بارت جميل كالعاده،وقفاته كلها تشلع القلب ..

أولا .. وسن والوسن ونواس ..القفله لحالها كارثه وشلون بالاحداث اللي صارت قبلها .. بداية من هوشتهم وتعب وسن ..اول مره انبسط من تعبها..لانها لما تعبت هالمره سوت نتيجه..لو هي ماكلمت جواد ماكان تحرك نواس وتزوجها وريحنا من سالفة هالكبرياء المعقد اللي بينهم..متحمسه اشوف كيف بيقابلها كاول مره وهو زوجها..لا وماراح يقابلها باي مكان والا باي ظرف..اولا باسطبل الوسن وثانيا جالسه تبكي .. وثالثا يمكن يكون صابها شيء من البنادق اللي معهم..بس املي الوحيد انهم بيسمعون صوت بكائها او ان الوسن بتحميها..واذا شافها نواس ساعتها بس بيبدا الفلم الهندي اللي انتظره من بداية الرواية..ويارب يكون شيء يبرد القلب ويستحق الانتظار..طبعا ممكن وسن تستغرب من تعامل نواس معها وهو مو محرم لها وساعتها يقول لها عن زواجهم وبكذا يكون ريح نفسه من التفكير في كيف يوصلها الخبر .. وكلللللللللووووووووييييييشششش...بنفرح وبننبسط حتى لو العروسين مو راضين .. يارب سلم وسن بس ..


نزار وسما؛وكالعاده مازال نزار يكابر على حساب قلبه .. بس ضحكت ضحك وهو يقول خليها تنتظرني ولا تبينين لها...الله يهديك يانزار اذا كنت تبي البنت اخذها وش عليك من اهلها وعمامها وفلوسها .. تفكيرك سخيف والاسخف ان سما لو تدري عن تفكيرك هذا ممكن فعلا تنهبل .. اللحين تسكنها بيتك وتصرف عليها من فلوسك وتقول لها مقدر اتزوجك يظنون اني طمعان فيك .. طيب وهي ! رضت على نفسها تعيش على نفقتك ومافكرت بكلام احد عشان مين ؟ مو عشان خاطركك ؟صدق قهرررني قهررني قهررررني .. تكفين ميشو لاعاد تكتبين لنا عن سخافات تفكير نزار .. واذا كان ولابد اكتبي بين قوسين ( فآرغه لا تقرين بيصير فيك شيء من هالولد ) ما اقول الا ياصبر قلبك ياسما عليه .. قال ايش قال تبين تكسرين ضلوعي .. احسن خلها تتكسر يمكن تحس وتتحرك ..

ردين وفراس ... !!!!!! لو فرضا قلت ان حصل لبس عند ردين وكانت تظن ان جيهان هي جوجو وجوجو هي جيهان نفسها ماتعرف شكلها طيب !! لكن هي شافتها مع اشرف واللحين تشوفها مع فراس والبنت ماتعرف اشرف وجوجو ماتعرف فراس هذا يعني انهم مو نفس الشخصيه .. واشرف فعلا كان يكذب على ردين .. بس ليش ؟ معقوله يكون فراس طلب منه هالشيء ؟؟ السالفه فيها كذب من الاثنين اشرف وفراس .. بس مستحيل جيهان بتكون زوجة فراس .. يمكن بس يبي يختبر غيرة ردين لانه شافها اول مرة عصبت ...آخخ منك ياسما لو كملتي ..😞..اللي مطمني بالموضوع ان لو صدق فراس بكلامه ابوه ماراح يرضى وبيوقف بصف ردين .. الحمدلله تطمنت عليها .. اصلا هي البنت الوحيده اللي متطمنه على مستقبلها ..

جابر وارجوان ... جابر كل مره ازعل منه اكثر من اللي قبلي وتتغير وجهت نظري .. يعني مو كفايه عليك كلامك القاسي وتصرفتك ( التافه ) بعد تزيد الطين بله بكلام وافعال اكثر قساوه .. ! بالبداية مافهمت كلامه مع ارجوان وعن اي موقف يتكلمون وما اسعفتني ذاكرتي مع الاسف .. بس بعدها مسأله انو يطلب منها ماتتغير معاه هذي صدق اللي تقهههر..غير حركة الطرد من السرير ومسوي نفسه مؤدب وكاتبها بورقه .. اشك انو سبق ارجوان ع الغرفه عشان يسوي هالحركه .. بس ماعلي منك ياجابر لو تمثل علينا من هنا لاخر بارت برضو ماراح نصدقك .. انت غارق لشوشتك بحب ارجوان وماتقدر تنكر هالشيء بينك وبين نفسك..وعندي احساس صغير يقول ان جابر يسوي كل هذا مقهور من حركة ارجوان وانها تاكل المانع وماقالت له...شفتو كيف باقي عندي امل في جابر وانه يتعدل ؟ مع ذلك انا واقفه ضده حتى يرضي ارجوان خلاص بأه كفايه عليها اللي قاله ..

زهور ورضا والمهمه المستحيله لرضا .. يالله فعلا قد ايش صعب عليه يكسبها .. لو ذكرها بالماضي كرهته اكثر وهي تظن انه يستغفلها .. ولو عاش معها بشخصيته العاشقه ماصدقته وان قسى عليها هربت .. وهو بكل الاحوال مايقدر يخسرها .. صعب موقفه .. بس الاكيد الحب اللي بقلب زهور لسه مامات .. ممكن ذبل بس مايموت..ورضا يقدر يحيي هالمشاعر فيها من جديد بطريقته .. وهو اكثر من يعرف زهور ..

معتصم وبتول ... معتصم مو سهل كللش .. يرسل هدايا وحركات .. تكفى معتصم اعطي جابر درس لو بالغلط عن الرومانسيه .. اتوقع من تزوج ارجوان ما اهداها .. والا اقول بندرس جابر عند رضا لانه غارق بالرومانسيه ..


ميشو ما ادري هل فعلا كل بارت تكتبينه احلى من الثاني مثل ما اشوفه . !
او الموضوع متعلق بمزاجي اللي اقرى فيه البارت ؟


عندي طلب صغيرون .. ردين وفكرة قصتها كقصه بداخل قصه عجبتني .. بس احسها مظلومه بقصر جزئيتها .. وهي بالنسبه لنا صارت كبطله اساسيه .. فياريت تطولين جزئيتها شوي وتخلين سما تنهي الرواية بسرعه وتشوف نفسها وتطبق اللي عرفته من الرواية عليها وعلى نزار .. لام ام نزار ماخلتها تقرا هالرواية من عبث ...


سؤال اخير ابي البنات يتفاعلون معي باجابته !
هل ممكن يكون جابر جرب الحب مره وانخذل فيه .. عشان كذا قال لارجوان ان الحب مايموت ؟

انا بالنسبه لي احتمال كبير انه جربه ... ابي اجاباتكم ..