بحط بارتين الثاني و الثالث مع بعض لانهم قصار شوي ..





الفصل الثاني
( لما الهم و الحزن )

كان الجو العائلي طاغي ع المكان .. بين الهدوء و الانفعال .. و الحزن و البهجه .. تذكرنا شويه ذكريات اللي عشناها مع بعض مع اللي فقدنا .. مسحت الدمعه اللي ننزل قبل ما يشوفونها ما كنت متعوده اصيح جدامهم حتى بوفاه ابويه الله يرحمه كنت اختلي بنفسي و اطلع كل كتل الهم اللي انغرست بقلبي ..

امايه : نهيان صارلك شهر متخرج ليش ما تشتغل ؟!
نهيان : ههه توظفت امايه قلتلج عطيني راحه شهر
امايه : زين الحمدالله اسمع كل شهر تحط مبلغ بسيط فالبنك هب تصرف معاشك كله ابعد عن التبذير
نهيان : ولا يهمج
امايه : هيه بي يوم و بتحتاج لفروس بدال ما تاخذ من هني و هناك يكون عندك مبلغ ادبر عمرك فيه
نهيان : صح كلامج يالغاليه
امايه : شو تبون ع العشا ؟!
منصور ابتسم : كل شي من ايدج حلوو يالغاليه
سعود : لا لا نبا بيتزا
سعيد : هيه من زمان عنه بليز امايه
امايه : برايكم انا بسوي عشا اللي بياكل ياكل و اللي بياخذ له بيتزا برايه
سعود : منصور !!
منصور هز راسه بمعنى " هيه " و كمل جايه اللي صار رابع استكان ماخذ ها العاده من ابويه اللي ما كان يمر عصريه الا وهو شارب اربع او خمس ستكانات جاي .. منصور له نفس ملامحه ابويه فكل شي و فبعض التصرفات ماعدا العصبيه .. ابويه كان عصبي لكنه حنون بس منصور يقدر يتمالك اعصابه .. و نهيان كان ياخذ ع شكل امايه مهره اكثر ما عدا خشمه الطويل و منيره تشبه نهيان و سعيد و سعود يشابهون منصور .. اما انا كنت ماخذه من ابويه و من امايه شوي ..
امايه : هيه صح نسيت ع طاري العشا , حرمه عمك محمد عازمتنا ع العشا
منيره طالعه امايه : بمناسبه ؟!
امايه : لزوم تكون شي مناسبه !! بس جي من توفى المرحوم ما اجتمعنا
منصور : خير ان شالله , متى بتسرون ؟!
امايه : بعد صلاه المغرب

مضى الوقت سرت بدلت لبست مخوره لونها اصفر .. قعد ادور ع كريم اللي ادهن به ايديه بس اكتشفت انه مخلص .. اكتفيت بكحل ماشالله عيال عمامي كبار و نهيان واقف فالبلعوم .. لبست عبايتي و شيلتي و كعب اسود و شنطه صفره تعطرت و كل هذا بعد الصلاه طبعا .. نزلت و اللي مأخرنا منيره و قبل ما تتطلع شياطين نهيان نزلت بس بكامل زينتها
امايه رمست قبل لنهيان ينطق : شو ها !! ترى عيال عمامج هناك قومي امسحي يلا
منيره : امايه ترى بنقعد ويا البنات عاادي
امايه : ماشي يلا سيري مسحي بسرعه
نهيان عصب : برايج يلسي بروحج فالبيت
منيره : بمسح فالسياره والله
ركبنا موتر منصور الثاني الفتك و سيده لبيت عمي محمد كنا فنفس الفريج يعني كلها خمس دقايق وصلنا البيت و كانت السياير ممزوره فبيت عمي كلهم صافين ع سيد واحد حركات شباب .. صفينا و نزلنا و بعد السلام و الترحيب يلسنا فالصاله الواسعه كان القعده دائريه و كبيره كنا بنات بجه و شباب بجه و الكبار فالنص

عمي جاسم / حرمته عايشه .. عيالهم ..
سلطان / 27 سنه
روضه / 24 سنه = متزوجه خالد / 27 = ولدهم سالم / 3 سنوات
بشرى / 19 سنه
اماني / 18 سنه
ريم / 13 سنه

عمي عيسى / حرمته حمده .. عيالهم
خالد / 27 سنه = متزوج روضه
ياسر و جابر / 25 سنه
ناصر / 22 سنه
مريم / 20 سنه
موزه / 18 سنه

عمي حمدان / 29 = عزابي

منيره خذت اماني ع صوب و تمن يسوالفون بالهمس ماادري شو عندهن !! بس كنت ملاحظه نظرات سلطان لمنيره و منيره ما تقصر تعطي نظرات و اونها تستحي .. طالعت نهيان كان لاهي عنها يرمس ويا ناصر و ياسر و جابر والله ان شافها بيشرشها جدام الكل و ها سلطان صدق ما يستحي طول و عرض يطالع بنظرات اعجاب تباها اخطبها بلا ها المصاخه اللي صارلها كمن شهر ماادري شو يبا بالضبط
بشرى : اقول نروح للصاله اللي فوق ناخذ راحتنا
ابتسمت و مشيت وياهن فوق و يلسنا
يا سالم و عفد فحضن روضه فصرخت : هي هي شوي شوي ماما عشان البيبي
: اوييه !! من متى ؟!
ابتسمت روضه : من اسبوع عرفت
ابتسمت لها : مبروك تستاهلون
روضه : الله يبارك فيج عقبالج تتزوجين و تيبين عيال جي كيوت شرات سلوم
طالعتها بنص عين : والله واثقه بوسامه ولدج
بشرى : هييه ترى القرد فعين امه عزاااال
روضه : ويعه ان شالله ولدي شحلاته يشابه ابوه
بشرى كاتمه ضحكتها : تعترف انه خالد احلى عنها
ضربتها روضه ع جتفها : صدق ما تستحين ان شالله ايج ريل اسود
شهقت بشرى : سم الله ع ريل المستقبل لا تفاولييين
مريم : حسيت انه واحد من العايله هاااا ليكون تحبين لج وااحد منهم يلا اعترفي !!
شهقت بشرى
موزه : بس بس شفطي الهواء كله من شهقاتج حشى
بشرى : جب انتي , " بغرور " احم اصلن انا ما اطالع حد بالعكس هم يطالعوني
حطيت ايدي ع شفاتي اكتم ضحكتي : منو يا حسرى !!
اهني بدت موجه ضحك لا منتهيه
بشرى بوزت : ما احبكم
مسكت ايدها : ويي حبيبتي و الله نتمضخر
بشرى ابتسمت : ههه اعرف والله عليكن سوالف

رن فوني [ يوسف يتصل بك ]
: مرحب مرحب
يوسف : يا مرحب بها الصوت
سمعت صوت يدوه : هااته عنك هااته بلا هذربان زايد
يوسف : تري امايه بسلم عليها بسالها عن حالها
يدوه : خلاف اسالها عطني اياهااا فديت روحها عطني
ضحكت : خااالي عطني اياه فديت حسها
يوسف : عطني ها !! هاج الغاليه
يدوه : السلام عليج
: وعليج السسسلام و الرحمه , شحالج يدووه ؟!
يدوه : بخير حبيبتي و انتي علومج عساج مرتاحه ؟!
: صرت احسن من سمعت صوت يالغاليه , شو صحتج ؟!
يدوه : الحمدالله
: تاخذين دواج بالنتظام !!
يدوه : هيه فديتج , شخبارها مهره ؟!
: بخير الحمدالله كلنا بخير
يدوه : هيه الحمدالله , اقول بنتيه
: امري فديتج
يدوه : ما يامر عليج ظالم , باجر من اتين عنا ابي شنطه ملابسج وياج باتي عنا كمن يوم متوله عليج
: ياه فديتج من عييووني ما طلبتي شي ان شالله ع ها الخشم
يدوه : لا تنسسين , يلا مااطول عليج هذا خالج
: ربي يحفظج
يوسف : زعلان لا ترمسيني
: اونك عااد !! معلوم دلوع ماما
يوسف : شكبري دلوع ماما !! عيل انتي شوو !!
: انا دلوعه خاالي فديت روحه
يوسف : اي واحد فيهم !!
: تعرفه , المهم بششوفك باجر سلام
يوسف ضحك : الله وياج

فديت يوسفي بس الله ها الخال بلسسم ع القلب انسان بروعه منصور و اكثر .. كملت سوالفي ويا البنات خلاف تعشينا و ردينا البيت ع ساعه 10 المسا .. دخلت حجرتيه بدلت بس اللي ستغربته انه لين احينه ما حصلت شي فحجرتيه بس متاكده ضحكتهم ما كان لله .. اندق الباب ابتسمت و بطلت الباب و دخل منصور من عوايده ايني قبل النوم نسولف شوي و يروح يرقد .. رحت صوب علبه اطلع منها شباصه صغيره ارفع شعري فيها فتحتها شفت شعرتين طول تتحرك ستغربت طالعتها عدل
شهقت وفريتها وصرخت : صرصوووووووررررررر يماااااه
منصور فز : ششو !!
نقزت فوق الشبريه و اشرت ع العلبه : مناك مناك شي صرصوور صرصووور
راح منصور و شاف العلبه قلبها و طاح الصرصور و بثواني صار تحت نعاله : خلاص مات
: يااااع بروح ازقر الخدامه اتي تنظف
نادتيها قبل لا ترقد تنظف و العلبه بكبرها و باللي فيها تفرها
منصور : خيبه ما يسوى عليج
: يع شقايل تباني احط ها الشباصات ع شعري و صرصور مشى عليهن يييع
منصور يلس ع الكرسي المخملي البنفسجي : هههههه بس اموت و اعرف شقايل وصل هناك ما احيد شي صراصير فبيتنا !!
طالعته : يعني ما تعرف !! الثنائي الشرس
منصور : لا حول ولا قوه الا بالله هيل ناوين يشردونج من البيت
يلست ع الكرسي الثاني : عيل لا تستغرب اذا ما حصلتني الصبح فالبيت
منصور : هههه ماعليج بهزبهم و لا يهمج
: هيه صح باجر بسير بيت يدوه ببات عندها
منصور عقد حواجبه : يرضيج تودريني !! اسولف ويا منو
ابتسمت : حبيبي سشوي تراها متولهه عليه و من فتره ما بت عندها
منصور ابتسم : ولا يهمج بس ماشي ازود عن ثلاث ايام
: ههههه انزين متى عندك رحله !!
منصور : يوم السبت يومين و برجع
: عيل لما ترد برجع البيت , انزين خبرني شو سويت بها السفره !!
منصور تنهدت بضيج : رحت سويسوا شهر عسلنا كان هناك .. قالت لي منصور الله يخليك حلمي يكون شهر عسلي هناك .. لبيت كل طلبنتها ما قصرت بشي ليش جي سوت !!
مسكت ايده و انا اشوفه يتألم همست : منصور
تنهدت و سند راسه ع الكرسي و طالع السقف : و بكل بساطه راحت تبي واحد ثاني و خذت قطعه مني وياها ما تخليني اشوفه الا بالحسره و فوق هذا تبا تتزوج
شديت ع ايده ..
وقف بسرعه حسيت انه يبي يغير الموضوع : اممم شكلج بتامين !!
ابتسمت
حبني ع راسي : تصبحين على خير شيختي
: وانت من اهل الخير

ظهر من الحجره , اااه يا منصور والله الحب عذاب من جي خايفه منه .. منصور و غلا كانوا احلى قصه حب سمعتها بحياتي بس فيوم و ليله و بدون سابق انذار تغير كل شي محد درى شورى الغلا .. شواللي غيرها حتى منصور جاهل سبب تغيرها بعد ما ودلت " محمد " تتطلقوا معنه يعشقها و احينه تبا تتزوج .. الله يسامحج يا الغلا :"( ..
تغطيت عدل و سكرت عيوني ..

،

الفصل الثالث
( ما سرك يا هذا )

وعيت ع الساعه 10 تسبحت و لبست مخوره لونها اسود ويا ابيض مستويه شطرنج .. و رفعت شعري بشكل مرتب .. قعد ادور ع كريم الايد اللي استخدمه و اكتشفت انه خلص .. فجحلت و رسمت عيوني بس بشكل بسيط ع طرف عيني و تعطرت خلاف نزلت تحت تريقت ويا الكل و بعد الريوق الشباب ساروا لصلاه الجمعه و انا صليت و لبست عبايتي كانت ساده بس فيها حركه و لبست شيلتي و تعطرت و لبست كعب اسود من ديور و شنطه سوده من ديور و ظهرت و انا اتعبث بفواني اشوف مسجات اللي وصلتني من بنات عمامي و بنت خالتي مسجات يوم الجمعه و طرشتلهم .. فجاه تذكرت اني ببات عند يدووه و ربعاان للحجره ..

ضحكت ع عمري و طلعت هاند باق بسرعه من الكبت و حطيت لي كمن بجامه و كمن مخوره و dress و عبايه مطرزه ويا شيلتها وباجي الخربطان و ظهرت حصلت منصور فالصاله
منصور : نظهر !!
ابتسمت : هيه خلصت
ظهرنا ركبت موتره و سيده بيت يدوه .. تقريبا خذ دربنا ربع ساعه لين ما وصلنا و عقني هناك و سار .. كان موتر ريل خالتي موجود , حدرت و سلمت .. ردو السلام عليه و سرت حجرتيه فوق و حطيت شنطتي فيها و فصخت عبايتي و عدلت شيلتي تاكد انه ماشي شعره ظاهره و نزلت تحت يلست وياهم و كلهم يالسين و يتخبرون عن احول بعض و يدووه مستلمتني تتفداني جدامهم و خالي يوسف يسويلي حركات و اونه غيران معلوم اخر العنقود .. شوي و نزل خالي صقر و هو عاقد حواجبه يلس و سلم برود و ريحه السجاره فاحت و كتف ايدينه و طالع الكل .. سمعت يدوه تهمس " ربي يهديك و يصلح حالك " خلاف تغدينا يميع

خالتي مريم / ريلها راشد .. عيالهم ..
حمد / 28 سنه
حمدان / 26 سنه
حميد / 24 سنه
علي / 23 سنه
عمر / 21 سنه
شيخه / 19 سنه

خالي صقر / 30 سنه = عزابي

خالي يوسف / 25 سنه = عزابي

بعد الغدا يدووه و خالو و ريلها راحوا يقيلون .. و انا و شويخ حدرنا حجرتيه لين يومي انحرج من عيال خالتي و ماشي بينا اي ميانا اللي بينا رسميات لا اكثر و لا اقل يعني شرا عيال عمي استحي منهم .. شوي و اشوف شويخ مظهر كيس من كبتي و طلعت من تنوره قصيره موديلها حلوو لونه بيج يوصل لفوق الركب
شيخه : حلوو !!
ضحكت : و متى بتلبسينه ان شالله !! لعلمج تراج عزابيه
شيخه : شو اسوي عيبني والله تخبلت من شفته و امايه احتشرت عليه فالمحل " تقلدها " شو تبين بها التنوره تبين تفضحينا جدام الخلق وين اودي ويهي يا مسوده الويه .. " ضحكت " ما تتخيلين شكلها و هي تشوف التنوره
: هههه ما تنلام انزين صدق ليش شريته متى بتلبسينه !!
شيخه : همممم فالجامعه تحت العباه تكون مسكره و البس بوت " و ابتسمت ابتسامه شريره "
تميت ارافس من الضحك : انزين انزين يصير خير
راحت طلعت شورت جينز طلعت عيوني : شوو ها !! احيد ها يشترونه لرياليهم شو ها المنكر ياربي عن اطيح السما علينا
شيخه : هييي شو اطيح السما علينا ما بظهر جدام الخلق جذا ترى
: و خالوو شافتج وانتي تشترين هذا !!
شيخه : هههههه قلتلها اربيعته موصتني اشتري لها
: طااع الخرط و صدقت !!
شيخه : لا طبعا لين ما تحايلت عليها بس والله كيوت شو رايج ؟!
: هوو حلوو ما عليه كلام ههههههه اتخيلج تظهرين جدام اخوانج جي
شيخه شهقت : هييه عشان تحصلين راسي معلق عن الباب
: يعني شارتهم حق الجامعه !!
شيخه يلست ع السرير : هيه , الا ما خبرتيني فاي جامعه سجلتي ؟!
: بعدني قلت لمنصور يدورلي ع جامعه هب حاطه فبالي جامعه معينه
شيخه : هيييييي تعالي عندي حتى لو هب فنفس السنه و لا التخصص ع اقل بنتلاقى لا تقولين لا
ابتسمت و غمزت لها : ولا يهمج يا بنت خالتي من عيوني
شيخه قامت باستني ع خدها : فديتها يا ناس
: لو سمحتي ممنوع البوس
شيخه : ههههه هيه لريل المستقبل
انا هني احترقت : قليله ادب ما تستحين و لا تخيلين عييب عيييب عليج
شيخه بعدم اهتمام : ايييييه اي عيب كلنا بنتزوج
: خخخخ , تعرفين خاطريه اسوي سويت بس اخاف يدووه تشتهيه و تاكله و يرتفع السكر عندها
شيخه : هههه دومها تاكل من اللي نسويه بس شويه تعرف شو تسوي " حطت ملابسها فالكيس " يلا ننزل نسوي سويت

نزلنا تحت رباعه و سرنا المطبخ الخارجي و حبينا نسوي كب كيك .. شويخ اهتمت بالكيك و انا بالكريم و تفننا فيه لين ما اذن العصر رحنا صلينا و سوينا قهوه و ع رده الريايل من المسيد حطينا الفواله فالصاله ع الارض و يلسنا و تمينا مرتبشين بس خالي صقر كان بارد ع عاته احسه يخرب القعده بصراحه حتى عيال خالو اللي يستحون مني ارتبشوا للسوالف و العبط .. و خالي يوسف ماسكه بلاكه و يصور الكب كيك اللي سوينا و قاص ع القائمه اللي عنده اونه يالسه فمطعم و انا تحسفت ما يبت الكام ويايه كان خاطريه اصور ها القعده والله قعده ما تنمل ..

يدووه : ربي يبلغني و اشوفكن عرايس قولوا امين
خالوو : امييين
: يدووه عرسي العزابيه اللي عندج خلاف فكري بعرسنا
يدووه : خليهم هيل ما منهم فايده لساني عورني من كثر ما اقولهم خاطري اشوف عيالكم عرسوا ماشي فايده
يوسف و عينه ع بلاكه : بعدني صغير
يدووه : ها شوفي اونه بعدني صغير " طالعته " غيرك يابو عيال و انت اونك بعدك صغير
يوسف طالعها : اماايه توني 25 سنه تري عليه سنتين
يدووه : بكون فقبري
يوسف قام حبها ع راسها : يعد عمر طويل ان شالله لا تقولين جي يالغاليه
يدووه : عيل عرس
يوسف : هههه امايه شقايل اعرس و اخويه اللي اكبر عني بعده ما عرس !! خلي يعرس خلاف بعرس
يدووه : هذاك ما منه فايده خل يهتم بعمره عشان يهتم فبنت الناس
تيبست من رمسه يدووه و صقر هني تلفت اطالعه كان صنم ما تحرك من مكانه بس ايده و حلجه يتحركه للاكل لا اكثر ولا كانه يدووه رمست و ذمته هذا يا الحياه حلووه عنده يا انه ما يحس !! .. ما كان جي تغير و ما اعرف شواللي غيره تقريبا من ثلاث سنوات و هو جي حاله صار يدخن , نظراته بارده , ما همه حد , ما يضحك , ما يسولف .. و انا جاهله سبب تغيره هذا كان رغم عصبيته انسان مزوحي و اذا طلبنا منه شي قال تم و حاضر ما ردني بحياته كنت وقتها بالاعدادي اتباهى به جدام ربيعاتي و ابتسامه كانت محليته بس احينه صار جاسي .. ربي يهديه ..

،

ارتميت ع فراشي بعد ما ساروا قوم خالوو حاولت فشويخ ترقد عندي ما كانت يايبه وياها ثياب , طالعت الساعه كانت 12 و مافيه رقاد رحت فتحت الاب و بديت افتر فالنت و هب حاسه بالوقت صارلي فتره ما يلست ع النت بها الشكل .. ثبت تسجيلي فنتدى و فتحت لي صفحه فالفلكر و من ها الخرابيط لاني من عشاق التصوير بس ما فكرت اني ادخل تخصص تصوير فتغرافي لانه الرسم احسه يشكل شخصيتي .. حسيت بعطش قمت رحت صوب ثلاجتي الصغيره بس ما حصلت ماي طالعت الساعه و طلعت عيوني .. امبيه ساعه 3 الفجر خخخ من زمان ما سهرت لها الوقت .. رفعت شعري و نزلت تحت و انا نازله تهيألي اني سمعت صوت الباب تعوذت من الشيطان و كملت دربي لما وصلت للصاله انفجعت و انا اشوف خالي صقر طايح ع الغنفه بحاله لا يرثى لها ..

خفت قلبي بدا يدق بقوه و اطرافي تجمدت و بدت ترجف حسيت اني بروحي بها اللحظه .. ما قدرت اتحرك جني انزرعت فمكاني و ريولي تثبتت فالارض .. لاحظ وجودي ابتسم و بدا يقرب مني و هو يتمايل حسيت هبيته راحت بها الوضع و حط ايده ع كتفي و نزل ويه لمسواي لانه اطول عني بوايد ..
ابتسم وقال : هلا .. هلا بـ .. بحمد
ريحه تلوع بالجبد و كلامه يخوف اي حمد !! لهدرجه السكران يشوف البنت ولد !! طالعت عمري كنت لابسه بجامه حرير بنطولون و قميص لونه اسود و طويل و شعري كله مرفوع .. يارب يارب احميني يارب .. فجاه سحبني من ايدي و يلسنا ع الغنفه و حط ايده ع كتفي و ارتخى ع الغنفه .. يارب ابي اشرد ابي اششششرد .. حسيت بخوف هب طبيعي كنت اخاف منه و هو صاحي .. عيل كيف و هو سكران بس هو متى يشرب !! اول مره اعرف انه يشرب اتقززت منه فوخرت عنه بحركه لا اراديه و انا اطالعه من فوق لتحت باشمئزاز

صقر : بلاك .. ليش وخرت .. تعال تعال .. برمسك
لسانه كان ثقجيل و شكله كان يخوف بزياده عيونه يالله يفتحن و مبتسم ابتسامه جانبيه و شعره متلخبط جنه ياي من ضرابه و غترته ع جتفه و عقاله ع راسه و بدون نعال !! لفت انتباهي لما بدا يتكلم ..

انا متاخر هني عليكم ببارتين ..
فمحطهم مع بعض ..
و ان شالله من بعدهم كل سبت بحط بارت ^^

الفصل الرابع
( حقائق )

بدا يتكلم و هو يطالع الفراغ و عينه مثبه ع شي معين و نبره صوته كانت حزينه
صقر : انا السبب .. مات بسبتي .. سرعت و حذرني .. بس عنييييد هيه انا عنيييييييد .. شفت مات راح " حرك ايده " بببببح ماااات " ضحك " ههههه طار فالهواا طاااااار .. ههههههه
الحمدالله انه حجره يدووه يبعد ع الصاله بحيث ما تسمع الاصوات اللي فالصاله و لا جان انفضح .. بس هو يرمس عن منو ؟! منو اللي مات بسبته !! سرعه و حذره !! شسالفه
صقر : يقولون الشاحنه السبب .. بس لا انا هيييه انا .. ههه يحبني اربيعي .. مات طار فالهواء
بدا يقطع فالكلام صرت ما افهمه يعني اربيعه مات !!
صقر : انا ما مت هو مات .. ليش جي " طالعني و لمحت الدمعه بعينه " ليش مات !! يقول لا تسرع و مات

احينه تذكرت الحادث اللي صار قبل ثلاث سنوات تقريبا كان ويا ربيعه و ربيعه مات و هو كانت حاله صعبه و نجى بصعوبه !! بس قالو هب هو المتسبب بالحادث الشاحنه انحرفت ع الطريج و دعست السياره ع جه ربيعه فتوفى بنفس اللحظه .. ليش يلوم نفسه هو ماله خص يعني معقوله ورى التغير هو تأنيب الضمير !! بس اللي يسويه دمار لنفسه هب تأنيب ضمير

صقر : انزين .. شو رايك نطلع احينه .. هههههههه
امبيه فالموضوع في طلعه خليني اشرد احسن
بس وقفني صوته : خطيبته .. تقول تحبني .. شفت الخيانه هاي بذبحها .. خاينه تحبني .. اتيني الشركه تسوي حركات .. باستني حضنتني .. تحبني تباني اخبطها .. هددتني .. تحبني
امبيه هذا طايح فمصيبه !! خطيبه ربيعه هددته بس هو ريال شقايل حرمه تهدده لازم يوقفها عند حدها ليش يخاف منها بس شكلها قويه باسته و حضنته و تحبه و هددته ما خلت شي الا و سوته
صقر : هددتني اني .. لازم اخطبها .. ماابي هي خاينه ما احبها

احس راسي افتر بس بس حسيت اضعف منه ماشي حسيته انسان ضعيف جنه ياهل خايف من اللي بيصير عقب .. قربت منه بس عقلي متردد لكني سمعت صوت قلبي و حضنته .. وهو حضني رص عليه بالقوو حسيت بألم .. بديت اسمع صوت صياحه قطع قلبي ياربي شو من مصايب طايحه عليك يا صقر شو من مصايب طايحه عليك !! ياريتك تتحرك و انت صاحي و تقول كل اللي فخاطرك ياريت .. وخرت عنه و حطيت ايده ورى كتفي و وقفته ابي اوديه حجرته سحبته شوي شوي و ثقله علي و هو يتمتم " تحبني , مات , اكرها , حضنتني , خاينه " لين ما وصلت لحجرته كانت ريحه السجاير ماليه الحجره مشيت لسرير و سدحته و طاح بكل قوته ع السرير و رقد على طول ..

ظهرت من حجرتيه حسيت ريجي صدق نشف رحت شربت ماي .. ستغربت من نفسي كيف يلست ويا واحد سكران كيف يتلي الجرئه اني ايلس وياه ليش ما قدرت اشرد !! ماادري احس انه غلط اسمع لاسراره غلط دام هو يايبي يقول المفروض ما استغل وضعه و اسمع بس هو رمس هو اللي بدا يرمس و حسباله اني حمد !! اي حمد ليكون ولد خالتي !! معقوله يعرف بكل شي ليش ساكت !! همم يمكن يوسف بعد يعرف .. قمت سمعت صوت الاذان رحت صوب حجره صقر وقفت كيف بوعيه لصلاه الفجر اساسا هو هب صاحي و احينه رقد يعني لو قام ما بيكون فوعيه .. رجعت لحجرتي توضيت و صليت .. قلت بنزل تحت بشوف يدووه قامت و لا لا , نزلت و دقيت الباب بهدوء وياني صوتها

يدووه : ادخل
حدرت و انا مبتسمه معني لين احينه متوتره من سالفه صقر : واعيه يدووه قلت اشوفج وعيتي
يدووه : دومي اقوم بنتي متعوده , صليتي فديتج
: هيه يدووه صليت
يدووه : عيل سيري ارقدي شويه سيري ريحي
حبيتها ع راسها و ظهرت سرت جدا حجرتيه .. فريت عمري ع السرير بس الخوف متملكني احس اني خفت اكثر من يلستي معاه احسه بيحدر الحجره احينه و يرد يرمس .. تنهدت بضييج تميت اتقلب اكثر من نص ساعه لين ما رقدت ..

،

وعيت ع ساعه 2 ونص رحت تسبحت و صليت و لبست لي مخوره لونها عشبي و تجحلت و رفعت شعري بشكل مهمل بحيث تنزل خصل ع ويهي و حطيت كلوز وردي و تعطرت و نزلت كانت الساعه 3 ونص .. حدرت المطبخ بس تيبست و انا اشوفه يالس بروحه ع طاوله الاكل شكله توه واعي شراتي , رحت يلست و اطرافي تنتفض يمكن يتذكر شو صار البارحه و يهددني ان قلت لحد او يصفعني او اي شي اي شي .. ياربي زايغه بديت اكل انا و هو وبس لانه يدووه و يوسف تغدوا قبلنا .. وضعنا كان جدا هادي ما اصار اي احتكاك بينا حتى مارمس معقوله ما يتذكر شو صار امس !! يمكن لانه كان سكران .. احس بعدني هب متقبله انه كان سكران البارحه !! هو من متى يسكر ودي اساله بس احس بتيني صفعه طيح ضروسي كلها

ميري : مداام
رفعت راسي : ها !!
ميري : كلاص !!
طالعت صحني كان فاظي و طالعت جدامي و ما حصلت صقر .. قمت و ظهرت من المطبخ حصلت يوسف يالس يطالع تلفزيون و صقر وياه متردده اسير اقعد وياهم و لا لا !! خايفه من صقر خاايفه احس الخوف بدا يتملك قلبي و بديت اتخيل اشياء .. اتخيل يقوم يضربني او انه يهددني اذا خبرت حد .. يلست بهدوء عند يوسف احتمي فيه و منها اختفي عن انظاره

يوسف : خذيت الصفقه !!
صقر : هيه خذتها بعد ما حسبتها صح
يوسف : ربحها مضمون ؟!
صقر : هيه

كان ليدي الله يرحمه شركه عقارات كبيره و لكل واحد من عياله قسم من الارباح .. و امايه كان لها قسم بس من ولدت يدي طلب منها تكتب الارباح باسمي عشان ما يضيع حقي خصوصا اني بنت وحيده لامايه و ابويه .. وهذا اللي صار احينه انا اشاركهم بقسم من الارباح كانت الارباح تتقسم علينا نحن الاربعه انا و خالتي و يوسف و صقر .. ابويه ما كان يعرف عن سالفه هاي الارباح كان ها شي حرص من يدي بس اعرف مستحيل ابويه يفكر ياخذ بيزاتي بس يدي كان مصر ع كتمان ها الشي بس عرف ابويه بعد ما دخلت سن ال 16 سنه و مع ذلك ما خلاني المس شي من ها البيزات كان يشترلي اللي ابيه من بيزاته بس مع ذلك كنت اصرف منهم احيانا يعني اتشرى ملابس و اشياء تخصني من ها البيزات احيانا لاني اعرف معاش ابويه ما بيكفي متتطلباتي ..

تموا يتناقشون عن الشركه و انا هب فاهمه عليهم واايد .. رن فوني [ منصور يتصل بك ]
: الوو
منصور : شحالج ؟!
: بخير و سهاله و من صوبك ؟!
منصور : اااه عندي رحله يووم و هب متفيج
: ههههههه ربي يعينك
منصور : انزين شسمه باجر بيمرج نهيان عشان تسجلين فالمرور بخصوص اليسن و بيسجلج فالجامعه
: هيه ع طاري الجامعه بسير نفس جامعه بنت خالتي
منصور : ما طلبتي شي خبري نهيان و بيوديج
: تعال هب ع ساس توظف !!
منصور : بيداوم يوم الثلاثاء عشان جي
: هييه انزين خير ان شالله متى بيمرني !!
منصور : ساعه 8 تكونين عند الباب ترى بيحتشر خخخ
: ههه ان شالله بكون زاهبه ع ثمان
منصور : خلاص تم يالله اخليج مع سلامه
: ربي يحفظك

سكرت عنه , سألني يوسف : شو عندج باجر ؟!
: الصبح بيمرني نهيان عشان اسجل فالمرور عشان الليسن و بسجل فالجامعه
يوسف : جان خبرتيني كنت بوديج باجر ما عندي شي
: هب مشكله هو بيمرني لانه منيره بعد بتسجل
يوسف : ع راحتج
: احييم يوسف ودني الدكان الييوم
يوسف طالعني : بتروحين الدكان !! وين تبين
: لا اقصد يعني تشترالي من هناك يعني خاطري جبس و كاكاو و ببسي و بسكوت و حلاو و لبان
يوسف اعتفس ويهه : تعرفين ماشي دكان صوبنا و لازم اوديج الشيشه متعاااااييييز
نافخت : خلك خلك غيرت راي
يوسف : هههههه بعوضلج اياها و لا يهمج بس هب اليوم متكاسل من خاطر
ابتسمت : ولا يهمك بس اسمع باجر يمكن ارد البيت توديني فدربك
يوسف حط اصابعه تحت عينه : من ها العين قبل ها العين ان شالله

صليت العصر فحجرتيه .. كنت ناويه اتصل فشواخ ارمسها و اخليها ترقد الليله هني بس تذكرت سالفه صقر يمكن الليله بعد يسكر يمكن اقدر اعرف اشياء ثانيه عنه و بعدين باجر الصبح بظهر هب حلووه اخليها اتي و اوردها الصبح .. نزلت تحت كانت الصاله فاظيه بس لفت انتباهي كيس كبير ع الطاوله نفس كيس الشيشه مشيت و فتحته لقافه .. كان في كل اللي اشتيه جبس و كاكاو و حلاو حتى الايس كريم موجود و من كل نوع ياحبيبي يا يوسف ما هنت علييك , خذت الايس كريم حطيته فالفريز لانه كان ذايب شوي و رجعت الصاله حصلت يدووه تمشي شوي شوي ويا عصاها رحت ساعدتها ويلستها ..

ابتسمت : يدووه تبين ؟!
يدوه : شو ها ؟!
طلعت جبس و كاكاو : خذي
يدوه : وخري عني ها الزباله من متى اكل ها الاكل اكل يهال منو شاري كل ها ؟!
يلست و انا افتح الجبس : يوسسسسف
يدوه : كلي بالعافيه , حبيبتي اذا ما عليج امر خبري ميري اتيب القهوه و التمر
: ان شالله

خبرت ميري و بربع ساعه يابت القهوه و التمر و فتحت التلفزيون ع قناه دبي حاطين مسلسل كوري طالعته و يدووه كل شوي تعلق عليه اونه شو ها و ماادري شوه و غيري ههه اخر شي حطيت لها قناه دينه و تمت تتسمع و انا ملتهيه بكومه ها الكيس .. شوي و دخل يوسف سلم و حب راس يدوو

: مششششكووور
يوسف : ع شوو ؟!
أشرت ع الكيس
يوسف عقد حواجبه : بس ما اشتريت شي !! قلتلج اني متعايز ما رحت
ستغربت : عيل منو شترى ؟! السايق مثلا
يوسف : ماادري يمكن صقر !!

صقر !! ههه اكيد يستهبل هذا من تغير حاله ما حط اعتبار لحد و لا همه احد يعني بيتعنى عشاني و يروح يشتري لي كل هاا !! شكله يوسف يسوي فيني مقلب طنشت و كملت اكلي لين ما حسيت اني اكتفت .. قضى الوقت و انا يالسه و يا يدووه و يوسف اما صقر راح الشركه و ع العشا تعشينا مع بعض .. سرت حجرتي و بيدي علبتين ريد بول شربتهم ورى بعض ماابي ارقد بتريا صقر و بظهر بنفس لبس البارحه عشان يتهيأله اني حمد و يقعد يرمس ابي اعرف اكثر عنه و شواللي مخلي غامض ها الكثر .. تمييت يالسه لين ساعه 1 ع الاب و ظهرت بنفس اللبس اللي لبسته البارحه و رفعت شعري نزلت تحت و انا اقرى المعوذات و الادعييه ..

احينه في وحده خبله شراتي تروح للموت بيرلها يمكن ها المره يتحسبني بنت و يسوي بي شي .. وقف مكاني خفت يمكن يسوي لي شي بدون ما يحس تراى هب صاحي .. تعوذت من بليس و كملت مشي بس الصاله كانت هاديه عادي بتريا رحت يبت لي كوب ماي و يلست فالصاله اتريا و كل شوي اطالع الباب و اشرب ماي لين ما اذن و ما يا !! رحت صليت و رديت للصاله لين ما طلع الشمس عاد ريد بول سوا مفعوله لين احينه ماياني رقاد ..

فتحت شعري و لعبت فيه و رديت رفعته .. شوي و شفت شي ابيض خطف جدامي رفعت راسي و شهقت بس ما سمعني مشيت شوي شوي و قلبي يدق بقوه .. صبر صبر ها نزل من فوق كيف دخل !! انا طول الليل هني يالسه فالصاله محد دخل كملت مشي صوب المطبخ حصلته يالس يتريق و هو . . . صاحي !! طالعته وبققت عيني متى !! هذا شكله ما سكر اليوم صح كيف بيسكر و عنده دوام فالشركه ضربت ع راسي بغباء و ناسيه وجوده مخ مخ والله ماشي مخ .. رحت يلست جدامه و هو مارفع عينه عن اكله شوي و نزل يوسف صبح و يلس طالعني

يوسف : شو موعنج !!
طبعا عندي عذر : شو نسيت نهيان بيمرني
يوسف : هييه انزين تريقي عدل
ابتسمت : ان شالله

تريقت و انا اسرق نظرات اشوف صقر كان عادي .. قام و طلع و بعده يوسف رحت تسبحت و لبست بنطلون جينز ازرق و تيشرت احمر و لبست عبايتي عليها تتطريز احمر و خذت شنطه حمره من جانيل و كعب اسود و حطيت كحل فعيني و تعطرت و نزلت تحت يلست فالصاله اتريا نهيان .. بعد عشر دقايق ياني نهيان و منيره كانت وياه رحنا سجلنا فالجامعه هي فجامعه و انا فجامعه .. و خلاف سار عيمان عشان اسجل فالمرور قال انه هناك اسهل و بخلص بسرعه وماشي كلاسات قلت زين احسن بس قال بياخذ المتدربه من دبي و بجي اكون خلصت شغلي و ردني البيت ساعه 2 الظهر تاخرت لاني فنفس اليوم امتحن امتحان الاشارات و نجحت فيه و بعد اسبوعين عندي امتحان الباركن .. و بعد اسبوعين بعد عندي امتحان التوفل حق الجامعه ..

يدووه : انتي من وين يايه ؟!
طالعتها و ضربت ع يبهتي : ههه نسيت اخبرج يدووه نهيان مرني عشان اسجل فالجامعه و الليسن
يدووه : هييه و انا حسبالي راقده
رحت حبيها ع راسها : لا فديتج بسير اصلي و ببدل و بنزل
يدووه : سيري فديتج خوالج ع وصل

رحت بدلت البنطلون اللي ما البسه الا للطلعه اللي اظمن فيها اني ما بفصخ العبايه لبست بجامه حرير بنطلون طويل و قميص كم طويل لونه فوشي لانه بعد الغدا برقد قمت اشفر خلاف سرت اصلي .. بعد ما خصلت نزلت تحت تغدينا يميع و رقدت بعدها رقاد طويييل ..

،

وعيت و انا حاسه بكسل هب طبيعي رحت غسلت ويهي و بدلت و نزلت تحت و احس بعده الرقاد فراسي .. كانت الساعه 10 المسا كنت بكمل نومي بعد اليوع كافر .. كانت الصاله هاديه اكيد الكل رقود رحت المطبخ حصلت عشاي فالثلاجه كان معكرونه سخنته بالمكرويف و كلت لقمتين ما قدرت اكمل رحت كملت رقادي ..

قمت حاسه بنشاط طالعت الساعه كانت 11 الصبح .. تسبحت و لبست dress لونه بني ويا حزام بيج ساده جحلت و حطيت كلوز و تعطرت و نزلت تحت صبحت ع يدووه و تريقت كنت جاكه انه ممكن صقر سكر البارحه !! بتاكد لما اتي ساعه 2 اذا راح الشركه يعني ما سكر و اذا نزل من فوق يعني سكر و جي بتاكد اذا هو بس يسكر فالويند و لا فأي يوم .. تميت ادق سوالف ويا يدووه و تفرق لي بين بنات اول و بنات ها الايام و تعق عليه رمسه

يدووه رفعت ايدها : يارب يبلغني و اشوفج عروس قبل ما اموت
قمت حبيتها ع راسها : يدووه شو يارب طاري الموت اعوذ بالله
يدووه : كلنا رايحين لها الطريج
: الله يعطيج طوله العمر يارب
تطبل الباب و شفت صقر و يوسف داخلين يعني شكوكي بمحلها ما يشرب الا الويكند عشان ما يجكك احد فيه .. بعد الغدا يوسف ردني البيت معنه منصور باجر بيوصل .. دخلت سلمت و حدرت حجرتي بنفس الوقت رن فوني لين ما حطيت الشنطه من ايدي و تميت اتعبث فالشنطه ادور ع فوني تسكر طالعت الرقم كان غريب فريت الفون و رحت فصخت عبايتي و خلاف نزلت تحت

نهيان : انسه ميره ممكن طلب و بدون مذله
حطيت ايدي ع خصري : من متى انا اذل !!
نهيان نافخ بملل : شو احينه !!
ضحكت : قول
نهيان : يعني بما اني وديتج البارحه و تعنيت
: هيييه !!
نهيان : ابي سويت
منيره : انا بسويلك اخاف تسممك
نهيان : توني اذل عمري و تقولين ما بسوي شواللي تغير
قهرني ردها بغيت اصفعها خطفت من جدامهم و هم يتجادلون رحت صوب المطبخ رحت فتحت الكبت و طلعت اللي احتاجه عشان السويت فجاه انسحب من ايدي الدريم ويب بقوه طالعت الشخص كانت منيره
منيره : ما نبي منج شي سيري انا بسوي لاخويه
رفعت حاجب .. احسن ريحتني رحت يلست فالصاله و احس اني مفوله ها الكم يوم اللي تميت فيها فبيت يدووه حسيت اني تدلعت بزياده محد يسمعني كلمه تزعلني يدووه تتفداني و تحبني خالي يوسف و استهبالته و اليلسه و يا خالتي و شويخ .. اووف ما بصغر عقلي عشان وحده مغروره مثل منيره .. بعد ما جهز سويت الخانوم منيره ع العصر الكل اجتمع و بديت تحط فالصحون و حطت جدام الكل الا جدامي قهرتني حتى ما يابت لي صحن يلعتن السويت بس عيب عليها ليش جي تسوي حسيت اني بصيح صدق اذا تكلمت بصيح

امايه : منيره شو نسيتي اختج سيري هاتي لها صحن
منيره : برايها امايه جان تبا تروح تيب حق عمرها
امايه : منيره شها الرمسه تراها اختج عيب قومي يلا
منيره : عدها ريول خلها تروح بروحها
قمت و انا احس اني بصيح رحت حدرت حجرتي و فريت عمري ع شبريتي و نزل بدال الدمعه دموع .. احينه صارت تستقوى عليه ع ايام ابويه الله يرحمه ما كانت تنطق بكلمه بس ليش تحسست لهدرجه تولي قمت مسحت دموعي و بثواني صحت مره ثانيه و صوت شهقاتي تعلى اكثر و اكثر حرام عليها انا ما ضريتها بشي .. اندق الباب و من حرتي قمت فتحت الباب كنت متوعه تكون منيره كنت بفر عليها كمن كلمه و اسكر الباب فويها بس كانت هي .. كان سعيد
طالعني وهو مبهت و تلعثقم : آآ آ .. آمآيه تقول تعالي
صرخت من حرتي : ماابي شي من منيره ولا منكم سير عند اختك سسير و محد اييني
سكرت الباب فويه اكيد سمعو صوتي تحت خلهم يحسون باللي يسونه فيني رديت تسدحت ع سرير و كملت صياحي و فوني يرن و ماابي ارد و مااعرف منو اصلن ..

بعد ما هديت من نوبه الصياح ندمت ليش اني ظهرت جدام سعيد بدموعي بس ما ندمت ع صراخي رحت غسلت ويهي و شفت فوني منو اللي يتصل من الصبح كان رقم غريب و نفس الرقم !! لو حد يباني بيرد يتصل رحت تسدحت ع السرير و فكرت فصقر و بلاويه ياربي والله خاطري ارمسه و اقوله اني اعرف كل شي و ابي اساعده بس احس انه بيتضايج خصوصا انه قال كل ها من غير وعي .. قمت فتحت الستاره شفت المكان برع الزرع و الكراسي المعلقه و الضو حبيت الجوو حسيته غرام معنه اعرف انه رطوبه تنهدت بضيج و رحت يلست ع كرسي المخملي و خذت المجله و تميت اقلب فيها رن الفون طالعته نفس الرقم شكلهم مصرين !!

رديت : الوو
.. :
: الوو !!
.. :
: منو ؟!
.. :

سكرت بس ردوا اتصلو و رديت و نفس الحاله !! يستهبلون يعني فريت الفون ع الطاوله و كملت قلبه فالمجله و سمعت صوت الاذان طالعت الساعه كانت 8 ونص شهقت ما صليت المغرب و ربعان صليت المغرب و العشا مع بعض .. و فوني رد رن بنفس الرقم
طفرت و رديت بعصبيه : وبعدين يعني بترمسون و لا شوه ؟!
.. : هدي
ارتجف اطرافي من صوته الرجولي الهامس : منو ؟!
.. : هب مهم تعرفيني
: بغيت حد !!
.. :
: اخويه شكلك غلطان
.. :
لا حول و لا قوه الا بالله بستخف هذا : مع سلامه

سكرت شو ها عبيط و غبي ليش يتصل اونه هب مهم تعرفيني شبا به !! اندق الباب رحت فتحته كانت سعيد طالعني بنظرات تشبه نظرات منصور و بصوت غريب عليه : العشا جاهز تعالي تعشي
تستغربت ها اللهجه كانه منصور واقف جدامي !! : ماابي هب يوعانه
سعيد : انزلي بتيوعين بعدين يلا
انتفضت خفت بصراحه ليش يرمسني بها الحنيه هب هذا سعيد اللي اعرفه !! : انزين احينه بلحقكك
ابتسم و راح و نزلت بعد دقيقه حصلتها يالسه ع الطاوله رحت يلست مكاني بدون ما ارمس ولا اطالع بويه منيره و حطيت اول لقمه فحلجي كانو مسوين لازانيا بس كان حااار على طول رحت صوب المغسله طلعته من حلجي و غسلت حلجي سمعت صوت سعيد
سعيد : تعرفين انه معدتها ما تتحمل اكل الحار شعنه مسويته حار
منيره : احب الحار و بعدين انت شعليك مستوي منصور ع غفله
امايه : انا ما قلتلج لا تحطين فلفل روحها تعبانه من معدتها
شوي ويت امايه طالعته و رمست و انا معصبه : دام ما تبوني اتعشى ليش زقرتوني
امايه بعصبيه : ارمسي عدل انا ما سويت العشا و احينه بسويلج شي قولي شو تبين
ندمت لا الا امايه مهره رحت حبيتها ع راسها : سامحيني
امايه : ما عليه و منيره دواها بعدين قولي شو تبين اسويلج ؟!

هزيت راسي بلا و ظهرت من المطبخ رحت يلست فالصاله و جابلت التلفزيون شوي وياني سعيد يلس عندي
سعيد : تبين اطلبلج من كفتيريا !!
طالعته وانا لين احينه مستغربه من تغيره : لا مشكوره هب يوعانه
سعيد ريح فيلسه كانت اول مره يلس عندي
: سعيد
سعيد لف : لبيه
بهتت فيه : شي ببسي فالثلاجه !!
سعيد : لا بروح اشتري
قام و طلع لا لا ها الولد حد ضاربنه ع راسه او ياله شي غريب ليش جي مهتم !! معقوله دموعي حركته مشاعره .. ضحكت ع ها التفكير منو سعيد !! التوام ما يهتمون فيني و يدورن اي شي عشان يقهروني و يسوين مقالبهم عليه .. اويه ليكون ها واحد من مقالبهم يارب سترك .. دخل سعيد و عطاني الببسي اللي كان بارد فتحته و شربته و هو يلس عندي
سعيد همس لي : منيره غيرانه منج عشان جي ترمسج جذا لا اكثر و لا اقل
طالعته كنت برد بس وقفني صوت فوني نفس الرقم تنهدت بضيج و حولته صامت رديت لسعيد : شدراك ؟! وليش تقولي !!
سعيد : اختي و اعرفها
سكتنا لما منيره يت .. كملت شرب الببسي و انا مطنشه الكل طالعت التلفزيون بهدوء لما خلصت الببسي حبيت راس امايه و رحت جدا حجرتيه و رن فوني مره ثانيه بنفس الرقم احس اني بكسر الفون

رديت بعصبيه : خير
.. : الخير بويهج
نفس الصوت الرجولي الهامس كان غذب , عصبت ع عمري : شو تبا ؟!
.. : توني اعرف انج عصبيه
: انت منو عشان تعرفني
.. : ميره قصري حسج
انتفضت و يلست ع السرير بحيره : كـ .. كيف عرفت اسمي
.. : هب مهم
من توتري عصب : شو هب مهم كيف عرفت اسمي !!
.. : ما بعيد المهم لا تنطشين مكالماتي , تصحين على خير ميره

و سكر و انا انتفض ياربي منو هذا !! و كيف يعرف اسمي من يكون ؟! حسيت جسمي كله ينتفض خفت من ها الشخص المجهول .. تسدحت ع السرير و تحولت لوضعيه الجنين من خوفي و لميت نفسي و انكمشت .. والله لو يدري منصور بيدفني هني بدون رحمه هو حساس فها المواضيع يارب يارب منو هذا اللي يعرف اسمي !! بعمري ما احتكيت ويا حد غريب .. ياربي كيف اتخلص من ها المصيبه !! مالي الا اطنشه هيه لازم انطشه و بيمل و ما بيرد يتصل

الفصل الخامس
( اني بحاجه إليه )

نزلت تحت بعد ما تسبحت و بدلت كنت ماسكه فوني و ايدي ترتجف لانه بعده يتصل رحت يلست ع الطاوله اتريق و حولت فوني ع سايلنت كانت منيره توها نازله يت يلست و سعيد و سعود وياها و شكلهم واعين بالزور .. طالعت سعيد اللي ابتسم لي رديت لها الابتسامه ان شالله تكون علاقتنا حلووه دووم .. شفت فوني يولع بنفس الرقم طنشت و كملت ريوقي صبيت لي كرك و شربته بذهن سارح .. انتبهت ع الفون يولع يعلن عن وصل مسج وطيت كوب الكرك ع الطاوله و شفت المسج كان من نفس الرقم " ردي علي و لا طنشين مكالماتي ترى بثواني اتصل باخوج و اتبلى عليج .. 050 / ******* "

انتبفضت هذا رقم منصور امبيه هذا من وين يايب الرقم .. حطيت ايدي ع قلبي اسمع نبضاته احس الكل يسمع صوت دقاته حست نفسي صار صعب ياربي شو ها البلوه رفعت راسي لاحظت اني بروحي ع الطاوله .. انتبهت ع الفون نفس الرقم
خذت نفس و دريت
.. : يعني ما تين الا بالتهديد
رغم صوته العذب الا انه حقير : شو بغيتي !!
.. : ليش ترمسيني جني بنت حد عندج ؟!
: اسمعج
ضحك : انزين , كيف اصبحتي ؟!
سخيف مثلا !! : الحمدالله
.. : انزين ميره برمسج بعدين و لا تنطشين اتصالتي اوك !!
ما رديت
.. : ميره !!
: ان شالله
.. : مع سلامه
: مع سلامه

سكرت و انا انتفض طلعت نفس و طالعت حولي كنت بروحي تعمدت اني ارمسه ع اساس انه بنت ماابي حد يسمع بالصدفه و تصير مشكله مافيني ع المشاكل قمت صعد فوق لحجرتي ياربي شو ها الغموض اللي حولي يكفي سالفه الهدايه اللي تيلي باسم شيخه معنه هب من شيخه بنت خالتي ماادري من منو !! و هدايا توصلني بشكل متواصل فكل المناسبات تكون عباره عن ملابس , نعول , ساعات , اكسسوار و غيره و الملابس تكون ع قياسي و الاغراض كلها ع ذوقي ماادري منو ها اللي يعرف عني كل ها الكثر !! بس بعد استنتجاتي انا و شيخه قلنا انه ها الشخص من العايله ما ينعرف اذا بنت و لا ولد ..

و سالفه ها الهدايا من سنتين شي غاامض بس شيخه متوقعه انه ولد لانه اذا بنت ما بتخش اسمها اكيد ولد .. يمكن !! اخر هديه وصلتني لما تخرجت كانت عباره عن ساعه سراميك من ماركه رادو و عطر من جانيل و عده كامله مكياج من ديور .. كل شي يوصلي كان ماركات و ع ذوقي و كل يكون ع قياسي و اللي حيرني اكثر انه على الاعياد يوصلي من الشخص " كعب و ساعه و اكسسوارات " نفس لون ثوبي يعني ها الشخص من معارفي اللي قريب مني بس هب منصور متاكده من ها الشي لانه منصور لما يعطيني هديه يعطيني اياها بدون لف و لا دوران .. افتر راسي من كثر ما افكر فريت عمري ع السرير و تميت اطالع السقف بهدوء

،

لبس بدله الطيران و رتب شنطته .. طالع عمره فالمنظره اخر نظره و عدل شعره و لبس قبعه الكابتن و مد ايده ياخذ الشنطه بس وقفه رنه فونه طلعه من جيبه و طالع المتصل يلس بهدوء ع الغنفه .. صح انه مسح رقمها بس بعده حافظه
رد عليها بصوت مخملي جبار : سلام عليكم
غلا : و عليكم السلام , شحالك ؟!
منصور : بخير , شخبار محمد ؟!
غلا : الحمدالله امممم بتي بتاخذه اليوم ؟!
منصور : هيه باخذه المغرب
غلا : ممكن نتفاهم ع شي
منصور ببرود : بشو ؟!
غلا : بخصوص محمد ابي يكون عندي حتى بعد الزواج
منصور وقف و بجمود : مستحيل و اذا ما بترضين بالطيب المحاكم بينا و انتهى

سكر الفون فويهها و غلقه و سحب شنطته و ظهرت من السويت

،

دخل منصور المغرب و محمد بيده ركضت شليت محمد من ايديه و قعدت العبه و هو يضحك فديته صار عمره 3 سنوات بس نفته
منصور : و انا ماشي احضان و لا من شاف احبابه نسى اصحابه ؟!
ضحكت و حضنته بايد وحده و رحت يلست و محمد فحضني اللعبه و هو يضحك بس من شاف امايه مهره راح ركاض صوبها والله و دقها خيانه الخايس .. فديته والله له نفس عيون منصور اما باجي الملامح يشابه امه .. حسيت بيد تسحب ايدي كان منصور صعدنا فوق و رحنا جدا حجرته يلست ع الكرسي و هو دخل الحمام يبدل .. ظهر و ملامحه ابد ما عيبتني شكله الموضوع يخص غلا !!

منصور خذ نفس : غلا ما تبي تعطيني محمد
حطيت ريل ع ريل : و ليش ان شالله ع كيفها !! تتزوج و تاخذ الولد
منصور : اتصلت بي اليوم
رفعت حواجبي : عشان محمد !!
منصور : هيه
: و شو قلتلها ؟!
منصور : قلتلها اني باخذ محمد و اذا رفضت بينا المحاكم
: و القضيه بتكون فصالحك و لا فصالحها
منصور : فصالحي انا لانها بتتزوج و بعدين هي ما تشتغل عشان تصرف ع ولدها عايشه ع بيزات ابوها
: و الحل !!
منصور : باخذ محمد طبعا " يلس " ما اتصور يقول بابا لشخص ثاني غيري
: و اكيد هي بعد هب راضيه يقول ماما لشخص ثاني غيرها
منصور طالعني : بس انا ما افكر اتزوج
: لا منصور صدق ليش يالس يعني عشانها ما بتتزوج !! خلاص تراها تزوجت
منصور : خايف هذا و انا احبها ودرتني
: منصور انت ما يعيبك شي هي اللي ما عندها نظر انا ما اقول ها الرمسه جي من عندي هذا الصدق
اندق الباب و دخل نهيان : شو سالفه محمد !!
منصور : شو السالفه ؟!
نهيان يلس ع السرير : سمعت بالصدفه انك بتاخذه بالمحاكم !!
منصور : هيه غلا بتتزوج و تبي محمد
نهيان رفع حاجب : تتزوج !! هاي ميته ع زواج , المهم محمد تروم تاخذه سهله
منصور : ادري بس ابي اخذه بدون محاكم و مشاكل
نهيان : اذا هي تبي المشاكل شو بتسوي
منصور تنهد بضيج : ماادري
مسكت ايده : منصور لا تتخلى عن محمد عشان حب اندفن خلها برايها هي الخسرانه , خسرت زوج و ولد
نهيان : ها هاي الرمسه السنعه ماعليك منها
منصور : اخاف الولد يضيع بينا و هو صغير متعلق بامه
لفيت ويهي و طالعت الفراغ : منصور هذا انا شفت حياتي و انا ياهل و هذاني عايشه الحمدالله مافيني شي
منصور مسح ع شعري
وقفت و طالعته : يلا انزل و لا تحط فبالك و الولد لا تتنازل عنه
منصور ابتسم

شليت عمري و سرت حجرتي خذت من ثلاجتي جالاكسي و نزلت تحت حصلت محمد حاط فوني ع اذنه و يرمس عقد حواجبي .. طرى فبالهي الريال ركضت سحب الفون منه طالعت الفون كان في مكالمات لم يرد عليها منه كانت مكالمتين , طالعت محمد
: تبا جالاكسي
محمد مد ايده : اتييني ( عطيني )
ابتسمت و اشرت ع خذت : عطني بوسه
مسك ويهي و باسني بقووه حتى عضني و خرت عنه بسرعه : ااااه يعور
ضحك عليه و سحب الجالاكسي و تبهدل وهو يحاول يفته راح يستنجد فسعود يفتحله , رن فوني رفعته كان نفس الرقم خذت نفس و صعد الدري و رديت عليه
.. : ليش ما تردين لدقيقه كنت بتصل
سكرت عيني و رديت فتحته لما سمعت صوت منصور و نهيان يرمسون : الفون ما كان عندي
.. : مره ثانيه خلي عندج
حدرت حجرتي بعد ما خطفت جدام منصور و نهيان : اظن ها الشي راجعلي
.. : لا طبعا , اخبارج ؟!
: اذا تعرفين اسمي اكيد تعرفين اخباري
.. : شو قالولج جني !!
زفرت بضيج : متصله عشان تسالين عن اخباري !!
.. : هيه
سكت ولا رديت
.. : ميره
انتفضت اول ما نطق اسمي كل ما اسمع اسمي ع لسانه احس بسواد : خير
.. : اسالج عن اخبارج بلاج ما تردين
: يعني كيف تبا يكون حالي يالسه اسوي شي غلط استانس مثلا
.. : بلا طوله اللسان
: ممكن اسكر اخواني تحت يتريوني
.. : هيه ممكن بس من اتصل ترديني و لا تقولين انه الفون ما كان عندج
: اوك مع سلامه
.. : مع سلامه

سكرت و نزلت تحت و من شفتهم حاولت اتنسى موضوع ها المجهول , شفت محمد ايدينه و حلجه كل كاكاو شكله كان توحفه حلفت عليهم ما يغسلون و ربعت جدا حجرتي يبت كميرتي و صورته و هو مستانس ع الفلاش و خلاف شليته و غسلته
محمد : ابي غييير
: لا والله وايد ستانست عليه ماشي بعدين بنتعشى
محمد طالعني ببرائه : ابي بابا
ضحكت و رحت الصاله ويلسته فحضني بس نزل من حضني وراح يلس عند منصور اللي حضنه بقوه و باسه و خلاه يالس فحضنه , يارب يكون محمد وياه و يستانس شويه شاف الهم و يا غلا فالفتره الاخيره تعب وايد الله يوفقه و يهني ..

،

تسبحت بسرعه و بدلت و لبست عبايتي و جحلت عيني و تعطرت و خذت شنطتي و لبست نعال مسطح و نزلت ربعان تحت .. سهرت البارحه ما رقت الا ع ويه الفير و وعيت ساعه 3 الظهر و بنسير احينه صوب كارفور حتى غدا ما تغديت .. ركبت سياره منصور الفتك و تحركنا محد راح غيري انا و امايه مهره و منصور و محمد الصغيرون .. وصلنا و نزلنا و بدينا ندور بين الرفوف و انا اخذ لي كل اللي ابيه .. شوي و اختفى محمد من عندي ما خفت لاني اعرف وين بيسير رحت صوب رفوف الكاكاو حصلته بين احضان واحد شايلنه و مخلنه ياخذ اللي يبيه من الرفوف قربت شوي

: محمد
محمد طالعني : أموو تعاني ( عموو تعالي )
الريال ابتسم و ما طالعني نزل محمد و لف , و محمد ياني ركيض بيده مجموعه كاكاو ماكسنهم بيدينه الاثنين : تبي شي بعد !!
محمد هز راسه بلا خذت اللي بيده و رجعنا لامايه و رحت خذت لي كمن غرض و طلعنا من كافور و ردينا البيت ع الساعه 6 المغرب صعد فوق ابدل بس منو قال بتهنى بيومي و ها العثيث وراي
: الوو
.. : شحالج ؟!
يلست بملل : بخير
.. : همم شو سويتي اليوم ؟!
: يهمك !!
.. : ردي
: ما سويت شي
.. : رحتي كافور
حسيت قلبي بيوقف : دام تعرف ليش تسال
.. : عرفت بالصدفه هذا يعني انج بتخشين عني طلعاتج و رداتج !!
: انا هب ملزومه اخبرك عن طلعاتي و رداتي
.. : لا ملزومه
: منو تكون عشان تجبرني و لا عشان اخبرك
.. : بكون .. المهم ماشي ظهره الا و انتي مخبرتني ترى والله ان عرفت ما بيصير خير
: ياخي شو تبا بي انا هب راعيه ها السوالف ودرني فحالي
.. : اعرف انج هب راعيه ها السوالف و مثل ما قلت خبريني احسلج , مع سلامه

سكرت عنه و تسدحت ع السرير يارب يارب شها الغموض منو هذا !! ودي افتح عيني و اسكرها و اشوف كل المصايب انحلت و كل الغموض انكشف .. حاسه اني ضايعه بسواد و ماادري وين باب النجوى اول مره احس بالضياع ها الكثر .. سكرت عيني و انا اتذكر ها الموقف لما كنت صغيره شفت ابويه و هو ماسكني من ايدي و انا بين احضان شخص ثاني و ماابي اروح ويا ابوي بس منو ها الشخص ودي احضنه ابي حبه ابي احضانه احس بالامان كل ما تذكرته .. انفتح الباب فجاه رفعت راسي كان محمد يا و يلس ع السرير و وصل لحضني

محمد : أموو اكليني لووب ( عموو اكليني روب )
ابتسمت فديته اللي يسنيني همي شليته و نزلت تحت و طلعت له روب من ثلاجه و يلست فالصاله و يلسته عندي و بديت آآكله و منصور يطالعه بهدوء و الابتسامه ع شفاته
منيره : ليش ما تقولي انا بأكلك حبيبي
محمد بلع اللقمه : قلت بس انتي قلتي نااا ( قلت بس انتي قلت لا )
منيره بدلع : انا حبيبي !!
محمد هز راسه بهيه
بغيت انقع ضحك عليها محد بيكشفها غير ها الياهل ,
يت امايه : منيره قومي جدامي المطبخ
منيره طالعتني بنظره ناريه : ان شالله
ابتسمت لها و حطيت لقمه فحلج محمد , خلاف لما خلص اكله راح لصق فالتوأم يباهم يلعبونه سوني و شاد الهمه اونه يلعب و لعبه خرطي و قاصين عليه اونه الفريق اللي سعيد يلعبه هو اللي يلعبه محمد و يايب اقوال و حاله كل ما ايب سعيد قوم يرقص محمد
منصور : لااا ولدي لعبه تقص عليه
سعيد ضحك : شو اسوي به عشان ما يصيح
محمد ضربه بايده الصغيره : انا ما اصيييييييييح
سعيد : اسمح لنا شيخي
نهيان : هيه انت صيااح بعد شوه ياهل
محمد فر القير : انا هب يااااااااااهل بابااا
منصور : هه نهيان بحط راسك براسك خلاص اسكت عنه
نهيان : ياهل بعد شوه عمرك 3 سنين ياهل
محمد وقف و ضرب ريله بالارض : ناا نااا ( لا لا ) " وصاح "
راح دفن راسه فحضن منصور و منصور يسب نهيان قعد دقايق لين ما سكت خلاف رحنا تعشينا و تمينا يالسين و محمد شاد الهمه يبا يسهر ويانا و ع ساعه 11 رقد فحضن منصور .. يلسنا لين ساعه 2 و كلن سار حجرته ما عدا نهيان اللي رقد مبجر لانه عنده دوام باجر و منصور شاق الحلج ماخذ اجازه و مستانس ..

،

قمت متاخر كانت الساعه 4 العصر رحت صليت الظهر و العصر , استغفر الله حتى صلاتي اخترب لازم اعدل رقادي خلاف رحت تسبحت و لبست لي dress لونه اصفر في ورده كبيره لونها فوشي ع كتف اليمين و حزام صغير ع الخصر كحلت عيني و حطيت كلوز وردي و تعطرت .. فزيت لما سمعت صوت صراخ تحت حد يتكلم و يصرخ بس هب فاهمه عليه !! نزلت تحت اربع بدون نعال و شعري مفتوح نزلت حصلت الغلا موجوده استغرب شو اللي يايبنها و يالسه تصرخ فنص الصاله و منصور جدامها و الكل متيمع حولينهم و محمد فنص يصيح و منصور ماسك ايده اليمين و غلا ماسه ايده اليسار .. تذكرت عمري و انا بين احضان هذاك الشخص و ابويه يسحبني منه .. عصبت رحت سحبت الولد بينهم و الكل سكت لما شافوني

صرخت : سيروا تهاوشو بعيد عن الولد ما تحسون وحده همها تاخذ ريل و الولد و الثاني ناسي عمره و يبي الولد ما تستحون شوفوا واقف بينكم يصيح كل واحد طوله طول نخله حرام عليكم بتعقدون الولد
الكل سكت طالعني حضنت محمد بقوه لصدري و ربعت فيه فوق لحجرتي حطيته ع السرير و هو بعده يصيح .. يلسته فحضني و مسحت ع ظهرت اهديه و طلعت له بسكون يسكته شوي و بدقايق نسى صياحه و التهى بالبسكوت
طالعته : ما بتعطي لعموو وحده !!
طلع و حده و حطها فحلجي : يم يم هههه
ضحك و بدا يحوس فاغراض .. و انسمع صراخ غلا مره ثانيه بس صوتها كان قريب رحت بسرعه حضنت محمد ماابيها تاخذه بها الطريقه حرام يعيش اللي عشته حرام هو ماله ذنب .. انا مالي ذنب مالي ذنب ابويه يشيلني منهم ليش يشيلني منهم ليش ما خلاني عندهم ليش هو اناني بديت اصيح و انا ارص ع محمد و انا اتذكر عمري بين احضان هذاك الشخص .. هو خلاني بس انا ما بخلي محمد ما بخلي غلا تاخذه و تعيش ويا انسان ما ينعرب نوايا لا مستحيل ..

حسيت بحد يسحب محمد عني ضغط عليه بقوه ماابيها تاخذه
: ودري ودري لا تشلينه حرام عليج
منصور : خلاص راحت ميره راحت
: لا لا لا تشلينه حراام
منصور : مييره مييره هاتي الولد يالس يصيح ميره غلا راحت خلاص
انسحب عني بقوه طالعت حولي بس ما حصلت غلا لصقه فامايه مهره : امايه لا تخليهم يشلونه مثل ما شلني ابويه الله يخليج حرام اللي يسونه حرام
امايه مسحت ع شعري : محد بيشله من ابوه لا تحاتين يمه اهدي
شهقت بين دموعي : امايه ابويه شلني رجعوني عنده ابيه يمه ابيه رجعوني
امايه حضنتي : طلعوا برع يلا الكل يطلع
منصور : امايه شفيها
امايه : ما سمعتوني اظهروا
هدى المكان ما ينسمع فيه شي غير صياحي و شهقاتي .. بديت امايه تقرى عليه قراءن
: امايه ابويه خذني منه الله يخيلج رديني له ابيه ابيه امايه ابيييييه
امايه : تعوذي من ابليس يمه هب زين اللي تسوينه سم الله عليج سم الله عليج