السلام عليكم ورحمة الله وبركاته



مشكوره اختي الغاليه نوف على المجهود الجبار


وتسلم يدك على النقل


متابعين

بســـــــــــــــم الله الرحمن الرحيم








السلام عليكم ورحمة الله وبركاته









البــ 9ـــــارت













..احس اني تسرعت


كان يكلم راكان الواقف قريب من التسريحه


..وليش تحس هالاحساس وليش اذا ماانت مقتنع وافقت


قلب شفته وتنهد تنهيده طويله تعبر عن حيرته



.. مدري الي صار غريب ويمكن ماراح تفهمني لو شرحته ويمكن تلومني وانا يكفيني لوم نفسي


جلس على كرسي تسريحته


.. لا تلوم نفسك يمكن الي تكرهه اليوم تحبه بكره واذا هي من نصيبك تأكد ان الي خلاك تتسرع هو نصيبك



..ادري ياراكان ان كل شي قسمه ونصيب بس انا مااعرفها ولا اعرف اهلها بس انا الي مضايقني اني راهنت عليها واخاف اخسر الرهان



..ياسلطان لاتعذب نفسك بتوقعات ولاتفكر واجد بمراهنة ناس مالهم معك مصلحه ان تزوجت وان قعدت عزوبي
وعلى العموم انت للحين على البر تقدر تتراجع



اومأ باصبعه وبتأكيد لفكرته ورفض لألغائها


..لايمكن اغير رائيي وبعدين الحين خلاص امي كلمتهم



هز كتفه بعدم اعتراض وعدم تأييد



..انت حر بس هذا زواج ماهو لعبه



..ومن قالك اني قاعد العب انا بديت ولازام اكمل للنهايه وهي او غيرها ماراح تفرق

"

"

"


تحت وبالصاله موضي وماجد المستلقي وراسه على رجلها


.. طيب يمه تقدرين توصفين لي شكلها


حطت يدها على خده" ماجد فيه حساسيه زايده وقلبه ضعيف وهي تخاف عليه من رقة قلبه انها تتعبه "والحياه محتاجه قوه وهي تشوف شفقته على شوفتها وتتوقع من نجود ردة فعل ماجد مايقدر عليها


..وش الفايده اذا وصفت شكلها وصورت لها صوره براسك ممكن اذا بيوم شفتها تتغير وتنصدم انت منها



يوجعونه اذا حس انها بعيده واذا اشعروه انها ضايعه وصعب يلاقونها "رفع نفسه واستقعد



..ليه يمه تتكلمون كأنه مستحيل اشوفها وحنا نعرف مكانها وممكن بسهوله نوصل لها ليه مصعبين الموضوع ؟؟



رفعت يدها ومسحت شعره ورسمت نصف ابتسامه تحاول تبسط الامر


.. لانها هي ترفض تشوفني انا "حنا ماراح نستسلم بس ماراح نتأمل واجد



..بس انا حتى اذا انتم استسلموا انا ماراح استسلم وراح اروح لها حتى لو طردتني بس ماني ساكت




.........................



كانت الاغراض تملا المكان اشياء يحتاجونها واشياء مالها داعي
وقفت تتفرج على الي اشتراه راودها احساس انه يقضي التزام فقط او انه هم ويحاول يخلص منه


سمعت ندا امها لها وهي واقفه وعيونها تستدير وتوقف بمحاجرها دموع تعفف عن النزول

مسحت بطرف اصبعها عيونها واقتربت من المجلس بدون ماتدخل لانه يجلس مع امها


..نعم يمه


انطوا بطنها لان امها طلبت منه تدخل وهي من طبعها ماتحب تشوفه كثير وبهااللحظه تخاف انها يلاحظ او ان عيونها تفضحها "ماكان عندها خيار ثاني "توكلت على الله ودخلت
تحاشت النظر له مثل ماهو تحاشا النظر لها
ارخت يديها وشبكت اصابعها


..آمريني يمه


ام غاليه لانه ولااول مره يطلب منها يكلم غاليه ولان الطلب بارادته بدون حتى ماتلمح له وافقت وطلبت منها تجي لعل الكلام يزيل شي من التحجر بينهم


..مايأمر عليك ظالم بس فيصل يبي يكلمك


ابتلعت ريقها "وجتها رغبه انها تهوي" مشاعر تتنازع داخلها "فرحه "خوف " توتر "خجل " اضافه الى الالم
اطرقت براسها دون رد


كان هو في هالوقت رافع راسه يشوف ردها الي ماافصحت عنه" ماطال انتظاره والتفت لاامها



..بعد اذنك ياخاله "ودي اكلمها برا شوي



هنا هي الطامه احتد الصراع وحست انها ماتقدر توقف "ياترى وش راح يقول "يمكن يكون قرر ينهي الي يربطهم ببعض"حدثت نفسها يمكن ترتاح ويرتاح هو يمكن هذا انسب حل "كل هذا كان في اللحظه الي سمحت امها انهم يطلعون ويتكلمون يمكن كانت اقل خوف من غاليه لكن كانت اكثر توتر


وقف ومر من جنبها وطلع من الباب وهي مازالت ثابته بمحلها



..غاليه اطلعي الرجال ينتظرك



جفلت وبسرعه تحرك كل جسمها ومشت ماتدري لوين


لكن من طلعت شافته بالمرر الي يفصل المجلس الداخلي عن المطبخ
اقتربت متردده الى ان صارت على بعد خطوات منه
وراسها للاراض
لانه كان يبي يشوف ردود افعالها ولا لسبب مايعرفه طلب منها بطريقه غير مباشره تناظر له


..بغيت اكلمك لوسمحتي


الكلمه كانت مناسبه بالنسبه له ووصلته لنتيجه مرضيه فعلا رفعت راسها
وبدا مباشرة بالكلام


.. انا يمكن مااقدر اجي كل اسبوع علشان دوامي ومااقدر حاليا اخذكم معي



نست انها تحدق فيه وتركت لملامحها التعبير عن عدم رضاها مبدائيا بالكلام لكن مازالت ترتقب كلام الطف من الي قاله


..انا جبت اغراض تكفيكم احتياط "وان شاء الله احاول اني مااغيب بس ودي اعرف اذا كنتي انتي محتاجه شي من السوق اوديك ونجيبه لك او لاامك او للبيت


كان يقصد ملابس ونحوها "كلمه عاديه لكن كانت سم بدا يتسرب فجسمها ويحسسها بنقصها وبضعفها
عضت شفتها وهزت راسها بالرفض


..اكيد



مره ثانيه هزت راسها لكن بالإيجاب


مد يد لجيبه وهو يبعد النظر عنها وطلع مبلغ ومد لها


.. وخلي هذا معك يمكن تحتاجون شي بغيابي وعند خالتي انا نزلت كيس فيه جوال لك رجـــــاء اذا احتاجتو أي شي اتصلي علي رقمي محفوظ فيه



حركت عيونها واخفضتها علامه على قبولها لطلبه المرفوض ومدت يدها واخذت الفلوس وهو استدار عنها ونوا يطلع


..مع السلامه


ماردت لكن وهي ماسكه الفلوس وتقلبها باامتهان


..غالـــيه


فزت لنداءه وردت بلا شعور وهي تسحب طرف شيلتها وتغطي خصلات شعرها المتناثره


.. سم


صفن وهو معطيها جنبه ويده تمسك طرف الباب



.. لاتترددين انك تكلميني اذا احتجتوا شي



الصمت كان ابلغ واريح واسرع واصدق

طلع وهي تشوفه الى ان طلع من الباب وسمعت تسكيرة الباب الخارجي

وقفته معها كانت لحظات مرة مثل كابوس متداخل
حسسها انها عبئ عليه وعمل لازام يأديه
تاكلت كل المشاعر المتصارعه داخلها للاسف اكلها الالم وبقى متسيد بمكانها

وقف يرحب بالشاب الي دخل عليه وعرف السكرتير على نفسه


..هلا حياك الله ياولدي


اقترب ومد يده وصافحه بااحترام



.. الله يحييك طال عمرك "انا مشعل سلمان



اشر بيده يأذن له بالجلوس



.. هلا وسهلا "وشلون الوالد هو كان واعدنيني يجيني اليوم واتصل يعتذر يقول انه تعبان شوي عسى ماشر


..بخير عساك بخير "والله شوي ارهاق "وارسلني لك بالاوراق لانه مايثق بالموظفين



ابتسم بوقار وتكلم بصدق ولهجه رزينه



..سلامته مايشوف شر "وزين الي خلانا نتعرف عليك



..الشر مايجيك "ولي الشرف طال عمرك اني تعرفت عليك الحقيقه من كثر مايتكلم عنك الوالد تمنيت اتعرف عليك



اتسعت ابتسامته ووقف الى ان قابله وجلس على الكرسي الي يقابله



.. تسلم ياولدي "هاه علمنا وش قال لك ابو مشعل



ابتسم ومد الورق على الطاوله الصغيره
وبدا يشرح له بتفصيل وبمهاره عاليه رغم انه ماله أي علاقه بشغل ابوه لكن لانه نبيه شجع ابوه انه يستعين فيه ويرسله يقضي شغله عند ابو ندى"
بعد ماانها شرحه وكلامه رفعوا انفسهم


..ماشاء الله عليك عارف الشغل زين"مع حق ابوك ان ارسلك انت



خجل منه ووقف يستأذن يطلع من عنده



..تسلم "يالله انا استأذن



وقف ومسك يده



.. وين "ماقهويناك




..ماعليه مره ثانيه بس والله مستعجل انا مستأذن من دوامي عشان احصلك قبل تطلع



ضغط على يده الي تصافحه


.. لازام نشوفك والمره الجايه تجي للبيت عشان تاخذ واجبك


زاد خجل مشعل منه رجل وقور ومحترم رغم مااعطاه الله ورغم الفارق الاجتماعي الشاسع لكن يحس ان بعيونه احتواء وموده



.. يسلم البيت واهله "ان شالله يالله عن اذنك




................................







كانت تنتظره "وقت وصوله قرب

ماكانت تعتقد انه حريص على الاتفاق الي اتفقوه وكانت شبه متأكده انه راح يماطل في الموضوع
كانت لاهيه بتجهيز الغدا

تركت الي في يدها ورفعت جسمها وهي تستعد لااستقباله مع صوت فتحت الباب

اقتربت خطوات وهي ترد السلام الي القاه عليها
سألها قبل يجلس

..وين العيال ؟؟

مدت يدها واخذت شنطته من يده


..بغرفهم "روح انت غير ملابسك وغسل وانا بناديهم


كان يعتقد انه من يدخل تستجوبه على كثر ماشاف منها حماس لكن خيبت ظنه ترك الموضوع شوي يمكن كانت تمثل

اجتمعوا على الغدا وتغدوا بدون مايلاحظ عليها أي شي

كان يراقب نظراتها له كانت جدا عاديه وتكلمه وتكلم عيالها ماكانت تمثل لكن كانت متباعده انه يكون نفذ طلبها بهالسرعه


.. يالله ياشوق خوذي اخوك واطلعوا فوق لين اجيكم



بعد مااطلعوا عياله بقت معه لحالها مشغوله بلم الصحون


غسل ورجع جلس بنفس المكان حس بحماس لمعرفة ردها اذا قال الي عنده


..غريبه ماراح تنام



ابتسم ابتسامه صغيره .. مضايقك بشي !!


مطت شفتها وفتحت عيونها بااستغراب



..لاابد بس انت اهم شي عندك نومة الظهر



.. اليوم استثناء


تركت الي في يدها ومشت له





..وليش ان شاء الله وش الجديد



..تدرين يافاطمه انا مستغرب منك



اشرت بااصبعها على نفسها



..مستغرب مني انا " ليش ؟



..كنت اتوقع انك من اجي تستجوبيني عشان تعرفين وش سويت ؟؟



وكأنه ايقظها من النوم معقوله يكون سأل عنه بهالسرعه اسرعت له وهي شبه تهرول



..معقوله سألت عنه ؟؟




..وليش لا "حنا مااتفقنا !!




..الا بس توقعت تتهاون بالموضوع وتأجله




..بصراحه انا اليوم ماكان عندي ضغط بالشغل وطلعت للمكان الي يشتغل فيه وسألت عنه



اشتعل عندها الحماس والتوتر والترقب



..هاه وش عرفت عنه ؟؟



بلهجه واثقه وكلام متوازن وبأبتسامه هاديه



.. بصراحه الرجال سمعته سابقته الكل يمدح فيه من المدير للفراش



هذي هي الفرحه الحقيقه "الي قطعت كبدها لقت اخيرا من يشاركها فيها تمنت ان العنود قريبه منها وتحضنها وتقولها وتبارك لها



..صدق " يعني ام ماجد ماتبالغ يوم تمدحه




..ابدا ماتبالغ "الرجال دين واخلاق ومركز" بس لاتنسين شي مهم ان الرجال ببيته غير شغله


..وشلون يعني ؟



.. يعني ماندري وشلون ممكن يتعامل مع اهل بيته



..طيب هذي وشلون نعرفها



..للاسف يافاطمه هذي الي ماراح نقدر نعرفها ولاهو بنفسه يمكن مايعرفها الا بعد مايتزوجها اذا كان له نصيب فيها



.. طيب الحين وش نسوي انا قلت لها عطيني كم يوم عشان نكلم ابوها



.. خليهم يروحون لاابوها ويخطبونها منه حنا الي علينا سويناه


تجهزت انها تطلب منه هالطلب لكن مظطره



..قبل اقول لهم ممكن اطلب منك خدمه


..خير وش عندك بعد؟


..ابيك تكلم ابوها وتمهد للموضوع


.. وشلون يعني امهد للموضوع السالفه ماتحتاج تمهيد



..محمد هو يثق فيك يعني قل له انك سألت عن الرجال وحاول تقنعه "انت تعرف لطبعه


... ....................



..ماقال لك مشعل وش صار بين ابوك وسلطان ؟؟


بعدم مبالاه كان عندها ماهو اكبر من اهتمامها بمشاكل سلطان


..ماقال لي ولاسألته "اذا كنتي تبين تعرفين وش صار ليه ماتسألينه انتي



بطريقه ما حاولت تقلب عليها حتى تلين مع توبيخها لها وتقول أي شي تعرفه


.. هذا رد تردين على امك فيه "ماهقيتها منك ياخلود


سهدت رمشها وتنفست بعمق مالها نفس لااي نقاش



..آسفه يمه بس انتي قاعده تسأليني عن مشاكل ابوي وسلطان ولافكرتي تسأليني عن نفسي



احرجت من نفسها رد خلود كان مؤلم وقاسي



..انتي مكبره السالفه رجال ناوي يسافر بشغل وانتي ماتبينه يبعد عنك وش اقدر اسوي لك !!



مالت شفتها بااستهزاء عذر غير مجدي



.. صح بس كنت اتمنى اسمع كلام الطف من هالكلام او احس بااهتمام مثل اهتمامك بسلطان


قالت اخر كلامها وطلعت وتركتها تافف من تماديها


........................




..اخيرا حنيت علي وتكرمت وخليتني اشوفك




بقدر المستطاع حاول يفصل بين علاقته بمشعل ومشاكله مع عمه لكن للاسف مشعل بدون قصد منه يذكره باابوه


.. انا هاليومين كنت احب اجلس لحالي واول شخص شفت وجهه من طلعت انت


..وليش كنت تجلس لحالك ؟؟



باغته ودخل مشعل بفتح الموضوع الي يعرف سلطان انه راح يفتحه معه


..كنت حاب انفرد بنفسي اذا ماعندك اعتراض



حط يده على خده وضغط كوعه على الطاوله وسلط انظاره عليه



.. وش نتيجة انفرادك بنفسك



تلفت عدة مرات في المكان وركز عليه



..ماطلعت بشي مفيد "بس تعلمت ان الي يحاول يرضي الناس يتعب



مشعل كانت روح المزح حاضره عنده ولايحمل المواقف اكثر مماتحتمل



..اوه اجل ابوي اخذ اجرك وخلاك تصير حكيم



لف عنه ببطئ ورفع يده يستدعي واحد من عمال المقهى



.. دمك خفيف "من متى ؟؟



.. من زمان "بس ماقلت لي وش جد بخطبتك



شي من التوتر عاوده من هالسيره



..ننتظر ردهم



حط يديه على الطاوله وبعيونه نظره جاده


..سلطان انت مقتنع بالي قاعد تسويه ولا بس تعاندهم
؟؟


كانت كلمه لمجرد الرد ليست صادقه ولاكاذبه ومالها تصنيف محدد


..اكيد مقتنع خصوصا بعد كلام ابوك



مط شفته وهز راسه



..وبعد كلمتك انا متأكد انك بس تحاول تكسرهم بس للاسف على حساب نفسك


..خلاص يامشعل كل شي انتهى وانا الحين صرت بنص الطريق ومااقدر ارجع

وانت وشلون عرفته ؟؟





..الحقيقه ياابو عبد الرحمن انا كنت اسمع عنه انه رجال زين ومقتدر وماعليه كلام "وامه شافت البنت عند ام ريان وخطبتها له "وانا بنفسي سألت عنه والكل اثنا عليه


قلب الكلام براسه السالفه فعلا متباعده عن بعضها "ومع ذلك ثقته بمحمد مالها حد



.. واذا كان مثل ماتقول وش الي حده على بنتي وهو يقدر يتزوج الي نفس مستواه



اخذ نفس عميق ابو عبد الرحمن رغم كل شي ورغم عيوبه لايمكن يمر عليه الموضوع بدون مايقبله ويتأكد من نيته ومن صدق الي قاله محمد عنه



..القسمه ياابوعبدالرحمن خلته يختار بنتك لاتقول غريب ولاتقول ليش " وطبعا امه هي الي اختارتها


تنحنح وشعور فيه من الغرابه الي داهمه فجئه


.. والله وانا اسمعك تتكلم اقول انه اخذ البنت وكأنك متأكد اني اوافق



الشي الي مكن ابو ريان منه انه يوسع صدره عليه ويوصل معه لاخر الكلام ويعرف كيف يقنعه


.. انا وسيط خير "بس البنت بنتك وانت ادرى بمصلحتها واكيد اذا شفته مناسب ماراح تقطع نصيبها حنا ماحنا احرص منك على بنتك بس انا قلت اقول لك الي اعرفه قبل يجيك الرجال وترفضه بس مثل ماقلت لك الشور لك ومالنا حق نتكلم عقب كلمتك


مايدري ليه شقت وجهه ابتسامه ومايدري وش دافع الشعور الي اغتاله


.. تسلم ياابو ريان بس خلنا نشوف الرجال اول



..اكيد اكيد ان شالله نبلغهم ونبلغك متى يجون



انتهى الاتصال حط جواله بجيب ثوبه ودخل

اخذ مكانه المعتاد قريب من باب الصاله وسحب بكت الدخان وبدا مسرحية الموت اليوميه الي صارت بالاوقات الاخيره صامته


انفتح الباب مع دخول العنود وصينية الاكل بين يديها

كان عبد الرحمن داخل يركض لولا وجود ابوه بوجهه تراجع وطلع يركض مثل مادخل
العنود بلا شعور منها نزلت الي بيدها وتعبته مسرعه
قبل يفتح الباب كانت تطبق بيدها على معصمه



..عبدالرحمن وين رايح ؟؟


سحب يده من يدها بقوه وجاوبها بصوت مرتجف


.. خليني اطلع لين يروح انا من اشوفه احس انه يكرهني


رجعت مسكت اكتافه بيديها


..وين تروح يعني ياما هو يطلع ولا انت" وبعدين لمتى هذا ابوك ولازام تتحمله مهما سوا



غامت عيونه ضربه له اوجعه "مراهق وبعمر حرج ويكره احساس التصغير ويحب يكون رجال بعين نفسه وبعين اهله لكن ابوه اساء معاملته


..مااحب اشوفه يالعنود مااحب


ارتجفت شفتها بين ابتسامه وبكاء ورصت كفها على خده



..وعلى علشان خاطر العنود مارح تجلس" لاتدخل بالبيت اجلس بالمجلس هنا وانا اجيب لك الي انت تبيه العشا وكتبك عشان تذاكر بس لاتطلع


رفع يده ومسك يدها


..هو ماراح يطول يطلع اذا طلع رجعت


حست بشعوره وتمنت انها ولد تقدر تطلع وتبتعد وقت ضيقها" اذا عبدالرحمن و امه موجوده عاف البيت وعاف نفسه بسبب ظلم ابوه هي وش راح تقول


..توعدني انك ترجع وماتطول



..اوعدك






.........................


رجعت من دوامها العصر تحس عيونها ثقيله وجسمها مهدود من العتب من كم يوم ماعادت قادره على النوم

البيت كان صغير والصوت عالي "شدها الفضول ومشت على اطراف اصابعها تستمع حوارهم الي يظهر انه يخصها ويخص زواجها
كانت تعتقد ان الموجود عمها "واستبعدت انه هو اللي موجود في هذا الوقت


"


"

"

كان يجلس في غرفتها الى ان طلع ابوه وهو قام ناوي يطلع لكن اوقفته بكلامها



.. اشوف جلستك عندي صايره تضايقك كل هذا حبا ببنت موضي وزعل لان سعود بياخذها


بعد ما ناظ بجسمه جلس"
خطبت نجود له وان كان رافضها لكن حسسته انها من حقه وتعدي انها تخطب لغيره



.. السالفه ياجده ماهي سالفة حبا ببنت موضي مثل ماتقولين السالفه انك مافكرتي يوم زوجتي وحدها اعتبرها خطيبتي بدون حتى ماتفكرين وشلون موقفي



قرصت بعينها وابتسمت



.. سوالفك ياطليل ماتمشي علي انا ادري انك ماتدانيها "بس يمكن طمعت براتبها وخفت انه يروح لسعود هو ماهو محتاجه



مايدري هل هي صادقه ولا غلطانه بتحليلها له تسأل بنفسه لكن رفض انه يكون مادي




.. خلينا من موضوع راتبها لاني مليت من كثر مااسمع هالسالفه " بس ليش ياجده قبل كم يوم لي واليوم لسعود



.. مدري هي جت كذا ولو كنت ادري انك تزعل ماكنت عطيتها سعود "انا يوم بغيتها لك بغيتك تربيها والحين انا بربي مرت عمك فيها وانت بكره ازوجك الي تسواها



دخلت بالكلام الي مايهمه وبدت بموضوع انتقامها من كل من يعترض على كلمه وتصرف منها



..انا لاابيها والاابي غيرها انا اصلا كرهت الحريم كلهم





ماانتهبه للي من لحظات دخلت تركض
وصلت لغرفتها بسرعه خروج طلال المفاجئ افسد نيتها انها تدخل وتقتحم مكانهم وترمي عليهم قنابل من السب يمكن تبرد قلبها وترد كرامتها لكن بعد ماجلست شوي تفرك اصابعها لدرجة ان احمرت من ضغطها لها"
بعد مافكرت انها تخطط بصمت قبل تنبههم ويحتاطون
لقت نفسها بسرعه تسحب شنطتها الي على كتفها وحتى مانزلتها وطلعت جوالها منها "
وعلى اخر رقم اتصلت عاودت الاتصال


بعد اكثر من دقتين وصلتها انفاسها قبل ردها


..الو "غريبه نجوده متصله لايكون بس ناويه تعتذرين
خلاص مسامحتك بس خليني اروح اكمل القهوه لزوجي وارجع اكـــ ...........


انقطع كلامها فجئه وغص الكلام بحلقها


..ابتسام رقم موضي معك للحين


ادرت عيونها تستوعب الي قالته نجود "
هدت حدتها وعجلتها احساس جاها ان نجود وراها شي كبير لكن الاسم الي تطلبه هي ماتعرفه


.. موضي "أي موضي ؟؟



ثقل لسانها وانشل تجميعها للكلام لكن هي بلحظه من الضغط النفسي اوصلتها للانفجار



.. امــــــــــــي "رقمها عندك ؟؟











نهاية البارت