه يم فراس –
روان : ( بقلبها ) يارب ادري اللي اسويه غلط بس مو قادره اروحله

- شوي دشت هلا –

هلا : ( بصوت واطي ) روان قاعده
روان : اي كنت انوم فراس
هلا : تعالي معاي شوي
روان : اوكي ( قامت اطلعت معاها )
هلا : روان جاسم يسأل عنج وناطرج بغرفته
روان : ( قلبها يرقع ) بس فراس نايم ماقدر اخليه
هلا : عن الدلع خلاص انا انام يمه
روان : لا انا رايحه اكلمه بقوله اني بنام عند اخواني اليوم
هلا : ( طالعتها مده بنظره غريبه ) انتي فيج شي مو طبيعي
روان : شنو يعني فيني ؟
هلا : انتي ادرى
روان : مافيني شي بس مرتبكه شوي
هلا : لا ترتبكين هذا ريلج ولا تحاتين اخوانج تكشخي وروحيله
روان : ( فيها بجيه ) اوكي ( خلتها ودشت الغرفه )

- بطلت الليت واقعدت تبجي بس على قد ماتقدر مقصره صوتها عشان لا تقعـّد اخوانها –
( راحت بطلت كبتها وخذت الدبدوب واقعدت تلمه )

روان : والله احبك بس خلاص انا مو لك

..مشتاق له ميت عليه ..
..وينه بعد عمري ابيه ..
..بحكي له عن كل الي صار ..
..عن غيبته ليل ونهار ..
..وبلهفتي بحظن ايديه ..
..وين بعد عمري ابيه ..

ردت الدبدوب وامسحت دموعها وراحت البست قميص محتشم والبست فوقه روب طويل و وخلت شعرها مبطل لي جتفها وعدلت شكلها حطت مكياج خفيف – كحل مسكرا وقلوس – ( بعد مهما يكون هذا ريلها وماتروحله بويه اصفر ) .. خذت تلفونها وباست الشاشه ( كانت متعوده تسوي جذي بعد ماتكلم بدر ) .. طفته ( مغلق ) وحطته بدرج الكبت واطلعت .. لقت هلا بره
هلا : اي جذي اشحلاتج ( لمتها ) والله اني عادتج اختي بس مرات اتنرفز ومادري شقول سامحيني.. ولا تحاتين فروس راح انام عنده
روان : ( قاعده ترجف ) اوكي
هلا : ( امسكت ايدها ) اشفيج ترجفين لا تخافين سمي بسم الله وروحي حق ريلج
روان : اوكي عن اذنج ( خلتها وراحت غرفة جاسم – بنفس الدور - )

- اوقفت مده عند الباب ماتبي اتدش .. وكان ودها ترجع بس تعوذت من ابليس وسمت بسم الله وطقت الباب –


= اسف حبيبي سامحني واعتذر =
= يشهد الله اني من بعدك بكيت =
= بكيت من همي وضيقي والقهر =
= ليتني ما عرفتك ولا بك التقيت =
= ليت يوم شفتك غضيت النظر =

جاسم : منو ؟
روان : ( بصوت يرجف ) آنا روان
جاسم : ( قام بطل الباب وكان لابس شورت قصير )
روان : ( شافته قلبها قام يرقع ونزلت راسها )
جاسم : ( يبتسم ووخر عن طريجها عشان تدش ) حياج
روان : ( دشت الغرفه وريلها ترجف )
جاسم : ( سكر الباب ومسك ايدها وقعدها يمه عالسرير ) قعدي شوي بكلمج
روان : ( اقعدت والدموع متعلقه بعينها )
جاسم : ( رفع راسها من حنجها ) طالعيني .. ليش هالدموع ؟ خايفه مني ؟
روان : ( ارمشت جان تطيح دموعها على خدها )
جاسم : ( يمسح دموعها بيده وباس راسها ) لا تخافين
روان : ( صوت نسمها عالي كانت تحاول تسيطر على اعصابها وماتبجي )
جاسم : اشفيج روان ؟
روان : مابي
جاسم : شنو اللي ماتبينه ؟
روان : مابيك تسوي شي
جاسم : ( ابتسم ) خلاص ماراح اجيسج لين تهدين اوكي ؟
روان : ( اتهز راسها – اوكي - )
جاسم : (سكر الليت وانسدح ) زين ماتبين تنامين ؟
روان : ( انسدحت بعيد عنه على طرف السرير ) بلى

- مرت نص ساعه و روان وجاسم عالفراش اثنينهم ومو قادرين ينامون وقاعدين يفكرون روان وقتها قاعده تفكر ببدر وودها تبجي بس مو قادره .. وجاسم قاعد يفكر بروان وشلون يحاول يكسبها ومايضيق خلقها .. التفت عليها وقرب منها –

روان : ( ترجع لي وره ) جاسم مابي الله يخليك
جاسم : ( مسكها و باس راسها وخدها ) اهدي شوي

( غمضت عينها وتحاول ترضى بالي قاعد يصير .. قرب منها جاسم اكثر وباسها بس ماتجاوبت معاه .. رفع راسه وطالعها )
جاسم : حبيبتي انا ريلج الحين

( روان فجأه اقعدت تبجي واهو منصدم يطالعها )
جاسم : خلاص والله انا آسف نامي ماراح يصير شي

( وخر عنها وعطاها ظهره واهي هدت وغمضت عينها وتمت تبجي من غير صوت لين نامت )
---

- ثاني يوم الصبح -
هلا : جاسم .. جاسم قووم ( اتطق الباب حيل ) قوم جاسم ابوي ناطرك
--

( روان نايمه على طرف السرير أول ما سمعت صوت الباب ينطق فزت طالعت جاسم لقته نايم على بطنه وايدينه تحت المخده )
روان : ( اقعدت وتلحفت عدل ) جاسم .. جاسم
جاسم : ( يرد واهو نايم ) همممم
روان : ( تحط شعرها وره اذنها ) جاسم قوم
جاسم : ( نايم مايرد )
روان : ( تهزه من جتفه عالخفيف ) جاسم قوم هلا تناديك

( جاسم انزعج لأنها تهزه ولأن الباب ينطق بقوه )

جاسم : ( بعصبيه ) هاااا هااا
روان : ( اخترعت ) لا بس هلا تناديك
جاسم : ( يصرخ على هلا ) زييين خلاص كسرتي الباب قمت
روان : ( اتطالعه مصدومه ولا مره شافته جذي يصرخ )
جاسم : ( استوعب انها يمه ) آسف بس اذا قمت من النوم اكون متنرفز شوي
روان : لا عادي
جاسم : ( يبتسم لها ) صباح الخير
روان : صباح النور

( جاسم قرب منها جان ترجع جسمها لي وره )

جاسم : ( تنرفز ) تره مابي شي بس كنت بصبح عليج ببوسة خد واقوم اروح المحكمه عشان عقد الزواج
روان : ( ساكته )
جاسم : ( قام ) كملي نومتج
( راح دش حمام الغرفه – عزكم الله – وسكر الباب بقوه و روان تمت قاعده مكانها وخذت المخده ولمتها )

 
 

 

عرض البوم صور بوح قلم   رد مع اقتباس
قديم 29-07-10, 04:14 PM   المشاركة رقم: 22
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,330
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت التاسع عشر **



( جاسم قرب منها جان ترجـّع جسمها لي وره )

جاسم : ( تنرفز ) تره مابي شي بس كنت بصبح عليج ببوسة خد واقوم اروح المحكمه عشان عقد الزواج

روان : ( ساكته )

جاسم : ( قام ) كملي نومتج

( راح دش حمام الغرفه – عزكم الله – وسكر الباب بقوه و روان تمت قاعده مكانها وخذت المخده ولمتها )

بعد فتره طلع واهي نفس مكانها ماكلمها ولا قال شي بس صلى ولبس دشداشته واهي قاعده عالسرير متلحفه واتطالعه واهو يلبس الغتره



جاسم : ماراح تردين تنامين ؟

روان : لا بقوم اغسل بعدين اطل على فراس

جاسم : ( كمل يلبس غترته ) اليوم بالليل في عندنا عشى رياييل بالدوانية وهم انتو عندكم عشى حريم ماقالت لج هلا ؟

روان : بلى

جاسم : نادي خالاتج واللي يعز عليج

روان : اوكي

جاسم : ( خلص لبس و حط شوية دهن عود بيده فركهم ببعض ومسح على ارقبته ) يللا انا ماشي تبين شي ؟

روان : لا تسلم

جاسم : مع السلامه ( خلاها وطلع )



( أول ماطلع قامت اسبحت و راحت غرفتها لقت اخوانها نايمين .. بطلت الكبت خذت تلفونها افتحته وخذت الدبدوب و انسدحت يم فراس وغمضت عينها بترد تنام )



- شوي دشت هلا -

هلا : روان ؟

روان : ( توها بتغفى جان تقوم ) هلا ( هلا )

هلا : بتردين تنامين ؟

روان : يعني قلت شوي انام لي الظهر

هلا : ( ابتسمت ) امس مانمتي صح ؟

روان : ( حست ان هلا تقصد بسؤالها شي ثاني بس سوت روحها مافهمت ) بلى نمت الحمدلله

هند : ( قامت ) اوكي عيل اخليج

روان : ( ردت غمضت عينها ولمت الدبدوب )



( نص ساعه جان يرن تلفونها وقعدها من النوم )

روان : الو ؟

فجر : هلا حبيبتي روّون ولهت عليج اشلونج ؟

روان : الحمدلله بخير

فجر : ها قعدتج من النوم ؟

روان : اي

فجر : اوكي بخليج تنامين بس تره امي اليوم عازمتكم عالغدى انتي وجاسم

روان : اليوم ؟

فجر : اي اليوم عطيه خبر ها

روان : وانتو بالليل معزومين عالعشى عندنا

فجر : اوكي اقول حق امي .. وانتي لا تنسين تقولين حق جاسم

روان : اوكي باي ( سكرت التلفون ودزت حق جاسم مسج )

" السلام قوه جاسم .. خالتي حصه اتقول اليوم الغدى عندها مادري يناسبك او لأ ؟ "



( شوي جان يدق )

روان : الو

جاسم : هلا روان .. كنت اتمنى اشوفج داقه بدل المسج

روان : ( ساكته )

جاسم : عموما خالتج الحين بحسبة المرحومه امج .. فأكيد بعتبرها عمتي وما ارفض عزيمتها

روان : تسلم

جاسم : يللا انا الحين بالمحكمه أي شي تبينه دقي ماحب سوالف مسجات

روان : اوكي

جاسم : يللا ديري بالج مع السلامه

روان : باي



( نامت ساعه وقامت الظهر قعدت اليهال وقالت لهم يبدلون وخلت خيريه تاخذ فراس وتلبسه )



- البست و انزلت الصاله لقت ام جاسم وهلا –

روان : السلام عليكم

ام جاسم : وعليكم السلام زين شفناج

روان : ( ساكته ماردت )

هلا : ( تغير الموضوع ) ها شكلج طالعه ؟

روان : اي بنروح انا وجاسم واليهال بيت خالتي عازمتنا عالغدى

ام جاسم : وليش ماعطيتوني خبر عشان ماحسب حسابكم ؟

روان : مادري خالتي انا الصبح دريت و..

ام جاسم : ( تقاطعها ) شنو الصبح دريت انتي عبالج انتو واحد ولا اثنين ؟ انتو خمسه وكلكم بتروحون كل هالأكل وين بوديه يعني ؟

هلا : يمه حصل خير عادي اشفيج

ام جاسم : شنو عادي كل شي عندكم عادي ( قامت واهي تتحلطم )

هلا : ميخالف روّون طوفيلها تره ماتقصد

روان : ( تبتسم ) لا عادي ماصار شي

هلا : ها اشلون امس ؟ كل شي تمام ؟

روان : ( ماعرفت شترد ) الحمدلله

هلا : ( ابتسمت ) الحمدلله



( دش جاسم )

جاسم : السلام عليكم

روان وهلا : وعليكم السلام

جاسم : ( قعد يم روان ) ها متى نروح ؟

روان : الحين بس يخلصون لبس

جاسم : على خير .. زين امي وابوي وين ؟

هلا : امي بدارها وابوي للحين مايه

جاسم : خل اقولها اني بتغدى بره

هلا : لا ماله داعي تونا قلنالها .. روحوا اخذوا راحتكم



( انزلو اليهال مع الخدامه )

جاسم : ( وقف ) يللا عيل مشينا

---



- بيت ابو محمد –



فجر : شنو هذا يمااا .. ماقدر على المحاشي بمووت حطيلي بصحن تصبيره

ام محمد : فجور طلعي من المطبخ و روحي شوفي يعقوب شنو لابس لا يفشلنا

فجر : يمه اشكبره شكو نشوف شنو لابس

ام محمد : ابي مره وحده اقولج شي وتسمعين الكلام .. خل اروح ابدل قبل لا اييون

فجر : اي يمه روحي فشله تقعدين بدراعه فيها ريحة طباخ

ام محمد : فجوور تراج طالعه من بطني اعرفج عدل .. تبيني اطلع عشان تحطين لج اكل بس يللا جدامي روحي بدلي انتي بعد

فجر : فديتها كله جاكتني .. يللا صج صج بروح البس ( راحت غرفتها )



- بعد فترة اوصلوا جاسم وروان واليهال -



ابو محمد : اهليين جاسم وعليكم السلام ( يسلمون على بعض خد بخد )

ام محمد : هلا وليدي اشلونك

جاسم : ( يبتسم ) الحمدلله بخير اشلونكم انتو

ام محمد : بخير دامكم بخير حياكم



( اقعدوا بالصاله .. روان اقعدت يم فجر واليهال راحوا غرفة يعقوب )

ام محمد : خيريه خلاص خلي فروس عندي وروحي مع اليهال

خيريه : اوكي ( راحت )

فجر : ( مقصره صوتها ) اشلونج ؟

روان : زينه

فجر : اشون الزواج

روان : ( طالعتها مده واسكتت )

فجر : اشفيج ؟

روان : ماكو شي بس مالي خلق ارد عليج

فجر : ( تحاول تلطف الجو ) اشهالنفسيه لا يكون حملتي ؟

روان : ( تخزها ) فجر اشفيج بالظبط

ابو محمد : ها يبه روان اشلونج ؟

روان : الحمدلله بخير

ابو محمد : مبين على جاسم خوش ريال تتهنون ان شاءالله

جاسم : ( يبتسم ) تسلم عمي

روان : ( قاعده تطالع جاسم اول ما طالعها بسرعه لفت ويهها )



- بعد الغدى روان اصعدت فوق مع فجر –

فجر : يللا سولفيلي

روان : اذا قصدج شنو صار فخل اختصر عليج واقولج ماصار شي

فجر : صج ؟؟!!

روان : اي والله ماصار شي

فجر : ليش؟

روان : ( عصبت ) وتسألين ليش؟

فجر : ادري روان بس خلاص انتي تزوجتي مايصير جذي و جاسم ريلج يعني ..

روان : ( تقاطعها ) ادري ريلي بس والله ماقدرت حاولت بس كل شوي بدر ايي على بالي وماقدر اسوي شي احس اني اخونه

فجر : ( انصدمت ) اتخونينه ؟؟؟!! انتي جذي قاعده تخونين جاسم حتى لو تفكرين ببدر مجرد تفكير هم يعتبر خيانه

روان : ( دمعت عينها ) ادري بس والله موبيدي كل ما اشوف جاسم يطري علي بدر واقعد اقارن بينهم وادري ان هالشي غلط بس مادري شسوي

فجر : تقارنين!!

روان : ( دموعها انزلت واهي معصبه ) اي اقارن .. اقارن بالشكل و بالعمر

فجر : اذا تبين تقارنين بشي قارني ان جاسم خذاج وعزج ورضى فيج وبخوانج وان بدر ماسواها

روان : خلاص فجر سكري هالموضوع

فجر : لا ماراح اسكره قاعده تقارنين بالعمر ومادري شنو وبدر اساسا حتى ما...

روان : ( قاطعتها ) أي اكيد اقارن بالعمر انتي تدرين ان طول عمري اتمنى آخذ واحد اكبر مني مو آنا اكبر منه

فجر : الريال بتصرفاته مو بعمره

روان : لو خطبج واحد اصغر منج توافقين ؟؟

فجر : ( ساكته )

روان : ردي علي ليش ساكته ؟

فجر : اي اذا زين ارضى ليش لأ

روان : والله انج جذابه واعرفج عدل ماكنتي راح ترضين

فجر : والله روان اللي سويتيه اهو الصح وتره مبين ان على جاسم انه ريال طيب واللي تسوينه فيه والله حرام

روان : ( زادت بجي ) فجر انا تعبت حرام عليج والله ماقدر اتحمل كل هذا احس اني مضغوطه لا تزيدين علي

فجر : ( اكسرت خاطرها ) روان آنا كل اللي قصدته انج تعطين جاسم فرصه عشان تحبينه كل مايطري بدر على بالج فكري بشي ثاني .. خلاص عاد روّون لاتبجين

روان : ( تمسح دموعها وتسكت شوي ) .... اهو كلمج ؟

فجر : روان اشفيج ؟؟ خلاص لاتتكلمين عنه انسيه انتي الحين متزوجه

روان : اذا كلمج سلمي عليه وطمنيني

فجر : اذا كلمني ماراح اقولج ولا ابيج تكلميني عنه لأن اللي قاعده تسوينه غلط



- دشت منال –

منال : روان جاسم يقول يللا بنمشي

روان : خلاص الحين انزل

منال : اوكي ( اطلعت )

فجر : عدلي شكلج الكحل صاير عفيسه

روان : ( اوقفت عند المنظره وعدلت مكياجها ) يللا انا رايحه

فجر : ( سلمت عليها ) ديري بالج ولا تفكرين بشي غير بيتج

روان : ( ماعلقت على جملتها ) اليوم مو ماتييون

فجر : أي اكيد راح انيي

روان : اوكي باي

فجر : مع السلامه



- أول ماراحت روان فجر اقعدت بطلت اللاب توب لقت بدر اون لاين –



Good Bye Beautiful Days :

السلام

Fjo0oOo0o :

هلا بدر

Good Bye Beautiful Days :

ها يت عندج ؟

Fjo0oOo0o :

اي توها راحت

Good Bye Beautiful Days :

واشلونها ؟

Fjo0oOo0o :

الحمدلله بخير

Good Bye Beautiful Days :

اكيد ؟

Fjo0oOo0o :

اي اكيد

Good Bye Beautiful Days :

فجر والله ماني قادر اتحمل ودي اسمع صوتها واقولها اني اهني

Fjo0oOo0o :

لا يويلك حرام عليك لا تعذبها اكثر الحين اهي متزوجه لا تسوي جذي

Good Bye Beautiful Days :

زين عالاقل بدز لها ايميل اتطمن عليها

Fjo0oOo0o :

ماتشوف ايميلات ولا تبطل النت .. فلا تتعب عمرك وخلاص خلها انت مو قلت لها اتشوف حياتها اشتبي الحين

Good Bye Beautiful Days :

والله تعبان فجر حسي فيني ودي ادزلها أي شي اتطمن عليها عالأقل

Fjo0oOo0o :

خلاص انا طمنتك عليها واهي بخير عفيه بدر لا تسوي جذي حرام عليك خلها تتعود على حياتها اليديده

Good Bye Beautiful Days :

خلاص اوكي

---



- بيت ابو جاسم –

( عزيمة العشى )

( روان كانت لابسه نفنوف طويل علاق وحيل ناعم لونه ذهبي على نحاسي ومسويه شعرها استشوار ومن فوق بف خفيف مع تاج نحاسي بسييط .. و حاطه مكياج برونزي ناعم .. كان شكلها وايد حلو)



ام علي : ( رفيجة ام جاسم ) ماشاءالله جنتج تهبل يستاهل جاسم

ام محمد : اي الله يهني ولدي

ام علي : اذا عندها اخت تره حجزتها من الحين حق عليوي

ام محمد : ( تظحك ) شنو ناويه اتزوجينه مره ثانيه



- فجر يت مع اهلها وثنتين من بنات خالتها فاطمه ( حريم كبار ) مع اعيالهم ويو بعد ثنتين من رفيجات روان اللي تعرفهم من ايام الثانويه و اقعدوا يمها وظحكوها حست ان اليوم حلو ومافكرت بشي وبعدين تعشو ومشو الناس –



هلا : الرياييل للحين بالدوانيه والساعه 11 تأخر الوقت ما اتوقع بتروحون بيتكم اليوم

روان : مادري اهو قال اليوم .. خل اروح ابدل واكلمه

هلا : اوكي



( روان اصعدت فوق لقت خيريه منومه فراس ومنال مبدله ملابسها ومنسدحه )

روان : منول لا تنامين بدق على جاسم اشوف انروح بيتنا ولا لأ

منال : اوكي

روان : ( دقت على جاسم ) الو ؟

جاسم : الو هلا

روان : اقول جاسم اليوم بنروح بيتنا ؟

جاسم : لا باجر بعد الغدى احسن لأن الوقت تأخر ومشاري كاهو يمي ومبين عليه نعسان

روان : اوكي خلاص

جاسم : روان

روان : هلا

جاسم : لا تبدلين بشوف شكلج

روان : ( ساكته )

جاسم : زين ؟

روان : اوكي

جاسم : يللا باي ربع ساعه واصعد



( روان سكرت التلفون وقلبها يرقع ودها تبدل وتنام قبل لا يرجع )

منال : ها اشقال ؟ انام ولا انطر ؟

روان : لا نامي باجر بعد الغدى نمشي

منال : ( تلحفت وغمضت عينها ) اوكي

روان : خيريه حطي فراشج اهني بالارض عشان اذا قام فروس تشوفينه لأني ماراح انام اهني

خيريه : اوكي ( راحت اتييب فراشها )



( تمت روان قاعده وخايفه وماودها تروح تقوم بس بتتعوذ من ابليس وتروح .. خذت ملابسها وطفت جهازها مغلق وحطته بالدرج وراحت غرفة جاسم )

- تمت قاعده بالغرفه وكل ما تتذكر بدر تخنقها العبره وتفكر بشي ثاني .. بعد شوي دش جاسم –

( أول مادش طالعها وقعد يبتسم واهو بعيد )



جاسم : اشوف قومي اوقفي

روان : ( قامت اوقفت وريلها ترجف )

جاسم : ( مشى لين صار جدامها ومسك ايدها وباسها ) طالعه وايد حلوه

روان : ( ساكته )

( جاسم قرب منها يبي يبوسها جان ترجع لي وره )

جاسم : ( بصوت هادي ) اشفيج روان ؟

روان : ( بدت ترجف ) مافيني شي

جاسم : زين يللا بدلي

روان : اوكي ( راحت خذت ملابسها وبتدخل الحمام – عزكم الله - )

جاسم : وين ؟

روان : ببدل

جاسم : بدلي اهني ماراح اشوف

روان : لا لأني بغسل بعد و..

جاسم : لا تغسلين عاجبني مكياجج

روان : اوكي ابدل وارجع ( دشت الحمام )



( جاسم ابتسم وفصخ دشداشته وانسدح .. روان اطلعت من الحمام لابسه قميص طويل علاق وكانت حييل مرتبكه ومتضايقه )

جاسم : ( يبتسم لها ويطق عالسرير يمه ) تعالي

روان : ( انسدحت بس بعيده عنه )

جاسم : ( انسدح على جنب ورفع جسمه شوي وسند راسه على ايده وقعد يطالعها ) روان

روان : ( طالعته وقلبها يدق بسرعه ) هلا

جاسم : تدرين انج قمر

روان : ( لفت ويهها وطالعت السقف )

جاسم : سولفي

روان : عن شنو ؟

جاسم : عن العشى اليوم منو يه وشنو صار

روان : ( للحين اتطالع السقف ) يو رفيجاتي وفجر وبنات خالتي الكبار و..

جاسم : ( قاطعها وقعد يطالع فوق ) لحظه شنو فيه

روان : ( طالعته ) شنو؟

جاسم : مادري انتي قاعده اتطالعين السقف قلت يمكن فيه شي متعلق

روان : ( اظحكت ) لا مافي شي

جاسم : اتهبل ظحكتج و نادر اشوفها

روان : ( اسكتت وتمت اتطالعه )



( قرب منها باسها جان اتدزه عالخفيف من صدره بس كمل وماوخر لين هدت وتجاوبت معاه .. بعد 5 دقايق دزته عنها حيل )

روان : ( بصوت عالي ) وخر خلاااص مابي ( قامت اقعدت وتلحفت عدل )

( جاسم حقرها قرب منها جان تدزه )

روان : ( اقعدت تبجي ) اقولك وخر عني مابي ماابي

جاسم : ( يطالعها وحييل تنرفز ) انتي مرتي شنو مابي

روان : مابي خلاص الله يخليك

جاسم : ( يكلمها بهدوء ) روان انتي مو صغيره يعني اتعرفين ان هذا شي لازم يصير

روان : مو مستعده حاليا خلاص خلني على راحتي

جاسم : ( معصب ) شنو اخليج على راحتج انتي اصلا مو ناويه تستعدين

روان : بلى بس مو الحين الله يخليك عطني وقت

جاسم : لي متى يعني ؟

روان : مادري الله يخليك خلني جم يوم والله اوعدك اني راح اصير احسن

جاسم : ( ساكت يطالعها مده بعدين انسدح مكانه وعطاها ظهر )



( روان تمت تبجي بصوت واطي لأنها موقادره ترضيه )



- اليوم الثاني بعد الغدى ارجعو بيتهم وكان اليوم اللي قبله مخلين الخدامه تنظفه وتسنعه –

( منال ومشاري حيل استانسو وكل واحد راح غرفته يركض )



روان : شفتهم اشلون مستانسين

جاسم : ( للحين منفس من سالفة امس ) اي



( روان اصعدت معاه غرفتها وكانت كبيره ( ماستر مع حمام ) و فيها سرير بونفرين )

روان : هذي غرفتي .. اقصد غرفتنا

جاسم : راح انغير اثاثها لأن شكله بناتـّي وايد

روان : ( ابتسمت ) اوكي

--



- مر اسبوع اليهال ردو المدرسه وجاسم كل يوم يعطيها ظهره وينام وماحاول يقرب منها –

( بالليل جاسم واليهال قاعدين بالصاله يطالعون تلفزيون وروان بالمطبخ )

جاسم : ( ينادي ) خيريه خيريه

خيريه : ( يت ) نام بابا

جاسم : ( عطاها فراس ) روحي نوميه ونامي خلاص

خيريه : اوكي

جاسم : ها شباب ماتبون تنامون ؟ باجر مدرسه

مشاري : لاااا .. خل انشوف الفلم معاك

جاسم : باجر راح اقعدك مبجر مو تقوولي خلني انام تره اسويلك ضربتي الساحقه

مشاري : ( يظحك ) اشلون ورني

جاسم : تبي تشوف متأكد ؟

مشاري : اي متأكد

جاسم : ( نط على مشاري وقعد يسوي روحه ياكل كرشته )

مشاري : ( ميت ظحك ) خلاااص خلاااص والله راح اسويها على نفسي هدني خلااااص

جاسم : تستسلم ؟؟؟؟

منال : ( تطالعهم وتظحك ) اي صج خله الحين يسوي شي يفشل اهو كله جذي

جاسم : ( وخر عنه ) لا يحوشك يبخر الصاله بعدين

( مشاري ومنال اقعدو يظحون بعدين راحو ينامون )



( قام جاسم راح حق روان بالمطبخ لقاها واقفه اتطالع كبت الصحون .. راح وراها وحط ايده على بطنها و لمها وقعد يشم شعرها من وره روان بغت اتوخر بس ماخلاها )



جاسم : لا تتحركين خلينا شوي جذي

روان : جاسم هدني اليهال بالصاله

جاسم : ( بصوت هادي ) اليهال نامو .. ( باس راسها من وره وارقبتها ولمها اكثر )

روان : ( ماقدرت تتحمل بتوخر عنه بس ماهدها ) جاسم هدني

جاسم : ( هدها وتم يطالعها بس نظراته كانت تخوف و غير عن كل مره )

روان : انا مو قلتلك خلني على راحتي ؟

جاسم : ( يصرخ ) انتي ليش وافقتي عالزواج اذا ماكنتي قده هاا ؟

روان : جاسم انا ..

جاسم : ( يصرخ واهو مقهور ) انتي ثلج مافيج مشاعر لا والله انتي ابرد بعد لأن حتى الثلجه لو مسكناها تذوب ( طلع من البيت وخلاها واقفه ودموعها تنزل )



- روان راحت غرفتها ودقت على فجر وقالتلها عن اللي صار –

فجر : والله مادري شقولج .. انتي وايد غلطتي بحقه حاول يعطيج فرصه ومايقرب منج بس هم نفس الشي ماصار منج أي تغيير

روان : ( تبجي ) فجر ماقدر والله كل مايلمسني احس ان بدر موجود ويطالعنا

فجر : خلاص عاد ذبحتينا ببدر انتي الحين تزوجتي جاسم لا تييبين طاري بدر لا تخونين ريلج روان فهمي عاد

روان : ( تبجي ) والله نفسيتي تعبانه حتى البيت تعبني زياده كل شي يذكرني فيهم حتى المواعين كل شي

فجر : تعوذي من ابليس وروحي نامي الله كريم تنحل الامور ان شاءالله

روان : ان شاءالله .. اوكي اخليج الحين باي

فجر : باي

--

( راحت غرفتها وانسدحت اتحاول تنام مو قادره لين أذن الفير قامت صلت ودعت ربها ان يريحها من اللي اهي فيه ويقدرها ترضي زوجها خلصت صلاة و اقعدت عالسرير تحاتي جاسم .. خذت التلفون ودقت عليه )



جاسم : ( باسلوب ناشف ) نعم ؟؟

روان : ( بصوت واطي ) وينك ؟

جاسم : موجود اشبغيتي ؟

روان : بغيتك ترجع البيت

جاسم : ليش يعني ؟ عشان احرسكم انتي واخوانج ؟

روان : ( تضايقت من كلمته بس اعذرته ) لا عشان اكلمك

جاسم : كلميني الحين سامعج

روان : لا ابيك اتيي

جاسم : ( سكت )

روان : جاسم ؟

جاسم : هلا

روان : ناطرتك

جاسم : نص ساعه وايي

 
 

 

عرض البوم صور بوح قلم   رد مع اقتباس
قديم 29-07-10, 04:18 PM   المشاركة رقم: 23
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,330
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت العشرون **

روان : جاسم ؟
جاسم : هلا
روان : ناطرتك
جاسم : نص ساعه وايي

(( روان سكرت التلفون ودموعها انزلت على خدها .. راحت الحمام – عزكم الله – و تسبحت عالسريع كانت تبجي تحت الماي بس قررت ان من اليوم بتعدل حياتها ( وياكثر ماتقول هالجمله ) .. اطلعت من الحمام نشفت شعرها بالفوطه و حطت كريمات وعطر و تكشخت ( كحل ومسكرا وجلوس وردي ) بطلت درج كبتها وطلعت قميص أبيض البسته وراحت اقعدت عالسرير ومخليه شعرها مبطل واهو رطب ( مبلل شوي ) بس شكلها كان وايد حلو ))

- واهي ناطرته حست ان قلبها بيوقف كانت وايد مرتبكه وتفرك ايدها عشان توقف الرجفه وطبعا طول هالوقت ماقدرت اتشيل بدر من بالها واسرحت واهي تتذكر عيونه ابتسامته حنجه المقسوم .. لحيته الديرتي كل شي تذكرته بهاللحظه وجنها تشوفه جدامها .. خذت نفس طويل عشان لا تبجي .. بهالوقت دش جاسم –

( أول ماشافها حس وده يروح لها ويلمها وينسى كل اللي سوته بحقه .. بس مسك نفسه و راح قعد جدامها عالسرير )

جاسم : روان انا مابي تسوين هالشي عشان خاطري وبس .. انا ابيه طالع من اهني ( أشر على صدرها ) اذا الشي ماطلع من الخاطر مابيه
روان : ( طالعته ودموعها بعينها حست ان كسر خاطرها وانها وايد اغلطت بحقه )
جاسم : ليش ماتقوليلي شنو فيج تره صارت تطري على بالي اشياء ماودي افكر فيها ريحيني وقوليلي بشنو تفكرين ؟
روان : ( نزلت راسها ) اخاف اني ما اسعدك
جاسم : بس انا متأكد انج بتسعديني
روان : ( طالعته )
جاسم : ( مسك ايدها وباسها ) تدرين اني احبج ؟
روان : ( حست الكلمه عورت قلبها زياده ودها تحس بهالشي ناحيته بس موقادره )
جاسم : ( يبتسم ) ومتأكد انج راح تحبيني لأني انحب
روان : ( ابتسمت بضيق )
جاسم : ( باس راسها وابتسم ) الحين نامي ومتى ما استعديتي عدل سويلي نفس اللي سويتيه الحين ( قعد يطالع ارقبتها وجتفها بعدين قام يبدل )

( قلب روان قعد يدق بسرعه واهي تطالعه يبدل ملابسه.. تم عالشورت وسكر الليت وانسدح يمها )

جاسم : ( مد ايده عشان تنسدح عليها ) تعالي يمي
( انسدحت على ايده ولمها وغمض عينه )
روان : ( متردده حيل بس خافت لو هدها اليوم على راحتها تصعب عليها الامور اكثر ) جاسم ؟
جاسم : هلا حبيبتي
روان : ( كانت ترجف حيل بس حطت ايدها وره ظهره ولمته )
جاسم : ( حس بشعور حلو و ماوده تهده .. باس راسها ولمها ) نامي حياتي
روان : ( بصوت واطي ) مابي انام
جاسم : أكيد ؟
روان : اي اكيد

( نزل راسه وباسها وتجاوبت معاه وخر عنها يبي يشوف اذا راح ترجع لي وره او لأ بس ما بعدت عنه بالعكس كانت حاطه ايدها على ظهره )
---

- غرفة فجر –
( الساعه 6 الصبح .. رن تلفونها وقعدها من النوم )

فجر : ( اتطالع الرقم وغصب استوعبت ان هذا رقم بدر ردت عليه ) الو ؟
بدر : ( صوته تعبان ) قعدتج من النوم؟
فجر : وعليكم السلام اي قعدتني من النوم وليش داق انا مو قلتلك اذا بتسأل عنها اسأل بالمسنجر وبس؟
بدر : فجر وصلت عند بيتها ورجعت قوليلي شسوي احس اني راح اين
فجر : ( صحصحت و اقعدت عالسرير ) شنو؟؟؟ لا صج انت ينيت وخلصت
بدر : اي ينيت احس قلبي يتقطع وانا اتخيلها بيد غيري والله ودي اذبحه
فجر : بدر اشفيك انت اللي هديتها
بدر : ( يصارخ ) مو داق عليج عشان تعيدين لي هالاسطوانه ادري اني هديتها والحين بموت من الغيره
فجر : زين لا تصرخ اهدى شوي
بدر : مابي اهدى ابي اشوفها واكلمها لو مره وحده بس عفيه فجر قوليلها اني بالكويت يمكن ترضى تشوفني آخر مره بس
فجر : ( منصدمه مو عارفه شتقول ) ماني عارفه شقولك والله انربط الساني انت انسان غريب
بدر : اذا ماراح تساعديني انا راح ادق عليها او ادز لها مسج
فجر : تبي تخرب بيتها يعني ؟
بدر : لا مابي اخرب بيتها والله ابيها تعيش مرتاحه ومتهنيه بس ودي اكلمها لو مره وحده بس
فجر : ماراح يصير هالشي لأنها الحين متزوجه .. و لو سمحت لا تدق عليها .. واذا للحين تحبها لا تخرب حياتها كافي اللي شافته منك

- ام فجر دشت عليها الغرفه –

ام محمد : انتي تكلمين منو من صباح الله خير صوتج واصل لي الممر
فجر : خلاص روان انتي نامي واذا قمتي انكمل سوالف .. باي ( سكرت التلفون بويه بدر )
ام محمد : اشفيها روان ؟
فجر : قامت تصلي ودقت تسولف والحين بترد اتنام .. زين انتي اشقعدج ؟
ام محمد : تذكرت ان يعقوب عنده علوم اليوم وموصينه اييب البالطو الابيض رحت اجهزه له قبل لا يروح المدرسه ويتوهق
فجر : اوكي عيل انا برد انام .. اذا قاعده الساعه 8 قعديني لأن محاضرتي الساعه 10
ام محمد : وانتي كله تاخذين ساعتين تتزهبين قبل المحاضره حشى رايحه عرس مو كليه ( خلتها واطلعت )
فجر : ( تمت اتطالع التلفون واهي خايفه من بدر ) الله يستر لا يخرب عليها
----

- غرفة روان وجاسم –
( روان منسدحه على جنب وجاسم لامها ومنسدح وراها )

جاسم : ( بصوت هادي ) نامي حياتي .. انا بعد شوي اودي اليهال المدرسه لا تحاتين شي
روان : ( مغمضه عينها تتذكر و ادموعها تنزل )

- بريطانيا : جامعة كامبريدج –
( درس الاسعافات الأوليه .. بكتب الحوارات بالكويتي )

الدكتور ديفد : تعالي روان شوي
( روان قامت راحت حق الدكتور و طالعت بدر واهي تبتسم )
الدكتور : عطيني ظهرج بليز
روان : ( لفت عطته ظهر )
الدكتور : لاحظوا معاي كلكم لو الشخص غاص وكان يختنق .. تروحون وراه بهالطريقه وتحطون ايدكم تحت الصدر مباشره ( كتـّف ايده وحطهم تحت صدر روان )
روان : ( خافت من بدر ماحطت عينها بعينه )
بدر : ( وقف وراح حق الدكتور ) دكتور لو سمحت
الدكتور : ( هد روان ) نعم ؟ اشبغيت ؟
بدر : ( مسك ايد روان وكلمها بالكويتي ) روحي قعدي مكانج يعني ماقدرتي اتقوليله لأ ؟
الدكتور : تكلم بلغة افهمها شاللي قاعد يصير اهني؟
روان : ( انحرجت من الموجودين وردت مكانها واهي معصبه من غيرة بدر )
بدر: دكتور انا آسف بس اهي خطيبتي وبديرتي مايصير احد يمسكها بهالطريقه الا زوجها .. تقدر تكمل الشرح علي آنا
---

- عند روان وجاسم -

روان : ( فجأه ماتت بجي ماقدرت تمسك اعصابها اكثر )
جاسم : ( فتح عينه ولفها عليها ) اشفيج اشصاير ؟

( روان تمت تبجي بصوت عالي مثل اليهال واهو يحاول يهديها )

جاسم : اشفيج فهميني ؟ في شي يعورج ؟ تبين اوديج الطبيب ؟
روان : ( تبجي وتهز راسها - لأ - )
جاسم : زين فهميني اشفيج ؟
روان : ( لمته وادفنت راسها بصدره واهي تبجي ) تذكرت امي حسيت اني محتاجتها
جاسم : ( لمها ) ادري ياعمري ادري انج فاقده وجودها خصوصا بهالوقت .. بس انا راح اصيرلج كل اهلج لا تبجين خلاص عاد
روان : ( تمت تبجي مده لين هدت )
جاسم : ( باس يبهتها ) لا تبجين خلاص .. ( يبتسم ) الحين صرتي مره عيب تبجين
روان : ( ردت تبجي وتشاهق )
جاسم : ( لمها اكثر واهو يظحك ) آسف عمري كنت اتغشمر معاج والله .. بس عاد خلاص اهدي

- انطق عليهم الباب –

خيريه : بابا .. مشاري منول يلبس خلاص متى ودي مدرسه ؟
جاسم : ( يعلي صوته ) كاني قايم الحين اوديهم
جاسم : ( يطالع روان ويمسح دموعها ) روّونه خلاص عشاني لا تبجين رايح اغسل واوديهم واذا رجعت ابي اشوفج نايمه اوكي؟ ومابي دموع زين ؟
روان : اوكي
جاسم : ( باسها بوسه سريعه على خشمها وقام واهو يبتسم ) الساعه 7 الا ثلث والله أخرناهم وايد ( خلاها ودش الحمام )

 
 

 

عرض البوم صور بوح قلم   رد مع اقتباس
قديم 29-07-10, 04:20 PM   المشاركة رقم: 24
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,330
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت الحادي والعشرون **

جاسم : ( يطالع روان ويمسح دموعها ) روّونه خلاص عشاني لا تبجين رايح اغسل واوديهم واذا رجعت ابي اشوفج نايمه اوكي؟ ومابي دموع زين ؟
روان : اوكي
جاسم : ( باسها بوسه سريعه على خشمها وقام واهو يبتسم ) الساعه 7 الا ثلث والله أخرناهم وايد ( خلاها ودش الحمام )

- أول مادش الحمام قامت البست وردت انسدحت وغمضت ودها تنام وماتفكر بأي شي –

( طلع جاسم من الحمام )
جاسم : ( راح يمها وباس خدها ) أحبج
( روان افتحت عينها طالعته وابتسمت )
جاسم : ( قاعد يلبس ) حياتي لا تسبحين نامي زين ؟
روان : لا بسبح
جاسم : لا ماتسبحين بروح اوديهم وارجع ابيج بكلمة راس
روان : ( صار ويهها احمر ) تونا متكلمين وبعدين انت قلت نامي
جاسم : اي نامي ساعتين واقعدج ابي اكلمج مره ثانيه
روان : ( اسكتت )

- خيريه اتطق الباب –
خيريه : روااان متى ودي مشاري منول مدرسه
جاسم : زيييين خلاص روحي .. ( يكلم روان ) هذي على طول بتناديج روان ؟ انتي الحين معزبتها لازم تقولج مدام او ماما
روان : لا متعوده عليها منزمان تناديني باسمي
جاسم : على راحتج يللا انا ماشي ( طلع من الغرفه )

( روان غمضت عينها واقعدت تقرى آية الكرسي والمعوذات وتحاول ما تفكر بأي شي .. وتمت تقرى مده لين نامت )
---

- جاسم وصل اليهال المدرسه وراح بيت اهله -
( دش لقى هلا بالصاله )

جاسم : السلااام عليكم
هلا : اهليين اخووي حبيبي اقعد قولي شمسوي مع مرتك
جاسم : ( قعد يمها ) اول شي شمقعدج من الصبح ؟
هلا : دق علي حسن وقالي جم كلمه حلوه طيرو النوم من عيوني .. عاد قعدت اشوف تلفزيون
جاسم : اكيد كلام حلو؟ .. ولا تهاوشتو ؟
هلا : ( تبتسم ) حسن مايطلع كلامه الحلو الا مرتين بالسنه على الحد الأقصى
جاسم : الله يهديه ويوفقج معاه
هلا : ( تسوي روحها مو متضايقه ) زين خلك مني وقولي اشلون الزواج معاك ؟
جاسم : ( يبتسم ) وايد حلو
هلا : تتهنون ان شاءالله .. شوف متى ماتبون تتخلصون من اليهال قطو علي فروس والباجي ودوهم بيت خالتهم
جاسم : خوش فكره لأن خاطري اروح الشاليه معاها
هلا : اي والله روحوا استانسو
جاسم : زين انا ياي اتريق عندكم بس وين امي ؟ ما اشوفها
هلا : الحين تقوم ونتريق
---

- كلية العلوم –

( فجر قاعده مع رفيجاتها وكل شوي يرن تلفونها وماترد عليه .. بعدين حطته سايلنت )

عنود : ها فجور ؟ اشعندج ليش ماتردين عاللي يدق صارله ساعه واهو يحن حني عليه شوي
فجر : هذي بنت عمي كلش مالي خلقها اكيد تبي تطلع معاي
مريم : فجر حطي عينج بعيني .. اعرفج اذا جذبتي
فجر : اوو عاد ذبحتوني بسكم حنه والله اني ما اكلم
عنود : زين ليش عصبتي ؟ وبعدين اشفيها لو كلمتي عادي حلو الحب
فجر : لا ويع مادري شالحلو فيه كله بجي وفراق

- وصل حق فجر مسج بطلته وقرته –
" فجر دقي علي ضروري "
فجر : ( قامت )عن اذنكم بنات
عنود : ( تكلم مريم ) شفتي ايدي هذي والله اقطعها من عرجها اذا ماكانت تكلم
مريم : الحمدلله والشكر وشكو ماتقول شنو بناكله يعني ؟
---

- بعيد عنهم –

فجر : ( متنرفزه ) بدر انا مو قلتلك لاتدق ؟ اليوم الصبح بغيت اتسويلي سالفه مع امي والحين مع رفيجاتي
بدر : كنت عند بيتها وشفت الحقير طالع مع اليهال يوديهم المدرسه .. والله كان ودي ادعمه
فجر : بدر !! اشفيك خلاص البنت تزوجت مومنحقك تسوي جذي
بدر : خليها تكلمني
فجر : لا
بدر : ( يصارخ ) خليها تكلمني لا والله امسكه واطلع حرة الدنيا كلها فيه
فجر : ( خافت ) بدر اهدى شوي الله يخيك .. خلاص انا اكلمها بس هدي نفسك
بدر : ناطرج اترديلي خبر ( سكر التلفون بويهها )
---

- غرفة روان –

( دش جاسم لقى روان نايمه وخر الغطى وانسدح وراها وتلحف .. قعد يلمها ويبوس خدها وارقبتها وجتفها )
روان : ( افتحت عينها ) جاسم خلاص
جاسم : ( يبوس جتفها ) احبج
روان : ( ودها تقوم بس ماسكها )
( لفها عليه وقعد يبوسها ....... )

- بعد ربع ساعه رن تلفونها –
جاسم : خليه يولي
روان : اوكي

- تم التلفون كل جم دقيقه يرن –

جاسم : وخر عنها ردي عليه او خلاص طفيه
روان : ( اقعدت وخذت تلفونها ) هذي فجر
جاسم : ردي عليها صرفيها
روان : اوكي ( ردت عليها ) الو .. هلا فجر
فجر : في احد يمج ؟
روان : اي الحمدلله انتي اشلونج
فجر : زين عفيه ضروري اكلمج اول مايروح دقي علي
روان : خلاص اكلمج بعدين اوكي ؟ .. باي ( سكرت التلفون )
جاسم : ( خذه تلفونها وطفاه مغلق وقرب منها حطه عالميز وراها وقعد يطالعها واهو يبتسم ) جذي احسن
---

- كلية العلوم –

فجر : ماقدرت اكلمها كان موجود يمها
بدر : الله ياخذ عمره .. خلاص انا اتصرف مشكوره ( سكر التلفون )
فجر : ( بقلبها ) الله يستر
---

- غرفة روان –

روان : جاسم انا لازم اقوم .. بسبح
جاسم : ( عيونه حمر من التعب والنعس ) واليهال ؟
روان : انا راح اييبهم انت نام
جاسم : اي والله احس خلاص بموت من النعس
روان : خلاص عيل هدني خل اقوم
جاسم : ( وخر ايده عنها ) يللا قومي افراج
روان : ( تبتسم ) خذت روبها من يم السرير والبسته وقامت

- اسبحت وخلصت لقت جاسم بسابع نومه .. بدلت ملابسها واطلعت من الغرفه –

فراس : ماما وان
روان : ( شالته ولمته ) حيااتي ولهت علييك
فراس : وله عليك
روان : ( باسته ) عمري انت .. خيريه مشكوره ادري تعبتج وايد تشوفين فروس وتسوين الغدى لو انتي ماكو مادري جان اشسويت
خيريه : ميكالف روان .. انا عرف انتي توه في زوج لازم مشغول
روان : ( تبتسم ) شنو سويتيلنا ؟
خيريه : برياني دياي
روان : ريحته تهبل واصله لي اهني
خيريه : مو بس ريهه طعم بعد واجد حلو
روان : ( تظحك ) اي ادري كل شي تسوينه حلو ماشاءالله

( اقعدت مع فراس بالصاله لين صار موعد طلعة اخونها من المدرسه )
روان : ( تنادي ) خيريه
خيريه : نام روان
روان : خيريه انا بروح اييب اليهال من المدرسه شوفي فروس
فراس : ( شافها بتطلع لحقها واهو يبجي ) ماما واان انا رووح
روان : تبي تروح معاي ؟ زين خلاص لاتبجي باخذك معاي ( شالته ) يللا خيريه مع السلامه ( اطلعت من البيت )

- بيت ام محمد –

ام محمد : يمه فجر اشفيج ؟
فجر : مافيني شي
ام محمد : اشلون مافيج شي وانتي من ييتي من الكليه وحالتج مو عاجبتني
فجر : لا ماكو شي بس ضايق خلقي
ام محمد : من شنو ؟
فجر : ماكو شي والله ( قامت وخلتها )

- دشت دارها اتدق على روان وكله يطلعلها مغلق –
فجر : قلبي بيوقف وهذي مادري وينها
---

- بالطريج رادين من المدرسه –

روان : اشفيج منول ؟
منال : ماكو شي
روان : اشفيج حبيبتي
منال : قلتلج ماكو شي
روان : استغفرالله يارب
مشاري : ( قاعد يلعب فراس ) هذا فروس ياب البيضه سلقها وقشرها وكلاها
فراس : ( قاعد على كرسي اليهال ويضحك )
روان : منول قوليلي اشصاير اعرفج اذا كنتي متضايقه
منال : ( بعصبيه ) انتي تغيرتي علينا
روان : انا ؟؟ متى تغيرت عليكم
منال : من تزوجتي وانتي ماتقعدين معانا وايد وكله مع جاسم
روان : ( منصدمه ) انا ؟؟؟؟
منال : اي اي انتي وامس ماطليتي علينا قبل لا ننام ولا شفتينه الصبح قبل لا نداوم وخليتينا نتأخر وماهمج .. وايد تغيرتي
روان : حرام عليج بس اليوم صار هالشي .. يمكن لأني مانمت الا الصبح
منال : مابي اسمع خلاص .. ( اقعدت اتطالع الشارع )

( روان تضايقت حيل بس اعذرتها لأنها تمر بمرحلة انتقاليه بين الطفوله والمراهقه لازم تتحمل اطباعها )
---

- اوصلت البيت مع اليهال دشت الغرفه بدلت ملابسها البست نفنوف بيت وراحت تقعد جاسم –

روان : ( تهزه شوي شوي ) جاسم ؟ .. جاسم ؟
جاسم : همممم
روان : ماتتغدى
جاسم : ( يكلمها واهو مغمض ) لا خليني انام
روان : اوكي ( خلته واطلعت )

- وصت خيريه تحط الغدى وخذت فراس تبدل ملابسه .. خلصت واقعدو عالغدى -

مشاري : اليوم استاذ الرياضيات مسك فهد رفيجتي وطقه كف والله من قوة الكف طاح فهد عالارض جان يقول حق الاستاذ يا حيوان
منال : احلف ؟
مشاري : والله العظيم
منال : واشسوه الاستاذ ؟
مشاري : قعد يصارخ وبغه يطقه مره ثانيه بس فهد طلع وراح حق الوكيل
روان : والله لو طقك جان رحتله نتفته

( تمت اتسولف و لهت معاهم بعدين درستهم وخلتهم ينامون العصر.. واقعدت بالصاله بطلت تلفونها .. ولا توصل لها 5 مسجات .. اربعه من فجر تطلب منها اتدق عليها اول ماتبطل الجهاز .. وواحد كان مكتوب فيه جذي
" اشلونج روان ؟ انا فاطمة بدر .. جيكي على ايميلاتج "

( أول ماقرت المسج حست الدنيا تفتر فيها .. وبسرعه دقت على فجر )

روان : الو
فجر : انتي وينج والله قلبي بغى يوقف ليش طولتي ؟ من الصبح ناطره
روان : اشقالج ؟
فجر : اهو كلمج ؟
روان : ( صوتها يرجف ) لا بس داز مسج يقولي شوفي ايميلاتج
فجر : والله ين رسمي
روان : اشقالج ؟
فجر : يقول يبي يكلمج مره وحده عالاقل .. بس روان لا تردين عليه عفيه والله حرام انتي متزوجه الحين
روان : ( دموعها انزلت ) بروح اشوف الايميل باي ( سكرته بويهها )
--

قامت دشت الغرفه خذت لابتوبها وانزلت الصاله بطلته وايدها ترجف وقلبها يدق بسرعه .. اشبكت ودشت عالايميلات لقت آخر واحد من بدر

افتحته والدموع معلقه بعينها .. كان هذا المكتوب بالايميل
---

وش مسوي مع غيري .. وش الدنيا في قربه قول
ياروحي انت متهني .. ولابشوقي لي مشغول
انا مازلت افكر فيك .. واموت فحبك وطاريك
ولكن هذي اطباعي .. اخبي الحزن بي ماقول

رجعت اسأل غصب عني .. جبرني الشوق واعذرني
انا ماقدر على قلبي .. عجزت القى لوفاه حلول

أمانه ان جيت في بالك .. تطمن قلبي عن حالك
على الذكرى انا عايش .. وكيف انساك مو معقول



مابي اكثر من انج تضغطين عالرابط وتسمعينها عدل واذا للحين لي معزه بقلبج كلميني
روان ادري انج تزوجتي وربي يهنيج بحياتج .. بس انا حيل مشتاقلج ودي اسمع صوتج عالأقل لو مره وحده الله يخليج طلبتج لا ترديني )
----

( روان قرت الايميل واسمعت الاغنية و دموعها تنزل على خدها وموقادره توقفهم )
روان : ( بقلبها ) ليش يابدر .. ليش الحين .. ليش؟

لو طاوعت انا نفسي و سلمت لك قلبي بيديك
تقدر ترد امسي و عمري اللي ضيعته عليك
ياحبي قولي ليش تمر في غفلة اشواقي
و انا بربيع العمر تتساقط اوراقي
خايف على روحي من صحوة جروحي
ليش تاخذ العمر و تجي
وش باقي عندي ترتجي
جا الفرح من عاشق منك انجرح
آه يالفرح معذور و الله يالفرح
----

ردت عليه بهالايميل واهي ميته بجي ..
" سامحني بس ماعاد ينفع هالشي .. الله يوفقك ولا تحاتيني انا بخير "

( سكرت الصفحه وقامت واهي تبجي راحت الحمام – عزكم الله - )
- نص ساعه اقعدت تبجي وعقب ماهدت غسلت ويهها و اطلعت –

دشت الصاله لقت جاسم قاعد عاللاب توب وعيونه عالشاشه .. شافته حست الدنيا تفتر وريلها ترجف .. جاسم حس فيها جان يرفع راسه ويطالعها

 
 

 

عرض البوم صور بوح قلم   رد مع اقتباس
قديم 29-07-10, 04:33 PM   المشاركة رقم: 25
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,330
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت الثاني والعشرون **

- نص ساعه اقعدت تبجي وعقب ماهدت غسلت ويهها و اطلعت –

دشت الصاله لقت جاسم قاعد عاللاب توب وعيونه عالشاشه .. شافته حست الدنيا تفتر وريلها ترجف .. جاسم حس فيها جان يرفع راسه ويطالعها

جاسم : ( أشر عالقنفه ) تعالي قعدي يمي
روان : ( خايفه ) اشفيك؟
جاسم : تعالي يمي اشفيج واقفه بعيد
روان : ( غصب تمشي وراحت يمه بس تمت واقفه )
جاسم : ( يطالعها ) روان اشفيج ؟ قعدي
روان : ( اقعدت يمه وعينها عالارض مو قادره اتشوف اللي قاعد يشوفه )
جاسم : ( يأشر عالشاشه ) عطيني رايج أيهو أحلى ؟
روان : ( ارفعت راسها وشافت الشاشه ولا يطلع موقع السينما سينسكيب .. طالعت جاسم وتحس ودها تبجي )
جاسم : ( يبتسم ) ها أي فلم أحسن؟ انا محتار بين هالأثنين
روان : ( للحين تحس ريلها ترجف ) مادري كيفك اثنينهم زينين
جاسم : يعني اختار على ذوقي ؟
روان : اي
جاسم : زين .. بختار الساعه 7 ونص .. ونودي اليهال بيت خالتج اوكي؟
روان : اوكي
جاسم : اشفيج ماودج تروحين ؟
روان : ( تبتسم ) لا لا عادي
جاسم : اكيد ؟
روان : اي اكيد
جاسم : ( حوطها بيده وخله راسها على جتفه ) دام اكيد عيل خل نختار فلم مع بعض مابي اختاره بروحي .. بعدين يطلع مو حلو وتقطينها براسي
روان : ( بقلبها ) آسفه والله ماتستاهل اللي اسويه فيك
----

- بيت ابو جاسم –

ام جاسم : يمه اشفيه حسن معاج ؟
هلا : ( ساكته )
ام جاسم : انا امج حبيبتي قوليلي اشفيج ؟ ادري انج يايه من البحرين وانتي زعلانه بس ليش شالسبب ؟
هلا : يمه حسن بيتزوج علي
ام جاسم : ( مصدومه ) شنو !!!؟؟
هلا : ( عيونها اتدمع ) اي يبي عيال وانا ماقدر اعطيه اللي يبيه
ام جاسم : ( معصبه ) الله ياخذه
هلا : يمه لا تدعين عليه هالشي منحقه
ام جاسم : زين انتو مو سافرتو تتعالجون ؟ ليش ماينطر يمكن تحملين
هلا : ماكو فايده .. وخلاص قرر يتزوج
ام جاسم : ( ساكته متضايقه )
هلا : يمه خلاص حياتنا صارت كلها نجره وهواش .. صاير يكرهني لأني ما اييب عيال .. خلاص خليه يتزوج كيفه
ام جاسم : واهو قاعد يدق عشان يبيج ترجعين ؟
هلا : اي بس انا ما اتحمل اكون يمه واهو متزوج .. ابي اتطلق
ام جاسم : ( انصدمت ) شنو؟؟!!
هلا : ( دموعها انزلت ) اي يمه ابي اتطلق خلاص والله ماقدر اتحمل
ام جاسم : يمه تعوذي من ابليس وخليج مع ريلج
هلا : لا مابي خلاص و لا تجبروني ارجع .. انا ييت اهني عشان ارتاح لا تضغطون علي
ام جاسم : الله يهديج وترجعين حق بيتج ريلج
هلا : خلاص يمه مابي اتكلم بهالموضوع ( قامت وخلتها )
---

- بيت روان وجاسم –

روان : ( صوتها يرجف ) فجر ماقدر اعلي صوتي بس تخيلي كان قاعد عاللاب توب والله حسيت اني بغيت اطيح غشيانه .. شسوي لو كان شايف شي ؟؟
فجر : اهدي خلاص الحمدلله ماصار شي .. وبعدين افرضي على يوم طلب الباس وورد .. عفيه روان مسحي كل الايميلات وانا راح اكلمه واقوله لا يخرب حياتج
روان : خلاص الحين لازم اروح ابدل بنقط اليهال عندكم اوكي؟
فجر : اوكي
روان : باي ( سكرت الخط )

- راحت حق منال –

روان : يللا حبيبتي منول بدلي ملابسج بنقطكم انتي واليهال بيت خالتي حصه
منال : وانتي ماراح تيين معانا ؟
روان : لأ .. انا بطلع مع جاسم
منال : اوكي انا مابي اروح خلوني اهني
روان : منول عمري ميخالف شوي ماراح اطول وارجع اخذكم
منال : اهناك كله صبيان وفجر كله عالنت محد يقعد معاي
روان : قعدي مع خالتي .. و والله ماراح اطول وعد
منال : ( معصبه ) شنو اهو غصب يعني ؟ مابي اروح .. روحو وخلونا اهني مع خيريه
روان : لا مايصير
منال : بلى يصير
روان : ( بصراخ ) خلاص منال لا تيننيني قومي لبسي لا تأخريني ( خلتها واطلعت )
منال : ( قامت وسكرت باب غرفتها حيل )
روان : ( واقفه عند الباب ) لا تتأخرين ربع ساعه كوني تحت
جاسم : اشفيكم ليش اصواتكم عالية ؟
روان : منال ماتبي تروح بيت خالتي
جاسم : وخري شوي ( يطق الباب ) منوله بطلي الباب
منال : ( تبجي ) اشتبون الحين ؟ خلاص راح البس
جاسم : انتي بطلي شوي
منال : ( بطلت الباب وويها احمر ورموشها مبلله ) نعم ؟
جاسم : ( يطالع روان ) ممكن تخلينا على انفراد ؟
روان : على شنو ؟
جاسم : ( يظحك ) على انفراد .. تره انا مثقف اعجبج
روان : ( تبتسم ) اوكي اخليكم رايحه اشوف الثاني جهز ولا للحين قاعد عالبليستيشن ( خلتهم وراحت )
جاسم : ( يكلم منال ) تره احنا ماكنا بناخذج معانا لأن الفلم رعب قلت يمكن ماتنامين بالليل
منال : بس انا مو صغيره عادي ماخاف
جاسم : لا الفلم هذا حتى الرياييل يخافون منه .. المهم انا الحين قمت اشوف الافلام بالموقع جان القى واحد ثاني كوميدي .. عاد الحين بناخذج معانا
منال : ( تغيرت ملامحهها ) بس روان ماتبيني ايي معاكم
جاسم : اصلا اهي اللي اقترحت هالشي .. بس انا قلت لها الفلم رعب خليها تروح بيت خالتها احسن بس الحين راح نروح كوميدي ونبيج معانا
منال : ( ابتسمت )
جاسم : يللا لبسي ناطرينج تحت
منال : اوكي
---

- بيت ابو محمد –

فجر : ( تتكلم بالتلفون ) اللي سويته اكبر غلط .. ترضاها على مرتك؟
بدر : انا ماراح اتزوج
فجر : لو نفرض انك تزوجت ترضى مرتك تكلم حبيبها اللي قبل ؟؟
بدر : انا ادري انها دزت الايميل من وره قلبها وادري انها راح اتدق علي بس انتي لو شوي تسكتين عنها .. والحين انا مشغول ماقدر اكلمج
فجر : لا انت غلطان اهي ماتبي تكلمك ولا بتشوفك وانا ماراح اسكت عنها لأن اللي تسويه حرام واذا خربت حياتها شنو راح تستفيد ؟
بدر : فجر جد مشغول اخليج الحين اذا ممكن
فجر : لو عندك شي اتقوله جان قلته بايميل وخلاص .. بس اللي تبي تسويه انك تعور قلبها وتخرب حياتها
بدر : لا مابي اعور قلبها بس ابي اطلبها طلب واحد .. و بعدها بخليها على راحتها .. وانا اعرف اشلون اخليها تكلمني
فجر : ( بعصبيه ) بدر انت ... معاي خط ثاني باي ( ردت على روان )
روان : الو احنا بره فجو الباب لهم
فجر : اوكي .. روان ديري بالج اوكي
روان : اوكي مع السلامه
---

- عند روان –

مشاري : ليش ماتنزل منال ؟
منال : كله صبيان اهني و انا بروح معاهم
مشاري : وين بتروحون ؟
منال : بنروح ..
روان : ( ماخلتها تكمل ) مشاري حبيبي يعقوب ناطرك بيلعب معاك ماتبي تروح له ؟
مشاري : بلى
روان : يللا عيل انزل ودير بالك على اخوك احنا بنروح شوي السوق ونرجع
مشاري : اوكي ( راح مع خيريه وفراس )
----

- سيارة بدر –

( بدر واقف بعيد يطالع اليهال انزلو من السياره وروان وبدر ومنال مشو .. وقعد يلحقهم من بعيد )

بدر : ( ماسك السكان بعصبيه ) اذا الايميل مافاد اكيد شوفتي راح اتخليج تكلميني
---

- اوصلوا الفنار وانزلوا .. اصعدوا فوق حق السينما –

جاسم : ( حجز 3 تذاكر ) الفلم بعد ربع ساعه امشوا نقعد بالكافتريا
روان : اوكي

( بدر كان وراهم بس ماشافته روان .. راح عند شباك التذاكر )

بدر : لو سمحت ابي حجز يم الجماعة اللي قبل شوي
الموظف : ( طالعه ) اتعرف أي فلم بيدشون ؟
بدر : انت اللي تعرف .. توهم حاجزين عندك
الموظف : بس اهم مكان عائلي مايصير
بدر : زين انت بس ورني وين بيقعدون وخلاص انا اختار
الموظف : انت تبي تشوف الفلم ولا شنو بالظبط ؟
بدر : ( معصب بس ماسك اعصابه ) انا بدفع فلوس وادش الفلم مو شغلك اذا بنتبه عليه او لأ
الموظف : ( قصر الشر و سواله اللي يبيه )

( روان ومنال اقعدو على طاوله )

جاسم : شنو تبون ؟
روان : انا ابي عصير برتقال بس
جاسم : وانتي ؟
منال : ابي بوب كورن كاراميل وعصير
جاسم : اوكي ( راح يشتريلهم )
منال : ( تبتسم ) جاسم طيب وايد
روان : اي وايد
منال : انا مستانسه ان ساكن عندنا

( روان ابتسمت لها .. واول ماشافت جدامها ولا تختفي ابتسامتها وقلبها اتحس ان راح يطلع من مكانه .. لقت بدر قاعد عالطاوله اللي جدامها وكان يطالعها و مبين عليه ان حيل معصب وعيونه صايره حمر )

روان : ( حست الدنيا ظلمت عندها وويهها تغير لونه ) يارب سترك
منال : اشفيج ؟
روان : ( تحاول تكون طبيعيه ) لا ماكو شي
منال : بلى فيج شي

( يه جاسم وقعد جدام روان )

جاسم : ها نقعد شوي اهني ولا اندش القاعه من الحين ؟
روان : ( ساكته وقلبها يرقع )
منال : مادري كيفكم
جاسم : روان ؟ اشفيج ساكته
روان : لا ماكو شي
جاسم : انقوم اندش القاعه ؟
روان : اوكي
جاسم : ( وقف ) يللا عيل قوموا
روان : ( اوقفت جان تحس ان الدنيا تفتر ردت اقعدت مره ثانيه )
جاسم : ( حط الجياس عالطاوله ومسك ايدها ) اشفيج ؟؟ تعبانه ؟
روان : لأ بس دخت شوي
جاسم : تبين نرجع البيت ؟
روان : ( طالعت منال ) لا لا مافيني شي كاني قمت
جاسم : ( تم ماسك ايدها ومشوا مع بعض ) اذا تعبانه قوليلي تره نرجع عادي
روان : ( ريلها ترجف مو شايلتها بس تحاول تمسك اعصابها ) لا بس شوي دخت لا تحاتي
منال : ليش فجأه دختي ؟
روان : ( ماردت عليها بس قاعده تفكر ببدر وليش لاحقها )

- دشو القاعه اقعدت وبدر قعد يمهم بس بقسم الشباب وكان يفصل بينه وبين جاسم ممر .. لأن جاسم كان مختار انهم يقعدون عالطرف .. واهم قاعدين شافت تلفونها ولا فيه مسج ماكانت منتبهه عليه بطلته وايدها ترجف –

( المسج كان من بدر وهذا اللي مكتوب فيه )

" كنت اتمنى اني اكون مكانه .. بس الظروف كانت اقوى"

( روان اول ماقرت المسج امسحته على طول )

روان : ( تبتسم غصب ) يحليلها فجر
جاسم : اشفيها ؟
روان : ( اتحاول تسيطر على نفسها ) ماعندها سالفه تسألني عن اسم الفلم
جاسم : يحليلها
روان : ( اكتبت حق فجر مسج وايدها ترجف )
" فجر .. بدر اهني بالسينما وانا وايد خايفه .. شسوي ؟ "

( روان دزته بس طلع لها لم يتم الارسال لأن السيرفس بالسينما كان طايح )
-----------------------------------------------

 
 

 

عرض البوم صور بوح قلم   رد مع اقتباس
إضافة رد

مواقع النشر (المفضلة)
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 03:37 AM.


مجلة الاميرات 

 



Powered by vBulletin® Version 3.8.11
Copyright ©2000 - 2021, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية