الفصل الثاني والعشرين


قامت ديما من نومها قبل الفجر بنص ساعة .. الغت المنبه

لانها راح تنتظر الفجر بنفسها ، وقامت وتوضت وصلت

الوتر وجلست تقرأ وردها وهي تنتظر الأذان .. وزياادة على هدوء

مشاعرها اللي نامت عليه امس .. زادتها تلاوة القرآن هدوء

وطمأنينة اكثر خصوصا في هالوقت المبارك اللي تتنزل فيه

الملائكة من فوق سبع سماوات ..
.
.
.
.
وفي الجهة الثانية ، وخلف الجدار الفاصل . كان صاحي من
بعد ما جافاه النوم من الليل لهذاالوقت ..
شعور غريب ما يعرف له تفسير بدأ يزعجه ويأرق بااله ..
كل شي ماشي تمااام وعلى افضل وجه ..
وش اللي يخنق على انفااسه بهذاالشكل ؟؟
وكل ما فكر بالاسباب ..لقا اكثر من سبب لهالضيق ،،واللي منها حبوب المخدر اللي للحين مو قادر يتركها نهائياًَ ،،
واللي كلها اسباب كانت،، بلاا حلوول في نظره .. او حلولها اللي قدامه تعجيزية .. !!
يدري انه في واحد بس هو اللي ممكن يساعده في اللي هوفيه ..
بس وشلون يلجأ له وهو مازال على هالحال ..
وشلون يطلب منه وهو اصلا مب راضي عنه ولا هو اللي يستحق انه يناظر فيه حتى .. شعوره بالاختنااق زااد ..مع استحقاره لنفسه اكثر .. ..!



قام للشباك وهو يفتحه بقوة ويسمح للهوا البارد
ونسيم الليل يتخلل مجرى تنفسه ...



رفع عينه للسما الصافية والخالية من النجوم ..
متيقن انه يطلع عليه بهاللحظة ..
بس وشلون اذا كان يجهل طريقة الوصول له ..
بقدر ما يعرف انه ضعيف ومحتاج له .. بقدر
ما يحاول يتظاهر بالقوة .. وبقدر ما يبتعد ويتجاهل ...



تراجع لباب الغرفة وهو يقرر اخيرا انه يطلع منها لانه حس
انها امتلأت بالافكار اللي صارت تحاصره من كل جهة ..


.
.
.


كان كل تفكيره انه يروح للحمام ويغرق وجهه بالموية

عشان يفوق ،، لكنه تفاجأ بديما اللي ترتب جلالها بداخل

السجادة وهي تطويها ..



قال بدون تركيز : للحين صااحية ؟؟


التفتت بتفاجؤ وهي تقول بسرعة : لا .. توني صحيت قبل

شوي ..
قال : وش اللي صحاك ؟



قالت : صلاة الفجر !


قال بثقل : آهاا ............ وصليتي ؟


قالت : الحمد لله ..



التفت عشان يطلع من الغرفة لكن فاجئه سؤالها المتردد ..

وزلزله ..



كملت : وانته .. صليت ؟


التفت عليها بسرعة .. ليش لما تتكلم وتسأله .. تسأله

هالسؤال بالذات ..
وليش بالوقت اللي يهرب منه من افكاره .. تجي هي باالذات
وتكلمه في نفس الموضوع اللي مأرقه ..


قال وعيونه على اللحاف اللي ديما قاعدة ترتبه : لا ..

ماصليت ..


التفتت بخيبة امل وقالت : ليه ؟


قال ببرود وهو يتجه للحمام :انا الحين باصلي ..!


شافته يدخل الحمام ويسكر الباب .. ابتسمت بهدوء وخيبة
املها تتبخر ..
طلعت من الغرفة وهي تتسائل عن سبب تقصيره بالصلاة ..
تذكر اخوها عايض لما كان في مثل عمرها ما كان يصلي

وكثير تعذبت امها بسببه .. لكنها تذكر بعد وشلون انقلبت

حاله بعد سنوات وصار يركض للصلاة ركض وصار احرص
منهم على صلاتهم حتى ..!
لامت نفسها شوي على سؤالها وفضولها .. كان ودها من

فترة تعرف اكثر عن علاقته بالصلاة بالذات .. واستغلت

فرصة مناسبة الموقف للكلام .. لكن جوابه المريح كان

يستاهل محاولتها ..
.
.
.
.

واقف بنفس مكانه من بعد ما طلعت ، ومشى بهدوء للحمام

.. قرر انه يصلي .. ركعتين ما بتضره .. لانه قال لديما انه

بيصلي .. ولانه .. لانه عارف ان هذا اللي لازم يسويه بس

كل ماااله يأجل .. وقف عند الحوض وهو يكتشف بعد دقيقة
انه حتى خطوات الوضوء ملخبط فيها وناسي ترتيبها ..

ضرب بقبضته الحوض بعصبية وطلع من الحمام باتجاه

الدولاب ،، فتحه وطلع منه شريط الحبوب وقبض عليه

بأقوى ما عنده ..



اتجه للسرير وجلس على طرفه وهو يدفن راسه بين يديه ..

يناظر الحبوب شوي .. وشوي يبعد انظاره عنها بألم ..



.
.
.

صبت الماي المغلي على الشاي في كوبين ، واخذتهم على
صينية صغيرة ورجعت للغرفة .. ترددت في الدخول لما

شافته جالس على طرف السرير ومعطيها ظهره ، وحاطط

راسه بين يديه بألم ..



فجأة التفت عليها بحركة عنيفة وعيونه كان باين عليها

الاحمرار .. انصدمت من شكله لدرجة انها همست : ايش .. فيه ؟؟؟


ماسمعها ...ورجع يلف لوضعيته الاولى ..



حطت الصينية من يدها على الكومدينه البعيدة منه ..

وماعرفت ايش تسوي .. وقفت بمكانها بحيرة


شافته قابض على شريط ادوية بيده .. خمنت انه مسكن ..

وخمنت انه مصدع .. وتذكرت انها شافته اكثر من مرة

بنفس هذي الحالة ..
قالت : تبي موية ؟؟



ناظرها بتشويش وقال بثقل : موية ؟؟ ايه .....ايه ابي موية ..
راحت تجيب الماي وهي تتمنى لو سألته ايش فيه ؟؟ وش

سبب هالآلام المتكررة ؟؟
رجعت بالماي بعد ثواني .. وناولته اياها .. تركته ياخذ

المسكن واخذت كوب الشاي وطلعت برا الغرفة عشان ياخذ

راحته فيها ..


.
.
.
.
.

راقبها الين ما خرجت من الغرفة .. وتنهد بتعب وهو يتخيل

لو ديما عرفت بمصاايبه هذي .. مو بس راح تكرهه زيادة ..
الا راااح يخسرها .. وللأبد !!!
رمى الشريط من يده بقوة وهو يوعد نفسه انها اخر مرة ..

اخر مرة يخضع لها فيها ..

.
.

لكنه رجع يلتقط الشريط بضعف ، لانه عارف انه لو ما اخذه

معه في السفر .. احتمال كبير تخرب السفرة كلها عليهم !!!!
وهذا اخر شي يبيه يصير !!!!

.
.
.
.
.
.



بفندق من الدرجة الخامسة بمدينة مومباي بالهند .. مستلقي
بعد يوم حاافل وهو يفكر في اخر يوم من هذي السفر ،

بالفوائد اللي استفادها منها .. اولاً .. اكتشف مكان جميل

كانت دائما فكرته عنه سطحية .. الا وهو.. الهند المليئة

بالكثير من الجماال الطبيعي النادر .. واللي استمتع باغلب

المناظر اللي شافها فيها ..



وثانيا .. احمد صديقه بدأ يطلع من حالة الحزن اللي لازمته

ويرجع لطبيعته ..
وثالثا . انه عرف ان الانسانة اللي كان يفكر فيها طول

هالوقت ماهي بنصيبه .. والام ان هالشي ما اثناه عن عزمه
، بالعكس اعطاه امل بأن ربه راح يعوضه بأفضل منها ..



بالامس بلغه فياض بموضوع سفره هو وديما ..وما قدر

يمنع نفسه يقلق في البداية .. لكنه ارتاح للموضوع لما فكر
فيه واقنع نفسه ان الاهم هو راحة ديما وسعادتها مع فياض
.. بأي الوسائل .. خصوصا في بداية حياتهم ..
.
.
.
.
.
.

مايذكر كم مرة لف الشقة في هالنص الساعة اللي غابها

نواف ، والتفت عليه بقلق لما شافه يدخل للمكان وعلى

وجهه حيرة واضحة ..


ايمن بعتااب قوي : وش صار ؟؟ ووين رحت ؟؟ اقلقتني

ياشيييخ !!
نواف يرفع راسه لايمن ويسأله بجدية : انت متأكد ان اللي

شفته هو نفسه من اللي أذووك ؟؟


ايمن وهو يتأفف : ايه يا نوااف متأكد حتى ما شفته وهو

يطالع فيني ؟ يعني شكله عارف اني انا نفسه اللي تعرض

لي مع اصحابه .. بعدين ليش تسأل .. انته وش سويت ؟؟


نواف بنفس الحيرة : انا مشيت وراه .. هو ماشافني معك

فعشان كذا ما انتبه علي .. بس الغريب انه رجع للمكتبة

وجلس يذاكر فيها الين ما ماليت وانا اتظاهر بالقراءة

وانتظره .. سألت عاملة المكتبة عنه واستغربت اني ما

اعرفه .. قالت لي انه من اكثر طلاب الجامعة تفوق وحاصل
على اوسمة تميز وشهادات .. وانه اغلب الوقت بالمكتبة

يقرأ أو يذاكر ..
ايمن بدهشة : غرييب .. !!


نواف : خلاص يا ايمن .. انا بنسى الموضوع الحين عندنا

اشياء اهم نسويها لا تنسى انه فاتنا كثير ولازم نشد حيلنا بهالفترة.. واذا عرفنا شي ثاني عنهم بلغنا اوكيــه ؟؟


ايمن : وقتها يصير خير ان شاء الله ..


نواف :ان شاء الله ....قم نتعشى قم .. والله اني جعت ..


.
.
.
.
.
.

رجعت للغرفة بهدوء .. مر الوقت وهي مو حاسة بنفسها ..
غفت على الكنب الين ما صارت الساعة 12 .. وقامت

عشان تتوضا لان الظهر باقي عليه دقائق .. دخلت وخافت
تفتح الحمام تسوي ازعاج لفياض اللي غرق في نوم عمييق على سريرها .. او سريره السابق ..



تقدمت بشويش من الكرسي القريب من السرير وسحبت

الجلال من عليه ، وهر تراقب ملامحه الثابتة .. وما تدري

كيف طولت بمكانها تناظر في ملامحه اللي كانت مسببة لها
رعب كبير من مدة قصيرة .. انتفضت لما حرك حواجبه

بانزعاج .. وتراجعت بسرعة لبرا الغرفة وهي خايفة لا يكون صحي على حركتها ..
طلت من بعيد على الغرفة وزفرت لما لقته نايم مثل ما كان قبل شوي ..
راحت للمطبخ وهي تحاول بأي شكل من الاشكال انها تتوضا منه ..
.
.
.
.

.
.

في المسا كان لاازم ترتب اغراضها استعدادا للسفر اللي للحين مو مستوعبة فكرته ..

لاول مرة من مدة طويلة راح تطلع برا السعودية ولحالها ..
وبدون ما يكون معها احد من اهلها ..
دخلت الغرفة مستغلة غيااب فياض عنها ورتبت اغراضها

البسيطة في الشنطة وتراجعت لبرا لما دخل فياض يرتب

اغراضه هو بعد ..


ما نامت الا متأخر .. وهي تعيد وتزيد في التفكير حول السفر .. وحول مشاعرها المقلبة يوم عن يوم ...!
.
.
.




قصير ... لكن له تكملة بإذن الله
اشوفكم على خير

الفصل الثالث والعشرين
فك حزام المقعد العريض بعد ما أقلعت الطائرة واستقرت بالجو ..
والتفت على ديما اللي جلست من جهة الشباك تناظر بمعاالم المملكة اللي قاعدة تصغر أكثر وأكثر مع ارتفاع الطائرة ..
ولاحظ انها قاعدة تفرك يدها ببعض تبي تدفيها لا شعوريا ..
اقترب منها ومد يده لفتحة التبريد من فوق مقعدها وغير اتجاههاا .. انتبهت على اللي سواه ورجعت تناظر بالشباك وبداخلها تقول..شكراً ....!

حاول إنه ما يقاطع صمتها ، واخذ المجلات اللي كانت قدامه وبدأ يتصفحها ..
ولفتت انتباهه صفحة المبيعات اللي بالطائرة ..
لف بعد ثواني يناظر معصم ديما اللي طوقته الساعة الفضية الصغيرة اللي اهداها اياها عايض ..
وابتسم وهو يرجع يناظر بالمجلة ..
.
.
مر الوقت.. وبدأ وقت المغرب يدخل ، وأظلمت السما من برا ..
خففوا الاضاءة بالطيارة وصار الجو فعلا يساعد على النوم ..
التفت على ديما اللي مالت واستندت على الشباك وغفت .. وحاول بحركة خفيفة يرفع غطاها اللي مضايقها ..
ظل يراقب ملامحها المستكينة لفترة كان شبه مسكر عيونه فيها .. الين ما انتبه على صوت المضيفين اللي بدأوا يوزعون الاكل على الركاب ..

التفت على ديما وناداها بنبرة خفيفة : ديماا .. ديماا ..؟
فتحت عيونها بعد لحظات ببطىء واعتدلت وهي تناظر بفياض باستفسار ..
قال وهو يأشر على المضيفين : اظن الاكل جا ..
والتفت يسألها بتردد :اسف اني صحيتك.... تعبانة ؟
قالت وهي تنزل غطاها : لا مو تعبانة ..
قال وهو يمد لها كتيب الوجبات عشان تختار منها : خذي ..

.
.
.
مرت الساعات الثلاث بهدوء .. حتى أعلن كابتن الطيارة عن وصولهم ..
وفي المطار كانت بقية الاجراءات بسيطة ، لكن اتأخروا بسبب الزحاام الشديد ..
وكأن الناس ما حلا لهم السفر الا هالفترة ولمصر بالذاات ..
أما ديما كانت ،مازالت مو مستوعبة انها انتقلت في هالثلاث ساعات من السعودية لمصر ،
وابتسمت لما تذكرت الشي اللي قالته لنفسها من ايام .. وتأكدت منه الحين ..
" مع هذا الانساان ..
مستحيل يمر يومين على بعض من دون ما يصير شي جديد ومفاجىء ..
سواء كان حلو او مر "
.
.
التفت عليها يتأكد انها جنبه لان الزحام كان زايد عند منطقة استلام الحقائب ..
شاف شنطهم اخيرا من بعيد ومد يده لديما ،و امسك بيدها عشان ما يقلق ويلتفت كل شوي ..
واتجه ناحية الشنط وانزلها ..حاولت تاخذ شنطتها منه لكنه طنشها وهو يشيلها..
.
ظل ماسك يدها الين ما طلعوا برا المطار ، مكان ما وقفت سيارات الاجرة في صف طويل ..
وتقدم منهم بسرعة رجال باين عليه انه بالخمسينات ..
قال بلهجة عملية : عايز تاكس يافندم ؟
فياض بتردد : ايه ..وينه ؟
قال الرجال بابتسامة : هناك يا بشمهندس ..
واشر على سيارة اجرة قريبة ..
أعطاه فياض الشنط وهو يتقدم من السيارة مع ديما ..
حط السائق الشنط بالسيارة وركبوا وراه بعد ما قال له على اسم الفندق اللي اختاره بتوصية من نايف ..
.
.
.
وطبعا بما أن هذي القاهرة ..فأكيد الزحاام الشديد هو أكثر شي يميزها ..
اضطروا للوقوف في اشارات كثيرة بسبب هالازدحام ..
فياض كان بداخله معصب من الزحمة .. اما ديما فاستمتعت كثير بتأمل الشوارع والمحلات ..
في شي غريب بمصر جذبها ما تدري ايش هو ..؟؟
شي يبعثها على الهدوء والراحة ويدعم شعورها بالاستقرار ..
.
.
نزلوا بعد ما دفع الاجرة للسائق.. واستقبلهم على الباب واحد من موظفي الفندق بحمالة للحقائب ..
ترك له الشنط ودخلوا لباحة الفندق الفخمة وديما مازالت مقيدة بقبضة فياض ..
توجه معها للاستقبال وعرضت عليه الموظفة الاجنحة والغرف الفاضية ..
التفت على ديما وهو يكلم الموظفة : باخذ الجناح اللي بغرفتين ..
ابتسمت الموظفة وهي تسجل بعض المعلومات عندها وتعطيه مفاتيح الجناح ..
سبقهم الموظف بالحقائب واتجهوا للمصعد الزجاجي اللي توقف بهم عند الطابق الخامس ...
تقدم فياض من باب الجناح المنشود وفتحه ودخل من بعد ما دخل الموظف الشنط وتركها فيه ..
المكان كان راقي جدا في تصميمه وديكوراته وفخامته .. لدرجة انك ممكن توقف لوقت طويل تتأمل فيه ...
ودخل فياض يستكشفه ، بالغرفة الاولى سريرين متجاورين.. وملحقاتهم من تسريحات وكمودينات وخزانة وغيره ..
وبالغرفة الثانية .. فتحها .. لكنه التفت على ديما اللي كانت واقفة بالردهة بصدمة ..
استغربت من نظرته ..
قال بعصبية : من الحين بدينا بالنصب ..!!
وراح لباب الجناح وهو يقول : بروح اشوف وش قصتهم ذولي ..
طلع من الجناح والتفتت على المكان اللي كان واقف فيه بسرعة تبي تعرف وش اللي ازعجه ..
واكتشفت انها حمام كبير مو غرفة.. هزت راسها باستيعاب .. وفتحت الغرفة الثانية تشوفها ..
اذهلها الفندق ... يمكن لان صورة مصر كانت في ذهنها شي.. واللي تشوفه الحين شي ثاني ..
الغريب انها ما تخيلت فيها اماكن بهذي الفخامة .. مع انها تدري ان فيها كثير ..بس الاعلام يعطي صورة طاغية احيانا..
سكرت الغرفة وجلست بالردهة على الكنب تستنى فياض .. اللي دخل بعد دقائق وهو مكشر ..
قال بحيرة وهو يجلس مقابلها : الغرف الفاضية كلها فردية ..
قالت بتردد وبدهشة ما قدرت تخفيها : ....هذي الغرفة .. وش فيها ؟؟
قال وهو مو مستوعب انها ما انتبهت للحين : هذي غرفة وحدة يا ديما ..
قالت بحرج : آآ ..عارفة ..
قال وهو يقوم من مكانه ويتجه للحمام : الحين خلينا نروح نتعشى وبعدين نشوف وش الحل ..
هزت راسها بموافقة ..
وقامت تعدل حجابها قدام مراية المدخل ، وهي تفكر كم ساعة مرت من بعد ما أكلت ..
لانها ما ودها تكسر بخاطره وتقول انها مو جيعانة .. !
.
.
.
ولحسن الحظ ما ابتعدوا كثير عن المنطقة لان بجنب الفندق كان فيه مطاعم كثيرة ..
لكن نظامها كان مختلف ، وما قدرت تاخذ راحتها بالاكل بسبب الناس اللي كانوا حولهم من كل صووب ..
واللي ازعجها اكثر الانظار اللي كانت موجهة عليهم هم بالذات كسيّاح..
وارجعت السبب لحجابها الاسود الشامل وملابس فياض ، الثوب والغترة واللي كانوا اكبر دليل على انهم مو من اهل مصر ..
رجعوا للجناح واانتبهت وهم جايين على الساعة الكبيرة في ردهة الفندق واللي كانت على الساعة ثنتين ..
الوقت كان صدمة لها لان مافي أي شي يدل عليه ..
المحلات كلها مفتوحة و الناس كلها صاحية وبالعكس يمكن الازدحام الحين صار اكثر مما كان عليه قبل ..
دخلت معه للجناح وهي ترجع بتفكيرها لموضوع الغرفة الوحدة ..
شافت فياض يرفع شنطته على الكنب ويفتحها ويدوّر فيها .. وياخذ ملابسه ويدخل للحمام ..
اخذت شنطتها وطلعت لها بيجامة موف واسعة قطنية وحطتها بأعلى الشنطة وهي تجلس على الكنب تنتظر اللي راح يوصل له الموضوع ..
بعد ما خرج فياض شافته يدخل للغرفة ،
تجاهلت الموضوع مؤقتا و اخذت ملابسها ودخلت للحمام ..
تغسلت على السريع بدون ما تبلل شعرها وبدلت.. وطلعت وهي تتمنى انه يكون حل الاشكاال ..
وفعلا اعصابها ارتاحت وهي تشوفه مستلقي على الكنب اللي بالصالة ومعه لحاف ومخدة شكله ماخذهم من الغرفة ..
التفت على مكان وقوفها وهو يناظر شكلها بالبيجاما .. اول مرة تغير القمصان الواسعة اللي اعتاد يشوفها فيها ..
وقال بعد لحظة : خذي راحتك بالغرفة ..انا بنام هنا ..
التفتت على الغرفة وهي تحس برغمة عارمة انها تشكره ...
.
.
حطت راسها على المخدة وهي تتثاوب ...
وناامت وهي تحسب عدد الايام اللي مرت عليها للحين بهدوء وسلاام .. مع فياض ..

.
.
.