8:15 الصباح ..اليوم التالي..
شقة ليال ..البلكون..
البحرين
البارح من اروع الليال الي قضيتها مع حبيبي.. من احلاها على قلبي.. سعادتي ما اقدر او صفها.. وحاله هو بعد ما اقدر اوصفه.. سعيد مبسوط قليله على المشاعر الي بانت عليه.. كنت غبيه الي حاولت اخبي عليه.. بس وش اسوي الخوف سكني.. صحيت بدري اليوم وكلي نشاط
ليال على التلفون: هلا خالتي
ام عبداللطيف: هلا يما صاحيه
ليال: ايوا حبيبتي صاحيه
ام عبداللطيف: وزوجك وين؟
ليال: نايم فيكي شي!!
ام عبداللطيف: أي يما.. سمعي اذا لقيتي وقت مري علي انا وخالتج ام لينا نبيج بموضوع مهم
ليال بخوف: حاضر
من تزوجت جراح مارضيت خالتي ام لينا ترجع على بيتها.. كنت ابيها جنبي وجنب بناتي.. ما بلاقي احن منها علي وعلى بناتي.. قالت دام جراح بيكون في الشقه معاي اكيد ماراح يكون لها قعده عندي.. فخليت لها شقه جنب شقة خالد هي وخالتي ام عبداللطيف ولمى.. واسمها قريبه مني واسمي بكون بحضنها.. والاهم انو لينا قدام عينها.. دخلت غرفتي ولقيت جراح بدا يصحى
جراح وفيه النوم: حبيبتي صحت بدري اليوم
ليال: حبيبي انا بنزل لشقة خالتي ام عبداللطيف داقه علي تبيني
جراح يقوم: خير في شي
ليال تلبس غطاها: لحد الان ما ادري
جراح: فطرتي
ليال بدلع: ماني مشتهيه الاكل الان.. اشوف خالتي وارجع لك.. ما اقدر ابتعد عنك
جراح يحضنها: ماراح افطر لحد ما تجيني.. بستناكي ياروحي
مشيت عنه.. وما ودي اتركه.. هالوحم غريب.. هالاحساس الي داخلي اغرب.. كنت اسمع البنات يتكلمو عن هالموضوع بس ما توقعت ابد اني اطيح فيه.. نزلت تحت.. وفتحت خالتي ام لينا
ام لينا: هلا يما
ليال: هلا حبيبتي.. خير مالكم
ام لينا: حياج يما الحين نقول لج
ام عبداللطيف تطلع من غرفتها: هلا يما زين الي جيتي
ليال: خير يا خالتي ايش صاير
ام عبداللطيف: امس يا يما بطلع من هالشقه ورايحه اشوف شقة العيال اصحيهم.. طلعت ولقيت حرمه عند باب لبنى.. وفي يدها غرشة ماي
ليال مستغربه: يعني ايش؟!!!!
ام عبداللطيف: انتبهت لي وخبت الي بيدها عني مع اني شفتها.. سألتها من انتي.. قالت انها غلطانه في العنوان
ليال تبتسم: طيب غلطانه في العنوان
ام عبداللطيف بجديه: هذي ام خالد يا يما
ليال: وكيف شافتك وقالت لك غلطانه في العنوان.. هو انتي اول مره تشوفينها!!!!
ام عبداللطيف: كانت متغطيه يا يما
ليال: يمكن ماهي هي
ام عبداللطيف باصرار: هي يا يما.. غشيمه عن صوتها انا
ليال تشوف ام لينا: ما فهمت.. طيب ليه متغطيه
ام لينا: اليوم انا طالعه عشان اوصل البنات للسياره حتى يروحون المدرسه.. لقيتها يا يما ترش هالماي الي خالتج تقول عنه قدام باب لبنى
ليال فاتحه عينها: بعد ما فهمت!!
ام عبداللطيف: غرشة الماي ورشه على الباب ماراح يكون غير سحر يا يما
ليال تفز: اعوذو بالله اعوذو بالله ايش تقولي
ام عبداللطيف: عاد هذا الي صار
ليال: يما انتي كلمتيها
ام لينا: اكيد كلمتها قلت لها انتي مين وكنت معصبه عليها.. تركتني ونزلت على الدرج
ليال: الله واكبر الله واكبر
ام لينا تجلسها: اهدي يما
ليال بحده: كيف اهدى وانتي تقولي سحر
ام لينا: اذكري الله انتي الحين
ليال بتوتر: وكيف بنتصرف الان.. قولو لي كيف
ام عبداللطيف: لازم يكون فيه شيخ عشان يقرا ويفك السحر.. اذا مشو عليه
ليال: طيب وكيف نعرف اذا كان سحر
ام لينا: يا يما نقول لج وحده ومتغطيه جات امس وخالتج ام عبداللطيف شافتها وخربت عليها وجات اليوم وانا مالحقت عليها اش بيكون غيرالسحر
ليال تغطي وجهها: كيف بنتصرف الان كيف
ام لينا: والله يا يما لو ماهي حنان مسافره كنت ما قلت لج.. بس ماعندي خيار ثاني
ليال تدق: خوله لازم تعرف
ام لينا: قبل خوله الرجال لازم يعرفون.. هم الي المفروض يتصرفون
ليال: الو خوله.. صحي لينا وتعالو عند خالتي ام لينا بسرعه
لمى وفيها النوم: ليش هالصراخ من الصبح.. والله مفكرتكم ديما وريما
تجمعو خوله ولينا.. ولمى طارت النومه منها.. وهم يسمعون الي خالتي ام عبداللطيف تقوله.. لفت الدنيا بي من جد.. كان هذا الي قاصرني.. واحد اتهم بقضية قتل.. والثانيه زوجها قال روحو استلموها من المستشفى جثه هي وعيالها.. ووحده معتدين عليها.. وغير الي طاحت من على الدرج وسقطت ولدها.. غير هالزفت لافي وعشقه لمحارمه.. الان جا دور السحر.. ياربي ارحمني.. ارحمني ياربي
رجعنا لشقتي من جديد.. خوله فاتحه عيونها.. ولينا الدنيا تلف بها.. لمى كأنها تشوف فلم هندي.. وانا قلبي على لبنى.. من اقول اخيرا استقرت في حياتها القى العجوز خالقه هم ما ينلم لها ولنا.. انا بحياتي ما دعيت طول عمري اتحسب الله لكن الان اذا فعلا فيه سحر.. عساها الحراق.. ربي يحرقها دنيا قبل الاخره.. حسبي الله ونعم الوكيل
شوي وتجمعو الرجال كلهم في شقتي.. الي نايم والي لساه صاحي من النوم.. والي يفرك عيونه يعني بينام على حاله.. خالتي ام عبداللطيف بدت الكلام وقالت لهم على الي صار.. ثواني والكل فتح عيونه.. الكل انتبه للكلام الي ينقال.. حسيت جراح جمد بمكانه.. عبدالرزاق اخذ يكبر ويذكر الله.. احمد ساكت والصدمه باينه على وجهه.. وليد كان يضحك اثر الصدمه.. منير يحاول يهديه.. عبداللطيف قام دخل المطبخ يشرب مويه.. اول مره يعملها.. بحياته ما دخل مطبخي بس من جد كان باين على الكل انه مصدوم من الي يسمعه.. عزيز الوحيد الي احسه امتص الصدمه وفكر بعقله
عبدالعزيز يقوم: انا رايح لشيخ الجامع الي جنبنا حتى يدليني طريق احد المشايخ المختص في السحر
منير وقف: خذني معاك
عبداللطيف: واذا الي امي شافته ماهو سحر
عبدالعزيز: ماراح تضرنا قرائة القرأن بس اذا تأخرنا الي بينضر خالد ولبنى
احمد يقوم: روح لشيخ الجامع وانا بروح اشوف واحد من ربعي.. اخته مسوين لها سحر من قبل
خوله: اتصل فيه ياخوي.. لا تخلي الصدمه تأثر على عقلك
احمد: لا اختي ماهي مأثره ان شا الله بس هو مغير رقمه من زمان.. خليني الحق عليه قبل يطلع من البيت
جراح يقوم: خذني معاك
عبدالرزاق: وانا بتصل على خالد حتى مايطلع برا الشقه ويصير له شي
ام عبداللطيف: أي يما احسن بعد

&&&&&&&&&&&&&&&&&&

9:45 الصباح
في السياره
البحرين

احمد: حسبي الله عليها حرمه.. فزعتنا من نومنا عساها تنحرم لذيذ النوم
جراح: اشوفك تدعي زي العجز
احمد: يا اخي شي يشيب الراس.. ولا هذي سواة وحده رجل بالدنيا ورجل بالاخره
جراح: الله عليها
احمد: والله اذا بنسكت هالمره لها.. اقول اختربت بيوتنا وضاعت حريمنا من يدنا.. وياخوفي تتبعهم عيالنا
جراح: تعوذ من ابليس يارجال
احمد: وانت اش يدريك ان الماي الي رشت به باب خالد ومارشت به ابوابنا بعد
جراح: الي عرفته من ليال انها ما تطيق لبنى
احمد: ليت الله يخليها بيدي كنت طلعت روحها
جراح: تعوذ من ابليس.. لا تنسى خالد
احمد: بس ياخوي هذا البيت الي جنبه السياره السوده
جراح: ال بي ام؟
احمد: لا الشفر
جراح: انزل معاك؟
احمد: خلك مرتاح شوي وارجع
جراح يدق: هلا ليال
ليال: هلا ياروحي
جراح: ايش الاخبار عندكم
ليال: عبدالرزاق يدق على خالد وهو مايرد.. ولينا تدق على لبنى وما ترد
جراح: بدز احد من الرجال يكسر الباب يمكن فيهم شي داخل الشقه واحنا غافلين
ليال بخوف: تظن.. انا خايفه
جراح: توكلي على الله.. سكري الخط عبدالعزيز معاي على الخط الثاني
ليال: دق مره ثانيه طمني
جراح: حاضر ياروحي.. هلا عبدالعزيز
عبدالعزيز: اش الاخبار معاكم
جراح: احمد نزل لصاحبه ولسا ما رجع
عبدالعزيز: انا عند بيت الشيخ علي بن احمد.. الرجال مسافر وبيرجع بعد يومين.. اهله يقولون مسافر يقرا على ناس
جراح: لا حول ولا قوة الا بالله.. وبعدين
عبدالعزيز: ما ادري انتظر احمد وشوف ايش يطلع معاه
جراح: طيب برجع اتصل فيك.. عبدالرزاق معاي على الخط
عبدالعزيز: ارجع اتصلي بي طمني
جراح: ماشي.. هلا عبداللطيف
عبدالرزاق: اتصل على رجالك وخليهم يكسرون باب خالد.. قلبي ماهو متطمن
جراح: خلاص اتصل فيهم الان لا تقلق
احمد يدخل: مين معاك على التلفون
جراح: استنى شوي.. هلا رائد.. خذ معاك ثلاثه من الرجال وروح لعبدالرزاق بشقتي فوق.. اسمع ابيكم تكسرو باب.. خذ عدتك وعلى عبدالرزاق على طول.. سلام
احمد بخوف: صار شي
جراح يحرك السياره: خالد ولبنى ما يردو على تلفوناتهم
احمد بخوف: الله يستر
جراح: بشر ايش صار معاك
احمد: عطاني عنوان الشيخ يقول رقمه ضيعه
جراح: وهذا وقته عاد
احمد: توكل على الله بس.. بيته قريب ما يضيع.. شوف المسجد الي هناك.. وقف جنبه البيت الي على اليسار.. لونه بيج وبني.. مكتوب على الباب بيت الشيخ علي بن احمد
جراح يوقف السياره: ابشرك هذا الشيخ الي عزيز كان عنده.. تراه مسافر وبيرجع بعد يومين

&&&&&&&&&&&&&&&&&&

11:00 الظهر
شقة ليال ..الصاله..
البحرين

خوله تفز: بشر يا بوسالم
عبدالرزاق يدخل الشقه: شقتهم خاليه مافيها احد
عبدالعزيز يوصل: بشرو فتحتو الباب
لمى: الشقه خاليه
عبدالعزيز: والشيخ الي رحت له بيجي بعد يومين
ليال تحضن ام لينا: آه على اختي
ام لينا: تعوذي من ابليس يما.. دامهم برا الشقه احتمال ان السحر ما طالهم
وليد: الله يهديج يا خالتي.. وانتو مصدقين انه سحر
ام عبداللطيف: حتى لو ما كان سحر يا يما.. الحذر واجب
لينا: طيب اتصلو على منصور
ليال: لا نخوفه وحنا مانعرف عنهم شي
عبدالعزيز: نقول له عندنا اجتماع وخالد متأخر علينا
ليال تبكي: ما ادري ما ادري
جراح يدخل الشقه: ليه تبكين صار شي جديد
ام لينا حاضنتها: خايفه على اختها يما
عبدالرزاق: بشرو اش صار معاكم
احمد: رحنا لنفس الشيخ الي عزيز سبقنا له
عبداللطيف: وبعدين.. بنجلس جذي!!!
منير: ومافيه غير الشيخ احمد بن علي!!
وليد: منير خلنا ننزل ونروح نشوف غيره
عبداللطيف: ووين بتشوفون
وليد يمشي: ان شا الله نلف الجوامع كلها
منير يطلع معاه: يلا
عبدالرزاق يتصل: هلا والله بوخالد
منصور: بالمهلي اخباركم يا عيال
عبدالرزاق: ابشرك امورنا حلوه وتعجبك
منصور يضحك: يعني المشروع الي جبته فكرتو فيه
عبدالرزاق يضحك: الا قول خلاص بنبتدي فيه.. عاد يا بوخالد احنا مجتمعين عشان نقرر الموافقه وخالد تأخر علينا.. بيني وبينك هو له طلعات سريه مع حرمته.. اتصل فيه ومايرد علي.. عاد قلت ما اخسر شي اذا سألتك عنه
منصور: لا ما اعرف شي عنه.. من امس ما شفته
عبدالرزاق يضحك: طيب خليه يغير جو مع حرمته والله شكلي خربت عليه من كثر ما دقيت.. اقول احنا ناخذ راي الكل وننتظر خالد لين يرجع
منصور يضحك: لا تنتظره ولا شي.. اعتمد موافقته مني
عبدالرزاق: خلاص شورك وهداية الله.. اشوفك على خير
عبدالعزيز بقلق: ما يعرف عنه شي
عبدالرزاق بحزن: ما يعرف

&&&&&&&&&&&&&&&&&&

12:15 الظهر
جناح غسان ..غرفته..
السعوديه
غسان يتأملها: صحيتي ياروح غسان
العنود تبتسم: نوم عجيب غريب.. احس روحي لسا ما شبعت
غسان يضحك: ودك تنامي بعد
العنود: لا ابي اطرد هالنوم من عيني ابي اشوف ولدي واقعد معاه
غسان: للاسف ولدك نايم
العنود بدلع: وليه عاد.. تراني جالسه عشانه
غسان يسرق بوسه: صاحيه عشانه بس.. طيب والمسكين الي سهران عشانك
العنود: لاااااااااااااااا هذا عاد له روحي
غسان بفرح: يا بخته
العنود: الا قول يا بختي به
غسان: لحظه ياروح غسان ارد على التلفون .. الو
عبير: مرحبا
غسان عرفها: ايوا نعم
عبير بدلع: من معاي
غسان: انتي الي داقه
عبير: اه انا اسفه اكيد داقه غلط
غسان سكر الخط بوجهها: هههههههههههههههههه
العنود تشوفه بشك: من هذي الي ضحكتك كذا
غسان: اقول لك وتصدقيني
العنود بغيره: اسمعك
غسان يضحك: هذي عبير
العنود بحده: خييييييييييييييييير
غسان: استني استني اتصلت من جديد.. بخليها سبيكر.. الو
عبير بدلع: مرحبا
غسان: خير
عبير بدلع: من معاي
غسان: انتي شكلك فاضيه.. منين لك الرقم
عبيربدلع: لا ماني فاضيه.. انا احب
غسان بتريقه: ما شا الله حب مره وحده
عبير: تبيها اكثر من مره ماعندي مانع
غسان سكر الخط بوجهها: ايش رايك
العنود بصدمه: ماني مصدقه.. انت سجلت لها؟
غسان: اكيد بسجل لها تحسبيني بتركها
العنود: ما ابي مشاكل معاها ومع ابوها
غسان: ياقلبي انا الي بربيها لك وبربي ابوها معاها
العنود بضيق: غسان
غسان: استني ياروح غسان دقت من جديد.. وبعد بخليها سبيكر.. الو
عبير: تراني اتضايق اذا سكرته بوجهي.. تقدر تستأذن وبعدين تسكره بس كذا لا.. تراني ازعل
غسان: انتي مصدقه حالك؟!! قال استأذن الظاهر منتي عارفه قدر نفسك
عبير بدلع: ياليت تعلمني ياه
غسان: انتي وحده من الشارع.. وحده قذره.. كل يوم في حضن.. وكل يوم حضن يرميها.. اسمعيني زين.. صحيح اني ماني عارف من تكوني بس الي اعرفه ان زوجتي ملكه بأخلاقها عليكي.. من انتي ومن هيا.. تتوقعين اني اناظر وحده زيك
عبير بثقه: اوعدك تحبني.. راح تحبني اكثر منها كمان
غسان: هههههههههههههههههه الظاهر منتي ملاحظه انك زباله.. حلوه سكرت في وجهها بعد
العنود تحضنه: غسان انا احبك من جد
غسان: والله لاطلع قهري فيها.. واذكرها بالضرب الي اكلتيه من يدي.. بخليها تذوق اضعاف اضعافه.. صبرك علي

&&&&&&&&&&&&&&&&&

2:15 الظهر
شقة ليال ..الصاله..
البحرين



جويل بهمس: مزيان ماما.. حط الغدا
مزيان: لا ياجويل.. ماهو وقت اكل الان
جراح يدني صوبهم: ايش في
جويل: بئول حط الغدا احسن.. الكل تعبان يا ماما.. ومحتاجين للاكل.. انتو فطور مافطرتو
جراح يتذكر حمل ليال ويتنهد: حطي الغدا
جويل بفرح: من عيوني
جراح: يلا ياجماعه.. جويل بتحط الغدا.. وبنجلس ناكل.. تفكير والمعده خاليه ماراح نطلع بنتيجه
وليد يدخل: السلام عليكم
عبدالعزيز بلهفه: وعليكم السلام.. بشر اخوي
وليد: لقينا اثنين.. واحد مريض ومنيم في المستشفى.. والثاني يقولك عرس ولده اليوم وبكره ماهو فاضي
عبدالرزاق يدفن وجهه بيده: لاحول ولا قوة الا بالله
عبدالعزيز بحزن: وبعدين محنا عارفين هم وين.. ولا احنا لاقين احد من الشيوخ يطلعنا من الي حنا فيه
منير يدخل وعلى التلفون: اكيد الله يسلمك.. خير ان شا الله.. ما قصرت.. من عيوني قبل صلاة العصر نكون عندك.. تسلم يا شيخ ما منك قصور.. مع السلامه
وليد: بشر
منير بفرح: هذا الشيخ الي بيزوج ولده.. يقول لك بيجي.. بس ضروري يرجع بيته قبل صلاة المغرب
عبدالرزاق بفرح: الحمدلله.. الحمدلله
احمد: الحمدلله.. بقا خالد وزوجته
لمى بقهر: الشور يقول لي اني اروح لهالعجوز واطيح فيها ضرب.. لين تطلع روحها بيدي
لينا: حسبي الله ونعم الوكيل.. روعتنا من الصبح
ليال: ان كان سحر.. ربي يحرقها.. ربي يحرقها
ام لينا بحزن: البنت حامل
حسيت ان الكل ناسي ان لبنى حامل.. ومن سمعو كلمة ام لينا الكل انتبه لهالشي.. خفت على ليال الي شفت تنفسها بدى يضبق.. مشيت لحد ما وصلت جنبها.. جلست ومسكت يدها بحنان
جراح: انتي مؤمنه.. قومي اجلسي على سجادتك واسألي الله الفرج
ليال وعيونها بعيده عنه: اكيد.. ربي ما يرد لي رجا
قامت من عندي ودخلت غرفتها.. عيوني تتبعها.. قلبي واجعني عليها.. يادوبها تقول لي حامل.. ياربي انك تفرح قلبها.. ياربي انك تزيح عننا هالكرب.. انتبهت على تلفون عبدالعزيز.. طلعني من افكاري
عبدالعزيز: الو
خليفه: مرحبا عزيز
عبدالعزيز متشكك: عفوا من معاي
خليفه: قبل لاقولك انا مين قول لي اش اخبارك
عبدالعزيز يبتسم: اخباري؟!!!
خليفه: لا تخاف مني ماني عدو.. ابي اسأل عن اخبارك بس
عبدالعزيز بكل حنيه: شخص مااعرفه ومتصل بي يسأل عن اخباري؟!!! الحمدلله اخباري طيبه
خليفه براحه: الحمدلله.. خفت يكون صاير لك شي
عبدالعزيز تدمع عيونه: ليلحين ماعرفت انت من
خليفه متردد: انا واحد من ربعك
عبدالعزيز يوجعه قلبه: حياتي خاليه من الربع.. انت من
خليفه يتنهد: انا اخوك
عبدالعزيز بضيق: ماعندي اخوان.. واذا انت قريب مني بتعرف ان اخواني رموني في الشارع
خليفه: ما اعرفو قدرك وقيمتك.. انا واحد منهم.. ماعرفت من انت الا متأخر.. عموما انا متصل ابي اتطمن عليك بس.. وزين انك ما عرفت انا من.. احسن بعد صدقني.. لاني ما استاهل انك ترحب بي في حياتك مره ثانيه
عبدالعزيز: غلطان يا خليفه
خليفه بحزن: تمنيتك ماعرفت انا من
عبدالعزيز: عرفتك من قلت مرحبا.. بس كنت ابي اتأكد انك متصل.. لي.. عشاني.. خوف علي ماهو خوف مني
خليفه: واحد من ربعنا يقول شافك مع احمد من شوي رايحين القسم.. قلت بسأل عنك.. اتصل في احمد وما يرد علي.. قلت اتصل فيك حتى لو رفضت تكلمني
عبدالعزيز يشوف احمد: واحد من ربعنا مختفي هو وزوجته.. ومحنا عارفين لهم مكان
شفت عبدالعزيز يشوف احمد بأمتنان.. كمل موضوع خالد مع الشخص الي متصل به.. عطاه معلومات وبيانات واوصاف خالد وزوجته ولوحة سيارة خالد وارقام تلفوناته.. كمل مكالمته وشفته قام من مكانه لاحمد.. واحمد وقف له.. لقيت عبدالعزيز يحضنه بقوه.. كلمات الشكر ماوفت احمد هذيك الساعه.. شفت عبدالرزاق وعبداللطيف يمسحو دموعهم اكيد عارفين ايش الموضوع.. انا جالس متفرج.. طلعت ليال على هالمنظر.. دموع عبدالعزيز.. واحمد الي يهديه.. عبدالرزاق المتأثر وعبداللطيف معاه
ليال بخوف: ايش صاير!! جراح ايش صاير!!
عبدالرزاق: باركي لعبدالعزيز.. خليفه ولد عمته كلمه بعد قطيعة سنين
ليال تبتسم غصب: الف مبروك ان شا الله تلاقي عمتك بعد داقه عليك
خوله تمسح دموعها: آمين ياربي
جويل: يلا يا ماما الغدا جاهز.. قمو كلو واتكلو ع الله.. واكيد ربنا هيفرج الهم
جراح يجلس على طاولة الاكل: حبيبتي ارتاحت في سجودها
ليال بكل حنيه: اكيد ياروح حبيبتك.. دامي مع ربي اكيد بكون مرتاحه
جراح يدفن يدها بيده: ..........................
ليال: عزيز خليفه قالك بيحرك الموضوع؟
عبدالعزيز يبتسم: وعدني هو الي يلاقيهم
منير: انا اكلت باروح اجيب الشيخ وانا راجع
جراح: والله ما تقوم يارجال..اجلس كل لك لقمه عدله
منير: ياخوي مافي وقت
جراح: لسا فاضل على صلاة العصر.. تجيبه ويصلي معانا بالجامع ويرجع يشوف شغله ويرجع بيته قبل صلاة المغرب
جلس منير.. والكل في قلق.. حتى عبدالعزيز الي الابتسامه ما فارقته كان قلق.. ما اظن ان احد فينا شبع.. قمنا من على الطاوله وطلع منير ووليد مع بعض.. وجلسنا ننتظر جية الشيخ.. اذن العصر.. احمد دق على منير.. ومنير قال له انهم رايحين للجامع مع الشيخ.. طلعنا كلنا.. وصلنا الجامع وصلينا العصر.. وطلعنا مع الشيخ الي ركب معاي ومع احمد السياره.. واحمد جلس يقول له على الموضوع بالكامل.. وصلنا لشقة خالد.. وراح الشيخ يشوف شغله.. سبتهم وركبت لحبيبتي.. دخلت الشقه ولقيتها في البلكون.. نفس الحال نفس الكدر.. جلست جنبها
جراح: حبيبتي.. الشيخ تحت
ليال بلهفه: وقال لبنى وين
جراح يبتسم: ليال هذا شيخ متخصص في امور السحر.. ماهو عالم بالغيب بيقول لنا خالد وزوجته وين
ليال تتنهد: لا الاه الا الله.. وين عزيز
جراح: الرجال كلهم تحت عند شقة خالد.. انا جيت اطمنك
ليال: طيب قول له يدق على خليفه ويسأله اذا عرف شي جديد
ام لينا تدخل البلكون: جراح يما وصلتو
جراح ينزل عيونه: ايوا خالتي.. الشيخ تحت
ام لينا: يما قول له يقرا على المكان كله.. هو بيعرف انا اش اقصد
جراح يوقف: حاضر.. تامرين بشي ثاني
ام لينا: لا يما.. انتبهو على تليفوناتكم.. يمكن احد تبع خالد يتصل
جراح: ان شا الله
نزلت ووصلت عند الرجال.. قلت للشيخ ام لينا اش قالت.. وهو من نفسه قال لي هذا الي هو ناوي يعمله.. ظلينا واقفين جنب بعض والشيخ راح يقرا القرآن بالمكان.. كمل واخذه منير ووليد قبل أذان المغرب حتى يلحق على عرس ولده.. وقبل لا يطلع شكرناه من قلوبنا على معروفه الي من جد ماحد بينساه.. رحنا للمكتب وجلسنا فيه.. احمد قال الاحسن اننا نبتعد عن الحريم.. اذن المغرب وطلعنا.. صليناها ورجعنا للمكتب مره ثانيه.. وصل منير ووليد.. سمعت صوت التلفون وفزيت من سمعت اسم خليفه
عبدالعزيز: هلا خليفه
خليفه: عزيز.. الاخبار الي عندي ما تسر

&&&&&&&&&&&&&&&&&&&&&&&

6:00 المغرب
فيلا العايله ..الحديقه..
السعوديه
نوف: جالسه لحالك
بسمه تنتبه لها: لا عادي.. قلت اجلس شوي بهالجو
نوف: مالك
بسمه تبتسم: مافي شي
نوف: عارفه انك ما تحبي تجلسي هالجلسه.. مالك
بسمه: مافي شي مهم صدقيني
نوف تحس عليها: في شي مع ناصر
بسمه تبتسم: لا
نوف: ماراح اتركك الا لما اسمع منك ايش صاير
بسمه بضيق: تأخرت بالحمل.. وخايفه
نوف: عملتي تحاليل
بسمه: ايوا
نوف: وبها شي
بسمه: لا الحمدلله
نوف: وناصر
بسمه تتنهد: ماله
نوف: عملتي له تحاليل
بسمه: ما يحتاج
نوف: وليه ما يحتاج
بسمه: لان زوجته حملت قبل كذا
نوف: وانتي ليه خايفه كذا
بسمه: عشان طليقي جاب الولد الثالث.. بعد ما طلبت الطلاق تزوج على طول.. وزوجته حملت بسرعه.. وهذا هي جابت الثالث
نوف: دام التحاليل قالت مابك شي.. ايش منه خايفه.. وبعدين انتي ما اخذتي وقت من تزوجتي
بسمه تنزل راسها: ماهو خوف.. بس انا اكبر بالسن.. كل هذي عوامل بعد
نوف: ايش رايك بطفل الانابيب
بسمه: تقصدي الحقن المجهري؟!! لا لا اخجل افتح هالموضوع مع ناصر
نوف: تبين تتركي هالموضوع علي
بسمه بخوف: لا طبعا.. تبينه يقول تشتكي لاختي
نوف: ماني غبيه يا بسمه.. اكيد اني ما بجيب سيرتك.. بخليه هو يفتح معك الموضوع من غير ما يحس انك مكلمتني
بسمه بخوف: ودي يانوف.. ودي بطفل من ناصر.. بس انتي تكلميه لا.. ودي احسه هو الي يبي هالشي.. هو الي يسألني
نوف: ناصر بحياته ماراح يسأل
بسمه بخوف: مافهمت هو قال لك انه ما يحبني
نوف تضحك: لا ياغبيه.. ناصر ما يحب يغث حبيبه.. لو ايش ما يكون الموضوع.. حتى لو الموضوع يمس ابوته
بسمه متردد: نوف ودي اسألك
نوف تحط رجل على رجل: اسألي
بسمه: كيف كان يتصرف مع زوجته
نوف: زي ما يتصرف معك تمام.. لا تحسبي انه بيحبها اكثر منك.. هو يحب الي تدلعه وتتدلع عليه.. يحب الي تهتم فيه وتجبره يهتم فيها.. يحب الي تتلهف على شوفته وتعشقه
بسمه تبتسم: يعني ما تغير عن زمان
نوف: اكيد ماتغير ناصر زي ماهو
بسمه: بس احسه بارد معاي.. ما يحبني زي زمان
نوف: لافي خلانا بوضع ما ننحسد عليه.. خلانا نمشي ونكلم نفسنا
بسمه: صرتي تقولي لافي.. وين راحت كلمة بابا
نوف: بعد الي عمله معاي.. مستحيل تسمعيها.. ربي بقلبي عالم.. وعارف اني ما اعصيه.. بس ما اقدر اسامح لافي على الي عمله معاي
بسمه: الله يقومك بالسلامه.. يجي الي ببطنك ويعوضك ربي به خير
نوف تبتسم: ياربي آمين

&&&&&&&&&&&&&&&&&&&&

8:00 الليل
قسم الشرطه ..جنب السجن..
البحرين

احمد بحده: يعني شنو!!.. يعني شنو!!
خليفه: احمد.. اهدى.. شوي بنعرف نعرف لبنى وين.. اصبر شوي
احمد فقد اعصابه: تعرف لبنى وين!! اشلون.. اشلون.. شوفه مثل الثور الهايج.. ماهو بعقله يا خليفه ماهو بعقله
جراح يمسك احمد بقوته: انت عارف خالد ايش فيه.. اهدى خلنا نفكر.. محنا عارفين نفكر كويس يارجال
عبدالعزيز يسحب احمد مع جراح: اجلس.. واهدى
خليفه يجيب كاس ماي: شربه يا عزيز
عبدالرزاق ياخذ خليفه ويبتعد عنهم: طيب الدم الي على ثيابه ماعرفت دم من
خليفه: لا طبعا.. كل الي اعرفه انه صدم بسياره بشارع عام.. ونزل خالد وطاح في الرجال ضرب وهو الي غلطان على الرجال
عبدالرزاق: طيب الرجال طلع منه دم
خليفه: التقرير يقول ان الرجال منقول للمستشفى بكدمات ورضوض بليغه
عبدالرزاق: خليفه لا تجنني.. ابي اعرف هالدم دم الرجال ولا لبنى
خليفه: ياخوي اشلون تبيني اعرف والتقرير الي قدامي ماجاب سيرة هالشي.. عبدالرزاق تراني وكيل نيابه ماني المحقق.. اصبر شوي لين يجي الضابط واعرف منه كل شي
احمد على التلفون بصراخ: فيصل انت وين
فيصل: خاطري لو مره وحده تتصل هادي.. خير يا خوي اش صار الحين


يتبع

احمد بحده: اسمعني زين بلا كثر كلام
جراح يبتعد مع عبدالرزاق عن احمد: ايش رايك نجيب الشيخ يقرا عليه هنا.. خالد يهذي
عبدالعزيز: اسمعو مني
عبدالرزاق: قول
عبدالعزيز: نجيب ام خالد وابوه
جراح يشوفه بحده: انجنيت انت.. تدخل الحريم هنا!!!
عبدالعزيز بجديه: وابو هنا بعد.. خليها تشوف نتايج تصرفاتها مع ولدها
احمد يدخل بينهم: شنو تقولون
عبدالعزيز: جراح يقول نجيب الشيخ يقرا عليه الحين.. وانا اقول نجيب امه وابوه قبل
احمد يفكر: صح.. نجيب هالحماره وتشوف اش سوت في ولدها.. ومعاه نجيب الشيخ
عبدالعزيز: خليفه.. ياليت تاخذ الام بعيد عن الاب وتقول لها انه بينحبسه وممكن ينعدم لانه ذبح الرجال الي ضربه.. وزوجته مختفيه واحتمال ذبحها
جراح ماهو راضي: اشوف عشت جو الاجرام يا عبدالعزيز
احمد بقهر: الي عبدالعزيز يقوله صح.. وخلها عسى تطلع روحها
جراح بحده: ياحمد ماهو كذا عاد.. اهدى وانا اخوك.. امه حرمه كبيره واذا سمعت بذا كله ماراح تستحمل
عبدالرزاق: جراح انت تبي تذبحني؟!!! امه مسويه سحر.. عارف يعني شنو السحر.. هذا خالد قادمك وشوف حاله
خليفه: لا حول ولا قوة الا بالله
احمد: الاول اعرف هي ليش ما تحب لبنى
عبدالعزيز: اذا قدرت تعرف لا تتأخر وانا اخوك.. بس الاول امه تشوفه
احمد يتصل: هلا بعمي منصور
عبدالرزاق يتصل: هلا منير.. جيب الشيخ الي جبتوه العصر احنا بقسم الشرطه

&&&&&&&&&&&&&&&&&&

8:45 الليل
شقة ليال ..الصاله..
البحرين
ليال بحده: يعني شنو
منير: هذا الي قاله يا ليال.. اجيب الشيخ لهم
لينا: وهم وين
منير مابغى يقول لهم: ما ادري هم وين اختي.. عبدالرزاق قال بيتصل بي
ام عبداللطيف: يا يما وقف وكلمنا احنا قلوبنا ماهي حمل الي تسويه
منير: خالتي.. انا لحد الحين ما ادري عنهم.. ولحد الحين ما ادري هم وين.. خليني الحق على الشيخ واروح لهم
لمى: اتصل يا منير
منير: حاضر حاضر
وليد: اصبر جاي معاك
منير بحده: لا طبعا خلك مع عبداللطيف.. الحريم بروحهم
لمى بعد ما طلع: اكيد لقوهم.. واكيد حالتهم حاله
ام لينا: أي صح.. ولا ما قالو يبون الشيخ
ليال: ياربي برد قلبي.. ياربي رجيتك ماعاد فيني صبر
لينا: اتصلي على جراح
ليال: لاطبعا ما اتصل فيه وحنا محنا عارفين ايش الوضع عندهم
خوله: طولو البال.. دامهم يبون الشيخ اكيد لبنى وخالد معاهم.. وبيعرفون يتصرفون زين
لينا: لحقو حنان متصله على تلفوني
لمى: انا ارد عليها.. انتي تبكين.. جيبي انا صوتي مافيه شي
لينا: خذي بس لا تقولين شي
لمى: هلا حنون
حنان: هلا وغلا اش الاخبار
لمى: تمام اش الاخبار عندج
حنان: وناسه الصراحه.. كنت محتاجه لهالاجازه.. حتى العيال غيرو جو
لمى: بس بنتج مدرسه يا مجنونه
حنان: يا بنت الحلال بعد بكره بكون في البحرين.. هي كلها ثلاث ايام وانا ما خذه لها عذر من المدرسه
لمى: زين سويتي.. ان شاالله مرتاحه
حنان: تمنيتكم معاي كلكم تبين الصراحه.. ماني قادره انبسط وانا بعيده عنكم
لمى: اقول بلا خرابيط.. والله هالله بالهدايه السنعه
حنان تضحك: جبت لكم هدايا تجنن.. وجبت للينا ولبنى اغراض تجنن للي ببطونهم
لمى تضحك: بقول لهم بخليهم ينبسطون
حنان: ذكرتيني اتصل في خالد ولبنى من الصبح وماحد يرد علي
لمى تضحك: شكل اخوج ارتاح من وجودج وراح شهر عسل مع زوجته
حنان تضحك: الله يهنيه.. وانا اقول ليش ما يردون
لمى: لا تطمني هم بخير لا تخافين
حنان: ولينا وين ليش انتي الي راده على تلفونها
لمى: لينا في شقتها وناسيه تلفونها هنا
حنان: ليال اشلونها وخوله
لمى: بخير وكل وحده فيهم في شقتها
حنان: سلمي عليهم كلهم
لمى: يوصل ياقلبي.. انتبهي لروحج وللعيال.. مع السلامه
ام عبداللطيف: زين الي سويتي يا يما

&&&&&&&&&&&&&&&&&&&

9:15 الليل
قسم الشرطه ..غرفة المحقق..
البحرين

الضابط بحده: والله لو ماهو انت يا خليفه ماكنت تقاضيت عن الي صار
خليفه: يا عماد انا شرحت لك حالة المتهم
الضابط بحده: خليفه لا تجنني.. اش تبيني اكتب في التقرير.. المتهم مسوين له سحر؟
خليفه ينزل راسه: لا طبعا.. كل الي ابيه انك توفر لي الي ابيه وبعدين شوف اجراءاتك
الضابط يتنهد: عارف اني بسويلك الي تبيه من غير لا تقول.. بس انت عارف اكثر مني ان موضوع السحر ذي ماله أي بند ولا قانون عندنا ياخوي
خليفه: عارف كل هذي.. المهم عندي الحين امه وابوه يجون يشوفون حاله.. والشيخ يدخل عنده يقرا عليه
الضابط: انا بعطي امر يحضرونه في المكتب عندي.. وانت عليك بالشيخ
خليفه: عماد.. ما اظن ان الي تقوله في صالح خالد.. هذي هايج ولاهو حاس بروحه.. افضل ان الشيخ يروح له
الضابط: خلاص بعطي امر للحراس يتركون الموقع ربع ساعه
خليفه: ربع ساعه ما تكفي.. ياخوي تكفى
الضابط يتنهد: خلاص بكون معاك.. وخذ الوقت الي تبيه
خليفه: ماقصرت
الضابط: طيب اش بتسوي بعد ما التقرير يروح النيابه العامه
خليفه: لا تستعجل.. المجني عليه بيجيك يتنازل عن حقه
الضابط بحده: بكره لازم يكون عندي ياخليفه
خليفه: بكره يا ابن الحلال.. ليش خلقك ضيق جذي
العسكري: سيدي والد المتهم خالد موجود برا

&&&&&&&&&&&&&&&&&&&&&&

9:40 الليل
فيلا لافي ..غرفة عبير..
السعوديه
عبير تدق: خليني اجرب مره ثانيه يا غسان
غسان بحده: وبعدين معك انتي.. وبعدين
عبير بدلع: ليه منت معطيني فرصه ابين لك حبي غسان
غسان بحده: انتي شكلك ما تربيتي
عبير تضحك: حرام عليك انت لسا ما عرفتني
غسان: ما ابي اشوف رقمك مره ثانيه يدق فاهمه
عبير: ليه انت بتنام
غسان: ..........................
عبير بدلع: رد علي ما احبك تسكت عني
غسان: ........................
عبير بدلع يلوع الكبد: لا تحرمني اسمع صوتك عاد.. تراني اموت كذا
غسان: قولي لي
عبير نحسبه انها قدرت عليه: يا عيوووووووني انت خير ياقلبي.. ايش بغيت اقول لك
غسان: تعرفي العيب
عبيربتأفف: غسان اترك عنك العيب الان.. وقول لي.. ليه ما تحاول انك تتعرف علي
غسان: لسبب بسيط
عبير بفرح: ايش هو خايف من زوجتك
غسان: لا.. لانك زباله.. وانا مستواي ارقى من كذا
عبير: اف رجع سكر الخط بوجهي.. ايش اعمل حتى يرق لي
لافي يدخل عليها: مين ذا الي تبينه يرق لك
عبير بحده: ايش تعمل هنا
لافي يدخل ويقفل الباب وراه: ابد جيت اتطمن على عبورتي حبيبتي
عبير تضحك: عبورتك حبيبتك اذا تبي منها شي.. والبقره وتراني ما خلفت غير البقر اذا ما صار الي براسك.. اقول افتح الباب تراني بصرخ وانادي ام ناصر
لافي يصفعها على وجهها: لافي ما يتهدد يا كلبه
عبير بكل ثقه: هذاك اول.. الان لا.. مامااااااااااااااااااااااااااااااااااااااا
لافي يفتح الباب بسرعه: بردها لك يا حقيره
عبير تقفل الباب: الدرب الي ما يرد.. ارجع اكلم غسان افففففففففففففف سكره بوجهي مره ثانيه.. ادق على مين؟!! بدق على هالبدر.. امس اخذت رقمه بالمجمع.. الوو
ماجد: هلا والله
عبير بدلع: مين معي
ماجد: معك ماجد.. وانتي ملكة الجمال الي شفتها امس
عبير بدلع: ههههههههههههه لهالدرجه شكلي حلو
ماجد يبتسم: ومن ذا الي يقدر ينسى هالجمال.. قولي لي
عبير: خير
ماجد: اكلتي يا قلبي.. ولا اجيب لك
عبير تضحك: يا زينك شكلي بحبك
ماجد: ياربييييييي يدوخ هالضحك.. ها اجيب لك عشا.. واشوفك
عبير: ايوا ودي بعشا حلو.. وابيه باختيارك.. بس عارف اذا ما عجبني.. ماراح تسمع صوتي ابد

&&&&&&&&&&&&&&&&&&&&

10:00
قسم الشرطه ..جنب السجن..
البحرين
منصور يمسك احمد من ياقته: شنو الي اسمعه ذي
احمد يبعده عنه: هذي الحقيقه وحرمتك قدامك تقول لك الحق
منصور يتلتفت لام خالد: الكلام الي يقولوه العيال صحيح
ام خالد تشوف خالد: ..........................
منصور يصفعها: هالكلام صحيح
ام خالد بخوف: لا طبعا ماهو صحيح
احمد: تتوقع احنا الي مسوين فيه هالشي
منصور يشوف حال ولده: .......................
ام خالد برجا: دخلو الشيخ خلوه يقرا عليه
عبدالرزاق بكل هدوء: اش يقرا عليه يا ام خالد
ام خالد بخوف على خالد: يقرا عليه عن السحر
احمد بحده: ومنين عرفتي انه سحر.. انا قلت ان الي مرشوش على الباب شوية ماي
منصور مسكها وطاح فيها ضرب: ليش.. ليش.. ليش
جراح يمسكه: بوخالد.. يا بوخالد اذكر الله
عبدالعزيز يسحبه مع جراح: بس يا بوخالد.. الشيخ بيدخل الحين ومايصير الا الخير
لفت الدنيا بي.. عالم غريب الي انا فيه.. نسيت حالي بعالم المال والاعمال.. نسيت روحي بين الارقام وارصدة البنوك.. اول مره اعيش هالشي.. ليال وحياتها اكسبوني خبره ماهي سهله.. عيشوني بحياه ما قد حلمت اني اعيشها.. دخل الشيخ وخالد ماهو بوعيه صار يصرخ ويبكي ويرمي حاله على الحيط.. كنت اشوف امه.. اول مره اشوف ام تعمل كذا بولدها.. مستحيل تكون ام.. هذي شيطان.. مالقت غير السحر!!.. ايش ما يكون السبب احد يخسر دينه ودنياه.. بعد الآيات استقرت حالة خالد.. ما حسيت بروحي عطيتهم ظهري ومشيت عنهم وصلت لسيارتي.. فتحت الباب وجلست بها.. صرت افكر بخالد.. ايش الان.. ايش بيصير فيه الان.. اذا عرف ان لبنى مختفيه وماحد يعرف عنها شي ايش بيصير فيه.. تخيلت روحي مكانه لو بفقد ليال.. كنت اتمنى اننا نخلص بسرعه ونرجع.. ودي ارمي نفسي بحضنها.. الان عرفت ليه دايم تحب انها ترتمي بحضني.. من الي شافته بحياتها.. وانا اليوم الي شفته ما يجي شي جنب الي هي عاشت فيه وشافته.. شفت احمد ومنصور جايين علي.. طلعت من السياره
جراح: خير ايش صار
احمد: بسرعه بنروح المستشفى للشخص الي ضربه خالد.. لازم يتنازل عن القضيه قبل لا تتحول للنيابه العامه
جراح: يلا حياكم
منصور بحزن كبير: معلش يا بومبارك.. بنعذبك معانا
جراح يحرك السياره: عيب يا بوخالد.. انت تتكلم عن اخوي الصغير
منصور وحالته حاله: ما منك قصور
مشيت وانا عيني على منصور.. كنت اشوفه بالمرايه لانه جالس وراي.. تخيلت ان زوجته هي ام صبا.. كيف راح تكون حياتي لو انها عملت كذا بولدي.. تعوذت من ابليس.. الحمدلله الي ارتحت منها.. الحمدلله.. وصلنا المستشفى.. احمد سأل عن المريض ورحنا له بسرعه.. لقينا رجال واقف على بابه.. تعرفنا عليه وقال انه اخوه.. الرجال كان قمه في الذوق.. راح بوخالد يكلمه ويبين له انه مستعد يدفع الي يطلبونه بس المهم يتنازلو عن القضيه.. اعتذر الرجال وقال اننا ضروري نتكلم مع المريض.. دخل هو بالاول وتكلم معاه .. طلع الرجال وهو مستحي.. قال لنا نتفضل عند اخوه.. دخلنا عنده وحتى قبل لا نسلم.. اخذنا الرجال صراخ بقلة حيا.. صحيح فرق بينه وبين اخوه.. وسبحان الله اذا الام عملت كذا بولدها اجل ما استغرب اذا الاخين طلعو فرق بعض.. بوخالد ما كثر خبر.. الرجال ذا عنده خبره بالناس ماهي هينه.. طلع دفتر شيكاته وكتب مبلغ ما قدرنا انا واحمد نعرف كم.. شفنا الرجال ابتسم ابتسامه غريبه.. قال له بوخالد.. تاريخ الشيك يستحق بعد ثلاث ايام.. اذا بكره الساعه 8:00 الصباح ماراح تنازل عن القضيه بيوقف صرفه من البنك.. شفت الرجال خاف.. وتأكدت ان الموضوع منتهي لحد بكره.. رجعنا لقسم الشرطه.. واصريت اني انتظر الشباب في السياره.. نزل احمد وبوخالد.. ربع ساعه ووصلو الشباب
عبدالعزيز متأثر: حسبي الله ونعم الوكيل
جراح يحرك السياره: ايش صار جديد
عبدالرزاق بمنتهى الغيض: اسمع الحماره اش تقول.. تقول لك اسمعت ام لبنى تتدلع على بوخالد وتحاول تغريه
جراح مستغرب: اعوذو بالله اش هالكلام
عبدالرزاق: تقول لك شبت النار بقلبها من ذيك الايام.. وعايشه عشان تنتقم من ام لبنى
جراح: وام لبنى ميته صح؟!!!
عبدالرزاق: ميته من زمان
جراح فاتح عينه: ميته من زمان!!! ولبنى ايش دخلها
عبدالرزاق بقهر: اسمع عذرها.. لان البنت تشبه امها فحبت تحرق قلب منصور عليها وتزوج خالد وحده غيرها عشان تحرمه شوفتها
جراح: ايش هالاسباب الواهيه ذي
عبدالعزيز: تشكر الله الي كنت جالس هنا.. والله لو كنت معانا كنت تتمنى انك تقتلها
جراح: هي بعملتها تعتبر كافره.. ايش تبي اكثر من كذا.. خسرت دينها ودنياها.. واتوقع خالد يرميها
عبدالرزاق: بعد الي صار اليوم.. ما اتوقع انه يجي يوم ويرق قلبه لها
جراح: ما قلتو لي عن الشيخ
عبدالعزيز: لا ابشرك.. الحمدلله يقول طلع السحر منه
جراح: وخالد قال لبنى وين؟


يتبع

عبدالعزيز بحزن: ما يتذكر هي وين.. من شاف الشيخ والسجن الي هو فيه صار يصرخ اش صار.. تبي الصراحه انا قلت له كل شي وامه واقفه.. ثار وحمق وجلس يصارخ.. وفتح باب السجن رايح لامه.. ما رحمها منه غير خليفه والضابط الي معاه
جراح: والشيخ؟
عبدالعزيز: رجعه منير.. وزمان منير في الشقه
عبدالرزاق: احمد ليش ساكت
احمد وهموم الدنيا: ولا شي
عبدالرزاق: اش سويتو مع المريض
جراح: منصور ما قصر دفع له.. وقال له بكره الساعه 8:00 الصباح يكون بالقسم يتنازل عن القضيه
عبدالرزاق: الحمدلله.. الله يطمنا على لبنى
قال عبدالرزاق هالجمله والكل سكت.. صحيح الخوف كان كبير على خالد.. بس الخوف اكبر على البنت.. كنت افكر بليال ايش بقول لها.. كيف بنكلم الحريم.. ما ادري يمكن احمد ساكت يفكر بنفس الموضوع.. وصلت للعماره وانا بخاطري ما ودي اوصل.. ركبنا للشقه والكل كان جالس على اعصابه ينتظر كلمه تريحه.. عبدالعزيز تكلم وقال كل شي بالتفصيل.. وجينا للسؤال الي ماله اجابه.. وين لبنى؟

&&&&&&&&&&&&&&&&&&&

7:00 الصباح
فيلا العايله ..المطبخ..
السعوديه

نوف: جالس بدري
ناصر: ماجاني نوم
نوف: ليه يا قلب اختك
ناصر يبتسم: عادي ياروحي انتي.. لا تقلقي
نوف بإهتمام: لا بهتم.. قول لي ولا تراني ما بتركك
ناصر يضحك: احلفي عاد.. انا الي بتركك وبمشي عندي شغل
نوف تمسكه: ما تروح الاول اعرف
ناصر: ابوكي مضايقني بشغلي
نوف بحده: وايش يبي
ناصر: ارجع معاه الشركه
نوف: وبعدين!!
ناصر: انا معاند ماودي.. عارف انه يبي يذلني
نوف: لا ترجع.. شوف لك أي شغله ثانيه
صلاح يدخل: صباح الخير
ناصر: صباح النور
صلاح: شكلكم يقول في موضوع مهم
ناصر: الموضوع الي كلمتك فيه
صلاح: وايش قررت
ناصر: لسا افكر
صلاح: وايش عملت على الارصده الي في البنوك
ناصر: زي ما قلت لي.. سحبتها كلها تقريبا وخبيتها بنفس الطريقه الي قلت لي عليها
نوف: اشوف بينكم اسرار
ناصر: ماهي اسرار.. بس هذا شغل
صلاح: هذا معناه انك قررت
ناصر: تقريبا ايوا
صلاح: وليه تقريبا دامك سحبت كل الفلوس
ناصر: قلت بنتظر منه اتصال.. انا سكرت مكتبي.. وانتظر منه يتصل على تلفوني
صلاح: احتمال هالشي ياخذ وقت.. ابوك ماراح ينزل من عمره
ناصر يبتسم: ان اتصل هذا في صالحي.. وان ما اتصل هذا في صالحي
صلاح يضحك: عشان كذا تقول تقريبا.. بتترك لاتصاله تحديد موقفك
ناصر: بالضبط تعجبني
صلاح يطلع: حلو.. بلغني بآخر المستجدات معاك
ناصر: بيننا تلفون

&&&&&&&&&&&&&&&&&

7:20 الصباح
شقة احمد ..غرفة احمد..
البحرين

لينا تدخل عليه الغرفة: حبيبي لسا صاحي
احمد مانام: خير ياروحي في شي
لينا: لا ياروحي.. ابي اسوي لك فطور
احمد بحزن: ماني مشتهي
لينا تقوم عنه: طيب
احمد: وين رايحه
لينا: بالصاله.. يمكن تبي تفكر بروحك
احمد يحضنها: تحبيني
لينا: ياروحي انت.. انت ما تسألني انت تجاوب عني
احمد يبتسم غصب: تعرفين اذا لبنى صار لها شي.. خالد بيموت هم من بعدها
لينا تدفن راسها بحضنه: لا تقول جذي.. الله يردها
احمد بخوف: من امس ماحد يدري عنها.. احتمال ذبحها
لينا بخوف: لا تقول جذي احمد
احمد: لو تشوفين الرجال الي اضربه يا لينا
لينا تحاول تنسيه: شوفني.. احمد شوفني
احمد يلف وجهه عنها: اتركيني
لينا: ما بتركك.. اسمعني زين انت........ تلفونك ذي!!
احمد يفز: أي وينه
لينا: بالصاله قلت بطلعه برا عشان تعرف تنام
احمد يطلع الصاله بسرعه: الو
خليفه: هلا احمد
احمد: هلا ياخوي بشر
خليفه: البنت كانت في وحده من الفنادق.. وانا عندها الحين
احمد بفرح: احلف احلف
خليفه يحاول ما يوتره: تعالي زين.. البنت بخير
احمد: انت بأي فندق

&&&&&&&&&&&&&&&&&&

7:00 الصباح
مكتب لافي ..الشركه..
السعوديه

مسعود: تامر شي عمي
لافي: المحاسب الكلب ترك الشغل
مسعود: عارف هالشي عمي
لافي يشوفه بابتسامة خبث: سمعت ان بنتك دارسه محاسبه
مسعود يتلعثم: ايوا عمي.. بس خطيبها مانعها تشتغل
لافي فهم حركة مسعود: متى انخطبت؟!!
مسعود متوتر: ولد عمها تكلم عليها
لافي ببتسامه: ايوا تكلم عليها.. يعني لحد الان ما ملك عليها
مسعود يبلع ريقه: ايوا عمي
لافي بحزم: ترد ولد عمها.. قول له ما تناسب بنتي
مسعود يرتجف: ايوا بس.........
لافي بحزم: من بكره تجيبها معاك حتى اوريها الشغل كيف
مسعود يحاول يثني لافي عن قراره: البنت لساها صغيره ياعمي.. وما اظن انها تقدر على شغلك.. شغلك محتاج واحد عنده خبره.. والبنت لساها من تخرجت.. اغلاطها ممكن تدفعك ثمن كبير
لافي بعنجهيه: جيب البريد من السكرتير وقول لهم يجيبو لي قهوتي.. سكر الباب معاك

&&&&&&&&&&&&&&&&&&&&&

8:30 الصباح
قسم الشرطه ..بمواقف السيارت..
البحرين



خالد بلهفه: تقول لبنى بخير.. لقوها
عبدالعزيز: أي يا يبا ذبحتني ترا هذي رابع مره اقول لك أي
خالد: يا اخي طول بالك علي.. تراني ما نمت من امس
عبدالعزيز: الحمدلله على سلامتك وسلامتها
خالد: انت شفتها؟
عبدالعزيز: لا انا جيت اخذك.. جراح وليال.. عبدالرزاق وخوله عندها
خالد مستغرب: غريبه.. احمد وين
عبدالعزيز: ما ادري عنه يمكن راح لهم بعد ما مشيت
خالد: ابوي عندها بعد
عبدالعزيز: ما ادري
خالد: حنان اليوم بتجي صح
عبدالعزيز: لا حنان بكره بتجي
خالد يتنهد: فقدت من عمري يوم
عبدالعزيز: ابعد ابليس عنك.. واسمع مني كل شي يتعوض.. سامعني
خالد يبتسم: اكيد كل شي بعوضه لها.. كل شي
عبدالعزيز يبتسم غصب: صح ابيك جذي.. كل ما جات مصيبه تأكد اننا بنكون اقوى منها
خالد يضربه على كتفه: صرنا من رد السجون ياخوي
عبدالعزيز يضحك غصب: ومفرحك هالشي
خالد: لا طبعا.. لقيته شي وتشاركت فيه انا وياك
عبدالعزيز: حياتي غير عن حياتك.. وهذا انا قدامك اضحك ومافي شي كسرني..اياك تخلي شي يكسرك وانا اخوك.. لو شنو تكون المصيبه
خالد: احب قوتك يا خوي
عبدالعزيز: الحمدلله.. دريت ان ابوي محكوم عليه بالاعدام
خالد بحزن: كنت ادري من زمان
عبدالعزيز: امس خليفه قال لي.. بس الحمدلله راضي بحكم الله
خالد يبتسم: احلى شي انك تكون راضي
عبدالعزيز: ايواااااااااااا احبك تكون جذي مثلي بالضبط.. راضي بكل شي وباي شي يجي من رب العالمين
خالد: الحمدلله
عبدالعزيز: تعرف اني عشت سنين طويله بروحي مالقيت احد يقول شخبارك
خالد: اش جاب هالطاري يا خوي
عبدالعزيز: سوالف.. اول مره افتح لك قلبي يعني؟
خالد: لا ياخوي ماهي اول مره.. ومنين كنت تأمن سكنك
عبدالعزيز: كانت الفلوس الي عندي مخصصها للسكن وبس.. مكان يلمني وبس.. ما كنت افكر بالجوع والاكل لان القهر ماليني.. تعرف امس خليفه يقول لي ان القضاء بيرجع لي كل فلوسي الي ابوي سرقها
خالد بفرح: هذي الاخبار الي تسر.. قلبتها لي محزنه وانا اخوك
عبدالعزيز: ابيك تعرف ان الله يرد الحق لصاحبه.. ماهو شرط ان صاحب الحق هو الي يدور عليه.. ربي رجع لي حقي
خالد يشك: عبدالعزيز لبنى بخير؟!!
عبدالعزيز يلف بوجهه للشارع: الحمدلله بخير
خالد يشك بزياده: احلف
عبدالعزيز يشوفه: وش فيك قلت لك بخير
خالد براحه: الحمدلله
عبدالعزيز: بس لا تنسى انها مشت على السحر مثلك
خالد بخوف: وجبتو لها الشيخ
عبدالعزيز: اكيد الشباب تصرفو وجابوه

&&&&&&&&&&&&&&&&&&

9:10 الصباح
المستشفى ..جنب غرفة لبنى..
البحرين

جراح على التلفون: منير وينك تأخرت وانا اخوك
منير: زين الي انت كلمتني يا جراح
جراح بخوف: خير
منير: الشيخ سافر اليوم الفجر
جراح بحده: الله اكبر
احمد يوصل لهم: خير اش صار
جراح: يقول الشيخ سافر اليوم الفجر
ليال تمسك كتفه: يعني كيف ها.. يعني كيف
خوله: اهدي الله يهديج
جراح: منير ارجع الشقه خلاص.. سلام
عبدالرزاق يدفن وجهه بيده: يارب انت اعلم بحالنا يارب
ليال تبكي: خوله وبعدين
خوله تحضنها: مالنا غير الصبر
ليال تبكي بحرقه في حضن خوله: ...................
جراح يشيلها: اذا ظليت كذا برجعك الشقه.. انا الغلطان الي جبتك
خالد جايهم ركض: وين لبنى
احمد بحزن: تعال معاي بكلمك
خالد يوقفه بحده: لا تقول جرا لها شي
احمد: ما جرا لها شي.. تعال ابي اكلمك
خالد بحده: تكلم مين عندك تخاف يسمعك
عبدالرزاق: اهدى ياخوي.. اسمع مني.. انت تعرف ان لبنى مسحوره بعد
خالد بخوف: أي عارف
عبدالرزاق: طيب البنت مثل حالك.. ماهي بوعيها
خالد: ووين الشيخ ليش ما جبتوه
عبدالرزاق: سافر اليوم الفجر
خالد بخوف: ولبنى!!!
جراح يمسكه من كتفه: بنشوف غيره يا خوي الديره ما خلت
خالد: خلاص طيب شوفو غيره.. بروح اشوف زوجتي
احمد يمسكه: خالد
خالد بحده: احمد.. بشوف زوجتي ليه ما نعني يا اخي
عبدالعزيز يمسكه: يا خوي.. انت مؤمن بقضا الله وقدره
خالد بحده: لبنى ماتت!!
عبدالعزيز يمسكه بقوه: لبنى ولدت و الطفله ماهي بخير
خالد ينهار على الارض: لبنى في السابع !!!!!!!!!!!!

&&&&&&&&&&&&&&&&&

- ايش الي ممكن حصل
- معقوله لبنى او بنتها يموتو؟!!
- ايش الي بيصير على ام خالد
- لافي.. آآآآآه يا لافي وش الجديد الي مخطط له

السلام عليكم ورحمة الله وبركاته



اتمنى لكم قراءة ممتعة ..............

الجزء الثاني والثلاثون


11:00 الظهر
فيلا العيله ..جناح غسان..
السعوديه
العنود بزعل: وين كنت كل ذا
غسان: متعرف لي على وحده قمر.. رحت اشوف لي حاجه حلوه ادلعها بها
العنود تمشي عنه: تتهنا بها
غسان يمسك يدها: وين رايحه
العنود معصبه: مالك شغل
غسان: كيف يعني مالي شغل.. ماني زوجك
العنود تشوفه بحده: انت ايش شايف
غسان يضحك: ما ادري انتي قولي لي
العنود بقهر: منت زوجي
غسان باستهبال: كيف يعني ولدي هذا ولد حرام!!!!!
العنود تضربه بقهر على كتفه: انا ولدي ولد حرام؟.. هذي كلمه تقولها
غسان يضحك: انتي قلتي اني ماني زوجك
العنود تتركه وتمشي: بايخ
غسان يسحبها له: اناااااااااا.. انا بايخ.. اسألي حبيبتي وهي تقول لك عني.. هذي مقطعه روحها علي
العنود بقهر: وليه جاي عندي.. كنت رحت لها
غسان يسرق بوسه: انا بحضنها شوفيها كيف ما سكتني
العنود تشوف يده الي مطوقتها: الان هي الي ماسكتك!!!!
غسان يبتسم: اجل يا سيدتي اجل
العنود غصب عليها ضحكت: وخر عني طيب
غسان: وين اوخر هذي حبي كيف اوخر عنها
العنود بدلع: وبعدين معاك وخر عاد
غسان يحملها: اااااااااااااااه يا قلبي.. اموت بدلع هالبنت احبها احبهاااااااااااااااا
العنود تضحك: يا مجنون دخت يا مجنون
غسان: جننتيني يا بنت
العنود بحيا: تعرف ساعات يجيني خاطر اروح اقتل عبور الله يا خذها لانها حرمتني منك طول هالسنين
غسان يحضنها بقوته: احبك احبك
العنود: غسان ماني قادره اتنفس
غسان ينزلها ويضحك: هذا بس عشان منتي قادره تتنفسي
العنود تضحك: ياربي شوية عقل لزوجي
غسان يضحك: اجل شايفتني مجنون ها
العنود بفرح: وسيد المجانين بعد
غسان يبتعد عنها: طيب ماني موريكي المفاجأه الي جايبها لك
العنود تمسك ذقنه: ما تهمني مفاجآتك ياقلبي.. انت احلى مفاجئه حصلت لي بحياتي كله
غسان يرجع يحظنها: اموت فيكي يالعنود
العنود تضحك: وخر عني.. بشوف غازي وبرجع
غسان: وينه في
العنود: عند عمتي
غسان: خليه شويه كمان
العنود بدلع: ماودك تشوفه.. انت ما شفته من الصبح
غسان: شويه بس.. وبعدين روحي جيبيه
العنود: طيب شويه بس
غسان: غمضي عيونك
العنود: شكلك تشوف افلام كثيره
غسان يروح بسرعه ويرجع: فتحي الان
العنود تفتح عيونها: واااااااااااااي لاب توب
غسان يضحك: قصري حسك لا تفضحينا.. الان يدخلو علينا يقولو غسان ذبح العنود
العنود تضحك: ذبحها من حبه.. غسان احبك احبك.. الان بدق على ليال وآخذ الميل حقها
غسان: طيب تعرفي كيف تعملي ميل لك
العنود: اكيد.. تتوقع اول مره اشتغل على لاب توب
غسان: ما اذكر انك قلتي لي
العنود: لاني ما كنت استعمله واجد.. نادر جدا اما للبحوث او للمعلومات ايام الدراسه
غسان يسحبها: تعالي خليني اشوف زوجتي كيف تستعمله
العنود تضحك: ساعات تحسسني اني غبيه

&&&&&&&&&&&&&&&&&&&&&&

3:00 الظهر
المستشفى ..جنب غرفة لبنى..
البحرين



عبدالرزاق: احمد ماهو معقول الي تسويه.. يا اخي اهدى خالد حاله يقطع القلب.. يون على بنته.. يا اخي ارحم حالنا محنا ناقصين.. وجهك يوجع القلب انت بعد
احمد يجلس على الكرسي: فيصل خليه ينام ارحم له
فيصل بحزن: ما يحتاج ينام.. اتركه يطلع الي في داخله
عبدالرزاق: منصور وين
عبدالعزيز: مختفي.. حتى التلفون ما يرد عليه
فيصل: ولحد الحين ما يعرف اننا ليقينا لبنى
جراح: اخر مره اتصلت فيه مكالمته خارجيه
احمد بقهر: عساه ذبح زوجته وراح يخبي جثتها
منير: تبي تحبس الرجال!!!
احمد بقهر كبير: هو يذبحها وانا بطلعه برائه
عبدالرزاق بهمس: تكلم مين
جراح: بشوف جراح لعملية بنت خالد.. ماراح اعتمد على الدكاتره الي هنا.. بجيب الجراح هنا وهو يعمل العمليه
عبدالرزاق براحه: الله يجازيك خير.. ياربي تعيش هالبنت
جراح يمسك كتفه بقوه: ربك يسهلها.. الله كريم ونطلع من هالشر
طلعت من المستشفى.. والهم الي داخلي كبير.. صورة خالد وعبدالعزيز ماسكه ويقويه.. يون على زوجته وبنته.. شي صعب..وصلت للشقه فتحتها ولقيت الحريم متجمعات بالبلكون.. وحبيبتي بينهم تايهه.. قلت لجويل تحضر شي خفيف حتى تاكله.. ما ابي اهملها ويصير لها شي.. اخذتها ودخلت معاها الغرفه وصارت تبكي بحضني.. تقول ان لبنى هي اكثر وحده تضررت في البنات.. تذكرت شي مهم قلت بضحكها به
جراح: ليال حبيبتي.. بوخالد مختفي
ليال تمسك قلبها: تقول صار له شي؟!!
جراح يبتسم: لا بعيد الشر.. دقيت عليه وتلفونه رنه خارجيه
ليال مستغربه: ما فهمت
جراح يضحك: شكله راح يتخلص من زوجته
ليال بخوف كبير: ذبحها؟!!
جراح: ياقلبي ماعندك الا الافكار الي توجع القلب.. اسمعي امس ضربها قدامنا وما اهتم لوجودنا.. واليوم مختفي من الصبح ومايرد على تلفونه حتى
ليال برجا: شوف رجالك واعرف هو وين.. طمن قلبي جراح
اخذتها في حضني.. ودقيت على معارفي.. انتظرتهم يدقو علي حتى يطمنوني عليه.. ورحت اتكلم معاها واقول لها الاشيا الي تفرحها.. كنت اشوفها تبتسم.. احس اني نجحت اني خففت عليها.. ارجع احضنها واطمنها.. ليتني اقدر امنع عنك هالحزن.. بس وش اسوي هالمجموعه لا انا ولا انتي نقدر نعوضهم.. او نجيب ظفر واحد فيهم.. معلش مجبور استحمل مشاكلهم عشان احبهم.. ياليت اقدر امنع المشاكل عن قلوب الكل.. لو بيدي ما تأخرت يا قلبي

&&&&&&&&&&&&&&&&&&&&&

3:30 الظهر
في السياره
جسر الملك فهد ..السعوديه – البحرين..لو عندي مكان ابعد من السعوديه كنت وديتها.. قهر بقلبي.. حسره ما بعدها حسره.. قلت اكبرت واعقلت.. مشاكلها كثيره وكبيره.. ماراح انتظر لحد ما تذبح الي بقا من عيالي.. غلطان الي سمعت كلامك يا هاجر.. لو اني معرس على غيرها ما وصلو عيالي للي هم فيه.. اشلون ما انتبهت!!.. اشلون غفلت عن الي كانت تسويه!!.. اشلون ما تزوجت لحد الحين!!.. تكون مسويه لي سحر انا بعد؟!!! تسويها.. تسويها.. كل شي جايز
اشلون بقابل خالد الحين.. اشلون بشوف لبنى.. هالبنت الي تعذبت سنين من تحت راس وحده مريضه.. خربت بيت البنت ضيعت مستقبلها ومستقبل ولدي معاها.. قهر.. قهر في قلبي كبير.. حسره في قلبي كبيره.. وين اروح.. يا صغرها الدنيا في عيني.. يا ضيق هالكون.. اشلون بروح للعيال وش بقول لهم.. طحت من عين الكل يا بوخالد.. صغير بعين الكل
موظف الجوازات: لو سمحت الجواز
بوخالد في عالم ثاني: ......................
موظف الجوازات: يا عم.. يا عم تسمعني
حسيت بدوخه.. رجعت راسي على الكرسي وغمضت عيوني.. كنت اشوف رجال يركضون علي.. نزلوني عن السياره واخذوني على مكتب.. غمضت عيوني بعدها
صحيت ولقيت مسعف يناديني.. كنت اشوف المكان مستغرب.. وش صار؟!! ما اذكر شي.. المكان غريب علي.. اول مره اشوف هالناس.. ما قد جيت هالمكان من قبل.. انا وين؟!.. ويني فيه؟!!
المسعف: تسمعني يا منصور
بوخالد بتعب: أي اكيد اسمعك
المسعف يبتسم: اسمك منصور صح
بوخالد يكشر بوجهه ويغمض عيونه: أي نعم منصور.. انت من؟!!
المسعف: اسمي هاشم انا مسعف.. يا عمي عارف انت وين؟!!
بوخالد مستغرب: لا اول مره اجي هالمكان
المسعف: انت على جسر الملك فهد يا عمي.. في السعوديه
بوخالد يتذكر: أي صح.. صح
المسعف يشوفه باهتمام: انت معاك سكر يا عمي؟
بوخالد يجلس: لا ما عندي سكر.. ليش تسأل
المسعف: الظاهره انه معاك.. صار معاك هبوط.. نسبة السكر عندك وصلت 30 وهذا خطر كثير.. يعني لو كنت ماشي بالسياره وانت منت حاس بحالك كنت بعيد الشر عامل حادث
بوخالد يتنهد بحسره: الحمدلله على كل حال.. الحمدلله
المسعف يبتسم: قول لي تشوف يدي بوضوح
بوخالد يشوف يده: أي بوضوح
المسعف: قولي كم صبع هذول
بوخالد بتعب: ثلاثه
المسعق: حلو جالس تستعيد وعيك
رائد يدخل: سلامات سلامات.. عساك بخير يا عمي
بوخالد مستغرب: انت من؟!!
رائد يبوس راسمه: انا رائد من طرف عمي جراح.. قول لي انت بخير
بوخالد يغمض عيونه ويتذكره: الحمدلله انا بخير.. وجراح وش دراه عني
رائد: الكل يدور عليك يا عمي.. والحمدلله لقيناك
بوخالد: ولدي اشلونه
رائد يبتسم: بخير ياعمي لا تخاف.. وزوجته بعد بخير
بوخالد يتنهد بهم كبير: الحمدلله
رائد: قول لي ياخوي.. ايش صار معاه
المسعف: معاه هبوط سكر حاد.. وماكان عارف ان معاه سكر.. يحتاج يشوفه دكتور مختص للحاله.. لازم يشوفه دكتور ويتابع معاه.. الحين الحمدلله صحته تمام.. بس ضروري احد يتابع معاه.. احتمال انه يحتاج لابر او حبوب تنظم السكر معاه
رائد: ان شا الله.. نوصل للبحرين ويلاقي الدكتور ينتظره.. تقدر تقوم يا عمي
بوخالد يشوفه بوجع: أي اقدر.. سيارتي وين
رائد: انا الي بسوق.. وسيارتي في واحد غيري يسوقها
بوخالد يرجع يغطي وجهه بيده: زين الي سويت.. انا تعبان
رائد: وكل امرك لله يا عمي.. كل شي بخير.. وما يستدعي الي تسويه بحالك
بوخالد يمسك يد رائد ويقوم: الحمدلله.. الحمدلله
ركبت السياره مع رائد.. كنت دايخ.. احس بتعب كبير.. تعب ملك جسمي وروحي.. وين قوتك يا بوخالد.. وين قوتي؟!! اسأل روحي وين قوتي؟!! اقتلت قوتي هالكلبه الي عشت معاها سنين وماني عارف حقيقتها.. معقوله اكون معمي؟!!.. ولا سحر اعماني عنها.. اشلون عشت معاها طول هالسنين اشلون!!.. تذكرت وقت الي وصلت البيت من بعد ما كنت عند خالد في السجن
بوخالد بكل حده: اشلون سحرتيهم.. اشلون
ام خالد بحقد: انا ما سويت شي.. هم يتبلون علي عشان الكلبه لبنوه
بوخالد واحلى كف: سألتج اشلون
ام خالد تمسك خدها: ما ادري لا تسألني.. انا ما اسوي جذي
بوخالد بكل حده: من وين عرفتي السحر وين رحتي عشان يسوونه لج
ام خالد تحاول تبتعد عنه: انا ما سويت جذي
بوخالد دفعها للحيط بكل قوته: بتقولين واياكي تكذبين.. بطلع روحك بيدي
ام خالد بعد راسها ما ضرب بالحيط بقوه كبيره: لاتظلمني.. لاتظلمني.. انا طول عمري احبك واحب عيالك.. مافي ام تسوي بولدها جذي..
بوخالد يسحبها له ويدفعها للحيط مره ثانيه: اشلون عرفتي ان الماي الي قال عنه احمد سحر
ام خالد وبدى راسها يلف: ماي مرشوش اش بيكون يعني.. انت تصدق اني آذي ولدي.. مستحيل
بوخالد ويرجعها للحيط من جديد: ما بتآذين ولدج انتي تبين تآذين لبنى وبس
ام خالد وبدت تنهار على الارض: لبنى.. ههه ليتني ذبحتها بيدي يمكن النار الي داخلي تنطفي
بوخالد يرفعها عن الارض ويمسك رقبتها بقبضته: يعني تعترفين انج مسويه السحر ياكلبه
ام خالد تبتسم: أي.. انا مسويته كنت ابي هالكلبه تموت.. انتظرت الحرمه الي تسوي السحر شهور لانها مسافره.. ووقت الي رجعت سوته لي.. ما ظنيت ان خالد ينضر من وراه.. كنت ابي لبنوه وولدها يموتون.. مستحيل اقبل احفادي تكون امهم لبنوه
بوخالد رماها على الارض وصار يرفس فيها بقوته: الله لا يسامحك.. حسبي الله عليك.. تبين تذبحين احفادي الله ياخذك.. ليش كل ذي ليييييييييييييييييش
ام خالد تأن من الاوجاع: ليش؟!! تبي تعرف ليش؟!! لانك عشقت هاجر.. تموت عليها وهي تموت عليك.. نسيت انها زوجة اخوك.. وهي نست اني زوجتك وبنت عمك.. فضلتها علي واغليتها.. طلباتها مجابه.. احلامها منفذه على طول.. دلعها امر وعليك تنفذه.. هاجر الي عشقتها من قلبك بس الي منعك عنها ناصر.. ناصر لو ماهو موجود كنت ما تأخرت وتزوجتها.. روحك كانت بتطلع عليها.. ودك فيها وتتمناها.. عشت سنين وانا اشوف حبك لها شوقك ولهفتك على جيتها.. ما استحيت من ناصر.. وما خفت على اخوك لو درا انك عاشق زوجته.. وزوجته عاشقتك
بوخالد صار يضرب فيها بجنون: منين جايبه هالكلام.. انا احب هاجر؟!! الله اكبر عليك وعلى ظنونك.. مالقيتي الا هاجر عشان تقولين اني احبها؟!! ومن متى دللتها ولبيت طلباتها؟!! من متى؟!! ومن ادلل هاجر؟!! وين راحت مريم الي اصريت اني اتزوجها بس كان شرطها اني اطلقك.. وين راحت عايشه الي حفيت على ترابها.. ومارضت هي بعد انها تكون زوجه لي بوجودك.. هذول الحريم الي عشقتهم ماهي هاجر.. شنو محسبتني ما اخاف ربي عشان احب زوجة اخوي؟!!
ام خالد بصراخ ووجع من الالام: تحبها يا منصور تحبها.. سمعتك وانت معاها في المطبخ تتغزلون في بعض.. سمعتكم بإذني تمنيت ناصر يكون جنبي ويسمعكم عشان يذبحك او يذبحها.. مستغفلينه بغيابه.. بس انا كنت موجوده وسمعتكم انت وياها
بوخالد مستغرب: متى صار هالشي متى!!
ام خالد: وقت الي رفضتك عايشه وانت كنت سعيد وتضحك.. وتقول لها ماهومهم عايشه تروح انا بتزوج غيرها واحسن منها.. وهي تقول لا تتشجع دربك مسدود.. قلت لها صح ما اقدر حاجز كبير بيني وبين الزواج.. حاجز ما اقدر اكسره.. حاجز ان كسرته عيالي بيضيعون.. تذكر ولا اذكرك اكثر
بوخالد يحاول يتذكر: ما اذكر ان هالشي صار!!!
ام خالد: تذكر زين.. وقت الي قلت لها ابيها تشبهك راعية بيت.. تحب زوجها وتموت عليه.. وهي تضحك فرحانه لانك تتغزل فيها.. وانت تقول لا تضحكين انا اتكلم من جد.. وهي تقول لك هالشي ما اقدر اسويه.. وانت تقنعها.. وتقول لها.. عشاني سويه عشان منصور المتعذب.. وهي تتعزز عليك وتضحك.. وتقول انت تعرف ان منصور غالي ومعزته كبيره.. بس هالشي لا
بوخالد يتذكر رجع يضربها بقهر: حسبي الله عليك من حرمه.. حسبي الله عليك.. هالكلام على عايشه.. انا كنت ابيها ترجع تقنع عايشه وهي ما راضيه.. الله ياخذك ويرميك بجهنم.. ناصر كان جالس معانا في المطبخ بذاك اليوم.. انا بحياتي ما تكلمت مع هاجر الا بوجود ناصر.. هي اساسا ما ترضى تجلس معاي غير بوجود ناصر.. لانها متربيه.. هاجر مارضت اني اتزوج عايشه واخرب بيتك.. كانت خايفه عليك يالي ما خفتي الله فيها وفي عيالك وفيني.. الله اكبر عليك من حرمه.. هاجر الي طول عمرها تدافع عنك.. وانتي هذي


يتبع