أهلا وسهلا ي جماعة الخير أما بعد<دخول سريع من غير مقدمات جاي يدافع ويوقف ف ظهر غسق
ضد سيل الإتهامات القاسية والمجحفة اللي إتعرضت لها من الأخت العزيزة شيما💔
معاكم محامية غسق لا والله محاميةالحق 🖐ولا أقول غيرت رأيي وحقول مقدمة لأنو بصراحة ردك كان جميل جدا ومميز وتوقعاتك أدهشتني صلاة على النبي حبيت تساؤلاتك الذكية وشطحاتك الرهيبة 🔥
اتخيلت لو أبو أويس كان فعلا واحد من المدفونين جوا البير أما عن انو دجى م قتل الاخوان التلاتة ف أنا ف بالي التوقع دا من أول ع الأقل م قتلهم كلهم وشعيب وحقدو متوقع منو يضحي ف أخوانو عشان يوصل لمبتغاه وهوا خافيهم عشان لا يتبرأ دجى من اتفاق الثأر وتضيع عليه غسق ويضيع إنتقامو
الله ينتقم منو المجرم😪 أما توقعاتك عن زيزفون ف الصراحة أنا أتوه عند قضيتها وكل م يتعلق بها
برد الله يحفظها شربكت الأحداث وأحكمت لف العقد وأنا أفكاري زي كدا في مَ يخص زيزفون↗↙➡↖⬇😂😩غيهم فعلا صمتو مالو داعي يبني صرّح عن مشاعرك ما حينقص من كبريائك حاجة خصوصا إنك انت اللي خليت الفأر يلعب ف عبها وقلتلها إنو وحدة تانية مالك داعي تطنش قهرها وتتصرف كأنو مَ قلت شي وتباها ترجع الوطن معاك من غير مَ توضح لها كدا إنتَ تكسرها وتجرح كبريائها<اخخخ من الرجال بس🙄 عموما تبارك الله ردك لفتني مرا
ونجي لنقطة البداية ومحور الحكاية اللي كنت عاوزة أدخل فيها دايركت بس كنسلت ☺
شيماء ي شيماء بحق الله كيف تكون دي نظرتك عن غسق فعليا وعمليا وتقنيا وواقعيا<هههه أوك خلاص 🤣 جد جد هيا المظلومة ومطر اللي ظلمها وعشان أكون واضحة مطر ظلم نفسو معاها أوكي عشان الوطن وعشان مجبور وعشان الكون فيه مسؤوليات وبشر غير غسق فاهمين تمام مَ إختلفنا لكن وين المصارحة وين إحترام الزوجة وإحترام العلاقة جا ع بالي لمن شك فيها وف جبران سمّعها كلام في العظم قال هل ربّاك شراع على هذا هل هكذا تحترمين زوجك <والله مَ قال كدا بالزبط بس في مَ معناه😅وين إحترامها كإنسانة مو من حقو يتصرف ف حياتها ويقرر عنها من غير يشاورها ياخي لا تشاورها إجبرها لأنو دا إسلوبك تعمل اللي تفكر إنو صح رضي من رضي بس خلي عندها خبر
أولاً: قبل م تقرر إنك حتسيب البلد وحتسيبها وإنت اليوم اللي قبلو معشمها إنك حتصالحها وحتعتذرلها عن تخوينك لها كان لازم توفي بوعدك وتعتذر منها وتطيب خاطها عشان هيا إنسانة ودا أقل من حقها لكن مطر إيش عمل؟ إتناسى وعدو لها وتركها بجرحها وإتجبر عليها ودعس على كبريائها كإنسانة وقالها إرجعي لبيت أهلك🙂
ثانيا: وإنت تاخد طفلها اللي م كمل أيام قبل مَ تشيلو ف حضنها ،،قول ي بنت الناس أنا مجبر م أقدر أقول ليش لكن مصير الأيام تعرفك حتكون حافظت على أسرار الدولة ي رئيس الدولة بس فهمتها إنها مهمة وإنك مهتم لشعورها ومهتم لنظرتها لك لكن مطر إيش عمل؟ أخد البنت وراح حتى مَ قال الحمدلله ع سلامتك ولا أشوفك ع خير هل كان حينهد الكون ع رأسك ؟ هل حتخرب خطتك؟ لأ بس كانت حتحس إنها إنسانة
ثالثا:لما بقيتها على ذمتك كان مفروض تعلمها دا الشي عشان كان شخصية عاطفية زي غسق وتحبك بجنون كانت حتشوف هالشي زي الأمل بعلاقتها فيك وإنك رغم كل اللي سويتو م فرطت فيها وأنهيت علاقتك بيها لأنك باقي تحبها لكن مطر إيش عمل؟ قال غسق م تتزوج بعد مطر وإمرأة نامت ف حضن مطر م تنام ف حضن رجل تاني.. شف الكبر والتجبر لو كنت همست ف إذنها تراكي لازلت زوجتي بس لا تقولي لأحد عشان فيها هلاكك كنت حسستها إنها إنسانة لكن إنت إخترت الغموض في كل شي وحسستها بالخجل من الناس وهيا كأنها حاجة حصرية لك بجملتك المستفزة
رابعا:لما عرفت إنها عارفة بوجود غيسانة معاك من البداااية وإنها حتموت من غيرتها وحتتجنن وإنو فيه شكوك كتير ف رأسها هل تعبت نفسك ومحيت الشكوك دي لمن عرفت إنها فهمت الكلام اللي قلتو عن الوحدة اللي عشت كل حياتك متعفف ومستنيها لأنك حبيتها لأنك م شفت ولا حتشوف غيرها وهيا باعتك وخانتك على إنو فيه وحدة تانية في حياتك غيرها وانت غرقان ف حبها إنت عارف إنك قتلتها يومها ياخخخي ليه مَ قلت مافي غيرك إنت اللي ف قلبي ومافي غيرك أحد😭 بس لأ م تكون مطر لأنو ايش عمل مطر؟ إتجاهل الموضوع وإتناساه إتناسى انو الغيرة نار تنهش في قلب اللي يحب وكان المفروض هوا أكتر واحد عارف النقطة دي حرق قلبها وبعد 14سنة فضل قلبها محروق على نفس النقطة 14 سنة يعرف إنها تنزف وجع الخيانة ولا برر ولا قال بالعكس ايش عمل؟ صرّح قدام الناس إنو خانها
مَ كفاه عذابها ف السر حب يعذبها ف العلن وبعد م خلاص بلغ السيل الزبى وطفحت المسكينة وروحها إتدمرت وماتت وحيت ورجعت ماتت كم مرة ومرة وإنهارت وصمدت وإنهارت تاني ولا زالت مَ تقدر عليه وسامحتو بعد كللللل دا ايش قال ايش عمل ؟ قال هيا مَ تبغى تسمع وأنا مَ أبغى أجبرها هه بالله ؟ طيب وين 14 سنة ساكت وشايف لمن دخلت ف مرحلة الإنهيار الأخير وصلت لمرحلة الشفقة على نفسها إنها رجعت لك بعد عمايلك فيها وإتصرفت تصرف طبيعي أي أحد حيعمل زيها وقالت م أبغى أسمع مافي تبرير للي جاني منك لكل شي عملتو فيني لكل شعور خليتني أحسو قال خلاص هيا السبب م تبغى تسمعني .. يعني إنت كدا عملت اللي عليك وأرضيت ضميرك؟ لا وكلامو يوم قال غسق تحب تكسر الرجال ودي لعبتها المفضلة قمة ف التجبر والحكم بإجحاف وقسوة إذا غسق لعبتها تكسر الرجال ف إنت لعبتك تكسر غسق
رعد أخوها رغم كل شي كان لازم يبين لها إنو مستعد يساندها أقل شي مو يقولها إنتِ مو قد رئيس البلاد والقاضي هاذي وظيفتو مجبور يأديها وقائد نفس الشي هيا م جبرتهم هما راضيين واتنينهم رجال قانون وواجبهم يناصروا المظلوم لو كانو يستاهلو منصبهم...غسق يائسة محطمة إمرأة مذبوحة ف لبها بخنجر محفور ف وسط صدرها لا هوا اللي موتها ولا هوا اللي سامحلها تعيش براحة والمصيبة إنو هالخنجر له 14سنة محفور ف قلبها ،،، للأبد أنا مع غسق للأبد الحق معاها للأبد مطر ظالمها وللأبد مطر ظالم نفسو.

أخر حاجة حابة أقولك شيماء إني مجرد بحاورك م بهاجمك وأحترم رأيك وإن كان مخالف لرأيي
م راجعت ردي إن شاءالله م يكون فيه أغلاط بس إنفعلت فعلا لأنو من الظلم الحكم على غسق وإنصاف مطر
شي تاني حابة أقول إن تعليقي م يعني إني أكره مطر لأني ع العكس تمام أحبو وأحب شخصيتو وأتمنى يكسب قلب غسق وينصف إنسانيتها ويعدل معاها ويداوي جراحها منو لأنها هيا العلاج لجروحو
لو عالجها حتعالجو

ربي يسلمك ي فيتو الصراحة إنصدمت من طول التعليق قولت هيا البت ليلي والبت شيماء عدوني ولا ايه ي لههوي🤣بس كان تعليق نابع من صميم إحساسي بغسق ومعاناتها وكل الظروف اللي مرت فيها 💔

شيماء حبيبتي حكتفي بكدا وم راح أفتح نقاش تاني عن غسق معاكي😂تعرفي ليه؟
عشان فهمت إنو إنتِ عندك اسبابك اللي تشوفيها منطقية مخليتك تحمليها اللوم
زي مَ أنا عندي برضو أسبابي اللي أشوفها منطقية لرفع اللوم عنها
لذلك ي شيماء إنبسطت بالنقاش معاك عن هالثنائي الروعة رغم عيوب اتنينهم الا إنهم رائعين رهيبين حلويينننن آخر حلاوة🤤😍