لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 29-07-10, 03:53 PM   المشاركة رقم: 16
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,340
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت الثالث عشر **

( تمت روان نص ساعه تبجي بالسياره واتدق عليه بس مايرد .. ماكانت عارفه شتقوله بس ودها تسمع صوته )

- حطت التلفون على حضنها وشغلت السيارة ومشت رايحه بيت خالتها واهي ميته بجي -

( اوصلت بيت خالتها وامسحت دموعها ودقت على فجر )
روان : ( بصوت مبحوح ) فجر خليهم يطلعون انا بره
فجر : نزلي ليش تنطرين بره
روان : ماقدر خليهم يطلعون
فجر : روان اشفيج ؟؟ صوتج مو عاجبني .. نزلي قوليلي اشصار
روان : ( تبجي ) فجر والله تعبانه ماقدر انزل
فجر : خلاص انا الحين بييلج اقعد معاج لين يطلعون
روان : اوكي باي ( سكرت التلفون )
--
- بيت فجر –
فجر : ( حاطه على بجامتها عباية امها ولابسه ملفع ) خيريه جهزي الاغراض وقولي حق منول ومشاري يطلعون روان بره
ام محمد : وانتي وين على الله ؟؟ و شنو هاللبس ؟؟
فجر : بطلع اكلم روان بموضوع
ام محمد : واهي ليش ماتنزل ؟
فجر : مالها خلق خو مو غصب تنزل .. يللا بروح لها
ام محمد : خيريه عطيني فروس وروحي قولي حق اليهال ان روان بره
خيريه : ( عطتها فراس وكان حاط ايده بحلجه ) اوكي
ام محمد : ( توخر ايده ) وانت كله ايدك بحلجك
--

- بسيارة روان -

فجر : خلاص حبيبتي اهدي تلقينه معصب بس راح يرجع مثل قبل واحسن
روان : ( ميته بجي ) فجر ماشفتيه اشلون يكلمني .. قالي روحي موفقه
فجر : زين نزلي نامي عندي
روان : يبيني اهدهم وارجع معاه ماقدر اسويها .. ماقدر
فجر : انا راح اكلمه اذا شبك .. مسحي ادموعج ونزلي معاي
روان : ( تمسح دموعها ) ماقدر
فجر : بلى تقدرين .. بعدين انكلم عمج لا تحاتين شي
روان : فجر قلت ماقدر خلاص
فجر : روان لا تعاندين .. شوفي الحالة اللي انتي فيها اشلون تروحين اهناك ومرت عمج راح تغثج زياده انتي مو ناقصه
روان : ( ردت تبجي ) ماتدرين اشكثر محتاجه امي وابوي
فجر : ( دمعت عينها ) خلاص روان الله يخليج لا تسوين جذي بنفسج يللا نزلي حبيبتي انتي

- روان وفجر شافو اليهال يايين من بعيد جان يمسحون دموعهم –

مشاري : ( طق دريشه روان و بطلتها له ) روّوون عفيه عفيه عففففففففيه خليني انام بعد اليوووم باجر عطله
روان : ( بصوت مخنوق ) اصعد حبيبي
مشاري : ماراح اصعد خليني انام

( منال وخيريه وفراس اركبو وره )

منال : خلاص عاد لاتصير ياهل واصعد
مشاري : انتي مالج شغل اهي اختي الكبيره مو انتي
منال : تكلم معاي عدل فاهم
فجر : بس خلاص لا تتهاوشون .. ( تطالع روان ) روّون قلبي نزلي نامي عندي
روان : ( بصوت واطي ) ماقدر
مشاري : ( يصرخ ) امي كانت تخليني انام على كيفي .. ماحبج انتي نحيسه وكل شي احبه ماتخليني اسويه حتى بيتنا طلعتيني منه غصب

( كان كلام مشاري مثل القشه التي قصمت ظهر البعير , يعني بمعنى ثاني ان روان كانت غصب ماسكه نفسها وكلام مشاري خلاها تنهار )

فجر : خلاص روان عفيه هدي نفسج
روان : ( ميته بجي ) خلاص خليهم عندج انا باخذ فراس و اروح
مشاري : ( مصدوم ) خلاص روان والله انتي مو نحيسه .. لاتبجين
منال : اشفيج روان ؟
روان : ( امسحت ادموعها واسكتت شوي عشان تهدى ) مافيني شي حبيبتي نزلي مع مشاري باجر آخذكم
منال : لأ انا بروح معاج
فجر : روان خلاص عاد نزلي معاي
روان : اوكي ( طفت السياره ) يللا نزلوا

- انزلو كلهم ومشاري مسك ايد روان –

مشاري : والله العظيم انتي مو نحيسه بس كنت معصب وقلت جذي
روان : ( بصوت هادي ) خلاص حبيبي مافيني شي الحين
منال : ( امسكت ايد روان الثانيه ) تره هذا غبي مايقصد اللي قاله
مشاري : اي اي انا غبي والله
فجر : خلاص عاد لا تأذونها

- بيت ابو جاسم –

ام جاسم : شوف هذي حالتهم مايردون البيت الا متأخر
ابو جاسم : خلاص والله تعبت من حنتج
ام جاسم : و انت اشدراك انها عند خالتها ؟
ابو جاسم : اتقي الله يا مره اشهالحجي؟
ام جاسم : زين خلك جذي ياغافلين لكم الله
--

- غرفة فجر –

روان : اخاف يصر على رايه شسوي ؟
فجر : لا ان شاءالله راح يرجع لا تحاتين

( رن تلفون روان جان يفز قلبها وامسكته بسرعه وشافت الشاشة وطلع اللي داق عليها عمها حمد )

روان : ( متضايقه ) هذا عمي .. ومالي خلق ارد عليه
فجر : ردي قوليله انج بتنامين عندي
روان : ( ساكته اتطالع الشاشه )
فجر : يللا ردي قبل لا يتسكر
روان : ( ردت ) الو .. وعليكم السلام هلا عمي
ابو جاسم : هلا روان .. ها متى اتيون ؟
روان : عمي انا واليهال بنـّام اليوم اهني
ابو جاسم : لا يا حبيبتي ردوا البيت مايجوز تنامين من غير محرم

( روان اخنقتها العبره وماقدرت تتكلم بس أشرت حق فجر ان مو راضي )

فجر : ( اسحبت منها التلفون ) الو .. السلام عمي انا فجر
ابو جاسم : هلا يبه فجر اشلونكم؟
فجر : الحمدلله بخير .. بس الصراحه روان تعبانه نفسيتها وحيل متضايقه .. خلها اليوم تنام عندي وباجر ان شاءالله ترجع
ابو جاسم : ليش عسى ماشر اشفيها ؟
فجر : ماشر عمي .. بس شوي نفسيتها تعبانه بعد تدري اللي صارلهم موشويه
ابو جاسم : خلاص عطينياها ومشكوره يبه
فجر : ( عطت روان التلفون ) هاج وتره كل شي تمام
روان : ( خذت التلفون ) الو ؟
ابو جاسم : خلاص روان ناموا اليوم وباجر ترجعون ماشي يبه ؟
روان : اوكي عمي
ابو جاسم : يللا مع السلامه
روان : مع السلامه ( سكرت التلفون )
فجر : اشرايج فيني ؟؟ تره يسموني فجر طوارئ
روان : ( تبتسم ) وتقدر فجر طوارئ تنقذني بموقف ثاني؟
فجر : اكيد تقدر نطري بس خل يشبك واذا ماشبك انا ادق عليه حتى لو من تلفون الفرع واخليه يرجع
---

منال : خالتي؟؟
ام محمد : هلا يمه؟
منال : فروس قبل لا يسوي حادث كان يمشي الحين كله قاعد او يحبي .. يعني ماراح يرد يمشي مثل قبل؟
ام محمد : بلى حبيبتي بس لأن كان مده نايم فياخذ وقت وان شاءالله بيرد يمشي
منال : متى يعني؟
ام محمد : مادري بس قريب ان شاءالله
مشاري : اذا مشى يصير شيطان خلوه جذي احسن
ام محمد : لا حبيبي مشاري مايصير تقول جذي هذا اخوك
منال : ماشي انا اقول حق روان انك قلت جذي اخليها تزعل عليك مره ثانيه
مشاري : خلاص والله كنت اتغشمر لا تقولين لها الله يخليج
منال : تعطيني مصروفك لمدة اسبوع وما اقول
ام محمد : ( تظحك ) يحليلكم والله جني اشوف توم و جيري كله نجره
--
- اليوم الثاني –

( روان واخوانها ارجعوا البيت )
ام جاسم : ( بطنازه ) تو مااانور البيت اهلا وسهلا
روان : ( شايله فراس ) السلام عليكم
ابو جاسم : وعليكم السلام ورحمة الله .. ها يبه اشلونج الحين؟
روان : الحمدلله بخير
ابو جاسم : تعالوا قعدوا يمي يبه
( راحوا اقعدوا يمه )
ابو جاسم : يبه تره انا مو غريب عنكم انا عمكم واحبكم مثل ما احب جاسم وهلا
فراس : ( مسك لحية عمه ) داااد دااا
روان : ( تمسك ايد فراس ) لا ماما عيب
فراس : ايب
روان : ( تظحك ) اي ماما عيب
(مشاري ومنال قاعدين يظحكون على فراس )
ابو جاسم : اي جذي يبه وروني ظحكتكم ماتدرون اشكثر ارتاح اذا شفتها
روان : الله يخليك لنا ان شاءالله
ابو جاسم : ان شاءالله ويخليكم سالمين من كل شر

- بعد 3 اسابيع –

باللليل روان كانت اتدز مسجات حق بدر واتدق عليه وكان محول مغلق لأن المسجات كانت توصل فيبين ان محول
( بعد فتره وصل لها مسج )

روان : ( واهي تبطله ) يارب يكون من بدر
- المسج -
" روان والله اني تعبت و فكرت فيها وايد ولقيت اني مستحيل اخليج 4 سنين بعيده عن عيني "
- ردت عليه –
" الله يخليك رد علي بكلمك وغلاة اللي بينا اترد علي "

( دق عليها )

روان : الو ؟؟
بدر : ( صوته تعبان ) هلا روان
روان : ( بجت ) ماكنت متخيله اني راح اسمع صوتك .. امانه بدر لا تخليني والله احبك
بدر : ماقدر انا خليتج جم شهر حسيت عقلي بيطير وانتي بديره ثانيه .. بعد ماكنتي قريبه مني وكل يوم اشوفج والله صعبه اخليج ومادري شيصير ومحد ضامن عمره وماقدر اعلقج كل هالسنين
روان : انا مستعده انطر لو العمر كله مايهمني
بدر : بس انا يمهني .. روان انتي اللي كنتي ماسكتني عن اشياء وايد حتى ربعي اللي اهناك والله قاطعتهم عشانج والسبه سوالفهم .. و ماقدر اكون اهناك وقلبي اهني راح اتعب اكثر
روان : بس انا راح انطرك
بدر : روان بقعد معاج سنه وقرري فيها اتيين معاي بعدها او خلاص الله يوفقج
روان : ( تبجي ) بدر انا ماراح اخليهم واسافر
بدر : زين لو خذتج بعد 4 سنين وقلت نبي نسافر عندي شغل بره او بنسافر سياحه لمدة 3 اشهر نفتر العالم او أي شي من اللي خططنه له شيكون ردج ؟
روان : ماقدر اخليهم
بدر : خلاص عيل الله يوفقج
بدر : ( ميته بجي ) بدر لا تتخلى عني الله يخليك انا محتاجتك
بدر : وانا بعد محتاجج .. ابيج تمسكيني .. مو تخليني بروحي بره اخاف اسوي أي شي تعتبرينه خيانه لج وهم بنفس الوقت ماقدر اخليج اهني ومادري شيصير 4 سنين تره مو شويه.. وبغض النظر عن كل هذا انتي قاعده اتقولين حتى لو تزوجنا ماراح نطلع بره الكويت ؟؟
روان : اي ماقدر اخليهم افهمني الله يخليك
بدر : ( يتنفس بعصبيه ) خلاص روان أحسن شي كل واحد يشوف حياته والله يوفقج
روان : بدر لا تقول جذي اترجاك
بدر : تره اخوانج عند عمهم مو قاطتهم بالشارع .. فكري بكلامي ورديلي خبر قبل لا اسافر مع السلامه ( سكر الخط )

- روان لمت مخدتها واقعدت تبجي مثل اليهال –

~~~~~~~~~~~~~~~~~~~

كلن له الله لو تخليت عني
محدن يموت يا صاحبي قبل يومه
مادام قلبك جرح قلبي و طعني
ما اشره على إنسان بعدك و ألومه
كل المصايب دلن طريقي وجني
و الحزن أرسل لي باقي همومه
من كثر همي أحس الهم مني
لاغآب هم ٍ يجي هم يعلن قدومه
شمت كل عدآي وخيبت ظني
والقلب حطمت به باقي عزومه
تعآل شوف اليآس حلّ وسكنـّي
والجسم مايقوى يرفع هدومه
~~~~~~~~~~~~~~~~~

- منال دشت عليها وشافتها جذي –

منال : ( اقعدت يمها عالسرير ) روان اشفيج؟
روان : ( تمت دافنها راسها بالمخده بس امسكت بجيتها ) مافيني شي حياتي روحي لعبي تحت
منال : ( اتنعم على شعر روان ) صارلج جم يوم تبجين حتى بالليل اسمعج تبجين .. اشفيج اشتقتي حق امي وابوي ؟
روان : ( ردت تبجي وقامت لمتها ) مافيني شي بس البجي حزات يريح
منال : ( صوتها بدى يتغير جنها بتبجي ) انا ادري ان خالتي ام جاسم اهي السبب .. روان خلينا نرجع بيتنا
روان : ( امسحت دموعها ) مانقدر

- دش مشاري يركض –

مشاري : والله العظييييييم تعالوا معاي تشوفون شي حلو تحت
روان : ( تبتسم ) شنو والله العظيم تعالوا معاي ؟
منال : اي والله جنك هندي
روان : ( امسحت دموعها عدل و امسكت ايد منال ومشاري ) يللا ننزل

( انزلوا لقو فروس واقف وماسك ريل خيريه )

خيريه : توه يمشي شويه شويه
روان : ( اقعدت على اركبها ومدت ايدها واهي مبتسمه حيل ) فروسي تعال حبيبي
فروس : ( مشي 4 خطوات ) مااماا واان (وبغى يطيح جان تمسكه )
روان : ( لمته وماتت بجي ) حياتي انت
مشاري : روان ليش تبجين؟؟
روان : لأني احبكم تعالوا ( مدت ايدها لهم )

( مشاري ومنال اقعدوا يمها ولموها وبحضنها فراس )

روان : والله ماراح اخليكم .. انتوا دنيتي كلها

- ارفعت راسها شافت جاسم واقف يطالعها ويبتسم –

جاسم : الله يخليج لهم ويخليهم لج

----------------------------------------------------------

 
 

 

عرض البوم صور بوح قلم   رد مع اقتباس
قديم 29-07-10, 03:59 PM   المشاركة رقم: 17
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,340
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت الرابع عشر **

- ارفعت راسها شافت جاسم واقف يطالعها ويبتسم –

جاسم : الله يخليج لهم ويخليهم لج
روان : ( تمسح دموعها ) تسلم جاسم
جاسم : ها اشفيكم قاعدين عالأرض ؟
مشاري : فروس مشى
جاسم : ( شال فراس من حضن روان ) عفيه عالبطل
فراس : ( يظحك ويمسك خشم جاسم )
جاسم : عجبه خشمي لأن وايد صغير ( يتطنز طبعا )
- جاسم طويل و عريض بس ضعيف .. اسمراني شعره اسود كثيف .. عيونه بنية خشمة نوعا ً ما اعظمته كبيره ( نوعا ً ما ) مو حيل يعني و مو مخرب عليه .. يعني اهو كله على بعضه لا باس فيه –
روان : ( ابتسمت وقامت اقعدت عالقنفه )
جاسم : ( قعد يمها وبيده فراس ) روان انا ما احصلتلي فرصة اقعد معاج واكلمج .. بس الحين بسألج سؤال وابيج تجاوبين عليه بكل صراحه .. امي مضايقتج صح ؟
روان : ( اتطالع منال ومشاري قاعدين عند التلفزيون ) لا ماضايقتني
جاسم : روان آنا قلت ابيج تكونين صريحة معاي .. كلنا ندري انها مضايقتج وادري انج بجيتي بسبتها .. بس والله اهي انسانه طيبه من الداخل بس مادري اشفيها
روان : لا عادي ماصار شي يستاهل
جاسم : امي وابوي مو اهني ؟
روان : لا طالعين
---

- بيت ابو محمد –
( فجر قاعده مع اهلها يتعشون جان يرن تلفونها )

فجر : ( طالعت الرقم بس ماعرفته حطته ميوت ) الحمدلله انا شبعت
ابو محمد : يبه خلي عنج التلفون وكملي عشاج
محمد : واصلا شكو يايبه التلفون معاج عالطاوله ؟
فجر : روان متضايقه و أي وقت اتدق علي لازم ارد عليها
ابو محمد : زين كملي عشاج بعدين دقي عليها
فجر : اوكي
ام محمد : اي والله هالبنت وايد تكسر الخاطر .. الله يكون بعونها حست بالشقى واهي للحين ماتزوجت
ابو محمد : افا اشقصدج ؟
ام محمد : لا والله حشى ماقصدت اني بشقى .. بس اقصد مسؤوليه واعيال وتربيه وتدريس كل هذا حسته مره وحده حتى قبل لا تتزوج وتحمل
ابو محمد : الله يكون بعونها ويصبرها
ام محمد : والله لو محمد كبير جان زوجتها اياه عشان اتطمن عليها
محمد : زين ما انفع حق منال ؟
ام محمد : وييي .. هذي السـ..
فجر : ( انصدمت ) حموود استح على ويهك البنت ياهل ويع لوعت جبدي
ابو محمد : مسكين اشقال وبعدين بينهم سنتين عادي يكبرون ويتزوجون
ام محمد : اي والله هذي الساعه المباركه تكبر وانزوجكم مالك شغل باختك

( رن تلفون فجر نفس الرقم اللي قبل شوي )
فجر : ( قامت ) يللا الحمدلله .. لازم ارد عليها
----

- بيت ابو جاسم –

جاسم : زين انا بطلب شنو تبون عشى ؟
فراس : ( يقط نفسه على روان ) ماما وااان
روان : ( خذته من جاسم ) لا تسلم مانبي شي سلامتك
جاسم : ( جنه ماسمعها ) مشاري منول ؟؟ شنو تبون من المطعم
مشاري : أي مطعم ؟
جاسم : شنو تبي تتشرط يعني ؟؟ يبه مطعم فلافل وبطاط
مشاري : عندهم نقانق ؟
جاسم : اي عندهم
مشاري : زين ابي ثنتين مع كجب وجبن ومايونيز
جاسم : وانتي منول؟
منال : مثله
جاسم : ( يكلم فراس ) وانت ؟
روان : ( تبتسم ) لا هذا طلبه خاص سيريلاك وحليب
جاسم : زين وانتي ؟
روان : لا ما اشتهي تسلم
جاسم : يللا عاد طلبي عشان اخوانج
( روان قاعده تفكر ببدر ومتضايقه لانها تدري ان مايرضى تسولف مع جاسم )
روان : ( اوقفت ) لا مشكور مابي .. بصعد اغير حق فراس عن اذنك ( اصعدت وخلته بالصاله مع اليهال )
---

- غرفة فجر –

فجر : لا ماعرفتك منو معاي ؟
بدر : معاج بدر
فجر : ( انصدمت ) هلا بدر اشلونك ؟
بدر : تعبان
فجر : تره ما اسمعك عدل عندك هوا او شي مادري
بدر : اي انا عالبحر الحين رايح السياره
فجر : اوكي
بدر : ( ركب السياره ) اي فجر
فجر : هلا
بدر : انا قبل شوي مكلم روان مادري قالتلج او لأ
فجر : لا والله ماقالتلي
بدر : فجر انا اللي سويته صح او غلط
فجر : تبي الصراحه ؟
بدر : اكيد
فجر : اللي سويته حيل غلط .. اشلون تتخلى عنها واهي محتاجتك ؟
بدر : محد راح يفهمني .. بس انا ما اتحمل تبعد عني يوم واحد اشلون تبوني اخليها 4 سنين ومادري شيصير لها وبعدين
4 سنين تره عمر ومابي اعلقها كل هذا من غير زواج
فجر : عادي اهي راضيه و كلمها كل يوم بالنت و بالتلفون بس مو تهدها
بدر : صعب علي انا احترق من داخل اذا شفت احد يكلمها هذي واهي يم عيني اشلون اخليها واسافر كل هالمده ومادري شيصير ؟؟
فجر : ليش مو واثق فيها ؟
بدر : مو سالفة ثقه بس صعبه علي .. واذا ماتبي نتزوج خلال سنه خلاص خل اشوف حياتي و اهي اتشوف حياتها
فجر : زين عيل ليش داق ؟ اذا مو ناوي تحل المسأله
بدر : داق اسألج سؤال عشان اتأكد اللي سويته صج ولا غلط
فجر : شنو بتسأل
بدر : لو خليتها 4 سنين ورجعت وتزوجتها ورحنا سكنه بشقه .. اخوانها وين بتخليهم ؟
فجر : عند عمها اصلا اهو قايل لها انهم راح يكبرون تحت عينه
بدر : متأكده انها بتوافق اتخليهم ؟
فجر : اي اكيد بعد شتسوي مو معقوله تسكنهم معاكم بشقتكم
بدر : اوكي الحين اكلمها مشكوره
فجر : العفو .. مع السلامه
---

( روان نومت فراس وانسدحت يمه جان يرن تلفونها )

روان : ( قلبها يرقع وردت على طول ) الو ؟؟
بدر : اشلونج روان
روان : ( عيونها دمعت ) ولا شي من بعدك
بدر : روان لو فرضت اني بتحمل اعيش بروحي وبعيد عنج كل هالوقت .. ورجعتلج وتزوجنا .. فكرتي وين بيكونون اخوانج ؟
روان : معاي
بدر : بشقتنا يعني ؟
روان : لا في بيتنا اللي خليناه
بدر : يعني اسكن ببيت مرتي ؟
روان : اي عادي
بدر : اول شي مو عادي عندي .. ثاني شي تتوقعين عمج بيخليهم عندج؟
روان : ( بجت ) اذا ماعطاني اياهم مستعده ارفع عليه قضيه بس لا تخليني
بدر : متأكده ؟
روان : اي والله متأكده بس الله يخليك لا تخليني انا ماقدر اعيش بدونك
بدر : اوكي ماراح اخليج
روان : ( تظحك وتبجي بنفس الوقت ) صج ؟؟
بدر : اي صج .. وتره عقب باجر مسافر
روان : اقدر اشوفك قبل لا تروح ؟
بدر : ( متضايق ) لا باجر مشغول مع الاهل
روان : ولا حتى 10 دقايق ؟
بدر : احاول يللا مع السلامه ( سكر الخط )
( روان لمت تلفونها واهي تبجي ماتدري من الوناسه ولا من الضيق )
----

- ثاني يوم –
( روان داقه على فجر )

روان : بروح الحين اشوفه .. ماتدرين اشكثر ولهت
فجر : ادري والله ادري والحمدلله رجعتوا حق بعض
روان : ( تظحك ) زين الحضانه تستقبل يهال اليوم ؟
فجر : وانا اقدر اقول لأ ؟؟ والله ابتلشت فيكم انتو الاثنين
روان : حياتي فجر ماتدرين اشكثر وجودج يمي مهون علي
فجر : ( تظحك ) بس عاد اخجلتي شعوري .. ييبيهم ناطرتهم وخصووصا فروس المتروس
روان : فجور قولي اشاءالله
فجر : ماشاءالله لا اله الا الله زين جذي ؟؟
روان : فجور اخليج الحين .. بدر خط ثاني
--
بدر : ها متى تطلعين ؟؟
روان : ( تبتسم ) الحين اقطهم واطلع
بدر : اوكي
روان : ماسألتني منو اكلم ؟؟
بدر : مايهم يللا ناطرج بنفس المكان ( سكر التلفون )
( روان انصدمت من اسلوبه بس طوفت )

- قطت اخوانها واسفطت يمه وانزلت اركبت سيارته –

روان : ( طالعته وامسكت ايده ) الله لا يحرمني منك
بدر : ( مبين انه متضايق ) اشلونج ؟ واشلون اخوانج
روان : بدر اشفيك متغير علي
بدر : لا ماكو شي بس مستعيل شوي مسويلي عشى وبييون الربع
روان : متى طيارتك ؟
بدر : الفير
روان : راح اشتاق لك
بدر : ( ساكت )
روان : راح تشتاق لي ؟؟
بدر : اي
روان : احبك
بدر : يللا روحي تأخرت
روان : ( حست بغصه ودها تلمه وتبجي ) بدر
بدر : ( عينه عالسكان ) هلا
روان : ( قربت يمه تبي تلمه ) لمني قبل لا تروح
بدر : ( طالعها مده بعدين لمها ثواني ووخر عنها )
روان : ماعجبتني هاللمه
بدر : روان انا مستعيل روحي يللا
روان : اوكي توصل بالسلامه ( باست ايده وانزلت وادموعها بعينها )
---

- بعد شهر .. في بيت فجر –

روان : ( تبجي ) تعبت فجر والله تعبت مايكلمني عدل ومايشبك واذا دزيت 10 مسجات يرد عليهم بمسج واحد ويكتب انا مشغول .. ليش جذي يعاملني ؟؟
فجر : مادري عنه .. حتى انا ما اشوفه يشبك .. خلاص اهدي روان لي متى بتمين على هالحال
روان : لين يردلي بدر اللي عرفته
فجر : بدر هذا غير .. هذا يبيج تسافرين معاه وتهدين اللي وراج ودونج
روان : بس انا ماقدر اهد كل شي واروح معاه
فجر : ادري بس خلاص حبيبتي هدي نفسج
روان : ( تمسح دموعها ) يللا لازم امشي
فجر : تو الناس
روان : اليهال بروحهم بالبيت وماحب اخليهم مع مرت عمي
فجر : اوكي مع السلامه
----

- غرفة روان -
( روان مقعده يمها فراس وماعطيته دفتر وقلم )
- امسكت تلفونها و دزت حق بدر مسج -

" بدر الله يخليك اترجاك اتقولي اخبارك اشفيك شاللي مغيرك علي "
( دق عليها )

روان : الو ؟؟
بدر : ( صوته معصب ومتضايق ) روان بتكلم وانتي بس اسمعيني لا تقاطعيني
روان : اوكي
بدر : انا تعبت وماني متحمل هالوضع .. امس كنت سهران عند ربعي ماغيرهم اللي منعتيني عنهم .. سهرت عندهم عشان ما افكر فيج .. حاولت امنع نفسي بس ماقدرت كنت ابي الهي عمري بأي شي حتى لو بالخراب
روان : ( دموعها تنزل ) بدر يعني انت ..
بدر : ( يصرخ ) قلتلج لا تقاطعيني .. مالج شغل شنو صار اهناك .. أي شي صار فهو بسبتج انتي .. و حسافه طلعت رخيص عندج لهالدرجه
روان : ( بجت ) بدر انت اشقاعد تقول ؟؟ تراهم يتامى و مالهم غيري
بدر : ( يصرخ ) اوووووه .. شنو مالهم غيري جم مره افهمج انهم عند عمهم يخاف عليهم مثل مايخاف على عياله
روان : ( تبجي زياده ) بس انت وعدتني ماتتخلى عني
بدر : اي صح وعدتج بهالشي .. وراح اتم معاج بس نكون ربع تسألين عني اسأل عنج ناخذ اخبار بعض بس لا اكثر ولا اقل
روان : اشلون يعني ربع ؟؟
بدر : يعني اسوي اللي ابيه وسوي اللي تبينه .. ومتى ماتبين تكلميني راح اكون موجود
روان : ( اسكتت من الصدمه بس دموعها تنزل على خدها )
بدر : سامعتني ؟
روان : تتوقع اقدر اكون صديقتك بعد ماكنت حبيبتك ؟؟
بدر : ( متضايق ) اي تقدرين
روان : ( امسحت دموعها ) لا ما اقدر .. خلاص موفق يابدر
بدر : متأكده ؟؟
روان : اي والله موفق دير بالك على نفسك
بدر : اوكي موفقه انتي بعد .. مع السلامه ( سكر الخط )

( روان اتطالع التلفون ودموعها معلقه بعينها بس امسحتهم وخذت نفس عشان ماتبجي )

فراس : ( قط راسه على حضنها ) ماما وااني
روان : ( شالته وباسته ) من اليوم بعيش غير .. بعيش لكم وبس .. بدر مات خلاص
---------------------

ابا عز الدموع الي غشت خدي عقب فرقاك
واداوي نزف جرح سال دمه من شرايني
واعز النفس عن حبك مادام اني عجزت القاك
تعبت من الصبر واتعبت من كثر السهر عيني

تعبت استعطفك وارجيك وامشي في سبيل ارضاك
وتلعب بي على كيفك تبعدني وتدنيني
تحملتك وانا صابر وادور لك عذر لخطاك
ولكن مانفع صبري معك واليوم يكفيني

خلاص اليوم قررت انسحب من دنيتك واسلاك
ابا ارحل منك فد لو صاح لي صوتك يناديني
ابرحل للبعيد اللي ينسيني اسى ذكراك
وابترك كل شي منك لا شفته يبكيني

 
 

 

عرض البوم صور بوح قلم   رد مع اقتباس
قديم 29-07-10, 04:02 PM   المشاركة رقم: 18
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,340
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت الخامس عشر **

- مر عاللي صار شهرين ودشوا سنه يديدة و روان الحمدلله تحجبت –
- غرفة فجر -

روان : اتشوفينه عالنت ؟؟
فجر : لا والله مايدش
روان : ( تبتسم ابتسامة حزن ) اتوقع مسويلنا بلوك ودليت
فجر : ( متضايقه على حال روان ) مادري يمكن
روان : كل يوم اقول اليوم راح يدق بس مايدق .. واللي مو قادره اصدقه اشلون اندش سنه يديده مايدزلي حتى مسج
فجر : خلاص روان انسيه
روان : يارب انساه لأن اهو تخلى عني ومايستاهل اني افكر فيه
فجر : يمكن يرجع بعد جم يوم
روان : واذا رجع راح يرجع متغير ( نزلت راسها ) وادري ان سوه اشياء ماترضيني اهناك
فجر : خانج يعني ؟
روان : اي
فجر : ماتوقع
روان : بلى انا اتوقع منه كل شي الحين
فجر : ( اتطوف السالفه ) اتصدقين حلو عليج الملفع
روان : ( تبتسم ) عاد احس اني مو متعوده عليه كلش
فجر : اي صج ماقلتيلي عمج شنو كانت ردة فعله يوم تحجبتي ؟
روان : استانس وايد وقعد يمدح فيني اشكثر آخر شي ختمها بجملة الفال حق العباية ان شاءالله
فجر : ( تظحك ) عمج مايغشمر كل شي يبيه مره وحده
روان : ( تبتسم ) بس طيب

- مشاري دش عليهم وماسك فراس من ايده -
مشاري : فراس يبيج
روان : تعال ماما
( فراس مشي لين وصل لها جان تشيله وتقعده بحضنها )
فجر : فرووس قول فجووره
فراس : ( ساكت يطالعها )
فجر : ( بصوت عالي ) اقولك قول فجووره لا اعصب
فراس : ( بجى ولم روان ) مااماا واان
روان : فجور اشفيج خرعتيه حرام تره عمره سنه ونص
فجر : اي كبير المفروض يتكلم عدل حتى اسمي ماسمعته يقوله
روان : ( قامت واهي شايلته ) بس ماما هذي خايسه ماراح نقعد معاها
فجر : تعالي وين رايحه
روان : باجر امتحان منول الفاينل لازم اراجع معاها قبل لا تنام
فجر : ( تتغشمر ) اوكي سلمي على ام جاسم وبوسيلياها
روان : اي خير .. يللا باي
---
- بيت ابو جاسم –
( روان واخوانها توهم داشين البيت )

ام جاسم : ( تتكلم بالتلفون ) والله ولهت على شوفتج كنا علساس انيي عندكم بس الحين ماكو لا سفره ولا هم يحزنون
ام جاسم : شنسوي يعني ابوج مايرضى يخليهم بروحهم ..مادري عاد شبيصير لهم لو خلاهم
روان : ( تضايقت من اللي اسمعته ) السلام
ام جاسم : شرفت .. اهلين وعليكم السلام
روان : خيريه خليج مع فروس يللا منول امشي اراجعلج قبل العشى ( اصعدو فوق )
مشاري : ( لحقهم ) نطروني بيي معاكم
منال : انت عطلت اشتبي يعني
روان : عادي خليه ماراح يطلـّع صوت
---
- غرفة فجر –
( فجر قاعده شابكه ولا يدش بدر المسنجر .. انصدمت و سيده دشت عليه قبل لا يفصل )

Fjo0oOo0o :
السلام قوه بدر
Good Bye Beautiful Days :
هلا فجر
Fjo0oOo0o :
اشلونك ؟
Good Bye Beautiful Days :
الحمدلله بخير اشلونج انتي
Fjo0oOo0o :
انا بعد بخير
( سكت مده ماتكلم )
Fjo0oOo0o :
ماودك تسأل عن احد ؟
Good Bye Beautiful Days :
انا مشغول لازم افصل الحين
Fjo0oOo0o :
لحظه انطر شوي
Good Bye Beautiful Days :
هلا ؟
Fjo0oOo0o :
شاللي صارلك ليش جذي تخليت عنها فجأه ؟
Good Bye Beautiful Days :
ممكن ماتكلميني عن هالموضوع ؟
Fjo0oOo0o :
لا مو ممكن .. اهي تعبانه والسبب انت ليش جذي سويت فيها؟
Good Bye Beautiful Days :
لأني احبها
Fjo0oOo0o :
اشلون فهمني
Good Bye Beautiful Days :
انا ما اتحمل اتكون بديره ثانيه واعرف نفسي كل يوم بخليها تكره عيشتها من كثر ما اتهاوش معاها عالطلعه والرده ما اتحمل اخليها كل هالوقت بعيده عن عيني .. وبعدين جذي احسن لي ولها اهي ماتبي تتركهم حتى بشهر العسل قالتها لي ما اسافر واخليهم .. اتسمين هذا زواج ؟
Fjo0oOo0o :
انت اناني تدري
Good Bye Beautiful Days :
لو كنت اناني جان علقتها معاي 4 سنين و آخر شي اهي بنفسها تكتشف ان ماكو بينا نصيب
Fjo0oOo0o :
انا مستغربه منك ماصدق انك كنت تحبها بيوم
Good Bye Beautiful Days :
وللحين احبها .. بس والله هديتها عشان مصلحتها .. ما اتحمل اكون بالمرتبه الثانيه ويزيد اهمالها لي عشان اخوانها و اخاف اذا خذيتها يمكن من غير قصد اعصب عليهم واهم مالهم أي ذنب
Fjo0oOo0o :
زين لو اخطبوها شيكون موقفك ؟
Good Bye Beautiful Days :
الله يوفقها يارب
Fjo0oOo0o :
صراحه مادري شقولك صدمتني
Good Bye Beautiful Days :
مع السلامه ( طلع من المسنجر )

- بالليل –
( رن تلفون روان فز قلبها شافت الشاشه ولا المتصل فجر )

روان : الو هلا فجر
فجر : ( ضايق خلقها ) اشلونج روان
روان : زينه اشفيج ؟
فجر : مافيني شي ضاق خلقي ودي اسلوف معاج
روان : اكيد ماكو شي ؟ ماشبك ؟
فجر : ( ساكته )
روان : اشقالج ؟
فجر : ولا شي ناموا اليهال ؟
روان : اي ولا تطوفين السالفه اشقال ؟
فجر : قال مابي اضيع من عمرها 4 سنين عالفاضي وآخر شي احنا مو حق بعض
روان : ( حست بغصه ) ماقالج ليش احنا مو حق بعض ؟
فجر : قال لأن اخوانج راح يكونون المرتبه الاولى وراح تتنازلين عن وايد اشياء عشانهم
روان : ( ساكته )
فجر : روان اذا يه نصيب زين لا تفكرين فيه وافقي على طول
روان : اوكي الحين بنام تصبحين على خير
فجر : روان الله هالحزه بالسمى الدنيا .. ادعي وراح ترتاحين
روان : ان شاءالله مشكوره
فجر : مع السلامه
روان : باي
( سكرت الخط وتمت اتفكر باللي صار لها وعينها اتدمع على فرقى كل اللي حبتهم .. امها , ابوها , وبدر )
---
- ثاني يوم –
( روان خذت منال من المدرسه )

روان : مبروووك ها شنو شعورج وانتي معطله ؟؟
منال : ( ساكته )
روان : اشفيج ؟؟ ماقدمتي عدل ؟
منال : ( ماترد عليها )
روان : منول اشفيج حبيبتي ؟؟
منال : مافيني شي
روان : اشلون الامتحان ؟
منال : زين
روان : عيل اشفيج متضايقه ؟
منال : ( لفت عليها واهي معصبه ) مافيني شي
روان : اوكي على راحتج

- اوصلوا البيت وانزلوا –

مشاري : ( ركض حق منال ) وناااسه عطلتي الحين نلعب بليستيشن لي الصبح
منال : ( ماردت عليه )
مشاري : منول قاعد اكلمج
روان : مشاري خلاص خلها

( منال اصعدت فوق وخلتهم )
مشاري : اشفيها ؟
روان : يمكن الامتحان صعب اقعد انت اهني انا بصعد اكلمها
---

- الساعه 4 العصر بيت فجر –
روان : ( عيونها اتدمع ) تخيلي ماعرفت اتصرف قاعده تبجي وتصارخ علي تبي امي .. ماقلت لها غير كلمة انا معاج لا تبجين شنو بتسويلها هالكلمه ؟؟ بتردلها امي ؟؟
فجر : ميخالف هالشي يتعـّب نفسيتنا احنا الكبار فاشلون عالياهل ؟
روان : و الممرضه اللي بالمدرسه اتقولها لا تبجين اصلا امج راح تستانس ان بنتها صارت عروسه
فجر : الله يعينها يارب ميخالف لأن شي يديد عليها اكيد بتحس بحاجه حق خالتي الله يرحمها لا تحاتين فتره وتعدي
روان : حتى مشاري و فراس كلهم راح يحتاجونهم .. فجر والله تعبت ماعرف اتصرف معاهم
فجر : زين الحين ليش خليتيها بروحها ؟
روان : خليتها نايمه وييت اقعد عندج شوي احس مختنقه

- رن تلفون روان –
روان : ( تمسح دموعها ) البيت داقين .. الو ؟
ام جاسم : ( معصبه ) وينج انتي ؟
روان : عند خالتي خير اشصاير ؟
ام جاسم : تعالي شوفي اختج ينت واقعدت قاعده اتصارخ علي قليلة الادب
روان : ( ايدها ترجف من العصبيه ) لا تكلمينها كاني يايه ( سكرت التلفون )
فجر : شنو صار ؟
روان : ( غصب ماسكه البجيه ) مادري مادري لازم امشي اكلمج بعدين
فجر : طمنيني عاد
روان : اوكي
---

- بيت ابو جاسم –
( روان اوصلت البيت وانزلت لقت ام جاسم قاعده بالصاله مع ابو جاسم )

روان : خير اشصار ؟
ابو جاسم : ماكو الا الخير ان شاءالله
ام جاسم : ( معصبه ) شنو ماكو الا الخير ؟ اتقل ادبها علي واهي ياهل الله يعين لو اكبرت شتسوي
روان : اشصار احد يفهمني ؟
ام جاسم : اكلمها تحقرني ويوم زفيتها عشان ترد علي مثل الأوادم كلتني قليلة الادب .. اتقول انتي مو امي عشان تتدخلين فينا .. بعد مابقى غير الحشرات تنطق
ابو جاسم : استغفرالله اشهالكلام خلاص تعوذي من ابليس

( روان خلتهم واصعدت فوق دشت الغرفه لقت منال لامه صورة امها وقاعده تبجي )
روان : ( دموعها بعينها ) حياتي منول لا تسوين جذي والله موزين
منال : ( تبجي ) روان الله يخليج ابي ارجع بيتنا
روان : ( حست بنغزه بقلبها ) زين لا تبجين حبيبتي
منال : ابي ارجع اهم يكرهونه ليش نقعد اهني
روان : محد يكرهنا حبيبتي بس اهي شوي ..
منال : ( اتصرخ وميته بجي ) بلى تكرهني قالت قطيعه تقطع الساعه اللي ييتو فيها عندي .. الله يخليج ابي ارجع البيييت
روان : ( تمسح دموعها ) اوكي خلاص والله اوعدج راح نرجع انسدحي ارتاحي .. انا بكلم عمي وارجع

- انزلت تحت –
روان : عمي ممكن اكلمك شوي
ام جاسم : تكلمي اهني ماكو اسرار في بيتي
ابو جاسم : ( يصرخ ) خلاص عاد بس سكتي شوي ( قام ) تعالي معاي روان

( روان راحت معاه واقعدوا بروحهم بالصاله الثانيه )
روان : عمي ..( اسكتت )
ابو جاسم : قولي يبه اشفيج ؟
روان : عمي جاسم للحين يبي يتزوجني ؟
-----------------------------------------------------------

 
 

 

عرض البوم صور بوح قلم   رد مع اقتباس
قديم 29-07-10, 04:06 PM   المشاركة رقم: 19
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,340
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت السادس عشر **

روان : عمي ..( اسكتت )
ابو جاسم : قولي يبه اشفيج ؟
روان : عمي جاسم للحين يبي يتزوجني ؟
ابو جاسم : روان يا بنيتي لا اتخلين اللي صار يأثر على قرارج
روان : لا عمي خالتي مالها شغل آنا منزمان فكرت بس مالقيت الوقت المناسب عشان اقولك
ابو جاسم : انتي متأكده انج فكرتي عدل ؟؟
روان : اي فكرت .. بس عندي سؤال و اعذرني على هالكلمة بس اتمنى تجاوبني عليه بصراحه
ابو جاسم : ان شاءالله يللا سألي
روان : الزواج هذا قرارك ؟ ولا قرار جاسم بعد ؟
ابو جاسم : آنا اللي شرت عليه بالبدايه .. قلتله اشرايج بروان وقالي والنعم فيها بس طلب مني اخليج على راحتج لين توافقين بروحج من غير ضغط
روان : ( ودها تبجي بس ماسكه نفسها ) و آنا الحين موافقه
ابو جاسم : بس انا حاس انج وافقتي نتيجة الظروف اللي مريتي فيها و ابيج اتفكرين عدل مره ثانيه
روان : عمي والله اني موافقه وبرضاي
ابو جاسم : خلاص انا اقول حق جاسم اذا وصل
روان : بس مابي عرس لأن ..
ابو جاسم : ادري يابنيتي .. الله يوفقج يارب ويسهل دربج ويعوضج عن كل اللي مريتي فيه بجنة الفردوس ان شاءالله
روان : آمين ( ماقدرت تتكلم اكثر ) عن اذنك عمي

- روان اصعدت فوق لقت منال قاعده عالسرير واتطالع البوم فيه صورهم اهي ومشاري كانو مسافرين مصر مع امهم وابوهم –
روان : ( اقعدت يمها ) اشلونج الحين ؟
منال : ( ماشالت عينها من الالبوم ) متى انرد البيت ؟
روان : قريب ان شاءالله
منال : ( طالعت روان ) آنا ابي ارد اليوم
روان : ميخالف منول عمري تحملي شوي بس خل تخلص العطله
منال : ( بصوت عالي ) شنو ؟؟ والله مو كيفكم ابي ارجع البيت او وديني حق خالتي حصه اذا ماتبين ترجعين
روان : زين سمعيني واهدي شوي .. آنا ابي ارجع بس عمي مايرضى يخلينا بروحنا عشان جذي بيي جاسم معانا بس مو الحين بعد العطله
منال : وليش ايي معانا؟
روان : لأن عمي مايبي يخلينا بروحنا ماتذكرين شنو صار حق مشاري ؟
منال : و راح تتزوجينه ؟
روان : ( ماتوقعت تسألها هالسؤال ) اي .. بس لا تحاتين انتو اهم شي بدنيتي ومحد ياخذني منكم
منال : ( انسدحت وحطت راسها على فخذ روان )
روان : ( تنعم على شعر منال ) صدقيني والله ماراح اخلي خالتي ام جاسم تزعجكم وبكون معاكم على طول عشان لا تقولكم شي
منال : ( غمضت عينها )
روان : وين الصبيان
منال : نايمين
منال : فروس وين نايم ؟
روان : بغرفة مشاري وخيريه عنده
روان : زين انتي بعد كملي نومتج
منال : اوكي بس لا تخليني انام وايد ماحب نومة العصر
روان : خلاص نامي الحين عشان بعد المغرب بنروح حق خالتي
منال : اوكي

( روان خلتها نايمه وراحت اقعدت على سريرها وامسكت تلفونها تقرا المسجات ودموعها تنزل على كل مسج تشوفه )
روان : ( بقلبها ) آنا ليش اسوي جذي بعمري خلاص الله يوفقه ويوفقني

( امسحت ادموعها وراحت عالمسجات الصادره والمرسله سوت عليهم Mark all // تحديد الكل // واضغطت على مسح وحست بعوار بقلبها )

- بعد ساعه دشت عليها خيريه –

خيريه : روان ؟؟ روان ؟؟
روان : ( متغطيه وملحفه راسها ) نعم ؟
خيريه : بابا قول نادي روان
روان : اوكي الحين انزل

( امسحت ادموعها وقامت غسلت ويهها وعدلت شكلها والبست ملفع وانزلت لقت جاسم قاعد مع عمها بالصاله )

روان : ( حست قلبها مقموت ) السلام عليكم
ابو جاسم وجاسم : وعليكم السلام
ابو جاسم : يبه انا قلت حق جاسم انج وافقتي واهو بيكلمج شوي اذا ممكن
روان : ( اسكتت )
ابو جاسم : آنا اخليكم الحين عشان تقدرون تتناقشون على راحتكم عن اذنكم
( قام وخلاهم بروحهم )

جاسم : تفضلي ليش واقفه
روان : ( اقعدت بعيد عنه )
جاسم : ابوي قالي انج موافقه وبرضاج بس انا حاب اتأكد منج
روان : اي والله محد ضغط علي
جاسم : ولا حتى ظروفج ؟
روان : لا وماكو شي اثر على قراري .. بس في جم شغله ماقلتها حق عمي
جاسم : قولي كل اللي بقلبج
روان : الملجه بعد العطله مو الحين
جاسم : اللي تشوفينه
روان : و ... ( اسكتت )
جاسم : قولي كل اللي تبين و لا تترددين
روان : ابي نسكن في بيتنا مع اخواني
جاسم : ( سكت مده ) روان خليج صريحة معاي .. انتي وافقتي بس عشان تطلعين من اهني صح ؟
روان : لا مو صح .. واعذرني على هالكلمة بس لو ابي ارجع البيت ومعاي اخواني اقدر ارجع بأكثر من طريقه
جاسم : اوكي راح نعيش في بيتكم .. بعد في شي ودج تقولينه ؟
روان : اي بس اخاف ماتفهمني بس لازم اقوله لك
جاسم : قلتلج لا تخلين شي بقلبج انا مابيج تتسرعين وباجر تندمين لا سمح الله .. فطلعي كل اللي بخاطرج و انا اسمعج
روان : ( متضايقه ) اخواني اهم حياتي كلها مابي احد يزعلهم او ..
جاسم : ( يقاطعها ) اخوانج اهم اعيال عمي وبحطهم على راسي
روان : ( فيها بجيه ) تسلم يارب
جاسم : في شي بعد ؟
روان : لا
جاسم : ولا تحاتين امي تره طيبه بس تبي اللي يسايسها يللا عن اذنج ( خلاها وقام )

- بيت فجر –
( روان توها داشه مع اخوانها )

ام محمد : اهليين بالغااليين حياكم
روان : ( تبتسم ) الله يحييج
يعقوب : ( قام ركض حق مشاري ) اهليين ميشوو
مشاري : هيي شنو ميشو شايف شعري اصفر ؟
ام محمد : شوي شوي يمه لا تتهاوشون
روان : خالتي ممكن اتيين معاي غرفة فجر بكلمج بموضوع
ام محمد : اي اكيد حبيبتي .. يعقووبوو مو تضايقهم
يعقوب : لا يمه رايحين نلعب
روان : منول حبيبتي روحي معاهم
منال : اوكي
روان : خيريه انتي بعد روحي معاهم بس ديري بالج على فروس لا يتعور
خيريه : اوكي

( اصعدوا دشوا غرفة فجر )

فجر : ( كالعاده قامت من النت عشان تسلم ) ماقلتيلي انج بتيين اشلوونج
روان : الحمدلله زينه
فجر : ها يمه اشفيج يايه؟
ام محمد : شنو يعني طاردتني من دارج ؟
فجر : لا يمه اشدعوه بس قاعده اسأل
روان : آنا ناديت خالتي عشان بكلمكم بموضوع
فجر : زين ثواني خل افصل
ام محمد : الله يستر عليج من هالنت 24 ساعه مجابلته
فجر : يمه اشدعوه عاد والله اني اشبك من العصر لي الساعه 10 بالليل بس
روان : ( متضايقه ناطرتهم يخلصون عشان تتكلم )
ام محمد : زين بس بس خل اسمع بنيتي روّونه شنو بتقول
روان : ( من غير مقدمات ) جاسم خطبني وانا وافقت
فجر : ( منصدمه اتطالعها وماقالت أي تعليق )
ام محمد : صج ؟؟؟ ( لمتها واقعدت تبجي ) يا بعد عمري يا حياتي انتي الف مبرووك والله فرحتي فيج مثل فرحتي بفجر لو ياها النصيب وتزوجت
روان : ( لامه خالتها ودموعها تنزل ) الله يبارك فيج
ام محمد : ( وخرت عنها ) ليش تبجين يمه ؟ عسى مو مغصوبه بس ؟
روان : ( تمسح دموعها ) لا خالتي مو مغصوبه والله .. بس كلامج ذكرني بأمي وابوي الله يرحم
ام محمد : ( بدت مناحه ) آآخ يا حبيبتي يا سعاد كانت تنطر هاليوم وتتحسر عليه و كانت كله اتقول اخاف تنشغل بدراستها وما اشوفها عروس ( حطت ايدها على عينها واقعدت تبجي )

( روان حطت ايدها على جتف خالتها وادموعها تنزل بدل لا يواسونها اهي اللي قاعده اتواسي خالتها )

فجر : يمـّه خلاص عاد البنت مو ناقصه كانت تبي تفرحج الا تقلبينها عزا
ام محمد : اي شسوي تذكرت اختي الله يرحمها ويغمد روحها الجنه يارب
روان : ( تمسح دموعها ) الله يرحمها ويرحم ابوي
فجر و ام محمد : آمين
ام محمد : وهذا جاسم جم عمره خبري فيه كبر فجر
روان : ( متضايقه ) اي عمره 23 داش ال 24
ام محمد : عادي يمه ياما حريم تزوجوا رياييل اصغر منهم ب6 سنين وهم مستانسين ولله الحمد
روان : ( ودها تبجي من كثر الهموم اللي خاشتها بقلبها ) اي صح
ام محمد : زين آخر مره اسألج اكيد انتي موافقه ؟ يعني اذا مو موافقه محد يقدر يجبرج
روان : ( تبتسم لها ) اي خالتي انا خذيت وقت كافي افكر فيه ووافقت بس ماراح نملج الا بعد العطله
ام محمد : اي جذي يكون مر عالوفاة تقريبا سنه.. والله الايام تركض ركض سبحان الله
روان : خالتي في شي بعد ودي اقوله لج
ام محمد : خير يمه ؟
روان : ( قالت لها عن منال ) بس لا تكلمينها صايره بسرعه تعصب بس حبيت اقولج
ام محمد : ( تبتسم ) يحليلها بنيتي ( قامت ) باخذها واطلع لازم اونسها احنا قبل كانو امهاتنا يعطونا فلوس و هدايا عشان يرفعون معنوياتنا كنا نستاانس
روان : عفيه خالتي اذا ماودها تطلع خليها على راحتها
ام محمد : لا ماعليج اهي تحب خالتها وراح تروح معاي باخذها اهي واليهال بعد وبخليكم بروحكم عادي؟ ولا تخافون ؟؟
فجر : ( تظحك ) شيخوفنا ؟ بناتج يخوفون ديره
ام محمد : يمه منج والله بس انتي اللي تخوفين ديره روان مسكينه تهبل ذربه
فجر : بديينا تفرقه
روان : ( تبتسم ) خالتي بتاخذين فروس ؟
ام محمد : اي وباخذ خدامته معاه
روان : بس خل تتأكد انها حاطتله كل شي يحتاجه بالجنطه لأنها مرات تنسى
ام محمد : ان شاءالله .. يللا اخليكم سولفوا على راحتكم ( اطلعت من الغرفه )

فجر : مبروك حبيبتي والله انج تستاهلين كل خير بس وين راح تعيشون بعدين ؟
روان : راح نرجع بيتنا
فجر : يعني انتي ماوافقتي الا عشان ترجعون صح ؟
روان : ( معصبه ) لا وافقت عشان وايد اسباب ومنها اني انسى بدر
فجر : زين خلاص اهدي ماقصدت ازعلج
روان : ( دموعها انزلت ) حاولت انساه بس ماقدرت عاد يارب اقدر انساه بهالطريقه ومنها نرجع البيت ويرتاحون اخواني
فجر : خلاص ان شاءالله راح تحبين جاسم وينسيج بدر واهله
روان : ان شاءالله
--

- غرفة ابو جاسم –

ابو جاسم : ( يصرخ ) خلاص بس مابي اسمع منج أي كلمه
ام جاسم : بس هذا ولدي انا بعد .. وباخذله على ذوقي مو كيفك تتصرف بروحك
ابو جاسم : سمعيني عدل ولدج ريال واهو يبي ياخذ بنت عمه واهي وافقت وخلاص راح يتم كل شي.. و هالموضوع تسكر اهني و اذا تبطل بره هالغرفه أو قلتي حق روان او اخوانها أي شي يضايقهم والله ماراح يصير خير وانا ماحلف بالله جذب
ام جاسم : تهددني يا بو جاسم ؟
ابو جاسم : اي نعم قاعد اهددج وتذكري اني حلفت ( طلع وخلاها )
---

- غرفة فجر –

روان : ( منسدحه على سرير فجر ) خايفه من ردة فعل خالتي ام جاسم
فجر : ( قاعده يمها ) مالج شغل فيها اهم شي راح تسكنون بعيد عنها
روان : تدرين .. ودي اتقطيني بنص البر واصرخ حيييل لين ارتاح بعدين ارجع
فجر : اوكي متى ماتبين قوليلي والله اوديج
روان : ( تبتسم بحزن ) تخيلي
فجر : اي والله منصجي اوديج واقعد بالسياره اشغل اغاني وانتي بره صرخي على كيفج
روان : احب هالطبع فيج
فجر : أي طبع؟
روان : تاخذين كل شي ضحك .. ما تأزمين الأمور
فجر : اي شنسوي الدنيا يبيلها جذي
روان : صح كلامج

- دشوا عليهم مشاري ويعقوب –

فجر : ( اتصرخ ) ويعه انت معاه انا اشقلت عن الباب ها
مشاري : والله انا مالي شغل اهو اللي بطله
فجر : تبي اقوم لك الحين ؟ ماتعرف اتطق الباب يعني
روان : فجر اشفيج قلبتي جني عطيتج عين
فجر : لا بس عشان يتأدب لأن كذا مره داش علي وانا ابدل
يعقوب : ماشفت شي والله
روان : خلاص عاد فجر بروحي مصدعه لا تزيدينها علي بصراخج .. ها حبايبي وين رحتو ؟
مشاري : رحنا لاند مارك ( سنتر بوينت حاليا ) واستانسنا وايد شرينا العاب
روان : ( اقعدت )عسى ما خذيت كل شي
مشاري : لا بس كل واحد خذه لعبه وحده
روان : ومنول وين ؟
مشاري : تحت قاعده تجرب لعبتها .. وآنا شريت همر ريموت كنترول تعالي شوفيني العب فيه بالحوش
يعقوب : و آنا خذيت دبابه ريموت
روان : وفروس؟
مشاري : شريناله كره اتطلع صوت
روان : يللا عيل بس البس ملفعي و انزل معاكم
فجر : منصجج ؟؟ خل يولون كنا انسولف
روان : الله والسوالف عاد كله عوار قلب امشي خل ننزل احسن لنا
فجر : اوكي
--

- بعد شهر –

( ام جاسم من درت ان جاسم بياخذ روان واهي ماتكلمها حتى السلام ماترده عليها )

جاسم : يمه يعني شالغلط اللي سويته عشان تنفسين علي؟
ام جاسم : ليش تسمع كلام ابوك وتعصي كلامي
جاسم : يمه انا ماعصيت كلامج بس البنت زينه وطيبه ليش ما تحبينها ؟
ام جاسم : مادري من صارت هوشات بين ابوك و اخوه الله يرحمه بسبتها صرت ما اتقبلهم
جاسم : زين اذا ابوي عادي يكلمهم انتي ليش للحين شايله النفس؟
ام جاسم : ابوك ينسى الاهانات انا ماقدر انساها ولا انسى عمك يوم يقوله جدامنا كلنا بنتي اللي تتكلم عنها راح ترجع دكتوره احسن منك ومن كل فرد بعايلتك .. هذا واهو الكبير جذي يكلمه ولا حشم لحيته
جاسم : يمه اللي فات مات خلاص وبعدين انا ولدج المفروض تدعيلي بالتوفيق
ام جاسم : وانا اقدر ما ادعيلك ؟؟ يمه والله كل يوم قبل لا انام ادعي انك تكون مرتاح
جاسم : ( باس راسها ) ربي يطولنا بعمرج ان شاءالله
ام جاسم : ويطول بعمرك يارب .. زين يمه لا تنسى اليوم هلا توصل الساعه 7 اخذها من المطار
جاسم : اي ذاكر لا تحاتين
---

- غرفة فجر –
( فجر قاعده عالنت جان يدش بدر )

Good Bye Beautiful Days :
قوه
Fjo0oOo0o : (( معصبه وماودها ترد عليه ))
هلا بدر
Good Bye Beautiful Days :
بغيت اسألج عن روان .. اشلونها الحين ؟ ان شاءالله احسن؟
Fjo0oOo0o :
و ليش تسأل
Good Bye Beautiful Days :
فجر ردي علي لو سمحتي مابي اكثر من اني اسمع اخبارها من بعيد لي بعيد
Fjo0oOo0o :
عيل اسمع
Good Bye Beautiful Days :
؟؟
Fjo0oOo0o :
روان خطبها ولد عمها ووافقت والملجه الشهر الياي
Good Bye Beautiful Days :
...........(( ماكو أي رد ))............
Fjo0oOo0o :
وينك ؟ ماتبي تقول شي ؟ ماتبي تقول الله يوفقها مثل ماقلتها من قبل ؟

(( تم تسجيل خروج Good Bye Beautiful Days ))
-----------------------------------------------------------

 
 

 

عرض البوم صور بوح قلم   رد مع اقتباس
قديم 29-07-10, 04:09 PM   المشاركة رقم: 20
المعلومات
الكاتب:
اللقب:
عضو فخري
حَاتمِيّة العَطآءْ

البيانات
التسجيل: Nov 2009
العضوية: 151969
المشاركات: 40,340
الجنس أنثى
معدل التقييم: بوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسيبوح قلم عضو ماسي
نقاط التقييم: 6598

االدولة
البلدUnited Arab Emirates
 
مدونتي

 

الإتصالات
الحالة:
بوح قلم غير متواجد حالياً
وسائل الإتصال:

كاتب الموضوع : غرور الأمل المنتدى : القصص المكتمله
افتراضي

 

** البارت السابع عشر **

- بريطانيا : غرفة بدر –
( بدر قاعد عالسرير واللاب توب جدامه )

Fjo0oOo0o :
روان خطبها ولد عمها ووافقت والملجه الشهر الياي

( بدر حس الدنيا ظلمت عنده ماقدر يشوف الشاشه حاول يكتب بس ايده كانت ترجف )

Fjo0oOo0o :
وينك ؟ ماتبي تقول شي ؟ ماتبي تقول الله يوفقها مثل ماقلتها من قبل ؟

( بدر طلع من المسنجر و تم مده ساكت ويتنفس بعصبيه وبعدين دز اللاب توب عالأرض )
بدر : ( بصراخ ) ليييييش بهالسرعه جنج ماصدقتي اني تركتج لييش

( مسك طاولة الادراج اللي يم سريره وحذفها عالطوف )
- يت العيوز تركض ودشت عليه ( بكتب بالكويتي ) –

العيوز : اشفيك ؟؟ هد نفسك يا ولدي
بدر : ( يصرخ ) راااحت حق غيري
العيوز : تقصد حبيبتك ؟
بدر : ايي راحت خلاااص
العيوز : قولي شالسالفه يمكن اقدر اساعدكم
بدر : ( خلاها وطلع من البيت )
--------

- غرفة روان –
( روان قاعده عالسرير وحاطه بيد فراس سياره لعبه قاعد يلعب فيها )

منال : روان ؟
روان : هلا حبيبتي
منال : تدرين متى آخر مره شفت هلا ؟
روان : متى
منال : يمكن من 3 سنين
روان : ماكانت اتيي الكويت بالعطل ؟
منال : مادري بس جنه عمي وخالتي اهمه اللي كانو يسافرون لها
روان : ( ساكته )
منال : متى راح توصل
روان : بعد شوي
منال : اخاف تطلع نفس خالتي ام جاسم
روان : لا تحاتين ان شاءالله مايصير الا كل خير
فراس : ( يعطي روان السياره ) اتـّيييي
روان : لااا مايفجونها هذي يسوون فيها جذي ( تمشـّي السياره عالسرير )
فراس : ( يحن ) اتـّيييهااا
روان : لااا ماما مايصير
منال : اهي سياره شنو نفج فيها

( مشاري دش الغرفه واهو يركض )
مشاري : روّوون روّووون يت هلا شفتها وسلمت عليها بس ماتذكرتها اهي تقول تذكرني
روان : الحين انبدل وننزل روح انت وناد خيريه
مشاري : اوكي ( راح )
روان : منول حبيبتي يللا امشي نلبس عشان انشوفها
منال : لازم ننزل؟
روان : اي حبيبتي توها يت وماشفناها منزمان اكيد لازم ننزل
منال : ابي ابطل شعري مابي اسويه عنقوص
روان : اوكي بس ييبيلي شباصات لايقه عاللي بتلبسينه وتعالي اسويه لج قبل لا ننزل

- دشت خيريه –
خيريه : نام روان ؟
روان : خيريه حبيبتي اخذي فراس غيريله ولبسيه شي حلو مو مال بيت
خيريه : اوكي ( شالت فراس وراحت )
روان : يللا فشله انا بلبس عالسريع وانتي بعد لا تتأخرين خل اسوي شعرج وننزل
منال : اوكي
---

- بيت فجر –
( فجر متضايقه وتحاتي بدر .. واندمت لأنها قالتله )

و دزتله هالمسجات اوف لاين
Fjo0oOo0o :
بدر آنا ماقصدت اصدمك بهالطريقه بس كنت معصبه لأنك رحت وخليتها
Fjo0oOo0o :
و تره اهي نفسيتها تعبانه وكانت تبي تنساك وغير جذي اخوانها مايبون يقعدون عند مرت عمهم فاضطرت توافق على جاسم عشان يقدرون يرجعون بيتهم واهو ولد عمها يعني بيخاف الله فيها وفي اليهال
Fjo0oOo0o :
بدر انت بنفسك قلت الله يوفقها وكنت قايل انك ماراح تقدر تسعدها لو تحبها ادعيلها ولا تأذي نفسك ودير بالك على دراستك .. مع السلامه
--
( امسكت تلفونها ودقت على روان )
فجر : ( متضايقه ) الو روان ؟
روان : هلا فجر .. منول عطيني الشباصه
فجر : بكلمج شوي وخري عن اليهال ؟
روان : واي منول اشكثر تتحركين شنو بتروحين الحمام ؟
فجر : الوو؟؟ روان قاعده اكلمج
روان : فجور حبيبتي اكلمج بعدين يت هلا من السفر لازم ننزل انسلم عليها
فجر : اوكي مع السلامه ( سكرت الخط )
فجر : ( بقلبها ) الحمدلله انها لاهيه خلاص ليش اضايقها
---

( روان البست جينز وجاكيت حلو ناعم لونه اسود في شك سلفر وحطت مكياج رمادي خفيف والبست ملفعها وشالت فراس وانزلت مع منال ومشاري )
- دشت الصاله كان فيها عمها ومرته واعيالهم جاسم وهلا –

روان : السلام عليكم
ابو جاسم وجاسم : وعليكم السلام ورحمة الله
هلا : ( اوقفت اتسلم على روان ) وعليكم السلام اشلونج روان وعظم الله اجرج ولو انها متأخره بس اعذريني امنعتني الظروف اني ايي واعزيكم
روان : لا عادي

( هلا اقعدت عالقنقه واقعدت يمها روان واخوانها )

هلا : ( تقرص خد فراس عالخفيف ) اهليين بالحلو .. شسمه ؟
روان : فراس
هلا : اعذريني ماعرفت اسمه بس تدرين بعد منزمان مو يايه الكويت
روان : ( تبتسم ) اي ادري والحمدلله على سلامتج
هلا : ( اتكلم مشاري ) انت سلمت عليك خالصين منك ( اتطالع منال ) بس في عروسه حلوه ماسلمت عليها
روان : منول حبيبتي قومي سلمي عليها
منال : ( قامت سلمت على هلا )
هلا : اشلونج شخبارج ؟
منال : الحمدلله زينه
هلا : يحلوج والله

( روان ابتسمت لأنها حست ان هلا غير عن امها .. واول مارفعت راسها لقت جاسم يطالعها جان تختفي ابتسامتها ولفت ويهها على فراس )
--

- بريطانيا –

بدر : ( عيونه حمر ) خلاص يعني راحت حق غيري
فواز : ( صديق بدر – سعودي - ) بدر هد حالك مايصير تعمل كذا
بدر : ( بصوت مخنوق ) ادري اني قلت لها تتزوج وتنساني بس صعبه اتخيل ان احد يكلمها فاشلون لو لمسها ؟؟
فواز : بدر انت بنفسك قلت انها لازم تشوف حياتها
بدر : ( يصرخ وعيونه حمر ) اي ماكانت راح تعيش بسعاده معاي .. كنت ابي افتر العالم معاها ابيها اتكون 24 ساعه معااي وانكون بروحنا فاهم علي ؟؟
فواز : فاهم بس هد حالك
بدر : والله لو تزوجتها راح تكرهني .. لأني ماراح اتحمل انها تقيد حريتنا واخاف تفلت اعصابي عليها او على اخوانها
فواز : عارف
بدر : ( يصرخ ) لا مو عارف انا كنت اقدر اعلقها معاي 4 سنين وكل هذا من عمرها.. بس والله ماكنت راح اتحمل عيشه جذي
فواز : بدر خلاص ادعيلها الله يسعدها .. اللي تعمله بحالك ماراح يفيد
بدر : ( دموعه معلقه بعينه مايبيها تطيح جدام رفيجه ) خلاص فواز خلني بروحي شوي
فواز : انا راح اخليك الحين بس بعد شوي بجيك ونروح شقه مسعود تهدي حالك وتفرفش معنا وتنسى الدنيا .. ماشي؟
بدر : اوكي بس خلني الحين
فواز : اعتبر نفسك في بيتك انا طالع وراجعلك بعدين .. مع السلامه ( طلع )
---

- بيت ابو جاسم عالعشى –

هلا : متى تملجون ؟
روان : ( بغت اتغص باللقمه )
جاسم : ان شاءالله بداية الشهر الياي
هلا : زين اشوه راح اكون اهني .. بس مابقى شي من الحين لازم اتسوق اشوف لبس حلو
روان : بس ماراح نسوي حفله
هلا : ولا حتى حفلة صغيره من غير اغاني يعني عشى وكوشه وبس ؟
روان : ( ودها تصرخ عليها بس امسكت نفسها وتكلمت بهدوء ) لا
ام جاسم : وعليا عليك يا وليدي .. الله يعوضك يمه
جاسم : عادي مو مشكله .. هلوي انا اوعدج اذا سوينا استقبال او أي شي بطيرلج بنفسي واييبج من البحرين عشان تحضرينها
هلا : بعد عمري جسوم تستاهل كل خير ومبين على روان انها خوش بنت
روان : ( ساكته وماكو بويهها أي تعبير )
فراس : ( قعد يبجي ) ابيي تاات
هلا : وي فدييته شيقول ؟
منال : يبي بطاط
هلا : ( عطته بطاطه ) هاك حيااتي انت
فراس : ( خذاها منها وقعد ياكلها )
هلا : ( تكلم جاسم ) دام ماكو عرس وبس ملجة وتاخذها عندك .. عيل المفروض تعطونها المهر من الحين حق الزهاب
روان : ( حست بعوار بقلبها )
جاسم : ( يبتسم ) أي اكيد باجر يكونون عندها
روان : ( قامت وشالت فراس ) عن اذنكم لازم انومه
ابو جاسم : اذنج معاج يبه
---

- بيت فجر –

( فجر رايحه راده تحاتي بدر حست انها اصدمته وخايفه يصير شي وتكون اهي السبب .. رن تلفونها جان تمسكه بسرعه وردت عليه )

فجر : هلا روان
روان : ها فجر كنتي داقه اشبغيتي
فجر : اشلون بنت عمج ؟
روان : زينه الحمدلله
فجر : الحمدلله .. زين انتي اشلونج ؟
روان : متضايقه حيل احس ان روحي بتطلع
فجر : روان تعوذي من ابليس .. وان شاءالله جاسم يقدر ينسيج بدر
روان : ( صوتها بدى يتغير ) ادزله مسج اقوله اني راح اتزوج ؟
فجر : ( اسكتت ماتدري شتقول )
روان : الو ؟
فجر : معاج
روان : ها ادزله مسج ؟
فجر : انا قلتله
روان : قلتيله ؟!!
فجر : اي دش المسنجر وسأل عنج وقلتله
روان : ( دموعها بعينها ) واشقال ؟
فجر : ماقال شي طلع من المسنجر
روان : ( تبجي ) الحين اشراح يسوي ؟؟ والله خايفه عليه ابي ادق اتطمن ماقدر اخليه جذي
فجر : روان اشفيج ؟؟ خلاص راح تتزوجين واهو بنفسه قالج الله يوفقج بعد ليش تفتحين عليج ابواب صعبه تتسكر
روان : ( ميته بجي ) بس ماقدر لازم اتطمن عليه
فجر : روان حبيبتي بس عاد اخوانج مو ناقصين لا يسمعونج
روان : خلاص تعبت والله ماني قادره اتحمل
فجر : حاولي تنامين وان شاءالله مايصير الا كل خير
روان : اوكي تصبحين على خير ( سكرته وتمت تبجي مده لين نامت )
----

- بريطانيا –

( بدر وفواز بشقه مسعود وفي 4 شباب غيرهم وطبعا مايحتاي اذكر شنو في بعد بس ان الجو مو حلو )

فواز : بدر خلاص اليوم ابيك تفرفش و تنسى كل شي
بدر : ( قاعد عالقنفه وساكت مارد عليه )
فواز : شوف اللي حواليك انت بس أشر وهم يجونك
بدر : فواز اسكت عني شوي
فواز : اوكي على هواك ( قام من يمه وأشر حق وحده انها تروح تقعد عنده )

( يت اقعدت يمه وحطت ايدها على فخذه )
البنت ( طبعا أشك ) : ( بدلع ) hiiii //هاااي //
بدر : ( طالعها مده واهو ساكت )
البنت : ( قربت يمه )
why do you seem so sad ? // ليش مبين عليك انك وايد متضايق ؟//
بدر : ( دزها وصرخ عليها ) go away b** :x // وخري عن ويهي ...//

( الكل التفت عليه جان يخليهم ويطلع ولحقه فواز )

فواز : بدر ايش فيك؟ حاول تنساها خلاص
بدر : ( يصرخ ) فواز رجاءا خلني بروحي
فواز : لا والله ما اخليك اروح معك وين ماتروح
( بدر تم طول هاليوم يتمشى ومعاه فواز )
---

- بعد اسبوعين –

هلا : ( مقعده فراس على حضنها ) تره امي طيبه والله انتي جربي قعدي معاها وكلميها وبتشوفين
روان : ( تبتسم بضيق ) كلمتها وايد بس دايما تعطيني نفس ردة الفعل
هلا : ميخالف باجر لي صرتي جنتها بتحبج
روان : بس انا اتوقع العكس بتكثر المشاكل اذا صرت جنتها
هلا : لا تحاتين انا اهني وبعرف اشلون اطلع طيبتها اللي دافنتها عنج
روان : ان شاءالله
فراس : ( يغني ويصفق ) ماما منها ديا
هلا : ( باسته ) يختي علييه يهبل
روان : ( تبتسم ) تره قاعد يغنيلج ماما زمنها جيه
هلا : ( تظحك ) يحليله .. زين روان ماباقي شي وتملجين ما اشوفج تروحين الصالون تسوين برامج عروس
روان : ( تضايقت ) ماله داعي
هلا : شنو ؟؟ اشلون ماله داعي انتي عروس ولا تنسين اخوي المعرس لازم تتكشخين له
روان : اي بس ماله داعي برامج
هلا : لا بلى له داعي لازم اتسوين مغربي و برامج العروس ماكو وقت اصلا المفروض منزمان باديه بهالشغلات
روان : ( تضايقت حيل ) خلاص هلا خليني على راحتي
هلا : اشفيج روان ؟؟ تره اخوي يستاهل هالاشياء
روان : ( اسكتت )
هلا : من باجر باخذج معاي مو كيفج تقولين لأ .. وبنفتر السوق مايصير ماشريتي الا بدل طلعه .. ( تبتسم ) تره الزواج يبيله اكثر من جذي
فراس : ( بجى )
روان : ( خذت فراس منها ) آسفه بس لازم اروح اغيرله ( اصعدت فوق )
هلا : والله هالبنت فيها شي مو طبيعي
----

- قبل الملجة بيوم –

( روان ودت اخوانها عند خالتها وراحت المكان اللي متعوده يتلاقون فيه اهي وبدر )

- اسفطت واقعدت نص ساعه تبجي حييل وتشاهق .. بعدين خذت تلفونها وماقدرت ماتدز هالمسج –
" اذا للحين مانسيتني حاول تنساني .. وانا بعد اوعدك بنساك .. باجر ملجتي .. ادعيلي بالتوفيق "

( بعد شوي دق عليها جان ترد )

بدر : ( صوته مخنوق مبين باجي ) والله اني احبج وما اتحمل فكرة ان غيري بيلمسج ودي اذبحه قبل لا يلمس منج اشعره
روان : ( بصراخ واهي تبجي ) مو انت اللي تركتني وقلت الله يوفقج ؟ مو انت اللي طلبت اني اشوف حياتي ؟ عيل اشتبي الحين ليش اتقولي هالكلام ؟
بدر : والله اني احبج بس لو خذيتج ماراح اريحج بالعكس راح اتعبج معاي .. وماقدر اعلقج من غير زواج .. ( يصرخ وصوته يتغير جنه يبجي ) وهم ماني قادر اتخيل انج بتروحين حق غيري روان والله احبج حاولت اطلعج من بالي حاولت اخربط عشان انسى بس ماقدرت والله ماقربت من أي بنت انتي الوحيده اللي افكر فيها
روان : ( ميته بجي ) خلاص بدر لا تحاتيني جاسم راح يخاف علي وعلى اخواني وهذا اهم شي عندي .. موفق ( سكرته بويهه )

( وقطت التلفون عالكشن اللي يمها واقعدت تبجي وقلبها محترق ودق بدر يمكن 4 مرات بس ماردت عليه .. بعدين دزلها هالمسج )
" الله يوفقج يا احلى شي بدنيتي "

( قرت المسج واقعدت تبجي من قلب بعدين انزلت بطلت الباب اللي وره وخذت الجيس اللي عطاها اياه بدر كان في دبدوب ورساله وحطته على الرصيف وردت اركبت السياره )

( أول ماحطته R ارجعت شوي جان توقف وارفعت السايد وصرخت بحرقه واهي تبجي .. بعدين انزلت خذت الجيس وارجعت بيت خالتها )
---

- بيت ابو محمد –

( روان دشت الصاله كانت عيونها حمر ومبين انها باجيه )

ام محمد : ( مخترعه ) اشفيج حبيبتي ؟ عسى ماشر
روان : لا خالتي مافيني شي رايحه حق فجر عن اذنج
ام محمد : لا ماكو عن اذنج انا صاعده معاج بعرف اشفيج ؟

( دشو غرفه فجر )

فجر: ( اول ماشافت قامت لها وماعرفت شتقول لأن امها موجوده ) روان اشفيج ؟؟
ام محمد : مادري هذا اللي بعرفه اشفيج يمه قعدي ارتاحي ( اقعدت عالسرير وروان اقعدت يمها )
روان : خالتي مافيني شي بس شوي متضايقه
ام محمد : باجر ملجتج لازم اتكونين اسعد بنت اشفيج يمه قوليلي شاللي مضايقج ؟
روان : ( ردت تبجي ) كنت ابي امي وابوي يكونون موجودين بهاليوم
ام محمد : ( لمت روان ) الله يرحمهم .. انا اهني و اعتبريني امج واي شي تبينه انا ماراح اقصر معاج
روان : الله يخليج لنا خالتي
ام محمد : بس يمه لا تبجين متأكده ان جاسم بيرتاح معاج وبتحبينه صدقيني
روان : ( انسدحت على ريل خالتها ) ان شاءالله
فجر : ( تمسح على جتف روان ) بس عاد قطعتي قلبي والله كل شي بيصير احسن صدقيني
ام محمد : انا عادتج بنتي وبقولج جم نصيحه اسمعيهم عدل
روان : ( ساكته تسمعها وادموعها تنزل )
ام محمد : يمه جاسم راح يكون ريلج عاشريه بالمعروف شوفي اللي يحبه وسويه واذا لقيتيه مستانس لا تكشرين بويهه لأن وقت مايكون فرحان مايبي شي ينكد عليه واذا كان متضايق لا تضحكين بس خليج يمه واسأليه عن اللي فيه وحاولي تخففين عنه ولازم ماتعصينه بأي شي حتى لو هالشي انتي تشوفينه بسيط .. وهالله هالله بأسرار بيتج يمه لا تطلعينها حق أي احد ولا حتى حق فجر ادري اشكثر انتو قراب من بعض بس اسرار البيت مايصير تطلع بره .. واهم شي انج تشوفيه أول واحد بعينج بعد الله سبحانه وتعالى .. لازم ترفعينه فووق وماتنزلينه للأرض
روان : ( ماقدرت تسمع اكثر ماتت من البجي )
ام محمد : لا يمه تعوذي من ابليس ( و اقعدت تقرا عليها قرآن لين هدت )

 
 

 

عرض البوم صور بوح قلم   رد مع اقتباس
إضافة رد

مواقع النشر (المفضلة)
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 06:13 AM.


مجلة الاميرات 

 



Powered by vBulletin® Version 3.8.11
Copyright ©2000 - 2021, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية