The Darkness of The Night 9
ضحك وهو يقول : يا بنت الحلال أتغشمر معاج شفيج !
بصوت عالي بس مو بصراخ قالت بنفس العصبية : لا تتغشمر معاي !!! شايف نفسيتي تسمح لي لسخافتك هذي . . . أكبر شوي . . و كبر عقلك !! مب كل شي غشمرة و ضحك ترى !!!
حست به أنزعج و بقوة من أسلوبها بالكلام معاه ! لكنها ما أهتمت
ولا حب هو يعاملها على أساس أنزعاجه !!!!
تكلم وهو مازال مكبر عقله معاها : زين . . أسفين و حقج علينا ! محنا بضاحكين ( يطبق كفه على حلجه و يكمل بصوت مكتوم ) !! يصير أعرف حلمج اللحين ؟
بأندفاع : حلمانه بالزفته اللي أسمها أم غيث . . . !!!
ماجد بنبرة صوت هادية على خلافها بعد ما شال يده عن حلجه : و شذنبها المرة اللحين تسبينها !؟
بنفس الأندفاع قالت وهي تأشر بعشوائيه بيدينها الثنتين مخنوقه : ذنبها أنها طيرت قللللللبي و خرعتنييي و نقص علي نومتي . . . ( تطالع ماجد وتكمل بحشرجة ) تخرررررررررع ماااااااجد تخرررررررع . . ما تفههههههههم !!!!!! ( صاااحت من يديد )
أحتظنها من يديد وهو يقول بصوت واصل لأقصاه من الضيق : عارف أني ضريتج من أول ما خذيتج لين هاليوم . . و بهدلتج وايد طول حياتنا سوا . . . لكنج هم تدرين مثل ما أنـا ادري . . أنه أحنا أنخلقنا لبعض !!! نحب بعض . . و نحب حياتنا مع بعض ! بحلوها و بمرها . . . . علشان جذي فكرة أنفصالج عني سببت لي رعب !!!! ما أبي أهدج . . ولا أبيج تتركيني . . . . يمكن تقولين أنـاني . . بقول لج أيه !! دامه شي يتعلق فيج فأنـا أنــاني . . . . و علشانج هذاني راضي أتعالج بعيادة نفسيه مع واحد يتعامل معاي على أساس أني مينون . . و أنتي أكثر وحدة تعرفين نظرتي لطب النفسي و رايي فيه . . ( يبعدها عن صدره ويشوفها ) بس لأني ما أبي أضرج من يديد . . . . . ولا أبيج تتعاملين مع أكثر من شخصية فوقت واحد . . . . أبيج تتعاملين مع ماجد واحد وبس !!! . . تتعاملين مع هذا اللي واقف جدامج اللحين . . اللي مستعد يحلف لج أنه ندمان على كل دمعة نزلت منج بسبته . . . . .
أبتسمت ساخرة من يديد وهي تقول : كلامك حلو ! . . نفس ليلة الفندق بالضبط . . . و اللي أعرفه . . أن حبيبي ما يعرف يصف كلمتين على بعض ! . . . يخوفني أسلوبك هذا !!! . . كلامك الحلو يخوف !
ماجد بتأكيد : والله العظيم يا موزة أني بوعيي . . و عارف شقاعد أقول . . . .
ماجد : شتبيني أسوي لج علشان تصدقين أني بوعيي !!!
موزة : لا تسوي شي . . . . باجر بنعرف ! . . . بس تكفى ماجد !! لا نويت تضربني . . . أذبحني بالمرة و فكني من هالعيشه !!!! لأنه ما عاد لي مكان أروحه غير بيتك . . ! ( تطالعه من فوق لتحت قبل لا تتعداه لسرير ) تصبح على خير !
كانت تصحى كل يوم الفجر وهي تصرخ بأسمه و تتعلق بقميصه بقوة . .
مما يخليه يفز من عز نومه خايف عليها . .
لو تقول أن صراخها اليومي هذا كل فجر
كان المنبه اللي يقعد ماجد لدوامه كل يوم . . .
علشان يحاول يصحيها بسرعة و يخلصها من مخالب هالكابوس اللي متشبث بها !
تقدر تقول أن هالكابوس أستمر معاها حوالي الشهرين
فَ بدايتهم كان يتكرر عليها يومياً . . و تدريجياً أبتدى يخف و يمرها بشكل متقطع !!!
و السبب أن حرصها زاد أكثر من أول على أذكار النوم
و قراية كم صفحة من القرآن قبل لا تحط راسها و تخوض جولة نوم يديدة
يمكن تنتهي بَ فزع . . أو طمأنينة !
لكن فَ كلا الحالتين . . .
كانت تتجرأ تغمض جفونها بسكينة كبيرة تحوطها من جهاتها الأربع و تمسح على قلبها بشعور عظيم بَ الراحة
ألا لا نامت و ذكر الله يتجول داخلها !!
لكن كل هذا ما كان يكفي . . .
الحلم ما أنقطع . . لكنه خف بدرجة كبيرة عن أول الأيــام . . . . !
و آخر مكالمة لها مع لطيفة . . قبل اليوم المشؤوم بأسبوع . .
اللي أكشفت الغشاوة عن عينها " متأخر " !
لطيفة بعد ما همهمت شوي : شوفي , أدري أنج بتاكليني اللحين لا قلت لج الكلام اللي أفكر فيه . . بس لازم تسمعينه !! . . . ترى بيتكم مب خالي . . وله نسيتي الكلام اللي طلع عليه أول ما سكنتوه ؟
موزة بأنزعاج بعد ما كش شعر جسمها من هالطاري اللي تكرهه : يوووووووه يا لطووف ! مب وقتج ها !! بنفسي غصب قاعدة أتناسى السالفة . . .
لطيفة بمفاجأة : وليش تتناسينها ؟ مو تقولين تحسين في حد معاكم فَ البيت . . وكل أحلامج كوابيس . . . . ترى أنـا قريت من قبل أعراض مثل هذي اللي تكلمتي عنها تصير فَ البيوت المسكونه !
موزة وهي تمرر يدها اليمنى على ذراعها الأيسر من قو ما وقف شعر جسمها من الخرعه وتقول بألحاح : لطوووووووووف !!! سكري الموضوع بليز !
لطيفة : يالغبية , جيبي شيخ يقرى فَ بيتكم زين . . . !
موزة : أنــا شغلت سورة البقرة فَ البيت أول يومين . . وماكان فيه شي , لا تقعدين تخرعيني !
لطيفة : ومن قال لج أنه تشغيل السورة من المسجل كافي ؟ . . مو كافي ترى . . . . لأزم أنتي بنفسج تقرينها فَ البيت ! و مو يومين بس . . ثلاث آيـــــام !!
موزة بعد تفكير بسيط : بس . . شوفي ادري بتقولين عني هبله ! بس أخااااف أقراها أنـا فالبيت . . أخاف يصير فيني شي وله يستفردون فيني شسمهم . . . .
لطيفة تلوي بوزها بيأس : ووووووووي طاح حظج ! عيل ليش تصلين و تصومين و مسوية فيها الديّنه ! أذا أيمانج ركيك جذي ؟ . . . تدرين , جيبي شيخ أحسن لج !
موزة : ومن وين اجيب شيخ يقرى فَ البيت ؟
لطيفة : أنـا بدبر لج رقم واحد ثقه . . . و دقي عليه و رتبوا معاه !! منها تفتكين من هالكوابيس أن شاء الله و ترتاحين من الخامس اللي معاكم على قولتج !
رجعت تتكلم بنبرة طبيعية : أنـا جايه أساعدج , مو جايه أ أذيج . .
ما جاوبتها موزة , ف كملت : أقــدر أحميج . . وما اخلي ديجور تضرج !!
تكلمت ام غيث : ما بتسأليني شلون ؟
ظلت ساكته . . تصيح و تنتفض . .
صرخت أم غيث : أسأليييييييييييني شلللللللللللون !!
موزة بصوت عالي بعد ما أرتجف جسدها من يديد : شــــــــلللون ! شللللللللللللون !!!!!
أم غيث وهي ترسم أبتسامة يديدة : قلتي لي شلون ! . . . ( تقعد القرفصاء بجوار موزة و تمرر سبابتها على كتفها العاري وهي تقول ) أتلبسج !
يتبع
08-07-12, 09:30 PM
جديد مواضيع قسم القصص المكتمله من وحي قلم الاعضاء
العرض العادي
