..ان شاء الله تستمتعون بالقراءه..
..البارت الثاني والعشرون..
بعدت عن الباب كم خطوه وانا اطالع فيه
اول مره اشوفه بهذي الشكل غير كليا كليا عن الثوب
لما مشى بتجاه الباب يعني بتجاهي مشيت لمكاني وانا احس بتفاهمنا جاء بسلاسه وان حياتنا راح تكون بسيطه بدون عقد
لان مااحتجنا لتفكير بكلامنا ووقفت شوي بعيد عن الباب حتى دخل الاكل سحبه لجلستنا في الصاله
جلست ع الكنبه وجلس هو ع الكنبه الفرديه الي جنبي سميت بالله وبديت اكل
واستمر السكوت فتره ماادري احدد شعوري بالضبط بثانيه احس ان سكوتنا مريح ودليل ع تعودنا بعفويه
وان احنا مانحتاج نتكلم عن شي كل شي واضح
بس بثانيه ثانيه احس معقوله في اول يوم مانلقى موضوع نتكلم معقوله يعني مافي شي مشترك
بعدين حتى ماعلق ع اي شي ومااتذكر انه قال شي من جينا هذي نظرته وعن الحياه الي بنعيشها سوا
وعن التفاهم في الايام الجايه
قلت بسرعه وبدون تفكير علشان افتح موضوع""مادخل ابوك في الزفه صح""
حرك راسه بطريقة ايوه وهو يٲكل باندماج استغربته
نزلت الملعقه وطالعت فيه وقلت""ليش""
ذيك المره طلب نجيه بمطعم والحين يٲكل بهذا الشكل حتى ماطالع فيني ولا ثانيه
وجسمه مايقول انه مثل نظرتي عنه
قال وهو يٲخذ كوب العصير""ماقدر""
وشرب يعني بس هذا كلامه يبغى يختصر حتى كلامه
رجعت اخذت الملعقه يمكن هو طبعه قليل كلام بس متذكره لما دخلت مكتبه وفي المستشفى ماكان كذا مايقول حرفين ع بعض يمكن تعبان ويبغى ينام
ولا يمكن مااعجبه كلام عبدالرحمن ولا يمكن يفكر بشي اشغله
اكيد العمل مو يقول ان زوجته تركته بسبب عمله هذا الدليل
اذا معاها حق اذا وحده تبغى حياه حلو ومرحه ماله داعي تتزوج من الاساس اهم شي انها ماتعتمد ع احد
رجعت نزلت الملعقه وكذا جاني احساس قوي يشدني اثبت وجودي عند ليث فقلت له بعد تفكير لثانيه""كيف الشغل اليوم""
اذا يحب هذا الموضوع ماطللب الا عزه اهم شي يتكلم لو شوي بس ابرد قلبي ويتوكل ع الله
قال ""تمام""
عقدت حواجبي اش فيه مضرب عن الكلام حتى احقق الي يبغاه اش بيطلب مثلا كل شي موجود عنده واكثر بعد
والحين انا صرت مثله مااحتاج شي وراح اكون مكتفيه بشغلي وبنفسي
علشان افكر بالشغل دايما البدايه يتطلب تفاني اكثر ووقت اكثر ومتعه اكثر
وفي شي غير من ان كل وقتي له لانه هو مستقبلي وراح اقلم نفسي ع هذي الحياه او نقول بالاصح هو يتٲقلم انه بيساعدني
ابتسمت هذا الموضوع دايما يفرحني وشلون عاد اني عندي اجازه اسبوع وبعدها ارجع العمل بطريقه ومكانه غير
قلت وانا اللتفت اطالع فيه""وين بنسافر""
رفع راسه الي من اول مارفعه ومركز مع الاكل ماادري متى اكل اخر مره لدرجة مسوي كذا
وقال""برا السعوديه(وسمى الدوله)""
وسعت ابتسامتي اكثر اخيرا خلينا نشوف العالم ونستمتع
مو قادره اصبر لبكره وتو كنت بسٲله وين بس شفته
قام وسحب الاكل بعد وطلعه من الباب ورجع سكر الباب وقال""موعد رحلتنا العصر خليك من بدري جاهزه""
قلت بفرحه بس طبعا مارح ابينها له""ان شاء الله""
دخل الغرفه شكله بيغسل يده مع انه اكل بملعقه يعني مثلي ماراح اغسلها
بس مره وحده قبل ماانام افرش اسناني ولا اكيد بينام دامه اكل كذا اكيد انه مااكل ولا نام انشغل
بس مشغول فٲيش بلله كل شي يحتاجه كلمه منه بس ويصير
طالعت بالساعه شكله صلى لما انا كنت بالحمام ايوه صح حتى لما سمعته وضيت قمت تمضمضت وصليت الفجر بعبايتي
وبعدها فسخت عبايتي ومشيت ووقفت قدام المرايه طالعت بشكلي تصدقون اني مااستحيت منه لما شافني بفستان الزواج ولا الحين
يعني حسيته اخذ نظره عاديه طبيعيه مو كٲنه اول يشوفني وخلاص اكتفى
كل العرايس يكون هذا اليوم اليوم العالمي لتوتر بس انا ماحسيت فيه عارفه كل شي بيصير وحاسبتها صح
لدرجة توقعت انه يكون بحاله وانا بحالي بس طبعا مو من اول يوم في بالي في البدايه نتعرف ع بعض ونسولف في كل المواضيع وبعدها تكون علاقتنا عاديه مريحه
مو مثل الحين حاسه انه مسكر ع نفسه عادي يعتبرني زميله في في البدايه
اكيد اشتغل مع بنات مستحيل يكون هذا اسلوبه
بس يمكن يبغى يعلمني من اول يوم شلون تكون علاقتنا
فرجحت هذا السبب اكيد علشان كذا فهمت وجلست بالصاله ع التلفزيون الي خفضت صوته
كم ساعه من الحماس من السفر ومن التفكير اش بسوي زاد حماسي
ودخلت الغرفه بهدوء
كان نايم ع طرف السرير طيب اذا معاي النوم اش اسوي المفروض يكون عنده ذوق ويخلي السرير لي
والكنبه الي بالصاله له
لما فتحت الدرج بطلع فستاني علشان ماانساه طلع الدولاب صوت خفيف خلى ليث ينقلب لجهه الثانيه
فرجعت سكرتها اذا صحي ماله داعي ازعجه واحنا مابنطلع الا العصر
رجعت طلعت الصاله وجلست ع التلفزيون وانا احس ان نفسي اجلس ع الاب اكثر من التلفزيون
بس مو موجود هنا مع كل هذي الكماليه صار عدمه غريبه
بعد ساعه ثانيه اخذت لفه في المكان وانا اطالع في كل شي بتركيز
يازين الفلوس تخلي الواحد يستمتع مو مثل اول
انا الحين تغيرت وتغير اسلوب حياتي
رجعت جلست وانا اطالع بالساعه غصب الوقت يمشي متى نسافر
اساسا ماقد طلعت الطايره يعني منجد الاستمتاع بكل خطوه
ابتسمت وانا اتسٲل كل العرايس متحمسين مثلي
طالعت بالساعه بقي ساعتين لظهر والحين تو بديت احس بالكسل نفسي انام شوي
مو بس علشان كسلانه الا علشان يمر الوقت وعلشان هذا السبب يمكن نمت ع الكنبه ساعه ونص
وصحيت وانا مصحصحه لاني سمعت اذان الظهر
لما صحيت مع اني مااصحى بسرعه ولا نومي حساس
دخلت الغرفه اتٲكد انه موجود ولسى كٲن نايم اش كان يسوي امس علشان كل هذا النوم مو معقوله هذا نظامه الطبيعي
فتحت شنطتي بعد ماجلست ع الارض طلعت لي لبس عادي بنطلون وكذا
علشان السفر والله بس علشان وعدت امي اول اسبوع ماالبس بجايم
وهي ع بالها من نفسي راح اتركها بعدين ماتدري بشي
اخذتها ودخلت الحمام اخذت دش سريع مره ولبست ووضيت وطلعت صليت ولسى ليث نايم اقولكم مسوي شي كبير امس
قلت""ليث صلاة الظهر""
فتح عيونه بدون مايتكلم
طلعت من الغرفه يلله معد بقي وقت ابغى نطلع من هنا متحمسه من امس
هذا فايدة المظاهر ولا كان ماسافرنا اذا الكل يدري
وبدل كذا داومنا مع اني احب العمل بس احب استمتع بكل شي وبذات اذا كٲنت عندي الامكانيه
عشر دقايق يمكن شفت ليث طالع من الباب بدون مايتكلم طالعت فيه وانا مستغربه مزاجه لايكون كذا مللول ماينجلس معاه ماعنده الا شغله فقط
نبغى نستمتع بهذي السفره مو يمشي جنبي سٲكت
ماتوقعته كذا مع ع بالي بس كذا بالشغل مو كذا شخصيته
لما رجع من الصلاه جاب الغدا معاه اش فيه هذا زياده ع الملل عنده روتين
ليش كذا مو حلو كل هذا الترتيب الظهر خلاص غدا رز والساعه وحده
طيب ابغى افطر الحين
بس ماتكلمت ساكته واكلت بعد مو من الحين اتكلم
وطول الاكل مافي ولا صوت مجرد صوت الملعقه حتى التلفزيون سكره لان الريموت كان عنده ولا علقت بس لما قربت اشبع والسكوت نفسه وعدم الاهتمام نفسه
كٲني مو موجوده ع الاقل يراعي شعوري وهذا اول يوم لي
شلون الباقي اش فيه احس بديت اتنرفز منه ومن الوضع كله
اش هذا الصمت الي عايش فيه طول حياته ولا انه مايبغى يكلمني انا بالتحديد
بس ليش انا
عند هذي الفكره عصبت احنا متفقين اتفاق نكون قدام الناس طبيعين بس كيف يصير هذا وهو حتى مايطالع فيني
اش فيه ندمان ع هذا الاتفاق حتى لو مو ع كيفه انتهى الموضوع
وراح نستمر فيه كذا
قلت وانا اترك الملعقه والف عليه بعصبيه""اش فيك مو معنى ان احنا بيننا اتفاق معناه تتجاهل وجودي ولا تكلمني كيف بنستمر كذا حتى بدون ود بيننا""
..نهاية البارت..
..عافاكم..
..عجايب..
الحمدلله.



..بأذن الله لي حسنه ولك حسنه..
(قال رسول الله ﷺ "" لأن أقول سبحان الله والحمد لله ولا إله إلا الله والله أكبر أحبّ إليّ مما طلعت عليه الشمس "" رواه مسلم)

ان شاء الله تستمتعون بالقراءه..
..البارت الثالث والعشرون..
لف راسه وطالع فيني بنظره ذكرتني ع طول انه رئيسي بالشغل
وانه الحين يطلب مني اسكت بهذي السلطه الي عنده
ووضح لي بالتمام مكانتي وان كلامي هذا وعصبيتي وين يحطها بالنسبه له
ورجع يكمل اكله بدون مايتكلم
كل عصبيتي اختفت بثواني معقوله كل هذا خوف مستحيل
مااحس اني خفت كل الي حسيت فيه صغر نظرته عني
وليش هو الي ارسل لي في مكتبي انا بالتحديد اروح له ويحكي لي مشكلته وحلها عندي
وانتظر ردي اسبوع وكٲن ظاغط علي لما نفذ الانذار وخصم الراتب
يعني كٲن مصر والحين يبين لي انه حتى رئيسي هنا
مو ع كيفه
بعد هذي الخطوه زادت ثقتي بنفسي
بس الشي الي ماني واثقه فيه وهو تنفيذه لشروطي
اول مانرجع من السفر راح اقوله يبدا بالبيت وبشغل ابوي
انا الحين سويت الي علي بقي الي عليه
واذا رفض راح افضحه قدام الناس واتوقع يعرف هذي النقطه ويخاف ع سمعته
رجعت ظهري وقلت ببرد بعد هذي الافكار""انا اتكلم بمصلحتك بس عادي مو مشكله انت الي تبغى كذا""
يعني انه تهديد مبطن
اذا بعد وقت مااعجبك اسلوبي بس صدق وينه ووين اخلاق ابوه ممل بقوه
قمت دخلت الغرفه بتٲكد من اغراضي حطيت العبايه الي لقيتها ع الكرسي في الشنطه
وطلعت عبايه ثانيه وسكرت الشنطه ووقفت شنطتي الثانيه ماادري وين الي مجهزتها لسفر
بس مستحيل اكلمه واسٲله اخذت عبايتي وطلعتها معاي الصاله يعرف كذا اني جاهزه بدون مااتكلم
ماادري اش سالفه الكلام معاه بس مع هذا كله انا متحمسه لسفر ومطنشه كل شي ثاني
ابغى استمتع لاخر درجه ماقد سافرت ابدا يعني تجربه جديده لي كل شي
بس اعرف واسمع ان لازم تكون في المطار قبل الرحله بساعتين
وهو قال عصر يعني مافي وقت
كان واقف عند الباب يكلم احد وبعدها سكر الباب ودخل الغرفه اكيد يتجهز وناسه
مع ان كملت يوم كامل صاحيه بس ابدا مامعاي النوم ابدا الا نشيطه
قمت لبست عبايتي وخليت الطرحه ع كتفي لما تٲخر تذكرت اني حطيت شوية مكياج
في الصاله مرايه قمت وطالعت بوجهي ومسحته ورجعت لميت شعري ورجعت جلست
وهو لسى شكله يٲخذ دش طالعت بالساعه الساعه ثنين الا ربع تقريبا
قمت اعد الثواني ماصدقت لما طلع من الغرفه وهو يسحب شنطتي وشايل شنطته
سبحان الله من قوة التفاهم والعشره الطويله صرنا مانتكلم نفهم بعض بدونه مانحتاجه مثل الناس
لفيت طرحتي زين وبهدوء علشان اثبتها وعلشان ينتظرني مثل ماانتظرته
اذا سالفة انه رئيسي هنا واني لازم احترمه و اتحمل تصرفاته وكلامه وقراراته فهو غلطان
انا زوجته غصب عنه يعني بنفس مستواه لا هو رئيسي ولا متفضل علي بيننا مشاركه
مشيت وانا رافعه ذقني وطلعت وراه وبما ان احنا بالدور الاول وصلنا السياره بسرعه ركبت قبله
لانه كان يحط الشنط بشنطة السياره طالعت حولي مااتذكر قد شفت هذا الشارع ولا مريت منه
ياسلام ع الحياه الجديده
ركب ليث وحرك السياره ابوه عنده سواق ليش هو مايٲخذ له سايق ويرتاح
ماادري ليش اقارنه بٲبوه ع طول يمكن لانه الوحيد الي اعرفه من عايلته
الا اعرف امه تذكرت امي المفروض اكلمها بس حماسي لسفر خلاني افكر اني ادق عليها لما نوصل
علشان اطمنها مره وحده
طول الوقت بالسياره سكوت حتى دق جواله وانطلق يتكلم بالشغل واكثره يقول اسماء رجال وش رايهم
والي يكلمه هو الي يتكلم كثير
وسكر ورجع الهدوء معقوله هو كذا هادي وممل كذا مايعرف المتعه
كل الي يتحلى فيه الصبر
لما تٲخرت عليه اليوم ماتكلم ولما كلمته بعصبيه بعد اعطاني نظره وماتكلم وبعد يوم الزواج سل......
فتحت فمي بصدمه لما تذكرت شي
واحاول استرجع علشان اتٲكد قلت بصوت شوي منخفظ من الاحراج""نسيت فستاني في الدولاب""
وهنا منجد بان صبره رفع الجوال واتصل ع الفندق وطلب يحفظون الفستان عندهم كم ساعه وبيرسل لهم واحد قال اسمه محمد وسكر
ورجع اتصل ع محمد هذا وقال له وقت مايخلص شغله يروح له
وسكر الجوال وحطه وانا انتظر تعليقه او مسخرته علي
توقعت انه ينتظر الزله علي
بس ماتكلم حبيت صبره هذي المره لانه مااحرجني ومشى الموضوع كٲنه شي طبيعي
بس اختفى حبي لصبره لانه خربه بعد ماقال""كٲنت من ضمن وصايا ابوك انتبه لاغراضك لانك تنسينها""
طالعت فيه اشوف يعني اش المقصد من هذا الكلام بس كان يطالع بالطريق بطريقه طبيعيه
رجعت طالعت قدام بدون مااعلق ع كلامه انا مو من عادتي انسى اغراضي انساها نادرا تصير لي
اساسا ليش قال له بعدين حتى لو ذي من صفاتي وش عرفه ابوي فيها وبصفاتي وهو مايشوفني كثير
مليون بالميه كذاب والكلام من راسه اكيد
ماعلقت ع كلامه لان بصدق يعني قالها بطريقه طبيعيه مو يتمسخر علي
ولان ماابغى اتكلم معاه من الاساس
ولان حتى لو رديت عليه ماراح يرد فٲختصر ع نفسي من البدايه
وقف السياره ونزلنا وانا اطالع في كل شي بنظره استكشافيه لكل شي جديد
جلسنا بالانتظار ننتظر النداء لرحله اخذت نفس عميق وانا اطالع بالناس
لما حسيت فيه يتحرك اللتفت اطالع فيه لقيته مطلع لاب وجالس يشتغل فيه بتركيز
رجعت طالعت بالناس وانا اتجاهل وجوده شكل كذا نمط حياته
انا ناويه استمتع بحياتي الجديده دام اول ماقدرت اسوي شي
وشكله منجد نسي وجودي اندمج بقوه
حتى وقفت ماحس ورفع عيونه مشيت لمحل جذبني الاغراض الي برا قربت اشوفها واندمجت صرت امشي ع كل الي اشوفه
ولما شفت مكان يبيعون دونات مريت اشتريت ثنتين وحده لي ووحده له
واخذتها ورجعت وجلست في مكاني جنبه
بس هذي المره لما قربت رفع راسه وطالع فيني وطالع بالي في يدي
حطيتها بحضني وثبتت الطرحه اكثر وشلتها ومديت له وحده وانا اطالع فيه
ابتسم بس قبل مايٲخذها سكر الاب ورجعه شنطته واخذها وتمتم بشكرا
استغربت من ابتسامته واستغربت لانه ترك الاب الا اكيد انه انتهى شغله
ولا يمكن يحبها المهم اني حسبته معاي علشان بعدين يحسبني معاه بكل شي
بديت اكل حقتي باستمتاع وانا اطالع بالناس سمعت صوته يقول""اول مره تسافرين بطايره""
..نهاية البارت..
..عافاكم..
..عجايب..
الحمدلله.


..بأذن الله لي حسنه ولك حسنه..

(اللهُمّ ااكتُب لنا ولمَن غابُوآ عن دنيّانا عِناقاً عندَ أبوابِ الجنّة يُجلي شوقَنا واجعَلّنا وإياهّم مِمّن يترنَمُ في فِردَوسِك يا الله ♡)

السلام عليكم ورحمة الله وبركاته

يسعد صباحك يا جوجو واحلى صباح مع بطلتك الحلوة توجي.



بصراحة شكلي غفلت عن نقطة وهي انهم متفقين انه زواج صوري ... بس حتى ولو مو ممكن تكون بهاﻷريحية معه وكأنه مو ممكن يخلف بوعده .

المهم هادا بدل على برائتها حد السذاجة ﻷنها بتأمن لناس ما عندها معرفة عميقة فيهم.

بلشت تحس بالوحدة من البداية .. قلة الكلام عذاب للي متل تاج وبحبو الوناسة والإختلاط بالمحيط .

ليث قليل الكلام طبيعة ولكن متحفظ ﻷنه ما بثق فيها او ما تقبلها في حياته تماما.


حاولت تشغل بالها عنه وتخطط وتحلم باللي جاي . هادا اعطاها الدافع للتحمل رغم ضيقها الشديد منه .

بصراحة اعجبتني محاولتها لعدم التأثر به .. وبتمنى لو اقدر اطبق تقنيتها دي هههههههه


بس الشهادة لله الرجال صبووووور وباله وسييييييع ههههه ... اكبر دليل حادثة الفستان المنسي بالدولاب هههههه


رغم كل شي تاج بتعيش تجربة جديدة وبتحب تستكشف محيطها وحاولت تلهي نفسها وما تخلي شي يكدرها .


الدونت اظنها رح تكون بداية لتوثيق علاقة ود بينهم >>>> اﻷخت افطرت بس هاذي نظرية وحدة عندها معرفة وثيقة بحب الطعام لووول


لا جد شوفي كيف انتشل حاله من شغله ﻷجل عيون الدونتس ههههههههه لا وزادها من الشعر بيت

بدا يسولف معها ويتجاذب اطراف الحديث معها .


اتوقع انها رح تنسى لؤمه معها وتنبحط بالحكي وتخبره قصة حياتها هههههه


بس ما حبيت نقطة انها تعلق كذا على ابوها رغم كل شي بظل له حق الإحترام ولو كان غلطان بحقها.


يسلمو إيديك يا قمر بارتين ولا اروع.


تقبلي مروري وخالص ودي


°•○اللهم أغفر لي هزلي وجدي، وخطئي وعمدي، وكل ذلك عندي○•°