المنتدى :
القصص المكتمله
حبنى أحسن لك للكاتبه أحلى ظبيانيه
منى : تــرانــي صج أحبكـ
سعود متغصص: حبج البرص قولي آمين أنتـي قـولـي آميـن بـس
منى تضحك:شفت حتى البرص يحبني فليش أنت ما تتنزل وتحبني
ها؟ قول ها؟ يالله رد علي ولا أنا مب من مستواك رد علي بلاك ساكت
سعود تم ينفخ وينفخ وينفخ ميود نفسه بالغصب
منى:هههه شو عندك تنفخ تبى أطير شو
سعود:طيف بعديهـا عني قبل لا أرتكب فيها جريمه
طيف ماسكه نفسها من الضحك: منى عيب اصطلبي عاد تراج صدعتي بأخوي
منى: صلبي أخوج أول شيء مب راضي يحس بحبي
سعود :أكثر من مره قايل لج إني ما أحبج
منى:ليش إنزين؟ مب مهم خلاص , أنا أحبك وخلاص
سعود:أنا أبى أفهم شيء واحد
منى:أفا عليك أنا بكبري موسوعه أسأل أنت بس
سعود:أنتي عندج اللي عندنا عندج عقل ولا أنتي مدمغه
يوم شافت منو اللي كان واقف ورا سعود تظاهرت بالبكاء:إهيء أهي عمو سمعي ولدج شو يقولي
صد وراه وشاف أمه واقفه وحاطه يد على يد وأطالعه بنظرات غضب
رجع صد عند منى اللي مخبيـه ضحكتهـا ,, وتغمز له بعين
سعود:آخ آخ
أم سعود ماسكه إذنه:كيف تقول لبنت خالك مدمغه اللي يقول أنت ألحين سيد الذكاء
عقت راسها على كتف طيف: إهيء إهيء دومه جذي معاي
أم سعود:أعتذر منها بسرعه
سعود:والله أمي هي اللي مأذتني أذيه كل ما تشوفني ما عندها غير كلمه وحده ........ سكـت
منى وطيف يطالعونه ...
منى: يالله كمل طلع من عندك كلام اتهمني بالزور (وكملت صياحها التمثيلي)
سعود:تعرفون شو الكلام ضايع معاكم (بشكل سريع قالها): آسف آنسه منى
منى:عادي في نهاية أنت سعود ولد حبيبة قلبي عمتي لازم أسامحك
يطالعهـا بنص عين .. و أم سعود تركته وراحت تحضن منى
أم سعود:شوفها كيف حنينه هالبنت
طلعت له لسانهـا وتمت تستهزئ فيه
بعدما بعدتها أم سعود تظاهرت بالبراءه
سعود:أنتي لو تعرفين هالحنينه على قولتج على أصلها كان ما قلتي هالكلام
قال هالكلام وطلع عنهم ...
أم سعود:ما عليج منه
قعدت بجانب طيف:عادي في نهاية هذا سعود (في خاطرها):حبيب قلبي(تضحك)
راحت عنهم أم سعود
ضربتها على كتفها: تراج أكبر ممثله تعرفين هالشيء؟
منى أطالعها بغرور:توج أستكشفتي
فرت عليها الموسده عشان تغير نظراتها ... وقعدن يضحكن
بعدما شبعن من الضحك
طيف:جد جد منى ترى سعود صج يضايق وايد يوم تسوين له هالحركات
منى:المشكله يا أخت سعود يعجبني يوم يعصب ويهه يصير كأنه بيــبــي
طيف:يوم بصكج كف قولي هـالـبيـبـي كيف كبر فجأه
منى بأسلوب وحده حالمه:عادي كفه كأنه كأنه
رجعت لطبيعتها:ساعديني أدور على كلمه تناسب الجمله
طيف:صج مينونه أنتي
منى:اللي يرابع هالأشكال وين ما بجنن
في بيت سعيد
منى توها كانت راجعه من بيت بو سعود والبنت طربانه على الآخر
منى: تحية طيبه وبعد التحيه .. أحي قلبك القاطع وصاله
آمنه:شرفتي آنسه منى
منى تهز راسها بالموافقه مستمره في الغناء والرقص
آمنه: بسألج أنتي من متى طالعه
ابتسمت وتقربت من أمهـا باستها على خدها ,, ابتعدت عنها ملوحه بيدها مع السلامه كل هذا ومستمره في الغناء ومتوجه لغرفتهـا
حطت آمنه يدها على راسها: محد بقصر من عمري غيرهـا
سعيد: بعد عمر الطويل إن شاءالله يا أم منى
آمنه: ويه متى دخلت ما حسيت فيك والله
سعيد بغيره أونه:ومنو اللي ماخذ مكاني في عقلج
آمنه : في أحد غيرها
سعيد:ههه إذا منى فما عندي مانع بس شو سوت هالمسكينه
آمنه:هذي مسكينه هذي سكين قول .. الله يطول من عمرك طالعه من العصر وشوف متى رجعت ؟
سعيد:بس عشان هذا حرام عليج بعده الساعه 8 وهي وين راحت مو بيت عمتها؟
آمنه:مب مشكله تروح وين ما تبى بس أنا قايله لها أريد السايق على الأقل كان طرشته إذا كانت بطول عندهم
سعيد:آآه يعني أنتي معصبه لأنها ماخذه السايق , أفا عليج بس كم آمنه عندي أنا عشان الأم والبنت ما يضاربون على السياره باجر بحط لج سايق خاصه لحبيبة قلبي وبس
استحت: والله إنك بعد يا سعيد
يالسه تتطالع التلفزيون , بس اصـوات اللي مصـدرهـا من بـرع البيـت مزعجنهـا ..
طيف:كوماري سيري شوفي برع شو قاعد يصير
كوماري تمسح عـلى الطاوله:أنتي مافي معلوم
قصرت على صوت التلفزيون:ليش ؟شو صار؟
كوماري:ناس جديد يجي يسكن في بيت اللي صوبنا
طيف:أحلفي
كوماري:مافي صدق روحي
طيف:واااي منج عاد خبريني بالتفاصيل
كوماري:اليوم أنتي يوم في روح جامعه هالناس يجي يسكن في بيت هذا
طيف:وااااو يعني جيران جدد بتصل في منى وبخبرها
منى:وااع منج تراج صج إزعاج
طيف ما اهتمت وقالت اللي عنـدهـا:يقولج تعرفين البيت اللي حذالنا ,
منى:هيه وش فيه؟
طيف:سكنوا يقولج
منى:أنتي من صجج
طيف:والله توها كوماري مخبرتني
منى:خساره كان ودي اشتريه ونعيش أنا واخوج حذالكم
طيف:صج متفيجه بتين تشوفين ولا كيف
منى:انتي اللي فايجه شو استفيد يعني يوم بشوفهم ناس حالهم من حالنا
طيف:ويييي وايد ممله صايره
منى:ممله محد غيرج أقولج شيء سمعي صوت القطار وفكينا
سكرت على ويهـا
طيف:صج ما تستحتي
دخل عليها سعود:منو اللي ما تستحي
طيف:منى سكرت على ويهي تخيل
سعود:ألحين تعرفين إنها ما تستحي
طيف:اقعد أقعد أنت بس
سعود:بقعد غصبنن عليج .. سحب عنها الريموت..
طيف:سعود سمعت عن الجيران الجـدد
سعود:هيه اليوم ساعدهم شوي
طيف:أحلف
سعود:وأنتي الكل تبينه يحلف عشان تصدقينه .. واحد من عمال طلب مني أشل معـا وبس
طيف:طيبين؟؟!
سعود:ما اعرف .. قومي عني خليني أشوف التلفزيون
طيف:واااع منك
قامت عنه وراحت لغرفتها
في الجامعه
منـى تكلم السايق: روح أنت انا بروح مع طيف
طيف ضحكـت
منى:إنتـي إيـه على شو تضحكين؟
طيف: قاعده اتخيل ويه سعود يوم بيعرف أنتي بتين معانا
منى: واع بس ,, وشو اللي يضحك يعني
مسكتها بذراعهـا ومشوا لين البوابه
طيف:أثقلي يا بنت ترى الولد ينفجر أول ما يشوفج
منى: ما عليج منه هو يحبني بس يتغلى وتبين الصراحه أحب يوم أطلع له قرون
منى:كيفج والله لا تقولين ما نصحتج
منى: أنطبي أنتي بس
سعود كان يالس في سيارته يتريا أخته , وتغيرت ملامح ويه يوم شاف منو مع اخته
سعود:ولييه هذي شو يابنهـا لا يكون بتروح معانا
طيف:هاي اخوي
منى:مرحب بالساع
ظل ساكت وما رد عليهم
منى:ويه وش فيك سعودووو ؟
سعود:اسمي سعود لو سمحتي
منى: لا أنت لك مكانه خاص في قلبي ومحد يدلعك غيري
حطت يدها على حلجها وتمت تضحك
أما سعود أكتف بالسكوت وضغط على الريس خلهم يجدمون بشكل فجائي
طيف:منى أسكتي عن يسوي فينا حادث ويقتلنا
منى:بلاج خايفه اطمني دام أنا معاج في سياره سعودوو ما بيقتلنا إذا ما يخاف عليج يخاف علي .. صح سعود؟
ابتسم بسخريه ورجع لطبيعته .. يعرف الكلام معاها ضايع
يوم وصلوا قرب البيت .. لمح سعود حرمه كبيره في سن تحاول تشل الأغراض بس مب قادره وكانت تمشي
وقف سعود صوبهـا
منى:شو تسوي ما يوقفون للأغراب يمكن يكونون مسلحين
سعود:أنتي خبيله شو انطبي وارحمينا
نزل من السياره
أما منى وطيف فكانوا يطالعون من ورا الجامة السياره
منى:أخبرج ترى ما أتخيل أطلع مسدس فجأه وتهدد أخوج
طيف:منى حبيبتي لا تكثرين من أفلام ما تلاحظين إنه مأثر عليج
منى:ها ها ها يوم بيستوي صدق بتعرفين
طيف:سكتي هذي الحرمه بتركب صوبج
منى:وااابي .. يوم انفتح باب السياره سكتت وابتسمت لها
الحرمه:السلام عليكم
منى وطيف:وعليكم السلام
سعود أنشغل يدخل الأغراض في السياره
الحرمه:اسمحوا لي عاد تعبتكم معاي
طيف:عادي خالوا ما سوينا إلا الواجب
ركب سعود السياره
سعود:خالوا أنتي كيف تمشين في هالحر؟
الخاله:بيتنا قريب ونحن تونا منتقلين هنا قلت استكشف الأماكن قمت وطلعت أمشي وعاد أنا عيوني زايغه هههه شفت محلات اللي هنا اشياءهم روعه
سعود :وين بيتكم خالتي؟
الخاله: روح سيدا
سعود:زين عيل بيتنا من هنا بعد
الخاله:ريحتني عيل ولا كنت مكلفه عليكم
يوم وصلت البيت
خاله:تسلم ولدي والله يخليك لأهلك إن شاءالله
سعود تم يضحك:خالتي تعرفين إنه البيت اللي حذالكم بيتنا يعني أنتوا الجيرانـا اللي توكم منتقلين
الخاله أستانست:والله؟! اقربوا عيل
سعود:قريب إن شاءالله
نزل ينزل أغراضهم
طيف:صج الدنيا صغيره طلعت في الأخير ساكنه حذالنا
منى:يوم أقولج حياتنا أفلام
طيف:أخبرج انطبي
جدمت جدامها وضربتها على الراس:محد يقولي أنطبي غير سعود فاهمه
طبف:فهمنا يا الخبله . عادي أقولج خبله ولا بعد مصرح لسعود وبس
ابتسمت:عادي مصرحه
ركب سعود السياره وتوجه صوب بيتهم
دخلت منى قبل طيف البيت وألتوت بعمتهـا
أم سعود:وانا أقول كيف البيت نور فجأه
منى:وااااي عمو عليج سوالف تعرفين تغازلين بعد حظك عمي
ضربتهـا أم سعود , أما أبو سعود فتم يضحك
طيف حبت راس أمها وأبوهـا
طيف: هالبنت سوالفها غريبه وعجيبه
سعود :ألحين أكتشفتي
منى: عمو شوفي بـدأ يغلط علي
أم سعود كانت بترمس بس بو سعود سبقهـا
بو سعود: حدك عاد سعود ما أرضى على الغاليه
سعود: ألحين هذي يوم غلطت عليها (يقصد طيف) ما قالت شيء ويوم أنا أغلط عليها تشتكي
طيف:هذي عندها اسم
منى:واسمها طيف الحلوه
بو سعود:هههه والله إنكم الحريم فاهمت بعض
|
21-06-08, 02:09 AM
جديد مواضيع قسم القصص المكتمله
العرض الشجري
