ان شاء الله تستمتعون بالقراءه..
..البارت السابع والثمانون..
كتبت(مااشتقت لك شكلي بديت اتعود ع غيابك)
وارسلتها بدون تفكير
اذا هو ضامن اني احبه ومصره ارجع له واراضيه راح يطول الوقت اكثر
بس لما يحس اني مو مثل اول يمكن اقصد ان شاء الله يخف علي ويرسل ع الاقل
طلعت من غرفتي والجوال بيدي وجلست بالصاله وانا اطالع بٲمي طالعه من غرفتها وابوي وراها
اكيد قالت له امي ولا معقوله انا عندهم من ايام ولا يسٲلني
ولان نظامي واحد من فتره صرت اتابع برامج
قلبت ع القناه بعد ماشغلت التلفزيون
ابوي جلس بالصاله معاي وامي دخلت المطبخ بعد كم دقيقه سمعت ابوي يقول""روحي ساعدي امك""
خفظت الصوت وقمت دخلت عند امي مو طاعه لكلامه بس علشان اجلس مع امي مو معاه
اول مادخلت قالت امي بعد ماالتفتت علي""اش تبغين""
قلت""بساعدك""
وجلست ع الطاوله
ضحكت وقالت""شكرا""
تميت وقت اراقبها وهي تسوي الفطور وبعدها قلت""ليث يعرف يطبخ في مره هو طبخ العشى تخيلي سوا شوربة الدجاج بالخضار""
ماحسيت اني اتكلم بحماس زياده حتى شفت نظرات امي
قالت""مااتصل""
حركت راسي بطريقة لا بدون مااتكلم ولا شكله ناوي
رجعت قالت وهي ترجع لطبخها""كل ماتٲخر بالاعتذار كل ماراح يزيد زعلك عليه عارفه""
طيب انا اعتذرت من بدري
قلت""انتي تسوين كذا""
قالت""انا اختلف""
قلت بتعقيدة حواجب""وليش مختلفه""
طالعت فيني وقالت""انا ام""
قلت""في امهات مطلقات عادي الوحده تجيب عيال علشان يكونون لها مو عليها""
قالت وهي تطفي النار""الموضوع معقد اكثر من كذا""
مااتوقع اكثر من تعقيدات حالتي الحين
منجده ليث حتى بعد رسالتي مااهتم
انا كنت احسه يحبني من معاملته كان واضح معقوله هذا الشي طيحني من عينه وصار يكرهني
قلت وانا انزل من ع الطاوله""اساسا ماشكله بيتصل""
واخذت السفره وطلعت من المطبخ
لقيت عبدالرحمن بعد جالس بالصاله بعد الفطور وطلوع ابوي وعبدالرحمن
ذكرتني ان اليوم بيجيبون اثاث غرفة الاستقبال وبعد اسبوع مجلس الرجال
لازم اصرف قبل مايجون
قلت لها نطلع نصرفها ونسوي اي شي
قالت جدتي وحدها في البيت ماتقدر
ووصت معاي كم غرض للمطبخ اجيبهم بطريقي
دخلت غرفتي لبست عبايتي ونقابي والله مالبس النقاب علشان ارضي ليث
البسه علشان نفسي علشان ذنوبي علشان ربي
بس تشجيع ليث هو الي ساعدني خلى الموضوع اخف
لما طلعت من الغرفه ابتسمت امي بقوه هذي نفس ردة فعلها الاولى
كٲنها مو مصدقه
طلعت من البيت واخذت تكسي وصرفت ولقيتها زايده راتب هذا الشهر كامل مع المبلغ المتفق عليه
وقفت مكاني وقت قبل مااتحرك وانا اطالع بالرقم
احترت بقوه اش قصده مايرد ع اتصالي ويضيف المبلغ الي بيننا
ولا يعني هذي استلام اخر شهر بما اني كملته عنده
تنهدت بقوه مع كل ذيك الايام الا اني مااعرفه زين
من اول ماسمع كلام عبدالرحمن وانا ماافهمه
اعرفه لما كان يعاملني بذيك الطريقه المميزه
احس اني ضيعت ايام كثيره ماكنت معاه
رجعت السياره وانا افكر لو اني قابلت ليث بتنحل ولا بتتعقد زياده
قلت بعد ماسكرت الباب يوديني السوبر ماركت الي رحته مع ليث
بس هو ماعرف اسمه وصفت له الطريق
لما مرينا من عند بيتنا ماكانت سيارته موجوده
نزلت بعد ماقلت له ينتظرني مثل اول
سكرت الباب وانا اخذ نفس عميق
دخلت واخذت الاغراض الي وصت عليها امي وانا رايحه احاسب شفت عصير ليث المفضل مع اني اتوقع طعمه مو حلو الا اني اخذت واحد اذوقه
طلعت السياره وقلت له يرجعني البيت خلاص
حاسبته وطلعت واغراضي كانت جنبي شلتها وسكرت الباب
ومشيت لباب الشارع اول مادخلت حطيت الاغراض بالمطبخ
واعطيت امي الفلوس الي صرفتها واخذت العصير ودخلت الغرفه
وكٲني ماراح اطلع منها
فسخت عبايتي ورميتها ع الكرسي
وطلعت جوالي من الشنطه وحطيتها بالارض وفتحت جوالي بعد مافيه شي منه
ماادري بنتظره يتحرك لين متى
لازم نتقابل نتفاهم مو نخليها كذا معلقه وتزيد مع الوقت
وانا بعد اعدي الايام
خلاص معد فيني صبر
وبعد ماابغى اروح بيته ولا هو راح يجي هنا
خلاص نتقابل بمطعم
فتحت النت ادور ع مطعم حلو
بارسل له اني انتظره هنا وبحدد الوقت
كذا راح يجي
فتحت العصير واخذت رشفه بسيطه اذوقه طلع مو بالسوء الي انا متخيلته
يعني عادي ينشرب
وخلال بحثي بالنت شربته كامل ولقيت المطعم المناسب
مع ان سعره عالي بس هو يوم واحد ابغاه يكون مميز
ابغى نبدا من البدايه
بدل المطعم الي قابلناه فيه اول مره
ابغاها منجد تبدا من هنا
تحمست بقوه واتصلت ع المطعم احجز طاوله
وطلع اليوم كل الطاولات المعزوله محجوزه
وحجزت لبكره الساعه تسعه
وسكرت وحماسي يزيد اكيد بيجي
واذا ماجاء ماابغى افكر بهذا الاحتمال
انا بسوي كل شي وبنتظره وبشوف اكيد في مكان بقلبه بيخليه يجي
برسل له ان شاء الله بكره الظهر هو من بعد العشى ماعنده شغل
راح يجي
سكرت الاب وانسدحت وغمضت عيوني
واتخيل كيف بيدخل وش بقول له بالبدايه واش اسوي
انتظره يفتح السالفه ولا انا الي اتكلم
بعد وقت فكرت اني اعطيه هديه مثل ماهو اعطاني ابغى يبان حبي له مثل لما حسيت بهديته لو الموقف ذاك
راح نبدا معاها بدايه جديده
وابغاها تكون قريبه منه ماابغى شي معتاد مثل ساعه ولا قلم
ابغى شي مميز شي اعرف انه بيحبه
الشي الوحيد الي احسه يحبه هو العسكريه طبعا ماراح اجبله بذله
بس شي يدل عليها وانا مااعرف شكلها من قريب
علشان كذا رجعت جلست وفتحت النت وشفت شكلها من قريب
وعرفت ان الي يميزها النجمات الي بالكتف تدل ع مركزه ويسمونها شاره اذا مو غلطانه
قربتها وصورتها بجوالي علشان تكون التفاصيل واضحه
اكيد بيحبها انا متٲكده
تحمست بقوه راح يكون مميز مثل مافكرت
سكرت الاب وطلعت من الغرفه اشوف امي وجدتي اش يسوون
مالقيت احد بالصاله فتحت باب غرفة جدتي بشويش لقيتها نايمه
سكرت الباب وفتحت باب غرفة امي بشويش ولقيتها بعد نايمه
انا نشيطه ومتحمسه خلاص طيب اروح اشتري الهديه
دخلت غرفتي لبست عبايتي ونقابي واخذت شنطتي وحطيت فيها جوالي وطلعت من البيت
ورحت محل هدايا كبير موجود بالشارع الثاني
واخذت تكسي علشان اوصل بسرعه متحمسه
وريته الصوره الي بالجوال وقلت""ابغى مثل هذا المجسم بكل التفاصيل الصغيره""
قال""دقيقه""
واخذ جوالي ودخل فيه غرفه شكله يسٲل احد تكتفت وانا اوزع نظراتي
وايوه بعد ابغى شي احطه فيه مثل علبة الخاتم بس اول اعرف كيف المقاس
شوي وطلع ومعاه رجال ثاني واعطاني الجوال وقال""تبغين مثلها بالضبط""
قلت بتعقيدت حواجب لما شفتهم يطالعون فيني بنظرات غريبه""التفاصيل ايوه بس ابغاها اكبر ولونها ابيض ولا قزاز""
طالعو في بعض وبعدين راح الي كان موجود اول وقال الرجال الثاني""مااقدر اسويها الا بالخشب لان عليها مسٲله قانونيه""
الحين فهمت ع بالهم اني بزور
والله اني ع نياتي
قلت بٲبتسامه""الخشب احلى متى تجهز""
قال""حوالي ساعتين اواكثر خلاص تعالي لها العصر اكيد تكون جاهزه""
قلت""تمام بس ابغى علبه مثل الخاتم تناسب حجمها""
قال""بحاسب هذا الشي""
سٲلته عن الحساب ودفعت له وطلعت
ورجعت البيت مشي
متحمسه ماادري كيف بيمر اليوم
رجعت البيت فتحت لي الباب امي وهي تسٲل وين كنت
قلت لها رحت الصيدليه العذر المعروف
مادخلت غرفتي ماابغى اجلس وحدي
جلست مع امي وتغدينا بدون عبدالرحمن ماجاء الا قبل العصر
اول ماشفته قلت""كٲنك ناوي ترجع شغلك""
حرك راسه بطريقة لا وقال""لا وين الغدا جيعان""
قالت امي""غير ثيابك وتلقاه جاهز""
دخل غرفته وانا دخلت غرفتي
ماابغى احد يعرف لا بالهديه ولا بالمطعم
صليت العصر وانتظرت نص ساعه تقريبا وطلعت وعبايتي حاطتها عند باب الغرفه
ابغى الفرصه ولما مالقيت احد طلعت من البيت
واخذت المفتاح معاي
طلعت اخذت تكسي وبسرعه دخلت المحل وراني وطلعت مثل ماابغاها بالضبط
واعطاني بعد العلبه حاسبت العلبه وطلعت بسرعه
اخذت نفس التكسي رجعني البيت
ومانزلت الا العلبه بالشنطه كل المشوار مااخذت فيه ربع ساعه تقريبا
محد بينتبه
دخلت البيت بدون محد ينتبه لي
حسيت اني سويت انجاز
دخلت الغرفه وطلعتها من الشنطه وجلست اطالع فيها بحب بتعجبه مثل مااعجبتني هديته
ومع اني صاحيه من الفجر الا ان الساعه وحده وانا اطالع فيها
ماقدرت انام بس بعد حلو علشان بليل اقدر اسهر
ابتسمت لهذي الفكره
بس لما صحيت الفجر معد قدرت ارجع انام من الحماس
طلعت من الغرفه وخليت جوالي فيها علشان اتٲكد اني ماارسل له الا الظهر مثل مافكرت
ومنجد بس خلصت صلاه الظهر كتبت له برساله(تعال الساعه تسعه مطعم.......(كتبت اسمه)اذا يهمك امري ولو شوي)
..نهاية البارت..
..عافاكم..
..عجايب..
الحمدلله.


..بأذن اللي لي حسنه ولك حسنه..
(قال العلامة العثيمين: بل إذا كان يوم القيامة،وكان على الإنسان الصائم مظالم للعباد،فإنه يُؤخذ للعباد من حسناته إلا الصيام فإنه لا يؤخذ منه شيء،لأنه لله عزَّ وجلَّ وليس للإنسان،وهذا معنى جيد،أن الصيام يتوفر أجره لصاحبه ولا يُؤخذ منه لمظالم الخَلْق شيء
#صيام_الخميس)

بعد ماقريت ردودك ماقدرت الا اجهز لكم بارتين بعد الردود ان شاء الله راح انزلها..
ان شاء الله انها تكون بمستوى متابعين مثلكم..

بانتظارك ي عسل لاتبطين علينا

بارتين غير ذي ؟؟