عليك شلون ما أزعل ؟
وتسوِّي أشياء تجرحني !
تضايقني بـ أفعالك ..
وتظن إنِّك مفرحني ؟
تسوِّد وجهي بـ طعونك ..
وتبيِّض ( وجه ) أحزاني ..!
[ ياليت ] اللِّي حصل منِّك ..
حصل من واحدٍ ثاني !
مثل غيرك ومنتَ غير ..
جرحت جروح ما طابتــ ..!
هقيته فيك يطلـع خير ..
ولكن هقوتي " خاااابت "
صدمني الكل ..
ومو ناقص !
بعد منِّك تجي صدمه
تحطْها بذمِّتك ( عادي )
وسيعهـ صارت الذمه !
بسيطه كانت أحلامي ..
توقعتك تحب لي الخير
وتدوِّر .. راحة أيَّامي !
وأشوف إن الحقيقه غير ..
تحب الخير لـ جروحي ؟
حبيبي الوقت ما قصَّر
وكلمة حق .. يا روحي :
( جميع الناس تتغيَّر ) !!!


طلعت ليان من غرفتها بنفس الوقت اللي طلع فيه فيصل من الجناح تلاقت عيونهم لثواني وبعدها كل واحد صد عن الثاني فيصل كان الشك يكبر بداخله اكثر واكثر بسبب صد ليان عنه واسلوبها اللي تغير معه .. وليان مو قادره تناظر فيه لانها تحس انه هو السبب بكل اللي تمر فيه اختها .. تجاوزت عن ظلمه لها لكنها ماتقدر تتجاوز وتغفر ظلمه للين
شافته ليان انه بينزل مع الدرج فــ اتجهت للمصعد لكن قبل لاتدخل المصعد حست بيد تمسك يدها بقوه وتلفها على ورى ماحست بنفسها الا وهي صادمه بصدر فيصل خافت ان مشاعرها تخونها لان قربها منه يربكها ويسعدها حتى لو كانت بقمة زعلها منه رفعت عيونها له وهي مجهزه عمرها تصده حتى لو سمعت كل كلام الحب اللي قلبها متشوق يسمعها لكن نظرات فيصل الحاده وملامح وجهه الصارمه كانت ابعد شي عن انه ينطق بأي كلمات حب او اعتذار
فيصل وبكل قسوه : انسى انانيتك لو شوي عشان جدك والا الحب عندك مجرد كلام
فتحت ليان فمها من الصدمه وقبل لا ترد سكتها فيصل
فيصل وهو يجرها معه للدرج : ماابي اسمع صوتك وتأكدي ان جدي عندي اهم منك ومني ومن هالدنيا كلها فما هو من صالحك انه يحس ان بينا شي
عرف يسكتها فيصل لانها فعلآ للحظه نست جدها وكان كل تفكيرها بزعلها وبأختها بالموت قدرت تبلع غصتها وترسم على شفايفها ابتسامه وهي تشوفهم مجتمعين بالصاله
باست راس جدها وعمتها وخالتها ام طلال ولانها سرحانه وعايشه بعالم ثاني باست راس ندى اللي رافعته لها بمعني بوسيه لكن ليان مانتبهت للي سوته الا بعد مامدت ندى يدها بمعنى بوسيها هي بعد
ليان وهي تضرب يد ندى الممدوده : صدق ماتنعطين وجه
ندى : المفروض تبوسيني من رأسي لــ رجلي المجبسه تدرين ليه ؟
ليان وهي تجلس بجنب جدها : ماابي ادري دام السالفه فيها بوس
ندى وهي تناظر في فيصل : ايه بوستك حلال لغيرنا وحرام علينا
فيصل : انتي صاحيه من صباح الله خير عشان تحسدينا
ام ماجد : لا ابشرك مانامت طول الليل تقول تنتظرك تنفذ وعدك
فيصل بأستغراب : اي وعد مذكر اني وعدتها بشي
ندى وهي شوي وتنفجر : يالكذاب مو انت البارح تقول لي انك بتسوي مقلب بليان وتبي تعرف هي وش تخاف منه ولما رفضت اقولك وعدتني انك تزوجني اليوم لو علمتك
ام ماجد : وانتي من شفحتك على العرس تبيعين الصداقه بريال
ندى : واسوي دسكاوند بعد
ليان بدون شعور : صراحه عرف من يسأل بس اهم شي قلتي له لين وش تخاف منه والا اقوله انا
رفع فيصل راسه بصدمه وناظر بليان اللي كانت تناظر فيه والدمعه بعيونها
فيصل بضحكه عشان محد يشك بشي : ههههههه شسوي اذا حتى طلال غار وبيسوي مقلب بحرمته
الجد : ومالقيتو تسوون مقالب غير بلين وليان ترى هالتؤام قطعه من قلبي
ليان وهي تحط راسها على صدر جدها : فديت قلبك ياقلبي وروحي انت
ندى بهبال : فيصل الحق زوجتك تغازل غيرك ولا عيني عينك بعد
كانت كلمة ندى مثل السكين اللي انغرست بقلب فيصل وخلته يتذكر العذاب اللي مر فيه البارح واللي زاده شك هو صد ليان عنه واسلوبها اللي تغير معه لكن من كلمتها اللي قبل شوي واضح انها سمعت مكالمته مع طلال وبرغم انه يتمنى انها ماتعرف هالشي الا انه في لحظه تمنى ان صدها عنه يكون بسبب مكالمته لطلال والكلام اللي دار بينهم ولا يكون سببه شي ثاني
الجد وهو يلف يده من ورى كتف ليان ويمسح على شعرها : شكل زوجك غار مني
ليان والعبره خانقتها : يحق له يغار لان ماله منافس بقلبي غيرك
فيصل بنظرت حب : وماارضى بغيره منافس
ندى بقهر : يمممممممممممه زوجيني لا انحرف
ام ماجد : اذا حسيتي انك بتنحرفين قوليلي
ندى : ليه ؟
فيصل : عشان نسترك بالموت قبل لا تفضحينا
ندى وهي تقوم : يمممه شوفي ولدك بدال مايسترني بالزواج ناوي يذبحني
ام ماجد : مهو بالاخير غايته سترك اجل ماتفرق الطريقه دام الغايه وحده
ندى وهي تنقز على رجلها السليمه رايحه لغرفتها لانها من كثر القهر نست حتى عكازها : الشرهه موب عليكم علي انا اللي جالسه معكم
فيصل وهو يرجع يقراء جريدته : اول مره تفكرين صح صراحه تشكرين على هالاستنتاج
الجد : منتو مرتاحين الا اذا عقدتو هالخبله
ام ماجد : لاتشيل همها هذي تعقد بلد بأكمله
الجد : بس ولو خفو عليها .. وانتي ياليان ماراح تقولين وش فيك
ليان ودموعها بدت تنزل : جدي ارجوك اسمحلي اروح للين
الجد بخوف : لين فيها شي
ليان بسرعه : لا جدي مافيها شي بس ابوس يدك اسمحلي اروح لها
الجد : مو قبل لا لاتقولين لي وش فيها لين
فيصل بكذب عشان مايلاحظ جده ان بينهم شي : ليان خلاص تناقشنا في الموضوع بما يكفي البارح وقلت لك متى ماسمحت ظروف شغلي اخذك تشوفينها هذا اذا مارجعو قبل
ام ماجد : ليان فيصل تكلمو لين فيها شي
ليان وبكاها يزيد : لا مافيها شي بس حلمت فيها حلم يخوف وابي اروح اشوفها (وهي تنزل على يد جدها تبوسها) جدي ارجوك وافق ارجوك ياجدي لو لي خاطر وافق
الجد وهو يسحب ليان لحظنه : اهدي ياقلب جدك واوعدك بعد عزيمة ماجد بكره اخلي فيصل يأخذك لها على أول رحله
فيصل بعصبيه : وليه انا مالي كلمه
الجد بهدوء لانه عارف انه مو من حقه يجبر فيصل على شي مايبيه : غير اذا بتكسر كلمتي يافيصل هذا شي ثاني
فيصل بأحراج : ماعاش اللي يكسر كلمتك يالغالي لكن انت عارف وضع الشغل وان لي فتره مهمله وتارك الشغل كله على وليد
الجد : وليد كفو وقدها واللي خلاه يتحمل كل المده اللي راحت بيخليها يتحمل هالكم يوم اللي بتغيبهم
فيصل ناظر بليان بحقد ورجع ناظر في جده : ابشر يالغالي طلباتك امر
قام فيصل بيطلع من البيت لانه حس لو جلس دقيقه وحده بيقتل ليان اللي قدرت تمشي كلمتها عليه
الجد : فيصل ياليت تأخذ الجوازات معك وتحجز اليوم لاني اتوقع ان فيزكم مابعد انتهت مدتها
فيصل وهو يحاول يكتم غيضه : لا اتوقع باقي لها شهر واذا على الحجز اعتبره صار ان شاء الله (وهو يناظر بليان) اطلعي عطيني الجوازات
ليان ماكانت مصدقه ان اللي تبيه صار بسهوله هذي كانت شبه متأكده انه ماراح يوافق لكن جدها قدر يفرض كلمته باست جدها على خده شكر وامتنان له وهي تدعي بقلبها ان ربي يطول بعمره ويشفيه ويحفظها لها من كل مكروه وبعدها طلعت طيران لجناحهم عشان تجيب الجوزات لفيصل
دخلت الجناح واتجهت لغرفة تبديل الملابس لان فيها الخزنه اللي يحط فيصل اوراقه المهم والجوزات فيها لكن اول ماوقفت قدام الخزنه تذكرت انها ماتعرف الرقم السري لفت بتطلع من الغرفه عشان تروح تقول لفيصل انها ماتعرف الرقم السري لكن اللي صدمها ان فيصل واقف وساد عليها بجسمه باب الغرفه
حست برعشة خوف منه هي تقدر تواجهه قدام جدها لانها تعرف انه ماراح يسوي شي قدامه بس الحين جدها مو فيه وواضح من وجهه انه معصب حيل وممكن يقتلها
فيصل : فرحانه بالانجاز اللي سويتيه وانك قدرتي تمشين كلمتك علي؟
ليان : مامشيت كلمتي عليك جدي قال كلمته وانت احترمتها
فيصل بسخريه : الحين جدي هو اللي قال كلمته مو كانك انتي اللي خليتيه يقولها (وبتهديد) مشيتي اللي براسك ياليان وحتى انا بمشي اللي براسي وبشوف وش بتسووين
ليان بخوف : وش تقصد ؟
فيصل : اقصد بتسافرين لــ لندن لكن ماراح تشوفين اختك (فيصل كان كل هدفه يقهرها مثل ماقهرته ولا ماعنده نيه يمنعها لاتشوف اختها)
ليان بقهر وبدون لاتفكر بكلامها: وش هالجبروت والحقاره اللي فيك مو كافي انك ظلمتها ووصلتها للجنون جاي الحين تحرمها حتى من وجود احد من اهلها عندها وهي بــ هالحاله
رفع فيصل يده بدون شعور وقبل لايعطيها كف قدر يسيطر على نفسه لكن كان لازم يأدبها وهو يعرف ليان زين ويعرف ان الكلمه القاسيه تجرحها اكثر من مليون كف
كانت ليان ترجف من الخوف بعد مااستوعبت كلامها كان خوفها من انها تخسر فيصل اكثر من خوفها من ضربه لها هي صدق مجروحه منه وزعلانه لكن ماتقدر تعيش بدون حبه ووجوده في حياتها كانت تعيش بتناقض غريب مابين عقلها وقلبها
نزل يده ومسك فيها يد ليان وكان شاد بكل قوته كأنه يفرغ فيها شحنات الغضب اللي بداخله لدرجة ان ليان حست ان عظام يدها انطحنت تحت قبضته قرب منها وبكل هدوء وهو يناظر بوجها
فيصل : سمعتي مكالمه وحكمتي اني ظالم بدون لاتعرفين وش السالفه وانا شفت بعيني ومع كذا عطيتك فرصه تثبتين برائتك وماكتفيت بكذا بالعكس كذبت عيوني وصدقتك لكن مو فيصل اللي ينهان ويسكت ياليان ومن هاللحظه زواجنا بيستمر لخاطر عيون الغالي بس على الورق وانا من اليوم بدور على زوجه تصوني وتصون بيتي
خلص كلامه وفتح الخزنه اخذ منها الجوزات وطلع بدون حتى مايلتفت لها
اما هي انهارت على الارض وهي تحس انها بدت تخسر كل اللي تحبهم ويحبونها جدها واللي المرض صار ينهش جسمه بدون اي رحمه وكل يوم يضعف اكثر من اليوم اللي قبله ولين اللي ماتدري عن حالتها بس اللي متأكده منه انه اختها محتمل تفقد عقلها وفيصل اكثر انسان حبته حتى لو كان ظالم وكل عيوب الدنيا فيه بتحبه ومستحيل تعيش بدون حبه شطبها من حياته وماعاد تربطها فيه غير ورقة زواج

ــــــــــــــــــــ .. ــــــــــــــــ .. ـــــــــــــــ

في بيت سلطان (ابو تركي)

ام تركي : تركي سكت هالجوال رأسي بينفجر من كثر مايرن يارد عليه او طفه
تركي : مقدر اطفيه انتظر مكالمه مهمه
ام تركي : طيب رد على هاللي يتصلون وارحم روسنا
خالد بسخريه : لو سكت وحده بيتصلن عشر غيرها
ام تركي بصدمه : وش تقصد ليكون ياتركي متزوج من ورانا
تركي : لا وش متزوج وانتي على طول صدقتي هالسفيه
خالد : ليته متزوج ولا يلعب على بنات الناس
ابو تركي : الرجال مايعيبه غير جيبه وتركي حافظ حلاله البركه فيك ياللي مسلم رقبتك لفيصل وراضي بهالراتب اللي يرميه عليك كل اخر شهر
خالد بنفسه (الحين اللي عايش بالحرام ويصرف على نفسه من سرقت صفقات العالم صار هو اللي حافظ حلاله ) : راضي براتبي ومكفيني وقررت اكمل نص ديني
ابو تركي : يافرحتي فيك ومن بنت الفقر اللي حاط عينك عليها
خالد : والله اللي اعرفه عن ابو فهد انه رجل اعمال كبير ومحد يقدر يقول على بنته انها بنت فقر بس حتى لو كانت بنت فقر مازلت ابيها ولا راح اتزوج غيرها
ابو تركي بدهشه : من ابو فهد تقصد منصور ولا احد غيره
خالد : ايه منصور ماغيره
ابو تركي : اي وحده فيهم
ام تركي : هو ماعنده غير بنت وحده اللي انلدغت في المزرعه
ابو تركي : يعني الحين هو ماعنده غير هالبنت وفهد بس
ام تركي : ايه ماعنده غيرهم اللي عرفته ان زوجته تعرضت لمشاكل في ولادة بنتها واضطرو يستأصلون لها الرحم وزوجها رضى باللي الله رزقه وماتزوج عليها حتى بعد ماماتت قبل كم سنه
ابو تركي كان شوي يطير من الفرحه نسب ابو فهد ماينتعوض هو صدق كان يبي يخطب ندى لخالد بس الحين بيغير فكرته لانه يعرف ان ابو فهد رجل دين وماراح يرضى بتركي اللي مايدل حتى طريق المسجد من غير خرابيطه الثانيه اما خالد محافظ على صلاته وحافظ نفسه
ابو تركي : والله كنت مفكر اخطب لك ندى بنت عمتك لكن دام هذي رغبتك على بركة الله واذا على ندى بخطبها لتركي
تركي بصدمه : وشو ومالقيت غير انا تخطب لي هالخبله بنت اختك هذا اللي باقي (وهو يقوم) اقوم اشوف اشغالي ابرك لي من سوالفكم اللي تقصر العمر
خالد بقهر وبعد ماطلع اخوه : يبه حرام عليك مالقيت غير بنت اختك تبليها بولدك اللي سيرته على كل لسان
ابو تركي : خااااااااالد ثمن كلامك لا اوريك شغلك واخوك رجال ومافيه شي يعيبه يأخذ بنت عمته احسن من ان يأخذها الغريب ويتهنى بورثها
خالد : وانت ماهمك غير الفلوس وماهمك ان ولدك مايعرف حق ربه عليه لا بصلاه ولا بغيره وفوق كذا سكير غير خرابيطه مع بنات خلق الله وتشوف انه شي مايعيبه
ابو تركي بغضب : خالد والله ثم والله ان ماسكت لايصير لي تصرف ثاني معاك انت خلاص كبر رأسك ولا عاد تحشم احد
خالد بغيض : خلاص سكت واذا بتخطب ندى حق احد اخطبها لي انا
ابو تركي : وش اللي غير رأيك من توك تبي بنت ابو فهد
خالد وهو يقوم : خلاص غيرت رأيي وابي ندى فيها شي
طلع فوق وهو يحس انه بينفجر من القهر ضحى بنجلاء الانسانه اللي حبها وتمنى انها تكون زوجته كله عشان ينقذ ندى من براثين اخوه
قابل رنيم على الدرج وعرف انها سمعت كل شي من الدموع اللي على خدها لكن مافيه يهدي احد هو محتاج اللي يهديه تركها وكمل طريقه لغرفته لكن اول مادخل سمع دقه هاديه على الباب وعرف انها رنيم
خالد وهو يفتح الباب : وش تبين ترى اللي فيني كافيني
رنيم : ممكن ادخل بقولك شي وماابي احد يسمعني
بعد خالد عن الباب وتركها تدخل
رنيم بعد ماسكرت الباب : خالد انا ادري انك تحب نجلاء وتبيها زوجه لك فلا تفرط فيها عشان تنقذ ندى من تركي
خالد : رنيم اذا عندك شي غير هالكلام قوليه واذا ماعندك اطلعي وخليني ارتاح موضوع نجلاء خلاص قفليه ماابي اسمع عنه شي
رنيم بأصرار : خالد ندى مو محتاجتك تدافع عنها ندى عندها فيصل وماجد يحبونها ويدورون سعادتها ولاتتخيل مجرد تخيل انهم بيوافقون على تركي اللي هم عارفين كل بلاويه (وبكذب) واللي اعرفه ان فيه ناس متقدمين لها وفيصل موافق عليهم بس مأجلين الموضوع حتى تطيب رجلها ويفكون الجبس عنها
خالد بفرحه : متأكده من هالشئ
رنيم : ايه متأكده واذا تسمع نصيحتي كلم جدي يخطب لك نجلاء لان ابو فهد يحترمه ولا راح يرفض له طلب ولا تشيل هم ندى لان لو انطبقت السماء على الارض فيصل وماجد مستحيل يوافقون على تركي وحتى عمتي وجدي نفس الشي
خالد وهو يبوسها على رأسها : الله لايحرمني منك يأحلى اخت والحين طسي ببدل ملابسي واروح لجدي
رنيم : طيب بطس بس مصيرك تحتاج خدماتي ياخلود
طلعت رنيم من عند اخوها وهي مو ندامانه على الكذبه اللي قالتها صدق انها تحب ندى حيل وتتمنى تكون زوجة اخوها لكن دام سعادة اخوها مع غيرها اجل الله يرزقها باللي احسن منه ومو خايفه عليها من تركي لانها متأكده انهم ماراح يوافقون عليه

ــــــــــــــــــ .. ــــــــــــــــ .. ــــــــــــــــــــــ

طلع طلال هو ولين من عند الدكتور وهو يحس ان كل هموم الدنيا فيه
وضع لين مافيه اي تحسن والدكتور اقترح يدخلها للمستشفى ويعمل لها صدمات كهربائيه ممكن تساعد بأنها تصحيها من الصدمه اللي هي فيها لكن طلال رفض هالشي فما كان قدام الدكتور غير انه يصرف لها ادويه جديده ويعطيها مهلة اسبوع لعل تفوق من صدمتها ولو ماتحسنت خلال هالاسبوع بيكون مافيه مفر من انه يعمل لها جلسات صدمه كهربائيه
حس انها بردانه ولان الجو بدا يميل للبروده هالايام حط معطفه على اكتافها وجلسها في السياره وجلس على الكرسي اللي بجنبها وقبل لايشغل السياره سمع صوت جواله يرن
طلعه وشاف ان المتصل فيصل بس مارد عليه لانه متأكده بيسأله عن لين وهو مايقدر يتكلم قدامها شغل السياره وشغل اغنية

عبادي الجوهر
أبسألك؟
هو انا استاهلك
استاهل الدمع اللي جرح وجنتك
أستاهلك
استاهل اني اعشقك
ابسألك عن حالنا
انتي وانا
ياللي احس انك انا
وحالنا ماهو غريب
انه نكون متأكدين
ان الفراق ماهو بعيد
بالرغم من جرح السنين
عشقنا دايم يزين
ماهو غريب اني لو مره في همي
قسيت وبكلمة جرحتك
قبل ما تتألمي
اللي ينزف هو دمي
هو دمي
ابسألك ...ماهو غريب
استاهلك؟
ابسألك لو قلت لك
ان الحنان اللي في قلبك
ينبت من الصخر الزهر
بستاهلك؟
وان النهار اللي في خدودك
يخلي النسمة عطر
بستاهلك؟
وان العذاب اللي ف عيونك
يعلم الناس الشعر
بستاهلك؟
ابسألك ...ماهو غريب
استاهلك؟
ولو قلتلك
اني احبك
اكثر من هموم البشر
وكثر الجفى وكثر السهر
لو قلتلك
وانك اقرب من عيوني للنظر
بستاهلك
لو قلتلك... كل الذي اقدر اقوله
واللي ما اقدر اقوله
بستاهلك حبيبتي
بجاوبك للأسف... ما به احد يستاهلك

مد يده ومسك فيها وجه لين رفعه له وناظر بوجها البريئ وبصوت يحمل ندم وألم : ادري اني خسرتك وادري بعد اني سبب عذابك ومااستاهلك لا وربي ماستاهلك لكن سامحيني سامحيني ماعاد فيني صبر على هالعذاب
سكت لما شافها شاده قبضتها على معطفه وبدت ترجف وكأن الخوف رجع لها هو يعرف انه يشكل لها مصدر الامان وخوفها لما تشوف ضعفه نابع من خوفها لاتفقد مصدر هالامان ومو لانها فهمت كلامه او تأثرت فيه
وصلو للشقه واول مادخلو فسخ المعطف عنها وجلسها على الكنبه في الصالون وطلب من كاميليا تسوي لها شي دافي
طلال بحنيه : وش حابه تتفرجين عليه ياقلبي
وكالعاده متعود يسألها ويجاوب هو عنها لانها ماترد عليه غير بنظرات مالها معني : اوكي حبي بختار لك على ذووقي
طلع فيلم كركر لفنان محمد سعد وشغله لها برغم ان هالفيلم ماله معني الا انه يضحكه وهو محتاج يضحك قبل لايخنقه هالهم
جلس يتابعه معها ويعلق على الفيلم وكأنها تفهم وش يقول
وقفت كاميليا تراقبهم وهو مستغربه من طلال وتعامله مع لين يكلمها بالساعات وكانها تفهم عليه يهتم بلبسها ومظهرها وكأن هالشي يهمها وهي حتى مادرت عنه رافضه الاكل وعايشه على الشوربه والسؤال وهو سوى مثلها ومايأكل الا مثل ماتأكل هي حطت لهم كأسات الشكولاته الساخنه على الطاوله وقبل لاتروح طلب منها طلال تجلس معهم
اخذ طلال كأس لين وبدا يشربها حتى خلصت كأسها ولما لاحظ انها انشدت للفيلم وممكن يتركها طلب من كاميليا تنتبه لها على مايخلص مكالمه مهمه بالمكتب ويرجع
لكن اول ماقام قامت معه حاول يفهمها انه بيخلص مكالمه ويجي لكن مسكتها ليده خلته يستسلم ويجلس
طلع جواله ودق على فيصل
فيصل : الوو
طلال : هلا وغلا
فيصل : وينك اتصلت من شوي مارديت
طلال : كنا عند الدكتور وماقدرت ارد
فيصل : بشر ان شاء الله فيه تحسن
طلال وهو حريص مايقول شي قدام لين : لا مافيه
فيصل بضيقه : طيب وش قال لك
طلال : خلها على ربك
فيصل : كل شي على ربي بس وش قال لك مافيه علاج ممكن يساعدها
طلال : الحمدلله على كل حال .. المهم طمني عنكم
فيصل : هي عندك
طلال : ايه
فيصل : طيب اسمعني ترى اختها شكلها سمعت مكالمتنا البارح وسوت مناحه عشان كذا اتصلت اقولك انه بنجي
طلال بخوف : اشلون احد عرف
فيصل : لا محد عرف هي صارت تبكي عند جدي وتقول اشتقت للين وتعرف جدي مايرفض لها طلب واصدر مرسوم ملكي اني احجز على اول رحله واخليها تشوف اختها
طلال وهو مو عاجبه اللي صار : ومن بيجي معك
فيصل : بس انا وهي وبالموت حصلت رحله صباح الجمعه يعني ان شاء الله الساعه 1 ونص الظهر بتوقيتنا بنكون بــ لندن
طلال : الله يحييكم بس لا اوصيك يافيصل ماابي احد يعرف بالسالفه كافي انت وهي
فيصل : ان شاء الله لاتوصي حريص
قفل طلال من فيصل وهو ضايق صدره ماكان يبي احد يعرف لكن لعلها خيره يمكن وجود اختها يساعدها تطلع من الحاله اللي هي فيها

ـــــــــــــــــــ .. ـــــــــــــــــــــ .. ـــــــــــــــــــــ

يتبـــــــــــــــــــــــــــــــع

’,

في بيت ابراهيم ابو راكان

ام راكان : هلا وغلا حبيبتي مابغينا نشوفك
منال : هلابك اكثر ياخالتي والسموحه منك والله نشغلت الفتره اللي راحت
ام راكان : معذوره حبيبتي وكيف الاهل ان شاء الله بخير
منال : الحمدلله كلهم بخير ويسلمون عليك
ام راكان : الله يسلمهم من كل شر وامك ليه ماجت معك
منال : والله كانت بتجي بس لما تذكرت انه بكره بنجتمع بالمزرعه قالت مالها داعي روحتي اليوم الا خالتي وين لمى ؟
ام راكان : ايه الجيه عشان لمى مو عشانا .. لمى بغرفتها فوق اطلعي لها حبيبتي مافيه احد
استأذنت منال من خالتها وطلعت فوق وقبل لاتدق باب غرفة لمى رسمت علامات الحزن والهم على وجها وهي جايه اصلآ بدون مكياج عشان يضبط الدور
انصدمت لمى لما شافت ان اللي عند باب غرفتها منال حست بخوف منها لكن ملامح الحزن اللي بوجه منال خلتها تستغرب ويزيد خوفها
لمى بخوف وتردد : هلا منال حياك حبيبتي تفضلي
منال وهي ترتمي على صدر لمى : لمى سامحيني وربي مالي دخل باللي صار اقسم لك بالله اني تفاجاءت فيه
لمى بخوف : منال اشفيه وش صاير ليكون ليان صار لها شي
منال وهي تكتم غيضها : لا ماصار لها شي ولاتجبين لي طاريها لاني خلاص شلت هالانسانه من تفكير وماابي اسمع طاريها
لمى وهي مو مصدقه منال لانها تعرفها مستحيل تتنزل عن شي هي تبغاه : اجل وش صاير
منال بتأثر : لمى خالد بيتزوج لكن اقسم لك بالله ان مالي اي يد في هالموضوع ولو مو مصدقتني جيبي المصحف احلف لك عليه
حست لمى انها بتختنق وكأن الجو مافيه ولا ذرة اوكسجين كل الكلام اللي اوهمت نفسها فيه البارح تلاشي ومابقى منه غير صدمتها اللي تحس انها بتوقف قلبها للحظه عذرت فيها منال على اللي سوته بليان لكن مستحيل هي تسوي مثلها هي تحب خالد حب حقيقي ومستحيل تأذيه واذا كانت سعادته مع غيرها بتتمنى له الخير حتى لو كان الثمن قلبها اللي ينزف عليه
انهارت على سريرها وصارت تبكي بكى يقطع القلب على حب صار له سنين يكبر بداخلها حتى امتلك كل جوارحها
منال وهي تعصر كم دمعه : لمى لاتقطعين قلبي واذا على خالد اوعدك اسوي المستحيل ولا اخليه يتزوج نجلاء او اي وحده غيرك
لمى وبصوت مخنوق من البكاء : لا يامنال الله يوفقه مع اللي اختارها الشي اللي يسعده يسعدني حتى لو كان موتي
منال وهي تضمها : مدري وش هالحظ اللي عندنا اللي حبيناهم اختارو غيرنا
رجعت لمى تبكي وهي حاطه يديها على فمها عشان تكتم صوت شهقاتها لا احد يسمعها
منال : لمى كذا بتخلين الكل يشك ان فيك شي قومي معي خلينا نطلع
لمى : ماابي اطلع ماابي اروح اي مكان خلوني يمكن اموت وارتاح
منال بأصرار : لا بتطلعين ماراح اخليك وانتي في هالحاله لو اطلعك بالقوه لانك لو جلستي دقيقه هنا وانتي على هالحاله بيحسون اهلك ان فيك شي
لمى : منال خليني بهمي ارجوك ماابي اسمع ولا حرف
منال وهي تسحبها من السرير : قومي معي واوعدك ماافتح فمي بكلمه لا عن خالد ولا حتى فيصل وليان ولا عن اي مخلوق بس قومي معي
استسلمت لمى وقامت معها هي فعلآ محتاجه تكون بمكان بعيد عن هالبيت عشان تبكي براحتها على حبها اللي راح
لمى بضعف : وامي وش اقولها وين بنروح
منال : انتي روحي اغسلي وجهك والبسي عبايتك وخالتي خليها علي تعرفينها ماترفض لي طلب
تركت منال لمى تلبس وهي راحت قالت لخالتها ان اليوم ملكة وحده من صديقاتهم ومحتاجتهم يكونون معها من بدري
وطلعت هي ولمى واتجهو لبيت سمر لانه هو المكان المناسب بحكم ان سحر عايشه بروحها مع الخدم والسواق لان من بعد ماتطلقت امها وهي عايشه مع ابوها اللي طول الوقت مسافر

ــــــــــــــــــــ .. ـــــــــــــــــــــ .. ــــــــــــــــــــــ

قام طلال عن الكنبه لانه يحس ظهره انكسر من كثر مهو جالس ويتابع بفيلم كركر اللي لين خلته يعيده ثلاث مرات الى درجة انه حفظه عن ظهر قلب وقامت معه لين
طلال بضحكه وهو يحضن وجه لين بيديه ويبوسها على خدها : فديت قلبها القلوده .. حبي ماطفشتي من جلست البيت
طلال وكأن لين عبرته والا ردت عليه : طيب دامك طفشتي ماودك نطلع حاب اشتريلك ملابس على ذووقي
اخذها طلال للغرفه وبدل لها ملابسها ولبسها معطف لان الجو صار بارد
طلال : يله الحين دوري ابدل غمضي عيونك
كانت لين تناظر فيه ابرائه وكانها مو فاهمه وش يقول
ماقاوم شكلها طلال لان لين من تبتسم تسحر الشخص اللي قدامها بوجها البيبي فيس وغمازاتها قرب منها وباسها على شفايفها وبعدها ضمها لصدره وتخيل لو تعافت لين ودرت انه كان اخذ راحته معها يبدل لها ملابسها ويغير قدامها ويبوسها ويضمها والاعظم من هذا كله دخلته معها للحمام
بعدها عن صدره وناظر فيها وهي مبتسمه له ابتسامه صغيره
طلال : ههههههههههههههههه زين مافيه احد يفتن علي اذا تعافيتي ان شاء الله والا كان بدال هالابتسامه ماراح يكفيك فيني غير الموت
كانت لين اذا شافته يضحك تبتسم له واذا مكشر ومتضايق تخاف عشان كذا طلال كان يحرص اغلب الوقت انه يسولف معها عادي ويضحك كأنه خالي من الهم بس عشان ماتخاف ولا ينحرم من ابتسامتها
خلص طلال لبسه وطلع مع لين وراحو شارع نيو بوند لان فيه اغلب محلات الماركات العالميه
وهو حالف انه مايترك شي لها الا ويشتريه

ـــــــــــــــــــ .. ـــــــــــــــــ .. ـــــــــــــــــــــــ

المغرب في بيت سحر

كانو طول اليوم معها ويحاولون يرفهون عنها لكن كل محاولاتهم فشلت صحيح وقفت عن البكى لكن ملامح الحزن والضيقه مااختفت عن وجها
سحر : بنات يلا خلونا نروح لبيت وحده من صاحباتي وربي انها فله وتوسع الصدر
منال : ايه فعلآ خلونا نطلع يلا يالمى عشان خاطري قومي البسي وحطي ميك آب
لمى : ماابي اروح اذا انتم بترحون خذو راحتكم انا برجع بيتنا
منال : لا وربي ماترجعين ومستحيل اخليك بروحك وانتي كذا
سحر : لمى صدقين بتنبسطين عندها البنت مره حبوبه وترى هي مجروحه مثلك انتي حبيبك اختار غيرك وهي حبيبها مات يعني ماراح تتضايقين من الجلسه عندها وترى انا قلت لها لا تعزم احد يعني بنكون بروحنا
لمى : الله يكون بعوني وبعونها بس قلت لكم ماابي اروح
منال وهي تبوسها : بليز لمى لو لي خاطر لاترديني وقومي معنا
لمى بضيقه : منال وربي مالي خلق اروح ولا فيني حيل البس واحط ميك آب
سحر : خلاص لاتسوين شي لبسك حلو ومافيه شي والعزيمه مو رسميه يعني بس احنا وهي
لمى : خلاص كيفكم سووا اللي تبون
منال وهي تضمها : وه بس فديت قلبها المطيعه
قامت منال وسحر يلبسون ويجهزون نفسهم وبعد العشاء كانو كاشخين كأنهم رايحين زواج موب عزيمه ماعدا لمى اللي تاركه شعرها على طبيعته ولابسه بنطلون جينز وتي شيرت احمر نفس لبسها اللي جت فيه من البيت ووجها خالي من اي مكياج ومازال واضح فيه الحزن واثار الدموع
وصلو عند الفيلا ونزلت اول وحده سحر بعد ماغمزت لــ منال
منال : لمى حبي انتظري بعدل مكياجي
انتظرت لمى منال وبعد 5 دقايق نزلو للفيلا اللي سحر خلت بابها مفتوح لهم كانت الفيلا صغيره شوي وفيها حديقه صغيره تجاوزتها هي ومنال واتجهو للمدخل
كانت سحر واقفه عند المدخل واول مادخلو سكرت الباب بالمفتاح
لمى بهمس : وين صديقتك شكلنا جينا بوقت غير مناسب
سحر : لا تطمني عارفه بجيتنا بس يلا افسخو عباياتكم
شالو البنات عباياتهم ورتبت منال نفسها بعكس لمى اللي بس مسحت بيدها على شكله وكانت تناظر بالفيلا كانت صغيره الارضي كان عن يسارها صالون مفتوح ودرج من النص يطلع على الدور العلوي وبالجهه الثانيه كان فيه مطبخ مفتوح على النظام الامريكي وعلى يمينها باب سحب كبير ماتدري وش وراه بس توقعت انها تكون غرفة جلوس او مكتب
سمر وهي تقرب من لمى : محضره لك مفاجاءه حلوه اوعدك تنسيك خالد وسنين خالد بس غمضي عيونك اول
لمى بعصبيه : وحد قالك اني ابي انساه وبعدين مو تقولين انه بيت صاحبتك اجل وينها
سحر مو قبل ماتغمضين عيونك
لمى وهي تغمض عيونها : ياصبر ايوب يله غمضت
لفتها سحر على الجهه اليمين وبعدها فتحت باب السحب وهي تقول سبراااااايز
فتحت لمى عيونها ونصدمت من اللي شافته كان قدامها غرفة جلوس وفيها اربع شباب جالسين
جلست دقايق وهي تحاول تستوعب اللي تشوفه وبعدها بصرخه : ياحقيرررررره
راحت تركض للباب لكن قبل لا توصله كانت منال تحاول تمسكها وتهديها
منال : اهدي يامجنونه ناويه تفضحينا تعالي خلينا نجلس الين مانلقى لنا صرفه ونطلع من هنا ولا ناسيه ان الباب مقفول
لمى بصراخ : بعدي عني مجنونه انتي تبيني اجلس هنا (وهي تحاول تفتح الباب وتخبط عليه بجنون) افتحووه خليهم يفتحونه طلعوني من هنا
منال وهي تمسك ايديها بالقوه : اهدي يامجنونه لاتجيبين لنا الهيئه بصراخك ولحظتها فضيحتنا بتكون على كل اللسان ومحد بيقول انهم ماكانو يعرفون (وبهمس) انا مثلك انخدعت لكن مو بطريقتك تنحل الامور تعالي خلينا نجلس ووعدك اطلعك من هنا بأي طريقه
جاء واحد من الشباب ولما شافته لمى تخبت ورى منال عشان مايشوفها وبصوت خشن: بتجلسين بالطيب ولا اجلسك بالقوه
لمى وهي تبكي ورى منال : الله يخليك خليه يبعد
منال بغنج : خلاص انت اجلس وهي بتجي الحين معي
الشاب وهو يطبع بوسه على خد منال : فديت الدلوعين
منال بعد ماراح الشاب : شوفي يالمى بأسلوبك هذا ماراح نطلع من هنا خلينا نجاريهم شوي واوعدك اطلعك من هنا بدون اي اذى
لمى ببكاء : خليني جالسه هنا الين ماتجيبين المفتاح مستحيل ادخل عندهم
منال : ماينفع يامجنونه ماسمعتيه وهو يقولك بتدخلين بالطيب والا بالغصب
لمى وهي تأخذ عبايتها : ماراح ادخل الا وعبايتي علي ولا تقولين لي لا لانه على جثتي ادخل بدونها
استسلمت منال وبعد مالبست لمى عبايتها دخلو
كانت لمى ترجف من الخوف وماسكه منال بيديها الثنتين .. اما منال كانت تمشي بكل غنج ودلع برغم الخوف اللي بداخلها واتجهت للكنبه اللي جالسه عليها سحر ومشاركه فيها واحد من الشباب
جلست منال على الطرف لان سحر كانت جالسه بالنص وعلى الطرف الثاني كان جالس واحد من الشباب .. اما لمى ظلت واقفه لانها خايفه تبعد عن منال
... : خير وش عندك على هالعبايه لابستها
منال : ماعليه خلها فيها شوي الين تتجراء وهي بتفسخها من نفسها
... : وطيب ليه ماتجلس (وهو يأشر على المكان اللي بجنبه وبخبث )ولا اجلسها انا
لمى خافت من نظرته وجلست بسرعه على الكنبه المنفرده اللي قريبه من منال وهي متشبثه بكل قوتها بعبايتها وتدعي ربها انه يحفظها وتقراء اية الكرسي
بعد ماجلسو وبدو يشربون ويدخنون الحشيش وصوت ابو نوره يصدح في المكان
منال بهمس : الله يأخذك على هالخطه انا قلت لك انا قلت لك دبري خطه ترجع لمى لنا ماقلت دبري خطه تضيعنا كلنا
سحر بنفس الهمس : يزيد اللي جالس بجنبي يكون حبيبي وكل الموجودين اصحابه وانا متفقه معه يعني تطمني ماراح يصير لك شي ولمى اوعدك تطلع من هنا وتكون مثل الخاتم بأصبعك
منال : الله يستر مدري ليه قلبي مو مرتاح
سحر : قلت لك تطمني (وبصوت عالي ) اعرفك على الموجودين
وهي تأشر على اللي بجنبها هذا يزيد حبيبي .. وهذا فارس نسميه (وبضحكت دلع) المدخنه من كثر ماهو يشرب في
هالسجاير .. اما هذا مشعل مطربنا خليه بس يروق بعد كم كأس واسمعي احلى صوت واحلى دق عود
مشعل : كنت حاقد عليك بعد ماسكتينا من شوي لكن بعد هالمدح بسامحك
(سحر لما نزلت قبل البنات راحت لهم وطلبتهم يسكتون الين ماتفتح باب غرفة الجلوس)
منال شدها اخر واحد واللي سحر ماقالت اسمه كان وسيم حيل وواضح انه ولد نعمه بقوه من لبسه وساعته وحتى طريقة جلسته
منال بدلع : وهذا ماعرفتينا عليه
سحر بدلع : اممممممممم مااعرفه بس (وهي تناظر لــ يزيد) اتوقع حبيبي يعرفه
يزيد : هذا نواف ولا تحتكون فيه تراه عصبي ومايرحم
نواف وهو واضح ان كل اللي يشوفه مو عاجبه : تشكر صراحه على هالمدح
منال داخت من سمعت صوته كان صوته يسحر رجولي وفيه بحه حلوه نست خوفها من بعد ماشافت وسامته وكشخته (واااي يجنن هذا الحبيب اللي يرفع الرأس مو هالكحيان سعود )
منال بدلع : تشرفنا نواف
نواف بدون نفس : اهلين
ماتت منال من القهر توقعت اقل شي بيبتسم لها بيقول الشرف لي اي شي بس ماتوقعت اهلين وبدون نفس بعد
يزيد : سحوره ماعرفتينا على صديقاتك
سحر : ههههههههه مو انتم عرفتو اسمائهم الحقيقيه من المسرحيه اللي من شوي
يزيد : يعني لولا هالمسرحيه على قولتك والا كان كذبتي والفتي لهم اسماء
سحر : هههههههههههههههههه تقدر تقول كذا عمومآ هالقمر منال والثانيه لمى
مشعل : تشرفنا
منال وهي تناظر بنواف : الشرف لي
استمرت سهرتهم سحر ماكان عندها خطوط حمراء تشاركهم بالشراب والحشيش اما منال بالاول رفضت وبعدها جربت تشرب من الشراب شوي لكن ماعجبها طعمه بس سحر شجعتها حتى شربت كل الكأس وحطت لها كأس ثاني
اما لمى كان ماباين منها غير عيونها اللي غرقانه بالدموع حتى يديها لافتها بعبايتها وضامه جسمها وهي ترجف من الخوف ولا وقفت دقيقه وحده عن ترديد آية الكرسي
ونواف كان مثلها لا شاركهم شربهم ولا حشيشهم ولا حتى الرقص معهم كان يتابعهم بصمت ومكتفي بسجايره العاديه

ــــــــــــــــــــ .. ـــــــــــــــــ .. ـــــــــــــــــــــــ

كانت ليان بجناحها وتناظر الساعه اللي صارت 11 وفيصل الى الان ماجاء للبيت
صار لها ساعتين وهي لابسه وتنتظره مافكرت تروح للغرفه الثانيه كلام فيصل اليوم قتلها لكنها مستحيل تتخل عنه بسهوله هي مالها بعد الله غير هو وجدها صح راكان يحبها لكن مصيره يتزوج ويعيش حياته ومستحيل تكون عاله عليه ولين الله يشفيها مستحيل انها تكون لها سند لانها بالاخير بنت وبتكون بحكم رجل وصعب تنغص عليها حياتها واهلها مارحموها وهي عندهم اشلون بيرحمونها وهي مطلقه
عشان كذا هي مستعده تسامح فيصل على كل شي وترضى بكل عيوبه هو صادق انها ماعطته فرصه يثبت لها صحت الكلام اللي سمعته وبسرعه اتخذت قرارها وظلمته ومستحيل تلومه على الكلام اللي قاله لانها هي اول من غلط عليه
سمعت صوت باب الجناح يفتح وبسرعه فزت من السرير ومسحت دموعها
دخل فيصل لغرفة النوم وشافها قدامه وبرغم الابتسامه اللي راسمتها على شفايفها لكن اثار الدموع مازالت واضحه بعيونها
ليان بأحراج : اخيرآ جيت (مالت علي بدال ماارحب فيه اقوله اخيرآ جيت)
فيصل بــ برود : ليه بغيتي شي
ليان بحزن : لا ... بس
فيصل : دام لا اجل نامي لاني تعبان وبنام ولا ناسيه ان ورانا طلعه من بعد الفجر للمزرعه
تركها بدون مايسمع ردها واخذ له مخده وغطاء وطلع للصالون اللي بنفس الجناح
اما ليان بدت دموعها تنزل هي بتصرفاتها السبب بقسوة فيصل عليها مسحت دموعها بعنف وهي ناويه هالمره ماتكتفي بس بالدموع وراح تعمل المستحيل عشان ترجع فيصل لها
طلعت للصالون وشافته نايم على الكنبه ومغطي عيونه بيده قربت منه وهي تستجمع كل شجاعتها جلست على الارض بجنب الكنبه ومسكت يده وبهمس : فيصل سامحني ماكان قصدي اقول هالكلام وربي طلع مني بدون مااحس او افكر فيه ادري اني غلطانه لكن سامحني هالمره وربي ماتحمل اشوفك زعلان علي
فيصل بــ برود وبدون لايرفع يده اللي مغطي فيها عيونه : ليان نامي وخليني انام ترى تعبان ومالي خلق على الكلام
ليان وهي تحاول ماتنزل دموعها : طيب قوم نام على السرير واذا فيه احد لازم ينام على الكنبه بيكون انا مو انت
فيصل بعصبيه : ليان اسمعي الكلام وخليني انام
حطت يدها على فمه عشان مايسمع صوت شهقاتها وراحت للغرفه اخذت لها غطاء ومخده وراحت حطتهم على الارض في الصالون وقبل لاتنام راحت لفيصل وطبعت بوسه على خده لكنه مارد عليها
نامت على الارض وهي حاطه جزء من الغطاء تحتها والجزء الثاني منه متغطيه فيه اذا هو عنيد بتكون هي اعند منه وماراح تكون بمكان هو مو فيه
فيصل كان حاس بكل تحركاتها وقلبه يتقطع عليها وهو يسمعها تبكي كان يبي يأدبها بس حتى هو ماتخيل انه بيكون بــ هالقسوه معاها كان يسمع صوت بكائها المكتوم وهو بالقوه ماسك نفسه لايروح يضمها ويهديها كان بين نارين قلبه يقوله ارحمها وعقله يذكره بشكوكه ويقول خلها تتأدب يوم او يومين وبعده سامحها
بعدها بفتره طويله هدت وعرف انها نامت رفع يده عن عيونه وشافها وهي نايمه على الارض كسرت خاطره لكنه قوى قلبه وحاول انه ينام حتى هو

ــــــــــــــــــــــــ .. ـــــــــــــــــــــ .. ــــــــــــــــــــــــــ

رجع طلال ولين لــ الشقه بعد ماقضو اجمل يوم بالتسوق ماترك شي ماشراه لها واي شي كانت تمسكه او بس تناظر فيه يروح يشتريه حتى لو كانت نظرتها مالها معنى او وقعت عينها عليه بالصدفه
اما هو فدخل محل ساعات فخمه وطلب من صاحب المحل يطلع له افخم الساعات طلع له حوالي 5 ساعات وطلب من لين تمسك وحده واللي مسكتها لين شراها واعتبرها هديه منها ولبسها قدامها وهو يوعدها مايشيلها من يده
فتحت كاميليا فمها وهي تشوف كمية الاكياس اللي بيد طلال
طلال : كاميليا افتحي للحراس اذا جاء لاني طلبت منه ينزل باقي الاكياس من السياره
كاميليا بصدمه : ليه فيه غيرهم
طلال : ههههههههههههه ايه هذا من غير اللي بكره بيوصل لاني اعطيتهم عنوان الشقه يوصلونها لها
كاميليا : ليت كل الازواج مثلك
طلال بحزن : ليه تتمنين انهم يكونون قاسين وبدون رحمه
كاميليا وهي مو فاهمه : اذا كل الحب اللي اشوفه منك تجاهها تعتبره قسوه فأنا استغرب اشلون بيكون الحب عندكم ياالعرب
طلال بمزح عشان يغير الموضوع : خلاص بزوجك واحد عربي عشان تجربين حبنا (وبجديه) العشاء جاهز
كاميليا بسخريه : قصدك الشوربه ايه دقايق وتكون جاهزه
كانت لين ماتشرب غير شوربه وبالموت على مايقدر طلال يشربها كل صحنها عشان كذا ماقدر يعشيها برا ورجعو يتعشون في البيت او بالاصح يشربون الشوربه
طلال : اوكي اجل بندخل نبدل على ماتجهزينها
دخل طلال للغرفه وحس ان لين محتاجه شور دافي بعد هالمجهود ساعدها على الاستحمام وبعدها بدل ملابسها وطلعو للمطبخ عشان تشرب شوربتها و يعطيها ادويتها عشان تنام

ــــــــــــــــــــ .. ــــــــــــــــــــ .. ــــــــــــــــــــ

الساعه وحده بعد منتصف الليل

كانت لمى تناظر بجوالها اللي يرن وهي تشوف رقم امها حطت يديها على جهها من ورى اللثمه وصارت تبكي بصوت مسموع كانت تحس انها مخنوقه وحتى اطرافها تحس فيهم بخدر بسبب دخان الحشيش اللي كان كاتم غرفة الجلوس
اما منال وسحر كانو فالينها على الاخر ويرقصون مع يزيد ومشعل وفارس
حاولت تقوم عشان تمسك منال وتقولها ان امها تتصل عليها لكنها حست بدوخه ورعشه بجسمها صارت تبكي اكثر وهي تتخيل لو احد اعتدى عليها وهي بهالضعف حتى دفاع عن نفسه ماراح تقدر تدافع
شافت سحر وهي تطلع مع يزيد من غرفة الجلوس (سحر ماعندها شي تخسره لانها سلمت نفسها ومن زمان لــ يزيد لكن ماكان احد يعرف هالشي حتى منال)
اما منال استمرت ترقص مع مشعل عجبها بخفت دمه ووسامته لكن كان نواف اوسم منه بكثير بس انه شايف نفسه وكل محاولاتها انها تقرب منه فشلت
حاولت انها تنادي منال لكن صوت الاغاني غطى على صوتها اللي بالموت على ماينسمع من الخوف وكثرت البكاء
شافت مشعل يطلع من غرفة الجلوس وهو ماسك منال اللي واضح انها كانت مو داريه عن نفسها من هالسم اللي شربته
انتبهت لنظرات فارس اللي تلتهمها قرب منها وهي فزت من مكانها ووقفت بزاوية الغرفه وهي تصرخ من الخوف
فارس : خليكي مطيعه وتعالي معي بالطيب شوفي صاحباتك معارضو
استجمعت منال كل قوتها دفت فارس من قدامها وركضت لــ نواف رمت نفسها عند رجليه وبصوت يقطع القلب وهي تشاهق من كثر البكاء : فكني منه اللي يفكك من عذاب النار وطلعني من هنا (كانت متعشمه فيه خير لانها ماشافته يشرب معهم ولا يرقص)
لكن نواف مارد عليها نزلت على رجله تبوسها : ابوس رجلك استر علي وارحم ضعفي
دفها نواف برجله وبكل قسوه واحتقار : مو انتي جايه برجليك هنا خلاص تحملي اللي يجيك

ـــــــــــــــــــــ .. ــــــــــــــــــــ .. ــــــــــــــــــــــ



- وش بيكون مصير لمى في هالليله المشوؤمه وهل هي الوحيده اللي بتخسر اهم شي تملكه البنت او بتشاركها منال نفس المصير

- لــ متى بتستمر قسوة فيصل وهل بيرجع لها مثل قبل الحبيب المغرم او بستجد امور تزيد من الفجوه بينهم

- كيف بيكون لقاء ليان بأختها وهل بتتحسن حالة لين او بيكون مصيرها المصحه والجلسات الكهروبائيه

- هل تتوقعون ان الخبله ندى بتوافق على تركي


مودتي

’,

اشوفكم على خير ان شاء الله مع بارت جديد

تحيآآتي