1:30 الظهر
فيلا العايله ..جناح صلاح..
السعوديه

ناصر بحنين: راحو البحرين
نوف: ايوا صلاح يقول ان الدكتور الي يشوف عمي جاي زياره.. عاد اخذ له موعد
ناصر يبتسم بحزن: خير ما عمل
نوف: يقول انه بعد حجز له في منتجع.. يبي ينسيهم الهم شوي
ناصر بحزن: وليه ما رحتي معه
نوف: قلت اخليه مع اهله ياخذو راحتهم معاه.. اكيد بقلبهم شي
ناصر: هو قالك تجين
نوف: عجز معاي.. بس انا ما حبيت
ناصر بضيق: زين الي ما رحتي
نوف: ليه ياخوي
ناصر: ما ابيكي تتركيني
نوف تضحك: يا عزي ناصر ما وده يفارقني
ناصر: ليه ما تعرفي قدرك عند ناصر
نوف: ربي يخليك لي ياخوي.. وانا بعد ما اطيق الدنيا بلاك
ناصر: ماني مرتاح مع بسمه
نوف بخوف: على ايش ناوي
ناصر يبتسم: ولاشي.. لا تخافين.. بس احس بالضيق
نوف: وهي لا تقول انها حست عليك
ناصر: حاسه وساكته.. هي محسبه اني زعلان عليها عشانها بلغت ابوها بالسالفه القديمه
نوف: ايوا احسن كذا.. لا تجيب طاري ليال قدامها
ناصر: ماني عارف اعيش بلاها
نوف: بس هي عايشه ومتزوجه وحامل بعد
ناصر بحزن: ايوا عارف
نوف موجوعه عليه: انساها ياخوي.. عيش حياتك

&&&&&&&&&&&&&&&&&&

2:30 الظهر
شقة ليال ..الصاله..
البحرين

تجمعو المجموعه عندي.. الكل حاضر.. بس جراح تأخر كثير.. كنت ابي اتصل فيه.. وبعدين تراجعت.. فكرت ان مافيها شي لو ادق عليه على الاقل اتطمن على اهلي.. وبعدين حسيت روحي سخيفه وجالسه ادور الحجه حتى اتكلم معاه.. ايش صار لي.. ما كنت كذا.. ما كنت افكر فيه كذا.. ليه اشغل تفكيري معاه.. كل ذا عشانه جاب اهلي.. راح ادفع له ثمن الي عمله كله.. تركت المجموعه جالسين ورحت عند بناتي وصبا معاهم.. صحيح انها نايمه بس كانت مبتسمه.. تاخذالقلب هالبنت.. احس ان امها غبيه الي رمتها.. هذي بس النظره لها تاخذ القلب.. رحت لبناتي الجالسات طبعا.. ضحكت عليهم كانو يسولفو بكلمات ماهي مفهومه تجبرني على الضحك.. صغر سنهم وعفويتهم حلوه.. كنت ماسكه يد كل وحده فيهم.. وهم يسولفو والله ولاني عارفه ايش يقولو.. تذكرت ابوي.. تركتهم ودخلت على البلكون.. كنت مشغوله على اهلي.. قررت اني ادق عليه
ليال على التلفون: الو
جراح بفرح: اهلين
ليال بحيا: تأخرت.. كل شي بخير معاك
جراح: الحمدلله كل شي بخير
ليال: هم معاك
جراح: طبعا لا
ليال بحده: مافهمت
جراح: هم بسيارة صلاح.. مالك ياقلبي ليه العصبيه الزايده هذي
ليال بجديه: اعذرني اني دقيت عليك مع السلامه
جراح بحده: ليال
ليال بجديه اكثر: قلت لك لا تقول يا قلبي.. ياريت نحافظ على الالقاب
جراح يبتسم: ماشي انتي تامرين.. طيب ايش لقبي
ليال بجديه: اخوي
جراح يمسك غيضه: خلاص ماشي.. الي تبينه.. مع السلامه
سكر الخط!! ماني مصدقه سكر الخط!! والله مصدق حاله.. طيب يا جراح انا بعلمك كيف تحترمني.. هذا الشي ما ينسكت عليه.. خلاص انا ما اقدر استحمل اسلوبه معاي.. الغلط مني كنت دقيت على تلفون صلاح.. ليه داقه على تلفون جراح.. غبيه الان يفسرها على كيفه.. ما غلط الرجال.. شافني داقه عليه.. غبيه يا ليال
ليال على التلفون: صلاح
صلاح: هلا ياروحي
ليال: وينك ياروحي
صلاح: قريب ياقلبي.. شويه ونوصل لك
ليال: من جا معاك
صلاح: امي وابوي
ليال: طيب ونوف!!!
صلاح: ما رضت تجي.. تركتها على راحتها.. وين رايح يا رجال الطريق ماهو من هنا
جراح: عشان اتأكد ان ماحد يتبعنا ياخوي
ليال مصدومه: تكلم مين!!!!
صلاح كاتم ضحكه: هذا جراح
ليال بحده: لسا مكلمته ما قال لي انكم معاه
صلاح: نوصل عندك ونتفاهم..سلام
المجرم.. المجرم.. كانو معاه.. ياربي كانو معاه واسمعوه يقول يا قلبي!! ماراح يفوتها لي يوسف النشمي.. انا عارفته زين.. بيقول لي ليه ما دقيت على تلفون صلاح اذا انا قلقه عليهم.. وااااي يمه قلبي.. راحت عليكي يا ليال.. حسبي الله على ابليسك يا جراح.. ايش اقدر ادعي عليك الان.. بس ايش يقصد صلاح بنوصل عندك ونتفاهم.. يا ويل قلبي.. عارفه ان يوسف النشمي ماراح يعديها لي.. اه ياقلبي.. شفت سيارة جراح وصلت.. زاد الخوف بقلبي.. صرت ماني عارفه افكر.. ايش ممكن يصير الي اليوم.. ايش ادعي عليك يا جراح.. سمعت صوت الجرس وانا سارحه بدنيا يوسف النشمي.. ياربي رجولي ماهي شايلتني.. ابوي يزورني ويسمع رجال غريب يكلمني كذا.. طارت رقبتك ياليال.. طلعت من البلكون ورميت نفسي بحضن امي.. ما كنت بوعيي.. كنت خايفه وشوي برتجف وبصارخ من خوفي.. يا ويل قلبي.. كنت فاتحه عيني على الاخر وامي تتركني عشان اسلم على ابوي.. رحت له ضمني لصدره.. وقتها حسيت بالراحه.. حسيت بالامان.. وبعديها على طول رجع لي الخوف.. عقلي في مكان وجسمي في مكان.. تركت ابوي ورحت اسلم على صلاح وعيني على جراح.. كان باين عليه انه معصب.. ياربي بذبحه.. بذبحه.. كنت بموت من جد واتكلم معاه.. مالقيت طريقه ثانيه.. رحت لخوله
ليال بهمس: ابي اكلم الحمار الي اسمه جراح
خوله مصدومه: نعم يما!!!
ليال تصر على اسنانها: دقي عليه تلفون وقولي له يطلع برا الشقه حتى اكلمه
خوله: يعني اقول له انج تبين تكلمينه!!
ليال تداري حدتها: ايوااا
خوله: حاضر حاضر.. هذا انا ادق عليه اهدي.. الو هلا جراح
جراح مستغرب: منتي صاحيه بيني وبينك خطوتين داقه علي ليه
خوله: اطلع برا الشقه العاقل الي جنبي تبي تكلمك
جراح: اه.. قولي لها ماني فاضي.. سكري الخط
خوله مستغربه: سكر الخط!!
ليال بحده: ايش قال
خوله: يقول ماهو فاضي
ليال بهمس: هذا ناوي على جناني.. انا رقبتي بتطير وهو يستهبل حضرته
خوله: ليش اش صاير!!
ليال بحده: ماصار شي..جيبي التلفون
خوله: خذي اهدي طيب احمد يشوفنا
ليال تأشر على احمد: خذي تلفونك ما بيه..بكلم احمد احسن
احمد يجيها: خير اش صار
ليال بحده: ابي اكلم جراح الان فاهم.. الان
احمد يبتسم: اش صار
ليال: اكلمه عشان اسأله عن اهلي يقول لي ماهم معي.. يكلمني وماخذ راحته ياقلبي وياقلبي.. ادق على صلاح اكتشف انهم معاه
احمد: وليش ما اتصلتي على صلاح من البدايه
ليال بحده: آآآآآه يا وجع قلبي.. دبرني رقبتي بتطير اليوم.. ابوي ماراح يعتقني
احمد يضحك: اهدي طيب انا اكلمه
تركنا وراح له.. شفته وهو يكلمه.. شوي ولقيت جراح معطيني ظهره.. واحمد باين انه عصب معاه.. كنت خايفه ابي اعرف كيف اتصرف.. احرجني مع اهلي.. جاني احمد
ليال: اش قال
احمد: يستهبل.. يقول لك اعترفي انه ماهو اخوكي وهو يطلعك من هالوضع
ليال تعصب: حسبي الله ونعم الوكيل.. ماهو اخوي.. قول له انه ماهو اخوي.. بس يرحمني
احمد يروح له: طيب طيب اهدي بس.. بروح اقول له
عبدالعزيز يجي: خير اش صاير
ليال: الحمار الي اسمه جراح يستهبل.. ما لقى احسن من هالوقت الي ابوي يكون فيه هنا حتى يستهبل
خوله بحده: بس لا تقولين حمار ما ارضى عليه
ليال بحده: انكتمي زين.. شوفي الموقف السخيف الي خلاني فيه
جراح يجي هو واحمد: خير ليال احمد يقول تبيني
ليال تمسك نفسها: اظن ان الوضع الي انا فيه ما انحسد عليه
جراح: ابي اسمع منك كلمة ماني اخوكي حتى اطلعك من الي انتي فيه
ليال تعض شفايفها: منت اخوي
جراح يبتسم: طيب انا ايش
ليال: اللهم طولك ياروح.. اخو صاحبتي
خوله تضحك: جبتيها والله
ام لينا تنادي: ليال يما اش فيكم واقفين بعيد.. يلا يما جعنا وين الاكل
ليال تمشي عنهم: يلا خالتي بقول لهم يجهزوه
خوله: حرام عليك لعبت باعصابها
جراح: عنيده.. خذي تلفونك معاكي وروحي لها
خوله تضحك: ماشي
عبدالعزيز: والله ياخوفي لا تقوم الدنيا عليك وتخرب الي انت جالس تسويه
جراح بخوف: تظن؟!!
عبدالعزيز يمشي عنه: اقول كلمها قبل هي لا تتهور.. وتسويلك حركه ما تكون حاسب لها حساب
وصلت المطبخ وكنت بعالم ثاني.. من جد خايفه.. ماني عارفه اتصرف.. جات خوله وكان باين علي الخوف.. ودي اطلع واروح عند بناتي.. بس والله عيبه امي وابوي عندي.. بدل ما افرح بهم يصير حالي كذا معاهم
خوله تعطيها التلفون: خذي
ليال بحده: ايش
خوله: انتي ليش ما تهدين.. يعني عارفه عن جراح انه يفضحج؟!!
ليال: شوفي تصرفه معي اليوم وانتي تقتنعي
خوله: كلميه على الخط
ليال تاخذ التلفون: جراح
جراح بهدوء: ياروح جراح
ليال: تعرف اذا اسلوبك ذا ما تعدل معاي.. والله ثم والله.........
جراح يقطعها: ليال وقت الي كلمتيني اهلك كانو بسيارة صلاح.. ولما كلمتي صلاح كانو لسا راكبين معاي
ليال براحه: من جد
جراح: ايوا من جد.. يا خوافه انا من متى اسعى لك بضر
ليال: جراح بقى شي
جراح: تدللي
ليال: غير اسلوبك معاي
جراح: من عيوني
ليال: طيب اتركني حتى اجهز الاكل مع خوله
جراح: ليال
ليال: نعم
جراح: ماني اخوكي صح
سكرت الخط بوجهه.. وحده بوحده والبادي اظلم.. ضحكت واعطيت خوله تلفونها.. اساسا كل شي كان جاهز وخوله اعطت اوامرها للشغلات حتى يطلعو بالاكل.. جيت بطلع معاها من المطبخ
جراح واقف يشوفها: تسكري الخط بوجهي!!
ليال بثقه: البادي اظلم
جراح: والله عاد
ليال بثقه: تصدق عاد
جراح: طيب يا ليال.. انا اوريكي
خوله: اش بتسوي يعني
جراح: احبك ياليال..احبك موت
استخبيت ورا خوله.. حسبي الله على ابليسك يا جراح.. ماتستحي يا جراح.. كذا عيني عينك.. خوله راحت في نوبة ضحك.. وانا واقفه مصعوقه بالي سمعته.. وهو واقف والابتسامه تجنن على وجهه.. يا خوفي لا يعملها ويطلبني من ابوي اليوم.. يسويها.. كنت واقفه ماكان ودي اتحرك من مكاني.. ولا ودي اطلع للصاله حتى ما اشوفه
خوله: جراح مشى.. يلا خلينا نطلع
ليال: روحي لحالك اتركيني شوي
خوله تطلع: براحتك
جويل: ليال يا ماما انتي عارفه انو بيحبك
ليال: بس انا لا
جويل: شو انتي لا!!.. يا ماما حرام تروحي على نفسك واحد بيحبك هيك
ليال: بناتي
تركتها وطلعت وجات عيني في عينه.. ابتسم لي ابتسامته الي تعجبني.. صديت عنه ودخلت لغرفة البنات.. سكرت على نفسي الباب.. وجلست معاهم.. مستحيل هالشي يصير.. ماراح اسمح اني اضيع بناتي مني.. هذول روحي


&&&&&&&&&&&&&&&&&&


6:00 المغرب
فيلا لافي ..غرفة لافي..
السعوديه

لافي على التلفون: وتأكدت من حجز المنتجع
مسعود: ايوا عمي
لافي: وما في اسم ليال
مسعود: تأكدت من اسماء النزلاء كلهم حتى الاسر الي حاجزه ولسا ما وصلت للمنتجع
لافي: تمام ..خلاص ارجع
مسعود: عمي ما تبي احجز لنفسي واراقبهم
لافي: ماله داعي.. ليال ماهي معاهم
مسعود: خلاص انا راجع عمي تامر شي ثاني
لافي: مافي اخبار عن ناصر
مسعود: غير انه رجع لزوجته القديمه مافي
لافي: اعمل الي قلت لك عليه لشغله
مسعود: حاضر عمي..سلام
مالها اثر.. مالها اثر.. حتى الحرمه الي تزورهم ورجالي ماهم عارفين هي مين.. ما طلعت ليال.. وين راحت.. لا لها اثر بالسوق.. ولا لها اثر بالدنيا.. صلاح وماله أي اتصال خارج عن المألوف.. ويوسف جالس بالبيت.. سلطان كان من البيت للشغل ومن الشغل للبيت
وين راحت بس.. هالكلب الي كنت محسب انه رجع لها ولقاها ومخبيها عني.. رجع الزفت بسمه وعايش حياته.. ناصر الي يموت في تراب ليال.. معقول يتزوج غيرها.. او انه يبي يتوهني.. ليال تعمل فيك كذا يا لافي.. آآآآآآآآآآآه يا مهرتي وين بتروحي مني بلقاك يعني بلقاك


&&&&&&&&&&&&&&&&


7:00 الليل
المنتجع ..شقة يوسف النشمي..
البحرين



ليال بحده: ايش الي تقولوه!!!
بوسلطان: سمعتي الي قلته.. جلسه لحالك هنا من غير رجال لا
ليال: خلاص ارجع السعوديه
بوسلطان: كمان لا
ليال: لا يبا.. الله يخليك.. انا جربت حظي بالزواج وخلاص.. ابي اعيش لبناتي.. الله يخليك يبا.. لاتجبرني على شي ما ابيه
ام سلطان: ماهو جبر يما.. حنا نتكلم
ليال بخوف: ايوا يما ايوا.. نتكلم.. بس نتكلم.. انا ما ابي اتزوج
صلاح: انتي ليه خايفه كذا
ليال: عشان الي برقبتي بنات ناصر.. ناصر بن لافي.. فاهم من هو لافي؟
صلاح: فاهمين وعارفين.. طيب وبعدين بنظل طول عمرنا نقول لافي.. يا روحي انتي.. ماله داعي الخوف
ليال: انتو تتكلمو وواثقين انكم ماراح ترجعو السعوديه الا وانا متزوجه
بوسلطان: منتي غبيه.. اظن انك فاهمه ومستوعبه الي نقوله وماهو جديد عليكي
ليال: جراح؟
صلاح يبتسم: ايوا جراح.. امس كان بالسعوديه وطلبك من ابوي
ليال تمسك يد ابوها: يبا لا تقول انك اعطيته كلمه
بوسلطان: وبترديني اذا اعطيته؟!!
ليال في حيره: ما اقدر ارد كلمتك يبا بس.. بناتي
بوسلطان يحضنها: انا تفاهمت معاه على كل شي.. حتى البنات.. وعدني انه بيحطهم بعيونه
ليال: كلام يبا.. كلام.. ماحد يربي بنات غيره
صلاح: ابوي قال له هالكلمه وهو رد انك انتي كمان بتربي بنت غيرك
ليال تدمع عيونها: يبا الله يخليك لا
بوسلطان: ما عندي خيار ثاني
ليال تبكي: لا ترميني يبا
صلاح يمسكها من كتفها: اسمعيني زين.. ما اقدر امشي واتركك لحالك.. انتي قرري.. اما اني اجلس معاكي احميكي.. او اترك امي وابوي هناك لحالهم بعد سلطان.. انتبهي اني مشتت.. امي وابوي هناك وانتي هنا.. سلطان كان شايل عني حمل كبير.. الان خلاص سلطان راح.. انتي اختاري


&&&&&&&&&&&&&&&&

- بينجح جراح في الي ناوي عليه؟
- بيقدر يكسب قلب ليال؟
- بتوافق ليال ولا بترده خوف على بناتها
- ولافي بيقدر يلقاها؟!! ولا بتكون بعيده عن عيونه

يسلموا على النقل
وربي يشفي دانه وترجع ان شاء الله

اللهم ارفع عنا من البلاء ما نعلم ومالانعلم وما انت به اعلم انك انت يا الله الاعز الاكرم
اللهم فرج كرب المكروبين وهم المهمومين وشفى مرضانا وارحم موتانا يارب العالمين
اجر وعافيه وخير يارب اللهم اجعله فى ميزان حسناتها يوم اللقاء العظيم ويارب اللهم امنحها شفاء لا يغادره سقما يارب العالمين
ددمتى بكل خير وعافيه اختك المصريه