السلام عليكم ورحمة الله وبركاته


اتنمى لكم قراءة ممتعة ............

6:00 المغرب
شقة ليال .. غرفة مزيان..
البحرين
خوله تحضن مزيان: ليش ما صرتي تتكلمين معاي مثل زمان.. مزيان ما كنتي تخبين عني شي.. حتى حسن كنتي تقولين لي عنه.. ليش الحين ما تبين تتكلمين
ليال: يمكن لاني موجوده
مزيان بعتب: لا تقولي كذا
خوله تلعب بشعرها: مزيان حسن وقت الي مات ما كنتي جذي.. كنت اقوى من هالحال الي انتي فيها
مزيان: صورته في وجهي هاليومين.. تطاردني وين ما اروح
خوله مستغربه: اش هالعبط.. صورته تطاردك؟!!
ليال تمسك يد خوله تمنعها تكمل: مزيان حبيبتي.. طيب تكلمي عنه كيف كنتي عايشه معاه يمكن هالشي يخفف حزنك شوي
مزيان تبتعد عن خوله: اتكلم عنه!! لما تزوجت حسن كنت طايره به.. كنت اتمنى افرش له الارض سعاده.. رجعت السعوديه وعشت براحه معاه.. امه كانت طيبه اما اخته كانت كبيره في السن وما تزوجت.. ماكنت ارتاح بوجود اخته.. كنت اتضايق من كلامها.. ما كنت اقول له أي شي عن الي يصير لي معاها.. سعادتي معاه تكفيني.. صحيح كان عصبي.. بس طيب مره.. اخته كانت تحاول تدمر حياتي معاه.. كانت تتقول علي باشيا ماكانت تصير.. ولما يروح يسأل امه.. المسكينه تكذب اخته وتقوله ان مزيان مافي منها.. انا رفضت كثير قبله كنت استخير وما كنت احس براحه ابد.. بس معاه غير حسيت براحه حلوه.. زي ماكانت حياتي حلوه بوجوده.. بس الله ما كتب اني اكمل حياتي معاه.. راح وماصار بحياتي غير جراح وصبا
ليال فاهمتها: وقلتي تدفني نفسك بالحيا مع جراح وصبا.. وكأن قلبك ماله أي قدر عندك
مزيان بحزن: قلبي متعلق بحسن
خوله: تبين تقتعيني ان الحزن الي انتي فيه.. على حسن!!.. مزيان محنا عيال حولك.. ترانا نعرف للدنيا ونعرف اش يعني الحزن ولمن.. الي انتي فيه ماهو حزن على زوجك المتوفي
مزيان تشوفها بحزن: اجل ايش
خوله بجرئه: تحبين.. مبين انك تحبين
مزيان بحده: ومحسبتني خاينه؟!!
ليال: انتي محسبه انك لما تفكري بغير زوجك المتوفي جريمه؟!!
مزيان متردده: .................................. يعني اذا فكرت بغيره ما اخونه؟!!
خوله مصدومه بالي تسمعه: لاطبعا ما تخونينه من قال انك تخونينه.. لو حي تعتبر خيانه وحرام وما يجوز.. بس حسن ميت يعني تقدري تتزوجي عادي
ليال مستغربه: كيف يعني تخوني ميت!!
مزيان بتعب: ما ادري.. هذا التفكير الي مسيطر علي هاليومين
خوله: ليش ما سألتيني ليش ما قلتي لي عن هالاحاسيس.. ما ابي اعرف عشانه فضول.. بس على الاقل اوضح لك شي منتي عارفته
مزيان بلخبطه واضحه وماهي عارفه اش تقول: خوله ماني غبيه وعارفه الحلال من الحرام.. انا.. انا ابي اعيش مع حسن وبس.. بس بتفكيري ذا احس اني اخونه
خوله تبتسم: شكلك تحبين وماحد داري عنك
مزيان تستسلم ودموعها تنزل: هو احساس.. مجرد احساس لواحد ما اظن يفكر فيني حتى
ليال تضحك: اخيرا اعترفت.. وااااااااي ياقلبي ويني عن هالاحساس.. مزيان تحب وانا ما ادري عنها
مزيان ملخبطه: ماكنت ابي اقول لاحد.. بس ماني قادره استحمل هالشعور.. شعور اني اخون حسن وممكن اعرض جراح لاحراج اذا رفض الي افكر فيه.. ههه هذا اذا تقدم لي
خوله: من هو ذا
مزيان: ما ابي اقول اسماء.. خوله الله يخليكي اتركيني بهمي.. كنتي تبين تعرفي عن حزني وهذا انتي عرفتي عنه.. غير كذا لا
ليال: خلاص ياقلبي.. ماهو مهم اسماء.. المهم انك تعرفي انه في من جا يخطبك.. يعني اذا ظليتي ساكته كذا ممكن الي تبينه يسمع بخطبتك وبعديها ما يصير نصيب بينكم ابد
مزيان فتحت عينها: ومن ذا!!
خوله: قولي واحنا نقول
مزيان متردده: لالا ما ابي اقول اسمه.. واذا على الي جايني قولو له ما ابيه
خوله بقل حيله: هذي اخر كلام
مزيان تبتعد عنهم: ايوا وماعندي غيره
ليال: فكري يا مزيان
مزيان متردده: لالا
خوله: يابنت احنا ستر وغطا عليكي.. قولي اسمه وبتشوفين اشلون نساعدك
مزيان: لا ما ابي احد يساعدني.. كل الي ابيه انه من نفسه يجي يخطبني.. حتى من غير ما احسسه باي شي.. ابيه من نفسه يقول ابي مزيان
خوله فقعت ضحك على حالها: من شوي كنا بحسن.. وذكرى حسن.. الحين تغير الوضع من جبنا سيرة..... اش قلتي اسمه؟!!
ليال تضحك على خوله: اتركيها لا تضحكي عليها وتعاند معنا.. خليها على راحتها.. الي تقوله ماهو عيب او غلط.. هي امنيه واتمنى من الله انه يحققها لها
مزيان تشوف ليال بامتنان: خلصيني من الي جاي.. انتي كلمي جراح.. قولي له اني افكر بحسن
خوله: خلاص ياليال قولي لجراح الي قالته لك.. وعيني عليك يالي ببالي
ليال بحزن: مالي قلب اقول لعزيز هالشي
مزيان انفتح كل شي بوجهها من سمعت الاسم: ........................
خوله: تخسري الرجوله والعقل والطيبه يامزيان.. عبدالعزيز مافي منه
مزيان انربط لسانها: .....................
ليال: عيني عليك ياخوي.. حتى البنت الي تمنيتها طلعت تفكر بغيرك
خوله زاد التمثيل عندها: خلاص خلاص ليال لا توجعي قلبي اكثر عليه.. ماله نصيب.. الله يوفق مزيان مع الي تبيه
ليال تتنهد: ان شا الله
خوله توقف: انا رايحه لشقتي اقول لعبدالرزاق علي رد مزيان
مزيان مسكت ثوب خوله: انتظري شوي
ليال وقفت: خليكي معاها اكيد تبي تكلمك.. انا رايحه اشوف طريقه ابلغ عزيز فيها
مزيان وخلااااص: ليال انتظري شوي
ليال لفت عليها: خير
خوله تقوم بسرعه وتضحك: اجلسي معاها انتي خليني ابشرهم بموافقتها


في الصاله
عبدالرزاق يشوف وجه زوجته: البشاير على وجهها افرح يا عبدالعزيز وارحمنا
جراح يوقف لها: بشري
عبدالعزيز يتبعه: خوله لا تلعبين باعصابي
خوله تضحك: موافقه
عبدالعزيز يحضن جراح: الف مبروك
عبدالرزاق يضحك: جراح المفروض يبارك لك
جراح من الفرح: ماعليك منه زين.. مبروك علي نسبك يا عبدالعزيز
عبدالعزيز: ربي يبارك لي فيك.. ما تتخيل فرحتي
خوله: اسمعني كل الي ابيه تسألها موافقه وهي ترد عليك.. لا تزودها معاها تراها على اعصابها
جراح يبتسم لها: ولا يهمك.. ما قصرتي يام سالم
خوله بفرح: اش تقول انت هذي اختي.. يلا روح خلنا نفرح وننبسط
عبدالرزاق يجلس: اسمع مني الحين نجي للجد
عبدالعزيز يجلس جنبه: اكيد جد.. لاتقول اني احلم وانا ما ادري
عبدالرزاق يضحك: لا طبعا ما تحلم الله يتممها على خير
عبدالعزيز يبتسم: الله يسمع منك
عبدالرزاق: ابيك تتصل على خليفه وامه حتى يجون عزوه لك.. صحيح احنا كلنا اهلك وعزوتك.. بس دام الله ميسر الامور بينك وبين اهلك خلاص انسى الي راح
عبدالعزيز بطيب نفس: اكيد ياخوي.. انا من نفسي قلت بقول لهم
عبدالرزاق متردد: وامك
عبدالعزيز ينزل راسه: ...........................
خوله بضيق من زوجها: انا رايحه اشوف العيال
عبدالرزاق يمسك كتفه: لا تزعل مني.. انا اذكرك بس.. وانت بكيفك اختار
عبدالعزيز يشوف عيون عبدالرزاق وبعدها رفع تلفونه يتصل: الو
مشعل: اهلا من معاي
عبدالعزيز: مشعل هنا
مشعل مستغرب: أي نعم انا مشعل من معاي
عبدالعزيز: انا عمك عبدالعزيز
مشعل بفرح كبير: هلا وغلااااااااااااا.. يا حي الله هالصوت.. اشلونك ان شا الله بخير.. عمي قول الصراحه انت بخير.. عمي تراني ما ادل لك على طريق ولا كنت جيتك اطير.. لما صاحبك جا صدقني حاولت اسأله عنك وعن عنوانك بس مارضى يدلني عليك
عبدالعزيز بفرح: الله يحفظ يايبا.. ما منك قصور.. انتو بخير.. ابوك وجدتك بخير
مشعل متردد: جدتي بخير.. وابوي..................
عبدالعزيز يحس: اش صار قول
مشعل: ابوي محبوس
عبدالعزيز غمض عيونه: نادي جدتك ابي اكلمها
مشعل: ان شا الله دقايق بس
ام عبدالعزيز بعد ما اخذ مشعل التلفون لها ركض قال لها انه عبدالعزيز على التلفون وهو فرحان: عبدالعزيز!!
عبدالعزيز وجعه قلبه: يما
ام عبدالعزيز بحده كبيره: ولك عين تتصل يالكلب.. انت وش تبي مني وش باقي تسويه فيني.. يالي ما تستحي حرمتني حياتي وجات على ولدي تحرمه حياته.. حسبي الله على سواتك يالي ما ربيتك.. يالي ماعرف ابوك يربيك.. يا قليل الحيا
مشعل بحده: يماااااااااا شالي تقولينه
ام عبدالعزيز: انكتم انت بعد حرق قلبي على ابوك.. اكيد هو الي بلغ عنه والشرطه امسكته عارفته زين وعارفه فعايله.. هالكلب ذي وش تنتظر يطلع من ورا يده
عبدالعزيز بغصه: يما انا مالي دخل بعيسى من اخر مره جيتكم فيها.. تراني كنت بالسجن
ام عبدالعزيز: ليتك ما طلعت منه.. ليتك ما طلعت منه وبقى عيسى بحضني
عبدالعزيز بوجع: قاصرك شي تبين شي
ام عبدالعزيز: دز فلوس باسم مشعل.. دز فلوس تكفيه وتكفي العيله الي برقبته.. هذا اقل شي حتى ترد حق عيال اخوك الي سجنته
عبدالرزاق بعد ما شاف عبدالعزيز نزل التلفون من اذنه: خير
عبدالعزيز يحاول يبتسم: سكرت الخط.. المهم عندها ادز فلوس

&&&&&&&&&&&&&&&&

7:15 الليل
شقة ماجد ..الصاله..
السعوديه

ماجد كان يتابع التلفزيون: صحيتي حبيبتي
عبير دايخه: تركتني انام لهالساعه؟!!
ماجد: ما شفت احد من اهلك اتصل يسأل عنك قلت اخليكي نايمه
عبير بمزاج زفت: لا تجيب طاريهم.. اتركني مبسوطه
ماجد يحضنها: عجبك الحشيش الي دخنتيه
عبير تضحك: عجبني وبس.. ابي منه كميه كبيره
ماجد: الفلوس الي معاي تجيب كميات صغيره.. بس انا ما عندي فلوس حتى اجيب كميه كبيره يا حلوه
عبير: ولا يهمك جيب كميه تكفينا شهر.. وانا اجيب لك الفلوس
ماجد: عندي الان قطعه وش رايك نبتدي.. ولا ننتظر لبعد شوي
عبير: شوف انا بعد ساعتين بروح الفيلا.. حتى اجيب فلوس تكفينا
ماجد: يعني على الساعه 9:00 تبين تروحين!!
عبير بلا مبالاه: ايوا وايش فيها
ماجد: بينتبهو انك راجعه من الشارع وانتي البارح قلتي لامك انك بغرفتك وماتبين احد يضايقك
عبير تشوفه بجديه: ايش رايك نتزوج
ماجد رفع حاجب: نعم!!
عبير تضحك: ماهو حبا فيك.. بس حتى اطلع معاك على كيفي
ماجد رجع يشوف التلفزيون: قبل لا تدخلين الشقه قلت لك لا يجي يوم تقولين لي فيه يا زواج.. انا ما احب هالسيره
عبير دخلت الغرفه وسكرت الباب بقوه: الي يسمعك يقول اني بموت عليك.. كل الي ابيه اطلع من بيت لافي وبس.. لو انك الي براسي كنت شفتني ايش اعمل حتى اخليك تعشق الارض الي امشي عليها.. ياليتك غسان.. ياليتني عايشه مع غسان الان واتدلع عليه.. هذاك الي من جد بقتل روحي حتى ارضيه.. بدق اسمع صوته.. ليتك ترد ياغسان مشتاقه اسمع اصوتك
غسان بكل عصبيه: كم مره قلت لك لاتدقين.. لا تدقين ما تفهمين الكلام انتي
عبير بفرح: هلا حبيبي وحشتني ياعمري
غسان بحده: عبيييييييييييييييييييييييير
عبير مستغربه: وعارف انا مين!! وتارك النار تاكل فيني.. عارف اني بنت خالك وتعذبني!! حرام عليك يا اخي
غسان بحده: يازباله تكلميني انا عن الحرام.. والي انتي تعمليه هذا ايش اسميه
عبير بدلع: حب, عشق, وله, غرام يا غسان غرام
غسان يسمعها التسجيل: ايش رايك
عبير تضحك: غسان ايش ذا.. حبيبي انسى الي سمعتني ياه.. هذا ما يأثر فيني ياقلبي.. الي سمعته ما يخليني اتنازل عن حبك.. ايش رايك لو تترك العنود وتتزوجني.. بعيشك بدنيا ما تملها.. بكون خادمه لك وانت الملك الي مخلوق حتى يأمر وانا انفذ اوامره
غسان بشفقه: عبير وجعتي قلبي على حالك.. تعرفي انك مثار للشفقه.. روحي يابنت الناس تراني ما ابي لك الفضيحه.. لا تدقين علي حتى ما تصير مشاكل.. وخصوصا مع ابوكي.. اسمعيني زين.. الي جالسه تقوليه هذا ماراح يصير.. اما اذا عاندتي واستمريتي فيه ماراح تلاقي غير العذاب اما بيدي او بيد ابوكي او بيد ناصر.. وانتي اختاري
عبير بكل حب: اختار العذاب على يدك حبيبي.. انت ما تعرف قد ايش احبك.. ما تعرف ايش ممكن اعمل حتى احصل عليك.. غسان لا تجبرني على اني اهدم بيتك بيدي واخليك تحبني غصب عليك.. غسان حبني زي ما احبك.. حبني وانا انسيك كل شي شفته بحياتك.. غسان وعد علي اني اعيشك بجنه ماكنت تحلم بها
غسان بكل هدوء: نار العنود ولا جنتك.. الي مثلك زباله ياعبير مافي رجال يعمل للي زيك وزن او تقدير.. انتي وحده ما تربيتي ماتعرفي السنع ماتعرفي الحلال من الحرام.. لافي عمل منك زباله ماحد قادر يحبها او يقترب منها.. شفتي من قبل احد عشق زباله!!
عبير تضحك بعد ما سكر غسان الخط في وجهها: بخليك تركض وراي غسان.. بخليك تبوس رجلي على الي بسويه فيك وبحياتك.. بخليك تندم لانك اخترت العنود علي
ماجد يدخل عليها الغرفه: قومي اوديك الفيلا انا طالع الان مع اصحابي
عبير غيرت ملابسها: يلا انا بعد ماني طايقه وجودك
ماجد مسكها من ذراعها بقوه: خير!! سمعيني ايش قلتي!!
عبير بتحدي: الي سمعته.. اذا كان طاري الزواج قلب حالك.. فانا ماني حابه اتزوج عشانك.. كل الي ابيه اني اعيش بحريه
ماجد بحده: تعيشي بحريه!!.. اكثر من الحريه الي انتي فيها ايش تبين
عبير تبتعد عنه: بجهز لك الفلوس بكره.. تجيني وتجيب معاك الكميه الي ابيها
ماجد: يعني ما تبين ترجعي هنا!!
عبير بملل: لا طبعا
ماجد يحضنها: واهون عليكي.. عبير ياعمري.. انا قلت لك ما احب سيرة الزواج.. انتي قلتي لي انك بتعيشي معاي من غير زواج.. الان جايه تغيري رايك؟!!
عبير تبتعد عنه: يلا ماجد لا تتأخر عن اصحابك

&&&&&&&&&&&&&&&&&&&&&&


يتبع

7:40 الليل
جناح صلاح ..غرفته..
السعوديه
صلاح بخوف: مالك
نوف بتعب: نادي خالتي.. اظن اني بولد
صلاح: بشيلك بشويش
نوف بخوف: صلاح ولدي.. لايذبحه لافي
صلاح يلبسها العبايه: ما يقدر يقرب له.. انسي لافي فكري بولدك
نوف ماهي قادره تتنفس: دق على بسمه ما ابي اكون بروحي
صلاح ماسكها بقوه ويدق على ناصر: الو ناصر
ناصر يفز: خير ايش هالصوت الي عندك.. ايش صاير
صلاح: اختك على وجه ولاده.. نادي زوجتك لي.. دق على امي وعمتك خلهم ينتظروني بالطابق الاول
ناصر بخوف: يلا يلا انا جايك
نوف تبكي: صلاح خايفه على ولدي
صلاح شالها بيده: اسمعيني زين.. ماهو وقت انك تضعفي.. الوقت الي بتتركي الخوف يلعب بعقلك بتفقدي ولدك.. سامعه.. هالمره اذا الولد صار عليه شي.. بيكون السبب خوفك
نوف بخوف: خلاص خلاص.. ولا يصير على ولدي شي
ناصر جاي ركض: نوف روحي
صلاح يمشي بسرعه: دق على عبدالله وقوله يجيب سوسن ويجون يجلسو مع ابوي.. خليهم يدقو على منال بعد.. ما ابي ابوي يكون لحاله
ناصر يدق: حاضر
غسان يوصل له: ها كل شي بخير
نوف بخوف: انا بخير وماني خايفه.. وماراح يصير شي على ولدي
غسان مقدر حالتها: اكيد يانوف.. يلا كلنا معاكي لا تخافين بسمه تلبس وجايه
نوف تبكي: انت لا تجي.. خليك مع اختي.. اخاف لافي يذبحها.. غسان لا تجي الله يخليك
صلاح: نوف اش قلنا.. عن الخوف عاد.. غسان خلك مع العنود وابوي.. لا تتركهم الا اذا جات سوسن ومنال وازواجهم.. اكد على الحراس يشددو حراسه اذا بتجي المستشفى
غسان: ماشي ماشي.. بتصل على المستشفى يجهزو كل شي
نوف تصرخ عليه: لا تنسى ولدي ابيه يكون جنب غرفتي
غسان يوجعه قلبه عليها: ما نسيت يا نوف.. توكلي على الله

&&&&&&&&&&&&&&&&&

9:00 الليل
شقة ليال ..غرفة مزيان..
البحرين


جراح حاضنها: طيب ليه منتي راضيه تسكتي
مزيان تبكي بحضنه: ...........................
جراح بخوف عليها: ما تبينه.. تبيني ارفضه يعني
مزيان تحضنه بقوه: .......................
جراح بجديه: ضروري اعرف.. حبيبتي لازم اعرف اذا كنتي لسا تفكري بحسن ولا لا.. قلبي ما ابي اظلمك عشان عبدالعزيز رجال زين وانتي تفكري بزوجك.. وما ابي اطلم الرجال واخليه يعيش معاكي وانتي ما تبينه
خوله تدخل عليهم: كم ساعه صار لك معاها وهذا حالها ماتغير.. قوم اشوف خلني اشوف وش اخرة هالدلع معاها
جراح يضحك: تتدلع هذي مزيان.. بس الاول ترد علي.. اش قلتي حبيبتي
مزيان تشوف خوله تستنجد بها: .......................
خوله: يلا طيب اتركني شوي معاها عبدالعزيز جالس على اعصابها محسبها رافضته
مزيان رفعت راسها تشوف خوله بخوف: .........................
خوله: لا تشوفيني جذي.. الرجال من حقه يخاف ويحسب رفضك.. من سمعتي انه خطبك ماغير ماسكه جراح تبكين!! وبعدين
جراح يقوم: خليني اشوف عبدالعزيز.. وبرجع بعد شوي اخذ رايك النهائي.. ماشي مزيان
خوله: روح انت وما عليك
مزيان تمسح دموعها: ماني مصدقه.. ماني عارفه ليه ابكي
خوله تضحك عليها: خوفتينا جعلك العافيه.. وآخرتها منتي مصدقه
ليال تضحك: كنت ساكته طول ماهي تبكي بحضن جراح.. خفت يفهم من كلامي انها تفكر فيه وماهي مصدقه زي ما تقول
خوله تضحك: زين الي التزمتي بالصمت
مزيان تحضن خوله: من جد يبيني.. يفكر فيني
خوله: وانا اش عرفني.. ياخبله لو وافقتي من ساعتين عليه زمانه صار زوجك وهو يجاوبك الحين
مزيان بفرح: لا ماهو بهالسرعه عاد.. اصبري شوي خليني اصدق حالي بالاول.. ايش تعملي
خوله تتصل تخليه سبيكر: هلا عبدالعزيز
عبدالعزيز بخوف: ها.. رجعت بكلامها؟!! ما تبيني صح
خوله: لا ياخبل انت بعد
عبدالعزيز بحده شوي: شوفي لا تطولينها معاي ماني طايق روحي.. تراني بعيد عن الي حولي وما ابي ارجع اجلس معاهم.. ضايقه بي الدنيا ياخوله
خوله بندم: انا آسفه نسيت روحي.. هالخبله لفت راسي
عبدالعزيز بحده: لا تقولين عنها خبله
خوله تضحك: وليش عاد كل ذي حب
عبدالعزيز فهم من حركة خوله ان مزيان تسمعه: شوفي تراني احبها.. ومن زمان ودي افتح الموضوع مع جراح.. بس انتي عارفه ظروفي.. يمكن هي خايفه مني ومصدقه الي مريت فيه؟!!
مزيان ماحست بروحها: لا بالعكس
ليال فقعت ضحك: ........................
خوله ميته ضحك: كلمها طيب
عبدالعزيز براحه: بكلمها واخذ راحتي بالحكي بس وهي زوجتي.. جذي لا.. مزيان انتي موافقه
مزيان تهز راسها لخوله: ........................
خوله تضحك: تهز راسها ياعبدالعزيز.. البنت موافقه
عبدالعزيز بفرح: اطلعي لجراح وقولي له
خوله: من عيوني.. يلا مع السلامه
مزيان بفرح: نسيت حالي رديت عليه وما حسيت بحالي
ليال تبتسم: وماله كل شي عفوي صادق.. دام شعوك صادق تجاهه يبقى حبك له صح
خوله تبتسم: اسمعي مني وخليه يملك الليله
مزيان: لا خوله الله يخليكي لا
خوله مستغربه: وليش عاد.. يا خبله ليش تأجلين الفرح
مزيان بحيا: ابي اشتري ملابس جديده.. ماعندي شي جديد.. ابي اجلس معاه وانا.. انا..ممممممممممم
خوله تضحك: خلاص فاهمين.. اقول لجراح بكره الملكه.. وانا وانتي من الصبح ننزل نشتري الي تبينه
مزيان تمسح دموعها: ايوا خلاص كذا كويس
ليال تسحبها: قومي غسلي وجهك.. الي يشوفك ما يقول عروس ومبسوطه ان حبيبها متقدم لها.. قومي جعل الفرحه ما تفارق قلبك يارب
خوله: يلا بسرعه عشان تتكشخين وتجلسين مع الحريم نفرح شوي بهالخبر الحلو.. الليله عاد سهر لحد الصبح وناسه وضحك

مع الرجال

عبداللطيف يفتح باب الشقه: لااااااااااااااا انت بعد!! يا اخي ارحمني من شوفتك.. يكفي بالنيابه هنا بعد
خليفه يضحك: بتبتعد ولا القي القبظ عليك
عبداللطيف يفتح الباب: حيا الله من جا.. يا هلا ومرحبا والله.. حياك هنا بالمجلس
خليفه يدخل المجلس: السلام عليكم
عبدالعزيز يحضنه: هلا بك والله.. اخيرا جيت
خليفه بهمس: امي واقفه برا تبيك
عبدالعزيز بفرح: حياك رايح لها
طلعت من الشقه ووقفت شفت اريج وسعادتها بشوفتي.. اريج الي قالو اني اعتديت عليها.. وقفت كرامتي امنعتني من اني اقترب من عمتي الي اتهمتني وما صدقت اني ما لمست بنتها.. لقيتها من نفسها تقرب مني وتحضني.. بكت وهي بحضني وانا اسمع كلامها ودفاعها ماهو عن نفسها.. دفاعها عني.. كنت محتاج لحضن ام.. دعيت ربي انه يرزقني بحضن ام.. وهذا انا فيه.. وقفت مده لحد ما حسيت بالراحه.. ابتسمت لها وقلت لها اني ماني زعلان مهما كان فهي امي الي ربتني.. تناسيت امي والكلام الي قالته.. خلاص يكفيني حزن.. ابي ابتدي اعيش.. من حقي ارتاح.. دخلتها للحريم واستقبلتها خالتي ام لينا وبعدها خالتي ام عبداللطيف.. دخلت المجلس وقلت لجراح وعبدالرزاق حتى يتصلون على حريمهم ويستقبلونها.. جلسنا مع بعض ضحك.. شوي وابتدى خليفه بكلام جدي.. وطلب مزيان بصوره رسميه.. تمنيت عبدالرزاق هو الي يقوم بهالخطوه لانه اول من قربني من نفسه ومن هالمجموعه.. رحب جراح بخليفه وقال له ان نسبي يشرف أي رجال.. وانه موافق على خطبتي بشرط اني اخلي مزيان بعيني.. كانت عيوني بعيون جراح وانا اوعده بالخير.. واتمنى من الله يقدرني اني اسعدها ويرزقني منها بالذريه الصالحه

&&&&&&&&&&&&&&&&&&&

10:30 الليل
بيت مسعود ..غرفة شهد..
السعوديه

مسعود يدق الباب: شهد.. صاحيه يبا
شهد فتحت بسرعه: ايوا يبا صاحيه
مسعود: مسكره تلفونك زي ما قلت لك
شهد بخوف: ايوا يبا.. انا خايفه عليك
مسعود: لا تخافي
شهد: يعني ما يقدر يآذيك
مسعود: ما بيقدر.. جهزتي اغراضك
شهد تمسك يده: يبا انا خايفه اترك البيت.. اخاف يمسكني
مسعود: نامي يبا.. لا تخافي
تركتها ودخلت غرفتي.. زوجتي جفاها النوم من قالت شهد ان هالكلب يبيها مقابل مبلغ يدفعه لها.. ما كفاه بناته.. يبي ينتي بعد.. هذا الي مستحيل يصير.. ايش العمل الان.. مسكت التلفون.. ورجعت قفلته.. يمكن ما يرد علي الاحسن اكتب رساله.. اذا قراها بيرد واتمنى انه يرد.. رحت اكتب.. لما خلصت دزيتها.. ماني غبي .. لافي بيدي.. واي حركه منه بقدر اضيعه.. ادله كثيره بيدي.. وبعرف كيف انتقم منه لو حاول يمسك بنتي
ام شهد: منت قادر تنام.. قلت لك زمان لافي ما بيتركك ترتاح.. ماكفاه الي عمله في بناته الان جا الدور على بنتي
مسعود: لا تخافي ما بيقدر عليها.. بعرف كيف أأمن حياتها
ام شهد تبكي: انا طلعت من الدنيا بها وبأخوها.. ايش بعمل لو صار لكم شي من ورا لافي
مسعود: قلت لك لا تخافي
ام شهد تمسح دموعها: ياربي لا تحرق قلبي عليهم.. ياربي...................
مسعود بحنيه: اسكتي شوي هذا ناصر يدق.. الو
ناصر: مسعود!!
مسعود: عمي.. هذا انا مسعود.. عارف انك تعرف هذا الرقم لاني دزيت لك رساله عليه قبل هالمره.. لا تخاف ماحد يعرف اني اكلمك عليه.. انا مأمن حياتي به
ناصر يضحك: جا الدور عليك يا مسعود؟!!
مسعود بجديه: حاولت احمي الكل من يد ابوك.. والي قدرت عليه عملته
ناصر: قول الي عندك
مسعود: ابوك يبي بنتي.. عرض عليها فلوس بمقابل انها تكون له
ناصر يضحك: والمطلوب
مسعود: ابيك تحميها
ناصر يضحك: صدق عاد!! وكيف تبيني احميها؟
مسعود: عمي اقدر اقول لك على معلومات ماحد غيري يعرفها.. بشرط انك تحمي بنتي وزوجتي وولدي
ناصر يضحك من قلبه: كنا في بنتك.. الان صرنا في زوجتك وولدك؟!!
مسعود بجديه: هذا شرطي اذا بغيت تعرف المعلومات الي عندي
ناصر بجديه: اسمعك
صرت اقول له عن كل الي يبيه.. فتحت ملفات قديمه عن الشغل وهو يسمعني باهتمام.. قلت له عن اهم حادثه تهمه عن اهم موضوع مهم انه يعرف تفاصيله.. عن الشخص الي شافه طالع من الملحق الي ساكن فيه هو ليال في لندن.. الشخص الي ترك الشك يتسلل في قلبه وعاقب زوجته من غير ما يسمعها على شي هي بريئه منه.. قلت له ان عبير كانت تقابل هالرجال في حديقة الفيلا يجيها طول الليل واول ما خيوط الصباح تبان يتركها ويمشي.. والله اعلم كيف كانو يقضون الليل.. بيني وبين نفسي استحيت اقول له اني طنشت ابلغ لافي بالي كنت اعرفه وبعض احيان اشوفه.. بقصد مني ان لافي يكتشفه بنفسه قلت يستاهل الفضيحه ماترك حد يعيش بسلام حتى انبهه عن الي يصير من تحت راس عبير.. ناصر ما سألني ليه ما قلت للافي عن هالشي عشان كذا سكت.. سكت عن موضوع عياله الي ماتو ما حبيت اقول له عارف انه بيثور وبيروح للافي وبتصير معركه بينهم وفي النهايه لافي بيعرف اني بلغت ناصر ورقبتي انا الي بتطير من ورا تصرف ناصر.. غظيت النظر عن الموضوع وتابعت كلامي.. قلت له كيف لافي عرف بحمل نوف من المراقبه الي كانت تتبع كل الي يطلع من الفيلا وكيف عرفو من فايل المتابعه بالمستشفى انها حامل وكيف ذبح الجنين الي ببطنها وكان ناوي على ذبحها بس لحقها سلطان.. قلت له كيف دبر موت سلطان وزوجته مها.. قلت له كيف دبر موت جاكلين وانها فعلا كانت حامل منه.. قلت له كيف دبر موت عبدالرحمن زوج عبير وكان ناوي عبير تموت معاه بس عبدالرحمن وقتها طلع من الفندق من غيرها
ناصر: ومن نفذ كل ذا!!
ما قدرت اكون صادق معاه في ذا السؤال.. الجواب عليه بيضر عيلتي كلها.. وانا الي ابيه حمايتهم.. ردي على هالسؤال بيعرض اهلي للذبح.. وهذا الي مستحيل يصير.. على موتي انه يصير
مسعود: ما اعرف من الي نفذ.. الي اعرفه قلته لك
ناصر: الي قلته لي ما ينفعني بشي.. ايش اعمل بشي ما ينفعني.. انا....................
مسعود يقطعه: عمي ابوك ما يعرف انك الان بالمستشفى مع نوف.. ومايعرف ان نوف حامل.. كان بإمكاني اقوله بس انا خفت عليها.. لوكنت اعرف بنيته بقتل نوف قبل كذا كنت نبهتك.. ابوك ما يعرف عن الحرمه الي تدخل الفيلا على انها عمتي ليال حتى تلعبو عليه ان عمتي بالسعوديه.. لاني المكلف بالمراقبه هذاك الوقت وعارف ان الحرمه هذيك ماهي عمتي ليال.. دزيت لك رساله وحذرتك ان الرجال الي يراقبو المكان ما بقا شي ويكشفوها.. دزيت الرساله من هذا التلفون ومن وقتها ما صارت الحرمه تدخل الفيلا.. عمي الي قدرت اني اعمله حتى احميكم عملته اما غير كذا فالوالد نفذه من غير علمي.. الاهم من ذا كله ان وجودي مع ابوك الان مهم لك لاني بكون العين الي تحذرك من أي خطوه خطره تصير لك ولاهلك
ناصر: وكيف اعرف انك منت مخطط كل ذا معاه
مسعود بجديه: لاني ابيك تحمي عيالي وزوجتي بالفيلا معاكم.. واي حركه راح تصير تخليك تتأكد من اني مخطط كل ذا مع ابوك تقدر تذبح اهلي بالحال.. ما حد يعرف عن وجودهم عندك وماراح ابلغ عن اختفائهم بالاساس.. حتى انا لو جيتك اترجاك اشوفم تقدر تقول لي انك ما تعرف مكانهم.. المهم عندي اني احميهم.. عمي لا تتخلى عني.. انا ما تخليت عنك.. انا الي كنت اراقبك وقت الي رحت البحرين.. وما قلت له ان عمتي ليال هناك.. عرفت ان جراح هناك وربطت روحتك له.. عشان اشتت تفكيره عن عمتي ليال وما اتركه يلقاها ويذبحها من غير لا اعرف
ناصر يتنهد: اتركني افكر وارد عليك
مسعود: عمي لا تعتبر الي بقوله لك تهديد.. بس انا مطر اقولك هالشي.. انا بعطيك ساعه وحده بس حتى ترد علي.. ما عندي وقت اكثر اعطيك ياه حتى تفكر.. ضروري الاقي طريقه ثانيه احمي بها اهلي.. بنتي لازم اهربها من البيت لاي مكان أمن لها والليله.. ضروري السرعه يا عمي
ناصر: سلام
مسعود نزل راسه: سلام
ام شهد: مسعود ايش ناوي عليه
مسعود بحنيه: اذا رد علي فبتكونو بأمان انتي والعيال معاه بعيد عن لافي.. خذي هذي الورقه والقلم واكتبي ان شهد قالت لك عن الي لافي ناوي عليه وانتي خفتي تقولي لي لاني اتبع لافي بالي يبيه.. فأخذتي العيال وهربتي
ام شهد بخوف: وبعدين!!
مسعود: برسالتك بتأمني حياتي
ام شهد: واذا ما رد عليك!!
مسعود: بيرد غصب عليه.. لاني اعرف كل شي عن عياله.. اذا ما أمن حياة عيالي.. بهدده بحياة عياله

&&&&&&&&&&&&&&&&&&&&

11:15 الليل
شقة احمد ..الصاله..
البحرين
ما كنت اعرف ان الوناسه تعمل فينا كذا.. ام خليفه وبنتها ما ودهم يمشو.. عجبني الجو كثير.. ما ارتحت بشقتي ريما اكلت قلبي تبينا نشغل مسجل حتى يرقصو عليه.. وانا افكر بالرجال فشيله الصوت لو وصلهم.. حنا من غير مسجل وصوتنا فضيحه.. خوله قالت نروح شقتها والحريم ما صدقو.. وقفو بيمشون.. بس لينا اصرت ان الجمعه تصير عندها.. هنا ريما صارت تأيد الفكره بس عشان تاخذ راحتها بشقة اختها في تغيير الاغاني.. صدقت خوله خبله مثل اختها هههههههههههه.. وصلنا شقة احمد وصارت الوناسه من جد.. صحيح شقتي اوسع بس البنات على كل حركه يعملوها الحريم صارو يصارخو عليهم بس يابنات الرجال يابنات.. انا هنا غييييييييييير المكان ضيق علينا شوي بس ماهو مهم.. المهم الوناسه الي كنا فيها.. الرقص والخبال صار على اصوله.. حتى مزيان نست وجع القلب الي عيشت نفسها فيه.. احسها عروس من جد.. جويل كل دقيقتين تجي تبوسها وتبتعد عنها تروح تهز لها شوي وترجع لها.. هالحرمه طيبه كثير مع مزيان وجراح.. تحسسني انها امهم ماهي مربيه بس.. نسيت اشوف حبيبي بعد الموافقه الرسميه اكيد الفرحه ماليه وجهه وابتسامته الي اموت عليها ماليه قلبه.. وحشني افكر اروح له.. ههههههههههه نسيت نفسي




يتبع

لمى: وين سرحانه
ليال بفرح: وين اقدر اسرح مع هالجو الي ياخذ العقل
خوله تضحك: لموووو اش قلتي عبداللطيف يخطبك
لمى بهمس بين ليال وخوله: ووجع ان شا الله ذبحني.. متى ارتاح منه ومن ركضه وراي
خوله ميته ضحك: يا اختي ياحلوه بس.. ياخذ القعل بثقل الدم
ليال تضرب خوله: حرام عليكي انتي وياه.. لطيف مافي منه
لمى بقهر: تزوجيه انتي.. واتركي لي جراح
ليال بقهر من قلب: ووجع الي يوجع بليسك.. اشوف كل كلمه والثانيه قلتي جراح
خوله تضرب لمى: يااختي شوفي لج رجال ماهو مرتبط اش يعجبك في الرجاجيل المتزوجين
لمى فقعت ضحك: تصدقين توني انتبه ان عيسى بعد كان متزوج
ليال تضحك: خبله انا قلت لازم يشوفك طبيب نفسي
ريما بتعب من الرقص: خالتي تلفونك
ليال تلعب بحواجبها للمى: اكيد جراحي.. وله علي.. ما يقدر يجلس من غير ما يسمع صوتي
لمى بقهر: عسااااااااااااااك ما تعرسين على غيره.. عساااااااااااااااااااه ما يخذ غيرك.. ويه جعل الموووووووووووت ياخذ عدوك ان شا الله
خوله ميته ضحك: خبله
ليال ترد على التلفوه بلهفه: حبيب قلبي انت
خوله: حقيقه قليلة حيا
لمى: ومصدقه روحها شفتي لهفتها
صلاح بفرح كبير: حبيبة قلبي.. ليال ليال ليال جبت سلطان ياليال.. جاني سلطان يا عمة سلطان
ليال وبدت تبكي: الله يبشرك بالخير ياوجه الخير.. الحمدلله على سلامة نوف وسلطان ياروحي
صلاح بجنون: تعالي شوفي جماله ياقلبي يهبل.. ابييييييييض زي عمته.. ياليال له عيون تخبل
ليال وبكاها يزيد: تفداك وتفداه روحي.. ودي ياخوي .. ودي يانور عيني اشوفه.. ليت الله ياخذ لااااااااافي وارتاح منه.. ليت الله يكتب لي ارجع اعيش معاكم.. جعلني ما انقطع منكم
صلاح ينتبه لليال: حبيبة قلبي بخليكي تشوفيه على النت.. اقتحي جهازك.. وانا معي جهازي
ليال بشوق: الكل حولك ياروحي؟.. وحشوني كلهم
صلاح يضحك: ايوا ياقلبي.. كلهم موجودين عندي.. ههههههههههه تعالي شوفيه يبكي.. يبكي ليال
ليال تبوس التلفون وتبكي: جعل ربي ما يحرمك منه.. ربي لا تحرمه منه
خوله تحضن ليال بعد ما سكرن التلفون: مبروك ياروحي مبروك
ريما تسكر المسجل: خالتي حبيبتي اش صاير
خوله: زوجة صلاح ولدت
سمر بفرح: ايوااااااااا ان شا الله تجيبين ولد ياخالتي انتي بعد
ديما تضحك: أي خالتي شبعنا من البنات نبي اولاد
لينا تبكي على منظر ليال: جعلني الحقها وارتاح انا بعد
ام عبداللطيف تضحك على لينا: آمين يما الله يقومك بالسلامه
ام لينا تشرب ليال الماي: اش سموه يما
ليال رجعت تبكي: سلطان.. رجع لي سلطان يما.. ربي عوضني بسلطان من جديد.. ما لحقت اشبع من الي راح.. ربي عوضني بغيره.. جعله يعوضني عن الي راح ويعوض امه وابوه عن الي سبقه

&&&&&&&&&&&&&&&&&&&&&&&

12:00 الصباح
فيلا لافي ..غرفة عبير..
السعوديه
البيت كأنه مقبره.. لا حركه ولا صوت.. جيت وليتني ما جيت.. عادي ولا كأن فيه احد ساكن هالبيت.. مممممممم ليه ما اخطط اذبح لافي وزوجته واستولي على هالبيت لي لحالي.. آآآآآآآآآآه من هالشعور.. اطلع وادخل على كيفي.. متى بس.. خساره مافي سم سريع المفعول واسقيهم ياه.. سم كذا يسبب سكته وما احد يشك اني اعطيتهم ياه.. وماهو ضروري يموتو في نفس الليله الاول اذبح لافي وبعديه بكم شهر اذبح زوجته واقول ما قدرت تعيش بدونه والحقته.. ههه جهنم ان شا الله.. ضروري افكر بهالشي.. ياآآآآآآآآآآآآآآه ياهو شعور.. طلعت من غرفتي وقلت بتصرف في البيت كأني ذبحتهم وارتحت منهم.. على طول رحت لغرفة الشغاله ورفست السرير
الشغاله تقوم بخوف: يس مام شنو فيه
عبير بعنجهيه: قومي اعملي عشا لي
الشغاله تفرك عينها: اوكي مام شنو يبي
عبير تكب عليها كاسة مويه: قلت لك قومي عن الكسل يلاااااااااااا
طلعت من عندها.. ودخلت الصاله.. شفتها وحسيت كبدي قلبت بمجرد تذكرت ان لافي كان جالس على هالكرسي او انه يكلم على هالكرسي او انه ياكل على هالكرسي.. غمضت عيني ودخلت المجلس كنت اشوف الاثاث وكل الي اشوف ماهو عاجبني.. ابي اغير كل ذا.. اللون الازرق وتدرجاته رافعه ضغطي.. ابي الوان تفرح ابي الوان الناريه.. احمر.. برتقالي.. اصفر.. كذا.. الوان الشمس تحسسني اني بمكان مهم وسلطتي فيه طاغيه.. ماهو كذا الوان بارده كأني في مقبره.. سمعت صوت لافي وهو بيدخل الفيلا شكله كان برا.. عشان كذا البيت نايم.. ولا بالعاده صوته يصحي الميت.. هذا يقرب على المجلس!! وين استخبى.. وين.. استخبيت ورا الستاره كبير وقماشها من كثره ما يبين ان في احد وراه.. استخبيت وسكتت
لافي بحده: اقول لك رحت عشان.. عشان.. وانت ايش دخلك رحت وخلاص.. كان عندي صديق ازوره بهذيك المنطقه وصادف اني قريب من بيت مسعود
مرزوق: ايوا عمي حاضر حاضر بدق عليه واشوف هو وين الان
لافي بحده: يلا بسرعه انا انتظرك
مرزوق: حاضر حاضر
لافي بعد ما سكر الخط: ووجع هالبنت ماتخاف!! خافت مني وما خافت من الموت!! تنتحر عاد!! تنتحر.. وين مسعود وين راح!! جعلك الموت ياشهد.. الان هذا الي اتفقنا عليه.. ومن هذا الي يتصل الان.. الو
مسعود يتصل من الشارع: هلا عمي انا مسعود
لافي بحده: مسعود ووجع وينك فيه
مسعود بكل هدوء: انا في البحرين عمي.. قالو لي ان صلاح محرك سيارته وجيت وراه اشوفه
لافي بحده: تلفونك وين.. ادق ومغلق
مسعود: خلصت البطاريه عمي.. عاد بالصدفه ادق على مرزوق حتى اقول له اني في البحرين ويبلغك.. قال لي انك قالب الدنيا علي
لافي بحده: منين تتكلم
مسعود: من الشارع عمي.. ليه ماهو واضح لك ان الرقم بحريني
لافي: ارجع ياثور.. ارجع بسرعه وروح شيك على اهلك
مسعود يتصنع الخوف: خير ايش فيهم اهلي
لافي: واحد من رجالنا داق علي يقول ان فيه اسعاف عند بيتك ناقل احد من اهلك
مسعود يتصنع الربكه: جاي جاي جاي ياعمي
لافي بحده: الو الو مسعوووووووووود.. ووجع ان شا الله حتى ما سألته صلاح وينه فيه
هههههههههههههههه ضحكت من قلبي.. دارت الدنيا وصرت تشوف شهد بنت مسعود!! بس طلعت ذكيه هالشهد ما سلمت نفسها لك زيي.. انا الغبيه يالافي.. اكتشفت اني انا الغبيه يالافي.. طلعت من المجلس بعد ما تأكدت انه راح لغرفته.. قررت وقتها اني اذبحه خلاص.. مابقى بقلبي رحمه.. موته اهون علي.. صدق غسان.. عملت مني زباله الكل ينفر انه يقترب مني يالافي.. حتى حبيبي الي اترجاه من الدنيا قارف انه يقترب مني.. ليه ايش فيها العنود احسن مني.. انا اجمل منها.. حبوبه وذكيه.. ليه حبيبي ما يشوف كل ذا فيني ليه.. هذا كله بسببك يالافي.. انت عملت بي كذا.. صحيح ماحد عرف بالي سويته بي.. بس يكفي الحال الي صرت فيها حتى الكل ينتبه ان الي فيني من سواة يدك.. احس المر بحلقي كل ما اتذكر غبائي.. ايش بينفع الندم الان.. ماراح ينفع ابد.. ابد

&&&&&&&&&&&&&&&&&&

7:30 الصباح اليوم التالي
المكتب
البحرين
من فرحتي ما نمت البارح.. سعيده شويه على شعوري.. طلع النور وانا ماغير كل شي اتذكر صلاح واضحك.. سمعت تلفون جراح يدق وشفته يقوم يرد كان يسمع باهتمام.. تركته ورحت للمطبخ قلت لهم يجهزو لنا الفطور.. طلعت منهم ورحت لغرفة مزيان.. شفتها صاحيه ووفقت اتابع حركاتها وضحكها مع جويل.. وجويل ماغير تضحك من قلبها مبسوطه لحياة مزيان الجديده.. مزيان الي ما بحياتي شفتها بهالحال من الراحه والسعاده.. سألتني اذا بروح معاهم نتسوق عشان ملكتها.. صحيح اني ما نمت بس فرحتي تجبرني اروح معاها.. عيب اكسر بخاطرها وانا ما صدقت تفرح.. رجعت لجراح وشفته خلص مكالمته
جراح بابتسامته: هلا بوردتي
ليال بحيا: جراح
جراح بحب: ياروحه
كنت اشوف عيونه.. ما كنت ابي اتكلم ابي اشوف عيونه بس.. وهو حس علي كان يناظرني بحب ما اقدر اوصفه.. تركني براحتي لحد ما اشبع.. بس بصراحه انا من حملت وانا ما اشبع من شوف ابتسامته وعيونه
مزيان تدق الباب: صاحححححححححححين
جراح يضحك: تعالي ياروحي صاحين
مزيان بفرح: قومو نفطر انا جعانه
ليال بسعاده: وانا بعد جعانه
جلسنا على الطاوله وصرنا سوالف واكل.. ماكان ودي هالجو ينتهي بيننا ابد.. ما ابي يتغير علي من هالحياه شي.. جراح قال لي ان احمد الي كلمه من شوي.. صلاح داق عليه عشان يبي صيغه قانونيه حتى ناصر يوقع العقد مع ابوه.. احمد اتفق مع صلاح على اهم البنود الي تمسك لافي من الايد الي تجيب اجله ان شا الله.. لما فتح جراح موضوع شهد.. اختفت ابتسامتي نهائي.. هالحيوان ماهو لاقي شي يوفقه.. لا خوف من الله ولا خوف على نفسه من نار الله الي بتحرقه.. اعوذو بالله ايش هالمخلوق.. عجبني عقل غسان وقت الي شار على ناصر ان تصير مسرحية ان شهد تنتحر وتنقل للمستشفى هي وامها واخوها.. ومن بعدها يستلمهم ناصر ويجيبهم على الفيلا.. صدق فكره اعجبتني.. صحيح كلفت بس ماهو مهم دام الفلوس موجوده كل شي ممكن يصير.. شفت الساعه بيدي.. وقلت لجراح ان صلاح المفروض يطلع بنوف بعد ساعتين.. الحمدلله ولادتها البارح كانت سهله.. وهي والولد بخير.. صلاح اصر انه يطلعها دام لافي ما عرف بحملها وولادتها.. وبعدين هي من البارح ماهي قادره تطرد الخوف من عقلها.. الاحسن انها ترجع الفيلا غسان موجود واخته كمان موجوده.. تركت مزيان مع خوله.. ونزلت مع جراح المكتب.. لقيت الشباب جالسين في نقاش على المشروع الاخير.. الي تقريبا حنا منتهين منه.. وخلاص المفروض اليوم نطرحه في السوق حتى نلاقي شريك نبتدي معاه
محمد: لو تسمعون مني وتوافقوني.. لافي ما بنلاقي معاه غير المشاكل.. خلونا نختار واحد مسالم.. تظمن انه ما يلعب علينا
خالد: انا بالنسبه لي عادي.. لافي او غيره ماهو مهم عندي
حنان: يا محمد انا ماني فاهمه.. دام اوراقنا صحيحه وسليمه ليش الخوف من لافي
وليد: انا رايي من راي حنان.. هو بيدفع فلوس وبس.. الاداره علينا وهو عليه انه يتابع بس
احمد: هذا الحكي لواحد غير لافي.. لافي معروف بلعبه.. ومعروفه اوراقه اما يملك المشروع او ان يكون له حق الاداره حاله حالنا
منير: في هالحاله من حقنا اننا نرفض عرضه
حنان: اوكي في هالحاله بس نرفض عرضه
عبداللطيف: ضروري ناصر يوقع معاه قبل لا نطرح المشروع.. عشان نعرف كل تحركات لافي
احمد: لا.. ضروري نطرح المشروع في السوق بالاول حتى لافي يعجل بالموافقه على شروط ناصر.. هذيك الساعه بنظمن ان لافي بيدنا
ليال: انا مع هالراي.. وبعديها نقرر على راحتنا اذا عرض لافي يناسبنا او لا
عبدالرزاق: قبل ذي كله نأمن المكان الي بنعيش فيه.. طاولة المفاوضات بتصير عندنا هنا.. الشريك بيجي عندنا.. مو معقوله نعزمه بأي مكان حتى نتفاوض معاه
جراح: البنايه تقريبا جاهزه محتاجه للتأثيث.. اما قاعة الاجتماع بالمكاتب احمد متولي الشغل فيها وكملها
احمد: القاعه جاهزه تماما.. والمكاتب بعد
وليد: بس تبقى الغرفة الالكترونيه.. ناقصتها شوية معدات لحد الحين ما وصلتني
جراح: تابع مع الشركه الي طلبت معداتك منها.. واذا ما قدرت تستعجلهم اعطي المعلومات لرائد وهو يخلص لك الي تبيه
عبدالرزاق: كل واحد ياخذ اهله اليوم ويروح يشتري الاثاث الي يبيه.. ضروري بكره او بعده نكون منتقلين
عبدالعزيز الي ساكت يسمعهم: املك الاول وبعدين الي تبونه يصير.. ماجات عند ملكتي ويطلع الشغل كله مره وحده
عبدالرزاق يضحك: نسييييييييييييييييينا ملكتك يا اخي.. جراح ايش رايك نأجل الملكه اسبوع.. عبدالعزيز موجود ومزيان موجوده ما بيطيرون
ليال معترضه: حرام عليك.. ماجات عند فرحته ونأجلها.. انا من رايي نلغيها احسن
حنان معترضه: تلغينها بعينك انتي بعد.. ما صدقنا هالمسكين يتزوج ونفرح له
عبدالعزيز بفرح: الله لا يحرمني منك يااختي
حنان: افا عليك ياخوي.. لا تقلق وراك حنان.. شارو علي الي مآذينك وانا اوريك فيهم
جراح يضحك: ..............................

&&&&&&&&&&&&&&&&&&

8:00 الصباح
شركة لافي ..المكتب..
السعوديه

لافي بلهفه: ها ايش طلع معاك
واحد من رجال لافي: عمي باب البيت مفتوح ومابه احد فيه.. دخلت ولقيت الدم مغرق وحده من الغرف.. لقيت فيه هالورقه
لافي ياخذ الورقه من يده: وغيرهالورقه ماشفت شي
واحد من رجال لافي: شي مثل ايش عمي
لافي: يعني البيت مافيه شي لفت نظرك.. مافي اغراض مكسوره.. اشيا تحسسك ان كان فيه خناق.. مثلا ملابسهم ماهي موجوده
واحد من رجال لافي: لا عمي الصاله كان بها بقايا عشا.. الظاهر انهم كانو ياكلو وما خلصو اكلهم.. اما الملابس في يبين انها مسحوبه على عجل.. كان فيه ملابس في الخزانه بس فيه بعد ملابس مرميه على الارض
لافي: وكيف عرفت انه فيه ملابس مسحوبه على عجل
واحد من رجال لافي: عشان وحده من الغرف كان فيها شنطه مفتوحه ومرمي في الشنطه كم غرض بس متروكه على السرير
لافي يفكر: وين مسعود الان
واحد من رجال لافي: في المستشفى ماسك خناق الموظفين يسألهم عن بنته وينها
لافي: والمستشفى ايش قالو عنها
واحد من رجال لافي: يقولو ان سيارة الاسعاف جابت حالة مشتبه بها انها حالة انتحار عالجوها.. واختفت المريضه والمرافقين الي معاها
لافي يفكر: ..................................
واحد من رجال لافي: تامر على شي عمي!!
هذا الي ما حسبت حسابه يالافي.. مالقيت الا بنت مسعود.. حافظ اسرارك.. وشوف الورقه الي تاركتها له زوجته.. "لافي حاول يعتدي على بنتك.. وهي حاولت تنتحر.. لا تدور علينا لانك ماراح تلقانا.. عارفتك زين.. بتقدم بنتك على طبق من فضه لحبيب قلبك لافي" زين الي سبقته قبل لا يشوف الورقه كنت بنفضح من وراك يا شهد.. بس من عذري افتتن فيها.. هذا وانا ما شفت شكلها لسا.. بس عيونها.. آآآآآه من عيونها.. وين بتروحين مني ياشهد.. بلقاك بلقاك.. ذكرتيني بمهرتي.. مافي احد يقدر يهرب من لافي.. انتو الثنتين الي قدرتو.. آخ بس لو تشوفكم عيوني الان آخ
ناصر بصراخ: الووووووووووو
لافي ينتبه له: ياثوووووووووور.. ليه تزعق كذا.. انا ابوك ماني واحد اشتغل عندك
ناصر يحط رجل على رجل ولا كأنه سمع شي: اوراقك جاهزه
لافي يتنهد: يا ذا الصباح
ناصر يشوف عيونه ببلاهه: وش فيه ذا الصباح.. هذا هو حلو وشمسه مشرقه وياحلوها
لافي يشوفه بقهر: اوراقك جاهزه
ناصر: طبعا.. محتاجه لتوقيعك الكريم بس
لافي: ايوا بس انا ليا شروط بعد
ناصر بملل: شروطك ما ابي اسمعها.. انا جيت عشان تنفذ شروطي انا.. انت شرطك الوحيد اني ارجع اشغل معاك.. وهذا انا وافقت.. ماهو كل يوم تطلع لي بشي جديد.. تراني ملول.. وازهق بسرعه
لافي: جيب اوراقك
ناصر يعطيه: اقرا كويس.. لاني وان جيت للحق اتمنى انك ما توافق عليها
لافي بحده: امس طلبت 30% نسبة الارباح.. اليوم صارو 40%!!!!!
ناصر: حسبتها بيني وبين نفسي ولقيتها نسبه تناسب مجهودي.. اذا حسبت الخساره الي سببتها في شغلي بتلاقي ان الي طلبته ولا شي
لافي يفتح الدرج ويعطيه شيك: خذ هذا
ناصر يشوف الشيك: ايش ذا!!
لافي: تعويض عن كل خسارتك.. وعليه زياده بعد
ناصر يقطع الشيك: الان ما ينفع.. تعويض الخساره ماراح تفيدني الان.. اما توافق على شروطي والنسبه الي حددتها بالعقد.. او تتركني اشتغل من غير ما تضايقني.. قرر الله يهديك واتركني اروح اشوف شغلي
لافي مركز بالعقد: تطورنا بشغلنا كثير ياناصر.. الصيغ هذي ما يقولها غير محامي شاطر
ناصر واصل حده من الملل: ..............................
لافي: تصدق اسأل روحي ليه ما ذبحتك من زمان
ناصر وعيونه بعيون ابوه: سؤال سألته لنفسي انا بعد.. ليه قدرت تذبح عيالي بس انا لا
لافي يضحك: عيبك ان عقلك صغير.. تصدق الكذبه بسرعه
ناصر يضحك: الا ما قلت لي يابو ناصر.. ليه ماتبي تشوف لي ذريه
لافي يبتسم: ومن قال!! فيه اب يكره يشوف ذرية ولده وحيده
ناصر يضحك: فيه يابو ناصر وشفت بعيوني
لافي: ليه ما ذبحت ولد العنود ما سألت نفسك؟
ناصر يحك جبهته: لان يدك ما طالته.. صدقني لو يدك طالته كان ولد العنود ميت من زمان



يتبع