" تشابتر ثنين وأربعين "
أستمعي للرجل جيدا من باب الذوق ..
أما من باب الإحتياط ؟!
فلا تصدقي كل ما يقوله لك
• جنون المطر
بعـد ليلة عصيبة متعبة .. صحـى بكسل على صوت المنبه , تافف بقرف .. هو متى نام عشان يصحى اللحين ؟! استقعد بجلسته وفور حركته رجع الجرح ينغزه عقد حواجبه بضيق وهو ينطق بقرف : الله ياخذك وجع !
فتـح جدوله يحـاول يراوغ اشغاله .. لكن مستحيل اليوم بالذات حضوره مهم , مثل كل يوم ..
دخل الشـاور بصعوبة بالغة قدر يخلص حمـامه .. وقف قدام المراية وشكل جرحه زايد قبح قبح اكسبه قناعه انه لازم يزور المستشفى غير وجهه اللي يحس كبر عشر سنوات من الهلاك اللي شافه أمس , لبس ثوبه وتراجع عن العطـر هالمرة ... أي ذرة عطر بتزيد الوضع سوء بس ..
توجه لطاولته ياخذ اغراضه المهمه المرمية فوقها ... انتبه للشـال الأورانج بالكنب , فجأة استوعب .. امس ؟ صـح امس ...
حدق في الشال لفترة .. ثم سحب اغراضه ودخلها جيبه وهو ينـزل وكأنه يأجل التفكير .. أو يمكن يلغيه ؟!
صبـاح اليوم نشيط عكس العـادة ... أسماء : محـــد طلب رايك يالفصعه !
أنس وهو يفطر : والله المصخرة ... " التفت لامه " بالله يمه هذي كيف صارت اختنا ؟! شكلنا خلصنا العقل عليها
اسماء شهقت : حسبي الله على بليسك ... " التفتت لفراس اللي تو نزل " صباح الخير ! ولو سمحت انا امنعك من أنس التطبع اللي جالس يصير مو طبيعي
فراس ماله خلقها .. تجاهلها وهو يسحب كاس قهوتـه : .....
انس : هاهاها سفهك ! روحي اوقفي بدال المزهرية بالله
فراس رفع عينه لأنس ونطق بحدة : أنـــس !
ام فراس طلعت من المطبخ وبيدها صحن فاكهة : صح النوم يمه
فراس : صح بدنك
ام فراس : انتو خلوا منكم الهواش بسرعة السواق ينتظركم ! اخلصوا افطروا
اسماء : انا مالي دخل .. بيجيني بدر يوديني مع ميهاف انتو يالبزارين اخلصوا
ام فراس : وليش تخلينه يتعنى عشانك ! كان رحتي مع السواق وبس
اسماء : اذا ماتعنى عشاني يتعنى عشان مين بالله ؟!
ام فراس : ياسمين لاتنسين الورقة ..
ياسمين طلعت ورقة وهي تتوجه لكرسي فراس ..وتحطها جمبه : وقعها ..
فراس : شهذي ؟
ام فراس : بداية السنة عشان تستلم مقررها
فراس وقع على السريع وهو يكمل كاسه ... ام فراس ضيقت عيونها فيه واضح وجهه شاحب وغريبة يكون فيه نقار بين اخوانه الصغار ومايهجدهم : فراس ؟! يمه فيك شي ؟
فراس وهو يحتسي فنجاله : شوي صداع بس
ام فراس : بسم الله عليك .. فيه صداع ارتاح اليوم مو لازم تداوم
فراس دون نفس : ومن بيخلص الشغل ؟ خيـالي ؟
ام فراس : وهالشغل مايتأجل ؟
فراس : لا مايتأجل .. انا اللي أتاجل
ام فراس عقدت حواجبها من نبرته .. مره ماله خلق واضح , وقف وهو يطـلع مباشرة .
***
زفرت إبتسام بضيق من شكل معجون الأسنان مرمي على المغسلة دون غطا .. رجعته مكانه وهي تطلع لنايف بغرفة النوم جالس بكسل على اللابتوب : نايف ! كم مرة اقولك لاتترك المعجون كذا ؟! اموت انا ؟
نايف : بس معجون ترا .. لايطق لك عرق
إبتسام : بس معجون ؟! وملابسك المرمية ... من بيصدق اني تو رتبت الغرفة قبل ساعتين ! جيت بخمس دقايق وعدمت المكان
نايف هز راسه بتبلد وهو يكمل شغله .. هزت ابتسام راسها بيأس وهي ترجع ترتب , اثناء ماهي تشيل بنطلونه انتبهت لجواله داخله : ناسي جوالك ببنطالك ! لو دخلته الغساله وش بتسوي ؟
نايف ببرود : بشتري جديد
إبتسام قبل تجيب جواله لعنده انتبهت ل 24 مكالمة فائته من نهى .. نطقت بضيق : وش كل هالمكالمات ؟!
نايف : ما أدري ولا ابي ادري
ابتسام : حتى لو ضروري شنو 24 مكالمة ؟!
نايف رفع عيونه لها وابتسم : تغارين ؟!
ابتسام حطت جواله على الطاولة : لا عادي .. بس انا اقول رد وخلصنا احسن
نايف : افا مفروض تمنعيني اكلمها ! وش هالجفاف رد وخلصنا !
إبتسام : ليش امنعك ؟ حط ببالك اني مستحيل امنعك انك تكلم غيري او حتى تتعرف وتحب غيري .. لأنك لو تحبني صدق كان بتمنع نفسك دون أقولك
نايف ضيق عيونه : يعني هذا معناه لاتكلمها بس بطريقتك الملتويه ؟
إبتسام : ...... هذا معناه عقلك براسك وتعرف خلاصك !
سحبت سلة الغسيل وهي تطـلع .. نايف عقد حواجبه مافهم شي , اساسا صاير مزاجها هاليومين مقفل .. من رجعوا من المزرعة , بس نفسية الحوامل مايتعبث معها .. عنده خبره قبل كذا ,
***
هيـــثم : لا اترك هالوقت لإجازة الربيع أحسن لك
مؤيد : وانا وش مستفيد منها ؟ اخذها رسمية احسن
هيثم : تستفيد كثير .. وقتها مره كويس غير انها طويلة لانك تقدر تمسكها مع اجازة رسمية
مؤيد : بس بخسر الإحتياطي حقي
هيثم : والله اللي يعرس يتحمل !
مؤيد تنهد : ظنك يعني .؟!
هيثم : ايه صدقني ماحتندم .. لانك لو تروح موسم سياحة راح تكون الأسعار ضاربه غير الزحمة والقرف هالوقت ركادة لك
مؤيد : خلاص على قولتك .. وين ظنك اسافر ؟
هيثم دون تفكير : استراليا .. سدني على طول !
مؤيد : يمه مسرع جاوبت ! ليش ؟
هيثم : جوها خفيف وحـلو .. مو جو مدينة يمرض ولا عاد مقطعة , وسط يعني
مؤيد : رحت لها من قبل ؟
هيثم : لا .. بس درست مع ناس من هناك كلامهم مره يطمن غير انهم شعب كويس
مؤيد تنهد : مو مصدق بتزوج .. لو ومو بس كذا باخذ اللي تمنيتها من زمان راح اكون لها اللي تبي بكون صديقها وقت حزنها .. حبيبها وقت حاجتها واخوها وابوها واللي تبي ..
هيثم : انا اقول خلك بنكها تختصر كل وجع الراس هذا بشيء واحد !
مؤيد : فداها والله اصير بنك .. بس ابوي الظاهر ناوي يتركني ادفع نص المهر يعني ابي اصير بنك بجد
هيثم : انا اقول احسن لك تدفعه كله .. خلك مكتفي بنفسك من اللحين قدامك مسؤولية
مؤيد : ايه لان قدامي مسؤولية ابي اوفر !
هيثم : والله انا لو يجوني عيال ماراح ادفع القرش .. انا ادفع وهو ينبسط خله يسنع نفسه
مؤيد : جعلني مب ولدك بس !
هيثم : آمين
مؤيد : مفروض الممرضات والعالم اللي طايرين فيك يعرفون جانبك المجرم هذا عشان يحرمون يعجبون بك بعد !
هيثم : لا تخاف اول معجبه عرفت هالجانب وماشفت الا غبرتها
مؤيد : اول معجبة ؟!
هيثم وهو منوجع من طريقتها في الإنعتاق منه : ..... المهم زواجك متى ؟
مؤيد : لا لا تعال من اول معجبة ؟! اللي تزورك كل شوي ؟
هيثم : يالقفك ! " وقف " قوم بس تاخرنا
مؤيد وهو يلحقه : وين رايح ابعرف يعني ابعرف
هيثم : اقول فك عني .. بدال ماتنشب لي اشكرني راح البريك حقي كله اخطط عنك
مؤيد : شكرا مع خالص احتقاري !
هيثم وهو يكمل طريقه : عفوا مع خالص حقراني
مؤيد وهو يخز ممرضة : يالبيه ياغمازاتها .. شي يقتل ان شاء الله زوجة المستقبل فيها غمازات
هيثم انقهر بجد : كف عيـونك ! استح على وجهك فيه وحده بذمتك
مؤيد : يمه وش قلت ؟! بس ادعي ان فيها غمازات
هيثم : تدعي عليها بتشوه في عضلات الوجه ؟! هذا وأنت دكتور
مؤيد : علامة جمال ياغشيم !
هيثم : طبيا هي تشوه .. ماتقدر تنكر
مؤيد : إلا اقدر انكر ! طبيا يسوون عمليات تجميل عشان الغمازة
هيثم : طبيا يشوهون عضلة الوجه عشان الغمازة
مؤيد : رب ضارة نافعة يخي
هيثم بتسليك : خلاص زين خذ معك دريل اخرق خدها اول ماتشوفها , اوك ؟
مؤيد : ههههههههههههههههههههه تخيل بس
قابلوا دكتور بطريقهم : ههههه جالس تودع العريس قبل يروح
هيثم : شدعوة بيروح المريخ ؟ كلها شهر وراجع
مؤيد : بتفقدني وقت اغيب ؟!
هيثم : لا .. بغيب وقت تغيب , باخذ اجازة
الدكتور : صدق ؟!
هيثم : ايه .. مقدمها قبل كم يوم ووافق عليها الرئيس .. هالكم يوم اخلص معاملاتي وباجز
مؤيد : ليش طيب ؟! فيه شي ؟
هيثم : بوسع محيطي شوي .. يمكن القى نفسي بمكان ثاني واشتغل فيه
مؤيد : لا عاد !
هيثم : ماتدري وش الدنيا مخبية لك ..
***
فـراس /
لؤي تنهد : اليـوم وانا امشي بالشركة جالس احس بشوشرة .. شكل العالم بدوا صدق يستغربون وضعي
فراس وهو يكمل شغله : وليش تتضايق ؟ رصيد شهرة ببلاش .
لؤي : لاتقول كذا .. امي اليوم تقول حتى اهلنا عمتي وخالاتي صاروا يسألونها ..
فراس منغمس بشغله : ................
لؤي : اللي يقهر كلهم يشكون فيني .. بجد احيان مواقف صغيرة تبين لك انت شنو بالنسبة للي حولك ! يحسسوني اني مقصر بحقهم بجد ..
فراس وهو يزيح الملف ويسحب الملف اللي بعده بعجل : ماقصرت بحق احد .. بس الحيوان حيوان فلا تفكر كثير
لؤي : أبوي له يومين مطنشني مدري شالسالفة كانه نسى الموضوع ..
فراس : او يمكن جالس يرسم نهاية للموضوع
لؤي طالع فراس : ............. كيف يعني ؟
فراس رفع عيونه له .. وهز كتوفه بخفه : انت ابخص
لؤي تنهد بضيق : احيان افكر اني جالس اظلمها بكل هالظروف ... عشان واحد مايستاهل واناني مثلي
فراس : تحسب انك متواضع وانت تقول هالحكي ؟! لا انت جالس تدمر نفسك وشخصيتك ذاتيا عشان وحده ماتستاهل وانانية مثلها !عز نفسك شوي يرحم والديك
لؤي : ياليل ! يخي انت ليش مو متفهم كذا ! بحقها البنت تزعل وقت اسحب عليها ... بس انا مو قارفني الا حكي هالناس حتى اللي خادمهم طول عمري يتكلمون
فراس : عندك عيـون ؟!
لؤي كبس بعيونه : ايه عندي .. ليه ؟
فراس : اجل تشوف الناس باذنك ليه ؟! دامهم قدام عينك ساكتين وقتها مايهمك وش يقولون من وراك .. هذا اذا قالوا من الإساس .. يمكن امك تبي تحسسك بس انك لازم تغير وضعك , وانا بصراحة ماسمعت شي
لؤي : تتوقع .؟! " تنهد " الا اقول شخبارك انت والمدام المصونة ؟
فراس : مطول انت هنا ؟!
لؤي : ما اعجبتك جلستي
فراس : مشغـول .. وانت واضح جاي تسولف
لؤي : لا يخي والله ماعندي سوالف حتى بس شاسوي احب احكي معك! وبعدين مافكرت تطردني الا يوم جبت طاريها !
فراس : لا من أول جالس اقول هالسالفة بيخلص بس واضح انك راعي طويلة
لؤي : ايييه حال الدنيا اللي يبون بعض متعذبين ! واللي كارهين بعض حاصلهم القرب.. نيالك يخي
فراس بنص عين : مغصتني بهالحكي ترا .. اخلص بجد اطلع
لؤي : لاحظ اني صديقك الوحيد ترا .. وتطردني ؟! صدق المفرط بتجلس لحالك طول عمرك ترا
فراس : ابد .. يقولك قلل ناسك يرتاح راسك
لؤي : اقول انا باخذ باقي كرامتي واذلف .. اشوفك بعدين يالئيم
فراس : على خير .
مجرد مـاطلع ... سكر فراس الملف وهو يوقف ويستعد يطلع قابله قبل يطلع رئيس الفرع الداخلي : طالع طال عمرك ؟
فراس : هاه وليد شبغيت ؟
وليد : لا بس .. فيه المشرف موجود ويبغى الأسعار اللي طلبها
فراس زفر : موجود اللحين ؟
وليد : ايه نعم ..
فراس كان حاس انها ماراح تزبط له : دخله غرفة الاجتماعات .. دقيقة وأكون عنده
***
غـادة تنهد بزهق من نفسها : خلاص تو شفته قبل يروح الدوام من الشباك ! وشكله مافيه شي .. " لانت لمحتها " بس شكله امس كان بالحيل تعبان ..
مسكت جوالها تدق على ابتسام تشغل نفسها .: هلا غدو
غادة : هلا بالقاطعة ! عارفة انك ماصدقتي انتي ونويف انقلع من وجيهكم ! بس شوي اهتمام يخي مره وحده نسوني مايسألون ولا شي
ابتسام : هاو شوي شوي علي كليتيني تو رادة !
غادة : هههههههه كيفك .؟
ابتسام :ههههه تمام ... مايحتاج اسالك كيفك من صوتك واضح معنوياتك كويسة
غادة : تقدري تقولي
ابتسام : لا مستحيل .. الله يتم لك لاتنضلين نفسك
غادة : تخيلي امس سويت شعر اسوم يفوتك شكله مره جمميل , جاني قهر ابي اقص شعري !
ابتسام : اوك قصيه
غادة : بس حرام شعري تعبت لين صار طويل !
ابتسام : معناها خليه
غادة : بس اسوم تقول القصير بيجي حلو عليك
إبتسام : اجل قصيه
غادة : بس القصير التسريحات ماتضبط عليه
ابتسام : افففففففف !! غادة بغيت انسى انك مريضة بهالأمور !
غادة : لا خلاص ماحقصه .. يمه منك بس اسألك
إبتسام : يوه غادة عندي مكالمة بالإنتظار سكري احاكيك بعدين
غادة : اوك ..
سكرت ابتسام وهي ترد : هلا هيثــــم .؟!
هيثم : هلا بسمه .. كيف حالك ؟
إبتسام : كويسة .. إنت شلونك ؟
هيثم : ماعلي .... " سكت لفترة ثم نطق " شعندك اليوم ؟
إبتسام : ماعندي شي ... ليه ؟
هيثم : عازمك لمطعم .. نتعشى سوا
إبتسام : وانت فاضي تعزمني ؟
هيثم : ايه اليوم فاضي لك ... اهم شي انتي افضي لي وتعالي
إبتسام : هههههه وانا اقدر اقول لا ؟ ولا يهمك بس وش رايك تتعشى عندي وبس احسن
هيثم : لا لا ! مطعم اريح لي ... خلاص راح امرك بدري مالي خلق الزحمة
إبتسام : اوك من عيوني
هيثم : اشوفك ..
سكر السمـاعة .. تنهد وهو يمسك راسه , صعب عليه يتنـازل .. طالع الساعة وهو يفرك عيونه ,سحب اغراضه وشنطته وهو يستعد يطلع من المستشفى
***
طـلعت ميهاف واسماء من الجامعة .. وركبن مع بدر , اسماء بحماس : بدووووري !! وش رايك كل يوم توديني وتجيبني !
بدر بسخرية : هههههههههه اسومتي ! وش رايك تطخين راسك باقرب جدار ترجعين للحياة الواقعية
اسماء كشت عليه : مالت ! هذا وانت اخوي ...
بدر : انا بيتي وين .. وبيت اهلي وين .. والجامعة وين ! فاضي لهالمشوار كل يوم ؟
اسماء : مايهون عشاني .؟
بدر وهو يحرك : لا مايهون
اسماء : وبعدين وش بيت اهلي هذي ؟ مو بيتك يعني !!!
بدر : ياليل ... اقول شخبار الجامعة اليوم ؟
اسماء : ميهاف قولي له .. انا زعلت
ميهاف : هممم .. كويسة , بس بدر انا امي تو كلمتني تقول تعالي تغدي معنا ..
قاطعها بدر قبل تكمل : بوصلك اللحين
ميهاف : وأنت ؟
بدر : ماحضيع ..
اسماء : تعاااال معي نتغدى سوا مع امي بتنبسط
بدر : هذا اللي بيصير
***
ام فراس .. ابتسمت بسعة وهي تشوف بدر يدخل واسماء : يالبى من دخل .. هلا والله مابغيت تنور ؟
بدر وهو يبوس راسها : هههههههه لو ادري من زمان اني مهم كذا كان حصلتيني !
ام فراس : افا وليدي وعندك شك انك مهم ؟ بتتغدى معنا ؟
بدر : أيـــه
اسماء : يمه وين غادة ؟
ام فراس : ما ادري .. مانزلت من صبح
اسماء : غريبة ! " طمرت " بروح اشوفها
بدر : ووين فراس ؟! مفروض رجع اللحين الساعة 2 ..
ام فراس : شكله مشغول .. ادق عليه مارد وارسل رسالة انه مشغول
بدر : الله يعيــنه .. يعني ماراح يتغدا معنا ؟
ام فراس : ماظنيت ..
***
بيت أبـو نايف /
دخل لؤي البيت وهو ينتبه لأمه وابوه وميهاف جالسين سوا : اووه ميهاف عندنا
قامت ميهاف تسلم عليه : وحشتني يادب كيفك ؟!
لؤي وهو يطالع ابوه اللي يتغدى بصمت : مشتاق لك اكثر شلونك انتي وشلون بدر ؟
ميهاف : شفيك ناحف كذا ياولد ! ماتاكل اجل ؟
لؤي ( وهو اللقمه تنبلع بحلقي بهالبيت . ؟ ) : وش تتوقعين نفسية واحد حابسينه أهله بالبيت ! لاشغل ولا مشغله
أبو نايف : أنت اللي اخترت تكون كذا ! لاتخليني انشر غسيلك قدام اختك ... يكفي انا وامك طحت من عينا
ميهاف استغربت .. مشاكل لؤي كاثرة من ترك وظيفته واللحين شكل فيه مشكلة بعد : شفيكم صاير شي ؟
ابو نايف : اللي صاير يا أبوك اني ماعرفت اربي مضبوط ! هذا اللي صاير .. مجتمع محافظ زينا يجي هذا يسود وجهي فيه
شد لؤي على قبضته : معك حق يبه .. حنا مجتمع محافظ اكيد .. محافظ على التخلف والجهل والتعصب !
أبو نايف : تتمصخر .؟! انقلع من وجهي ... انقلع لابارك الله فيك ! اصلن حقارتك هي انك نسيت أهلك وكل اللي وراك بسبب وحده عرفتها عن طريقنا .. انا الغلطان اللي تركتك تشتغل اساسا ! اذا كنت بترضى الذل لي ولأهلك فياليتك ما أنولدت ولا جيت على هالدنيا من الاساس !!
ميهاف فتحت عيونها بدهشة " وحده " لاتكون اللي وراها صورتها ... كانت خايفة من عواقبها من شافتها واللحين : ...
ابو نايف : انا مدري ليش تغيرت كذا ! ولا متى حتى تغيرت كذا .؟!
لؤي بألم : أقلدك .. وين المشكلة ؟
أبو نايف : ليتك تقلدني كان ماصار كل هذا ! اذا هذا حال شبابنا الله يخلف على بكرة من اللحين
لؤي : بالضبط .. حنا الشباب يبه مو أنت ! اتركني اخطط لبكرة انا اللي راح اعيشه مو أنت ... مو كافي ان مستقبلكم الفاشل هو حاضرنا اللحين !
ضرب ابو نايف بكل قوته على الطاولة : لــــــــــــــــــــــؤي !!!!!
عبر طريقه يصعـد لفوق ينهي هالنقاش اللي ماراح يرتقي أبد ... صار يكره هالبيت .. يكره الرياض يكره هالمدينة اللي اضطرته يعيش هالحب كله تزوير وتهريب , مجرد مادخل غرفته مسك جـواله وهو يفتح على صـورتها ... ابتسامتها كانت كافية انه يعيش باقي عمره دون ندم .. تنهـد هو يشكي شوق ولا يشكي ألم .؟ كتب رسالة يحاول يفرغ فيها اللي بداخله : ( ماني متعـود احد يفهمني .. ماني متعود لدرجة أول ماعرفتك حسيت الموضوع مزحة أكيد .. واللحين بلاك رجعـت اعيش شعور ليش صعب عليهم يفهموني زيك ؟ .. )
رمى جـواله وهو يستلقي .. صار محتار وش مفروض يسوي ؟! الواقع بدا يتسلله ويحاول يفهمه ان ابوه معه حق مافيه أمل انهم يقبلونها .؟! قطع تفكيره صوت جواله .. رفعه بكسل لكن تعابيره انقلبت لتعجب ! ماتوقعها ترد مجرد ارسلها تفريغ ... فتح الرسالة
( الدنيا مشوار طويل فيها الصعب وفيها السهل .. وفيها برضو المستحيل .
السهل .؟! انك تلقى احد يجرحك .. حتى أنت كان سهل عليك
الصعب .؟ انك تلقى احس يحس فيك ..
والمستحيل .؟ تلقى احد يمسح دموعك ويبيع الدنيا ويشتريك ... كان مستحيل علي حتى أنا
آسفة .. )
لؤي حس بمرارة عقب ماقرا رسالتها ... بلع ريقه وهو يرسل ( كيف مايا .؟! اقلها صورة ... أكيد كبرت مو ؟ )
لكن هالمرة مافيه رد ... ! حس بهلع داخله . . فيه حاجة غلط ! رسالتها تجيب المـر .. مر فوق مر كلامها لما راح امريكا .؟ رغم انه عبر .. مازال يحس بمرارته داخله ..
***
اثناء جلسة العصر .. ام فراس وبدر جالسين ..
وقف بدر بعد ماخلص فنجاله : اكرمكم الله .. يله انا ماشي .. تامرين شي ؟
ام فراس : اقول بدر .. فاضي اللحين ؟
بدر : ايه ماعندي شي ..
ابتسمت ام فراس بوسع : اجل وش رايك تطلعنا معك للحديقة وبالمرة نتعشى سوا
بدر عقد حواجبه : ليش .؟
ام فراس : هاو ؟ مشتهيه اطلع معك .. واخوانك حتى فاقدينك
بدر بمضض : اوك .. اللحين ولا متى ؟
ام فراس وقفت بحماس : اللحين !
صعدت مسرعة : اسماء !!! انس ! ياسمين !! يله تجهزوا بسرعة بنطلع
ياسمين : فين ؟
ام فراس : مع اخوك بدر .. بنطلع نتمشى
طلعت اسماء : شالسالفة ؟
ام فراس : كم مرة بعيد انا !! اخوك بدر بيطلعنا معه نتمشى ..
اسماء : يله ... اوه لحظه بروح اقول لغاددة تجهز
مسكتها ام فراس من كتفها : لا غادة ماراح تروح معنا !!
اسماء : ليش يمه غريبة عليك !!
ام فراس : حنا بنطلع مع بدر .. بنجلس معه مانبي ننفصل " همست " وبعدين راح نرجع متأخر خلي البيت يفضى يمكن يزهق فراس ويصعد ولا هي تنـزل يتدابرون عاد
رفعت اسماء حواجبها : اهــــــــــا !! والله منتي بسيطة يا أم فراس ... كل هذا تخطيط ؟ طيب فلنفترض مثلا بس ان فراس مارجع الا اخر الليول كالعادة تجلس البنت لحالها ؟
ام فراس : لا هو كلمني وقال بيرجع بدري بيتعشى معنا .. فخلينا نطلع وهو يرجع
اسماء : طيب واذا نزلت غادة وحصلت البيت فاضي ؟
ام فراس : انا راح اكلمها أول مانطلع وبقولها حنا طالعين ومشغولين وفراس بيرجع يبي عشا وهي تسوي اللازم
اسماء : والله يا يمه حركات عجز صدق
ام فراس قبصتها : عن الحكي الزايد واخلصي علينا !
سوت ام فراس اعصار لين خلص الكل وركبوا السيارة .... اول ماركبوا دقت ام فراس على غادة : هلا والله !
ام فراس : هلا غادة .. شلونك طيبة ؟
غادة : ايه حمدالله .. راحت علي نومة اليوم فمانزلت
ام فراس : لا عادي الله يحفظك .. بس حبيت اقولك ترا محد بالبيت بدر اصر علينا نطلع معه من زمان عن اخوانه
بدر فتح عيونه وهو يأشر على نفسه : انا ؟!
ام فراس ضربت كتفه بخفه وهي تاشر له يسكت : فعاد طلعـنا وميهاف اصرت نتعشى عندها ... فراح نتأخر
بدر فتح فمه وهو يطالع امه : ياكبرها عند الله ! ميهاف بعد ؟
غادة وصوتها دخله احباط : اهــا .... اوك الله يحفظكم انبسطوا
ام فراس : ايه نسيت اقولك ... فراس بيرجع على الساعة 8 كذا ويبي عشى اكيد اليوم ماتغدى مشغول , فانتبهي لعشاه وسوي اللازم
غادة : هـــاه .؟!
ام فراس : يله في امان الله هذا حنا دخلنا عند الناس .. مع السلامة
سكرت بسرعة قبل تعطيها فرصة لأي كلمه .... بدر يطالع امه بنص عين : ........
ام فراس : لاتطالعني كذا ! شاسوي اذا اخوك اعوج ... خله يحتاج لها غصب
بدر : هي مرته طبيعي بيحتاج لها دون كل هالدراما !
ام فراس ( بلاك ماتدري ) : ................
بدر : وبعدين ميهاف مو بالبيت ترا ... كيف حطيتي نفسك معزومة عندها
ام فراس : بس عشان اسكتها ... حنا بنروح المنتزه ونغير جو ولاخلصنا رحنا لخالاتك وسهرنا عندهم
اسماء : ههههههههههههههههههه ماراح استغرب من نفسي اجل لما كنت اسوي تخطيطات كذا ! طلع العرق دساس يمه هاه ؟
ام فراس : جب ولا كلمة ... صدق البازع هذا لمصلحتهم مو لعب بزران
***
ابتسام :
كان البانيو مغري لدرجة ماقدرت تحرك نفسها تطلع لمدة ساعتين بالأخير سحبت نفسها بصعوبة .. لبست حاجة تدفيها .. مع بطنها البارز بالبلوزة الصوف .. كانت تنطق نعومة .. سليبرز عشان تدفي رجلها .. شعرها المبلول تركته على حاله .. نزلت تحت وهي تجهز لها حليب دافي عشان تجلس تختم معاملات قسمها .. لازم تخلص كلش قبل تاخذ اجازة امومة اثناء ماهي جالسة .. فجأة فزت على اللي نغزها من ورا حتى ضرب بطنها بالطاولة قدامها : اااااااااا ! " التفتت بفزع " نااااااااااايف !!!!
نايف خاف مباشرة : بسم الله عليك ... عورتك .؟
إبتسام وهي ماسكه بطنها وعاقدة حواجبها : بالله هذي حركة !؟ فجاة تجي تخوفني !
نايف جلس القرفصاء قدامها وعلى وجهه تعابير تأنيب الضمير : آسف والله .. شاسوي ماطرا علي ..نروح المستشفى؟
إبتسام سحبت هوا وهي تتنفس : لا عادي ..
نايف إبتسم : ياكثر ماتقولين لي لا عادي وانا احس ودك تهفيني بكف يلف وجهي مرتين !
ابتسمت إبتسام : من جد ههههه
نايف : اخيرا ضحكتي ! اليوم كله مابغت تطلع هالضحـكة .؟ " ضرب خدها بخفة " شلت همك هاليومين .. احسك مو تمام
إبتسام : الله يعين .. وهو العيال ببلاش ؟
نايف وقف وهو يجلس بالكرسي المقابل : وهو الجنة تحت رجليكن ببلاش ؟
إبتسام : إلا اقول .. ادق عليك قبل ساعة ماترد ليه ؟! تخيل لو كنت ابغى شي ضروري .
نايف : شوفي يابنت الحلال من عاداتي السيئة .." قلب وجهه بسخرية " وياكثرها بصراحة ! ان علاقتي انا وجوالي مشوهه اتمناه مايرن وانبسط اذا تعطل أو خرب .. واذا رديت ارد وانا مالي خلق
إبتسام : لا عاد ؟ طيب اذا جتني الولادة .. وادق عليك ماترد ؟ راح اقول معليش عادة سيئة ؟
نايف : لا المشكلة اني وقح .. لاشفت اللي حولي جوالاتهم ترن ويردون احسدهم ! اتمنى اني زيهم بس .. ماتضبط ماش اكره جوالي صدق
إبتسام : هذي مو عادة سيئة ياحلو .. هذا قلة مسؤولية واهتمام
نايف : صدقيني كل اللي يعرفوني من وانا صغير فاهمين ان هالموضوع عادة فيني لا أقل ولا اكثر
إبتسام : اجل لاتزعل اذا قلت لك ان الجدار مفيد اكثر منك !
نايف بتفهم : معك حق والله .. اقل شي فيه فيه الشاحن .. والمكيف .. اكيد مفيد اكثر مني !
دق جـوال ابتسام ... نايف : مين .؟
إبتسام : هذا هيثم لحظة .. " ردت " هلا هيثم ... ايه ايه جاهزة ؟ اوك
سكرت السمـاعة وهي توقف : حبيبي انا طالعة اتعشى مع هيثم عازمني ..
نايف فتح عيونه : وانا .؟!
إبتسام وهي تلبس عبايتها : بتحصل صحن بالثلاجة .. حرره وبالعافية
نايف : لحـــالي ؟ وبعدين ماقلتي لي انك معزومة ويا هيثم اليوم
إبتسام : نايف مو وقته الولد برا ... يله باي
طلعت مبـاشرة بينما نايف تكتف وهو يتحلطم : ولا عزمتني معهم حتى !
***
غـادة كانت تتحرك روحة وجيه وهي تحس بورطة ! هو يبي عشاء يعني ؟ طيب يمكن مايبغى مني ... افففف .. لا ولحالنا بعد ؟ عقب امس مدري كيف بطالع في عيونه اساسا .. احقره وبس ؟
مسكت راسها وهي تحس بصداع ... دقت على منقذتها : هلا غدو
غادة وهي شوي وتبكي : ابتسااااام ...
ابتسام : شفيك خرعتيني ؟
غادة : تخيلي ..." بلعت ريقها " ام فراس طلعت هي وعيالها كلهم .. وتقول بتسهر برا وفراس بيرجع بدري ويبي عشاء وتبغاني اسنعه
ابتسام : طيب وش فيها .؟
غادة بربكة : ... هو ... امس صاير بينا موقف غريب .. مدري كيف بتصرف
ابتسام : غادة ! اسمعيني زين .... اعتبري هذي فرصة ذهبية البيت فاضي ومافيه غيركم .. اضبطي نفسك واكشخي مايحتاج اوصيك بالكشخة .. وسوي طبخة تفتح النفس وجهزي جو رايق خليه يهتم فيك شوي عشان تكسبينه يالهبله ! كيف تبغين رنيم ومدري ايش وانتي كذا ! وبعدين خلاص تزوجتوا تسنعوا عن الهبال !!
غادة كانت فاتحه عيونها بوسعها وابتسام تتكلم : اقول أبتسام ! شكل حرارتك مرتفعه ... روحي من وجهي هناك .. قال ايش قال اكشخي واطبخي .... اقولك امس صاير موقف انا احتري ردة فعل عليه ... يعني يمكن يقتلني لو يشوف كل هالإهتمام فجأة
إبتسام : ليش وش صاير أمس ؟
غادة عضت على شفايفها : ..... كيف أقولك شصاير وانا ماعندي كلمة مناسبة اشرح فيها الوضع لنفسي حتى ..
إبتسام : اقول غادة انا مشغولة اللحين .. بعدين اتفاهم معك , انا عطيتك الحل المناسب للحين .. تبغينه ولا اجلسي
وسكرتها مباشرة ... غادة طالعت الشاشة وهي تعض شفايفها .... اف ببكي اكرههـــا .. ضربت برجلها الأرض : وش يعـــــني اكشخي وأطبخي ! الله يسامحك يا خالتي على هالموقف
بعد صراع مع نفسها ومع الوقت اللي يمشي بسرعة .. قررت ماتبالغ بحاجة .. راح تسوي الواجب وأنتهينا .. غيرت بجامتها البنكيـة وهي تلبس بنطال قماش اسود رسمي " high waste " مع بلوزه رسمية سماويه دخلته تحت البنطال شعرهـا رفعته بوني تيل .. مع مكياج خفيف كحل بسيط .. وروج وردي غامق لبست صندل بسيط .. ونـزلت مباشرة ..لما شافت البيت فاضي وكلش هادي .. كان غرابة بجد .. تنهدت بضيق : مايمزحون يعني ..
دخلت المطبخ .. وهي واقفة بحيرة ..تخاف تسوي أكبر غلطة وهي تطبخ حاجة مايحبها .. تنهدت بضيق وهي تمسك جوالها : يقولك في قانون الذكاء خلك غبي عشان تعرف .. اسألهم وبس ..
دقت على اسماء لكن مافيه رد ... والحقيقة كانت أن ام فراس سحبت جوالها ورفضت انها ترد بحجة " تخربين عليهم!" ... : بعد فوق انهم تاركيني حاقريني ... " تاففت " حتى الخدم ماخذينهم !!! " تنهدت " انتظر لين يرجع واسأله ؟ ايه اتوقع احسن من اني اتلقف واطبخ حاجة ماتنوكل
سمعـت صوت الباب ينفتح ... بلعت ريقها ومن قهرها ضربت راسها بالطاولة اللي قدامها !! سمعت صوته ينادي : يمـــــه ..؟ يمم .... " غير الإسم " اسماء ؟ انسسس !! انسس .. ياسمين ؟ ..... ميري
غادة هنا كرهت نفسها .. فوق انهم تاركينها ماعطوه خبر !! مايدري انهم طلعو ؟ بالله وش هالحالة حتى الشغالة قال اسمها وماقال اسمي .... وايقت من المطبخ وهي تشوفه يرفع جواله ويتصل على رقم ثم نطق بحيرة : وماترد ؟
جلس على الكنبة وهنا دق جواله ... رد مباشرة : هلا دكتور .." استطرفت المكالمة انتباه غادة ! صح لازم يروح دكتور عقب أمس " ... لا معليش اليوم انشغلت ماقدرت اجي .. " تنهد " فاهم والله ..... خلاص بكرة على خير
سكر السماعة وهو يرفع راسه : لا بجد العالم وينهم !!!
: طلعـوا ..
التفت لصوتها وهي واقفة عند مقدمة الصالة .. وشابكه يدينها ورا ظهرها : ..
فراس عقد حواجبه : طلعوا وين ؟
غادة هزت كتوفها : مدري ... فجاة دقت علي امك وقالت بيطلعون كلهم مع بدر وبيسهرون برا
فراس شد على قبضته .. ثم عض على شفته بصبر وهو ينطق : وأمي اللي تحبك مدري على ايش .. ليش ماسحبتك معها كالعادة ؟ " تو بتتكلم نطق " مايحتاج تقولين .... اتوقع اللي يصير واضح .... " همس بقرف " مهزلة
غادة ظلت واقفة لوهلة .. بس الظاهر مو وقتها : ........ " تنهدت بإحباط " تبغى شي قبل أصعد ؟
فراس رفع حواجبه : احلفي ؟ شمري عن كمومك وادخلي المطبخ ياهانم !
غادة : طيب .... وش حاب تاكل ؟
فراس : ما شاء الله منيـو مفتوح ؟ على اساس تعرفين تطبخين كلش !
غادة تنهدت داخلها " اللهم طولك ياروح اللي بيشوفه اللحين مو مصدق ان حالته امس قريبة من الموت " : ....
فراس : معناها ابغى جريش
غادة : جريش ؟ .... ما أعرف
فراس : اجل ليش تسألين ! وش تعرفين حضرتك ؟
غادة : طيب وش رايك تطلب من مطعم جريش .. ونرتاح كلنا
فراس : ترتاحين ؟ على راسك انا ... مابي طبخ المطـــاعم !
غادة : إيوا بس مو تتذمر .. لأنوه ما اعرف كثير
فراس : انتي اساسا تعرفين شي ؟ لا طباخة .. ولا ذرابة ... ولا فوق كل هذا خرابة ! وش فايدتك بالحياة اجل ؟ بزر صدق
غادة تنهدت وهي تنطق بقهر : اقل شي مو بزر لدرجة ما أنتبه لصحتي !
سكت فراس .. وهو يضيق عيونه فيها : نعـــم ؟
غادة عضت على شفتها : ...... أمس .. " شاحت بنظرها " واضح جرحك محتاج راحة لأنه رجع ينفتح .. فـ .. ليش .
قاطعها فراس : يهمك ؟
غـادة : يهمك اذا يهمني او لا ؟
فراس ببرود : لا , عموما لاتفلينها انتي وهالشرفة قبل أسكرها
غادة : إنتا اللحين ليش معصب ؟
فراس : عشان !
غادة : عشان شنو ؟
فراس : عشان تمثلية شوفوني انا البنت الطيبة ما تعجبني , اوك ؟
غـادة رفعت حواجبها : ماحزرت .. انا بجد بنت طيبة !
فراس : لاتضحكيني وانا مالي خلق اضحك !
غادة : مافيه خير بإهتمام يجي متكلف !
فراس : بالضبط مافيه خير ..
غادة : اوك آسفة ! انسى .. تمام ؟ راح اعطي امك الخبر مرة ثانية واتركها تهتم بك وخلصنا ؟
فراس : اذا بخاطرك اصير أرمل سويها !
غادة : معناها اقبل المعروف وقل شكـــرا دون تحقيق .. لان ماعندي أي دافع خفي
فراس رفع حواجبه : أقول ؟ وريني عرض اكتافك وانقلعي المطبخ
غادة بالفعل ورته عرض اكتافها .. لأن نفسها طابت من هالإنسان الصعب : ...............
فراس : غادة !
غادة وقفت " وش بعد " : هلا .؟
فراس : تكلفة الكابينة .. مافيه داعي تدفعينها
غادة فتحت عيونها : بجد ؟
فراس وهو يشب سيجارته: عشان تعرفين أني على عكسك .. المعروف مو خسارة فيني
غادة اكتفت بإبتسامة صادقة : فيك الخير
ودخلت المطبــخ ... وبدت تجهـــز
***
ميهـاف :
ام نايف : كأن الوقت تأخر ؟ ماراح ترجعين ؟
ميهاف : واااي ماما زهقتي مني ؟ ترا زمان ماجيتكم حرام عليك ..
ابو نايف : ايه والله اتركيها ... شفيك على البنت ! إلا اقول ميهاف مابقى لك شي على التخرج .. فكرتي وش بتسوين ؟
ميهاف تنهدت بضيق : طبعا أبغى اشتغل .. اكره جلسة البيت بس ...
ابو نايف : بس شنو ؟
ميهاف : محتاجة دعــــم ..
ابو نايف : افا بس ! شايله هالهم وانا موجود ؟ الدعم من اللحين موجود لاتشيلين هم
ميهاف : بجد بابا ؟
أبو نايف : ايه اكيد ... اللي تبين كرمـال عيونك يحضر
ميهاف : ميرسي بجد بابا .. مو عارفة ايش كنت بسوي دونك ؟
دق جـوال أبو نايف .. رد مباشرة : هلا والله .؟! لا انا بالبيت بس شوي وطالع ....... خلاص تعال نتقهوى على ما أروح ... يله يله جايك
سكر السماعة ... : جهـزوا القهوة هذا بدر
ميهاف : انبسطي ماما يله بروح !
ام نايف : ايه وناسة الأم تشوف بنتها مرتاحة ببيتها
ميهاف : رايحة اشيك على القهوة وأخذها معـاي
دخلت المطبخ تاخذ القهـوة بعد ماجهزت .. دخلت المجلس وهو متربع جمب أبوها ويسولف : السلام
بدر : وعليكم السلام والرحمة .. ماكان فيه داعي كلافة قهوة شوي وماشين
ميهاف وهي تحط الصينية : فنجال مايضر
ابو نايف : تو كنا نتكلم عن تخرج ميهاف .. ومن اللحين انا ضامن لها مكانها عندي بشركتي اول ماتخلص ! مو تقول ماقلت لك ؟
بدر وقف بنص فنجاله ... نطق يستوعب : وميهـاف وش رايها بالموضوع ؟
أبو نايف : هي اللي طلبت تشتغل عندي .. وانا عطيتها
بدر : اهــــااا .. " طالع ميهاف وإبتسم باصطناع " مبروك حياتي جتك الوظيفة مثل ماتبين
ميهاف مافاتها انه متضايق .. بس ماهمها اهم شي مستقبلها : يبارك فيك ..
دق جـوال ابو نايف .. تغيرت تعابيره ثم رد : هلا ....... اللحين ؟ ... تمام ... لا ... خلاص زين !
سكر السماعة : انا لازم امشي اللحين .. خذ راحتك البيت بيتك
بدر : درب السلامة عمي ..
مجرد ماطلع أبو نايف انفكت ابتسامته المزيفة .. وهو يطالعها وكأنه يطلب تفسير : ...............
ميهاف تجاهلت نظراته : اتجهز نمشي ؟
بدر : لا اجلسي مكانك ياحلوة .... كابره معك هالاسبوع مو ملاحظة ؟
ميهاف : شقصدك ؟
بدر : قصدي اني صابر لي اسبوع .. بس ترا تكوني غبية لو تظنين اني صابر غباء ولا طيبة مني
ميهاف : شدعـوة ؟ حنا ماصبرنا كلش يعني ؟
بدر نطق بين أسنانه : انتبهي ميهاف ! لا تستوطين حيطي عشان ما أهده عليك ..
ميهاف عضت على شفاتها : ماله معنى هالحكي هنا ؟ بنرجع البيت ونتفاهم
بدر : حلم ابليس بالجنة .. اليوم ما أبي اشوفك قدامي ! خليك هنا
ميهاف : تستهبل ؟
بدر وهو ينزل فنجاله ويوقف : من غير مطرود .. ابي اظل لحالي ! مو مزعجتني لك اسبوع بأهلك اللي ماتشوفينهم .. تخلخلي عندهم اجل
وطلع مباشرة دون يعطيـها فرصة ! ميهاف مو مصدقة هالبدر ... عليه حركات فضيعة ! مسكت راسها بقهر .. على باله بهالحركة بيخليها تتراجع عن قرارها .... بس ماراح تخسر له ..
***
فراس كان مسترخي على الكنبة .. وبيده جواله يتعبث ..طلعت راسها من المطبخ : فراس !
فراس : نعـــم ..
غادة : تحب الحار ولا لا ؟
فراس : وسط !
غادة : اهــــا .... " رجعت للمطبخ " ربع ساعة ثم طلعت للصالة ..
فراس بتذمر : ماخلص هالمفطح اللي تطبخينه ؟
غادة : حطيته بالفرن يبي له دقايق ... ليش مستعجل ؟
فراس : ماني مستعجل .. لك ساعة والله لو عزيمة كان خلصت
غادة جلست بكرسي بعيد عنه بشكل معقول : قلت لك اني مو طباخة ! سويت اللي اقدر عليه
فراس طالع الساعة .. 11 ونص , وللحين اهله مايردون : استغفر الله بس !
غادة : بجد تأخر الوقت .. للحين مارجعوا ؟
فراس هز راسه : عمرهم مارجعـوا !
غادة : أوف ليش تقول كذا ! بسم الله عليهم
فراس : والله امي مسكينة .. على بالها تاركتني مع وحده سنعة ! هذا انا جويع وبطق من الجوع بعد
غادة : آله انا ؟
فراس : ليته ..
غادة : هو أنا آلة بس باشياء ثانية طبعا ... المطبخ كلش مو مجالي
فراس بسخرية : ونعـم والله ..
غادة : عادي اسألك سؤال ؟
فراس : لا .
غادة بوزت : بخيــــل ..بس راح اسأل بكل حال ! يعني أنت مو ناقصك شي كامل ..
قاطعها : قولي ما شاء الله !
غادة : ما شاء الله ! صح تنقصك الأخلاق شوي بس ماتضر .... ليش ماتزوجت من زمان ؟
فراس : مكتوب اني ابتلش فيك شاسوي ؟
غادة : هههههههههههههههههههههه ظنك !
فراس رفع حواجبه : مبسوطة ؟
غادة هزت كتوفها : لا بس تضحك طريقتك وانت تقولها ..
فراس : وأنتي ؟ ليش تزوجتي من بدري ؟
غادة اختفت ضحكتها .. نطقت بكئابة : مكـتوب ..
فراس : هذا مو جواب ..
غادة : هممم ... كان ولد عمي , وعمي طالبنا فلوس .. " صارت تدلك يدينها ببعض بضيق " وبابا كان مريض .. وإبتسام راتبها مايوفي شي .. وهيثم تو يدرس ... فخطبني من أبوي كحل بديل ..
فراس وهو يتأملها .. واضح ضيقها من هالموضوع او من هالمرحلة بحياتها : حل بديل ؟ معناها مافيه مهر
غادة هزت راسها : كان دايم يقولي مهرك اني مارميت اهلك بالشارع .. عموما عمي كان يكرهنا بالأخير قرر أني حل بديل فاشل فرجع يطالب بالفلوس ... بس فرجها ربي وقت خطب نايف ابتسام والمهر وفى كلش .. " تنهدت " كنت دايم اخاف اعنس زي إبتسام ...
فراس : التالي عند ربه غالي ... مطيورة !
غادة ابتسمت بضيق : ههههه .. معك حق ..بس حمد الله على كل حال .. اللي مايقتلك يخليك أقوى
فراس : اللي مايقتلك يخليك نفسية
غادة ظلت تطالعه .. وهو مسند راسه على يده ويسولف معها لأول مرة .. ابتسمت لاشعوري من إحساس داعب قلبها: حياتي هنـا .. بجد حياة كثيرة علي , بيت اهلي كان كئيب لدرجة المرض ... بيت عمي كان جحيم من جميع النواحي .. بيت إبتسام كنت احس بثقل .. وقت جيت هنا .. شفت كيف أم تحب عيالها لأول مرة .. شفت كيف اخوانك يحبون بعض .. شفت كيف أنت شايل مسؤوليتهم ... مستحيل اصدق انك تعاقبني بهالزواج .. لأني عشت اوقات اصعب..
فراس كان يتامل الطاولة بالنص وهو يسمع كلامها : هذا اللي افنيت نفسي عشانه ..
غادة تو بتتكلم انتبهت لتعابيره تنقلب ... : قلتي لي بالفرن ؟
غادة شهقت وهي تنقز : نسيــــــــــــــــــــته !!!!
فراس مسك راسه : ................... أقتلها ولا أقتلها .؟
***
المطـــــعم /
إبتسام : جت التحلية ... انت فيك شي وتراوغني كل ماسألتك
هيثم تنهد ... نطق بربكة ويده ورا رقبته : إبتســام ... اذا قلت لك أني بسألك كم سؤال .. بس دون تقولين لي ليش ..
إبتسام : اسأل اللي تبغى .. وماراح اقولك ليش !
هيثم : ....... وش رايك في أسمـــاء بنت فهاد الله يرحمه ؟
إبتسام توسعت عيـــونها : تبغـــــــــــاها !!
هيثم : واللي يرحم لي والديك ابتسام .. انا اسأل مو انتي ..
إبتسام حست ان هيثم يواجه صعوبة بجد .. طول عمره كذا عنده مشكله اذا صار يعبر عن نفسه : ... رايي فيها ؟ من أي ناحية ؟
هيثم : اخلاقها ..
إبتسام : البنت وقحة !
هيثم فتح عيونه ... إبتسام : وقحـة لدرجة كل مرة اطلع معهم مشوار ماتطلع الا متضاربه مع نص الموجودين , لأنها ماتسكت عن حقهـا ولا حق غيرها ..
هيثم وعيونه على صحنه ويسمع .. وكلامها يرسم صورتها بعيونه .. دفاعية ؟ يناسبها : ............
إبتسام : و ماتعتبر مسؤولة .. مرة هبلة .. بالحيل مطيورة .. بس كل هذا لأن قلبها طيب .. واللي فيه على لسانها ..انا أحبها بجد هالبنت
هيثم وعيونه مازالت شاردة بالصحن : ...............
إبتسام ابتسمت وهي تقرا اللي بداخله : تبغـــاها ؟
هيثم رفع عيونه لها :............................
ابتسام حضنت يده اللي على الطاولة : راح اقولك انها عكسك بكل شي ... بس يمكن هذا اللي تحتاجه , وبأمانة ؟ هي عطتني كم تلميح عنك .. ههههه كنت مستغربة بس اللحين فهمت .. ماراح اسألك كيف صار كل هذا لأني واثقة انك مستحيل تتجاوز حدودك .... " ابتسمت بوسع " نتوكل على الله .؟
هيثم رفع يده وغطــى عيونه وهو ينطق بانحراج : ونعـم بالله ...
ابتسام ماتت ضحك .. : هههههههههههههههههههههههههه ياربيه ! اول مرة اشوفك مستحي !!
ارنسمت إبتسامته الجذابه وهو مازال مخبي عيونه : للحين أحس مخي مغسول لأني كلمتك بهالموضوع
إبتسام : صدقني راح تسعـدك .. فوق ماتتصور , البنت روحها تجيب العافية
هيثم نزل يديه وهو يبتسم براحة بعد ما قال اللي بخاطره : أدري ..
***
لــؤي اللي كان بالسيارة مع ابوه .. ومستغرب انه طالب منه يروح معه : ...............
كان ساكت طول الطريق .... عقد حواجبه وهم يوقفون عـند المحكمة : شالسالفة ؟
ابو نايف : مو عارف .. كلمني القاضي وقال فيه قضيه مرفوعه علينا ..
لؤي : شغل يعني ؟
ابو نايف كمل طريقه دون يرد .... تبعه لؤي لحد ماوصلوا عند الشيخ ...
ابو نايف : تفضل ياشيخ ..
القاضي : انت لؤي بن عبدالرحمن بن نايف الشمري ؟
لؤي : أيـ..يـه
القاضي : زوجـتك سارا والكر رافعه قضية خلع .. وكل الأدله بصفها فراح نضطر نخلعك للأسف .. ياليت تصير طلاق بالطيب ..
لؤي : مستحيل ! كيف تطلب خلع وهي .... " استوعب " هي وين ؟!!!
القاضي : موجودة .. راح نوصلك لعندها ونسمح لك بلحظة لكن احب افهمك ان القانون مو بصفك
لؤي صرخ بقهر : هي فين !!!
بعـد ما مشى لحد ماوصل لغرفة .. اول مادخلها كانت جالسة بعبايه على كتوفها وطرحه لافتها على راسها .. وقفت أول مادخل وهي تنتبه لهيئته المفزوعه ... والإرهاق واضح عليه : ..................................
لؤي وبعيونه عتب نطقه بصعوبة : انتي هنا !!!
سارا نزلت عيونها .. كان صعب تواجه عيونه : ....... ايوه انا هنا ..
لؤي : قبل شوي ... قالي القاضي ..
كملت سارا : ايوه .. انا طلبت خلع , راح تساعدني اذا تمت الامور بسهوله ورجع كل واحد لمكانه الصح ..
لؤي هز راسه بإنكار : لا ... مستحيل ! اكيد انتي مو بعقلك !! " صرخ فيها " ليش قابلتي ابوي .... ليش صار بينكم تواصل !! اكيد كل هذا بسببه
سارا : ابوك ماله دخل ... هذي قناعتي .." تنهدت " لؤي انا ماراح اندم على اللي صار بينا .. اللي صار ذكرى راح اعتز بها طول عمري ...ومايا هديه ماراح انساها منـك وراح اشوفك فيها طول عمري بس اللحين انا محتاجة اشوف حياتي .. ويكفي اللي صار للحين .
لؤي حضن يدها وواضح على لمحته فزع من كل اللي يصير : انا لك سارا .. لاترجعيني لي انا لك ! شقاعدة تسوين ؟
سارا وهي تمسك نفسها لاتنهار : انت مو لي ... ولا بيوم حسيت بهالشعور وانا اعتذر اني رغم هذا غلطت وسايرتك .. كان حلم مسمم بالنسبة لي .. خلاص لؤي خل نوقف لحد هنا .. شف حياتك .. وانا راح اشوف حياتي .. تزوج وحده تقدر تواجه العالم بها
لؤي بعصبية : شقاعدة تقولين !! منهي اللي راح تكفيني بعد مارفعتي سقف التوقعات عندي لحد تعجز عنه أي وحده بالعالم ! انا مالي غيرك صدقيني ..
سارا : انا ماراح اقبل بأقل من اللي استاهل .. وهالوضع اكيد اقل من اللي استاهله ..
لؤي : صدقيني فترة وراح تمر ... ليش ضعفتي ! لازم نصير قويين اذا نبغى نهاية تناسبنا ..
سارا رفعت يدها بألم وهي تمسح الدمعه بخده .. ودمعتها ماقاومت تنزل : ظنك الدنيا تنسينا بعض .؟
لؤي اكتفى باعتصار دموع تعبر عن خوفه واهتزازه بهاللحظة : ........
سارا : لؤي خلاص .. انت تنتمي هنا هذي ديرتك واهلك ! صدقني انا لو مكانك سويت كذا ..
لؤي : انا من سافرت وشفتك تغيرت نظرتي للحياة .. تغيرت فكرتي عن الرفاهيه اللي كنت عايشها وعن الهواء والراحة .. وعن انتمائي .. ما انتمي هنا انا انتمي لك ..
انطرق الباب ..... : الوقت مو لنا ياجماعة ؟
سارا استنشقت الهواء بقوه وهي تنزع يدهـا من يده وتمسح دموعها .... : هنا مكان قانون .. لاتحاول تلحقني .. ماعلى الدنيا عتب .. كل مافيها اماني ..
***
فراس كان جالس ومتكتف ... وقدامه صحن الأكل المحترق تقريبا : ...................
غادة كانت تطالعه بربكة : ......
فراس قلب الأكل بالملعقة .. لكن ماطول رمى الملعقة : هذا المحترق شوي بس ؟
غادة عضت على شفتها : ما أعجبك ؟
فراس ضرب بالملعقة على الطاولة .. حتى فزت بخوف : قومي انتي وهالسم الهاري اللي حاطته لي ... وسوي لي خبزة اخلصي علي بنام ! الساعة 12 وحنا للحين ننتظر هالأكل وبالأخير ..." ماحصل كلمة يعبر بها "
غادة شالته وهي منقهره من السوالف اللي ضيعت عليها طبختها اللي تعبت عليها .... سوت له سندويتشه وهي تطالع التاريخ : اول مرة نتعشى سوا ! هههههههه ماكانت فكرة شينه انهم يروحون بعد كلش ..
جهزته بصحون وحطت كاسين عصير .. وهو ترسم سمايلي فيس على سندويتشته .. شالت الصينية وأول ماطلعت .. انتبهت لوجهه متغير وهو يكلم : شفيك يابن الحلال خرعتني !! .... تكلم زين مو فاهم !! .... " رجعت ملامحه للبرود ونطق بهدوء عقب فترة " انت وين اللحين ؟ .... خلك مكانك
وقف وهو يمشي يطلع .. غادة : وين ؟! العشاء !
كان الجواب تسكيرة الباب ... وش المكالمة فجأة !! طالعت العشاء بقهر .. عقب كلش ماتعشوا اساسا ..

لؤي وسارة .. معقول تنتهي حياتهم مع بعض بس لانها مو من نفس الجنسية
غادة .. بصراحة بتقهر كتير .. بنت متزوجة مرتين ما بتعرف تطبخ لزوجها وحرقت الاكل
ابتسام ونايف .. بحب حياتهم مع بعض متصالحين مع نفسهم وكل واحد عايش براحته

" تشابتر ثلاثة وأربعين "
الكذب في بلادنا ليس إستثناء , ولكنه من فرط التكرار صار يشبه الحقيقة
- واسيني الأعرج -
ظـلت عيونه على الطريق متسمرة .. جالس يستوعب وش صـار قبل لحظة ؟ طلق .. عفوا خُلع !
بصوت مبحـوح ملحق بالكثير من الشوائب : وقف السيارة ..
التفت له أبو نايف : نعـم ؟!
ارتفع صـوته درجة : وقف السيارة ..
أبو نايف : عن الهبل .. بنص الطريق العام اوقف بك ؟
فتح الباب مباشرة بتهـور ودون إعتبار .. وقف أبو نايف السيارة بسرعة وصرخ فيه : مبهـــول !!! متهور معد فيك عقل ؟!!!
ما التفت له لؤي ونـزل وهو يجلس على الرصيف .. نـزل ابوه وهو يطالعه بقهر : ماتبيني اسحبك بنص الشارع !
لؤي كان مخبي وجهه بيديه الثنتين بوهن وجالس : .................
ابو نايف سحبه من ذراعه يوقف بقوة : طـول عمرك عايش بملعقة ذهب بفمك .. بفضلي انا !! واللحين عشان **** صرت ماعـاد تبيني ؟!!!!
لؤي سحب ذراعه بقوة من يد ابوه : متى ؟ ... " كمل " متى قلت لك اني أحب طعم الذهب بفمي ؟
أبو نايف : ودك تجرب الفقر عشان تعرف !!
لؤي : لا .. بس ذهبك هذا طلبتك تجرف لي منه دراستي فن ! رفضت .. طلبت منك تجرف لي بعثة برا ! قلت معصي .. طلبتك تجرف لي منه وظيفة بمكان معين ! رفضت ... واللحين لأول مرة ما اطلبك ذهب .. اطلبك تتركني بحالي ! " نزلت دمعة مكبوته " ما أناسبك يبه مرة ثانية تبغى لك ولد ؟ رح لشركة صيانة تضبط لك روبرت
أبو نايف : كل هـذا فيك منا ؟ مافكرت يوم بإيجابيات العيشة معنا ؟
لؤي : ايه كل هذا فيني !! احيــان تصور اني ما أكون ابغى إلا احد اكلمه ... بس ما احصل احد مناسب !! واللحين يوم لقيت اللي تكمل لي حياتي .. " انخنق وصرخ بقوته " من عطــاك اذن تفرقنا ! من عطاك قوة تحكمك بكلش ؟؟
أبو نايف : هذي قوة أني أبوك !! ماتعبت فيك وصرفت عشان تسود وجهي .. رح غير اسمك الثاني ووقتها بالناقص
لؤي شد على قبضته : بيدك ... تبرى مني ..
أبو نايف : توصل فيك لهنا ؟ تترك امك ؟ مجتمعك كله ..!!
لؤي : مو مقياس سليم لصحتي اني أتأقلم مع مجتمع مريض زي هذا .. عظم الله اجرك في لؤي , من هاللحظة استوعب اني مت .. وأنت السبب ..
أبو نايف ارمقة بنظرة ثم نطق وهو يمشي لسيارته : مرد الكلب للقصاب .. واللحين انقلع لوين مابغيت !!
أول ما تركته سيارة أبوه .. جلس بتعب على جانب الطريق وهو يقبض قلبه يحسه يتهشم , بنته اللي ما قابلها غير مرة بحياته ؟حبيبته اللي ماتمنى شي قد ماتمنـاها .. متأكد عقب هاليوم ؟! ماراح يحلم لفترة طويلة اكيد ..
مسك جواله وهو يرفعه بتعب .. ويدق على الرقم الوحيد اللي يقدر يفكر فيه بهاللحظة جاه الرد بصوت رايق : هلا والله؟
نطق بتعب : ..... فــراس
فراس استوعب النبرة : لؤي ؟! شفيه صوتك يارجال .؟
لؤي : انا على طريق الملك فهد ... تقدر تجي .؟
فراس : جــايك خلك مكانك
***
رجـع أبو نايف البيت وهو معصب ... أم نايف : هلا والله جيت !
أبو نايف انتبه لميهاف جمب امها : شتسوين هنا ؟ مارحتي مع بدر .؟
ميهاف بلعت ريقها وهي مو عارفة وش تقول : لا .. امي محتاجتني بكرة فـ .. قلت لبدر حنام هنا اليوم
أبو نايف ضيق عيونه فيها ... ونطق : انا فوق .. مزنة الحقيني
اول ماصعد التفتت لها ام نايف : ألله لايوفق هالبدر ! شلون بقول لأبوك اللحين
ميهاف : لا ماما لاتقولين له .. راح تنحل دون يعرف ابوي ..وبعدين خل ارتاح منه هاليومين شوي
ام نايف : بترتاحين كان ماتزوجتي وبس !
: مـــــــــــزنة !!
راحت له ام نايف مباشرة .. بينما صعدت ميهاف لغرفتها وهي تحس زمـان عنها كأن ايامها بالغرفة كانت من سنين طويـلة .. ما كأنه من كم فترة بس , سحبت الدرج جمب سريرها وهي تنتبه لرسالة كانت من بدر أيام خطبتهم .. مجرد كلمة غزلية بسيطة أرفقت بهدية " وكيف للكحل أن يكون بعينيك دون أن يذوب " حست بغبائها بجد .. مفروض جلست مخطوبة له وبس .. كانت أيام حلوة الزواج قلب هالأشياء كلها ! فيه ناس كذا بالبعد اجمل ..
او يمكن عند بدر المرأة الذكية المحتضرة للإعجاب بس مو للزواج .. المرأة الذكية المتعلمة تخوفه لأنها تفهم .. واللي يفهم يكتشف .. أكيد راح يفضل وحده حمقاء .. عشان كذا البنت تتعلم تزيف غبائها من نعومة اظافرها
***
بعد ما وصل فراس .. وشاف لؤي بحالة كسيحة على جانب الطريق متسند وسارح بعيد عن هالعالم ..ضرب البوري .. هنا أنتبه له لؤي وركب : ..........
فراس عقد حواجبه : شتسوي هنا ؟! سلامات !
لؤي : رافعه قضية خلع ... " التفت لفراس " بكل الأساليب بالمحكمة مارضوا يتركوني لحد ما خلعوها مني .." إبتسم بسخرية " قال القاضي ان سبب الخلع هو عنف بالسلوك وتقصير بالصرفية .. تصدق ؟ رافعه قضية علي لأني اضربها ؟ وما أصرف ...
فراس استرخى على كرسية وهو يسوق : ..........................
لؤي : طاحت عيني بعينها .. وتاهت علومي .. ماصدقت انها رافعه علي كل هذا ! انت تصدق ؟
فراس احتفظ بصمته : ..................................
لؤي : هذا انا من نقرة لدحديرة .. ومن فخ لفخ .. والدنيا تشيلني وتهبدني مثل ماتبي ..! " دمعت عينه " واللحين هي راحت ..
فراس بهدوء : راح الشر .. ياما قلت لك نظف مخك بنفسك عشان محد يغسله لك .. واللحين ؟ هذا حصادك
لؤي وهو يقبض صدره : اخخخ يافراس ... اخخ
فراس التفت له بطرف عينه .. حالته في الحافة ساند راسه على النافذة ويفرك بقهر ودموعه تنزل .. رجع فراس عيونه للطريق : من الأول مفروض صدقت افعالها مو اقوالها ... بس كل طقة بتعليمه
لؤي طلعت شهقة مكتومة .. كان يصارع نفسه .. يصارع دموعه بس اللي يصير أكبر منه ... فراس كمل الطريق بسكوت .. لحد ماوقف عند الفيلا بعد طريق طويل كان لؤي نام بالفعل .. وقف فراس وهو يهزه بخفة : لؤي ..
لؤي ماصحى للحين : همممم ...
تنهد فراس وهو يطلع من مقعده .. ويتوجه لمقعد لؤي انحنى حتى حط ذراع لؤي على كتوفه .. وحاوط خصره وهو ينـزله .. وكان لؤي بالفعل مخدر .. مخدر من الواقع غارق بنومـه .. صعده فراس لغرفته وهو يتركه ينام .. تنهد بضيق وهو يطالعه : أنت ويــن ؟ وهالعالم وين ؟
صحى لؤي وهو يجلس فجأة .. كبس بعيونه ثم رجعت عيونه تذبل بتأثير الواقع .. الوجع بقلبه يشهد على ان اللي يصير مو كابوس : ........ الفيلا ؟
وقف فراس : ايه الفيلا .. ونام ترا كثر السهر مايجيبها
لؤي : ...........................
طلع فـراس وهو يسكر الباب وراه .. توجه لمكانه المفضل بالفيلا ؟ سيارته المركونة بالفناء الخلفي .. تسند على الكبوت وهو يحسب بداخله .. اشياء محد غيره راح يحسب لها .؟
***
إبتســام :
مجرد ماقاربت الساعة 4 عصر .. دق جوالها بينما كانت بالمطبخ ترتبه بعد الغداء .. ابتسمت وهي تشوف المتصل وترد : هلا والله
هيثم : هـلا بك زود .. كيف حالك ؟
إبتسام : عقب أمس اكيد مبسوطة
هيثم : ......... ايوه على طاري أمس , " كمل بربكة " ابيك تقيسين نبض البنت بس .. يعني لاتسوين حاجة رسمية قبل تتأكدين
إبتسام : يؤ كيف .؟ انا ناوية اروح لهم بعد شوي وبكلم امها
هيثم : لا ! كلميها هي بس ..
إبتسام بتردد : همممم .. براحتك راح احاول
هيثم : ...... و ناوية تروحي اللحين ؟
إبتسام ابتسمت لنبرته .. واضح مستعجل بس مستحيل يبين : ايوه ..." قرت افكاره " ولا تخاف اول ما أرجع راح اقولك
هيثم: لا مافيه داعي .. .. متى ماعرفت عرفت
إبتسام : هههههههه ياعزة النفس !! يله ياحلو باي
سكرت السمـاعة وهي تخلص مسح آخر صحن .. طلعت وين ماكـان نايف جالس بنص الصالة ببجامته وحوله حوسة .. اللاب قدامه وملف جمبه .. واوراق بحضنه ويشتغل على جواله .. عقدت حواجبها : وش كل هالحوسة ؟!
نايف وهو يسند اصابعه لراسه : مضيع كم ملف لازم احصلها اذا بداوم الأسبوع الجاي
إبتسام وهي تجلس جمبه وتحاول توضب الحوسة حوله : ماراح تحصل حاجة بهالفوضى
نايف : لا لاتحركي شي راح تحوسيني .. اتركيها وبحصلها
إبتسام : اساعدك بشي .؟
نايف : ماتقصري حياتي بس ماراح تعرفي
إبتسام ابتسمت : طيب عندي لك بشارة
نايف وهو ينتقل من الجوال للابتوب : هممممم ؟
إبتسام : هيثـم اخوي امس ...
قاطعها بزفرة : افففففففف ماحصلت شي !
إبتسام رفعت حواجبها : جدار انا
نايف : محشومة بس بعدين .. مو يمك اللحين
إبتسام وقفت .. وهي تلبس عبايتها .. نايف وهو يشتغل : طالعه ؟
كان الرد صوت الباب يتسكر .. كبس بعيونه .. هز كتوفه بتسائل .. رجع يشتغل ..
***
غـادة .. انتظرت مساء أمس بطولة فراس يرجع ... بس مارجع .. ولا أم فراس رجعت , فاستسلمت للنوم فجر لما يأست .. نتيجة لذلك ماصحت إلا لما دقت عليها إبتسام عصر تقولها أنها راح تجي ..
صحت بطاقة إيجابية مو عارفة مصدرها .. بس تعرف انها مبسوطة بجد سحـبت طرحتها وهـي تنزل .. استقبلتها ضجـة تحت دخلت الصالة وأم فراس استقبلتها بابتسامة واسعة :هـلا والله مرحبا ومسهلا
جلست غادة جمبها : إبتسام بالطريق .. فقلت أنزل اعطيك خبر و ..
قاطعتها أم فراس : حياها الله باي وقت .. البيت بيتها..
غادة : متى رجعتـوا امس ؟
ام فراس : مارجعنا الا عقب الفجر .. البزران انبسطوا هناك فخذينا راحتنا
غادة : اهـا " تلفتت حولها ثم سالت بربكة " فراس هنا ؟
ام فراس كانت متحمسه يكون فوق .. لكن الظاهر ماضبطت : لا .. من رجعنا ماكان بغرفته ولا رجع
غادة استغربت .. من امس مارجع يعني ؟ : ...........
: وش عندك كاشخة ؟!!!
التفتت لاسماء اللي واضح تو صاحية من النوم شعرها الرمادي منتفش .. مع بنطال بجامة " poma "
فضفاض ... جلست بكسل وهي تتثاوب : ..........
غادة : اكيد بكشخ ابتسام بتجي
اسماء : عجزانة اغير والله .. " استلقت على الكنبة " يازين النـوم .. الله يسامحك يا يم امس تبهذلنـ..
قاطعتها ام فراس : بتنامين ارجعي غرفتك ! كلن صاحي من ظهر الا انتي تو تفزعين !
اسماء بقهر : انا محبطة !تو دفعت اول شهر لفراس حق كابينته الزفت ... والله حرام عليه لمتى يعني .؟
ام فراس : وش اسوي لك ؟ حاكيته وعصب تدابري انتي وياه
اسماء : غادة انتي وش سويتي ؟ عطيتيه ؟
غادة سوت حبتين : انا جاني إعفاء !
كبست اسماء بعيونها : كيف ! جاك شنو !
غادة : طبعا بيجيني اعفاء... لا ادرس ولا وظيفة ولا شي .. ابيض فلوس ؟
اسماء بانفعال : لاااا عاد !! وش هالغشش ...... متى جاك هالإعفاء ؟
غادة : أمس ..
ام فراس انبسطت .. اكيد اجل انبسطوا ..
اسماء : شفـــتوا ! هذي هي مشكلتي بالحياة اني اخت فراس ومفلسة ... وش هالغش ندفع سوا ولا ناخذ اعفاء سوا!والله لأوريه وينه ...؟ وين جوالي !
ام فراس : انتي اعقلي وتفاهمي معه بأدب وبيقتنع .. اهم شي الأسلوب
اسماء : اتفاهم ! اتفاهم مع من ؟فراس ؟ هذا بينه وبين التفاهم اساسا سوء تفاهم من وين اتفاهم معه ... وانتي ياغادة تقهرين يعني كان فزعتي لي يوم قدرتي تخلصين نفسك !
غادة : شنو انا ماصدقت اطلع منها .. اخاف اجيب طاريك ثم يهون
اسماء : لا انا بخليه يهون ... خليه يرجع والله ندفع كلنا ولا نقعد كلنا
غادة شهقت : ياويلك ياشريرة !! انتي عندك دراسة شي .. انا اتقي الله فيني مطفرة
اسماء : مب مشكلتي .. والله لأجني عليك .. حلوة هذي انا ادفع وانتي تطلعين منها
دق جوال غادة ... : هذي ابتسام اتفاهم معك بعدين ياشريرة !
ركضت تطـلع .... ام فراس : اقول اسماء كنها مبسوطة اليوم بزيادة ؟
اسماء بحمق : مالاحظت مشغولة احقد على الزفت فراس
ام فراس : خلي عني الخرابيط بحاكيه لك مرة ثانية .... بس صدق اكيد مبارح مشى حالهم
اسماء بعصبية : اكيد مشى لدرجة عطاها عفو حضرته ماتدفع !! اتركيني انا وياه بالبيت لحالنا اليوم اجرب حضي
دخـلت غادة وإبتسام .... إبتسام سلمت على الكل ثم جلست وعيونها على اسماء .. ابتسمت على هيئتها المعصبية متربعه ومتكتفة ومبوزة .. ماتخيلت بيوم هيثم يبغى وحده كذا : هههههههه شفيهم الحلوين مبوزين ؟
ام فراس : طول عمرها مبوزة الله يهديها
اسماء اللي زعلت صدق من فراس : انا بصعـد لغرفتي .. خذو راحتكم
هزت ام فراس راسها لما صعدت : البنت طنقرت صدق
ابتسام : افا وش فيها ؟
غادة : هي مسكينة صح بس انا ايش ذنبي بعد تجني علي .. ناقصة ؟
ام فراس : ماعليك منها مصيرها تسمح ... وانتي ابتسام كيفك وكيف الحمل .؟
إبتسام : ماعليـنا .. كلش تمام
ام فراس : ونايف علومه ؟
إبتسام : بصحه وعافية تسلمين
أم فراس : بروح اشيك على القهـوة
غادة نطت : استريحي انا بروح اشيك
ماعطـتها فرصة على طول راحت للمطبخ ... اما ابتسام كانت متورطة من طلب هيثم محد يعرف كيف بتقول لغادة اللحين بوجود ام فراس : .......................
***
دخـل فراس الفيلا بعد ماخلص شغله .. : هالفيلا من ملجا مشردين لمصحة نفسية !
كان لؤي نـايم للحين .. عقد فراس حواجبه : للحين ؟! " هزه " هييييه انت ! ماوراك صلاة ماوراك شي .. لك 12 ساعة نايم
لؤي وهو على وضعه : لانمت ما أفكر .. اتركني
رفع فراس حواجبه وهو يجلس على الكرسي الجانبي : عارف شي ؟! ماشفت بحياتي اسخف منك
لؤي بهدوء : هذا شي مو بيدي ولا بيدك .. ماجربت تعشق ..
فراس : يعني تهوجس وتعاتب وتنام عشان ماتفكر ودراما مالها حدود عشان وحده فانية تركتها تتولى عرش حياتك وتصرفاتك ؟ ليش ؟!عطني سبب مقنع يخليك تتسبب على نفسك واهلك بكل هذا
لؤي زفر وهو يستقعد : وقت تسمع ان العشق مرض .. افهم انه مرض واتركني بحالي !
فراس طالعه بنص عين : زقوم !
لؤي : التفكير عندي موقف فراس .. مقدر احكم عقلي ماعاد فيني خلاص
فراس : العقل يميز .. اذا المدمن وهو المدمن عقله يردعه عن ادمانه
لؤي : لا للاسف اللي يجري في الدم مايغلبه العقل ولا الارادة .. لو كان العقل يردع مافتحت مصحات الأمراض العقلية
فراس : كل داء وله دواء لؤي ! والمصحات يطلع منها ناس سليمة .. وهذا يثبت ان العقل قادر
لؤي : لا تلومني في شي ماتعرفه ولا تعتب علي في شي ماعشته ..
فراس : وأنت لا تنصاني اذا ماتبي تسمعني " لانت نبرته " لؤي تزعل اليوم مو مشكلة بكرة زعلان حقك .. عقب بكرة نمشيها .. بس اكثر من كذا زاد عن حده ولازمه ردة فعل .. حتى لو مصحة نفسية على قولتك
لؤي : من اليوم ودني ... ما أتوقع هالجرح بيوم بيطيب
فراس بحدة : فيه فرق بين انه مايطيب وأنك ماتبيه يطيب !! لؤي لي سنتين جمبك مع انك تغيرت 180 درجة .. استح على وجهك تسوي كل هذا عشانها وانت مكتوب لك بالحياة أم وأبو غيرك يتمانهم ..
لؤي : ابوي هو سببي .. ماتعزيني اذا قلت عندك ابو
فراس : رح لامك وحطها على جرحك و عاتبني اذا ماطاب
لؤي : ....................................
دق جوال فراس .. كانت امه رد مباشرة : هلا
ام فراس : فراس .. هلا والله ؟
فراس بسخرية : بالبيت ولا لسى مشروعك ماخلص ؟
ام فراس : عن العيارة ! تنكر انك ما انبسطت امس
فراس : لا مانبسطت ! لا نوم ولا أكل ... من وين البسطة ؟
ام فراس : الله يهديك ويصلح قلبك .. طيب وينك من امس منت بالبيت ؟
فراس وعيونه على لؤي اللي متسمر بالجدار : ايه مشغـول معليش
ام فراس : ومتى بترجع ؟ تعال خل اعوضك عن امس واسوي لك احسن عشاء
فراس : جريش ؟
ام فراس : جريش ومروقوقة واللي تبي
فراس : اخلص اللي بيدي اجل وجـاي
ام فراس : نحتريك .. يله مع السلامة
سكر السمـاعة وهو يطالع لؤي : شفت ! بس مكالمة من امي طلعتني من النكد اللي عشته من مقابل خشتك
لؤي : وانت ليش متعب نفسك ؟ رح يخي ماني بزر ترا
فراس : هذي كسرة ظهر ابوك لؤي .. انك منت بزر !
لؤي انفجر : على بالك اني مابي اسوي الصح ؟ اشوفه صدقني .. واعرف انه صح بس اسوي الغلط , اتحمس وقت اسمع المنطق .. بس اني اضعف وأتخاذل بالاخير وانصاع لشهوتي ومايحز بقلبي وقت ازلق .. إلا اني اعرف اني ماطلبت كثير ... رغم كذا رفض ابوي حتى انه يفصلني منها بطريقة محترمة ..
فراس تنهد بضيق وهو يشوف كيف انفجر .. وعقبها مسك فمه يحبس عبرته .. دفن راسه بين ركبه وينطق بخنقة : تخيل نفسك مكاني فراس ... انا عندي بنت .. بس مطلوب اللحين اني انسى انها كانت بحياتي
فراس هز راسه : لاحول ولا قوة الا بالله .. " حط يده على كتفه " اصلب طولك لؤي انت اقوى من كذا .. قم توضى اللحين وصل وبتتسهل .. ماعمر حياة انسان وقفت على احد
وطلـع تاركه يرتاح .. أول ماركب سيارته وقف عند البواب : قل للطباخ يجهز للؤي وجبه ويصعدها له
البواب : حاضر طال عمرك
كمل فراس طريقه ..ودق مباشرة على مسعود : مسعود !
مسعود : سم طال عمرك
فراس : انا مو قايل لك تحط عيونك على سارا ... وتنتبه لحركاتها ! كيف جت للرياض ماحسيت
مسعود : اكتشفت بعدين ان الحجز ماكان باسمها .. جايه باسم ثاني , ماعرفت الا متاخر لأنها تواصلت مع سامي المتعب عشان تمسك فرعه بامريكا
فراس رفع حواجبه : متأكد ؟
مسعود : ايه .. هي مسؤولة الفرع بامريكا حاليا
فراس : ................... قول لسامي المتعب يطرد هالـقـ*** ولا اتفاقنا معه ملغي !
مسعود انصدم : واذا رفض ؟
فراس : وقتها الإتفاق ملغي واسحب موظفيني من عنده !!!
مسعود بتردد : أيـه بس .. سامي المتعب مايرضى احد يـفرض رايه و ..
قاطعه فراس بحدة : شغلك تنفذ وبس ! واذا رفض عطه خبر ان السوق لعبتي .. ويحتري خبره
مسعود : حاضر .. اوامر ثانية ؟
فراس : واعرف لي هاللي اسمها سارا جايه باسم مين !
مسعود : حاضر
سكر فراس السماعة وهو يرمي جواله على جمب ويسحب له سيجاره تطفي اعصابه شوي : .....
دق جـواله طالع المتصل " عمي عبدالرحمن " ... سحب سيجارته بعمق ثم رد : هـلا
ابو نايف : السلام عليكم
فراس : وعليكم السلام .. كيف حالك عم ؟
ابو نايف : حمدالله ماعلينا ... لؤي ..
قاطعه فراس : لؤي عندي ..
ابو نايف : معناها عرفت اكيد .؟
فراس : ايه وانا اقول هالكم يوم انساه شوي .. اتركه يهدى وعقبها لنا كلام ثاني
ابو نايف : للحيـن زعلان ؟
فراس بسخرية : مصطلح زعلان مبدئي بالنسبة للي جالس يصير .. عموما انت سويت اللي انا ماقدرت اسويه من زمان وهذا اللي مفروض صاير من أول .. الخطوة الثانية اللحين انه يلم نفسه ويوقف من جديد
ابو نايف : يعني انت مو ضدي مع لؤي ؟
فراس : أنا مع لؤي .. عشان كذا اقولك هذا اللي مفروض صاير من أول
أبو نايف : الله يرده بعقله بس ..ويكملك بعقلك
فراس : آمين ... تامر شي ؟
ابو نايف : سلامتك
سكـر السماعة وهو يوقف بسيارته بالقراج .. أول مانـزل دق جواله طالع المتصل وهو يعض شفته : ياليل النسوه ..
رد : هلا دكتور
الدكتور باستياء : هلا استاذ .. فينك اليوم !
فراس : والله نسيتك تماما .. يومي مزحوم مره ماقدرت
الدكتور : هذي صحـتك .. واذا الاعراض اللي قلت لي صح معناها الجرح بحال اسوأ مما تتخيل ويمكن يحتاج تعقيم
فراس : لا تقول كذا .. صار احسن هالكم يوم
الدكتور : انت متهاون كثير .. يعني اليوم خصوصا مفروض أجلت أي شغلة ثانية وحضرت عندي !
فراس بزفرة : وهو بيدي !! خلاص باللعنه هالجرح خله يتسمم .." سكر السماعة مباشرة " ناقصك بعد انت
دخـل البيت .. استقبلته أم فراس تسلم عليه : هلا والله باللي وحشني .. كيفك يمه ؟! ياساتر كان لي سنين مو شايفتك
فراس ابتسم بتعب : ماهو بيدك .. لو مو تاركتني امس ماصار كذا
أم فراس وهي تطالع هيئته المتعبه .. شماغه على كتفه غير ارهاق وجهه : شفيك تعبان ؟!
فراس وهو يجلس : ارهاق مو تعب .. يبيلي ارتاح بس
ام فراس : مو بس اليوم لك كم يوم ناحف واحسك على طول متكدر
فراس : وش بيكون فيه يعني ؟ شغل وماشغل ..
ام فراس : خوفي هالشغل بيوم يطرحك يمه .. ارتاح لك شوي ماتقدر ؟
فراس : ....... وين اخواني مو شايف احد ؟
ام فراس : اسماء بغرفتها مطنقرة .. وأنس بالملحق يلعب مع العيال غريبة ماشفتهم وانت داخل ؟ وياسمين تو كانت عندي وراحت تتروش .. وغادة كانت هنا بس صعدت هي واختها
فراس : سألت عن اخواني انا ... غادة اختي ؟
ام فراس : يعني بتسأل عن الكل إلا عنها .؟!!
فراس : واسماء شعندها مطنقرة ؟
ام فراس : زعلانة انك تاركها تدفع وغادة لا ..
فراس بعصبية خفيفة : وهالغادة امداها تقرقر للكل !!
ام فراس : اسماء سألتها وهي جاوبت .. عاد انت الله يهداك بتعجز عن الماكينة ؟ ادفعها وخلاص
فراس : لا ! اسماء بالذات بتدفع وهي مرة .. غادة أولا ماعندها بطرة فلوس ثانيا ماهمتني ! اسماء ابي اطلع قلبها عند الريال ..
ام فراس : طلع قلبها دون هالطريقة ..
فراس : وانا مو عاجبني غير هالطريقة .. خل المرة الجاية نروح للمزارع تنكسر رجلها قبل تدوح حول المكاين .. وبعدين تخلي مني مبدأ المقارنات مالها دخل في غادة !
أم فراس تنهدت : اجل الله يعينك وقت تشوفك .. منقهرة جدا
فراس ببرود : من اليوم للسنة الجاية ..
***
غـادة شهقت : نصـــــــابة !! مستحيل اصدق لاتحاولين
إبتسام : بزر انا اكذب عليك .؟ " َضيقت عيونها " وبعدين ليش مستغربة ..؟ انا اقول يمكن اخر مره بالمزارع طاح فيها واعجبته ..
غادة : ايوه الشكل شي والطبايع شي ثاني .. يعني معليش انا مافيني نص دلعها ووراني الويل .. كيف هي !
إبتسام : انتي ماسوا لك كذا عشان دلعك وانتي عارفة ! ثانيا انا قلت له عن طبايعها كلهـا .. حتى مشاكلها مع اهلها قلت له .. وهو مقتنع !
غادة : أيـه بس .. ؟
إبتسام : انتي تعرفين شي ؟
غادة بربكة : لا والله ... بس بجد احس غريبة السالفة ! ما تخيلت هيثم يخطب اسماء ..
إبتسام : المهم هو انا جاية اليوم اكلم ام فراس .. بس هو رفض يقول كلمي البنت أول وانا طبعا مقدر اتوحد باسماء فهذي عليك ..
غادة : ................ بحـاول
إبتسام : شنو تحاولين ! لا لازم تقولين لها وعقبها ردي لي ..
غادة تنهدت : أوك ...
إبتسام : أيوه ماقلتي لي وش صار أمس ؟
غادة عقدت حواجبها : امس ؟
إبتسام : ايه مو تركوك لحالك بالبيت و ...
غادة قاطعتها : ايه ايه ... " حاست بفمها " ماصار شي ..
إبتسام : كيف ماصار شي ؟
غادة وهي تلعب بيديها : يعـــني .... " وقفت " يعني ماصار شي
إبتسام : وين وقفتي بتروحين ؟
غادة وهي تحك راسها : بجيب لنا قهـوة .. ماتبين ؟
إبتسام : والقهوة اللي قدامنا ؟
غادة انتبهت : هههههههههه انا ابي قهوة تركية معليش
إبتسام بنبرة فهمتها غادة على طول : غــــادة ؟!! تعاااالي .... وش صار امس !
غادة : افف والله ماصار شي ... والله
إبتسام : لاتحلفين .. إلا صاير ونص اليوم بالقهوة صايره سنعه ونفسيتك متغيرة ومبسوطة وأول مره اشوفك وماتحشين فيه
غادة : ليش احش فيه ؟
إبتسام : مدري عـنك .. امس انبسطتي ؟
غادة : ما انبسطت .. ولا زعلت .. يعني عادي
إبتسام : احلف انه صاير شي ؟
غادة اشرت للمطبخ : بروح اسوي قهـوتي
إبتسام دق جوالها : هذا السواق جا ... حسابك عندي بعدين ! صرتي تخبين علي يعني ؟
غادة سوت نفسها ماسمعتها : تعالي أنـزلك معي
إبتسام : والله انا قاهرني هالباب الخارجي حق شقتك ! ليش مقفل ؟ يعني احراج لازم امر كل ماجيت اجيك
غادة : مو هذا هو الغرض منه ؟
إبتسام : يله الله يعينك مشينا
نـزلت معها غادة .. أول ماقربت من درج الدور الأرضي سمعت صوته ابتسمت دون شعور .. انتبهت لابتسام تطالعها بنص عين : خلاص مايحتاج تقولين لي !
غادة نغزتها : مناك .. تعالي بعبايتك انزلي مباشرة
نـزلت ابتسام مباشرة وطلعت .. اما غادة طالعته كان واضح من هيئته انه على شكله من أمس بلعت ريقها : سلام ..
: وعليكم السلام
تو بتجلس نطق : شتسوين ؟ انس بيجي يتعشى اقلبي وجهك !
ام فراس حست باحباط .. يعني امس مافاد شي : انس بوصي عشاه له هو وربعه برا
فراس : ماله داعي جلستهم عندنا لهالساعة .. كلن يذلف بيته ليلة دوام ! " رفع حاجبه وهو يطالعها " تسمعين ؟
غادة حفظت كرامتها .. هي نفسها تحسب عقب امس صار احسن بس الظاهر الأعوج اعوج : ...........
صعـدت مباشرة وهي تضرب بكعبها على الدرج بقهر .. قبل تصعد لفوق وقفت وهي تطالع غرفة اسماء .. تنهدت وهي تطق الباب : .............................
اسماء : مـــن !!
غادة : انا غادة .. فاضية ؟
اسماء : ادخلي
دخلت غادة .. وهي تدخل : شتسوين ؟
اسماء اللي منبطحة بسريرها وقدامها اللابتوب : ابد اشوف فيلم
عدلت جلستها وهي تسكر اللابتوب : راحت ابتسام ؟
غادة : أيـه راحت ... " تنهدت " اسوم ..
اسماء : لبيك ؟ شفيك كانك ضايقة ؟ فراس غاثك بشي بعد ؟
غادة : لا لا .. " رجعت تحبط " بس ابي اسألك سؤال .. وأبيك تجاوبيني بصدق
اسماء حست السؤال يتعلق بالصورة .. : غادة اذا سؤال خاص أو شي .. مافيه داعي
غادة : هو خـاص .. بس مو جالسة اسألك فضول بس .. عندي غرض من سؤالي
اسماء استسلمت : وش سؤالك ؟
غادة : صورة .. صورة هيثم اللي حصلتها أخر مرة , كانت بجدة .. مو العرس مثل ماتقولين
اسماء : كان دكتوري وصورته أوريه البنات ! بس مافيه دافع خفي
غادة : والشعر اللي على ظهر الصورة ؟
اسماء تنرفزت وقفت وهي تنطق بعصبية : غادة الصورة انتي شفتيها لأنك تلقفتي باغراضي ! يعني مايحق لك تسأليني عنها شي خاص فيني !
غادة تنهدت : ............ اسـوم ابتسام اختي جايه اليوم على طلب هيثم
اسماء وقفت مكانها .. نطقت ببلاهه : كيف ؟!
غادة باحباط : غرضها اليوم جايه تاخذ رايك .. على كلامها تبغى تعرف ردك قبل أي حاجة رسمية
اسماء كبست بعيونها : شتقولين انتي ؟
غادة : انا .. أحس انك كئيبة من ناحيته .. بس اللي راح راح حنا عيال اليوم .. بس انتي حره
اسماء بجد ما استوعبت : يعنــــي ؟!! اخوك يبي يخطبني .؟ هذا قصدك .؟
غادة هزت راسها بصمت : ..............
اسماء عقدت حواجبها .. كان نفسها تقول لغادة كلش تشرح لها انه مستحيل يكون يبغاها ! او يمكن رحمه فيها بس مايحبها صدق ! : .....................................
غادة وقفت : انا بطـلع واتركك براحتك .. خذي قرارك من نفسك أسوم وانتبهي تقررين حاجة تندمين عليها ..
اسماء من صدمتها ماعرفت ترد : ...........................
غادة فتحت الباب بتطلع ... بس ماقدرت ماتتكلم .. قبل تطلع وقفت وهي تلتفت لها : اسماء ؟!
اسماء طالعتها دون ترد : ................
غادة : هيثـم أخوي صح ... بس ماهو مثل ما أنتي مفكره .. يقدر يكون أكبر كابوس بحياتك , فانتبهي لقرارك .. أنتي حلوه وصغيرة وغنية .. اذا تقدرين تستغنين .. استغني ..
وطلـعت مباشرة .. هيثم فعلا كان كابوس غادة .. حتى بعد ما انقطع كلش بينهم مايزال كابوس لها ..
***
أول ماوصلت إبتسام البيت دق جوالها .. طالعت المتصل ردة بإبتسامة : هلا والله !
هيثم : كانك جحدتيني ؟ إلا اذا للساعة 1 وانتي ماتصرفتي
ابتسام : ههههههههههههههههه مطيور !! اصبر يخي تو رجعت منهم
هيثم : جد ؟ هاه كلمتيها ؟
إبتسام : لا ... ماقدرت انفرد فيها طول الوقت امها موجودة فتركت المهمة لغادة تكلمها
هيثم تغيرت نبرته : وغادة شدخلها !!! انا مكلمك انتي مو هي !
إبتسام : ايه بس مثل ماقلت لك ماقدرت انفرد بها .. وغادة معها على طول , وبعدين غادة اختك ! لمتى بتاخذ موقف ضدها يعني .. البنت تزوجت وكفتك شرها خلاص
هيثم ما اعجبه الكلام : إبتسام ! كم مرة بقولها ؟ غادة بالصفحة السوداء بحياتي .. يعني أي شي يخصني مالها علاقة فيه !
إبتسام : هيثم .. اذا الأمور تيسرت واسماء وافقت حط ببالك ان اسماء صديقة غادة يعني ماراح تقدر تتركها برا حياتك
هيثم : تصادقها شي وتتدخل شي ..
إبتسام : الله يعينك على نفسك اذا بتجلس حاقد على اختك كل هالعمر .. أبوي الله يرحمه أمنك عليها وانت تسوي كذا
هيثم : ابوي الله يرحمه ماحضر فعايلها .. ولا كان تبرى منها بنفسه !
إبتسام : عموما اعتبرها ماعرفت .. انا الغلطانة اللي قلت اصلن , وقت ترد راح اقولك
هيثم سكر السماعة دون رد .. بينما ابتسام هزت راسها بيأس
***
ميهـاف /
جو العشاء كئيب .. ابوها ساكت وأمها ساكته ..
نطق أبوها بحـدة : اليوم بعد بتنامين هنـا ؟
ميهاف حقدت على بدر وهالموقف اللي حطها فيه : أيـه .. بكرة ابي ازور الجمعية مع أمي
ابو نايف : وماتقدرين تزوريها من بيتك ! بدر بالبيت لحاله ليش ؟
ميهاف : .....................
تو بيتكلم دق جواله .. طالع المتصل وزفر ثم وقف وابعد عنهم يرد : ...............
ام نايف : ميهاف ! حلي هالمشكلة مع بدر قبل تصير مشكلة .. مو ناقصين حنا مشاكل
وقفت ميهاف : حمدالله ..
صعدت غرفتها وهي تفتح بجوالها تدور اسمه .. فكرت تدق لكن قررت تراسله بشكل مبدئي : .......
"أحبني لذاتي وليس للكحل الذي يمطر في العينين .
وليس للورد الذي يلون الخدين ..
وليس للشمع الذي يذوب من أصابع اليدين .
أحبني تلميذة تعلمت مبادئ الحب على يديك
أحبني إنسانة .. من حقها أن تصنع القرار "
انتبهت له يقرا رسالتها .. وعقبها تجاهلها دون رد , عضت على شفتها وهي تدق وتهز رجلها بقهر جاها رده : أيـه ميهاف ؟
ميهاف : ايه ميهاف ! اراسلك وتسفهني ؟!
بدر : مشغـول .. كنت برد عليك بعدين , تبين شي ضروري ؟
ميهاف : عن السخافة بدر ! ابي ارجع بيتي .. بتجي تاخذني ولا بجي مع السواق
بدر بسخرية : شالسالفة ؟ مالك يوم .؟ هذا بيت اهلك اللي عشتي فيه فوق 20 سنه .. تتركينه عشان كم شهر معي ؟ ولا البرنسيسة زهقت من بيت بابا ؟
ميهاف : ............ لا مازهقت بس لو كنت ابي اعيش هنا ماتزوجتك من أول ! واللحين ابي ارجع بيتي اغراضي ابيها
بدر : انا بـدبي .. تبين ترجعين روحي للسواق يرجعك
ميهاف : بدبي !! متى .؟
بدر : وصلت اليوم ظهر كم مقابلة وكم حفلة وراجع
ميهاف : وليش ماقلت لي ؟
بدر : لأنك شاورتيني بقرارك قبل تاخذين الوظيفة .. صح ؟
ميهاف : تدري كبريائك الحقير هذا يخليني احس ساعات انك تكرهني بجد بينما تقول انك تحبني !
بدر : البسمة بالبسمة ياقلبي .. والبادي أجمل
ميهاف : لا تتفلسف .. لو لي خاطر عندك كان أقل شي ماتركتني بهالشكل حتى اهلي حسو !
بدر : خاطـرك غالي بس أنا خاطري طاب
ميهاف : بالتوفيق بمقابلاتك وشغلك ! بس لاتجيني عقبها تعتب على اني جالسة أأمن مستقبلي !
بدر بحدة : ميهـــاف !! كملي مع أبوك وبيجي يوم افقد فيه قدرتي أني اكون حولك ! وصدقيني انتي جالسة تقربين هاليوم بيديك
ميهاف انقبض قلبها من كلامه : وش قصدك ؟!
بدر : قصدي واضح
ميهاف : انا مقتنعة ان فكرتي اللي مستحقرها اللحين بتقدسها بكره .. وبتشوف
بدر : كلمتي وحده انا ماعمري غيرتها
ميهاف : معنـاها انا كمان بيجي يوم اتعب فيه من كثر ما أقولك آسفة .. وراح أقولك مع السلامة بدلها !
بدر : لاتنضلين نفسك كثر ماتعتذرين ! راجعي نفسك شوفي كيف كنتي الشهر اللي راح كله مع ذلك كنت متسامح وساكت بس في عزة نفسي مستحيل اتسامح .. خلي ابوك ينفعك اللحين
ميهاف : سلام ..
سكرت السماعة وهي ترميها على طاولتها بقهر .. حضنت راسها بيديـنها وهي مو عارفه كيف وصلت لهالمرحلة ..
***
أبو نايف رجع بعد ماخلص مكالمته : وين ميهاف ؟!
ام نايف : خلصت وصعـدت تنام
أبو نايف رمى جواله بقهر : هذي نهى ! تقـول زواجها الشهر الجاي وتحتاج تستعد .. وتكلم نايف عشان يزيد مايرد عليها ! واللحين انا بلشت فيه لازم يجي يجلس عندي
أم نايف : مو مشكلة يجي مع فهود
أبو نايف : انا زين ما انطل فهود من وجهي اجيب يزيد بعد ! اسمعي بكرة تكلمين مرته دامه مايرد علينا تحضر هي وياه عندي بكرة .. لمتى انا بجلس ساكت ! بنت جالسة عندي وولد بايعني عشان وحده ماتسوى والثاني حاقرني مايرد!
ام نايف : روق اعصابك يا أبو نايف .. خلاص بكلمها ان شاء الله ومب صاير الا كل خير
***
ســارا /
صحـت بـدري وهي تلبس على السريع .. ضرب جرس الشقة ..راحت تفتح بسرعة : اخيرا اتيتي ..
المربية : زحمة الطريق اعذريني
سارا : ليست مشكلة .. الصغيرة نائمة الآن وكتبت لك التعليمات على ورقة .. لن اتأخر
المربية : رافقتك السلامة
سحبت شنطتها وهي تطـلع مسرعة .. هالأسبوع كان متعب ركضت للرياض عشان الخلع .. ورغم هشاشة مشاعرها بهاللحظة قدرت ترجع بسرعة وتنقل من بيت صوفي لشقتها الخاصة .. خلاص تبي تستقل بحياتها هي وبنتها .. ماتبي تقرب لأحد خصوصا جاكسون اللي زاد الحاحه بعد طلاقها ..اليوم وظيفتها الجديدة راح تستلمها .. وتبدا بداية جديدة من جميع النواحي .. في نص الطريق اتصل عليها " سامي المتعب " ردت مباشرة : اهلين استاذ
سامي المتعب : هلا فيك ... وصلتي للشركة ؟
سارا : لا اللحين بالطريق راح أوصل ..
سامي بانحراج : لا تتعبين نفسك .. انا اسف بس انتي مطرودة
انصدمت سارا : عفوا استاذ سامي بس حنا اتفقنا على كلش .. كيف فجأة كذا ؟
سامي : مو بيدي صدقيني .. راح اخسر السوق اذا سلمتك هالمنصب مقدر اهدم كل شغلي عشانك
سارا : كيف تخسر السوق صدقني ماراح اضر الشركة بأي حاجة !
سامي : شركة الشمري راح تسحب كل عملائها ودعمها .. فسامحيني حلي خلافاتك معهم ووقتها انا حاضر
سارا عضت على شفتها .. نطقت بقهر : فراس الشمري ؟
سامي : ماغيره ..هذا واحد حقير وماعنده قلب راح يسحب كل عملائي على وجيههم ..
سارا سكرت السماعة بقهر .. وهي توقف قدام الشركة .. هذي البداية الجديدة ؟ من أول خطوه خطرف رجليها ..
فتحت جوالها وهي تدق عليه .. جاها الرد الشامت وكانه يحتري : نعـــــم !؟
سارا : ينعـم بحالك ! انا مو سويت اللي تبون وانخلعت .. وش مصلحتك توقف بوجهي مرة ثانية ؟
فراس : ماعندي مصلحة غير اني اكره اشوفك بخير
سارا : بهالحقارة انت ؟
فراس : بهالحقارة أنتي ! سمعت أنك ماخذه مبلغ من عمي مقابل هالخدمة ؟
سارا : أبو لؤي هو اللي اصر عشان مايا !
فراس : مايا مين ؟ مايا ايش ؟ مايا والكر ... الله العالم انك حاطتها عذر عشان تاخذين قد ماتقدرين !
سارا : عذر ؟ فلنفترض انها عذر ... انت مايخصك هذي حياتي ..
فراس : حيـاتك عيشيها بعيد ! على بالك جيتي للرياض وخلصتي تجربتك العشوائية مع لؤي وبتروحين تعيشين بسلام؟
سارا : تجربة عشوائية .. محد خسران فيها غيري ! لؤي وش صار له ماخسر شي بيرجع يعيش حياته احسن من ماكان
فراس : سامي شركته تابعه لي ! ولا بخاطرك تعيدين سناريو لؤي معه ؟
سارا : حقارتك قد ايش بتوصل ؟
فراس : ماوصلك شي مني للحين .. سامي منكب على وجهه وقت عطاك الوظيفة ! ولا بحالة ثانية البصمة السوداء اللي حطيتها بملفك محد راح يقبلها
سارا : تسوي كل هذا عشان لؤي ؟ ومافكرت وش بيصير لمايا من ورا اللي تسويه اللحين ؟
فراس : صدقيني ماتستعطفيني نهائي وقت تجيبين طاري مايا ! ما أدري يمكن لأنها باسمك ؟ عموما لؤي ماراح تخلعينه وتروحين تعيشين حياتك مثل ماتبين ...بس اذا على وظيفتك ؟ انا مالي سلطة على المطاعم ارجعي اشتغلي فيها زي أول
سارا شدت على قبضتها بقهر : .......................................
فراس سكر السماعة مباشرة .. وكل تفسيره للموقف انه مايحق لها تعيش حياتها ولؤي منرمي بجرح مو عارف يوقف بسببه ..
***
بـــدر /
اثناء استرخائـه وراء الكواليس .. ينتظر الكاميرات تجهـز والسماعات باذنه ومسترخي براسه ومغمض عيونه في فترة استرخاء ... فجاة أنتبه للسماعات تنسحب من اذنه .. فتح عيونه وهو ينتبه للشابه طويلة القامة باناقتها الواضحة .. ومبتسمة والسماعات بيدها : نـــجلا ؟
نطقت بغجرها المعتاد : جذي ياجاسي ؟ مافيها ألو نجولتي انا هنا
بدر رفع حواجبه : وش جابك ؟
نجلا جلست وهي تحط رجل على رجل : مو أنا اللي شجابني ؟ إنتا اللي باغيني .. مو ؟
بدر رجع سماعاته باذنه : لي مرتين اجي ما أكلمك ..
نجلاء : وااااي تزعلني منك جذي .. عموما انا بالفندق اللي مقابل موقع التصوير نقدر نتفاهم الليلة ؟
بدر : لو مو انتي منهوسه فيني بصدق انك ماتدرين ! انا تزوجت يعني دورك خلص ياماما
نجلاء : شدعـوة ؟ مو ضروري تعرف
بدر : يب مو ضروري .. يكفيني انا اعرف ! انسيني نجلا خلاص اللي بينا كان نزوة وخلصت
نجلا رفعت حواجبها : اوك فهـمت
بدر وقف وهو يرمي المنشفة بكتوفه على الكرسي : كويــس
ودخـل قدام الكاميرات .. نجلاء زفرت بقهر : سخيف !
تو بتوقف انتبهت لجـواله يدق .. طالعت المتصل " قمــري " وصورة المتصل يدين بدبلات متشابكه ببعض .. اكيد هي رفعت حواجبها وهي ترد بغنج : هــلا والله
ميهاف انلخمت : الو ؟!
نجلا : بـــدوري ؟! بدوري نايم ... اصحيه لك ؟
ميهاف : وأنتي مين ؟!
نجلا : إنتي اللي مين ؟ انا عشيقته وحبيبته نجلا
ميهاف : ...... قدره زباله زيك ! " وسكرت السماعة"
ابتسمت نجلاء برضا وهي تسكر السماعة .. وتوقف وترجع الجوال لمكانه وتطلع : هدية آخيره لك حبيبي
***
إبتسام بعد ماسكرت السماعة من أم نايف زفرت بضيق .. نايف اللي كان يتغدى : شفيك ؟
ابتسام تنهدت : مافيه شي .. هذي امك عازمتنا عندها اليوم
نايف : طيب ليش تزفرين ؟ كان قلتي لا وبس
ابتسام فتحت عيونها بدهشه : وش هالوقاحة ؟ تبيني اقول لامك لا !!
نايف : مو وقاحة .. حرام ترفضين الدعوة يعني ؟
إبتسام : عندي انا ! ايه عيب ! وبنروح عصر ان شاء الله
نايف هز كتوفه : اللي يريحك .. مابقى شي على العصر قومي اجهزي عشان نروح بدري
هزت ابتسام راسها : ثواني اخلص غداي
نايف : ايه ابتسام انتي امس كان تبغين تقولين لي شي وقلت لك بعدين ؟!
ابتسام طالعته بنص عين : كان سمعتني بوقتها .. خلاص ماحقولك اللحين
نايف : كنت مشغول !
إبتسام : واللحين انا مشغولة بروح اجهز
وصعدت مباشرة ..
***
أسمـــاء /
مانامت الليل كله .. واللحين العصر وهي للحين بتفكير !! تحس باي لحظة بتصعد لغادة تتاكد من كلامها ... يعني اللي جالس يصير صعـــب يصدق ... كانت بحالة هلع تروح وتجي .. رفضت تتغدا رفضت كلش قبل تعرف وش جالس يصير ؟ عضت على شفتها ..... طيب ليش كل هالتفكير ؟ لو اوافق وبس .. ومايهم وقتها هو وش يحس .. ؟ لا كيف مايهم ! تنهدت بضيق : ...................
اقتحمت امها غرفتها فجأة : وينك انتي تعالي تخيلي وش صاير !
اسماء جلست وهي تسأل بشرود : شصاير ؟
ام فراس : تو ام نايف كلمتني ! تقول بدر تارك ميهاف عندهم .. وزعلان عشان وظيفتها ! وتبيني احل السالفة قبل يدري ابو نايف .... انا كيف اتفاهم مع بدر اللحين !!
اسماء هزت راسها : ايه
ام فراس : اقولك كيف تقولين لي ايه !
اسماء بانزعاج : يوه ماما شعلاقتي انا .. انتي امه مو انا
ام فراس تنهدت بضيق : الظاهر بعطي فراس السالفة ويتصرف .. مع انه ياعمري هاليومين مايفضى يحك راسه
اسماء : انتي كلمي بدر اعرفي السالفة اول ترا ميهاف احيان مهوله !
ام فراس : لا حرام عليك .. ما أصدق الغلطة تطلع من ميهاف اكيد هو اللي غاثها ولا البنت وش بيدها مسكينه
اسماء تنهدت : اوكيه
ام فراس : فيك شي انتي ؟ مانزلتي تفطرين ولا تتغدين ؟ واحسك مكئبه ؟
اسماء : هاه ؟ لا مافيني شي ... بس متوعكة شوي
ام فراس : طيب خذي لك حبوب شي
اسماء : ان شاء الله
ام فراس : يله انا بروح أكلم بدر اشوفه .. وانتي مغرب انزلي تقهوي معنا
***
بيت أبو نايف /
استقبلتهـم أم نايف : هلا والله مرحبا ومسهـلا
إبتسام : هلا فيك
ام نايف طالعت نايف بعتب : هلا بالخايب ..
نايف ابتسم : هلا فيــــك .. فين فهود ؟
ام نايف : فهــود راح مع ميهاف للجمعية .. اجلسوا ارتاحوا ابوك فوق شوي وينزل
جلس نايف وهو يهمس لإبتسام : قايل لك ماعزموك الا براسهم شي .. وعارفين لو يعزموني برفض
ابتسام : معناها كويس كلموني خل نخلص من هالسالفة .. ونايف رجاء خلك محترم هذا ابوك مهما كان !
نايف : ماعمري قللت احترامه !
ابتسام : ايه واضح
: السلام عليكم
سلمو عليه .. ثم جلس ابو نايف وهو ينقل بصره بينهم .. نطقت ابتسام : كيف صحتك عمي ؟
ابو نايف : حمد الله ! " طالع نايف بحدة " ليش ماقلت لي ان نهى بتتزوج !
نايف ابتسم بسخرية : بتتزوج ؟
ابو نايف : بدري عليك .. ماتدري يعني !
نايف : قالت لي من زمان .. نسيت السالفة ع بالي تكنسلت
ابو نايف : راح تتزوج .. واكيد يزيد ماتقدر تاخذه
نايف : ايوه وبعدين ؟!
ابو نايف : هنا دورك ! انت ابوه خــّذه عندك .. البنت ماقصرت شالت مسؤوليته من تطلقتوا للحين
نايف همس : الله اكبر يالمسؤولية ! " عدل صوته " ايه وانا ايش خصني ؟ مقدر اخذه طريقتي ماتعجبكم
ابو نايف : ماراح اتدخل بقراراتك معه عقب اليوم .. تقدر تاخذه ؟
نايف : ماتدخل ماديا ولا معنويا ولا شي .. حتى اذا رجع لنهى !!
ابو نايف : مالقيت خير من اني اتدخل بينكم تصطفلون انت وولدك !
نايف : خلاص اذا كذا مب مشكلة .. راح اخذه , متى ؟
ابو نايف : رد على اتصالاتها وبتقولك !
ام نايف : إبتسام ادري انه صعب تشيلين مسؤولية ولد مب ولدك .. حاسه فيك والله بس انتي اعقل من كذا
إبتسام ابتسمت بمجامل : لو انتي تحسين فيني ماحكيتي فيني ! انتي اللي فسرتي من نفسك اني ما أبي اشيل مسؤوليته وانا اللي مغيرته على نايف ... بينما الموضوع العكس تماما !
ام نايف : انتي الله يهداك ماتحكين .. لا تفترضين احد بيفهمك اذا ماتكلمتي
إبتسام : على نيتي اتكلم وعلى نيتك تفسرين .. عموما ! " كملت بقوة " راح ناخذ يزيد بس اتمنى مايطلع كلام زي آخر مرة .. لأنه بحاله ثانية انا مو ملزومة فيه
ابو نايف قطع النقاش : كذا اتفقنا أجل !
نايف برواقة : معناها وين القهـوة اجل ..؟! جاي تعاتبوني وبس .؟
ام نايف : عيارتك انت .. القهوة بتجي واللي تبي انت بس خل منك هالطبع الشين !
***
اســماء /
اذان المغرب عزمت انها تروح تقابله ! براسها اسأله كثيره .. وماراح تقدر ترد عليها بنفسها .. لبست عبايتها وتجهزت وهي تنزل مسرعة ..
ام فراس : وين وين ؟
اسماء : المكتبه ماما بخلص كم بحث وبجي ... سي يو
ركبت مع السايق وكلها رهبة وهي تنطق له : مدينة الملك فهد الطبية
ماتدري ليش لأول مرة توصل بسرعة للمكان .. يمكن لانها عايشه طول الطريق توتر انها ترتب افكارها : ....
دخلت المستشفى وهي تمشي بربكة تحاول تعرف وينــه .. بعد فترة بحث انتبهت له جالس بالكفتريا لحاله .. استجمعت قوتها ومشت ناحيته حتى وقفت : ................... احم .
رفع هيثم عيـونه .. بدهشه لما شافها قدامه ماتوقع يقابلها نهائي : ....... اسماء ؟!!
اسماء بلعت ريقها : ايه ..
رجعت تعابيره للطبيعي وهو يوقف ويمسح فمه .. : تعـالي ..
اسماء شدت على قبضتها وهي تمشي وراه لحد ماوصلوا لحديقة المستشفى العامة .. كانت هادية بهالوقت ماعدا من كم مريض يشمون هواء .. وقف وهو يلتفت لها : ماتوقعتك تجين .
اسماء استنشقت هواء بعمق ثم نطقت بانكسار : أمس .. امس وصلني كلام .. صدق ؟
هيثم شاح بوجهه يطالع المكان ويده ورا رقبته : صدق ..
اسماء شدت على قبضتها حتى غرست اظفرها : ليش ماتركتني ؟ اخر مرة بالمزرعة ماتأثرت حتى .. ولا انزعجت ورميتني ببساطة .. ليش اللحين ؟
هيثم طالعها ثم نطق بهدوء : قلت لك ان كلام أمس صدق .. فهمتي اللحين ؟ معناها وقفي هالأسئلة
اسماء ظلت تطالعه لفترة ثم نطقت بقوة ودموعها تجمعت بمحاجرها : لا مافهمت ! لحد اللحين كل اللي وصلني منك برود ونظرات ناقده .. على بالك خلاص حليت المشكلة بس كذا ! اكتفيت من كل هذا خلاص .. تكلم بوضــوح انا ماعاد افهم
فتح هيثم عيونه بربكة نطق بتصلب : قلت لك من قبل اني ما أمانع ازعاجك !
أسماء باصرار : وعقبها بيومين قلت انك ندمت على هالكلمة !
هيثم تنهد بضيق من اصرارها : باختصار انتي مو حاجة اقتل فيها وقتي مثل ما قلت لك من قبل ..
اسماء رفعت حواجبها : بعبارة اخرى ؟
هيثم ظل يطالعها بقهر .. لكنها كانت تطالعه بقوه هالمرة هي مصرة ماتطلع الا بحاجة واضحة وأكيده : ...
بعد حرب النظرات استسلم وهو ينطق : ... كل اللي قلته هذا هو اللي يعتبر بالقاموس إعجاب ؟ اعتقد .. ولا له معنى ثاني ؟
اسماء انفجر قلبها لحظها .. نزلت دموعها لاشعوريا .. هيثم ارتبك من دموعها : !!!
اسماء وهي تمسح دموعها بكمها وماوقفت دموعها وصارت تنهج : لاااا .. انا اللي احبك !! " جلست القرفصاء وهي تبكي بصوت واضح " اشتقـــت لك كنت بموت لو ... لو.. " تشهق " كأني في معجزة .. مو مصدقة والله ..
هيثم انهشم على هيئتها ..جلس القرفصاء قدامها وهو ينطق بجاذبيه : ماعطيتيني ردك ؟!
اسماء رفعت راسها ووضحت له عيونها الزرقاء المعباه بالدموع : أبعد !!
هيثم : شنو ؟
اسماء : مواااافقة .. موافقة بس ابعد من قدامي ولا راح اضمك و .. " الدموع شلالات "
هيثم ابتسم بنعومة .. ونطق داخل نفسه .. " خسرت .. كيف مالاحظت اني احبها هالقد ؟ " : .........
اسماء وهي تحاول تسيطر على نفسها .. : هيــثم ...
هيثم بابتسامة ناعسه : هممممم ؟
اسماء بلعت ريقها وهي ترمش : انا .. انا ...
قاطعها هيثم : خلاص اسماء .. امسحي دموعك .. ارجعي لبيتكم عطي خواتي رد .. وخلينا نبدا صح
اسماء ابتسمت بين دموعها : ان شاء الله !
هيثم بابتسامة جذابه : المرة الجاية اللي اشوفك فيها .. راح تكونين حلالي
اسماء كبست بعيونها وهي تحس بيغمى عليها .. هذا هو حلمها ؟ بابتسامته الجذابه .. رجولته المفرطة .. صوته الهادي .. وكلامه ؟! : ..................... " وقفت تستعد تروح وكانها توافق على كلامه "
وقف هيثم وهو يدخل يدينه بجيب بالطوه ويراقبها تروح .. وقفت بنص الطريق والتفتت .. كان تبي تسأله عن كلام غادة وليش قالت كذا ! بس كانت اللحظة خياليه .. لدرجة ماقدرت .. هز براسه كانه يحثها تروح ... طلعت من الحديقة ومن المستشفى .. وهي تركب السيارة ..
أول ماوصلت البيت .. ركضت مباشرة للدور الثالث وهي تعلق بالجرس .. : مين !!
اسماء : افتححححححححححححي !!!
فتحت غادة .. اسماء نطقت على طول : انا موافقة ! قولي لابتسام وتعالوا اخطبوني رسمي
غادة رمشت بعينها : شنو ؟!
اسماء وهي تنطط من الوناسة : اللي سمعععتي !!
غادة حست باحباط من موافقتها .. بس حطت امل ان هيثم اكيد راح يكون معها غير : .....ههههههههههههه ان شاء الله
نزلت اسماء تركض وهي تدخل غرفتها وتنطط على السرير .. وتتبرعص بالارض وتضحك بكل قوتها ... تحسب قلبها بيوقف من فرط السعـادة ...

عزيزتى متمللة من اعجابى بروايتك أعدت قراءتها مرة اخرى و هى لم تنتهى بعد كأنى أعيش فى مسلسل و لا أرجو له الانتهاء روايتك كلها حيوية و شخصياتها جذابة و أنا سعيدة بها أعجبتنى الرواية صدقا مثلما أعجبتنى رواية أخرى بالمنتدى و قرأتها مرتين ألا وهى رواية " اهدتنى قلبا" لسامراء النيل أنصحك بقراءتها لتستمتعى و موفقة دائما مع مزيد من التميز و الابداع

وما زلنا مع روايتك الجميلة
عزيزتي متمللة .. عندي استفسار
ما قدرت افهم سبب تصرف فراس مع سارة
لؤي ما كان حيرضى انه يطلقها رغم رفض اهله لها.. كان اسلم حل الخلع
والان اصبح لؤي حر باتخاذ ما يراه مناسبا.. ولتستطيع ان تبدأ حياتها من جديد
ليش فراس حرمها من الوظيفة اللي موعودة فيها .. تسلط، تجبر، ظلم..
هي تركتهم بخيرهم وشرهم وحتبدأ حياتها بعيد عنهم ( حسب طلبهم) ، ليش الظلم ؟؟