يخرب بيت شركات التلفون على شركات النت مو فالحين غير يبعتولي فواتير طول الوقت و النت بيشتغل على هواه
كتير منيح اني ما خنقت موظفة الاستقبال اليوم.بس كان نفسي عن جد هههههههههههه
امتى يا رب يصير عندي انترنت بالأقمار الصناعية

مش عارفة مع ان اليومين دول حاجات حلوة بتحصل الا اني كالعادة قلقانة
خايفة؟؟
يمكن
وكمان حاجات مش فاهماها

مش عايزة اروح الشغل بكرة الدنيا برررررد جدا الصبح
كنت بفكر ازوغ لكن مينفعش للاسف
يلا علقة تفوت ولا حد يموت

مش عارفة في ايه
بحاول انام مش عارفة
مفيش فايدة هفضل سهرانة واجي الصبح معرفش اقوم دا ايه الجنان دة

قعدت اقرا شوية في اشعار فاروق جويدة, وقفت قدام بعض القصايد , ومنها الابيات دي علقت معايا وقريتها اكتر من مرة :

فقلت: هواك إيماني

ومغفرتي.. وعصياني

أتيتك والمنى عندي

بقايا بين أحضاني

ربيع مات طائره

على أنقاض بستان

رياح الحزن تعصرني

وتسخر بين وجداني

أحبك واحة هدأت

عليها كل أحزاني

أحبك نسمة تروي

لصمت الناس.. ألحاني

أحبك نشوة تسري

وتشعل نار بركاني

أحبك أنت يا أملا

كضوء الصبح يلقاني

أمات الحب عشاقا

وحبك أنت أحياني

ولو خيرت في وطن

لقلت هواك أوطاني

ولو أنساك يا عمري

حنايا القلب.. تنساني

إذا ما ضعت في درب

ففي عينيك.. عنواني

ياترى اللي بيحبوا يقدروا يعبروا عن حبهم بالشكل دة؟
عن نفسي مقدرش


مع اني كنت هتجن ع النوم من بدري, لكن لما تكون قدامك فرصة تكون فيها مع اللي بترتاح معاهم اكيد بتغتنمها مهما كانت النتيجة, المهم اني بنسى كل حاجة بكون عايزة اقولها ,تخيل لما تكون جواك حاجات كتير وتتفاجئ لما تيجي تتكلم ان كلها اتبخرت وتلاشت تماما مش تبقى حاجة تجنن؟

ايه الكلام العجيب دة؟
غالبا السهر خلى دماغي تفوت
ماعلينا

مذكرات اليوم 15-1-2009

مش عارفة ليه مبقيتش احب اكتب تواريخ مع اني في الروشتة والدفاتر بكتبها
بحس ان الوقت بقى يعدي بسرعة اوي واليوم بسرعة بيخلص
والايام بتمر بسرعة, والعمر يجري, ونلاقي نفسنا حاجات كتير ماعملنهاش, ومش بنلحق
ايه النكد دة؟ ماعلينا

قعدت الضهرية اشوف الاخبار لأول مرة من فترة اتابع تقارير اخبارية على التليفزيون, غالبا اقرا فقط لاني معدتش بفتح التلفزيون الا نادرا, والنهاردة كان بابا جايب الجزيرة وقعدت معاه, قلبي اتوجع من اللي شفته , حسبي الله ونعم الوكيل

النهاردة في العيادة عملت حاجة ضايقتني جدا, كنت هتسبب في كارثة , مشيت وسبت الاوتوكلاف شغال, وانا في الصيدلية شكيت اني اكون نسيت الجهاز شغال رجعت بسرعة لقيت اني فعلا سبته, بس الحمدلله لحقته قبل مالضغط جواه يزيد, وكان المهندس قبل كدة لما صلحه قالي لو الضغط زاد عن 3 ممكن جدا الجهاز ينفجر
الحمدلله ربنا ستر
اول مرة اعمل كدة, مش عارفة ايه اللي خلاني انساه دايما قبل مامشي براجع على كل حاجة, الحمدلله قدر ولطف, بس متغاظة اوي من نفسي, دايما بقول اني مش بنسى غالبا قريت على نفسي


أحلى حاجة في الكتابة إن الواحد بيستخبى وراها, واللي بيقرا كلامه مش شايفه ولا سامعه وبالتالي مش شايف تعبيرات وشه ومش سامع نبرات صوته ومش عارف ايه بيدور في باله
بحس انها زي ماتكون قناع بنتدارى وراه, ونداري كل حاجة عايزين نخبيها, بنداري وراها لحظات ضعفنا, وخوفنا, وقلقنا وغيرتنا وكل حاجة جوانا
الصوت نبراته بتفضح كل اللي بتحاول تداريه, ومش بيديك فرصة تفكر قبل ردودك , ولما بتكون تتكلم واللي قدامك شايفك بيقرا ف عينك كل كلامك قبل ماتقوله وبيعرف من نظراتك ان كنت كداب ولا صادق, فرحان ولا زعلان وكل حاجة
لكن الكتابة بتديك فرصة ترتب افكارك وتفكر كويس قبل اي رد وتراجع كلامك قبل مايوصل

هو ماينفعش ان الكلام بين الناس يكون عن طريق الكتابة ؟؟

اه نسيت
مش عارفة ليه نفسي اوي اخرج اتمشى ع النيل
وحشني اوي مع اني لسة كنت بتمشى امبارح
بس نفسي اوي اتمشى تاني واقف شوية اطل عليه
بحب اوي اسرح معاه واتفرج على المية والشمس بتلمع عليها
غالبا نفسي ف كدة عشان عايزة ابقى لوحدي شوية
مش عارفة بقى
بس كدة كفاية رغي