اليوم مثل كل يوم من هالاسبوع تنام بعيد عن بيت ابوها نفسيتها كانت احسن تشجيع خالتها واعتذار جواهر والتغيير الطارئ على ابوها وغيابه المتكرر وحضوره الصامت " ردوا لها شي من ثقتها بنفسها

بعد ماتركتها خالتها وراحت تنام قعدت تردد بعض كلامها تحس بعيونها كلام ونظره غريبه وتلميحات شككتها ان فيه امر راح يحصل عن قريب لكن ماقدرت تستنتجه

رفعت ظهرها واعتدلت شوي وسرحت بحالها لين غفت بدون ماتحس بنفسها


..........................

كانت السماء بين الازرق والاسود رفضت تخليه يقوم احد من النوم لانها ماتبي تزعج احد ولانها تعبانه والاهم ماتبي احد يسألها عن حالتها

بعدماصلت الفجر وقبل ماتصير على سريرها سمعت دقه على الباب

..ادخل

فتح الباب ودخل ومباشرة سلط انظاره عليها تمنى انها تكون احسن "ابتسم وهو ماشي لها


.. يعني مانمتي ؟


ردت له الابتسامه وجلست


..زي ماانت شايف " توقعت انك انت نمت


جلس مقابلها وحط المخده بحضنه


.. لا قلت استناك لين تريحين شوي ولين ابوي يرجع من الصلاه لانك ماتبين احد يحس انك جيتي وبعدين اخذك ونطلع نفطر برا


حركت يدها برفض لعرضه


..لا لا مشعل انا شبعانه وماودي اطلع


غمز بعينه لها وحاول يقترب من سبب حالتها


..شبعانه "ولا نفسك مسدوده


بعد ماكانت مبتسمه ومركزه عليه نزلت عيونها عنه واستدارت براسها


.. قلي وش تبي توصل له بالضبط واذا عندك استجواب خلصني


ضحك على طريقتها المباشره لان العلاقه بينها وبينه كانت اكبر من التستتر والكتمان

.. ابي اوصل لسبب حالتك يوم رجعتي وليش تركي نزلك وراح بدون حتى مايسلم "انتم متزاعلين ؟؟


فركت اطراف اصابعها واخفضت نغمة صوتها

.. مادمت عارف ليش تسأل


رجع يده وراه واتكا عليها ورجع ظهره ورا


.. عشان اعرف السبب


تربعت على السرير وحطت يدينها بحضنها وضغطت كفوفها ببعض


.. تركي يبي يسافر ويخليني



رفع يده وعدل جسمه وهو مندهش سببها كان غير مقنع


.. واذا كان يبي يسافر تسوين بنفسك كذا" وبعدين يمكن الرجال مضطر


بدت دموعها تلمع بعيونها عز عليها ان مشعل بالذات ماحس فيها


.. يقدر يكنسل هالسفره كلها اذا مايقدر يأجلها والله يرزقه بغيرها "بس مايخليني وانا بحاجته


.. يعني هالسفره تخص شغله ؟؟


هزت راسها .. ومايرجع الابعد ست شهور " يعني راح اولد وهو مسافر


كانت مهمته يهديها ويسحب الضيق منها


..بس انت بين اهلك وكلهم حولك ولا تركي اهم منا


ابتسمت رغم الي تحس فيه من خوف من فقده


.. انتم غالين يامشعل لكن هو غير " صعب على احس انه تركني وانا محتاجته "عارفه انك ماراح تفهمني بس انا ودي افضفض لك لانك الوحيد الي ممكن تسمعني


.. ومتى راح يسافر


مسحت دمعتها بااصبعها وابعدت وجهها عنه


..هو يبي يقعد هنا اسبوعين قبل يسافر عند اهله ويسافر من هنا



مسح على كتفها ووقف ومسك يدها


.. من هنا للاسبوعين مابيك تبكين وقومي معي نفطر برا انا ميت من الجوع يكفي سواة ابوك وولد عمك البارح فيني


مشت مطاوعه له ووقفت عند رغبته وراحت معه ورجعت بدون مايدري احد انه رجعت


..............................






ارخا النهار سدوله وتلاشى ظلام الليل


قامت من نومها بدري او بالاحرى مانامت رجوع سلطان المتأخر وحالته وقت رجوعه خلتها تندم انها كلمت فاطمه
لكن من فرحتها ضاع التفكير والتريث
جلست على طاولة الاكل تنتظر احد منهم يقوم ويضيع بعض الملل كان يزيد اول من نزل
اقترب منها وصبح عليها وجلس


..احد قام من اخوانك


على طول بدا بفطوره وبااسلوب بارد


.. مدري كل واحد بغرفته ومسكر بابه


استعجاله بالاكل ولبسه يدل انه طالع


.. وانت تبي تطلع


حس من سؤالها عدم رضاها بلع لقمته بصعوبه


..اي يمه العيال بيطلعون وبطلع معاهم


مدت جسمها وقربت منه


.. وين ان شاءالله


..ااا رايحين لنادي


..ومن الي راح يوديكم ؟؟


بدا انزعاجه واضح وتذمره اوضح


.. يعني صار تحقيق !!


غمضت عيونها بنفاذ صبر


.. قلت لك من راح يوديكم


اخفى نظراته عنها


.. واحد من العيال معاه سياره وبنروح معاه


تراجعت ورا وحاولت تتحكم بااعصابها


..وليش ماتروح مع السواق


..يمه انا ماني بزر اروح مع السواق


.. طيب واحد من اخوانك


وقف منزعج من شعوره انها تضيق الخناق عليه


.. نفس الشي "بعدين اخواني نايمين والعيال الحين يمروني


ضغطت بااصبعها على الطاوله وبطريقة التهديد والتأكيد


.. راح اسمح لك تروح لكن جوالك ماتسكره واذان العصر بالكثير تكون موجود ومره ثانيه تفكر تطلع تقول لي قبلها "فاهم


هز راسه مكره وقبل يمشي


.. معك مصروف ؟؟


..سلطان عطاني امس

غادرها وتركها تنتظر احد من الثلاث الباقين ينزل لكن انتظارها بلا فايده الكل اليوم معتصم مكانه الى ان سمعت اذان الظهر وقامت تصلي وتقومهم للصلاة




...................




يجلس مع ام غاليه ويتبادلون الحديث بدون ماتفكر تعاتبه على انقطاعه وبدون ماتحاول تعرف سبب جيته بغير موعدها لكن سيرت الامر على طبيعته


.. انا جيت البارح ولقيتك نايمه


ابتسمت له يمكن لانها حست انها يمهد لشي محدد


.. انا من اخذ هالعلاج ماقدر ارفع نفسي ومن بعد صلاة العشا انام



ماعنده لمثل هالموقف كلام تمنى انها عاتبت عشان يعتذر لكن ابدا ماحس منها بااي نظره او كلمه تدل على زعلها


.. الحمدلله على كل شي


ووقف الحديث حتى يفتح نافذه ثانيه على الحديث الي يخالجه لكن سبقت ام غاليه


.. بس ليه ياولدي تارك شغلك ومتعب نفسك وجاي ؟


احرج الى ابعد حدود الحرج من كرم اخلاقها من تغاضيها او رضاءها بقليله



..لاتعب ولاشي " وعارف اني مقصر والمفروض انك قلتي عن حاجتكم عشان اجي واقضيها بدال ماانتم محتاسين باانفسكم


استغربت وشلون عرف ودت ان غاليه هي الي قالت له لكن امنيه بعيده


.. من قال انا محتاجين شي " وبعدين حنا بوسط جيرانا وهم ماراح يخلونا


كان ضايق من عرف انه كان ينقصهم اشياء كثيره ولاتكلمت ومتضايق اكثر لانها مستحيل تقول والاهم انه يعرف مكان المشكله وين


.. بس ولو مايصير كل يوم غاليه تتصل تدور احد يقضي اغراضكم


ام غاليه موقفها لايمكن يتغير الحاجه كانت معنويه ولم تكن ابدا ماديه فيه اشياء أي احد ممكن يقوم فيها لكن اشياء تخص شخص واحد ولايمكن احد يسدها غيره وفيصل مكانه لايصلح الاله لكن مصره انه اذا مافهمها من نفسه لايمكن أي احد ثاني ينبهه لها


..ماعليه غاليه تمون عليهم وهم جيرانا من سنين واكثر من اهل"بس انت منين دريت ؟؟



كان يحس بكتمه وغصه اكبر من حجم المشكله الظاهره انما بحجم المشكله الي يعانيها مع نفسه
وياليت ام غاليه عاتبت حتى يوصل شعوره ويشرح ويعتذر لكن للاسف كانت هي من تعتذر له بينما هو مالقى لنفسه عذر


..سئلت الشغاله وقالت لي ان البيت فاضي من اسبوع "يعني ياخاله لو ماسألتها وتكلمت انتم لو تجوعون ماراح تتكلمون



ابتسمت تهديه رغم كل احساسها بخطاه وعلى معرفتها بتقصيره لكن ماتقدر تغصبه ويكفي لومه لنفسه


..مااحد يموت من الجوع "والسالفه ماتسوى انك تمسك هالخط وتجي و حنا نقدر ندبر انفسنا"ماحنا بصحرا وانا خالتك



احساس بالعجز يتضاعف داخله المسائله اكبر من مساعدة جيران او حاجه تنقص البيت
استمر معها في حديثه عن هالموضوع الا ان بمهاره طلعت من السالفه وبدت تسولف عن احوال القريه وعن امور كثيره لكن ابدا مااندرج في سياق الحديث موضوعه هو وغاليه



................................



بعد صلاة الظهر وعلى جمعة مزنه مع صالح <ابوطلال >
وبعد ماقامت ام طلال تجهز للغدا وطلال كعادته هالوقت والبنات بغرفهم


.. يمه انتي شاورتي نجود بخطبة طلال لها


صدت بنظرها عنه بغير رضا


.. ماعندنا بنات نشاورهم "بس هالسالفه خلها لوقتها


عقد حواجبه مايدري كيف تفكر ووش مقصدها من تصرفاتها


.. لمتى والبنت ماتدري مايجوز يايمه حقها انها تدري وانها توافق ولا ترفض


تمللت من تكراره واعادته هالسالفه


..خلص ياصالح متى ما شفت الوقت يصلح قلت لك تملك لهم البنت والولد كلهم عندنا ماهم منحاشين انت ليه مسكت هالسالفه دور لك سالفه ثانيه


تنهد واخفض راسه امه تشعره انه طفل


..وش تبيني اقول


بنظره تحمل شيء ماء


.. ماكلمك اخوك ؟؟


.. تدرين انه كل يوم يكلمني ويطلب يكلمك بس انتي تعيين


شمخت براسها واحتدت نظرتها ولهجتها


.. انا مايكفيني منه صوته بالتلفون وهو مندس عند مرته انا اذا بغا يتعذر مني يجي ويوقف قدامي ولاماعذره الا يوم يسوي الي ابيه والا يخلي شيخه تنفعه "والله لاارد له سواتها لي


تعجب من قهرها للجميع ابو سعود رجال مالك عقله والى الان تصمم تفرض رايها عليه

مافصحت عن زعلها بسبب سفر زوجها لانها ماراح تلاقي احد يعذرها او يحس باحساسها كل الي راح تلاقيه مجرد سب لزوجها على غير برهان
بعد ماطلع ابوها وطلع مشعل وتوجهت امها للمطبخ جلست مع خواتها بس
امجاد كانت تسترق النظر لها كل ماسرحت اما هند فما ابدت أي تعليق
لاحظتها امجاد تقلب بجوالها بين يديها وتشاور نفسها تكلمه ولا لا


.. خلود انتي متضايقه لان زوجك راح يسافر ويخليك

ناظرت لها بطرف عينها وابتعدت عن التركيز عليها

..لاحبيبتي عادي ان عندكم مستانسه وان شاء الله يروح ويرجع بالسلامه

انطلقت هند الي كانت تعتصم الصمت وتسرح هي الاخرى بحالة ابوها بعد ماانتها من مقابلة سلطان وبعد ماطلع مشعل مباشره ورجع بعد دقايق

..صدق ماعنده ذوق يسافر ويخليك وانتي حامل "انا لو بمكانك ماارجع له


..هند قولي خير ولا اسكتي هو وزوجها يتفاهمون

حطت اصبعها عند فمها وهددتها


..اوووص ولا كلمه مالك دخل انتي

صرخت عليهم ووقفت مبتعده من المكان كله


.. بس انتي وياها انا ماطلبت مشورتكم كل وحده تحط لسانها بحلقها وتسكت


كانت تعبر عن حالة التوتر الشديده لها تركي على كل جمال اخلاقه وحبه لها الا انه بقراره همشها ومارعا نفسيتها وتقلب مزاجها



......................



بعد ماخلصت تجهيز الغدا توجهت لغرفة شوق المكان الي العنود لها مده من تجيها ماتحب تطلع منه

دخلت والعنود مشغوله تشرح لشوق درس صعب عليها وشوق مندمجه معها ابتسمت وهي تحس بتحسن حالة العنود كانت تجيها لحظات تفكر تتهور وتقول لها لكن تتراجع كل ماتذكرت كلام زوجها
وتقرر تترك الكلام الى ان يسأل محمد عنه


.. لمتى ياشوق وانتي حاشرتها معك يكفيها دروسها


رفعت راسها ورجعت شعرها ورا اذنها
وابتسمت


..لا عادي ياخاله "وعاالعموم خلصنا


جلست معهم بنفس المكان ونظرها على بنتها


.. روحي ياشوق خلي الشغاله تحط الغدا


وقفت شوق وطلعت من الغرفه وتركت لهم المكان



.. هاه حبيبتي "ان شاء الله وضعك زين في بيت ابوك


هزت راسها بإيجاب وقناعه ورضا


..الحمدلله من بعد ذاك اليوم ماعاد احد يضايقني "بس ان شاء الله انهم يصيرون كذا على طول


ضغطت كتفها وعيونها مليانه امل وتبرق بتفاؤل


.. الله كريم من يدري يمكن بكره يتعدل كل شي


ماانتبهت للكلام الي قالته بمفهومه العميق لكن اخذت منه اعلاه
كانت نظرتها مقتوله تعيش شي من الاحباط


..يارب "بس انا خايفه


بسرعه حطت عينها بعينها وسألتها


.. من ايش وش الي مخوفك ؟؟



ابتلعت الحراره وابتلعت الالم على حالة ابوها واحساسها انه مكسور وعبرت بس عن خوفها من المجهول


.. فوزيه "هددت ابوي انه اذا ضرب احد من عياله تشتكيه


ماتدري ليش حست فيها بدون سبب وبدون مبرر وحست انه امر مؤذي ويتعب النفس


..يمكن بس تخوفه او قالت هالكلمه بلحظة زعل


غمضت عيونها وهربت بنظرها عن خالتها


.. بالحالتين انا خايفه


كانت لهجتها غريبه وغير واضح مرماها من الكلام "
فاطمه بداية اعتقدت ان العنود خوفها مبرره ضعيف حتى وان كان موجود


.. انتي خايفه على ابوك


ابوها كان سبب من توجسها لكن بشكل غير الي ظنته فاطمه


.. انا خايفه على ابوي وخايفه منه


..فاهميني وشلون


كان الكلام محشور بحنجرتها والتعبير كان صعب لكن خالتها قطعت معها مسافه كبيره من الحوار وقدرت توصل للي تحب العنود تقوله


.. ابوي اذا قدرت فوزيه تهدده وتكسبه اكيد راح يكون ضدي وهو بكل حالاته قاسي مدري وش راح يسوي اذا فعلا قدرت عليه هذا اذا كانت تقصد تخوفه
امااذا كانت صدق راح تنفذ تهديدها اكيد راح تصير هي الي تتحكم بحياتي وامااظن انها راح تحن على اكثر من ابوي


ماقدرت تتحمل قسوة الي سمعته وماكانت متخيله انها كانت تشيل هم من كلمه قالتها فوزيه بلحظة غضب ممكن تكون نستها وماقدرت تلومها لان الي قالته صحيح وهي اعرف الناس باابوها وزوجته
ومالقت كلمه تواسيها فيها
وكتمت امنيتها ان سلطان يكون الرجل المناسب في المكان والوقت المناسب
ضمتها لصدرها ومسحت شعرها

.. ماتدرين يمكن ربك يفرجها قبل يصير شي من الي قلتيه "بس انتي تفألي



.................................................


هوا على راسها وحبها وهي صاده عنه لكن تحس بنشوة الانتصار لمجرد انه جاها واعتذر ولمجرد احساسها انها هي سيدة الموقف


.. سامحينا يمه وهذا سعود جاي يعتذر منك عنه وعن امه


كانت بنفس الوضع وترفض حتى النظر له


.. وش عقبه عقب مامشت مرتك شورها عليكم جايين تضحكون على بكلمتين "خلاص ارجعوا لها لاتزعل عليكم



كان سعود يتبادل مع ابوه الكلام ويحاولون ارضاءها


.. حنا جيناك نستسمح منك ومالك الي يرضيك



..كلام تقوله ياولد شيخه والكلام سهل وكلن يقدر عليه



حط يديه ورا اكتافها وحضنها


.. ماهو كلام ياجده وهذا ابوي وعمي وطلال يشهدون اني من يدك هذي ليدك هذي


هنا بدت تضرب على مكان واحد وقررت تقلب الطاوله وتمشي بطريق معاكس لسعود مع ان المقصوده امه


.. وبنت خالك !!


.. البنت رفضت يمه لانها تدري ان سعود خاطره ببنت عمه


التفت له بعد صدها وبلهجه حازمه


.. يعني انت لك هوا ببنت عمك ؟؟


بكل ثقه ولانها ماحددت


.. اكيد ياجده المهم انك ترضين


اشتعلت عيونها بفرحة الانتصار ورددت بلهجه آمره


.. الله يرضا عليك " اجل انا اشوف انك اولى بنجود






انشلت حواس الجميع وانربطت السنتهم اول ردت فعل صدرت من طلال الي وقف مثل الملسوع


..هي لعب ياجده امس خطبتيها لي واليوم لسعود



عطته نظره محرقه لكن نست انها هي الي ربته انه مايكسر عينه احترام لااحد


.. اجلس ياطلال انت لين تتوظف الف من تتمناك


صرخ بصوت عالي وعيونه تلتهب من الغيض



.. توك تتذكرين اني ماني موظف



نطق ابو طلال بعد ماتشرب الدهشه واستوعب الموضوع "وبعد مارتاح نسبيا لان سعود رجال كفؤ وممكن يعتمد عليها وخاف من مشكله وضغينه تصير بين ولده وولد اخوه العمر كله بسبب العنود مثل ماصارت الضغينه بين اخوانه بسبب امها


.. اقصر صوتك واحترم الي اكبر منك انت حتى لو تاخذ البنت منين تصرف عليها ولاتبيها هي الي تصرف عليك


تكلم سعود المبهوت والمصدوم والمقيد بقيد لايمكن التخلص منه


.. لحظه لحظه ياجماعه انا كنت ناوي اخطب مشاعل وابوي يدري "وشلون انقلبت السالفه


ناظرت جهتته .. انت ماقلت الي يرضيني يصير وشهدت ابوك وعمك وولد عمك ؟؟


حرك راسها وهو يحس بصفير يملا راسه


..قلت بس انا كنت اظن ان نجود مخطوبه لطلال وانا من الاول كنت اقصد مشاعل


صالح العاجز عن مسك نفسه هالمره


.. حرام يمه تعرضين البنت كل يوم على واحد الي يبيها منهم يخطبها مثل الناس ويتزوجها ولا الله يرزقها بغيرهم


ماعطت كلام صالح اعتبار وقررت تاخذ الخلاصه من راس سعود

..بكيفك ياسعود وان مااخذت نجود ماراح تاخذ مشاعل






طلع طلال من المكان لانه كان يحس انه ممتهن وان سعود فضل عليه كان بقرارة نفسه وكأن الضغط على صدره خف وكأن الحمل عن اكتافه طاح لكن احساس انه مهمش هو الي ضايقه
اخذ مده بسيارته الان انفتح الباب وحس بااحد يركب جنبه
طبعا كان متوقع وتوقعه كان صحيح


.. وش انتهى الموضوع عليه


الثاني من ركب رجع راسه ورا وكان الارض تدور فيه خلاص انقطع الامل وضاعت الفرصه انها تكون له


..وش راح ينتهي عليه مثل ماابتدا "جدتي قالت قرارها "وحطتني بين خيارين واحد اصعب من الثاني


ابتسم بااستهزاء


.. والحين ياشاطر ياحكيم زمانك فك نفسك عمرك واطلع منها


تنهد بصوت مسموع وفتح عيونه بوسعها



..انا على الاقل اعترضت تكلمت ناقشت لكن انت وش سويت وافقت انك تظلم نفسك وتظلم البنت معك



بنفس اسلوب الاستهزاء البارد



.. هذا انت اعترضت وناقشت وتكلمت وش استفدت حطتك براسها وسدت عليك المنافذ


فتح الزجاج واخذ يتنفس بعمق


..مدري من الوم على الي صار والي يصير


حط كوعه على السكان والتفت له


..لوم ابوك وعمك الي طول عمرهم عايشين يسمعون وينفذون


غمض عيونه وتكلم بهمس


..بس انا لايمكن اسكت واتزوج وحده انا ماابيها


نزل طلال راسه وبدا بتشغيل السياره وهو يرد على سعود


..لهاالدرجه تكرها !!


التفت بسرعه برفض لتفكيره


.. انا مابيها لاني اكرها انا مابيها لاني ابي غيرها "ومو ضروري يكون فيها عيب ممكن تكون احسن مني ومنك "انا ابي مشاعل وقلت هالكلام


بلهجه راكده تناقض الي يقوله


..تدري لو مااعرفك كان حذفتك بنص الشارع وخليتك ترجع للبيت مشي


..اقول امش وانت ساكت مسوي تغار انا دخلت البيت من بابه وقلت اني ابيها قدامهم كلهم


اخفض طلال راسه وهو يثبت كل يوم ان قوة شخصيته كانت كذبه يكذبها على نفسه









نهاية البارت

هذا اخر جزئين نزلتها الكاتبه
اول ماينزل الجزء القادم راح اجيبه هنا فورا

تسلمين اختى نوف على نقلك لهذه الرواية الرائعة والله يجزاك خير

الله يعطيج العافيه اخت نوف وان شاء الله ما تطول الكاتبه