رجل المستحيل والنهايات المفتوحه

منوره الموضوع كالعاده طبعا ياجين

أنا مش هضحك عليكى وأقولك أنى ذاكره حديد ولا حاجه انا قريت السلسله حوالى 3 مرات

فيه تشابه كبير بين إجاباتك واللى أنا بفكر فيه بس ماعتقدش أن منى ماتت
وعلى العموم الدكتور نبيل ساب الباب ده مفتوح عن طريق تعليق الدكتور احمد أخو ادهم لما قال انه شاف صابع منى بيتحرك وادهم بيدخلها السياره
اما موت سونيا فمش واضخ فعلا لانه فى النهايه المكان انفجر بالسلاح وقبل ماهيا تخرج فبردك الباب مفتوح
وهو علشان كده اسمها النهايات المفتوحه واحنا عايزين نقفلها - مش كده -

شكرا على مرورك الجميل ياجين ومنورانى دايما والله

صح يا عوض
انا فاكرة ان د. احمد قال كدة عن منى بس برضه تفسر بايه اللى اتقال فى العدد الخاص اوراق بطل

يلا يا جماعة عايزين نقفل بقى الابواب المفتوحة دى

بجد المنتدى نور بيك من تاني يا عوض ووحشتنا مشاركاتك الجميلة

وعودة قوية بعد غياب طويل بموضوع رائع




**************
نيجى للنهايات المفتوحه :-

1- هل ماتت منى وإذا لم تمت كيف ستستمر شخصيتها فى السلسله, وهل كانت هى المقصوده بالتفجير أم أدهم , ومن المسؤول عن التفجير ؟


بيتهيألي انها ماتت فعلا وده شيء ذكره الدكتور نبيل في كذا موضع منها زي ما جين قالت في اوراق بطل و كررها بعدها د.نبيل في عدد من أعداد ملف المستقبل لما ظهر فيها أدهم صبري كمستشار لرئيس الجمهورية وقال عنه دكتور نبيل انه فقد أحب انسانة ليه واكيد يقصد منى
طبعا مفيش جدال ان أمجد صبحي هو أدهم صبري طبعاً وده من وجهة نظري جواب للنقطة دي لان أدهم ظهر من بداية قصة المجهول العدد رقم 121
واستمر مع السلسلة لحد النهاية

2- من هو مستر أكس , وهل سيظهر مره أخرى ؟

مستر أكس ده أكتر شخصية غامضة معرفتش أخمن مين هو بصراحة
بس بيتهيألي كان حصله صدام كبير مع أدهم وبعدين اتعلم ازاي يكون حريص
عشان كده ظل مجهول لحد نهاية السلسلة وكنت بتمنى أعرف مين هو

3- هل ماتت سونيا جراهام بالفعل أم ستظهر مره أخرى كالعاده ؟

لا أظن ان سونيا ماتت ممكن معتقله هناك في أمريكا لاستخدام معلوماتها او شيء مماثل لأنها بالنسبة لأمريكا كنز وبيتهيألي هي سبب قنبلة الفرح

4- أبن أدهم ما مصيره ولمن سيكون ولائه وهل سيستطيع أدهم أنقاذه ؟

ده شيء لمح له د.نبيل في سلسلة ملف المستقبل ان احتمال كبير ابن ادهم يتربى في اسرائيل ويكون عدو لمصر ويحارب والده
زي ما حصل في قصة الأعماق وحرب الأشباح الأعداد رقم 138 و139
بس برضه دكتور نبيل ساب الباب مفتوح ان يكون حصل تلاعب في جينات ابن أدهم بمعنى ميكونش الشخص الشرير اللي حاربوه في القصتين دول ابن أدهم
بس رأيي ان أدهم مش هيقدر يستعيده وهيكمل حياته في اسرائيل

5- هل سيترك أدهم المخابرات ويعود للعمل منفردا كما حدث من قبل أم سيظل يعمل تحت مظلة المخابرات ؟

بيتهيألي صعب لانه كبر وكمان هيحتاجوه في مناصب تانية مهمه فكل خطواته هتكون محسوبة وهيكون في منصب كبير
***************
اسئلتك كانت جميلة يا عوض

واستمتعت بالاجابة عليها

ولو لقيت خيوط تانيه هحاول اكتبها هنا ان شاء الله

شكرا على الموضوع الرائع