المنتدى :
المنتدى العام للقصص والروايات
رواية زئير النمر لا يقتل الفريسه..للكاتبة ( شغف)..
المقدمة..
اتـــــــــيه وحمل بين كفي جوهرة ثمينه بنسبه للي اهديها لمن شجعتني بلطف كلامها على الاستمرار..
حتى اصبح قلمي له قوة رائعه تاخذكم معي الى عالم اخر لشعركم بان الخيال واقـــــــــع..
روايتي الثالثه اهــــديها لكل وحده منكم بــــــاسمها.
تفضلي فانتي حقاً تـــــــــستحقينها..
(رواية زئير النمر لا يقتل الفريسه)..
…
..
.
الحياة رواية جميله عليك قراءتها حتى النهــــاية فلا تتوقف ابداً عن سطر حزين فقد يكون السطر الذي بعده جميل وتكون النهائه اجـــــــــمل؟؟..
لذالك تفاءلوا فـــ أذا ضاقت الارض بالامنيات فـ سماء ربي لها او ســـــــــع..
رواية زئير النمر لا يقتل الفريسه..
للكاتبة (شـــــــــغف)..
ربما ذاك الزئير لا يقتل ، لكن قد يخلق ضعفًا وانهزامية عظمى داخل النفس ..يظل يتردّد صداه في المسامع..فيهزّ الأوتار ويؤلم أشد الإيلام !!
ربما الزئير يقتل طموحًا أو يُقوّي روحًا؟؟..
~\البارت الاول/~
(ادعو لوالدي برحمه والمغفره)..
ماهو(الحـــــــــب)ان تبقى القلوب على العهد مهما طالت المسافات ومهما مضى من السنوات..
همس بعمق حـــــبه وهيامه ..وتدفق من مشــــاعر الوفا والخلاص ..التي لا حدود لها ..في تلك السنوات الطويـــــلة..
وهو يقف امام المراءه ليتاكد من اناقته وفخامته بنظرات عينياه القـــــاتله الواثــــقة الحــــــاده!!.
عدل نسفة شماغه ثم بخ من عطره الثمين بينما هاتفه موضوع على سبيكر امامه على التواليت..
همسه لا يخلو من عبق رجولته الخــــاصة/انتي محتاجه شي ناقصك شي قولي للي لا تستحين؟..
اجابته بنبرتها التي تسحره هو فقط في صوتها لحن يمزق وريده عشقاً/لاوالله يا قلبي كل شي عندي بس ناقصني شوفتك..
ابتسم بفخامة كفخامتة تماماً/بحدد لنا موعد نلتقي فيه بس لين اخلص كم شغله مهمه عندي..
زفرت بضيق اقرب للعتاب/اشغالك ما تخلص يا نمر لنا سنه ملكين ما زرتني بالبيت الا مرتين مفروض تخصص لنا وقت نشوف بعضنا فيه..
نمر هتف بحنو لا يخلو من نبرته الحازمة/ادري اني مقصر معك وكثير بعد لكن انتي اكثر وحده تعرفين ضغوطات اللي امر فيها القبيلة والشركة والبيت كله ذا على راسي اصبري ترا الصبر زين..
هتفت بذات نبرتها الساحره التي تحيي عروق قلبه/نفذ صبري نمر سنين وانا انتظرك تحدد زواجنا وانت تقول اصبري لين اخلص اشغالي شفت العمر يمشي فينا و شغالك مابعد خلصت؟..
نمر بذات النبرة الحانيه الحازمه/ابشري بالعوض راح نحدد زواجنا بقرب فرصه ولا يهمك..
هي تنهدت ثم همست بشجن بنبرة باسمة/اصلاً انت العوض الجميل بنسبه للي..
نمر ابتسم كذالك بذات الشجن/احبك و بضل احبك لاخر يوم بعمري..
لا سلطه له على قلبه التي نبض لمن اراد ومتى ماراد وكيف ماراد؟؟..
اصدق الحب عندما تحب انساناً ولم تعرف لماذا احببته؟؟..
هي كانت الحبيبه لنمر من ايام المراهقه من صفوف الدراسه المتوسط الثانويه حتى الجامعه..
لفرحة التخرج من ادارة العمال ثم افتتاح شركه خاصه له بكل اوقاته كانت متواجدة هي(الــبـــنـدري)
طيلة السنوات الماضيه كانا نمر ياجل زواجهما لانه هو الرجل القائد للقبيله و للعائله ولشركة من بعد وفاة والده الشيخ فخر..
وهو من تولى تربية معاذ ابن شقيقه الوحيد حاتم الذي (انـــــقتل)قبل عشر سنوات ولم ينكشف القاتل حتى الان؟..
حفظ ورثه تولى مسؤليته منذا كانا عمره ثلاثة عشر عام رباه على القوه والشهامه حتى صنع منه رجـــــل..
يمضي العمر في نمر ويسرق اجمل سنوات حياته وشبابه من غير لا يشعر الى ان وصل 32 سنه..
من بعد ما حقق طموحه وكبر شركته واصبح اسمه اشهر من النار على علم قرر يعطي نفسه حقها..
لذالك حدد موعد زفافة من البندري ابنة عمه صايب التي كانت تنتظر هذا اليوم بلهفه حتى طال صبرها؟..
قبل سبوع من ليلة زفافهما كانا الجميع على استعداد تام لتلك اليلة الذي طال انتظارها و اقترب موعدها..
شعور نمر والبندري لا توصفه الكلمات والعبارات شعور فرحه عميقه بعد الصبر الطويل والحب القديم
لتــــــــكون الصـــــــــــدمة!!..
اتصال ومن ثم استنجاد ومن ثم فقد و فــــــــــراق..
دخل البيت شداد بوجه محتقن بالسواد وعيناه ذابله من اثر الحزن ليفزع قلب نشميه شقيقته الوحيده!!..
التي تجلس بصاله مع ابنتها الوحيده شيخه على قهوة الضحى يدور بينهما حديث ودي عن تجهيزات الزواج!!
في تلك الحضه تماماً كانا نمر ينز الدرج بهيبة قائد فعلاً بعمله وعائلته وتربيته وشخصيته القيادية..
فهو رجل اعتاد على القيادة والمسؤليه بداية شبابه حتى الان في سن الثلاثين من عمره..
لكنه وقف على اخر عتبة من الدرج من راء على ملامح خاله شداد الحزن والضيق وكانه لم يبشر بخير!!!..
سال بحزم بالغ/عسى ماشر يا خالي شفي وجهك؟..
شداد خفت باختناق جداً عميق/عمك صايب يطلبكم الحل..
نمر اقترب بذهول حقيقي زفر بذات الذهول/انت وش تقول عمي مصلي معنا الفجر بالمسجد؟؟..
شداد ضع الشماغ على عينيه وانفجر باكي/صار عليه حادث وهو جايب بنته من الجامعه..
نمر ضع كفيه المتجبرة على كتفي خاله وهزه بعنف من غير لا يشعر سال من بين انفاسه المرعبه/البندري معه وينها ويـــــــــنها؟؟..
شداد فجرها بنبرة قاتله/ماتت..
ليته كان حلما وليسا حقيقه البندري حقاً ماتـــــت!!..
ماتــــــــــــت!!!..
رحلت من الحيــــــاة انتهت قصتها مع نمر قبل ان تبـــــــــداً!!..
زفها لقبرها بالكفن الابيض قبل ان يزفونها له بفستان الزفاف الابيض!!..
لما رايتك قد إدرجت في كفـــــن
مطيباً للمنايا اخر لـلابد..
ايقنت بعدك اني غير باقياً..
وكيف يبقى ذراع زال عن عضــــــد؟؟..
مرت ســـــــــنه..
تتبعها ســــــنه..
تتبعها ســنه..
مضت ثلاث سنوات..
و مازال نمر بصراع مع الحزن والفقد عاجز عن نسيانها كانه نهار الامس خبر وفاتها ويوم دفنها ووداعــــــــها!
تمر عليه الايام صعبه لياليها و شهورها وسنينها صعبه جداً لكنه مازال على قيادته بقبيلته وشركته وعائلته..
كانت ومازالت والدته نشميه تلح عليه بان يتزوج كي ينجب اطفال لابد ان يتجاور فراقها ويبحث عن رزقه؟
لكن نمر يرفض رفض قاطع الارتباط بانثى اخرى يشعر بانه يخون البندري لو تزوج حتى وصل عمره 35 عام؟..
بيني وبينه وصل واسرار وعهود..
مصيونتن ماتدري الناس عنها..
ليلاً جمعني بها عسى ليت ويعود..
يبعد عن النفس الحزينه حزنها..
عسى السحاب اللي معه برق ورعود..
يمطر على دار ولــيفــــــــي سكنها..
الجدة نشميه تنظر نمر نظرات حزن وحنان اجتمعا في قلبها الامومي تلك النظرات مشبعه بالياس والوجع..
مؤلم حينما تراء ابنها الوحيد كان بقلبه شعلة الشغف لكنها تحولة الى رماد من الياس والاحباط..
ومع ذالك همست بغضب حازم/اذا انت عادي عندك تظلم نفسك انا ماهو عادي عندي اشوف ولدي مظلوم وضايع شبابه لا ولد ولا تلد من يبي يشيل الشيخه بعدك؟..
نمر اجابها بحزم بارد/يشيلها ولد حاتم في الخير والبركه..
الجدة نشميه بغضب اعمق/ابوك شيخ ما خلف من العيال الا انت ومعاذ حتى اخوه صايب كل خلفته بنات من يبي ياخذ الشيخه بعد عمر طويل؟؟..
شيخه هتفت بعتاب حازم/يومه علامك نسيتي ولدي شهاب؟..
الجدة نشميه تنظر بها من تحت اهدابها/ولدك شهاب ماهو من عيال فخر انتي اولى منه بالشيخة..
نمر زفر بنبرة حاده مرعبه/مابقى الا هاذي مره تشيخ على الرجال؟..
الجدة نشميه نفذ صبرها حقاً/وليش ما تعرس وتجيب لك ولد يشيل اسمك واسم ابوك قبل لا يفوت الفوت ما ينفع الصوت..
نمر يشعر بلسعة نار تحرق قلبه اخفاه خلف نبرته الحازمه/تدرين اني عايف الحريم ليش اعرس وظلم بنات الناس معي؟..
الجدة نشميه هتفت بوجع عميق لم تستطع منع ظهوره في نبرة صوتها/يا نمر لو الحزن يرجع الميت كان انا اول من رجعت حاتم ضاعت سنين عمري وانا ابكيه..
نمر تالم بشدة عليها لكنه زفر بثقه عميقه/ما تحزنين وراسي يشم الهوا كان الله عطاني عمر لانثر دم القاتل قدام عيونك وغسل حزنك فيه..
الجدة نشميه تنهدت ثم زفرت بحزم جدي/خلنا من القاتل بيجي وياخذ جزاه الحين حنا فيك انت بدور لك من بنات الشيوخ عشان لاجا ولدك عمانه شيوخ و خواله شيوخ..
نمر هتف بصرامة بالغه غير قابله لنقاش/مابي لا بنت شيخ ولا غيره وسكري ذا الموضوع يومه لا عاد اسمعه مره ثانيه..
الجدة نشميه فجرة القنبله التي بداخلها/اسمع عاد والله والبيت اللي بناه الله كان ما تعوذت من الشيطان و اعرست اني لا اغضب عليك لا يوم الدين والله شاهد على ماقول..
صدمته صدمه هائله وهو يقفز بشكل مفاجئ انحنى وقبل ظاهر كفها المجهد المصبوغ بالحنا..
همس بنبرة مؤلمه متضخمه جداً من الالم/لا يومه تكفين لا تجبريني على شين ماطيقه وانتي تدرين اني عمري ما مشيت الا بشور راسي..
الجدة نشميه شد قبضة كفه بكفيها الثنتين وهي تهمس بحرقة/شور راسك هو اللي ضيعك وذا للي يامك قدر ومكانه بقلبك لا تخلي الدنيا تفرقنا عشان وفاك لوحده ميته..
نمر يشعر عروق راسه بدات تنبض بشكل مخيف كما لو كان راسه يوشك على الانفجار لشدة ضغطه..
اعتدل واقف وهو ينفث يأسه والمه تنهد ثم زفر بنبرة ميته لا حياة لها/بتزوج عشانك انتي حتى لو ان مالي خاطر بالحريم..
نعم رضى بزواج من اجل والدته اما النفس كما قال ليسا لها خاطر بعد البندري التي تخلت عنه ورحلت
عزيزة ام معاذ من علمت بان نمر اقتنع بزواج خطر بالها خاطر او ربما طمعت تزوجه شقيقتها الصغرى..
فهي كانت تريد نمر لشقيقتها من زمن طويل وقبل حتى وفاة البندري ولكنها تفشل في كل محولاتها..
والان استطاعت تزرع الفكره في راس الجدة نشميه وهي تخفت بحيله/شرايك يا عمه بسلطانه اختي ما تناسب لنمر؟..
شيخه زفرت بتدخل رافضه الفكره كلياً/لا سلطانه ما تناسبه نمر يبي من بنات الشيوخ..
عزيزة متماسكه قبل تثور عليها/وش قصدك ما حنا بنات شيوخ؟..
الجدة نشميه قطبت جبينها قليلاً كي تركز ثم خفتت بحيره/اي والله سلطانه شفتها بتخرج معاذ مزيونه ماشاءالله عليها بس كانها صغيره عليه؟..
عزيزة تسارعت دقات قلبها بفرحه/لا ماهي صغيرة بينها وبينه سبع سنين ماهن شي..
الجدة نشميه على وشك الاقتناع/لا يامك اكثر حول عشر سنين تهقين توافق؟؟..
عزيزة هتفت بتسرع/اكيد توافق من يحصل لها الشيخ نمر وترفضه افا عليك بس..
شيخه كشرت ملامحها ثم هتفت بتقصد/اخاف انها مثلك يا اختها لو مات نمر تروح تزوج بعده؟؟..
عزيزة عطتها نظره قارصه بينما الجدة نشميه زفرت بجزع/بعيد الشر عن وليدي عسى عمره طويل..
ثم ردفت بحماس/اسمعي يا عزيزة كلميها اليوم عجلي قبل نمر يغير رايه..
الجدة نشمية تاملت بان نمر لو تزوج سلطانه سوفا ينسى البندري و طوايفها لانها قمة بالجمـــــــــال..
عزيزة بدات تلح على شقيقتها الوحيده سلطانه بان توافق على نمر رجل بمكانته بالمجتمع لا يفوت..
سلطانه كانت صغيرة عمرها 24 سنه لذالك متردده يفرق العمر بينهما 10 سنين و رجل عاشق لبنت عمه
لكن كثر الدق يفك اللحام وهذا ماحدث بضبط عزيزة استطاعت تقنعها حتى وافقت سلطانه وتم الزواج..
نمر حينما راء جمالها الساخط انفعل حقاً لكنه كتم ذالك امامها حتى اتى الصباح وانفجر يعاتب والدته
تتوقعين ان فتنتها تنسيني البندري لا والذي خلق النفس من النفس بانها ستبقى محفوره بالقلب حتى الممات!!..
(مرور ســـــــــنه)..
سلطانه انجبت لنمر بنت كالقمر كانا سوفا يسميها البندري لولا بانها رفضت رفض قاطع ان لايفعل
ولو فعل ذالك سوفا ترمي عليه ابنته و تغادر بيت والدها وهو احترم امومتها لايريد كسرها..
فهمي من انجبتها من بين احشائها شاركتها نبضها ودمها لذالك اسمتها(شـــــــــروق)..
(بعد ســــنه ثانيه)
انجبت سلطانه له بنت اخرى اسمتها(غــــروب)لم يطلب نمر بان يسميها البندري مراعي مشاعرها؟؟
اوربما يكون السبب تهديدها من قبل بانها سوفا تغادر من حياته يخشى ذالك هذا قد يكون حبا ام تملك؟؟..
قد ينعم الله بالبلوى وان عظمت..
و يبتلى الله بعض القوم بالنعم..
بدا نمر يلح عليها بان تحمل يريد اخ لبناته لكنها ترفض حتى مرت سنه ثالثه حملت وانجبت له ولد
اسماه (شامــــخ)كما كان يدعيه والده من الصغر ابو شامخ هيبته و صفاته فيها من الشموخ والكبرياء..
كل مايكبر شامخ شهر يكبر غلاه ملى على نمر حياته واستطاع بطفولته ان ينسيه ذكرياته مع البندري فعلاً..
حينما كمل شامخ السنه بدا يخطي خطواته الاولى كانا طفلا وسيما كل عين تراه لابد ان تذكر الله عنــــه..
اليوم الخميس اجتمعان عائلة الفخر كامله صغيراً وكبيراً بشاليه على مناسبة ترقية معاذ لملازم اول..
الكل مبتهج وسعيد في تلك اليوم التي سيصبح ذكرى مؤلمه تنسخ بذاكره واصعب تاريخ سيمر على الجميع
"قسم النساء"
يصرخان شروق وغروب بنبرة واحده مرتعشه/ماما مــــامـــــا الحقي على شامخ..
اتت سلطانه بخطوات سريعه ونظرات مرعبه والجده نشميه و شيخه وعزيزة يالحقان بها ذات الرعب!!..
صرخت هي بتسال مرتعش/وينه وينه؟؟..
شروق اشرت على المسبح من بين شهقاتها/يمشي وطاح بالمسبح..
سلطانه صرخت بصوت عال كانت سوفا ترتمي بالمسبح العميق لولا بان عزيزة امسكتها بشده..
وهي تصرخ خوفا عليها/نادو العيال بسرعه..
نمر اتى راكض يرتعش كالمجنون من علم بان شامخ ارتمى بالمسبح يلحق به معاذ بخطوات سريعه..
الجده نشميه ترجف من شدة بكاها/الحق عليه يا نمر كاد ربي ورحمته يعوده لحضنك اللي عاد يوسف لحضن يعقوب..
نمر ارتمى بالمسبح بثوبه اخرج ابنه فلذت كبده كانا يحمله بين يديه وفي القلب حرقه لا تنقضي حرقه لاتموت..
شعورة بالياس والوجع والحسره على من رحلو تحت الثرى والده وشقيقه وحبيبته والان يرحل ابنه الوحيد..
(فو الله ان الفقد مؤلم وان موت احبابي ترك اثراً عميقاً في صدري لا يزول)..
معاذ اقترب وحمل شامخ من يدين عمه وهو ينهت باستعجال حازم/بوديه المستشفى..
نمر هتف بنبره مؤلمه قاسيه حد الممات/مايمدي الولد مــــــات..
مـــــــــات!!..
مـــــــــات!!..
تلك الصرخات كانت من صميم قلب سلطانه التي تنتحب بهستريه و تلطم وجها/لالا يومه ولدي مات لالا ولدي ماااتت..
نمر استدار لها بغضب جنوني وقسوه غريبه مخيفه ليصرخ عليها بشدة/صاحت عليك الاسعاف انتي السبب انتي وحده مثلك حرام تكون ام طاقتها سوالف داخل و ولدي يموت بالمسبح يا حيوانه يا قذره..
اقترب كي يضربها لكن معاذ كان اسرع شد عضده بقوه وهو مازال يحمل شامخ بيده الاخرى/اهدا يا ابو شامخ تعوذ من الشيطان هذا قضا الله وقدره..
الجدة نشميه تقدم وتضع كفيها على صدره برحمة وعينيها تذرف الدمع بنكسار/استعذ بالله من الشيطان لا تعترض على قضا ربك هذا المكتوب لك بالحياه..
نمر رغم الفقد والحزن كانا يقف بجبروت وهو ينظر في سلطانه المنهارة بالبكا الشديد على صدر عزيزة..
هتف بحده وقسوه غير قابل لتراجع/والله و اللي خذا شامخ ما تجلسن عندي دقيقه انتي طا..
الجدة نشميه ضعت كفها على فمه لتصمته وهي تصرخ باكيه/والله وهذا انا حلفت ماتقولها ما تقولها لا تبعدها عن بنياتها كفايه فراق ولدها خاف ربك يا نمر..
نمر ابعد كف والدته بعنف وهو يصرخ بانفعال لايخلو من قسوته/عشان حلفك وعشان بناتي ماني مطلقها لكن اشهدي ويشهد الجميع يحرم علي لـــــــــمسها وعيشها ومــــــلحها..
—————————————————————-
بعد مرور اربع سنين..
بوقتنا الحالـــــــي…
تنزل الدرج رافعه نحرها وانفها بشموخ واعتزاز الاربع السنين الذي مرت ماكانت الا اربعين سنه بنسبه لها؟..
كبرت بها فكرياً و عقلياً علمتها الحياة ان الانكسار لم يدوما يوماً وان الحياة تطلب القوه حتى لو كانت تصنع
كملت دارستها قانون لكنها لم تفتح مكتب كل همها بهاذي الحياة هي شروق و غروب فقط لا غــــــير..
انفتح الباب بفخامة زجاجيه ليدخل نمر بطوله الفارع وجسده الاستثنائي هيبه وصرامة قوه وظلم وقسوه..
نمـــــر اسم على مسمى رائحه عطره الثمين التي يسبق حضوره بكل مكان تفوح منه رائحة العود..
من لمح وجودها واقفه على الدرج امامه صد وجهه بسرعه هتف بالسلام البارد من غير لا ينظر بها..
سلطانه ردت بذات البرود وهي ترفع راسها لمستوى طوله العالي وعينيها تخطف جز من ملامحه..
تكبر به السنين مجرد رقم ولم يتغير به شيء مازال وسيما انيقا مثقفا واثقا حادا قسيـــــــــاً..
نمر هتف بصوت جهوري بينما هو يتجاوزها مع الدرج/قولي للخدم يجهزون القهوه بصاله لمعاذ وشهاب..
سلطانه اغلقت عينيها بصمت يقتلها صده وتمسكه بالهجر اربع سنين مرت وكل واحد منهما ينام بغرفه؟
لم يجتمعان حتى على وجبه مشتركه لم تتذكر يوماً بانه نظر لها بشكل مباشر حتى لو كانا بالغلط..
لم تذكر يوماً بانه سالها عن حالها من بعد وفاة ابنها شامخ وهي تعالج عن الصدمه حتى تجاوزت المرض..
—————————————————————-
بعد الغدا..
قصر نمر بن فخر..
الجدة نشميه تهتف بتسال/شيخه يامك جبتي للي من السوق الاغراض اللي وصيتك عليها؟..
شيخه هتفت بتقدير/ايه يومه قلت للخدامه تحطهن بغرفتك..
نمر هتف بحزم بالغ/ماتبين تغيرين رايك وتتركين الديره وشقاها وتجلسين عندنا بيتك؟..
الجدة نشميه تنهد بحنين/لا بالله بيتي بالديره ما بها شقى ولا ني مخليتها مدام راس شداد حي فيها..
شهاب زفر بسخريه/يا جدة اخوك شداد شهبن رموشه من غبرة الديره اتركيه وتعالي اسكني المدينه..
الجدة نشميه عطته نظره قارصه/شداد جدك يا قليل الادب يا عديم الحساس..
شهاب تافف بضيق/ليتني ساكت..
الجدة نشميه تنحره بغبنه/من طلقت الظبي وقهرت ابوك وقلبي ماهو راضي عليك تطلقت عظامك قل امين..
معاذ كتم ضحكته وهو يرا تعابير وجهه شهاب كيف تغيرت بقرف ثم زفر بغرور/تبوني غصب اتزوج وحده قرويه حتى شهاده مامعها وانا للي مكانه بالمجتمع؟..
الجدة نشميه مطت برقعها بدهشة/من زين مكانتك مغير لعب كوره وتصور اللي تسمونه علانات وسفر وقلة سنع..
شيخه زفرت بضيق/يومه الله هداك الزواج ماهو غصب الظبي يجيها نصيبها..
الجده نشميه هتفت بحده/ماقوى راس ولدك الا طبوعك الخايسه..
نمر بتدخل بنبرة صارمة/امي معها حق انت يا شهاب طلقتها ومابعد شفتها يمكن تكون مناسبه فكرياً لك..
شهاب كشر ملامحه بذات القرف/يا خالي البنت جاهله ماتعرف شي تبيها تناسب فكري انا؟..
معاذ ناظر به بنصف عين/الجهل والله براسك..
شهاب هتف بضيق شديد/رجا لاعاد احد يتدخل بحياتي كفايه علي حن ابوي اجيكم ابي اغير نفسيتي شوي..
الجدة نشميه زفرت بغيظ/ما ينلام ابوك لمنه جا لديرة مايقدر يحط عينه بعين شداد من الحرج اجل رجال براسه عقل يطلق بنت عمه وهو مابعد دخل عليها؟؟..
شهاب تنهد بضيق اعمق/مابيها ليش ادخل عليها وظلمها معي الله يرزقها باللي يستحقها..
نمر ينهى النقاش بصرامته المعتادة/خلاص هو ادرى بحياته كلن ياخذ نصيبه..
الجدة نشمية وجهت نظرها وكلامها لمعاذ بزفرة/وين امك ماتجي تسلم علي قبل احدر لديره هي ما تعرف الاصول؟؟..
معاذ بحزم هادئ/مادري عنها ما شفتها اليوم..
الجدة نشميه صغرت عينيها لتبين تجاعيدها/ليش وين هي ذالفه مع زوجها اللي خذته من بعد حاتم تحسبه بغنيها عنه؟؟..
معاذ بتماسك/مادري عنها..
الجدة نشمية زفرت بقهر/وانت ورا ما تسيري علي بديرة كبرت عزومك واشتد حيلك ونسيت الحضن اللي رباك بعد ما تزوجت امك وتركتك؟..
معاذ نظر بها بغموض/مانسيت يا جده ولا راح انسى الام هي اللي تربي ماهو اللي تجيب..
الجدة نشميه تنهدت ثم اعتذرت بحرج/وانا جدتك لا تلومني ولدي مات مغدور وامك ما همها الا العرس قهرتني فوق قهري الله يقهر العدو..
معاذ ينهض واقف بذات التماسك لا يريد ان يسمع اكثر حتى لا ينفجر هتف بثبات/بطلع اسلم على خالتي عن اذنكم..
نمر كان يتبعه بنظراته حتى رقى الدرج التفت لوالدته هتف بعتاب حازم/ليش تحرجينه ماتدرين ان هذا الموضوع بذات يوجع معاذ؟؟..
الجدة نشميه هتفت بوجيعه/يامك من حر ما بجوفي ولا سواتها تسويها وحده صايمه مصليه تقهر ولدها وهو بسن المراهقه تروح تزوج من بعد عدتها بعذر انها تبي عيال والشيب مالي راسها؟..
نمر بحده صارمه/تزوج تطلق ماعلينا منها اهم شي ولدنا حنا من ربيناه و كبرناه هي قلعتها..
شيخه تهز بوزها بستهزاء/وليتها خذت واحد فيه خير الا طمعان بحلالها وحلال ولدها لكن زين ماسويت فيهم يا نمر وقفت حلاله عندك لين كبر وسلمته بيده..
الجدة نشميه انحدر صوتها بذات الوجيعه/عشر سنين والقاتل عايش حياته ولا ندري ارضه من سماه دم ولدي راح هدر..
نمر انتفض بشده مرعبه/من قال انه راح هدر يومه انا ماخليت محامي على وجه الارض ما وكلته وماخليت محكمه مارفعت فيها قضيه ماخليت اعلان مانزلته حتى اني تنازلت عن ملايين لمن بس يعرفني على القاتل بس ماحد يعرف شي وانا ماني ظالم الناس..
نشميه تنهد بالم من صميم قلبها/اه بس يامن يسلمه بيدي والله ما يهنى للي قلب ولا تنام للي عين لين اشوف راسه ينقص بحد السيف..
نمر بثقه صارمة/طال الزمن ولا قصر بيجي يوم ونعرفه مايضيع حق وراه مطالب يا ام حاتم..
شهاب كانا يستمع بصمت موجعه هاذي الذكرى للجميع قتل حاتم لم يكن الا سهم اخترق قلوب عائلة الفخر..
يتذكر انهيار وصراخ صديق عمره معاذ حينما اتاه خبر وفاة والده مقتول توقع بانه انجن حقاً من الفجيعه..
شهور قضائها بحالة اكتئاب لو ما رحمة الله وقوة عزم نمر وتعامله معه بسياسه حتى تشافى لعاش مجنون..
يتذكر بان نمر اصيب بصدمه بشبابه ضاعت سنين عمر وهو يركض بالمحاكم يطالب برقبة القاتل..
حتى انه اصبح كا المجرم ضع رقابة ودفع ملايين ليظهر القاتل لكنه لم يظهر لم يظهر حتى الان!؟؟
———————————————————-
الطابق الثاني..
سلطانه ابتسمت ابتسامه فاتنه من رات معاذ يقترب لها برجولته المتالقه وملامحه الوسيمة الغامضه..
وقفت مرحبه/هلا وغلا حي الله معاذ..
معاذ اقترب سلم عليها بثقل/الله يبقيك اخبارك يا عيوني..
سلطانه تجلس وهو يجلس جوارها/الحمدلله طيبه شلون امك اتصل عليها من اليوم ماترد؟؟..
معاذ تغيرت ملامحه بضيق/امي شكلها تعيش مراهقه متاخره اخذ رجلها ومسافره لدبي..
سلطانه قطبت جبينها/غريبه ماقالت للي؟؟..
معاذ تنهد بياس/حتى انا ماقالت للي مريت البيت بسلم عليها وامنه هي من علمتني..
سلطانه تظر به بحنو/لا تضايق نفسك يمكن يكون عندها شغل مهم وخذته معها محرم..
معاذ يرص على اسنانه كاد يحطمها/اي شغل واي بطيخ الا من خذت هالرجال وهي مضيعه عقلها لكن وش اقدر اسوي امي ومضطر اني اعض على رضمه واسكت حتى جدتي تحت تسال عنها قدام عمي نمر وعمتي شيخه خجلت لاقول لهم مسافره..
سلطانه تمزق قلبها من تضخم القهر الذي يكتمه معاذ بصدره مع احمرار وجهه وبروز عروق عنقه..
طبطبت على كتفه العريض بحزم هادئ/معاذ اخر من تفكر فيه نمر وشيخه امك ترا ما عاشت مع ابوك ولا يوم مرتاحه من حقها تعيش باقي عمرها بسعاده..
معاذ ناظر لها بحده/ليش ابوي وش كان مقصر معها فيه مكرمها بيت وفلوس وخدم وحشم وسواق خاص فيها لكنها ماتبي كل هذا تبي السفر والمظاهر..
سلطانه بذات الحده/ابوك اعطاها مال صح لكنه مقصر بمشاعره كان كل شهر يسافر يتزوج ويطلق وهي صابره وساكته..
معاذ بحزم شديد/تزوج بسر ما جابها على راسها امام الناس اقل شي احترم مكانتها..
سلطانه بوجع عميق/وش دارك ترا انا وانت بعمر بعض كنا صغار ما عشنا اللي هي عاشته يمكن يكون ابوك ظالمها؟..
معاذ زفر بصرامة/اي ظلم واي خرابيط هي اللي ظلمت نفسها وظلمتنا كلنا معها..
سلطانه تنظر به بياس/هذا انتم يا عيال فخر القسوه والظلم تمشي بعروقكم ممشى الدم ما تعترفون بخطاكم ابد..
معاذ رفع حاجبيه بتعجب/معقوله هذا كلامك يا سلطانه انا كذا؟؟..
سلطانه تهتف بثقه/للاسف ايه حتى انت خذيت اطباعهم ماتبي تعذر امك تشوف ان ابوك هو الرجل المثالي..
معاذ مازال ينظر بها خفت بتقصد/الظاهر ان عمي نمر شوه صورة عيال فخر كلهم بعينك؟؟..
سلطانه رفعت حاجبها بكبرياء/هذي صورتكم بعيني وبعين غيري حتى عمتي نشميه كانت ومازالت تقول نفس الكلام فخر وعياله من جدهم لين احفادهم قاسين وظالمين..
معاذ ابتسم رغماً عنه/تبين امردغ عمي نمر شكله رافع ضغطك اليوم؟..
سلطانه تنهد بضيق/اصلاً مابيني وبينه اي نقاش عشان يرفع ضغطي..
معاذ صغر عينيه/للحين هو هاجرك؟..
سلطانه تنظر له بغرور/هجره على نفسه ماهو علي انا جالسه لتربية بناتي فقط..
————————————————————-
عائلة المرحوم الجد فخر زوجته الجدة نشميه..
الابن الاول ..
حاتم توفى من عشر سنين مقتول زوجته عزيزة :: ولدهم الوحيد معاذ عمره 30 سنه ضابط ملازم اول وسيم جداً جذاب الملامح شخصيته غامضه ينطبق عليه هذا المثل(اتق شر الحليم إذا غضب واتق صبر الحكيم إذا نفذ)..
:::::::::::؛؛؛
البنت الثانيه..
شيخه عمرها 48 سنه متزوجه محمد ابن خالها شداد..الولد شهاب عمره 30 سنه..حاد الملامح ..كانا ضابط مع معاذ لكنه ترك وضيفته من اجل الشهره.. لاعب كوره مشهور بتواصل الاجتماعي..شخصيته متكبر مغرور جداً..
البنت شهد عمرها عشر سنين انجبتها شيخه انابيب..
:::::::::؛؛؛؛؛؛؛
الابن الثالث..
نمر عمره 45 سنه..ملامحه وسيمه قاتله..شخصيته عزيمه واصرار حتى ولو حاولة الحياة والفراق كسره لكنه مازال بقوته وجبروته..يتميز بجسد استثنائي..هذا صفه بجميع عيال الفخر مميزين بجسادهم الرياضيه..
الزوجه سلطانه عمرها 33 سنه..جميله جمال حد الثماله جمال فاتن رائع..لون بشرتها بيضا يدخلها توريد..شعرها اسود يوصل لنصف ظهرها..عينيها قاتله..انفها شامخ..شفتيها مزمومة..فكها مسطر.. منذا كانت صغيره جسدها طاغي بالانوثه والاثاره..سلطانه مميزه بصفاتها شخصيتها شامخه واثقه ساخطه..فراق ابنها وهجر زوجها وتحملها لذنب ليسا ذنبها ماكان الا وجع خفي لم تظهره امام الناس..
بناتها شروق عمر 9 سنين طفلة جميلة هادئه ناعمه
غروب 8 سنين طفلة جميله شقيه وذكيه..
————————————————————
بعد صلاة العصر..
المول..
شهاب يدخل بحضور واطلاله استثنائيه يخطي بكبرياء وغرور متالق بثوب الابيض مفصل على جسده الرياضي
وعضلاته البارزه تفصيلاً شماغه ناسفها بدقه يلمع بنظافه المسباح و الكبك والقلم علامة ماركه معروفه.
واقف مع مالك براند للعطور يتحدث معه ثم يشتغل بهاتفه كي يصور اعلان لم يلتفت للعالم الذي تراقبه..
كانت عيني الفتيات تراقبه بعجاب والبعض تصوره من بعيد شهاب حلم كل فتاة شهره و مال مكانه وسامه..
فتاة هزت كتف صديقتها/هذا المشهور شهاب الفخر؟؟..
الثانيه تنظر له بتفحص/ايه هو يجنن بطبيعه ياربي شوفي الطول والجسم والملامح تاخذ العقل..
الاولى زفرت بغبنه/بس واضح مغرور شوفي كيف يمشي وكن الميدان لابوه؟؟..
الثانيه تنهد بعمق/من عذره مال وسامه وشهره وفوق على هذا كله ولد شيوخ..
الاولى رفعت يديها ودعت بتمثيل/الله يرزقك واحد مثله..
الثانيه تنهد بجرائه/ابيه هو بكبره ياربي يجنن..
الحديث العفوي الذي دار بينهما وصل لمسامع فتاة كانت تنظر لشهاب بعيني دامعه من تحت النقاب..
تراقب تحركاته وهو يرفع الهاتف ويصور سناب ويتكلم للمتابعين لم يعبر وجود الناس حوله من شدة تكبره..
انتفضت حينما رن هاتفها شدة لها نفس عميق وهتفت باختناق/هلا جدي؟..
الجد شداد يستعجلها بحنو/يابوك تاخرتي من اليوم انتظرك برا اخلصي علي بنحدر الديرة قبل اليل..
بلعت ريقها ثم هتفت بذات الاختناق/ابشر هذاني جايه..
خذت نظره اخيره على شهاب وخرجت من المول وهي تكتم بكاها كي لا يتغير صوتها وتحمر عيناها..
ويلاحظ جدها ومن ثم يستلمها تحقيق هل احد تحرش بك ما ابكاك لا عاد تخرجين اماكن عامه؟..
فهو يخاف على صغر سنها و جمالها الواضح حتى من خلف ستارة العبايه السودا من الاذى والاستغلال..
———————————————————-
معاذ كان جالس بسياره بالمقعد الامامي ينتظر شهاب يخلص علانه بينما عقله مشغولاً جداً في سلطانه..
راء بعينيها بريق حزن مهما اخفتها عن الجميع لم تخفي عنه فهو اقرب واحد لها حتى بالعمر بينهما سنه
كبرت معه منذا الصغر وكانها شقيقته وليست خالته ومن ثم تزوجت عمه نمر لتكمل باقي سنها قريبه له..
غير راض بما يفعله عمه نمر مع سلطانه فهي صغيرة سن ومن حقها تعيش معه حالها حال اي زوجه..
لماذا هذا الظلم حملها ذنب وفاة شامخ وهي برئه منه صدها و هجرها جعلها في بيته مربيه لبناته فقط؟
قطع حبل افكاره المؤلمه فتح باب السياره ليركب شهاب بمقعد السائق بتافف وهو يشتغل بهاتفه..
معاذ التفت عليه بتسال/خلصت؟؟..
شهاب يرد وعينيه تنظر بالهاتف/اي بس بنزل كم صوره ورتاح..
معاذ قطب بغرابه/انا مادري وش لك بذا الشغل وانت عندك خير مانت بحاجة للمال؟؟..
شهاب ضع الهاتف ربط حزام الامان هتف بحزم/ماهو قصة مال معاذ التصوير ولعب الكوره هوايتي من وانا صغير تعبت حتى وصلت لهذا المستوى..
معاذ زفر بحزم اشد/انت ادرى بس احسك ترهق نفسك بعض الاحيان مباره والبعض سفرة تصوير ماتفضى حتى يوم؟..
شهاب حرك السياره هتف بذات الحزم/يا رجال خلني اتعب مادمت شباب احسن من اكبر وادفن هواياتي..
معاذ اعتدل بجلسته ثم زفر بامر هادئ/ودنا مكان نتقهو فيه صدع راسي وانا انتظرك تخلص من اليوم..
شهاب ابتسم بخبث/تامر امر بوديك احلى كوفي الان..
معاذ ناظر به بنصف عين/لايكون علان بعد؟؟..
شهاب انفجر ضاحك/انت وش عليك ماتبي قهوه خلاص خلك ساكت..
معاذ هز راسه بياس/يا ذا اليل اللي مايبي يخلص بعدين لاصار عندك علان لا عاد تاخذني معك..
———————————————————
بيوت شعبيه متفرقه جدرانها ملخبطه بالعبارات المجهوله بينهما عشش غنم وخلفهما مزارع ونخل..
مجموعه من الصبيان يلعبان كوره ومجموعه اخرى يلعبان غميمه ونسا محتشمات بسواد يتجولان..
حمام ابيض واسود يحلق بوسط السما لم يكن الوقت ليلا ولم يكن نهار مابين المغرب والعصر..
انزلت من سيارة جدها الددسن وهي تغلق الباب تحمل بيدها كيس بداخله اغراض اشترتها من المول..
دخلت حوش البيت الممتد بطوله وعرضه ارضه من الرمال الناعم وقفت في وسطه بذهول عقل..
انزلت شيلتها ونقابها بيد واحده تركت عباتها تنزل على كتفيها اطراف شعرها العنابي تطاير مع عبث الهواء..
امطرت عينيها الدمع لتحمر خديها وانفها فوراً من شدت بياضها وشفافيته بشرتها..
جلست على حجر كان مرصوص بزوايا الحوش رفعت راسها بالم عميق تنظر لسما الزرقا يحيطها الصفا..
خفتت باختناق موجع حاد حاد يجتاح روحها/الله يحرق قلبك يا شهاب مثل ماحرقت قلبي عايش حياتك من بعد ما هدمت حياتي خليت الناس كلها تكلم علي..
تتذكر قبل ثلاث شهور يوم انكسارها حينما اتى عمها محمد معتذراً لايعلم بان العذر لا يجبر الكسر..
ولا يضمد الجرح اتى بعد ست شهور من ملكتها على شهاب يحمل بين يديه ورقة بيضاء صدمها بما قال!!..
بنبرة موجعه لا تخلو من الحرج الشديد/شهاب طلق الظبي وسافر والله اني مادريت عنه ولا كان قصيت لسانه الله يقص وجهه كانه قص وجهي قدامك..
الجد شداد انتفض بغضب مرعب/انت صاحي بالكلام اللي تقوله طلقها وهو مابعد شافها؟..
محمد بذات الحرج وعينيه تلمعان/له سبوع مطلق بس ماقدرت اجي يابوي وعلمك مالي وجهه لكن شهاب تاخر ادق عليه جواله مقفل خفت انك تدري من الناس وتزعل علي وانا مالي دخل..
شداد وقف بغضب اعمق/الا لك دخل ماعرفت تربي ولدك السفيه يرخص بنت عمه ويطلقها تطلقت يديه..
ثم ردف بذات الغضب العميق/اسمع يا محمد كل شي اسكت عنه الا الظبي هاذي امانه احمد اخوك برقبتي ان ماجا شهاب وصلح خطاه ورجعها تراي بري منك ومنه ليوم الدين..
محمد ارتمى امام اقدام والده برجا بينما عيناه تذرف الدمع/تكفى يابوي لا تحملني الحمل الثقيل انا ولدك لحمك ودمك رضاك عندي بدنيا كلها..
الظبي خرجت لهما وهي تهتف بنبرة ثابته تخفي خلفها انكسارها والمها/ياجدي انا اللي لحين مابي شهاب والله لو مايبقى من رجال الدنيا الا هو ماخذته كاني امانه برقبتك لا ترخصني للي ارخصني..
الجد شداد تنهد بوجع/لاحول ولاقوة الا بالله..
ثم انحنى بحنو وهو يسند محمد كي يقف ويردف بحزم/قم يابوك قم وعلم ولدك لا تشوفه عيني ولا ترا والله وبعالي سماه لقطع راسه قدام العربان..
نعود للوقت الحالي..
كانت الظبي سارحه بفكارها وعيناها تمطر الدمع لم تنتبه لمرور الوقت وغايب الشمس وظهور القمر..
حتى انفتح الباب لتدخل نشميه مهلله/لا له الا الله محمد رسول الله..
الظبي وقفت بتوتر وهي تمسح وجها بسرعه بطرف كم عباتها من اثر الدمع وتقدم مرحبه بجدتها..
ببتسامه مغصوبه/يالله حيها زين جيتي من المدينه؟؟..
الجدة نشميه تحامل على عصاتها/الله يبقيك تعالي سلمي علي ودخلي داخل معاذ بينزل غريضاتي..
الظبي قبلة راسها ومن ثم انحنت وقبلة ظاهر كفها بتقدير/الحمدلله على السلامه نورتي بيتك..
الجدة نشميه شدت على كفها الصغير بحنو/الله ينور عليك يا بنيتي شلون جدك عساه مايونس شي؟؟..
الظبي خفتت بعذوبه/لا بالله مثل الحصان وداني المدينه اخذ اغراضي وتو حطني وراح لنياقه يبي يلعفهن..
الجدة نشميه تنظر وجها المحمر بتركيز/الله يطول عمره وترا حتى انا جبت لك مقاضي معي..
قطع عليهما تنحنح رجولي فخم/احم احم يا اهل الدار..
الجدة نشميه تنظر في الظبي الذي تبتعد راكضه لداخل البيت وهي تنادي/تعال يا معاذ ما قدامك احد..
معاذ دخل يحمل بيديه شنطتين هتف بتسال/احطهن بغرفتك؟..
الجدة نشميه هزت راسها بموده/ايه الله لا يخليني منك..
معاذ اتجه غرفتها انزل شنطها وعاد لها هتف بحزم مهتم/تامريني على شي يا جدة قبل ارجع؟..
الجدة نشميه بذات الموده/الله يحفظك انتبه من الطريق بذا اليل ودي انك امرحت والصباح مع فجة الضو تمشي..
معاذ هتف بحزم اعمق/من الصباح عندي شغل بالشركة الحين بروح الدوانيه اسلم على خالي شداد قبل امشي..
الحدة نشميه بحنو خالص/شداد عند النياق تقول بنته راح يعشيهن ما يجي الا متاخر بس اسر يامك قبل اليل..
معاذ قبل راسها/يلا اجل تمسي على خير..
—————————————————————-
الساعه العاشرة ليلاً…
سلطانه جالسه على الاريكه تراجع الواجبات مع بناتها شروق تجلس على الارض متكيه على الطاوله وتحل..
غروب متمدده على بطنها فوق الاريكه وساقيها تلعب بالهواء وكذالك تكتب حلها بانسجام..
اتت العامله هتفت بهدو/بابا نمر يبغى شروق وغروب بغرفته..
سلطانه خفتت باهتمام/متى طلع من مكتبه؟؟..
الخادمه بتجاوب/الان طلع من مكتب كلام خلي شروق غروب يجي غرفه..
سلطانه شدة لها نفس طويل/زين الحين يطلعون له..
شروق ناظرت والدتها بهدؤ/انا خلصت حلي بروح لبابا..
سلطانه بحزم هادئ/ضبي اغراضك وانتظري غروب تخلص وطلعو سوى..
غروب تعتدل جالسه وهي تحمل كتابها/بروح بابا يحل معي..
سلطانه هتفت باسمه/كذا غش ماما لازم انتي تحلينه..
غروب تبتعد لدرج بشقاوه/بابا يحله..
شروق تنهض واقفه ضبت كتبها داخل الشنطه حملتها على كتفها ورقت الدرج بخطواتها الهادئه..
سلطانه اغلقت عيناها فهي حقاً اشتاقت له و ليسا المره الاولى بل هي عادتها في كل يوم ولكن بصمت..
نفضت افكارها مع رنين هاتفها حملته وردت بهجوم متقصد/حي الله القاطعه لو ما اتصلتي احسن؟..
عزيزة تضحك بمياعه/بسم الله الرحمن الرحيم وشفيك علي؟؟..
سلطانه هتفت بغيظ/كيف تسافرين ولا تكلفين على نفسك و تقولين للي ولا حتى لولدك؟..
عزيزة هتفت بحزم/السفره كلها جت فجئه وبعدين انتي الصباح تكونين نايمه ومعاذ له يومين ما مر علي كيف بقول له؟؟..
سلطانه بزفرة خافته/في جوال يا عزيزة من المفروض تتصلين عليه مهما كان هو ولدك وحقه عليك اكبر من حق راشد رجلك..
عزيزة تنهد بضيق/شكى لك؟؟..
سلطانه بذات الزفرة/تعرفين معاذ ماهو من طبعه الشكاوي لكن عمتي نشميه احرجته اليوم وهي تسال عنك و عتبانه انك ماجيتي تسلمين عليها قبل تروح الديره..
عزيزة كشرت ملامحها/وعمتي نشميه ما تخلص من الشرهات اعوذبالله..
سلطانه بحزم رقيق/تشرهه لانها تحبنا و لها حق علينا لا تنسين انها جدة ولدك..
عزيزة زفرت بكراهيه/تحبك انتي ايه اما انا ما تطيقني على وجه الاوض تقل اكله عشاها يا دافع؟..
سلطانه ابتسمت بياس/ما تحبك من طبعوك الله يصلحك المهم كلمي ولدك لا تزيدين الجفا بينكم..
عزيزة تنهد بوجع/ولدي يعرف اني مريضة قلب ومن المفروض يمر علي بدل ذا الهجر يومين ماشفته كرهو عيال فخر فيني..
سلطانه قطبت بغرابه/غريبه يومين ما جاك وين ينام طيب؟..
عزيزة زفرت بضيق/المره الاخيره اللي جاني فيها يقول انه شرا له منتجع هو ولد شيخوه يمكن نام فيها..
سلطانه اتسعت عينيها/معاذ و شهاب شارين منتجع ماحد قال للي؟؟..
عزيزة بقهر شديد/واللي مختاره لهم نمر زوجك اللي مفروض هو يقول لك..
سلطانه تنهدت ثم زفرت بشده/نمر حتى موضوع يخص بناته ما يكلمني يرسل الخدم علي وانتي تبينه يقول للي موضوع يخص معاذ وشهاب؟..
عزيزة بمكر نسائي/والله لو كنت مكانك ما اجلس عنده ساعه سلطانه انتي الف واحد يتمناك تدفنين شبابك مع واحد هاجرك وقدام اهله بعد؟..
سلطانه بحزم انوثي/شبابي ادفنه مع بناتي ماهو معه يا عزيزة وبعدين انتي قبلي صبرتي على ضيم حاتم..
عزيزة خفتت بجديه/صبرت عليه لاني ماني بمستوى جمالك ولاني ضامنه الزواج بعده مثلك..
سلطانه رفعت حاجبيها بتعجب/ليش وانا الحين ضامنه اني بتزوج بعد طلاقي من نمر؟؟..
عزيزة بثقه عميقه/وبتاخذين عطران الشوارب بس تطلقي وخلي كل شي علي..
سلطانه زفرت باستنكار/انتي صاحيه تبين طلقيني من نمر اللي زوجتيني ياه على شورك شايفتني لعبه بيدك تحركينها على كيفك؟..
عزيزة خفتت بحنو/والله كنت ومازلت ابي مصلحتك يا الخبله..
سلطانه تغير الموضوع/خليك مني وقولي وش صار على مرت زوجك قلتي للي انها مريضه؟؟..
عزيزة زفرت بقسوه/ايه فيها جلطه عساها ماتقوم منها..
سلطانه انتفضت بجزع/استغفري ربك حرام عليك بنتها تبيها..
عزيزة تاففت بقهر/بنتها طويلة لسان يقول راشد كلتني بقشوري يوم امها مرضت حطت الوم كله عليه..
————————————————————
يوم جديد..
القرية..
مع شروق الشمس تجلس الجدة نشميه وشقيقها شداد تحت ضل الحيط المشطب امامهما القهوه
شداد يرشف من فنجاله/ترا قلت لراعي يحلب العنز قبل يرضع ولدها..
نشميه هتفت بحرص/زين تسوي بس قل له يلعفها زين لا تجوع..
شداد ياكل له فذة من التمر/ايه علمته عساه يمسك العلم بس..
الظبي تقترب لهما بنعومه مرتديه دراعه حرير بالون الفستقي نصف كم يظهر جز من بياض عضديها..
خصل من شعرها ذات الون العنابي من اثر الحنا متناثره على نحرها الطويل بنعومه كالحرير..
جلست وهي تسال باهتمام/عنزي ماولدت للحين؟..
نشميه تبتسم بمودة عميقه/عنزك يا ذكر الله ماتجيب الا على ثنين عيالها الاولين كبرو وام مصلح تبي تشتري واحد تقول يبون يجونها ضيوف و بتذبحه لهم..
الظبي سالت بتوجس/وكم تبيع تدفع فيه؟…
نشميه صغرت عينيها/ما بعد قالت انتي كم تبين فيه؟؟..
الظبي خفتت بفطانة/ابي فيه تسع ميه تراه سمين وهذا سعره..
نشميه تنظر في شداد باسمه بعجاب/بسم الله على قلبها صارت تفهم بالغنم والبيع وشرا..
شداد ابتسم كذالك وهو يمسح على لحيته البيضا/كان الله عطاني عمر لا علمها على بالنياق بعد لين تشقى فيها..
الظبي هتفت بحماس/اي والله يا جد تكفى ابي للي حوير ابيع وشري فيه بسوق لين اتعلم..
شداد بتقدير عميق/ابشري تراه جاك حوير من عندي يوم السبت البسطه تروحين معي و تبيعينه وفلوسه لك..
الظبي وقفت على ركبتيها قبلة راسه/الله يطول بعمرك..
رن هاتف الجدة نشميه اخرجته من مخباها/هلو..
وصلها صوت نمر الرخيم/صباحك الله بالخير شلونك عساك طيبه؟..
نشميه بموده حانيه/ياالله انك تحييه طيبه طاب حالك هو انت شلونك شلون بنياتك..
نمر بذات النبرة الرخيمه/كلنا بخير وعافيه المهم ترا برسل عليك معاذ العصر عندي عشا اليله لبنات عمي صايب ورجالهن..
نشميه قطبت لثواني/بنات صايب يالله عفوك وش جايبهن من الجنوب؟؟..
نمر شد له نفس ثم هتف بثبات/بنات عمنا يعني وش جايبهن الله يطول عمرك بيسلمون..
نشميه زفرت بعتاب/يسلمون بعد ذا السنين تو تذكرنا وهن منقطعات من بعد وفاة ابوهن و اختهن البندري؟..
نمر يحاول يتجاوز اسم البندري الذي يهز مشاعر الشوق بداخله رغماً عنه هتف بتحكم/خلك جاهزه العصر معاذ عندك..
نشميه تنهدت بضيق/يامك معاذ كل يوم وهو متر هالطريق الصعب وانا مارجعت بيتي الا البارح برتاح مالي قدره على المسرا..
نمر بحزم شديد/لازم تجين يومه البنات متعنيات يبن يسلمن عليك..
نشميه بزفرة/وليه مايجني بديرة ولا ماهي من مقامهن؟..
نمر ببتسامه ثقيله/الديرة بعيده ويمكن رجالهن ما يدلون الطريق المهم انتي تعالي ولكل حادث حديث..
نشميه باستلام/ان شاءالله تعالى..
نمر بتوصيه وتقدير/وسلمي على خالي شداد و اعزميه الله يحيه هو ومن يعز عليه..
نشميه تنهى الاتصال/سلمت سلمت مع السلامه..
شداد ناظر بها بتسال/علامه نمر وش عنده؟..
نشميه تعيد هاتفها للمخباه/يقول تعالي انتي وخالي شداد للعشا اليلة لبنات صايب جايات من الجنوب بيسلمن علينا..
شداد صغر عينيه الذي يحيطها التجاعيد/هن كم بناته ناسيهن؟..
نشميه تعد باناملها المصبوغة بالحنا/بدريه الكبيره معرسه ومعها والدين والثانيه البندري خطيبة نمر اللي ماتت والاخيره بدور يقولون اعرست مابعد ولدت عقيم مادري منها ولا من رجلها..
شداد تنهد بحزن/الله يرحمك يا صايب خلفته كلها بنات؟..
نشميه تنهدت بعمق/اي بالله كلهن بنات خير وبركه من الله..
ثم التفت لظبي الذي تسمع لهما بصمت ردفت بتسال/تروحين معي للعشا؟..
الظبي هزت راسها بنفي التام/لا والله ماني رايحه تروحين وترجعين بالسلامه..
نشميه بحزم حاني/ليش ماتبين تروحين اقول بس تزيني معاذ بيجي العصر يودينا..
الظبي باصرار على رفضها/مابي اروح يا جده مالي خاطر لا تجبريني..
شداد بتدخل حازم/كيفها لا تضغطين عليها..
الظبي توقف وتبتعد لغرفتها بينما نشميه تنهدت/والله ان سوات ولد محمد فيها ماهي بسوات رجال..
شداد ضاق صدره بالفعل/ولدي وبنتك الظاهر ماعرفو يربون ولدهم ولا كيف يطلق بنت عمه وهو مابعد شافها طغى عليها؟؟..
نشميه زفرت بغبنه/انا ادري عنه الله يقطعه ويقطع طاريه المهم تروح معي للعشا؟..
شداد بذات الحزم/لا والله عندي شغل من الصباح انتي روحي و لاتاخرين عاودي علينا..
"""اعرفكم على عائلة الخال شداد متوفيه زوجته من عشرين سنه"""
الابن الاول ..
محمد زوجته شيخه عياله شهاب وشهد تكلمنا عنهم..
الابن الثاني..احمد متوفي قبل سبع سنين و زوجته منيره متوفيه قبل وفاته بخمس سنين والظبي بعمر ست اعوام..
الظبي الان عمرها 19 سنه شهادتها ثانويه قمه بالجمال والانوثه قمه بالجاذبيه والنعومه طولها مميز جسدها منحوت بياضها زجاجي كثلج عينيها ناعسه انفها حاد شفتيها صغيره مدوره فكها مسطر تكساس بخلقة الخالق شعرها العنابي من الحنا يوصل لردفها شخصيتها عنيده طويلة لسان لكنها كتومه..
————————————————————-
عزيزة تدخل البيت وهي تزفر على الخدم بحده/شوي شوي على الشنط لا تكسر عطوراتي ثم اكسر روسكم وحده وحده..
راشد يتبعها وهو يحمل شنطه زفر بضيق/الله يهداك يا عزيزة ماخليتي شي بدبي ما شريتيه انا مادري ليش تحبين الخساير كذا؟؟…
عزيزة استدارت نظرت به بحده/فلوسي ولا فلوسك؟..
راشد بطولة بال/طبعاً فلوسك بس الخساره ماهي زينه..
عزيزة رفعت حاجبها بتكبر/حلالي وانا حره فيه ان شاءالله احرقه كيفي مزاجي..
راشد لم يرد عليها لينتفض من صرختها مجدد على الخدم/وجع شيلي عدل متفلته يديك انتي؟؟..
معاذ يخرج من غرفته التي بطابق الارضي اقترب بخطوات واثقه وعيناه تنظر بالشنط التي بيد الخدم؟..
عزيزة ابتسمت بامومة/معاذ يا قلبي انت هنيه؟؟..
معاذ مال من برجه العالي و قبل راسها/الحمدلله على السلامه..
عزيزة ترفع راسها لمستوى طوله لتنظر به/الله يسلمك من متى وانت هنيه؟؟..
معاذ اجابها بغموضه المعتاد/البارح نايم بالبيت..
راشد هتف بتقصد/ماتبي تسلم علي؟؟..
معاذ اعطاه نظره محتقره ثم هتف لوالدته بحزم/ترا عمي نمر عنده عشا اليله وقال للي ابلغك..
عزيزة سالت باستغراب/عشا لمن ما قالت للي سلطانه؟؟..
معاذ هز كتفيه وهو يعود لغرفته/مادري يمكن ما فضت للجوال..
عزيزة بذات الاستغراب/يمكن..
————————————————————
بعد صلاة العصر..
قصر النمر بن فخر..
تدخل الجدة نشميه مستنده على كف معاذ العريضه الذي يرحب بحزم/حياك الله في بيتك..
نشميه ترد بثقل/الله يبقيك ما مداني ارتاح الا تعودون فيني يالله العفو..
معاذ يقترب للاريكه ساعدها على الجلوس/نحبك يا جدة ودنا انك عندنا على طول..
نشميه تنظر به من تحت برقعها/حبك ربك والله يامك اني اويه لك من تعب هالطريق مره جايبني ومره مرجعني وانت عندك اشغال الشركه والدوام..
معاذ هتف بحزم هادئ/تعبك راحه واليوم ماعندي دوام بس مريت الشركه خلصت كم شغله وجيتك..
نشميه تذمر بغيظ/والله انك اشوى من هذاك المتكبر لا يودي ولا يجيب ولا اطريت له الديره عفس وجهه حتى ما يمر يسلم على جده شداد؟..
معاذ هتف بشبه ابتسامه/شهاب عنده اشغال يالله يلحق عليها اعذريه يا جده..
نشميه زفرت بسخريه/وش عنده غير الصياعه و المهايط بالتصوير..
معاذ يتجه الدرج/بطلع فوق ابلغ خالتي سلطانه بوصولك..
عند سلطانه كانت جالسه بصاله العلويه تشاهد لها فلم بانسجام حتى سمعت خطوات رجوليه..
استدارت بغرابه ليس بالعادة نمر يعود بهذا الوقت ابتسمت من رات معاذ يتقدم لها بجاذبيه..
معاذ عقد حاجبيه بتسال/انتي جالسه هنيه والناس على وصول؟..
سلطانه تحولت ابتسامتها لعلامات تعجب/من الناس؟..
معاذ رفع حاجبه بتوجس/ضيوفكم ماهو اليوم عشاهم جدتي تحت جبتها..
سلطانه وقفت بصدمه/عشا وضيوف انت شقاعد تقول؟؟..
معاذ سال بحده/عمي نمر ماقال لك ان اليله في عشا وعازم الناس؟؟..
سلطانه شعرت دم راسها يفور بقهر/عازم ناس وعشا وانا راعية البيت اخر من يعلم عمك هذا وش يقصد بحركاته؟؟..
معاذ بدا يعصب بالفعل/انتي متاكده ماعلمك؟؟..
سلطانه تعالت انفاسها بذات القهر/ليش وانا بيني وبينه كلام من اربع سنين وهو رافع خشمه يبي من يكسره له..
معاذ انفعل حقاً من حركة نمر كيف يعزم اقصى الناس ولم يبلغها حرمة بيته من باب الاحترام والتقدير؟!..
هتف بتماسك مغلف بتهدئه/الخدم اكيد مجهزين كل شي بس انتي الحين انزلي تحت لجدتي وانا اتفاهم مع عمي..
سلطانه زفرت بعناد شديد/ضيوفه ولا للي شغل فيهم خل الخدم تستقبلهم مدامه مبكر قدرهم فوق قدري..
معاذ ينظر بها وهي تجاوزه لغرفتها بزعل حقيقي وهو مازال واقف مكانه بصدمة وحيره؟..
شد له نفس عميق ثم نزل اخبر جدته بما حدث من اجل ان تقنع سلطانه بان تقوم بواجب الضيوف..
نشميه بحزم بالغ/قل للخدامه تخلي سلطانه تنزل لي بساع يلا..
معاذ اتجه المطبخ تافف بضيق/بقول لها وبطلع المجلس الرجال بتفاهم مع عمي كانه زودها هالمره..
انفتح الباب ودخلت شيخه سلمت على والدتها وهي تسال بمودة/متى جيتي ومن جابك؟؟..
نشميه تنظر فيها بغيظ/تو جابني معاذ جيت من شان خاطر نمر ولا بنات صايب مالهن خاطر عندي..
شيخه تنزل عباتها وتجلس جوار والدتها خفتت لها بغرابه/والله غريبه جيتهن بعد هالسنين تو عرفن صلة الرحم؟؟..
نشميه بذات الغيظ/ماعلينا منهن انا الحين غاثني نمر مسوي سواتن شينه..
شيخه انتفضت بصدمة/نمر ليش وش هو مسويه؟..
نشميه تنهد بوجع/عازم القاصي والداني على العشا ولا علم حرمة بيته ان فيه ضيوف وعشا..
شيخه بشبه ابتسامه/سلطانه ما بعد درت؟..
نشميه تهتف بعفويه/اي بالله تو معاذ علمها وزعلت..
شيخه شعرت بسعادة لانها تكرها جداً/يمكن زعلت لان العشا لخوات البندري..
نشميه عطتها نظره حاده/اقول لا اسمع هالكلام مره ثانيه خوات البندري كلن على ذمة رجال..
سلطانه تنزل الدرج وهي ترفع جز من دراعتها البحريه المفصله على رسمة جسدها الطاغي بالانوثه..
اقتربت سلمت ثم هتفت بحزم وهي مازالت واقفه بشموخ/الخدامه قالت للي انك تبيني يا عمه امري؟..
نشميه هتفت بحزم حاني/ما يامر عليك عدو سلطانه يابنيتي انتي راعية البيت وماهو بزينه يجون الضيوف وانتي غايبه..
سلطانه رفعت حاجبها بمكابرة/يا عمه يرضيك اللي سواه نمر يعزم بيتي وانا اخر من يعلم؟..
نمشيه بكلمة حق/لا بالله ماهو مرضيني والخطا راكبه من راسه لا ساسه لكن تجملي مع ضيوفك ونمر انا اتفاهم معه بعد العشا..
سلطانه هتفت بحزم عميق/ماهو ضيوفي انتي تكفين و توفين البيت بيتك..
شيخه بتدخل خبيث/وليش ماتبين تطلعين ماتبين بنات عمي صايب يشوفونك؟..
سلطانه قطبت بشده/بنات صايب؟؟..
شيخه بذات الخبث المتقصد/ايه ضيوف نمر بنات عمي صايب..
————————————————————
تحياتي(شغف)..
اتوقع هالـــبارت الطـــــــويل تكلم لكم عن الرواية وعرفكم على الشخصيات باقي شخصيه مهمه ما بعد ظهرت لاحد الان..
عطوني رايكم وتعليقاتكم استمر او لا استمر؟..
|
17-07-23, 09:00 PM
جديد مواضيع قسم المنتدى العام للقصص والروايات
العرض الشجري
