أتمنى تنزلي كل يوم بارت 😜طماعةَ
الرواية مشوقة وحماس مع إنه نمر رافع ظغطي.
اقترح يوم الأحد و الأربعاء.

مساءالخير حبايبي كيفكم؟..بما ان الاغلب بالواتباد قالو الاحد والخميس راح يكون هذا موعدنا لتنزيل البارتات باذن الله تعالى..نبدا من الخميس القادم بهذا الموعد..ولكن اليوم بعطيكم بارت عن يوم الامس الاحد تستاهلون..❤❤

رواية زئير النمر لا يقتل الفريسه..

للكاتبة (شـــــــــغف)..

ربما ذاك الزئير لا يقتل ، لكن قد يخلق ضعفًا وانهزامية عظمى داخل النفس ..يظل يتردّد صداه في المسامع..فيهزّ الأوتار ويؤلم أشد الإيلام !!
ربما الزئير يقتل طموحًا أو يُقوّي روحًا؟؟..

~\البارت الثالث/~

(ادعو لوالدي برحمه والمغفره)..

انفتح الباب ودخل معاذ بصوت حاد/علامكم؟؟..

دانه هربت لدرج قبل ان يراها معاذ الذي ادار وجهه من لمح زول بنت لتو يتذكر وجود ابنة راشد بالبيت؟..

عزيزة جلست على الاريكه وهي تضم راسها بين كفيها اخر من تمنت وجودة بهاذي الحضه هو معـــــــاذ!!

لاتريد ان يلقى له حجه لطرد راشد من حياتها فهو من سنين يبحث عن زله واحده كي ينفذ من غير تردد..

معاذ هتف بحزم بالغ/وش صاير ليش صراخكم واصل لشارع؟؟..

راشد كانا سوف يتكلم لولا بان عزيزة قاطعته/مافينا شي بنت راشد تصيح على امها من درت انها ماتت..

معاذ رفع حاجبه واحد بحده/تصيح على امها وانتي ليش تصيحين معها؟..

عزيزة وقفت بثبات/من قال اني صحت انا كنت اهديها بس بنته مجنونه..

راشد بارتباك/ايه صادقه بنتي لا صاحت ما سكتت..

معاذ تجولت عيناه مابين والدته وراشد بتشكك ثم هتف بتحكم/وبنتك مالها خوال عمان تحطها عندهم بيتنا ماهو ملجا للمشردين..

راشد كتم قهره/بتزوج عن قريب وتروح بحال سبيلها..

معاذ عطاه نظره ثم غادر لغرفته لم ينتبه للذي تراقبه من اعلى الدرج ودمعتها تنزل بانكسار من اخر جملته؟

دانه اتجهت غرفتها جلست على السرير لتتفجر باكيه وكفيها على شفتيها محاوله تكتم صوت شهقاتها..

مهما ارتدت قناع القوه وعدم الخوف ستبقى انثى رقيقه لاقوة لها يجرحها تصرفات والدها وفراق والدتها

وجنون عزيزة وغيرتها واليوم يكمل ماتبقى ابنها المغرور بتنمر عليها لاحد منهما يعلم ما تعاني منه؟..
—————————————————————
بعد ماستحمت ضعت مرطباً على ساقيها شغلت المبخره الكهربائيه لتفوح رائحة البخور بانحاء الغرفه

ليطرق الباب بخفه نهضت سلطانه وفتحته وهي مازالت بروب الاستحمام ذات لون البندقي..

الخادمه تهتف بهدو/مستر نمر كلام انا يجهز ضيافه بصاله في ضيوف يجي..

سلطانه قطبت جبينها/من الضيوف؟؟..

الخادمه هزت كتفيها/مادري..

سلطانه هتفت بتوجس/هو كلام انتي يقول انا؟؟..

الخادمه بهدو/ايه كلام بلغ انتي في ضيوف..

سلطانه هزت بوزها الصغير بغيظ/ايه لان عمتي نشميه وشيخه ماهن هنيه ولا ما كان عبرني..

الخادمه بتسال/انا انزل اجهز قهوه وحلا..

سلطانه ترفع معصمها تنظر في الساعه/مايمدي تسوين حلا اذن العصر..

الخادمه/مستر نمر كلام طلب حلا..

سلطانه بصدمه عميقة/نعم نمر طلب حلا؟؟..

الخادمه تاكد لها/ايه بس كلام انا سوي قهوه..

سلطانه تاشر لها تروح وهي مازالت مصدومه/خلاص البس ونزل الحين..

عادت غرفتها ارتدت لها فستان انيق جففت شعرها ضعت خفيف من الميكب بينما عقلها مشغولاً..

تسال بينها وبين نفسها من الضيوف المهمين التي طلب لهما نمر حلا واخبرها تنزل لستقبالهما؟؟..

سلطانه نزلت تحت لترا الطاوله ممتلئه من اغلا انواع الحلويات والمعجنات ليثير استغرابها نمر بتصرفاته!!.

رن الجرس فتحت الخادمه لتكون الصدمه دخول بدور وهي تنزل النقاب و الشال من على راسها ببتسامه..

سلطانه تفجر دماغها بالغضب لكنها تماسكت وهي تستقبلها بثقه وثبات الخادمه قامت بضيافة..

بدور هتفت بتسال/وين عمتي لاتكون نايمه؟؟..

سلطانه ضعت رجل على رجل بكبرياء انثى/ماهي موجوده عمتي بديره..

بدور تاخذ الفنجال من يد الخادمه الذي مدته لها لتهتف بضيق/متى تجي خاطري اسلم عليها عاد اشغلت يوسف ولد بدريه يجيبني اليوم عشانها..

سلطانه بكلام مختصر ونبرة مغروره/مادري..

بدور صمتت لم ترتاح لشخصيتها المتكبره وكلامها المختصر لتشعرها بانها ضيف غير مرغوب به..

لذالك جلست لنصف ساعه ثم كلمت يوسف بان يحظر السياره ودعت سلطانه وغادرت...
——————————————————-
بالمجلس الخارجي..

نمر عاقد حاجبيه باستغراب منذا جلس يوسف وشرب فنجالا من القهوه ليرن هاتفه كانت بدور تستعجله؟؟..

نمر ترك شغله بالشركه وعاد للبيت من بعد اتصال يوسف المفاجئ بانه هو وخالته سياتون لزيارتهما..

عندما وصل طلب لهما ضيافه مستعجله ومن ثم ارسل الخادمه بان تخبر سلطانه كي تقوم بالواجب..

ليفاجئ مجدداً بانهما غادرو بهاذي السرعه عطلوه عن شغله بالشركه وعاد من اجلهما وهاذي الزيارة؟؟..

نمر اتصل في والدته سلم عليها وسال عن اخبارها واخبار خاله شداد ثم ودعها بمودة ونهض لداخل..

اتجه الدرج وهو يلمح سلطانه مازالت جالسه بصاله امامها الضيافه هتف بالسلام البارد المعتاد من بعيد..

اوقفه نداها الغريب/نمر..

نمر قطب جبينه بصدمة بالغه منذا اربع سنين لم تنادي باسمه ولم تحدث معه كانت هاجرته كما هجرها تماماً!!..

حتى انها ليست من النساء التي تحاول اغرائه بلبسها وحركاتها كرامتها وعزة نفسها فوق كل شيء كل شــئ.

نمر هتف بحزم من غير لا ينظر بها/نعم..

سلطانه اقتربت له وقفت خلفه تماماً وهي تخفت بصرامة رقيقه/كلمتين حطهم حلق بذونك تبي تتزوج خذ من الحريم اللي تبي ما يهمني الا بنات صايب والله لو فكرت تاخذ وحده منهم لرمي عليك بناتك وطلع من بيتك..

نمر صمت ثواني كي يستوعب ما قالت وهو مازال موجها عرض اكتافه ثم خفت بحده مرعبه/خلصتي كلامك؟؟..

سلطانه قطبت بصدمه/ايه خلصت..

نمر رقى الدرج بصمت غريب بشعور غريب ليثير استغرابها لم يرد على كلامها بكلمه واحـــــــــدة!!

اول مره تحادث معه بشكل مباشر وبتهديد توقعت ردة فعله بتكون معجزة مرعبه لكنه صدمها بصمته!!
——————————————————
الديرة..

الظبي من بعد ما رتبت غرفتها البسيطه الذي تتكون من سرير حديد بالون الابيض وكبت ملابس قديم..

شغلت مكنسة الكهربا تنظف الفرشه الذي بهت لونها من كثر ماهي مكدودة سنين لم تتغير..

وصلها صوت الجدة نشميه/ظبي يمال الصلاح تعالي افتحي الباب تكسر وهو يطق..

الظبي اطفئت المكنسه خرجت وهي تزفر بغيظ/ياربي والباب ليل نهار يطق وهاذي سعديه وش شغلتها بالحياة تاخذ راتب على الفاضي؟..

الجدة نشميه هتفت بحنو/يامك سعديه من اليوم تشتغل والحين طلعت السطح تشر الملابس..

الظبي اتجهت الباب وهي تذم ذات الغيظ/طول وقتها اصلاً غاطه بسطح مادري وش هي لاقيه فيه؟..

ثم زفرت من طرف انفها عندما وصلت الباب/منو اللي يطق طق الله حنكه؟..

اتاها صوت شاب ليسا غريباً عليها/انا فيصل نادي ابو محمد؟؟..

الظبي رجعت على وراء وهي تلطم وجها بحرج ليعود فيصل منادي/ابو محمد موجود؟؟..

الظبي خفتت بذات الحرج/لا طالع لنياقه على المغرب يكون موجود..

فيصل كل عرق ينبض عند سماع صوتها خفت لنفسه بهيام(شكل ذي البنت بتجيب اخرتي يالله اجعلها من نصيبي)..

الظبي عادت لداخل على بالها بانه غادر نشميه هتفت بتسال/من عند الباب يا بنت؟..

الظبي هزت كتفيها بغرابه/مادري واحد يقول اسمه فيصل يبي جدي..

نشميه امسكت برقعها باناملها وكانها تتذكر/اسمه فيصل؟؟..

الظبي بغرابه اعمق/ايه تعرفينه؟..

نشميه هتفت بتشكيك/كان ماخاب ظني هو اللي خطبك من جدك يقول مدرس اسمه فيصل..

الظبي اتسعت عينيها/ليكون هو اللي بالبسطه؟..

نشميه هزت راسها موكده/الله الله هو..

الظبي اتجهت غرفتها وهي تشعر بضيق لماذا فيصل مصر على الزواج منها حتى ان جدها بلغه برفضها..

لكنه قال لا تستعجلون سوفا اعطيكم فتره كي تفكر البنت حتى تقتنع لم يستوعب بانها لا تريده لا تريده؟؟
—————————————————————
قصر النمر بن فخر..

الساعه العاشرة ليلاً..

كان نمر متمدد على سريره من يمينه تمدد شروق ومن يساره غروب يحدثونه عن يومهما بالمدرسه..

وهو يستمع لهما بتركيز و اهتمام عميق حتى تشتت عقله بما قالت غروب بشقاوتها وذكائها الطفولي..

وعيناها تنظر اناملها الصغيره وهي تكلم/اليوم علي حفظ قران ولا حفظته عشان ماما كانت تعبانه البارح..

نمر قطب جبينه بشده/ليش شفيها؟؟..

غروب تركز عيناها بعيني والدها/راسها يوجعها قالت شوي احفظك ونست من التعب..

نمر تنهد بصوت مسموع لتهتف شروق باهتمام/بابا انت تعبان؟..

نمر ادار وجهه لها بحنو/لا بابا بس نعسان ودي انام بكرا عندي شغل بشركه..

شروق تنهض جالسه على السرير بهدؤ/خلاص نام ورتاح انا وغروب بنروح عند ماما شوي بعده ننام..

غروب تحضن والدها برقه/مابي بجلس مع بابا شوي..

نمر شد احتضانها بحنو باسم/خلاص شروق روحي انتي وهي تلحقك..

شروق قبلة جبينه/تصبح على خير..

نمر هتف بحب/وانتي من اهل الخير يا روحي..

غروب تراقبها حتى خرجت ثم همست بفطانه/بابا ممكن اسالك سوال؟..

نمر ابعد الشعر من على جبينها/طبعاً اسالي..

غروب بذات الفطانه/ليش انت تنام بغرفه وماما بغرفة صديقتي ساره تقول امها وابوها ينامون بغرفه وحده؟؟..

ولعت النار بقلب نمر وهو يهتف بتماسك/غروب لا سمع هذا الكلام مره ثانيه لا عندي ولا عند غيري فاهمه؟..

غروب انكمشت على نفسها/حتى ماما هاوشتني انا اسفه..

نمر حضن راسها على صدره وهو يغلق عيناه/قلتي لماما؟؟..

غروب ترد وهي دافنه راسها بصدره/ايه..

نمر بدات دقات قلبه تزيد/شقالت لك؟؟..

غروب تنهدت بضيق/تقول عيب تكلمين كذا ولا تقولين لاحد ماما وبابا كل واحد ينام بغرفه..

نمر تنهد ثم خفت بحزم بالغ/انتي بنت شطورة و تسمعين الكلام شوفي شروق ما تتكلم بسوالف كذا خلك مثلها..

غروب ترفع راسها و تنظره بشقاوه/شروق تخاف منك انت وماما وتسكت لكن انا ما اخاف..

نمر ينظر ملامحها لتاتي صورة سلطانه بين عيناه فعلاً نسختها بكل شيء حتى جرائتها و ثقتها بالكلام؟..

غروب عقد جبينها الصغير/شفيك بابا انا قلت شي غلط؟..

نمر يبحر في ملامحها/انتي حلوه طالعه على من؟..

غروب تضحك بخبث طفولي/على ماما حلوه مره..

نمر صمت لثواني ثم هتف بثبات/بابا يبي ينام تصبحين ع خير..

غروب قبلة خده/وانت من اهل الخير..

نهضت من السرير وهي تخطي متجه للباب كانا نمر يراقبها ليشعر بعدم راحه من تدخلها وهي بهذا السن؟

كيف لو تكبر من الممكن تجبره بعاطفتها ومقارنة والديها بغيرهما ليعود مع سلطانه بنفس الغرفه؟؟...
————————————————————-
صباح جديد..

شيخه تخفت لمحمد بحرص/ترا شهاب يبي ينزل يسلم عليك قبل يسافر ماهو كل ماشفته نشبة بحلقه عشان بنت اخوك؟..

محمد زفر عليها بعصبيه/لا اجل احب على راسه انتي مقتنعه باللي سواه؟..

شيخه زفرت بحزم/يا محمد لا تنسى انك انت اللي غصبته على البنت وهو قايل لك مايبيها رحت وخطبتها من غير علمه حطيته بالامر الواقع؟..

محمد بقهر عميق/ليته ماملك عليها كان اهون علي من الطلاق فشلني قدام ابوي وقدام الناس وحطني بموقف صعب..

شيخه بذات الحزم/انت اللي سحبته عشان يملك وهو حذرك بس انت ماتمسك العلم..

محمد عطاها نظره حاده/لو البنت بنت اخوك نمر والله ما تسكتين تقومين قيامة ولدك عشان سمعتكم لكن بنت اخوي ما تهمك..

شيخه بمكابرة/بنت اخوك ماهي ضايعه يجي رزقها هاذي من تطلقت لها ثلاث شهور كلن يخطبها..

محمد تنهد بوجع/بس هي عافت الرجال من بعد سوات ولدك فيها الله يسود وجهه..

شيخه زفرت بغيظ/خل ولدي عنك لا تحمله ذنبها هي اللي ماتبي العرس ماحد غاصبها..

محمد هز راسه بياس/كلكم يا عيال فخر قلوبكم قاسيه مافيكم رحمه حتى ولدي ورثتوه القسوه..

شيخه خفتت له بان يصمت حينما رات شهاب يقترب بهيبه/اص الولد جاء لا تضايقه..

محمد ناظر بها بنصف عين/الله يضيق عليك وعليه قولي امين..

شهاب انحنى وقبل راس والده باحترام/مساك الله بالخير..

محمد من غير نفس/هلا مساء النور..

شهاب جلس جوار والدته هتف باهتمام حازم/انا بسافر العصر عندي رحلة عمل تبون شي توصون بشي؟..

محمد سال بزفرة/وش العمل وين مسافر؟..

شهاب بذات الحزم/مسافر تايلندا عندي اعلان سياحه..

محمد تافف بضيق/والسعوديه مافيها علانات عشان تروح اخر الدنيا؟..

شهاب بتماسك/فيها بس عاد شركة السياحه طلبو مني علان لتايلندا..

محمد هتف بغرابه/انا مادري وش انت لاقي بذا السفريات اللي كل شهر بديرة؟؟..

شهاب نهض واقف استعداد للمغادرة/هوايتي وابي احققها المهم تبي شي توصي بشي؟..

محمد صد عنه/بحفظ الله..

شهاب انحنى للمره الثانيه وقبل راسه/لا تنساني من دعاك..

ثم انحنى وقبل راس شيخه/تبين شي يومه؟..

شيخه بنبرة حانيه/سلامة قلبك عسى الله يحفظك..

شهاب اتجه الباب ليوقفه ندا شهد/شهاب وقف بسلم عليك..

شهاب استدار لها باسم/هلا شهوده تعالي سلمي علي..

شهد تقترب وشهاب ينحنى لطولها ويقبل خدها/تبين شي من تايلندا؟..

شهد هزت راسها بطفولة/ابي هدايا لا تنسى..

شهاب اشر على عيناه الثنتين/من عيوني بجيب لك هدايا وغيره؟..

شهد تهمس له/استاذة منى تسال عنك ليش ماترد عليها؟..

شهاب كشر ملامحه/ماني راد عليها وبعدين ليش تكذبين علي وتقولين انها حلوه؟..

شهد قطبت جبينها برائه/انت شفتها؟..

شهاب اعتدل واقف بهيبه/تو ادري ان ماعندك ذوق المهم قولي لها مسافر مادري متى بيرجع..

شهد واقفه مصدومه لا تعلم كيف راء استاذتها لم تكن تعلم بانه تواصل مع منى بخصوص العلان..

ومن ثم طلب صورتها باسلوبه الخبيث وهي ارسلتها له بجهل منها ليكون رده عليها بلوك فوراً..

لم تعجبه ملامحها ولم تدخل مزاجه شخصيتها الخفيفه فهو يعشق البنت الثقيله المحافظه على ذاتها..
————————————————————-
شارع معروف يسمى بشارع الابراج..

برج شركة فخمه من افخم الشركات واكبرها اسم تقف سيارته نمر مرسيدس اس كلاس اخر موديل..

نزل منها بشموخ واعتزاز دخل المصعد ضع سبابته على رقم الطابق الاخير من البرج يكون مكتبه الخاص..

حينما وصل جلس على كرسي جلد بالون الاسود
يحيط به فخامة المكتب بطراز القيادة كقيادة المالك.

السكرتير كانا يتبعه و بين كفيه يحمل ملف ضعه على الطاوله امام نمر بتقدير/تفضل..

نمر بحزم رجولي بالغ/جهز للي غرفة الاجتماع الساعه 10 ونص وبلغ جميع الموظفين..

السكرتير بذات التقدير/ابشر طال عمرك تامر على شي ثاني؟..

نمر يفتح الملف بتركيز/سلامتك..

طرق الباب بخفه دخل معاذ بهيبته المعتاده التي لاتخلو من الغموض والتعقيدات بحياته..

نمر رفع عيناه لطارق الباب بحده لتحول نظراته الى حنو بالغ معاذ بنسبه له ابنه وشريك لروحه..

لم ينسى قبل عشرين سنه انكسار جناحه وصدمته بخبر وفاة والده حاتم والصدمة تعمقت حينما علم

بانه مات مقتولا اصبح حالته كالمجنون ينام ويفيق على المهدئات اعتزل عن العالم الخارجي..

حتى دارسته تغيب عنها في كل ليله يكرر بصراخ* وجنون اريد القاتل يظهر ولو كانا مدفونا تحت الارض!!

كانا نمر يحتويه مرارا وتكرارا لم يغيب عن عيناه لحظه وهو ليس باقل من قهر وحزن على قتل شقيقه الوحيد

ولكنه يتظاهر بالقوه من اجل معاذ فقط مـــــــــعاذ
يخشى عليه من الهبل او ربما موت الحسره..

نمر نقل ملف معاذ الى مدرسه خاصه كي يكمل مسيرته الدراسيه لايريد مستقبله ينهدم..

حلف لمعاذ وحلف لنفسه وحلف لناس اجمعين بانه سياخذ ثار شقيقه حاتم طال الزمن ام قصر..

معاذ استمر سنه على علاجات الاكتئاب حتى تحسنت صحته وعاد الى دراسته وهو مازال يطالب بحق والده.

لكن الصدمه عادت له مجدداً بشكل مفاجئ حتى تدهورت صحته و انكسر جناحه الاخر..

بسبب قرار عزيزة بزواج وخذلانها وقهرها لابنها
لم ينسى معاذ يوماً كان ينكب امام اقدامها برجا..

بان لا تتزوج وتتركه ولكنها اصرت بعذر الانجاب وهو بهذاك الوقت بعمر اربعة عشر عام..

ليست عنده القدره والقوه التي عنده الان كي يرفض زاجها وتحكم بحياتها صغر سنه لم ينصفه..

ونمر ليسا له كلمه عليها بما ان والدها كانا على قيد الحياة لكنه رفض رفض قاطع بان تستلم ورث معاذ..

عاده للعلاج النفسي وعاده لدراسته حافظ على حلاله كاملا شغله بذمه وضمير حتى اصبح اضعاف مضاعف

ثم فتح له شركة خاصه لمعاذ باسمه كانا ومازال عضيد وسند احن عليه من الاب و اقرب له من الاخ..

بالوقت الحالي..

نمر هتف بفخامة/حي الله معاذ وش ذا الصباح المبارك؟؟..

معاذ اقترب له بتقدير انحنى وقبل راسه/ابقاك الله شلونك بشرني عنك؟..

نمر اشر له بان يجلس بذات الفخامه/طيب طاب حالك اجلس اجلس بطلب لك قهوه معي..

معاذ جلس ونمر رفع السماعه وطلب لهما قهوه ثم نظر به بتسال حازم/ما مريت شركتك اليوم؟..

معاذ بنبرة غامضه/لا عندي استلام العصر وبعده بطلع مداهمه لا انتهى داومي رحت لشركه..

نمر زفر باهتمام اقرب للغضب/كذا تتعب نفسك لازم تخصص وقت لراحتك ولدوام والشغل ملحوق عليه..

معاذ بذات النبرة الغامضه/خلني يا عمي اشغل نفسي بشي يفيد بدل ماجلس وشغل تفكيري من الفضاوه..

نمر نهض واقفه ثم تقدم وجلس على الكرسي المقابل له على هتف بحزم حاني/بس اللي انت تسويه مايفيد يابوك تهرب من نفسك المفروض تجلس معها وتواجها تكسر حاجز الوحده..

معاذ شد له نفس عميق شديد العمق/مابي اختلي بنفسي لاني راح امرضها على العموم انا كذا مرتاح..

نمر زفر بحده/لا توهم نفسك بالراحه لانك مو مرتاح اصلاً تبي تشغل نفسك تزوج وشغلها بشي يفيدها صدق..

معاذ هتف بتقصد/لو الزواج وراه راحه كانك انت اول واحد مرتاح؟..

نمر تغيرت ملامحه بشكل مفاجئ صمت قليلاً ثم وقف وعاد لكرسيه جلس بجمود مدروس..

هتف بحزم هادئ/شهاب عنده رحلة سفر على ماضن انها اليوم سافر معه غير جو..

معاذ زفر برفض/ماورا شهاب الا الضياع خلني كذا افضل..

نمر قطب جبينه/ليش وهو للحين ماترك خرابيطه؟؟..

معاذ ينظر في المضيف الذي تقدم لهما يحمل بيده صينية القهوه ثم عاد انظاره في عمه نمر..

تنهد ثم زفر بذات الهدو/لا ماتغير ولا راح يتغير ولا يسمع نصيحة احد اصلاً..

نمر بحزم شديد/ودام قلبه مع النسوان ليه ماتزوج بنت عمه وخذها معه بالسفريات؟؟..

معاذ يرشف من فنجاله/وانا ادري عنه المهم ماعلينا من شهاب انا جاي ابيك بموضوع اهم..

نمر اشر على المضيف بان يغادر وهو يسال بحزم/خير ان شاءالله وش الموضوع؟؟..

معاذ هتف بحذر/بكلمك عن خالتي سلطانه لامتى وهي بتم كذا م ع؟..

نمر بمقاطعه صارمه بالغه/معاذ حدك عاد سبق وقلت لك الموضوع هذا بذات لاحد يفتحه معي لا انت ولا امي ولا غيركم..

معاذ زفر بقهر/لامتى يا عم انت ترضى على وحده من بناتك الظلم؟؟..

نمر قفز واقف بغضب مفاجئ وهو ياشر بسبابته على الباب/برااا اطلع برااا..

معاذ وقف وهو يهز راسه بياس لايعلم لماذا عمه ينفعل هكذا بشكل غريب من ياتي احد بسيرة سلطانه

تنهد بطولة بال ثم هتف بحده/قبل لاطلع بقول لك كلمه وحده ترا خالتي من طبعاها ماهي صبوره اخاف يجي يوم وتطلع شخصيتها الحقيقيه..

نمر شد قبضة كفه حتى ابيضت انامله وعيناه التي تقدح شراراً مرعباً تراقب معاذ حتى غادر..

ليحمل تحفه ثمينه من القزاز موضوعه امامه على المكتب ويرميها بقوه غاضبه منفعله حتى تحطمت

دخل السكرتير مرتاع ليعود ويخرج فوراً عندما وجه نمر كيف متفجره بالحمار وصدره يرتفع وينزل بشده
————————————————————
دانه من ليلة البارح كانت سهرانه تفكر كيف تخلص والدها ونفسها من حياة هاذي المرءه المجنونه؟؟..

بالاخير قررت تنكد عليها عيشتها من اجل تسبب بمشاكل بينها هي و والدها ثم تطرده وتفتك منها؟..

نزلت الدرج حبه ورا حبه وهي تغني بصوت عال وروقان متصنع/اخصمك اه اسيبك لا لا لا لالالا..

عزيزة جالسه تحادث مع امنه عامله سودانيه كانت عاملت بيت والدها منذا ثلاثين عام عشرة عمر بينهما.

حينما اتت كان عمر سلطانه سنه توفت والدتها وهي بسن المراهقه امنه من تولت مسؤليتها حتى تزوجت..

ثم طلبت عزيزة بان امنه تعمل عندها كي تهتم بصحتها بذات انها مريضة قلب وتحتاج عنايه..

امنه قفزت مستديره للخلف وهي ترا فتاه ملكة بالجمال قمه بالانوثه تنط الدرج وتهز خصرتيها!!!

عزيزة قفزت واقفه بغضب/هواه اي والله هواه يمال المرض اللي يسكر فمك يا قليلة الادب..

دانه تقترب بخبث باسم/كثري دعاوي الملائكة تقول ولك مثلها..

عزيزة صرخت بذات الغضب/انقلعي فوق لاشوف وجهك لين اخلي ابوك يصرفك ويفكني منك..

دانه رقصت حاجبيها وهي مازالت تبتسم/جالسه على قلبك يا تقبليني انا وابوي سوى ولا طردينا سوى..

عزيزة بدا دمها يفور/هذا اللي تبين يا عقرب رمل تفرقيني انا وابوك هين والله لا لدغك قبل لا تلدغيني..

دانه تغيرت ملامحها بقهر وهي تزفر مهدده/لاتحطين راسك براسي تراك مابعد عرفتيني لو ابيه يطلقك خليته يطلقك اليوم..

عزيزة صرخت بانفعال/تعقبين يا السافلة والله وانا بنت ابوي لا بليك بنفسك..

دانه اتسعت عينيها صدمه/انا تقولين عني سافله؟؟..

امنه وقفت بحده وهي ترا ملامح عزيزة كيف تغيرت بتعب/روحي فوق يابنت لا قسم بالله مايحصل لك خير المره مريضه لا تذبحينها بطولة لسانك؟..

دانه تخصرت بعناد/ماني برايحه بتموت خلي تموت وتفكنا منها..

عزيزة تقدمت لها بانفعال اشد/تبين تذبحيني عشان تورثيني انتي وابوك لكن انا اللي والله لا ذبحك..

دانه صرخت برعب من راتها هجمت عليها وبدات تخنقها وتهتف بجنون/والله لاذبحك والله..

عندما صرخت دانه امنه انتفضت وهي تحاول تخلص عنقها من بين يدي عزيزة قبل ان تقتلها بالفعل!!..

معاذ الذي كان بغرفته حينما سمع صوت الصرخ خرج كل ماخطر باله بان والدته تعبانه/يومه شفيك؟؟..

عزيزة استدارت تنظر فيه وهو يقترب لتفلت عنق دانه وتشدها كي تخبيها خلف ظهرها تخشى بان معاذ يراها

ويرا جمالها الساخط الذي اذاب جليدها وهي امراءه وثار غيرتها جعلها تفكر بقتلها فكيف الرجل لو راها؟..

دانه تحاول تخلص من يدها كي تهرب لكن عزيزة منعتها وهي تخبيها و تزفر لمعاذ بارتباك/عاود مع طريقك بنت راشد موجوده..

معاذ لف وعطاها عرض كتافه بغضب/انا بفهم هاذي وش فيها كل يوم والثاني صياح من جت البيت؟..

عزيزة دفعت دانه بغل/اذلفي فوق..

دانه رقت الدرج بخطوات سريعه وهي ترتعش ومعاذ مازال صاد حتى غادرت استدار لوالدته بذات الغضب.

عزيزة لم تعطيه فرصه يتكلم وهي تزفر بحده/مابي اسمع كلمه ترا اللي فيني يكفيني..

معاذ زفر بغضب اعمق/وش اللي فيك غير راشد مايرتاح لين يموتك ناقصة عمر انا بدري وش اللي مخليك تمسكين فيه كذا؟..

عزيزة تجلس وهي تاشر لامنه بامر/جيبي داوي بسرعه..

معاذ يحاول التماسك/يومه خلاص مابقى بالعمر كثر اللي راح خلي راشد ياخذ بنته ويذلف بالذي ما يحفظه..

عزيزة لم ترد عليه بسبب نغزات قلبها امنه اتت وهي تخطف انفاسها جلست جوارها اعطتها الدواء بدقه..

معاذ كان واقف يراقب بصمت بينما دم راسه يفور يفور من تضخم القهر والغضب من راشد وابنته..

عزيزة عندما هدات رفعت راسها وناظرت به/معاذ يامك انت ليش ماتبي تفهم راشد ماله دخل اصلاً ماهو موجود بالبيت لكن بنته مريضه تحلم بموت امها وتنزل تصارخ حتى اسال امنه..

امنه كانت تنظر بها بذهول عزيزة هزت كتفها/تكلمي بنته ماهي متاثره بوفاة امها؟..

امنه هزت راسها بذات الذهول/الا صدق مجنونه يمكن..

معاذ ركز عينيه الناعسه بهما بنظرات حارقه ثم استدار وعاد لغرفته لايريد يسمع مبرر عن راشد لانه لم يقبله.
———————————————————-
الساعه الثانيه ونصف ظهراً..

يدخل البيت بذات الشموخ والاعتزاز رغم الارهاق رقى الدرج بتعب يريد سريره فقط كي يريح جسده وعقله..

من الصباح هو على اعصابه بسبب تدخل معاذ بحياته حتى انه لم يركز على الاجتماع كما كان مخطط له؟؟..

منذا وصل الطابق الثاني كانت شروق وغروب باستقباله يتسابقان على حضنه بطفولة ولهفه..

نمر فتح ذراعيه بحنو خالص بناته هم الاولويه بحياته
رغم التعقيدات بينه وبين والدتهما الا انه قريب لهما جداً..

حضن شروق وغروب باسم/ياهلا ياهلا بروحي وقلبي..

غروب بطولة لسان/شفيك تاخرت علينا من اليوم وحنا ننتظرك؟..

شروق نحرتها بطفولة/اكيد كان بشركه بعدين ما تاخر علينا كثير..

غروب بتركيز/الا تاخر ساعه ونص دايم الساعه 1 يوصل..

نمر كان يستمع بصمت شد له نفس ثم خفت بحزم هادئ/بروح اخذ عفوه العصر لا صحيت نسولف تمام؟..

شروق هزت راسها برضا/تمام..

نمر ناظر في غروب الصامته/وحبيبة بابا وش تقول؟..

غروب بشقاوه/لا لا مو تمام بجي انام عندك..

نمر تنهد بعمق/اوك تعالو معي ننام سوى..

شروق لحقته بينما غروب اتجهت غرفة سلطانه وهي تهتف بصوت عال/هونت بروح انام عند ماما..

نمر قطب ثم استدار ينظر بها بصدمه لا يعلم ماذا تريد توصل له من حركتها الواضح بانها مدروسه؟..

شروق برائه/علامها؟؟..

نمر مازال واقف وعينيه مرتكزة على باب غرفة سلطانه الذي دخلت معه الطفله الغريبه بتصرفاتها وكلامها!!

شروق هزت كفه/بابا يلا انعس بنام..

نمر نفض الافكار من راسه وهتف بذهول/يلا بابا تعالي نامي عندي..
————————————————————-
سلطانه كانت تمسح على شعر غروب الذي متمدده قريب من حضنها وتنظر السقف بصمت غريب..

سالتها باهتمام/ليش مانمتي عند بابا وشروق؟..

غروب ناظرت بها بعيني لامعه/وانتي ليش ما تنامين عنده؟؟..

سلطانه صعقت من كلامها لكنها اخفت ذالك خلف نبرتها الحاده/انا مو قلت لك من قبل لاعاد تفتحين هذا الموضوع مره ثانيه؟..

غروب عادت تنظر السقف/ليش انتي وبابا تعصبون لا لا سالتكم هذا السوال؟..

سلطانه ارتعشت رغماً عنها/سالتي بابا؟؟..

غروب عادت تنظر بها بذات النظرات الامعه/ايه وعصب علي ماما انتم ليش ما تجاوبوني على سوالي؟..

سلطانه تالمت حقاً/سوالك وش يا ماما؟..

غروب استدارت وتعلقت بجيب سلطانه برائه/ليش كل واحد غرفه كل صديقاتي ابوهم وامهم غرفه وحده؟..

سلطانه تماسكت قبل ان تنفعل/وانتي ليكون قلتي لصديقاتك؟..

غروب هزت راسها بنفي/لا مستحيل اقول..

سلطانه تنهدت براحه/ايه يا ماما عيب تكلمون انتي وصديقاتك بشيء يخص اهلهم..

غروب باصرار/طيب ردي على سوالي؟..

سلطانه احتارت ماذا ترد عليها/مادري غروب لا كبرتي تفهمين من غير لا تسالين..

غروب بزفرة/بس انا كبيره؟..

سلطانه بعصبيه/خلاص انسي ذا الموضوع تفهمين..

غروب لوتها ظهرها بزعل/ماراح انساه لين تردون على سوالي..

سلطانه قلقت من تصرفاتها ولحها بهذا الموضوع بذات ما الذي لفت انتباها بعد هاذي السنين الاربع؟..

لتو تنتبه بان والديها كل واحد بغرفه او انها كانت منتبه و كاتمه بقلبها حتى اتى وقت الانفجار؟؟..

طيب لماذا شروق لم تسال وتدخل بينهما كما تفعل غروب تماماً معنها اكبر منها سنا؟؟..
——————————————————
تحياتي(شغف)..

في انتظار الرواية 😍😍😍

كل مرة اقول ماراح اقراها الا اذا اكتملت

بس رواياتك سحر❤‍🔥❤‍🔥❤‍🔥

صباح الخير حبايبي..ادري تاخرت عليكم لكن والله حصل عندي ظرف..وان شاءالله اني على الموعد معكم الاحد في بارت والخميس بارت❤


رواية زئير النمر لا يقتل الفريسه..

للكاتبة (شـــــــــغف)..

ربما ذاك الزئير لا يقتل ، لكن قد يخلق ضعفًا وانهزامية عظمى داخل النفس ..يظل يتردّد صداه في المسامع..فيهزّ الأوتار ويؤلم أشد الإيلام !!
ربما الزئير يقتل طموحًا أو يُقوّي روحًا؟؟..

~\البارت الرابع/~

(ادعو لوالدي برحمه والمغفره)..

عصر الديرة..

بين شبوك الغنم كانت الجدة نشميه رافعه عباتها السوداء تحت عضدها لتبين جلابيتها الخضراء..

بين كفها واحد تمسك صحن معدن محفور من الداخل وكفها الاخر تحاول حلب العنز..

اتاها صوت شداد منادي/تعالي يا نشميه تقهوي وخليها عنك العامل يجي يحلبها..

الجدة نشميه ادارة وجها تنظر في شداد الذي جالس على الرمل النظيف وامامه ترمس القهوه وصحن التمر..

زفرت بحده/عاملك هذا ذايه عساه لذوه العنز مبطية ما نحلبت..

شداد اجابها بحزم/تعالي وعيني خير امس الصباح شايفه بعيني حالبها..

الجدة نشميه افلتت العنز ثم نهضت واقفه اقتربت لشداد وهي تمد له صحن الحليب/تشرب ولا باخذه لظبي تفوره على النار وتشربه؟..

شداد هتف بحنو/خذيه لظبي انا شبعان يالله من فضلك..

الجدة نشميه ضعت الحليب في قنينه و حكمت اغلاقه ثم جلست تقهوا مع شداد و عينيهم وحديثهم عن الغنم

رن هاتف شداد اظهره من مخباه/عسى خير..

رد بخشونة/مرحبا..

الطرف الاخر/مساك الله بالخير يابو محمد شلونك بشرني عنك؟..

شداد قطب/بخير يا عساك بخير من معي؟..

الطرف الاخر/انا فيصل تذكرني جيت امس للبيت سالت عنك مانت موجود؟..

شداد بحزم هادئ/يالله تحيه شلونك شلون ابوك عساكم بخير؟..

فيصل بذات الحزم/كلنا بخير ونحمد الله ياعم انا بسالك وش صار بموضوعي؟..

شداد تنهد بحيره/يابوك موضوعك رديت عليك من قبل البنت عيت ولا ني غاصبها..

فيصل تنهد بعمق ثم خفت برجا اعمق/تكفى ياعم حاول فيها تراي طالب قربك وشاريكم من بين الناس كلها..

شداد ضاق صدره عليه/والله ان ودي فيك لكن العذر من الله ثم منك الشور شورها والراي رايها..

فيصل هتف بيقين/طيب انا ماني مستعجل بعطيكم اسبوع ثاني كاد الله يهداها وتوافق؟..

شداد بذات الضيقه/يا وليدي يمكن اقول لك اصبر وهي مصره على رايها؟..

فيصل بحزم/بصبر يابو محمد لو تبون سنه بس بالاخير توافقون علي؟..

شداد بغرابه/انت ليش مصر عليها البنات ماكثر منهن يابوك شف رزقك؟..

فيصل بصرار فعلي/قلت لك ابي نسبكم وابي بنتك انت بذات طالبك تحاول فيها..

شداد ينهى الاتصال/باذن الله بحاول وعسى الله يقدم لكم الخير..

فيصل بهدو/تبي شي توصي بشي..

شداد بموده/سلم واسلم على الوالد ومع السلامه..

الجدة نشميه بتسال/من اللي يكلمك يا بو محمد؟..

شداد يعيد هاتفه لمخباه ويزفر بضيق/هذا فيصل اللي خطب الظبي اشغلني يبيها..

الجدة نشميه قطبت باستغراب/طيب قلنا له مرتين البنت عيت هو مايفهم؟..

شداد هتف بحيره/الرجال شاريها بدم قلبه بس هي الله يهدها مادري وش بلاها عيت عنه..

الجدة نشميه خفتت بتوجس/انت تشوف ان فيه خير بس؟..

شداد اجابها بثقه/اي بالله ان منطوقه وسمعته زينه..

الجدة نشميه بذات الخفوت/اجل اتركها علي اذا هو مصر عليها ينتظر لين نقنعها فيه..

شداد تنهد بعمق/اي والله انه يقول طالبك تكلمها وانا مستعد اصبر سنه على رضاها..

الجدة نشميه ابتسمت بمودة/ماهي سهله بنت احمد كلن يطق عصي عليها..

شداد زفز بغبنه/ولد عمها اقرب الناس لها رفع خشمه عليها..

الجدة نشميه كشرت ملامحها/شهاب ما يستاهل الظبي ذهبه هو خله والله ليعض اصابع الندم عليها..
————————————————————
عزيزة زفرت بحده/شوف يا راشد بنتك لو ما ذلفت ترا بتخرب العلاقه بينا حتى معاذ صار ملاحظ من جت بس صياح بالبيت..

راشد تنهد بضيق/وين اوديها يا عزيزة بنت مالها احد بعد الله غيري؟..

عزيزة زفرت بقسوه/ولد جماعتكم اللي كان يبيها خل ياخذها ويفكنا منها..

راشد بذات الضيق/قصدك سليمان تزوج من كم شهر وهي ماتبيه ماني بغاصبها..

عزيزة جنت جنونها/تراب بفمها الا تغصبها على اي واحد وتصرفها ولا خلاص طلقني ورح معها..

انتفض راشد بشده/اعوذبالله اطلقك انتي صاحيه يامره انا هويك من زمان ماصدقت اتزوجك..

عزيزة ابتسمت بتميع/ادري انك هاويني وهذا اللي خلاني تحديت العالم وخذتك بس عاد بنتك لازم تفارق لاتخرب بينا لان معاذ ماراح يسكت..

راشد بمكر رجولي/ابد اول واحد يجي بخطبها بزوجها من غير شورها زين كذا؟..

عزيزة تزفر بحده/وانا بنتظر لين تنخطب انت رح اخطب لها وزوجها لو شايب فكني منها..

راشد هز راسه بمسايرة/ابشري ابشري لا تنقلين همها..

عزيزة زفرت مهدده/معك سبوع فقط دبر امرها ولا ترا معاذ بيدبر امرك وامرها و يشوتكم برا البيت..

راشد انتفض بجزع/الا معاذ لا يدخل بينا تامرين انا بكرا ادور لها رجال وخطبه..

عزيزة ابتسمت بنصر/عفيه رشودي..
—————————————————————
الساعه العاشرة ليلاً..

سلطانه سالت باهتمام/غروب ليش ما تحلين واجباتك مثل شروق مشاءالله عليها؟..

غروب كانت متمدده على الاريكه تتابع فلم كرتون زفرت بعناد/ماني بحالة..

سلطانه بحنو رقيق/تبين تسقطين وتضحكين صديقاتك عليك؟؟..

غروب هزت كتفيها بعدم اهتمام وعينيها مازالت تنظر شاشة التلفاز/ماراح اسقط وانا مدرسه خاصه..

سلطانه تكتم غضبها/لا راح تسقطين وتنزل درجاتك وتزعلين ماما وبابا و ننقلك مدرسه ثانيه..

غروب هتفت برود/احسن انقلوني مابي مدرستي اصلا..

شروق سالتها برائه/ليش غروب ماتبينها حرام عليك حتى الموديره و المدرسات يحبونا..

غروب لم ترد عليها لتثير استغراب سلطانه من جديد ماذا بها فتاتها تتصرف بغرابه ماذا بها؟...

وصل سمعهما صوت خطوات نمر يرقى الدرج لتقفز غروب وشروق كما يفعلان في كل مره سباق لحضنه..

نمر ابتسم لهم بلطف كما يعشق الحياة بوجود هاذي الفتاتين/هلا ومسهلا حبيبات البابا..

شروق تقبل كفه اليمين/حبيبي بابا اشتقت لك..

غروب تقبل كفه الاخرى/وانا بعد اشتقت لك..

نمر انحنى من عليانه وقبل كل وحده مع جبينها ثم همس لها بود/وانا والله اشتقت لكم كثير نروح الغرفه نسولف لين يجينا النوم؟..

شروق وغروب بحماس /يلا نروح..

نمر اعتدل واقف وهو يمسك شروق من يساره وغروب من يمينه ويتجه غرفته غير معبر الذي جالسه تراقبه..

سلطانه تنهدت تنهيده طويله حنانه على بناته يذكرها بحياتها من قبل كم كان حنون عليها رغم انها عصبيه..

و منفعله بسبب غيرتها عليه حينما ياتي احد بسيرة البندري وهو كان يحتويها بدفى يخشى عليها من الاذى

يحرص والدته وشيخه بان لاحد يتحدث بالبندري امامها كي لا تثور غيرتها وهو من يتعب لرضائها؟..

والان سبحان ربي مغير الاحوال يتجاوزها غير معبر وجودها وغير مهتم لمشاعرها لا يعلم ولا يسال عنها..

وعن اخبارها وحياتها هل هي مرتاحه ام انها متضايقه سعيده ام انها مريضه لم تهمه كما كانت تهمه من قبل..
————————————————————-
صباح جديد..

تمددت على سريرها من بعد ما جهزت فطور جدها وجدتها فتحت هاتفها تشاهد اخبار العالم بسناب؟..

لفت انتباها ترند رحلة شهاب السياحيه الى تايلندا اتاها فضول بان تشاهده وقلبها يتالم يتالم حقاً..

كان بتلفريك يصور الطبيعه والعالم وهو مبتسم سعيد عايش حياته بطولها وعرضها بماله وشهرته..

الظبي بدات تشاهد حسابه وعينيها تدمع رغماً عنها ترا عديد من صوره البعض واقف بتالق وشموخ..

والبعض جالس بسيارته الفخمه بثقه وهيبه والبعض جالس بكوفي او مول او مطعم كانا وسيم انيق مثقف

الظبي رمت هاتفها بعيد لتنخرط بالبكا وتدفن وجها بالوساده مكسوره مجروحه باقصى حدود الانكسار..

نصف عمرها كانا حلم والباقي ضياع فهي حقاً كانت معجبه بشهاب وتحبه ومن علقها فيه اهلها واهله..

منذا بلغ سنها ربطو اسمها باسمه توقعت بانه يبادلها نفس المشاعر لا تعلم بانه حب من طرف واحد..

حتى صفعها بورقة الطلاق لتفيق من حلمها لم يفكر فيها لا من قبل ولا من بعد كانا ومازال مغرور متكبر..

قطع حزنها ندا الجدة نشميه بنبرة حانيه/الظبي يامك تعالي افطري وشربي حليب دافي..

الظبي اعتدلت جالسه وهي تمسح دمع عينيها وتشد لها نفس وتظهر بالحوش رات شداد والجدة نشميه..

يجلسان مثل كل عادة على الفرشه بضل الحيط عن الشمس وامامهم الفطور والحليب والقهوه والشاي..

الظبي تقدمت وجلست معهم ببتسامه مغصوبه/عسى الخبز اعجبكم اليوم سويته عن سعديه..

شداد ياكل قطعه من الخبز والسمن/سلمت يمينك يابوك عزالله احلى من سوات سعديه..

الجدة نشميه تضحك بود/لابالله ان خبز سعديه احسن بس انت تبي تزكي بنت ولدك..

شداد ابتسم بذات الود/بنت ولدي مزكيها ربها ماهي محتاجه من يزكيها..

الجدة نشميه بحزم/كفو تستاهل بنت احمد عسى عمرها طويل..

الظبي ترشف من كاس الحليب باسمه بفطانه/من صبحتو على مدحي والله ان وراكم شي؟..

الجدة نشميه تضحك بحنو/ياربي يحفظك ويخليك لعين ترجيك فوق انك مزيونه فطينه بعد؟..

الظبي مازالت تبتسم بفتنه/عسى ياربي خير حتى لوني متوقعه وش تبون خطبه جديده..

شداد بحزم حاني/يابوك وش فيها الخطبه البنات يبون الستر وانتي يا دافع ماتبين تعرسين؟..

الظبي بحزم رقيق/ستري بيتك عسى عمرك طويل والعرس مالي خاطر فيه الحين خلوني على راحتي لين يلين راسي..

الجدة نشميه بنبرة حاده/ومتى يبي يلين راسك شهر سنه يا بنتي العمر ترا ماهو واقف لك وبعدين ماكل الرجال فيهم خير..

الظبي هتفت بثقه/عمري صغير وللحين مادخلت العشرين وش معجلكم على عرسي؟..

شداد بركادة/ماهو معجلنا شي بس فيصل شاريك يقول لو تبينه ينتظر سنه تراه راضي..

الظبي انتفضت بغضب/وفيصل هذا مايفهم والله لو مايبقى بالدنيا غيره ماخذته..

الجدة نشميه بذات النبرة الحاده/طيب عطينا سبب ليش ما تبينه؟..

الظبي زفرت بغبنه/واحد براسه عقل يخطب بالبسطه؟..

شداد اجابها بثبات/ماسوى عيب الرجال طلبك بالحلال وانا خاطري فيه..

الظبي نهضت واقفه بزعل/تبي تجبرني ياجدي عليه؟..

شداد تنهد بضيق/لا يابوك الشور شورك بس ودي انك تسمعين رايي..

الظبي اتجهت لداخل بعناد/ماني موافقه لا عليه ولا على غيره..

الجدة نشميه هزت راسها بياس/كاد ان ولد محمد عقدها عساه للعقدة اللي ماتحل عن راسه..

شداد ضاق بالفعل/لاحول ولاقوة الا بالله..
—————————————————————
سلطانه كانت تقف امام طاولة الافطار كي تاكد من وجبه طفلتيها المفضله قبل خروجهما للمدرسه..

استدارت باسمه لمصدر خطواتهما لتحول ابتسامتها لغرابة وعيناها تبحث عن غروب لم تنزل؟؟..

مع شروق التي ترتدي مريول مدرسي بالون التركوازي والعاملة ساري تتبعهما تحمل الشنط المدرسيه..

سالت بتوجس/وين غروب ليش مانزلت؟..

شروق تقدم وتقبل كفها الناعم/تقول بتسلم على بابا وتجي..

سلطانه بذات الغرابه/ليش بابا صحى؟..

شروق تجلس على الكرسي امام الافطار/لا نايم بس غروب مخبوله ماتفهم..

سلطانه حذرتها برقة/لا تقولين عن اختك مخبوله عيب ماما؟..

شروق هزت راسها/حاظر ماما..

سلطانه جلست بضيق من تصرف غروب فهي تعلم بان والدها لم يفيق الا الساعه التاسعه حينما يخرج لشركه..

لماذا اليوم اصرت ان تسلم عليه قبل تخرج المدرسه هل تعمد تغثها بتصرفاتها ام انها تخطط لشيء اخر؟

"غرفة النمر"

كان غاط بالنوم العميق فهو من فتره لم ينام اليل بسبب الافكار بشركة والمناقصات بناته ودراستهما..

معاذ وغموضه المخيف والدته وجلستها بالقريه بعيد عن عينيه وصمتها الغريب عن موضوع قاتل حاتم!!..

وهي من كانت تلح عليه بان ياخذ بثاره ولا يتنازل عن دم شقيقة مهما كان لماذا صمتت هل فقده الامل؟؟

او انها لاتريد تحمل نمر فوق طاقته وهي تعلم ظروفه العصية وتعقيدات حياته وشغاله التي لا تنتهى..

كل هاذي العالم فكرت فيها يا نمر الا سلطانه الا هي لماذا لم تخصص لها وقتاً كي تفكر فيها لمـــــــاذا؟؟

نمر افاق بينما حاجبيه معقودة من رفرف دافئه على جبينه ليصدم بقرب وجه غروب وابتسامتها الساحره..

نمر سال بنعاس/هلا بابا تبين شي؟..

غروب عادت وقبلة خده برائه/بسلم عليك قبل اروح المدرسه..

نمر قفز جالس لا يعلم لماذا انقبض قلبه من كلامها سحبها وحضنها على صدره بشكل مفاجئ!!..

غروب انصدمت من تصرفه همست قريب اذنه/بابا شفيك؟..

نمر شد احتضانها بصمت كاد يدخلها بين ضلوعه من شدت رعبه حينما اتت باله البندري قبل تغادر الحياة..

كانت هاذي عبارتها حينما ايقضته من عز نومه وكانها تودعه برنة الهاتف قايله(حبيت اسلم عليك وسمع صوتك قبل اروح الجامعه)..

ومن ذالك اليوم لم يعد يسمع صوتها نهائي لكن نبرتها وكلامها بقت محفوره بذاكره من الصعب نســـــيانها.

غروب كاد تبكي من الاختناق/بابا كتمتني شفيك؟..

نمر افلتها بخفه وعينيه تبحر ملامحها برعب/شروق وينها؟؟..

غروب برائه/تحت تريق بنروح المدرسه..

نمر حمل الهاتف بيده بينما يده لاخرى مازالت تحاوط كتفي غروب وكانه خايف انها تضيع منه للابد..

رن رقم ساري هتف بصرامة بالغ شديدة البلوغ/خلي شروق تطلع للي فوق بالغرفه اليوم مافيها مدرسه مفهوم؟..

ساري قطبت جبينها/مفهوم..

سلطانه سالت بحذر/وش يبي نمر؟..

ساري هزت كتفيها بذات الصدمه/كلام شروق تطلع له فوق بالغرفه مافيها مدرسه اليوم..

سلطانه وقفت بعصبيه/نعم ليش مافي مدرسه؟..

ساري رجعت على ورا برعب/مادري عذا كلام مستر نمر..

سلطانه شدت على اعصابها تخشى بان تفلت وهي من كانت متحكمه فيها/هذا جن رسمي اليوم اختبارات لازم يداومون..

ثم ردفت بذات العصبيه وهي تنظر شروق/روحي قولي لبوك ان عندكم اختبارات ولازم تداومون بلا دلع غروب علينا؟..

شروق تنهض واقفه/حاظر ماما..

حينما وصلت غرفة والدها راته مازال حاضن غروب فتح ذراعه الاخرى بندا/شروق تعالي..

شروق اقتربت على السرير وهو سحبها وحضنها بقوه قبل شعرها قبل متتباعه عم الصمت بينهما لدقايق..

نمر يمسد ظهر بناته بكفه الجبرة بحنو خالص شروق رفعت راسها وناظرت ملامحه والدها بغرابه!!..

ثم هتفت باختناق/بابا عندنا اختبار لازم نداوم..

نمر عادها لحضنه برفض هادئ/مافي دوام اليوم والاختبار انا اكلمهم يعيدونه لكم..

شروق عادت تنظر به/بس ماما معصبه تقول لازم نختبر..

نمر زفر من بين اسنانه من غير لايشعر/خليها تضرب راسها بالجدار تبي تعيد الخطاء و تضيع بناتي بعد؟..

شروق صمتت وعيناها تتسع بصدمه لاول مره تسمع والدها يشتم والدتها بهاذي العبارات؟؟..

عكس غروب التي زفرت بزعل/لا تقول عن ماما تضرب راسها بالجدار؟..

نمر ندم على تسرعه لكنه اخفاء ذالك بنبرة صوته الحازمه/شروق غروب انا قلت مافي مدرسه اليوم يعني مافيه والحين بدلو ملابسكم وتعالو نامو عندي بسرعه..

شروق نهضت واقفه و اتجهت لباب بهدو ذات هدوها بينما غروب رمت والدها بنظراتها عتب وخرجت..
—————————————————————
دانه لم تستسلم لتهديد عزيزة هي اتت البيت بهدف هدم حياتها الزوجيه مع والدها وسوفا تحقق هدفها..

دانه يمكنها انجاز كل شي في هذا البيت بما ان لديها الشجاعه والاصرار و الثقه بنفسها وخططها الشقيه..

لمت شعرها ورفعته كاملا بمسكه نزلت الدرج بشقاوه مفكره ان تجنن عزيزة جنون اعظم من جنونها..

بهذا الوقت عزيزة كانت بعالم الاسترخاء جالسه على الاريكه بارتياح ناقعه اقدامها بحمام جاكوزي صغير..

خبيرة تجميل فلبينيه تعمل لها بدكير ومناكير لظافر كفها والخبيرة الثانيه تعمل لها حمام زيت لشعرها..

دانه وقفت على الدرج وعينيها تتسعان(مدلعه نفسها عجوز النار صالون منزلي بيتها وانا يخلف الله علي بعز شبابي ماسويت سواتها؟)..

ثم اقتربت بخبث جلست على الاريكه ضعت قدميها على الطاولة امامها وهي تفسر جزء من قميصها..

زفرت بامر متقصد/هيه انتي وياها تعالو دلكو رجولي وسوو للي بدكير ومناكير..

عزيزة الذي كانت مغلقه عينيها تستشعر الترف الذي هي فيه من سمعت صوت دانه المستفز فار دمها..

فتحت عينيها ناظرت بحده غاضبه/انقلي لغرفتك لقوم اقلع عيونك..

دانه لم تعبرها وهي تزفر على الخبيرات بغضب متصنع/وجع انتي وياها ما تسمعون وش اقول تبون اطردكم من بيت ابوي؟..

عزيزة قفزت واقفه بشكل منفعل/تخسين انتي وابوك هذا بيتي وانتم ضيوف عندي عضي على لسانك ترا ادري انك تحاولين توقفين قلبي لكن والله لاوقف قلبك ورتاح منك..

دانه مازالت جالسه برود/صدق لا قالو البيت بيت ابونا والقوم حاربونا؟..

عزيزة هجمت عليها تريد قتلها حقاً/اعلمك القوم وش يبون يسوون..

دانه قفزت هاربه لدرج زفرت بمكر لخبيرات التجميل الذين متصلبات بصدمه/شفتو بعينكم هاذي مجنونه كيف تامنون على نفسكم و تجون تشتغلون عندها؟..

عزيزة صرخت بصوت عال/امنه امنه تعالي..

امنه اتت برعب/نعم عزيزة شفيك؟؟..

عزيزة تاشر على الدرج وعينيها محمره بشده/قفلي عليها بغرفتها لا قسم بالله اقتلها بسررررعه..

امنه انتفضت بذات الرعب/حاظر حاظر بس انتي اهدي اهدي..

دانه تصعد الدرج وهي تهتف بصوت عال متقصد باسم/بلغو الشرطه قبل تذبحني..

امنه تلحق بها بعصبيه/انتي لازم نشوف لك صرفه..

عزيزة تعود وتجلس على الاريكه وهي تخطف انفاسها المتسارعة من شدت القهر والغضب المفاجئ؟..

رفعت عينيها بصدمه لخبيرة التجميل الذي تضب اغراضها وتهتف لصاحبتها/بدنا نمشي يلا..

عزيزة زفرت من بين اسنانها/وش تمشين انتي وهي باقي ماخلصنا شغلنا؟..

خبيرة التجميل تنظر لها بعدم راحه/لازم نمشي ورانا شغل مهم..

عزيزة كاد تبكي من شدة قهرها/اقول تكملين شغلك غصبن عليك انا جايبتكم بفلوس مو بلاش؟..

الجبيرة باصرار/مابدنا نكمل ولا بدنا الحساب..

عزيزة تنظر بها بذهول حقيقي وهي تحمل اغراضها وتتجه الباب وصاحبتها تتبعها!!..

ضربت الارض بقدمها بقوه وجسدها يرتعش وعينيها تطاير من الجنون الذي اصابها من تحت راس دانه..

وقفت رقت الدرج وهي تزفر متوعدة بها/لازم تموت لازم تموت..

امنه من بعد ما اغلقت باب غرفة دانه عليها لم تستجب لصراخها وتوعدها بان تبلغ والدها..

اتجهت الدرج وقفت مرتاعه من منظر عزيزة الذي تكلم نفسها من غير لا تشعر وكانها جنت حقاً!!..

امنه امسكت بها بحنو/عزيزة انتي تعبانه تعالي معي بعطيك الدواء..

عزيزة تدفعها وعينيها متفجرات/بعدي بروح اخنقها بيدي لين تموت لازم تموت..

امنه تهديها بارتباك/حبيبتي عزيزة كذا مايصير توسخين يدك بدم البزر هاذي خبله ماتعرف شي ولا انتي مره كبيره عاقله..

عزيزة تنظر بها بقهر/شفتي وش سوت الصالون هج كامل ماعاد يجون بيتي؟..

امنه بمسايرة لاتخلو من قلق/بيجون غصب عليهم واذا ماجو في صالون احسن منهم..

عزيزة تكلم من بين الدوران/بس هاذي راح تخرب علي بكل مره لازم تموت..

امنه ساندتها وهي تتجه غرفتها/انتي تعبانه لازمك دواء..
————————————————————-
قصر نمر بن فخر..

تحديداً الصاله..

كانت سلطانه جالسه على الاريكة متماسكة باعصابها تنتظر بناتها عندما رات شروق تنزل تتبعها غروب وقفت..

ثم هتفت باستعجال/يلا ماما الحقو على الطابور..

شروق بنبرة طفوليه هادئه/بابا يقول مافي مدرسه اليوم يعني مافيه..

سلطانه نقلت انظارها لغروب بحده/انتي اللي قلتي له ماتبين تدرسين؟..

غروب اجابتها برائه/لا ماقلت له شي بس سلمت عليه وهو حضني وقال مافي دوام..

سلطانه كاد تنفجر فعلاً/طيب ليش وش السبب؟..

شروق هزت كتفيها/مادري ماما..

سلطانه بزفرة حاده/والاختبار طيب؟..

غروب تثاوب برود/يعيدونه عادي والحين بروح انام عند بابا..

سلطانه قبضة عضدها قبل تغادر زفرت بعصبيه/لا كلمتك توقفين وتكلمين معي فاهمه؟..

غروب بوزة بزعل/وانا وش سويت الحين؟..

سلطانه بذات العصبيه/كله من تحت راسك يا سوسه اخرتي اختبارك انتي واختك بدلعك..

قطع كلامها المنفعل نبرة نمر الحديديه/فكي يدها..

سلطانه افلتت عضد غروب وهي تعتدل بوقفتها وعيناها المشتعله تنظر نمر الذي ينزل الدرج بخطوات هادئه ثابته..

لفت انتباهها انه نازل بالبجامة السودا المشدودة على عضلات صدره وكتوفه جز من شعر صدره كانا ظهراً..

نمر لم يستطع التماسك قلبه غير مرتاح لا يريد بناته يغيبان عن عينيه لحضه لذالك لحق بهما فوراً..

لكنه صدم من انفعال سلطانه ونظراته القاتله ومع ذالك صد النظر عنها بجمود وعدم اهتمام..

ثم نادا بامر صارم/شروق غروب تعالو..

شروق نفذت وهي تقترب وتوقف جواره لكن غروب لم تتحرك من مكانها ورثت من سلطانه العناد والشموخ..

نمر رفع حاجبه واحد بحده/تعالي؟..

غروب امسك كف سلطانه بين كفيها الصغيرتين/بروح انام مع ماما..

سلطانه سحبت كفها بخفه رقت الدرج متجاوزة نمر وبناته بكبرياء انثى مخفيه بداخلها عاصفة من الخذلان..

تالمت من رؤيته وجاذبيته ومن نبرته الحديديه ومن قيادته وتحكمه و كل شيء يخصه كل شيء يخصه..
———————————————————
تحياتي(شغف)..