يمامة السلامة .. الاروع تواجدك يا عسولة

و البارتات تنزل كل أحد و خميس

نورتي و شرفتي يا قمر

بسم الله الرحمن الرحيم

صباح الخير لكل الأعضاء الكرام

هذا البارت الخامس عشر نزلته لكم بدري

قراءة ممتعة للجميع

( الـــجــــزء الــــخــــامــــس عـــــشـــــــر )

انا لعيونها بس..
لـ عيونها .. !
قلبي سراب بدونها .. و عيني سراب
ما اقول اعشقها بعقل.. مجنونهاا .. مجنونهاا ..

قفل عادل من شهد و جلس يفكر بينه و بين نفسه ( ياا الله وش تبي مني هالبنت ليه ملاحقتني بكل مكان حتى و انا بآخر العالم لاحقتني , انا بعدت عن أهلي و تركت ديرتي بسببها والحين بتلحقني حتى بالغربة , انا غبي ليه ما قلت لشهد لا ماقدر ادبر لهم بعثة و خلاص ريحت نفسي , كيف بشوفهم كل يوم مع بعض و يحترق قلبي ما اتحمل اشوفه معها يمكن ما اسيطر على نفسي و اضربه لو بس كان ماسك يدها قدامي , الله يسامحك يا أميرة تحبين تعذبيني )

اتصل عادل على صديقه و هو متثاقل هالمهمة اللي طلبتها منه أميرة , هالشي صعب عليه بس ما يقدر يقول لا لأميرة أي شي بيسعد أميرة هو بيسويه حتى لو كان فيه عذابه

دق عادل على صديقه مساعد

عادل: ألو السلام عليكم

مساعد: و عليكم السلام هلاا و غلاا بابو عبدالله

عادل: هلا بك وشلونك

مساعد: والله الحمدلله بخير انت بشرنا عنك وشلونك مع الغربة

عادل: والله ماشي حالي شوي شوي وان شاء الله اتأقلم

مساعد: الله يعينك ان شاء الله

عادل: شكلك بالدوام للحينك ما طلعت

مساعد: ايه والله اليوم عندنا ضغط بالشغل

عادل: اجل عطلتك عن شغلك , بس و لا عليك أمر بغيت منك طلب

مساعد: انت تامر ما تطلب يابو عبدالله

عادل: تسلم , في ناس من معارفنا يبون بعثة ياليت والله لو تقدر تدبر لهم بعثة

مساعد: خلاص و لا يهمك ابشر اعتبرهم مسافرين

عادل: ما تقصر والله

مساعد: وش دعوه عزيز و غالي يابو عبدالله , عاد انت خلهم يجون للمكتب يقولون حنا من طرف عادل و ان شاء الله ما يلقون الا كل خير

عادل: تسلم والله , يالله اجل مابي اعطلك عن شغلك فمان الله

مساعد: بحفظ الكريم

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــ


باقي على زواج أميرة ثلاث أيام , كانت جالسة مع أهلها العصر ووصلها مسج من رقم غريب , فتحت المسج , و كان محتوى المسج ( مبروك يا حلوتي ألف مبروك بدأ العد التنازلي 3 ) , استغربت أميرة المسج و جلست تفكر مين اللي مرسل المسج ( شكله سلطان بتصل عليه و اشوف )

دقت أميرة على سلطان

أميرة: الو هلا سلطان

سلطان: هلا حبيبتي

أميرة: وينك؟

سلطان: انا ببيت واحد من الشباب

أميرة : انت ارسلت لي مسج قبل شوي من رقم غريب؟

سلطان: لا , ليه وش المسج

أميرة: لا اجل اكيد وحدة من البنات ارسلت لي رسالة تبارك لي

سلطان : اوكي حياتي انا بقفل منك الحين الشباب ينادوني أكلمك اذا طلعت

أميرة: اوكي

قفلت اميرة من سلطان و زاد استغرابها مين اللي مرسل لي المسج بس ما اهتمت كثير و طنشت السالفة

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــ

من بكرة و بنفس الوقت جتها رسالة من نفس الرقم فتحتها اميرة و كان محتوى الرسالة ( باقي يومين ) , أميرة استغربت و جاها فضول تعرف مين اللي جالس يرسل لها , كتبت مسج ( مين؟؟) , بعد شوي نفس الرقم رد عليها بمسج ( كل شي بوقته حلو ) , استغربت اكثر بس قررت تطنش , بس الشي الغريب انه من بكرة و بنفس الوقت الساعة اربعة العصر بالضبط ( باقي يوم واحد) , اميرة لما شافت المسج انصدمت و قررت الا تبي تعرف مين اللي قاعد يسوي كذا , جا فبالها يمكن وحده من البنات تهبل فيها , أرسلت اميرة لنفس الرقم مسج ( ممكن أعرف مين اللي يرسل؟) , شوي وصلتها رسالة منه ( ياخبر اليوم بفلوس بكرة بيجيك ببلاش , لا تكونين فضولية ) استغربت اميرة و انشغل بالهاا و صارت تفكر بالرسايل اللي صار لها ثلاث ايام تجيها من شخص ماتعرف مين ( أميرة بينها و بين نفسها : هذا تهديد مبطن مين اللي جالس يهددني و ليه ؟؟ انا اصلا ما اذكر انه عندي عداوات مع احد , شكلي بقول لسلطان بس سلطان وش يقدر يسوي بخليه يقلق ع الفاضي و يمكن تكون وحدة من البنات مسوية فيني مقلب و هذا هو الاغلب , بس كيف اقدر اتناسى هذا التهديد اخاف يكون فيصل لاني اذكر اني لما انخطبت فيصل هدد نواف انه بينكد عيشتي اتوقع انه هو الله يستر منه )

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــ

الله يهنيك فيني .. والله يهنيني فيك..
يا عسى تبقى بإيديني.. و يا عسى ابقى بإيديك

اليوم هو اليوم الموعود , يوم زواج أميرة و سلطان , أميرة صحت من الصباح الساعة ستة و هي اصلا ما قدرت تنام الا الساعة ثلاثة الفجر , كانت رايحة للقاعة من بدري و كانوا عندها الكوافيرات , كانوا جالسين يعملون لها بديكير و مناكير و لسه ما بعد بدوا بالميك اب و لا التسريحة لان الوقت لسه بدري

دخلت عليها سارة : خذي خلي جوالك معك لاني انا بطلع اشوف وش صار ع الكوشة

أميرة: ليه نواف مو عندهم؟؟

سارة: الا عندهم بس هو ناداني قال تعالي شوفيها لانه هو مايدري حنا وش اتفقنا معهم

أميرة: أوكي

طلعت سارة , وبعد ما خلصوا من أظافرها قالت لهم اميرة ابي اصلي العصر قبل ما تبدون ميك اب , بعد ما صلت طالعت جوالها لقت مسج من نفس الرقم , استغربت و خافت و فتحت الرسالة ( الله يهنيكم بيكون يوم حافل اتمنى لك قضاء يوم ممتع ) , اميرة ارتبكت و خافت هذا اللي يهدد يخرب زواجها و هي من دون شي متوترة , دخلت عليها سارة

سارة: لاا الحمدلله لحد الحين كل شي اوكي شكل الكوشة بتطلع حلوة

أميرة ما ردت عليها

سارة: أميرة وش فيك ليه وجهك اصفر , قلتلك كلي لك شي تبين اجيب لك عصير

أميرة من التوتر و ماتدري وش تسوي صارت تبكي

سارة: أميرة وش فيك خوفتيني وش صاير؟ متهاوشة مع سلطان؟

أميرة: لا

راحت سارة وجابت منديل و موية و عطتها تمسح دموعها

اميرة قالت لسارة السالفة

سارة: وبس كذا؟ خوفتيني طاح قلبي قلت صاير شي كايد دلوعة والله و اذا يعني تلقينه سلطان يستهبل عليك و حتى لو كان فيصل خله يبلط البحر وش بيسوي يعني , انتي حاسة الموضوع كبير لانك متوترة

هدت اميرة بعد كلام سارة

سارة: الحمدلله ما بعد بديتي ميك اب والا كان كله خرب , اقول لك شي هاتي جوالك ماينفع يكون معك

سارة اخذت منها الجوال و طلعت عشان تخلي الكوافيرات يبدون فيها

خلصوا الكوافيرات شغلهم و جت المصورة و جلست تصورها , و قربت الساعه 12 اللي هو وقت زفتها , صارت أميرة جاهزة , كان فستانها من فوق ضيق مرة و بدون اكمام و ضيق مرة لحد الخصر و من تحت جاية نفشته كبيرة و سحبتها طويلة , و رافعين لها شعرها كله شنيون و حاطين لها تاج صغير بعدين الشرعة من ورا طويلة و المسكة كلها ورد احمر , و الميك اب كان ترابي و روج احمر و طالع الميك اب مع لون عيونها الخضرا مرة غريب و حلو , دخلوا عليها ريم و حنان و يارا و صاروا يسولفون معها و يروقون الجو شوي قبل الزفة

ريم: والله والله روووووووووووووعة خياال طالعة

أميرة: لاا تجاملين عشان ترفعين معنوياتي

حنان: والله ما شاء الله تبارك الرحمن طالعه قمر , قريتي على نفسك؟

أميرة: ايه قريت الورد

يارا : والله كأنك سندريلا مع هذا الفستان مرة حلو

أميرة و هي مستحية: شكرا

بعد شوي جا وقت الزفة , الزفة كانت هاادية مرة و كانت اميرة تمشي بشويش و المصورة قدامها تصورها و اميرة كانت مرة مستحية و الناس يطالعونها و يسمون و يذكرون الله و امها بس تقرا عليها لحد ما وصلت للكوشة , و جلست و جت امها و سارة و ام سلطان و اخوات سلطان و غدير وام عبدالرحمن و شهد و جلسوا يرقصون قدامها , بعد شوي قالوا الرجال بيدخلون , و دخل سلطان و ابوه و نواف و خالد , وقف سلطان جنب اميرة و سلم عليها و باس جبينها و صاروا نواف و خالد يرقصون , طبعا خلودي كان ماكل الجو ماوقف رقص و عايش جوه

بطاولة من الطاولات كانت روان و امها و زوجة عمهاا و بنات عمها جالسين

وحدة من بنات عم روان: روان هذا ولد خالك ؟؟

روان: ايه هذا نواف

بنت عمها : يجننننن

روان: لا يع

بنت عمها: والله انتي اللي يع شوفي كيف يهبل

روان: مو حلو ماعندك ذوق

بنت عمها : والله لو انا مكانك افكر بخطة اخليه يخطبني على طول اتزوجه

روان: لا انا ماحب هذا الشكل احسه ابيض بزيادة انا احب السمار

بنت عمها: الحين البياض صار شين شوفي ما شاء الله طول و بياض و رزة كأنه امير

روان: بشويش على نفسك لا تموتين علينا , كل هذا عشان نواف اجل لو شايفة فيصل ولد خالي احمد كان ما تنامين

بنت عمها: ليه احلى من نواف؟

روان: فرق السماء عن الارض

بنت عمها: لا والله خلااص انا قلبي تعلق بنواف حتى اسمه يهبل , شوفي شوفي كيف يبتسم ابتسامته تاخذ العقل

روان: الله يقرفك ما عندك ذوق

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــ

خلصت الزفة و طلعوا الرجال بعدين طلعت اميرة و سلطان و سلموا على اهلهم و راحوا للاوتيل

اول ما دخلوا الغرفة سلطان قرب من اميرة و صار يطالعها

سلطان: انا كل يوم بصلي صلاة شكر انك زوجتي , احس اني بحلم معقولة انا اتزوج بنت مثلك فيها كل شي كنت اتمناه

طبعا أميرة كانت بدت تمون عليه بس رهبة يوم الزواج كان لها دور انها تكون مستحية و مرتبكة

سلطان: انتي المفروض اهلك ما سموك اميرة

أميرة: ليه مو حلو؟

سلطان: حلو و يجنن بس المفروض انتي اسمك ملكة كل المواصفات اللي فيك تخليك تستاهلين تكونين ملكة , امورتي احبك احبك اموت فيك

بعدها بشوي قرا سلطان على اميرة دعاء الزواج و بعدها راحت غيرت ملابسها و صلوا

سلطان: يالله امورتي نتعشى , انا مييت جوع و من الفرحة انا باكل كثيير و انتي اكيد الحين جوعانه و انا عارفك اكيد صار لك كم يوم ما تاكلين زين

جلسوا ع العشاء طبعا اميرة كانت مرة مستحية و ما تاكل و سلطان كل شوي يأكلها


بعد ما خلصوا اكل بشوي دق باب الغرفة , راح سلطان و فتح الباب , جت اميرة و طالعت سلطان لقته شايل باقة ورد , قربت منه و طالعت الورد

أميرة: وااو مرة يجنن مين ارسله لنا؟؟

سلطان كان فاتح الكرت و يقراه و وجهه انقلب الوان و عقد حواجبه , اميرة استغربت و سحبت الكرت منه و قرت المكتوب فيه ( مبروك حبيبتي أتمنى لك حياة سعيدة يا خاينة ) قرت اميرة و شحب وجهها و صارت ترتجف و ربطت بينه و بين التهديدات اللي جتها على جوالها

أميرة و عيونها تدمع و بصوت مرتجف : م م مين هذا؟

سلطان كان مو معها و منزل راسه و باين انه معصب رفع عيونه عليها و تنهد و قرب منها و رفع يده و مسح الدمعة اللي نزلت على خدها و مسكها و حضنها

سلطان: أمورتي حبيبتي لا تضيقين صدرك انا واثق فيك و مافي شي يقدر يفرق بيننا لطول العمر و انا مستحيل اتخلى عنك او اشك فيك انا اشك بنفسي و لا اشك فيك و لا تتوقعين حركة من شخص تافه و الا حاقد تقدر تخرب بينا انا احبك ياعمري , تعالي نروح ننام الحين رحلتنا بكرة بدري و لازم ننام كم ساعة

و اخذها و راحوا ناموا

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــ

بعد ما سافرت اميرة لشهر العسل بيومين

سارة: يمه كلمتي اميرة

أم نواف: دقيت عليها بس جوالها مقفل

نواف: ايه انا بعد دقيت عليها جوالها مقفل و اتصلت على سلطان و كلمتها

ام نواف: طيب هي جوالها ليه مقفل

نواف: طالعين و جوالها مافي بطارية

سارة: ها و ان شاء الله مبسوطة

نواف: ايه الحمدلله

سارة: مرررة ابي اكلمها اشتقت لها احس البيت فاضي بعدها

ام نواف: صادقة فضى علينا البيت كانت معبيته حركة الله يسعدها و يهنيها يارب

سارة و نواف: امين

ام نواف: بتداومين بكرة؟

سارة: ايه ان شاء الله خلاص اجازتي خلصت

نواف: يالله عقبال ما نشوف سارونة عروس

سارة: لاا انا مضربة عن الزواج

ام نواف: قبلها نبي نشوفك انت عريس

نواف: ان شاء الله بتشوفيني عريس

ام نواف: طيب وش رايك اخطب لك

نواف: والله اذا بتخطبين لي ما اقول لا

سارة: وااو لاا ما اصدق نواف يتزوج ونااسه يعني هذي السنة الفرحة فرحتين قول وش تبي مواصفاتها عشان نبدا البحث من الحين

نواف: انا ابي روان بنت عمتي نورة

سارة: مالقيت الا روان هالبنت ما تنهضم

نواف: انا اذكرها و هي صغيرة حلوة و عاجبتني ابيها

ام نواف: أي ولله حلوة البنت

سارة: بس لا تتعب نفسك و تخطبها ما راح توافق عليك

نواف: و ليه ما راح توافق

سارة: لانها ما تحبنا و اذا شافتنا كأنها شايفة جني

نواف: ماحب اقطع الامل نجرب ما ورانا شي واذا ماوافقت الله يرزقني بوحده ثانية

ام نواف: ابشر بكرة ان شاء الله الضحى اتصل على ام بدر


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــ

بمكان ثاني , روان كانت تكلم لمياء بالجوال

روان: لمياء سوري ما راح اقدر اجيك بكرة

لمياء: روان بلا سخاافه تعالي عندي

روان: جد ما اقدر بكرة بجلس بالبيت اذاكر خليها بالويك اند

لمياء: بالويك اند بتعتذرين و تقولين بروح مع ماما

روان: لاا جد بالويك اند ان شاء الله اجيك

لمياء: خلاص عطيني يوم بالتحديد

روان: خلاص يوم الخميس ان شاء الله

لمياء: اوكي حلو

روان: اوكي لمو انا مضطرة اقفل بااي

لمياء: باي

قفلت لمياء من روان ( بينها و بين نفسها خطتي جالسة تمشي مضبووط و مثل ما انا ابي والله لاقهرك يابدر و احرق دمك على اختك)

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــ

فديتك قد ما تقدر .. تغزل فيني دللني
و خليني معاك اعرف.. فنون الحب و اصوله

أميرة و سلطان كانوا يمشون راجعين من المتحف و بيروحون للمطعم و كان سلطان ماسك اميرة و يمشون بوسط الناس و يحسون كأنهم لحالهم بالعالم

سلطان: امورتي حياتي

اميرة: هلا سلطاني

سلطان: تحبيني؟

اميرة: ايه

سلطان: لا قولي احبك

اميرة: احبك

سلطان: ياااابعد الدنيا انتي يابعد روحي

و صار يصرخ بصوت عالي و يقول : احــــــــــــــــبـــــــــــــــــــــــــــــــ ــــــك

و اميرة تضحك عليه و الناس يطالعونه مستغربين

اميرة: ههههههههه سلطان خلاص يا مجنون شوف الناس كيف يطالعونك

سلطان: ما علي من الناس انا علي منك انتي و بس يابعد كل هالناس

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ

بيوم جديد و وقت الظهر كانت سارة بالمستشفى و طلال من اول ما شافها و هو وده يفاتحها بالموضوع اللي من زمان وده يكلمها فيه بس كانت سارة الفترة اللي فاتت ماخذة اجازة شهر عشان زواج اختها

طلال: صباح الخير

سارة بدون نفس: صباح النور

طلال: كيفك دكتورة؟

سارة: الحمدلله

طلال: نورتي المستشفى و مبروك زواج اختك

سارة: الله يبارك فيك , عن اذنك

و مشت و تركته و حتى ما سمعت رده

طلال استغرب حركتها بس قال يمكن في شي مضايقها او لانها اول يوم تداوم و مالها خلق تداوم

قرر يكلمها بالموضوع نهاية الدوام لانه حس ان الموضوع طال بزيادة و مايتحمل تأجيل اكثر من كذا , بنهاية الدوام طلال راح لسارة

طلال: دكتورة سارة

سارة: هلا

طلال: ابيك شوي ابي اكلمك بموضوع ممكن

سارة طالعته بنص عين و باحتقار و قالت له: مافي أي موضوع يجمع بينا غير الشغل و شي بالشغل ما يحتاج اننا لازم نبعد عن الناس عشان نتكلم فيه صح؟

طلال: بس انا ابي اتكلم معك بموضوع خاص

سارة: ما في بينا مواضيع خاصة عندك شي قوله

طلال: سارة من الآخر انا ابي رقم اهلك ابي اخطبك

سارة: روح العب مع غيري مو انا اللي ينضحك علي بهذي الاساليب الملتوية , عن اذنك بااي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــ

انــــــتــــــهــــــى الـــــبـــــــارت


تتوقعون مين اللي مرسل المسجات لأميرة ؟ هل هو فعلا فيصل؟؟

و ليه كانت ردة فعل سلطان اقل من عادية و ما شك بأميرة لما قرا الكرت؟؟

و روان تتوقعون بتوافق على نواف؟؟

و لمياء وش ناوية و مخططة لروان؟؟

و طلال بيكتشف الحقيقة و الا بينسى الموضوع و خلاص؟

وعادل العاشق المنسي كيف بيتقبل حياته بعد مادخلت فيها اميرة مرة ثانية بس هالمرة هي وزوجها؟

انتظر آرائكم و توقعاتكم و انتقاداتكم .

دمتم بخير

حمااااااااااااااااااااااااس..
اتوقع فيصل هو اللي يرسل لأميرة ياشينه هالانسااان اكررررررررررررررررررهه ..

ردة فعل سلطاان عاادية اتوقع ربط بينها وبين المسجااات وعرف انه وااحد لعاااااااااااااااب ..

مااتوقع روااان تواافق ..

طلال بيكتشف الحقيقة بس متأخر ..

ياااااااااااااعمري ياااعااادل والله اني احبك ..

ننتظر الباارت الجاااي بفاررغ الصبر

صعبة المنال .. هلا و غلا

يمكن يكون فيصل هو اللي مرسل و يمكن لا

نورتي يا عسولة

بسم الله الرحمن الرحيم

مساء الورد و الكادي .. ياحلوين نزلت البارت الجديد و اتمنى انكم تحبونه

قراءة طيبة


( الــجــــــزء الــــســـــادس عــــــــشـــــر )

بعد ما راحت سارة و تركت طلال , طلال انصدم من طريقة تعاملها معه و تصرفاتها بهذي الطريقة و تعاملها له باحتقار , طلال بينه و بين نفسه ( غريبة سارة بالعادة تتكلم معي بادب و تحترمني ليه جالسة تتكلم بهالطريقة و كأني حشرة , كل هذا لاني قلت لها بخطبك؟ طيب انا نيتي صادقة ما طلبت غير رقم أهلها لهالدرجة تحسست من الموضوع؟ و ليه اعتبرتها اهانة؟ بخلي نورة تسألها ليه تصرفت معي بهالطريقة .

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــ

بيوم ثاني و وقت الظهر و في بيت عمتهم نورة , روان كانت داخلة للصالة و تسمع امها تكلم , بعد ما قفلت امها صارت تكش على التلفون و تبرطم

روان: مين هذا اللي كلمك و خرب مزاجك

ام بدر: ام نواف

روان: ايش تبي ليه متصلة عليك

أم بدر: تبيك

روان: تبي تكلمني انا؟

ام بدر: لاا تبيك لنواف , داقه تخطبك الشيخة

روان: بسم الله علي انا اخذ نواف؟

ام بدر: والله لو مو امه كان قلتلك تزوجيه نواف رجال بس عيبه امه

روان: لا والله لا هو ولا امه ما اهضمهم , ايه لو فيصل يخطبني ممكن اوافق

ام بدر: عاد لا جينا للصدق نواف اسنع من فيصل

روان: لا والله فيصل كل شي فيه حلو

ام بدر: استحي يا بنت ما بقى الا تروحين لبيتهم و تخطبينه

روان: انا ما قلت شي قلت الجد

و طلعت و راحت غرفتها

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ

الله لا يحرمني منك ..
و من حلاك و من دلالك..
ماتمنى غير شوف..
مبتسم مرتاح بــالــك..


في روما كانوا أميرة و سلطان يتمشون و ما بقى مكان ما وداها له و بعد ماخلصوا مشاوير جلسوا على كرسي قدام الحديقة

أميرة: حبيبي خلينا نرجع للأوتيل والله خلاص تعبت

سلطان: نو نو مافيه , خلينا نتمشى شوفي كيف الجو حلو وانتي تبينا نرجع للأوتيل

أميرة: والله مررة فيني نوم , الحين انت كل يوم تبينا نرجع و حنا ما كملنا نص المشوار اليوم بس عشاني انا ابي ارجع انت ماتبي

سلطان: وش اسوي انا شرير أحب اعذب امورتي

أميرة: طيب خلاص بليز نص ساعة و نرجع مرة رجولي تعورني

سلطان: طيب حنا الحين جالسين ع الكرسي كيف تعورك رجولك و انتي جالسة

أميرة بضيقة خلق: طيب ابي انااام

سلطان سحبها و حط راسها على كتفه

سلطان: يالله غمضي عيونك و نامي

أميرة حطت راسها و غمضت عيونها : بنام و احلم فيك بعد , اصلا هذي احلى نومه انامها بحياتي

سلطان: يابعد روحي انتي , انا كلي لك

بعد ساعة تقريبا

سلطان: ههههههههه شكلك حلو وانتي تعبانة

أميرة: يااسلاام فوق ما انت حارمني من الرجعة للاوتيل جالس تتريق علي , اصلا خلاص لازم نرجع الجو صار مرة بارد

سلطان: اوكي من عيوني مع اني كان ودي اسهر معك سهرة طويلة

أميرة: نسيت بكرة بنرجع لازم نرتاح ورانا سفر

سلطان: ايه بس يمدينا ننام رحلتنا بكرة بالليل

وصلوا اميرة و سلطان للأوتيل

سلطان: امورتي خذي افتحي الباب

اميرة: طيب

فتحت أميرة الباب و تفاجأت كانت الغرفة ظلام و كلها شموع من اول الباب لاخر الغرفة , و على الطاولة بوكيه ورد احمر كبير مرة و السرير منثور عليه ورد احمر , و ميوزيك رومنسي

اميرة التفتت على سلطان و حضنته

أميرة: ياحبيبي انت

سلطان: بعد عمري انتي

أميرة: عشان كذا ما كنت تبي ترجع للاوتيل بدري

سلطان: ايه و تورطت لما قلتي يالله نرجع ههههههههه

أميرة: سلطاني

سلطان: عيون سلطانك لبيه

أميرة: احبك

سلطان: ماا اصدق معقوولة أمورتي قالت لي احبك بدون ما اترجاها تقولها لو ادري كان من زمااان سويت جو رومنسي , يابعد روحي و انا احبك و اموت فيك

أميرة: جد حبيبي مرة انبسطت شكرا

سلطان: ياحياتي انتي , انا فكرت قلت مافي مناسبة صح بس انا دامك انتي معي معناته كل ايامي عيد و كل يوم بالنسبة لي اعيشه معك عيد حب

أميرة: احبك والله احبك

اميرة طالعت بسلطان و كان سرحان و مو معها

أميرة : سلطاني وش فيك مو على بعضك

سلطان حضنها: تدرين , اتمنى اعيش انا و انتي بمكان مافي احد مكان مافيه الا انا و انتي مابي احد بالعالم غيرك يكون موجود معنا

أميرة: لهذي الدرجة تحبني؟

سلطان: ما تتصورين وش كثر انا احبك اكثر من كل شي بالعالم

أميرة: سلطاني

سلطان: عيونه و قلبه و روحه

أميرة: ممكن يجي يوم من الايام تأذيني فيه؟

سلطان: اميرة وش هالكلام؟ مجنونة انتي؟ انا اذا شفتك متضايقة كل الدنيا تقفل بوجهي كيف تبيني انا اكون سبب زعلك و ضيقتك , حبيبتي دامك معي ماراح تشوفين يوم اسود بحياتك ان شاء الله بحاول قد ما اقدر اسخر حياتي لك و اسعدك

أميرة: الله يخليك لي و لا يحرمني منك

سلطان: و يخليك لي ياعمري

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــ


يا صاحبي ما فادنا كثر الاحلام..
واللي بخاطرنا عجزنا نطوله..
ماتت امانينا على كف الايام..
و حكم القدر فارض علينا ميوله...



عبدالرحمن و ديما , تحسنت علاقتهم كثير و طبعا حددوا موعد الزواج و عبدالرحمن بدأ يتقبل الوضع بدون وجود سارة بحياته و رضى بالواقع اللي انكتب له و زواجهم تحدد بالصيف يعني تقريبا بعد خمس شهور

كان عبدالرحمن جالس مع فيصل بالملحق و ديما اتصلت على عبدالرحمن , طلع عبدالرحمن للحوش شوي و كلم ديما و قفل , رجع للملحق

فيصل: ما فزيت كذا الا ان اللي متصلة المدام

عبدالرحمن : أي والله المدام

فيصل: وش اخبارك معها كل الامور تمام مرتاح معها

عبدالرحمن : االحمدلله مرتاح بنت حلال و تحبني

فيصل: المفروض تشكرني

عبدالرحمن: و على ايش اشكرك ان شاء الله ؟

فيصل: عشاني فكيتك من سويرة

عبدالرحمن تنرفز من طريقة فيصل بالكلام: اولا اسمها سارة ثانيا تكلم عنها باحترام تراها مهما كانت بنت عمك ثالثا وانت وش سويت عشان تفكني منها

فيصل: اشوف القلب للحينه مشعلل منها , دامك كذا بغيت تاكلني يوم قلت سويرة اجل ماراح اقول لك وش سويت

عبدالرحمن حس ان فيصل مسوي شي غلط و سوا نفسه هادي عشان يخلي فيصل يتكلم

عبدالرحمن: لا عادي ماراح اعصب عليك قل لي وش مسوي

فيصل حكى لعبدالرحمن سالفة المسج اللي ارسله لسارة من جوال عبدالرحمن

عبدالرحمن طبعا لما سمع السالفة عصب و فقد عقله من كثر العصبية و قام من مكانه و ضرب فيصل و جلس يضربه و فيصل يحاول يدافع عن نفسه

فيصل: ابعد عني يا مجنون ابعد بتذبحني

عبدالرحمن وهو كل ثقله على فيصل و يضربه : يا خسيس يا حيوان طول عمرك حقود و دنيء بعمرك ما راح تتعدل وتصير بني ادم مثل الناس

وجلس يضربه كفوف و يلكمه و يرفسه لحد ما صار خشمه و فمه يصب دم

فيصل: بعد عني الله ياخذك تسوي باخوك كذا عشان ذا الواطية

عبدالرحمن: انت الواطي ياحقير يا كلب ان سمعت انك قربت منهم والا اذيتهم مرة ثانية والله ما يصير لك طيب , تفوو عليك منحط وسخ

طلع عبدالرحمن من الملحق و دخل للبيت و كانت امه وغدير جالسين بالصالة و تفاجأوا من دخول عبدالرحمن وهو شكله معصب بهالطريقة

أم عبدالرحمن: عبدالرحمن وش فيك

عبدالرحمن ما رد عليها و مشى و طلع لغرفته

ام عبدالرحمن و هي مصدومه : وش فيه عبدالرحمن

غدير : والله مدري يمه بس شكله معصب مرة

ام عبدالرحمن: بروح اشوفه

و قامت بتروح لعبدالرحمن بس اللي ماخلاها تتحرك دخول فيصل وهو كل وجهه دم

ام عبدالرحمن على طول توجهت لفيصل

ام عبدالرحمن : بسم الله عليك وش صاير

جلس فيصل ع الكنبة : تهاوشت مع عبدالرحمن الكلب والله لاوريه

ام عبدالرحمن : اذكر الله قوم روح للدكتور شوف شلون دمك معبي وجهك

فيصل: ما يحتاج دكتور

غدير كانت تطالع فيصل و هي خايفة ماتدري وش صاير بينه و بين عبدالرحمن , قررت تطلع عند عبدالرحمن لغرفته

غدير فتحت الباب على عبدالرحمن و دخلت لقته متمدد على السرير و مغطي عيونه بيده

غدير: عبدالرحمن

عبدالرحمن بدون ما يتحرك: نعم

غدير: وش فيك وش صار بينك انت و فيصل

عبدالرحمن: تهاوشنا

غدير: ليه وش السبب

عبدالرحمن: فيصل طول عمره تصرفاته تصرفات بزر بعمره ماراح يصير رجال

غدير: ليه وش سوا

عبدالرحمن قال لغدير كل السالفة , طبعا غدير ربطت بين موقف سارة الي اتخذته من عبدالرحمن و بين المسج

غدير: اهاا عشان كذا سارة كانت زعلانة و منصدمه منك

عبدالرحمن: يعني ما يكفي اذيتها يوم تركتها و خطبت وحده ثانية يقوم هذا يسوي حركة مثل كذا , ياااالله ياسارة وش كثر تعذبتي وانا السبب

غدير: بس انت مالك دخل

عبدالرحمن: تخيلي حجم خيبة الامل اللي حست فيها لما قرت المسج تخيلي الالم اللي عاشته بسب هالزفت فيصل , ياليت ربي اخذني قبل ما أأذيها , ياربي هالبنت كل ماقلت نسيتها اكتشف اني احبها اكثر , تعبت وربي تعبت يا غدير

غدير قربت منه و صارت تربت على كتفه و تحاول تواسيه


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ

بعد يومين بعد المغرب كانوا جالسين ام نواف و نواف و خالد و سارة و يتقهوون , دق الجرس و راحت الشغالة تفتح بعد شوي دخلت عليهم اميرة كانت مسويتلهم مفاجأة و قالت لهم بتجي بعد اربع ايام , ما انتبهوا انها دخلت وكانوا يسولفون

أميرة: ما اشتقتوا لي؟؟

التفتوا كلهم و انصدموا من وجودها , سارة على طول قامت و ركضت لاميرة و حضنتها

سارة: اشتقت لك مووووووت ونااسه

راحت اميرة و سلمت على امها و باست راسها

أم نواف: الحمدلله على سلامتكم امورة كيفكم

اميرة: الله يسلمك الحمدلله انتي كيفك ماما

ام نواف : والله الحمدلله بخير ليه ماقلتوا لنا انكم راجعين اليوم عشان نجهز لكم اكل والا شي

اميرة: لا تغدينا بالطيارة الحمدلله

نواف: وين سلطان؟

اميرة: برى ينتظرني

خالد: سواق هو ينتظرك برى

نواف: ليه ماقلتي لنا بروح ادخله للمجلس انا , خالد تعال معي

راحوا نواف و خالد و سلموا على سلطان و دخلوه , اما اميرة و سارة ما سكتوا كل وحدة تسولف للثانية الاشياء اللي صارت لها

بعد ما سهروا اميرة و سلطان في بيت اهل اميرة طلعوا من عندهم , و هم بالسيارة

اميرة: سلطان بأي يوم بنسافر بريطانيا الاسبوع الجاي؟

سلطان: يوم الاحد بإذن الله

اميرة: مرة قريب فكرت بآخر الاسبوع

بعد شوي جاها مسج , فتحت اميرة المسج و الغريب كان من نفس الرقم اللي يهددها ( قدرتي تفلتين منها المرة الاولى , بس كلها كم يوم و تنهدم حياتك استعدي )

اميرة مرة عصبت : وجع وش يبي مننني

سلطان: وش فيك اميرة؟

اميرة عطت سلطان الجوال و قرا المسج بس الغريب ان سلطان ماقال ولا شي و كان الموضوع عنده عادي

سلطان: عادي هذولي ناس حسودين ماعليك منهم طنشي

اميرة: يهددني و اطنش؟

سلطان: ايه طنشي نهايته بيمل و يوقف تهديد و خلينا نشوف وش يقدر يسوي

أميرة ما عجبها كلام سلطان و بروده بس سكتت و ابحرت بتفكيرها بالشخص اللي يهددها مين يكون يا ترى


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــ

يوم الخميس بالليل كانت روان لابسة و متجهزة عشان تروح لبيت لمياء

اتصلت عليها لمياء

روان: هلا لمو

لمياء: هلا وينك يا قمر

روان: سوري عارفة تأخرت عليك بس الحين طالعة

لمياء: اوكي انتظرك لا تتأخرين

روان: اوكي بس بليز ابي وصف بيتكم

لمياء: اوكي اذا طلعتي كلميني عشان اوصف لك البيت

بعد نص ساعة كانت روان عند باب بيت لمياء , روان اتصلت على لمياء عشان تفتح لها الباب

روان: الو هلا لمو انا عند الباب بليز افتحي لي

لمياء: اوكي الحين بقول للشغالة تفتح لك انا بغير ملابسي لان العصير انكب علي و انزل لك على طول ماراح اتأخر و خذي راحتك البيت بيتك

روان: اوكي باي

روان دقت الجرس و فتحت لها الشغالة ودخلتها بالمجلس, روان كانت تنتظر لمياء و من الطفش صارت تلعب بجوالها , سمعت صوت احد عند باب المجلس و رفعت راسها بحماس و هي مبتسمه و متحمسه بتقوم تسلم على لمياء بس تفاجأت ان اللي دخل عليها بالمجلس رجال مو لمياء , خافت روان و من الخوف ما قدرت تتحرك فكرته انه غلطان و تنتظره يطلع من المجلس , بس الشي اللي صدمها انه ماطلع , دخل و سكر الباب وراه , بهاللحظة روان قامت و تبي تطلع

روان: بعد عني خليني اطلع

الرجال: ليه وين تطلعين؟ مو انتي قبل شوي جاية كيف تطلعين؟

روان كانت بموقف لا تحسد عليها و ضربات قلبها تزيد و تحس نفسها بتموت من الخوف

روان قالت بعصبية يتخللها خوف: قلتلك خلني اطلع

الرجال: و لمياء ماتبي تشوفينها؟

روان لما حست انه ما في مفر من الموضوع فكرت بخطة عكسية يمكن تنقذها و حاولت انها تسوي نفسها هادية قد ما تقدر

روان وقفت مكانها و وقفت عن مقاومته و سوت نفسها طبيعية : يعني لمياء بتجي؟

الرجال: طبعاا بتجي

روان سوت نفسها مو مهتمة و جلست: اها كويس انت خوفتني لما دخلت علي فجأة اكيد لمياء نست تقول لي انك موجود , انت اخوها صح؟

الرجال: ايه انا اخوها

بهالوقت روان كانت مسوية نفسها مو معطية الموضوع اهمية و كانت تسوي نفسها تلعب بجوالها و ارسلت لبدر ( بسرعة تعال انا ببيت لمياء في واحد دخل عندي و كتبت له الوصف )

روان تحاول تشغله : ايش اسمك؟

الرجال: اسمي فهد

روان: احب اسم فهد

بهالوقت كانوا نواف و بدر بسيارة بدر و لما وصلت الرسالة لجوال بدر

بدر كان يسوق: نواف افتح المسج هذا اكيد عبدالمجيد ارسل رقم راعي السيارة

نواف فتح الجوال و قرا المسج و لقاه من روان لما شاف المسج خاف بس ماكان يبي يربك بدر و هو يسوق

نواف: بدر خذ يوتيرن

بدر: ليه

نواف: بسرعة قلتلك خذ يوتيرن

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــ

انــــتــــــهـــــى الـــــبـــــــارت

يا ترى وش راح يصير لروان؟؟ و كيف راح يتصرف نواف ؟؟

عبدالرحمن وش راح يسوي بعد ما اعترف له فيصل بالحركة اللي سواها . هل راح يعتذر من سارة؟؟

و أميرة و مسجات التهديد اللي توصلها تتوقعون مين اللي يبي يأذيها و يهدم حياتها ؟ و سلطان وش ورى بروده وعدم اهتمامه بالموضوع تتوقعون يدري وش سر هالمسجات؟؟

انتظر توقعاتكم و آرائكم و انتقاداتكم

دمتم بخير