لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


ايامي للكاتبة ليل العشاق

بسم الله الرحمن الرحيم باسمه نبتدأ وبه سنختم بإذنه ... قد نسجت من افكاري قصصا قد تكون حاكت الواقع .. وقد كتبت احرفا قد لامست قلوبكم ...

إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 21-07-08, 04:10 PM   المشاركة رقم: 1
المعلومات
الكاتب:
اللقب:

البيانات
التسجيل: Mar 2008
العضوية: 66106
المشاركات: 333
الجنس أنثى
معدل التقييم: سر حياتي عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
سر حياتي غير متواجد حالياً
وسائل الإتصال:

المنتدى : القصص المكتمله
افتراضي ايامي للكاتبة ليل العشاق

 

بسم الله الرحمن الرحيم

باسمه نبتدأ وبه سنختم بإذنه ...

قد نسجت من افكاري قصصا قد تكون حاكت الواقع ..
وقد كتبت احرفا قد لامست قلوبكم ...

هذه المرة تختلف الكلمات والحبكة عن السابق ..
كتبنا للواقع ...
كتبنا للحب ...
وسنكتب اليوم بإذنه تعالى ..
للحب والواقع معا...
" ايــــــــــــــــــــامي "

قصة تحيا بتعليقاتكم وستنتهي بارائكم ...
تقبلوها مني ...
اختكم : ليل العشاق

الحلقـــــــــــــــــــــة الأولـــــــــــــــــــــى
ــــــــــــــــــــــــــــــــــــــــــــــــــ ــــــــــــــــــــــ


آآآآآآخ يا حلاة الطلعة من الدوام ...تريح وتنعش البني آدم ...طلعت من مكتبي وعلى طول على السيارة
بروح البيت... دخلت السيارة وشغلت التكييف ابعد الحر اللي حرق ويهي ..وتحركت ...سمعت صوت تلفوني ... وكان رقم ولدي مشعل... ابتسمت ...ورفعت التلفون لأذني ... وقلت ..
هيثم : هلا مشعل .
مشعل :هلا يبا ...اشلونك شخبارك ؟؟
هيثم : انا الحمدلله ...انتوا اشلونكم ؟؟ اشلون اخوانك ؟؟
مشعل : كلنا بخير والحمدلله ... بس ناقصتنا شوفتك ...
اها ...ردينا للموضوع القديم ...اختفت ابتسامتي تدريجيا ..وقلت وانا اوقف للأشارة..
هيثم : مشعل لا ترجع للموضوع هذا ...انتهينا منه خلاص ...
سكت شوي شكله زعل .. بس والله مو بإيدي انا ما اقدر ارد لأمهم مرة ثانية ...
تكلم هالمرة وقال مغير للموضوع وبإحباط ..
مشعل : اوكي ... يلا يبا مع السلامة ...
ضوت الإشارة وصارت خضرة ..حركت وانا اقول ..
هيثم : مشعل لا تزعل ..
قال وصوته يقول شي ثاني ..
مشعل : لا ما زعلت ..دير بالك على روحك يبا ..
هيثم : وانت بعد ..
وصكيت عنه ... افففففف لازم ينعاد هالموضوع علي اكثر من مليون مرة ...ماادري اشفيهم مو راضيين يتقبلون خلاص انا ونورة ما نصلح لبعض ...بعدين احنا مطلقين صارلنا 12 سنة ليش الحين مصرين هالشي ...
ادري دوختكم بدون ما اقولكم منوا انا وشنو سالفتي ...
انا هيثم ...عمري 46 سنة .. مطلق من 12 سنة ... مهندس معماري ..عندي اربع ..ولدين وبنتين .. اكبر عيالي اسمه فارس وبعده اللي دق علي قبل شوي مشعل وتيي وراه جمان ..وبعدها حبيبة قلبي فرح ..
فارس عمره 22 سنة ...من اول ما تطلقنا انا وامه ما اشوفه اللي لما ازورهم بالبيت .. ولما كبر ما قمت اشوفه إلا نادرا .. ادق عليه بعض المرات ..بس هو عمره ما دق علي ...حاقد علي ماادري ليش ..يشبه امه بالشكل وبالصفات ..ويموت على امه واااايد فوق ما تتصورون ..يدرس ادارة اعمال
اخوه مشعل عكسه تماما ..طيب وحبوب والضحكة ما تختفي من ويهه ... ودوم انا وهو مع بعض يزروني في البيت ويقعد معاي اغلب اوقاته ... عمره 20 سنة ... يدرس هندسة معمارية ..يعشقها بجنون ..ما شاء الله عليه شاطر من يوم هو صغير ومتفوق طول عمره ..
تيي بعده جمان ...وآآآآه من جمان ...اكثر وحدة مخوفتني ... ماادري عنها كلش ..شنو تحب شنو تكره ..مبتعدة عني واايد ..او انا مبتعد عنها ماادري بالضبط ...عمرها 19 سنة ..تدرس بكلية التربية ...سنة ثانية ..
وبعدهم آخر العنقود فرح حبيبتي ...عمرها 10 سنين ...الطفولة تتمثل فيها ...اعشقها بجنون ..لما تيي تزورني مع مشعل ...طول الوقت تكون قاعدة بحظني ...بس للاسف مع هالبراءة ما تتكلم ...مولودة وحاسة السمع مفقودة.. طبعا تعرف لغة الإشارة ونتفاهم معاها من خلالها ...
مع هالكلمات وصلت البيت ...صفت السيارة بالموقف ونزلت ... دق هني تلفوني ...طالعت الشاشة ولا زياد ...
هيثم : هلا زياد ..
زياد : اهلين ...وينك؟؟
هيثم : توني طالع واصل البيت ...راد من المكتب ...ليش ؟؟
زياد : لا ولا شي ...بس نلتقي الليلة ؟؟
قلت وانا ابطل باب الرئيسي ..
هيثم : اكيد كالعادة ...
زياد : اوكي ..يلا مع السلامة .
صكيت عنه .. زياد هذا رفيجي من ايام الجامعة ...ربع لأ مو ربع احنا اخوان واكثر بعد .. ومن حبي له عطيته اختي .. يعني الحين نسيبي ... متزوجين اكثر من 10 سنين ... وعندهم بنت بعد ما يأسوا ان ما اييبون يهال ...سبحان الله ... الله رزقهم في بنت بعد 9 سنين تعب ...اسمها شوق ...عمرها سنة ...تهبل ..إلا تينن ... تنسى روحك لما تمسكها ...
دخلت البيت وانا ابتسم على طاريها ...توجهت للصالة لقيت عبير بنت اخوي المتوفي الله يرحمه ..قاعدة تقرا كتاب ونظاراتها تزيدها حلاة فوق حلاها ..شعرها الأسود الناعم والفاحم يذكرني باخوي كل شي فيها يذكرني فيه ...
مات شهيد الله يرحمه ...مابي ارجع لهالذكريات لأني مااتحمل ...تقدمت وما انتبهت لي ..كنت امشي بشويش ابي اخرعها ... قلت بصوت عالي شوي ..
هيثم : شنو تسوين ؟؟
نقزت هي بمكانها ...والتفت لي ولما شافتني واستوعبت اني انا ...دزتني على الخفيف وقالت ..
عبير : عمي ...خرعتني ...
ضحكت انا على شكلها ...وقلت وانا اقعد يمها ..
هيثم : لا ؟؟؟ يا رقيقة ...
ردت مسكت الكتاب وقالت وهي تعدل نظارتها ..
عبير : اشحقة ياي مبجر ؟؟
بطلت عيوني على وسع وقلت ..
هيثم : انتي شكلج من كثر القراية ما حسيتي بالوقت ...
التفت لي هي هني وكملت وانا اطقها على راسها ..
هيثم : الساعة وحدة ونص الحين ...
وقمت من مكاني وقلت ..
هيثم : قولي لساندرا تحط الغدا ...حدي يوعان ...
ومشيت ...ياني صوتها وراي يقول ...
عبير : بقولها ...بس عمي ... عندي دوام الساعة اربع ...
وقفت بطريجي ..متأفف ...دومها تقولي بآخر لحظة .. رديت للصالة ...وقلت وانا احط ايدي على الطوفة ..
هيثم : لا ؟؟ حلفي انتي بس ؟؟ توج تقولين لي ؟؟
فصخت نظارتها ..وقالت ..
عبير : سشوي انا ما اشوفك إلا الصبح وحزة الغدا ...وباجي الوقت برة .. يعني اشلون اقولك ؟؟
صح ...صاجة انا كله برة ... تنهدت وقلت مقهور ..
هيثم : قعديني ثلاث ونص ..
وبغيت امشي بس وقفت والتفت لها وانا رافع صبعي اهددها ..
هيثم : هاذي آخر مرة تسوين فيني جذي ...
ضحكت هي ...على شكلي وطريقة كلامي ...هني يتني صورة اخوي لما كان يضحك ... ما قدرت وابتسمت ...
عبير : ان شاء الله ...
صعدت انا فوق وبدلت هدومي .. ونزلت تحت وتغديت معاها ... اكيد بتسألون شنو سالفة عبير ...
عبير الله يسلمكم مثل ما عرفتوا ابوها ميت ..وامها الله يسامحها هدتها وهي صغيرة علي انا وامي ..وتزوجت بعد ما مات اخوي .. من 17 سنة وانا متكفل فيها ..
وطبعا بتسالون بعد وينها امي .. امي ماتت من الحزن والهم اللي ياها بعد وفاة عبدالعزيز اخوي .. عقب ثلاث سنين من الغزو ماتت .. بسكتة قلبية ..
وانا الحين ظليت بروحي مع عبير في البيت ... شبح امي واخوي احس لسة موجود في هالبيت ...بعض المرات لما اقعد بالغرفة بروحي ..احس عبدالعزيز نايم وياي ...مثل قبل ..لما كنا صغار ..كان يخاف ينام بروحه .. ايي ويطق الباب علي ..وانا اعرفه بدون ما ابطل الباب ..
ماادري ليش هالأفكار محتلة مخي الحين ...تنهدت وانا اصك الباب ..باب غرفتي ..وانسدح على السرير ..
التفت ناحية مكتبي ...شفت صورته ...اقصد صورتنا واحنا بالشاليه ... انا وهو واقفين ...لامه بذراعي ..
غمضت عيوني والتفت عن الصورة ...مابي اتذكر شي ..رح اتعب جذي ... وعلى هالأفكار نمت ...
قمت على صوت الباب ...هاذي عبير اكيد .. قلت وانا ازيح البطانية عني ..
هيثم : قاعد عبير قاعد ..
ومسحت على ويهي بكسل ... فركت عيوني ورحت الحمام عزكم الله ..توضيت وصليت العصر .. وبدلت ووديت عبير الجامعة ...انا ماادري هالبنت ليش ما تسوق وتفكني ... تذكرت لما ردت على تساؤلي هذا ..قالت انها تخاف من السيارات ..والحوداث ...مع ان جمان بنتي بعمرها وتسوق ...
اذكر اني شريت لها هالسيارة يوم تفوقها باول سنة جامعة ... ابتسمت على هالذكرى ...
حياتي كلها ذكريات ..ماادري متى بتصير واقع ..
بعد ما وديت عبير ...ما ياه في بالي ارد البيت .. دقيت على مشعل ... ياني صوته النايم ..
هيثم : نايم ؟؟
مشعل : لا زين انك قعدتني .. هلا يبا ..
هيثم : هلا حبيبي ... فاضي ؟؟
مشعل : حتى لو مو فاضي افضى لك ..
ابتسمت وقلت ..
هيثم : ماله داعي ...شكلي بتعبك ...رد نام ..
مشعل : يبا ...شهالرسمية ؟؟ انا ولدك لو تبيني اييك المريخ ايي ... بعدين انا خلاص قعدت وانا مااحب ارد انام إذا احد قطع نومتي ...مثلك ..
وقالها بمزح ...ضحكت انا وقلت ..
هيثم : مشيعيل ..استح ...وتعالي يلا ..
ضحك هو بعد وقال ..
مشعل : ئي جذي ..هذا هيثم اللي اعرفه ..
صكيت عنه بعد ما علمته وين نلتقي .. اول ما شفته ياي وقفت وسلمته عليه ...تعانقنا ...وقال هو ..
مشعل : اشتقت لك وايد ..
هيثم : وانا اكثر ..
قعدنا ..وقال هو ..
مشعل : دومك تيي هني ؟؟؟ ما تمل من هالمكان ؟؟
هيثم : لا طبعا ...انا متعود على الناس هني .. اشتشرب ؟
مشعل : كالعادة ...مانجا ..
قلت اقلده ..
هيثم : ما مليت منها ؟؟
وضحكنا ...طلبت انا قهوتي ..وطلبت مانجا حقه ..
مشعل : ها يبا ..أشلونك ؟؟ شخبارك ؟؟ وشخبار عبير ؟؟
طالعته بخبث وقلت ..
هيثم : اها ...عبير ...قول جذي من الأول ..بلاها هاذي ال...
وقلدت صوته ..
هيثم : ها يبا ..اشلونك ؟؟ شخبارك ؟؟
مات من الضحك مشعل ... وقال ..
مشعل : يبا ...انا اسال عنها من باب القرابة بس ... مااكن لها اي مشاعر وانت تعرف ...
قلت وانا متأكد ..ان ما يكن لها اي مشاعر ..
هيثم : ئي ادري ...
قلت مغير الموضوع ..
هيثم : اشلون فارس ؟؟
هز راسه وشرب شوي من المانجا وقال ..
مشعل : ماشي حاله ... عدا العصبية اللي ما ادري من منو ماخذها ..
تنهدت من داخلي .. فارس ما كان جذي ..نهائيا .. اعرفه مثل ما اعرف اصابعي عدل .. بس من اول ما تطلقنا انا وامه وهو صاير عدائي .. مع ان تطلقنا وعمره 10 سنين ...
هيثم : ياخذ دواه ؟؟
مشعل : مرات ما ياخذ ..ويتعب ...بس امي تحن فوق راسه ..
نسيت اقولكم ان فارس مريض بالسكري ..
قلت وانا التفت للبحر ..
هيثم: هالولد ما ادري طالع على منو ؟؟
سمعت مشعل يقول ..
مشعل : بس مع ذلك .. طيب ..بس الله يهداه عصبي شوي ..
التفت انا وقلت ..
هيثم : للحين هو وجمان يتهاوشون ؟؟
مشعل : دايما .. آخر مرة قبل ما اييك ..
قلت باهتمام ..
هيثم : ليش بعد ؟؟
قال ببساطة ولا مبالاة ..
مشعل : لا بس ...جمان تبي تطلع مع رفيجاتها وفارس مو راضي ...
هيثم : ليش ؟؟
مشعل : لأن آخر مرة فارس سمح لها تطلع تأخرت ..
نزلت راسي اطالع اصابعي ...وقلت ..
هيثم : جمان هاذي سالفة ثانية ..
مشعل : يبا ..
رفعت راسي له ...وقال بجدية ..
مشعل : ترانا محتاجينك ..
طالعته مصدوم ...صج بعض المرات يلمح اني ارجع عندهم البيت .. بس اول مرة يقولها بويهي ..
تحركت ايدي ومسكت ايده وقلت ..
هيثم : انا معاكم دايما ..
سحب ايده وقال ولأول مرة اشوفه جذي ..
مشعل : لا مو معانا .. يبا ...
وسكت مو عارف شنو يقول ...فقلت اشجعه ..
هيثم : قول يبا ..
غمض عيونه ورد شعره ورا بارتباك وقال ..
مشعل : انسى الموضوع ... ما ..
ودق تلفونه .. كان يتكلم بضيق ... اعرفه مشعل لما يزعل ولا يتضايق .. صك التلفون وقال ..
مشعل : امي تبيني ...يلا يبا ...اشوفك على خير ..
سلم علي سلام بارد وراح .. طقيت الطاولة بقهر ..
هيثم : أففف ..أففف ...
وسندت ويهي على الطاولة .. ماادري شنو اسوي ... اشلون ارجع لنورة وانا اصلا ..ما ...عمري ما حبيتها ...
ئي ما حبيتها ...احترمها ئي ...بس احبها لأ ..
اذكر هوشتنا قبل ... على كل شي نتهاوش ... حتى لو كان هالشي سخيف وما يستحق الهوشة ..
اذكر لما كنت ابات عند امي ...كنت اخذ هدومي واروح انام عندها لين ما تهدا الأمور بينا ... وعيالي تعودوا على جذي ..
لين ما حل الطلاق بينا ...لاني ما قدرت اتحمل ... والحين انا بروحي من 12 سنة .. وبعد هالسنين اشلون تبوني ارجع ؟؟؟ انا ونورة ما نجتمع بمكان إلا نتهاوش ...حتى بعد الطلاق .. طلعت انا من البيت لان الشرع والقانون يوقف بصفها ..
ما كنت ايي اشوفهم لاني مو حلوة بحقها ..خلاص انا ما عدت زوجها .. هيفاء اختي كانت تمر عليهم وتييبهم عندي في البيت وترد تاخذهم ...وطبعا هالحجي لما كانوا صغار ..
رديت اخذت عبير من الجامعة .. وردينا البيت ..وانا مكتئب .. ونمت لين المغرب ...صليت فرضي .. وطلعت لزياد ..
مريته البيت ... شفت بنتهم برة قاعدة مع الخدامة ..طبعا ما عجبني هالشي .. مسكتها ..ودخلت فيها داخل البيت ...وقلت وانا ابتسم على شكل شوق و هي خايفة مني ..
هيثم : يا اهل البيت ...
وصكيت الباب ..طلعت لي هيفاء .. وقلت ..
هيثم : هيفاء ..جم مرة اقولج لا تخلين شوق مع الخدامة ؟
يت وسلمت علي وقالت ..
هيفاء : شسوي رحت انظف المطبخ ..وخليتها مع الخدامة لين ما اخلص ..
هيثم : وينه ريلج ؟؟
قالت وهي تاخذ شوق مني ..
هيفاء : نايم فوق ..
هيثم : نايم ؟؟ !!!
هزيت راسي وقلت ..
هيثم : بروح اقعده ...
وهذا احنا متواعدين ..صعدت فوق ودخلت الغرفة ..طبعا لقيت البطانية ملفوفة عليه الف مرة جنه صمونة ..هزيت راسي باستنكار .. دقيت راسه اصحيه ...
هيثم : زياد ..
ماكو رد ..
رديت طقيته بس هالمرة على جتفه ..
هيثم: زياد ..
ياني صوته من الأعماق السحيقة ...
زياد : امممم ..
قلت وانا احاول ابعد اللحاف عنه بس مثل ما قلت لكم ..لافه حوله الف مرة ..
هيثم : انت اشلون تنام جذي ؟؟ لاف البطانية خمسين مرة ..
مارد علي .. اففففففف ...قربت من اذنه وصرخت ..
هيثم : زيااااااااااااااااااااد
قام هو ..ومسك اذنه وقال ..
زياد : ويعة ..ويعة ..
ضحكت انا واما هو كان معصب طبعا ..دزني وقال ..
زياد : اطلع برة ...برة ..
مسكت ايده وقلت ايره ..
هيثم : قوم قوم .. متواعدين احنا ..
بعد الحاف وقام معاي وقال وهو يغمض عيونه بكسل ..
زياد : حرام عليك توني راد من المستشفى ..
يريته للحمام عزكم الله وقلت ..
هيثم : محد قالك تشتغل طبيب .. بعدين انت اللي داق علي.
ولما وصلنا للحمام دزيته داخل وقلت ..
هيثم : خلص بسرعة وصل لأن اذن من نص ساعة تقريبا ..
وصكيت الباب ..ونزلت تحت وقعدت اسولف مع هيفاء والعب مع شوق ...نزل الأمير تشارلز .. وطلعنا ..
وبالسيارة .. قال زياد وهو يتعبث بالراديو ..
زياد : شفت مشعل اليوم ؟؟
هيثم : ئي ... اشدراك ؟؟
طالعني وقال ..
زياد : انت قايلي امس ..
هيثم : هالأيام ماادري اشفيه يحن يبيني ارجع لأمه ..
زياد : ترجع تتزوجها يعني ؟؟
هزيت راسي بايجاب وقلت ..
هيثم : اليوم لما التقينا قال انهم محتاجيني ..
زياد : مع حق .. انت ابوهم اكيد بيحتاجونك ..
طالعت بملل وقلت ..
هيثم : زياد لا تبدأ ..
سكت وما رد بس قال وهو يطالع الدريشة ..
زياد : دومك جذي ..
طالعته وهو قالب ويهه عني ...
حتى انت !!! ..يا ناس يا عالم ...اشتبوني اسوي عشان تصدقون ان انا نورة ما ننفع حق بعض ... لازم يعني احط هوشتنا ومنازعاتنا مباشر على الهوا عشان تصدقون ؟؟؟
يا الله ...صج لين قالوا ..اللي ايده بالماي مو مثل اللي ايده بالنار ..
رديت البيت بعد ما خلصنا سوالف .. وكانت الساعة عشر ونص ... صوت التلفزيون كان اول شي سمعته لما بطلت الباب ...
طرشة هاذي ؟؟ اشحقة معلية على الصوت ؟؟
دخلت الصالة وقلت ..
هيثم : عبير ...الصوت ...
بعدها ما سمعت الصوت اصلا .. شكلها طفت التلفزيون ... شفتها جدامي بعدين .. تخصرت وقالت ..
عبير : تو الناس ...لا تأخر بعد ..
أحم ..بدينا ...قلت وانا اعديها ..
هيثم : سوري بس كنت مع عمج زياد ... في عشا ؟
والتفت لها ..هزت راسها بايجاب ..وصعدت انا فوق .. وبدلت هدومي ... بعد العشا قعدنا نطالع تلفزيون ..بس عبير قامت لأن وراها دوام ...ظليت بروحي ... اطالع فيلم اجنبي ...
خرعني صوت التلفون ... هديت جلاص الجاي اللي كنت اشربه ...وقمت وانا مالي خلق ...رفعت السماعة وقلت ..
هيثم : الو ..
" يبا .."
هذا صوت مشعل .. طالعت الساعة وكانت وحدة نص الليل ..اخترعت ...
هيثم : هلا مشعل ..
سكت وما قال شي ..قلت باستغراب وانا قلبي ناغزني ..
هيثم : مشعل ..في شي ؟؟
ياني صوته مخنوق ..
مشعل : امي ..
نورة !!
هيثم : اشفيها ؟؟
سكت ومارد ...
قلت ما نفد صبري ..
هيثم : اشفيها امك ؟؟
اخيرا رد ويا ليته ما رد ...
مشعل : ماتت .

يتبع

 
 

 

عرض البوم صور سر حياتي   رد مع اقتباس

قديم 21-07-08, 04:14 PM   المشاركة رقم: 2
المعلومات
الكاتب:
اللقب:

البيانات
التسجيل: Mar 2008
العضوية: 66106
المشاركات: 333
الجنس أنثى
معدل التقييم: سر حياتي عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
سر حياتي غير متواجد حالياً
وسائل الإتصال:

كاتب الموضوع : سر حياتي المنتدى : القصص المكتمله
افتراضي

 


الحلقــــــــــــــــــــــة الثانيــــــــــــــــــــة
ــــــــــــــــــــــــــــــــــــــــــــــــــ ــــــــــــــــــــــ


ما صدقت اللي سمعته من مشعل.... بدلت هدومي على السريع وطلعت طيارة للمستشفى بعد ما خذيت العنوان ... مااصدق ..نورة !!!
وصلت ودخلت المشفى وانا مشي بسرعة ... وقفت وحدة من الممرضات وقلت ...
هيثم : لو سمحتي ... م..
" يبا "
التفت لقيت مشعل واقف عند الريشسبشن ... كان ويهه ما اقدر اعبر عنه الصراحة ... تجدمت منه وقلت ..
هيثم : مشعل ..صج اللي سمعته ؟؟
نزل راسه وبدت ايده ترجف ...عرفت من هني ان صج ... حط راسه على صدري وبدا يبجي .... اما انا ..واقف مثل الصنم ... ما قدرت اسوي شي إلا اني ارفع ايدي واحظنه ... ولسان حالي يقول ..لاحول ولا قوة إلا بالله ...
بعَد مشعل عني فقلت ..
هيثم: اشلون ماتت ؟؟
طالعني سيدة جنه كلمة ماتت قرصته ..او ما استوعب انها ماتت ... قال بمضض ..
مشعل : كانت هي وفرح رايحين حولي بارك تبي تلعبها ... بس ..
قاطعته انا بصدمة وقلت ..
هيثم: فرح كانت وياها ؟؟
نزلت هني دمعة ومسحها وقال ..
مشعل : لا تخاف ...مافيها شي ...طلعت منها صاغ سليم ..الحمدلله ...
تنهدت بارتياح ...بغى قلبي يوقف ... قلت ..
هيثم : وينها اختك ؟
مشعل : مع فارس جدام غرفة ...
واخذ نفس وقال ..
مشعل : غرفة امي ...
مشينا للغرفة ...لما وصلنا لقيت فارس قاعد ...تصدقون اشتقت له وايد ... من زمان ما شفته ... كان قاعد على الكراسي وفرح تبجي بحظنه ... يحاول يسكتها وهو اصلا يبي واحد يواسيه ... ما كان منتبه لي ...
فارس : بس فرح ...خلاص ...
وحط راسه براسها ونزلت دمعة منه ... آلمني هالمنظر ... انتبهت على فرح ومدت ايدها لي تبيني وهي بحظن فارس ...التفت فارس اخيرا ولما شافني ... انقلبت نظراته لحقد .. ماادري ليش يكرهني ... احس لما يشوفني جنه يشوف ابليس ...مسح دمعته ...وقال لمشعل وهو يعطيه فرح ..
فارس : هاك ...
ومشى عنا ... تنهدت بألم ...آآآخ يا قلبي ... اخذت فرح عن مشعل ..وقعدت اسكت فيها ...سالت مشعل عن جمان بس طلعت جدامي ..كانت بالغرفة عند امها ...اول ما شافتني يتني ...وبجت بحظني .. لميتها بذراعي وانا اقول ..
هيثم : بس بابا ...حبيبتي ادعي لها ...تراها محتاجة الدعاء ...
بعد ما تعبت وانا اسكت فيهم ...سمعت جمان تسأل مشعل عن فارس .. قامت هي وقالت ..
جمان : بروح اناديه ..
واختفت ... التفت انا لمشعل البائس ...اللي منزل راسه ..
هيثم : مشعل ..
طالعني ..فقلت ..
هيثم : قوموا روحوا البيت الوقت متأخر ..
انصدم وقال وعيونه مليانة مسبقا بالدموع ...
مشعل : حتى بهاذي بتخلينا ؟؟
انا الحين انصدمت ...كمل وقال ودمعة تنزل ..
مشعل : نروح البيت ..جذي ؟؟ امنا ماتت وانت تقول لنا روحوا البيت ؟؟؟
ما فهمت عليه فقلت ..
هيثم : وشنو تبيني اقولكم ؟؟
انصدم اكثر ... مسح دموعه واخذ مني فرح بدفاشة ... وقال ..
مشعل : ولا شي ..
وراح ... ظليت انا اطالع الفراغ مصدوم .. يعني شنو تبوني اسوي اكثر من جذي ؟؟
بس تصدقون احس اللي قاعد يصير حلم ...نورة اللي طول عمرها قوية لدرجة انها استحقت احترامي ..
ما اقول إلا الله يرحمها .. ويرحمنا برحمته .. قمت من مكاني وطلعت من المستشفى .. عند الباب الرئيسي التقينا انا وفارس .. اللي لما شافني نزل راسه وعداني ..بس انا قلت بسرعة قبل ما يروح ..
هيثم : فارس ..
وقف وما التفت لي .. تجدمت انا منه ووقفت جدامه وقلت ..
هيثم : ادري ان الوقت مو مناسب للكلام هذا ...ولا انا الشخص المناسب بعد .. بس ..
طالعت الفراغ اتهرب من نظراته الحادة .. وانا اصلا مو عارف شقول .. بس اخيرا يت الكلمات بس مخربطة .
هيثم : ااا ....دير بالك على اخوانك ..انت اخوهم العود .. وادري المسؤولية جبيرة بس ادري انك قدها ..
بغيت اضيف كلام بعد بس ويهه ما يساعد ابد ..فبلعت الكلمات وبغيت اغص فيهم ...
قال اخيرا ..
فارس : انا اصلا من زمان جذي ..
ومشى ...
مو قلت لكم ما يشجع احد ان يكلمه .. ولأني مابي اشوف ولا اسمع كلام يبط الجبد اكثر من هذا احترمت نفسي ورحت البيت ..تبون الحق على قولة اخوانا المصريين ... انا اخاف اتكلم معاه ... ئي والله ..شفتوا الدنيا ؟؟ اب يخاف يحاجي ولده ...
وصلت البيت ...ولأن الوقت كان متأخر ..ما علمت احد ..رحت نمت سيدة ... بس قبل ضبطت المنبه على صلاة الفير ..عشان اصلي واروح لهم ان شاء الله ...وفعلا نمت ...
تقلبت شوي وبطلت عيوني من الضوء اللي عمى عيوني ...
ضووووء !!!!!
قمت بسرعة وبطلت الدريشة ولا الشمس طالعة وخالصة ...التفت للساعة برعب ..وكانت عشر ونص
توضيت وصليت قضاء ..يا الله ما حسيت بالمنبه .. بدلت هدومي ونزلت تحت لقيت عبير قاعدة تريق ..
قلت لها وانا ادور على سويجي ..
هيثم : عبير ... قومي بدلي .. بنروح عزا مرت عمج ...
شلت المخدة ادور السويج ..بس مالقيته ..انتبهت اني ما سمعت رد ..التفت لقيتها تطالعني بصدمة ..
وقالت ..
عبير : اي مرت عم ؟
هديت المخدة ..وقلت ..
هيثم : طلقيتي ماتت امس بحادث ...
ازدات صدمتها ... ورمشت بسرعة بعيونها وقالت ..
عبير: انت توك دريت ؟؟
قلت اكمل بحثي ..
هيثم : لأ ..امس دريت ..
واخيرا لقيت السويج .. تحركت للباب وقلت ..
هيثم : عندج خمس دقايق ..بسرعة تجهزي ..
ومشينا انا وعبير ...لما وصلت نزلنا ..بس تفاجأت ان المكان للحريم .. عيل وين الرياييل ؟؟
طلعت لي جمان ..وويها خالي من التعبير ..وقالت ان مشعل وفارس بالمقبرة .. رحت هناك بسرعة ..على الأقل الحق على صلاة الجنازة ..وصلت المقبرة ..بس شفت الرياييل طالعين ....دخلت بسرعة ..ودورت على فارس ولا مشعل ..لقيت مشعل واقف جدام القبر وفارس قاعد جدامه ومثني ركبته .. انتبه لي مشعل ولما شافني لف ويهه عني ..تجدمت منهم ..وقلت والكلمات خارت وطلعت ضعيفة ..
هيثم : آسف ...تاخرت ..ضبـ...
قطعت كلامي لما شفت فارس واقف .. تحرك وعداني .. لف هني مشعل وتقرب مني وقال..
مشعل : لا زين انك ييت ..
وابتسم بسخرية وقهر ..ومشى عني ..
لأ إلا اله إلا الله ... الله ياخذ المنبه ... افففففف .. طلعت من المقبرة ..ومشيت ورا مشعل وفارس عشان مكان العزا ... طلع في بيتنا بالملحق ...بس بابنا يختلف عن باب الحريم ...
دخلت ...حسيت روحي غريب ... شفت مشعل وفارس واقفين يستقبلون المعزين المفروض اوقف وياهم صح ؟؟
تجدمت وقفت عند فارس ... وقف لي ..اعتبرني واحد من هالمعزين ... اما انا وقفت جدامه ما مديت ايدي ظليت اطالعه ..مشتاق له واااايد ...ودي اخذه بحظني الحين .. ظليت جذي سرحان فيه لين ما رفع راسه لي وطالعني ...يمكن تقولون الموقف اخذ ثواني بس انا اقولكم اخذ ساعات ايام ...هالموقف خلاني احس بغربة المشاعر اللي بينا ... بفارق المسافة اللي انحفرت 12 سنة ... ظل يطالعني كأنه يقولي " وبعدين ؟" ..انتبهت لنفسي ومديت ايدي ..تصافحنا ..لما لمست ايده ايدي .. تمسكت فيها بقوة .. لدرجة انه استغرب ..وقريت الأستغراب بعيونه ولو انه حاول يخفيه ...ابتسمت ...ئي ابتسمت ..خبل صح ؟؟ بس والله مشتاق له ... اما هو ظل يطالعني ببلاهة يقول" اشفيه هذا ين ؟ ".. حطيت ايدي الثانية وقلت وانا اخفي ابتسامتي غصب ... واتحول لريال حزين ..
هيثم : عظم الله اجرك ..
نزَل نظراته للارض وقال ..
فارس : اجرنا واجرك ...
وسحب ايده ..وانا اقول من داخلي ..." لااااا خلها " ..
انتقلت لمشعل ... ونفس الشي ..مديت ايدي بس هالمرة كان عادي لأني متعود على مشعل ... قربت من اذنه وقلت اساسره..
هيثم : آسف اني تأخرت ...مومني ..
طالعني بعدين هز راسه وعيونه للأرض .. جنه يقول " عادي ...مو اول مرة " ...
ادري اني مقصر بحقهم ...طلاقنا انا وامهم .. كان الحل الأمثل ...
تحركت وقعدت يمهم ..استقبل المعزين ..كانت يدور في عقلي هالسؤال ...بصفتي شنو استقبل المعزين ؟؟ انا مو ريلها ... بس ..انا ابوهم .. ولازم اوقف وياهم .. كان مشعل يعرفني على كل واحد ايي يعزي ...انا مستغرب الصراحة ..منو هذول ؟؟
ما اعتقد انهم ربع فارس ومشعل ..اعمارهم تقريبا قدي .. واكبر .. واللي لابس بشت جنه ياي عرس مو عزا ... واللي وراه بدي جارد ماله جنه داخل مؤتمر ..
قربت من مشعل وسالته ...
هيثم : منو هذول ؟؟
بغى يرد مشعل بس احد ناداه ..التفتنا انا وهو ..وطاحت عيني على اكثر شخص على وجه الخليقة اكره ..
احمد ...خال العيال واخو طليقتي ... انصدم لما شافني وانا انصدمت بعد بس تحولت نظراتي له لأحتقار وكره ..ما اقدر اخفي مشاعري لما اشوفه ... الحين ياني الجواب ..هذول ربعه ..واللي يشتغل معاهم ..
ما شاء الله ما خلى احد ما علمه عن العزا ...هو من كل شي حتى لو عائلي يخليه حدث عالمي ...
قمت انا لما شفته يقرب ... ورحت طلعت من الملحق بكبره ... هني دق تلفوني وكان زياد علمته على المكان ..
ظليت انطره برة مابي ادخل واشوف هالمخلوق .. رح اذبحه ونستقبل التعازي عليه هو واخته ... استغفر الله ياربي ..
انا هو متهاوشين من ايام الجامعة ..حتى من قبل ما اتزوج اخته .. بتسألون وتقولون اشحقة مناسبه ؟
بقولكم اني ما كنت ادري ان هاذي اخته .. لما خطبتها كان مسافر وتمت الملجة وبعدها انصدمت ان احمد اخوها ... خلاص طاح الفاس بالراس ...
لما اشوفه امشي من طريج ثاني جني شايف ابليس .. اكره واكره اشوف رقعة ويهه .. والسبب ولا شي .
بس جذي لا انا احبه ولا هو يحبني .. حاط دوبه من دوبي من ايام الجامعة ... طبعا ما كنت اسمح له ان يدخل بيتي ..وكان هذا نقطة جدالنا انا ونورة الله يرحمها ... وكنت اخليها تروح تزوره وتاخذ العيال معاها ..بس هو يطب بيتي فكرة من سابع المستحيلات تصير ... حتى بالأعياد لما اودي نورة تسلم على اهلها وتعيد عليهم كنت ادخل معاها وويانا اليهال اسلم واقعد مع عمي ومرته الله يرحمهم .. بس لما اشوفه اطلع .. ما اتحمله ..ما اتحمله ...
شفت زياد صافط السيارة ..نزل وياني وقال ..
زياد : اشحقة ما علمتني امس ؟؟
هيثم : ما كان في وقت ... كل شي صار بسرعة ..
قال باستغراب ..
زياد : انزين اشفيك واقف برة ؟؟
قلت بقرف ..
هيثم : هذاك داخل ..
زياد : منو ؟؟
قلت بملل وقرف اكثر ..
هيثم : منو يعني؟؟ .. شين الحلايا احمدوه ...
هز زياد راسه باستنكار..انا هني طالعته بنظرة ..وقلت ..
هيثم : شنو؟؟
زياد : انت لين الحين تكره ؟؟
هيثم : واكره المكان اللي هو فيه ..لو ما احترم عيالي والظرف اللي احنا فيه كنت طردته من بيتي ...
زياد : خلاص يبا لا تموت علينا ...انا بدخل بعزي ..بتنطر هني ؟؟
هزيت راسي بايجاب ...اما هو راح داخل .. دخلت داخل السيارة من الحر ... وشغلت التكييف .. ماادري ياه في بالي لما هيفاء علمتني ان نورة حامل .. بعد ما تطلقنا .. وكانت فرح .. سميتها فرح لاني كنت حزين من داخل يوم دريت انها ما تسمع ... اذكر يوم ولادتها ... اذكر يوم شلتها ...ابتسمت على هالشي ..
ما ...
اخترعت من صوت يطق الجام ..التفت وكان مشعل .. نزلت الدريشة .. قال وهو حاط ايده على عيونه من الشمس ..
مشعل : يبا ..خالي يبيك ..
ها ها ؟؟ نعم نعم ؟؟ منو يبيني ؟؟؟ ..
هيثم: وليش ان شاء الله ما اييني هو ولا خايف على بشرته من الشمس ؟؟
لعلم مشعل المسبق اني اكره خاله قلت هالكلام .. كملت وباصرار ...
هيثم: مارح اروح له ..هو يبيني خل ايي .. هذا اللي قاصر بعد ..
تنهد مشعل ..حسيته اني ثقلت عليه وهو مو ناقص .. راح وانا حسيت بالإحراج حسيت روحي غبي ..ريال شكبري تطلع مني هالكلمات .. يطلع مني هالشي وبمثل هالوقت العصيب ؟؟ بس قلت لكم من قبل انا ما اقدر اتحكم بمشاعري لما اسمع طاريه ..
نزلت من السيارة لما شفت زياد طالع ..
هيثم : رايح الحين ؟؟
طالع ساعته وقال ..
زياد : ئي عندي دوام ...
سكت شوي وطالعني حسيته بيقول شي ...وقال ..
زياد : عظم الله اجرك .
اول واحد يقولي هالجملة ... على الأقل حسسني اني واحد من العيلة ... تنهدت وقلت ..
هيثم: اجرنا واجرك ...
بغيت اضيف شي بس في صوت نشاز خرب علي ونساني اللي كنت ابي اقوله ...
" هيثم "
بدون ما التفت عرفت صاحب الصوت .. غمضت عيوني واخذت نفس امسك اعصابي لا اجرم فيه الحين .. التفت وقلت ..
هيثم : نعم ..
وصل لي احمد ..هني قال زياد ..
زياد : يلا عن اذنكم ..
مشى زياد وظلينا انا هو بروحنا ...الله يستر لا ارتكب جريمة اليوم .. قلت اطالع الفراغ مابي اشوف ويهه ..
هيثم: خير ؟؟
احمد : الخير بويهك .. بغيت اكلمك بموضوع عيال اختي ...
طالعته باستخفاف وقلت ..
هيثم : اشفيهم ؟؟
احمد : باخذهم عندي ..
بققت عيوني منصدم ... قلت وانا ابي اتاكد من اللي سمعته ..
هيثم: خير ؟؟؟ نعم ؟؟
نزل عيونه للسويج الي بين ايدينه وقال ..
احمد : العيال مو قادرين يتاقلمون في البيت بعد ما ماتت اختي ... انا باخذهم عندي على الأقل ينســ....
قاطعته وقلت وهاذي الفكرة وليدة اللحظة ..
هيثم: عيالي مارح يطلعون من بيتي ... وانا ابوهم بيظلون معاي ...
وطالعت ويهه اللي اشمئز منه طول عمري ..
هيثم: انا بييب اغراضي وبقعد عندهم ..
وبغيت امشي عنه بس قال ..
احمد : وعبير ؟؟
رديت التفت له ..شلي ياب طاري عبير؟ ... قلت ..
هيثم : شنو ؟
التفت لي هو هني وصرنا وجها لوجه ...وقال يأكد ..
واحمد : وعبير ؟؟ مارح ترتاح بقعدتها مع ناس غرب عنها ..اول مرة تقعد وياهم ..
تقربت منه وانا ودي اصكه بكس على تدخله المقيت ..
هيثم: عيال عمها مو غرب عنها ..بعدين اسمح لي ... انت مالك شغل اشلون رح ترتاح عبير في قعدتها مع عيالي ..
وتقربت اكثر وقلت جني اهدده ..
هيثم: انا وعيالي ...وعبير ..ننياز ان شاء الله البيت يحترق فينا لما نقعد مع بعض ..
والقيت عليه نظرة احتقار وقرف ومشيت عنه ...
اكرهك يا بني آدم ..اكرهك ...
رحت البيت وبطريجي دقيت على عبير وعلمتها تطلع لي عشان امرها ونروح انييب اغراضنا ..
ما قلت لأحد عن هالفكرة ...اصلا ما يت على بالي إلا لما قال شين الحلايا عن مخططه ... بفاجأهم ..طلعت لي عبير ورحنا البيت ..
عبير : بنقعد عندهم للابد ؟؟
طالعته وانا اسوق ..
هيثم: ئي ليش ؟؟ فيها شي ؟؟
شكتت شوي جنها ما توقعت اني اقولها مثل هالشي ... بعدين قالت ..
عبير : بنهد بيت ابوي ؟؟
بغيت انحرف عن الطريج .. ذكر اخوي كافي انه يخربطني ويربكني ... تصاعدت انفاسي ..والتفت لها ببطء ...لقيتها منزلة راسها ...ظليت اطالعها وانا مو منتبه للطريج ... ليما رفعت راسها وصرخت فجأة ..
عبير : عمي دير بالك ..
طالعت جدام ولفيت السكان بسرعة لا ندعم السيارة اللي جدامنا ..ووقفنا يم الرصيف ... قلت لكم لما اسمع طاريه اتيدوده ..انسى الدنيا كلها ...
بجت هني عبير ...ما اعتقد من الموقف اللي صار قبل شوي .. اعتقد من الصدمة اللي تلقتها من كلامي ..
من انتقالنا من بيت ابوها ...
ادري والله انج متعلقة فيه واايد ...وانا روحي فيه اصلا ..لميتها لي وانا اصلا امس الحاجة لايد تربت على جتفي ..
قلت ...
هيثم : عبير ..حبيبتي ... ادري انج ما تبين تنتقلين بس انا ما اقدر اهد عيالي بروحهم بدون احد معاهم ..
طالعتني هي هني جنها تترجاني اني اقول غير هالكلام ..كملت ..وانا ابتسم بويهها الرقيق ..
هيثم : صدقيني بييبج هني كل ما حسيتي انج محتاجة لابوج .. بس انتقالنا بيخلينا نعيش بعيد عن احزانا بننسى الألم شوي ...
كفكفت دموعها وهزت راسها شوي وقالت بصوت مخنوق ..
عبير : اللي تبيه ...
حسيتها لسة مو مقتنعة .. بس لازم نكمل ...وصلنا البيت ..ولمينا قشنا كله ..وطبعا ما نسيت صورة اخوي اللي على المكتب ...وصورة امي وابوي الله يرحمهم ... حطينا اغراضنا بالدبة وحركنا للمكان اللي طلعت منه من 12 سنة ولا طبيته من يومها ...
وصلت هناك وكانوا المعزين بدوا يخفون ..خليت عبير تروح للبيت وساعدتها بالجنط لين الباب لأن لسة في حريم موجودين ...بعدها رحت الملحق ... وشفت مشعل طالع ... ابتسمت بويهه وبغيت ابشره بس اختفت ابتسامتي لما شفت احمدوه طالع وراه ... ياني وقال ..
احمد : ما شاء الله بسرعة يبت اغراضك ...
مادريت عليه وطالعت مشعل وقلت ..
هيثم : اخوك داخل ؟؟
هز راسه بايجاب وهو مو فاهم شي ... بغيت اتحرك بس قال احمد ..
احمد : ما علمت عيالك انك بتعيش عندهم ؟؟
مالت عليك ..ودي احقق امنيتي واذبحك ...
طالعني هني مشعل وقال بصدمة ..
مشعل : بتعيش عندنا ؟؟
هزيت راسي بايجاب على مضض ...خرب علي الله ياخذه كنت ابي افاجأهم ...ابتسم مشعل مو مصدق ..
وقال ...
مشعل : اخيرا ...
قال هني احمد ..
احمد : اخذت رايهم ؟؟
قلت باشمئزاز ..
هيثم: راي منو ؟؟
قال وهو يأشر على فارس اللي طالع ومشعل ..
احمد : راي عيالك ..
هيثم: وليش اخذ رايهم ؟؟
احمد : يمكن ما ...يبونك تقعد عندهم ..
هني ما قدرت امسك اعصابي ...تقربت منه وقلت ..
هيثم: هم اللي ما يبوني وإلا انت ؟؟
مسكني مشعل لا تصير هوشة .. بس تمادى احمد وقال ..
احمد : انت ناسي ان هذا بيت اختي .. يعني مو من حقك تدخله ..
فلت من ايد مشعل وقلت ..
هيثم : لا ؟؟ احلف ؟؟ توني ادري تصدق ؟؟ وانت ناسي ان هالبيت ..
واشرت عليه بعصبية ..
هيثم: بيتي وانا كاتبه باسمها قبل ما نتطلق ؟؟ انا اللي بانيه ..
وقربت اكثر وقلت ..
هيثم: وهاذي آخر مرة اسمح لك تتدخل في شي انت مالك شغل فيه ...سامع ؟؟
قال مشعل ..
مشعل : يبا ...احنا في عزا..
بعدت عنهم ورحت لسيارتي .. كل هذا صار وفارس كان واقف يطالعنا ما تحرك ولا قال شي ...
سمعت احمدوه يهدد من بعيد ..
احمد : ما رح اسمح لك تقعد في هالبيت ...البيت بيت اختي ..
مارديت عليه وظليت ماشي لسيارتي ... قعدت فيها لين ما طلعوا كل المعزين .... ماادري اشلون فقدت اعصابي ..
وكان آخر واحد احمدوه ذالف بيتهم ... دفعة مردي ... طلعت من السيارة دقيت على عبير وسالتها إذا كل الحريم طلعوا ولا لأ ..والحمدلله راحوا ...دخلت البيت ..اول ما عتبت اول الباب .. تذكرت اليوم اللي طلعت فيه ...واذكر عيون عيالي البريئة اللي مو فاهمة شي ..ليش انا طالع وماخذ اغراضي معاي ..والحين سبحان الله ...راد واغراضي معاي بعد ...
بعد ثلاث ايام خلص العزا طبعا ... وإلا الآن ما احتكيت بفارس ولا جمان ... اللهم كنت اقعد مع فرح ومشعل ..اما فارس اغلب الوقت طالع وجمان حابسة روحها بالدار ..وعبير نفسها ...حسيتها مو متاقلمة هني ..
رحت داري بعد ما نومت فرح بدارها ... تصدقون كل ما ادخل هالدار هاذي اتذكر هوشتنا انا ونورة الله يرحمها .. اذكر لما كانت تاخذ البطانية وتروح تنام مع واحد من عيالها ...واغلب شي كانت تنام مع فارس ..عشان جذي طالع عليها ...
وقفت جدام الدريشة اطالع القمر اللي اكتمل ... تنهدت ..حياتي شكلها بتصير احلى بقعدتي مع عيالي .. والله احس اني مقصر بحقهم وايد .. وياه الوقت اللي انسهم هالشي .. انتبهت على فارس يصفط سيارته ..
طالعت الساعة ولا وحدة ... هو متعود يتأخر جذي ؟؟ ..طلعت من الغرفة ونزلت تحت ..استقبله ...
شفته داخل ...تفاجأ لما شافني بس بلعها .. صك الباب ومشى بهدوء من يمي .. دومه جذي لما يشوفني ما يكلمني ..بس انا بكلمه ..
هيثم: متعود دايما تتأخر جذي ؟؟
وقف هو هني وما رد علي .. التفت له وطالعته انطر الجواب .. وطال انتظاري ... فقلت .
هيثم: الساعة وحدة الحين ... كل يوم تيي بنفس هالوقت ؟؟
لف لي وطالعني وقال ..
فارس : ليش تسأل ؟؟
ما توقعت هالرد ..بس قلت ..
هيثم : ليش اسأل ؟؟ انت طالع من العصر وما رديت إلا الحين ..اكيد يهمني اعرف ..
قال وهو زهقان من هالتحقيق ..
فارس : كنت ع البحر ..
هيثم: كل هالوقت ؟؟
رفع راسه لي وهالمرة كانت نظراته تخرع ... حادة وثاقبة ..وقال ..
فارس : حلو عليك دور الأب ..تصدق ؟
وابتسم بطنازة ومشى ... ما قدرت ارد عليه ..بهالسهولة ...ما قدرت ارد عليه ... ماني عارف اشلون ابدأ معاه بداية ترجع علاقتنا مع بعض مرة ثانية ... صعب التعامل معاك يا فارس ...صعب ..
اليوم الثاني الصبح ... قعدت من النوم مبجر ...وفي بالي فكرة خططت لها من امس .. نزلت المطبخ وسويت لهم ريوق .. بيض ..جبن ..مربى .. زيتون ..طماط ..خيار .. شنو بعد ياكلونه الصبح ؟؟ ..اممم ..
بس بعد ...اكثر من جذي ؟؟
جهزت كل شي على الطاولة ورحت صعدت فوق اقعدهم .. دخلت غرفة عبير اول ..بعدين مشعل ...وفرح ..وجمان ... ووصلت لغرفة فارس ووقفت ...
" حلو عليك دور الأب ...تصدق ؟"
اكيد حلو ..لأني اب صج ... طقيت الباب اتحدى عمري ... وفتحت الباب ودخلت ...لقيتها فاضية ...اول مرة ادخل غرفته من 12 سنة ... تغيرت ...انا اعرفها بيجية .. الحين صارت بيضة ... اذكر اني انا اللي صابغها له ...
حسيت باحد وراي ..التفت ولا فارس ماسك فوطة يجفف ايدينه ويطالعني بنظرة ..نظرة صعب افسرها ..
ظل يطالعني جنه ينطر مني تفسير لوجودي هني ... بس قلت ..
هيثم: غرفتك كانت بيجية ...
علق الفوطة ..وقال ..
فارس : غيرت اللون ..فيها شي ؟؟
ادري غيره لأني انا اللي صابغه له ... قلت اغير الموضوع ..
هيثم : عبالي بلقاك نايم ؟؟
قال وهو يمسك قميصه ويلبسه ..
فارس : ما اطول بالنومة انا ..
ومسك بنطلون الجينز وقال ..
فارس : ممكن ابدل هدومي ؟؟
طردة غير مباشرة ... طلعت وانا محبط ..
هاذي البداية والله يستر تاليتها ...

يتبع <<<

 
 

 

عرض البوم صور سر حياتي   رد مع اقتباس
قديم 21-07-08, 04:15 PM   المشاركة رقم: 3
المعلومات
الكاتب:
اللقب:

البيانات
التسجيل: Mar 2008
العضوية: 66106
المشاركات: 333
الجنس أنثى
معدل التقييم: سر حياتي عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
سر حياتي غير متواجد حالياً
وسائل الإتصال:

كاتب الموضوع : سر حياتي المنتدى : القصص المكتمله
افتراضي

 

السلام عليكم ورحمة الله وبركاته

هذا الحلقة الاولى والثانية اذا تبون التكملة حاضر

القصة لليال العشاق وما انا الا سوى ناقله

 
 

 

عرض البوم صور سر حياتي   رد مع اقتباس
قديم 22-07-08, 12:08 AM   المشاركة رقم: 4
المعلومات
الكاتب:
اللقب:
عضو فخري
نور الامل
عضو مجموعة الطوارئ


البيانات
التسجيل: May 2006
العضوية: 4832
المشاركات: 12,247
الجنس أنثى
معدل التقييم: نونو عضو له عدد لاباس به من النقاطنونو عضو له عدد لاباس به من النقاط
نقاط التقييم: 125

االدولة
البلدSaudiArabia
 
مدونتي

 

الإتصالات
الحالة:
نونو غير متواجد حالياً
وسائل الإتصال:

كاتب الموضوع : سر حياتي المنتدى : القصص المكتمله
افتراضي

 

اشكرك جدا عزيزتي

سأقراها حتما حالا الانتهاء من تنزيل حلقاتها

دمتي بود

 
 

 

عرض البوم صور نونو   رد مع اقتباس
قديم 22-07-08, 03:14 PM   المشاركة رقم: 5
المعلومات
الكاتب:
اللقب:

البيانات
التسجيل: Mar 2008
العضوية: 66106
المشاركات: 333
الجنس أنثى
معدل التقييم: سر حياتي عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
سر حياتي غير متواجد حالياً
وسائل الإتصال:

كاتب الموضوع : سر حياتي المنتدى : القصص المكتمله
افتراضي 4-5

 

الحلقــــــــــــــــــــــــــــــة الثالثــــــــــــــــــــــة
ــــــــــــــــــــــــــــــــــــــــــــــــــ ـــــــــــــــــــــــــــــــــ


قعدت على الطاولة انطرهم ايون عشان يتريقون بعد ما طلعت من غرفة فارس ..شفت فرح تنزل بسرررعة وتركض وتصرخ بصرخات الأطفال اللي احبها .. يت تحتمي فيني من مشعل اللي ياي يركض وراها ... خصلات شعرها البني القصير لين اذنها ... تلعب بويهها .. فتحت ايديني اضمها .. واحميها منه ... هي تشبثت فيني بقوة ... وتخش ويهها بقميص نومي ... ويدلدغها شوي وهي تضحك بحظني ..انتقلت انظاري لمشعل اللي قاعد يضحك لفرح وحركاتها ...الحمدلله قدر يطلع ويتجاوز حالة البؤس اللي خيمت عليه هو واخوانه .. انتبهت عليه يصرخ ...
مشعل : ااي ...فرح هدي شعري ...
اشرلها تهد شعره بس ماكو فايدة .. ظلت تشد وبقوة ...ضحكت انا وبعدت ايدها ... وقلت اعاتبها طبعا ااشر لها ..
هيثم : فروووحة عيب ...هذا اخوج العود ..
قال مشعل وهو اير الكرسي ويقعد ..
مشعل : اي عود خلاص ...قمنا ننطق من يهالو...
واشرر لها بايدها يفهمها شنو قال ... لما فهمت نطت عليه تبي تطقه .. بس انا بعدتها ومشعل ..قال يسوي روحه خايف ..
مشعل : لا خلاص آخر مرة ..آخر مرة ..
هيثم : فرووحة ..من متى واحنا نطق اللي اكبر منا ؟؟
اشرت لي انها ما تحب احد يقول عنها ياهل .. التفت هني لمشعل بعد ما قعدت وحطيت فروحة بحظني ..
هيثم: والله قوية فرح ...
قال وهو يمسك المكان اللي شدته فرح ..
مشعل : عورتني ...
ابتسمت ..اما هي شدت قميصي واشرت لي ..شنو تقولون ؟؟ ...
مشعل : صح ..نسيت اقولك . تراها ما تحب احد يتكلم بدون ما تفهم ...
طالعتها واشرت لها ..
هيثم : تبين تعرفين شنو كنا نقول ؟؟
هزت راسها بايجاب ... قلت .
هيثم: فروووحة حلوة ...
ضحكت هي ضحكة ملت البيت ... ضميتها لي وقلت ..
هيثم: يا حياتي ...
طالعت الساعة لقيتها سبع وعشر ..والباجين ما نزلوا ... قلت وانا اقعد فروحة بالكرسي اللي يمي ..واقوم .
هيثم: بروح استعيلهم ...
وصعدت فوق ... اول غرفة كانت اقرب كانت غرفة جمان ..بطلت الباب ..لقيتها لسة نايمة ...قلت وانا اتجدم لها ..
هيثم: جمان ...اشحقة نايمة ؟؟
شالت البطانية من راسها وقالت ..
جمان : مابي ادوام ...
قعدت على طرف سريرها وقلت ..
هيثم : ليش ؟؟
حسيت بالكآبة في صوتها ... بس قالت .
جمان : مالي خلق ...
وتعدلت في قعدتها وبعدت شعرها عن ويهها ... وسندت على ظهر السرير ...تقربت منها وقعدت يمها بالضبط وقلت ..
هيثم: بابا ..حبيبتي ...ادري انج لسة زعلانة على امج ...
طالعتني هني جني اكتشفت سر كانت تحاول تخشه ... فكملت ..
هيثم: بس امج ما رح ترجع خلاص ...وانتي جبيرة وعاجل .. وتعرفين ان الموت حق ...
نزلت راسها هي ...
فقلت ..
هيثم: جمان ...الحياة بتستمر سواء امج موجودة ولا لأ ... صدقيني انتي بتتعبين بالنهاية ...
رفعت راسها لقيت دمعة نازلة .. قلت وانا امسحها وابتسم بويهها اشجعها ..
هيثم : مابي اشوفج زعلانة ..
بس اللي سوته بدت تبجي ...قلت وانا ارفع راسها ..
هيثم: ها ها.. شقلنا ؟؟
هزت راسها بايجاب وهي تمسح دموعها ...قلت امازحها ..
هيثم: لا تخليني اطقها بجوة معاج ...
ابتسمت هي من بين دموعها ...اخيرا ...قلت ..
هيثم: يلا غسلي ويهج وبدلي هدومج عشان تريقين ...وتروحين دوامج ...كافي الأيام اللي غبتيهم ...
جمان : ان شاء الله ...
طلعت من عندها ....ووقفت بنص الممر ... باجي المعضلة فارس ... بس تبطل الباب وطلع .. وكان مبدل هدومه وماسك كتبه ... ظلينا نطالع بعض لثواني .. صك الباب غرفته بهدوء ومشى ... تنهدت بضيق وملل من المواقف البايخة والباردة اللي تصير بينا ...قلت بسرعة قبل لا ينزل من السلم ويختفي ..
هيثم: بتتاخر اليوم ؟
التفت لي وطالعني باستغراب شوي ...جنه يقولي " ومن متى تسال ؟" او " مالك شغل " ...بس قال وهو يطلع سويج السيارة من جيبه ..
فارس : عندي محاضرة وحدة اليوم ...
ونزل ..هزيت راسي وانا مو عارف شسوي معاه .. رحت لعبير ...وطقيت الباب ودخلت .. لقيتها مبدلة وقاعدة على السرير جنها تنطر احد ..
استغربت وقلت ..
هيثم : اشفيج قاعدة جذي ؟؟
قالت ..
عبير : راحوا؟؟
هيثم : منو؟؟
قالت وهي تعدل شيلتها وتوقف ..
عبير : فارس ومشعل ...
ظليت اطالعها باستغراب وقلت ببطء ..
هيثم: انتي تنطرينهم يروحون؟؟
ويهها صار احمر من الأحراج ..نزلت راسها وقالت جنها مستحية ..
عبير: ئي ..
ظليت اطالعها وما قدرت امسك روحي قمت اضحك ... قالت هي ...
عبير : عمي ..لا تضحك علي ..
وقعدت وسوت روحها زعلانة ...اما انا مسكت روحي وقلت ..
هيثم: وااي بطني ...انتي ...من صجج ؟؟
ماردت علي ... قعدت يمها وانا ابتسم ... وقلت.
هيثم: عيال عمج هذول .. يعني بالله عليج بتظلين حابسة عمرج لين متى ؟؟
هني رفعت راسها وطالعتني وقالت ولسة ويهها احمر ..
عبير : ماادري ...ما اقدر يا عمي وانزل وهم تحت استحي منهم..
للمرة الثانية ضحكت بس كتمت الضحكة بسرعة ...سشوي ويهها يضحكني ... قالت هي لما حست اني كاتم ضحكتي ..
عبير : عمي ترى والله ما رح انزل ..
طقيتها على راسها ع الخفيف وقلت ..
هيثم: تهددين ويا ويهج ؟؟ قومي يلا ..
وقمت ..بس ما قامت هي ..قلت وانا ايرها وراي ...
هيثم: اتكلم عربي اخت عبير .. يلا امشي ..
وقفتني وقالت وهي تسحب ايدها مني ..
عبير : لحظة لحظة .. بنزل والله بنزل ... بس اسبقني وانا وراك ..
طالعتها بنص وقلت ..
هيثم: خلصي ..ترى ان ما يتي بييج صدقيني ...
هزت راسها تأكد لي ...ويهها يقول غير عن جذي ...بنشوف ....
نزلت تحت لقيتهم كلهم موجودين حتى فارس اللي كان مبطل واحد من كتبه وياكل ... قعدت براس الطاولة .. قال هني مشعل ..
مشعل : وين عبير ؟؟
طالعته بنص عين وقلت ..
هيثم: ياية ...
ضحك هو فاهم قصدي ...وقال ..
مشعل : لا لا هيثم ..متى بنعقل ؟؟
ضحكت انا وقلت ..
هيثم: اقلب ويهك ..
نزلت هني عبير .. ووقفت عند السلم ..انا اول واحد شافها ..شفتها بتلف وتركب الدري مرة ثانية بس جكيتها وقلت ..
هيثم : عبير ...
حسيتها بغت تطيح لما ناديتها ... لفت وقالت بصوت يالله ينسمع ..
عبير: نعم ؟؟
هيثم: تعالي قعدي ...ماتبين تريقين ؟؟
كانت طول الوقت منزلة راسها ..رفعت راسها ومشت وهي تاخذ نفس داشة حرب ... يرت كرسي يمي تبي تقعد بس قلت لها اقهرها واحرجها ...احبها لما تنحرج ..ويهها يصير احمررررر ...واقعد اضحك انا ..
تدرون ليش اسوي جذي ؟؟ تذكرني باخوي والله ...
هيثم: مكان جمان هذا ...
طالعتني متفاجأة ...وانا اكتم ضحكي وارد آكل ..ومطنشها ... تحركت وقعدت بالكرسي اللي يم مكان جمان ... يم فارس اللي قاعد على راس الطاولة من الناحية الثانية ..ويقرا من كتابه ... ولا مهتم ..
^^^^^^^^^^^^^^^^^^^^^^^^^^^^^^^^^^^

قعدت عبير وانا اطالع ابوي مستغرب ..اشفيه عليها ؟؟ ...حرام احرجها مبين عليها منحرجة ومستحية ..
طول الوقت تضبط الشيلة عليها ... تتأكد شعرها مو طالع ...طالعت فارس اللي ولا همه ...قبل ما تقعد عبير كان الكتاب ناحية الكرسي بس لما قعدت شال الكتاب وحطه بالناحية الثانية ناحيتي ... وويهه مركز على الكتاب ولا رفع راسه ولا شافها ..
طولت عليكم صح ؟؟؟ انا مشعل ... طالب سنة ثالثة هندسة معمارية ... كليت بسرعة لأن عندي محاضرة ثمان ونص ..
طالعت ابوي وقلت ..
مشعل : يبا ..بتودي فرح ولا انا اوديها ؟؟
كون فرح تدرس بمدرسة خاصة للصم ... بغى ابوي يرد علي بس ..
" انا بوديها "
التفت لفارس صاحب الصوت ..اخيرا نطق اللوح ... قلت وانا اخذ كتبي معاي ..
مشعل :يلا ..مع السلامة ..
قال ابوي قبل ما اطلع ..
ابوي : بتأخر اليوم ؟؟
قلت وانا ابطل الباب ..
مشعل : لا انا اخلص وحدة .. وبيي ان شاء الله على طول ..
شفت فارس قايم هو بعد وياي ...التفت لفرح واشر لها تخلص ...كلنا متعلمين لغة الأشارة عشان فرح ..
طلعنا مع بعض انا وفارس ..رحت لسيارتي ...بس سمعت فارس يقول ..
فارس : بتمر عليها الظهر تييبها معاك ؟؟
ولأني ما كنت مركز قلت ..
مشعل : منو؟؟
فارس : فرح ...
مشعل : اوكي مو مشكلة ...
لفيت عشان اركب السيارة بس شفت ابوي واقف عند الباب ...نزلت الجامة وفارس لسة ما ركب ... قال ابوي ..
ابوي: ترى عبير بتخلص 11 ...منو بييبها ؟؟
طالعت فارس اللي مارد وحط سويجه داخل السيارة ... دومه ابوي لما يتكلم فارس يطنش ولا جنه احد يكلمه ... ما يصير جذي ...قلت اوهقه ..
مشعل : فارس انت ييبها ...
طالعني فارس ببرود وقال ..
فارس : ماني فاضي ...
والتفت لابوي وقال ..
فارس : ليش ما تييبها انت ؟؟
هيثم: انا مارح اخلص إلا ثنتين عندي شغل لفوق راسي ..
قال بلا مبالاة ..
فارس : خل تيي مع جمان ...
وركب سيارته .. الله يهديه هذا .. قلت انا ...
مشعل : جمان متى بتخلص ؟؟
ابوي كان يطالع فارس اللي داخل السيارة ..وقال ..
ابوي : وحدة ونص ..
ورد طالعني ... زعل ... طالعت فارس .. والله انك خبل ... اشتسوى عليك تزعل ابوك ؟؟ ..
طلعت هني فرح وانا قلت ..
مشعل : اوكي خلاص انا بييبها ..بتنطرني ليما اخلص ؟؟
هز راسه بايجاب وقال ..
هيثم: مو مشكلة تنطر ..
مشعل :اوكي انا بييبها ...
شغلت السيارة تحركت للجامعة ... وصلت الحمدلله قبل المحاضرة بشوي ...ولأن زحمة .. قفلت السيارة ..
" اشحقة متأخر ؟؟"
التفت لصاحب الصوت ولا شوق وراي ... طالعتها بشوية غرابة وقلت ..
مشعل: ما تاخرت ...باجي وقت ..
دومها ملقوفة وتراقبني انا بالذات ...ادري ادري شبتقولون ...بس انا ما احبها ... ولا افكر فيها اصلا ..
كافي لبسها وتحررها الزيادة عن اللزوم ... ولا المشكلة ان اسمها على اسم بنت عمتي شوقاني فديتها ..
طالعت ساعتها وابتسمت لي بعذوبة وقالت ..
شوق : اشرايك نروح مع بعض المحاضرة ؟؟
قلت اعتذر لها ..
مشعل: لا انا رايح ...
ما كملت جملتي قامت تنطط تسوي روحها ياهل وقالت وهي تمسك ايدي وتيرني ...انا انصدمت طبعا ..
شوق : لا مشعل ..خل نروح ...رح نتاخر جذي ..
بعدت ايدي عنها بسرعة ودفاشة وهي حست وطالعتني باستغراب ...ثارت براكيني والعادة انا هادي بس تنرفزني هالحركات ..
شوق : اشفيك ؟؟
عدلت كتبي بايدي وقلت احاول اهدي عمري ..
مشعل: رجاءا اخت شوق ...بينا حدود لا تعدينها ...
والقيت عليها نظرة نارية ومشيت عنها ...طول عمري اكره البنات اللي عادي عندهم يحاجون شباب ولو من باب الصداقة ... حتى لو ما حاجوني اتنرفز واعصب واطلع حرتي بالجدامي ...
اذكر مرة شفت جمان تحاجي ولد جيران اللي يمنا كان يسال عن فارس ... اخت طولت عند الباب .. بغيت اذبحها والله مع ان ما قالها شي وانا ما اشك بجمان ..بس ما احب ...
وصلت القاعة وبدت المحاضرة ..وانا مندمج حدي ... واكتب وحالتي حالة ... حسيت بمحمد رفيجي يمي قاعد ينغزني بخصري ..التفت له بعصبية ..
مشعل : حمود ويعة اشتبي ؟؟
قال وهو يقربني منه ويساسرني ..
محمد : لا تصرخ فضحتنا ...هاك ..
عطاني ورقة وخلاني ..بطلت الورقة ولا مكتوب فيها ..
" مشعل انا آسفة ما كان قصدي بس لا تفهمني غلط رجاءا "
والله انج فاضية ... طالعتها وانا ادري انها قاعدة تطالعني ...هزيت راسي لها بتفهم ورديت طالعت المحاضر ... وطنشت ...
لما خلصت المحاضرة وطلعنا استلمني حمود ...
مشعل : حمود فكني ..ذبحتني تراك ..
محمد : ماراح اخليك لين تقولي سالفتك ويا شوق ...
مشعل: اففففففف ...انثبر اقعد ..
وقعدنا بالكافتيريا وقلت له السالفة لما خلصت .. طالعني بنص عين وبخبث والإبتسامة الماكرة شاقة حلجه قلت وانا مالي خلق احد ..
مشعل: بو جاسم .. لا تينني ... بروحي راسي مصدع من هالسالفة ...
وحطيت راسي على الطاولة ...قال هو
محمد : متأكد من مشاعرك ناحيتها ...
قلت وانا لسة قاعد على وضعيتي ...
one hundred percent مشعل:
ورفعت راسي وقلت ..
مشعل: اشحقة تسال هالسؤال ؟؟
رفع حاجبه اليمين وطالعني بمكر وخبث وانا اعرف لما يطالعني بخبث جذي ..
محمد : يعني تبي تقولي انك لسة تحب بنت عمك ؟؟
بققت عيوني عليه منصدم ..بغت عيوني تطلع من مكانها ..ظل يطالعني بهالنظرة ... قلت وانا اقوم عليه ابي اذبحه بس نحش ..قلت بصوت عالي ..
مشعل: وين بتروح براويك انا ...
انا الغبي اللي علمته على سري ...ئي انا احب عبير بس ما علمت احد ما عدا الخبل حمود كونه رفيج عمري ...
احب عبير من زمان بس مخبي عن ابوي وعن الكل ...مابي احد يعرف ...
لا تقولون لأحد ..
^^^^^^^^^^^^^^^^^^^^^^^^^^^^^^^^^

ظليت اطالع الرايح والراد انطر عمي اييني ... تاخر ..طالعت الساعة لقيتها 12 وربع ..وانا خالصة من 11 ...والله حالة هاذي ... مو احسن لي اتعلم السواقة وافتك ... بس اخاف ..والله ..اخاف ...اخترعت من صوت هرن ..التفت لقيت سيارة سودة واقفة قريبة مني ... نزَل الجام ..طلع مشعل ...
شهقت ..عمي مطرش لي مشعل ؟؟؟!!!!!! ..
لااااااااا .... ياحسرتي ..الحين انا بركب معاه ؟؟؟ ....اشر لي اركب ..بطلت الباب الوراني وركبت ... وانا كل شوي اخذ نفس ...
لف لي مشعل بس نزل عينه وقال ..
مشعل: اشلونج عبير ؟؟ شخبارج ؟؟
نزلت راسي ماادري ليه بس استحيت وقلت ..
عبير: زينة ..
مشعل: انزين اشفيج داخلة جذي لا سلام ولا اشلونك شخبارك ؟؟
تصاعد الدم لويهي وحسيت ان الجو حار ...وقلت بصوت بالغصب طلع ..
عبير: السلام عليكم ..اشلونك ؟؟ شخبارك ؟؟
هني ضحك مشعل ... اشفيه هذا ؟؟ في شي يضحك ؟؟
مشعل: سوري ..بس جنج مبرمجة ...اشفيج صايرة آلة ترددين الكلام بس ؟؟
ولف لي السكان وداز بنزين وتحرك ...وقال ..
مشعل: آسف تاخرت عليج .. الدكتور طول شوي بالمحاضرة ..
طالع ساعته فقلت انا مخترعة ..
عبير : مشعل طالع الطريج ..
رفع راسي يطالعني من الجامة عباله فيني شي .. وقال ..
مشعل :انا عيني على الشارع اصلا ...
حطيت ايدي على صدري اهدي نبضات قلبي ...سمعته يقول ..
مشعل :اشفيج عبير ؟؟
ولف لي ..فصرخت بسرعة وقلت ..
عبير: طالع الطريج لا تطالعني ..
صفط السيارة على جنب ..ولف لي هني كله وقال ..
مشعل : عبير ..صلي على النبي اشفيج ؟؟
تسارعت دموعي لعيني وبديت ابجي ... اخاف والله اخاف ... اخاف من السيارات .. اخاف من كل شي انا اصلا خوافة ...
كفكفت دموعي تحت نظرات مشعل مستغربة مندهشة بنفس الوقت .. وقلت انا اخش نظراني بالكلينكس اللي بايدي ..
عبير : آسفة ...ما كان قصدي ...
اما هو ظل يطالعني مو مستوعب ... وانا احترق من داخلي ...متحلفة على عمي ...
وصلنا البيت وبسرعة نزلت ..اول ما دخلت الصالة .. لقيت فرح بويهي ... ابتسمت لي بس انا كشرت بويهها المسكينة .. وكملت دربي ... بس دعمت شي ..
" ديري بالج "
رفعت عيوني لقيته فارس ... اشفيني انا اليوم ؟؟ طالعني بنظراته الغريبة بعدين مشى ...
هالبني آدم اشك عنده لسان ..ما اشوفه يتكلم ...كله حاكر عمره بداره او برة ...بس اشوفه على الوجبات بس ...
رحت داري ..وبدلت هدومي ..الحمدلله اني صليت بالجامعة .. قعدت على السرير وانا اتنهد ...انا شسويت ؟؟
والله اني خبلة ... الحين شبيقول عني ؟؟ مينونة عندنا بالبيت ... يا الله ..
رجعت شعري ورا واخذت شيلة ولبستها ... وطلعت من الغرفة عشان اتغدا ... لقيتهم كلهم موجودين عدا الصنم فارس ... طاحت عيني على فرح اللي طالعتني ببراءة جنها متوقعة اني اكشر بويهها مرة ثانية ..
رحت لها وانا ابتسم لها وابوسها ...طالعت جمان وقلت ..
عبير : جمان قولي لها اني آسفة ..
لاني ما اعرف لغة الأشارة .. طالعتني جمان باستغراب بس اشرت لها ..لما فهمت فرح .. ابتسمت لي واشرت لي ..بس ما فهمت ...طالعت جمان وقلت ..
عبير : اشقالت ؟؟
نط هني عمي وقال..
عمي : تقولج قلبي ويهج ..
هاها ..حلوة ...طالعته باستخفاف وقلت ..
عبير: لا تحاجيني ..انا ما اكلمك ..
قال هو ويحط لروحه اكل ..
هيثم: لا تكفين ...لا حاجيني ..ما اقدر تراني .. مالت عليج ..
ضحكت عليه عمي دومه جذي .. بس اختفت ابتسامتي لما شفت مشعل يطالعني وهو يبتسم ...حمدلله والشكر اشفيه هذا ؟ بس دفنت انظاري بالصحن ... هني ياه الصنم .. وقعد براس الطاولة نفس مكانه الصبح ... وما نطق ...
جمان : يبا ..
هيثم: هلا حبيبتي ..
قالت وهي تطالع فارس بنظرة جنه تحره ..
جمان : ابي اطلع مع رفيجاتي ...
طالعت فارس اللي طالع جمان بنظرة خالية من التعبير ..ورد كمل اكله ...
هيثم: وين رايحين ؟؟
جمان : البحر ..نتمشى ونرد ..
طالعها عمي وركز نظره عليها وقال ..
هيثم: إذا قال فارس ئي بخليج تروحين .
وطالع فارس .. اللي رفع راسه وطالع عمي وقال ولاول مرة اسمع صوته بوضوح ..
فارس : ما يهمني .. كيفها ..
ابتسمت هني جمان منتصرة .. على اساس عمي موجود فارس ماله كلمة .. بس قال وهو يطالعها ببرود وقال بوعيد .
فارس: بس إذا تاخرتي جمان ...
وهد القفشة وقام .. وكمل ..
فارس : تعرفين شنو بيصير لج ..
وراح .. صعد فوق ..واحنا ظلينا نطالعه لين اختفى ...دومه جذي يتوعد ؟؟
هني قالت جمان بعصبية ..
جمان : شفت ...شفت يبا ..وهذا انت موجود اشلون يتوعد فيني جدامك ...
ومسكت القفشة وطقتها بالصحن وقالت بحقد ..
جمان :اكرهه ..
قال عمي بعصبية ..
عمي: جمااان ..
طالعته جمان ..كمل عمي وقال ..
عمي : اخوج هذا ..اشلون تكرهينه ؟؟
قالت جمان بدفاع ..
جمان : لأنه دومه يتدخل بحياتي ... لاتسوين جذي ولا تروحين هناك ولا تطلعين ..لا تتاخرين ..حتى لما رديت لنا بعد يتامر ...انا ماادري اشحقة ما ذلف امريكا وفكنا ..
وقامت زعلانة ..انا الصراحة انصدمت شهالعيلة اللي قاعدة بينهم ؟؟ ..
شفت فرح تير ملابس مشعل وتاشر له ..قال وهو ياشر لها يرد عليها ..
مشعل: ولا شي حبيبتي .. بس جمان زعلانة ..كملي اكلج انتي ..
ولف يكمل اكله بلا مبالاة ..وقال ..
مشعل : والله ابتلشنا فيهم ... كل واحد يحر الثاني ..
لاحظت ان عمي ما ياكل ...وقف وراح صعد فوق هو بعد ..
والله عيلة مو صاحية ...
^^^^^^^^^^^^^^^^^^^^^^^^^^
صعدت عند جمان لقيتها نايمة بسريرها ... ماادري متى بتعقل هالبنت .. كنت ابي احاجيها بس شكلها مالها خلق ... طلعت من عندها ورحت داري .. افكر بحل لهذول الأثنين .. بس ما لقيت .. ومن كثرة التفكير نمت ..
صحيت على صلاة العصر صليت بالمسيد انا ومشعل ..فارس كان معانا بس سبقنا بالمشي بامتار ... كل هذا لانه مايبي يحاجيني ولا يسمع صوتي .. لا حول ولا قوة إلا بالله ...
مشعل : يبا ..
طالعت مشعل بدون مااتكلم فقال ..
مشعل : صج بتخلي جمان تروح البحر مع رفيجاتها ؟
هيثم: ليش ؟؟ فيها شي ؟؟
مشعل : بنات بروحهم بالبحر ؟؟ الشباب كلهم هناك ..
تنهدت وقلت ..
هيثم :عيل نحبسها في البيت ؟؟
طالعني مشعل بصدمة وقال ..
مشعل : يعني انت كنت رح تخليها تروح؟؟
قلت ببساطة ..
هيثم: ئي اشفيها ؟؟
بقق عيونه علي ..قلت ..
هيثم : اشفيك تطالعني جذي ؟؟ انا اثق بجمان ..
مشعل : حتى انا اثق فيها بس مو معناه ان تروح البحر بروحها ..
هيثم: يعني اقولها لأ ؟
مشعل : وليش ما تقولها ؟؟؟ ..خلاص انا اقولك حل ..اخذها هي وعبير وفرح واقطهم بالبحر حلو ؟
طالعته بحيرة وانا اطالع بيتنا اللي وصلنا له ..
هيثم: اوكي ...قولها ..
ودخلت البيت .. قعد على القنفة ..ابرد شوي ..عليت على التكييف ... غمضت عيوني افكر بالكلام اللي قاله لي مشعل ...
انا اثق ببنتي واعرف اشلون تفكر ما تحتاج احد يراقبها ..ولو انا شوي مطفوقة ومطيورة .. بس مع ذلك تفكر الف مرة قبل ما تسوي شي خطأ ..
سمعت جرس الباب بعدها طق ...منو هذا المستعيل ؟؟؟ قمت ورحت فتحت الباب وانا منزعج من اللي يطق جذي ...طلعت لي بنت ...قد جمان تقريبا .. وقالت وهي تدخل بسرعة .. انا بعدت .. اشفيها هاذي ؟؟
اصلا منو هاذي ؟؟
قالت بسرعة ..
البنت : السلام عليكم ...جمان موجودة ؟
طالعته بهبل ..طبعا طالعت ويهها اللي ماخلت لون ما حطته .. بس قلت ...
هيثم: منو انتي ؟؟
قالت هي وتطالع الصالة جنها تتأكد ..
البنت : هذا مو بيت جمان هيثم ؟؟
قلت ..
هيثم: ئي بس انتي منو ؟؟
طالعتني من تحت لفوق وقالت ..
البنت : انت اللي منو ؟؟
طالعتها بصدمة واندهاش ... قلت ..
هيثم: انا اللي منو ولا انتي اللي منو ؟؟
تخصرت وقالت ..
البنت : والله إذا كنت صاحب البيت تعال كلمني ..وخر ..
وكملت طريجها لداخل ...بس قلت انا منغث من طريقة كلامها معاي ..
هيثم: انتي هييه ...وين داشة جبرة ولا سوق يمعة ..منو انتي ؟؟
لفت لي وقالت بامتعاض وتعلج ..
البنت : انا وعد رفيجة جمان ..ارتحت الحين؟ ...وينها هي ؟؟
قلت انا بعصبية ..
هيثم: بجيبي تعالي دوريها ... فوق ..
طالعتني باستخفاف وراحت فوق ...حمدلله والشكر شهالأشكال ؟؟ داخلة بيتي وتهيني ؟؟ .
دق هني تلفوني وكان زياد ... طلعت برة لأني متواعد معاه ...
تلقينا على الممشى اللي يطل ع البحر ..
هيثم: انت الحين شايف الجو ثلج عشان تطلعنا ع البحر ويا ويهك ؟؟
ضحك هو وقال ..
زياد : ئي تصدق .. الجو بارد نسيت جاكيتي بالبيت ..
طالعته باستخفاف وقلت ..
هيثم: هاهاها ..حلوة ...بس لا تعيدها ..
وطالعت البحر وقلت ..
هيثم: آآآخ ودي اسبح ..
زياد : روح ..الله وياك .. شيل دشداشتك واسبح ..
طالعته بملل وقلت ..
هيثم : انت شارب شي اليوم ؟
زياد : توني قبل ما اطلع هيفاء عطتني جاي ..مشكور مابي شي ..
واااي ...مو صاحي ..
ظلينا جذي لين اذن المغرب علينا .. صلينا ورحت البيت .. بطلت الباب ولا حسيت اني داعم شي ..ولا شينة الحلايا اللي شفتها قبل ما اطلع ..
وعد : اووه ..آسفة عمي ..ما كان قصدي ..
عمت عينج ...مادريت عليها ومشيت ...بس قالت هي ..
وعد : عمي .
التفت لها وانا مستعد تقول شي عشان اصكها باقرب وسيلة قتل يمي ..
وعد : آسفة اني طولت لساني عليك ما كنت ادري انك ابو جمان ..
لاا ؟؟ حلفي بس ؟؟
قلت اصرفها ..
هيثم: انزين ما صار شي ..
قلبي ويهج بس .. طالعتني بمياعة والكحل واصل لين اذنها وطلعت ..اشلون تشوف ؟؟
" لأ مشعل قلت لك لأ "
التفت ولا جمان ومشعل وراها يكلمها ...
مشعل :انزين اشحقة ؟؟
التفت له وقالت ..
جمان : انا بطلع بروحي ..وين بروح يعني ؟؟ كله البحر ... بعدين انتوا ما تثقون فيني ؟؟
مشعل : بلى اثق فيج ... بس طلعة بروحج لأ ..لا انا ولا ابوج ولا حتى فارس راضيين ..
بققت عيوني على مشعل ..جذااب انا قلت جذي ؟؟ بس سكت لا اجذبه جدام اخته اللي اصغر منه ..
طالعتني جمان وقالت ..
جمان : يبا ..
قلت مسوي روحي رافض نهائيا ..
هيثم: يا تطلعين مع اخوج يا ماكو طلعة نهائيا ..
طبعا قلبتها مناحة اخت جمان وقامت تعصب وتقول من الحجي اللي يصدع .. وطلعت فوق ... طالعت انا مشعل ..
هيثم: حرام عليك ...زعلت ..
قعد يمي وقال ..
مشعل: تطق راسها بالطوفة ... صاج فارس لما يقول عنها مدلعة ...
قلت هني انا ..
هيثم: مرة ثانية لا تقولني كلام ما قلته ...
ضحك هو ...هني شفت فارس نازل ومبدل هدومه .. حتى ما قال شي ..سيدة للباب ... تعودت على اسلوبه ..
التفت لمشعل وقلت ..
هيثم: ئي صج .. منو هاذي وعد ؟؟
مشعل : وعد ؟؟ وين شفتها ؟؟
هيثم :يت هني البيت ...
تنهد بضيق وقال ..
مشعل : رفيجة جمان .. وبنت الجيران ...
قلت بلوعة جبد ..
هيثم: وحدة خبلة ..
طالعني وقال ..
مشعل : حتى انت تقول جذي ؟؟
هيثم: ليش انت بعد ؟؟
مشعل : انا ما ادانيها ...والحمدلله تعرف ..بس امي الله يرحمها وجمان كانوا يدخلونها البيت ولا علي انا كنت شتها ..
ضحكت على آخر تعليق ... دق تلفونه هني مشعل وقام عني ... تذكرت ان تلفوني بالسيارة ... قمت اروح اييبها ..طلعت من البيت بروح الكراج ...تفاجات ان فارس واقف مع وعد ... يضحك معاها ...
انصدمت ...
فارس ووعد !!!!!!!!!!!!!


يبتع <<<

الحلقــــــــــــــــــــة الرابعــــــــــــــــــــــــــــة
ــــــــــــــــــــــــــــــــــــــــــــــــــ ــــــــــــــــــــــــــــــــــ


الحين ويانا مثل اللوح الخشب ما يتكلم ومعاها شينة الحلايا يضحك؟؟!!!!...
ظليت واقف اطالعهم وودي اعرف عن شنو يتكلمون ... ضحكتها العالية القاصي والداني يسمعها ...وشعرها اللي طالع من الشيلة ... خوش اختيار والله يا فارس ... تمنع جمان من الروحة والردة وتحاسبها على كل شي وانت نفسك واقف بالشارع مع وحدة مثل هاذي؟؟؟ ... صج اني ما اعرفها واول مرة اشوفها بس مبين ...الكتاب باين من عنوانه ...
عناد فيهم وقفت وما تحركت... انتبه لي فارس وطالعني ..أبتسمت انا له ابتسامة هبلة ... طبعا ما عرفت شنو التعابير اللي بويهه لأن ما شاء الله عليه فارس ما تعرف تقرا شي بويهه ابد ...بسرعة يخش مشاعره .. بس نظرته الخاصة فيني طالعني فيها ..وانتوا تعرفونها وقمت اميزها من بين نظراته الباجية .. لفت وعد لي لما شافت فارس طول وهو يطالعني .. لما شافتني ...ابتسمت لي جنها تعرفني من زمان ..وقالت ..
عبير : اشلونك عمي ؟؟
عمج دبب ..
قلت وانا اطالع فارس اللي تنهد بضيق ولف ويهه عني ..
عمي : هلا ..
والقيت عليه نظرة استنكار ..ومشيت ...
عاد وعد؟؟!! ...ما لقيت غير وعد!!! .. متأكد ان يحبها ...على الأقل عاجبته ...وفارس ما يعطي ويه حق احد إلا إذا كان مرتاح له او عاجبه ..
بطلت الكراج والسيارة بعد ..دورت على تلفوني .. لقيته اخيرا ..طلعت من السيارة وعيني على التلفون لأني لقيت مكالمات من المكتب طبعا ما رديت عليها .. صكيت الباب وبغيت امشي ..بس خرعني فارس لما لقيته واقف جدامي ..
سحبت نفس اهدي روحي ... قلت له ..
هيثم : خرعتني ..
مد لي ورقة وقال ..
فارس : طاحت منك ..
ومشى ... شفته يلف لسيارته شغلها ...وسمعت صوت تلفونه رد عليه ...وانا مشيت ..
فارس : هلا خالي ..
وقفت انا هني ...
احمدوه داق عليه ؟؟ وووع ..
فارس : بخير ..الحمدلله ..انت اشلونك ؟؟
بعد !!!! وانا ما يدري عني ... آآآخ يا القهر ... ولأني مابي اسمع شي يبط الجبد ..مشيت للبيت ... بغيت افتح الباب ..بس ..
" عمي ...عمي .."
التفت لقيتها وعد ...يوووه ...اشتبي هاذي ؟؟ نزلت راسي وانا العب بتلفوني وقلت ..
هيثم: نعم ؟؟
وقفت عندي وقالت بدلع ماصخ ..
وعد : اا... بغيت اقولك شي ..
طالعتها لقيتها شوي وتذوب علي ..لااا .يبا لا تموتين علينا بس ... طالعتها باستخفاف وقلت ..
هيثم : خير ؟؟
قربت مني ..وعطرها القوي دخت منه ... ظلت تطالعني بعيونها المكحلة .. جنها تبي تقول شي خطير .. قلت انا مو فاهم شي ..
هيثم: شنو تبين تقولين ؟
هني لفت هي والتفت انا لقيت سيارة فارس طالعة من الكراج ... بعدت عني وقالت جنها غيرت رايها ...
وعد : لا ..بس بغيت اسال جمان موجودة ؟؟
لاا ..حلفي بس؟ .. انتي مو كنتي عندها العصر ؟؟ حلاو هي ؟؟
قلت وانا ابطل الباب واطالعها بلوعة جبد ..
هيثم: داخل ... تقدرين تدقين عليها ..
المح لها ما تيي تدخل ... دخلت وخليتها واقفة ... شهالأشكال ؟؟ ..صعدت داري فوق ..هني اذن العشا..رديت نزلت وانا انادي على مشعل ...
مشعل: هلا يبا ..
قلت وانا واقف عند الباب ..
هيثم: اذن العشا ...ماتبي تصلي ؟؟
مشعل : ئي اكيد بس خل اتوضى واييب تلفوني ..
بطلت الباب وقلت ..
هيثم: مارح تلحق ..توضى هناك بس ييب تلفونك ...
قال وهو يصعد فوق ..
مشعل :ان شاء الله ..
طلعت انا ... والحمدلله ما كانت هذيج موجودة ... بس شفتها من بعيد تحاجي واحد ... هاذي ما شاء الله ..ما تخلي واحد ما تحاجيه ...كل شباب الفريج يعرفونها ... الله لا يبلانا ... لازم جمان تبعد عنها هاذي ...
مشعل : يلا يبا مشينا ؟؟
انتبهت لمشعل وقلت وانا ارد اطالع وعد واللي واقفة معاه ..بس شكلهم يتهاوشون ...
هيثم: يلا ..
انتبه شكله مشعل بعد عليهم وقال وهو يطالعهم ..
مشعل: دومهم جذي ..
التفت انا له وقلت ..
هيثم: منو ؟؟
قال وهو يربط جوتيه تكرمون ..
مشعل : وعد ووليد اخوها ... دومهم يتهاوشون ...
اخوها؟؟؟؟ هذا اخوها ؟؟؟
طالعته عدل ..لبسه مهبدل ... شعره حمدلله والشكر .. جنه قاطين عليه جراغي ... لبسه لبس شباب هالأيام اللي بناطيلهم ماادري بطيح منهم ولا مضيعين الحزام ...
مشينا انا ومشعل ... قلت ..
هيثم: الحين انتوا يا الشباب لما تلبسون اشحقة تلبسون جذي ..بناطليكم شوي وتطيح ؟؟
ابتسم مشعل وقال ..
مشعل: انت قلتها شباب .. بس انا الحمدلله لبسي محترم مو مثل هذول ..
طالعته بنص عين وقلت ..
هيثم: علينا ...مشيعيل ..
ضحك هو وقال ..
مشعل: لا يبا ..والله لبسي مافيه شي .. بعدين مرة شفتني البس جذي ؟؟
ابتسمت له وقلت وانا اطقه على راسه ع الخفيف امازحه .
هيثم: لأ ...
سكتنا ... وهني سمعنا اذان الأقامة ...
هيثم: تأخرنا ..يلا بسرعة .. متوضي ؟؟
مشعل : الحمدلله زين اني ما سمعت كلامك ... توض هناك ها ؟؟
وطالعني بنص عين ..قلت
هيثم: تسابق ؟؟
طالعني متفاجأ ...وقال ..
مشعل : ها ؟؟
هيثم : تسابق ؟؟
طالعنا بعض جنه الفكرة عجبتنا ..ركضنا فجأة ... وصلنا مع بعض .. ودخلنا والناس بدت تصف عشان تصلي ... واحنا نضحك ...كلهم التفتوا لنا ..فسكتنا انا ومشعل وكتمنا الضحكة .. دخلنا وقلت اساسره ..
هيثم: واحد صفر ..
صلينا والحمدلله .. قعدت استغفر بعد ما صليت الشفع والوتر ومشعل بدا يصلي السنة .. يا جدامي الموقف اللي شفته جدام بيتنا ... فارس ووعد ...شسالفتك وياها يا فارس ... يا خوفي تكون تحبها وانا متأكد من هالشي ... مستحيل تتزوجها .. مستحيل ... لو على قص رقبتي ... ما ياخذ وحدة مثل هاذي ...
طلعنا المسيد ..ورحنا البيت ...وبالطريج قال مشعل ..
مشعل : تسابق ؟؟
قلت بزهو ..
هيثم : لا تحاول مارح تغلبني ..
مشعل : احنا وصلنا مع بعض ...ما غلبتني ..
قلت اسوي روحي افكر ..
هيثم : امممممم... يلا حرام كسرت خاطري ..
بدينا ..وركضنا للبيت .. ومشعل غلبني ...وقال وهو يتنطط مستانس ..
مشعل: هاها ... انا الفايز ...
قلت استعبط ..
هيثم : انت مشعل مو فايز..
قال ..
مشعل : هاهاها .. حلوة ...عيدها عيدها تكفين ..
بققت عيوني عليه وانا اضحك ..
هيثم: صج ما تستحي ...ابوك انا مالت عليك ... واحد من ربعك تحاجيني جذي ..
مسك ايدي وقال وهو يعطيني كف ..وانا اطالعه ببلاهة ..
take it easy مشعل: هيثم ..لا تكبر عمرك الحياة حلوة..
شديت شعره وقلت ..
هيثم: لا احلف ..أنا اعلمك اشلون الحياة صايرة ..
وقمنا نتهاوش بالشارع ليما قدر ينحاش مني ...قلت وانا اركض وراه ..
هيثم: وين بتروح ..ياي وراك انا الحين ..
مشعل: حاول ما تقدر تصديني ..انا مـ.....
وقطع صوتنا صوت صراخ .. واعتقد هواش ..ركضنا انا ومشعل لمكان الصوت .. ولقينا هذا اللي شفته قبل صلاة العشا ...بس ما بين اللي جدامه ... ماسك واحد ..
وليد : صدقني ان ما بعدت عنها .. بذبحك بمكانك ..
الحين اللي جدامه بين وكان فارس ... انصدمت وبسرعة تحركنا انا ومشعل ... بعد فارس ايد وليد وقال بعصبية وقرب منه ليما صار بويهه..
فارس : حاول ...
هني دز وليد فارس بقوة ... والحمدلله اني وصلت بالوقت المناسب وبعدت فارس اللي بغى يهجم على وليد قلت ..
هيثم: هيه هيه ..انتوا الأثنين بس ..
بعد مشعل وليد ...بس ما قدر نط وليد علينا انا وفارس ..وبدت الأصوات ترتفع بالشارع ...دزيت انا وليد وقلت بعصبية ..
هيثم: هييه ..أنت .. وين قاعد ؟...
مارد علي بس كان يطالع فارس بحقد وعصبية ...وقال وهو يبعد عنا وبوعيد ..
وليد : مرودة يا فارس مردودة ..
بعد قمنا نهدد ..والله خوش ييران .. انتبهت ان وعد واقفة عند باب بيتهم ..وتطالعنا ...وشكلها خايفة ..
اكيد وليد كان يقصدها هي ...
التفت لفارس ...والحمدلله ان مافيه شي .. قلت ..
هيثم: شسالفته هذا ؟؟وليش يهددك؟؟
طالعني فارس وهو حاط ايده على شفاته اللي انجرحت .. جنه يقولي مو ناقصك ... بس قربت منه انا وقلت وانا امسك ايده ابي اشوف جرحه ..
هيثم: ورني ..خل اشـ....
قاطعني وبعد ايدي بدفاشة وعصبية وقال ..
فارس : بعَد ...
وطالعني بنظرة حقد ومشى ودخل البيت ... انصدمت انا ..وظليت واقف بمكاني ... غمضت عيوني وتنهدت
متى بيعقل هالولد ماادري ...
دخلت ورا مشعل البيت بغى يروح له فوق بس مسكته وقلت ..
هيثم: تعال اقعد ..
التفت لي باستغراب فكملت ..
هيثم: علمني عن وليد وسالفته مع اخوك ..
قعدنا ..وقال مشعل وهو يتنهد ويقول ..
مشعل : وليد واخته من زمان ييرانا ..من تقريبا سبع سنين .. كانوا فارس ووليد ربع حيل ..لدرجة ان وليد وفارس يتزاورون ...بس ..
وسكت جنه مايبي يقول ..فقلت باهتمام ..
هيثم: شنو ؟؟ كمل ...
طالعني شوي .. طالع حواليه وقال يساسرني ..
مشعل : اقولك بس ما تعلم احد ..
قربت منه اكثر وقلت ..
هيثم: مشيعيل تحج ...شصاير ؟؟
مشعل : وليد كاره فارس وحاقد عليه وحاطه في باله ..
هيثم: ليش ؟؟
نزل نظره لاصابعه اللي تلعب بالمخدة ..
مشعل : لأن فارس علم الشرطة على وليد مرة ..
شرطة ؟!!!!!
مشعل: وليد مدمن مخدرات ويبيع بعد ..
بققت عيوني على وسع منصدم ...الحين احنا ساكنين يم مدمنين مخدرات !!!!!!!!!!!
قلت بعدم تصديق ..
هيثم: انت من صجك ؟؟
هز راسه بايجاب متأكد ..
قلت انا .
هيثم: وماشي جذي بالشارع بدون احد ما يمسكه ؟؟؟ ..الشرطة وينهي عنه ؟؟
مشعل : قطوه مرة بالسجن وانحكم عليه سنتين لأن باق محل عشان يشتري مخدرات بس ما شرى فيها وما لحق .. وفارس هو اللي كان شاهد عليه ولما سألوه ما قدر يجذب وقال ان وليد هو اللي دخل المحل وباق ..ومن هني وليد حاقد على فارس وكارهه... فارس ما كان يقصد ان ياذي وليد وكان ينصحه يترك هالأشياء ... بس لاحياة لمن تنادي .. ليما صار اللي صار ...
هيثم: والمخدرات؟؟ الشرطة ما صادته عليها ؟؟
مشعل : مالقوا دليل واحد عليه ..طلع منها مثل الشعرة من العجين ..
قلت باهتمام اكبر ..
هيثم: اشلون ؟
لف لي وصدمني ..
مشعل : لأن يشتغل مع ناس تقدر تقول عصابة ..
قلت بصوت متفاجأ ..
هيثم: عصابة !!!!
مشعل : عصابة مخدرات ..
هيثم: ليش وين قاعدين ..شيكاغو ولا نيويورك ؟؟
تنهد ..
مشعل: والله هذا اللي صاير ..
يعني فارس ووليد كانوا ربع ... والحين اعداء ... ما اصدق ان كانوا ربع مو لايقين على بعض .. وليد البطالي اللي شكله ما يقول اصلا واحد محترم نهائيا ...
اشلون فارس كان مرافجه ؟؟؟ ...
صعدت داري عشان ابدل هدومي ... بس سمعت صوت فارس شكله يحاجي واحد ...قربت اكثر ..
فارس : انزين ذبحتني مشعل ..خلاص حفظت الإسطوانة ..
متى مشعل صعد له اصلا ؟؟
مشعل :عشان لما اقولك بعد عنه يعني تبعد عنه ...قلت لك وعد وليد ما وراهم غير المشاكل ..
فارس : وعد ما لها شغل ..
مشعل : وعد مالها شغل ؟؟ علينا فارس ؟؟..تلقاها هي اساس المشكلة ... ولا ليش قالك وليد بعد عنها ؟؟
فارس : اففففففف ..لا تسوي روحك كونان زمانك علي ... قلت لك وعد مالها شغل ..
مشعل : لا كونان ولا شارلوك هومز .. انا بس قاعد اقولك الصج ..بس تدري اشلون الشره مو عليك علي انا ...مالت عليك ..
فارس : ميشعل ويعة ..اشوف لسانك طال ..
مشعل : لا طال ولا قصر ..انا بروح انام وانت تحلم بحبيبة قلبك وعد ..
حبيبة قلبك وعد !!!!!!!!!!!!
فارس : اقلب ويهك ..انا بعد بنام ..
شفت الباب يتبطل فبعدت بسرعة ورحت داري لأنها قريبة لدار فارس ..دخلت وصكيت الباب بس خليت فتحة صغيرة .. شفت مشعل واقف عند الباب يحاجي فارس ..
مشعل : اخذت دواك ؟؟
فارس : لا بعدني ..باخذه الحين ..
صك الباب مشعل وراح داره .. يعني الحين السالفة عشان وعد ؟؟ صاج مشعل وليد كان يقصد اخته ...بس اللي مزعلني ان فارس يحب هاذي ويه العنز وعد ... هذا اللي قاصر اناسب مدمنين مخدرات ...الله لا يبلانا ..
طلعت من داري ابي اروح احاجي فارس بس ما اتوقع رح يتقبل مني اي شي .. عرجت على جمان اللي ما شفتها من ذيج السالفة ..
لما قربت على غرفتها سمعت صوت اغاني .. طقيت الباب ...وبطلته ..لقيتها قاعدة على اللاب توب وحاطة سماعات ...
انتبهت لي ولما شافتني ما اهتمت تنهدت وقلت ..
هيثم: جمان ..
ماردت علي ...قربت منها وقلت ..
هيثم: اكلمج انا ..
شالت السماعات وقالت بزعل ..
جمان : نعم ..
هيثم: نعم الله عليج ...تعشيتي ؟؟
لفت ويهها عني وقالت ..
جمان : لأ ..
زعلانة يعني ؟؟
قعدت يمها وقلت ..
هيثم: يصير اخليج تطلعين بروحج ومكان كله شباب ؟
طالعتني وقالت بعصبية ..
جمان : يعني انت يبا ما تثق فيني ؟
هيثم :بلى ..لو ما اثق فيج ما كنت خليتج تسوقين ولا تروحين الجامعة ولا تطلعين من البيت اصلا ..
جمان : عيل اشحقة رفضت اني اطلع ؟؟
قلدت صوتها الرقيق وقلت ..
هيثم: لان ما يصير ...المكان كله شباب وين تطلعين وانتوا بنات بروحكم ؟؟
تنهدت وقالت ..
جمان : انا ادري ان فارس هو محرظك علي ..
بققت عيوني عليها وقلت ...
هيثم: فارس ؟؟
قالت بحقد ..
جمان : هو دايما يكرهني دايما ما حاط دوبه دوبي .. محد يحبني في هالبيت ...
وبدت دموعها تنزل ...صج لين قال فارس ..دلوعة ..
هيثم: جمان ...انتي الحين مرة جبيرة وفاهمة ... بلاها حركات اليهال هاذي ...
طالعتني من بين دموعها وقالت ...
جمان : حرام عليكم اللي تسوونه فيني ...حابسيني في البيت جني قطو ..
افففففف ... وبعدين ؟؟ ...
طالعتها بملل وقلت ..
هيثم: جمان .. طلعة بدون رضا اخوانج ورضاي مافي ...
وقمت ..طلعت من عندها ..صراحة مصختها ... رحت نمت ...
اليوم الثاني .. قمت على صلاة الفير وانا حدي نعسان ...فيني النوم مو شايف جدامي .. قبل ما اطلع شفت عبير طالعة من غرفتها ...سبحان الله هالبنت تقوم بروحها ..منبه ذاتي عندها ..
ابتسمت لي وقالت ..
عبير: صباح الخير بو فارس ..
ولأنها تعرف اني ما احب يناديني جذي ..عشان تكبرني ..
هيثم: مارح ارد عليج ..
ضحكت هي .. اما انا نزلت تحت لصالة انطر مشعل وفارس ..حطيت راسي على الطاولة ..ابي اناااام ...
" يبا "
فزيت من الصوت ... لقيته فارس .. كان يطالعني بتفحص عباله ان فيني شي .. بس لما شافني اني طبيعي ..قال وهو يبطل الباب ..
فارس : اذن ترى يلا ..
ما صدقت ...صج اللي صار توا ؟؟ قولي لي الصج تكفون ؟؟ بغيت اقوم ارقص تصدقون ..استغفر الله ينيت انا ..
صلينا وردينا البيت وعلى طول على الفراش والحمدلله ان اليوم خميس ..صكيتها نومة .. بس ازعجني صوت التلفون .. رديت بدون ما اشوف الأسم ..
هيثم :الوووو..
زياد : هيثم .. نايم ؟؟
قلت استعبط عليه ..
هيثم: لا صاحي ...اشرايك ويا ويهك اكيد نايم ؟؟
زياد : ههههه.. انزين قوم ترى الساعة 12 الحين اذن الظهر قوم اخلص ..
غمضت عيوني مو مصدق واااو نمت وايد ...
هيثم: انزين بقوم ...بس تعال ...انت عندك دوام اليوم ؟؟
زياد : دوامي نص الليل ..
هيثم: حلو ... نتلاقى العصر ؟
زياد : اوكي ..يلا مع السلامة ..
صكيت عنه وقمت من السرير استغفر الله طافتني الصلاة جماعة .. توضيت وصليت ونزلت تحت .. لقيتهم قاعدين ...عبير ومشعل وجمان وفرح يطالعون تلفزيون .. وفارس قاعد ياكل ..شكله توه صحى ..
هيثم: اشحقة ما قعدتوني ؟؟
محد رد علي .. قلت بصوت اعلى ..
هيثم: يا اصنام مكة .. اشحقة ما قعدتوني ؟؟
طالعتني فرح وابتسمت لي واشرت لي انها قومتني بس انا ما قمت ... لهدرجة ما حسيت ؟؟ قعدت معاهم اشوفهم شنو مبحلقين عليه لدرجة انهم ماردوا علي ... لقيته فيلم اجنبي ...طالعت مشعل اللي طالعني وفهم علي وقال ..
مشعل : لا تخاف مافيه شي ..هالقناة تقطع ..
قلت وانا اقوم اروح المطبخ اللي مطل على الصالة ..
هيثم : جم مرة اقولك لا تطالع افلام ومسلسلات جدام فرح ؟؟
ياني صوته ..
مشعل : مافيها شي ..
مارديت عليه وسويت لي ريوق خفيف .. رحت الصالة وبايدي جلاص جاي وصمونة وقعدت اطالع معاهم ..
مشعل : يبا ..
قلت وعيني على الفيلم آكل ..
هيثم: هممم..
مشعل : خالي بيينا ..
فجأة غصيت ... وبديت اكح ... ذكره بس اييب لي الصرع ..ولا بيينا بعد ؟؟ يابت لي عبير جلاص ماي ..
عبير : اسم الله عليك ..عمي اشفيك ؟؟
قلت وانا احط الماي على الطاولة وبصوت مبحوح ...
هيثم: حسبي الله عليك من صبي ..مشيعيل تدري ما احب هالطاري ..
ابتسم علي وقال ..
مشعل: هو دق علي وقال بيي مع مرتي..اقوله لأ ؟؟
قلت وانا اقوم لابعة جبدي ..
هيثم: مالت عليه وعليك ..
وصعدت داري ..وانا متضايق ...اففففففف ..هذا اللي قاصر .. احمدوه بيينا ... انسدحت على السرير سمعت طق على الباب قلت ..
هيثم: ادخل ..
تبطل الباب وما شفت منو اللي دخل ..
مشعل: يبا ..
قلت وانا اغمض عيوني واقول ..
هيثم: دريت والله ..
مشعل : خالي ياي الحين ..
بطلت عيوني متفاجأ ..وقلت ..
هيثم: انت بس تييب الأخبار الشينة ..
ضحك علي وقال ..
مشعل : تراه تحت ..
هيثم: توك تقول ياي الحين ؟؟
مشعل : ئي كان عند الباب يوم ييتك بس الحين تلقاه دخل ..
تنهدت بضيق وقلت وانا اقوم ابي ابدل هدومي بطلع من هني انا ...الصراحة مارح اتحمل ...
طلع مشعل عني وخلاني ابدل ... نزلت تحت لما خلصت والحمدلله مالقيته بس مرة تحت واعتقد مرته كانت معطيتني ظهرها .. جلبت فيني هني فرح ..
اشرت لي ايي اسلم على المرة ...فقلت باحراج ..
هيثم: فروحة حبيبتي بعدين ...خليني اطلع ..
وقلت احاجي روحي ..قبل ما ايي خالج ...مابي اشوفه ..
بس اصرت فرح واشرت لي انها تحب هالمرة وتبيني اشوفها .... واااي فروحة مو وقتج ... قلت لها اساسرها ..
هيثم: فروحة عيب ما يصير ...
يتني هني عبير وقالت ..
عبير :عمي ماكملت جايك هاك ..
وعطتني استكانة صغيرة ...شربت ولسة فرح مصرة قلت لها وانا اشرب ..
هيثم: فروحة بعدين قلت لج ..
ابد ما هدتني ..هي إذا حبت شي توريه لنا كلنا ... اشرت لي فرح انها بتخلي المرة تيي قلت بسرعة ..
هيثم: لا فرح لاتــ...
بس راحت ... يت فرح وهي يارة المرة من ايديها فشلتنا ... نزلت عيني للإستكانة ...
مرت احمد : السلام عليكم ..
بدون مااطالع ولا ارفع عيني عرفت ...صوتها ..هي ... نبضات قلبي زادت ...رفعت راسي اتأكد ....
شهقت وطاح الجلاص مني ...
هي .... مستحيل ...
اميرة !!!!!!!!!!!!!!

^^^^^^^^^^^^^^^^^^^^^^^^^^

ياني هيثم وهو حالته حالة ...ماادري مسبه ...سرحان ...
زياد : هيهه انت ..صارلي ساعة احاجيك ..
لف لي ويهه صاير غريب مو هيثم اللي اعرفه ...قلت بجدية ..
زياد : هيثم ..اشفيك ؟؟
قال وهو يتنفس بسرعة شوي ..
هيثم: شفتها ..
قلت باستغراب ...
زياد : منو ؟؟
طالعني بعيونه اللي ذبلت التعابير فيها ...
هيثم: اميرة ..
انصدمت ...اميرة ؟؟؟ مرة ثانية ؟ لا مستحيل ...
زياد : لحظة اميرة اللي خبرك ..
هز راسه بايجاب وبألم ...
هيثم: هي نفسها ...
طبعا تستغربون منو هاذي اميرة ... اميرة هاذي قلب هيثم ... بنت ييرانهم ... اذكر لما تقدم لها هيثم وابوه مارضا لأن من عيلة فقيرة ... لاتستغربون هيثم من عيلة فقيرة ..بس بعلمه اجتهد ووصل لهالمكانة ....
سافر هيثم يكمل دراسته برة ..ولما رد درى انها تزوجت وسافرت مع زوجها برة ...هني لو تشوفونه اشلون قلب الدنيا علينا ... بغى يذبح عمره ... اذكر اشلون كان يترجى امه عشان ترد تخطبها مرة ثانية ..مو مصدق انها تزوجت ...
بعد سنتين لما اقتنع اخيرا امه خطبت له نورة ...وللاسف ما تاقلم كان دوم يحكي لي عن مشاكله معاها ...
قطع تفكيري صوته ..
هيثم: للحين مو مصدق انها مرت هالنذل احمد ... هو كفو ياخذها ؟؟
قلت اهديه ..
زياد : هيثم ...الحين المرة متزوجة لا تفكر فيها خلاص ..
غمض عيونه بالم وحسرة ..
هيثم: لا إله إلا الله ... انت لو تشوف شنو كان رح يصير فيني لما شفتها ...بغى قلبي يوقف ...
رديت تذكرت الحالة اللي وصل لها من حبه لاميرة ..
زياد : هيثم رد البيت وارتاح وانسها خلاص ما يصير تفكر فيها ..
هز راسه بتفهم ...وركب سيارته وراح البيت ...
الله يستر وما يتهور هيثم ...اعرفه ..
^^^^^^^^^^^^^^^^^^^^^^^^^^^^^^^^^^^
دخل ابوي علينا ويهه متغير ... ابتسم خالي وقال ..
خالي : حياالله هيثم... اشلونك ؟
طالعه ابوي بحقد ومارد عليه وصعد فوق ... شكله زعلان من شي ...
احمد : اشفيه ابوك ؟؟
قلت وانا مو فاهم شي ..
مشعل : ماادري ...
بعد ساعة طلع خالي ... وانا طيران صعدت فوق ... حق ابوي طقيت الباب ياني صوته ..
هيثم: مابي اشوف احد ..
بس بطلت الباب وقلت ..
مشعل : ولا انا ؟؟
كان قاعد على السرير حتى مابدل هدومه ... لف لي وحزن الدنيا بعيونه ...قلت وانا ادخل واصك الباب ..
مشعل: يبا ...أشفيك ؟
غمض عيونه ..وقال ..
هيثم: راسي يعورني ..
قلت وانا ارد امسك الباب ..
مشعل : اييب لك بندول ؟؟
هيثم: لا ماله داعي ... بنام شوي وبصير احسن ان شاء الله ..
مشعل : ماتبي تغدا ؟؟
هز راسه بالنفي وهو يفج زراير الدشداشة ..
هيثم: ما اشتهي شي ..
خليته على راحته وطلعت .. ابصم بالعشرة ابوي متضايق من شي .. نزلت تحت لقيت عبير قاعدة تدرس ..وفرح يمها نايمة ..
قلت ..
مشعل: درسي بدارج احسن ..
وقعدت يم فرح ..
طالعتني بخجلها المعتاد وقالت ..
عبير : مليت من الغرفة ...
طالعت فرح وقلت وانا اتاملها ..
مشعل : ازعتج فرح ؟؟
عبير : لا حرام عليك ..عسل على قلبي حتى لو ازعجتني ..
طالعتها وانا ابتسم ماادري ليه ..فاستحت هي ...دومها جذي خجولة ... طالعت الكتاب اللي تدرس منه ..وقلت ..
مشعل : صعبة المادة ..
عبير : شوي ..
يا الله كلامها قليل .. شفت فارس نازل ...ومبدل هدومه ...
فارس : السلام عليكم ..
ردينا السلام .. طالعني فارس واشرلي يبيني ...استاذنت من عبير ورحت وراه ..
مشعل: خير ؟؟
فارس : عبير طالبة مني كتاب وما قدرت اييبه لها ..بس انا رحت المكتبة وحجزت الكتاب بس انت ييبه اوكي ؟؟
بققت عيوني منصدم ... طالبة من فارس ؟؟؟ وانا ؟؟؟
طالعني فارس باستغراب وقال ..
فارس : اشفيك تنحت ؟؟ ها بتروح ؟؟
قلت وانا ابلع ريجي ..
مشعل : متى طلبت من الكتاب ؟؟
فارس : قبل امس ... ها رايح ؟؟
رايح ؟؟ اكيد بروح ...بس زعلت من داخلي اشحقة طلبت من فارس وهي اللي تستحي من ظلها ....
قلت بدون ما افكر بعواقب السؤال ..
مشعل : واشحقة طلبت منك انت ؟
طالعني ببلاهة مو فاهم وقال ..
فارس :شنو ؟؟
سحبت سؤالي بسرعة لا يشك وقلت ..
مشعل :خلاص خلاص ..بروح ..
ودخلت داخل ... ماادري اشفيني ماقدرت امسك اعصابي ... طالعتها لسة بمكانها ...
مشعل : ناقصج كتاب عبير ؟؟
طالعتني مصدومة وقالت ..
عبير : اشدراك ؟؟ فارس قالك ؟؟
مشعل : ئي .. توه ...متى تبينه ؟؟
عبير : انت اللي بتييبه ؟
ليش ما اعجب ؟؟؟
قلت وانا اطالعها بنص عين ..
مشعل : ئي ..ولا تبين فارس اييبه ؟؟
قالت تبرر لي ..
عبير : لا عادي انت هو ...اللي يريحكم ..
وردت دفنت ويهها بالكتاب ...
هين يا عبير ..تقولين لفارس وانا لأ ها ؟؟؟
طيب كله بحسابه .....
^^^^^^^^^^^^^^^^^^^^^^^^^
اشفيه هذا متنح يطالعني طول ما انا ادرس يا اخي حل ... ما اهتميت له وظليت ادرس ... لين ما رفعت راسي فجأة لقيته نايم وهو قاعد ... بغيت اضحك على شكله ...ساند على القنفة وحاط راسه عليها ونايم ..
طالعت الساعة لقيتها خمس ونص ... قمت الم كتبي بوديهم فوق ...بس فجاة تبطل باب البيت ودخلت جمان ..تبجي ...ماادري اشفيها ...اصلا متى طلعت ؟؟ ما شفتها ..انا طول الوقت قاعدة هني ...
صعدت وراها بس قفلت الباب ...
اشفيها ؟؟؟ رديت نزلت تحت لقيت لسة مشعل نايم ويمه الناحية الثانية فرح ...قومت مشعل ..
عبير : مشعل ...
مارد علي ... قربت اكثر ..
عبير : مشعل ..
فز مخترع ..شكلي خرعته ...طالعني وقلت ..
عبير : ما تعبت من رقدة القنفة ؟
قام فرك عيونه ...قال..
مشعل: ما حسيت ...
يغى يروح بس وقفته وقلت ..
عبير: مشعل ..اا ...ممكن تروح تشوف جمان ؟؟
طالعني باستغراب وعيونه اللي لسة فيها النوم ..
مشعل : ليش اشفيها ؟؟
عبير : ماادري بس شكلها متضايق وايد ..
ما بغيت اقوله انها طلعت بدون ما احد يدري لا يهاوشها وهي مو ناقصة ..
ابتسم لي بكسل وقال ..
مشعل : ان شاء الله ..تامرين امر ..
طالعته باندهاش وتفاجأ ...بس قلت ..
عبير: ما يامر عليك عدو ولا ظالم ..
اشفيه هذا ين ؟؟
^^^^^^^^^^^^^^^^^^^^^^^^^^^^
قمت على صلاة العشا ...شهقت وقمت صليتها والعصر والمغرب قضاء ...استغفر الله ..طافتني الصلاة ...
لاحول ولا قوة إلا بالله ... صفت السيادة هني سمعت صراخ ... اخترعت طلعت من الغرفة بسرعة .. لقيت مشعل صاعد وشكله كان يركب بسرعة ..سالته ..
هيثم : شصاير ؟؟
قال وهو اييني ..
مشعل : ماادري توني اسمع الصراخ ...
كان الصراخ ياي من غرفة جمان ...تحركت هناك بسرعة لقيت فارس ماسك شعر جمان ..ومعصب ويقول ..
فارس : انا جم مرة اقولج ما تحاجينه ولا تيين صوبه ؟؟
كانت جمان تصرخ بالم وفارس يصرخ معصب .. قلت بصوت عالي ..
هيثم: فااارس ..
لف لي فقلت بحزم ..
هيثم: هد اختك ...
بس ماهدها ...ظل يطالعني فكررت باصرار وعصبية ..
هيثم: هد اختك ..
تجدمت مني وبعدت ايده عنها وخليت جمان وراي ...وقلت وانا معصب ..
هيثم: انت مينون تمد ايدك على اختك ؟؟
رد علي بدفاع مستميت ..
فارس : دلعها ...بس هذا اللي انت فالح فيه ... كاهي خربت ... تدري انها طالعة بدون ما احد يدري ؟؟؟
طبعا لأ ... انت تدري عن شي اصلا ...
مسكته من دشداشته وقلت اطلع حرتي فيه ..
هيثم: احترم نفسك واعرف تحاجي منو ...ولا تبيني اعلمك ؟؟
وهزيته وقلت بوعيد ..
هيثم : هاذي آخر مرة اسمح لك تحاجيني جذي سامع ؟؟...
بعد ايديني بدفاشة وطالعني بحقد وانا بالمثل وطلع ... اما جمان كانت لسة تبجي ...انا هديتهم وطلعت ...مالي خلق احد اصلا ...والفجوة اللي بيني وبين فارس زادت وكبرت ...غبي انا غبي ...بدل ما احل الموضوع عقدته اكثر ...
من اول ما شفت اميرة وانا ماادري اشفيني ... شفت فارس قاعد تحت بالصالة ...وحاط راسه بين ايدينه ..
تقربت منه ..وهو حس فيني ..رفع راسه وطالعني ... لف ويهه عني وقام ..بس رد طاح على القنفة ..شكله دايخ ... قعدت يمه بسرعة وقلت ..
هيثم : فارس ...اشفيك ؟؟
مسك راسه ومارد علي ... وقام ...وهو يترنح يبي يصعد فوق ..لحقته ومسكته من ذراعه اسنده ..بس هو سحب ايده ...فقلت ..
هيثم: خلني اساعدك ..
فارس : مابي منك شي ...
وصعد فوق ... جرحتني كلمته ...بس ما يأست ...صعدت وراه داره طقيت الباب ودخلت ..لقيته قاعد ياكل دواه ...
هيثم: ماكليت دواك الصبح صح ؟؟
مارد علي ... عرفت انه مااكل ... عشان جذي داخ ..
قعدت وتنهدت ..وقلت ..
هيثم: فارس ..انا آسف ..ماكان قصدي اتنرفز عليك ...
انسدح على السرير ولا مهتم ...
ماكو فايدة ...طول عمره عنيد وراسه يابس ... طلعت من عنده وصداع راسي زاد علي ...
لين متى بنظل انا وهو في صراع دائم ؟؟
لين متى بتظل الفجوة كبيرة بينا ؟؟
انا اقرب خطوة يبعد خطوات ....
الله يهديك يا فارس يا ولدي ...
ويسامحك ...

يتبع <<<

 
 

 

عرض البوم صور سر حياتي   رد مع اقتباس
إضافة رد

مواقع النشر (المفضلة)

الكلمات الدلالية (Tags)
الكاتبة ليل العشاق, روايات, رواية ايامي
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 01:55 AM.


مجلة الاميرات 

 



Powered by vBulletin® Version 3.8.11
Copyright ©2000 - 2021, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية