كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
جده، التاسعه مساءً
ردت بعدم فهم/قصي بلا عباطه وأهرج عدل، أيش اللي خطه وغرض، ركز وفهمني بهداوه.
طالعها بعصبيه/محد عبيط غيرك لإنك مو شايفه أيش بيسووا وأحنا بنتفرج عليهم بدون مانتصرف .
عقدت حواجبها بإستغراب/أيش اللي سووه بس ! الناس تاعبين نفسهم وجايين زواج خالتك و--
قاطعها /وأنتي على بالك جايين لله! ماهيا ذي خطتهم ياغبيه.
ردت بحده/قصي وبعدين معاك أهرج بأدب ولا خليك ساكت أحسلك.
طالعها بعصبيه/أنتي ليه مو راضيه تفهميني، أقلك هما جايين علشان الزواج بس مو زواج خالتي أحلام ، ذول جايين علشان أمي.
ردت بملل/ماالبيت كله عارفين إنهم جايين علشان خاطر ماما حتى جدو صقر الله يعطيه العافيه كلف على نفسه وجاء يتعرف على خيلاني علشان يقوي علاقتنا بيهم أيش الجديد في كلامك!
صرخ بقهر/الجديد إنهم جايين يخطبوها هما جايين يخطبوا ماما فهمتي ولا لسا.
سألته بعدم إستيعاب/ يخطبوا ماما! يخطبوا ماما لمين!
رد بقهر/أكيد لأبو بدر وبتول.
مسكت إيديه وجلسته جنبها بالقوه/أترزع هنا وفهمني أنتا مين اللي قلك الهرجه دي هاا، بدر قلك شي! سمعت جدو صقر ولا مساعد يهرجوا مع جدو عبدالله ولا خالو علي ولا معاذ!
هز رأسه بنفي/محد قال ولا سمعت منهم شي.
صرخت بعصبيه/يعني قاعد تتونس على دماغي بهرجك الغبي دا، لا وحضرتك منقي العريس وبتتكلم بثقه كمان.
دف يدها وبغضب/ أنا مو قاعد أمزح معاكي أنتي لو تفكري شويه هتلقي كلامي صح، أمي مطلقه وتحب بدر وبتول وهما نفس الشي وهما أمهم ميته وأبوهم رجال مو متزوج وموناقصه شي ليه مايتزوجها علشان تنتبه لعياله أكيد هوا مافي غيره.. طيب مو ملاحظه إن إتصالاتهم زادت بعد طلاق أمي وكل شويه عزايم وجدي مساعد جاء مع ماما وذحين جدي صقر غير الأهتمام والهدايا اللي جابوها، أحنا بس اللي أغبياء وماأنتبهنا لحركاتهم ولا هيا واضحه ومفهومه.
عضت أصابعها بتوتر/قصي لاتلعب في دماغي بملاحظاتك دي ولو في حاجه من اللي بتقولها كنا عرفنا ماما مارح تخبي عنا شي زي دا.
رد بسخريه/لااا، وهيا كانت قالتلنا عن خالي صدام ولا صاحب خالي معاذ اللي خطبها!
ردت بتفكير/وتقول ليه وهيا رفضتهم..
إلتفتت له بجديه/قصي حبيبي قول أعوذ بالله من الشيطان الرجيم وسيبك من الأوهام دي، ماما أكيد مابتفكر في دا الشي وهيا قالتلنا بنفسها إنها مرتاحه كدا.
أيه هوا اللي مابفكر فيه ياياسمين.
إلتفتوا وشافوا أمهم اللي دخلت عليهم بدون مايحسوا وقطعت كلامهم وبتطالعهم بتساؤل، ردت ياسمين بتوتر/هاا لا دا قصي كان بيقولي ..إنك يعني ..شكلك --
قاطعتها جوري بضحكه/خلاص حبيبتي أرتاحي أنتي لإنك موعارفه تجمعي كلمتين أو كذبتين على بعض وخلي قصي قلبي يحكيلي.
وألتفتت لقصي بعتاب/هاا سيد قصي أيش الشي المهم اللي خلاك تسيب الرجال وتجي تجلس مع أختك وأنتا معصب كذا خير!
رد بعصبيه/وإذا قلتلك هتجاوبيني بصراحه ولا بتقوليلي أنت لسا صغير ولاتتدخل.
سكتت للحظات قبل ماترد بهدوء/لا وين صغير وأنت ماشاء عليك صرت رجال وبتعلي صوتك وبتنفخ وتعصب على أمك وكمان طلعتها كذابه بس بلفه دبلوماسيه.
شحب وجهه وبإرتباك/ ماقصدي أنا بس كنت معصب من ياسمين.
ردت بحزم/مهما كنت معصب فذا مايديك الحق إنك تعلي صوتك عليا، أنا أمك جنتك ونارك يعني توصل عندي وتوقف وتنتبه لأسلوبك ولا كتاب الله اللي بتقرأ فيه كل يوم حفظ وبس.
باس يدها بندم/أمي والله أسف سامحيني.
طالعتها ياسمين برجاء/ماما لاتزعلي منه من جد هوا كان معصب وماركز.
طالعتهم بصمت للحظات وبهدوء/ أول وأخر مره تكلمني كذا ياقصي فاهم.
هز رأسه بموافقه/ سامحيني وأوعدك أخر مره والله ماأعيدها الله يحفظك لاتزعلي.
ردت بتنهيده/ موزعلانه حبيبي والله يسامحك دنيا وآخره.
سألها بتردد/أمي أنتي مارح تسيبينا أبداً صح؟
حاوطت وجهه بكفوفها وبهدوء/حبيبي أنا مو قلتلكم إنه ماينفع أجلس معاكم أكثر من كذا وأبعد خالكم عن زوجته وأهله، وأنا لازم أرجع لأهلي وأنتوا كمان هتكونوا مع أهلكم أبوك وأخوانك وجدتك وماما ندى، صح أحنا مارح نكون مع بعض دايماً بس ذا مو معناه إني هسيبكم..بإذن الله هجيكم بإستمرار حتى في أيام المدارس وأنتوا كمان هتجوني والنت والجوالات الله يحفظهم قربوا البعيد وهيساعدونا وحياتنا هتمشي.
ياسمين بتوتر/بصراحه ياماما قصي.. يعني حاس .. إنك هتتزوجي وتبدي حياتك من جديد بدونا.
نقلت نظراتها بينهم بصدمه/أتزوج وأبدأ بدونكم! أنتوا من وين جايبين الكلام ذا؟
أشرت له ياسمين علشان يسكت وردت بسرعه/قصي سمع جده فاطمه بتكلم جده أروى عن خالي صدام والرجال الثاني اللي خطبك.
سألته بإستغراب/بتتنصت على جدتك ياقصي!
رد بدفاع/لا، أنا كنت جالس أذاكر وهيا أتكلمت قدامي يعني مو بالعنيه.
طالعته بهدوء/طيب مدام سمعتها فأكيد عرفت إني رفضتهم والموضوع إنتهى وأحنا وضعنا هيفضل زي ماتفقنا عليه.
إبتسمت ياسمين براحه/شفت قلتلك ماما مابتفكر في الزواج وهيا مرتا---
قاطعها قصي بشك/ ولو جوا غيرهم هترفضيهم كمان صح!
عقدت إيديها على صدرها وطالعته ببرود/وذا سؤال ولا أمر ياسيد قصى.
رد بإرتباك/أنا مو قصدي كذا أنا أبغى أطمن على وضعنا بس .
جوري بهدوء/وأيش اللي مو مطمنك في وضعك الحالي.
بلع ريقه بصعوبه / بصراحه أنا مابغاكي تتزوجي وتجيبي عيال غيرنا.
هزت رأسها بتفكير/أممممم ماتبغى! وذا على أساس إنك ولي أمري وأنا أصغر عيالك ولا أيش بالزبط!
مسك يدها برجاء/أمي الله يحفظك لا تفهميني غلط أنا--
سحبت يدها وقاطعته ببرود/ أفهم اللي هقوله لإني ماهعيده مره ثانيه، إذا في يوم من الأيام حبيت أتزوج فماهأخذ أذنك ياسيد قصي وهتلقى نفسك معزوم من ضمن المعازيم.. فهمت؟
طالعها بصدمه لدقيقتين قبل مايهز رأسه بموافقه جامده وتابعت بأمر/إذا أطمنت ياريت تروح تقوم بواجب ضيوفك.. وأنتي ياست ياسمين بيتهيألي عندك ضيوف تشوفيهم أنتي كمان.
خلصت كلامها وخرجت بدون ماتسمع ردهم وإلتفتت له ياسمين بحده/أنتا أيش اللي هببته دا! كيف تكلم ماما كدا وتأمرها كمان!
طالعها بشحوب/أنا موبقصدي أمرها.. طيب هيا ذحين هتتزوج ولا لا!خطبوها ولا لا!
هزته بعصبيه/ أنتا عليك عفريت أسمه زواج وخطوبه، ماما ذحين آخر شي تفكر فيه هوا الزواج وحتى لو فكرت فهيا حره وأحنا مالنا حق نمنعها.
سألها بعدم إقتناع/كيف مالنا حق ذي أمنا و --
قاطعته بغضب/كويس إنك لسا فاكر إنها أمنا وياريت ماتنسى دا الشي، بعدين ياغبي يابو مخ تخين هيا قالتياغبي إذا إذااا يعني ذحين مافي شي من اللي في بالك فسيبك من هرجك الفاضي اللي هيزعلها منا وخلينا نقضي اللي باقيلنا معاها وأحنا مبسوطين و--
كل ذا بتفكر! ماترد على سؤالي وتخلصني.
إلتفت للصوت اللي طلعه من ذكرياته وإتنهد بضيق وطالع في أبوه اللي كان يتهرب منه من يوم مارجع من صنعاء علشان لا يسأله عن أمه وأخبارها بس اليوم أبوه رجع بدري وكان هوا وياسمين لسا جالسين فأصر يتعشوا سوا وماصدق ندى وياسمين راحوا يجهزوا العشاء فأخذه وراحوا غرفته علشان يسأله، طالعه خالد بعصبيه/أنتا مبلم كذا ليه! قول أيش صار وأنتا هناك، سمعت شي غريب! أمك قالتلك شي عن عريس ولا شي!
رد بضيق/ماصار شي وماسمعت شي عن اللي بتقوله وقلتلك ماما ماهي حول الزواج ولا بتفكر فيه.
دار في الغرفه بتوتر وبشك/قصي متأكد من كلامك! يعني جدك مساعد ذا مالمح لجدك عبدالله ولخيلانك عن خطوبه وزواج؟
رد بثقه/أصلاً هما ماجلسوا غير أربعة أيام يومين الزواج ويومين قضيناها تماشي والكل كان مشغول ومافي وقت للي بتقوله ذا.
رد بتوتر/إن شاء الله يكون كلامك صح.
جلس جنبه وبتردد/ طيب أمك مابتجيب سيرتي قدامك أنتا وأختك! مابتقول شي عني!
طالعه بعدم فهم/شي زي أيش!
رد بشرح/يعني كيفي.. أيش مسوي.. سلموا على أبوكم، يعني أشياء زي كذا.
هز رأسه بنفي/ماعمرها قالت ولاسألت.
وقف وطالعه بحده/أنتا شكلك مابتركز معاها وهيا تهرج ولا مو معقول ماتجيب سيرتي ولو مره عالأقل.
دخلت ياسمين قبل مايرد عليه قصي وطالعتهم بإستغراب/بابا أنتا هنا! يلا العشاء جاهز.
خرج قصي بسرعه بدون مايطالع في خالد اللي حس إنه هينفجر من القهر.
،
،
،
،
،
الرياض، الثانية صباحاً
مس..اء الخييير يااا.. قطوه.
إلتفتت وشافت أخوها سلطان يترنح ويتكلم بثقل وراحت له بسرعه/أنت جنيت! وش جايبك هنا وأنت بهالحاله ومتى رديت من السفر!
رد بثقل/ذا بييتي ..يااغبيه.
سندته بصعوبه للمصعد وطالعته جناحه وبالقوه وصل لسريره وإرتمى عليه، خلعت جزمته وبتأفف/ أنت تبي تورطني معك! أبوي إن شم خبر ولاشافك بهالمنظر بيصلون عليك جنازه.
رد بضحكه/شم..خبر.. أبوييي..كلب ع--
قاطعته بإبتسامه/لااا أنت منتهي عالآخر، الظاهر السهره كانت حيل حلوه.
هز رأسه بنفي/حلوه..طل ..بعينك نفسهم ..كل يووم.
أتعدل وأشر لها تجلس جنبه وبهمس/أنتي .. ياكذااابه.. وين.. وين رفيقتك.. اللللي صورررتيها هااا ووين!
زفرت بضيق/بعدك متذكر!
هز رأسه بموافقه وتابعت /تدري جاتني تبكي وتعتذر وتقول سامحيني عمتي شذى وأنا آسفه و--
قاطعها بضحكه/وأنتي.. سامح..تيها يا.. حنونه.. شذى الحنووو.. نه.. غبيه..أنتي..غبيه..
إتذكرت كيف دخلت المطبخ بعد طلعوا البنات وفرغت علبة الملح في الأكل بعد ماقعدت رؤى ساعه تغيض فيها وتمدح في طبخ جوري بس الحيوانه رؤى قالت لها إنها سوت المرقوق والجريش وبدل ما الكل يحشوها ويعيبوا طبخها خرب طبخ ثريا والمدح كله راح لها.. وقتها حست إنها بتنفجر لو سمعت كلمه زياده في مدحها وقررت تحول السالفه لصالحها وتخرب بينها وبين ثريا بس للأسف محد صدقها ومن كثر قهرها ماأستحملت تشوفها وفي نفس الوقت تحذير أبوها كان بيرن في دماغها ومخليها على أعصابها فتركتهم وطلعت غرفتها وقفلت على نفسها و
هي بترد ..تتمسخخر.. عليكي.. وتقو..لين ..سلطااان ساعدني
طلعت من أفكارها على صوت سلطان وردت بحده/أوووه قلت لك باست رجلي علشان أسامحها خلص فكني من هالسالفه وأنساها.. بعدين شتبي بصورها! ماشبعت بنات! أنت مو مخلي لاداخل المملكه ولاخارجها والبنات اللي تعرفهم أكثر من الهم عالقلب و--
قطعت كلامها لما طاح عالسرير وراح في النوم بدون مايحس وبغيض/مالت عليك الحين شلون بكمل سهرتي بعد ماعكرت مزاجي بسيرتها.
سبت فيه وفي جوري وخرجت وصفقت الباب بقوه وحقد.
،
،
|
06-09-16, 07:04 AM
جديد مواضيع قسم القصص المهجورة والغير مكتملة
العرض العادي
