لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 27-01-11, 12:47 PM   المشاركة رقم: 71
المعلومات
الكاتب:
اللقب:

البيانات
التسجيل: Apr 2010
العضوية: 161709
المشاركات: 1
الجنس ذكر
معدل التقييم: كــارو.. عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
كــارو.. غير متواجد حالياً
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله
افتراضي

 

[COLOR="MediumTurquoise"]أنـآ أنسـآنه مدمنه روايات بس الحق ينقال
روايه مثل هذي ماقريت اتمنى تكون روعه
حتى النهاية
لان اغلب الروايات تكون حلوه اولها وسخيفة اخرها
اشكر الكاتبه واشكرك على النقل
اتمنى التكملة
كـ^_^ـآرو.. ]

 
 

 

عرض البوم صور كــارو..   رد مع اقتباس
قديم 28-01-11, 06:02 AM   المشاركة رقم: 72
المعلومات
الكاتب:
اللقب:
عضو فخري
♪ مُخْمَلٍيةُ آلعَطّآءْ ♦


البيانات
التسجيل: Mar 2010
العضوية: 157123
المشاركات: 30,332
الجنس أنثى
معدل التقييم: ♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع
نقاط التقييم: 13523

االدولة
البلدSaudiArabia
 
مدونتي

 

الإتصالات
الحالة:
♫ معزوفة حنين ♫ غير متواجد حالياً
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله
افتراضي

 

اقتباس :-   المشاركة الأصلية كتبت بواسطة كــارو.. مشاهدة المشاركة
  
[COLOR="MediumTurquoise"]أنـآ أنسـآنه مدمنه روايات بس الحق ينقال
روايه مثل هذي ماقريت اتمنى تكون روعه
حتى النهاية
لان اغلب الروايات تكون حلوه اولها وسخيفة اخرها
اشكر الكاتبه واشكرك على النقل
اتمنى التكملة
كـ^_^ـآرو.. ]





هذي لـ نفس الكـــآإتبة ..
اتوقع تعجبك ..

غموض خالد ، للكاتبة : هدوئي ..

العفــو ..
نوووو^_^ووورتـي كـــآإرو ..



 
 

 

عرض البوم صور ♫ معزوفة حنين ♫   رد مع اقتباس
قديم 28-01-11, 06:04 AM   المشاركة رقم: 73
المعلومات
الكاتب:
اللقب:
عضو فخري
♪ مُخْمَلٍيةُ آلعَطّآءْ ♦


البيانات
التسجيل: Mar 2010
العضوية: 157123
المشاركات: 30,332
الجنس أنثى
معدل التقييم: ♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع
نقاط التقييم: 13523

االدولة
البلدSaudiArabia
 
مدونتي

 

الإتصالات
الحالة:
♫ معزوفة حنين ♫ غير متواجد حالياً
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله
افتراضي

 



* الجــزء الســابع عشــر *





وقف نايف بجنبي وهو ملصق ظهره بالجدار وماسك السكينة ومستعد
نايف بجنب الباب وانا بجنب نايف
مر علينا ربع ساعة وحنا واقفين عند الباب

تعبت من الوقوف و جلست ببطء عى الارض وانا اسحب ظهري على الجدار

سمعت صوت نايف يكلمني

نايف = خلني اسمع صوتك بس .. واذا تسوي شي ..هالسكينة بتصير بظهرك على طول ... تفهم ؟

ضميت ركبتي لصدري وغطيت وجهي وانا ادعي الله ان عمر مايجي


مر ربع ساعة ثانية وحنا ننتظر .. ونايف رايح جاي يحتري ..

نايف بعصبية = وييييين ذلف هذا ؟ ...

سكتت ومارديت عليه وانا ادعي الله تدعي هالليلة على خير

فجأة سمعنا صوت باب الشارع يسكر

شهقت بقوة ورفعت راسي لنايف بخوف ..

ركض نايف راجع لمكانه ووقف لاصق بالجدار جنب الباب ...

جلست على ركبي ومسكت رجلين نايف اترجاه

رايد = تكفى .. الله يخليك لا تسوي شي بعمر .. والله مب هو .. مب هو ... يكذب علييييييييك

مسكني نايف بشعري وخلاني اوقف

نايف بهمس = اششششش .. اسكت .. ياويلك اذا طلع منك صوت .. ما ابيه يدري عنا ... تفهم .. قسم بالله لاذبحك

عضيت على يدي بخوف وترقب

مسك نايف عضدي ولصقني بالجدار بعنف بجنبه ورفع السكينة باستعداد يحتري عمر

طليت من ورا نايف اشوف مقبض الباب بترقب وانا عاض على يدي بخوف وادعي الله ان مايصير شي لعمر

ودي اصرخ باعلى صوتي واقول ياعمر لا تدخل ... ودي انبهه بس مااقدر نايف بيذبحني

وقف نايف قدام الباب مباشرة والسكينة بيده موجهها و مستعد ويشر لي بيده على رقبته يعني ياويلك اذا تكلمت ... حبست انفاسي خايف من اللي بيصير


رفعت راسي لنايف وانا اهز راسي بلا بصمت اترجاه وكأني اسمع عمر يكلم احد وهو يقرب او من الخوف يتهيألي

واول ما انفتح الباب وشفنا عمر الغافل وقبل ما ينتبه للي قدامه .. فاجأه نايف بحركة سريعه وطعنه على بطنه

قدامي

شهقت بقوة ...


رايد = لاااااااااااا

واقف بجنبهم واشوف كل حركة

طيرت عيوني بصدمه وعيني على السكينة ببطن عمر ...

ابتعد نايف عن عمر وعيني على السكينة بيد نايف وهو يسحبها بعد مادخلها بعمر

سمعت صرخت عمر وركع ماسك بطنه

وقف نايف وشهق منصدم وهو يشوف شي ورا عمر


ولأني بجنب الباب وعيني بخوف على عمر ماهتميت لنايف وعلى وش يشوف

همي على اللي انطعن بسببي ...

و صورة السكينة وهي تدخل وتطلع تكرر ببالي

طاح عمر على ركبه وهو ماسك بطنه بألم

تحركت بسرعة وجلست على ركبي قدامه ومسكت عمر اساعده وانا ما اشوف من الدموع

رايد = عمر

مغمض عيونه بألم

نزلت نظري اشوف بطنه ... الدم مغطي ثوبه الابيض ويديه ...

رايد وانا ابكي = عمر هذا نايف

سند عمر بثقله علي وراسه على كتفي .. مسكته مع اكتافه .. وانا احس شوي واطيح انا وعمر على ظهري بسبب ثقله بالنسبة لي .... بصعوبة ساعدته يستلقي على بطنه

عمر بألم = آآآآآآه .. بطني بطني

ماسك بطنه ويتلوى ويحرك رجله اليسرى بالارض

حطيت يدي على يدين عمر فوق بطنه .. مدري وش اسوي

رفعت راسي بس شهقت لما شفت ابو فهد واقف قدامنا وهو متساند على حافة الباب الداخلي .. واقف مثل الصنم وعيونه على عمر بصدمة

بسم الله من وين طلع هذا ... واضح من شكله انه منصدم .. التفتت ادور نايف بس مالقيته .. طالعت باب الشارع اللي قدامنا ولقيته مفتوح بالكامل

هج الكلب ... بس وشلون .. كيف مر من جنب ابو فهد .. وليه ما مسكه

التفتت لابو فهد ولقيته يطالع عمر وشكله مافاق من الصدمة الى الحين ومتساند على الباب بضعف

حاولت ابرر لنفسي لابو فهد

رايد = هذا ... هذا نايف ... والله .. كان يحتري عمر .. والله

جلس ابو فهد ببطء بمساعدة يديه عند عند عتبه الباب وزعمر ممدد رجليه باتجاه جده وراسه باتجاهي

ابو فهد = عمر وليدي ( وطلعت دموعه بصدمة )

بكيت وانا اشوف ابو فهد يبكي قدامي ... اكيد بيكرهني اذا عرف ان كل هذا بسببي

نزلت نظري لعمر وشفته يحاول يتنفس بصعوبة

انحنيت عليه اكثر و حطيت يدي على صدره وهزيته

رايد = عمر .. تسمعني ؟

عمر بألم = آآآه .. بطنيييي

خفت وانا اشوف عمر يطالع السقف ويحاول يسحب نفس بصعوبة .. طيرت عيوني فيه نفس اخوي ريان بانفاسه الاخيرة كان يطالع السماء ويشاهق ووجهه مليان دم

رايد = عمر لا تمووت

بكيت مدري وش اسوي ... انتبهت على فخذ عمر اللي يعرج منها مليانة دم ... لااااااا .. صح هو جلس على ركبته قبل يطيح على الارض واكيد انفتك الخياطة وانفجر الدم من الجرح

ياربي كل اللي يصير لعمر انا السبب

سمعت صوت ابو فهد يكلم عمر بصوت ضعيف

ابو فهد = دزني وماقدرت امسكه ... عمر مين هذا ( وحط يده على رجل عمر) حسبي الله ونعم الوكيل ( وبكى اكثر وهو يهز رجل عمر )

عمر = آآ .. أأبـ .. أبو احمد

التفتت بسرعة لما سمعت عمر يتكلم بصوت ضعيف وبألم

رايد = وشو

التفت عمر لي و حط يده المليانة دم على صدري

عمر وهو يتنفس بصعوبة = رح لابو احمد .. ابو احمد

رايد = مين ابو احـ

وسكتت لما تذكرت ... ايوة صح ... ابو احمد جار عمر بالبيت

رايد = تقصد جارك اللي بجنب البيت ( واشرت على البيت اللي بجنب بيت عمر )

هز عمر راسه بايه

عمر بألم = ناد احمد .. ابي احمد ... خلـ

رايد = طيب طيب .. الحين

وقمت بسرعة وركضت برا البيت اسابق الريح

وتوجهت لبيت الجار ابو احمد ... دايم اشوف ابو احمد هذا يصلي معنا بالمسجد .. ودايم اشوف ولد كبر عمر يدخل بيتهم ... بس مااعرف اسمه .. اظن هو اللي يبيه عمر ... جيران عمر ماعرفهم ولا اهتميت ولا عمري سألت عمر عن جيرانه .. مين هذا ومين هذاك

بالصدفة عرفت ان الجار هذا اسمه ابو احمد ... حتى عياله ما اعرفهم زين مع اني اشوف اللي يطلع واللي يدخل لما اكون واقف عند الباب طفشان

قعدت اضرب باب بيت ابو احمد واصارخ بصوت عالي

رايد = افتحوا البااااااااااااب بسرررررررعة

وقعدت اضرب واصارخ .. فجأة فتحت الباب بنت صغيرة ونقزت على ورا خايفة وعيونها على ثوبي

رايد = رووووحي نادي ابوك .. بسرررررررررعة روحي ... بسرررررعة ونادي احمد ( ودفعتها داخل البيت استعجلها )

ركضت البنت داخل البيت وهي تنادي ابوها

نزلت نظري اشوف وش اللي خافت منه البنت

ولقيت ثوبي ملطخ بدم كثير .. غمضت عيوني بألم وهزيت راسي احاول اطرد صورة عمر عن بالي

طلع ابو احمد ووراه ولدين والبنت اللي قبل شوي

و انصدموا من شكلي

ابو احمد = بسم الله وش فيك عسى ماشر

تكلم الولد اللي كبر عمر

= وش هذا اللي بثوبك ؟

رايد = تعالوا تعالوا بسرررررعة ... عمر طعنه نايف ... بسرعة تكفون تعالوا

انصدم الولد الكبير وشهق

= وشلون ( وراح يركض لبيت عمر ووراه الولد الثاني وابو احمد )

ركضت بسرعة وراهم ... ولقيتهم متجمعين عند الباب الداخلي

الولد اللي شكله كبري بس ادب مني مرتين ساد نص الباب والنص الثاني ساده ابو فهد وهو جالس

دفعت الولد ودخلت البيت

ولقيت ابو احمد وولده الكبير جالسين بالارض و منحنين على عمر ويكلمونه

وابو فهد على وضعه عند عتبة الباب و جالس عند رجلين عمر ويديه تتراعد

سمعت الولد الصغير يهمس بصدمه

= يمه وش هذا ؟

طلعت دموعي بألم وانا اشوف عمر يسبح بدمه ... بلاط الارضيه مليان دم داكن

انا السبب ... ليتني مادخلت بيتك ياعمر ... ياليتني ماعرفتك

انتبهت على عمر يكلم الولد الكبير بصوت متقطع

عمر بضعف = اااا .. احـ .. احمد .. بلغ عن نايف... نايف .. كـ .. اللي كان معك بالثانوي

صاح ابو احمد علي وعلى ولده الثاني الدب

ابو احمد = روحوا هاتوا مناشف ... بسررررررررعة

ركض الولد لبيتهم وانا ركضت للدرج ورحت لغرفة عمر فوق .. وفتحت دواليبه ادور على مناشف

ومالقيت الا منشفة وحدة كبيرة ... اخذتها ونزلت على طول

عطيتها احمد وحطها على طول على بطن عمر والتفت لابوه

احمد = يبه اطلب الاسعاف بسرعة

قام ابو احمد وهو يسألني

ابو احمد = وين التلفون ؟

ركضت للصاله وهو وراي واشرت على التلفون وراح للتلفون

رجعت لعمر وجلست عنده ومسكت يده بخوف

الى الحين يسحب نفس .. وفمه يابس ويتنفس بصعوبة

التفت عمر لاحمد

عمر بألم = احمـد

قاطعه احمد بسرعة يمنعه عن الكلام

احمد = خلاص فهمت ... نايف اللي كان معنا بالثانوي ... عرفته خلاص لا تتكلم

جا الولد الدب من بيتهم و معه مناشف وعطاها اخوه

صاح احمد على اخوه بعد مااخذ المناشف منه

احمد بصراخ = محمد رح هات مقص بسرعة .. اركض

محمد = من بيتنا ؟

احمد بعصبية = اييييييييييه بسرعة رح

ركض محمد الولد الدب وراح لبيتهم يجيب مقص

مد احمد علي المناشف

احمد = خذ ... خلهم معك لين يجي محمد

اخذت المناشف وعيني على عمر اللي بدا يفقد وعيه وراسه مايل ناحيتي ويأن

قعد احمد يفتح ازارير ثوب عمر وهو يكلمه

احمد = عمر تحمل شوي الحين يجون الاسعاف

التفتت لاحمد .. ابي اسأله وش يبي بالمقص بس ماتجرأت اسأل

شوي و جا محمد وعطى المقص اخوه

قام احمد واقف وجلس بين رجلين عمر وبدا يقص ثوب عمر بالطول لين وصل للازارير

وبعدها قص الفنيلة الداخلية وكشف عن بطن عمر وصدره

شهقت لما شفت الدم يطلع من الجرح .. ورجع علي صورة السكينة وهي تدخل وتطلع ...

طلعت دموعي ندمان .. ليتني طلعت اليوم من بيته ولا سمعت كلام عمر .. كان ماصار اللي صار

اخذ احمد المناشف مني وحط منشفتين على بطن عمر ووحدة على فخذه

وطلب مني امسك المناشف واضغطها على بطن عمر .. ونفذت بيدين ترتعش

صاح علي احمد

احمد بعصبية = اضغط زييييييين

ضغطت وانا اهز راسي احاول اطرد صورة السكينة عن بالي

منظر الجرح افزعتني ..

شفت المناشف تحت يدي شوي شوي تتحول للون الاحمر

همست

رايد = يااااربي

حاولت اتمالك نفسي ... رفعت راسي وطالعت احمد اللي يضغط المنشفة على فخذ عمر

انا جالس بجهة من عمر واحمد جالس بين رجلين عمر ... مابي انزل نظري لعمر واشوفه وهو يسبح بدمه .. مدري وش اطالع ... ابي أي شي يشغلني عن المنظر

طلع ابو احمد من الصاله وصاح على محمد

ابو احمد = محمد رح لاخر الحارة واحتر الاسعاف ... بسرعة .. الحين يجون

ركض محمد وطلع من البيت ينفذ

راح ابو احمد يحاول يهدي ابو فهد اللي طوال الوقت يتكلم ولا نفهم عليه شي

وقدر ابو احمد يبعد ابو فهد عن الباب اللي ساده وصاروا بالحوش وانا اسمع او احمد يهدي بابو فهد ويكلمه

قرب احمد راسه مني وهمس

احمد = انت شفت اللي طعنه ؟

هزيت راسي بأيه وهمست

رايد بحزن = ايه .. نايف

قرب احمد راسه مني اكثر لين قرب عند اذني وهمس

احمد = المشكلة كان معنا بالثانوي ثنين اسمهم نايف .. مدري أي واحد يقصد عمر

نزلت نظري لعمر ولقيته يأن و صدره يرتفع و ينزل

احمد = ما اقدر اسأل عمر واجد عشان مايتكلم ... ابيك توصفه لي بعدين

وابعد راسه عني

احمد = الكلب طاعنه مرتين

التفتت لاحمد

رايد = اللي بفخذه بسبب حادث مو من نايف

فجأة سمعنا صوت الاسعاف

شوي وجا محمد يركض ووراه رجالين

قمنا انا واحمد وخلينا المجال لرجال الاسعاف







وعلى آذان العشاء اخذوا عمر بسيارة الاسعاف ..

وقفت بالشارع وانا اشوف سيارة الاسعاف تبتعد واحمد ومحمد بجنبي

طلع ابو احمد وهو يساند ابو فهد والتفت لنا

ابو احمد = انا ابوصل ابو فهد للمستشفى ..( والتفت لي ) تعال معنا يارايد

وقبل ارد تكلم احمد

احمد = لا يبه .. روحوا انتوا .. وانا اباخذ رايد بسيارتي

هز ابو احمد راسه بايه وتوجه لسيارته وهو يساعد ابو فهد على المشي

طالعت جد عمر بحزن .. وش جابه بهالوقت ... وليه جاي

ياربي وش هالحظ اللي لي ... يعني مايجي ابو فهد مع عمر الا بالوقت هذا

شكله تعبان مرة والى الحين منصدم ... انا ماأذيت عمر وبس ... انا أذيت للي يقربون له بعد ... امه وجده

الكل بيكرهني اذا عرفوا سبب اعتداء نايف على عمر

حتى مصعب يمكن يكرهني ... وابو فهد بيكرهني ... عمر بنفسه بيكرهني... انا عاله عليهم

نزلت راسي وبكيت بألم

حسيت بيد على ظهري

احمد = وش فيك انت طوال الوقت وانت تصيح .. يارجال ان شاء الله انه طيب .. ( ووجه كلامه لاخوه ) محمد رح هات ثوب عمر بسرعة

راح محمد ودخل بيتنا وجا ومعه ثوب عمر المقطوع نصفين

وانا منزل راسي وساكت

فتش احمد بجيوب ثوب عمر وطلع مفاتيحه وبوكه وجواله ومدهم علي

احمد = خذ خل اغراض عمر معك ...

رفعت راسي لاحمد

رايد = لا .. خلهم معك انت

احمد مستغرب = معي انا !! انت اللي ساكن مع عمر مب انا ... ياخي على الاقل دسهم بمكان لين يرجع عمر لا تخليهم طايحات بالارض كذا ... اخاف يرجع نايف ويسرق سيارة عمر والا جواله .. الاحسن تخليه معك

هزيت راسي بلا مصر على رايي ... مالي وجه ارجع لبيت عمر بعد اللي صار

لا والله مالي وجه

رايد = خلهم معك

طالع احمد اخوه مستغرب وحط اغراض عمر بجيبه

احمد = طيب يله امش خلنا نروح ..

و مشى لسيارته

محمد = احمد غير ثوبك

نزل احمد نظره يشوف ثوبه الملطخ بالدم وتوجه لبيته وهو يكلمني بسرعة

احمد = احترني الحين جاي ... رح انت بعد غير ثوبك والحين اجيك

ودخل بيته وهو يركض

نزلت راسي بحزن ... ماعندي ثوب غير اللي علي ... احس بصدري يغلي من القهر على اللي صار بعمر ... ماراح اسامح نفسي اذا صارله شي


وتوجهت لباب بيت عمر وسكرته ... خلاص لازم اترك بيت عمر وادور لي مكان غيره

بكيت غصب عني وين اروووووووح

اروح لعمي .. بس مابي ارجعله .. انا قلت راح اعتمد على نفسي واخذ اخواتي مب اخذلهم وارجع بدون أي فايده وفوق هذا مسوي مصيبة .. والمشكلة ابو فهد بنفس حارة عمي مالي وجه ارفع عيني قدامهم ... لا .. لا ... مب راجع لعمي ... لا يمكن ...

سمعت محمد يسألني

محمد = ماغيرت ثوبك !

مارديت عليه

غمضت عيوني بألم وصورة السكينة وهي تدخل وتطلع تتكرر ببالي عشرين مرة

طلع احمد من بيته وفتح سيارته ... رحت له وانا اجر رجولي جر وركبت سيارة احمد بصمت

احمد = ليه ماغيرت ثوبك ؟

سكتت ومارديت عليه .. ومسكت راسي بين يدي

حركنا متوجهين للمستشفى .. شوي و سمعت احمد يسألني

احمد = وصف لي اللي طعن عمر

رفعت راسي اطالع قدام وانا مالي نفس اتكلم مع احد

رايد بحزن = نايف ... اااا .... طول عمر ... ااااا ... ( وسكتت )

ما فيه شي مميز اوصفه فيه ... نايف شكله عادي

احمد = بس ؟ طوله طول عمر وبس .. وصفه لي .. عشان اعرف ... كانوا معنا ثنين بالثانوي .. وصفه لي عشان اعرفه ايهم

رايد = مادري مافيه شي مميز

سكت احمد شوي وبعدها سألني

احمد = نايف اللي طعن عمر فيه حبة خال كبيرة بشحمة اذنه ؟

سكتت وانا اتذكر نايف .. مااذكر فيه شي

رايد = لا ( والتفتت لاحمد ) ماعليه حبة خال

ابتسم احمد = اهاا عرفته ( وسكتت شوي وهو يسوق ) انت تقرب لعمر .؟

طالعت قدام بألم وهمست

رايد = لا

وكملت بيني وبين نفسي .. وياليتني ماعرفته .. كان عمر الحين مرتاح

احمد = انا وعمر الصراحة مانمون على بعض .. كنا زملاء ايام الثانوي بس ... وبيني وبينك الصراحة ما استغربت اللي صار لعمر

التفتت له وقطبت حواجبي مستغرب

التفت احمد لي وبعدها طالع قدام

احمد = عمر واحد موذي .. ايام الثانوي كان مشاغب مرررة ... يضرب هذا .. ويتطنز على هذا ... واذا شاف احد واقف على طاولته جاه من وراه وطيحه ... كذا بس .. يدور أي احد يتهاوش معه ... المدرسين ماسلموا منه ... يسوي حركات للشباب يخليهم يضحكون على الاستاذ... كنت اتحاشاه وما اكلمه ... ما احب اللي مثل عمر ... انا بنفسي وصلني اللي وصلني منه ... واكيد اللي صار اليوم ردة فعل ... شكل اللي صار واحد ماسلم من عمر وحب ينتقم ... اممم اذكر نايف هذا واظنهم على مااعتقد انهم دخلوا نفس الجامعة

والتفت لي وسكت

نزلت راسي ومارديت

صح عمر دفش وشري ومغرور حتى على ولد عمه مصعب ... انا اول يوم لي بااستراحتهم عطاني كف طير وجهي ... كل هذا اعرفه بس اللي صار اليوم من نحاستي انا ... عمر برئ ماسوا شي .. وماراح اسامح نفسي اذا صار فيه شي

وصلنا المستشفى ولقيناهم مدخلين عمر غرفة العمليات

وجلسنا ننتظر .. انا واحمد وابو احمد وابو فهد

وقفت بعيد عنهم شوي وانا اسمع ابو فهد اللي فاق من الصدمة شوي والحين قاعد يقول لابو احمد على اللي صار وانه ما امداه يستوعب والا ونايف هج من البيت

جلسوا على الكراسي نحتري الدكتور وكل واحد جالس بصمت

وانا واقف بعيد عنهم شوي

التفتت لابو فهد وضميري يأنبني ... لقيته منزل راسه ويدعي بينه وبين نفسه

مدري ليه احسه يدعي علي ... ياربي وش بيقول اذا عرف اني السبب


= يبه وش صااااار

التفتت متفاجأ لمصدر الصوت اللي قطع صمتنا .. وشهقت ...

مصعب وابوه

غطيت وجهي بيدي .. منحرج من مصعب ...

ياربي اخر شي تمنيته اشوف مصعب الحين ... هو يعرف كل شي ... يوم يزورنا ببيت عمر علمته ان نايف مأذيني ويحسب انا اللي مبلغ الهيئة

بيكرهني .. بيكرهني

سمعت ابو فهد يعيد الكلام اللي قاله لابو احمد على مصعب وابوه

وانا اطالعهم وساكت واحتري ردة فعل مصعب اللي شكله ما انتبه لي

ابو مصعب = يبه هد شوي ... اتصلت انا على الشرطة اول ماعلمتني بالتلفون ... حسبي الله ونعم الوكيل ... هالشباب متعبنا ( ووقف بجنب ابوه متنرفز )

شفت احمد يمشي متوجه لي ووقف بجنبي

احمد = رايد هذا ولد عم عمر ؟ ( واشر على مصعب )

طالعت مصعب وولقيته منحني على جده ويكلمه

هزيت راسي بأيه

احمد = وشسمه ؟

رايد بتنهيدة = مصعب

احمد = اهاا ( وتوجه لمصعب وشفته ياخذه على جنب )

طالعتهم وهم واقفين بعيد عني و يتكلمون .. شوي وشفت احمد يطلع من جيبه اغراض عمر وعطاه مصعب

نزلت راسي ورفعت يدي اشوفهم ... مليانات دم يابس

فركت يدي ببعضهم وصورة السكينة وهي تدخل وتطلع تكرر ببالي

= رايد

رفعت راسي ولقيت مصعب واقف قدامي مباشرة

طالعته بخوف ... وحاولت ابرر لنفسي

رايد = نااايف ( وسكتت مدري وش اقول )

هز مصعب راسه بايه

مصعب = ادري .. من يوم علمنا جدي بالجوال جا ببالي نايف على طول

نزلت راسي وبكيت بندم

رايد = عمر كذب عليه امس وتهاوشوا ... واليوم ( وبكيت اكثر وعجزت اكمل )

حسيت بيد مصعب على كتفي

مصعب = ان شاء الله عمر يطلع بالسلامة ... ونايف هذا ماني ساكتله ..

جانا احمد وطلب مني على الاقل اروح اغسل ثوبي بدورات المياة .. يقول افزعت العالم بثوبك

أيده مصعب ورحت لدورة المياة اغسل وانا بالي ماهو معي

خايف على عمر .. ومحتار مدري وين اروح ... ما اقدر ارجع لبيت عمر بعد اللي صار ... يكفي عمر اللي جاه

بس وين اروح ويييييييين... ما ابي ارجع لعمي ... امس اول ماشافني ضربني بس لأني اخذت اخواتي ... كيف الحين لو ارجع

اروح لخوالي ؟ ( هزيت راسي بلا بقوة ) عمي ما كان كذا بحياة امي وابوي ... تغير علينا فجاءة .. ما استبعد خوالي يصيرون مثله .... مابي امر باللي مريته مع عمي ...

ما اقدر اروح لخوالي ... مابي اصير انا بديرة واخواتي بديرة

حطيت يدي على صدري .. ياربي وش اسوي .. وين اروح

دخلت يدي بجيبي وطلعت كل اللي معي

ثلاث مية ريال وكم عشرة والورقة الوحيدة اللي دايم معي

هذا اللي املكه بهالدنيا ...

فتحت الورقة بيأس .. مافيها الا رقم مصعب ورقم بيت عمر

ياربي هذا الرقم اللي عطيته مريم عشان اذا احتاجتني تتصل علي ... الحين اذا احتاجتني وين تلقاني ؟

وين اروح ... احس نفسي ضايع

كيف انفعها وانا ماعندي لو غرفة انام فيها ( غطيت وجهي بالورقة وبكيت )

بعدت الورقة عني وطالعت الفلوس اللي معي .. ثلاث مية بس .. الباقي من الخمسمية اللي عطانياها عمر ... وش اسوي بثلاث مية ياربي.. تأجرلي غرفة والا توكلني

دخلت الفلوس والورقة بجيبي ورحت للمغسلة اغسل يدي وثوبي

طلعت من دورة المياة والدم عيا يروح من ثوبي

رحت للبقية ولقيت الضابط عندهم .. واول ماشافني احمد ومصعب نبهوا الضابط

احمد = هذا اللي كان مع عمر وقت الحادث

مشيت متوجه لهم وانا منزل راسي

وعلمت الضابط بكل شي .. ولما سألني الضابط عن سبب الهوشة

رفعت راسي له بخوف وبعدها التفتت لجد عمر وعمه والبقية

اطالعهم واحد واحد بخوف ... كلهم بيكرهوني

كيف اقول قدامهم ان سبب الهوشة انا ...

التفتت للضابط ونزلت راسي

رايد بحزن = مدري

الضابط = عموما اخذنا اسمه وعنوان بيته .. ماراح يطول الموضوع ان شاء الله اتطمنوا .. بينمسك على طول بحول الله

ابو مصعب = حسبي الله ونعم الوكيل

شوي و راح الضابط يكمل شغله

عرفت ان عمر طلع من غرفة العمليات وقت ماكنت بدورة المياة

رحت لاحمد اسأله عن عمر

رايد = احمد .. سمعت ان عمر طلع من العمليات .. وش قالوا ؟ .. طمني

احمد = تطمن .. الحمد الله عمر بخير .. الحين اهله ( وأشر على جد عمر وعمه ومصعب ) يحترون الدكتور يسمح لهم يشوفونه

رايد = انا ابي اشوفه بعد

احمد = قل لمصعب .. انا وابوي بنروح الحين للبيت وان شاء الله نزوره بكرة

نزلت راسي بحزن

ابي اشوف عمر الحين واودعه بدون مايدري اني ماراح ارجع لبيته ... اذا عرف اني ابترك البيت ماراح يسمح لي مثل اليوم الصبح قبل يروح للجامعة

ياليتني ماسمعت كلامه الصباح كان ماصار اللي صار

راح احمد وابوه وطلعوا من المستشفى

وجلسنا نحتري

ابو فهد ومصعب وابوه جالسين على الكراسي وانا واقف بعيد عنهم شوي

ساعة

ساعتين


وحنا الى الحين نحتري

قام ابو مصعب بعد ما مل من الانتظار وسمعته يكلم ابوه متنرفز

ابو مصعب = انا ابروح للدكتور اكلمه ( وراح )

نص ساعة ورجع

ابو مصعب = يله يبه .. سمح لنا الدكتور ربع ساعة نشوفه ... عمر بغيبوبة ولازم يرتاح ومانقدر نطول ( وساعد ابوه على الوقوف )

ناديت مصعب قبل يبتعدون

رايد = مصعب

التفت مصعب لي وجاني

مصعب = اكيد تبي تشوف عمر

رايد = ايه .. ياليت

مصعب = طيب يله امش معنا .. ( وتنهد ) جدي تعبان بعد اللي صار .. الصراحة ماودي انه يشوف عمر الحين ...

سكتت وماعلقت

رحنا لغرفة عمر و دخلنا عليه ولقينا عنده ممرض يتابعه

طالعت عمر بألم .. ممدد على السرير .. وغايب عن الوعي .. والوايرات حوله

والشاش على راسه ومعالجين الكدمات اللي امس وخاصة الجرح الكبير اللي كان بشفته السفلية

وقف ابو فهد وابو مصعب بجهه وانا ومصعب بجهه

حطيت يدي على كتف عمر وانا اشوف ابو فهد منحني و يسلم على راس حفيده

ابو فهد وهو يعتدل واقف = حسبي الله ونعم الوكيل على اللي كان السبب

شهقت وطالعته .. مدري ليه حسيته يقصدني

اخذت نفس احاول اتمالك نفسي .. وانحنيت على عمر وسلمت على خده وخده الثاني وراسه

طالعت وجهه بحزن .. ماقصرت معي ياعمر ... دخلتني بيتك واكرمتني ... وجا الوقت اللي اودعك فيه واريحك مني ..

( سلمت على خده مرة ثانية ) اتمنى ماتكرهني بعد اللي صار ... سامحني ( سلمت على راسه ) واعتدلت واقف وانا أتأمله ومهموم... وين اروح ياعمر علمني ... ما اعرف احد هنا

سمعت ابو مصعب يسأل الممرض الفلبيني

ابو مصعب = وشلون جرح هنا ( واشر على بطن عمر ) ان شاء الله كويس ؟

طلع الفلبيني يعرف عربي

الممرض = ايوة كويس .. بطن مريض كويس .. رجل راس كلو كلو كويس

التفت ابو مصعب على ابوه وكأنه تذكر شي

ابو مصعب = صح يبه .. تدري وش قال الدكتور .. يقول انه عاد الخياطة القديمة اللي كانت بفخذ عمر ... طلع عمر يعرج من خياطة برجله ماهو كسر من لعب الكورة مثل ماقالنا عمر

التفت ابو فهد لولده منصدم

ابو فهد = خياطة بفخذه .. وش منه ؟

رفع ابو مصعب اللحاف عن رجل عمر لين فخذه وهو مستغرب

ابو مصعب = مادريت الا من الدكتور ... وانا مصدق عمر حسبته يعرج من كسر بساقه

.. وشفنا فخذ عمر ملفوف بشاش

جلس ابو فهد بتعب على الكرسي بعيد شوي عن السرير وهو ماهو مصدق

ابو فهد = حسبي الله ونعم الوكيل ... اشوف الدم قبل شوي يطلع من رجله كنت احسبه طاعنه مع فخذه اللي اسمه نايف

ابو مصعب = يبه شكلهم متهاوشين قبل هالمرة وطاعنه مع رجله ... وهذا ( وأشر على عمر ) مكذب علينا ( وكشف اللحاف عن بطن عمر وشفنا لزقة متوسطة )

ابو فهد منفعل = وليش يكذب .. كان بلغنا عليه قبل يصير اللي صار اليوم ... لا حول ولا قوة الا بالله ... هالولد متعبني

سمعت مصعب يضحك بصوت خفيف وهمس يسمعني
مصعب = مقرود ولد عمي .. الراس والبطن والفخذ كلهم ملفوفين بضمادات

تنهدت وانا اشوف عمر لما انتبهت لهالشي

انتبهت على ابو مصعب وهو منقهر ويوجه كلامه لابوه

ابو مصعب = الولد يعرج قدامنا من زمان وحنا مصدقينه .. حسبي الله ونعم الوكيل بس

رفعت راسي لمصعب مستغرب ...

رايد = مصعب اللي برجل عمر بسبب حادث سيارة ... هم فاهمين غلط

سمعت بجنبي مصعب يهمس

مصعب = حبل الكذب قصير .. جاك الموت يامعاذ

والتفت لي و انحنى وهمس باذني

مصعب = اسكت لا تعلمهم خلهم على عماهم الحين ... هذا بسبب اخوي معاذ بس تكفى لا تقولهم

رفعت حواجبي منصدم

رايد = وشلون ؟ عمر قال حادث سيارة ما قـ

وقاطعني

مصعب = ايه ادري انه حادث سيارة .. بس معاذ هو اللي غلط عليه ( واعتدل واقف وهمس بصوت واطي ) ماراح يعديها ابوي على معاذ اذا عرف

نزلت نظري لعمر وحطيت يدي على راسه

ويقولون عمر شري ويغلط على الناس ... طلع هم بعد يغلطون عليه ... والله انه طيب ... انا مادري وش سالفة معاذ هذا ولا اعرفه اللهم اني شفته مرة بحارة عمي وقتها اول ماشفته حسبته مصعب ... ولا ادري وش بينه وبين عمر حتى توصل بينهم انهم يغلطون على بعض بحادث

ولا يهمني هذا كله ... اللي يهمني اني اريح عمر مني .. عمر اكرمني .. بس انا جبت له مشاكل هو بغنى عنها

انحنيت على عمر وسلمت عليه سلام اخير واستاذنت من ابو فهد وابو مصعب وطلعت من غرفة عمر

طلع مصعب معي وعرض علي يوصلني

مصعب = خلني اوصلك

التفتت لمصعب وهزيت راسي بلا وحاولت اصرفه ..

رايد بحزن = لا .. اباخذ ليموزين

دخل مصعب يده بجيبه وطلع بوكه وفهمت عليه و قاطعته قبل يعرض علي

رايد = معي فلوس

مصعب = اكيد ؟

رايد = ايه اكيد ...

وعطيته ظهري وطلعت من المستشفى وانا اجر رجولي جر مهموم

وقفت عند الطريق العام .. وانا ادور حول نفسي واطالع البيوت حولي

ما اعرف احد ... وين اروح ... كل الناس بتدخل بيوتهم الا انا

طالعت السيارات اللي تمشي بسرعة ... كل واحد له مكان يروحله

طلعت دموعي غصب عني وانا اشوف السيارات ... خايف ... احس اني غريب ... وحيد

نزلت نظري لثوبي والدم الى الحين فيه

ما اقدر امشي بالشارع وانا بهالشكل .. لازم اغسله ... بس وين ؟

مالي بيت .. ولا حتى غرفة على الاقل

تلفتت ادور بعيوني على أي شي يحسسني بالامل بس مدري وش ادور ... مدري وش اسوي

قطعت الشارع العام ... ورحت للمحلات اللي قبالي

مدري ليه .. المهم امشي

اروح للرياض ؟ ... بس مابي اخلي مريم ودانه ... المشكلة اني عطيتها رقم بيت عمر ... اخاف تتصل ولا اجيها مثل ما اتفقنا ... راح تخاف علي ... بكيت غصب عني .. محتاجها

طلعت من بيت عمي .. على بالي اقدر ادبر نفسي واخذ اخواتي ... بس طلعت غلطان

انتبهت لنفسي و رفعت راسي ولقيت نفسي داخل حارة

تلفتت اطالع البيوت ... انا وين

مامر علي سنة ببريدة ... ولا اعرف حاراتها زين

رجعت و طلعت من الحارة ولقيت على شارع فرعي محل مغسلة

ايوة صح .. ماجا ببالي المغاسل ... فرصة اغسل ثوبي الحين ....

دخلت للمغسلة وطلبت من الهندي يغسل ثوبي غسيل مستعجل

سألته عن الساعة.. وقال 10 ونص

طلعت اغراضي .. ونزلت ثوبي وعطيته الهندي

وقفت عند عتبة المحل وانا ماعلي الا ملابسي الداخليه واحتري العامل يخلص

واقف عند باب المحل وعاقد يديني عند صدري واطالع السيارات القليلة اللي تمشي بالشارع وبالي مو معي واحس بضيق بالتنفس من الهم

يمه .. يبه .. انا بعدكم تعبااااااان ... ضايع

وين اروووووح ... على الاقل هالليلة وين اناام












* عمر *


تحركت منزعج من الاصوات اللي حولي .. حلقي نااااشف عطشاااااااان ...

فتحت عيوني بتعب وبديت اميز الاصوات .. تلفتت بعيوني احاول استوعب المكان اللي انا فيه

هذا المستشفى .. غمضت عيوني بقوة لما حسيت بألم فظيييييييع ببطني

= هييييه شوفوا عمر تحررررك

فتحت عيوني وشفت مها تطل علي من فوق .. وبعدها شفت راس امي بجنبها

شوي شوي وبدت الروس تطل علي واحد واحد

مها وامي ومن الجهه الثانية مصعب وسعود وعمي

طالعت امي بتعب ... تطالعني وتبكي وما اسمع منها الا ( الحمد الله .. الحمد الله .. الحمد الله )

حاولت اتكلم بس ريقي نااااشف مرة ... عطشاااااااااان

حركت فمي بدون صوت

عمر = ما

مها = ايه انا مها

غمضت عيوني بقوة لما حسيت بطني يتمزق

سمعت عمي

ابو معاذ = الحمد الله على سلامتك

وكرروا البقية نفس الكلمة

فتحت عيوني وطالعت امي يمكن تفهمني وحاولت ارفع صوتي

عمر بهمس = ابي ما

واخيرا استوعبوا طلبي

دفعت امي مها وجت بمكانها

امي = وخري يبي ما

مها بزعل وهي تبتعد عن طريق امي

مها بزعل = اثره يقول ماء احسبه يقول مها .. فرحت احسبه يهوجس بي

سمعت ضحك مصعب وسعود عليها

حطت امي الكوب عند فمي وشربتني

ابو معاذ = عطيه شوي يام عمر .. الدكتور ماينصح يشرب سوايل واجد

ابعدت امي الكوب على طول بعد كلام عمي ... مارويت وابي اكثر ... بس مالي حيل اتكلم

مسحت امي على شعري ودموعها على خدها

امي = حسبي الله عليه ... فجعني فيك ... الله لا يوفقه ... حسبي الله ونعم الوكيل ... مالي غيرك وش يبي فيييييييك حسبي الله علييييه

غمضت عيوني لما تذكرت نايف و اللي صار

فاجئني ... اول مافتحت الباب لقيته قدامي ...

حطيت يدي اليمنى على بطني ... ماتوقعت نايف يتجرأ ويطعني بسكينة

حاولت احرك يدي اليسرى بس ماقدرت بسبب المغذي

مها = الحمد الله انك صحيت بوقت الزيارة

فتحت عيوني وطالعت مها بصمت

مصعب = أي والله شوي وكنا بنروح

= وخروا عنه خلونا نشوفه

انتبهت .. هذا صوت جدي

صح .. جدي ... كان وراي .. وينه .. وش صار عليه

ابتعدوا كلهم عن السرير بعد كلمة جدي .. وجلس عمي على الكرسي وامي راحت للجهة الثانية من السرير ... ومها ومصعب وسعود واقفين بعيد عني شوي

التفتت لجدي ولقيته جالس على كرسي ويطالعني

ابتسمت براحة ..

جدي = الحمد الله على سلامتك

هزت راسي بايه وهمست بتعب

عمر = الله يسلمك

سعود = عمر وش يبي منك هالخايس

ابو معاذ بصرخة = سعود مو وقته ... خلوه يرتاح

طالعت السقف بصمت وانا اتذكر نايف

ماتوقعت منه هالحركة ... صح امس هددني بس على بالي ماتتعدى المسأله ضرابة وهواش ...على حسب كلام الشباب ان نايف مر بايام صعبة وابوه متبري منه وطارده والهئية تدور عليه ... بس انا مالي ذنب .. هو اللي جابه لنفسه

اذا كان يبي يلوم احد يلوم نفسه .. مايلومني انا

التفتت لجدي ولقيته يطالعني بحزم

لفيت وجهي عنه بضيق ... مااحب اشوف جدي يطالعني بهالشكل .. اعرف وش يجيني بعدها

الله يعيني عليه ... راح يستلمني تحقيق ... عاد الحين كل شي صار قدامه وش يفكني منه

انحنت امي علي تسألني

امي = عمر .. يعورك شي الحين ... اقول لمصعب ينادي الدكتور ؟

احس بطني يتمزق .. وكل ما اخذت نفس انشدت الخياطة

طالعت امي بتعب .. بحالتها هذي مااقدر اشتكيلها

هزيت راسي بلا و همست اطمنها

عمر = مايعورني شي

انحنت امي علي اكثر وضمتني وخدها على خدي وتدعي الله يحفظني لها بصوت باكي وتدعي على نايف

غمضت عيوني مستمتع بحنان امي ... من زمان عنها ... تزوجت وانشغلت عني

 
 

 

عرض البوم صور ♫ معزوفة حنين ♫   رد مع اقتباس
قديم 28-01-11, 09:41 PM   المشاركة رقم: 74
المعلومات
الكاتب:
اللقب:

البيانات
التسجيل: Jun 2010
العضوية: 174383
المشاركات: 48
الجنس أنثى
معدل التقييم: fateema عضو بحاجه الى تحسين وضعه
نقاط التقييم: 12

االدولة
البلدKuwait
 
مدونتي

 

الإتصالات
الحالة:
fateema غير متواجد حالياً
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله
افتراضي

 

اشوف الاوضاع كل مالها تتعقد اكثر انا لو مكان رايد يمكن اقط عمرى ما اعلى ناطحة سحاب

يعطيج العافية ومتواصلين معاج حتى النهاية

 
 

 

عرض البوم صور fateema   رد مع اقتباس
قديم 29-01-11, 09:26 PM   المشاركة رقم: 75
المعلومات
الكاتب:
اللقب:
ليلاس متالق


البيانات
التسجيل: Mar 2010
العضوية: 158697
المشاركات: 510
الجنس أنثى
معدل التقييم: جرحها كايد عضو على طريق الابداعجرحها كايد عضو على طريق الابداعجرحها كايد عضو على طريق الابداع
نقاط التقييم: 210

االدولة
البلدSaudiArabia
 
مدونتي

 

الإتصالات
الحالة:
جرحها كايد غير متواجد حالياً
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله
افتراضي

 

يعطيك الف عااافيه على النقل

رااايد صدق احسه مقرووود الله يكون بعووونه وتنحل ازمته

اتوووقع عمر ماراح يخليه بيدوووره اوو بيوصي مصعب يدوووره

مدري ليه اتووقع عمر بيتزووج مرييم من قريت الروايه وانا احس كذاا


بانتظااار الباارت القاااادم


وتسلمييييييييين يالغلاا

مودتي

 
 

 

عرض البوم صور جرحها كايد   رد مع اقتباس
إضافة رد

مواقع النشر (المفضلة)

الكلمات الدلالية (Tags)
للكاتبة هدوئي, ليلاس, من يمسح الدمعه بشكوى قصة كاملة, اليتيم, الشكوي, عمر, غموض خالد, [ لـ تحميل الروآإيـــى كاملة على ملفي وورد & تكست صفحة 45 / حنوو ], هدوئي, قصة مميزة, قصص و روايات, قصه كاملة
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 02:58 PM.


مجلة الاميرات 

 



Powered by vBulletin® Version 3.8.11
Copyright ©2000 - 2020, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية