عبدالعزيز جاوب بقد سؤالي : عادي يابراهيم .. عبدالرحمن ما اهتم يوم قلتله أن عندي السكر .. قالي من غير لا يفكر اني اخوه او اهمه او اي شيء .. قالي طيب .. تخيل كلما سمعت احد يقول طيب .. تذكرت السالفة كلها ..
انقهرت من تفكيره : انا أووب مثل اخوك اللي مايحس .. أنا ابراهيم .. وحتى لو ماكنت ابراهيم .. هذا سعود .. [ بلعت ريقي واحاول ابلع الغصة ..] تدري وش سعود يصير .. من بين أخواني هو اللي استحملني .. أقل شي أنه هو اللي رضى يكون معي في نفس الغرفة .. ماتدري وش المشاكل اللي صارت عشان نصير بهالهدوء في البيت ... وسعود هو اللي استحملني .. تدري المفروض .. سعود وخالد بنفس الغرفة وانا وريان بغرفة .. وريان كان بزر .. أبوي ماكان يبيني اصير بروحي في الغرفة .. كان يبيني اصير مع اخواني .. اللي رضى اصير معه سعود .. عشان كذا خالد 24 مع صالح .. هذا سعود اللي احس انه هو اللي رباني بوجود ابوي .. هو اللي مسكني من يومي صغير وعلمني على الدنيا والحياة حبه حبه وصبر علي ... علمني البس نعلتي اليمنى قبل اليسرى .. وافصخ اليسرى قبل اليمنى .. بالله انت تعرف وش تلبس قبل ...
هز رأسه بـلا .. كملت : أنا من ايام الابتدائي وانا عارف ان اليمنى قبل في اللبس ..
كنت اتكلم وانا اوزع نظارتي في المكان ..طالعته : عبدالعزيز [ وعلى طول ابعدت نظرتي وكملت ] ماتتخيل وشو سعود .. بس ابي اعرف وش فيه .. لو يقولي بس وش فيييييييه ..! كان نعرف نتكلم مع بعض !!
عبدالعزيز ماعرف وش يقول .. :آآ .. ابراهيم لا اخوك عجبك ولا اخوي معجبني ..
سالته قبل يكمل كلامه : عادي يصير اللي في سعود في دحيمان اخوك ..!
على طول عبدالعزيز رفض وهو منصدم : لآآآ ..
داهمته قبل يستوعب ردة فعله : شــفت .. هذا وهو رافع ضغطك جايب لك السكر .. وباقي بيكمل عليك بعد مارضيت يصيبه شيء ... وش أقول وهو سعود اللي هو كل اخواني والله كل اخواني ...
حطيت يديني على عيوني اغبي القهر اللي في عيوني ... وأشياء ثانية بعد ...
عبدالعزيز وانا احس بيده على كتفي : ربي مختار اللي فيه الخير لك وله .. أنت جرب تكلم مع سعود يمكن يطمنك يمكن يقولك شيء... ترا سعود يمكن من حرصه عليك ماقالك .. يمكن مايبي يضيق صدرك ..!
رفعت راسي له : وأنا الحين يعني مستانس .. [ سحبت نفس ] خل نغير الموضوع قبل اصيح ...
سكت عبدالعزيز .. ماعنده المرونة اللي تخليه يطلعني من جوي البائس .. حتى هو طقته غلقة ..
حاولت اغير الجو شوي : اجيب الغلقة احيانا صح !؟
ابتسم بهدوء .. تكفى لاتقهرني زودن على قهري ..
طقيته من تحت ركبته احثه على القومة : قم قم نلعب كورة شوي ..
طالعني بنظرة ميته : والله ... تبي خليتين من مخي يالنابغة ..!؟
قمت وانا اضحك غصب : ههههههههه .. لا قم عشان ارجع لك خليتينك اللي عطيتن ..!
قام .. وطلعنا .. لفت انتباهي بابهم اللي يودي على فوق على طول ..
كنه توه يتسكر !!؟ طنشت .. آخذت الكورة .. وشتها بأقوى ما أقوى في الجدار ..
عشان ترجع لعبدالعزيز ويآخذه ويقعد يستعرض علي ...

*
*
*
ـــــــــــــــــــ
اليوم: الخميس ..
التاريخ: 2 / 9 / 1423 هـ ..
المكان: بيت امي لطيفة ..
الوقت: 6:00..
ـــــــــــــــــــ
(عبدالرحمن )
طرفت الباب قبل يحسون فيني .. تحركت ناحية الدرج ... والله قلوبكم مليانه ... رقيت الدرج وأنا منصدم من اللي قالوه .. مابين عليهم ذا اللي مدري شقول فيهم ...!
لاحول ولاقوة الا بالله ... ناقص ضيقة صدر أنا ...
تفاجأت من شذى في الصالة .. صالة قسمنا تقرى قرآن .. سحبت رجليني عشان تنتبه لي قبل اهبلها ...
تقدمت لها على نهاية الآية رفعت راسها لي : وينكم ياخي .. أوب عوايدكم تقعدون في المسجد عقب صلاة الفجر ..
ماعرفت اجاوب .. : ان كانك تبين عبدالعزيز تراه تحت مع ابراهيم .. مدري وش عندهم .. وأنا هذاني وبرقد ..
شذى : يعني جيتوا ...
استهبلت عليها وانا مالي خلق سؤالها : لآآآآ .. مين قال !؟؟
شذى اول شيء مصدقه .. بعدين اسستوعبت .. قامت وهي تضحك على خفيف .. : على بالي .. المهم قله ينوم .. بيجي عبدالرحمن على الفطور ترى !؟
طنشت وانا ماشي للغرفة : قوليله انتي .. انا مالي خلق نفسي ..!
دخلت الغرفة .. وأنا اتمنى تقوله ويرقى اتفاهم معه .. بس مبين من شكله ناويها سهرة ظُهري ...!!
على اقل من مهلي .. بهدوء و بروود بدلت ملابسي .. خذت لي ربع ساعة يمكن .. افصخ حبة حبة .. والبس حبة حبة .. لعل الوقت يمشي ويملون اللي تحت ...
خلصت وانسدحت ... آآخ ..لهالدرجة ياعبدالعزيز منقهر .. ولا انت يا ابراهيم حالة ثانية ... انا علي عبدالعزيز .. وسعود عليه ابراهيم .. الله يعينـا وبسس ..
آخ اجل هذي آخرتها يا عبدالعزيز .. أنا ما اهتميت ... الله يصلحك .. أنا ما اهتميت فيك .. أنت ماشاء الله انقهرت ورحت في طريقك قبل تقولي وش فيك ولا أنك فاهم غلط ...
مسكت جوالي وارسلت رسالة لـ سعود .. ( ضروري تكلمني آذا صحيت ..)
آخ والله مصيبة ...
ودي امردغـك يـا عبدالعزيز .. أجل أنا ما يهمني اخوي ..
اصلا بالعقل الاخوان غاالبا قلوبهم على بعض .. وابوهم عندهم وبينهم .. وشلون لو أووب عندهم مثل حالتنا الله يهديك يا عبدالعزيز .. أنا اخوك غصب تهمني أووب على كيفي اصلا ...
أما ابراهيم .. أووووه أوووه .. يا انه هو اللي معبي راسك افكار ..
اجل انا اللي جايب له السكر ..
اذا السالفة جـت على كذآ .. أنت يا ابراهيم بتذبح أخوك ..!
,, ماحسيت بنفسي الا وأنا نايم ..
,,,,,, حسيت بعبدالعزيز يدخل ... ما آدري كم الساعة الحين ولا وش الوقت ...
ودي اقوم اتهاوش معه ... بس مافيني حيل ..
كنت اراقبه .. ودي اتكلم ..
بس مافيني حيل هواش وشدّة أعصاب .. حتى هو أحس أنه خادر .. ومافيه حيل لشي .. مايشوف الا فراشه ..
,,, غمضت عيوني .. ونمت ..
بعد ماتقلبت .. آآخ حسيت اني خلاص ماعاد بي نوم .. قمت .. طالعت الساعة 11 ..
قمت .. دخلت الحمام اتوضى .. طلعت صليت الضحى عشان طهارتي ..
كنت بآخذ المصحف اقرى .. بس كان في الجوال رسالة ...
فتحتها وكانت من سعود .. : ( أنا صاحي من يومي .. بس على فكرة انا استيقظت في تمام الساعة 9 .. دق متى ماتبي )
هههه ... سبحان ما ابعد ابراهيم عنك واجد .. شكله رايق ..
ضغطت اتصال .. وقمت طلعت من الغرفة ..
انرفعت السماعة ووصلني صـوت سعود : السلام عليكم ..
رديت : هلا وعليكم السلام .. شخبارك عقب امس ..!
سعود : الحمدلله .. طيب وبخير وأسأل عنك ..!
عبدالرحمن : ههههه .. مبين رايق ..
سعود : آيه الحمدلله .. لازم نرووق خالي اليوم بيجي ..
استغربت أوب فاهم : خالك مين !؟
سعود : خالي عبدالرحمن .. رجل آختك ياخي ..
فهمت : آآآآييييييييييييييـه هههههههههههه ..ماش أوب قادر اركز ..
سعود : آيه حاس فيك وش عندك .. تبي تكلمني ضروري ..
طلعت من القسم وانزل مع الدرج : آيه ابي اقولك على شيء صار اليوم .. ولازم اشوفك .. عرفت ..
سعود بهدوء : آيــه .. خلاص .. تجي لبيتنا ولا اجي انا لعندك .!؟
طلعت مع باب الحوش : لا تعال انت في ملحق امي لطيفة ..
سعود : طيب جايك ألحين .. السلام عليكم ...
عبدالرحمن : وعليكم السلام ..
سكرت وانا ادخل الجوال بجيبي .. وآروح للملحق ..!
دخلت .. شغلت الأنوار .. وجلست ..انتظره يجي ..

*
*
*
ـــــــــــــــــــ
اليوم: الخميس ..
التاريخ: 2 / 9 / 1423 هـ ..
المكان: بغرفتي المشتركة مع ابراهيم ..
الوقت: 11:20..
ـــــــــــــــــــ
(سعود )
قمت من السرير واقف .. مديت يديني اتمغط ..آآخ ..
آخذت شماغي .. لبسته ..
تفاجأت من سؤال ابراهيم : بتطلع !؟
التفت لـه .. كان منسدح وعلى وضعية نومه بس المتغير فيها أنه مفتح ..
ابتسمت : ايه اكيد ..
سألني : متى بترجع !؟
طالعت الساعة .. :ما اتوقع يمديني قبل الصلاة .. ليه تبي شيء !؟
ابراهيم يستقعد : آيه ابي اسولف معك ..
سألته من باب الفضول : سالفة مهمه يعني ..!؟
ابراهيم يستهبل : أنا كل سواليفي مهمة ..
قعدت على سريري اقابله : سـم آمر وش عندك .. سولف اسمعك .. يالممهم ..!
تربع ابراهيم : طيب خل اغسل .. خل اتنشط شوي ..!
قمت : قم غسل وتنشط .. وتوض للصالة واقرالك كم وجه .. وعقب الصلاة نسولف .. عاد اليوم انا رايق ..!
ابراهيم يقوم : طيب ..!
طلعت .. غريبة ابراهيم احس انه هادي زود عن العادة ..
طلعت من البيت لبيت أمي لطيفة ..
أول مادخلت مع الباب المفتوح على طول .. فاجأني عبدالرحمن واقف في باب الملحق ..
سألني وبيمناه الجوال : وينك ياخي كنت بدق عليك ..
رحت لـه : لا جيت قبل تدق ..!
دخل الملحق : تعال بقولك ..
دخلت وراه مستغرب : في الملحق عاد ..
عبدالرحمن وهو يقعد : آيـه .. ما ابي احد يدخل علينا .. وبعدين عمي ناصر توه داخل المجلس شكله بيقرا قرآن ..
قـعدت جمـبه : هـاه عبدالرحمن وش عندك ..
عبدالرحمن يمسح وجهه .. : اليوم يوم رجعت من الصلاة .. كان في المجلس ابراهيم وعبدالعزيز ..
ركزت معه : آيـه .. وش زينوا ..
عبدالرحمن يطالعني : كل واحد قعد يسولف على الثاني .. والله طلعت فضايحهم ..!
أوفف .. انصدمت .. : بعذره اليوم ابراهيم هادي وومسالم .... طيب كنت معهم أنت ..
جاوب بسرعـة : لآآآآ .. كان مايتكلمون ...
حسيت أنهم قالوا اشياء خطيرة : طيب وش قالوا ...
عبدالرحمن : آبراهيم كان معصب او مقهور أنكم ماعلمتوه وش فيك ...! كان مقهور يقول لو ادري وش فيه ارحم من اني احط في بالي كل الاحتمالات .. والله كان شوي ويصيح .. كان مقهور أنك فيك شيء يعني .. بس مبين مايدري وش فيك ..
أووخ ..حسيت اني فقدت الاحساس باللي حولي .. انا ماتوقعت أنه بينتبه بهالسرعة .. أنا نفسي مابعد كملت الشهر من عرفت تقريبا !! لاحول ولا قوة الا بالله ..! يارب سترك ..
يعني معقوله انقهر وصار بهالهدوء لأنه عارف أن فيني شيء .. آجل وش بيسوي اذا درى عن اللي فيني ..!!
ركزت مع عبدالرحمن : عشان تقوله ...
: لأ .. مستحيل اقوله .. خل يتأقلم أول شيء أن فيني شيء .. بعدين آحاول اقوله ...
عبدالرحمن : والله لو سامعه أنت كان ماتقول هالكلام ..
: ألحمدلله اجل اني ماسمعته ... [ وعشان اوقف الكلام في هالموضوع ..] طيب وش قال عبدالعزيز ...
تنهد عبدالرحمن : عبدالعزيز حسيت انه بيفضخ قلبي من القهر ... تخيل وش قال ... [ غير نبرة صوته وهو مقهور ] عادي يا ابراهيم .. أن أخوي عبدالرحمن ما اهتم يوم قالي عن السكر .. [ كملت بنبرة انكسار ..] أنا اصلا ذاك الوقت كنت توك قايلي عن اللي فيك .. ووعد درت .. وضاقت صدورنا ذيك الفترة ..هذا اللي خلاني ما اهتم بالسكر.. لأنه مهما كان السكر .. السكر بالنسبة لي أهوون شوي .. [ كمّـل بتبرير ] وبعدين تراني اذا هولت له السالفة .. هو بيخآآف وينقهر وو يحس انه مسيكين .. أما كذا فالسالفة أهون بكثير ...
حاولت اهون عليه بالراي الصح .. : شـف تكلم مع عبدالعزيز وفهمه أنه أهوون من غيره .. بس انتبه هالفترة عشان ماينتبه أنك سامعه ... عشاني ترآ .. لأن لو ابراهيم يدري انك سامعه فصعبه يعني نسكت نستغبي عليه ...
عبدالرحمن : طيب ليه ماتقول لأبراهيم ..!؟
جاوبته بصراحـة : لـو أقوله .. صدقني ماتعرفونه ..!؟ ماتشوفه قبل اجيلك .. هآآآدي .. ومايستهبل مثل قبل .. حتى حسه خـآوي .. وهو بس داري ان فيني ... آجل لـو دري أن فيني سرطان وش بيسوي !؟
*
*



*



******
******************
********


**
*


ألقاكم ... مع الورقة الرابعة عشر بـ بإذن الله ..!!
.......
............................................إِمضاءْ ...
.......................................كُتلَـةْ جُــرُووح || ...

*
*

.................................. |[•• الــورقــة الخامسة عـشـر ..! ]|
------------------------------[ .. تَرَىْ الذِكْرَى ولَوْ حلْوَهْ ..طوَاْرٍيْها تهِدْ الحَيل ... ~



لآ جيت أسولف عن الذكـرى بـماضينـا
يضـيـق فيـنـي الـكـلام بـسـبـة الـعـبـره


ولآ جيـت اسولـف عـن أولـنـا لـتاليـنـا
يضيـق فينـي المكـان اللـي علـى كبـره



******
******************
************



ـــــــــــــــــــ
اليوم: السبت ..
التاريخ: 24 / 6 / 1426 هـ ..
المكان: غرفتي ..
الوقت: 9:30 صباحا ..
ـــــــــــــــــــ
(ابراهيم)
سحبت البطانية وغطيت راسي من القهر والمدري وشو وأنا اسمع ابوي واقف عند الباب .. يجرب حباله الصووتية ...
أبوي معصب : وبس هذا اللي انت فالح به .. تسحب اللحاف يومي اكلمك .. بدال ماتفز واقف .. قــم أشوف ..
ابعدت اللحاف وقعدت .. وانا منزل راسي .. وذابحني النوم ...
أبوي : يعني هذا اللي خذناه من السهر ليمن يأذن الفجر وكل النهار نوووم .. الليل نوم والنهااار قووم .. قم واقف أشوف ..!
وقفت .. طالعت الساعة وانصدمت ... تسع ونص ... حرآآآآم على بالي 12 ..
طالعت ابوي بقهر واستعطاف : يبه توه تسع ونص ..
ابوي : ليش ناوي تنوم لكم !! يلااا رح للحمام غسل ...
آخر مررة ابوي قومني يمكن يوم كنت في الابتدائي ... وشكله يكمل على ايام الابتدائي ... اجل انا يقولي رح غسسسل .. مشيت طالع للحمام .. وهو ابعد عن الباب وانا طلعت ...
آآخ متى يجي سعووووووووووووود بس .. آآخ ماله الا يومين رايح الله يعين بس ..
أمس ابوي مقومني تسع .. سكت انا ماقلت شيء على اساس انه جمعة ويبيني اتولم قبل الصلاة ووكذا يعني .. واليوم تسع ونص .. حرآآم والله حنا في اجازة وأبوي يقومن مثل قومته .. استغفر الله بس ...
خلصت مغسل .. وطلعت من الحمام ... نفسي في خشمي ... لبست ثوب ناوي اطلع ..
ورن جوالي ..
وكان سعود : نــــعم ..
سعود مشتاق لي : السلام عليكم ورحمة الله ..
سحبت نفس : وعليكم السلام ورحمة الله ..
سعود : وش فيك مالك خلق ..!
هبيت فيه : انا ماأدري أنت وشلون كنت متوقع اني ابرد عليك يومك تتصل .. المفروض انا الحين اكمل حلمي ... بس ابووووي مايخلي احد ..
سعود : يااشيخ هذا ابوك احترمه يااخي .. مايصير كذا يا ابراهيم ..
ابراهيم سألته من الآخر : أنت متى نآوي ترجع ..
سعود : مآدري على حسب اللي عندي يا الخميس يا السبت ..!
استغربت كلامه اللي تغير: والله !! .. وييين اللي يقول [ قلت اقلده] يمكن اغلب الظن الاثنين ..
سعود : لااا وين حدود ألف كيلو اخرتها يومين ... ههههههه .. يمكن السبت ياخي ..!
انقهرت : طيب وش اقعد ازين اليمن تجي ...! والله والله اني يومين وحامت كبدي .. ياخي ابوي الساعة 9 يقومني وامي من امس بعد العشاء ابراهيم نم ابراهيم نم بنعجز نقومك يا ابراهيم الصبح .. يلا يا ابراهيم نم .. ياخي والله تمصخرت ..!
سعود بهدوء : وش رايك ترووح للرياض .. اليمن ارجع .. مع حالتك المستعصية ذي احس حتى امي وابوي حايمة كبودهم أأوب أنت بس ..!
حسيت الفكرة حلوة بس يمكنها صعبة : طيب من عنده !؟ استأجر !!
سعود : لأ .. رح عند امي موضي ولا عند وعد اختي .. عند عبدالعزيز ... يعني الرياض عندك مليانه ...
ابتسمت عجبتني الفكرة : زيييييييين زييين .. طيب وش أقول لأمي ..
سعود : قل أني بروح للرياض بسلم على امي سارة .. امي موضي ووعد تبيني ولا اي احد .. ياخي ما اعلمك في الامور ذي ..
عزمت أمري : طيب طيب .. انا بروح اتولم .. تبي شيء قبل اقول مع السلامة ..!
سعود : اكيد ابي شيء ولا داق لأني فجأة حسيت فيك !؟
ابراهيم : هههههه .. على بالي .. وش سويت في مكة ميير ..!
سعود : أمم .. ابد .. أول ماوصلنا على المغرب تقريبا اخذنا عمرتنا .. وبعد صلاة العشاء .. نمنا .. تشوفنا تقل ميتين .. على عشر عشر ونص قمنا من بكرة يعني .. ميتين كنا ..
انصدمت : أووف من الفجر للمغرب ياخي تمشون على بيض ..
سعود : عاد هذا الدرب .. المهم خل امي تكلمني ابيه .. ادق عليه ماترد .. زين ..!
وانا اقوم استعد للروحة خلاااص مافيني : سـم ان شاء الله .. تحراله عقب ساعة ..!
سعود : ساعة عااد .. كان انا ادق عقب ساعة القاه ..! ابيه الحين .. اسمعن .. قله انا بروح الحين اصلي اووب راجع الا حدود الوحدة والجوال بخليه بذا أووب رايح به .. يعني اذا دقت ومارديت عليه ..خل تدري أني ماخذيت جوالي .. وعادي لو تدق الحين ان كانه تبي شيء ...
ابراهيم : طيب طيب .. وغيره ...
سعود : سلامتك .. سلملي على وعد اختي ورجله وخوالي وعيالهم واللي يسأل عني ..!
حبيت استفزه : ياواثق محد سآئل عنك ..!
سعود يستهبل : حتى محد سأل .. ياحبيله ماعمره نسين.. الله يسلمه سلملي عليه .. ولاتنسى السلام أمانه .. ضروري توصل سلامي لـ محد ..
قلبها علي ابن الآيـه هههه ..
سعود : مع السلامـة ..
وسكر قبل اقول مع السلامة وانا مصدووم منه أووب هذا سعوود ههههههههههههه .. توقعته بعد مكة يصير اهدى من قبل .. بس الظاهر العكس .. شكلهم رايحين لديرة غير مكة .. هههههههههه ...!
قمت فاتح الدولاب وأشوف وش بآخذ معي .. على ما اعتقد جلستي يمكن تطوول ..
وصلني صوت امي من وراي : ابراهييييم .. ماشاء الله .. قايم ..
بغيت استهبل واقول لا للحين احلم ..!!
التفت لها بسرعة اول ماتذكرت كلام سعود : يمه .. سعود يقول كلمين .. مدري وش يقول .. ايه يقول ان كانتس تبين تكلمينه كلميه الحين لأني يقول يبي يرووح للحرم ..وأووب راجع الا على الوحدة ...
امي باستغراب : وش دراااك !!
حكيت راسي : آآم دق عليتس ومارديتي ودق علي ..
امي : آيييه ..
قبل تروح ناديتها : أقول يمه ..!
التفتت : سـم ..
سم ..! المفروض أنا اللي اقولها لتس يايمة ..!! المهم بس : آآ .. ترآآي برووح للرياض ..!
امي اسستغربت : هــه .. الريااض .. !! وش عندك بذاك !!
حكيت راسي ادور تصريفه : آآمم .. ابد ودي اروح تسذآ ..
امي : طيب .. ومتى ناوي ترجـع !!
عقدت حواجبي افكر في سؤالها من جد .. : آممم .. قبل لايرجع سعود ان شاء الله ..!
امي وكنه بدت تستصعب الموضوع : ومن بتقعد عنده ..!
حبيت اطمنه واوسع صدره : آآبد اما عند وعد مع عبدالعزيز اصير يعني .. ولا عند امي سارة ولا خالتي موضي ..!
امي وهي ماوده : طيب ازهم حاتسن اول ماتوصل .. وقبل تمشي مـر علي حدر .. سامع ..!
هزيت راسي وأنا آخذ لي كم غيار احطهم بكيسة .. وآآخ الله يعين وبس ...

*
*
*


ـــــــــــــــــــ
اليوم: السبت ..
التاريخ: 24 / 6 / 1426 هـ ..
المكان: غرفتي ..
الوقت: 10:00 صباحا ..
ـــــــــــــــــــ
(عبدالعزيز)
سكرت الباب بعد ماطلعت من قسمي ... وانا مستغرب وين مضييع جوالي ...
وقفت قدام سيارتي .. وادخل المفتاح فيها وأنا افكر في ذاك اليوم اللي جتني فيها هالسيارة .. كنت يومها من اسبوع مستلم الرخصة كان في الاجازة الصيفية بعد ماتخرجت من الثنوي .. كنت حاط في بالي ان عبدالرحمن بيعطيني وحدة من سيارتينه !! أو يمكن سيارة من السيارات اللي عند خوالي .. بس تفاجأت بالسيارة الجديدة .. صح ما اخترتها .. بس انصدمت لحظتها ..
آخذت السيارة ... وأنا للحين ما انسى الفشيلة لحظتها ..
بس كان الموقف كله حلووو ..
ريوست طالع من البيت رايح ادور جوالي اتوقع عند عبدالله ..
آآخ بس .. دخلت في زحمة شوارع الرياض ..
وكانت تحوس في ذاكرتي ذكرى ذاك اليوووم ...!
××××××××
طلعت من الحمام مترووش وكنت رآآيق الحمدلله ..!
من أول ما طلعت لي رخصة وأنا افكر وشلون بقول لعبدالرحمن ابي سيارة أو اي احد المهم ابي سيارة .. بس مستحيل اقولهم اليوم وانكد على نفسي ..
لبست ملابسي وطلعت .. في الحوش انصدمت وأنا اشوف سيارة جديدة واقف عندها عبدالرحمن ..انصدمت من جد ..
كان مبتسم في الظلال عند السيارة ويطالعني .. أنا غصب عني رحت ماشي لـه .. هو والسيارة ..
حسيت به يكلم آحد على جنب السيارة .. بس ما أدري مين ...
قربت شوي .. وتنقز عبير من ورى السيارة .. وهي تصرخ : ممُمــفآآآآججــأأأأأأآآآآه ... [ وتنثر الورد اللي كان معها وهي تتكلم فصحى ] مباركٌ نجاحك ياعبدالعزييييييييييز ...!
انصدمت آي نجاح .. التفت لـ عبدالرحمن اللي يصفق ..: صحيح ودنا نحتفل فيك احتفال اهدى شوي .. بس اخوانك مزعجين بشكل ..!
ابتسمت اكثر كأقل تعبير .. كمل عبدالرحمن : ترا المفروض من زمان مسوين هالحفلة الكبييييييييييييييييرة .. بس تعرف تووك مآخذ الرخصة ..!
كنت منصدم واطالعهم وانا منبهت .. وش هالحركة الحلللوة ..
طلعت شذى من الفلة هي ومعها بنتها اللي مابعد تعدت السنة وصرخت : يلآآآآآ ..
انا منصدم ومدري وش السالفة ..
تقدم عبدالرحمن : شفت السيارة خلاااص .. دخلنا دخلنا حمستنا الشمس وحنا بالظلال ..
مسكني من كتوفي ومشاني لدآخل الفلة ..
اللي كنت من زمان مادخلتها .. كنت منصدم وفرحان في نفس الوقت ..
دخلت والصالة كانت متغيرة .. حاطين فيها بلونات وكذا .. وعلى الطاولة اللي بالنص تورته .. ووعصيرات ..
رااح فيها أبووو السكر .. دخلتنا شذى : يلااا بسرعة يالباردين .. نبي نصووور حناا ..
دخلت وانا انصدمت بعد من غدي بنت شذى ورنيم بنت عبدالرحمن أخوي مابينهن الا شهر هالبنتين .. كانوا ملبسينهن نفس اللبس ونفس كل شيء .. وملبسينهن قبعة الحفلات اللي تجي مثلثة .. يارآآآيقين ..
دفني عبدالرحمن : يلا يلا .. اقعد ..
جلست حيث وقفني ..كنت عند الطاولة ..وهو جلس وهو يآخذ بنته يجلسها بحصووري ..
شذى اعترضت : وبنتي ..!؟
شالت بنتها وعطتنياها .. وعبدالحمن مدّ لي السكين : يلآآآ بسم الله ..
آخذت السكين وانا مرتبك .. وقفت على ركبي .. وكنت ماسك بيدي اليمنى السكين واليسرى كنت مآسك بها غدي ..!
مسك معي عبدالرحمن السكين .. وقطعنا أول قطعة ...



ثم جلست عاد .. على تصفيق عبدالرحمن و كان مع عبير علبة حلويات على طول رمتها علينا وهي ساكته .. مما خلاني استوعب ان كل شي تصوور ..
آخيرا طلع حسي وضحكت : هههههههههههههههههه ..!
مما خلا عبدالرحمن يصرخ : آووووووووووووو هههههههههههه ... آخيرآآآآآ نطق الصمت .. من يوم طلعت توي أسمع صوتك .. سآآكت .. والله خوفتني .. بس كنت ماسـك روحي ما اتكلم ..
من ازعاج عبدالرحمن .. صاحت غدي مما خلا امها توقف تصوير .. وتآخذها ونبدا الفلة صدق .. جلسنا ناكل ونسولف ..
خلوني غصب اقطع لهم واوزع في صحونهم .. وكآن في اسفل التورته شيء على شكل مستطيل صغيير ..
كان كأنه جزء من الصحن .. فائدته اعتقد ينقص من كمية الترته .. حرآآمية !!
اشر لي عبدالرحمن على الكيكة : ماتلاحظ شيء !!
طالعتها وانا اخمن : المكتوب عليها !!؟
عبدالرحمن : لأ .. شيء ثاني ..
موقادر اركز : وشو !؟
عبدالرحمن يأشر على المستطيل كشرت غصب عني : آيــه حرامية هاللي انتم شارين منهم الترته ..
شذى صرخت من القهر : آي شارينها ... حنااا اللي مصلحينها !!
استغربت وأنا اقرب من الصحن : صدق !!
آخذت السكين عشان اطلعه من تحت الكيكة كلها .. على طول شذى حطت الصحن حقها وقامت تصور ..
طلعته .. بعدين فكيت البلاستيك اللي عليه .. ثم فتحت العلبة .. وضحكت ضحكة كبيرة وأنا اشوف مفتااح السيارة ... : آآآآ هههههههههههههههههههههههههههههههههههههههههههههااااي ..حللللوة الحركة ..!
وعليها تبكي غدي ..غصب عني ممت من الضحك .. حتى ماقدرت امسك نفسي .. أوو اشيل غدي اسكتها هالبزر .. من ضحكي صار عبدالرحمن يضحك ...
××××××××××
كـآن يوم حلو .. وفرحة حلوووة ..
عقبها .. اخذت المفتاح وقالوا لي خل نروح معك نركب معك ومدري ايش .. ركبتهم .. خذنا لفتين .. وعقبها طلب من عبدالرحمن اوصله مشوار ...
نزلت اخواتي ... ورحت معه .. واكتشفت انه ماكان يبيني اوصله مشوار بقد ماكان يبي يسولف معي ..
×××××
عبدالرحمن بابتسامة : شفت السيارة هذي ..
رديت بابتسامة اعرض من ابتسامته : آيــه ..
عبدالرحمن : أووب مني بس .. من خالي احمد وخالي عبدالمحسن .. كل واحد دفع المقسوم .. وشريناها لك ..!
ابتسمت وماقلت شيء ..
كمل : اذا تبي ترجعها وتآخذ غيرها عادي .. خالي أحمد متفاهم مع صاحب المعرض ..
رديت بأقل مايمكن اني ارد به لهم : لأ يكفي انها اختياركم ...
عبدالرحمن بابتسامة باهته اكثر : انا فيه شيء في قلبي مخليه من زمان لك ..وابي اقوله لك الحين .. تراه حارني ..
خفت .. غصب عني خففت السرعة : وشو !!
عبدالرحمن : ممكن ترجع للبيت ...
غيرت الوجهه للبيت وانا منصت لعبدالرحمن ..
عبدالرحمن على نفس وضعيته وابتسامته : السيارة لما كانت من خوالي .. قلتلك هي من خوالي ... والراتب اللي ينزل لك كل شهر .. ماقلتلك انه من خوالي .. مع انه كل شيء يقولك انه منهم .. يوم زادت رواتب الموظفين ومن بينهم أنت زاد راتبك .. طبيعي .. صح !!
مافهمت وش يقصد ركززت بقوة : صــح ..
عبدالرحمن : أنا مدري كيف بشرح لك .. بس لازم تسامحني على اسلوبي لو كان غلط ..
حاولت اشجعه وانا اطمنه اني ماراح ازعل : عبدالرحمن انت وش ماجا منك أنت أخوي ووانت اللي لي بهالدنيا .. أنت أنت ..
سكتني قبل اكمل .. : عبدالعزيز .. الراتب كان جزء مستقطع من راتبي .. يعني بدل ماينزل الراتب كامل في حساب واحد خليت 15 في المية ينزل في حساب والباقي في حسابي الأول .. الحساب اللي ينزل فيه 15 بالمية ماراح استخدم منه شيء .. لأنه بيكون لك ... ذاك الحساب اللي كنت تعتقد أنه من خوالي ..
انصدمت من كلامه .. انصدمت اكثر من الحقيقة وكيف عرف !!
كمل عبدالرحمن : تدري لو كان فعلا مثل ماتوقعت أنه من خوالي وأنا لعبت عليك وقلتلك أنه مني .. كان أهون تدري .. لأن مصلحتك أكبر .. لأنك ساعتها بتحس بان أخوك الكبير مهتم فيك ..بتصير عندك ثقة بالنفس و اعتزاز بالاهل .. [ تكلم بقهر أكثر .. أما انا اوقف السيارة واركز معه ] بس المشكلة انه صاير العكس .. يعني أنا بذلت جهدي عشان يصير عندك ثقة بالنفس وتعرف اني ما اهملتك ابدن .. تنعكس الاية ويبتعد تفكيرك لغيري ... وتعتقد أنها من خوالي .. [ تغير حديثه عشان ينهي الكلام ] ما ابي امن عليك انا ... بس ابيك تعرف أنك أنت اخوي .. وتهمني ... ومالي الا انت على فكرة ..
فتح الباب ونزل .. وانا منصدم ... مــنــه هــو !!! ومن الحقيقة .. ومن كيف عرف .. ومن كل شيء ...!
×××××××××
وعليها وقفت سيارتي الـ فورد 500 .. بلونها الاسود ..
ماهي اختياري .. بس لأنها هدية .. وماعندي قدرة اشتري جديدة ...!
يلاا على الله نعيش لذاك اليوم اللي بغيرها فيه ..
رنيت الباب المفتوح اساسا .. وطقيته ..
وصلني صوت عبدالله : جااك ..
اقبل من الملحق .. وأنا ادخل واسلم : السلام عليكم ..
عبدالله : يآآخي جابك الله .. وعليكم السلام قبل انسى .. تعال تعال افطررر معي ..
دخل وانا وراه : جاي آخذ جوالي تراني ما انفع من دونه ..
عبدالله يتذكر : ايييه الله يذكرك بالشهادة .. كل تو وابراهيم ولدعمي يتصل بك .. وابراهيم ولد عمي يتصل بك .. وابراهيم ولد عمي .. يتصل بك ... وأنت طبعا مارديت عليه ..
ضحكني : هههههه .. اكيد مارديت .. أووب عندي هو .. المهم المهم رح جـبه تكفـى ..
قبل يقعد هز راسه وطلع من الملحق رايح يجيب الجوال ...

*
*
*
ـــــــــــــــــــ
اليوم: السبت ..
التاريخ: 24 / 6 / 1426 هـ ..
المكان: الملحق في بيتنا ..
الوقت: 10:30 صباحا ..
ـــــــــــــــــــ
( عبدالله )

دخلت غرفتي وعليها على طول رن الجوال .. والمتصل نفسه .. ياشيخ اقلقت ام امنا على هالاتصالات ..
لكن تفاجأت أن اللي يرن الحين جوالي .. كنت برد بس انقطع .. اخذت جوالي وجوال عبدالعزيز وطلعت رايح للملحق .. ورن جوال عبدالعزيز .. على طووول مديته لـ عبدالعزيز : رد .. رد تكفى اقلق امناا بهالاتصالات ..
آخذه وانا طلعت اجيب الفطور ..
سالفة الجوالات هذي الله يسلمكم .. آمم يمكن مابين الترمين .. كنت رايح للمزرعة أنا وولد عمي سعد .. ومحد داري عني الظاهر .. ووكان عمي عبدالرحمن يدورني وتعب الى ان لقاني .. المهم انه عقب هالسالفة قرر يطلع لي جوال .. رحت انا وياه نطلع ومرة وحدة طلبت منه يطلع لـ عبدالعزيز .. قال مالي دخل .. ولازم نسأل اهله .. قلتله يكلم عبدالرحمن أخوه أو اخته .. اللي هي تصير مرت عمي .. كلمها .. وهي سألت عبدالرحمن وقال عادي ..
الرقم حقي فرقه عن ررقم عبدالعزيز أني انا 0505 وهو 0555 .. والباقي نفسه يعني بالعربي الرديف له .. طلع لنا عمي رقم جوال .. و فيما بعد رحنا أنا ويا عبدالعزيز نختار جهاز جوال .. واخترنا نفس الشيء والحمدلله .. عشان كذا امس يمكنه ما
اخذه .. عشانه اعتقد يظن انه جوالي وهو بالاساس جواله ..!
صووت عشان ادخل .. دخلتني امي موضي .. هذي هي جدتي .. واصغر حريم جدي ..
دخلت ابسلم على مرة جدي الثانية .. وكانت في مرقدها .. وعندها عبدالملك .. كنه مزكم !! أو بشكل عام مصخخن !! ههههه .. احد يزكم في هالبرد !!!
سملت عليها وحبيت راسها .. وقمت ادوور الفطور ..
آخذت الفطوور وطلعت بـه للملحق ..
حطيته وكان عبدالعزيز كنه يوصف لأحد على جواله ..
رحت اجيب الشاهي ومرة وحدة ناديت عبد الملك يفطر معنا ...
ورحنا نفطر ...
كان عبدالملك مصدع شوي ما أكل صدق .. وعبدالعزيز بعد ما أكل شيء يسوى .. يقول مفطر ..
عبدالعزيز يسأل عبدالملك : سلامات .. وش جايك ..!
عبدالملك يحاول يركز : هــاه !!
عبدالعزيز بطلاقة : What happened to you?
طالعني عبدالملك وهو يسحب عيونه !! ابتسمت له .. : معناتها وش جاك !!
عبدالعزيز استغرب : وت هابند تو يو معناها وش جااك !!
حسيت ان ترجمتي غلط .. قلت اصرف : لأ .. أنا اترجم له كلامك الأول ..!
عبدالعزيز ضحك : ههههه .. حللللوة .. [ يلتفت لـ عبدالملك ] الا صدق .. شكلك داخل غرفة فيها مكيف وأنت مييت من الحر ..!
تكلم عبدالملك بزكمته : والله شكلي ..!
عبدالعزيز يسأله مرة ثانية وكنه يبي يتطمن : رحت المستشفى ..!
غصب ماقدرت امسك ضحكتي وانا اتذكر ذاك اليوم اللي رحت انا وياه للمستشفى ..: ههههههه ..!
طالعني عبدالملك فاهم .. رد على عبدالعزيز : ايه رحت ..!
سأل عبدالعزيز: وش عطوووك !!؟
ماقدرت امسك نفسي اكثر من سؤاله : ههههههههههههههههه ..
طالعني من طرف عيونه : والله مافيني حيل لك ..
عبدالعزيز بابتسامه : لــيه !!؟
حطيت يدي على يده : أعلمك انا اعلمك ... ! ههههه .. رحت أنا وياه للمستشفى ومعنا خالد ولد عمتي .. حطنا ورااح مهتتتم مره ههههه .. المهم .. ههههههه .. حطوله اكسجين مدري بخار مدري وشو هههههه .. يقول الممرض بحطه لك وهو مايبي ههههههه .. يقول بزر أنا...
عبدالعزيز يبدي رأيه : عاادي تراا ياعبدالملك .. ياما اكبر منك حطولهم ...!
عبدالله هههههههه : لأ أووب ذي السالفة .. على آخر الاكسجين .. نناديه عبدالملك .. عبدالملك .. ههههه .. الرجال نآآم ... ههههههههههه ..
رغم التعب اللي في عبدالملك الا انه ابتسم .. : اقولك حاطين فيه مخدر !!
مرة ثانية ضحكت : ههههههههههه .. كثر منها .. أنت اصلا خاووي من أولها ..
ضحك عبدالعزيز : هههههههههه .. اتخيله ..!!
عبدالملك يغير الموضوع : وش ناوي تدخل أنت ..!
سألته مستغرب : أنااااا !!؟
عبدالملك يستهبل : لأ الجدار .. من ظنك ! عبدالعزيز .. مسجل من العام !!
طالعت عبدالعزيز اللي ابتسم غصب : آآ .. حتى عبدالعزيز ماسجل الا في أول سته .. عشان كذا شكيت ..! ايه سجلنا اكيد ....!
عبدالملك مستغرب : سجلتوا ...
بللت شفايفي بتوتر ..
سأل عبدالملك : وش سجلتوا !!
عبدالعزيز تكلم : اقتصاد ..
عبدالملك بهدوء : طيب من أنتم !!
حسيت انه لازم انا اللي اجاوب : أنا وعبدالعزيز ..
على طول فــز عبدالملك مستغرب .. : والطب يااا عبدالعزيز !!
ابتسم بألم .. : لآ خلآآص ..
عبدالملك : خلاص ليش ..!!
نزل عبدالعزيز رأسـه .. وهو يلعب في ساعته .. رفع رأسه وبدى يقص : عاادي يعني .. ماكنت في المستوى اللي ممكن يأهلني عشان أصير دكتور .. يعني أحم الحمدلله ان المشوار انتهى هنا قبل نقطع مسافة طويلة .. ويعني فرصة نصير انا وعبدالله نفس
القسم ...
حبيت اشرح أنا لـ عبدالملك عشان يأخذ الصورة صح : هم اساسا عشان تكمل لازم تآخذ في المواد فيزيا واحياء وكيمياء اكثر من 3 أو 3 ونص مآدري .. بس هو آخذ في الفيزياء بس درجة مانفعت .. [ حبيت اخلي الموضوع ممتع اكثر ] الله لو أنك
شايفة وهو يتمسكن عند الـدكتور حق الكلية يقول عطني فرصة ولو الى امتحانات الشهر .. يووه عقب حواسه وصورايخ .. طاع .. بس للأسف .. الشاطر الجميل معقده الفيزياء للحين ..!
عبدالعزيز ضحك : هههههه .. ياخي ما انسى يوم يقول لي شفت علاماتك .. قلت ايه .. قال انا اصلا ما اعتبرت دراستك رسمية لأن هذا شيء غير قانوني .. ههههههه يسسسستههبل على مين ...!
عبدالله : بس احسه يصرف لأنه من الأول غلطان ... في تصرفه ..! وما حس الا بعديييييييين انه غلط ..! يعني اقولك بصراحة انا لو أني منه .. كان ما اطيع القوانين واضحة .. وأنت عارف هالشيء من قبل امتحانتك ..
رد عبدالعزيز يصبر نفسه : كان ترم حلو .. الحمدلله ان دراستي ما استمرت .. لأني احسه مبنية على شيء غلط .. الحمدلله .. استفدت وعرفت انقليزي .. والحمدلله ..!
ابتسمت من تفاؤله : الحمدلله ...
عبدالملك يعقب آخيرا : الرجل بقلبه .. ماشاء الله عليك يا عبدالعزيز ..
على ان السالفة مدري كم لها من شهر صايره بس للحين كل ما اتذكرها .. يضيق صدري .. وطبعا كلما فتحت دولابي .. شفت السكرب اتذكره .. سالفته أن حنا انا وعبدالعزيز .. رحنا نفصل له ..
×××××× في المحل :
التفت لي بنظرة ترجي : فصّـل مــعي !! ..
فتحت عيوني بشكل أوسع مستغرب وأنا كاتم ضحكتي ..
رجع يحاول : تــكــــفـــــــــــــــى ـآآ ..
ابتسمت اكثر وانا مستصعب الفكرة ... ويييين .. مالي دخل افصل ..!
تكلم من منظور اقتصادي :عشان يسوي لنا ديسكاونت ..
ضحكت .. وهو التفت لـ صاحب المحل وسأله : ولاآآآ !! ..
صاحب المحل .. سعودي الجنسية : أكـيـد .. وبإذن الله تكونون من زباينا طول سنين الطــب ..!
استغربت من كملته "زباينا" .. باندفاع .. أأشر على عبدالعزيز : هـــو بروووحـه .. أنا مالي دخل ..
التفت لي عبدالعزيز يترجا : بس هالسنة تككفى .. هالمرة هالمرة ... عشاني ..
ابتسمت لـه على قولته " عشانه " : يلآآآ . عشانك .. [ وابتسمت اكثر وأنا اشوفه متحمس يضحك ..
قدّمني : خذ مقاساته ...
ابتسمت بهدووء .. وأنا اسمع ضحكته المتحمسه .. فرحان بالطب بشكل ماتتخيلونه ...
××××××
وهذي آخرتها .. بس الحمدلله ..

*
*
*
--------------|[ يتـ غـدا بإذن الله ..ـبع ..



ـــــــــــــــــــ
اليوم: السبت ..
التاريخ: 24 / 6 / 1426 هـ ..
المكان: زحمة الرياض ..
الوقت: 1:45 ظهراً ..
ـــــــــــــــــــ
(ابراهيم)
تأففت وانا اسمع صوت رنات الانتظار المقرف .. في وسط زحمة الرياض الـ أقرف ..وياا صبر أيوب ..
صراحتن .. أهل القصيم في راحـه .. يلاا ردي انتي بعد ..
واخيرا اسمع شوشرة صغيرة وبعدها حس وعد اختي : هـلآآآ ..
ترفقت بسيارتي وانا اوقف عند اشارة : السلام عليكم ..
وعد ترحب : هـلآآآ والله .. وعليكم السلام والرحمة ..
حكيت راسي ادور مقدمة للي بقوله : آمم .. [ وبابتسامة عريضة ] وش اخبارتس ..!
وعد : الحمدلله بخير وش اخبارك انت ..!
ابراهيم : بخير الله يسلمتس ..
ابتسمت وانا اتذكر ان عبدالرحمن مايحب كلمة ( كيفك في السؤال عن الاخبار ) قلت وأنا اتميوع : كيفه زوجــك ..!
وعد : ههه .. اسكت لا يجيك الحين طاير يخوض ببطنك ..! هههههه .. ترا يبين اللي قايلها عفويه واللي مستقصد ..!
كشرت باستياء مصطنع : والله تحسسيني ان رجلتس وحش ..!
فجأة حسيت السيارة تحركت من الصدمة اللي جتها من ورى .. فزيت متروع .. على طول رفعت نفسي والتفت لورى .. شفت صاحب السيارة يحط يده على راسه كـ مصيبة .. كنت بنزل اتهاوش بس انتبهت أنه يووه .. هههههههههه عبدالله ولد خالي ههههههه ..!
حطيت جوالي على اذني واسمع وعد تنادي : ألو ألووووو ,,
بسرعة صرفته : اسمعيني اكلمتس عقب ...!
نزلت بسرعة .. عبدالله ماينتفوت بستهبل عليه ..
صكيت باب سيارتي بسرعة وبقووة بعد .. ورحت ماشي له بسرعة .. ضربت على الكبوت بقوة وهو منصدم ... نزل : والله آسف اخوي ماقدرت اقدّر المسافة بين سيارتك وسيارتي ..
معقولة هذا من صدقه ماعرفني ..!
خل نكمل هبل .. أنا بالحسرة عرفته .. حاولت اخلي لهجتي مثل اهل الرياض ولو شوي : والله .. وانا وش ازين فيذاا ..
مدري وش تبي جملتي .. والمشكلة احس ريحة القصيم كله في لهجتي .. أو نطقي نفسه ..
عبدالله استغرب : هــه ..
سمعت بواري وصجـة أكثر انتبهت ان الاشارة خضراء : مشى السرى .. مشى السرى .. يلا يلاا .. اشوفك في بيت امي سارة ..
بشكل سريع رجعت للسيارة وركبته ..
ركبت وعلى اتصال عبدالعزيز .. حركت السيارة ببطء لزحمة الطريق وأنا ارد باستهبال : هــلآآآ ..
عبدالعزيز : السلام عليكم ورحمة الله وبركاته ..
رديت : وعليكم السلام ورحمة الله وبركاته ..
عبدالعزيز : آآ .. وش كنت بقول ..!
ابراهيم : وأنا وش عرفن .. قالوا لك أنا قلبك !!
عبدالعزيز يستهبل : لآآ قالوا لي ولد عمي .. المهم المفروض انت في الرياض .. وينك فيه الحين ..!!
استهبلت عليه هو بعد : أنا فيذآآ ..!
عبدالعزيز يجاريني : أنا عارف انك فيذاا .. بس وينك بوووه بالضبط !!
حلوو ردّه : الله يقطع بليسك هههههههه .. أنا توني طالع من الاشارة ..!
عبدالعزيز منقهر شوي : والله ... الرياض كلها اشارات ..
بديت انسل من الزحمة واخذ لفة وادخل حارتهم : الحين ابجي عندك أنا .. لا تغدوون عني ..
عبدالعزيز : طيب .. بس أنت عجـل .. لا تـ ..
قاطعته : طيب طيب .. افتح البيت ..!
عبدالعزيز وحسّـه يقوم : طيب طيب .. جايك .. مع السلامـة ..
: مـع السلامـة ..
وسكرت الجوال .. وانا اخذ ثاني لفة .. وامشي بالطررريق اللي الظاهر انه يودي لبيتهم ..
خذت يمين على حسب التوصيف .. ايوه .. ولااح لي مثل النور .. ذلك المنزل الجميل .. دعسسسسسسسست للبيت ..
وقبل اوصل البيت كان عبدالعزيز واقف ينتظرن .. سويت نفسي ابي اصدمه نقز .. وهو يرجع لورى .. ضحكت وانا اشوف خوفه .. وقفت السيارة .. نزلت وانا اصفق بالباب .. : تحب الدنيا ياولد عمي ..!
عبدالعزيز منقهر: والله .. اجل تعال اصدمك أنا ..
مديت يدي اسلم .. واستهبلت وانا اعانقه : وش اخبارك وش علووومك من زمان عنك ...!
عبدالعزيز يكمل استهبال : وانا اكثر .. حرام عليك وش ذا القطاعة ..!!
تركنا بعض .. حطيت يدي على عيوني امثل اني ابكي : هذي الدنيا .. اللي أنت تحبه ولا تحبن ..!
عبدالعزيز يضحك وهو يطقني على ظهري يدخلني .. دخلني في الملحق .. اللي كان فيه قهوة ..
قبل اقعد .. عزمني عبدالعزيز اختاره لي : تعااال هنا في صدر المجلس ..
رحت للمكان اللي يقول .. قلت اتطنز بـه :هناا .. في صدر المجلس .. اي صدر المجلس .. هذا صدر الملحق ..
عبدالعزيز : صدر .. ظهر بطن اللي تبي ..
حكيت راسي بتفكير : اللي أبي .. ابي مؤخرة ...
عبدالعزيز يضحك وهو رايح لزاوية الملحق يجيب مركى : كـفووك ...
وبعدين بذكاء او فطنة يأشر على مكان عند باب الملحق .. : هذي مؤخرة ملحقنا !!
فجأة ضحكت على نفسي وأنا افكر في كلامي : هههههههه .. تراني أحس أني أووب صاحي اليوم .. من عقب صكـة القايلة في ذا الخط .. وأنا مااش غاسل يدي مني .. حسيت اني بديت اصير غبي .. مع احترامي لي يعني ..! ههههههه ..
يمد لي فنجال من غير تعقيب على كلامي : تقهــو ..
آخذ الفنجال واعقب على كلمته : تقهو واسكت عني هـاه ..!
عبدالعزيز يطالعني وهو ينفي : لا والله .. ماعاش اللي يسكتك ..
اتهمته وانا اساسا استهبل : هذا هو عايش قدامي ويصب قهوة ..!
عبدالعزيز يبرر : أنا قلت تقهو ماقلت اسكت ...
رديت بنية اني اعقدها زوود : وتقهو وش معناته !!
طالعني في عيوني وهو منزل راسه شوي : معناها ابلع العافية وأنت ساكت ..
رديت باستياء مصطنع : والله انك ماتستحـي ..
قبل اكمل كلامي قاطعني وهو يتذكر : الا على طاري مااستحي .. ههههههه .. [ ضحك على نفسه ..] آآ .. عندي في جهازي برنامج عيا يشتغل .. اغديك تشوفه اويلاااه ..!
يستهبل بعد يطلب ويتطنز بعد .. رديت عليه : طيب تقدر تجيب جهازك ... فيذآآآ .. احتريك هاه ..
ضحك عبدالعزيز وهو يقوم : ههههه .. طيب .. [ صلب طوله ] ماودك تقوم معي ... ترآآك أووب غريب ..
سألته مستغرب : وين !!
عبدالعزيز يمد يده يبيني اقوم : غرفتي هنا على طول .. ياخي لاتسوي مستحي .. يلا يلا تكفى ..
كنت احرك الفنجال اللي خلصته وانا محتار ومدري وش اسوي وانا عيني على عبدالعزيز اتحراله يهوون .. مد يده وخذ فنجالي .. وقومني .. قمت مـعه ..
طلعنا من الملحق .. مشينا في الحوش الى ان وصلنا تقريبا ما قبل .. نهاية الحوش .. كان فيه باب دفّـه .. دخل وأنا وراه .. مشى شوي .. بعدين خذ يمين وعلى طول كان فيه باب .. قدامه باب ثاني .. وهالبابين بينهن حمام ..
دخل مع الباب الاول .. ولع اللمبات واتضح لي من الدولاب والسرير وباقي الاثاث انها غرفته ...
كان عنده دولاب فيه دروج كبيره .. يمكن خمس دروج .. الدولاب هذا كله يمكن اطوول من المتر .. لو اوقف عنده بيوصل لـ عند صدري .. فتح الدرج الثاني وكان فيه أسلاك وأشياء .. وطلع منه جهازه اللاب توب ..
تقدمت وقعدت جمبه على السرير .. : والله لو أني داري انه لاب توب تسان ماجيت معك وخليتك تجيبه .. لي بذاك .. [ عدلت كلمتي باستهبال ] اقصد فيذااااك ...
رن جواله اللي كان عنده على السرير .. رفعه وطاعني يتوعد : اصبر شوي ..
رد على اللي متصل : نــعــم ..
,,,, رد مرة ثانية : طيب انا جايتس الحين .. [ وسكر ..
عطاني الجهاز وقام : أنا بروح الحين احاتسي عبير وابجيك .. بس دقيقة هاه .. حووس فيه .. شووف وش بللااه .. طــيب ..
قام طلع وطرف الباب ورااه ...
طالعت الشاشة طيب ياخبل ماقلتلي وشو البرنامج .. آآخ من الصحاية اللي فيك ياولد عمي ..
حركت الفارة وأنا احووس فيه شوي .. تدرون ليش هو قالي اشوف وش فيه جهازه .. لأني ادرس حاسب ..
تدرون وش صار خلال الثلاث السنين الماضية .. بشكل سريع .. أوووخ اقولكم .. عمي ناصر تزوووج من سنتين .. تقريبا في صيف 1424.. وعنده الحين ولد توه عمره شهرين .. مسميه ابراهيم على ابوه .. تراه اساسا مسميه علي بس يكذب علي مايبي يعلم ..
ترا أووب بس ابوه اللي اسمه ابراهيم .. حتى ابوهاا ههههه ..
وو مين بعد .. وبنات عمي ثنتين بعد تزوجن اخوات فيصل .. وفضى بيتهم مافيه بنات خلاص .. هههههههه ..
وبعد سعود للحين عزابي .. طبعا للحين وانا مابعد ارتحت من وضعه يقول فقر دم .. فقر الدم يصير كذا .. ماعلينا ما ابي اضيق خلقي ..!
انتبهت للباب ينفتح .. ووراه عبدالعزيز .. رفعت راسي بسأله .. ابن عمي الخبل .. بس انصدمت وأنا اشوف عبير انصدمت حتى هي بعد .. على طول هي استوعبَت وراحت .. مدري لوين .. بس راحت .. وانا مازلت اناظر الباب .. ومكانه اللي كانت
واقفتن به ..
منصدم .. ياحليه عبير كبرت .. كم عمره الحين .. هي كبر اختي رغد .. رغد الحين بـ آآ اعتقد .. بثاني متوسط رايحة لثالث متوسط ..
نزلت عيوني للجهاز .. بعد ماخذيت وقتي عشان استوعب .. المفروض من أول مادخلت انزل عيوني ...
ماقدرت اركز في الجهاز اللي معي ..
رفعت راسي وانا اناظر نفس المكان ...غمضت عيوني .. وأنا اتذكر قد مرة كنت انا وسعود رايحين للسوق .. المهم كان فيه حرمـة ماكانت متغطية زين والظاهر انه اجنبيه .. غصب عنا طالعناه .. بس مسكني سعود وقالي : النظرة الأولى لك .. والثانية
عليك ..!
طالعت الجهاز .. رحت بمؤشر الفارة ويمين وانا اضغط عند كلمة ابدأ .. وأنا احاول بـقد ما أقدر .. اني ابعد عبير عن بالي ..!

*
*
*

ـــــــــــــــــــ
اليوم: السبت ..
التاريخ: 24 / 6 / 1426 هـ ..
المكان: حوش بيتنا ..
الوقت: 2:15 ظهراً ..
ـــــــــــــــــــ
(عبدالعزيز)
واقف انتظر عبير .. في الظلال عند سيارتي .. بس بعد شمس .. كنت مكشر من اشعة الشمس القوية ..!
كنت متسند على سيارتي ومتكتف .. فكيت يديني وأنا مليت وانا انتظرها .. حطيت يدي على جنبي وأنا احس اني عادية وقفتي .. صح شمس بس احب براآآ ..
أحب الاماكن المفتوحة ... على الرغم من أنه شمس .. بس عادي .. احس اني مستمتع .. بس هالعبير ما احب انتظر انا ..
آآخ اليوم يوم سأل عبدالملك عن تسجيلنا في الجامعة .. وعبدالله كان مايبي يقول ويبي يقول .. وأوووب عارف وش يسوووي ..!
بس لازم يدري .. مع اني الصراحة استغربت يعني توقعته يعرف .. اخبره يعني اقرب عيال عمه لـه تقريبا .. من ايام دراسة المتوسط وهم مع بعض .. صح يصادقون لهم اصدقاء ثانيين .. بس كانوا عيال عم وودهم يصيرون اخوان ..
بس عجبني بعدين ان عبدالله ماقال لعبدالملك السالفة المؤلمة .. لأنه اذا كان بيدري فالارجح ان عبدالله هو اللي بيقوله ..
يعني هذا اكـد لي ان فيه خصوصية عند عبدالله ..

بس من جد السالفة كانت مؤلمة لي بقووة ... اتذكر ايام امتحانات الشهر .. الامتحانات الفصلية .. كانت يدي على قلبي وانا اتحرى النتيجـة .. كانت كل نتايجي زينة الا الفيزياء .. كنت اعتبر مآخذ 3,25 .. كان شي يقهر .. بس الحمدلله ..
هو طبعا كـ نظام اللي يجيب اقل من 3ونص من خمسة في المواد احياء وفيزياء وكيمياء .. يحولونه لوحدة من الكليات اللي يبي هو يعني ..
انا مع نهاية الفصل الاول كنت جايب 3وربع من خمسة في الفيزياء .. كانت مادة وحدة والفرق قليل مررة ..
أنا رحت كلمت المعيد .. وقلتله يعطيني فرصة .. المهم فضخت راسه ..في الاخير قالي انا بقولك لو جبت اقل من المفترض صدقني اوريدي بتتحول لأي كلية .. بس وش فرقك عن غيرك انك راحت عليك سنة ضايعة .. لا أنت في الطب ولاغيره ..
المهم من امتحانات الشهر كان اتفاقنا .. بس ماجبت درجة زينة .. يالله الحمدلله ..
انفتح باب الفلة .. وطلع من وراه عبير كانت حاطه على راسه طرحة ..
اخيرا .. جت وقفت قدامي ..
عبير مكشرة من الشمس : مافيه قهوة ..! وكلمنا عبدالرحمن .. اتصل على البقالة وبيجيب الحين .. اذا رن الباب افتح له .. [ وتمد فلوس ] وعطه حسابه ..
تكتفت : طيب ليش يجي راعي البقالة وانا موجود ..!
عبير تنزل يدها يوم حست اني ما ابي اخذ الفلوس : انت عندك ضيوف ..وو بعدين من زمان قايلين لـ عبدالرحمن اساسا يجيب .. بس ينسى مايجيب .. عاد عشان يكفر لذاكرته الجميلة ..
وترجع تمد الفلوس : خذ ياخي ..
وقفت عقب ماكنت متسند : مابيهن .. وبعدين عادي هذا ابراهيم ولد عمي .. وش فيكم عادينه غريب يعني .. وبعدين اللي داخل تراها اخته .. يعني عادي لو رااح هو يجيب القهوة .. وبعدين يعني لو انه سعود كانت قلت يمكن .. بس ابراهيم ..! يعني زودن على انه ولد عمي واخووووها .. ابراهيم !!!!
عبير : طيب والرجال الحين خلاص بيجي .. والفلوس وش اسوي فيها ..
تنهدت .. قلت وانا رايح للغرفة : خذيها لتس ..!
دخلت مع الباب حقي ..
وعلى طول دخلت غرفتي .. لقيت ابراهيم مسكر الجهاز وحاطه على جنب .. ومنسدح على ظهره .. بس بشكر عرضي على السرير .. بحيث كانت رجلينه على الارض ..ويدينه رافعها لفوق ومرخيها شوي ..
نغزت باصبعي في بطنه وانا اجلس جمبه : وش عندك مستسلم للنوم ..
ابراهيم يفز قاعد من نغزتي ..! ويزجرني بقهر : هـــــااي ..
سألته : وش لقيت في الجهاز ..
ابراهيم يرفع كتوفه : مدري .. بس جرب حمل البرنامج من جديد .. وان كان مانفع .. وده لأي احد يصلحه .. أنا ماعرفت له .. وبعدين تراني اول سنة ادرس حاسب .. يعني مدري وش أنت متوقع !!
هزيت راسي وانا ما اتذكر اني شرحت له المشكلة .. بس شكله من جد ماعنده علم ..
ابراهيم بهدوء : حلوة اللوحـة ..!
رفعت راسي .. وشفت وين ناظر .. التفت للوحــة المعلقة على واحد من جدران غرفتي ...
وابتسمت وأنا أشوف لوحة مرسومة بقلم الرصاص .. اووب رصاص رصاص ابو مساحة .. لأ قلم رصاص حق رسامين .. مدري وش اسمه .. كانت الرسمـة لـي ..
سألت ابراهيم : ماعرفت الصورة ..!
ابراهيم يلتفت لي ويجاوب وهو كنه مستغرب من سؤالي : صورَكْ ..!
ضحكت لأنه فهم غلط : ههههه .. عارف بس ماعرفت يعني .. متى كنت كذا ..
في الصورة الاساسية كنت واقف وجمبي من اليمين واليسار عيال عمي وعيال عمتي يعني الصورة أساسا كانت مليانه .. انا كنت لابس ثوب بس .. وماكان علي شماغ ولاشي وقت التصوير .. وكان اللي على يميني عبدالاله وكان حاط يده على كتفي الايسر .. بس الرسمة كانت لي أنا مبتسم الى درجة اني كنت بضحك .. ووو كنت لابس نظاراتي الطبية وو كان معي سبحة ..
هي اساسا كانت صورة لنا كلنا .. وبعدين اخذها زياد ولد خالي ورسمني انا بس .. أمم .. الصورة من تصوير ابراهيم بس شكله عجز يتذكر ..
ابراهيم وهو يتأمل الصورة : من وين شاريه ..!
ابتسمت اكثر : جايتني هادية ..!
ابراهيم يتطنز : جايتني !! جايتني ..! هههههههه .. من مين ..!
رديت وانا مازالت عيني على اللوحة : زياد ولد خالي احمد ..!
ابراهيم : بمناسبة ..؟
جاوبت : هو اصلا كان يبي يعطيني شيء .. شُكرا لي يعني لأني دخلت معه النادي قبل كم سنة عشان نتعلم سباحة وشكله درى اني ماودي .. بس غصبت روحي عشانه .. عااد يوم تخرجت من الثنوي .. عطانياها ..!
ابراهيم يكمل : حللللوة ماشاء الله .. والأحلى شُـكرا لي !! هههههههه ..
ابراهيم قام واقف : قم قم خل نرجع للملحق ..!
اقترحت نروح لصالتي : لأ لأ خل نروح للغرفة الثانية اللي قبال غرفتي ..
ابراهيم : وين !!
قمت وأنا أأشر له براسي : فيذاك ..!
ابراهيم يتطنز : فيذآآك ..
طالعته في عيونه : ملاحظ أنك تتطنز واجد ..
ابراهيم يتكلم بصراحة : هذا انتم اذا جيتوا لنا ببريدة .. خذ ياتطنز .. مع ان حنا الاكثر المفروض حنا نتطنز فيكم .. بس لاحظت لازم اللي يجي هو اللي يتطنز .. أما أهل الدار ساكتين ..
قلت: ايه كذا الضيف .. مايقدّر احد ولا يعبر احد .. اما اهل البيت بالعينها في قلوبهم وساكتين .. زودن على انهم عازينه ورازينه ومستقبلينه عجز يحشمهم ...
رد باتهام : ترا انتم اللي بديتوا ..!!
طلعنا من الغرفة : زين خلاص .. ما اتعودها ..
دخلنا الغرفة وعلى طول شغلنا التلفزيون ... قعد يطالع وأنا كنت بروح اجيب القهوة .. عشان نتقهوى مع انه مابقى شي على الغدا بس لأن حنا ماقهويناه ..
*
*
*
ـــــــــــــــــــ
اليوم: السبت ..
التاريخ: 24 / 6 / 1426 هـ ..
المكان: حوش بيتنا ..
الوقت: 4:00 ..
ـــــــــــــــــــ
(عبدالله)
دخلت الملحق شايل الفيديو اللي جابه بدر ولد عمتي .. يعني لو بقولكم منهم عيال عمي وعيال عمتي .. بتنحاسون .. بس اللي يحتاج نقوله بنقوله ..!
حطيته عند التلفزيون ..
بدر : وين بنشبكه ..!
التفت ادور اقرب فيشين لبعض ..! لأن حضراتنا مامعنا توصيله .. ومامعنا الا بس قسام .. وفيش التلفزيون كبير ياخذ مكان سلكين !!
اقترحت : وش رايكم نشبك الفيديو هنا [ وأأشر على الفيش اللي يكمل صفة طفايات اللمبة ] .. بعدين نحطها هنا [ وأأشر على مكان يبعد عن الفيش متر ونص تقريبا ] وعادي نشبكه بالتلفزيون ..
بدر يشبك الفيديو في التلفزيون : نجرب ..
شبكه بعدين انا قمت اشبك الفيديو في الكهرب .. بس كان مايطول لو نحط الفيديو على الارض .. يعني لازم نرفعه ..
المشكلة مافي الملحق الا مركتين .. وكلهن تحت التلفزيون ..
ارتخت اطرافي وانا اطالع بدر اللي كان يحوس عند التلفزيون ..
اقترح عبدالملك : فيه طاولة أنا شايفها في الصالة اليوم الصبح ..
تذكرت الطاولة ..: ايييييييييه صح ..
تركت السلك .. ورحت اجيبها .. صووت وطلعتلي عمتي .. قلتلها ابي الطاولة ..
جابتها لي شايلتها هي وأمي موضي .. ثقيلة .. الطاولة هذي ارتفاعها تقريبا 60 سنتي ..
وتقريبا هي الخشبة اللي نحط عليها .. يعني سطح الطالوة ستين في خمسين .. أوووف ياهي ثقيلة .. هي فيها ثلاث دروج بس من جد ثقيلة ..! أووخ .. وخشبها خشب .. هي شارينها لعمتي الصغيرة اصغر وحدة .. يووم كانت هنا .. آمم كانت غالية حزتها .. بس شاريتها من مكافئتها ..!
حطيتها في المكان اللي بيوصل له الفيديو .. أوووه ثقيلة بصراحة .. شبكنا الفيديو وضبط الوضع الحمدلله ..
معليش تعبتك .. والله يخليك !!جلست قدام التلفزيون وجا جمبي عبدالملك وبدر كان يحووس وهو يشغله .. خالد ومحمد عيال عمي اللي كانوا يلعبون ..
فكرت ادق على عبدالعزيز .. اعتقد اني شايف ابراهيم .. ليش مايجي هو وابراهيم ..
اتصلت عليه ..
رد : هـلآآآ ..
أنا : اللسام عليكم ..
هـو : هلا وعليكم السلااام والرحمة ..!
أنا : وش اسمه .. ماودك تجي ...
رد : وين !!
ضحكت على نفسي يوم استوعبت وش انا قايل : ماودك تجي .. يعني توسع صدرك ..! ما اعرف اعزم تراي ..!
هـو ماعرف وش يقول : آآ .. مـ .. [ بلع ريقه ] مدري ..!
سألته عن ابراهيم : أنا اليوم شايف ابراهيم .. عندك هو ..!
هـو : ايه عندي ..!
أنا : خلااص تعال أنت ويااه ..
هـو : آآمم .. هو الحين نايم .. واذا قام جينا ان شاء الله ..
هزيت راسي بتفهم : آيـه .. خلاص اجل نحتريكم اذا قام هــاه ..
بدر يحشر نفسه بيني وبين عبدالملك ..
رد عبدالعزيز : خلاص مايخالف .. اذا قام ان شاء الله ..
رديت : على خير اجل .. مع السلامة ..
تحركت شوي على جنب .. ووجهتي كلامي لـ بدر : يااحبك للضيق ياخي ... الله يحوم كبدالعدوو ..
بدر وهو يحوس في الفيديو بالريموت اللي معه : ياخي انتم خونه خذتوا المكان الزين .. قلت احشر نفسي دامك لاهي تكلم ..! وعبدالملك مافيه حيل يهاوش !!
حبيت احسسه بالذنب شوي : فشلتني عند الرجال تصدق ..!
بدر ضحك باستهزاء وتركيزه مع الفيديو : ههههاا .. هذا عبدالعزيز شوي واعتبره ولد عمي من كثر ما انت معتبره اخوك ..! لدرجة انك دقيت عليه وقت المتعة ..!
ماعرفت ارد : أصلا .. انت وش دراك .. هذا ابراهيم ..!
شغل المسرحية : تسمع بالكذب أنت ... ركز ركز بس ..!
تنهدت .. مصدق نفسه لانه اكبر مني ..!
الله يعين بس ..!

*
*
*


******
******************
********

**
*
ألقاكم ... مع الورقة السادسة عشر بـ بإذن الله ..!!
.......
............................................إِمضاءْ ...
.......................................كُتلَـةْ جُــرُووح || ...
*
*