كاتب الموضوع :
فيتامين سي
المنتدى :
القصص المكتمله
رد: عشق بلا قيود للكاتبة شخصية خيالية
،
.
.
في المستشفى.. ،
أعادت لف الطفل بشكل مهمل لم تتقن كيفية لفه باحتراف كتلك الممرضه، تمنت لو أنها تعلمت ذلك من الممرضه.. كان سهلاً وهي تراها تلفه ولكنها فشلت في التطبيق ..!
حملته بعدما انتهت من لفه و وقفت أمام سرير والدتها وهي تحتضن اخيها المولود وتبتسم لها/شرايك ماما؟
ردت بابتسامه ذابله، قد ولدته باكراً بالقيصريه بسبب ارتفاع السكر وخوف الاطباء على تضخم الجنين/بسم الله عليه..ربي يحفظه
سلهام/يمه وش بتسمينه؟للحين ماندري وش نناديه،ابوي يقول الاسم عندك!
تنهدت وهي تتذكر والدها/مالله راد اني اسمي سامي على اسم ابوي.. لكن مكتوب اني اسمي ولدي الثالث عليه..
اتسعت ابتسامة سلهام/عاشت الاسامي يستاهل جدي يوسف
*لاحظت الذي يقف بجانب سريرها و ينتظرها تنظر اليه، خوفاً من ان تكون لم تعد تريده بعد الطفل الجديد،ابتسمت وهي تنادي/ووين سامي حبيبي؟ هاتوه.. ماشفته!!
ضحك عادل/هذا هو جنبك يمه..
ابتسم سامي وهو ينظر الى عينيها برجاء، مازالت تنظر اليه بنفس النظره الحانيه شعر بالامان وهو يمسك بيدها..
ابتسمت وهي تأمر عادل/ارفع سامي للسرير حطه جنبي
سلهام باعتراض/لا يمه بيوجعك.
اتجهت اليها ريم برجاء/تكفيين سلهاام عطينياااه
ابتعدت عنها وجلست بعيداً/اقول منااك بس..توه مايتحمل شيل وحط..روحي نادي الممرضه يالغبيه ماني عارفه كيف ألفه عدل..
مدت شفتيها بعبوس كالاطفال و ارخت نقابها وخرجت تنادي الممرضه لتصادف صيته التي رآتها تخرج من الغرفه المطلوبه..
صيته بتساؤل/انتي ريم صح؟
ريم وهي تستغرب حضورها/اي أنا.. هلابك صيته وين دلال
صيته/مش معي.. عند امك احد والا ادخل عادي
ريم/بس سلهام واخواني الصغار..ادخلي. انا رايحه انادي الممرضه وراجعه..
رآها تذهب بعدما راقب عينيها وسمع نبرة صوتها، ليست بطويله كثيراً بالتأكيد هي صغيره.. متى سيتخرج ليتوظف ويخطبها…جلس وامير بجانبه ينتظر خروج اخته..
،
.
،
لاحظت نظرات الوعيد منذ دخلت في عيني سلهام.. حاولت تجاهل ذلك ولكنها لم تستطيع اتجهت اليها وهي تقف عند سرير الطفل وكأنها تريد رؤيته وهي تهمس/شخبارتس سلهام؟
سلهام بضيق استأذنت واخذتها خارج الغرفه/وش تظنين باخباري ..امي ولدت وانا مبسوطه
فهمت صيته ان ماحدث لم يعجبها/علامتس زعلانه؟
بدون ان تنظر اليها/اذا خلصتي زياره تقدرين تمشين
استغربت نبرتها لها/تطرديني يا سلهام؟!!..وش سبب هالزعل هذا!! انا حبيت اساعد في لقاكم وبس اخوي يبيتس ويحبتس، وانتي مصختيها بالزعل والقطاعه.
سلهام وهي تذكرها بما تعرفه/وعناد يحبتس ويموت فيتس.. علشان كذا تغيرتي وصرتي تحبينه صح؟ واااو وش ذالسماجه هذي!!
صيته بضيق/لا تدخلين عناد بالنص..
سلهام/اووكي اسألي اخوتس.. ليه سلهام تزعل كل هالزعل؟ ووش يتوقع الشي اللي بيرد لها كرامتها ..ساعتها بيفهم، غير كذا ماعندي حكي زياده
قررت الخروج وتركها في هذه اللحظه/اجل سلام
.. ليدخل بعدها سعود الذي سمع نبرة سلهام الحاده، ليفهم لماذا طلب تميم ذلك الطلب..اعجبته وفهم خطأه في حق ابنته..ليناديها/سلهام
خافت. ولكنها تشجعت.. يجب ان يعرف انها ليست راضيه بردها لتميم.. يجب ان تدافع عن حقوقها وتحفظ كرامتها/لبيه يبه
بهدوء/خلي ريم عند امتس واخوتس وتعالي ابيتس بكلمة راس
ابتلعت ريق الخوف.. لكنها مصرّه على موقفها ..تمتمت بـ "ربِ اشرح لي صدري و يسّر لي أمري، واحلل عقدةً من لساني" ..
،
.
،
.
باتت في غرفتها تحترق بعدما عرفته.. كل ما حلمت به بات يتهاوا.. بعد تدخل الجده التي لم تتوقع وقوفها مع توق.. آه ليتها لم تتصل بها..لم تعد بيدها حيل سوا ان تشكك في أبوة حاكم لطفل توق..ولكن كيف؟!
اخذت هاتفها وهي تحاول الاتصال بصديقتها ساره التي سبق وساعدتها في مخططاتها..
انتظرتها ترد على احر من الجمر/الوه ساره!!
على الطرف الآخر من الخط/هلا منال..
منال بضيق/ساره اذا فيك تجين لي
ساره/لا منال والله ماقدر اجي.. ليه وش فيك؟
قررت منال بطلب ماتريده منها/ساره كل شي سويته علشان اخرب بيت هالتوق هذي ما مشى.. زوجها يثق فيها ثقه عمياء حسبي الله عليها.. حتى الصور اللي لعبت فيها وارسلتها ما مشت عليه.. ساره دبررريني البنت حامل وكلها شهرين ثلاثه وتولد عساها ماتفرح به... فكري معي بمصيبه توديها بداهيه هي واخوها اللي اسمه زوجي خله يموت بسجنه مقهور
لم تشعر بشي بعدما صفعها بكل قوته و يشد شعرها بكلتا يديها ويضربها بعنف/لعبتي بحسبت اختي هاااه.. قليلة خاتمه وماعندك ذرة شرف..
ضل يضربها وهي تصرخ من شدة الألم…
،
سمعت صوت صراخها واتجهت اليها بسرعه.. لم تشعر بنفسها وهي تستعجل خطاها.. لتدخل وتحاول إبعاده عن منال وتصرخ في وجهه/باااااس عبدالرحمن.. خلاااص.. شفيك عليها..
توقف عبدالرحمن بعدما اخذ هاتف منال من على الارض وهو ينظر لأخته بحرقه/ابعدي عنها يا توق خليني اشفي غليلي من هالحيّه الخاينه والله ماخليها
امسكت بمنال وابعدتها عنه وهي تبكي لم ترى اخيها بهذه الوحشيه من قبل/حلفت بالله ماتضربها..
ابتسم وبعينيه لمعة وجع وقهر وهو يعني منال/شااايفه كيف ماتبي لتس الوجع وانتي تأذينها؟
استغربت توق ما يحدث/وش السالفه؟
التفت عبدالرحمن اليها/انتي طاالق يا منال وتحرمين علي ليوم الدين.. انقلعي لبيت اهلتس..
دخلت ذوق الآن وهي تستنكر الطلاق/وشو؟!
جلست منهاره وهي تشعر بخسارة كل شيء..
تركتها توق وهي تفهم ماقاله اخيها.. لا يجعل اخيها يفعل مافعله الا لشيء لا يرضي الله ولا ضميره.. هي تعرف ان منال لا تطيقها ولكن لا تتخيل انها ستؤذيها ذلك الأذى الشنيع.. تسائلت تُرى ماذا ارتكبت منال في حقها لتجعل عبدالرحمن يثور ويطلقها..!!
.
.
،
خرج عبدالرحمن وهو يتصفح هاتف منال باهتمام و يرى اخر رقم اتصلت به.. سيتقصى حوله وسيجعل مشاري شاهداً على قبائح اخته، فهذه الامور تتعلق بالشرف ولا يجب السكوت عنها.. وان طلقها فهي مازالت ابنة عمه ويجب تربيتها وردعها..تفاجئ من المحادثات المطوله مع ساره وكمية الحقد التي تكنه لأخته وله هو.. شعر بالخذلان وهو يرى من أأتمنها على سر بيته تفضحه!! ..كيف لفتاه ناعمه مثلها ان تكون بتلك الكراهيه والقلب الاسود!!
اخرج هاتفه واتصل بمشاري مباشرةً ليقابله…
..
دخلت و جلست الجده على الاريكه وهي مصدومه مما فعله عبدالرحمن بمنال، هي تعرف تماماً ان عبدالرحمن لن يضربها الا لأنها تستحق ذلك ألتفتت الى منال مستفسره وهي تراها تلملم بقايا اشيائها بدموع/وش انتي مسويه يا منال… ليه ضربتس عبدالرحمن و طلقتس مره وحده؟!!
لم تجد جواباً كانت تفكر بما سيحدث لها.. قد جنت على نفسها ودمرت بيتها بنفسها..بالتأكيد لن يتركها عبدالرحمن حتى يخبر مشاري بما فعلته،نست اوجاعها وما احدثه ضرب عبدالرحمن وهي تفكر بمردة فعل مشاري هي تعرف تهوره. .. ..
ألحّت الجده في سؤالها/علامتس سااكته؟ تكلمي!
التفتت اليها بغضب، وهي تشعر بالاضطهاد/مالتس دخل.
استغربت من ردها الوقح/دام ذا علمتس فتستاهلين اللي سواه فيتس يا قليلة الادب
خرجت الجده غاضبه.. لم تتوقع ان منال بهذا المستوى..
.
،
.
،
.
،
.
مساءاً…
ابتسمت وهي تنزل من الأعلى وترى والديها معاً اخيراً، يتحدثان طوال الوقت و يجلسان معاً امام التلفزيون ! .قهوتهما باتت واحده.. باتت لهما حياتهما الخاصه وكأنهما للتو تعرفا ببعض!.. ابتسمت لوالدتها التي تغيرت للافضل بتغير والدها فهي تستحق ذلك بعد سنوات الصبر..انعكس ذلك حتى ملامح وجهها الذي لطالما ارهقه الهجر كثيراً..
تسائلت كيف سامحته؟! من الواضح ان والدتها لم ترغب في العيش بقية حياتها وحيده.. يكفيها من الوحده ما قد عاشت من عمرها الماضي.
لمحت صيته قادمه فابتسمت/اخيراً صحى احد منكم
سلّمت وقبلت رأسيهما وهي تجلس/صبحكم الله بالخير
ابو تميم/صبحتس بالرضا.. حي الله صيووت.. وانا اقوول اليوم البيت زايدن نووره.. اثرتس عندنا
لم تحب تعكير مزاجه بموضوعها،فابتسمت/نووركم يالغالين
سكبت لها فنجان قهوه وقدمته لها/تقهوي يا بنتي..
تسائل بفضول/الا تميم وينه؟..نايم في بيته والا عندنا
نزل من الاعلى بكسل وهو يرد عليه/لا نايم عندكم
استغربت والدته/هماك بترجع سلهام!! ،والا انشغلت مع أمها الله يقومها بالسلامه
رد بضيق/ما راحت علشان أمها وبس..
استغرب ابو تميم/اجل وش عندها
تميم بابتسامه/هذا انا بروح اليوم واشوف وش عندها بنت سعود..
كتمت ضحكتها وهي تراه يتذمر/والله ان كانك تبيها صدق يا ولدي لازم تراضيها.. والا ترى البنات وااجد كبها وكلن يشوف نصيبه
ابو تميم/امك صادقه و انا اقول روح لهم و شوف وش تبي وبعدها قرر انت.. يا تراضيها وتجيبها يا تكبها وقفل هالسيره اللي طالت ودور نصيبك عند غيرها وخلها تشوف نصيبها.
لن يتخيل لمجرد الخيال ان يتركها .. سيجاري عنادها حتى النهايه، و لن يلوذ بها أحدٌ غيره وان افنى عمره محاولاً إرضاءها..احتسى فنجانه وهو يفكر بما يريد منه عمه..!!
وقفت صيته تريد الذهاب للمطبخ/بروح اجيب الفطور..
ام تميم/انا وابوتس سبقناكم.. افطري انتي وتميم
قرر اللحاق بها/اخذيني معتس
التفت ابو تميم لام تميم/وش عندهم؟ انا حاس ان صيته فيها شي
بقلق/والله بعد انا حاسه بهالشي ..شوفت عينك هي من تزوجت مانامت عندنا غير البارح!
شعر بالذنب/الظاهر اني خربت حياة بنتي بتزويجها من عناد
هذا تطور آخر ان يشعر بما يفعله بهم من قرارات/اللي صار صار ولا تنسى ان الزواج قسمه ونصيب يا خالد، وبعدين للحين ماندري وش صار..يمكن ما فيها الا العافيه
اخذ رشفه من فنجانه وهو يتمتم/عسى خير
..
فرحت بلحاقه بها، تريد الحديث معه والخلاص مماتريد قوله.. لم تعد تطيق الانتظار..
وقف وهو يراها تبحث دون جدوى/صيته وش فيتس واناخوتس!
ألتفتت اليه بارتباك/هااه.. ادور كيسة الخبز
سحب كرسي من الطاوله وجلس وهو يبتسم/الخبز قدامتس علئ الطاوله.. اجلسي وفضفضي لي
خافت/وش افضفض به.. انا.. م
تميم بإلحاح/لا يكون عناد سوالك شي؟
لم تعد تستطيع التهرب، لتجلس، فقط تريده هو/انا طلبت الطلاق من عناد.. مابيه ياخوي يعنك ان كل يوم اعيشه معه ينقص من عمري سنه..
صمت وهو يتفهم.. لم ينصدم، ابتسم بحنان الاخ/لا تخافين وانا اخوتس..ريحي نفستس وما حاصل الا اللي تبينه.. انا معتس، ترى منتي بلحالتس..وامي وابوي خليهم علي بفهمهم.
اخيراً شعرت بالراحه وابتسمت/الله لا يحرمني وجودك
صمت وهو يفكر لو رفض عناد الطلاق.. سيجبره على الخضوع لفحوصات تؤكد ما تقوله صيته وبذلك يكون الطلاق من صالحها..
قررت الحديث عما قالته سلهام/امس رحت ازور زوجة عمي سعود.. وشفت سلهام..
لم يعلق، فضّل السماع.. فتلك قد ارهقت قلبه كثيراً..
اكملت صيته/كانت معصبه حييل من اللي صار.. لدرجة انها زعلت مني.. عمري ما شفت سلهام تعاملني بهالقسوه!
وقف وهو يعزم الذهاب/انا طالع.. تبين شي
وقفت معه وهي ترى عدم رضاه/بتروح لها؟
.
،
.
،
.
،
.
على الطريق السريع مابين الشرقيه والرياض.
في جوله له على سيارة امن الطرق حول نقاط التفتيش المكثفه التي تطوق المنطقتين.. لن يدع لسطام فرصه في الهرب..
اخذ جهاز اللاسلكي ليتحدث لعمليات امن الطرق ويملي توجيهاته كالعاده..ثم اغلق جهازه وهو يعقد حاجبيه/لا يالقهر للحين ماطرحنا سطام..!
حاتم بثقه/ماعليك… بنطرحه.. وين بيغدي يعني؟ المنطقه كلها محاصره
نظر الى ساعة معصمه وهو يتأكد من الوقت/ صدقني ما اختفى الا انه فيه احد يساعده.. يلا خلنا نرجع مركز القياده ونشوف.
حاتم باهتمام/والله احتمال كبير
لمح تنبيهات الواتساب لديه وابتسم بصمت..
حاتم بابتسامه/ وش اللي قلب هالوجه للابتسامه ونسنا معك ياخي
حاكم بفخر/براك جاي فالطريق ان شاء الله
استغرب حاتم فهو يعلم بامر الطلاق وكان شاهداً من ضمن الذين حضروا طلاقه في المركز بسبب بجاد/مبروووك الله يوصله بالسلامه
مازال مبتسماً/الله يبارك فيك
سأل بفضول فهو رفيقه ويمون عليه/عسى الامور بينكم زانت وكلها بخير اجل
لم تتغير ردة فعله مازال سعيداً/لا والله.. للحين عند اهلها..
استغرب/منت مرجعها ؟
بهدوءه الواثق/يا يرجعونها هم ويزيل سوء الفهم والمشاكل. والا بصرها… اما الولد لي سواء قعدت امه هناك او رجعوها.
قرر حاتم الحديث بصراحه/تبي الصدق والله لو اني مكانك يا حاكم معاد أرد اختهم لين يجون لي ويتعذرون بعد… اللي سووه بك ماهو بشوي وقدام الافراد والمركز كله!!
قرر الصمت.. فهو يتوق لذلك اليوم الذي تعود فيه زوجته لبيته وليستقر في حياته ويرتاح بعد كل تلك العواصف.. لكن جل ما يفكر به الآن التخلص من سطام..
.
،
.
،
.
،
منذ عشر دقائق وهو يجلس مع عمه ويحتسيان القهوه.. قرر فتح الموضوع الذي قدم من اجله.. فبادر بالسؤال/هاه يا عمي بشرني.. سألت سلهام؟
اخذ رشفه من فنجانه وهو يفكر ويرتب ما قالته سلهام ويحاول تذكره، ثم وضع فنجانه وهو يلتفت الى ابن أخيه/يا ولدي.. الزواج قسمه ونصيب..وحياه محتاجه الرجل الهاادي والرااكز.. العصبي هذا ما ينفع يأسس بيت ويتزوج لانه بيتعب بنت الناس اللي بيتزوجها وماهو بمستانس بحياته..!
خاف كثيراً من هذه المقدمه التي جعلته يبتلع ريق القلق/عمي انا قد الزواج من بنتك.. ومستعد ارضيها باللي تبيه
قرر سرد ما قالته ابنته وان كان ضرباً من الجنون.. ولكن هو حقها/و سلهام ماعندها مانع ترجع لك لكن بشروطها.
توتر مما سيسمعه قبل سماعه/تامرني أمر..
تحدث وهو يداعب سبحته/هم ثلاث شروط ماغيرها.. مهر جديد و حفلة شبكه وبعدما تطلع امها من الاربعين تكون حفلة الزواج ..وبس
رفع رأسه وهو متفاجئ من الطلب، المده طوويله كيف سيظل اربعين يوماً اخرى من دونها.. طن انه سيستعيدها اليوم، تنهد/متى بتكون الشبكه؟
ابتسم سعود فسؤاله يعني قبوله الشروط/بعدما يكمل يوسف اسبوعين ونتمم له.. بتكون الشبكه.. لكن لين يومها ماتشوفها ولا تتكلم معها..هذا شرطها
اخذ فنجانه وهو يرتشف منه ويحاول كتم غضبه من شروطها، ولكن مابيده حيله، سيفعل ما سيرضيها/ما قالت كم المهر؟
سعود بعد تردد فهو قد عارض ابنته على المبلغ ولكنها ألحت في طلبها والا لن تعود لتميم/200الف تقدمها مع الشبكه
دهش من هذا الرقم الخيالي بالنسبه لمهر وهو قد استعادها أصلاً ..! زواجاً ومهراً آخر.. هذا كثير جداً !!..فعلاً رضاها باهض الثمن لم يتخيل انها بتلك الغطرسه والغلو!!
لاحظه سعود اطال سكوته/انا قلت لها انه بيعجز عن المهر بس هي أصررت.. واعتقد ان حقها الرضاوه عليك.. ان كنت صادق و تبيها.. لكن دامك ماتقدر..
رد بثقه وهو يخفي غضبه من شروطها التعجيزيه التي تحاول من خلالها كسره/تبشر بعزها...تستااهل بنت عمي
ابتسم سعود وهو يأمر ابنه بتقديم العشاء/على خير ان شاء الله...
احكم قبضة يده على اصابعه ثمن رجوعها هذا سيفلسه، لكن لن ينكسر ابداً..حاول التفكير بما سيفعل..
.
،
.
صوت ضربها قد سمعه القاصي والداني.. لم يدع فيها عظمه حتى خدشها وسالت الدماء وهي تشعر بمغص شديد تبعه نزيف لم تعد تشعر سوئ بألآم الظهر والبطن وهي تترجاه/تكففئ يا خوي خلاص بمووت والله بمووت..
دفعها عنه بقوه لينصدم من كمية الدماء النازفه/مووتي تكفين ريحيني منتس
دخلت والدتها لتمنعه عنها وتتفاجأ بوضعها/مشااري شسوويت باختك؟
خاف وهو يتجه اليها بصمت.. ويقف مكانه بعيداً عن الدم/!!
حاولت الرؤيه ولكنها فقدت القدره وهي تشعر بفقدان قوتها والكثير من دمها.. لم تشعر بيدها ..شعرت بالخدر يتسلل اليها وهي تتمتم لوالدتها/بموت يمه بموت <<فقدت وعيها
ألتفتت الى مشاري وهي تبكي/مشااري ألحق علئ اختك يا ولدي تكفى
لم يحرك ساكناً وهو يقسّي قلبه، فهي قد ارتكبت اثماً تستحق عليه القتل.. شاهد والدته وهي تأتي بأغطيه وتلفها وتنادي الخادمه لتمسح اثار الدم ..رأى والدته تطالبه بحمل اخته فاستجاب رحمةً بها ليس بمنال.
،
.
،
.
،
.
اليوم الثاني..
بعد المغرب و بعدما افطر الجميع صيام ثالث ايام العشر ..
يقف في غرفة جدته ويراها تتأهب للخروج ويتضح أنها جاده فيما تقوله/اسمعني يا راجس يا ولدي.. انا اخترتك من بين اعمامك لأني اشوف فيك جدك فهد الله يرحمه.. ابيك توديني لمشوار مهم..
استغرب ويبدو ان الأمر مهم/ابشري بس وين ناويه تروحين يا جده؟
الجده/ابي اسيّر على حاكم البراك العود.
اعترض راجس/وليه تروحين له يا جده وش الداعي.. اذا على زوج عمتي، هالشي علي انا وعمي عبدالرحمن ناويين نروح له ..والله يعيننا على تخابيص عمامي.
الجده/هالمشوار مهم.. لو ماسويته مارتحت.. قدام يا ولدي جعلني مابكيك.
امسك بيدها وهم يخرجون بدون ان يخبروا احد..!
خفق قلبها وهي تتجه إليه..نسبة الادرينالين تزداد باقتراب لقاءها به ..حاولت مرار ترتيب شهيقها وزفيرها.. حتى لاحظ عليها حفيدها/جدتي فيك شيء؟
تنهدت و كأنها تعيد نظام تنفسها من جديد/لا يا قلبي انا بخير.
..
،
.
،
.
في المشب.. يجلس ويبادل تلك المشاكسه احاديثها التي لا تمل ومعهما ام حاكم .. تأتي وصايف كل اسبوعين وتقضي هنا اسبوعاً بعدما ذهبت وصايف لمنزل زوجها مجدداً..ستظل هنا حتى بعد العيد..
ضحك وهو يشير لأم حاكم/يا مها خذي ذالبنت عني اقلعيها برا ..
ام حاكم وهي تضحك/يا عمي تكفى خلها تعطينا من بنات سداح.. وش ورانا
عجايب وهي تسكب له فنجان قهوه/الله الله جزااي يوم اني أكب رجلي فالرياض واجي أونسكم انا وولدي!!
الجد/وين هالولد اللي كل شوي فالشارع.. انتبهي عليه يا بنتي
عجايب/شوفوا هالشويب كيف يغير المواضيع.. شكلي بشتغل خطابه وبدور لك بنيه ام 40 تجلس معك، وازوج أمي مها لشاب ابو 20 يدلعها
ام حاكم وهي تبتسم/بيّض الله وجهتس ..عاد ابو 20 ماقصرتي والله..
عبس الجد وهو يمازحها/افاا بتزوجيني عجوز؟ لاا ماخذ اكثر من 17
عجايب وهي تميل شفتيها باستنكار و تكمل مزاحها/احممد رربك بعد من تبيك يا هالشويب هااه!!
رفع عكازه.. وهو يحاول ضربها/انا ذالليل بذبحها جووديها لي يا مها جووديها
رن الجرس.. والتف الجد الى عجايب/يلا انقلعي داخل ..بيجوني رجال.. معاد ابيتس تقهويني
تخصرت وهي تصغّر عينيها/معليه يا حويكم بيروحون الرجال بعد شوي وبتقعد تناديني
ضحك/وبتجين غصب عنتس ..يلا افلحوا داخل.. وخلوا محمد يدخل الرجال.
دخل محمد وهو يركض/جدي جدي .فيه حرمه تبيك برا و
التفتت عجايب الى جدها/يا وجه الله يا حويكم ..حريم من ورااانااا؟!!
محمد وهو يكمل/هي معها رجال..
ابتسم الجد واشار لام حاكم/روحي داخل و قلطوا المره عندكم.. خلني استقبل الرجال واشوف وش العلم..
لحظات ليدخل راجس وهو يبتسم لرؤية ذلك الرجل الوقور وذو اللحيه البيضاء الطويله…يبدو نحيلاً وطويلاً وهو يقف ليستقبله..قبل رأسه وهو مازال يبتسم/مساك الله بالخير يا عم.
بادله الابتسامه وهو يرحب به/يا هلا مساك الله بالنور اقلط يا ولد..
جلسا وبدأ محمد بتقديم القهوه للضيف.. وبعد مرور الدقيقتين قرر الافصاح عن نفسه/معك راجس ابن سلطان بن ناصر الصارم.. و اللي جت معي هي جدتي الجازي طال عمرك..
تفاجئ وهو يسمع ما يقوله راجس .. فقط توقف عند ذكر إسمها "الجازي"..!! مالذي من الممكن ان تأتي لأجله وهي قد رفضت لقاءه تلك المره..!! لماذا تأتي بنفسها لابد وأنه شيء كبير وأمرٌ مهم دفعها للحضور إليه اليوم..!!
] يوم أفترقنا وزاد الصدّ فـ الهوّه
أبكي فراقه وهو يبكي على فراقي !
اللي فرّقنا حيَا وسلوم ومروّه
ماهيب نزوّة هوى في مجتمع راقي !
مالت بي أيام عمري والعمر توّه
إليا ذكرته اضيع وتنشفّ أرياقي !
ياما وقلنا يا لو ّ الوقت يا لوّه
ما كان قفّى زمّنا والله الباقي !]
.
… .
يتبع..
قراءه ممتعه..
|
19-12-15, 12:11 AM
جديد مواضيع قسم القصص المكتمله
العرض العادي
