حمود اول ما دخل حصل فاطمه تصيح : فاطمه مسحي دموعج خوله تعتبرج اكثر من اخت وهي محتاجتلج الحين اكثر من اول .. عسب جذا انسي كل اللي صار بينا ووقفي معاها ..
فاطمه وهي تتنهد وتمسح دموعها : فعلا حمود كلامك صح .. محد يستاهل دمعه من عيني .. عسب جذا ما راح افكر الا بنفسي وبالناس اللي تحبني وتحاتيني وانت سوا اللي براسك انا ما عاد يهمني شي بسير ابدل من رخصتك
حمود بضيج : سامحيني يا فاطمه الله يخليج سامحيني بس اللي سويتيه صعب اي ريال يقدر يستحمله
مها كانت معصبه واخذت التلفون ودقت لمريم : انا لازم اوقفج عند حدج لهنيه وكفايه مصختيها وايد
مريم بابتسامه : ساروه طالعي هذي مها شو تتوقعين تبا .. اكيد تبا تاخذ رايي فميكبها ..
ساره : انتي ردي وبتفهمين شو السالفه ..
مريم بدلع : هلا مهاااااا اشوووووو !!!!!!!!!!!!!!؟؟؟
مها بعصبيه : سمعي يا مريم بعدي عن حمود احسلج .. الريال عنده حرمه وعيال واللي يالسه تسويه لا يرضي لا الله ولا رسوله .. فيا تبعدين بالطيب او بيكون لي تصرف ثاني معاج
مريم بعصبيه : حووووه انتي ليش اتصارخين علي .. صارخي على اخوج وخليه هو يبعد عني يالس يركض ورايه من مكان لمكان .. صدق حاله يسوون سواتهم ويقطونها على راسي ..
ساره بتوتر : مريم فهميني اشو اللي صاير وليش صوت مها عالي
مها وهي تتنهد : شوفي مريم انتي مش غريبه علي وفاهمه كل حركاتج .. وانتي السبب بكل اللي يالس يصير بينهم
مريم تقاطعها وهي تصارخ : مها ترى انا وايد عطيتج ويه واذا حمود يباني بالحلال ليش ما اوافق وانتي شو حارج
اصلا من الاساس انتي مش من حقج ادقين وتعاتبيني هذي حياتي وانا حره اوافق او لا
مها بضيج : مريم انا حذرتج وانتي عاد بكيفج وصكرت فويها وفرت التلفون فوق الشبريه ..
مريم بعصبيه : والله لا اخليها تدفع ثمن كل كلمه قالتها انا اراويها هالماصخه
ساره بتوتر : مريوم فهميني اشو اللي صاير
مريم بعصبيه : فاطمه متهاوشه مع حمود وحاطين السالفه على راسي انا شو سويت
ساره وهي تتنهد : للاسف كل كلمه قالتها مها صح .. انتي وراء كل المصايب اللي يالسه تصير
مريم وهي تبا تضربها بكف بس وقفت : ساره لهنيه وبس انا ما اسمحلج
ساره وهي توقف جدامها: بلاج وقفتي ضربيني .. مريم كافي الله يخليج اعقلي وخلي حمود فحاله
مريم بعصبيه : شوفوا بالاول كنت مفكره اخليه عند زوجته وعياله بس الحين مستحيل اخليه وانا بتم وراه لحد ما يتقدملي واصير زوجته واقهركم وافش غلي فيكم .. اراويكم
ساره بضيج : الله يكملنا بعقل .. ويبعدنا عن طريق الحراااام
مريم بعصبيه : ساروه انتي وحده بلا احساس احينه انا اختج ولا هالخايسه مها .. بس مب مشكله الايام بينا وربي لادمرج مهوي ولا راح اخليج تتهني طول ما انا عايشه صبرج علي بس .. اوف ما يخلوا الواحد يرتااح
فاطمه تكشخت وبدلت ملابسها وصارت صوب حجرة خوله
مها بضيج : يالله ما ادري لحد متى بتم مستحمله هالمريم احسها غيمه سوداء وما بتنزاح بسهوله
خوله بضيج : مهوي الله يخليج خلي هالكوافيره تخلص بسرعه .. اكيد فاطمه محتاجتلي مابا اخليها بروحها
فاطمه اول ما سمعت رمست خوله دمعت عينها : خوالي انا هنيه غناااتي ولا تحاتين شي انا ما فيني الا العافيه .. اليوم فرحتج ولازم تنسيني وتفكرين بس فنفسج
خوله وهي تمد ايدها : فطوووووم انا من لي غيرج وصدقيني راحتج ابداء مني ومن نفسي
فاطمه وهي تمسك ايدها وتحضنها : وانا لاني احبج واموت عليج نسيت كل همومي وقلت افرح معاج .. وبعدين لحظات الفرح مب دايما تتكرر عسب جذا خلينا نستانس اليوم ونطمش على ام محمد
خوله وهي تنفجر ضحك : لا حرام عليج خلي الحرمه في حالها .. كافي مها ناويه عليها اليوم
مها تقاطعم وبابتسامه : صادقه فطووم وربي خاطري ومتحمسه اشوف عيوز النار شو مسويها بحالها اليوم
خوله وهي اونها معصبه : لا عاد لهنيه وبس انا ما اسمحلكم .. هذي عمتي ولازم تحترموها
مها وهي ميته ضحك : الله والعمه عااد .. صدق انها تشرررررررررف ولا شرايج فطوم
فاطمه بابتسامه ممزوجه بحزن : درر مهوووي انتي دومج صح وخوله الغلط
خوله بابتسامه : وليه بيقلبوها علي احينه
ام حمود كانت يايه تزقرهم ومعصبه من خاطر : لعنبوه انتن وين العرب بيووا ولا وحده فيكم نزلت
مها وهي تحضن امها : امايه حبيبتي لا تعصبين عسب ما تستوين عيوز بسرعه خليج ريلاكس
ام حمود بعصبيه : عيوز فعينج يالله طوفن جدامي
خوله بدلع : امايه انا انزل ..
ام حمود : لا حبيبتي انتي تنزلين عقب .. هذي العادات
مها وهي اونها زعلانه : امايه انا مالي خص .. انا بعد بنزل مع خواااالي ..
ام حمود : فطوم انا بنزل وهاتي مها من شعرها وانتظرج تحت لا تتاخرين .. نفس ما قتلج من شعرها
مها وهي اونها زعلانه : امايه حرام شعري بيخترب .. رفقا بالقوارير
فاطمه وهي تمسكها من ايدها : اقول انتي هذرتج ما تخلص خلينا ننزل بالطيب لا اشدج من شعرج ..
مها بخوف : لا الله يخليج من الصبح وانا يالسه اسنعه يالله طوفي جدامي وانا بنزل وراااج
فاطمه وهي تهز راسها : لا حبيبني هاللعبه مش علي انا تبين خالوه تعصب علي يالله طوفي جدامي
مها : اوووف منج طالعه قويه شرات امايه
خوله وهي ميته ضحك عليهن : يحليلكن تكسرن الخاطر الله يديم المحبه ..
~ ~ ~ ~ ~ ~ ~ ~ ~ ~ ~ ~ ~ ~ ~~ ~~ ~ ~ ~ ~ ~ ~ ~ ~ ~ ~ ~ ~ ~
فـــــــــــــي آلسياره
روضه : خلود متى بنوصل بيتهم وايد بعيد ..
خالد : والله عاد شو نسوي نصيبنا جذا بس لا تشغلين بالج شوي وبنوصل

روضه : خلووود والله متلهفه على شوفة خوله .. واخيرا بشوفها
بو خالد وهي يضحك : روضه والله اللي يسمعج يقول انتي اللي ناويه تعرسين مش خالد
روضه : باباتي بلاك قلبت علي ما سويت شي .. وحده ومتلهفه على شوفة حرمة اخوها فيها شي يعني
ام محمد فخاطرها : الله والحرمه عااااااااااااااد وحده عمياء ومعتمده على غيرها
بو خالد : لا يا بنيتي ما فيها شي اركدي قربنا نوصل
روضه : خلود ياويلك لو طلعت وحده شرانيه ترى ما بوافق
خالد بابتسامه : يا سلام ومنو انتي حتى ما توافقي الحمدلله ابويه بعده عااايش
روضه وهي تضربه على ايده : دب وااااحد صدق انك ثقيل دم
بو خالد وهو ميت ضحك على حركات عياله : بسكم هواااش ام محمد بلاج ساكته
ام محمد بتوتر : هاه لا ما فيني شي بس ما عندي شي اقوله
خالد بابتسامه : واخيرا وصلنااا
روضه : اممممم صراحه بيتهم ناااايس ووشكله وااااسع
بو خالد : ههههه وانتي ناويه تخطبين البنت ولا البيت
روضه بدلع : باباتي انا اسوي حركات العيايز هالايام اول شي يشوفن المظاهر وعقب البنت
بو خالد : يعني قصدج اذا البنت فقيره ما يزوجونها حق ولدهم
روضه بابتسامه عريضه : بالضبط هذا اللي اقصده باباتي
خالد وهو مستعيل : ابويه مطولين سوالف ولا ننزل
بو خالد : لا ياوليدي تعرف اختك من تبداء تهذر ما تسكت .. يالله خلوننا ننزل
فــــي آلميلس عند آلريــــآييل
بو حمووود : فهد وين الدخووون الظاهر امك راح من بالها ياليت لو تروح وتذكرها
فهد : ان شاء الله ابويه على امرك .. تامر امر
بو حمود : لا تتاخر ما باقي شي وبو خالد وولده بيكونوا عندنا
فهد راح يركض صوب المطبخ : امايه ... امااايه
ام حمود : هاه فهود بلاك تنافخ
فهد : امايه ابويه يقولج وين الدخون
ام حمود : وليه تصدق رااح عن باالي انتظرني خمس دقايق وبيكون جاهز
فهد : انزين امايه انا بترياج .. بس ليش هالخساير كلها .. امايه عادي اخذ حبه
ام حمود وهي اطالعه بنص عين : جرب وبتشوف شو اللي بيصيرلك
فهد بابتسامه عريضه : تصدقين امايه خاطري اسوي حركه من زمان ما سويتها
ام حمود : فهووود بطل حركات الصغيرين وقر مكانك احسن لك .. ترى بهالخاشوقه على راسك
فهد اول ما شاف امه صاده خذ حبة كيك وقعد ياكلها بشراهه
ام حمود بعصبيه : فهد الظاهر انك ما تسمع الكلام انا اراويك
فهد وهو يالس يركض وميت ضحك على امه .. امايه الله يخليج حبه وحده ما تضر
روضه: خالوه نحن ندخل من هالباب ؟؟؟!!!!!!!
ام محمد بدون نفس : هيه تعاالي الباب الثاني ميلس الرياييل ما تشوفين خالد وابوج ساروا هناك
روضه وهي ترفع حواجبها : ما ادري الصراحه قلت يمكن بنيلس كلنا رباعه
فهد اول ما بطل الباب حصل روضه فويهه
روضه وقلبها يدق بسرعه وصرخت : لاااااااااااااااااااا
فهد بخجل : سامحيني اختيه ما جان قصدي اخوفج
ام محمد فخاطرها : وليه الظاهر كل اللي فهالعايله ميانين اللهم يا كااافي
روضه بتوتر : ما عليه اخوي حصل خير
فهد وهو مستحي من نفسه : سامحيني اختيه والله ما قصدي اسبب لج احراج عن اذنكم احينه
روضه وهي طول الوقت واقفه متصلبه ولا ردت عليه .. كانت قاعده تتأمل كل شي فيه
ام محمد : روضه بلاج واقفه خلينا ندخل ..
روضه وهي تصد صوب فهد كانت خايفه وفنفس الوقت ودها تنفجر من الضحك لانه شكله كان متخيس بــ للكريما
فهد وهو ياشرلها من بعيد : والله اسف ما كنت اقصد
ام محمد بتوتر : روضه خلينا ندخل فضحتينا .. كليتي الريال بعيونج
روضه وهي تنتبه لام محمد : هاه خالوه شو كنتي تقولين من شوي ما انتبهت عليج
ام محمد بعصبيه : اكيد ما بتنبهي خلينا ندخل احينه
روضه وهي تصد صوب رواء بس ما حصلت فهد وضحكت : ياربي الظاهر انه هالولد مينون.. بس دمه خفيف
ام محمد : روضه تكلمين نفسج
روضه وهي ميته ضحك : خالوه يالسه اذكر هالريال اللي مر علينا شفتي شكله يضحك جان متخيس بالكريما
ام محمد : انزين لاحقين على هالسوالف .. وبتشوفي وايد ؟؟!!! بعدج ما شفتي شي للحين
مها وفاطمه اول ما شافوهم راحوا صوبهم
فاطمه بابتسامه : يحي الله بمن شرفنا حدروا البيت بيتكم
مها وهي تبوس روضه : انتي اكيد روضه صح
روضه بابتسامه : وانتي اكيد مها صح
مها : ايه اخر مره تعارفنا جان بمضااارب وان شاء الله اليوم بقدر اعدل صورتي يمكن في البدايه تتحسبيني شرانيه وقوية عين بعد ولا انا غلطانه
روضه وهي ميته ضحك وتتذكر كلام ام محمد : هيه بصراحه فاخر مره خفتج اطقيني
مها بابتسامه : حشا مب لهالدرجه عاااد............... تراني طيبه وحبوبه
فاطمه وهي تسلم على روضه : شحالج روااضي حدروا لا تموا واقفين ع الباب
مها : تفضلوا تو ما نور المكان تفضلي خالوه البيت بيتج وخذي راحتج
ام حمود وهي يايه صوبهم : تفضلوا بلاكم واقفين عند الباب حدرووا البيت بيتكم
روضه وهي تصد صوب وراء وتحاول ادور على فهد بس ما حصلته وعقب صكرت البشكاره الباب ..
مها : روضه حدري حبيبتي بلاج واقفه
روضه وهي مستحيه : لا فديتج بس اترياج تقوليلي دشي
فـــــي آلميلس
بو حمود : حيالله بو خالد وخالد تو مانور المكان
بو خالد : بوجودكم اشحالكم وش اخر علومكم وكيف الدنيا معاكم
بو هلال بابتسامه : انته تفضل استريح وعقب بنتفاهم على كل شي لا تم واقف
خالد وهو يسلم على حمود : شحالك حمود
حمود : يسرك حالي بو الوليد انته شحالك
خالد : الحمدلله ماشي حالنا نشكر الله وراح صوب فهد واول ما شافه كانت فيه كريمه فوق شفايفه ومسحها بايده
فهد وهو ميت ضحك: خلووود كانت كريمه صح
خالد وهو يضحك : هيه اعترف شو ماكل
فهد وهو يتذكر ويحاول يفهم ليش روضه خافت منه: والفشيله صدق انفضحت
خالد باستغراب : حوووه نسيت اني ربيعك يعني من جهتي عااادي واذا فيه حد ثاني عاد هذا شي يرجعلك
فهد بتوتر : لا انا ما قصدت احد ثاني كنت اقصد ابوك خفته شافني بس ما علق
خالد بابتسامه : تحريت بعد فيه احد ثاني شافك واذا على ابويه لا تشغل بالك تراه وايد يطوف وينسى على طول..

مــن آحــــدآث آللحــــظة آلخـــآمسة عشـــر


::



::

ام محمد وهي سرحانه : والله هالبنت من جهة حلوه حلوه .. بس اللي شاغل بالي خالد كيف بيقدر يعتمد عليها .. اكيد منبهر من هالجمال ... بصراحه لو انا ولد جان ما فوتها .. صدق حليوه .. بس مش احلى مني الله خلق وفرق

~ ~ ~ ~ ~ ~ ~ ~ ~ ~ ~

روضه اول ما سمعت صوت فهد ارتبكت : وليه هذا شو يابه احينه .. احسن شي اشرد قبل لا يشوفني واتوهق
فهد : اممم الظاهر الحلوه معصبه علي من خااطر .. احسن شي ادش وارضيج
روضه اول ما يات تطلع وقف فهد جدامها وكان مغمض عيونه .. فهد وهو اونه يصيح : امايه سامحيني
روضه بتوتر : .......................................


~ ~ ~ ~ ~~ ~ ~~ ~ ~ ~~ ~ ~ ~ ~ ~

ام هلال تقاطعه : شوف هلال انته ولدي الوحيد وبصراحه انا ابا ازوجك شيخة الحريم .. وتبا الصراحه لو كنت ماخذ خوله انا اول وحده بترفض .. وبتشوف اللي ما يسرك .. بس يالله انمشي الحال فهالدعله مها .. شي اهون من شي
هلال بعصبيه : امايه ما توقعت انه قساوتج توصل لهالدرجه .. خافي الله يمكن الله يبتليج بنفس مرض خوله