المنتدى :
القصص المكتمله
كفن صفعني نفعني للكاتبه البدور
بسم الله الرحمن الرحيم
رواية كفن صفعني نفعني للكاتبه البدور
كبداية حابه أني أعرفكم على أبطال القصة علشان ما تلخبطون :
خالد العامري : بطل القصة ولد عاقل وحليو وما عليه كلام ..
موزه الفلاسي : وهي بطلة القصة البنت الخجولة و الحلوة اللي محد يقدر يقول عنها إنها هب طيب وهي البنت الأصغر من بين 4 بنات وولد اللي هو أخوها سعيد العود .
جمال: واللي هو ربيع خالد الروح بالروح ودا يما وياه يهومون في السناتر وهو صح طيب لكن عنده كبرياء و كل شي وحده بوحدة وعاشق البنات.
حصة: بطله ثانيه للقصه وهي ربيعة موزه واللي هي يارتهم في نفس الوقت عصبيه وشيطانه وتتخبل عالهوامه والحوا طه في المحلات وينقص عليها بسرعه وربشة وفيها هفة.
منصور: اخو خالد وربيع سعيد اخو موزة متهور ومغازلجي ودايما فارش في المراكز يرقم البنات.
سعيد: اخو موزه عازب في العشرينات والبنات يتخبلون عليه لكنه ما يعطيهم ويه بس يعيبه يقهر وقلبه مجروح وأشياء ثانيه بتكتشفونها في القصة
والشخصيات الثانية بتنذ كر في القصة لأنها ثانوية وما في وقت نذكرها.....
الجزء الأول
اليوم الجمعة نشت موزه من الرقاد وكانت الساعة عشر الصبح تقريبا ، سارت تتريق ويا أمها في الصالة وتسولف وياها وخذت الجريدة ودخلت حجرتها تقراها وهيه يالسه تتصفح الجريدة شافت صورة شاب وما كان شكله غريب عليها هذا ،يلست تعصر مخها تحاول تتذكر المكان اللي شافت فيه هاذا الولد ......... وبعد مذله تذكرت انه هاذا ربيع أخوها سعيد شافته مره من الدريشه وهو ياينهم ...يلست
تضحك عليه لان جريدة الخليج فاضحتنه جدام الناس وحاطتنه في قسم المعاكسين ..هاهاها ..(يستاهل محد قاله يلعوز بنات الناس)
رن المبايل وكانت هاذي رنة حصوه أكيد شي عندها تراها هب متعودة تنش هالوقت الكسولة ويالله يالله تنش حق الجامعة
.ردت موزه : هلا حصوه صباح الخير...
حصة: يا مرحبا يا مرحبا الساع.....,يا بو عيون سود ووساع .. اشحالج الغالية ؟
ردت موزه وعاويها علامة استفهام:
بسم الله الرحمن الرحيم الناس اتجول اصبحنا و اصبح الملك لله
حصوه وهيه ماده البوز شبرين:
:بسم الله الرحمن الرحيم؟؟ ...بلاج انتي محد يروم يقولج كلام حلو الصبح...عفانا الله
يلست موزه تضحك على ربيعتها اللي نست عمرها وهي تتحرطم عاقولة الكل عيوزاه
حصة عقب ما خلصت : موزوه ... ايه يا لخسفه ....
موزه : أنت الخسفه يالناقه . ( وكانوا يسمون حصة الناقة لأنها طويلة وحليلها )
حصة : أنت هب طبيعية شكلك مخرفه اليوم المهم ما علينا اباج في موضوع خطير.
موزه : شو الموضوع ؟؟ اللهم يا كا فينا شر مواضيعج الي ما تخلص دشي ....دشي في الموضوع مايودتج.
حصة :بطوفها الدفاشه اليوم بس مره ثانيه احلمي استوي طيبه .
موزه :شوفي إن ما دخلتي في الموضوع يا أم الهذربان بيخلص رصيدج .
حصة :أنزين اسمعي ..بتين ويااي السينما منزلين فيلم رعب يديد ويخبل ..الله يخليج لا تقولين لا لان مالي حد غيرج ايي وياي .. الله يخليج يلا وافقي يلا بسويلج اللي تبينه ..وبعزمج على كوفي وبلعبج وما بقهرج وبشتريلج بدله وعطر كوكو شانيل....و,و,و... (وفي هاي اللحظة وقفت حصة تاخذ نفس)
موزه : حصوه خذي نفس .. ما عطيتيني فرصه أرد
حصة على أعصابها تتريا الرد .......
موزه : بفكر.... تراها روحة السينما فيها مخاطر.. و خاصة اذا كانت وياج
حصة وهي على وشك من إنها تنفجر
:نعم حبيبتي ؟ مخاطر ؟؟؟؟ شيه وين عايشين في الغابة الله يخليج ؟؟اسكتي لاشوتج وفرج في جنكل لاند.
موزه : عن الاطنازه...
حصة : عيل ليش مابتيين وبتفكريين وحالتج حاله ؟
موزه : بكل بساطه يانسايه نسيتي هاذاك اليوم يوم شافني أخويه سعيد وأنا طالعه من سينما جرا ند وياج شفتيي شقا بغى ينفجر وعيونه بغت تطلع ... اذا أنت نسيتي انا مانسيت هب كافي الفضيحة اللي سويتيها في السينما من يوم يلسنا عالكراسي وأنت اتزاعجين على اشو مادري وفشلتيني خليتي الشباب يضحكون علينا مالت عليج
حصة : مالت عليج انتي ............ول خييييييييييييييييييبه تذكرين هاي السالفة المغبره الا صارت من 3 شهور وبعدين ما اعتقد ان هاذا الشي يتكرر يا لمغبره
موزه :هيه صح عليه .... انت ما تتوبين شكلج مصره تخلين الشباب يضحكون علينا مره ثانيه
حصة .: اففففففففففففففف منج ياعيوزاه أنا الغلطانه اللي لجأت لج.
أرمس امايه وبيي بالرد
موزه: هاهاها....بلاج مستويه جبريت (كبريت) خلاص ولا يهمج الغالية بسير
حصة وهيه على وشك أنها تنقز من الفرحة :
يااااااااااااي فديتج والله صدقهم اللي قالو الصديق وقت الضجيج
موزه : أي ضيج ؟؟؟؟؟؟؟؟؟؟
حصة : الضجيج اللي أنا فيه .
ضحكت موزه عليها وحليلها ربيعتها خرفت ما تنلام البارحة خلصوا من الجامعة سنه أولى هاي يوم بتتخرج شو بتسوي ؟؟؟؟؟ بتهز جامعة زايد كلها من الفرحة .واللي يقول عاد بتتخرج من تخصص مثل الناس إلا علوم الأسرة الكل استغرب يوم دخلت حصة هاذا الاختصاص على شطارتها وذكائها وكلهم توقعو أنها تدرس طب ويوم سألوها ليش هالاختصاص ردت :لان ها لاختصاص بيعلمني الطبخ .... يعني بيوصلني لقلب ريلي .. مثل ما يقولون قلب الريال في معدته وأنا ناويه ارضي ريلي
هاذاك اليوم تمت موزه ناجعه عليها من الضحك أي ريل وأي خرابيطه ومن هاذاك اليوم تأكدت أنها مينونه ومخرفه
حصة :حووووووووووو... وين سرحتي ؟
موزه: سلامتج ماشي
سمعت موزه دق على باب حجرتها ودعت ربيعتها عشان تفتح الباب
عدلت موزه جذلتها وفتحت الباب ......طلع أخوها سعيد
سعيد : مابغيتي تفتحين الباب .........شو عندج ؟؟
موزه : بدال ماتقولي صباح الخير تهزبني وتقول شو عندج ؟؟؟ لا تخاف ما عندي شي ..كنت ارمس ربيعتي حصة
سعيد : حصة..؟ اااااا .. أنزين ويا ويهج اطلعي الوالدة تبيج في الصالة
موزه: خير ان شاء الله
سعيد: كل خير
صكت موزه باب الحجرة وطلعت وخوها سعيد وياها دخلت موزه الصالة وشافت امها وابوها يالسين واشكالهم غريبه عجيبه ... يلست أتفكر اكيد في شي
موزه لامها : ها امي شو بغيتي ؟
صدت الام اطالع بنتها وبعدين ولدها سعيد .. كأنها تفكر وطلبت من بنتها انها تيلس
سعيد: وانا يعني ما ايلس ؟؟؟؟
موزه لخوها سعيد : شو هاي الغيره بعد ويا ويهك ايلس
بو سعيد لام سعيد : عوشه ترا عيالج مافيهم مذهب
استحوا الاثنين ويلسوا ....ودخلت الام في الموضوع بعد مقدمات طويلة عريضة ...........
الام : تراه منصور العامري ربيع اخوج سعيد ياي يخطبج وحابين ناخذ رايج تراه الولد ما يعيبه شي ما شاء الله عليه ولد ناس وما عليه كلام
موزه: امايه أي منصور هاذا ؟؟
ام سعيد: منصور هيه وحليله اللي كان ايي يذاكر ويا اخوج أيام الثانوية العامه ربيعه اللي دايما عدنا ما يفارج.
موزه : كيف يباني وهو ما يعرفني؟ جد شافني ؟
ام سعيد: والله ما عندي خبر يمكن الله يعلم ولا يمكن سمع عنج
موزه : انزين أمي انا قايله بعرس يوم بخلص الجامعة
سعيد : شو هاي الحركات بعد ؟
موزه: لا حركات ولا غيره انزين انا توني داخله ال19 وتباني اعرس ومن هاذا منصور ؟؟؟
.. ذكرت موزه انها شافت صورته في الجريده بس ما حبت تقول شي جدام هلها وتفشله مب كافي ان نص الإمارات شافته وانفضح جدامهم
سعيد : كيفج فكري
بو سعيد : شوفي بنيتي إذا ماكنتي تبين تعرسين الحين ترانا مابنغصبج
فرحت موزه وسارت تحب أبوها على راسه : فديتك يابويه أنت الوحيد اللي تفهمني
أم موزه : يالله الحين ابوج الوحيد اللي صار يفهمج ونحنا ياخيبتنا مانفهم شي
سارت موزه تحب أمها عاراسها وتحضنها : حبيبتي امايه لا تزعلين ... وقالت تهمس في اذنها نحن نراضي الشيبه بس( وانت لسه شباب ياام العيال )
عيبها ام موزه الكلام وضحكت بعد ماتقردنت من بنتها موزوه الشيطانه
استأذنت موزه علشان تروح حجرتها
أم موزه : فكري يا بنتي باللي قلته تراها فرصه ماتتعوض
موزه في خاطرها وع منه المغازلجي ....
******************
طول خالد على مسجل السيارة لأنه يتخبل على أغنيه العيون لراشد الماجد وارتبش الحبيب يوم وصل شيشة البترول قصر شويه ترس فل وعقب وقف سيارته علشان يشتريله بارد من اينوك ورن تليفونه بوكاميره طلعه شوش شوي من جيبه علشان يسمع الهندي رنته اللي مدخلنها اليوم ( وعلى الشو ما عندي خبر يا عيني ) وطلع ربيعه جمال
خالد : الووووووووو؟؟
جمال : هلاااااااااا بو الشباب وين دارك ؟
خالد : أي دار واي خرابيطه ... يابوك داري الشيشة
جمال : هيه .... أقولك مابتي وياي
خالد : عاوين ؟؟؟؟؟
جمال : عاحمرعين ...هاهاها ...اتطنز بسير صحارى سنتر بتي وياي ؟
خالد : هيه ليش لا.. فاضي واليوم خميس ليش مااطلع واشم هوا
جمال : أنشم هوا ونصطاد غزلان
خالد : ياعيني ... والله متفيج
جمال: هب وقت المحاضرات
خالد: على راحتك
جمال:انزين اشوفك هناك ولا امر عليك
خالد :لا يابوك اترياني في ستاربكس اللي صوب السينما
جمال : اوكي .. مع السلامه
خالد : مع السلامه
دفع خالد حساب البيبسي اللي خذاه وركب الموتر وسار صحارى
رن مبايل موزه إلي واعاها من غفلتها شافت الرقم وكانت حصه ردت موزه
: نعم ؟
حصه : شو نعم أنت الثانية اتلبستي ؟؟؟
موزه : ليش اتلبس بعد ياعيني ؟؟
حصه : شوووووووووووووو؟؟؟؟؟؟؟؟ يعني ماتلبستي والفيلم بيبدأ الساعة سبع باقي ساعة إلا ربع شوفي يالهبلا عندج ربع ساعة بس البسي وخلصي هب لازم اتحطين مكياج .. يلا دهديه
موزه : أنزين أنزين أهم شي انج اتلبستي يالبارده
حصه : انا مخلصه ويالسه اترياج واوني بسير من وقت عشان ايلس في الكوفي
موزه : أي كوفي بعد أنت أتعرفين أن كوفي the one سكروه وفتحوا واحد بداله هب عايبني كله يبيع ايس كريم ولا تحلمين ايلس فيه
حصه : أنت هبله عااااادي في غيره حبيبتي بنيلس في ستاربكس كافيه
موزه :هبابج يا الخايسه انيه ايلس هناك احلمي بس أنتي
حصه : خييييييبه ليييييش ؟؟؟؟؟
موزه : كيفي كيفي لا تخليني أغير رايي وما آيي وياج
حصه : لا لا.. خلاص بس أنت الحين البسي وانا عقب بقنعج أو..بحطج في الأمر الواقع.
موزه :احلمي.....اوكي مع السلامة
حصه : مع السلامه
الجزء الثاني
مرت حصة على ربيعتها موزه بسيارتهم الستيشن اللي يسوقها دريولهم عبد الواحد وحصوه الربشه لازم ترفع صوت المسجل يوم يسوق دريولهم الخديه السيارة وتشتته
وكانت حصة حاطه أغنية سهرتنا لرابح صقر ... وهب بس شيه لا الحبيبة حصة كانت ترقص بعد ومن حظها المنحوس شافها واحد خايس وفهم الحركة إنها يا لحبيب الحقنا وطبعا هو ما عنده مانع ... وما انتبهت حصة لين ما قاللها الدريول :
- ماما..ماما.. سوف سوف هزا ريال في سيارة ورا مال انتي سيارة ..
وأول ماقاللها الدريول هاذا الكلام لفت الشيله عدل ويلست باحترام علشان ما يلحقهم ويسويلهم مشاكل
موزه تعاتب حصة : ارتحتي الحين ..بردت دودتج هاذا اللي أنت تبينه هالخايس يالس يلحقنا .....والله انه فاضي وما عنده شغل ....ما ترومين اتقرين مثل الوادم يوم توصلين البيت هزي على كيفج هب في السيارة جدام الناس ..والله فضحتينا
حصه وهي على الدقه بتدمع عينها : انزين أنا بس كنت اصفق
موزه : ..................................
حصه : خلاص يا موزه حصل خير
موزه:....................................
حصه : انزين خله يلحقنا اللي يقول نحن بنعطيه ويه
موزه : ممكن تكرمينا بسكوتج ؟؟؟؟؟؟؟
وتمت حصه ساكته ومتلومه من ربيعتها
لفتتها حركات صدت ولقت الخايس يالس يأشر لها ويسوي حركات تقهر
بس ما رامت تضحك عليه وتسوي شي لأنه هب وقته خاصه ان ربيعتها محرجه عليها الحين وهي ماترضى بزعلها .
قالت حصة في خاطرها الله يسامحج يا حكومة دبي مانعين عنا المخفي اللي ناخذ فيه راحتنا بس شو بيدنا ؟؟؟ حدنا مخفي 30% ماييب ولا يودي والحين لا أروم لا ارقص ولا آكل في السيارة .
وصلوا البنات صحارى سنتر، وبعدها موزه مويمه على ربيعتها تحجبت موزه اما حصه عدلت جذلتها ونزلن من السيارة ويالله يوم الخميس في صحارى شو الزحمة ......عجيبه وشو شباب بوظبي وشباب الشارجه ودبي مثل النمل ماشا الله ما عندي خبر شو لهم بصحارى .
المهم بالنسبه للولد اللي كان يلحق البنات تراه ما فجاهم ونزل وياهم صحارى دشن البنات صحارى من الباب وركبن الدري المتحرك وتمشن ويوم وصلوا صوب ستاربكس اللي جدا (( ALDO)) حمرت خدودهن من النظرات اللي طايحه عليهن اللي يقول داخلين مسابقات ملكات جمال وطبعا أنا ما اقدر أنكر ان البنات ( حصه وموزه ) يخبلن ماشاء الله جمال رباني بدون مكياج وبمكياج .وكانت العيون في صحارى متوجهة لحصه لأنها متمكيجه ولأنها طويلة ... باختصار تلفت النظر ...وطبعا هاذي هب نية حصه.. تمن يتمشن لين ما وصلن فوق صوب السينمات.... اختارت حصة سينما صحارى لأنها تحيدها دايما خاليه ومافيها زحمه حجزن تذكره ويلسن في كراسي الانتظار اللي حاطينها جدا ستاربكس اللي صوب السينما وطبعا من الجهة الثانيه الاخوان خالد وربيعه جمال يالسين في ستاربكس ...خالد يشم هوا ...(اللي يقول يالس عالبحر ) ..وجمال يتفرج عالبنات
وشاق حلجه من الابتسامات راع بوظبي .. موزه وحصة انقهرن يوم شافوا الغبي لاحقنهم وراز ويهه وياهم في السينما ..(اففففففففف يالقهر)
موزه: ماعرف شو اسويبج ؟؟ الغبي لاحقنا .
صدت حصة تطالعه .... واشرتلها موزه انها ما تطالع .
حصة : البسيه خليه يولي
موزه : نحن بنخليه يولي بس هو بيخلينا انولي !
حصة :.............................................
ارتفع الضغط عند موزه يوم شافته ياي ايلس جدامهم وكان بودها انها اتفر الشنطه عاويهه الخسفه ....واللي يقهر زياده انه يالس يبتسم بشكل يا ربيييييييييييييييييييي يقهرررررررررر وياويهه..
الله يغربله ... استغفر الله هذا يتجاشر على عمره بس خله يسوي شي أنا براويه العين الحاره .
وبالفعل الولد اتجاشر على عمره واتجدم بكل وقاحه وحط الرقم على الطاولة جدا حصه ..حصه اتيبست مكانها ما عرفت شو تسوي بس موزه كانت متحلفتله ونشت من كرسيها ورفعت كاس العصير وجبته عاويهه ......
حصه شهقت من الصدمه والولد اتيبس مكانه وموزه انصدمت من الحركة اللي سوتها .المهم إن خالد ومنصور لفت نضرهم الموقف اللي يالس يستوي ... المشكلة أن الموقف ما انتهى هنيه الولد نش وصفعها على ويها هنيه موزه من قوة الصفعه يلست وطبعا دمعت عينها.. وحليلها ما سوت شي علشان ما تكبر السالفه ويتيمعون الناس وتستوي فضيحة ..
خالد : هذا ما يستحي ...
جمال: يمكن أخوها ..؟
خالد : أخوها ويحط الرقم على الطاولة ؟؟!!
جمال: صدقك والله!
خالد : انا بسير أطالع الوضع من قريب وأتفاهم ويا الولد
جمال: أرجوك لا تتدخل ....
خالد ما عطاه ويه....... وسار صوب الولد اللي شل الرقم وحطه في أيد حصة عقب هذا كله
خالد اتقرب من الولد وقاله بصوت رجولي يخوف : يا أخ شو عندك هنيه ؟؟
الولد: نعم ؟؟ وأنت من تكون حضرتك ...لو سمحت لا تتدخل في شي ما يخصك ..
خالد : كيف ما ادخل يالنذل وانا اشوف خواتي ينصفعن...
الولد احترق ويهه وما عرف وين يوديه وحس بتوتر
خالد عطاه بكس على ويهه والولد طبعا ما سوى شي روح بهدوء ( ماله ويه الحبيب اتفشل )
اتقرب جمال من خالد وكانت موزه اتصيح بهدوء وما رفعت راسها اللين الحين لكن في قلبها كانت مستانسه ان هذا الولد الشهم دافع عنها صدق انه ريال ماشاء الله عليه وكانت عايبتنها الحركة انه يسمي عمره أخوها لو كان سعيد أخوها هنيه جان ضربها وما كان بيدافع عنها .
حصه : مشكور اخويه ما قصرت
خالد: مافي داعي تشكريني يا أختي هذا واجب
حصه : والله اني مستحيه منك يااخويه ماعرف كيف أكرمك
خالد : لا أختي ماقصرتي أتمنى اني ماكون أزعجتكم بأي شي
حصه : لا إزعاج ولا شي
خالد : أختي تامرين بشي
حصه : مايامر عليك عدو سلامتك اخويه
خالد : الله يسلمج مع السلامة
حصه : مع السلامة
وروح خالد ويا ربيعه يتمشون وحصه سارت ويا موزه تمسح دموعها في الحمام
جمال: شفتها يا خلوود ؟؟؟؟؟؟؟؟؟؟؟؟؟
خالد : منو؟؟؟؟؟؟؟؟
جمال: اااه يا ربي ماحلاتها
خالد : منو يا ريال
جمال: البنت اللي كنت اتكلمها شفت الذوق والاحترام والجمال والدلال .... ولا سمعت صوتها العذب ااه ...مع السلامة اخوي ....مارووم يا ريال لازم اقولها انها حلوه وتخبل واني متخبل عليها ....فديتها والله
خالد : يا ريال استح عاويهك عيب والله عيييييب
جمال: اني أعجب بوحده عيب ؟؟؟؟؟؟؟؟؟؟؟؟؟؟؟
خالد : أنت هاي البنت ما تعرفها ليش تييب طاريها ؟
جمال: والله يا ريال ماعرف شو اقولك... صدقت بكلامك
خالد.........اننزين انا ربيعتها غامضتني
جمال : هيه ....اقول شو رايك نلحقهم ونعرف وين بيتهم
خالد : لا شو أخاف يلاحظون ويزعلون وبعدين انا اريد اسير وافي سنتر
جمال: آه يا دنيا ظلمتيني
خالد : خلاص صار اللي صار خلهم في حالهم اذا كان لك نصيب فبيكون من حظك
جمال : خلاص شو بقول ....يلا سرينا وافي سنتر
وساروا الشباب وافي... أما موزه دخلتها ربيعتها الحمام تهديها وعقب بالغصب دخلتها السينما لأنها كانت ناويه اترد البيت ... وكانت موزه تحمد ربها إن الناس ما تيمعت وان الولد اللي دافع عنها عرف كيف يهدي المشكلة يلست موزه تدعيله بالخير وحليله يستاهل ... كانت حصه مندمجه بالفلم وموزه اتفكر بالريال اللي دافع عنها كيف اتردله الجميل...؟ وليش هيه يالسه اتفكر فيه بهذي الطريقه..؟ وهي حتى ما شافت شكله .!!
خلص الفيلم اللي ما فهمت منه موزه أي شي لان الريال الغريب شغل بالها ...طلبت موزه انها اترد البيت لكن ربيعتها أصرت انها تتمشى شوي ..
حصه : يلا عاد بسج زعل ونكد خلنا نتمشى هب مصدقه اني خلصت سنه أولى لا تنكدين علي خلينا نتمشى ونشاهد العرب .
موزه : وشو تشوفين فيهم..؟؟! يلا اتاخرنا الساعة تسع الحينه.. سعيد اذا شافني برع البيت ها لوقت بينازعني ..!
حصه : يا هالسعيد مالج بعد لاااااااااعت جبدي
ورن تليفون موزه وردت عليه : الو ؟
ام موزه : هلا أمي وين دارج الغالية ؟
موزه : قلتلج أمي بسير ويا حصه السينما .
أم موزه : برايج بنيتيه ...برايج ...جان بسيرين بيتهم بعد
موزه : انزين سعيد ما بيقولي شي
ام موزه : هبابه يقولج شي وانا عاطتنج الإذن .
موزه : خلاص ماعليه مع السلامة
وسكرت موزه التليفون وعطت ربيعتها التفاصيل اللي طلبتها .........
اتخبلت حصه يوم عرفت ان ربيعتها عندها الإذن والتصريح بالخروج ،
ويت على بالها أفكار جهنمية ( يعني أفكار بترفع الضغط حق موزه ) وموزه وحليلها ما عندها خبر بهالافكار ..
اتصلت حصه حق الدريول عبد الواحد ...
حصه : الوو ....عبد الواحد اقوول جيب سيارة جدام باركينج انا الحين سير..
عبد الواحد : ok mama
موزه استانست تتحرى وحليلها انها بترد البيت .....
ركبن البنات السيارة وانصدمت موزه يوم قالت حصوه حق الدريول انه يسير وافي سنتر ........
زعقت موزه زعقه : نععععععععععم!! لا أمي رديني البيت
حصه : عبد الواحد ما عليك منها سير سير ابويه وافي .
عبد الواحد : ok mama
حطت حصه ربيعتها في الامر الواقع وساروا وافي.... في الدرب سألت موزه حصه
موزه : حصوه الناقه ؟؟؟ شو لج بوافي بانصاف الليالي
حصه : اريد اطالع الساعات شوبارد إلي نازله توها في السوق عندج مانع ؟؟
موزه : يااااااااااااااالله .......من متى قمنا أنسير أنطالع السوع في وافي حدج سوع سوق نايف ويا ويهج ..
حصه: نعععععععععم ؟؟؟؟؟؟؟؟انا البس سوع سوق نايف انا أصلا سوق نايف ماعرفه
ضحكت موزه وعقب قالتلها : علينا..؟؟ نسيتي الخلقان مالت سوق نايف اللي عجيتيها عج في الفريج
حصه : شب شب اسكتي ...ولا تراني ما بعشيج
موزه : لا اميه كله ولا يفوتني عشاج اللي يقول بتعشيني في مطعم قصر الهند
حصه : الحيين ممكن تكرميني بسكوتج ؟؟
ضحكت موزه وسكتت لأنها ما بغت تعاشي ويا ربيعتها.. وصلن البنات وافي ونزلن من السيارة ودخلن وافي ودشت حصه محل السوع وطالعت السوع وعيبنها واايد لكنها ما خذتها لانها يايه تلقي نظره بس.. وطلعن البنات من محل السوع وتمشن برغبة حصه طبعا وهن يتمشن شافت موزه الدكتور اللي يدرسهم في الجامعه : شوفي شوفي مستر دونالد ..
حصه : وين
موزه : في الكوفي شوب ويا مرته وعياله
حصه : يلا نسير انسلم
موزه : لا استحي
حصه سحبت موزه غصب وساروا
في الكوفي :
حصه : hi sir ....how are you ?
موزه: hi sir
الدكتور دونالد : hi girls ...how is your vacation
وطبعا لان موزه تستحي ولان حصه فالحه في الإنجليزي أكثر وويها لوح ردت :
wonderful sir we miss you:
ضحك الدكتور لأنه عرف ان حصه يالسه تتمصلح وياه ..وهيه تتحراه مستانس منها
ومن جذبها .!..( وحليلج يا حصه ) ...
خلصوا من السوالف ويا الدكتور وروحن يتمشن وموزه ناجعة من الضحك على حصه لان الدكتور فهم حركاتها ...
تمشن البنات وعقب يلسن في كوفي شوب يشربن شي يا(( الويتر)) وحط المنيو جدامهم وبعد دقيقتين رجع :
-فيني آخذ الطلب ماتموزيل ..؟
حصه اتخبلت ويلست اطالع ويهه: اييه فيك
ومارامت موزه اتيود عمرها من الضحك وضربتها حصه من تحت الطاولة اتسكتها لان اللبناني يالس يترياهم يخلصون
اللبناني : ايه مدام شو بتريدي ؟؟
حصه : اييه ...بدي كابتشينو ازا بتريد ..
اللبناني عيبه ويلس يسولف ويا حصوه
موزه : لو سمحت ابا شاهي من غير شكر
اللبناني : ايه ولوو مدام لأنك سكر ما في لزوم جيبلك سكر ما هيك ؟
موزه : لو سمحت ما يخصك .
اتفشل اللبناني وسار واحترم نفسه ....بعد دقيقتين يابلهم الطلب واحد فلبيني... شكله استحى على ويهه بو دم ثجيل قالت موزه في خاطرها ...
يلسن يسولفن البنات واستوت الساعه10:45 ... سارت حصه أتحاسب وانصدمت يوم شافت الريالين اللي شردوا الريال اللي ازعجهم عرفها جمال واشر حق خالد يطالعها ابتسمت حصه وردت عند موزه اللي كانت توها واقفه ويلستها حصه ...
حصة : شوفي هناك الريالين اللي شردوا هالخايس اللي لحقنا في صحارى
موزه: وين ؟؟؟
واشرتلها حصه بعينها وهم كانوا يالسين يطالعونهم بس بدون ما يوضحون
حصه : يالله شفتي اشحلاته ربيع اللي نازع الولد ...
موزه: أنا شفت الولد علشان اشوف ربيعه ؟؟!!
حصه :- انزين ما يودتج طالعي
رفعت موزه عينها صوب خالد وجمال وشهقت شهقه خفيفه يوم شافت خالد ...وقالت في خاطرها يالله يهبل
لاحظت حصه النظرات وقالت :
:- يا بنت وين سرحتي ؟؟
موزه : ها ....ماشي الغالية
حصه : شفتي شقا يهبل اللي متعصم بو لحيه خفيفه .
موزه : .................................
حصه : اتشوفين الحلو اللي عداله هو عنترج اللي دافع عنج
هنيه موزه رفعت راسها اطالع ..المتعصم ربيعه يعني المتغتر هو عنتر على قولة حصه ما شاء الله عليه ...ويلست موزه اتفكر الين ما انتبهت انه يالس يطالعها ...
واستحت موزه ونزلت راسها بسرعه ..
جمال يلس يناقش موضوع حصه وحظه الحلو لخالد بس خالد كان يفكر بموزه استغرب من عمره هو في حياته ما يلس يفكر ببنيه بهذي الطريقه ..
رن تليفون موزه وطالعت الرقم وكان أخوها سعيد ..ما عرفت شو تسوي اذا ردت بينازعها وإذا ما ردت بعد بينازعها .. تمت محتارة لين ما مطت حصه عنها التليفون وردت
حصه : الو نعم ؟؟
سعيد: ااا ( عرف سعيد إنها حصة واستحى يرد )
حصه : الوووو؟
سعيد: احم احم ... اشحالج حصه ؟
ردت حصه بلهجه جافه : بخير .
سعيد: موزه وياج ؟
حصه : هيه نعم عندك مانع ؟؟؟
سعيد: لا لا بس كنت اتطمن
حصه : اوكي بااي
وقبل حتى ما سعيد يرد سكرت التليفون بويهه
فرت التليفون بويه موزه : اندوج
موزه : خييبه ....حصوه ويا ويهج حرام عليج !
حصه : حرمت عليج عيشتج ..!
موزه : الولد يحبج وشيه اتسوين ؟؟؟
حصه : حبه برص ... خلي حبه حقه ما اباه !
موزه : لازم ما تبينه هذا طرزان جدامج ..
حصه : أي طرزان ؟
موزه : أي طرزان بسم الله عليج ....اقصد اللي جدامج .
حصه : هيه فديته والله
موزه : لين الحين محد يعرف ليش اتضاربتي ويا سعيد حبيبج ....حبيب الطفولة
حصه : روحج قلتيها حبيب الطفولة وهذا من الماضي ...والحين ممكن تغيرين السالفه
موزه : على راحتج ..
وبجذيه شلن البنات عمارهن وطلعن من وافي ونظرات خالد وربيعه ما خلتهم بحالهم
الجزء الثالث
في السيارة :
موزه : أقوول ...ما عرف كيف نسيت اقولج بس أنا واحد تقدملي اسمه منصور
حصة : مبروك حبيبتي ..تستاهلين
موزه : شو مبروك أنت الثانية بعد ..... هذا منصور ربيع أخويه سعيد ..واللي قاهرني أني شفت صورته في الجريدة اليوم في قسم المعاكسين ..
تمت حصة ناجعه من الضحك وكملت موزه :
ما ادري يا حصة أحس أهلي بيغصبوني عليه
حصة : لا ما اعتقد أهلج يسوونها ما شاء الله عليهم ناس عاقلين مستحيل يسوون هذي الحركة الجاهلة
موزه : ما أدري حسيت من نظرات سعيد إني لازم آخذ هذا المغازلجي
حصه : هاهاهاهاهاهاه......
موزه : أنت في عالم وأنا في عالم مالت عليج
حصه : ماعرف شو اقولج ياخويتيه الله يكون في عونج بس صدقيني لو دريت أن سعيد غصبج عليه يا ويله من سواد ليله
موزه : يعني شو بتسوين ؟
حصه : أي شي بس علشان خاطرج يا حبيبتي
موزه : ارجوج حصه لا تخاطرين
حصه : شب شب ما يخصج أنا اللي بتصرف هب انت
وما جذبت حصه هيه ممكن اتسوي أي شي علشان خاطر ربيعتها من أيام الابتدائية موازي اللي تحبها وايد وعمرها ما بتنسى الأيام اللي كانت تي بيتهم علشان سعيد اخوها كانت تحبه وتموت فيه وخاصة يوم كبرت شوي وفهمت الحب .
بس سعيد ضيع حبهم بيديه وبحركته اللي جرحت قلبها..وهو بعد لين الحين بعده ينزف..وحصه ما بيدها حل لازم تنساه وهي متأكده انها بتنساه مع الأيام مع انهم تفرقوا من سنين وما نست لحظه عاشتها وياه .
وسرحت حصه في ذكريات الطفوله ......
حصه لبشكارة عايلة بو سعيد : ميري ...وين ماما موزه
هزت البشكاره راسها : موزوه مافي هنيه
حصه : وين سارت ؟
ميري : موزوه في سير جامعيه ماما اوشه ويا ..
حصه : متى بتي ؟
ميري : انت شو في قوول ؟
حصة : اييه بلاج ما تفهمين ...متى إيجي ماما موزوه من جاامعيااا
ميري : انت سو في سوي مسكره مال انا كلام
حصه : ني.. ني.. قومي أنت خليني اطوف انا هب غريبه ..
ودخلت حصه داخل البيت أتدور دفتر الرياضيات مالها لان موزوه خذته تنقل الواجب وما ردته .. دخلت حصة أتدور الدفتر ..وكانوا ثاني ثانوي هاذيج الأيام في نفس المدرسه ونفس الصف وييلسن حذا بعض وفوق كل هذا ما يشبعن هذربان ...
وكان سعيد توه يااي من الجامعه ودخل حجرة موزه اخته يخبرها ان الوالده تبيها
والمفاجئه ان حصه كانت موجوده في الحجره وعاطيه سعيد ضهرها وكانت الحبيبه يالسه مربعه ريلها اتدور الدفتر وماخذه راحتها ....
التعديل الأخير تم بواسطة dali2000 ; 30-12-08 الساعة 03:41 PM
|
30-12-08, 03:27 PM
جديد مواضيع قسم القصص المكتمله
العرض الشجري
