عزيزاتي نزلت لكم الى الحين 16 جزاء باقي 15 ابي تشجيع اكثر ممكن <<<فيس متحطم

الحلقــة العشـرون
" اولها جفا آخرها فرح "




شخطت للبيت بسرعة جنونية ..ودموعي على خدي ...حرام اللي يصير هذا حرام ... ليش يا سامي ليش ؟؟
دخلت قلبي وصرت دقاته ...دخلت روحي وصرت انفاسها ...دخلتني كلي ...ليه ليه ؟؟؟
وطقيت السكان بعصبية..وانا ابجي ...
سمعت صوت التلفون يرن ...مابعدت وايد عن العمارة بس ما رديت ادري هو ...دق التفلون ودق ودق لين ما تعب ...يمكن فوق العشر مرات ..بس مطنشة ... سمعت بعدها صوت مسج ...هم طنشت .. وصلت بيتنا ...
ماادري الي اسويه شح ولا خطأ ...ماادري اللي صار صج ولا حلم ...ماادري إذا سامي يحبها ولا لأ ...
ماادري عن شي ..ماادري عن شي ...
وسندت راسي على السكان وقعدت افرغ اللي بداخلي ...
تذكرت لما عالية وسامي بالحديقة الورانية ...
تذكرت كلماته لي في البيت لما عطاني العقد الألماس ...
تذكرت لما كنا بالمعطم ...واشلون كان يتكلم معاي ويضحك ...
تذكرت كل شي ..حتى عرسنا ....
تنهدت وطلعت من السيارة ..تركت وراي ذكرياتي ...
رحت الدبة وطلعت منها الجنطة ... ودخلت البيت ..وكانت الساعة 12 ونص ... بيتنا ما يبعد عن هني إلا عشر دقايق ..بس قعدتي بالسيارة اخرتني ...
سمعت صوت مسج ثاني ... بطلتها ...
" انزين لا تردين طمنيني وصلتي البيت ؟"
بطلت المسج الأول ..
" هناء عقلي وردي البيت ...ترا كل اللي قاعد يصيرهذا ماله داعي "
ماله داعي!!! ...مشاعري مالها داعي؟؟ ...حبي ماله داعي ؟؟؟ ...
لقيت البيت فاضي ..صج اني هبلة اكيد بيكون فاضي الوقت متأخر والناس وراها دوامات ... ابتسمت لغبائي ...وصعدت فوق ...
دخلت داري الحبيبة بدلت هدومي وحطيت الجنطة على جنب ونمت على السرير وانا ادور على النوم والنوم مجافيني ..
منو ريم هاذي ؟؟ زميلته بالجامعة ...انزين هي اتعرفت بحبها له بس هو يحبها ؟؟؟يحبها ؟؟؟
نزلت هني دموعي لما وصلت لهكلمة ....وغطيت ويهي بايديني ....
سمعت صوت حركة برة ...وصوت ...بعدها سمعت تلفوني يدق ...طالعته بملل وانا عارفة انه سامي ...بس كان طلال ...
طلال!!!!!
بغيت ارد بس سمعت طق على الباب ..بعدها تبطل ...طل طلال من ورا الباب وقال بذهول ..
طلال : انتي هني ؟؟؟
اووووه دروا ...
دخل وصك الباب وقال بدهشة ..
طلال : اشحقة ياية هني ؟؟؟
قلت وانا مالي خلق احد ..
هناء: حرام ايي بيت ابوي ؟؟
ظل طلال واقف مثل الشيرة مندهش ومستغرب من وجودي ...قال ..
طلال : هناء اشصاير ؟؟ اشحقة هادة بيت ريلج وياية هني؟؟
مارديت ...
سمعت بعدها تلفون طلال ...
طلال :ئي كاهي هني ...لا مافيها شي ...ماادري من متى هني توني اشوفها ...مع السلامة ...
اكيد هذا سامي ...
طلال : هذا سامي يسأل عنج ..خرعتي الريال بنص الليل ... شلي صار ؟؟
تكفين طلال مالي خلقك ..
هناء: طلال ...مالي خلق احد ..ما..
قاطعني وقال بعصبية شوي ..
طلال : مالج خلق احد ؟؟ ياية بنص الليل وتسحبين جنج حرامي تقولين مالج خلق احد ؟؟ شلي صار ؟؟
وقعد على السرير ينطر الإجابة ...
غمضت عيوني وانا خلاص مافيني شدة اتكلم لأني بنفجر ... وطولت بالسكوت ...
قام طلال وقال ..
طلال: اوكي ماله داعي تكلمين بس ردي على ريلج تراه خايف عليج ..
وطلع ....
خايف علي ؟؟؟صج عاد ؟؟؟
نمت على هالكلمات والأسئلة ...
بطلت عيوني على صوت تلفوني ..منو هذا المزعج ؟؟
بعدها تذكرت كل شي ...كل شي ...
لا إله إله إلا الله ...
مسكت تلفوني ..شفت 12 مكالمة لم يرد عليها من سامي ومسجين .. والحين هو يتصل ... ما يتعب هذا ؟؟
حذفت التلفون ورحت الحمام عزكم الله وتوضيت وصليت الفير ... ونزلت تحت اسوي الريوق مع امي ..أشغل روحي بأي شي ..بس اكيد بتتفاجأ بوجودي ... وفعلا ما خلت سؤال ما سالته ...
ليش هادة بيت ريلج ؟؟
شلي صار ؟؟؟
إلخ ...
دخل علينا طلال وبايده كتبه ..
طلال : السلام عليكم ..
قالت امي بسرعة ..
امي : شفت طلال اختك ينت وقعدت ...هادة بيت ريلها وياية عندنا ...
ولفت لي وقالت بعصبية ..
امي: شلي صار ؟؟؟ تحجي ..
طالعت طلال ينقذني بس طالعني بعيون رافضة اللي سويته ومتسائلة ...
ما تحملت وطلعت فوق داري وانا ابجي ... يا ناس افهموا ...انا مجروحة ..مجروحة ...
تسندت على الباب وقعدت ابجي بصوت عالي ..
ليش مو راضيين تفهمون ؟؟
ليش ؟؟
سمعت صوت تلفوني ...ما بغيت ارد بس ازعجني صوته ... قمت بعصبية وثورة من الأرض ومسكت التلفون وكان سامي ..
قلت من بين دموعي ..
هناء: نعم؟؟
سكت شوي بعدين قال ..
سامي: هناء ..اخيرا رديتي ...
هناء: اشتبي ؟؟
سامي: ابيج انتي ...
غمضت عيوني ونزلت دموعي وقلت ..
هناء: جذاب ...جذاب ..انت تبي ريم ...ماخذني بديلة عنها ..
قال بصوت واطي ..
سامي : منو قالج ؟؟؟ ريم ماضي وانتهى ..مـ..
قاطعته وقلت ..
هناء: شفت ..يعني تعترف انك تحبها ..صح ؟؟؟
وصرخت ..
هناء: خلها تنفعك عيل ..
وصكيت بويهه ..
رحت الجامعة اتهرب من عيونهم ...لما رديت الظهر ...شفت طلال طالع من الديوانية وقال بدون مايطالعني ..
طلال : ريلج داخل يبيج ..
بغيت اعترض فقال طلال بحقد وعصبية ..
طلال : روحي تراني حمدي ربج ساكت عنج للحين ..
ونظرات طلال كافية انها تحركني ... حسيت اني إذا رفضت بكفخني طراق ..رحت داخل وبايدي كتبي ودخلت الديوانية ...وانا رافعة خشمي ...
قعدت وقلت ببرود وانا لافة ويهي ..
هناء: السلام عليكم ..
رد علي ..
سامي: وعليكم السلام...
وسكتنا ... نطرته يقول شي ..بس ماقال شي لفيت له وقلت ..
هناء: خير ؟؟
ظل يطالعني وعيونه الفاتحة حسيت فيها حزن الدنيا ...
سامي: ممكن اعرف شنو اللي تسوينه هذا ؟؟
قلت بغرور وزهو..
هناء: فيك عين تسأل بعد ؟؟ صج فوق شينك قواة عينك ..
طالعني منصدم وقال .
سامي: ئي شسويت انا ؟؟ كل هذا عشان شفتي صورتها بدفتر مذكراتي ؟؟ اوكي ..مو مشكلة ...بس هذا مو معناه انج تشيلين قشج وتطلعين بنص الليل ..
وقفت بقهر وقلت ..
هناء : اشوف صورتها عندك مو مشكلة ؟؟؟ انت شنو ؟؟ ما تحس ؟؟
سامي: لا إله إلا الله ..هناء صلي على النبي واقصري الشر ...انا ما سويت شي غلط ...
تجدمت منه وقلت ..
هناء : عليه الصلاة والسلام ... لا تطلع نفسك بريء ...انت غلطت اكبر غلطة وانا ما اقدر اغفرها لك ..
طالعني بذهول وقال ..
سامي: يا سلام !!! انتي كنتي تحبين عصام وما قلت لج شي ..
لفيت له وقلت بدفاع ..
هناء: على الأقل اعترفت مو خشيت صوره وخنتك ... بعدين لا تقارن بيني وبينك انا غير عنك ...انا ما اختليت معاها بسيارة وحدة وسمعتها تقولي ..
ميعت صوتي ورققته ..
هناء: سامي انا احبك ..
ورديت لعصبيتي ..
هناء: في فرق يا محترم ..
حسيته من الصدمة مو قادر يتكلم ... هز راسه مذهول وقال ..
سامي: لا ينيتي انتي ..
قلت ..
هناء: ينيت لما وافقت عليك ..وانت بقلبك وحدة ثانية ...
وقف هني وحسيت ان المعركة ابتدت ..
سامي: وانتي ما كنت تحبين لما تزوجت ؟...بعدين يا مدام اشدراج اني اختليت فيها بسيارة وحدة انتي ما كنت معانا ... بعدين ما اسمح لج تكلميني بهالطريقة ..على الأقل احترمي اللي بينا ..
قلت هني وطعنته ..
هناء: وشلي بينا اصلا ؟؟
صدمة ثانية ... طالعني بعيونه الفاتحة ..وبلع الصدمة ..نزل راسه وقال ..
سامي: اوكي ...
رفع راسه وقال ..
سامي: مثل ما تحبين ...
وطلع من الديوانية ...
قعدت منهارة ودموعي تنزل ...وقلبي يصرخ ..
سامي لا تروح ...

ظليت ثلاثة ايام بين الجامعة والبيت ...بيتنا ...وسامي من بعد آخر مرة يانا فيها مادق ولا سأل ...
اليوم يوم الرابع لي في البيت ...مشتاقة له وايد ..وودي اشوفه ...وبحكم ان خلود ييرانا وخالها اللي هو ابو سامي قاعد عندهم كنت اسلم عليه وعلى بنته شهد ...وقلت لكم قبل انه يشبه ابوه وايد ..فكل ما اشوفه ارد غرفتي وبحر من الدموع على مخدتي ...
الكل حاس ان في شي ..ونظرات خالاتي شوي وتاكلني ...سمعت كذا مرة خالاتي يسالون امي عن سبب وجودي في البيت ..وامي ترد عليهم ان سامي مسافر ...
وطلال ما حاول يعرف شلي بينا .. وموضوعه مع عالية معلق لأشعار آخر بسبب سالفتي ...وعرفت ان امي تدري بموضوع طلال وهي اللي شجعته ..وكل ما ابي اعرف السالفة كاملة يردون علي بجفاف ...
بعدها ما قمت اسال ...
اليوم الثاني وهذا اليوم الخامس .. كنت قاعدة بغرفتي معتكفة فيها اهلي إذا حاجوني يحاجوني من طرف خشومهم فاحترمت نفسي وقمت اكل واصلي واقعد بغرفتي بروحي ...
مشتاقة له ياناس ..مادق ولا سال من بعد اللي صار واللي قلته ..
آآآه يا رب ارحمني ...
سمعت صوت مسج عندي وكان من عصاموه الخبل ...بس مارديت عليه طنشت ..
قعدت امشي بالغرفة رايحة رادة ..ماني قادرة لازم اكلمه .. حرام جرحته ...مسكت تلفوني ودقيت عليه بعد اول رنة قطع الأتصال ...او بمعنى اصح صك بويهي ...
مايبي يحاجيني ...انا استاهل انا الغلطانة ...بس والله موبايدي ..استخفيت لما عرفت انه يحب وحدة ثانية ولسة يحبها ...
وقفت جدام الدريشة اطالع المطر يطق على الجامة ...المطر صارله خمس ساعات يصب ..والجو بااااارد ..
وهني لمعت في بالي هالفكرة المجنونة ...لبست عباتي وشيلتي واخذت معاي شال عن البرد وتلفوني وسويج سيارتي ونزلت تحت ..ولأن الوقت عصر فالبيت نايمين ..هذا احلى شي فيهم ...طلعت من البيت بهدوء ..
وركبت سيارتي وحركت لسامي ..لحبيبي ... وصلت العمارة ...وصعدت فوق للشقة ..طقيت الباب محد يرد ...بطلته وكان مفتوح ...دخلت وجلت بنظري داخل مافي احد ..رحت الغرف والمطبخ هم ماكو احد ..
قعدت على القنفة انطره ..بس طول ...تقريبا ظليت ساعة قاعدة ..بس ماكو ...دقيت عليه محد يرد ...
خلاص خل ايي وقت ثاني ...طلعت من الشقة وركبت سيارتي بسرعة عن المطر اللي زاد عن قبل..
قعدت افرك ايديني عن البرد ...دخلت السويج في مكانه ابي احرك ..بس لمحت سيارته ...
هاذي سيارة سامي ..
ليش واقفة هني؟؟
طلعت من السيارة ورحت له ..سيارته كانت واقف عند مدخل الموقف سادة الطريج...
هرولت ومغطية راسي بالشال من المطر ..
وقفت عند دريشته شفته ساند راسه على السكان ... طقيت الجام .. رفع راسه وطالعني ...قلت بصوت عالي..
هناء: سامي بطل الباب ..ابي اكلمك ..
بس ما تحرك ...بطلت انا الباب اول ما بطلت طاح علي .. ومن ثقله طحنا احنا الأثنين على الأرض ..
صرخت ..
هناء: سامي ...
وريوله كانت لسة معلقة داخل السيارة ..فيريته لين طاحت ..قعدت فوق راسه وانا اطق خده على الخفيف ..
هناء: سامي ...سامي سامعني ؟؟
ماكو رد ولا حركة ...قومته بس مااقدر بروحي ...رديت حطيته على الأرض والدنيا بهدلة ..ماي وطين وحالة ..
غطيته بالشال عن المطر بس الشال اصلا تبلل ... لفيت مثل المينونة عن احد يساعدني بس مكانا موحش والعمارة اصلا يديدة ...
ياربي ...
حطيت اذني على صدره اسمع نبضاته ما سمعت شي من الخوف والربكة ... طقيته بايديني المبللة على ويهه اللي يقطر ماي من المطر ...ماكو اجابة ..
ضميته لي ودفنت راسي بشعره وقلت بصراخ ..
هناء: ياربي ساعدني ...
رفعت راسي للسيارة وهديت سامي ورحت دخلت داخل ادور على تلفونه لمحت علبة دوا مبطلة ومتناثرة على ارض السيارة ...مسكت حبة ...ودورت على الأقل على ماي ..شفت غرشة الماي مقطوطة ورا ..نطيت ورا بسرعة واخذت الماي وطلعت من الباب الوراني ..وجثيت يم سامي ...اكيد الدوا هذا كان يبي ياكله بس ما قدر ..
رفعت راسه بايد وايد الثانية دخلت الحبة بحلجه وبسرعة تبتعه بالماي ...ورفعت راسه فوق حيل عشان تمر الحبة ..بس اللي صار ان الحبة علقت ..وارتدت برة على شكل سعال ...ورجع سامي الحبة والماي بعد ..
بجيت بضعف ..
هناء: لا سامي ...اكلها ...
بطل عيونه وطالعني وردغمضهم وسكن ...انا هني ينيت ..رديت للسيارة واخذت تلفونه الطايح تحت ... ودقيت على طلال ...
وتأخر بالرد ..
هناء: مو وقتك ..يلا ..
بس لمحت عمي ابو سامي ..داخل العمارة ..طلعت بسرعة وهديت التلفون ..كأني غرقانة متمسكة بقشة .. وركضت وراه مثل المينونة ..وقاعدة اناديه ..
هناء: عمي ....عمي..
لف لي اخيرا قبل ما يدخل المصعد ..وتفاجأ من منظري ...قلت وانا الهث ..
هناء: عمي بسرعة ...الحق سامي طايح ..
ما مداني اكمل إلا عمي سبقني له ...ركضنا انا وهو.... قعد يطق خده على الخفيف لعله يصحى ..بس ماكو فايدة ..طلب مني عمي اني اساعده ..قومناه ودخلنا السيارة ونومناه ورا ..وانا فتحت الباب الوراني من الناحية الثانية وقعدت ..رفعت راسه وحطيته بحظني ...وطيران على المستشفى ...
برد ..مطر ...وانا مبللة ...وزوجي طايح ما يندرى اشفيه ...وتجريحي له وتطنيشي لمكالماته ...وطيشي اللي خلاني اطلع من البيت بنص الليل ونداءاته لي ...
كل هذا احتمع وخلاني اقعد ابجي بصوت عالي ...
حطيت راسي براس سامي ..
هناء: سامي ....آسفة والله ...
وحظنت راسه ...
وصلنا المستشفى ونقلوه غرفة الكشف ...وظلينا انا وعمي برة ... وانا لسة ابجي ...
خبلة ...خبلة ...انا خبلة ...استاهل اللي اييني ... طقيت راسي بالطوفة حيل ...بس سمعت صوت عمي
عمي: يبا هناء...لا تخافين ان شاء الله خير ..
رحت له وقلت ..
هناء: عمي انت دكتور ..روح اشفيه الله يخليك ..
قال عمي بقلة حيلة ..
عمي: هناء بنتي ..انا ما اشتغل هني وما اقدر اتدخل ..
قطع كلامه صوت الباب والدكتور يطلع منه ..
عمي :ها بشر ؟؟
الدكتور : ما عليه شر ان شاء الله ..بس هبوط حاد بالسكر ادى لفقدانه الوعي ..بس مبين عليه صارله جم يوم ما ياكل ..وهذا خطر عليه ...
ما سمعت الباجي لأني دخلت داخل وخليت عمي والدكتور برة ... شفته والكمام موصل عليه ....
قطيت روحي على صدره وقعدت ابجي ...
انا ما استاهلك ..والله ما استاهلك ...
نقلوه لغرفة الملاحظة .. وقعدت يمه طول الوقت ... طالعت الساعة لقيتها تسع وشوي ..وهو لسة ما صحى ..
سمعت صوت طلال وراي التفت لقيته يحاجي عمي ...ياني وقال ..
طلال : سلامات ...اشلونه الحين ؟؟
قلت وعيوني على سامي بيأس..
هناء: ماادري والله ...
سكت طلالو ما اعقب ...بعدها حسيته يهمس بأذوني ويقول ..
طلال : هناء قعدتج غلط هني ..امشي برة..
هزيت راسي رافضة ومعترضة وقلت ..
هناء: لأ ..ما رح اتحرك من هني ..
ومسكت ايد سامي ااكد لطلال ...بس قال ..
طلال : بس قعدتج هني والمكان متروس رياييل غلط ...قومي نوقف برة ..
قلت بصوت باكي ..
هناء: مابي ..مالي شغل انا بالرياييل اللي هني ..
بس مسك طلال ايدي وقال بحنية ..
طلال : عمري هناء...بس نوقف برة لما يقعد سامي بنرد صدقيني ..
وطالعته وعطاني نظرة حنونة يأكد لي اللي قاعد يقوله ..رحت معاه وانظاري معلقة على سامي النايم ..وطلعت برة ...
الغرفة كانت زحمة ..رياييل طالعين وداخلين ...وقفت برة ساندة على الطوفة ويمي طلال وعمي معانا ..
قلت بهمس ..
هناء: اشدراك اني هني ؟؟
قال يساسرني ..
طلال : لما دقيتي علي قعدت اناديج ..سديت الخط وقعدت ادق عليج بس ماتردين ...بعدها دقيت على سامي ماكو رد ...دقيت على بو سامي وعلمني ...
مر وقت وسامي لسة نايم بالملاحظة ... علمني عمي انه ما رح يطلعونه لين ما يرتفع السكر عنده ...وهذا بياخذ وقت ..
مو مشكلة ياخذ اللي ياخذ بس يرجع سامي مثل اول ... طالعت الساعة لقيتها عشر ونص ...
وقفت عند الدريشة والمطر لسة يصب ..والدنيا غرقانة ...تذكرت لما طاح سامي ...وقعدتنا تحت المطر
وسكونه كأنه سكون الأموات ...
تذكرت لما بطل عيونه يطالعني لما شرق ...كانت تحمل معاني وايد ..وكانت ثاقبة ..
غمضت عيوني بتعب وتنهدت ...انكمشت على روحي بردانة ...والشال علي الحمدلله نشف شوية ...
لما تأخر الوقت قال طلال كأقتراح ..
طلال : خلاص عمي باجر نيي هني مرة ثانية ..
قلت انا بفزع ..
هناء: شنو ؟؟؟ نروح لأ ..
كان يبي يتكلم طلال بس قلت بحسم ..
هناء: لأ ...طلعة من هني لأ ..
سكت طلال مستسلم ...اما عمي قال ..
عمي: روحي على الأقل بدلي هدومج ..وردي هني ..
هزيت راسي رافضة ومعندة ...اشلون اروح واخليه ؟؟؟ مستحيل ...نو واي ....استأذن طلال ومشى ..
وبقينا انا وعمي اللي كل خمس دقايق يدخل يشوفه ويطمني ... وانا ظليت برة ..
كل اللي صار ماله داعي يصير اصلا ...بس ما قدرت ...حبه لريم واكتشافي لهالشي صدمني ...يمكن معاه حق لما قارن حبي لعصام بحبه لريم بس في شي واحد مختلف ...انا اعترفت ام هو خش عني ... ولا فوق كل هذا مارضى يعلمني الصج ...ما..
قطع تفكيري صوت عمي اللي واقف عند باب غرفة الملاحظة ..
عمي : يبا هناء ...سامي قعد ..
طرت داخل شفته يحاول يقعد ...رحت لعنده بسرعة وسندته ...وقلت بفرح ..
هناء: حمدلله على السلامة سامي ..
طالعني بعدين استوعب شكلي ...مارد ..قلت ..
هناء: جذي تخرعيني ؟؟ وقفت قلبي ..
هم مارد ..بس شفته يشيل المغذي قلت باستغراب ..
هناء: سامي شنو تسوي ؟؟
مارد علي ...قلت وانا امسك ايده ..
هناء: شنو تسوي ؟؟
مارد علي ..بس اكتفى يطالعني بنظرات اقسم لو انها اسهم بتييب هدفها ...
هناء: بنادي عمي تراني ..
قلت اهدده ..بس هني تكلم بصوت مبحوح شوي وكان ينادي ابوه ..
سامي : يبا ...
وكح ... وسحب ايده من تحت ايدي ..ورد نادى عمي اللي دخل ولما شاف اللي سواه سامي ..
عمي : سامي لـ..
مد ايده سامي لعمي الي مسكها ووقف وقال بصوته المريض ..
سامي: ودني البيت ..مابي اقعد هني ...
بققت عيوني انا منصدمة ...قال عمي معترض ..
عمي : شنو ؟؟ لأ طبعا ..مافي روحة ..
قال سامي بضيق وطفش ..
سامي: يبا تكفين ..مابي اقعد هني ..إذا قعدت بمرض اكثر ...
قال عمي وهو يقعد سامي ..
عمي: مينون انت ؟؟ معدل السكر عندك لسة نازل .. لازم ترفعه ولا بتتعب جذي ..
وقف وسند على حافة السرير وقال ..
سامي: مالي شغل ..مابي اقعد هني ...طلعني ..
وطق حديدة السرير بعصبية ... قلت انا بخوف عليه ..
هناء: سامي ما يصــ...
قاطعني بعصبية وبدون ما يطالعني ..
سامي: سكتي انتي محد كلمج ...
ولف لأبوه وقال ..
سامي: ها يبا ؟؟ بطلعني ولا انا بطلع روحي ؟؟
سكت عمي المتفاجأ من طريقة كلام سامي معاي وقال بحيرة ..
عمي : خلاص خلاص ..بطلعك ..بس انت اهدى ..
وراح طلع ...وظلينا احنا بروحنا ...صج كانت كلمته خنجر بقلبي ..نزلت راسي لشرشف السرير بحزن وصدمة ... وهو ظل ساكت طول الوقت وقاعد عند طرف السرير .. ويكح مرات ...
رفعت راسي له ولمحت الجاكيت اللي معلق عند طرف السرير يمه ..تجدمت منه وهو طالعني استخسر فيني حتى هاذي ... نزل راسه ومسح على راسه متضايق ..مسكت الجاكيت وقلت ..
هناء : الجو بارد ..
مارد علي ...وظل يحرك ريوله بتوتر حركات اربكتني انا ...قلت وانا احط الجاكيت عليه ..
هناء: البسه الجـ...
قاطعني بحركة ايده المباغتة ...مسك الجاكيت وقطه بعيد ..وقال بحقد بس بهدوء ..
سامي: مابي شي منج ...
تراجعت انا خطوة لورا كردة فعل لحركته ..وظليت اطالع الجاكيت بصدمة ..لفيت له ودموعي تجمعت بعيوني ...بس منعتها تنزل ... قلت ..
هناء: ادري انك زعلان مني بس والله ما كان قصدي اللي قلته واللي سويته ..
رفع راسه لي وطالعني بنظرة ما تمنيته يطالعني فيها ..نظرة قاتلة اذبحت قلبي ...كملت وقلت وانا اتقرب منه ..
هناء: آسفة صدقني آسفة ...كنت غبية ..
ولما خلصت جملتي صلت له ومديت ايدي وحطيتها على جتفه ..بس هو بعد عني وقلب ويهه عني ..
قلت بحيرة ..
هناء: قولي شنو تبيني اسوي عشان ترضى ...قولي ..
مارد علي وظل قالب ويهه عني ...نزلت دموعي هني وقلت وانا امسحها..
هناء: خلاص اوكي لا ترد ..بس عشان اغلى انسان عندك لا تطلع الحين انت تعبان ..
قال اخيرا بس يا ليته ما تكلم ..
سامي: ما عندي احد اغليه ..
قالها وهو لسة قالب ويهه عني ... نزلت راسي ونزلت معاي دمعة للأرض ..وهني دخل عمي ...
عمي: يلا سامي ..
وقف سامي وسند على عمي ...ولا حتى قالي امشي معانا ولا شي ... نزلت للأرض واخذت الجاكيت ورحت وراهم ...ركبنا السيارة ورحنا البيت ... صعدنا للشقة ..واستأذن عمي بعد ما وصاني على دوا له وطريقة اكله ..
صكيت الباب بعد ماراح عمي ..واستعديت لأصعب معاركي ... انا وسامي ...
دخلت المطبخ وسويت له اكل ...شلت الصينية ودخلت الغرفة ..لقيت الغرفة فاضية ...بس سمعت صوت الحمام يتبطل عزكم الله وطلع منه سامي وهو مبدل هدومه ...دخل الغرفة ومطنشني على الأخر ومر من جدامي وقال وهو ينسدح ..
سامي: لا تعبين عمرج ماني ماكل ...
وتلحف ...
حطيت الصينية على جنب وقلت ..
هناء : عمي موصيني عليك ..لازم تاكل توك طالع من المستشفى ...
مارد علي ...تنهدت بصوت مسموع ..وقلت بسري ...ربي استعنت بك على الشقاء ...
قلت باصرار ..
هناء : ماني طالعة من هني إلا وانت ماكل ..
مارد علي وتعدل بنومته ...هني مسكت انا اللحاف وبعدته عن ويهه وقلت وانا اطقه بجتفه واقول بعصبية ..
هناء: طالعني ...
تأفف وقال وهو يلف لي ..
سامي: نعم ؟؟ خير ؟؟
هناء: ماتبي تاكل عشان انا موجودة انا بطلع ..بس اكل عشان صحتك تبي تموت روحك ؟؟
تعدل بقعدته وقال ..
سامي: اطلب منج طلب ..
قلت بفرح واخيرا ..
هناء : آمر ..
طالعني بضيق وقال ..
سامي: تدلين الباب ؟ طلعي برة ..
ورد تحلف .. حسيت بالأهانة ...خليته وطلعت من الغرفة وفرغت بالصالة .. طلعت كل همي والمي ...
بغبائي خليته يكرهني ...
نمت على القنفة ... بطلت عيوني واستوعبت انا وين ... قعدت وفركت عيوني ...سمعت حركة داخل المطبخ .. قمت وحركت ريولي للمطبخ ...شفته واقف يبطل جبنة شرايح ...
ما انتبه لي ...دخلت داخل وقلت ..
هناء: انا بسويلك ...
بس مارد علي ... كمل شغله ولا حتى طالعني ... تحرك ناحية الجلاصات واخذ جلاص ..مسكته انا وقلت بصراخ ..
هناء : انت وبعدين معاك ؟؟؟ لمتى هالعناد ؟؟ انا خلاص مليت ..
بعد ايدي بدفاشة ومارد علي ...طقيت الطاولة بقهر وقلت ..
هناء: حيل زعلان ؟؟ انا بعد زعلانة ومجروحة ..
هني لف لي وقال ..
سامي: والله ؟؟ صج ؟؟ مجروحة من شنو بالله ؟؟
قلت ابرر ..
هناء : يعني شنو تتوقع مني لما اكتشف انك تحب وحدة ثانية ؟؟
طالعني ببرود وقال ..
سامي: ميتة ...تغارين من وحدة ميتة ؟؟
بغيت اتكلم بس هو قال ..
سامي: بعدين اصلا هاذي مو غيرة ..انتي ما تغارين علي ... انتي لقيتي سبب عشان تسوين كل هذا ...واسمحيلي اقولج السبب تافه ..
انصدمت ...الحين انا شويت كل هذا عشان اسوي جذي ؟؟
تجدمت منه حيل ليما صرت يمه بالضبط ..
هناء: منو قال ؟؟ شنو تسمي هذا بالله ؟؟
لف لي وسند على الحنفية وقال ..
سامي: اسميه مبرر ...انتي اصلا تدورين علي الزلة عشان تطلقين ..
اتطلق ؟؟
هناء: الحين هذا اللي فسره مخك ؟؟ انا مابي اتطلق لو ابي كنت طلبت منك وافتكيت ...
قرب مني وقال بخبث ..
سامي: طلبتيه قبل هالمرة بس رفضت ...ولا اذكرج ؟؟
قصده على اللي صار قبل ...قلت ..
هناء: انت ليش تلف وتدور على هالسالفة ؟؟ انت مو سامحتني عليها ؟؟ ليش ترد على نفس النقطة ؟؟
قال بعصبية ..
سامي: لأنها محور حياتنا كله ..لو ماسويتي اللي سويتيه ما كنت عاملتج بهالطريقة ولا زعلت منج ولا ..
تنهدت وبعد خصلة من يبهته بضيق وقال يحاول يكتم اللي بداخله ..
سامي: هناء...بليز ...خليني استوعب على الأقل اللي سويتيه ..
نزلت راسي بحزن ...وانسحبت من المطبخ ... رحت الغرفة وقعدت فيها ... احس روحي مشوشة ...
ماني عارفة اللي صار بصالح منو ؟؟؟
لاهو بصالحي ولا صالحه ..انا اصلا ما اعرف سامي شنو يفكر فيه ولا حتى اعرف اشلون يفكر ...
اخذت هدومي ورحت الحمام عزكم الله ابدل ... رديت للغرفة ..اقصد الغرفة الثانية ...اذن هني الفير وصليت ونمت ...
بطلت عيوني حسيت روحي مكسرة .. اخذت شور على السريع ...وطلعت للصالة .. لقيته يتكلم تلفون ..
سامي : انزين تأكد منه ..
راقبته عدل ...
تنرفز وقال ..
سامي: عادل ...انا مو كل مرة اعلمك الطريقة ...
رفع راسه للسما بضيق ...قال ..
سامي: اوكي .. خلاص ..
وصك السماعة بقهر ..وقف وراح للغرفة وطلع منها بظرف ثواني وهو مستعيل ...قلت ..
هناء: وين وين ؟؟
لبس جاكيته وقال..
سامي: بروح الدوام يبوني ضروري ...
وطلع ...ما مداني اقوله شي اصلا ...بغيت اعتذر له واقعد معاه قعدة ابين له مشاعري ناحيته ...بس الله مو كاتب لنا ...
اخذت سويجي ونزلت بروح الجامعة ... لما خلصت وانا بالطريج دقيت على سامي ...مايرد ... افففففف..
ردت بيتنا وانا متضايقة ومقهورة ... من كلمة صارت امس ...كأنه يطردني من حياته مو بس من البيت ..
دخلت لقيت البيت لقيت البنات هناك ...ومسوين البيت حوسة ..سوالف وضحك وكيك ...
ولأني مالي خلق احد ..صعدت فوق بس وقفتني خلود ..
خلود : يلا هناء تعالي ...اختج مسوية حفلة يابت درجة كاملة بالإمتحان ...
مالي خلقكم ..رجاء خلوني ...بس لا حياة لمن تنادي ..يرتني انتصار وخلتني اقعد ...وهم يسولفون وانا عيني على التلفون انطره يدق بس ما دق ..
ليما تبطل الباب ودخلت اللي ما تتسمى ...
نزلت راسي باحباط ..كملت السالفة ...قمت انا وصعدت قبل محد يلاحظني ... دخلت غرفتي ...ابي اختلي بروحي ..
ابي اعرف اللي رقعته هذا وادور له حل ...
دق هني تلفوني وكان سامي ...رديت عليه وانا مو مصدقة ..
هناء: هلا سامي ..
سامي: وينج ؟؟ لقيت الشقة فاضية ...
ابتسمت على الأقل سأل عني ...فقلت ..
هناء: انا في بيت اهلي انطرك تدق بـ...
قاطعني وبهدوء ..
سامي :احسن ...خلج في بيت اهلج ترتاحين جم يوم وانا بعد ... مع السلامة ..
وصك ...
صك آخر باب للأمل ...
صك على احلامي ...
انهرت على السرير بضعف مو مصدقة ...
وبجيت ...بجيت حيل ....
كله مني ...كله مني ...
ظليت حبيسة غرفتي ...مر وقت طويل ... ماادري جم ساعة ..
حسيت بصداع ...مسكت راسي الملم افكاري ...الملم شتات روحي ...
نزلت تحت بعد ما هديت ... ورحت المطبخ ادور لي على بندول ...
المطبخ تحت غرفتي بالضبط .. يعني هذا انه يطل على الحديقة الورانية ...الدنيا ليل ..
لمحت احد واقف برة ...رحت للدريشة وشفت اللي ما تتسمى عالية واقفة تحجى تلفون ... رديت اخذت البندول وطلعت من المطبخ لا يرتفع ضغطي اكثر ...
شفت الصالة فيها بس اسما وانتصارقاعدين يطالعون تلفزيون ..قعدت معاهم لعلي انسى ..بس مو قادرة ..
قمت لا تنزل دموعي بس شفت انتصار تستأذن سلمت علي وراحت ...وعند الباب شافت عالية داخلة سلمت عليها ...
دخلت عالية ..وقالت تسوي روحها متفاجأة..
عالية: وييي ..روحوا ..
قالت وهي ياية تاخذ جنطتها ..
عالية: خلاص عيل ..مع السلامة ..
دق هني تلفون اسما واشرت لعالية مع السلامة ..وراحت فوق ...
طالعتني هي وقالت ..
عالية: مع السلامة قلبي ..
وابتسمت بطريقة تستفز ...قلت ..
هناء: الله لا يسلمج .. قلبي ويهج برة ..
شهقت وقالت بتمثيل كأنها متفاجأة ..
عالية: تطردني ؟؟
وردت لطبيعتها وقالت ..
عالية: ما عليه ...بتشوفيني وايد ترى ...باي ..
وطلعت من الباب ....
لحقتها للباب ووقفت عنده وقلت ..
هناء: لا تردين مالت على هالوية ..
لفت لي وقالت ..
عالية: لا يا قلبي لا تعصبين ترى العصبية مو زينة لج ...
قهرتني ... مشيت لعندها وقلت ..
هناء : إذا تبين سلامتج اختفي من جدامي الحين ..
قربت مني وقالت بدلع ماصخ ..
عالية: إلا ما قلت لي ...اشلون الصور ؟؟
بطلت عيوني على وسع ....تنفست بسرعة من الغضب كملت هي تقرب مني ..
عالية: تراج حلوة بالصور تصدقين ؟؟
هني ...ما قدرت اتحمل ... رفعت ايدي وصكيت كف فريت ويهها ...لفت لي وهي مصدومة وايدها على خدها ..
عالية: صج انج حقييييرة ..
لا هاذي بتموت على ايدي ...
هجمت عليها مثل اللبوة ..ومسكت شعرها وعطيتها من اللي يبرد القلب ...طحنا على الأرض اثنيناتنا وانا فوقها ...
بكسات ..طراقات ...زنط ...كل اساليب استخدمتها ... عشان ابرد حرتي ...
هناء: انا تقولين لي جذي ؟؟؟ والله ما اخليج ..
ومسكت شعرها المصبوغ وشديته بأقوى ما عندي ... وجم طراق وهي تحاول تدافع عن نفسها بس انا ما عطيتها فرصة ...
وكنت اصرخ معصبة وهي تصرخ عشانها تتألم ...
ماحسيت إلا بايد تمسكني وتقومني من فوق عالية ...
" هناء...هنااااء بس خلاص .."
وانا احاول امسكها واقول ..
هناء: خلوني ...خلوني عليها ..النذلة ...ياالحقيرة ... انتي ما تستاهلين تكونين بينا ...
قامت هي ووقفت وقالت وهي تبعد خصل شعرها عن ويهها ..
عالية : انتي مينونة ...مينونة ...
هني فلت من ايد اللي ماسكنيواعتقد اسما دزيتها بعيد ونطيت عليها مرة ثانية ..وطحنا على الأرض وصراخنا واصل لأخر الشارع ...
هناء: انا بعلمج الينون على اصوله ...
وزنطتها ...

واصوات من حولي وايادي تمسكني بس مو قادرة ابي اطلع حرتي فيها ... اخيرا وقفت لأن في احد شدني ..وماسكني من خصري ومن ايدي ...
قلت وانا ابجي ..
هناء: بذبحج ...صدقيني بذبحج ...
حاولت اتملص من ايده بس مو قادرة ...
هناء: خلني ...ابي اذبحها ...خلني ..
لف سامي لعالية وقال بأمر ..
سامي: طلعي من هني ...
بس هو وقفت فقال بعصبية ..
سامي: طلعي ما تفهمين ؟؟
يرتها اسما واختفوا...بس انا نطيت ابي امسكها ..مسكني سامي هني وكان مطوق ايده على وسطي يمنعني ...
سامي: بس خلاص ..هناء..
قلت وانا انهار واطيح على الأرض ..
هناء: خلني ...خلني ...حرام اللي تسوونه فيني حرام ....
وسندت ايد على الأرض وويهي للأرض ودموعي تنزل ... مسك سامي راسي وحطه على صدره ...
سامي: اششش...اهدي اهدي ...
غمضت عيوني وقعدت ابجي بصوت عالي....
بعدها هدا بجيي ...وقفني وخذاني لسيارته ... قعدنا داخل ...بس ظلينا ساكتين ....بعد ما مر وقت ثال سامي ..
سامي: هديتي ؟؟
هزيت راسي بايجاب ...ولفيت للدريشة ...مسكين عباله اني بهدا جذي ...
سامي: اشفيج قلبتي مفترسة فجأة ؟؟
مارديت عليه بس لفيت له وطالعته وانا مالي خلق ...شفته يبتسم ...لفيت وانا اتنهد ...
هناء: عجبك اللي شفته ؟؟
ضحك ... شفته العجب !!! يضحك!!!!
لفيته له وقلت متفاجأة ومنصدمة ..
هناء: تضحك ؟؟؟
قال ببساطة ..
سامي: وليش ما اضحك ؟؟؟
من هول الصدمة ما رديت ...قال ..
سامي: هناء عمري ...خلاص انسي عالية وطوايف عالية ..واللي صار هذا المفروض ما ينعاد مرة ثانية ..
ما ينعاد !!!!!
قلت وانا اسوي حركة مينون ..
هناء: اشفيك انت مينون ؟؟؟ ياية لبيتنا وتهيني وتبيني اسكت لها ؟؟
قال بعقل ..
سامي: ادري ..بس انا قلت لج عالية هذا اسلوبها ...تبي تستفزج ..وكاهي نجحت ...
روح انت بعد ...انا بروحي لابعة جبدي ...لفيت ويهي عنه بضيق وملل ..مسك ايدي وقال ..
سامي: حبيبي ...بس عاد ...خلاص انسي ..
لفيت له وقلت ..
هناء: انسى شنو ؟؟ طردتك لي ؟؟
سامي: انا ما طردتج ..انا قلت نرتاح من بعض جم يوم ..
سحبت ايدي وقلت ..
هناء: واشحقة ياي عيل ؟؟
ابتسم وقال وهو يمرر ايده على خدي ..
سامي: ما قدرت ...ييت اشوفج ..بس شفتج قالبة الشارع حلبة مصارعة ..
وضحك بخفة ...
ماقدرت وابتسمت ..ابتسمت من بين براكين الغضب اللي ثارت ...
مسكت ايده وقلت ..
هناء: مسامحني ؟؟
هز راسه وهو يبتسم ..
موافقته نورت الأمل في حياتي وقوت عزيمتي ... وردتني فرش مرة ثانية ...
شغل سامي السيارة ورحنا البيت ...

الحلقــة الحادية والعشرون
"هذا ما كان ينقصنا "


ردت حياتنا عادي ... مثل اول ...انا اصلا ماادري شنو اللي خلاني اقلب وحش فجأة على ساميواهد البيت واطلع ..وامد ايدي على ما الخبلة عالية ...
بس تصدقون ؟؟؟ ههههههه شكلنا تحففففة ... مو ناقص إلا حكم بينا ... بس صج نرفزتني وخلتني اطلع من طوري ...ذكر الصور بروحه يطلع عفاريتي ..اشلون من وحدة كريهة مثل عالية والله ادفنها ...لو ما مسكني سامي كانت الحين عالية بين الوفيات ...كنت فكيت العالم من شرها هالحية..
دخلت البيت وانا مستانسة حليت عدل بالإمتحان شفته موجود ...استغربت ... اشفيه ؟؟
قلت وانا احط الكتب على الطاولة واروح لسامي المنسدح على القنفة ..
هناء: انت مو رحت الدوام ؟؟
لف لي وقال وهو يقصر على التلفزيون ..
سامي: بلى رحت ...بس رديت ..
رحت ورديت !!
هناء: ليش ؟؟
قال بدون اهتمام ..
سامي: تعبان شوي ...
طالعت ويهه اللي شوي شاحب واصفر صاير ... لاحظ نظراتي فلف لي وقال ..
سامي: اشفيج ؟
هناء: حاس بشي ؟؟ صداع دوخة ؟؟
هز راسه يطمني وقال ..
سامي: لا لا ...لا تخافين مافيني شي ..بس تعب بسيط ...
طالعته كنظرة اخيرة ورحت الغرفة ...تسبحت على السريع ورحت المطبخ اجهز الغدا ...ولأني طالبة جامعية فاضطر اني اسوي العشا بليل واطبخه الظهر ...بس بسرعة طبعا ...
بعد ساعة كل شي جهز ...فرشت على الأرض ...
هههههه..من اول ما يينا الشقة عودته ان الأكل على الأرض ... قعدة الأرض صحية اكثر ...
قعد وهو ساند ظهره على القنفة ... وقال ..
سامي: انا ماادري شلي مخلينا نقعد على الأرض ؟؟ قعدة الطاولة اشحلاتها ..
ابتسمت وقلت وانا احط له بالصحن ..
هناء: مافيها شي ... قعدة الأرض احلى بوايد ..
وميدت له واخذ وقال ..
سامي: بس معاج حق الرسول عليه الصلاة والسلام كان ياكل بالأرض ..
هزيت راسي وقلت ..
هناء: حمدلله تعرف ..اشحقة تفلسف عيل ؟؟
ابتسمت وبدا ياكل ولو اكله خفيف هالأيام ... ماادري اشفيه ..
قلت وانا اتذكر موضوع عالية وطلال ..
هناء: سامي ..
قال بدون ما يطالعني ..
سامي: اممممم..
هناء: موضوع طلال وعالية ...
وسكت لأنه رفع راسه وطالعني ...فقال ..
سامي: مو بايدي هالموضوع هناء...اخوج عاجل وهو رح يفهم ..
قلت بخوف ..
هناء: بس انا مابي يتزوج عالية ...وانت تعرف ليش ...
نزل راسه حسيته تفشل منها ..وقال ..
سامي: اشتبيني اسوي ؟
قلت ..
هناء: كلم طلال ..رح يسمع منك انت لأنك واحد من اهلها ...
وقال وهو يمسك جلاص الماي ..
سامي : واقوله ان عالية مو زينه وهي رايحة فيها واطلع بلاويها ...صح ؟؟
حسيته يتطنز فقلت ..
هناء: سامي لا تاخذ الموضوع بهالحساسية ..انا قلت لك حاجه مو علمه عن سوايا عالية ..
شرب شوي بعدين قال..
سامي: واشلون بالله بيهد عالية ؟؟ مو المفروض يعرف عنها ؟؟ رح يسألني ليش بالله مو راضيين عنها ؟؟ وشقوله حزتها ؟؟
ونطر مني اقوله الحل ...قلت ..
هناء: حزتها قوله الصج ...
طالعني رافض الفكرة وقال ..
سامي : لا والله ؟؟ هناء عالية من اهلي ..وانا مااقدر اقول عنها شي ..بروحها فاضحة عمرها بعد انا ايي واكمل ...لأ لأ ...شيلي الفكرة من راسج نهائيا ..مو انا اللي يعلم على اهله ...
هناء: انزين اشلون نخليه يكرهها ؟؟
قال بهدوء وهو يقوم ..
سامي: بيعرف صدقيني ..بتفضح روحها يوم من الأيام وبتطيح بشر اعمالها ...
قلت وان ارفع راسي واطالعه ..
هناء: وننطر لين ما تطيح بشر اعمالها !!! يكون طلال تزوجها وياب منها يهال ...
تنهدت وقال ..
that all what I have.سامي :
ومشى...اففففففففف الله ياخذ يا عالية ...لو ذبحتج ذاك اليوم كنت ارتحت ...
قمت وشلت الصحون والمواعين ..ورحت المطبخ اغسلهم ...
تذكرت لما ياني طلال معصب ليش اني تهاوشت مع عالية ...بس رفضت اقوله السبب .. فقال وهو طالع معصب من الشقة ..
طلال: انتي اصلا من اول ما تزوجت وانت متغيرة ...انا ماادري غيرج علينا سامي ولا شنو ؟؟
انصدمت قلت بعصبية ..
هناء: طلال ..سامي ماله شغل بالسالفة ...انا ماابيك تتزوجها ...هاذي وحدة واطية ...
طق الباب بقهر وقال ..
طلال : انزين قوليلي شي مقنع ..تقولين وحدة واطية وتسكتين ...
" الماي ...خسرتيني "
انتبهت على هالكلمات ..ولفيت لسامي الواقف يمي ويصك الحنفية ...
سامي: إذا انت سرحانة الماي ماله شغل ترى ..
طالعته وابتسمت وقلت ...
هناء: خايف على فلوسك لا تخاف انا بدفع ..
قال وهو يمسك احد الصحون وينشفها ..
سامي: قاعدة على بنك الأخت ...ادري ادري من كثر فلوسج البنوك فاضت ...لا الله يخليج لا تقولين تراني بصكج عين ..
ضحكت على اسلوبه ..وقلت ..
هناء: تطنز ؟؟ الفلوس مو كل شي ..
هز راسه ومد ايده لي مع الصحن ..
سامي: ئي مو كل شي بس مو معناه نلعب فيها ...
عطيته ظهري وكملت غسيل الصحون ..
هناء: ما عندك مكتب اليوم ؟؟
تنهد وقال ..
سامي: بلى ...بس مالي خلق اروح ..
هناء : لسة حاس بتعب ؟؟
شفته يحط الصحون اللي نشفها بمكانها ..وقال .
سامي: لا ..الحمدلله مافيني شي ..بس ماادري ..
وتنهد ...وكمل ..
سامي: قلبي ناغزني هالأيام ماادري ليه ..
وقفت عن الغسيل وصكيت الماي ولفيت له لقيته يطالع دريشة المطبخ وهو سرحان ...تجدمت منه بهدوء وحطيت ايدي على جتفه وقلت ..
هناء: ان شاء الله خير .. يمكن خوف بدون سبب ..
نزل راسه وقال ..
سامي: ان شاء الله ...انا مااطلب من الله إلا السلامة وحسن الخاتمة ...
حسن الخاتمة !!!
قلت بخوف ..
هناء: انت اشحقة متشائم ؟؟ ان شاء الله خير ..
قلتها بعصبية شوي مع خوف ..لف لي بعدين ابتسم وقال وهو يطالع ايدي ..
سامي :شيلي ايدج ...خربتي هدومي ...
وبعدها بقرف .. فطقيته ...ضحك ...رحت للحنفية وبطلتها وقلت وانا ارش عليه ..
هناء: خبل ...بس فالح تخرعني ..
ورديت اغسل بس ما خلاني رش علي ..وقعدنا بالمطبخ نلعب جنا يهال ... وبالأخير طبعا هو اللي فاز ..
قال وهو يشد شعري ع الخفيف ..
سامي: يلا يلا جاندرا خلصي ..نظفي ...
وطلع من المطبخ منحاش قبل ما اكفخه بشي ...
سمعته يودعني قبل ما يطلع المكتب ...
العصر قعدت طول الوقت ادرس للأمتحان الثاني ..ما حسيت إلا المغرب ... صليت ورديت ادرس ..ليما حسيت الباب تبطل ...
سامي: السلام عليكم ..
وقعد ..
هناء: وعليكم السلام ...هلا حبيبي ...
وطالعت الساعة لقيتها ثمان ونص ... رديت اكتب ...وهو خلاني وراح داخل ..غاب فترة بعدين رد مغير هدومه ... وقعد طبعا يساعدني بدروسي ...ولما خلصنا قال ..
سامي: كل حرف قلته دفعي عليه يلا ...اعطي دروس خصوصية ببلاش ؟؟
قلت وانا ابعد ايده ..
هناء: ما عندي ..وثانيا غصبن عنك تعطيني ..مو مرتك ؟؟
قال يتطنز ..
سامي: الله يخليج متزوج جينفر لوبيز ..ولا نيكول كيدمان ...
قلت ارد عليه ..
هناء : اشدعوة انا اللي متزوجة توم كروز ولا براد بيت ؟؟؟
ضحك علي وقال ..
سامي: لا غلبتيني هالمرة بس انا احلى منهم ...
وعدل روحه وشعره ...فقلت احبطه ..
هناء: لا تحاول ...انت اصلا ما تيي صوبهم ...
وطالعني نظرة ضحكتني ....رحت داخل اسوي العشا ..رديت معاه وتعشينا ...
اليوم الثاني ..
رحت عند امي بعد ما خلصت دوامي ...طبعا بعد الغدا ..
امي: سمعت انج رافضة ان طلال ياخذ عالية ؟؟
رفعتراسي لها وقلت ..
هناء: ئي ..انا ماادري شنو اللي خلاج ترضين تاخذين هالبقرة حقه ..
قالت امي تدافع عنها ..
امي : انتي ما تقولين شنو شايفة عليها ؟؟ اشحقة تهاوشت معاها اصلا ؟؟
بغيت اقول بس تذكرت سامي ...هي من اهله واللي يضرها يضره ..وإذا تكلمت عنها اكيد اكون سبيت سامي ..
تنهدت وقلت بطريقة ثانية ..
هناء: يما ...عالية مو حلوة ..لا شكل ولا اخلاق ..واكبر دليل اهانتني في بيتي اكثر من جذي شنو ؟؟
امي : انا سألتها عن سبب الهوشة ..قالت انها كانت تكلمج بهدوء بس انتي تنرفزتي ومديتي ايدج عليها ..
كلمتني بهدوء صح بس لو تدرين شنو قالت لي ..لفيت عنها وسكت وانا مقهورة ...لو تكلمت امي بتعرف كل شي ..وهذا اللي ماابيه ..
بس قالت ..
امي: ولا اخوج مو قد المقام ؟؟
لفيت لها مو فاهمة وقلت ..
هناء: شنو ؟؟
امي : طلال يقول ان ريلج مو راضي ..لما ياه يخطبها منه ...
هناء: سامي موراضي لأنه ..
وسكت ..غيرت طريقة كلامي وقلت ..
هناء: يما عالية مو زينة اصلا ...
قالت بعصبية ..
امي : ئي شنو فيها ؟؟ شايفة عليها شي ؟؟ صايعة ؟؟
افففففف ...
ظلينا طول الوقت على هالسالفة ... ليما دق علي سامي وقالي انه رح يقعد مع طلال شوي ونروح البيت ..
استانست ...بيكلمه ..ان شاء الله يعقل وتطلع من باله هالخبلة ...
بعد ساعة من مفاوضات واخذو العطى بيني وبين امي ...اصرت امي على رايها ...
قلت وانا واقفة معصبة ..
هناء: طلال ما ياخذ عالية لو على جثتي ..
وطلعت ..دقيت على سامي ..بعدها طلع من الديوانية ..وشكله وصل لنفس النتيجة اللي وصلت لها ...
طلع طلال من الديوانية وقط علينا نظرة غريبة ...فقلت اناديه قبل ما يدخل البيت ..
هناء: طلال ..
لف لي وياه صوبي ..
قال سامي يساسرني ..
سامي: بس هناء كافي اللي صار ..
بس اصريت ..وصل طلال عندنا وقال وهو لاف ويهه عنا ..
طلال : خير ؟؟
هناء: انت لسة مصر عليها ؟؟ ما شلتها من بالك؟؟
مارد ... كملت وقلت ..
هناء: عالية ما تصلح لك ..
لف هني وقال ..
طلال : ليش بالله ؟؟ عشانها غنية وبنت اكابر ؟؟ ما انت متزوجة واحد مليونير ومحد كلمج ..
طالعته متفاجأة من اسلوبه ..
هناء: يالله انت اشلون تفكر ؟؟
طلال : والله هذا الصج ..
طالعت سامي ابيه ينقذني ..فقال سامي ..
سامي: طلال ...البنت انا اعرفها ..واسمح لي ما اقدر اقولك اكثر من جذي ..
قال طلال ..
طلال : تعرفها من وين بالله ؟؟
سامي: مو بنت خالتي اكيد بعرفها ... متربين مع بعض احنا ..
مارد طلال بس اكتفى بأنه قلب ويهه عنا زعلان ...
قال سامي .
ok …as you like.سامي:
وحركنا للبيت ...
ظلينا جم يوم بين كر وفر ...نحاول نثني طلال عن رايه ..وامي تزيدها وتشيشه علينا ...
وقفت انا بين الكل وقلت بعصبية في بيت ابوي وامي وطلال وسامي موجودين..
هناء: مستحيل تتزوجها ...لو على قص رقبتي ...
وقف طلال وقال يدافع ..
طلال : بتزوجها عناد فيج انتي عاد ..شتقولين خبل ...
قالت امي ..
امي: مارح نقتنع لين ما تقولين شي يدخل الراس ...
قال سامي يهدي الوضع ..
سامي: يا جماعة هدوا مو جذي تنحل السالفة ...
لف طلال لسامي وقال ..
طلال : اشلون تنحل بالله استاذ سامي ؟؟
لو انا طريقة طلال ما عجبتني ولا عجبت سامي بس قال ..
سامي: طلال عمتي ...عالية مو زينة ...مو ...
تنهد مو عارف شنو يقول ..فكمل ..
سامي: انا اعرفها ...وحدة تفكيرها اكبر من ان ...
وطالع طلال وقال ..
سامي: اسمح لي على هالكلمة بس تفكيرها اكبر من انها تاخذك ...هي ما تبيك وانا اعرف هالشي ..
وقفت امي هني وقالت تدافع عن ولدها ..
امي: ليش قالت لك هي ؟؟ ولا قلت جذي من كيفك ؟؟ ولا اخاف مو عاجبينك ؟؟
انصدم سامي من طريقة كلام امي فقال يتخبط بالكلام ..
سامي: عمة ..انا ما قلت شي ..بس ..
قاطعته امي وقالت .
امي: لا تقول ولانقولك ...اخوها بيي من السفر ونخطبها ...
طالعني سامي فقلت بقهر ..
هناء: يماااا ...الحين احنا نقولج عالية مو زينة تروحين تخطبينها ؟؟
قال طلال ..
طلال : ئي بنخطبها ..وبعدها محد يتكلم ويشوف روحه علينا ...
وطالع سامي ... وامي بعد عطته نفس النظرة..
انصدم سامي ...ونزل راس للمفاتيح ..وقام وطلع من البيت ...
قلت بصراخ ..
هناء: ارتحتوا ؟؟ كاهو زعل ...
وطلع الباب وصفعته بقوة ...قهروني ...
لحقت سامي بسيارتي ورحت البيت ...دخلت الشقة مالقيته ..وبعد لحظات لقيته داخل الشقة ...
قال وهو يبطل يحط مفاتيحه على الطاولة ..
سامي: يما ..متى ييتي انتي ؟؟
قلت بسرعة ..
هناء: سامي ..لا تزعل من اهلي مو قصدهم ..
ابتسم بحزن وقال وهو يطلع تلفونه ..
سامي: لا عادي ...ما زعلت ..
بس عيونه تقول شي ثاني ...
قلت وانا زعلانة على الحال اللي وصلنا لها ...
هناء: احط لك عشى ..
رفع راسه وحك شعره وقال ..
سامي : لأ ..
ورد للتفلون ..ومشى داخل ...
انا ماادري طلال شنو شايف بهالعلة .. طقيت الكرسي افكر ... اشلون اقدر ابعدها .. دخلت داخل ابدل ..
شفته يتكلم بالتلفون ..دخلت اخذ هدومي ..
سامي: صج ؟؟؟ مبروك ... شنو سميتهم عاد ؟؟
(......................)
ابتسم وقال ..
سامي: يتربون بعزك يا بو احمد ..عاد خلاص من اليوم ورايح بنديك بو احمد اشتبي بعد ؟؟
(......................)
سامي: لا تو الناس ..توني متزوج ما صارلي سنة ..
(......................)
ضحك سامي وكان ودي اعرف يضحك على شنو بس اخذت هدومي وطلعت ...بدلت ورحت المطبخ اسوي لي شي اكله بس اسدت ننفسي بالأخير وخليت كل شي وطلعت رحت الصالة شغلت التلفزيون وقعدت اطالع اي شي ...
ياربي هالموضوع هذا مو راضي يطلع من بالي ... ماادري احس بتكون نهايته جايدة ...يارب ما يصير شي انا ماابيه ..
اللهم اني لا اسالك رد القضاء ولكن اسألك فيه ...
شفته يقعد ويقول ..
سامي: شنو قاعدة تطالعين ؟؟
قلت بدون اهتمام ..
هناء: برنامج ما ادري عن شنو ...
وغمضت عيوني ...قالي ..
سامي: روحي نامي مبين عليج نعسانة ...
مو نعسانة متضايقة مقهورة ...
هناء: كنت تبارك حق منو ؟؟
قال وهو يبتسم ..
سامي: ئي ..هذا عامر ...مرته يابت توأم ...
انصدمت من الخبر ..تذكرت ان لما سافرت شيخة كانت حامل ...فرحت لها بس بنفس الوقت حزت بخاطري هالسالفة ...
كان ودي احمل ..صارلنا ست شهور من تزوجنا ولاشفت حتى علاماتها ....
سامي: الحلو شنو يفكر فيه ؟؟
انتبهت عليه وقلت ..
هناء: ولا شي ...
وسكتنا ..رفع سامي صوت التلفزيون ..وقعد يطالع ... اما انا ...ظلت الفكرة في بالي ...الحمل ...
كل شي بايد الله سبحانه بس ليش مااحمل ؟؟
قلت وانا متشككة ومترددة ..
هناء: سامي ..
yub.. سامي:
هناء : ااا..انت ..ما تفكر ...
قاطعني ..مامداني اقول شي وقال ..
سامي :لأ ..ما افكر باليهال الحين ...
فاجأني بس قلت ...
هناء: ليش ؟؟
قال بلا مبالاة ..
سامي: بس جذي ...
سكت وما اعقبت ...
بس انا ودي بياهل يملي علي حياتي ...صج ان سامي مو مقصر بس انا ابي ...