آلۈضع مـآ يطمن .. ۈأحس بمصيبـﮧ ..!!
لآ مآ آتشآئم .. بس هذآ شعۈريے ..
.
.
يمڪن فرآق .. ۈهم .. ۈدنيآ ڪئيبـﮧ ..
يمڪن جديد فـ دنيتڪ عآش دۈريے !!


في بيت فيصل

على دخلت لمى للبيت كان التلفون الثابت يرن بشكل مستمر
رفعت ليان السماعه وهي مستعجله
ليان : الوو
فيصل : هلا حبي زين اللي رديتي
ليان : ماعليه ياعمري عندي ضيوف ومشغوله ليه تبي شي
فيصل : لا بس اشتقت لك وجوالك على طول مشغول والبيت ماتردون عليه
ليان وهي محرجه انها الى الان ماستقبلت لمى ولا سلمت عليها : حبي انت رايق وانا مشغوله اخليك الحين بااي
فيصل : ول وش هالطرده طيب حبي ترى بجي انا وليد بعد صلاة العشاء جهزو لنا العشاء
ليان : الله يحييه يله حبي باي
قفلت منه وسلمت على لمى اللي اخذتها في الاحضان وبينت انها مشتاقه لها حيل
لمى : ساحرك فيصل ونساك حتى اهلك
ليان : الدنيا كلها ماتنسيني اهلي لكن وش تبيني اسوي اذا اهلي مايبوني
لمى : ليان فيه كلام كثير بقوله لك بس مو قبل لاتضيفيني ونجلس مع منالوه شوي قبل لاتذبحنا
منال : زين تذكرتو اني مازلت موجوده
ليان : ههههههههههه وربي نستني شوفتها كل شي عن اذنكم دقايق بقولهم يجبون الضيافه ويجهزون العشاء لفيصل وضيفه
لمى : ليان متى بيجي زوجك
ليان : بعد صلاة العشاء بس ليه تسألين
لمى : فشله نجلس وهو موجود عشان كذا قبل لا يجي بنمشي
ليان : وربي ماتطلعون قبل لاتعشون ونسهر مع بعض واذا على فيصل بيجي معه وليد وبيتعشون هنا يعني بيكون مشغول معه
منال : اذا كذا اجل احسبي احسابنا في العشاء
ليان وهي تبوس منال على خدها : فديت الحلوين اللي يجبرون بخاطري مو اختي اللي تدور الفكه
لمى وهي تسوي نفسها زعلانه : الحين انا اللي طلعت شينه وادور الفكه عشاني ابيك تأخذين راحتك مع حبيب القلب وماابي نشغلك عنه
ليان وهي تضم لمى : آآآآآهــ يالمى لو تحسين بفرحتي بشوفتك وجلستي معك كان رحمتي حالي وماطلعتي من عندي (وهي تبعد عن لمى وتحضن وجه اختها بين ايديها الثنتين)وربي يالسعاده اللي احس فيها لو وزعتها على كل العالم لــ كفتهم وفاضت بس لو امي وابوي يسامحوني ويحننون قلبهم علي كان صرت اسعد مخلوقه على وجه الارض
لمى وهي تحضن اختها بصدق وحب لااول مره : ليان انتي مااخطيتي بحقهم عشان يسامحونك انتي اللي سامحيهم وسامحيني
ليان ودموعها على خدها : ربي يشهد يالمى انكم لو تقطعوني وترمون لحمي للكلب مسامحتكم ومحللتكم دنيا واخره
منال والوضع اللي يصير قدامها ابد ماعجبها وهذا اللي هي خايفه منه : ليان وين ضيافتك وحلاك ترى بغير رأيي واقول عنك بخيله
ليان بضحكه وهي تمسح دموعها : هههههههه دقايق وتكون عندكم احلى ضيافه واحلى حلا لــ احلى اخت وبنت عم
قامت ليان من عندهم واول مااختفت عن انظارهم
منال بعصبيه : قلبي يقول ان اللي صار قدامي صدق مو تمثيل
لمى بخوف : منال وربي كسرت خاطري خلاص شيليها من راسك وشيلي فيصل ترى مو من نصيبك
منال والشرر يطلع من عيونها : كذا بكل بساطه تقولينها وتبيني اتقبلها اجل لو قلت لك ان خالد ماراح يكون من نصيبك وش بتسوين
لمى بكذب بس عشان تبعد منال عن ليان : بقول الله يهنيه مع اللي يختارها لو ربي كاتبه من نصيبي ماراح يأخذ غيري ولو ربي كاتبه من نصيب غيري مافيه شي بيخليه يكون من نصيبي
منال بتهديد : كيفك بس لاتنسين اني قلت لك قبل ياتكونين معي او تكونين ضدي ولاتنسين صورك والاشرطه اللي عندي ومازلت محتفظه فيها واقدر اسوي فيها شي مايخطر حتى في بالك
لمى بخوف حقيقي لانها تعرف مدى حقارة منال : وانا قلتها لك قبل انا معك على طول وبدون ماتهددين بس وربي كسرت خاطري
منال : دامك معي سوي اللي اقولك عليه واتركي عنك هالتفاهات او وربي يالمى لا اقلب الدنيا عاليها واطيها علي وعلى اعدائي
لمى تغير السالفه : انتي اهدي ومايصير الا اللي تبين بس مو خايفه تشوف الرقم والرسائل وتتصرف قبل لايشوفها فيصل
منال بسخريه : اختك هذي من العصر الحجري وماتعترف بشي اسمه جوال تصدقين من جيت وانا اخذه جوالها ومسويه مكالمه مع سعود وهي ولا تدري وين جوالها فيه بس صراحه خفت لما اتصل فيصل على البيت قلت اكيد بيسألها وتنتبه بس انتي جيتي في الوقت المناسب وانشغلت فيك
لمى : بس مازال فيه احتمال وكبير بعد انه مايفتش جوالها او ان ليان تشوفه قبل
منال : حاطه هالاحتمال براسي وعشان كذا قلت لك تجين وضبطت الوضع مع سعود
لمى : اشلون مافهمت
منال : بعدين افهمك على كل شي بس ابي منك اذا جت ليان وجلست شوي تقولين لها انك تبينها بموضوع وخليها تأخذك لغرفتها على اساس تبغينها لوحدكم واذا طلعتي لغرفتها كملي المسرحيه السخيفه اللي من شوي ولاتنسين تنزلين كم دمعه عشان يضبط الدور وخلي جوالك على الهزاز عشان اذا اعطيتك رنه تقولين لها تنزل عندي وانتي بس تهدين وبتنزلين
لمى بأستغراب : وليه كل هذا
منال : اول ماتتركك وتنزل حطي هالصوره (وهي تطلع هالصوره من شنطتها) بدولابها تحت ملابسها وبعدها روحي اوقفي عند شباك جناحها اللي يطل على البوابه الرئيسيه بتشوفين سياره بيضاء صغيره واقفه قريب منها لاتتحركين حتى تمشي هالسياره البيضاء اول ماتمشي السياره تعالي ركض هنا
لمى وهي من جد خايفه من هالمخطط : طيب فهميني وش بنستفيد من كل هذا وش سالفة هالسياره
منال : بقولك بعدين على كل شي انتي بس سوي اللي اقوله والحين روحي راقبي الوضع ان شفتي العله جايه عطيني اشاره لاني بكلم سعود
قامت لمى وراحت لليان في المطبخ ومنال طلعت جوالها واتصلت على جوال سعود الثاني
منال : هلا سعود وينك
سعود : وش هالاسراف دام الخط الثاني مفتوح ليه ماكلمتيني منه
منال : ياقلبي الجوال الثاني مااقدر اطلعه اخاف يشوفونه معي المهم انت وينك
سعود : ويني يعني قاعد اتأمل هالقصر اللي شكلك بتورطيني مع اهله
منال : سعود عن الغباء وش اورطك هذا بيت جدي وبعدين انا بعرف وش مخوفك دام الشريحه سوا وبدون اسم وحتى السياره مو بأسمك
سعود : طيب صاحب هالبانوراما السوداء متى بيجي
منال : تقريبآ بعد صلاة العشاء لكن خل صاحبك يراقب زين
سعود : تطمني موقف على اول الشارع وبس يشوف سيارته بيتصل علي لكن ترى اخذ مني 5 الاف عشان هالخدمه
منال وهي عارفه انه يكذب لان كل ربعه مثله ذابحهم الفقر لو عطاهم 100 ريال وافقو : مو مهم بس اطلع من هنا اعطيك اللي تبي لو سويت كلامي بالحرف
سعود : افا عليك قلت لك اعتمدي انا سعود
منال : اوكي انا بقفل الحين بس لاتنسي تنهي المكالمه اللي على الجوال الثاني اول ماتشوف فيصل وتمشي من عند البيت
سعود : صار ياقمر
قفلت منه وطلعت جوال ليان تشوف الخط مازال مفتوح مع سعود او لا تطمنت ورجعت الجوال تحت مخدة الكنبه
اما فيصل فكان يتصل كل شوي ويشوف الجوال مشغول لان العله منال الغت خاصية الانتظار استغرب انه طول الوقت مشغول لان مو من عادة ليان تكلم كثير لكن ماهتم

ــــــــــــــــــــ .. ــــــــــــــــ .. ـــــــــــــــــــــ

بكيتني وأحزنتني وانسيتني معنى السرور
أرخصتني رخص التراب اللي تدوسه وبعتني
صار النهار بناظري كنه العتمه بسـحور
رفعتك فوق الراس وبالمقابل هنتني
لأنك ردي فوق الردى كلك على بعضك غرور
ودي تحط عينك بعيني وتعترف"ما صنتني"
قلبك الأسود غدى اقسى من صلوب الصخور
وصلتني لــ حد الجنون وللاسف دمرتني
والحين جاي تقول آسف !!!
ب"آسف ترى حبك غدا غبره تطيرها الطيور"

صحى من نومه وشافها مازالت بحضنه وهاديه حيل لكن كانت تناظر فيه بطريقه غريبه
حس طلال ان هالنظرات فيها لوم وعتاب وحزن ماله آخر على كثر ماتعبته هالنظرات لكنه فرح فيها توقع ان لين رجعت له وتعافت
طلال بلهفه : لين حبيبتي كيفك الحين
لكن لين مثل ماهي اللهم ان النظرات اللي لمحها طلال اختفت وحل محلها الجمود
طلال بحزن : لين ارجوك لوميني عاتبيني سوي فيني اللي تبين لو قتلي يريحك اقتليني بس ارجعي لين القويه ارجعي لين اللي اعرفها
ضمها على صدره مايبيها تشوف دموعه اللي خانته وهي كانت مثل ماهي جسد بدون روح مثل الدميه يحركها طلال بين يديه
طلال من اشد الناس كرهآ للظلم لانه تأثر بالظلم اللي صار لفيصل من اعمامه وانزرع هالشي بنفسه من صغره كره اعمام فيصل برغم انهم ماعمرهم اذوه بس لانهم ظلمو فيصل وعيشوه بمعاناه من صغره كرهم من ظلمهم لدرجة انه لما استلم شركات ابوه كان كل ماصحى الصباح يدعي ربه يكون مظلوم ولا يكون ظالم
تعوذ من ابليس وقام عشان يتوضى ويصلي اللي فاته لكن قبل لايدخل دورة المياه ناظر بلين اللي كانت تحرك عيونها بــ ارجاء الغرفه بخوف راح لها وجلس بجنبها على السرير
طلال وهو يمسح على شعرها : حبي انا بدخل اتجدد عشان الصلاه وبخلي الباب مفتوح
لكن هالشي ماسكن الخوف اللي تحس فيه ومسكت يد طلال دلاله على رفضها
احتار طلال مايدري وش يسوي صعب يستمر الوضع كذا ولازم يكلم كاميليا عشان تجي تسكن ولو بشكل مؤقت الين ماتتعافى لين
اخذها طلال معه لدورة المياه وتجدد للصلاه وطلع يصلي وهي تمشى معه مثل ظله
خلص من صلاته واخذها معه للصاله وكلم كاميليا شرح لها الوضع وطلب منها تجي تبات معهم كم يوم حتى تتحسن لين لانه صعب تنترك لوحدها لو ثواني
كان طلال واثق ان كاميليا ماراح ترفض لانه عارفه وش قد هي حنونه ومستحيل ترفض له طلب وفعلآ هذا اللي صار ووعدته انها بتجهز نفسها وخلال ساعتين بتكون عنده
(كاميليا هي السيده البريطانيه اللي كانت تهتم بطلال وبشقته خلال هالخمس سنوات حبت طلال كأبن لها لانها انحرمت من الاطفال بسبب عقمها وقدر طلال بأخلاقه يغير نظرتها للاسلام اللي الاعلام الغربي شوه صورته وصور المسلمين على انهم ارهابيين ومجرمين لكن معاشرتها لطلال واهله عرفتها ان كل اللي يروج عن الاسلام مجرد كذب وتضليل وهالشي حمسها انها تقراء الكتب اللي كان يهديها لها طلال واللي تتحدث عن الاسلام قراءة عن تحريم الاسلام للحم الخنزيز ولكل مايذهب العقل من المسكرات واللي الطب اثبت خطورتها على الانسان وهالشي خلاها تتركها وعن قناعه وبالفتره الاخيره كانت تحرص انها تحضر الندوات اللي تتحدث عن الاسلام واللي كانت تنظمها الجاليات الاسلاميه في لندن لكنها الى الان متردده انها تعلن اسلامها)
اخذ لين معه للمطبخ عشان يحضر لها شي تأكله لانها طول اليوم مااكلت غير كم ملعقه من الشوربه
وبحكم انه مايعرف يطبخ اكتفى بأنه يسوي سندويتشات مرتديلا وجبن ويصب لها كأس عصير لكنها رفضت تأكل واكتفت بأنها تشرب ماء وطلال سوى مثلها لان مو هاين عليه يأكل وهي رافضه الاكل
تذكر سؤال الدكتور له اذا هي بطبيعتها من الاشخاص اللي يخافون من الظلام او الحشرات وانه وعد الدكتور يسأل ويرد له خبر
لكن احتار مايدري مين يسأل لانه مايبي احد يعرف عن حالة لين وخطر في باله فيصل وانه ممكن يتصرف ويجيب له اجابه عن هالسؤال بدون مايثير شكوك احد لكنه اجل اتصاله لفيصل حتى تجي كاميليا وتجلس مع لين لانه مايبي يكلم فيصل وهي تسمع
اخذها معه للبلكونه اللي كان الجو فيها خيال برغم البروده جلس على الكرسي وجلس لين على رجليه ضمها على صدره بيد واليد الثانيه صار يمسح فيها على شعر لين تمنى يدفع عمره بس يعيش نفس هاللحظه مع لين وهي متعافيه لانه كان متأكد ان استسلامها له ورضاها بكل اللي يسويه نابع من حالة الضعف فيها ولانها مو مدركه لكل شي حولها والا لو كانت بوعيها مستحيل تسمح له حتى انه يقرب منها فما بالك بأنه يلمسها او يضمها

ـــــــــــــــ .. ـــــــــــــــــــ .. ــــــــــــــــــــ

استأذنت لمى من منال انها تبي ليان بموضوع خاص وتظاهرت انها بتقوم عشان تترك لهم المجال لكن لمى على طول تكلمت
لمى : لا والله ماتقومين انا بطلع مع ليان لغرفتها وانتي خليك مرتاحه
انحرجت ليان من منال لكنها كانت متلهفه تسمع الشي الخاص اللي بتقوله لها اختها
ليان : منال لاتكونين زعلتي ياقلبي
منال : وش يزعلني حبيبتي ولو بتعامليني كــ ضيفه ترى بمشي
لمى : اجل انطقي هنا الين نجي (وهي تمسك يد ليان وتقومها) بهالاسلوب ماراح تحس نفسها ضيفه
منال : ربي راحمك ان ليان فيه لكن مصيري انفرد فيك واطلع هالكلمه من عينك
لمى وهي تأخذ ليان وتمشي : زين نبهتيني عشان ماعاد اقابلك الا وليان معي
عرضت عليها ليان انهم يرحون للمجلس لكنها رفضت وتحججت انها بتشوف جناح ليان لانها ولا مره شافته
طلعو للجناح وجلسو في الصالون
لمى بأهتمام حقيقي : ليان طمنيني عن لين ماتدرين عن اخبارها
ليان : ليه هي ماتكلمكم
لمى : لا ياليان لين زعلانه على امي وابوي لانهم زوجوها طلال بالقوه بس انا وش ذنبي تقاطعني معهم
ليان بصدمه : اشلون زوجوها بالقوه انا سألتها لما كنا بالمزرعه وقالت لي انها مبسوطه وراضيه ان الزواج تم بسرعه لانها مقدره ظروف طلال وانشغاله
لمى : تكذب عليك لين ماتزوجت طلال الا بعد ابوي ماقطع جسمها من الضرب وحبسها بغرفتها بدون لا اكل ولا شرب
ليان وهي تحس ان كل السعاده اللي كانت فيها تبعثرت ومابقى مكانها غير الهم : وليه ابوي يسوي كذا وانتم وينكم ليه مارفضتو
لمى ودموعها تنزل : ابوي مقابل الفلوس يبيعنا ومايحتاج اقولك عنه اتوقع انتي اكثر وحده عارفته
ليان والعبره خانقتها : الله يسامحك يابوي .. تدرين ان حتى انا ماسمعت صوتها من اخر ليله كانت فيها بالمزرعه
لمى : توقعت انها تكلمك لانها ماتبي تكلمنا لكن دامها حتى انتي ماتتصل عليك فــ معناها ان طلال هو اللي مانعها
ليان : لا طلال طيب ومايسويها وانا البارح قلت لفيصل اني ابي اكلمها ووعدني يتصل على طلال ويجيب لي رقمها منه
لمى : ارجوك ياليان سلميلي عليها اذا كلمتيها وقوليلها اني احبها مهما اختلفنا وربي ياليان ماحسيت بقيمتكم الا لما بعدتو عني (وبدموع حقيقيه) من صغر عقلي كنت اغار منكم لانكم احلى مني
ليان وهي تضمها :يابعد عمري انتي ومن المجنون اللي قالك انه احنا احلى منك لمى ياقلبي كل انسان ميزه ربي بشي ممكن يكون الشخص ملك جمال بس مايكون فيه جاذبيه او تكون فيه صفات تنفر الناس منه والعكس يكون الشخص مافيه شي من الجمال ومع كذا تكون فيه جاذبيه او صفات تحبب كل الناس فيه وانتي يالمى حلوه وجذابه ومجنون اللي يقول غير كذا
لمى : ايه كلي بعقلي حلاوه
ليان : لا وربي اني اقوله صادقه وعشان اكون صادقه معك اكثر انتي تمتلكين وجه يسحر بس يبيلك تسوين شويت رجيم عشان تنزلين كم كيلو وبعدها بيكون جسمك خيال
لمى وهي تضحك من بين دموعها : ومن قالك ماسويت بس جسمي حالف ماينزل ولا كيلو الين ماتحطمت (وهي تحس بأهتزاز الجوال) خليك مني ومن وزني وانزلي لمنال قبل لاتزعل وانا دقايق بس اهدى وانزل لكم
ليان : لا ماراح اخليك وانتي كذا
لمى وهي تدعي بنفسها على منال وان ربي ينقذ اختها من شرها وينقذها هي من تهديد منال لها : لا حبي تراها مجنونه وممكن تزعل وتمشي انزلي لها ودقيقتين واكون عندكم
ليان : اوكي حبي بس دقيقتين ولو مانزلتي بطلع لك ووعدني مااشوف هالدموع في عيونك مره ثانيه لانها وربي تعذبني
لمى : اوعدك ياقلبي بس الحقي عليها قبل لاتزعل
طلعت ليان من جناحها ولمى راحت لشباك غرفة النوم لانه يطلع على البوابه الرئيسيه وشافت السياره البيضاء بس بسبب بعد المسافه ماقدرت تشوف الشخص اللي فيها مع انها كانت متأكده انه سعود تمنت انها ماتسوي كذا بس عارفه انها لو ماسوت هالشي سعود بيقول لمنال وساعتها من يفكها منها لكن بخصوص الصوره عقدت العزم على انها ماتحطها في دولاب ليان وبتكذب على منال وتقول انها حطتها

كان فيصل بسيارته وقرب من البيت وهو طول الوقت يتصل على ليان وجوالها مشغول لفت انتباهه سياره بيضاء صغيره واقفه عند البوابه وواقف بجنبها شاب يكلم بالجوال وينظر لفوق بس ماقدر يشوف وجهه لانه عاطيه جنبه وقف فيصل سيارته بيشوف وش سالفة هالشاب لكن الشاب واضح انه انتبهله لانه ناظر فيه ولف وجهه بسرعه وركب سيارته وانطلق فيها فيصل ماكان مستوعب اللي صار ناظر في السياره اللي تحركت ورفع عيونه فوق يشوف وش كان يناظر وانصدم لما شاف ظل شخص واقف على شباك غرفة نومه وبسرعه اختفى هالظل
راح يركض للبوابه وهو ينادي الحارس مروان عشان يسأله عن صاحب هالسياره
مروان : ايوا ياباشا
فيصل : من سيارته اللي كانت واقفه هنا
مروان : والله ماعرفوش ياباشا
فيصل بعصبيه : ودامك ماتعرفه ليه سامح له يوقف هنا اجل وش فايدتك
مروان بخوف : والله يافندم ان سألته وقالي انه ينتظر الاستاز فيصل وعرضت عليه ينتظرك بالضيافه جوا بس هو رفض وقال حــ ينتظرك هنا
فيصل والشرر يتطاير من عيونه : ثاني مره اذا احد قالك انا انتظر فيصل او من طرف فيصل او اي زفت تتصل تسألني مو تتركه يسوي اللي يبي وانت مكبر الوساده بغرفتك
مروان وهو مستغرب من معاملة فيصل لانه برغم هيبته وصرامته كان يعاملهم بأحترام : امرك ياباشا
فيصل وهو يحاول يتحكم بأعصابه : كم له واقف هنا
مروان : انا شوفته لف مرتين مع نفس الشارع قبل نص ساعه وبعدها وقف هنا من 10 دقايق تقريبآ
فيصل : لو شفته جاء ثاني مره هنا تمسكه انت والسواقين وماتخليه يتحرك وتتصل علي فاهم
مروان : فاهم يافندم
فيصل : دخل السياره جوا وبعد مايجي وليد قفل البوابه
تركه فيصل وراح يمشي على رجليه لمدخل البيت وهو يفكر بهاشاب وبظل الشخص اللي كان واقف على شباك غرفته طلع جواله من جيبه واتصل على ليان واستغرب انه يرن ومو مشغول

كانت ليان تسمع رنين جوالها بس مو محصلته
منال وهي تشوف ليان تدور على جوالها : من شوي شفته بجنبك وانتي جالسه على الكنبه
رفعت ليان المخدات الصغيره اللي على الكنبه وشافته تحته اخذته وردت على طول بدون لاتشوف الرقم
ليان : الوو
فيصل : اطلعيلي عند المدخل (وقفل)
استغربت ليان من اسلوبه بس على طول طلعت له وشافته واقف عند المدخل
فيصل : عندك احد
ليان : ايه لمى ومنال في الصالون
فيصل : عطيني جوالك واطلعي قوليلهم يدخلون في المجلس الداخلي او يرحون للصالون الثاني بطلع لغرفتي
ليان بخوف : فيصل وش فيه وليه بتطلع لغرفتك الحين مو تقول ان وليد جاي معك
فيصل وهو الى الان ماسك نفسه ويحارب الشك اللي بدا يكبر داخله : ليان عطيني جوالك وسوي اللي قلت لك عليه
ليان : مو قبل لاتقولي وش فيك
قرب فيصل منها ومسك يدها اللي فيها الجوال وحرره منها : مافيني شي بس بطلع اخذ لي اوراق مهمه تاركها بغرفتي
تركته ليان وهي مو مصدقه هالعذر لكن ماقدامها غير تنفذ رغبته وراحت للبنات وطلبت منهم يدخلون للمجلس الداخلي لان فيصل بيطلع فوق
منال وهي تتصنع الاحراج : يؤؤؤ فشله مو انتي قلتي بيجي معه صاحبه
ليان : لا فشله ولا شي ترى فيصل ولد عمكم ومو غريب وهو بيطلع فوق عشان يأخذ له اوراق مهمه وبعدها بيطلع
منال وقريب بيكون زوجي : امانه ياليان اذا كان مو بطالع قولي لنا عشان نمشي
ليان : تعوذي من ابليس وين تمشين خليني اروح اشوفه دقايق وراجعه لكم
تركتهم وراحت لفيصل لكنها انصدمت من شكله كان جالس على الكنب ومنزل راسه وسانده على يد واليد الثانيه كان فيها جوالها اللي شوي وينكسر بيد فيصل اللي كان شادها بكل قوته
قربت منه وجلست بجنبه وبخوف وهي تمسك يده : فيصل وش فيك اهلي فيهم شي لين صاير لها شي
قام فيصل بسرعه وهو مو متحمل قربها منه لكنه عاهد نفسه قبل لايعاهدها انه مايظلمها بعد كذا وبيعطيها فرصه انها تدافع عن نفسها وتثبت براءتها
فيصل : تعالي معاي فوق
تركها وطلع للغرفه وهي تمشي وراها ومو عارفه سبب هالتغير
دخلت الغرفه وسكرت الباب وهي ترجف وتدعي ربها انه يسلم لها اهلها واختها
ليان ودموعها بدت تنزل : فيصل تكلم وش اللي صاير
فيصل وهو يلف لها : من كنتي تكلمين وليه جوالك كان مشغول طول هالوقت
ليان بأستغراب : ماكلمت احد اصلآ مامسكت جوالي غير لما انت اتصلت علي وقلت تعالي للمدخل
فيصل وهو يرفع حاجبه : متأكده ؟
ليان : ايه متأكده وليه تقولها كذا كأنك مو مصدقني
فيصل : لا من قالي اني مو مصدقك .. طيب ماشفتي رسالتي اللي ارسلتها لك
ليان : لا ماشفتها اقولك مامسكت جوالي الا لما اتصلت
فيصل : بس اللي واضح عندي ان الرساله مفتوحه معناها انك شفتيها
ليان : اقولك والله ماشفتها وبعدين وش فيها الرساله فيصل لاتخوفني وقولي وش فيك
فيصل : فيني اني مت وانا ادق عليك وجوالك مشغول وحتى لما اتصلت على البيت وسالتك ليه جوالك مشغول طنشتيني وقلتي انك مشغوله ومو فاضيه سؤالي لك من هالشخص اللي كنتي تكلمينه طول هالوقت
ليان بصدمه : وربي ماكلمت احد وماكنت مركزه وانت تكلمني على الثابت لان لمى كانت توها داخله وبستقبلها عشان كذا قلت لك اني مشغوله
فيصل وهو يقرب منها ويحط الجوال قدام عيونها : ومن هذا اللي مسميته حبيب عمري وكان جوالك طول الوقت مشغوله معه
ليان وهي مو مصدقه اللي تشوفه ولا اللي تسمعه
فيصل لما شافه ماردت فتح على الرسائل المرسله وحطها قدامها عشان تقراءها : تعرفين تقرين والا اقراها لك ؟
قرت ليان الرسايل اللي كان يفتحها فيصل قدامها سوا المرسله والا المستلمه وفتح قدامها السجل عشان تشوف مدة المكالمات
وهي الصدمه شلت عقلها واعجزتها عن النطق
فيصل بصوت مهزوز وبمراره : وهذي رسالة الغبي فيصل اللي تبين تصرفينه
(آحبك..
........ يآبعد كل آلقصآيد وآلحكي وآلبوح
آحبك..
....... يآبعد كل آلوجيه آللي على بآلي ..)
قرتها ليان بعيون غرقانه بالدموع ومشت بكل هدوء لدورة المياه دخلتها وخلت بابها مفتوح وتوضت وضوها للصلاه وفيصل يشوف طلعت واخذت شرشف صلاتها وتحجبت فيه
فيصل بصراخ : كافي تمثيل ياليان كافي
لكن ليان ماردت عليه فتحت درج الكومودينه حقتها وطلعت منه المصحف وجت لعند فيصل وقفت قدامه حضنت المصحف بين يديها يد من تحته شايلته ويدها اليمين حطتها فوقه
وبصوت يرجف من البكاء : اقسم لك بالله العلي العظيم واقسم لك بكتابه الكريم اللي بين يدي اني ماكلمت غيرك واني مااعرف هالرقم ولا ارسلت هالرسائل ولا شفتها غير لما انت حطيتها قدامي
وبصوت اعلى من قبل وبكاها يزيد ويقطع القلب : فيصل هذا كتاب ربي بين يدي واقسمت لك عليه وانا طاهره وصادقه وربي مُطلع وشاهد يافيصل اذا اختصم اثنين ومافيه بينه على كلامهم حكم القاضي بينهم بالحلف على كتاب الله لان هالشي يرضي كل الاطراف ولان مافيه مخلوق بقلبه ذره من ايمان بيحلف على كتاب الله وهو كاذب ومافيه احد حلف على كتاب الله وهو كاذب الا وعجل له العقاب في الدنيا وعقاب الاخره اشد واعظم
فيصل ورب البيت ورب ورب هالمصحف الشريف اني ماعمري كلمت رجل مو محرم لي لا قبل لا تزوج ولا بعد ماتزوجتك
والله العظيم اني مااعرف هالرقم ولا كلمت عليه ولا ارسلت له اي رساله ولا استلمت منه اي رساله وربي ان حتى رسالتك ماشفته الا لما انت فتحتها قدامي
يافيصل من حلف بالله فصدقوه وانا حلفت لك بالله وعلى كتابه ليه ماتبي تصدقني انتي وعدتي ماتظلمني انا مالومك لانك شفت هالشي بعيونك بس وربي اني ماسويت هالشي اسآل الله العظيم انه يشل كل ماتحرك من جسمي وهاللحظه ان كان انا كذبت عليك
فيصل وهو يضمها على صدره : بسم الله عليك ومصدقك ياعمري بس لا عاد اسمعك تدعين على نفسك فاهمه
لفت يديها ورى ظهره وضمته لها اكثر وهي تبكي بكاء يقطع القلب كله ولا انها تخسر فيصل او حبه لانها مستحيل تعيش بدونه
تركها فيصل الين هدت وبعدها بعدها عنه واخذ المصحف من بين يديها وحطه على الطاوله وجلسه على الكنب وجلس بجنبها
فيصل : طيب ماشفتي احد مسك جوالك
ليان وهي تبعد الجلال عنها : لا وربي ماشفت احد اصلآ طول الوقت مرمي على الكنب حتى لما انت اتصلت قعدت احوس الين لقيته تحت المخدات
فيصل : ومن تتوقعين انه استخدمه
ليان : ماادري ومستحيل اشك بأحد لاني ماابي اظلم
فيصل وهو يتذكر سالفة الشباك : طيب من طلع لغرفتنا
ليان : وش دخل الغرفه الجوال كان تحت
فيصل : لان كان فيه شاب واقف عند البوابه ويناظر لشباك غرفتنا ولما شافني هرب وانا لمحت ظل شخص عند الشباك فـ تذكري زين من طلع لها احد من البنات او ندى او احد من الخدم
تذكرت ليان انها تركت لمى بالغرفه قبل وصول فيصل بدقايق وهي تعرف ان لمى تكلم احيانآ شباب واكيد هي اللي كانت واقفه عند الشباك لكن مستحيل تقول لفيصل وتفضح اختها حتى لو كان الثمن حياتها
ليان : محد طلع لها
فيصل وهو ملاحظ توترها وترددها : متأكده
ليان : ايه متأكده ماشفت احد طلع لها
فيصل والشك بدا يرجع له بس توتر ليان الواضح : حتى من الخدم محد طلع لها
ليان كانت متأكده ان لمى هي اللي كانت واقفه عند الشباك لان محد دخل الجناح كله غيرها فــ عشان كذا مستحيل تقول انهم الخدم لانها مستحيل تظلم احد : من العصر مافيه احد من الخدم طلع فوق
فيصل : طيب خذي المصحف واحلفي ان محد طلع غرفتنا ولا انتي طلعتي لها
ليان : اشلون احلف على شي انا مدري عنه انا طلعت مره وحده بس ومستعده احلف اني ماوقفت عند الشباك لكن غيره مستحيل احلف عليه
فيصل وهو يوقف : طيب انزلي شوفي لي الطريق بنزل لوليد اكيد انه وصل
ماصدقت ليان انه يقول بينزل تبي تتخلص من الشعور بالذنب انها كذبت عليه
طلعت بسرعه قدامه وبعد ماراح لوليد حاولت انها تمسح دموعها وتهدي نفسها شوي وتفكر في هالمصيبه اللي فيها( انا متأكده ان لمى هي اللي كانت واقفه عند الشباك بس مو هي اللي استخدمت جوالي لان المكالمه بدت قبل لاتجي لمى بس من ممكن يستخدم جوالي معقول تكون منال بس وش تبي بجوالي عندها بدال الجوال اثنين مو واحد بس اللي استخدم جوالي هدفه يورطني مع فيصل والدليل الرسائل )
طلعت ركض لغرفتها غسلت وجها وحطت ميك آب خفيف يخفي اثار البكاء ماتبيهم يحسون بشي وخصوصآ منال لانها شبه متأكده انها هي اللي استخدمت الجوال وكتبت الرسائل (آآآهــ ياندى ليتني سمعت نصيحتك )
نزلت ودخلت عليهم وهي راسمه ابتسامه على شفايفها وجلست بكل ثقه
منال وهي تتصنع ابتسامه بالقوه : مابغيتي تجين
ليان بضحكه :ههههههه احمدي ربك ان وليد جاء واجبره ينزل والا ماكان شفتوني
لمى بصدق : الله يهنيكم ويسعدكم ويبعد عنكم شر كل حاسد
ليان بنظرة عتب : آمين والله يرزقك باللي يستاهلك ويهديك
منال وهي شوي وتنفجر : اجل يله انا استئذن
ليان وهي توقف : الله معك (وهي تنادي دارين) دارين جيبي عباية الانسه منال
وقفت منال بقهر لانها حستها طرده وسحبت عبايتها من دارين بعصبيه وهي تلبسها : يله يالمى ماراح تمشين
لمى بخوف وهي توقف : لا اكيد بمشي
ليان : لمى خليك شوي بعطيك هدايا شاريتها ليزيد وراما بس لحظه بوصل منال للباب وراجعه لك
طلعت منال من البيت وهي شوي وتتعثر بمشيتها من القهر ومن عباية هالرأس اللي ماتعرف تلبسها وحطت كل حرتها بالشغاله المسكينه اللي جايه معها
تأكدت انها طلعت ورجعت لــ اختها وهي مستغربه من نفسها ومن هالقوه اللي جتها على فجاءه
لمى كانت بحاله لايعلمها الا الله ضميرها معذبها من جهه على اذيتها لاختها وخوفها من منال من جهه والمواجهه اللي بتصير بينها وبين ليان الحين
دخلت عليها ليان وشافت الدموع في عيون لمى وهالشي خلاها تنسى كل كلمات العتب اللي كانت محضرتها مهما كان هذي اختها
صحيح عمرها ماحست بأخوتها لكن لمى اليوم فيها شي متغير مو لمى اللي عرفتها طول عمرها
ليان بعتب : ضاقت عليك يالمى مالقيتي تواعدين غير في بيتي
لمى بأرتباك لانه واضح ان ليان مافهمت الحقيقه : ماواعدت احد
ليان : لمى لاتنكرين فيصل شافك مع شباك غرفتي ومحد طلع لها غيرك
لمى : فيصل عرف انها انا ؟
ليان : لا ماعرف ومستحيل اني اخليه يعرف حتى لو كانت حياتي هي الثمن صحيح فيصل زوجي وولد عمك لكن الموت عندي اهون من انه ينظر لاختي على انها ماتربت او يشك لو لحظه بشرفها
كانت كلمات ليان مثل السكاكين تنغرس بقلب لمى كرهت نفسها وكرهت منال وللاسف انها اكتشفت متأخر ان عندها اخت مو بس تستاهل الحب الا تستاهل انها تضحي بعمرها عشان سعادتها
ارتمت بحضن ليان وهي تبكي وتطلب منها السماح على كل شي شافته منها وعلى كل اذيه او كره عيشتها فيه
لمى من بين دموعها : ليان سامحيني وادعي ربي انه يسامحني على اللي سويته فيك
ليان وهي تبكي : مسامحتك يالمى مسامحتك دنيا واخره على اللي اعرفه واللي مااعرفه بس اوعديني تحفظين نفسك وتحفظين شرفك لمى اوعديني تحافظين على صلاتك وربي ان قلبي كانت يتقطع عليك كل يوم وانا اشوفك تاركتها
لمى بصدق : اوعدك بس انتي ادعيلي ادعيلي ياليان ان ربي يحفظني من شر نفسي ومن شر شياطين الانس اللي حولي
ليان وهي تمسك ايدين اختها وتناظر في عيونها : بدون ماتطلبين ربي يشهد اني عمري مانسيتك من دعاي ودايم ادعيلك بالهدايه بس انتي لازم تعقدين العزم على انك تتركين كل مايغضب رب العالمين وتحافظين على صلاتك وتلجئين لربك بالدعاء
لمى : ان شاء الله واوعدك اني من اليوم بتغير بس انتي خليك جنبي واذا كلمتي لين قوليلها اني احبها ومشتاقه لها حيل
ليان وهي تمسح دموع اختها : ولايهمك حبيبتي واوعدك اذا كلمتها بخليها تتصل عليك وتكلمك
لمى وهي تلبس عبايتها : انا لازم امشي بس ارجوك ياليان قولي لفيصل انه انا اللي كنت عند الشباك ماابيه يشك فيك
ليان : لا ماراح اقولك وهالسر بيندفن بيني وبينك ومحد بيعرف فيه وفيصل ان شاء الله ان ثقته فيني كبيره وماراح يشك فيني
طلعت لمى من عند اختها بقلب غير اللي دخلت عندها فيه وهي توعد نفسها انها تبتعد عن منال وسحر وتبدا صفحه جديده مع نفسها ومع كل اللي حوالها وترجع لصلاتها ولقرآنها اللي لها سنين هاجرته
اما ليان برغم فرحتها بتغير اختها لكن كان الهم محاصرها هم فيصل وشكه وهم لين اللي من سافرت محد سمع صوتها
وما صحاها من افكارها غير وصل عمتها نوره وخالتها ام طلال

يتبــــــــــــــــــــــــــع

ـــــــــــــــــ .. ـــــــــــــــــ .. ـــــــــــــــــــ

سمع صوت باب الشقه وهو يفتح وعرف ان كاميليا وصلت حس بخدر بأطرافه لانه ماتحرك طول ساعتين عشان مايزعج لين اللي نايمه بحضنه
نزل رجليه عن الطاوله بهدوء وهو يحسها متصلبه وحمل لين بين يديه وحطها على السرير وغطاها وسكر باب البلكونه لان الجو صار بارد حيل وطلع يشوف كاميليا
كاميليا : مرحبا توقعتك برا لان ماكان فيه اي صوت
طلال : لان لين نايمه ماحبيت اصدر اي صوت عشان ماازعجها
كاميليا : وكيفها الحين
طلال : مافيه اي تحسن يذكر لكن ابي منك تكونين طول الوقت قدامها عشان تتعود على وجودك وتحس بالامان
كاميليا : وش سبب هالحاله اللي هي فيها
طلال : بيتنا اللي في ضواحي لندن تعرض للسطو ولين كانت لوحدها فيه واللي فيها بسبب حالة الرعب اللي تعرضت لها
لاحظ ان كاميليا تناظر لشي وراه وبصدمه التفت ورى وشاف لين واقفه وترجف وهي متبوله على نفسها من الخوف
راح لها بسرعه وضمها له واخذها لغرفتها لكن كاميليا لحقته
كاميليا : مستر طلال انا بحممها وبدل لها ملابسها
طلال : لا شكرآ كاميليا بس اذا ممكن تحضرين لنا اكل على مااخلص
طلعت كاميليا لانه حست ان طلال تضايق من دخولها وراحت تحضر الاكل
اما طلال كان متضايق لانه ماحب احد يشوف لين وهي بالوضع مايتمنى احد يشوفها وهي بــ هالضعف لكنه كان مضطر ان يطلب من كاميليا تجي لانه مايعرف يطبخ ولا يقدر يطلع عشان يجيب اكل ويترك لين
دخلها لدورة المياه وحممها وبعد ماخلص لف عليها روب الاستحمام بس ماطلعها تحمم حتى هو وبعدها طلعها واختار لها فستان خفيف الى تحت الركب الوانه مشرقه مايدري ليه اختار لها هالفستان بس اللي عرفه ان لين من اكثر الناس اهتمام بشكلها فحب انه يلبسها شي يكون حلو وبنفس الوقت بسيط
خلص من تلبيسها وطلع الاستشوار وجفف لها شعرها وبعد معاناه نص ساعه خلص وهو راضي عن النتيجه
فتح باب الغرفه ونادى على كاميليا واول مادخلت
كاميليا : وااااو ليدي بمعنى الكلمه ماناقصها غير الميك آب
طلال : وعشان كذا ناديتك ابيك تسوين لها ميك آب خفيف
كاميليا وهي تفتح شنطة الميك آب حقت لين : اصعب مهمه بس متأكده ان ابسط شي بسويه بتكون فيه ملكة جمال لانها جميله ومو محتاجه الا لمسات خفيفه
قربت كاميليا من لين لكنها خافت وصارت تناظر بطلال بخوف
وقفها طلال وجلس على الكرسي وجلسها على رجله وبهمس : انا معك حبيبتي مافيه شي يخوف
حطت كاميليا للين كحل خفيف مع شدو بنك يتناسب مع فستانها وحطت لها قلوس بنك وبلشر واخر شي ماسكرا وكانت فرحانه حيل بالانجاز اللي سوته لان لين طلعت جميله حيل وبنفس الوقت ناعمه
كاميليا بأبتسامه : انتهينا وانا بروح احضر احلى طاولة عشاء تناسب اجمل ليدي ومستر عرفتهم
وقف طلال لين ووقف هو ولفها له عشان يشوفها فعلآ كانت جميله حيل هي سحرت طلال وهي في اسوء حالاتها فما بالك وهي بهالطله الحلوه
طلال : ماناقص حبيبة قلبي غير رشة عطر مع ان انفاسك هي احلى عطر
اخذ عطرها ورش لها كم رشه خفيفه وبعدها لف لين للمرايه عشان تشوف نفسها
طلال : هاا حبيبتي وش رأيك مو حبيبك ينفع يصير كوافير
كأفائته لين بعد هالتعب ببتسامه صغيره انرسمت على شفايفها لكن فرحت طلال كانت تسوى الدنيا كلها بما فيها ضمها على صدره لــ دقايق وبعدها بعدها شوي عنه وحضن وجها بين يديه ورفع راسها له عشان يناظر بعيونها
قرب منها وطبع بوسه على جبينها وبدون مايحس بنفسه قرب من شفايفها وباسها احتاج كل قوته عشان يرجع يسيطر على نفسه مايبي يأخذ منها اي شي حتى لو كانت بوسه لانه يحس انه يستغل حالتها وضعفها
مسك يدها واخذها للصالون وتفاجاء بطاولة العشاء اللي محضرتها كاميليا كانت مرتبه بطريقه راقيه تناسب ارقى المطاعم ومخففه الاضاءه شوي وموزعه الشموع على طاولة العشاء وفي كل الصالون
خاف ان لين تخاف لكنه ارتاح وهو يشوفها تناظر حولها بدون خوف

ــــــــــــــ .. ــــــــــــــــــــ .. ــــــــــــــــــــــ

طلع فيصل لجناحه بدون لايكلم احد وهالشي خلا الكل يستغرب ماعدا ليان اللي عارفه وش فيه
ام ماجد : اشفيه فيصل مو عادته
ليان بكذب : شكله تعبان شوي لانه امس مانام زين
ام طلال : طيب اطلع يمي لزوجك وش مجلسك معنا
ليان بأرتباك : بروح اشوف جدي وبعدها اطلع (كانت عارفه ان جدها نايم وهي طلت عليه اكثر من مره لكن كانت تتهرب من فيصل لانها اول مره تكذب عليه بشي)
ندى : آآآهــ الله يرزقنا قسم لو اعرست مع ان ماهو ظني لتشوفوني لاصقه فيه مثل ظله حتى الدوام بداوم معه
ام ماجد : زين قلتيلي عشان حتى لو ضعفت وقررت ازوجك اتذكر كلامك واهون رحمتن فــ تعيس الحظ اللي بيتقدم لك
ندى : انا بديت اشك ان العرسان مقطعين باب بيتنا بس انتي واقفه لهم بالمرصاد
ام ماجد بسخريه : ايه ومن كثرهم حولتهم على ام طلال لاني تعبت
ام طلال : ايه نسيت ترى اليوم كلموني 10 خطاب بس كلهم رفضتهم قلت ان بنتنا رافضه العرس حتى تأخذ الدكتوراه
ام ماجد : تصدقين حتى انا اليوم مكلميني فوق العشرين لدرجة اخرتها سكرت جوالي
ام طلال : انا اقول اذا استمر الحال كذا لازم نوظف سكرتيره عشان تستقبل المكالمات
ندى بقهر وهي تضرب عكازه على الارض : مطولات والا خلصتو
ام ماجد : كنا بناقش موضوع السكرتيره بس مادام الضحيه هالرخام المسكين اللي كسرتيه بعكازك خلصنا
مرت عليهم ليان بعد ماشافت جدها وطلعت فوق وهي تتمنى ان قلبها خالي من الحزن والهم وتقدر تضحك مثلهم
دخلت جناحها اللي كان مظلم مافيه غير اضاءه خفيفه راحت لغرفة النوم وشافت فيصل نايم والغطاء مغطيه لحد خصره وكـ العاده نايم بدون قميص البجامه لكن اللي اختلف هالمره انه عاطيه ظهره
حست العبره خانقتها راحت وبدلت ملابسها ولبست قميص خفيف وراحت وتمددت على السرير حاولت تنام بس خلاص ماعاد تقدر تعودت انها ماتنام الا على صدره وبحضنه
فزت لما سمعت جوال فيصل يرن اخذ جواله من على الكومودينه واستغرب لما شاف رقم طلال
جلس على السرير ورد عليه : هلا وغلا
طلال : هلابك اكثر .. فيصل لا احد يعرف اني انا اللي متصل
فيصل بأستغراب : ابشر بس ليه
طلال : اول شي قولي عندك احد او لا
فيصل وهو يقوم عن السرير : ثواني بس (وطلع للصالون اللي في الجناح )
استغربت ليان من تصرف فيصل اول مره يسويها ويطلع عشان يكلم وفجاءه خطر في بالها ان المتصله لمى وبتقوله عن سالفة الشباك تعرف اختها مجنونه وممكن تسويها قامت بهدوء ووقفت عند الباب اللي يطل على الصالون بدون لايحس فيها فيصل
فيصل : طلال اشفيه خوفتني صاير لكم شي
حست لين ابروده تسري بأطرافها من الخوف على اختها
فيصل : ماراح اسئلك الا اذا عرفت وش السالفه وش دخل خوفها من الظلام والحشرات
فيصل بأنفعال : متى صار السطو وانت وين كنت عنها
حاولت ليان انها تطلع وتسأل عن اختها لكن الخوف شلها لدرجة ماقدرت تخطي خطوه وحده ولانها عارفه ان فيصل اذا شافها بيصرف الموضوع وماراح يتكلم قدامها ففضلت انها تبقى مكانها مجبره
فيصل وهو يحاول يتمالك اعصابه ومايرفع صوته : حرام عليك ياطلال مو كافي انا ظلمت لين رحت انت وسويت من نفسك قاضي وجلاد ونفذت فيها حكم الاعدام فرحان الحين لما جننتها
فيصل وهو يشد شعره : وش افهم ياطلال وانت خليت فيها فهم اللي تعاني منه هالمسكينه انا وانت اللي مسؤلين عنه امام رب العباد
فيصل : لاتحط اللوم عليك انا السبب بكل اللي صار لو ماشككت بلين كان انت ماتزوجتها ولا صار كل اللي صار .. المهم الحين الدكتور وش قال عن حالتها
: تعوذ من ابليس وش تفقد قواها العقليه اكيد هذي مجرد صدمه ولين اللي اعرفه عنها انها قويه وبتتجاوزها ان شاء الله
: خلاص انا نازل الحين لندى وبحاول اسئلها بطريقه غير مباشره وارجع اتصل عليك
سحبت ليان نفسها بعد اخر جمله سمعتها وارتمت على سريرها ودفنت وجها بمخدتها عشان تكتم بكاءها وصوت شهقاتها لايسمعها فيصل حست انها كرهته من الكلام اللي سمعته وهو يلبس وبعدها طلع من الجناح وعرفت انه رايح لندى مثل ماقال لطلال
نزل فيصل لندى وبعد عذاب دام ساعه كامله قدر يسحب منها المعلومات اللي يبيها بدون ماتحس هي بشي واللي هي ان ليان رعبها الحقيقي المسابح ولين الظلام والحشرات بس رعبها من الظلام اشد ومستحيل تجلس بمكان مظلم بروحها وندى اتحفتها بمخاوفها وان خوفها الوحيد من العنوسه وماتركت فيصل حتى وعدها انه يرميها على اول واحد يتقدم لها
طلع من عندها واتصل على طلال وقاله المعلومات اللي قدر يجمعها من ندى وبعدها طلع لغرفته فسخ قميص البجامه لانه مايعرف ينام الا وصدره مكشوف وتمدد على السرير حاول ينام بس ماقدر لانه عارف من اهتزاز ليان انها جالسه تبكي وتوقع انها عشان سالفة الجوال نام على ظهره ومد يده لها عشان تنام على صدره كالعاده لانه حتى هو ماعاد يقدر ينام بدون مايكون حاضنها
فيصل وهو يمد يده لها : حبي خلينا ننسى اللي صار اليوم وتعالي نامي
لكن انصدم بتصرف ليان اللي بعدت يده عنها بقرف وعطته ظهرها ونامت
فيصل بغضب : الحين من اللي من حقه يزعل
ليان وهي تفز من السرير بعصبيه : انت اللي من حقك تزعل وانت اللي من حقك تظلم وانت كل شي حلال عليك وحرام على غيرك ارتحت
فيصل وهو بالموت ماسك نفسه : اشوف فيه نبره جديده
ليان : لاجديده ولا قديمه وبريحك مني واترك لك الجناح بكبره اشبع فيه لاني مو متحمله اسمع حتى صوتك
فيصل بصراخ : باللي مايحفظك
طلعت ليان من الجناح وهي ماتشوف طريقها من القهر اللي تحس فيه ولا من دموعها اللي كانت مغرقه وجها كله ولا لين سامحت فيصل على ظلمه لها لكن مستحيل تسامحه على ظلمه للين هي ماتدري وش السالفه لكن كل اللي عرفته ان اختها حالتها مايعلم فيها غير رب العالمين وسبب اللي هي فيه فيصل وطلال
رحت لغرفتها القديمه وارتمت على السرير وهي تبكي تمت ساعات على هالحاله الين ماحست ان دموعها جفت بس باقي قلبها ينزف على اختها وتؤامها قامت من سريرها وتؤضت وقفت بين يدين بديع السموات والارض تصلي تدعي لــ اختها حتى هدها التعب ونامت على سجادتها وهي مافي بالها غير انها تترجى جدها الصباح عشان يشوف لها طريقه تسافر فيها لاختها
اما فيصل عجز ينام من القهر اللي يحس فيه ومن الشكوك اللي ذبحته اخذ جوال ليان اللي مازال معه وشاف فيه 5 مكالمات من حبيبي عمري ورسالتين واستغرب انه ماسمعه يرن بس بعد ماشيك على الاوضاع عرف ان التنبيه مسوى للعائله بس وان اي رقم يتصل غيرهم يكون بدون صوت وعلى الصامت
فتح الرسائل وقراءها (حبيبتي وينك مو قايله انك بتصرفين فيصل وتكلميني ) والرساله الثانيه ( اشغلك هالعله عني ونسيتيني اوه اسف نسيت انك ماترضين عليه بس وربي من غيرتي عليك حبيبتي )
اتصل فيصل على الرقم ومن اول رنه رد : هلا عمري
فيصل : مصيري اوصلك ياحقير وساعتها بتمنى الموت ولا انت محصله
قفل سعود من سمع صوت فيصل واتصل من الجواله الثاني على منال يقول لها الاخبار وبعد ماقفلت من سعود اتصلت على لمى للمره العشرين لكن لمى ماكانت ترد عليها لانها عاهدت نفسها تبعد عن شلة هالدمار وتتقرب لربها وتترك كل مايغضبه لانها اقتنعت ان لو خالد من نصيبها بيكون لها ولو ربي مو كاتبه لها لو سوت المستحيل ماراح توصله واذا على الاشرطه والصور اللي عند منال خلاص ماعاد يهمها لانها تعرف عن منال بلاوي وتعرف انها ماراح تجازف بفضحها
اما منال اتصلت على رأس الشر سحر بس هالمره مو عشان تدبر خطه لليان لا عشان ترسم خطها تسترجع فيها سيطرتها على لمى وتحكم قبضتها على رقبتها لانها ماراح تقدر تكمل خططها اللي ناويتها لليان لو لمى تخلت عنها

ـــــــــــــــــــــ .. ـــــــــــــــــ .. ـــــــــــــــــــ

- اشلون بيكون الوضع بين ليان وفيصل وهل بتقدر ليان تقنع جدها تسافر تشوف اختها
- وش الاحداث اللي بتصير بالمزرعه وهل بتزيد الفجوه بينهم او بتقربهم لبعض
- وش الخطه اللي بتسويها منال لــ لمى وهل بتنجح انها ترجعها لهم او تدمرها تمامآ
- بتنخطب ثنتين هل تتوقعون الخبله ندى احد هالبنتين والا مخاوفها من العنوسه بتصير واقع :)

محبتي

’,

يسلموووووووووووووو حبيبتي والله كنت حاسه انه ما راح يصدق بس بجد حزنت كتيييييييييييييير علين بنستناكي يا عسل لا طولي علينا حبي

الســـلام عليكم

مشكوره يالجوري ع هالبارت

بس حبيت اعرف متى موعد البارت الجاي