كاتب الموضوع :
سر حياتي
المنتدى :
القصص المكتمله
الحلقــــــــــــــــــــــــــــــــة الحادية والثلاثــــــــــــــــــــــــــــــــــــــون
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــ
طلعت من الشاليه بسرعة ...طيران ... ووجهتي كانت شاليه هيثم ... وصلت اخيرا ومسكت ريتاج الباب وحرّكته بس تجمدت فجأة لما تذكرت جمان وعبير ...
احترت ادخل ولا لأ ...
بس انا مستعيل وايد ..
هيثم ماادري اشفيه ...
ياربي شسوي ؟؟
مافي غير هالحل ...
حرّكت ريتاج الباب وبطلته ... ودخلت ... والحمدلله كان الصالة مظلمة ... إلا من ليتات اللي برة اللي تطل من الدريشة ...
ولأني حافظ الصالة اشلون صايرة ... صعدت فوق بديهيا ... وانا ادعي محد يطلع في طريجي ...
اقصد عبير ولا جمان ... وبالذات جمان ...
وصلت اخيرا فوق ... وانصدمت من الغرفة اللي مجابل بعضها ...
ولين ...الحين اي غرفة هو ؟؟
تحسست مخباتي ..وطلعت تلفوني ... ودقيت عليه ... وانا اقرب من البيبان احاول اسمع نغمة تلفونه ...
واخيرا سمعتها ...
رديت دخلت تلفوني بمخباتي بعد ما صكيته ... وطقيت الباب ضربات خفيفة بس مسموعة وكانت سريعة وقلقة ...تعبر عن خوفي ...
زياد : هيثم ...
مارد ...
بطلت الباب هني ودخلت ... وكانت الغرفة ظلمة إلا من ضوء الأبجورة ...
شفته نايم على بطنه وبهدومه اللي آخر مرة لابسهم لما تمشينا مع بعض اليوم ....
تجدمت منه وانا مرعوب ... انتبهت هني لتلفونه اللي طايح على الأرض ...
حطيت ايدي على جتفه وهزيته وانا اناديه ...بس مايرد ...
تحسست جبينه وكان دااااافي ....
ولفيت حولي محتار ...ماادري شسوي ...
حطيت اذني عند حلجه اتحسس إذا كان في نفس ...
وكان خفيف ...
قلبته على ظهره ... وبديت اطقه على خده ...
زياد : هيثم ... هيثم رد علي ..
بس لا حياة لمن تنادي ...
مسكت معصمه وتحسست نبضه ... وكان ضعيف ....
هني وقفت وتلفت حولي برعب وحيرتي تضاعفت ...
زياد : ياربي شسوي ؟؟
صج اني طبيب بس بهالمواقف الواحد ينسى نفسه ...
انتبهت للماي اللي يم الأبجورة ... والحبوب المسكنة اللي يمه متناثرة ..
اشلون ما انتبهت عليه ؟؟
مسكت الماي وكبيته على كف ايدي ... وقمت اطق خد هيثم فيه ...
زياد : هيثم ...رد علي الله يخليك ...
وقلبي مو راضي يهدى ...
اشلون يهدى وانا اشوف اخوي اللي مالي غيره مثل ميت ؟؟؟
ولما شفته ما يجاوب ...
هزيته بقوة وقمت اقول بصوت عالي ..
زياد : هيثم رد علي ...
واخيرا ...
اخيرا ...
بطل عيونه بثقل شديد ....
ماصدقت انا وعلى طول لزقت فيه ...
زياد : هيثم ..هيثم طالعني ...
رد بطل عيونه ...وطالعني ....فابتسمت بتشجيع متخوف ...
زياد : ئي خلك جذي ...
قومته قصدي خليته يقعد ...وقلت وانا اسند ظهره ..
زياد : قوم معاي ... قوم ..
ما عارضني ...هو اصلا فيه حيل ؟؟
زياد : تقدر تمشي ؟؟
شفته يمسك ايدي ويحاول يضغط عليها يعني اقدر...
سندته وطلعنا من الغرفة ...
شفت علامات الألم على ويهه ... وكانت ايده على خاصرته ...
فنمت عندي بذور الشك ...على قولتهم ...
ليش ماسك خاصرته جذي ؟؟
ما قدرت اجاوب على روحي او اسأله وهو بهالحالة ...
وصلنا تحت والحمدلله محد حس فينا ...
طلعنا من الشاليه ... وهني تذكرت اني ...
اني ما ييت بسيارتي ... ييت مشي اقصد ركض ..لأن شاليهنا قريب وايد ..
والمركز الصحي اقرب ...بس ولأن هيثم ما يقدر يمشي ...
طالعته وهو مغمض عيونه من الألم ويكتم تأوهاته ...وبغيت اقوله ان يتحمل شوي لين نوصل المركز الصحي ...
بس والله كسر خاطري ... مو قادر حتى يوقف...
قعّدته على اقرب كرسي بالساحة اللي واقفين فيها ... وهو لسة ماسك خاصرته يتأوه منها ...
قلت بسرعة ..
زياد : هيثم بروح اييب السيارة وايي ... تقدر تتحمل ؟؟
غمض عيونه بألم وقال اخيرا بصوت يحمل كل العوار والتعب ...
هيثم: بسرعة ...
طالعته بشفقة ... والله مو قادر اخليه جذي ...
طالعني وقال جنه يترجاني ..
هيثم: زياد تكفى بسرعة ...
وغمض عيونه وسند راسه على ظهر الكرسي ... وهالحركة دلت على انه خلاص واصل الذروة ..
تحركت انا اقصد انطلقت اركض بسرعة لين وصلت لشاليهنا ودخلته ويبت المفتاح وركبت السيارة وشغلتها حتى ما نطرتها تحتر ... وادري انها بتخرب ..بس مو مشكلة ...
دست على البنزين وبسرعة الصاروخ وصلت له ... وكان على حاله ... يتأوه ... طلعت من السيارة ورديت سندته لين دخلته ...
ركبت السيارة وعلى المركز الصحي على طول ... وانا يساورني الشك ...
وصلنا ودخّلوه غرفة الكشف ... ووقفت انا برة .. انطر ..بس ودي ادخل ..
حسيت هني بموقف الشخص ينطر واحد عزيز عليه متعور ولا تعبان ....ومو قادر يشوفه ...
ظليت اروح وارد واعد البلاط ...
ومر الوقت ..
طالعت ساعتي وكانت ثلاث ونص الفير ...
زين ان هيفاء نايمة ...
ما كنت برد والله يوم شفته داق علي ...وحزتها كنت اتابع فيلم بروحي بعد ما هدتني هيفاء وراحت نامت ...
رد لي منظره وهو ماسك خاصرته ...
حطيت راسي بين كفوفي دلالة المصيبة ..
يارب ما يطلع اللي في بالي ...
يارب ...
شفته ريول على مرمى نظري ... رفعت راسي لقيته الطبيب اللي كشف على هيثم ..
وقفت بسرعة وبخوف وقلت ..
زياد : ها بشّر ؟؟
الطبيب : انت اخوه ؟؟
يوووه يا شين الدكاترة يوم يتميلقون بالأسئلة ...
قلت بنفاد صبر ..
زياد : لأ ... اشفيه هيثم دكتور ؟؟
الطبيب : لا تخاف ...بس ارتفاع مفاجئ بضغط الدم ...
وقالها ببساطة جنه شي هين ...
قلت بشك ..
زياد : بس ؟؟
طالعني باستنكار وقال ..
الطبيب: ئي بس ...
طالعته بشك اكثر وقلت ..
زياد : هيثم كان يشتكي من خاصرته ... ما حاولت تكشف عليه من هالناحية ؟؟
طالعني باستخفاف وقال ..
الطبيب: قلت لك مافيه إلا العافية بس ضغطه مرتفع ويحتاج للراحة جم يوم...
طالعته وسكت ما رديت ..وانا مو مرتاح اصلا ...
قلت اخيرا ما تفرست بملامح ويهه عدل ..
زياد : ممكن اشوفه ؟؟
قال وهو يمشي ..
الطبيب: اكيد ...
رحت للغرفة وطقيت الباب ودخلت ...
لف لي هو هني ... وابتسم بوهن وقال بصوت مبحوح شوي ..
هيثم: هلا زياد ..
ابتسمت بويهه وقلت وانا اير كرسي واقعد ..
زياد : هلا فيك ... هلا باللي مخرعنا ...
ابتسم زيادة وقال وهو يغمض عيونه يحاول ينام ..
هيثم: شسوي ؟؟ مالقيت غيرك ...
قلت فجأة لأني مو قادر اقاوم التساؤل اللي تفجر في مخي ..
زياد : هيثم ..
بطل عيونه وطالعني وهو ساكت ... قلت بجدية ..
زياد : من متى وانت تتألم من خاصرتك ؟؟
توسعت عيونه جنه ما توقع اني اسأله هالسؤال ..
فقلت اكمل ..
زياد : انت ناسي اني طبيب ؟؟؟
طالعني شوي بعدين قال باستسلام ..
هيثم: من زمان ...
قلت اكمل عنه ..
زياد : من بعد العملية صح ؟؟
طالعني متفاجأ ونظراته كانت تأكدلي كلامي ..فقلت بعتاب ..
زياد : وليش ما رحت تفحص ؟
غمض عيونه بتعب وقال ..
هيثم: كان الم خفيف وقلت بيروح ان شاء الله ..
قلت بعتاب مرة ثانية ..
زياد : بس زاد عليك الألم ... هيثم لازم تكشف ...
قال ببرود وهو يرد يبطل عيونه ويطالعني ..
هيثم: لما تخلص العطلة ويتسانسون ..
قاطعته بعصبية خفيفة ..
زياد : مالك شغل فيهم انت ..الزم ما عليك صحتك ... زين اني رديت عليك لما دقيت علي ولا كنت في خبر كان ...
بلل شفايفه وقال وهو مغمض عيونه..
هيثم: مشكور انك رديت ...
هذا اللي يبيني اذبحه اليوم ...
زياد : هيثموه لا تستبعط علي ...
بطل عيونه التعبانة وقال ببرود وهدوء قاتل ..
هيثم: عيل شتبيني اقولك ؟؟
طالعته بعصبية وقلت ..
زياد : لا تقول شي ..بس خلاص انطم..
سمعت ضحكته ..بعدين تأوه فلفيت اطالعه ... وقال وهو يتحسس خاصرته ..
هيثم : أأاي حسبي الله على ابليسك ....
قلت بضيقة خلق ..
زياد : شكو انا ؟؟؟ انت اللي ما تبي تتعالج ..لو تعالجت كنت افتكيت من الألم اللي تحس فيه ..
طالعني وقال ..
هيثم: صك السالفة احسن ... انت اللي بتتعب بالنهاية ..
قلت منبطة جبدي ..
زياد : انت تبيني اموتك هني ؟؟ في احد بالدنيا مريض وما يبي تعالج ؟؟
قال بدفاع ..
هيثم: تراك مزعج ...انا ماقلت اني مابي اتعالج قلت بأجله شوي ...
قمت وقلت ..
زياد : تدري اشلون انا الغبي اللي قاعد احاجيك ... مع السلامة .
مسك ايدي وقال بسرعة ..
هيثم: خلاص خلاص والله خلاص ...آسف بس اقعد لا تخليني بروحي ..منو بيردني ؟؟
قلت وانا اسحب ايدي منه ..
زياد : يعني تبيني اقعد بس عشان تضمن احد يردك ؟؟
ابتسم وقال ..
هيثم : زياد ... اقعد لا تصير مثل اليهال ..
قلت بعناد ..
زياد :يهال ها ؟؟ انا اوريك اشلون صايرين اليهال ...
والتفت ابي اطلع بس رد مسك ايدي فلفيت له وطالعته فقال بجدية ..
هيثم: زياد لا تزودها علي بروحي تعبان ... قلت لك بتعالج بس مو الحين ...
قلت بسرعة ..
زياد : ليش مو الحين ؟
سكت شوي يطالعني ... جنه يفكر على عذر مقنع ..بعدين قال اخيرا ..
هيثم : خل تخلص العطلة ..بعدين اروح اكشف ..
مسكت عمري بالغصب ... لا اتنرفز عليه ..
وقفت وقلت وانا الف عنه ..
زياد : كيفك ... انا بروح الحين والصبح بييـ....
قاطعني صوته اللي اكتسب قوة مفاجأة ..
هيثم: شنوو؟
التفت له بخرعة واستغراب ...كمل وقال ..
هيثم: لا حبيبي مارح تروح مكان ...انا الحين ..
وحاول يقوم وهو يكمل ..
هيثم : بقوم ... خلاص برد الشاليه ..
طالعته بصدمة بعدين قلت بعصبية وانا امسك زنده ارد انومه ..
زياد : وين وين ؟؟؟ وايد مصدق عمرك انت ...
مع ذلك عارضني ووقف وقال وهو يتحامل على عمره ..
هيثم : زيادوه فج عني بروحي مو قادر اشيل عمري ...
بغيت اعترض بس تحرك من مكانه للباب وقال بأمر ..
هيثم: ردني الشاليه لو سمحت ...
بعد ؟!!!!
طرار ويتشرط ..
قلت وانا الحقه برة ..
زياد : انت صج ما تنعطى ويه ..
مارد علي بس ظل يمشي وانا يمه احاول اني اكون قريب منه ...رحنا للصيدلية واخذنا الأدوية اللي وصوه عليها ...
التفت له وهو مستند على كرسي اللي يم الصيدلية ...
انت مو قادر توقف اشحقة تعاند ؟؟ !!!
اففففففففففف ...
مشيت له وقلت وانا ارسم بويهي ابتسامة هبلة ..
زياد : تحرّك اخ هيثم ..
ركبنا السيارة وحرّكنا للشاليه ...
ولما وصلنا .... طالعته وقلت وانا اوقف السيارة جدام الشاليه ...
كان مسند راسه ورا ومغمض عيونه ...
قلت بعد ما تنهد ..
زياد : هيثم ...
بطل عيونه ورفع راسه وطالعني ..قلت وانا ااشر على الشاليه ..
زياد : وصلنا ..
طالع الشاليه بعدين بطّل الباب وقال ..
هيثم: مشكور زياد ..
بغيت اطلع عشان اساعده بس قال ..
هيثم: لا خلّك ... تعبتك معاي اليوم وايد ...
زياد : هيثموه ..عن الرسمية الزايدة ..
ابتسم ابتسامة ذابلة وقال ..
هيثم: عشان تعرف اني مو ثقيل عليك ..
قلت باستخفاف مرح ..
زياد : انت ثقيل خلقة ...
ابتسم بويهي وطلع ... ما تحركت إلا لما عرفت انه دخل داخل ...
انا ماادري ليش مو راضي يتعالج ...
مع اني شاك بس ان شاء الله ما يطلع اللي في بالي ...
ان شاء الله ...
هيثم طول عمره عنيد ...
وهذا اللي يغثني فيه ...
وياليت يفيد عناده ..بس جذي على الفاضي ..
حتـ...
انتبهت هني على جيس ادويته ...
يا الله ....
حطيت راسي على السكان متنرفز منه ...
هيثم ...
هذا هيثم ..
ماكو فايدة فيه ...
^^^^^^^^^^^^^^^^^^^^^^^^^^^^^^^^^^^
قعدت على صوت المنبه حق صلاة الفير .. تمغطت لين حسيت عظامي بينكسر ...
طالعت فارس اللي نايم ...
الحمدلله انه اكل دواه ولا جان حسيت بالذنب لين الحين ...
انا ماادري شلي خلاني اسوي جذي اصلا ..
بس صج بغيت ايّن لما وصلت لهالفكرة ...
استغفر الله ..
صج الشيطان شاطر ...
بغيت اخسر اخوي عشان هالشي ...
خلصت وضوئي على هالأفكار ...
طلعت من الحمام عزكم الله ...
تقربت من فارس وانا قاعد انشف ايدي ...
مشعل: فارس ...
سمعت صوته من تحت اللحاف يقول ..
فارس : قاعد ...
ابتسمت وقلت ..
مشعل: قوم عيل ...بيأذن بعد شوي ..
وما مداني اخلص إلا مأذن ...
طلعت من الغرفة ورحت لدار ابوي طقيت الباب وبطلته بعدين ...
لقيت السرير فاضي .. جلت بنظري بالغرفة كلها لين طاحت عيني عليه قاعد باهمال على الكرسي اللي يم الدريشة ...
انصدمت من شكله ..
شلي منومه هني ؟؟؟
تجدمت وهني انتبهت لجيس مبين عليه جيس ادوية اللي على الأرض ..مسكته وشفت المجموعة الكبيرة من الحبوب ..
طالعت ابوي اللي شكله ولا حاس بالدنيا ...
بعدين لحظة ليش نايم بهدومه ؟؟
طلع هو ؟؟
مديت ايدي وقربت منه وقلت بصوت واطي ..
مشعل: يبا ...
ماتحرك ...
مسكت ايده ع الخفيف وهزيتها وقلت ..
مشعل: بو فارس ...
هني بطل عيونه فجاة ... طالعني بعدين طالع حواليه ... شكله استوعب الحين المكان اللي هو نايم فيه ...
مسح ويهه بايده وقال بكسل ..
هيثم: ساعة جم الحين ؟؟
ابتسمت على ويهه وقلت ..
مشعل : اربع ونص ...
عدّل قعدته وقال بصوته الناعس ..
هيثم: اذن الفير ..صح ؟
هزيت راسي بايجاب ... فقام وقال وهو يسحب ريوله سحب ...
هيثم : نطروني لا تروحون ..
ودخل الحمام عزكم الله ...
اما انا ...اتجهت عيوني رأسا على جيس الأدوية ... رديت مسكته مرة ثانية وتاملته عدل ...
شهالأدوية ؟؟
اول مرة اشوف ابوي ياخذ ادوية ...
مسكت وحدة من علب الحبوب ... وطبعا ما فهمت شي ...
مالي غير عمي زياد ...
" اللقافة مو زينة ترى ..."
انتبهت على صوت ابوي وراي ..التفت وكان يطالعني وهو ينشف ايده ... قلت باحراج ..
مشعل: ماعليه ..مو اول مرة ...
وقلت بجدية ..
مشعل: شهالأدوية يبا ؟
تجدم مني واخذهم وقال ..
هيثم: قلت لك اللقافة مو زينة ...
طالعته بتعجب ...
شكله ما يبي يعلم ...
مشعل: انزين اشفيك ؟؟ ليش ماتبي تقولي ؟؟
التفت وقال وهو ماله خلق ..
هيثم: مشيعيل وايد تحن انت ...
بغيت ارد عليه بس سمعت طق على الباب وكان فارس ...اللي قال ..
فارس : باجي دقيقتين على الأذان ترى ... ماتبون تيون ؟
طالعت ابوي اللي طالعني وقال ..
هيثم: اخرتنا على الفاضي ...امش ..
الحين انا اخرتك ؟؟
انا إلا اعرف شسالفة الأدوية ...
كنت طول الطريج اراقبه ...شكله صج تعبان ...
شفته يقوم بعد ما خلص الصلاة... كان يقوم ببطء ...ويمه كان عمي زياد وطبعا كانوا يتساسرون طول الوقت ...
ودي اعرف شنو فيه ...
طقيت فارس اللي كان قاعد يستغفر يمي ...وبسرعة قلت بصوت واطي ..
مشعل: شوف شوف ابوي ..
طالعه فارس مطولا بعدين قال ..
فارس : اشفيه ؟؟؟
طالعته بنرفزة وقلت ..
مشعل: شوفه مو قادر يمشي ..
فارس : عادي ...كاهو يمشي مثل العالم ..
طالعته معصب وقلت ..
مشعل : لا ؟؟ احلف انت بس ؟؟ توني ادري انه يمشي مثل العالم ... تصدق ؟؟
ضحك فارس وقال ..
فارس :انزين اشتبيني اقول ؟؟
قلت وانا اقوم ..
مشعل: ولا شي ... قوم قوم ...
طلعنا من المسيد بعد ما افترقنا احنا وعمي زياد وطول الوقت انا وفارس نأشر لبعض ...
انا اقول ابوي تعبان ..
وهو يقولي مافيه شي ..
والمشكلة ان ابوي بالنص بينا ... واحنا من ورا ظهره نأشر لبعض ...
لين ..
هيثم : اقول... دوختوني تراكم ...
وطالعنا ....فضحكنا انا وفارس اللي قال ..
فارس : ماادري عنه ولدك مو صاحي ..
قلت قاصد ..
مشعل : مو انا بس اللي مو صاحي ...
وطالعت ابوي اللي طالعني وفهم علي ... طق راسي على الخفيف وقال ..
هيثم: انا ماادري طالع حنّان على منو ..
قلت وانا اضحك ..
مشعل: من شابه اباه فما ظلم ..
قال باستخفاف ..
هيثم: لا ؟؟ يعني انت تشبهني الحين ؟؟
قال هني فارس ..
فارس : يحصلّك تشبه ابوي انت ؟؟
طالعناه انا وابوي بصدمة جنا تجمدنا ....
الله الله من متى قمنا نقول هالحجي ؟؟
نقل نظره بينا ...بعدين نزّل راسه ومشى منحرررررج ...
طالعنا بعض انا وابوي اللي شكله كان الوان ...
انا هني ما قدرت امسك روحي ...
دزني ابوي وقال ..
هيثم: لا تضحك مالت عليك ..
وهو نفسه كان يضحك ...
قلت وانا ادخل البيت ..
مشعل: والله انك انت ولدك شي عجيب ..
صعدت داري فوق عشان برد انام ...
بطلت عيوني على الساعة 11 ونص ... لقيت فارس قاعد يحط اغراضه بالجنطة ..
ئي صح ..اليوم بنرد البيت ...
مابي ارد والله وناسة ...
" اقول سنو وايت شرايج تساعديني؟"
ضحكت على فارس وقلت ..
مشعل: ليش ما قعدتني ؟
قال وهو ياخذ هدوم من الكبت ..
فارس : انت ولا فرقة حسب الله تقعدك ..
قلت وانا اقوم من السرير واروح الحمام ..
مشعل: انت عبالك الناس كلهم مثلك من اقل حركة يقعدون ؟؟
فارس : ئي مو هاذي مشكلتي ...اني اشوف الناس كلهم مثلي ...
ئي مو هذا اللي خلاك تكره ابوي 12 سنة وتحقد عليه ..
هذا نفسه اللي خلاك ترجع لنا بعد اربع شهور هروب ..
لأنك انسان تحس بالمسؤولية ...
وبتظل جذي حتى بوجود ابوي ...
بعد ساعة تجمعنا كلنا عند السيايير ...
شفت ابوي يحط اغراضه داخل دبة سيارته ... ويقول لجمان ..
هيثم : جمون بتركبون مع عمج زياد اوكي ..
جمان : انا وعبير وفروحة ؟؟
هيثم: لأ .. انا وعبير بنروح بروحنا وانتي وفروحة مع زياد وعمتج اوكي ؟
هزت جمان راسها بايجاب وراحت لعمتي ...
كل هذا شفته وانا داخل سيارتي ... انتبهت لفارس يصك الباب ويقعد يمي ...قلت وانا عيوني على ابوي ..
مشعل: ابوي فيه شي ..
وطالعت فارس اللي طالعني بعدين طالع ابوي وقال ..
فارس : انت تتوهم ... مافيه إلا العافية ..
يمكن ليش لأ ؟؟
سمعته يقول ..
فارس : بس ليش ما يخلي عبير تيي معانا ؟؟
قلت وانا اشغل السيارة ..
مشعل: ماادري ..
بعدين انتبهت على جملته ..
طالعته بصدمة ... فضحك ...
قلت وانا ادزه يطلع برة ..
مشعل: يا شقول .. وانا عبالي قصدك على جمان وفروحة ...
وهو من كثر الضحك مو قادر يتكلم ...
مشعل: قوم قوم ...مو ويه واحد يوصلك..... قوم روح مع ابوي ..
فقال ..
فارس: واخلي عبير تيي عندك ؟؟
قلت منبطة جبدي ..
مشعل: فارس ..
فضحك زيادة ...
فارس: ويهك وانت مستحي تحفة ...امانة لا يطوفك ..ِشوف ويهك بالمنظرة ...
حرّكنا وعلى الساعة 2 ونص وصلنا ...
بعد ما رجعت هدومي مكانها بالكبت ... وتسبحت على السريع ... مسكت تلفوني لأني متواعد مع محمد
بس تفاجأت اني القى رسالة ..
بطلتها ...
" ابي اشوفك اليوم ... لا تتعذر ... "
وكانت من شوق ...
شتبي هاذي ؟؟؟
^^^^^^^^^^^^^^^^^^^^^^^^^^
" باجر ؟؟؟!!!!!"
وقفت مصدوم وانا اطالعه بكل فزع ...
طالعني بالمقابل بهدوء مصطنع ....
قلت لسة مو مصدق ..
هيثم: انت من صجك ؟؟
وقف جدامي وقال يحاول يبرر ..
فارس : يبا ... انا قلت لك اني لازم اسافر ... لا تنسى اني مأخر السفر اسبوع كامل ...
قلت بمرارة ..
هيثم: انا ماابيك تأجله ...
وقربت منه وقلت بأسى ..
هيثم : ابيك تلغيه ..
طالعني ...
تأملني ..
بعدين قال ..
فارس: صعب ... لازم اكمل الرسالة اللي بديتها ... هاذي مستقبلي يبا ... ولا انت ما تبيني ارد بشهادة عالية ؟؟
انا ماابيك ترد بشي ...
ابيك تقعد عندي ولا تحرك ...
ابي اعوض الأربع شهور اللي غبتهم عني ..
اقصد الـ 12 سنة اللي ضاعوا ...
ابي اقصّر المسافات بينا ...
قلت بضعف ..
هيثم: بس باجر وايد قريب ... اجله شوي بعد ..
فارس : لين متى ؟؟ ااجله يوم ؟؟ يومين ؟؟ انا بسافر بسافر ... خلني اسافر وانا مرتاح يبا ...
انت ترتاح وانا اتعب ؟؟؟
سحبت نفس اهدي البراكين اللي بدت تثور في صدري ...
هزيت راسي بتفهم مصطنع ..وقلت ..
هيثم: انزين ... جم تاخذ الرسالة ؟
فارس : على حسب ... بس انا ان شاء الله بقعد سنة ونص تقريبا ..
الله ... سنة ونص ؟
بققت عيوني عليه وقلت ..
هيثم : سنة ونص مارح اشوفك ؟؟
ابتسم وقال ..
فارس : لأ طبعا بييكم بالإجازات ...
هيثم: وان شاء الله متى اجازاتهم تبدأ؟؟
قال بمزح لأول مرة ...
فارس: بوفارس ... اشفيك ؟؟ ولا جنك دارس برة ...
تنهدت بضيق وقلت ..
هيثم: اوكي .. امري لله بعد شسوي ؟؟
ابتسم وقال ..
فارس: ئي جذي ...هذا هيثم اللي اعرفه ..
ولو انه اول مرة يمزح معاي ... بس سايرته وقلت وانا ابتسم ابتسامة ذابلة ..
هيثم: عداك مشعل ..
فارس: انا وهو بغرفة وحدة ... لازم يعديني ..
وسكتنا ...
قلت وانا هني اقطع السكون ..
هيثم: دير بالك على روحك هناك ...
هز راسه بايجاب وقال ..
فارس : ان شاء الله ...ادعيلي ارد بسرعة ومعاي الشهادة ...
قلت ابي اجيس نبضه وبنفس الوقت نبعد عن هالموضوع الكئيب ..
هيثم : وتتزوج ...
ابتسم وقال
فارس : اشحقة تفاول على بنت الناس ؟؟
قلت باستنكار ..
هيثم: افاول عليها ؟؟؟ تحمد ربها انك بتخطبها ...
ضحك وقال ..
فارس: القرد بعين امه غزال ...
هيثم: انا مو امك ...
ضحك زيادة وقال ..
فارس: انت بالنسبة لي اثنينهم ...
ابتسمت عليه وقلت ..
هيثم: اسالك سؤال يقرقع بقلبي من زمان ...
فارس : اكيد ...
قرّبت من ويهه شوي وقلت ..
هيثم: انت صج كنت تكرهني ؟؟
قلت بسرعة اكمل قبل لا يجاوب ..
هيثم: ابي الصراحة...
سكت وهو لسة محتفظ بابتسامته ...
وطوّل ...
بس قال اخيرا ..
فارس : لأ ... عمري ما كرهتك ... وقلت لك اياها من قبل ..حاولت وما قدرت ..
صدقت عمري انا هني ... بس مسكت روحي وقلت ..
هيثم : انزين اشحقة كنت تنرفزني دايما ؟؟
ضحك وقال ..
فارس : والله ما كنت اقصد بس كنت اكره برودك ..
برودي ؟!!!
هيثم: برودي ؟؟!!!!
قال باحراج ..
فارس : آسف...
هيثم: لا عادي ...بس انت شايفني بارد ؟؟؟
فارس : اخاف اقولك تزعل ...
بققت عيوني عليه مصدوم ...
فضحك وقال ...
فارس : انت ومشعل لما تنصدمون نفس الويه ..
ابتسمت عليه وقلت ..
هيثم: من شابه اباه فما ظلم ..
وردت لي ملامح الحزن مرة ثانية ...
ماادري احس اني مارح اشوفه مرة ثانية ...
ماابيك تروح يا فارس ..
مابيك تبتعد ...
كافي بُعد ...
كافي غربة مشاعر ...
" اول مرة تشوفني ؟"
انتبهت عليه وهو يطالعني ويهه احمر صاير ..
استحى من نظراتي ..
ضحكت وقلت ..
هيثم: اشفيك ؟؟ عادي ابوك ويطالعك مافيها شي ..
قلب ويهه عني وهو مستحي وقال ..
فارس : بس مو جذي ..
هني ضحكت من القلب ...
طالعني وقال ..
فارس : بعطيك صورتي قبل ما اروح تمقل فيها عدل بس لا تطالعني جذي..
عاندته وظليت اطالعه ...
فارس : يبا ...
ضحكت انا هني ... وقلت ..
هيثم: معجب ما يصير ..
ابتسم وقال ..
فارس : لا يصير ...
دق هني تلفونه قام وقال ..
فارس : عن اذنك ..
طلع وخلاني عشان يرجع لي الحزن ...
يا الله ما صدقت ان علاقتنا ردت ..
يروح يسافر ؟؟؟
قدّر الله وماشاء فعل ...
^^^^^^^^^^^^^^^^^^^^^^^^^^^^^^^^^^^
انا شلي خلاني ايي ؟؟
طلعت من السيارة وتسندت عليها ورفعت ايدي اشوف الساعة ..وكانت 6 ونص المغرب ...
شهالمكان ؟
ماتخاف على عمرها هي ؟؟
مكان خالي ..وظلمت الدنيا الحين ..
افففففففففف ..
الحين وينهي هي ؟؟
سمعت صوت مسج بتلفوني ...
مديت ايدي داخل السيارة وطلعت التلفون..
بطلته..
" تحرك جدام لين تشوف سيارة زرقة ... انا هناك "
لا والله ؟؟
وليش ان شاء الله ما تيين انتي عندي ؟
صج بنات مايعات ... خطوتين ما تقدر تمشي ..
افففف ..
هاذي المرة الثانية اللي اتأفف فيها ...
استغفر الله ..
مشيت لين ما لمحت سيارة ..دققت باللون وكانت الحمدلله زرقة ..
واخيرا وصلت ..
تجدمت لين وصلت للسيارة نفسها ...
بس انصدمت ..
مافيها احد !!!!
وين راحت هاذي ؟؟
تلفت حوالي بهالمكان الفاضي ..
ماكو احد إلا انا والسيارة الفاضية هاذي ..
شوق يا ..
مابي اغلط عليها ..
وين طست هاذي ؟؟...
" ان شاء الله استانست بخيران ؟"
التفت لصاحب الصوت ...
بققت عيوني مصدوم ....
هذا شلي..
يزيد ؟؟!!!!!!!!!!!!!!!!
يتبع <<<[/COLOR][/COLOR][/SIZE]
التعديل الأخير تم بواسطة سر حياتي ; 31-07-08 الساعة 03:40 PM
|
31-07-08, 03:31 PM
جديد مواضيع قسم القصص المكتمله
العرض العادي
