لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > قصص من وحي قلم الاعضاء > القصص المكتمله من وحي قلم الاعضاء
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله من وحي قلم الاعضاء القصص المكتمله من وحي قلم الاعضاء


انتماءات كاذبة

السلام عليكم ورحمة الله وبركاته بداية أحب اعلن وجودي في هذا المنتدى السامي الذي طالما راقبته ك زائرة منذ سنين وأعجبت بالعديد من الأعمال فيه لطالما هويت الكتابة

مشاهدة نتائج الإستطلاع: افضل شخصية برأيك ؟!
نايف 8 23.53%
فراس 16 47.06%
هيثم 2 5.88%
لؤي 3 8.82%
بدر 0 0%
ابتسام 10 29.41%
سارا 0 0%
ميهاف 3 8.82%
اسماء 4 11.76%
غادة 7 20.59%
إستطلاع متعدد الإختيارات. المصوتون: 34. أنت لم تصوت في هذا الإستطلاع

إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 18-11-16, 04:44 PM   المشاركة رقم: 1
المعلومات
الكاتب:
اللقب:

البيانات
التسجيل: Nov 2016
العضوية: 321971
المشاركات: 260
الجنس أنثى
معدل التقييم: متمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداع
نقاط التقييم: 497

االدولة
البلدSaudiArabia
 
مدونتي

 

الإتصالات
الحالة:
متمللة غير متواجد حالياً
وسائل الإتصال:

المنتدى : القصص المكتمله من وحي قلم الاعضاء
Icon Mod 44 انتماءات كاذبة

 

السلام عليكم ورحمة الله وبركاته
بداية أحب اعلن وجودي في هذا المنتدى السامي الذي طالما راقبته ك زائرة منذ سنين وأعجبت بالعديد من الأعمال فيه
لطالما هويت الكتابة وثقتي عالية على قدرة عقلي على نسج الأحداث
كتبت العديد ... والعديد والعديد من الروايات التي احتفظت بها في سجل خاص دون مشاركته مع الكثيرين بسبب ترددي من نشر افكاري
قال الخليفة أبو جعفر المنصور /
( إذا كنت ذا رأي فكن ذا عزيمة فإن فساد الرأي أن تترددا )
لذلك قررت التوقف عن نسج الفكرة بعقلي دون تطبيقها .. وسأشارك العقول المتمرسة في هذا المجـال
أعتذر عن أي خطأ قد يبدر مني مسبقا وعادة الإنسان الخطأ .. وأشكر اي نقد او تعليق مسبق بصدر رحب
بقدر شوقي لاستمتاعكم بما سأطرح فإن شوقي أكبر لتطوري بمساعدتكم
انا شخص نظامي بطبعه .. فأحب إعلان مواعيد نـزول منتظمة
ساطرح بشكل اسبوعي تشابتر كل يوم إثنين بإذن الله دون تأخير

" مقدمة "
عندما نحب , نرى الدنيا كألوان طيف , وببداية كل يوم نعد انفسنا ان نجعل من نحب سعداء , لأننا بسعادتهم نصبح أسعد . وبحزنهم ؟! نشعر وكأننا على حدود البكاء

برأيي كلمة ال " حب " كلمة واسعة المدى
حب العائلة
حب الخليل
حب الإبن
حب الوالدين
حب الذات
حب العمل
حب الكمال
حب المجوهرات
ولايوجد حدود لما قد تحتويه هذه الكلمة ..
حتى انه من الممكن التعبير عنها بشكل سلبي .. " حب ايذاء الآخرين " على سبيل المثال
في كتابتي هذه لن أتوج بطل وبطلة لهذه الحقبة ... فالجميع على المسرح

لكل شخص في هذا الكون نصف آخر .. ربما امامك . . ربما خلف المحيطات .. اغلبنا يبحث عنه .. والغالبية الأخرى تنتظره ليجدها .. والبعض لايعير هذا المفهوم اهتمام ... وربما يحالفنا الحظ بمقابلته وبعد حين نكتشف أنه " إنتماء كاذب " وربما نعتقده " إنتماء كاذب " وهو ليس بكاذب ..

ماذا يعني أن تحب شخص لحد الجنون ؟ ماذا يعني أن يكون عالمك بأكمله ..ماذا تعني المسؤولية ؟ العاطفة ؟ الحب ؟ العشق ؟ الوفاء ؟ الخيانة ؟ البهجة ؟ ماذ يعني تقديس هذه المشاعر برباط مقدس اسمه " الزواج " ؟!

فلنبدأ على بركة الله .. " بسم الله " اللهم اني اسالك من خيرها وخير ماجاءت به

طريقة التواصل BBM :D9D7812D


الفصل الاول
في نفس الصفحه
الفصل الثاني
الفصل الثالث
الفصل الرابع
الفصل الخامس
الفصل السادس
الفصل السابع
الفصلين الثامن و التاسع
الفصل العاشر
الفصل الحادي عشر
الفصل الثاني عشر
الفصل الثالث عشر
الفصل الرابع عشر
الفصل الخامس عشر
الفصل السادس عشر
الفصل السابع عشر
الفصل الثامن عشر
الفصل التاسع عشر
الفصلين العشرون و الحادي و العشرون
الفصل الثاني و العشرون
الفصل الثالث و العشرون
الفصل الرابع و العشرون
الفصل الخامس و العشرون
الفصل السادس و العشرون
الفصل السابع والعشرون
الفصل الثامن و العشرون
الفصلين التاسع و العشرون و الثلاثون
الفصلين الواحد و الثاني و الثلاثون
الفصل الثالث و الثلاثون
الفصل الرابع و الثلاثون
الفصل الخامس و الثلاثون
الفصل السادس و الثلاثون
الفصل السابع و الثلاثون
الفصل الثامن و الثلاثون
الفصلين التاسع و الثلاثون و الاربعون
الفصل الحادي و الاربعين
الفصلين الثاني و الثالث الأربعون
الفصلين الرابع و الخامس و الأربعون
الفصل السادس و الاربعون
الفصل السابع و الاربعون
الفصل الثامن و الأربعون
الفصل التاسع و الأربعون
الفصل الخمسون
الفصل الحادي و الخمسون
الفصل الثاني و الخمسون
الفصل الثالث و الخمسون
الفصل الرابع و الخمسون

 
 

 

عرض البوم صور متمللة   رد مع اقتباس

قديم 18-11-16, 04:46 PM   المشاركة رقم: 2
المعلومات
الكاتب:
اللقب:

البيانات
التسجيل: Nov 2016
العضوية: 321971
المشاركات: 260
الجنس أنثى
معدل التقييم: متمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداع
نقاط التقييم: 497

االدولة
البلدSaudiArabia
 
مدونتي

 

الإتصالات
الحالة:
متمللة غير متواجد حالياً
وسائل الإتصال:

كاتب الموضوع : متمللة المنتدى : القصص المكتمله من وحي قلم الاعضاء
افتراضي رد: انتماءات كاذبة

 

" البآرت الأول "
جالس باريحيه بكرسيه الجلد على المكتب العودي وسط غرفة المدير الفخم بأعلى البناية هذا الفرع الرئيسي لمجموعة كبيره هو رئيسها ..وبيده السماعه وبيده الثانيه مجلة غلافها شخص حوى لمحة وسامة العروبة والبداوة الاصيلة بالثوب الكركمي والعمامة المعصوبة على راسه وصقر واقف بشموخه على يده .. ملامح مشتقه من ملامحه لكن روح الشباب ورونقه بارزة بالشخص بالمجلة أكثر ونطق بصوتـه الهادي الثقيل : ايوه شفته هذي المجلة قدامي
لؤي : ههههههههه عاد اخوك هذا دون شي شايف نفسه كيف اللحين ؟
فراس وهو يشخط بالقلم على الوجه بالمجله : يتسنع ماعليك .. ماقلت لي متى طيارتك ؟
لؤي : الساعه 8 .. ماراح تقدر تجي اليوم ؟
فراس : لا بكره بتوصل دفعة موظفين جدد ولازم أنا اشرف .. ليش تبي شي ؟
لؤي :لا بس الوالد مسوي عزيمة بمناسبة وصولي وانا اكره هالتجمعات ....مطول انت بالكويت ؟
فراس : اسبوع بالكثير.. ( صوت جواله يرن ) يله لؤي انا بسكر عندي مكالمه اذا وصلت عطني خبر
سكر تلفون المكتب ورد على جواله وابتسامه نادره انرسمت على وجهه : هلا
أم فراس : هلا يمه شخبارك ؟
فراس : حمد الله .. انتو شخباركم ؟
أم فراس : طيبين بس ما كأنك طولت هالمره ؟
فراس وهو يفرك عيونه بتعب : ايه هالمره الشغل متراكم ويمكن اطول زياده
أم فراس : الله يعينك ويوفقك
فراس بصوت عذب : وانا مابغى غير هالكلمتين ... تامريني على شي يالغالية ؟
ام فراس : سلامتك
سكر فراس الجوال وسحب شماغه من الكنبه ورماه على كتفه ومن المصعد للدور الأرضي والكل يسلم عليه وهو يمشي ويتفحص ملامحه اذا راضي او لا .. له شهر من جا هنا وطرد نص الموظفين وماشافو للحين طيف ابتسامه على وجهه وقف عند طاولة مصعب : مصعب انا طالع اللحين .. بكره ابي كلش جاهز للتقديم الجديد وسجلات المتقدمين ارسلها لي ايميل
مصعب : حاضر طال عمرك
****
اركان غرفتها انيقه ببساطة .. بساطة غريبة على فخامة البيت اللي يحتويه لكن عكس البساطة غرفة ملابسها اللي أكبر من غرفة نومها .. مد نظرك بالمكان تشوف ديور .. شانيل ..كينزو ..قوتشي ..لويس فتون هذا التناقض بين غرفة نومها وملابسها دلالة ان شكلها وطلتها أهم عندها من راحتها ونومها حتى بجامتها الحرير ماركه اثناء ماهي تتنقل بين اركان خزاينها وتسحب مرشحات طق باب الغرفة طق وحده ثم اقتحمت : وانا نفسي يوم أدخل ما أحصلك قدام هالدولاب
قالت بزعل مبوزه : مااماا بطلع السوق ماعندي بدله لمناسبة اليوم
أم فراس : تو طلعتي امس ماقصرتي بعدين مابقى شي خلاص مايمديك تروحين
اسماء : على طاري السوق .. ادري انك ماتحبين بس أمس شريت لك هيلز طلبتك تلبسينها اليوم
أم فراس شهقت : عشتو عقب كل هالعمر اطامر بالكعوب .. خلي مني الهبال انا بروح البس اللحين
اسماء : هههههههههه شفينا أم فراس ؟ والله توك شباب
أم فراس : وين شباب وعيالي خاطه شواربهم .. المهم يله عجلي مانبي نتأخر
رجعت اسماء تطالع بالبلوزة والفستان اللي طلعتها بالغالب يفوز الفستان لكن هالمره رشحت البلوزة لأنها جمعه عائليه بلوزة عنابي طافي بأكمام طويله وتنورة لنص الفخذ سوداء وهيلز سوداء طلة بسيطة وأنيقة شعرها الأسود الطويل لنص ظهرها نعمته وفتحته على كتفها ومكياج رسمته بأناقه وتمرس نزلت من الدرج اللولبي المذهب وجلست بالصالة ..كان أنس موجود بثوبه وغترته متكشخ ابتسمت له : الله الله صاير رجال ماعرفتك
أنس مبسوط انها مدحته : احم احم ماعليك قصور
اسماء ماتت ضحك يقلد ردود اخوانه حتى طريقته بالغتره نسخه من فراس : ههههههههههههههههههه ادعس
أنس المراهق (11 سنه ) ما أعجبه ضحكها : خير ماقلنا نكته ؟
اسماء : هههههههههههههه سلامتك انت بكبرك نكته
أنس : اقول اسوم احترمي نفسك
اسماء : هههههههههههه خفتنا والله
نزلت أم فراس : هاه يمه أنس قلت للسواق يجهز ؟
أنس : ايه يم يحترينا برا
أم فراس : ياسمين عاد وينها ؟
اسماء : هالبنت لازم تأخرنا يعني
نزلت ياسمين ( 10 سنين ) تركض : خلصت خلصت
ام فراس : يله البسن عباياتكن تأخرنا على الجماعة
***
أم نايف مجتهده بالتجهيزات لعودة لؤي عقب غياب 4 شهور عمل .. وعازمه الجيران والعائلة ومعارفها بالمجلس الفخم : أم نايف وينها أم فراس مب جايه ؟
أم نايف : لا شلون ماتجي بتجي أكيد بس شوي
ووسط كلام الحريم وسوالفهم دخلت انثى ذات طله مثيره أنيقه فاتنه مغريه .. نص الحريم دون مبالغه جايات خصوصا عشان يشوفونها ويخططون عليها والخطاطيب واجد ابتسمت ام نايف بفخر من بنتها اللي خذت عقول الموجودين وجلست تسمي عليها وتعوذها .. زيادة على جمالها الصارخ سلامها الذرب وطريقتها بالترحيب بعد ماخلصت سلام جلست جمب امها .. أم حسام : شخبارك ياميهاف طيبه ؟
ميهاف وابتسامتها مافارقتها ومبينه فص الالماس بسنها : حمد الله خالتي .. وينها بنتك رفيف ليش ماجبتيها ؟
أم حسام : نسيتي انها بشهر العسل
ميهاف : هههههههه ع بالي رجعت الله يسعدها
أم حسام : آمين وعقبالك
دخلت أم فراس وميهاف أول ماشافتها قامت سلمت عليها : وين اسوم ؟
ام فراس : متشبقه بالمرايه برا
طلعت لها ميهاف وضمتها وهي تسلم عليها : تأخرتو .. كان ماجيتو احسن
اسماء وهي ترتب شعرها وتتعطر : والله انا جاهزه من أول امي اللي تأخرت
ميهاف : يله دام جيتي بنطلع حنا البنات للحديقة
اسماء : مين البنات ؟
ميهاف : مافيه الا بنات عمتنا
اسماء كشرت : افففف وش جايبهن ؟
ميهاف : حرام عليك .. وبعدين وش ودك نطلع ونتركهن لحالهن يعني ؟
اسماء : آيه عادي والله بيغثني
ميهاف : أقول ادخلي سلمي بس
دخلت اسماء وسلمت على الموجودات .. وطلعن وميهاف نادت بنات عمتهن ( سجى – وداد ) وجلسو بالحديقة مع انوارها الهادية الذهبية : خذو راحتكم بنات محد فيه
سجى جلست بثقه وقال برجاجتها : يوووه اسسوم اخوك صوره بكل مكان بالمجلات
وداد : ههههههههههه لا ومقابلات
اسماء : بعد عمري famous
ميهاف : عاد تصدقين انا لما شفته ماعرفته .. مدري حسيته متغير
اسماء : هههههههههههه الكاميرات تغير ياعمري لا وتخيلي جايه عرض يصور مع حريم
وداد شهقت باستنكار : وبيوافق ؟
اسماء : طبعا بيوافق من متى بدر يمنع نفسه من متعته ؟.. مسكينه امي بيوقف قلبها
ميهاف : اتوقع هو متعامل مع البنات في كلا الحالتين .. فايش فرقت ؟
سجى مصدومه : من جدك .. وضعيات التصوير يجي فيها حركات مالها داعي
ميهاف هزت راسها : صح يمكن
وداد : هو بالرياض ؟
اسماء بضيق من كثرة الاسئله عنه : لا بدبي .. بس بينزل الرياض قريب اساسا رايح عشان يصور بس
سجى بهيام : بس للأماااانه يييجججنن
اسماء بقهر : هييييه اعقلي !
سجى استحت : وش قلت ؟
اسماء : شوي وتسيحين .. بسم الله عليه من العين بس
سجى : لاتخافين مانيب حاسده اخوك من زينه
اسماء : ممو بإيدك والله تو بغيتي تسيحين زبده قدامي وانتي تحكين عنه !
ميهاف : سجى اسماء اعقلو شهذا ؟
اسماء انتبهت على نفسها : انا بقوم اجيب لي موية
ميهاف : ارتاحي بجيب لك انا
اسماء : لا لا بقوم اشوف جوالي مره وحده
ميهاف جلست : براحتك
***
دخل لؤي البيت بعد ماوصل .. انزعج وهو يشوف كل هالضيوف هم قالو له عزيمة مختصره وكانت فعلا مختصره لكن هو يكره هالمناسبات ..سلم على الكل وخذا له كرسي التفت لنايف اللي عيونه مصوبه على أبوه وزوج عمته و شريكهم بالعمل : نايف
نايف مره مركزه قاط اذنه عندهم .. لؤي هزه : ناايففف
نايف : هلا
لؤي : شوي وتاكل ابوي بعيونك شفيك ؟
نايف كشر : ماني متطمن لهالجمعه الثلاثيه ..قلبي قارصني
لؤي : وليه ؟
نايف : ماتعرف ابوك يعني حاطني فديه .. كل مابغى يسوي شراكه مع واحد نطلني على بنته
لؤي : ههههههههههههههه .. بيزوجونك يعني ؟
نايف رفع حاجبه : والله يسوونها
لؤي : ادع بس تكون بنت عمتك سجى حلوه
نايف : لا سجى ولا ربى ولا غيرهم
لؤي : ههههههههه الله يعينك
نايف : وليش لحالي لاتكون مو ولده ؟
دق جوال نايف بنغمه صاخبه نبهت الكل عليه طلع جواله وهو يبتسم لاسم المتصل على الشاشه رد بهمس : هلا حبيبتي
هز لؤي راسه وهو يسمعه طلع من المجلس وصعد من الباب الخلفي لغرفته والنوم ماكله بس لازم ينزل لين يخلصون المعازيم .. توجه لنافذة غرفته الكبيره ابتسم وهو يشوف جلسة البنات تحت وسجى واقفه وتسولف وتضحك بشده ووداد تبتسم .. وميهاف تضحك وهي تشر لسجى واسماء ماسكه بطنها من شدة الضحك : سجى للحين مهرجه ماتغيرت .. حمد الله والشكر
***
الكويـت – 7 مساءا :-
جالس على اللابتوب بكوفي رايق بنص مول ومشى على ملفات المتقدمين بسرعه وراجع اجتماعات بكره بعد ساعتين متواصله على الشغل .. مسك قفا رقبته بتوتر انتبه لهمس حوله : بالله مو جنه بدر آلشمري ؟
: لا من عقلج ؟ بدووري أحلى فديته ماشفتي آخر صوره نزلها وهو بالبدلة الرسمية
استحقرهن فراس .. سطحيات من جد حط لابه بشنطته الصغيره ووقف عند المحاسبه وعطاها بطاقته : معليش أخوي بطاقتك غير مفعله
فراس عقد حواجبه : كيف مو مفعله ؟
ابتسمت بتوتر وهي تحاول مره ثانيه : اسفه بس من جد بطاقتك مو مفعله
فراس سحب البطاقة وعطاها بطاقة ثانيه : جربي هذي
توترت من هالزبون من طريقة سحبه للبطاقه ورمي البطاقه عليها : هذي كمان فاسده مو فعاله
فراس : والله انتي الفاسده .. كيف مو فعاله انا تو محاسب بها
رفعت حواجبها وتكتفت : ياليت تحترم نفسك هذا اولا .. وانا ماغشيتك بطاقتك خربانه وهذي مشكلتك تعامل معها وبعدين الطابور وراك واقف
فراس بحده : ياليت تحسنين اسلوبك لافنشك من هنا
التفت النادل لهم : شصاير .. معليش حظرة الزبون شمضايقك ؟
فراس باشمئزاز : خدمتكم خايسه كيف اقدم شكوى ضدكم ؟
النادل : طول بالك عشان نحل المشكلة
النادلة خفضت صوتها عشان ماتصير شكوى : حسابك مو كثير تقدر تدفعه كاش
فراس كان معه كاش بس السالفه صارت عناد : مامعي كاش
النادل يبي يتحاشى المشكلة: خلاص نوصي معك احد عملائنا لحد البنك واسحب وادفع ونقفل المشكلة
فراس طالعها باحتقار : تفضلي
نزعت المريول الكوفي اللي كان لابسته ومشت بخطوات سريعه قدامه لحد ماوقفت عند صرافه بوسط السوق .. فراس باستفزاز : بطاقاتي فاسده كيف بصرف .. لازم نروح لبيتي
فتحت عيونها بوسعها : اروح معاك لحد بيتك ؟
فراس بحده : ايه .. ولا شاطره تسوين مشاكل ولا تعرفين تحلينها
ضغطت بقبضتها وقالت وهي ماسكه اعصابها : هالمشكله انعطت اكبر من حجمها .. اعتبر حسابك اندفع خلاص
ومشت دون تنتظر رده وفراس تجاهلها وش خسران ؟ 4 كيسان قهوه ببلاش ... هين يا أسوم انا الغلطان معطيك رقم بطاقتي خلصتها كلها بهبال اللحين
***
ميهاف بعد ماراحو كل الضيوف فصخت كعبها وارتمت على الكنبه بتعب : بمموت رجولي
أم نايف : كن أحد حالف عليك تمشين بهالطابوقه
نايف : ماتنلام مسكينه سنفوره
ميهاف طالعته بنص عين : والله لأزوجك سنفوره عشان تعرف
نايف : ههههههه راح اقوس طولها قبل اتزوجها .. غيرك سنفورة ما أشوف
فهد جا يركض من بعيد متحمس وارتمى بحضن لؤي : اثتقت لك
لؤي وهو يجلسه بحظنه: هههههههه هلا بالأثرم
فهد ( 3 سنوات ) : ماتروح خلاث ؟
لؤي : ههههههه ايه حبيبي
دخل أبو نايف وجلس مع عائلته : ميهاف حبيبتي جيبي لي كاس مويه
طلعت ميهاف تجيب لابوها كاس ماء .. وجلس يسولف مع لؤي بالشغل وقال بقهر : فراس ولد عمك جايه طلب مقابله لأكثر 10 شباب عربيين ناجحين
لؤي : وليش مقهور يبه ؟ الله يوفقه يستاهل فراس
نايف : وعع وش اكثر 10 شباب ناجحين .. وش النجاح في انك تجلس ورا مكتب اصلن ؟
أبو نايف : خلك راقد انت هاللي ورا مكتب يقال عنه بالسوق ملياردير
نايف دون اهتمام : امحق
أبو نايف :وش النجاح هجل ؟
نايف بجديه : النجاح توقف على قمة أفرست تشتري لك جزيرة وتصممها تدخل فورس اند فير هذولي الناجحين صح
أبو نايف هز راسه : خلك ساكت انت مالك بهالمواضيع اصلن .. المهم لؤي ابيك من بكره تنزل عند أبو مشبب وتاخذ منه العقود وتعطيه المفتاح يد بيد وتتأكد من انه يوصل للملتقى
لؤي عقد حواجبه : ضروري بكره ؟
أبو نايف بحزم : ايه ضروري ! ولا وشوله راجع عشان تنفعني بدل هاللوح اللي مامنه فايده
نايف ولا كانهم يتكلمون عنه جالس يطالع ميهاف ويضحك : ههههههههههههه سنفورتي عازمك بكره على مطعم
ميهاف : واو صدق
نايف : ايه صدق احسبي حسابك
ميهاف : يوووه لا مقدر .. مواعده اسوم نطلع المطعم سوا
نايف : طيب شالمشكلة نطلع كلنا سوا
ميهاف : استنى اشوفها وارد لك ( التفتت للؤي ) لؤي تجي معنا ؟
لؤي وقف بيصعد : لا عليكم بالعافيه
أبو نايف : يله وانا طالع انام .. تصبحون على خير
صعد ومعه ام نايف .. وميهاف سحبت جزمتها وصعدت وهي تكلم اسماء : هاه شرايك ؟
اسماء : نو بروبلوم .. وناسه خل نفكر بمطعم غالي دامه موجود يدفع
ميهاف : لاتنبسطين لايغرك شكله وحركاته تراه مطفر 24 ساعه.. المهم اليوم تقولين ابيك بسالفه شنو ؟
اسماء تحمست فجأه : اييييييه ذكرتيني ... شرايك نسافر ؟
ميهاف : مين انا وانتي ؟
اسماء : ايه .. دام فراس مسافر خل نسافر انا وانتي نفلها .. تعرفين لارجع خلاص ترجع القوانين والتخلف حقه
ميهاف : اوك بس لوين برايك ؟
اسماء بحماس : جده
ميهاف : حلو .. متى نروح ؟
اسماء : الاسبوع الجاي .. منيح ؟
ميهاف : اوكيشا .. شفتي جزمة وداد اليوم ؟
اسماء : لا والله مانتبهت .. شفيها :
ميهاف بقهر : انا تو بقائمة الانتظار وهي لابستها حظرتها .. من خطبها هالتاجر وهي كل مناسبة شي
اسماء : نسينا ايام جزمات امي نورة وتخفيض بعد
ميهاف : هههههههههههههههه الله يرزقنا يختي
... وكملن سوالف عقب العزيمة .. يحشون بفلانه ويتكلمون بفلانه ويحسدون فلانه
***
في جده ( عروس البحر الأحمر ) /
ببيت متواضع وأقل من متواضع دور واحد أرضي والدور الثاني إيجار دخلت وهي تنزع عبايتها وجلست على كنب الصالة الأرضي : افف هموت من الحر
غاده اللي منبطحة قدام التلفزيون وصحن فصفص قدامها : وينك من صبح الله طالعه
ابتسام وحالتها حاله من المشاوير بهالشمس والحر : شاسوي بعد رحت للعماره اخذ الايجار واسدد للكهرب والمويه والبقاله مره وحده
غادة صرخت : الله ياخذك ياحيوانه ماعندك كرامه
ابتسام رفعت حواجبها : شقلتي ؟
غاده طالعتها : اوووه مو انتي قصدي هالغشيمه .. ( جلست بقهر ) الحيوانه خاينها وترجع له
صوت متعب من الغرفة الجانبيه : بناااات
ابتسام قبصت ذراع غاده : مبسوطه كذا ازعجتيه بصراخك قصري على التلفزيون ..( رفعت صوتها ) ان شاء الله يبه جايه..( التفت للغاده ) وش فطرتيه ؟
غاده وهي منسجمه : ولا شي
ابتسام شهقت : حسبي الله عليك مفروض ماخذ دواه من ساعتين
غاده منسجمه ماتسمعها اصلن : ...
ابتسام انقهرت وقامت بسرعة للمطبخ وبسرعة قياسية صارت الشوربة على الفرن والعصير جاهز والدجاجه تحتري تنضج وطلعت بصينيه فيها دواه ومويته ودخلت بابتسامتها المريحه وباست راس ابوها ويده : صباح النور يبه .. شلون صرت عقب المرهم الجديد ؟
أبو هيثم ( 68 سنه ) شايب كهل مافيه حيل يمشي دون مساعده قال بصوته المرتجف اثر عمره : حمد الله يابنيتي .. وين هيثم ؟
أبتسام وهي تعدل جلسته وتحط الوساده ورا ظهره : هيثم بآخر سنه له يبه وشاد حيله مو فاضي
أبو هيثم : وشخباره ؟
ابتسام : حمد الله بخير شاد على نفسه بيخلص هالسنة ان شاء الله ويلبس المعطف الأبيض
أبو هيثم : وغاده وينها لي من قمت أناديها ..
ابتسام انحرجت وتألمت على ابوها .. لان بيتهم كله على بعض واكيد سمعها بالصاله : ... .
أبو هيثم بيده المتجعده مسك يد بنته وبنبرة موجعه : التلفزيون .. من ساعتين وهو ماطفى اكيد ماقامت تصلي .. قومي وانا ابوك قولي لها تصلي لاتأخر الصلاه
ابتسام وقفت وهي منقهره من اختها : غديه !
غاده : ما أحب اسم غديه لاتقولينه لي
ابتسام : تغدو عليك جن ان شاء الله .. ابوي من صبح يناديك سافهته حرام عليك
غاده بصدق : ماسمعته طيب
ابتسام معصبه : طبيعي ماتسمعين من هالتلفزيون قصري شوي .. لو صاير له شي لو محتاج شي ضروري وش بتسوين ؟
غاده ببرود : وانتي ليش متشائمه ؟ هذا هو حمد الله ماصار شي
ابتسام فصلت فيش التلفزيون : روحي صلي وقسم بالله ياغديه وحطيني على بالك لو يصير كذا مره ثانيه لا أقول لهيثم يتصرف معك
غاده : والله رعبتيني انتي وهيثم .. قولي لهيثم وجد هيثم بعد انا ماسويت شي
ابتسام تحاول تقنع نفسها ان غاده صغيره ولازم تتساهل معها بس من وين صغيره ؟ عمرها 19 خلاص فاهمه .. هي من لما كان عمرها 11 وهي شايله مسؤولية.. وحتى لو صغيره هي محتاجه لها تساعدها خصوصا مع كثرالضغوطات عليها .. فاقت من تفكيرها على صوت الباب راحت تشوف : مين
: عمانك ياقليلة الحلا افتحي
ابتسام تنفست الصعداء ( اللهم اجعله خير ) وفتحت وهي تبتسم : هلا والله .. حياكم الله تفضلو
أبو احمد طالعها من فوق لتحت : أبوك حي ؟
ابو مرزوق : فالك ماقبلناه يابو احمد
ابتسام ببرود : ايه حي يرزق .. شبغيتو ؟
ابو احمد دفها : شبغيتو هنا عند الباب ؟ صدق ماعرف يربيك تربية شوارع
لحقتهم ابتسام وهم يدخلون على ابوها وماسكه قلبها .. مايجون الا بالشهرين مره يغثون اهل البيت ويطلعون
أبو هيثم بتعب : هلا بمصعب ومحمد حياكم الله
ابو احمد : الله لايحيك جعلي ادفنك
أبو هيثم : آمين .. اذا هذا بيخليك يحضر جنازتي
ابو مرزوق : اسمع يامشعل هي كلمتين ورد غطاها .. العماره اللي باسمك بنجيب اوراقها وتوقع تنازل لنا
ابتسام ماتحملت قالت بقوه مو غريبه عليها : واذا باع العماره من فين بناكل ؟ انت تدري ان هالعماره الرزق الوحيد عندنا
ابو احمد : كلامنا مو مع الحريم خلك على جمب واحترمي الكبار .. الحق حق وهالعماره مب من حق ابوك
أبو هيثم : بناتي يامصعب بناتي .. هذا رزقهن وحلالي الوحيد
أبو مرزوق : هذي ابتسام مدرسة ما شاء الله راتبها مايسدكم ؟ ولا لازم كل يوم تاكلون لحم
ابتسام : حرام عليك ياعمي .. انت تدري ان راتبي كله 5000 ويروح بالقرض
أبو احمد : حنا سكتنا واجد وهذا حقنا ! بتمنعينا من حقنا
غاده سمعت الاصوات برا ومسكت قلبها بخوف .. عمانها مايجي من وراهم الا الشر
ابتسام وهي تدوس على كرامتها : اعتبرها صدقه في اخوك وعياله اللي مفروض بمكانة عيالك ماراح تضيع
أبو احمد : عجزت لي 25 سنه اتصدق عليكم بدخل الجنه بسبتكم ولا يبين بعيونكم بعد .. بكره جايين ومعنا الأوراق وبتوقعها غصبن عنك يامشعل .. سامع !
أبو هيثم ماتحمل منظر بنته واخوانه وهي واقفه بوجههم وهو المفروض يحطها ورا ظهره .. بكى بضعف
ابو احمد وابو مرزوق طالعوه بسخريه وطلعو .. ابتسام مسكت ابوها من كتفه وهي تبتسم براحة ما كأن داخلها براكين : يابعد حيي يا أبوي لاتبكي ..
أبو هيثم غطا وجهه بضعف .. دخلت غاده وهي منكسره من منظر أبوها وتدعي على عمانها بداخلها : يبه صدق كلامهم ؟
أبو هيثم مارفع وجهه .. ردت ابتسام : غاده مو وقتك روحي حطي الغدا ابوي جويع
أبو هيثم بتعب : لا يابنيتي .. عليكم بالعافيه انا اتركيني انام وانتو تغدو
ابتسام : على راحتك
ساعدته ينسدح وسكرت الأنوار ودفت غاده قدامها اللي واقفه ووجهها منقلب وسكرت الباب ..
غاده : ليش سكتيني ؟ ابي اعرف العماره حق لهم ولا لا
ابتسام تنهدت : ايه حقهم ..
غاده عقدت حواجبها : كيف حقهم ؟
ابتسام بهدوء : العماره ابوي بناها واشتغل فيها بس كانت باسم جدي ولما توفى صارت بينهم الثلاثة
غاده انصدمت : من وين يتقاسمونها هي كلها 3 شقق
ابتسام جلست ومسكت راسها : هذا حق ونصيب مانقدر نظلمهم حقهم اكثر من كذا ..
غاده : لا يابتسام حنا بالعماره كلها مو ملحقين مصاريف .. شلون بعد اللحين ؟
ابتسام : الله كريم
انتبهت لها غاده وهي تلبس عبايتها وتطلع : ويين كمان ؟
ابتسام : بروح للمستشفى اراجع دواء ابوي هاليومين مو مرتاح عليه
طلعت ابتسام وغاده رجعت للتلفزيون مافيه مكان غيره .. دور كله صاله ومطبخ وغرفة ابوهم وغرفة نومهن
***
الصباح الساعة 8 – في قاعة الاجتماعات جالس وجمبه السكرتير ومسؤول التقديم : اللي بعده يدخل
دخل شاب في غاية الشغف وجلس .. قبل يجري فراس المقابلة طالع ورقته ( التوصيات مبالغه فيها .. ياحبهم لحركات النفاق قال ايش قال اداء لامثيل له ) كان ساكت طول المقابلات واللي يجريها السكرتير وهو مجرد يعطي القرار الاخير .. ولو ان نظراته كانت سبب في فشل كثيرين نظرات محدقة تحبط حماسهم خصوصا وأن الشائعات اللي تحكى عن المدير التنفيذي الشاب لمجموعة آلشمري ماتبشر بخير ..
فراس بطفش : دخل اللي بعده
دخلت شابه قصيرة القامة ببنطال أسود قماش وبلوزة رسمية بيضاء وشعرها الأسود ملفوف بشكل منظم ووجهها خالي من المكياج عكس الي قبلها كلهن طالعات من صالون .. عيونها تحكي حكاية بحور عميقة مع بشرتها البيضاء المشرقة ووجهها الطفولي انحنت بنعومة ثم جلست : مرحبا أنا سارا 22 سنه .. خريجة جامعة هارفرد قسم ادارة اعمال .. اشتغلت قبل كذا بشركتين انتاج بواشنطن اكثر من واثقه اني راح اكون مناسبة لشركتكم .. واي معلومات ثانيه موجوده بسيرتي
السكرتير ومدير التقديم ذهلو بسيرتها : انتي عمرك 22 سنه ؟
ابتسمت سارا : أيوه
السكرتير : دراستك بهارفرد بس 4 سنوات ؟
سارا : مانقطعت من الدراسه حتى بالاجازات والصيفي ساعدني كثير
مدير التقديم بذهول : نشاطاتك الاجتماعية أكثر من رائعة
السكرتير : تتكلمين 4 لغات ؟
سارا : ايه طبعا .. انجليزي وايطالي وفرنسي وصيني
السكرتير : ما أعرف شاقول اكثر من رائعه بصراحه .. مقبوله طبعا
فراس اللي كان يرسم بورقة قدامه ويسمعهم التفت له : لايكون انت المدير هنا ؟
السكرتير نسى وجود فراس من ذهوله : عفوا منك طال عمرك .. بس سيرتها اكثر من رائعه
فراس طالعها وعرفته مباشرة فتحت عيونها وهي مصدومه كيف ماتذكرت صورته وهي باحثة عن الشركة لها شهر : خلصتي فشخرة بسيرتك ؟
سارا : اعتقد فشخرة تطلق على المعلومات المبالغه فيها .. أي معلومه قلتها عني واقعيه مية بالميه ومافيها فشخرة ياستاذ
فراس : يؤسفني اقولك ان معلوماتك الواقعية ماتأهلك تتوظفين هنا يا آنسة .. ( التفت لسكرتير المصدوم ) دخل اللي بعدها
مدير التقديم انقهر : ممكن شوي ياطال عمرك .. قسم الترجمة عندنا يحتاج مهارتها زيادة على ادارة الأعمال والانشطة تقدر تنفعنا فيها كثير
فراس وكأنه اقتنع هز راسه : هممم معك حق .. اوك موافق بشرط
المدير : تفضل
فراس : تاخذ مكانك وانت توكل على الله
مدير التقديم انصدم : عفوا ؟
فراس وهو يقلب بالاوراق قدامه : اللي سمعته .. وخلصو مسرحية التضحية هذي ورانا شغل
سارا وقفت وهي منقهره منه .. ووقفت خذت ملفها وطلعت عقب دراساتها كلها وجهودها كلها !! يجي هذا بناء على موقف بسيط يحرمها تشتغل .. سخيف .. تافه .. سطحي
***
بمطعم فاخر بالفيصلية وميهاف جالسه رجل على رجل وتهز بكعبها على الارض : 5 دقايق اذا ماجا بنتعشى
اسماء : تهقين يسحب عليك ؟
ميهاف : نايف اهقى منه كل شي
اسماء : دام تهقين منه كل شي ليش لنا ساعه ننتظره .. يله نطلب جعت قسم بالله
ميهاف : قولتك ..
بعد ماطلبن واثناء ماهن ياكلن .. قالت اسماء بحماس: يالله ماتدرين قد ايش متحمسه لسفرة جده حاسه حالي بطير من الحماس
ميهاف : وليش متحمسة كلها جده
اسماء : اول حاجه انا طفشت من البيت وجلسة البيت أحس نفسي اطلع لحالي واكون مسؤولة نفسي
ميهاف : ههههههه انا صراحة احس عادي .. تو راجعين الشهر اللي فات من سويسرا وشبعانه
اسماء : ايه انبسطي .. ااه يالقهر بس اكره اخواني انانيين
ميهاف : معك حق يعني شفيها لو واحد منهم ماخذك معه
اسماء باستهزاء : الاستاذ فراس يقول ( تقلده ) فاضي انا اخم معي مبزره ؟ ... والسوبر ستار بدر مب فاضي حياة النجومية مشغلته .. عشان كم مجلة صدق نفسه نجم مالت بس
ميهاف وهي تشرب عصيرها : والله الحق عليك ياما قلت لك تجين معانا بس انت ترفضين
اسماء : خلصي بس نتعشى نقوم نمر كم محل دامنا هنا
بعد ماخلصن فرفره .. وصلت اسماء ميهاف البيت مع السواق دخلت ميهاف ولؤي وأمها وابوها موجودين : هاي
أم نايف : وعليكم السلام
جلست معهم : بابا انا رايحه لجده بعد بكره
أبو نايف : من معاك ؟
ميهاف : انا واسوم
شرق لؤي بالبيره اللي يشربها : اححححو اححححم
أم نايف : هههههههههههههه بسم الله عليك شوي شوي
أبو نايف بنظرات خبث : هذا اللي يقول مابي
لؤي : ايه مابي والله الموضوع غريب
ميهاف بحماس : شنو شنو ؟
لؤي بحيرة : امي تبي تخطب لي اسماء بنت عمي فهاد
ميهاف شهقت : اسوم ؟!
أم نايف : ايه بسم الله عليها حلوه ومؤدبه واخلاق .. ليش ماياخذها
ميهاف عقدت حواجبها : وليش تزوجون لؤي قبل نايف؟
ام نايف غمزت لميهاف لأن ابو نايف واضح نفس التفكير يبي نايف يتزوج اول : نايف توه مطلق وعنده ولده .. فشغلته شغله بعدين
ميهاف التفتت للؤي : وانت شرايك لؤي ؟
لؤي : انا عادي مدري
ميهاف : ما أعجبتك اسوم ؟
لؤي : انتي اللي تقولين هالحكي ميهاف .. اسوم بعيوني وبنت عمي بس بغتوني أهلي الزواج ماكان في بالي
ميهاف : والله يا أخوي اسمعني اسوم صديقتي وما شاء لله مكمله .. بس لازم تكون مستعد وبرغبتك مو تسوي لنا زي نايف تزوج وهو متردد ماتم السنه الا هو مطلقها
لؤي فرك عيونه وهو يتثاوب : انا اللحين عقلي مو معي وابي انام .. لا أصبحنا فكرنا
صعد وميهاف رفعت حواجبها : لؤي واسماء ؟ هههههههههههه ماتوقعت
أم نايف : وليه ماتوقعتي ؟
ميهاف : مو كذا يمه .. انا لاحظتك اخر مره عيونك ماطاحت منها بس على بالي بتخطبينها لنايف مو لؤي
أبو نايف : وش ذنبها اسماء بهالمتخلف نايف .. أقل شي لؤي عاقل ومسؤول
ميهاف : على طاري وينه اليوم لطعني لطعه محترمه
أم نايف : طالع مع ولده وطليقته الملاهي
ميهاف هزت راسها : مدري كيف يطلعون سوا وهم متطلقين
ابو نايف بسخرية : يقول تفكيري متحضر وانفصلنا بالحسنى عادي نتعامل مع بعض كاصدقاء لمصلحة ولدنا
ميهاف: هههههه فعلا متخلف وهي متخلفه اكثر اجل وحده فيها عقل تطلع مع طليقها ؟
ام نايف : عجزت فيه هالولد يسوي اللي يبي خلاص يأست منه
أبو نايف : لا مو بكيفه .. انا تاركه اللحين يسوي اللي يبي عشان مو فاضي له بس اتفرغ له رجعته للدرب صح
دق جوال ميهاف .. طالعت الشاشه وابتسمت وردت على طول : الطيب عند ذكره
ام نايف فتحت عيونها : اسوم ؟ ( همست ) ياويلك تقولين لها
ميهاف وهي على السماعة : ههههههههه ماني مجنونه اقولها
اسماء : شنو تقولين لي ؟ لا قولي وش كنتو تقولون ؟ تحشون ؟
ميهاف : ماحقولك .. المهم شداقه تبين ؟
اسماء : ايه ابي اسالك عن الحجز بكره ولا بعده ؟
ميهاف : لا بعده
اسماء : خلاص حلو اجل اذلفي
ميهاف : هههه باي
أم نايف : يابو نايف شرايك نخطب بكره ؟
ابو نايف : نشوف الولد اول .. وبعدين بكره من أخطب منه ولا واحد من اخوانها هنا
أم نايف : خلاص شرايك انا احاكي امها حكي مبدأي ومتى مارجع فراس يصير رسمي
أبو نايف : ايه حاكيها ونشوف رد البنت ماحنخطب الا متأكدين
أم نايف : اجل توكلنا
ميهاف : الله يكتب اللي فيه الخير .. يلا مامي دادي تصبحو على خير
***
الكويت – 7 مساءا :
طلع فراس من الشركة وانتبه لها جالسه بكراسي قدام الشركة وواضح عليها الملل وبنفس لبسها وكلش .. معقولة من صبح للحين جالسه ؟! تجاهلها لكن هي مجرد مانتبهت له مشت لعنده : ممكن اعرف ليش رفضت ؟
فراس رفع حاجب : لا مب ممكن ووخري عن دربي
سارا : انا أكثر من واثقه ان مافيه عيب فيني واي شركه تتمناني .. وقبل يكون عندك سبب مقنع مايحق لك ترفضني
فراس : لا ياشيخه ماحزرتي يحق لي ارفضك .. أي شركه تتمناك وتشتغلين نادله ؟ لا مره واضح
سارا تكتفت : وليش؟ لاسباب شخصيه تافهه ؟
فراس : اسباب شخصيه ؟ من متى المعرفه ؟
سارا بقهر : احسن انت الخسران
فراس : تراك ماخذه بنفسك مقلب انصحك ماتعطين نفسك أكبر من حجمك
سارا رمقته بنظره ثم مشت بطريقها .. وهي داخلها تدعي عليه لها شهر متحمسه تقدم هنا واخرها ينتهي الوضع كذا ؟ اثناء ماهي تمشي خطواتها بسرعه وقوة تبي تفرغ شحناتها باي شي .. دق جوالها ردت دون تشوف الرقم : نععم !
صوت رجولي فخم : هههههه اعصابك يابنت
سارا : قهرني قهرني
: شصار على مقابلتك ؟
سارا بقهر : ما قبلوني .. المدير التنفيذي بزر اناني حقير مغرور
بتسائل : فراس فهاد آلشمري هو ؟
سارا : ايه وتبن ومليون تبن فيه وفي اسمه
: ملياردير عاد
سارا وهي تحاول تهدي اعصابها : ماعلينا منه جعله يفلس يارب .. شخبار دراستك ؟
: هالسنتين متدرب .. وعقبها نمسك رئاسة
سارا : ووش ناوي ؟
بتصميم : عظام طبعا
سارا : وخواتك شخبارهم ؟
بهم : لي 5 ايام ماقدرت اطلع من المستشفى اليوم بحاول اشوفهن
سارا : ياعمري الله يعينهن وربي اني احبهن من قلبي خصوصا ابتسام
: ابتسام محد مثلها الله يوفقها
سارا : المهم يله انا وصلت البيت رح خلص شغلك وشف خواتك
: لحظه اذا ماحصلتي وظيفه بتجلسي بالكويت ؟
سارا : لا برجع اقرب طيارة لحبيبة قلبي جده
: اوك عطيني خبر اذا بترجعي
سارا : اوك
***
بيت أبو هيثم – الساعة 8 :-
غاده كانت حايره ابتسام للحين مارجعت .. وهي ملت وقلقت وأبوها ماصحى فتحت باب غرفة أبوها ببطء تشوف كان مفتح عيونه وسط الظلام ويطالع بالنور البسيط من النافذه .. التفت لها بوجهه السمح : ادخلي يابوك
غاده جلست على طرف مفرشه الأرضي وقالت بهم: يبه ابتسام للحين مارجعت
أبو هيثم انقلق اكثر منها لكنه يبي يهدي بنته : تلقيها راحت تزور احد وبترجع ماحتطول
غاده : ان شاء لله .. بقوم اجيب دواك
أبو هيثم انهم من الحال .. فوق عجزه بناته يعانن بسبته .. الله يسامحك يا أم هيثم ليش سويتي كذا ؟
دخلت ابتسام وهي منهد حيلها ودخلت غرفة ابوها وهو جالس مع غاده يتعشون قالت بمرح : الله عشاء .. شدراكم اني جيعانه !
غاده : وينك يابنت والله طولتي
ابتسام : خذاني الوقت والله مدري شلون .. يله بروح ابدل بس وجايه اتعشى
أبو هيثم : ابتسام
ابتسام : لبيك يبه
أبو هيثم : طمني قلبي وين كنتي فيه ؟
ابتسام : زرت صديقتي امل يبه وماتوقعت يروح الوقت كذا
أبو هيثم صدقها : الله يطمنك ياحشاي
اول ماطلعت ابتسام لحقتها غاده لغرفتهن : قلتي لهيثم ؟
ابتسام : شاقول له ؟
غاده : عن عماني والعماره .. لازم يعرف ويتصرف
ابتسام : لا هيثم لايعرف ! بيترك دراسته وبيبهذل حاله مع عماني .. مشكلة بسيطة تنحل
غاده باصرار : ماعلي منك ! بقوله لمتى وانتي تكتمي كلش عنه عشان هالدراسه ؟
ابتسام : لان دراسته ياغاده هي اللي بتفرج عنا .. دراسته مو سهله ومستقبلها حلو اصبري كمان شوي وكلش بيتحسن
غاده : طيب شطالع بايدك انتي ؟
ابتسام : حليتها خلاص .. انتي لاتشيلي هم وسوي حالك ماعرفتي
غاده حطت يدها على خصرها : وشلون حليتيها ؟
ابتسام بقلة حيلة : جهزت الأوراق بحتريهم يجون بكره عشان نسجل العماره باسمهم
غاده بقهر : يعني مانحلت !
ابتسام بهمس : وطي صوتك غاده ابوي بيسمع
غاده تنرفزت : مو مصدقة اني بعيش بحال اردى من كذا بعد متحمسه مره .. وينهم عماني يجون بسرعه نعطيهم كلش
طلعت غاده من الغرفة وهي منقهره من هالحال فتحت باب البيت بقوه بتطلع للحوش الصغير صدمت بهيثم : وجع ماتشوف ؟
هيثم رفع حواجبه : يوجعك يارب .. خير شعندك كنك ثور هايج؟
غاده طالعته من فوق لتحت وهو بلبس المستشفى الأزرق وتحت عيونه هالات سوداء واضحه وتجاوزته وطلعت .. هيثم عقد حواجبه شاف ابتسام طالعه وابتسمت من قلب اول ماشافته : هيثثثم .. كيفك حبيبي ؟
هيثم ابتسم لشوفتها محد يشرح صدره كثرها : هلا بسومه .. شعندها هالبزر ؟
ابتسام : هههههه عمرك شفتها رايقه ؟اربع وعشرين ساعه منفسه الله يهديها
هيثم : مو بكيفها قولي لها تتعدل لا أوريها
ابتسام : من حظك ابوي لسى صاحي
دخل هيثم وباس راس ابوه : شخبارك يبه ؟
أبو هيثم وهو ماسك يده الشابه الممسوسه البيضاء بيده المتجعده : وينك يابوك .. نشف دمي وينك ماتجلس بالبيت ؟
ابتسام : شفيك يبه ماتعرف ان دراسة هيثم مهمه وصعبه .. على طاري شخبار دراستك ؟ شكلك مب عاجبني
هيثم : والله لي يومين دون نوم بهالعمليات مانقطعنا .. بنام لي ساعتين وراجع للمستشفى
أبو هيثم : الله يوفقك ياوليدي .. ولاتقطع فيني وفخواتك
هيثم باس راس أبوه : من هالعين .. تامر شي ثاني ؟
ابو هيثم : سلامتك
هيثم طالع المكان بضيق ثم وقف : يله انا ماشي
ابتسام وقفت : وين بدري ؟
هيثم : عندي كم شغله ضروري اكون بالمستشفى بنام هناك
ابتسام : الله يعينك وبتطول بعد ؟
هيثم : ما ادري يمكن
طلع هيثم وبطريقه للباب الرئيسي التفت لغاده اللي جالسه جمب النخله وترسم بحصاه على التراب جلس جمبها وكتب بنفس طريقتها على التراب ( شفيك ؟ ) التفتت له غاده وضحكت على الخفيف : ممنوع أقولك
هيثم عقد حواجبه : شهالممنوع تقولينه من مانعك ؟
غاده عدلت جلستها حتى صار وجهها يمه : اللحين هيثم اذا مسكت رئاسة السنه الجايه راتبك يزيد ؟
هيثم : ليش تسألين ؟
غاده هزت كتوفها : فضول
هيثم : ايه طبعا يزيد
غاده : زيادة كبيره ؟
هيثم اختصر اسئلتها بسؤال: غدو تبين فلوس ؟
غاده بتصريف : هااه .. لا بس جالسه اسوي دراسة لميزانية جده
هيثم طلع 500 من جيبه وحطها بيدها : كفايه كذا ؟
غاده الفلوس رفعت معنوياتها وابتسمت : اييه يعطيك العافيه
هيثم قرص خشمها بيده : من اول قولي تبين فلوس دون تبرطمين
غاده مدت لسانها : طيب
طلع هيثم من البيت وغاده قررت تخش الفلوس عن ابتسام عشان ماتسوي لها سالفه أكيد ! بس هالخمسمئة رفعت معنوياتها لفوق بكره بتطلع تبذرها ..
****

أم فراس بفرحه كبيره : من جدك هالحكي ؟!
أم نايف : ايه من جدي .. والله كان مفروض ازورك وتصير رسمية بس اللحين كلمتك فيها وأول مايرجعون اخوانها بنخطب رسمي
أم فراس بهم : اخاف تطول تعرفين اخوانها لهم شهرين ماشفناهم
أم نايف : وتطول قد ماتطول يا أم فراس انا ماراح القى احسن من بنتك
أم فراس : اجل انا بحاكي البنت وان شاء الله خير
أم نايف : ان شاء الله .. ردي لي بس اول ماتحاكينها عشان اقل شي ندق على فراس ونفاتحه
أم فراس : الله يكتب اللي فيه الخير
سكرت أم نايف السماعة ولؤي كان جمبها وميهاف جالسه متحمسه .. ابتسمت للؤي : ان شاء الله الف مبروك
فتح لؤي عيونه : وافقت ؟!
أم نايف : ان شاء الله بتوافق .. وليش ماتوافٌق ؟
ميهاف : ههههههههههه ياحليلها ودي ادق انغص عليها
أم نايف: ياويلك اللحين امها بتحاكيها وانتي تخربين كلامهم
ميهاف : اساسا بتكون اللحين نايمه
أم نايف : نايمه الساعه 4 العصر ؟
ميهاف : هههههههههههههههههههه ايه لؤي تراهي نوامه
لؤي ابتسم دون يعلق .. ميهاف : ياحياتي شهالابتسامة !
لؤي : ههههههه شأقول يعني ؟
انفتح الباب ودخل نايف ومعه ولده ( يزيد 3 سنوات ) .. مشت ميهاف لعنده وشالته من الارض : حبييييبييي زيزو شخبارك ؟
يزيد وبيده حلاوه : باااباا شراااالي حواوه
ميهاف بذهول : الله حلاوتك حلوه .. وانا بعد عندي لك حواوه اكبر من حقت بابا
ام نايف : جيبيه ياميهاف خل اشبع منه .. ابوه مايجيبه لنا الا بالشهرين مره
نايف : ههههههههههههههه ما أعرفك تحبين البزارين يمه ولا كان
أم نايف حطت يزيد بحظنها : شخباره الحلو ؟
يزيد ضحك بطفولة .. ميهاف : نايف اتركه ينام عندنا اليوم
نايف : براحتك اساسا امه عندها اعراس هاليومين ومتروك مع الشغالات عندك احسن
ام نايف : الله يستر على ولدنا بين يديها
نايف : هههههه حرام عليك يمه نهى مهتمه مره ترا
لؤي وقف : يله انا طالع
نايف التفت له : انت هنا ؟ تصدق ماحسيت فيك
ميهاف : هههههههههه بتروح لؤي ؟ ماتبي تجلس لين تسمع الرد
لؤي : على قولتك نايمه بلا باكل نفسي بالتفكير اطلع اشغل عمري
ميهاف متونسه : شتفكر فيه ؟ فيها من اللحين
لؤي ماله خلق: ياروقك ياميهاف .. يلا مع السلامه
نايف فتح عيونه : شالسالفه شتقولون؟
لؤي طلع .. وميهاف قالت بوناسه : خطبنا للؤي
نايف فتح عيونه : وانا آخر من يعلم ما كأني اخوه الكبير؟
ام نايف : ماصار شي تو بس حاكينا امها .. ماصار شي رسمي .. وانت ماتجلس بالبيت عشان نقولك
نايف : وبنت مين ؟
ميهاف : اسماء بنت عمي
نايف مات ضحك : ههههههههههههههههههههههههههههه اما عاد اسوم اسوم !!
ام نايف : حمد الله والشكر وش اللي يضحك ؟
نايف : ههههههههههههههه مدري يضحك وبس
ام نايف : مالت عليك بس
يزيد مسك يد نايف وهو ياشر على معصم يده : بابا خطا تكتب على يدك
ام نايف بقهر وهي تشوف التاتو بيد نايف : ماينلام ولدك .. انت ابو انت ؟
نايف طالع يزيد : مستانس اللحين قلبت جدتك علي ؟
ام نايف بصرامه : صاه ولا كلمه .. انت فيك عقل ؟ احد يوشم وشم ؟
نايف وقف : انا طالع ميهاف ديري بالك على يزيد
اول ماطلع التفتت ام نايف لميهاف بقهر : شايفه ولا كأني اتكلم .. اااه بموت من الحره من هالولد والله بموت ناقصه عمر
ميهاف : انتي عاد يمه روقي شوي .. نايف من زمان كذا شنسوي يعني ؟
أم نايف : ابد نسكت له ونتركه سايب كذا !
***
غاده قامت من النوم وهي تطالع الساعه 3 عصر .. تمغطت بكسل جت بتطلع لكن تراجعت وهي تسمع صوت رجاجيل اكيد عمانها .. ماتبي تنغص على نفسها بتجلس محلها
ابتسام كانت جالسه على القهوه مع عمانها في الصاله ماتبيهم يجلسون مع ابوها ...
أبو احمد : اسمعي يا ابتسام .. حنا عندنا طريقه تنحل فيها كل الامور وتجلس العماره كامله لكم لانا عارفين دون هالعماره ماتدبرون لقمتكم
ابتسام هزت راسها : لا عمي العماره حقكم خذوه وخلاص .. خل ننتهي من هالموضوع
ابو مرزوق : شفيك لايكون زعلانه ؟
ابتسام : مو زعلانه ولا شي .. بس انا مابي ينظلم احد بسبتي والعماره حقكم
ابو احمد : لا اسمعي اللي بقوله .. بس يكون بحضرة أبوك احسن
ابتسام : عمي ابوي مو قد هالتعب والحكي انا افهم خلاص
ابو احمد : بس عاد على بالك بتخافين على اخونا اكثر منا ! قدامي للمجلس اصلن انا ماتفاهم مع حريم
ابتسام استسلمت : تفضلو
دخلو عند ابو هيثم .. قال ابو احمد من طرف خشمه : شخبارك ؟
ابو هيثم بضعف : حمد الله ..
أبو مرزوق : حنا بندخل بالموضوع مباشرة ! وجايينك خطاب لولدنا احمد
أبو احمد : وبما انك تدين لنا بكثير وبتفلس لو توفي لنا فبنتك تكفي
ابتسام قالت بسرعة : مستحيل اوافق لا ! ابوي محتاجني ومقدر اتركه و ..
قاطعها ابو احمد بقرف : من حكى عنك يالعانس ؟ استحي على وجهك اصلن تفكرين في عمرك لولدي .. حنا نبي غاده وماراح ناخذ لا رد والعرس عقب اسبوعين
ابتسام تفاجأت : غاده ؟
ابو احمد : ايه .. مب احسن ماتجلس بهالفقر وتعنس مثلك
ابو مرزوق : وينها هي ؟
ابتسام : نايمه
ابو احمد : قولي لها تتجهز لعرسها .. يله يابو مرزوق مشينا
طلعو .. وابتسام طالعت ابوها : شالسواه يبه ؟
ابو هيثم : مدري يابوك .. اسالي اختك وشوفي يمكن ربي يطرح بركه في احمد
ابتسام بقلق: غاده صغيره ومو مسؤولة يمكن توافق دون تفكير ..
ابو هيثم مسكته نوبة سعال .. قامت ابتسام بسرعه وعطته كاس مويه : بسم الله عليك يبه .. خلاص ارتاح يابعد عمري
ساعدته ينسدح وطلعت دخلت غرفتها هي وغاده .. وغاده لابسه بنطال جنز أبيض وتي شيرت أحمر كم طويل وشعرها البرونيت مع خصل غزالي لوركها ظهرها بطبيعته الكيرليه تاركته وواقفه قدام المرايه المكسورة مسنده على الجدار .. ابتسمت ابتسام بحنان هذي بنتها هي اللي ربتها وشالت مسؤوليتها من كان عمرها 8 سنين : غدوش طالعه قمر شهالزين ؟
غاده حاست بفمها : أي قمر واللي يخليك حتى مافيه مكياج احطه واتصنع زي باقي العالم
ابتسام : وشوله المكياج هذا حق القبايح ؟ انتي ماتحتاجين شي حلوه
غاده بطفش : ايوه ايوه .. المهم انا طالعه للسوق تبين شي
ابتسام عقدت حواجبها : السوق ؟ ماقدر اعطيك فلوس
غاده : لاتعطيني شي ماراح اشتري اصلن .. بس بروح اتمشى مع البنات اتسلى
ابتسام : ومن هالبنات ؟
غاده : من غيرهن يعني رحاب واروى
ابتسام : طيب بس لاتأخرين ارجعي بدري فيه حاجه ضروريه لازم احكيها معك
غاده : اذا موضوع يسد النفس كالعاده تكفين ماله داعي اعرف
ابتسام : الموضوع يخصك انتي بالذات عشان كذا لازم تعرفين
غاده سمعت صوت السيارة : بعدين اذا رجعت ان شاء الله .. يلا باي
ابتسام : انتبهي على نفسك
دق جوال ابتسام ردت على طول : هلا هيثم .. كيفك ؟
هيثم : عال .. ولا عليك امر ارسلي لي اسماء الأدوية اللي يحتاجها ابوي اجيبها معي
ابتسام : برسلها لك رساله
هيثم : حلو .. يله انتبهي على نفسك
ابتسام بسرعه : هيثم !
هيثم : هلا
ابتسام : اليوم جو عماني
هيثم اللي ماكان يعرف بطبيعة عمانه ولا سوالفهم كلها ونادر يشوفهم اصلن : ايه ؟
ابتسام : وخطبو غاده لولد عمي أحمد
هيثم : هاه ؟
ابتسام : انت تعرف احمد ؟
هيثم : لا والله آخر مره شفته كنت بأول ثانوي وكان هادي مره مانعرف عنه شي
ابتسام : انا حتى ما أذكره ولا شي
هيثم : وش قالت غاده ؟
ابتسام : لسى ماقلت لها .. بقول لها الليلة
هيثم : وانتي عادي عندك الموضوع ؟
ابتسام فهمته : ايه عادي اصلن حتى لو خاطبيني ماكنت بوافق .. ابوي مايستغني عني
هيثم : انا ماراح اقدر اطلع اليوم من المستشفى .. انتي كلمي غاده وردي لي
ابتسام : ان شاء الله
انطرق باب غرفتها : تفضل
دخلت امها .. ابتسمت وهي تشوفها جالسه على مكتبها وتبرد اظافرها : ليش جالسه بغرفتك لحالك ؟
اسماء : اسوي استجمام لنفسي
أم فراس : استجمي عندي وين المشكلة ؟
اسماء : ماما اسمه استجمام يعني لازم اكون لحالي
أم فراس : هبالك تجلسين لحالك .. تعالي اجلسي جمبي ابي اقولك خبر بيفرحك
اسماء قامت بحماس وجلست : ايش ايش ؟ بدر بيرجع ؟
أم فراس : لا احلى
اسماء بحماس : بنسافر بالصيفية برا
أم فراس : واحلى بعد
اسماء استسلمت : ماما شهالخبر اللي احلى من كل هذا عقلي عجز قولي لي انتي
أم فراس بابتسامة وعيونها تلمع : انخطبتي اليوم
اسماء وقفت الدنيا فجأه ماستوعبت .. وش امها جالسه تقول .. هي انخطبت ؟
أم فراس ضحكت وهي تشوف بنتها اللي انبهتت : هههههههههه شفيك ماتبين تعرفين منهو عاد ؟
اسماء بذهول : مين ؟ اعرفه ؟
ام فراس : ايه تعرفينه زين .. تو رحتي لعزيمته قبل أمس
اسماء فتحت عيونها : لؤي ؟
أم فراس ابتسمت : ايه لؤي
اسماء كبست عيونها مليون مره : لؤي لؤي ؟ ولد عمي ... خطبني انا ؟
أم فراس : هههههههههه هاو شفيك ؟ ايه لؤي ولد عمك خطبك
اسماء : يمه انتي من جدك ؟
أم فراس : ايه من جدي وش فيها مايخطبك يعني ؟
اسماء منصدمه ماتوقعت ابد : لا بس يعني ... مدري ماتوقعت
أم فراس : يمه الراي الأول والاخير رايك .. بس انا بقولك كلمتين الولد ولد عمك وأمه تحبك واخته صديقتك ومجتمع متعوده عليه أحسن ماتطبين على ناس ماتعرفين طينتهم .. والرجال الصالح بهالايام نادرين .. ولؤي رجال ومسؤولية وعاقل وما أظن ان رفضه شي صح يسوى
اسماء : ايوه ماما كل هذا عارفته بس ...
سكتت لفتره .. قالت ام فراس تحثها : بس شنو حبيبتي ؟ انتي شايفه عليه شي موعاجبك ؟
اسماء بسرعه : لا ماما حشى .. بس عطيني وقت افكر
أم فراس : ومتى بتردين لي ؟
اسماء : اذا رجعت من جده
أم فراس : مايمدي قبل يعني ؟
اسماء : شنو قبل انا مسافره بكره .. خلاص اذا رجعت برد
أم فراس : فرحي قلوبنا كان قبل هالسفره
اسماء : يووه ماما كذا تضغطي علي .. وانا دون شي متوتره
أم فراس : بسم الله خلاص خلاص فكري .. انا بس قلت الموضوع مايبي له كل هالتفكير
اسماء : الا ويبي له اكثر من كذا بعد .. خلاص مامي بليز اتركيني على راحتي
أم فراس : على راحتك بس أول ماتقررين بجده دقي علي .. ولاتطولين
تركتها ام فراس وهي جلست تفكر .. ماتدري وش القرار الصح .. او يمكن تدري ايش القرار الصح بس ماتدري ايش القرار اللي يناسب طبيعتها ؟
***
غاده رجعت من السوق معصبه ومحبطه .. السوق شاب نار وصديقاتها شرن كل اللي بخاطرهن وهي ماشرت غير شنطته ومتحسفه انها شرتها دخلت مباشرة لغرفتها .. ثواني ودخلت ابتسام لما سمعت الصوت : شفيك لبقتي بغرفتك على طول تعالي تعشي معنا
غاده وهي منبطحه على فراشها حتى دون تفصخ عبايتها : مابي شي !
ابتسام : شفيك مو طايقه حالك ؟ مفروض مبسوطة من الدجه
غاده بقهر : امحق
ابتسام تنهدت : غاده وبعدين ؟
غاده جلست وعيونها تلمع وصرخت : لا بعدين ولا قبلين حياتنا ماتنطاق .. اروى تشتري لها طقم بمبلغ مانحلم به بالشهرين حتى ..
ابتسام : وانتي ليش ماطلبتي فلوس اذا كنتي ناويه تشترين او بتنقهرين
غاده : واذا طلبت ؟ بتعطيني ميتين ؟ اشبعي بها ماتسوي شي
ابتسام : قصري صوتك أبوي بيقلق
غاده وهي واصله معها : ابوي ابوي ابوي .. نص رداة حالنا ابوي اصلن
صفقتها ابتسام كف باقوى ماعندها وقالت بحده : لحد هنا وتنشعمين .. هذا ابوي وأبوك اذا ناسيه بس انا الغلطانه اللي معطيتك وجه من اليوم لي معك تصرف ثاني
غاده مسكت خدها وصرخت : وفوق كل هالقرف تنمد اليد علي .. الله يلعنها عيشه تقطع العمر
وطلعت مسرعه لبرا بالحوش لعند نخلتها اللي حفظتها وهمومها اليومية السطحيه.. وابتسام انقهرت هي تتعب وماكله روحها وصابره وغاده حتى ماتشيل أي مسؤولية جت بتطلع للحوش لعندها وقفها صوت ابوها : ابتسام
رجعت لعنده : سم يبه
أبو هيثم : شفيكم ؟ .. ليش اصواتكم طالعه ؟
ابتسام : هههههههه لاتشيل هم هذي غاده وهبالها المعتاد .. ثواني وراجعه
طلعت لعند غاده .. طالعتها غاده والدموع بخدها : نعم شتبين بعد ؟
ابتسام بقهر : ياهانم جاك الفرج .. اذا قرفانه من هالعيشه لهالدرجة احمد ولد عمي خطبك اليوم
غاده وسط دموعها انصدمت .. توقعت انها بتعنس مثل ابتسام وعمرها محد بيفكر فيه : هاه !
ابتسام بحده : ايه انبسطي وبسرعه وافقي وروحي اطلعي من هالبيت قبل تنخنقين من شوفة اختك وابوك كل يوم
غاده بندم : ابتسام .. انا . .
ابتسام قاطعتها : لاتقولين شي .. ابيك توافقين وتروحين هم يبون العرس الاسبوع الجاي يعني الفرج قرب
غاده بتردد : لا تقولين كذا ..
ابتسام طالعتها بقهر ورجعت تدخل ... غاده مسحت دموعها وللحين مو مستوعبة عقلها الصغير خذاها لأحمد مباشرة .. فعلا هي ماتعرفه ؟ وش شكلة وش يشتغل وش عمره .. غاده وأحمد ؟اسماء جديده تنربط بروايتنا
***
وقفت قدام مراية غرفة تبديل الملابس وربطت المريلة البيضاء ..ابتسمت لبس النادلات هنا أنيق بنطال أسود وبلوزة رسمية بيضاء بفيونكة سودا مع هيلز سوداء حتى انها تركت شعرها الأسود المموج بطريقة رايقة لاسفل كتفها على راحته .. طلعت للمطبخ : لبس النادلات عندكم جنان بصراحة
ابتسم طباخ شاب وهو ذايب على جمالها الطبيعي : اليوم مناسبه خاصه مو هاي اللبس الرسمي
سارا : بجد .. إيش المناسبة ؟
نادلة ثانيه : حاجزين القاعة كلها لحفلة للملياردير السعودي فراس فهاد آلشمري
سارا شرقت بقنينة المويه اللي تشربها : احححححوو ... شنو ؟
النادلة : علامج يابنية ؟
سارا : الحفله لمين ؟
الطباخ : فراس فهاد الشمري
النادلة : يقولون انه أخو بدر الشمري .. يارب يطلع مزيون مثله
سارا : وععع مو مزيون ولا شي
النادلة : شفتيه عيل ؟
سارا : ايه ومقرف وكريه وشين
النادلة : آجل خلق وفرق
دخل المدير : يله يله شدو الهمه .. مايحتاج اذكركم اليوم الضيف مهم وايد ومكانته كبيره وشرف لنا نكون المسؤولين عن الضيافه بهالمناسبة
الكل : حاضر !
سارا مسكت راسها ناقصه هي .. شلون بتتعامل مع هالمغرور ؟!

 
 

 

عرض البوم صور متمللة   رد مع اقتباس
قديم 18-11-16, 04:49 PM   المشاركة رقم: 3
المعلومات
الكاتب:
اللقب:

البيانات
التسجيل: Nov 2016
العضوية: 321971
المشاركات: 260
الجنس أنثى
معدل التقييم: متمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداع
نقاط التقييم: 497

االدولة
البلدSaudiArabia
 
مدونتي

 

الإتصالات
الحالة:
متمللة غير متواجد حالياً
وسائل الإتصال:

كاتب الموضوع : متمللة المنتدى : القصص المكتمله من وحي قلم الاعضاء
افتراضي رد: انتماءات كاذبة

 

أقدر اسمي هالتشابتر مقدمة بسيطة
ماباشرنا الأحداث الحقيقية تو وإلتحام الشخصيات
انتظر ردودكم

 
 

 

عرض البوم صور متمللة   رد مع اقتباس
قديم 18-11-16, 08:20 PM   المشاركة رقم: 4
المعلومات
الكاتب:
اللقب:
ليلاس متالق



البيانات
التسجيل: Nov 2009
العضوية: 152163
المشاركات: 6,718
الجنس أنثى
معدل التقييم: طيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسيطيف الأحباب عضو ماسي
نقاط التقييم: 3748

االدولة
البلدSaudiArabia
 
مدونتي

 

الإتصالات
الحالة:
طيف الأحباب غير متواجد حالياً
وسائل الإتصال:

كاتب الموضوع : متمللة المنتدى : القصص المكتمله من وحي قلم الاعضاء
افتراضي رد: انتماءات كاذبة

 

السلام عليكم ورحمة الله وبركاتة
هلابك منوره ليلاس منتدانا الراقي
بداية جميلة اتمنى تواصلين معانا وماتقطعينا بالمنتصف
اعجبني جدا العنوان بسهوله ينحفظ

 
 

 

عرض البوم صور طيف الأحباب   رد مع اقتباس
قديم 18-11-16, 08:54 PM   المشاركة رقم: 5
المعلومات
الكاتب:
اللقب:

البيانات
التسجيل: Nov 2016
العضوية: 321971
المشاركات: 260
الجنس أنثى
معدل التقييم: متمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداعمتمللة عضو على طريق الابداع
نقاط التقييم: 497

االدولة
البلدSaudiArabia
 
مدونتي

 

الإتصالات
الحالة:
متمللة غير متواجد حالياً
وسائل الإتصال:

كاتب الموضوع : متمللة المنتدى : القصص المكتمله من وحي قلم الاعضاء
افتراضي رد: انتماءات كاذبة

 

اقتباس :-   المشاركة الأصلية كتبت بواسطة طيف الأحباب مشاهدة المشاركة
   السلام عليكم ورحمة الله وبركاتة
هلابك منوره ليلاس منتدانا الراقي
بداية جميلة اتمنى تواصلين معانا وماتقطعينا بالمنتصف
اعجبني جدا العنوان بسهوله ينحفظ

وعليكم السلام ورحمة الله وبركـاته
منور بأهله وبمرورك الرايق وانا المحظوظة لوجودي هنا
أنتي اجمل .. وبإذن الله راح أكون متواجدة هنا على طول وأختم الرواية مثل مابديتها

 
 

 

عرض البوم صور متمللة   رد مع اقتباس
إضافة رد

مواقع النشر (المفضلة)

الكلمات الدلالية (Tags)
إنتمــــاءات, كـاذبة
facebook



جديد مواضيع قسم القصص المكتمله من وحي قلم الاعضاء
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 07:47 AM.


 



Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية