بليززززززززززززززززززز كملي البارت جنان مره روعه

حبوبتنا .. مشكوره ع مشاركة الأفكار و تحلى أيامك يا رب ...

الجزء السادس """"""""



>>>>>> وليد<<<<<

رحت الدوام وانا احس قلبي مقبوض خايف نوره تكون تعبانه ولا قالتلي
اعرفها خوافه وما تحب تروح المستشفيات
حاولت ابعد هالفكره من راسي لاني يوم اقوم كانت نايمه مثل الملاك
الله يخليها لي ويحفضها كملت طريقي وصلت الدوام
حاولت اركز بشغلي بس كان ذهني مشوش وراسي بدا يصدع
طلبت كاس شاهي اسود ثقيل يمكن يصفي تفكيري شوي
بس مافي فايده
بعد وصولي بساعه وانا اناضر الاوراق الي قدامي من غير ما ادري وش مكتوب فيها
دق جوالي رفعته بسرعه اشوف من متصل
عقدت حواجبي وانا اشوف رقم بيت اهل نوره
الله يستر متصلين هالوقت غريبه
رديت وكانت ام ناصر بعد ما سلمت قالت وصوتها مايطمن
وليد وشلون نوره اليوم اتصل على جوالها ماتردعلي وحتى تلفون البيت ماترد
: قمت من مكاني وانا متوتر ليش وشفيها
: امس يوم كانت عندنا وعيال اختي يلعبون كوره وحنا جالسين بالحوش
ضربتها الكوره على ضهرها هي تقول الضربه خفيفه ورفضت اني اكلم عليك
بس انا قلبي مو متطمن
: رديت عليها وانا زاد خوفي اكثر وكني كنت انتضر هالمكالمه عالشان
اقطع الشك باليقين : زين زين هاذاي طالع بروح اشوفها سكرت منها و
طلعت من الشغل مسرع وركبت سيارتي وشغلتها حركت بسرعه
كنت خايف على نوره يصير لها شي اول مره بحياتي احس بالخوف
كنت دايم انلقى تهديدات بالقتل بحكم شغلي ولا مره حسيت بالخوف مثل هالحين
كنت حاط رجلي على
البانزين وعداد السرعه وصل ميه وعشرين
الحمد لله ان الشوارع فاضيه الناس رايحين لشغالهم ولا كان رحت فيها
اخيرا وصلت للبيت نزلت من السياره وفتحت الباب بسرعه دخلت البيت وانا اتلفت
يمكن تكون قايمه ونازله ما شفت لها اثر
رقيت الدرج بسرعه قياسيه فتحت باب غرفتنا وحسيت بشي ساد الباب
دفيت الباب بشويش وقدرت ادخل
شهقت وحسيت ريقي نشف فجأه زادت دقات قلبي وعيوني بتطلع من مكانها
تمنيت الموت ولا اشوف هالمنضر
جلست على ركبتي ورفعت راسها كانت زي الميته ووجهها اصفر وشاحب
وغرقانه بدمها حطيت ايدي على مكان النبض وكان قلبها ينبض بطيء وضعيف
تنهدت براحه نزلت راسها ورحت جبت بطانيه ولفيتها فيها اتصلت على الاسعاف وقلت عندي حاله حرجه وخطيره
شلتها ونزلت وانا اركض خايف يفوت الوقت قبل
اوصل المستشفا سدحتها بالمرتبه الي ورا ركبت السياره وتوجهت للمستشفى
وانا ما شوف الي قدامي


"""""


وصلت المستشفى وكانو مجهزين سرير متنقل على طول حطوها فيه
وركبولها جهاز التنفس
ودوها داخل سوولها فحص سريع واشاعه تلفزيونيه للجنين
طلع الطبيب من عندها وقال تعال الغرفه معي لو سمحت رحت معه وانا احاول اضبط
اعصابي احس شوي وانفجر من التوتر والضغط النفسي
: جلست على الكرسي جنب مكتب الدكتور : قلت وانا خلاص صبري الي حاولت
اتسلح فيه بدا ينفذ قلي دكتور وش فيها زوجتي
: ناضرني الدكتور وقال بصراحه حالتها حرجه ولازم نولدها عمليه قيصريه
علشانها وعلشان حياة الطفل مع ان احتمال نجاته خمسين بالميه بس
ناضرت الطبيب بذهول وشلون تولدونها هي توها بالشهر السابع
:قال الدكتور بتفهم انا عارف انها بالسابع بس حالتها تستدعي ولاده مبكره
بسبب النزيف وكل مااسرعنا بتوليدها فا حتملية نجاتها ونجاة الطفل اكبر
كنت متردد اني اوقع وخايف
قال الدكتور وهو يحاول يطمني توكل على الله وقع انت انسان مؤمن
وعارف ان الانسان ما يصيبه الا الي مكتوب له
:وقعت وانا احس ايديني ترتجف وكأني اوقع على وفاتي





بعد ما خذو نوره لغرفة العمليات قبل ساعه وانا ماني قادر اقعد
على الكرسي دقيقتين ورا بعض
كل شوي قايم وقاعد ادوروارجع اقعد مره ثانيه دق جوالي ورفعته كانت عمتي ام ناصر
قعدت افكر ارد عليها او ما ارد ما ودي اقولها شي اشغل بالها اخر شي سكت الجوال
حطيته على الصامت ورجعته لجيبي خلاص ماني راد لين اشوف وش صار على نوره
يارب تطلعها بالسلامه


: بعد وقت من الانتضاروالخوف الحمد لله ولدت نوره وجابت ولد بس كان تعبان ومأكتمل
نموه حطوه بالحضانه تحت العنايه وحطوله تنفس صناعي لانه مايتحمل التنفس الطبيعي
ونوره الحمد لله حالتها مستقره
بس نقلولها دم لانها نزفت كثير وكانو خا يفين يزيد عليها النزيف بوقت العمليه
بس الحمد لله كل شي تم بسلام طلعوها من غرفة العمليات وحطوها بغرفة الترقيد
بعد ماتطمنت على نوره ورتاح خاطري اتصلت على ناصر وقلت له انها ولدت
قال ان امي خايفه عليها وكل شوي تتصل عليك و ما ترد
طمنهم عليها وقلت اني ما قدرت اقولكم شي قبل اتطمن عليها عشن ما اقلقكم

سكرت عن ناصر ورحت للبيت اخذلي حمام دافي يريحني بعد هالتعب وضغط الا عصاب


>>>نوره>>>



فتحت عيوني بشكل بطيء احس كاني اصحي من حلم غريب
ناضرت ايدي كان مشبوك فيها المغذي حاولت اقوم بس حسيت كن سكاكين تنغرس
با سفل بطني شهقت من الالم وطحت على المخده
لمست بطني وكان مختفي توي اتذكر كل الي صار لي خفت ولدي ليكون صارله شي
وبدت دموعي تمشي على خدي بدون استاذان
كانت الدموع مغرقه عيوني وما شفت امي يوم فتحت الستاره ودخلت علي
هي ونا صر ومها جت وسلمت علي وهي تصيح وتقول الحمد لله على سلامتك
وسلمو علي ناصر ومها كن انا ضرهم ودي اسالهم وين ولدي بس خايفه ردهم يصدمني
اقطعت علي افكاري امي وهي تقول مبروك ما جاك يابنيتي
حسيت كان جبل من الهم والخوف انزاح عن صدري
قلت بلهفه اكيد يمه ولدي طيب وما فيه شي
ابتسمت امي وقالت وش دراك انه ولد
قلت بصراحه باخر فحص سويته قالتلي الدكتوره انه ولد بس انا ما قلت لحد
بعد شوي سمعنا وليد يتكلم
تغطت مها وطلعت ودخل وليد اه يارب تخلي لي هاطله ولا تحرمني منه يارب
حسيت اني مشتا قه له وكني لي سنين ما شفته سلم على امي وناصر
وجا عندي باسني على راسي وخدي وقال الحمدلله على سلامتك حبيبتي
رديت عليه بصوت ياله ينسمع كنت مستحيه ليش يبوسني قدامهم الله يسلمك
بس شكل وليد كان مطنش سحب كرسي وجلس عند راسي مسك ايدي وقعد يناضرني
بشوق ولهفه قرب راسه عندي وقالي بهمس وشلون حياتي هالحين انشالله احسن
غمضت عيوني ونا مستحيه من امي ونا صر
بس شكلهم فهموها قالت امي عن اذنكم بروح للبيت اجهز شنطتي وبجي بعد ساعتين اذا
انتهت
الزياره علشان اجلس عندك
قال وليد خلاص اجل انا بخلص اوراق المرافقه
سلمت علي امي وناصر وطلعو
التفتلي وليد وهو يبتسم ناضرته بعتب ليش سويت كذا
ناضرني ا براءه وش سويت
صديت بقهر ما سويت شي
ما حسيت الا هو ضامني ويبوسني هالحين ليش تزعلين تراي ماسويت شي
توي بسلم عليك زين
قعد شوي يكلمني بهمس لين خلاني انسى كل شي
هاذا وليد دايم يسكتني ويخليني انسى حتى نفسي


جلست بالمستشفى خمسة ايام وجلست امي عندي كا مرافقه لي
بعد يومين قدرت اروح اشوف ولدي كان صغير مره
بس ملامحه باينه انه يشبه لبوه
حسيت بشي يتحرك بقلبي حسيت بعاطفه جياشه ورحمه لهالمخلوق الصغير
الي هو قطعه مني قعدت شوي اتامله
ودي امسكه واضمه لصدري بس ما اقدر من الاجهزه الي محاوطته
بعد وقت رجعت وانا كل تفكيري عنده





: اليوم الي بطلع فيه من المستشفى
كنت منسدحه على السرير وسارحه بتفكيري افكر وشلون بطلع من المستشفى
وبخلي ولدي وفلذت كبدي وهو تعبان وراي
الدكتور يقول ان حجمه صغير ورئته ما اكتمل نموها عشان كذا حطوله تنفس صناعي
تنهدت تنهيده من قلبي ونزلت دمعه حاره على خدي وانا احس اني مالي حيل ولا قوه
سمعت جوالي يدق مسحت دموعي بكفي ورفعت الجوال اشوف من متصل وكان وليد
رديت عليه وانا احاول اضبط صوتي عشان مايحس اني متضايقه : هلا حبيبي

:هلا والله حياتي يازين كلمة حبيبي اذا طلعت من هالشفايف الحلوه

:ابتسمت على كلامه تسلملي والله

: الله يسلمك ياروح وليد انتي

:وليد وش فيك اليوم

:مافيني الا العافيه حرام اتغزل بزوجتي

لا مو حرام

: طيب قولي لي حبيبتي وش اخبار ولدنا

: تنهدت بحزن انشاء الله احسن الدكتور يقول انه يتحسن بشكل بطيء

::طيب ليش هالحزن بصوتك

:قلت والعبره خانقتني غصب عني ما اتحمل اشوفه كذا

: قال بصوت حازم نوره موقلتلك ما بي اسمع هالتشأم والحزن بصوتك مره ثانيه

: قلت وانا احاول اكتم عبرتي عشان ما يعصب مني خلاص بحاول

: عفيه على حبيبتي ا يه كذا ابيك تكونين قويه ok حياتي

: انشاء الله

: زين ما قلتيلي ما فكرتي وش بنسميه

: لا ما فكرت ما حب اعلق نفسي بأمل وبعدين اتألم اكثر

::تنهد بضيق طيب شكلي ما ينفع اكلمك بالتلفون مسافة الطريق وانا عندك
وسكر السما عه من دون ما يسمع ردي
يا ربيه وش اسوي الحين اكيد معصب علي وما عندي احد حتى امي راحت امس
حطيت الجوال عند راسي وزفرت بضيق يعني كان لازم اغثه لين يترك شغله
ويجي عندي وهو مو فاضي لي

بعد ربع ساعه شفت وليد داخل وجلس بالكرسي الي جنب سريري
نزلت راسي وانا مفتشله من نفسي
قربلي و مسك ايديني وحتواها بيدينه الكبيره الدافيه وهو ساكت
حسيت ا نه طول ما تكلم رفعت عيوني بشكل بطيء وشفته مركز نضراته علي
كان ينا ضرني بناضرت حاده وحنونه بنفس الوقت نضرات فيها حب وعشق وعتب
واشياء ثانيه ما قدرت افسرها
حاولت اقطع الصمت وقلت بصوت مرتبك ليش خليت شغلك وجيت عندي
ابتسملي وقال : لانك نونو وتحبين تتدلعين علي وتشوفين غلاتك عندي.
حسيت وجهي صار حار ونحرجت اكثر قلت وانا احاول ادافع عن نفسي
ومن قال اني دالوعه
قرب مني اكثر ومسك وجهي بأيده بحنان وقل انا اقوله لاني عارف حبيبتي اكثر
من أي شخص ثاني

جلس وليد عندي نص ساعه وهو يكلمني لين تأكد ان نفسيتي
صارت احسن
طلع من عندي ورجع لشغله علشان يرجعلي العصر ويخلص اوراقي
ويطلعني من المستشفى



ثاني يوم طلعت فيه من المستشفى
كانت امي طالعه تزور وحده من اقاربنا مريضه وناصر موديها
ومافي البيت غيري انا ومها كنت طالعه من الحمام وداخله الصاله
شفت مها جالسه وشكلها حزينه وتفكر
جيت وجلست جنبها وقلت مها سلامات وش فيك سرحانه
لفت علي وعيونها حزينه ومليانه دموع تهدد بالنزول
وقالت ابوي يانوره رجع مره ثانيه يهدد ني اذا ما رجعت لمحمد مارح يخليني
اتهنا بحياتي انا مابي ارجع له ما صدقت اتخلص من هالكابوس الي منكد علي حياتي
وش لون يبيني ارجعله مره ثانيه
رمت نفسها علي ودموعها الي حبستها بدت تنزل وهي تشاهق شهاق يقطع القلب
ضميتها وانا امسح على ضهرها بحنان
وقلت لا تخافين حبيبتي حنا حولك وما راح نسمحله يأذيك وانتي تدرين انه مايقدر يسوي شي لان المحكمه نقلت الوكاله منه يعني مايقدر يزوجك غير ناصر
وهو بس كذا يهدد وهو ما بيده شي
جلست اهديها شوي وهي تشاهق بحضني
سمعنا صوت الباب ينفتح قلت اكيد جت امي وناصر
بس شفنا ابوي داخل والشر واضح بعيونه
خافت مها ونقزت من الكنب وهي تجرني وتقول تعالي نروح عنه بسرعه
جريت ايدي منها وانا احاول اتصنع الشجاعه وقلت انتي روحي وانا بتفاهم معه
ما صدقت سمعت كلامي وراحت تركض لغرفتها
وقفت قدام ابوي وانا متكتفه وانا اسوي نفسي قويه مع اني من داخلي منهاره من الخوف
تقدم مني ابوي اكثر والشر يتطاير من عيونه وقال هلا بنتي الخاينه الي تزوجت من
دون علمي ورضاي
قرب مني ومسك جلابيتي من عند صدري وسحبها حتى حسيت اني بديت اتنفس بصعوبه
حسيت ريقي نشف وبديت انتفض من الخوف
يارب تنجيني من شره هاذا مااستبعد يسوي أي شي الي ما خاف من ربه
لايمكن يخاف من شي ثاني
كان يهزني لين حسيت مكان العمليه يألمني وراسي بدا يدور
قال تحسبينك بتنجين بفعايلك انتي وأخوانك
قلت وانا انطق بصعوبه بس لايمكن اسكت له وانت متى حسيت نفسك ابونا
عشان اخر شي تجي تحاسبنا على افعلنا
قال بغيض بعد وتردين علي بعد الي سويتي لكن انا الي بربيك زين كان بيضربني
بس سمعنا صوت باب الشارع يفتح
رماني بقوه على الكنب وقال بتشوفين اذا ما ندمتي على ردك علي
ان ما خربت زواجك وخليت زوجك يكرهك ويطلقك مااكون ذياب

بعد ما رماني وطلع من الباب الثاني دخلت امي ونا صر
خافت امي لما شافت شكلي كان لوني مخطوف وجهي اصفر وانتفض من الخوف
جت تركض وجلست جنبي وهي تقول نوره بسم الله عليك نوره وش فيك
كنت باجاوبها بس حسيت لساني ثقيل
كان ناصر واقف يناضرنا ومبهت قالت امي ناصر رح جب لاختك ماء
بسرعه جاب ناصر الماء وشربت حسيت اني ارتحت شوي
وقلت الامي كل الي صار وشلون دخل علينا ابوي وهددني
وراح لما سمعكم جيتو
قعدت امي تتحسب عليه وشفت ناصر معصب ومنقهر وهويقول كله مني المفروض
اني مغير قفل الباب الثاني بس انشغلت وما جا على بالي انه بيجي بغيبتي
مثل الحراميه
قامت امي وهي تقول تعالي ارتاحي بسريرك مسكت ايدي وهي تسندني
ورحت لسريري الي حاطينه بغرفة الجلوس عشان ارتاح فيه اذا حسيت بتعب
انسدحت على سريري وطلعت امي وسكرت الانوار

غمضت عيوني وانا احاول انام يمكن انسى الي صار قبل شوي
بس النوم مافي امل يجيني ويريحني كنت مغمضه عيوني ودموعي تنزل على خدودي بصمت كنت افكر ابوي ليش يعاملنا كأننا اعدا ما كننا عياله
ليش بعد ما تركنا وحنا صغار عند امي ونسنانا يجي الحين ينكد علينا حياتنا
كان متزوج وحده ثانيه موضفه وتصرف عليه وهو ماله شغل غير يجمع اصدقاء السوء
يسهر معهم باليل ويشربون وبالنهار ينام عن الصلاةولا اهتم في احد
ولما كبرنا انا ومها وجو الناس يخطبوننا من ابوي كان يصرفهم ويقول بناتي صغار
وتوهم على الزواج
لكن واحد من الي خطبو مها ما اقتنع بكلام ابوي
وكان عارف ان ابوي ما يهمه شي بالدنيا كثر الفلوس
علشان كذا اغراه بالشيكات لين وافق عليه
بدون ما ياخذ شورمها ولا امي دخل علينا بيوم من الايام وقال اني ملكتها على واحد من الي خطبوها مني وزواجها بعد شهروياويل وحده منكن تعترض على كلامي
ورما على امي مبلغ بسيط وقال خليها تتجهز فيه
وطلع وخلانا قدام الامر الواقع
بعد ما تزوجت مها من الرجل الي خطبها
رجعت لنا بعد كم شهر مطلقه بعد ما تعذبت مع زوج يهينها
ويضربها من غير سبب
لانه كان ما يصلي ولا يخاف الله
وبعدها حلف ناصر ما يسكت لابوي ورفع عليه دعوى بالمحكمه
وسحب منه حقه الشرعي بتزويجنا بعد ما وكل محامي يثق فيه
وصار نا صر هو المسأول عنا
ومن ذاك الوقتوابوي حاقد علينا وزاد حقده بعد ما تزوجت من دون ما يدري
كنت ابكي بصمت واتحسر على حالي
ليش كل ما حسيت اني ارتحت بحياتي تجي الضروف وتعاندني
استغفر الله العضيم الهم لاعتراضا على حكمك
بعد شوي نمت وانا ما حسيت بنفسي


بعد ما صحيت حسيت راسي مصدع ونفسيتي زفت
قمت اخذلي بندول يمكن يخفف من هالصداع
كنت افكر اتصل على وليد واقوله ولا اصبر لين يتصل علي لانه بالعاده
يتصل علي قبل ينام اخر شي قررت انتضرلين يتصل عليواقوله كل شي
يمكن اتصل عليه ويكون مشغول


باليل انتضرت وليد يتصل علي مثل ما تعودت بس ما اتصل
شفت الوقت تأخر وهو مأتصل خفت يكون صارله شي
اتصلت عليه كم مره ولارد علي
كان جواله يرن لين ينقطع الرنين بدون مايرد
صراحه خفت عليه بس فجاءه
تذكرت تهديد ابوي حطيت ايدي على قلبي
معقوله لحق ينفذ تهديده بهالسرعه
لالا ما اتوقع وليدبيتأثر ويصدق أي كلام يقوله ابوي
بدون ما يسألني يارب تستر بس

>>>>>>


انتضرو التكمله قريب انشاء الله


انتضر ريكم بالجزء ونشاء الله يكون عجبكم

واااااااااااااااااااو بارت جديد مشكورة حبيبتي يالله بروح أقرأ

لاااااااااااااااااااااا حرام بنت أهلي مرة طولتي علينا والبارت قصير يالله البارت مرة روعة
مسكينة نورة تأثرت بالكورة الله يخلي لها ولدها
أما عن وليد فهو رومنسي ويحب نورة والدليل أنه ماقدر يتحمل الألم بصوتها وجاها يخفف عنها
وأبو نورة إنسان ماعنده احساس وإلا فيه أبو يترك عياله صغار ويعذبهم كبار
بس مانستبعد عن السكير شيء لأنه بعد مايشرب يروح عقله ويصير بهيمة
الله يعافينا ويبعد عنا وعن أولادنا عيال الحرام
ومشكورة ياقمر لا تطولين بالبارت الجاي