فهد بابتسامه تمتم بمكر : وانا شو يخصني !! يوم خايفه عليه دقيله بروحج ..
خوله وهي تتنهد : لا حول بيذلنا بعد هذا ...
مها سارت صوبها وباستها فـ راسها وتمتمت بحزن : الحمد لله ع سلامتج الغاليه ..
خوله اول ما سمعت صوت مها دمعت عينها وتمتمت بضيج : مهوي انتي هنيه !! الله يهديج خوفتينا عليج وين سرتي
مها بـابتسامه : لا بس مليت شوي ... وعقبها خطفت ابوي .. وقتلة سرينا نغير جو ع البحر .. وسكتت شوي وعقب تمتمت بإبتسامة..تذكرين ابوي يوم كنا صغار وإذا وحده زعلت فينا يودينا هناك وما يردنا البيت الا اذا نفسيتنا صار فوق
خوله اول ما حست انه مها طبيعيه .. : الله يبعد عنج كل ضيق يا الغاليه وهلال محظوظ لانه خذ وحده شراتج
ام حمود : خوله حبيبتي انتي اليوم بتمين هنيه .. وباجر بيرخصوج .. ودي اتم معاج .. بس قالوا ممنوع .. ما رضوا
خوله بابتسامه : اميه الله يهداج وين تيلسين انتي بروحج تعبانه سيري البيت ولا تحاتين انا كلها عشر دقايق وبرقد
حمود وهو يتنهد : هيه اميه خوله ما عليها الا العافيه خلونا نرد البيت الصغيرين بروحهم هناك .. وميود من الصبح يصيح ما سكت .. الظاهر فيه شي يعوره !! حاولت اهديه بس مب طايع يسكت .. والله احترت شو اسوي معاه
خوله بقهر : وداه عند امه .. وساعتها اكيد بيسكت... هو محتاج لحضن ام تلمه ..
بوحمود بضيج : خوله نحن ما صدقنا على الله نتناسى السالفه وانتي ناوية تفتحيها مره ثانيه !!
مها بابتسامه ؛ ابوي بسس خوالي ما قالت شي غلط .. مايد صغير وطبيعي انه بيبا امه !!
ام حمود قاطعتهن بعصبيه : بس انتي وياها .. مريم من اليوم وساير بتستوي امهم وكلها جم شهر واكيد بينسون فاطمه
خوله بضيج : اميه من صدقج اللي قاعده تقولية .. ترى فاطمه مظلومه .. وانتوا فاهمين كل السالفة غلط ..
ام حمود تمتمت بسخرية : لا والله .. اذا نحن شفنا بعينا وطلعنا مب فاهمين شي .. يلا أشوف خبرينا انتي .. شو هـ الشي اللي أكتشفتيه و خلاج متأكده انها فاطمه ما سوت هـ السواه..
حمود بعصبيه : بس كافي صكروا على هـ السالفه .. انا ساير البيت واللي بيسير وياي يلحقني ..!!
مها بضيج : خوله الله يهداج احينه هذا وقته !! حمود من الصبح ما نشفت عينه !! ليش طريتي الموضوع الحين
خوله :مهوي قربي صوبي مها وهي تقرب صوبها .. مهوي انا تأكدت اليوم انه مريم ورى كل اللي قاعد يصير !!
مها بصوت واطئ : انتي منن صدقج ..؟!!! انزين كيف عرفتي ؟!!
خوله وهي تتنهد : لا رديت البيت بخبرج بكل السالفه .. مابا احد يشك فاي شي .. خلينا نطبخها على نار هادية !!
مها باقتناع : خلاص اللي يريحج .. يلا عيل نحن نترخص الحين .. ولا تشغلي بالج !! نامي وريحي بالج !!


::

::

فــي بيـــت بـــومشعــل

ميثا وهي تضحك بصوت عالي وتمتمت بدلع : ضاري من صدقك انت !! حرام عليك موتني ضحك ..
ضاري بخبث : فديت اللي يضحكون انا .. هاه ميثاني ما خبرتيني متى تبيينى انفذ مخططج المدمر
ميثا بقهر : خلال هـ اليومين !! انته بس ارجع ... وعقب لكلك حادث حديث
ضاري : أنزين اموت واعرف انتي شو غرضج من هذا كله !! اذا فكرت زواجج من خالد شايلتنها من راسج
ميثا وهي تعض ع شفايفها بقوه : بعد ما تخلص هـ السالفه بخبرك بكل شي .. المهم دبرتلي للحبوب
ضاري :اكيد فديتج وباجر بتوصلج لحد باب بيتكم !! وسكت شوي وتمتم بخبث .. كـ العاده فبوكيت ورد اوك !!
ميثا بابتسامه : حلووووو .. خلااص عيل انا بخليك الحين ابا اريح راسي شوي .. وباجر بدقلك
ضاري : اوكي ميثاني انتظرج وكلي شوق لج .. عاد لا تتأخرين علي .. يلا باي يا قلبي ههههههههه
ميث وهي تصكر التلفون وتمتمت بقهر : يا الله !!!! وآخيرا نهاية قصة الحب هذي قربت تخلص !! انا بعلمكم كيف تستغفلون ميثا بنت بومشعل اللي طول عمرها ما فيه شي يهزها !! ودي أشوف الالم في عيونك يا خالد عسب تحس بالعذاب اللي عيشتني فيه من يوم ما عرفت انك تشوفني وحده رخيصه !! وكل هذا عشان شو !! بس لاني حطيت ميكب خفيف !! الحين انا بعلمك من الشريفه !! انا والا زوجتك خوله صبركم علي .. راح أسود عيشتكم !!
مشعل يقطعلها حبل افكارها وتمتم بابتسامة : ميثوه انتي هنيه ..........؟؟!!
ميثا بتوتر ممزوج بعصبية : مشعل انته كيف تتجراء وتدخل حجرتي من دون استئذان .!! ترى كل واحد وله خصوصيات
مشعل بابتسامه : يالله من زين حجرتج عاد .. المهم بغيت اسألج .. شو سالفة بوكيهات الورد كل يوم ومطرشين بوكيت
ميثا بثقه : والله عاد ما يخصك !! والبطاقه كاتبين فيها وبالخط العريض مرسله من عفاف تستعبط يعني ..!!
مشعل يقاطعها : بس انا فحياتي ما سمعتج ترمسين عن وحده اسمها عفاف !! خبريني من وين طلعت نزلت من السماء
ميثا بعصبيه : اوووووهووووووو .. تحقيق يعني !! المهم هـ البنت راهيه وتعرفت عليها فعرس ربيعتي الجوهره .. وعفاف هذي تصير بنت خالتها .. هاه أرتحت الحين
مشعل بخبث : اها .. يعني عفاف هذي عندها خير ..!! زين عيل ........... !! اشو رايج تعرفيني عليها ..!!
ميثا بعصبيه : ايوه عسب تبهدلها شرات ما بهدلت روضه !! أنسى يا بابا واحين قوم اطلع برع حجرتي مابا اشوفك هنيه
مشعل وهو مستغرب : ميثا بلاج خذيتيني بمشراع وميداف !! تراني انا اخوج !! ليش احس انج بديتي تكرهيني !!
ميثا بقهر وتمتمت بسخرية : وكيف ما تباني اكرهك وبسبتك انت انا استويت مدمنه ...!!
مشعل وهو مبطل عيونه : ميثا ليش انتي بعدج تتعاطين ..!!!!
ميثا بخبث : لا ودرته من زمان بس تعبت وايد لحد ما قدرت اتخلص من هـ السم عسب جذا تطمن ولا تشغل بالك
مشعل بقهر : انزينه وانا شو يخصني !!!! احد قالج اشربي من العصير ..!!! هذي نتيجة اللقافة ..
ميثا بضيج : هاه طمني ما عندك اخبار عن روضه .........؟!!
مشعل بعصبيه : انتي متى بتفهمين !! انا ما ادري مكان روضه وين !! تتحريني واحد مجرم !! واختطفتها من بيتهم !!
ميثا تمتمت بسخرية : والله اللي يتاجر بالمخدرات يقدر يسوي أي شي
مشعل بتوتر : اشوووو ؟!!!!!!!!! اتاجر بالمخدرات ؟!!!! من وين جبتي هـ الكلام؟!!!
ميثا انتبهت : هاه لا بس لو ما كنت التاجر !! من وين جبت الحبه اللي شربتها روضه
مشعل وهو يتنهد : من هـ الناحيه تطمني واحد من الربع عطاني اياها هدية .. ولا بغيت شي اعطيه فلوس وهو يدبرلي
ميثا وهي تطنز:انزين ليش تخبرني انا شو يخصني فيك تاجرت او لا هالشي يرجعلك انت وكل واحد أدرى بمصلحته وين
مشعل وهو يشوفها من فوق لتحت وتمتم بعصبية : انتي وراج سر كبير ومصيري اكتشفه .. من رخصتج
ميثا وهي تحط ايديها على راسها : وليه احينه انا شو سويت .. جيت اكحلها وعميتها !! اكيد بيشك فضاري الحين !! وبيحاول يعرف منو هـ العفاف الله يستر مشعل لا درى عن مكان ضاري بيخرب كل مخططاتي احسن شي اتصرف بحذر
مشعل وهو يفكر : انا محد يدري عن تجارتي بالمخدرات غير ضاري !! بس لا الحين ميثا كيف بتعرف عن ضاري هي اصلا ولا مره شافته بس تسمعني انا يوم ارمس معاه في التلفون .. انا لازم اعرف من هـ العفاف اكيد وراها سر كبير


:::


::



فــــــــــــــــي آلمستشفى خوله كانت راقده وما حست الا واحد يبوسها على جبهتها وفزت من مكانها
خوله بخوف : منو هنيه .. اطلع برع
خالد وهو يمسكلها ايدها ويبوسها : فديت اللي زيغتهم
خوله وادموعها اربع اربع : خالد هذا انته والله وقفت قلبي حسيت نفسي بموت
خالد وهو يحضنها : اسم الله عليج يالغاليه .. عاد شو اسوي اصريت على فهد ما يخبرج عسب اسويها لج مفاجأه
خوله بابتسامه : اها يعني متفق مع فهود ما عليه خلني ارد البيت وانا براويه هالدب
خالد : حشا بلاج خذيتيه بمشراع وميداف .. لعنبوج من يوم ما وصلت ما قلتيلي كلمه غاويه
خوله بابتسامه : بعدن تحت تأثير الصدمه لا هديت بقولك كل اللي فخاطري
خالد وهو يبوسها على راسها : عمري خوفتيني عليج اشو اللي استوى
خوله وهي تتذكر الموقف وبضيج : ما شي غناتي كنت امشي واتعثرت حسيت بدوار عسب جذا ما قدرت اركز
خالد : عقب اللي استوى اليوم انا مستحيل اخليج بتم معاج لحد ما تولدين وعقب بتابع امور المعرض
خوله بابتسامه : لا عمري لا تعطل شغلك عشاني انا ما فيني الا العافيه وامايه فديتها ما مقصره
خالد وهو يضحك : هيه شكلها تأكلج زين اشوفج زايد صايره دبدوبه
خوله تقاطعه : لا دبدوبه عشان هذا اللي فبطني والله لعوزني وايد اتوحم
خالد بابتسامه : هانت يالغاليه باقيلج 5 شهور وبتولدين ان شاء الله
خوله بابتسامه : لا والله وتحسب ما شاء الله .. يالله الله يعدي هالايام ع خير ولا شفت النونو بنسى هالعذاب وعقب طاحت دمعه من عينها لانها تذكرت انها عمياء وما راح تقد تشوفه بس بتسمع صوته ..
خالد وهو يحاول يغير الموضوع فديت النونو وفديت امه .. غناتي اشو رايج نشرد من المستشفى ونسسير بيتنا
خوله وهي تمسح ادموعها : فديت روحك انا وايد محظوظة لاني خذيت واحد مثلك مقدر حالتي وما عايرتني ولا مره
خالد بابتسامه : خوالي غناتي واشو فيها حالتج انتي فاقد نعمة البصر بس غيرج فقد البصيره احمدي ربج
خوله وهي تتنهد : الحمدلله على كل حال .. عمري ما بنشرد بس خلك معاي اليوم ومحد بيحس عليك
خالد بابتسامه : رايج كذا ..
خوله تقاطعه وبحماس : هيه وبعدين نور مشتاقتلك وتقول وين بابا من زمان ما شفته
خالد وهو يبوسها فبطنها : فديت روحج غناتي وفديت نواره خلاص عشان احلى بنتين بتم هنيه
خوله وهي سرحانه : آآآآآآه يا رب يمكن نحرمت من بصري بسبة ريال .. وساعتها كرهت كل الرجال الموجودين على وجه الارض .. بس عقب ما خذيت خالد حسيت انه بصري رجع لي مره ثانيه .. هو النور اللي يدلني في الظلمات .. يارب لا تحرمني منه .. وان شاء الله يتم فوق راسي على طول .. يارب تحفظه من كل شر من كل شر .وجنبنا عيون الحاسدين
خالد وهو يتأملها : خوالي يا روحي حتى لو كانوا ربعي يعايروني .. ويقولون اني تخبلت يوم قررت اخذ وحده عمياء .. صدقيني كلامهم ما يهمني .. بتم احبج واغليج .. اصلا كل واحد فيهم اذا تأمل هـ الوجه الطاهر .. اكيد بينبهر .. ما شاء الله .. تبارك الله .. جمال ممزوج بـ اخلاق .. واللي ذابحني طيبة قلبج .. دامج معاي محد يهمني .. كل اللي اباه واتمناه اشوفج دايما قريبه مني .. ابا اخر لحظة فحياتي عيني تحتضن عينج ..وهذي هي امنيتي .. واتمنى تتحقق !!!!!!
خوله قاطعتة بابتسامه : خالد .......................!!
خالد وهو يمسك ايدها وطبع بوسه فيها وتمتم بكل حب ممزوج بحنيه : يا عيون خالد ...
خوله بابتسامه : تعرف انك احلى شي صارلي بحياتي !! وما اقدر اعيش دقيقه وحده وانا بعيده عنك ..!!
خالد يقاطعها : انتي بعد يا الغاليه !! من اول يوم شفتج فيه .. قدرتي تسرقين قلبي بدون ما حس .. قبل ما اشوفج كنت حاذف قوانين الحب من كل قواميسي .. بس عقب ما شفتج .. تلخبطت عندي كل حساباتي..تذكرين سالفة المستشفى ؟!
خوله بابتسامه : اممم بخصوص هـ السالفه !! خبيت عليك سر !! واعتقد الحين جا الوقت المناسب عشان تعرفه ؟!!
خالد يقاطعها وبحماس : آآآآآآآاوه السالفه فيها اسرار .. يلا عيل خبريني بسرعه شو هـ السر .. ما فيني صبر
خوله بابتسامه ممزوج بدمعة : تعرف في الليله اللي طحت فيها !! كنت اخبر مها اني بديت احبك .. وانك الشخص الوحيد اللي يوم وقف حذاي .. ما خفت منه وحسيت بقربه بالامان !! وما كان ودي ادخل البيت .. جان ودي اتم واقفه معاك واسمع شلاتك .. بس مها عقب ما سمعت مها هـ الرمسه !! عصبت علي وقالت تتوقعين واحد مثل خالد بيفكر بوحده مثلج ..!! اصحي من اوهامج !! حسيتها صكتني بكف عسب تصحيني من حلم صرت اشوفه لليل مع نهار .. دارت فيني الدنيا دخلت في الظلمة اللي كنت اتهرب منها من لما جان عمري 12 سنه !! كنت ابا ارقد وما اصحى .. كنت راح أودع الحياة باللي فيها .. بس عقب ما سمعت صوتك حسيت بالامان وقلت لا مستحيل اخلي الماضي يخرب حياتي .. انا لازم اواجه المستقبل باللي فيه .. وحتى لو خالد ما حبني يكفي انه هداني شله واعتذر عن اللي سواه معاي .. وبديت ابطل عيوني شوي شوي وانا بعدني مش متأكده اذا انت كنت واقف يمي !! والا انا اتخيل صدى صوتك !! بس عقب ما قلت انك تحبني .. ساعتها عرفت انه هذا واقع مش مجرد حلم .. انته رجعتلي سعادتي عقب ما نحرمت منها سنين طويلة
خالد وهو يسمح دمعتها : خوالي حبيبتي انا يوم حبيتج ما همني تشوفين او لا .. حبيتج عشان قلبي تمسك بقلبج .. واوعدج يا الغاليه اني راح اتم معاج طول عمري .. وما راح اخلي احد يفرق بينا الا اذا اخذ الله امانته ..
خوله بخوف : لا تقول جذا حبيبي .. عسى يومي قبل يومك ..!!
خالد بابتسامه وهو يتأملها : فعلا انتي نادره وغير عن كل البنات اللي شفتهم بحياتي يوم عن يوم اكتشف فيج شي يديد
خوله بابتسامه : عمري بلاك ساكت ................؟؟!!! لا يكون قلنا شي زعلك !!
خالد وهو يتنهد : لا بس كنت سرحان واتذكر اول لحظة شفتج فيها !! وجمعتني معاج .. وغيرت كل حياتي ..
خوله وهي تسوي اونها معصبه : اممممممم اول لحظة بينا كانت قاسيه وقاسيه واااااااااااااايد
خالد وهو يتنهد : واوعدج اني اعوضج عن هـ اللحظة !! بلحظات احلى واحلى ..!!
خوله وهي شاخصة بصرها للسقف تمتمت بابتسامة : خالد تعرف اخر لحظة فعمري كيف اباها تصير ..!!
خالد بابتسامه : اممممممم خبريني اشو تبي تسوي فيها .. عسى عمرج طويل ويكون يومي قبل يومج
خوله وهي تتنهد: ما ابا اموت على فراشي !! او حتى أموت فـ مستشفى !! ابا لما روحي تطلع اكون فحضنك عسب انا واموت احس بالامان .. وتكون ريحتك هي أخر ريحه شميتها قبل ما أ فارق الدنيا باللي فيها
خالد وهو يضحك : بس جذا !! ما طلبتي شي حبيبتي !! غاليه والطلب رخيص !! وبعدين في سر ما خبرتج عليه من قبل
خوله وهي مستغربه : خلود شسالفه ؟!!!!! من متى بينا اسرار ؟؟!!!!
خالد بابتسامه : تذكرين يوم ما كنتي تردين على اتصالاتي وعقب فاجأتيني بموضوع الطلاق !! وحلفتي انج ما تحبيني
خوله وهي مستغربه : وشو اللي خلاك تتذكر هـ الشي اللحين .. هذا كان ماضي وراح في حال سبيله !!
خالد بابتسامه : خوله مها جان لها دور كبير !! يوم كانت تكلمج وتناقشج بموضوع طلاقج مني !! كانت متصله فيني وخلتني اسمع كل شي وعرفت انه سبب رغبتج في الانفصال !! كل هذا كان بسبب خوفج علي !! وتوقعتي لا تزوجتج انج راح تجرحيني !! وحياتي معاج راح تكون عذاب في عذاب .. وساعتها عرفت شكثر انتي تحبيني !!!!!
خوله وهي مصدومة : مها !!!! معقولة !!! وسرحت وتمت تفكر انه سبب تعاسة مها هي السبب فيها !! ومها اللي كانت سبب سعادتها وعقبها تمتمت بضيج .. آآآآآآآآآآآآآآآآآآآآآآآه يا اختيه !! رجعتيلي خالد وانا خليتج تخسرين هلال بسبتي !!
خالد وهو يقطع حبل افكارها : خوالي حبيبتي بلاج سرحانه ؟؟!!! ليش خاطرج تكدر جذا !!!!!!!!!!!1
خوله بابتسامه : لا بس سرحت في اللحظة اللي بكون فيها بحضنك وبفارق هالحياه
خالد وهو يسوي روحه معصب : حوالي ردينا ؟؟!!!!!!!!!!!!!!!!!!!!!!!!!!!!!!!!!!!!!!!!!
خوله تقاطعه: خلاص خلنا نصكر على هـ الموضوع !! خلنا نعيش اليوم بيومه !! بس حبيت اخبرك عسب تاخذ احتياطاتك !! ابا اموت وانا فحضنك فاهم !! لا تقول كنت مشغول ولا مسافر تراني ما عاذرتنك !! عاد انته وضميرك
خالد وهو يحضنها : خلاص يا الغاليه ما راح اخليج ابد .. ولا سافرت باخذج معي .. وبعدين في خبر ثاني ما خبرتج عنه
خوله بابتسامه : اووووه اخبارك اليوم وايد .. يلا قول شو لجديد عندك ...؟!!!
خالد بابتسامه : اليوم مسكت الشركه لحد ما يقوم ابوي بالسلامه !! ومن باجر ببداء اداوم فيها .. عسب اخلي كل شي يرد شرات اول واحسن بعد .. ومن شوي تصلت بمحامي الشركه وخليته يزهبلي الاوراق القانونيه عسب اباشر فـ الشغل
خوله بابتسامة : الله ......... تصدق لا درى عمي بهـ الموضوع اكيد بتتحسن حالته !!!
خالد بحزن : ابوي الله يكون في عونه !! صارله شهرين وهو على هـ الحاله !! وما في أي تحسن بحالته ..!!
خوله بضيج : خالد حبيبي ابوك مشكلته روضه .. ولا ردت اكيد بتتحسن حالته .. وبعدين لا خبرته بهـ القرار اكيد بيفرح
خالد بابتسامه : خلاااص عيل باجر بمر عليه وبخبره ..!! انا من يوم سافرت اهملت ابوي .. يمكن انا أتصل بـ الدكتور بين فتره وفتره .. وأتطمن ع حالته .. ومع ذلك حاس نفسي مقصر !! اخاف ابوي لا قام باجر يزعل مني ويقول انته بديت شغلك على .. وساعتها صدق بحس نفسي صغير .. وما بعرف كيف أرد عليه .. وكلها ثواني ودمعت عينه ..!!
خوله تقاطعه : لا انا كلمت عمي وفهمته .. وبعدين خالتي ام محمد ما مقصره .. طلعت تحبه حب امممم ما ينوصف
خالد بابتسامه : الحمد لله عشان جذا انا كنت مطمن !! لا ني عارف انه خالوه ما بتقصر معاه .. وبتحطه فـ عيونها

:::

:::

::


وكلها دقايق ودخلت عليهم الممرضة..واول ما شافت خالد تصلبت مكانها وتمتمت بخوف :بسم الله من وين طلعت انت !!
خوله بابتسامه : حياج اختيه !! هذا ريلي رراد اليوم من السفر .. وحب يتطمن علي وعلى بنته !!!!
الممرضة بعصبيه : حتى ولو جان المفروض ينتظر لباجر الصبح وعقب يزورج مب يدش المستشفى بهـ الشكل
خالد يقاطعها بخبث : عذريني اختيه انتو اللي يهمكم في هـ المستشفى راحة المريض!!وزوجتي دامني معاها هي مرتاحه
خوله تقاطعه : هيه صدق انا وايد مرتاحه .. خليه معاي اكيد ما راح يضرني .. اقولج هذا زوجي ..
الممرضة بتوتر : ادري اني ريلج !! بس قوانين المستشفى ما تسمح بهـ الشي !! المهم انا بسير اخبر الدكتور المسئول
خالد بعصبية : خلاص انا بعد بسير معاج وبكلمه وبشوف اشو اخرتها !! لعنبو ما ترتاحون الا اذا خربتوا علينا وناستنا
الممرضة انقهرت من كلامه وتمتمت بقهر: خلاص اخوي تم معاها بس بدون ازعاج .. انا سايره !! من رخصتك
خالد فخاطره : هيه ما تجون الا بالعين الحمراء !! اونها تبا تخبر الدكتور .. والدكتور غاط الحين في سابع نومه !!
خوله وهي ميته ضحك عليه : خلاص انزين اسكت فضحتنا .. اخاف تسمعك وتغير رايها بعدين
خالد بابتسامه : خليها تولي .. اوني عاد مصدق روحي !! اوف قطعت علينا لحظاتنا الرومنسيه اللي عايشين فيها
خوله بابتسامه : لا ما قطعت شي قر فمكانك وخلنا نكمل سوالفنا ما فيني رقاد
خالد بابتسامه : حاضرين جم خوله عندنا .. كلها وحده .. ولو تطلب عيوني وروحي فدوه لها




::::


:::

فــــــــــي صباح اليوم التالي وتحديدآ في بيت بو مشعل

بومشعل كان قايم متأخر من النوم .. عسب جذا جمع اوراقه بسرعه .. وما انتبه انه في ورقه طاحت
ام مشعل بخوف : حشا بو مشعل !! بلاك مستعيل جذا !! تراك ما متأخر غير عشر دقايق بس .. هدي نفسك شوي !!
بومشعل يقاطعها : عندي اجتماع مهم الساعه عشر انا ساير خبري مشعل يلحقني زين
ام مشعل : ان شاء الله توكل انت ولا تحاتى شي .. واول ما راح .. تمت ترتب الحجرة .. وشافت ورقة بيضاء.. وشلتها من الارض وتمت تطالعها .. وتمتمت بخوف .. " يا ربي شو هـ الورقه !! مو كأنها عقد زواج !! بس احيد عقد زواجي من بو مشعل معاي !! يا ربي اشو السالفه .. أخاف بو مشعل سواها وتزوج علي وحده صغيره .. يدلعها وتدلعه !!
مشعل يقاطعها وهو يبوس راسها : صبحج الله بالخير امايه !! اشو هـ الورقة اللي في ايدج !!
ام مشعل بتوتر : لو اعرف اقراء كان خبرتك بس شكلها عقد زواج .. عرفتها من هــ العلامة .. وأشرت عليها بصبعها
مشعل وهو ياخذ الورقه .. وتم يقراء اللي فيها واول ما خلص تم واقف مكانه ما عرف شو يقول كان منصدم
ام مشعل بخوف : مشعل بلاك تصلبت جذا !! اشو فيها الورقه علمني !! أبوك متزوج علي صح ..!!!
مشعل بضيج : اميه هذا فعلا عقد زواج .. ابوي متزوج عليج صارله سنتين ..!!!!!!!!
ام مشعل وهي ماسكة راسها وتنوح : اشو متزوج علي لا ومن سنتين وانا الماي جان يمشي تحتي وما حسيت عليه
مشعل يقاطعها : اه يا اميه المشكله اللي ماخذنها وحده حشـــ ،.....ـــره ما تسوى شي !!
ام مشعل وهي تجلس ع الأرض وتمتمت بقهر : واااا حسرتي .. تزوج علي وانا في هـ السن !! انزين ليش ؟!! عمري ما قصرت معاه !! وقفت وياه فـ اشد الظروف .. وما ارتحت الا لما شفته واقف على رجولة .. لا وخليته قادر يعتمد على نفسة .. وفي النهاية وبكل قوة عين .. يروح ويتزوج علي .. ويطعني في الظهر .. هذا جزا المعروف ..!!
مشعل بضيج : قتلج يا اميه تحذري !! سفرياته زادت !! لكن انتي شو رديتي علي قلتي ابوك ما يسويها !! طالعي اشو استوى الحين .. صارله متزوج من سنتين وانتي ما عندج خبر !! نايمه في العسل وهو يلعب عليج من تحت لتحت
ام مشعل بعصبيه وهي تشده من كندورتة : خبرني منو هذي اللي ماخذنها ابوك !! والله اروح الحين واكسر راسها !!
مشعل وهو يتنهد : لا اميه انتي اطلعي من الموضوع .. وانا بتصرف محد بيكسر راس هنود غيري
ام مشعل تقاطعه وعيونها بدت تتوسع اكثر : اللي ماخذها ابوك .. هي نفسها السكرتيره صح ..!!!
مشعل : هيه يا اميه .. وانا اشوف دخلاتها المكتب كاثره .. وتتصرف كأنها راعية الحل والحلال .. بس دواها عندي
ام مشعل تقاطعه وبعصبيه : حامض على بوزها تاخذ فلس احمر .. وبو مشعل انا الحين سايرتله الشركه ودواه عندي !!
مشعل وهو يتنهد : زين تسوين اميه .. لبسي عباتج وانا بترياج في السياره !! لا تتأخرين زين ..
ام مشعل : الظاهر انه اكتشف اني رابطنة ومخليتنه شرات الخاتم في اصباعي . وقدر يتخلص منه .. بس ما عليه حسابه عندي اليوم بيسجل الشركه والحلال باسمي .. انته على بالك أني هينه وبمشيها .. لا يا بو مشعل .. غلطان وأكبر غلطان
مشعل يقاطعها وبخبث : اميه واذا ما طاع اشو بتسوين ..؟؟!!
ام مشعل : لا بيطيع .. واذا ما طاع راح اسوي اللي براسي وعلي وعلى اعدائي



:::


:::



وعنـــــــــــــــد فاطمة

كان ليلها طويل لم تستطع النوم ومرت عليها الساعات وكأنها دهر .. اخذت عبائتها واوقفت سيارة اجرة .. وتوجهت مباشره إلى حيث تعمل غاده .. كانت تدعوا الله وتتوسله بان لا تجد سالم هناك .. لما تأخذ سوى عشر دقائق حتى وصلت !! كان المحل فخم بعض الشي .. تأملت المواقف فلم تجد أي شي يثبت وجود سالم هناك .. نزلت وكانت تمشي بخطوات متثاقله .. كانت خائفه مما ينتظرها .. كل ما ارادته ان تثبت حقها فقط .. وبعدها تمضي في حال سبيلها .. وتلملم بقاياها المتناثرة ..فتحت الباب وكانت يداها ترتجف من الخوف !!تأملت المكان بسرعه ..ولم تجد سوى فتاه ترحب بها بابتسامة
سلوى بابتسامه : .. هلا أختيه حياج تفضلي ..!!! امري تبيني اساعدج فــ شي
فاطمه كانت مغطية وجها كانت متخوفه تشوف سالم وعقب خازت الغطاء وتمتمت بخوف : بغيت غاده لو تسمحين ؟!!
سلوى بتوتر : ليش غاده بـ الذات !! انا موجوده وبقدر اساعدج .. لانه غاده ماخذه إجازة شهر وما بداوم !!
فاطمه أول ما قالت سلوى هـ الكلام مسكت يدها وكانت شوي وبتبوسها وتمتمت بضيج : شو ؟؟؟؟؟!!! ما خذه اجازه !! الله يخليج خبريني وين بيتهم ؟!! هذي مسألة حياه او موت !! أنا لازم اشوفها دبريني عسى الله يفرجها عليج .. انا محتاجتلها ضروري .. انا فهم ما يعلم فيه غير رب العباد .. أبوس إيدج دليني على بيتهم وبكون شاكره لج !!
سلوى فخاطرها : يحليلها هـ الحرمه شكلها طيبه اخاف اخبرها مكان غاده وتقعد تتشمت !!
فاطمة تقطعلها حبل افكارها : اختيه اقولج مسألة حياه او موت !! وما خلصت كلامها الا وتدخل نوف عليهم
نوف بابتسامه : السلام عليج سلوى ..!!! سالم موجود بغيته شوي
سلوى بابتسامه : هلا نوف .. وصدت صوب فاطمة وتمتمت بابتسامة اختيه هذي اخت غاده خبريها شو تبين منها
فاطمه وهي حست انها انفرجت : بغيت اشوف غاده ..!! المسألة حياه او موت ..!!

نوف وهي مستغربه : انزين منو انتي !! وليش تبي تشوفي اختي ؟!! هي سوتلج شي !!
فاطمه وعينها تدمع : ما يحتاج تعرفين اشو سوت كل اللي اباه منج تخبريها انه وحده اسمها فاطمه تبا تشوفج
نوف وهي تتذكر : يا ربي لا يكون هذي فاطمه نفسها اللي غاده فرقت بينها وبين ريلها .. انزين خبريني شو اسم ريلج
فاطمه بضيج : اسمه حمود وهو الحين ماخذ مريم ربيعة غاده ..
نوف بتوتر : لا هذي هي .. وعقبها تمتمت بابتسامة .. تعالي اختيه انا بوديج عند غاده .. وبخبرج السالفه في السياره
فاطمه بضيج : زين اختيه اللي يريحج
نوف بتوتر : لا درت احين انه غاده في السجن اكيد بتتشمت!!وحتى لو تشمتت من تنلام اللي سوته غاده فيها مب شويه
فاطمه وهي تتنهد : اختيه وهذا نحن وركبنا السياره خبريني غاده وين ؟! هي الوحيده اللي بتقدر تخلصني من هـ العذاب
نوف بتوتر : شوفي يا اختيه غاده خبرتني بكل شي وباللي سوته فيج وبريلج حمود !! وانا عصبت عليها وهي ندمانه قد شعر راسها !! وكانت تبا تسير عند حمود وتصارحه بكل شي .. بس صار اللي صار وهي الحين في السجن
فاطمه بضيج : اشووو ؟؟؟؟؟؟؟!!! غاده في السجن ؟؟!! انزين اشو مسويه ؟؟!!
نوف بضيج : متهمه بجريمة قتل !! واحد حاول يغتصبها وقتلته ..!!!
فاطمه بضيج : هيه هيه شفتي الله حطها فنفس المكان اللي حطتني فيه .. ع الاقل هي قدرت ادافع عن نفسها وطلعت نظيفة .. لكن انا اللي تبهدلت وما قدرت اثبت اني مظلومه .. طلعوني من البيت مثل الحيـــــــــ .... !! مريم وغاده تلاعبوا بعفتي .. ووصلت فيهم المواصيل يسون مثل هـ الصور ..!! ما ضنتي بيرضيج اللي سوته أختج فيني !!
نوف وهي تطالع الصوره : لا مستحيل !! غاده ما تسوي جذا !! هي حلفت انه اللي ركبتها بس صوره وحده !!
فاطمه بضيج : يمكن ضحكت عليج !! وبعدين شو الفايده ؟!! انا خسرت كل شي واللي اباه منها الحين ترجعلي كرامتي اللي انهدرت !! وبهـ الطريقة بقدر ارجع عيالي !! تعرفين انه اهل زوجي فروني في الشارع عقب ما شافوا هـ الصوره !! واكيد ما ينلامون ..!!! انا صرت فنظرهم رخيصة !! تروح من ريال لـ، ريال .. أأأأأأأأأأأأأأأأأأأأأأأأأأأأه بس !!!
نوف بضيج : لا لا غاده مستحيل تسوي هـ الشي !! هذي أختي انا أعرفها عدل !
غاده وهي تتنهدت : لا تخدعج الصور يا نوف !! وما تعرفين يمكن غاده سوت هـ الشي عسب غايه فنفسها !!
نوف وبداخلها غصه : لا يا غاده انتي مستحيل تسوين هـ الشي !! لا تخلي صورتج تنهز بداخلي .. انتي مثلي الاعلى
فاطمه وادموعها اربع اربع : ليش انا يصير فيني كل هذا !! بـ الاول خسرت ابوي .. وبعدين امي وعقبها زوجي .والحين يمكن اخسر عيالي وكله بسبة وحده مريضه تبا تسترجع حبها اللي صارله ست سنين واختج للأسف ساعدتها بهـ الشي
نوف وهي تحاول تتهرب من اتهامات فاطمه : اختيه نحن وصلنا كلها شغله دقيقتين وبتتوضح كل الحقايق .. تعالي !!



:::


:::


فــي بيت بو حمــــــــــود

مها كانت توها ناشه من الرقاد وكانت يوعانه وسارت صوب المطبخ عسب تاكل لقمه واول ما نزلت سمعت الباب يدق
مها بضيج : وليه منو ياينا الحين ؟!! اكيد سيلين وسناتا راقدات !! احسن شي اسير ابطل الباب
عندما فتحت الباب رأت شخصا في سن العشرينات ولكن الحزن الذي بداء على وجهه جعله وكأنة شخصا في الستين .. كان وجه يميل الى السواد وعيناه اصبحت ذابلتين لم تتحمل ما رأت واكتفت بدمعه ارتسمت على خدها فما كان منه الا مسح تلك الدمعه ثم ابتسم لها قائلا : مهوووووووووي اشتقتلج وايد ...........!!!
مها بضيج : هلال بلاه شكلك جذا !! اشو اللي استوى فيك !! معقولة كل هذا من الدورة !!
هلال وهو يكتم دموعه : انتي يا مها انتي اللي سويتي فيني كل هذا ..!! حبج اللي سوا فيني هـ السواه !!!
مها بتوتر ممزوج بإستغراب : انا .. هلال انته تعرف عدل اني مستحيل أضرك !!!
هلال بابتسامه ممزوجه بحزن : ادري انج مستحيل تضريني !! وهـ الشي اللي معذبني .. وخلاني أحبج !!
مها بضيج : هلال انته شو تقول !! انا مب فاهمه شي
هلال وهو يتنهد : مها انا مب قادر اعيش بدونج تأكدت اني ما احب خوله كنت بس منبهر بجمالها و انتي حب طفولتي
مها بضيج : ما تلاحظ انك اكتشفت هـ الشي متأخر ...!! ومتأخر وايد بعد ...!!
هلال وهو يمسكلها ايدها : مستعد اسوي أي شي !! بس اشوفج قربي .. مها افهميني الله يخليج .. انا وايد احبج
مها فخاطرها : اااااه يا هلال تأخرت وايد تحسبت بسمع هـ الكلمه في اول ليلة من زواجنا !! بس حسافه من يوم ما تزوجتك وللحين ما ذقت غير طعم الحسره والمراره .. وعيني ما وقفت الدموع كانت مثل السيل على خدي .. والحين عقب كل هذا .. تباني اصدق انك ميت علي وتحبني .. صعبه يا هلال صعبه .. انته خسرتني وانا بعد خسرتك وللأبد
هلال يقطعلها حبل افكارها : مها ما رديتي علي !! بلاج ساكته !! الله يخليج لا تسوين فيني جذا ..؟!!!
مها بضيج : هلال انا بعدني على رائي .. انا وانته ما نصلح حق بعض .. شوفلك وحده تناسبك وكانت تبا تصكر الباب بس هلال أعترض الباب بايده وتمتم بحزن : مها الله يخليج لا تسوين جذا !! لا تتهوين وادمرين كل شي حلو بينا
مها وهي مستغربه :: كل شي حلو !! اصلا من يوم تزوجتك ولا شفت يوم حلو !! بس أنته تحلم كـ العادة !!
هلال بضيج : مها لا تصعبيها علي !! نسيتي لما كنا صغار !!!! الواحد فينا ما كان يفارق الثاني ...
مها وهي تخفي دمعتها : انته قلتها بروحك ((كنا)) عسب جذا حاول تنساني .. انا للحين مب قادر انسى خيانتك وغدرك
هلال بضيج : مها أي خيانه ؟!! انا ما خنتج خبيت هـ الشي عنج ما انكر !! وسويت كل هذا عشان ما اجرح مشاعرج
مها وهي تتمصخر:تبا تقنعني الحين انك يوم سويت هـ الشي سويته عشاني !! العب غيرها يا بابا !! اوراقك كلها صارت مشكوفه وانا مستحيل اسمحلك تتلاعب فيني وبمشاعري واقولك اياها وبالفم المليان..عافك الخاطر يا هلال عافك الخاطر
هلال بعصبيه وهو يضرب الباب بإيده : مها اقولج انا تعبان !! وانتي تقولين عافك الخاطر !!! حرام عليج ارحميني عاد
مها ودمعه ارتسمت على خدها : تباني ارحمك !! وانته اللي ما رحمتني !! ذبحتني من اول يوم تزوجتك فيه !! لو بغيت اسامحك وانسى كل اللي صار .. مأ أقدر يا هلال ما أقدر .. أنا ما أنكر اني حاولت أكثر من مره وما قدرت .. والجرح للحين طري .. الظاهر يا هلال انه مالنا نصيب ويا بعض فطلقني احسن .. وسير دور على حب ينسيك مها !!
هلال بضيج : دام هذا قرارج خلاص .. بسوي اللي يريحج .. من رخصتج وسار صوب سيارته بخطوات بطيئة

:::

مها تمت تشوفه .. وتتأمل الضعف اللي سيطر عليه .. والأنكسار اللي انرسم على ملامحة .. وعقبها صكر ت الباب ويلست ع الارض تصيح وتمتمت بغصة : انته اللي وصلتنا لهنيه !! كله منك .. انته دمرت حياتي وحياتك !! والحين ياي وتباني اسامحك !! انت بدال لا تصلح غلطتك شردت وخليتني بروحي .. باول ايام زواجنا انت دمرتني وقضيت علي !!
والحين بكل وقاحة تقولي أسامحك .. مهما حاولت في شي أكبر عني يمنعني .. والله انه غصبا عني يا هلال !!

::

هلال وهو يتصل بمسعود ومعصب ودموعه في عينه : صدتني يا مسعود طردتني !! لغتني من حياتها !! قالتلي وبكل سهوله عافك الخاطر .. وتمت ترددها اكثر من مره .. كيف قدرت تقولها !! كيف قدرت تنطقها بالسهولة هذي .. هذي مش مها اللي كنت اعرفها قبل لا أسافر .. تغيرت وايد شافت شكلي كيف متبهذل .. ومع ذلك ما رأفت بحالتي !! شو اسوي عسب ارضيها .. انا تعبت قلت لها اني احبها !! بس ما صدقت !! قالت جرحتني مره ومستحيل اخليك تسواها مره ثانيه .. ليش تعاملني بهـ الطريقه !! كل واحد يغلط وانا غلط .. ليش مب راضية تسامحني ليش ..!!!!
مسعود بضيج : هلال هدي نفسك يا خوي ,, قتلك المسألة يبالها طولت بال ..!! اذا هي باعتك تمسك فيها
هلال بضيج : اقولك ما تباني !! كيف اتمسك فيها .. وهي مصره على موضوع الطلاق
مسعود : هي تسوي جذا عسب ترضي غرورها واداوي الجرح اللي غرسته بصدرها وحطم كبريائها تحملها يا خوي ومصير الطير يرجع لعشه وكثر الدق ع الحديد يلينه .. اهم شي انته لا تستلم خل املك بالله قوي .. واكيد بتنفرج
هلال وهو يتنهد : مشكور مسعود من غيرك ما عرفت شو اسوي .. حاسه نفسي فدوامه مالها نهايه
مسعود يقاطعه : لا ان شاء الله كل شي وله نهايه .. انته استحملها شوي واكيد بترجعلك !!


::