رائعه نبوض وافكارتس اروع عشنا القصه مع ابطالها حزنا الحزنهم وفرحنا الفرحهم احب قصص الاكشن طبعن اللي تبدع كاتبتها في سرد حوارها فعلن لفتي الأنتباه ككاتبه جديده في عالم النت
خاصه ان القصه هي اول كتاباتس جذبتي القراء من خلال ادب الحوار الله لا يحرمنا طلاتس من انجاز الى اخر وفي انتظار اللي بعد متى يرتاح
من قصص


اسعدنا واياكي الرحمن برحمة لايضيق لنا فيها صدر
ويجعل في كل خطوه من خطاوينا يسر
ويسعد قلوبنا بالايمان


في انتضارتس نبوض بس تكفين خفي على نوره وشيخه والهنوف وسلمى والباقي قلعتهم لاكن ذولي من بداية الروايه وهم فحاله قشرى
وبعدين تقولين سالفة هذال يمكن تاثر على نوره وفهاد وش دخل فهاد ونوره يمكن تاثر على سيف والهنوف ايه وهذولا اذا ماخذو بعض خيره مافيه توافق وبعدين تعالي نبوض بيت ابو سعد جربو عمانهم يوم خذت نوره فلاح وشافو قشارتهم وشلون يعطونهم الهنوف
فرحينا نبوض ترى الروايه الى هالحين ماشفنا مواقف توسع صدورنا وتخلينا نتنهد من الوناسه لابطالنا المفضلين
محبتك واختك في الله النوفي

السلام عليكم ورحمة الله وبركاته
اشكر لك هذا التجاوب مع تسآؤلي والذي جاء بروعة روايتك
عزيزتي
اعذريني إذا لم ارد بعد كل جزء فهذا لا يعني أني غير متابعة ولكني لست من هواة محاورة شخصيات القصة فردودي ستكون حول الكاتبة والأسلوب لك خالص الود والتقدير

أمــا يكفينا انتظار يامشــاعر ..

هل لنا بالتكملة بعجل ..

أحب حروفكــ

--------------------------------------------------------------------------------


هذا المســـــــــــــــــــاء تلف حضوره الغيوم حتى احجبت عني الرؤيه فبين النجوم كان مكاني وكنت اانتظرها بشغف حتى تأتي فأني اعلم ان الكثير ينتظرونها لكن القمر في غياب
والسحب تكاثفت لأجواء خلقت لي وحشه فلم اعد اميز الرؤيه يالهي
كيف لي ان اعلم بحضـــــــــورها

ومن بينالسحب اتت بأانكســــــــــــــــــــار يشابه انكسار القلوب التي تحملها
فأاقبلوها

متـــــــــــــــى يرتاح قلب ٍ بالهوى ملكته راحت ايامه كلها وهويرتجيــــــــــــك

وهذال ساكت
فهاد بعد سعد عن هذال وش ذالطريقه الرجال مختلف ماهو مقطب العلم عاد به خلعه
سعد وهو ينطل عمره لهذال- من الي معك تحاكى واربها سالمه لاتبلشنا مع الخلق
فهاد بالقوه بعد سعد الي اعصابه منفلته والشيبان يهدونه
دخل الامن وقالو اطلعو الصوت العالي ممنوع
سعد معصب والشرار من عيونه - مانيب طالع لين يقول منهو بلانا معه
هذال رفع راسه اخيـــــــــــــرا – مابليت احد بليت عمري المره مرتي بين الحياه والموت
الشيبان انشلو من الصدمه ................
ابوسعد ماعاد ميز الي حوله
وابو فالح انخفظ معه الظغط وطلع
ابو فهاد ماتماسك وطاح على اقرب كرسي
فهاد جمدت ايدينه.... وسعد الارض ثبتته على وضعه وكأنه تمثـــــــــــــــال
فهاد اول مره يحس بالضيــــــــــــاع بين هذال الي يبي من يواسيه
ولاعمانه الي منصدمين من الي انقال
ولاعمه ابوفالح الي كسر خاطره وحس بالذنب هذي بنته الثانيه وكن الموقف يتكرر بس بتغير الاشخاص
ولاهوب داري وين يوقف معه ولا هوب قادر اصلا يحدد موقفه
وكان الذهول من نصيبه والصدمه شلت تفكيره عن أي تصرف يتصرفه
كثرت الاطراف وتشابكت .........الاحداث حوله………
والضياع كان هو الي مسيطر عليه عمره ماتوقع انه بيوقف موقف مثل الي انحط فيه
التفت لهذال الي ارخى راسه وغترته اخفت ملامحه
ودارت عينه تدور عمه ابوفالح الي اختفــــــــــــــــــــــى بسرعة البرق
((لحظـــــــــــــــــات عصيبه مرت)) في حضـــــــــــــرة قلوب مكســـــــــره


سعد فاتح عيونه وهو يتنفس حس انه للحظه ان الهواء وقف
وعيــــــــــــــــونه مازالت معلقه على هذال على امل انه ينكــــــر كلامه
فهاد للحين يركب الصوره وعلى طول راح لعمه ابو سعد الي قام يتمسك بحديد السرير يبي يقعد لانه ماعاد تحمل نفسه وعظامه بردت وحس فهاد ان عمه بيطيح قرب له الكــــــرسي
ابوفهاد بعد مااستوعب وقدرت عظامه انها تشله طلع من المكان يدور اخوه الي اول مره يشوف الانكسار بعيونه
وهو يردد
.......
(( مانقص من ولدنا كمله هذال))
.............................
مرت الوقت محد حسبه كانه دقايق ولاثواني المهم كان عند الجميع كنه سنه


سعد- وش مرته ومنهي ومن وين جاتك وانت كيف ..... اقطعه فهاد
فهاد عقد احجاجه وحد صوته بهدؤء ومسك كتف سعد بقوه ودفه على ورى- انت صاحـــــــــــي تشوف حاله المره ماندري عنها وانت تحقق انابروح ادور ابوي وعمي ناصر وانت شوف عمي نايف شكله مرتفع معه السكر بروح انادي احد هنا يقوس سكره
وطلع مثل الــــــبرق
طلع يتخبط ولاعرف وين يروح يشوف الي على عربيه والي يشلونه اهله
والي معهم بزر ودمه مغرق من شله ويمشي ولاكأنه شاف شي يصدم بذى وذاك.......... ويروح مع الاسياب وين ماتوديه....... ومافي راسه غير
وجهه سلمى الي لاجابو طاري هذال عندها استحت واستبشرت

حيث القلوب على حافة هـــــــــــــــــاوية كانت اشبـــــــــــــــــاح الهم مقبله وفي طريقها لتسرق فرحه من بين اضلعها مازالت في المهد
سلمى تلف الكتلوج حق الفساتين ولابسه نظارتها – تعالو بنات وش رايكم بذى
نوال تقعد جنبها- اشوف
تقلبه مع اختها وتمد شفتها السفلى – اممممممممم عادي
سلمى تجره- مالت عليس والله انه حلو شوفي من ورى كله طبقات ذيله
نوال- يالخبل اختاري شي يبرز بعد شكلس من فوق ماهوب بس من تحت
سلمى- اناعارفه موديله من فوووق ماش
دخلت ام فالح خشت سلمى الكتلوج وراها بسرعه- اخلصو اطلعو اماني بلحالها
سلمى – ابشري ان شالله
نوال وبشاير يطالعون بعض ويضحكون – ليه خشيتيه
سلمى – استحي وجع
نوال- يالخبل بتعرسين يعني بتجهزين
سلمى – لاوالله فضيحه تدرون اني افكر وشلون بكره اقول ميد فالح ولاسيف ودوني ولايشوفون اكياسي يافضحي والله بموت من الفشله
بشاير ترفع ايدينها فوووق- اما انا بقول سيف ودني اتقضى لعرسي جعل المعاريس به للزين
سلمى نطلتها بعلبه الفاين- وجدررررررررري بعد ناويه تدعي قدامه
نوال تضحك- يالله اماني برى خلنا نقعد معهم
وطلعو فيما هي انسدحت على السرير ونزلت نظارتها على بطنها وهي تتخيل هذال الحلم صار حقيقه وراحت في احلام بطلها غائب وحبيبها خائن من وجهه نظر الكثير وسيدها بليد
ومازلت المشـــــــــاعر تنزف
له.......... ومازلت ............تنزف .....وتنزف حتى الممات
!!!!!!!!!!!!!!!!!!!!!!!!!!


فهاد في محاوله بائسه بل فاشله لتخفيف من حدة الأمر
مسكه ياعم وش بلاك
ابوفالح شافه بنظره كلها انكســـــــار لكن ماتورى عن الرد- بلاي بناتي
الي حلوق الناس ماهيب راحمتهم ...بلاي بناتي الي عيال عمهم ما رحموهم.....((فهاد حس بالذنب تجاه نوال ))...واكمل ابوفالح وهو يجلس على احد كراسي الماره ...بلاي شفت الشيـــــــــــــــــــن من اخواني وعوالهم
وعادك تنشد وش بلاي !!!!!!!!!!!!!!!!!!!!!!!!
فهـــــــــــــاد ضاع في حرج من عمه ...وانكســـــــر من كلام عمه ....وانوجع من كلام ابو فالح الي حزنه كانت تنطق به عيونه ماهوب لسانه
وفي وسط صمت فهـــــــــــــــــاد
ارخى ابو فالح راسه وجاب طرف شماغه من كتفه وحط ابهامه واسبابه عند مفرق احجاجه الي كساها البياض وايده الي تجاعيد الزمن ابقى عليها
لتنزل دمعه تزلزل كيـــــــــــــــــــــــــان فهاد
!!!!!!!!!!!!!!!!!!!!!!!!!!!
في الغرفه المشؤمه او لنقول الغرفه الكئيبه فهم سيان يقبع هذال بصمت وسعد اخرجوه الامــــــــــــــن بسبب صوته العالي وابو فهاد رجع بعد مالقى خوه ويده على متـــــن اخوه نايف في الطوارئ وكان ابوفهاد اكثرهم تماسك
جاء مبارك وحمد وفالح
فالح دق على فهاد- وينك فيه سعد يقول انك مع ابوي
فهاد كان اخر شي ينقصه فالح وظنونه – معي وهو بخير ووصفه المكان
مبارك وحمد يتطمنون على ابوهم
ويتلفت مبارك على سعد الي دخل بعد ماهدأ- وش بلاكم دافع البلا
هذا هذال طيب كل ذاى عشان ضربه خفيفه هذا هو ماشالله(( يطمر العرفج)) مثل يضرب في نجد كنايه عن الصحه وطيب الحال
حمد- يابن الحلال من الغلا ولاهذا انت رجلك محد نشد منها
سعد بلا مبالاة فجر قنبله كفيله بقتل ابتسامه مبارك وحمد- هذال متزوج
وتكــــــــــــرر السناريو قبل لحظات ولكن بأختلاف الاشخاص كذلك .....عائله غريبه اقدارها متشابهه ......ا لكل لزم الســــــكون ولتحل الرهبه والسكــــــــــــون الاجـــــــــواء مرة اخرى ويسود الصمت القاتل
ثــــــــــــــــانيه ً
في بيت ابونايف اجواء ليست ببعيده عن توتر اهل المشفـــــــى لكن تبقى اقل حده على الأقل
ام سعد- اربك طيب ومابك شي
هذال باانهيار- طيب
ام سعد- ليه توك ترد علي
هذال – مامعي الجوال يالله فمان الله
أنهى المكالمه على عجــــــــــــل

.....رائحه الموت نشمها وترى الموت في هذا القسم يمشي ويجول بين الغرف بهيبه تجعل قلوب البشر تخافه رغم انهم لم يروه .... ليجتث معه احد ضيــــــوف الدنيا .... هذه عائله منكوبه وهذا منحني عند ركبه امـــــــــراءه يقرى عليها ايات من الذكر الحكيم وذاك قد امسك صاحبه في زاويه ويهدئه بعبارات (((ماصار الا الخير والعرب ان شالله سالمين )) مشاهد في قسم مازالت رائحــــــــــــــه الموت تشوبه


رجـــــــــــــــع فهاد وفالح الي كانت نظراته تخترق فهاد وتتهمه بان ماحصل من سببه..... ولم يعلم الى الأن ان اخته الثانيه ستكون ضحيـــــــه من ضحايا هذه العـــــــــــاده وعلى يد من ابناء عمه..............
وصلو فهاد وابو فالح وفالح في الطــــــــؤرى مـــــــــــرة اخرى
ليتجمد فالح لحظات وتوقف فهاد من جهه وابو فالح الي كان يمسك به من الجهه الاخرى وهو يسمع حمد بطبيعته العصبيه
حمد صار على ضروسه وبصوت اقرب للعالي- متى خذيتها الله يقطع فال ٍ جيت به .................
سعـــــد- الا انشده بنت عمه وش محلها وعمه الي فضحنا فيه
مبارك ساكت فالصدمه تشــــــــــل احيانا ً................
ماهي الا لحظات بعد سماعه الخبر لينقض بدون عقل ولارويه ولا تفكير على هذال ويوسعه ضرب في كل محل وهو يكرر
- يالخاين – ياقليل الشيمه – ماتستاهل ماعطيناك – مالقيت الاسلمى سلمى يالي ماتخاف الله – انهمرت دموعه وهو يضربه والغريب والاكثر غرابه -
- استسلام هـــــــــــــــــذال اليه بدون ادنى مقاومه للكمات وضربات فالح –
- حاولو يجرونه منه لكن غضبــــــــــــــه كان اقوى منهم
تدخل الامن وقام هذال الي فمه وانفه كان ينزف وجرحه فتق احد غرزه خياطه الي خلا وجهه هذال كانه مجرى انهار دم والعيال شمغهم في الارض والي يتعوذ من الشيطان والي يحط الغتره على هذال وحمد صـــــــــــــاح بالممرضه وقام يدعي عليها من برودها

شهـــــــــــــد الطوارئ لحظات مريره ومشاهد المت الشيبان كان يوم كئيب للكل الاطراف غادر ابو فالح وفالح وابو فهاد وابو سعد
وبقي الاخوان مع اخوهم والرفيــــــــــــق فهاد
ضمدت جراح هذال و ساعات مرات وهم في القسم المميت.... واخيـــــرا تكلم............
وهو يمسح دم استطعمه بلسانه على طرف شفته واخذ ماء وقطعة شاش من الي عطوه ويمسح طرف شفته وهو عاقد حواجبه من طعم الدم الي قلب على كبده في معده خااااااليه – والله والله لو اني في حال عمري
ان مايروووح بها
التفتو لصاحب الصوت الي اخيرا استوعب ماحصل و طالعو العيال فيما بينهم وكانت النظرات كفيله بجمل و ظلو ساكتين
احيان يصبـــــــــــــــح الكلام غير موفي ويقصـــــــــر فالصمت لذلك يتسيد الموقف


نوره فضــــــــــــى المكان وهدو بعد ماتطمنو على العيال
نوره تفصخ عقدها الذهب لانه ضايقها وشوي تشوف شاشه الجوال
وتبتســـــــــــــــــم (( الخلال شين الحلايا)) يتصــــــــــل بك
وعلى طول خافت مجرد مرور فكـــــــــرة لو شافه
فهاد – الو
نوره ببرود- هلا
فهـــــــــاد – يمكن ماامرس
نوره – ازين
فهـــــــاد – وش الي ازين
نوره بخوف- يعني اقعد شوي عند اهلي
فهاد ماكان رايق لها – ايه استعدلي
نوره تزفر من طريقته وهي الأخرى لم تكن بحاجه لنعراته- متى يطلع هذال
فهــــــــاد- داق عليس عشان اقول يمكن يطول في واحد من اخوياه حالته خطره ويمكن يطولون عنده علمي الي عندس
نوره - على خيـــــــر
فهاد – فمان الله
وعلى طول وهي متروعه على خيارات – تعديل – اسم ومسحت اسمه
وكتبت فهاد
راحت تبلغ امها بالي قاله فهاد
الجازي – رجلس متى بياخذس
نوره ماانتبهت لانها مااستوعبت كلمة رجلس ردت بااستفسار غريب او تأكيد اغرب – فهاد
الجازي – الا والله زوجك – يو هاز باند- سيادة الموأدم ياستي – قوزك
بجميع الغات تؤدي فهـــــــــــــــــــــــاد
نوره حست رجلس اول مره تنفضها – ايه يقول لين يتطمن على خوي هذال الله يشافيه يقولون حالته ماهيب لهناك


في السيــــــــــــاره فالح كان يصد من ابوه ويخفي دمعه امتلت بها محاجر عيونه وازرى يظهرها فيزيد على ابوه كم مره وهو يسمع تعليق خواته وكم مره قالت له اماني ان اختك مبين تحب هذال من عادها صغيـــــره
والحين يكسرونها وش وجهنا من الناس وذي ثاني اخت لنا ترد ولابعد من عيال عمها وش بيقولون عن سلمى امتـــــــــــــــــــلأ فالح حقد على هذال
قطع عليه ابوفالح بصوت مهموم – المصدوع سيف لايدري الحين
يبلانا مع عيال عمه خلني انا الي بحاكيه
فالح – ابرك
ابو فالح – لعنبو ابليسك بيبلى عمره ويبلانا ويفضحنا في الله وخلقه لا بالله لايدري مانيب ناقص قصمت ظهر غير الي قدامي
!!!!!!!!!!!!!
الهنوف – مشاعل انا ذاله من بكره ؟؟
مشاعل – ليه؟؟
الهنوف- المدرسه خايفه من الزفت تشكينا
مشاعل- خليها هي الي بدت وحنا مااخطينا مسوين حفله فوزنا في المزايين في الله وفي امن الله وهي الي تلقفت
الهنوف تصفق – بكره الاستدعاء جانا وفضيحتنا في جلاجل وعجزو ما داووونا والقلب باالعقايب متساهل ياهوووه ياليل دادن ويليل دانه ويليل دانه ليل دانه
وقامت مشاعل وخذت غطاء الاكسسورات وتطبل عليه ويغنون
وقطعت الاغنيه الهنوف سلمى جابت الجهاز
مشاعل تغمز- يس ماشفتيه لبى قلبها
الهنوف- اشوى جابت لاب توبها قلت حقي يبند لااتصل وجابت حقها تقول مااحتاجه الحين بنحمل البار ت الي نزل وتقول والله لو القى روايه نهايتها غلقه لا العن خامسكم
مشاعل – لبى عربٍ في ذمتي سلمى منهم
وعقبه رجعت تغني وتصفق ومشاعل بالطبل وهي تدور


على الدرج شايل ملازمه وكتبه الي توه مصورهم
سيف يدندن – ويلااااااااه ضاق الصدر وماذكر يسأل علي ويلااااه
نســـــــــــــــــاااااااااااااه طول الهجر ولا الهجـــــر من قسوته قساااااااااااه
بشاير مقبله عليه- ووعععععععع اسكت والي يرحم واليك لايصكون دار الفنون عقبك
بشاير- اقول سيف العرب هاجده ابوي وفالح اخبرهم ذا الحزه بقهوتهم برى
سيف- تلقينهم مجتمعين عند عمي ابو فهاد ولا ابو سعد

سيف في نفسه ابو طرى عمه ابوسعد لمع في راسه اسم الهنوف وفي خاطره هي ليه صايره ماترد ونظراتها البارده وش معناها وضحك بقوه
(( اخس ياهنيف تعرفين حرب اعصاب والله حركات )) مالت عليس مااشحنتيني (( يعني ماهميتني ))


في غرفتهم شايلين هم بكره بضحك ومايدرون وش يحتريهم وفاتحين الأب
الهنوف – تشوفين سلمى ماتخلي حركاتها مجلد برقم سري
مشاعل – شين اللقافه ماخذينه غشان الاتصال ماهوب عشان تفتشينه
الهنوف- ماعليه خليها تجي عندي لاخذت هذال لافصفصها
بشاير ارجعي على صور
الهنوف – مابها غير صور عرس فالح يوم عرسه على اماني والفاشل سيف وعمي ناصر
مشاعل بلهفه- ارجعي ارجعي خلنا نقزه ماعمري شفته ودققت زين
الهنوف – مالت الفاشل قدر وجهس
مشاعل- الاتعالي وش فيس هاجده منه ذا المره
الهنوف تخفي شي وتعذر- مدري خفت يقول للعيال وساعتها يلعنون خامسي وفرقاه عيد يابنت الحلال في الي مايحفظه
الهنوف ماقالت لمشاعل الكلام الي سمعته وتحس انها لاقالته مست خواتها وجرحت نفسها بنفسها ففضلت خلها بالقلب تجرح ولاتطلع وتفضح
مشــــــــاعل- والله انه حلو بس سوالفه بعد تحليه
الهنوف – والله ثم والله لو ماتسكتين انه على راسس ........الحين ابو جبهه كنها ساحه تفحيط حلو^_^
!!!!!!!!!!!!!!!!!!!!


قعدو البنات يتقهوون صادفهم ابو سعد وهو يدخل البيت ووجهه اسود
مر وسلم والبنات استغربو ماهيب من عوايد ابوهم يدخل دون مايعلق ولاحتى يتفقدهم

وكملو ضحك وسوالف بعد ان تبادلو نظرات الااستغـــــــراب قامت نوره من عندهم ولحقت ابوها
ابوسعد يرمي غترته والتفت لها
حياالله – النوري
نوره بحياء تذكرت انها عروس اوتناست انها عروس – بخير جعلك بخير تونس شي يايبه وجهك من دخلت مصفوق
ابو سعد تمدد ومابغى يكدر عليها – ابد مابه شي يابوس شغل ماشغل ولارحتي ردي الباب وراس وقولي لاحد يجيني
راحت نوره للباب وصكته لكن ماطلعت الا سكرته ودخلت وتوجهت لاابوها وجات عنده
وهي خايفه – ابو سعد نفداك علمني به شي اكلم عماني
مارد عليها ابوها خافت
قامت اجل بكلم ابوي ناصـــــر
ابوها بسرعه رد- لا ناصــــــر لاتحاكينه
نوره وعيونها تدمع- علمني والله مايطلع لاحد بس قول وش الي مكدرك
ابوسعد- هـــــــــــــــــذال متـــــــــــــــــــــــــزوج
صاعقه صعقتها في لحظه وشلت عظامها اخذها تفكيــــــــــرها بدون مسافه لسلمى وفي لحظه لاعمها الذي تألم في الصميم الى ان وصلت لفالح
تعلم كم هو مجنون وقد يتصرف بدون رويه والجرح الذي خاطه فهاد رجع هذال ليفتحه بمراره


ابو فالــــــــــــــــــح قعد في المجلس ونادى سلمى
فالح – يبه بشويش عليها سلمى هشه
ابو فالح يمسد وجهه – خابر
وكأنه على موعد في قتل اعز بناته احيان تجبرك الحياة ان تقوم بدور لاتريده ولأن يتقمص ابو فالح دور السيــــــــــــاف وعلى من
ابنـــــــــــــته الحلم الندي
سمع صوتها مقبله تحاكي بشاير- مفتاح درجي معي ولو تموتين ماخذتيه
دخلت بنظارتها وهي تضحك على شتايم بشاير بصوتها
عند الباب – هلا يبه بغيت شي
ابو فالح ادخلي دخلت والتفتت لفالح الواقف عند الباب ونظرت له بريبه وكأن عيونها تقول (( وش موقفك عند الباب )) لما سمعت ابوها يأمره بقفل الباب
اكتست ملامحها بحمره وخجل وفرح ظنته يريد ان يتكلم بشأن هذال فماكان منها الا ان تنشغل بشعرها ووتنظر الى شفاه ابيها كيف تنطق اسمه
ابو فالح تنحنح- وين ودس تروحين العطله اسمعس تقولين للبنات ليت ابوي يودينا مصر فالح يمدحها هو واماني
استغربت من حنــــــان ابيها الامتناهي – هو حنون ولكن ليس لدرجه ان ينفرد بي ويأخذ رايي في امر ليس بسهل
فالـــــــــــح في نفسه تــــــــــــــأوه لاااااا- يكره اسلوب التدليل ظن ان من حولك ان هذا كفيل بتخفيف مايحدث لك في حين ان تصرفهم هذا يبعث في نفسها ان الأمر مؤلم لدرجة انهم يريدون أي ضماد يخفف من حدة الألم
سلمى بدهشه – عادي وفي نفسها مادامت بتزوج بتروح حتى لوبغت باريس هذال ماراح يرفض لها طلب يكفي في الحفله عير شيخه عشاني وهو الي عمره ماقال لها شي وهذا نقطة من بحـــــــــــر
ابو فالح – اجل العطله الصيفيه في مصر اذا الله اراد
سلمى نست شخص كان متوتر والتفتت له يوم تكلم بحنق
فالح والقهر بعيونه وجبينه – يبه بتكلم ولا اتكـــــــــــــــلم
صابها جنون هناك امر يخفونه – لم يكن الامر يستدعي كثير من الذكاء سؤال والدها لها عن رأيها في أي عطله يقضون صيفهم يضمر خلفه شي سيئ لها
سلمى تركز النظر لاابوها – تكلمو فيه شي ماعاد فيني شي يتحمل
قفزت فكره مجنونه لرأسها احدهم صابه مكروه
بصوت اقرب لتهدج – سيف فيه شي
فالح- لا مابه شي
سلمى – عماني فيهم شي
ابوفالح – لا ياابوس عمانس سالمين بس هذال.....
سلمى بهدؤء مميت- هذال فيه شــــــــــــــــي
سكتو
وسكوتهم اثار جنونها وكأن مكروه وقع له وكأن حقا اصابه اذى
حتماً ستمــــــــــــــــــــــــوت هي على اثره

انهمرت دموعها طالما كانت تكره الروايات التي تنتهي بفقد البطل البطله
طالما كانت تتشاجر هي والهنوف عندما تحمل الروايات التي نهايتها كئيبه
طالما كانت تسخــــــــــــر من كاتبات تنتهي قصصهم بفراق الابطال
ولم تكن تعـــــــــــــــــلم انها ذات يوم ستكون بطله لقصه كتبها القدر هي بطلتها ويسطر الفراق نهايتها
سلمى بلمت وبشويش وبرجفه بانت في صوتها – هذال وش فيه ...؟؟
فالـــــــح انفجر يوم شاف دموعها وحس ان قليل الشيمه مايستاهلها – لامافيه شي............. وامسحي دموعس الك.....ال......
سلمى متشتته فصخت النظاره
ابو فالح- ابوسعد هونو عن نسبنا وبيفك الحجـــــــــر عنس هذال في عشاء عام
سلمى جمدت وصار ماتفرقها من سكونها بين أي قطعة اثاث موجوده من جمودها وامتلت لحظه عيونها بالدموع – ليـــــــــه .....ليه يايبه...؟؟ليه....؟؟؟

سـلـم عـلـى ][ قـلـبـك ][
وعـلـى عـيـونـك ..!
وعـلـى , ’ الـجـنـون ’ , اللـي طلـع من شـانـي
وعـلـى الـمـشاعـر
اللـي تـمـر كـل يـوم وتـعـداني
وسـلـم عـلـى | درب الهوى
اللـي عـرفـتـه وتـعـبـت أمـشـيـة
وأشـوف ~ غـيـري ~ مـشـى فـيـه ..!
سـلام يـا خـل ماقـدرت أبـكّـيـه ..
بـس هـو بـ / الحـيـل بـكـانـي ...!!
أمـانـه
يـالحـبـيـب اللـي خـذا ’ قـلـبـي , وخـانـه
أسـألك سـؤال [ واحـ 1 ـد ]
بـس واحـد
لـيـش ~ ضـيـعـت ~ الأمـانـه
وقـلـبـي اللـي كـنـت عـايـش فـي حـنـانـه
ضـاع بـ / اسـبـابـك
ضـاع قـلـبي
و
ضـاع قـلـبـي
ومـا دريـنـا عـن مـكانـه ...!!
حـتـى عـيـونـي فـي نـظـرهـا
~ تـصـونـك ~
لو تـنـظـر لـ / غـيـرك
[ طـعـنـت بشرفـهـا ]
عـيـون مـا تـعـشـق سـوالـف عـيـونـك ×
مـاهـي عـيـونٍ لـي ؛؛؛ ولا أنـا عـرفـهـا

مؤسف حين لم يــــــــــكن الجــــــــــــــزاء من جنس العمل في الوفاء
كـــــــــــــــــان هذا جزاء القلب الذي وفى في الانتظار وصان رغم الغياب
استحت سلمى تبين ان تكون انفعالاتها بسبب هذال مهما كان هيبة ووقار ابوها يمنعها تظهر مشاعر مثل هذي
وكملت وسط بحيــــــــــــره من الدموع – والناس وش بيقولون عني وجماعتنا... وخوالي...واهل القويعيه... وخوياتي.. وجيـــــــــــــــــرانا وين اودي وجهي من هم
فالح اشتاط وعلا صوته– بالعون قايل لك فكنا منهم عماني ماهمم الاعمارهم هذي سلمى الثانيه بتحتري الثالثه والله ماتروح لهم ..بس تدري ليه .... كل ذا عشانك ولد ((العميريه))
وطلـــــــــــــــــــع يدور شي ينفس فيه غضبه سأم عمانه سأم المتعجرف فهاد يواسي هذال كأنه هو المصاب سأم علاقه الدم الي بينهم
هي والدة ابو فالح عائله من تجار الشرقيه عرفهم الشايب وناسبهم وجابت ناصــــر وتوفت وماانقطعت العلاقه ورجع الشايب وزوج ولده ناصر منهم وخذى ام فالح تصير من خواله

طالما كان فالح يغني هذا الموال ويوم كان في السجن قال ماهوب نافعينك اخوهم من ابوهم ((كان لايعطـــــــــــــي أي اعتبار لأقاويل ولده وبعد خطبه فهاد و ترك نوال قـــــــــــــال قد غصبو بنتهم ((الجازي)) وهي اصغر من المعرس قدها و ش كبرها وتاخذ بزر توه متخرج من الثانوي ولاغصبو فهاد ياخذ نوال هم الي يبون الفرقى من الله
والحيـــــــــــــــــــن جابها وحطها في صدر ابوه
سلمى وسط دموع صامته – صاير شي بيننا عشـــــــــــان يهونون وليه ماهونو من البدايه
ابوفالح كان يتدرج مع بنته عشان مايصدمها – هونا حنــــــــا يابنتي
سلمى بصوت متراخي وكل عرق فيها وهن – يبه ماعاد افهم شي من الي هــــــون ولاتقول هون ...... كنا لعبه قل من الي عاف حنا ولاهــــــــــــــــــم
ابوفالح – بقولس وش صــــــــــــار وعقب حددي عادس تبينهم ولا لا
سلمى وصوت قلبها كاد ان يكسر اضلعها
ابوفالح بسكون مميت – هذال تـــــــــــــــــــــــــزوج
كانت تحاول تخفي انفعالاتها عن والدها انه بسبب هذال لكن فشلت في اخفاء دموع هو من سكبها

ألا يـا [ ساعـة الفـرقـى ] فضحتـي لوعــة المشتـاق
جبـرتـي دمعـتـهـ تنـزل .. ! وهـو ودهـ يخبيهـا ..!
ألا يـا ساعـة ٍ عـزت .. " دقـايقـهـا " علـى العشـاق
تـمنـوا هـ العـمـر يرحـل .. ! و لا ترحـل ثوانيـهـا ..
خدعهـم : فـرحـهـم : لمـا .. نسـوا إن الزمـن فـرّاق
إذا شـاف - الفــرح - فـي عيـن يحلـف إنـهـ يبكيهـا
تحـس قـلوبهـم ترجـف .. إذا سمعـت ذكـر لـ فـراق !!
يعذبهـا كـلام النـاس // عـن .. الفـرقـى .. و يشقيهـا

يضحكون – اكيد مزحه – لاااااا بل مقلب من مقالب السخيف سيف
هكذا هتفت نفسها
سلمى – كيف
ابوفالح رفع وجهه لبنته الي انهارت من انفعالاتها من خوفها على سيف لا يكون حاشه شي الى هذال الى انهائهم الزواج الى زواج هذال لكن مايفعل هذا افضل بكثـــــير من صـــــــــــدمه قد تفقده ابنته الهشه
ابو فالح – متــــــــــــــــــــــزوج وهو في المستشفى مع مرته
ابوفالح والزواج قسمه ونصيب و..................
ويوم العرس قسمه ونصيب ليه ماقالوه لفهاد ليه ماقالوه لبنتهم ولابس عذر عندنا بنك صـــــرفه
هذا كان كلام سيف الي داخل و وجهه منتفخ بعد ان انتشر الخبر بشويش وكأنه داء او وبـــــــــــاء قضى على الكل
سلمى مابقى بها عروق وشرايين تصلبت لين تقطع كل عرق يربط القلب كل شرايان تبرى من قلبها حست ان قلبها بقى وحيد وماعاد فيه وسيلة اتصال لقلبها تمده بالدم
قامت بعد مااستوعبت كل شي الا بعد ما استنزفت قواها وابوها يمهد لها الخبر
سلمى قامت وقطعت انفعالات سيف - عفناهم يايبه العـــــــــــــــرس قسمه ونصيب ..............عفناهم
قامت وهي تمر على المقلط وتشوف امها تكلم ام فهاد وتدعي على بيت ابوسعد بااهله واماني ماخلت كلمه ماقالتها وكن الو ضع ناقص كلماتها الي كان مفعولها بنزين لنار هــــــــذال الي شــــــــــــــابه
شافتها نوال نادتها لكن سلمى كانت تمشي ببطئ غريب وتماسك ماهوب وقته ولاردت لحقتها نوال تمسكها – فيس شي
سلمى ببلاهه – ها اا
نوال بخوف وتنفض اختها- سلمى فيس شي ؟؟؟؟؟؟
سلمى- لا وش تشوفيني جايتس اصيح وانيح مافيني شي
لاحد يقومني للعشــــــــــــاء برقد
سيف دخل على امه – وينها؟؟؟؟
دخلت عليهم نوال – راحت ترقد
سيف بصوت عالي – لاتخلونها ترقد وهي تبكي ماهوب زين اقعدو معها شوي
نوال تطمنه- رحت لها ماعليها مافيها شي
سيف- طلع لأابوه الي ضوايق الدنيا مجتمعه عليه وهو يشوف البيت مقلوب فوق تحت والجوال سكره مايبــــــــــــــي احد من اخوانه يكلمه ولايبي احد يعتذر يبـــــــــــــي خاطر بنته الحين يطيب وبس واهم شي ماتنكسر والباقي كلام ملحوق عليه كان خايف على بنته وارتاح انه وصل لها الخبر بشويش ولو نشف دمها لين وصلها اهم شي مايصدمها سلمى غير نوال
نوال كانت قويه ونوال ماحجروها من يومها صغيره نوال مالها خاطر في عمانها مثل سلمى الي تعلقه حتى بالبنات

طلـــــــــــــــع من البيت مثل المجنون وهو يسوق متوجهه لبيت عمه
الهنوف ضايقه ولاهيب مصدقه ومشاعل تهديهم ام سعـــــــــد ارتفع معها الظغط من كلام ام فالح والي يقهر مرت ولدها الي ماتحشم دخلت في السالفه وهي تقول لو البنات راضي بهم عمي يرحون لأخواني ماغدى نصيبهم كذى وحدها خلاها والثانيه متزوج وتدعي علينا
طق الباب ونوره عند امها- روحي يالهنوف للباب شوفي من عنده
لبست جلال وطلعت وعند طرف الباب – سيف
الهنوف تحس ان شراينها انقبضت من نبرته ففتحت الباب – قالت دونك المجلس ترى مابعد جو العيال
دخل سيف بطريقه جنونيه وهو يطل في بيت الشعر ويرجع يلتفت للي واقفه عند الباب وصاااااااارخ عليها بصوت ظنت ان الحي كله سمعه
سيف بصوت عالي – وينهم ؟؟؟؟ومتى يرجعـــــــون ؟؟؟
الهنوف متروعه – وش دراني
سيف في وسط الحوش- والله مايغدي بها الخسيس والله مايغدي بها
نوره سمعت صياح الرجال راحت وعند المدخل الرئيسي – مساك الله بالخير
هنا سيف التوت ذراعه هذي نوره نوره الي كانت تدافع عنه لاضاق ابوه نوره الي كانت تنشد اذا معتاز شي عنه كنه اخوها نوره الي افضالها عليه واجد نوره الي لابغى شي خلاها واسطه عند ابوه من غلاها
سيف كانت عيونه اقرب للحمره – ليه يانوره يسويها ليه ؟؟
نوره تفشلت – الرجال مع مرته في المستشفى وماحاكينه حنا يااهله ولاندري لين نشوف حال الاادميه الي بين الرجاء والموت وفيها حلال
سيف- لابالله مافيها حلال فضحنا في الله وخلقه قليل المروه
الهنوف الكل يدري انه هذال عمله خاصه وغير مبارك وغير حمد الي دايم تخالف معه
الهنوف بصوت مقهور- حدك .....حدك ياولد ناصر داخل البيت وتسب اهله ....وتقول لهذال قليل مروه ...اجل سواتك وش هي مروه ولاشيمه يالشيخ
التفت للي واقفه عند الباب ومتغطيه بجلال صلاه ولامبين منها الا صوتها
سيف التفت لها – لا حشاء والله يابنت نايف المروه ماشفتوها الامنا ولاانتم ماشفنا منكم الا القهر والشين كان حنا الي نغصب عليكم (( غصت الهنوف بعبرتها لانها عرفت انه يقصدها )) وحنا الي يحجرون بناتنا ويهملون ماتعلمينا وش خذى بيتنا منكم الا الغثـــــــــــــــــاء ؟؟؟؟؟؟؟؟
صرخ تحـــــــــــــــــاكي وعلميـــــــــــــــــــــني ؟؟؟؟؟
نوره تحاول تهدي الوضع- اذكر الله وادخل ياسيف لين يجون العيال
سيف خلا الهنوف تنهار وذر الملح على الجــــــــرح وهو عاده طري
مانست كلامه عنها في طريق مكه وجاي بعد يزودها – نغصب – بس ياسيف... بس ...
طلع سيف وقبل لايعدي الباب رجعه صوتها – كانك تحسب ترانا بعد بنحسب ........ بس تدري وش الفرق بيننا.... ان حنا لاشفنا المر منكم ندمحه ونقول عمنا واهلنا واللحــــــــــــم لاقرص يوجع بس انتم لاجاكم المر ماتدمحونه وتسمونه شين وعمــــــى عين..... كانك بتحاسب ترانا بنذكرك...... اولها خذيتو نوره ولاهو الله ابرك مقعد عندكم... غير امك الي كل شوي تغير عليها واختك وبنت خالك مثل وكل مره والثانيه ((فالح ان طال الوقت ولاقصر مرده للبنت الي في خاطره)) وتسكت وتدمحها ولاشكت لأمي قلنا عشان عمس ابلعي النعمه ولا فالح يشوف مرته تسمع الي يسم الحال ولايقول شي تعرف بعد الغوالي مايقدر يقول شي حتى لوكان يدافع عن مرته
نوره تسمع وكانت تهدي الوضع بس الحين بكت من كلام
الهنوف الي هي اصــــــــلاً كانت تكلم و تصيح
قالت بطلع في شقه بلحالي ابعد عن الشقاء قلنا عمس الي سماس وعدس احدى بناته تبعدين عنه خلس مع العرب صحنس صحنهم ومقعدس مقعدهم وجمعي العرب لاتفرقينهم
وطلقت نوره الي والله خسارة عندكم وترى ماقلنا شي نصيب والله كاتبه
وحنا الحين تلفي علينا غصايب((تقصده هو)) ونبلع النعمه مثلك ماتبلعها بس ((بســـــتـــــــــــــــــــر)) ولاشكينا للبعيد ولا القريـــــــــــــــــــــــب لانا انعرف ان اللحم يوجـــــــــــــــــع
وبكت وبكت وصوتها تقطع وكملت - روح ياسيف كلامك ماهوب معنا كلامك مع الرجال لاعودو
روووووووووووووووح وتجر الصوت الي تقطع من البكي والقلب الي انهان للمره الثانيه من نفس الشخص بس هاالمره قدام اختها الكبيره- روووووووووووح
طلعت الجازي الي شافت نوره عند المدخل مسمره تبكي والهنوف مثلها وسيف متجمد من كلام الهنوف قالت بسرعه- سيف جعل ربي يرضى عليك كلامك لاجاء عمي ماهوب على البزر تهرم عليها بشي سواه اخوها ماهوب هي الله يصلحك ادخل واحتريهم
لكــــــــــــــــــــن سيف
طلــــــــــــــــــــــع في لمح البصر وهو متشتت ومنصدم من منظرهاعمره ماشافها كذى عمرها ماعصبت كذى ؟؟؟؟
؟؟؟؟ الهنوف الي ضحكها وينه انت ......انت .....ياسيف بكيتها
انت ياسيف قهرتها.....ايه انت ؟؟؟؟
حتى نظراتها بسببك .......؟؟؟؟
بس خلهم حــــــــتى دموع سلمى بسبة الي تدافع عنه
اجل خلها معه .........

ليله عصيبـــــــــــــــــــه مرت ليله ماهي مثل كل اليالي
ام فهاد على طول راحت ترابط عند ام فالح

العيال تعبو في المستشفى استنزاف طاقه وتعب اعصاب مايدرون عن مصير مرت هذال ولا عن الأوضاع هنـــــــاك
مر الوقت من عصـــــر وضواهم الليل
واخيرا طلع الدكتور
سعودي الجنسيه ملتحي علامات الصلاح في وجهه والخير في تقاسيمه
الدكتور- السلام عليكم
الكل – وعليكم السلام ورحمة الله وبركاته
الدكتور وهو يجول نظره بين العيال التفت لهفهاد نزل غرشه الماء عن فمه الي كان يشربها وكأنه متوجس - وين زوج الاخت الله يجزاكم خير
هذال بربكه – انا ...بشــــــــــر يادكتور
((بشــــــــر)) كلمه موجعه بل مؤلمه شخص يشبت بالأمل في حين ان الأمل قد رحل لامحــــاله
الدكتور- بهدؤء انت انسان مؤمن ولو اطلعتم على الغيب لاخترتم مااختاره الله لكم
هذال وقف بتوتر واعصابه بعد الي صار لعمانه بسببه ماعاد به حيل - حيه ولاميـــــــــــــــته لاتحط لي مقدمات اخلص ...
الدكتور تنهد لان هذال قطع عليه المسافه – عظم الله اجرك والهمك الصبر والسلوان في مرتك
طاح هذال على الكرسي وهو ينتفض ويديه بأاصابعها على راسها بصمــــــــــــــــت لان بكاه حسره وماهوب الم بس
هو السبب للي صار للشيبان وهو السبب في موت مرته
وساوس الشيطان قامت تجول في خاطره وتنهشه رغم ا ن الي حصل
كان مقــــــــــــــــدر ومكتــــــــــــــــوب
العيال فوق راس هذال
طلع سعد يبكي من حال اخوه وحال عمه فالح الي صدق انوجع
فهاد بقوة باس كان على راس هذال - اذكر الله وحده
لااله الا الله ((نطقها الكل )).....يومها الله الي كاتبه من يوم عادها في بطن امها
ادع الله يرحمها برحمته تعوذ من الشيطان
العيـــــــــــــــــال فوق راس هذال
وراح سعد يسأل عن اجرأت استلام الجثه وطلبو من ولي الأمر توقيع استلام المرحومه
سعد حاول معهم انه ولي امرها في حاله صعبه الاان هم صعبوها
تهاوش معهم لكن مافيه حيله
خذى كرت العايله الصغيـــــــــــر الي كان اسمها مدرج تحت اسم هذال
وتروع وكأنه توه يستوعب ان اخوه متزوج
لمى مطر عبدالرحمن ..ال....من مواليد عام 1405هـ االمدينه المنوره

كان مبين انها صغيره وماهيب كبيره ومن اسم العائله والجد انها من الأسماء المعبده والي استشفه ان البنت من الحضـــــــــر
جاب سعد الأوراق لهذال وهم حارسين الطواري والليل اظلم يبون يرحون ويطلعون من الهم الي هم فيه ويشوفون الحريقه الي برى مشتعــــــــــــــــــله بين الشيبان في برودة ليل قارس ماافلحت برودته في اخماد لهيب كانت قلوب من الألم اتلوى






في بيت ابو سعـــــــــــــد
دخلت الهنوف والجازي حاطه يدهاعلى كتف الهنوف واليد الثانيه تغسل وجهها الي منتفخ وعيونها متنفخه وتغسلها عند مغاسل الريجيل وتسمي عليها وهي ترش الماء – خلاص ياهنيف الحمدالله تبكين عشان كلام سيف عادي مقهور وفرغ الي بخاطره ياويلي تصيحين كنه مذبوح لس احد دافع البلا....... هذي عمتي كلت علقه من ام فالح وامانيوه وهم نسوان كبار ولا بكت.... وانتي صياح كانه ماسكس برقبته تعوذي من ابليس سيف صبي وطاش عشان اخته الي الله وش هو حالها هي الحين
الهنوف تجر الفاين وتنشف وجهها وبوت مبحوح- طيب ليه يقول ماشفنا منكم الاالشين والغصايب ....تشاهق وتكمل ...ليه يقول لهذال الخسيس
.....وتبينه عادي
الجازي تمسح على وراس الهنوف الي غرق الماء مقدمة شعرها – بلاس ماسمعتي ام فالح وش قالت تقول زووود ٍ على ان بناتس هم على قلوب خلق الله وانتي عارفه مقصدها حتى عيالكم الله يكفينا شركم همن بعد جعلس تلقينها في دنياس قبل اخرتس - هذا كلام ينقال
جات مشاعل ومعها العزايم الجازي قالت لمشاعل ضحكنا وسولفنا وتوس تلفين بها علينا
مشاعل تلوي ثمها – مالت مالقيت جاهزه رحت ادور الزروف
الجازي تجر الهنوف- يالله يالله خلنا نروح لعمتي نغير جوها شوي


راح يمسكه فهـــــــــــــاد صاحي انت وين بتروح بيروح يشوفها
سعد بمنعه
فهاد- انا قبلك حاولت وعياء على الاقل لين يهدا
راح من اللدكتور والسستر يشوفها قبل لايودونها لثلاجه
دخــــــــــــل خطوه تقدمه وخطوه ترده شافه وجهها لافه على جهة اليمين وماكان فيه اثــــــــــــار واجد لجروح وخدوش سوى قطرات دم على شحمة اذنها باقي عليها اثرها على جهة اليمين
خدها وجبهتها فيها خطوط دم صغيره من قزاز السياره وعلى رقبتها
وقطعة شاش في مؤخرة راسها
وجهها تقريباً سالم من الخارج وقطرت الدم المتجمده على شحمة اذنها يوم لمحها مره ثانيه خلت كل قواه تنهار مسك يدها البــــــــارده وهو يبكي
الدكتورتكلـــــــــــم – سبب الوفاء ضربه حاده في مؤخرة الراس ادت الى نزيف حاد على اثره فارقت الحياه حاولنا نوقف النزيف او نخفف من حدته لكن قدر الله وماشاء فعل
تذكر صـــــــــرختها يوم ارتد راسها بقوه من الصدمه واطلقت صرخه دويها في ذانه للحيـــــــــــــن يرن .......... تذكر وش كانت تسولف له
عن ابوها واخوها .....تذكر الطريق الي كان سوالفه عن بنت تحملت الوجع رغم صغر سنها عمرها قريب من الهنوف وشكلها بعد ويشوف اخته وسوالفها ويقارن بسوالف مرته ........
اليتم – الغــــــــــربه _ الفقر- ثم المــــــــــــــــوت
دنياء مقاديرها واجد ودوراتها ماتنومن
وهــــــــــــذي هي خذتها والفرحه معها تمت اسبوع وايام
تذكر يوم تقول قووووم ورني اهلك تذكر يوم تعلق عليه – اثرك شيــــــن مع عيال عمك وتضحك........تذكر يوم يشتري العنب والفاكهه وهو معها في المطبخ تعلمه عصير الكوكتيل
تذكر يوم جات حطت الفلفل في جاله وخلته يحتر ولايذوق العشاء ومسك اليمون وعصره في فمها غصب
وقطـــــــــــــــــــع ذكرياته صوت الفلبينيه ومنظــــــــــــر قطرة الدم الي تجمدت على شحمة اذنها
ماادري اذا خلصت اوراقها تستلمها جابت الممرضه الفلبينيه السرير وهمت بنزع الكيسه عن رداء بداخله لم يلتفت ولكن ماان وضعت ذلك الشي على السرير وفردته وفتحت عنه السحاب حتى جن جنونه كيس وثلاجه حقا اكرام الميت دفنــــــــــــــــه



لاتحبسين الدمع يا عيـن هليـه
هلي ترى العبرات فينـي دفينـه
تنشد عن اللي راح والقلب يرجيه
هلي عليه الدمع دامـك حزينـه
خليه يطفي مـا بقلبـي وعزيـه
منهو تركنـي للمواجـع رهينـه
لاقال رايح ولا عطا ميـر تنبيـه
دمعك عقـب المـــــى لاتذخرينـه
هاتيه ياعين لوك تعزين الدمع هاتيه
وأبكيه ألين الشوف ما تفقدينـه
ألين نور العين ياعيـن نعميـه
أدري أنا من راح مـا ترجعينـه
لو ترجعينه كان شافك وشفتيـه
لا تكتميـن الضيـق لا لا تكتمينـه
لا تجرحين القلب ماجـاه يكفيـه
ليتك سمعتـي بالليالـي ونينـه
ماغير يصرخ ما يبي غير راعيه
يا عين راح اللي غمرني حنينـه
راح الذي ياحيف نفرح بطاريـه
وين الفرح ياعين..والمـــى وينـه
وين الذي لامر تضحك خطاويـه
مرحوم يا من ما وفينـاه دينـه
يالله تجيره من عذابـك وتنجيـه
وتعافيه في يوم الملاقي وتعينـه
يامن نقوم الليل لجلـه وندعيـه
وغفر لعبد دين الاسـلام دينـه
يا واحد كـل المخاليـق ترجيـه
عزي لمثلي شاف الايـام شينـه
من لاهب بالقلب ياعيـن يكويـه
الله يعيـن القلـب والله يعينـه
والله يعين اللي فقد زول غاليـه
ليت القصايد ترجع اللـي تبينـه
والله لقصد ليـن القصيد اقبـل اياديـه

نهض من غمرة احزانه يوم شافهم بيودونها الثلاجه عقب ماوثقو تاريخ الوفاة وسببها
وطلع لهم ماهو في عقله - بنطلعها ذالليل وبنغسلها ولااصبحنـــــــــا صلينا عليها مع الفجــــــر
فهاد – على خيــــــــــــر وترى العجوز جابها حمد وعلموها روح لها حنا عزيناها


ابو فالح مازار النوم عيــــــــــــنه ولاهناء فراش ومرقد
ابوسعد كان حاس ان كسر اخوه بسبته وان الناس بتاكل وجهه والأجناب بينشدون
ابوفهاد خايف من الي صـــــــــار يكون بدايه فك شمل لأخوانه وحس بغصه كيف ان هم بذى العاده يبون يوثقون القرابه في حيـــــــــــن ان الي بيزلزل خوتهم هاالعاده وصــــــــار مثل الي يقول نحسبه مطر به شرقنا واثره سيل ٍ به اغرقنا

جاب حمد عمة هذال وعلموها وجاها هذال يواسيه ويواسي نفسه

في راس السيب حق المستشفى وعيونهم تسرق هذال الي قاعد على رجوله ويده على رقبة عمته ويهديها ويكـــــــــــــابد دموعه لاتطلع عندها ولاطلعت سرق شمغه ومسحها قبل تطلع وتزيد الهم على عمته هم

مبارك – لاتكلم هياء هياء ماتحمل ونوره لاحد يغلقها توها عروس دق على الجازي ومنيره وشيخه وامي
يجون معها ويرحون للمغسله مع العجوز
الجازي بخوف- مبارك حرام عليك اتحمل بس المره مااعرفها ولا اعرف اتصرف مع ناس مااعرفهم
مبـــارك – ياجازي اخلصي علينا وشوفي نبي نصلي عليها الصبـــــــــــــــــــح

و لكل عرف بخبر موت مرت هــــــــــــذال
في ليـــــــــــــــــــــلٍ احداثه كانت على قلب هذال قاسيه

كانت ليله كئيبه ويوم ثقيل على الصدور ..لحظات مميته ...اجساد انهكها التعب وارواح قتلها الحــــــــــــــــزن وقلوب تحطمت وقلوب تكسرت
مســــــــــاء ابى ان ينجلي ...لماذ الوقت ساعه الحزن تتوقف عقاربها وتطول دقائقها وتقيم بنا ثوانيها دهــــــــــر.....لماذ الوقت لايتحـــــــــرك بل يظل بطـــــــــــــيئ في مشيه وكأن الحـــزن يحد من مضيه ؟؟؟؟
هأانا معكــــــــــــــــــــــــم انتظـــــــــــــــــــــــر متى ينجلي هذا المســــاء

مسـآء الحزن .. ياهاك الخفوق الذابل الحيران !
مسـآء المزن .. وعيون السحاب ! ... وثرثرهـ غيمه !
مسـآء الجرح .. لاردّت جروحك .. أربعــه جدران !
مسـآء الهم .. لانسنس هواك .. وضمـّـته .. ديمه !

تتقلب وكان النوم ابـــــــــــى ان يأتي في حضـــــــــــــرة ضيوفها اليله
الحزن – الجرح – الألم – الخيانه علم بمجيئهم فأبى الذهاب
في غرفتها لاتعلم بأي شي يحدث بالخارج تنتظـــــــــــر هذا المساء متى ينتهي وتنتظر اطلالة صباح عله ينام جرحها بعد سهــــــر

ياطعم الملح ! ياوحشة طعوني جيت لك بردان !
أبي لي " يد " ! تسرقني " صباح " وشمسنا نيمه !
مسامير السهر تركز بــ عيني .. وابلع الأحزان !
واجي بـ طعون .. يا والله عليها .. من التعب قيمه

تمتم قلبها..................

ياوالله ياهـــــــــــــذال ان جروحي عليها من التعـــــــــب قيمـــــــــــــه



اتمنى ان يتواجد طاقمي استنزفت قلمي هذه المره
ارائكم اتوق لها وتحليلكم انتظره بشغف
اتمنى ان يتواجد الجميـــــــــــــــــــع
فأنا في انتظــــــــــــــــــــــــــــار
دعواتكم لي هي مطلبـــــــــــــــــــــــــي دائماً
في حفظ الله استودعكم احبـــــــــــــــــتي
اختكم
نبض ومشــــــــــــــــــاعـــر

للأامانه الأدبيه القصائد منقوله
اتمنى لناقلي القصه التنويه

السلام عليكم..
نبوووووووض آآآآآآآآهـــــ يااقلبي والله جزء يحززززن مرررره ويضيق الخلق... اليوم ربعناا كلهم مزاااجهم اقشر وشين.. كلهم بلااا اسثنااء ماافيهم اللي يضحك.. وشكلهم اعدووني بعد..هخهخهخهخه
تدرين اني لي يمكن اكثر منشهر ماارديت على اي قصه.. وهذاا اوول رد لي من شهر تقريباا.. صرااااااحه.. اجبرتيني اليووم اني ارد عليتس بعد هالابداااع اللي صااير .. الجزء بكل موااقفه مشااهده فيه تماااسك قووي..وباين انتس تعبتي فيه.. الله يعطيتس العاااافيه..
اما الجزء نفسه واحداثه بعلق عليه بشكل سريع.. وخصووصا هذاال لان الحدث الاهم عنده والاحداااث الجايه كلهاا بتكوون بسببه..
هذال: عظم الله اجرك والله يرحمها ويخلف عليها شباابها بجنات النعيم..
خاطري اعرف انت تزوجتها عن حب والا عن شفقه؟؟؟؟ وخاطري اعرف الحين بعد كل اللي صاار واللي انت مااتعرفه هل ندمت على زواجك منها؟؟؟ وضعك صعب .. والله رحمت ام لمى الله يخلف عليها ياارب.. شكلها وحيده وزوجها ميت وولدها ميت والحين بنتها لحقتهم .. الله يعينها ياارب. ويمكن هذا هو اللي خلا هذال يتزوجهاا.. ؟؟ بس المقاارنه اللي سواها بينها وبين الهنوووف صرااحه عجيبه.. بنفس السن بس الظرووف مراات تخلي الواحد يكون اكبر من عمرررره..
سلمى: يااقلبي انتي الله يكون بعوونتس.. تدرين سلمى مع كل هاللي صااار بيكون فيه زوااج بينتس وبين هذال ويمكن انتي بنفستس بتوافقين عشان وضع العاائله كله ماايتدهوور وتصير بينكم مشااكل؟؟
اكثر شي يقهرر الواحد لما يكون باني احلاامه اعتمادا على نااس وهالنااس هم السبب في انهياار هالاحلام؟؟ اتوقع لوو جلستي شووي مع نفستس وفكرتي بعقلانيه بيطلع منتس تصرفات بتفااجئ الجميع؟؟
ابو فالح: اتمنى انك مااا تطون مؤمن بنظريه فالح وان اللي بينك وبين اخوانك بسبب امك ؟؟ بس والله وانت جاايب سلمى واسلووبك معها وحناانك عليها ومحاالوة تعويضك عن اللي صاارلها والله جتني الصيحه مهووب سهل على اي ابوو انه يشووف احلاام عياله تنهاار او ان كراامتهم تنهاان .. واللي صاار لسلمى صدمه كبيره وخصووصا انها عندكم كلكم مااتستااهل اللي صاار لها..
الهنوف وسيف : هل الكلام ورمي هالقناابل على بعض ممكن يخفف من كره كل وااحد للثاني والا ممكن يزيد مع الايااام.. اتوقع ان بااقي في جعبتكم الكثييييييير وممكن انكم انتم الحين بتحااولون تصلحون الاوضااع اللي بعاائلتكم عن طريق التضحيه>> اتوقع اني اكتب هالتوقع وانا نايمه..هخهخهخه
حضره المقدم .. الذيب .. رااعي البل.. فهااااااااد ..
ياازينك وياازين فزعتك والله.. حكيم وعااقل .. والله يعينك ياارب على الاحداااث الجاااااااااايه.. نووره الحين وضعك معها بيكون خطيير وخصووصا بعد احداث هذال.. واتمنى انك تركز عليها اكثر وتخليها تعبر عن حبها اللي هي مخفيته عنك.. والله انها تحبك بس هي مسوويه نفسهااا مقهووره منك.. بس خلك كذا رسمي شووي معها وهي بتمشي سيده..هخهخهخه.. والله انهاا تقهرني وتحرق اعصاابي..
نبووضه اعذريني على هالرد بس صرااحه احس اني شووي غريبه وانا اكتب بعد فتره الغياب هذي كلها..ههخهخه
ابدعتي نبووضه ونستنى القاادم بكل شووق.. وياليت تقولين لنا اذاا فيه جزء قبل رمضان والا ماافيه.
نبووضه الله يخلي لكم الوالد يرد لكم بالسلاامه...