يااااااه
اخر مرة كتبت هنا كانت يوم 29 -1
كويس انك رجعته تاني يابشمهندس
قعدت اقرا اللي كنت كاتباه ووقفت قدام كلام كنت كتبته ف يوم:

موضوع كثير حلو

ولي مواقف كثيرة مضحكة ومحزنة

لكن ماعندي حيل أكتب أي موقف

مشكوووووووور

الأحد 19-7:
- كل يوم بتعلم حاجة جديدة
أهم حاجة اتعلمتها الفترة دي ان ماينفعش حد يسكت ويسامح ويفوت علطول والا يتقال عنه ضعيف والناس تهينه وتدوس عليه وتذل فيه

- اوقات كتير بكون عايزة اقعد لوحدي, والقى الناس بتيجي تقعد معايا وبتحرج اتكلم واقول اني مش عايزة اقعد مع حد, بتحصل كتير وانا في العيادة, اوقات بكون مش طايقة نفسي ولما بصدق ان مفيش عندي مرضى فبقفل عليا الباب واقعد مع نفسي, منتهى الهدوء, القى السكرتيرة بسلامة نية تدخل تقولي: مالك يادكتورة, قاعدة لوحدك ليه, طب تعالي اقعدي معانا برة, ولو مخرجتش تيجي هيا تقعد معايا وتتكلم ف اي حاجة عشان ماتسيبنيش لوحدي, عارفة ان قصدها خير بس فعلا اوقات بكون مخنوقة لدرجة مش طايقة اي حد يكلمني ومش بعرف اتصرف

- واللي يضحك بقى: لما تكون محتاج تقعد مع الناس, تخرج من عزلتك وتتكلم مع اي حد تفضفض او حتى تعمل اي حاجة بس تهون شوية عليك, ماتلاقيش حد من اللي بتحبهم, او تلاقي حد يضايقك بزيادة, او حد يحسسك انك اقل حتى من انك تكون صديق, فترجع تاني لوحدك

- النهاردة في العيادة جاتني مريضة بعزها اوي, هي في سن والدتي, واوقات بتيجي تسلم عليا من غير مايكون عندها اي شكوى, لما بشوفها بحس براحة , بتتكلم بهدوء ووش بشوش
حتى لما بكون بشتغل لها, بلاقي الشغل بيخلص بسهولة والحمدلله بدون أي مشكلات
ربنا يكرمها ويباركلها ف ولادها واحفادها

- كلمت اقرب صديقاتي, و هي في مقام اختي, اطمنت عليها الحمدلله ربنا يقومها بالسلامة
لما بكلمها هي وصاحباتنا الاتنين التانيين بفرح اوي, بفتكر احلى ايام, بحس فعلا ان المقولة اللي بتقول ان افضل واصدق وادوم الصداقات هي صداقات الصبا مقولة صحيحة, بقالنا مع بعض 11 سنة, ف نفس المدرسة ونفس الكلية, وفي الامتياز بذلنا اقصى جهدنا عشان نكون مع بعض والحمد لله حصل, حتى في التكليف رتبنا الرغبات عشان بقدر الامكان نكون قريبين من بعض, واتحقق اللي كنا عايزينه الحمدلله
بحس صداقتنا فيها معنى الصداقة الحقيقي, فاهمين بعض, ومهما اختلفنا بنتناقش بمنتهى الهدوء وبنسمع بعض عشان باقيين على بعض, وبنقدر ظروف بعض
كل دا بفتكره وبفكر فيه كل مابكلم واحدة فيهم, ربي يخليهم ليا

- مش طايقة انام بالرغم من اني تعبانة, بس كل مادخل السرير واطفي النور تيجي كل الافكار ببالي مع اني بحاول اصفي ذهني ومفكرش ف حاجة عشان اقدر انام, الا ان اسوأ احداث اليوم بفتكرها في اللحظات دي, وبالتالي اتخنقت زيادة, واتضايقت اكتر مانا متضايقة, ناقصة الحكاية اصلها