كاتب الموضوع :
غموض الورد
المنتدى :
القصص المكتملة (بدون ردود)
الجزء التاسع عشر
*
*
*
*
*
ليلة كئيبة مرت بكل تفاصيلها التعيسة ... ليلة كانت
كلها دموع وعذاب واحساس قاتل بالإهانة ...بكت
كل شي صآر معاها ...وبزحمة احاسيسها الموجوعة
تذكرت بشاير وماتدري ليش حست انها ودها تكلمها
تشكي لها ... تفضفض عن اللي بخاطرها ...كانت
الساعة 10 استحت تتصل فيها خافت تكون نايمة
او تضايقها بهالاتصال خصوصا انها ماتمون عليها
اكتفت انها ارسلت لها مسج بسيط ويعبر عن مشاعرها
( مساء الخير اختي..
اولا حابة اشكرك على موقفك معاي وماراح انساه لك
طول العمر والله يقدرني وارد لك جميلك ..
وصدقيني اني اتمنى اتعرف عليك اكثر وحياك عندي
بأي وقت انتظرك تلبين دعوتي ,,,وآسفة على الازعاج)
بشاير كانت قاعدة مع اهلها اول ماوصلها المسج ...
ابتسمت بخاطرها لصاحبة المسج واتصلت فيها تكلمها
من اول وهي تبي تتطمن عليها: الو
الجوهرة: هلا والله
بشاير: مساء الخير شلونج؟
الجوهرة: بخير انتي كيفك؟
بشاير : الحمدلله.. قاعدة بروحج؟
الجوهرة: ايه
بشاير: بشري ان شاء الله ماصار شي وياج؟
الجوهرة: وش اللي ماصار خليها على ربك بس...
بشاير: طقج؟
الجوهرة: تبين الصراحة؟...
بشاير:اعتبريني اختج وقولي كل اللي بخاطرج
الجوهرة: بشاير انا اعيش بعذاب محد يتصوره
والاقسى اني اعيشه لحالي... ابي افضفض اللي بخاطري
ابي اقول..بس من عندي اقول له... قاعدة لحالي بهالمدينة
حتى اهلي ومابي ازود همهم فوق هم بعدي عنهم
بشاير: الجوهرة
الجوهرة: سمي
بشاير:اي وقت يناسبج قولي لي والله بيي لج على طول
الجوهرة: تقدرين بكرة؟
بشاير: اي اقدر ان شاء الله بس عطيني وصف شقتج وانا
ايي لج الصباح
الجوهرة: ما اعرف والله بالضبط الوصف
بشاير: ساكنة بشقة ماتدرين وينها؟
الجوهرة: لانك مو دارية اني محبوسة فيها ,,,
بشاير: عيل شلون ايي لج؟
الجوهرة راحت تطل من الشباك وشافت لوحة احد المحلات
اللي قريب من شقتها... قالت لبشاير الوصف اللي قدرت
عليه واتفقت معاها اذا ماعرفت توقف بالمحل والجوهرة
تطلع لها مع الشباك وتعرف منها الشقة ...
ارتاحت الجوهرة لهالاتصال كثير خصوصا انها حست
انه في احد حاس بمعاناتها وماتدري ليش تحس هالبنت
تبي تساعدها ...تسبحت وذكرت ربها ونامت ...
***********************************
اما هو من طلع من عندها وهو يحس انه مخنوق ...
كان تافه وسخيف وتعامله وحشي مع ارق انسانة عرفها
عمرها ما اشتكت كانت راضية بنصيبها ... حتى كلامها
كثر ماحاولت تقسى فيه الا انه كان يحس انه مو طبيعتها
وتتصنع شي مو من طبعها ...لام نفسه وغروره وانانيته
وده يروح يعتذر لها بس يدري ماراح تسامحه ... هو راح
يحاول يرضيها بأي طريقة ... اخذه التفكير وتأخر الوقت
ورجع للبيت وهموم الدنيا على راسه ...
اول ماوصل العمارة... انتبه لها واقفة على الشباك تناظر
حولها وتكلم بالجوال...عوره قلبه عليها رقى لشقته...
كان وده يروح لها ... بس اجل هالفكرة للصباح الحين
اكيد شايلة عليه بقلبها ... يبيها تهدا شوي عشان يطيب
خاطرها ... دخل شقته وكانت الساعة حول الـ 11 ناظر
حوله الشقة مثل ماهي ... وزوجته شكلها للحين ماجت
اتصل فيها وهو مولع قهر: وينك فيه للحين مارجعتي؟
جمانة: حبيبي شو بك ... روء انا هلا جايي
ياسر: شايفة الساعة كم الحين؟
جمانة: اي خلاص ماتعصب دقايق وبكون عندك
سكر منها وهو متنرفز... يلقاها من مين ولا من مين
راح يتسبح .. وطلع لقاها توها داخلة ... : بدري
جمانة: حبيبي والله انشغلت.. وقربت منه تبوسه وصارت
تتدلع عليه : شو زعلان حبيبي؟
ياسر: مو زعلان ياقلبي بس هالتأخير تعرفيني ما احبه
حتى ما اتصلتي تطمنيني
جمانة: خلاص ماتزعل هي آخر مرة وبوعدك ماراح اتأخر
مرة تانية
ياسر ابتسم لها : بنشوف
كمل قعدته معاها وهو تفكيره كل شوي يروح لوين مالجوهرة
قاعدة ... مايدري ليش يفكر فيها هالكثر... لام نفسه واعتبرها
خيانة لزوجته ... بس اوقات يرجع يقول انها هي زوجته بعد
وماسوا شي غلط ...
ليله مر بصعوبة وهو يحاول ينام ومو قادر... وبعد محاولات
مستميتة قدر ينام ...
الصباح قبل مايروح لكليته ..استجمع كل شجاعته والكلام اللي
يبي يقوله لها ويعتذر منها وياخذها للمعهد اللي كانت مستانسة
فيه ..طق الباب بهدوء ومالقى رد .. انتظر شوي ومافتحت له
فتح الباب بس مافتح ... مقفلته يعني ماتبيه يجيها حاول اكثر
من مرة بس ماقدر ... اتصل على جوالها ماترد ... وعلى
الثابت بعد ماترد..قرر يروح لكليته ولا رجع لكل حادث حديث
اما هي كانت سامعة كل شي وشايفة اتصالاته بس مطنشة حالفة
بداخلها تقهره وتهينه مثل ماقهرها ...سوت لها كوفي تبي تروق
وشغلت فيروز وقعدت بالصالة ...افكار كثير جالت بداخلها
رجعتها لورى ..وين ماكانت بالسعودية عايشة حياتها بكل هدوء
حلمها الوحيد زوج يسعدها ويشاركها حياتها ..كانت قنوعة
ترضى بابسط الاشياء .. لذلك كثير انهضمت حقوقها ومع كذا
تحملت وسكتت ... بس بهالمعركة ماراح تطلع خسرانة ابد
يمكن ينقصها الدهاء ..محتاجة تفكر وتخطط وتستجمع افكارها
وتبدا مخططها اللي في بالها... 3 ساعات مرت عليها كلها
تفكير وهي بقمة هدوئها يقطع عليها هالهدوء بأوقات اتصالات
ياسر اللي تتجاهلها ... على الساعة 11 وربع تقريبا اتصلت
فيها بشاير وقالت لها انها وصلت قريب منها ....وعرفت
وصف الشقة وراحت لها ..فتحت لها الجوهرة وهي مستانسة
بشوفتها اول مرة احد يزورها : هلا والله يالله حيها
بشاير: الله يحييج ياقلبي
الجوهرة : تفضلي ارتاحي
بشاير: زاد فضلج
قعدتها وضيفتها وخذتهم السوالف وكأنهم يعرفون بعض من
زمان ....
بشاير: ريلج بشغله؟
الجوهرة: لا يدرس
بشاير: متى ييي؟
الجوهرة: آآآهــ وش اقول لك بس.. انا ساكنة بهالشقة لحالي
وزوجي ساكن بالشقة اللي قبالي
بشاير: وليش مقعدج بروحج؟
الجوهرة: سالفة طويلة.... وحكت لبشاير كل شي صار معاها
من تزوجت ياسر الى اللي صار امس...
بشاير: تبين رايي بصراحة وبدون زعل؟
الجوهرة: اكيد
بشاير: يعني ماراح تاخذينه بخاطرج؟
الجوهرة: والله ماراح ازعل قولي
بشاير: ردة فعلج سلبية ليش ساكتة عن حقج.. لو استمريتي
جذي بيستعبدج...اذا مو عاجبج الوضع طلبي الطلاق
الجوهرة: لا الا الطلاق مابيه
بشاير: تحبينه؟
الجوهرة: مو كله حب.. بس حاجة .. انا بلحظة حسيت اني
وصلت لسن العنوسة ومحد يبيني والشخص الوحيد اللي
تقدم لي ياسر ... شلون لا تطلقت؟ اكيد محد يبيني..!!
بشاير: انزين... بس لا تسكتين عن حقج
الجوهرة: وش تبيني اسوي يعني.. وانا لحالي بهالديرة
بشاير: انتي مو بروحج الله معاج وهذا ظالمج ... ادعي الله
ماراح يخيبج
الجوهرة: اللي قاهرني اني حبيته ... رغم اللي يصير منه
ليش احبه مادري
بشاير: علقيه فيج.. خليه يحبج وبعدها علميه درسه صح
ذوقيه نفس اللي ذوقج
الجوهرة: شلون يعني؟
بشاير: انا اعلمج شلون...
افكار وتخطيطات كلها من بشاير للجوهرة تبيها تاخذ حقها
وماتتنازل بسهولة... الجوهرة حست بالقوة وببالها هي
كانت محتاجة من يشجعها .. وراح تنتقم لنفسها من ياسر
وراح يشوف نتيجة افعاله ... والايام الجاية راح تشهد حرب
ضروس بين هالاثنين.... والله يستر
***************************
جاها الدكتور وتطمن على حالة فارس... والحمدلله
انخفضت درجة حرارته .. طلبها تنتظر ساعتين يشوفون
حرارته آخر مرة وبعدها يكتبون له خروج ...تطمنت
وشكرت ربها ... وانتظرت متى يجي لها الدكتور مرة
ثانية تبي تروح للبيت ترتاح ...في هالاثناءجاها ناصر يبي
يتطمن عليهم ويشوف وش محتاجة..
ناصر: السلام عليكم
ندى: وعليكم السلام
ناصر: شلونك؟ وشلون فارس
ندى: بخير... وقامت تغطي فارس
ناصر: عساك ارتحتي الحين؟
ندى: الحمدلله
ناصر: ندى
ندى التفتت له بدون ماتتكلم
ناصر:زعلانة؟
ندى: ناصر مو وقت هالكلام الحين..انا ماعرفت النوم
طول الليل ..واللي بقلبي عليك بقوله لك لاتخاف بس
مو الحين
ناصر: ندى مو كل سالفة تكبرينها
ندى:انا اكبرها؟ مو ملاحظ انا من تزوجنا وانا سبب الزعل
وسبب المشاكل وانت اللي منزه عن الخطا وماتجي منك زلة
ناصر: انا ماقلت كذا
ندى: مايحتاج تقول شي .. عمرك ما اعترفت بخطاك وحتى
لو حاولت تعدل من نفسك يوم يومين وترجع بغلط اكبر من
اول.. ناصر احنا الحين بالمستشفى .. صدقني مو وقت نقاش
بس والله وهذاني حلفت كل شي راح يتغير .. وانت بتشوف..
سكت ناصر وماعلق ..اكثر من مرة تقول له هالكلام ندى بس
مايدري ليش هالمرة يحس انها صادقة بكلامها وماراح تعدي
له غلطاته ....
قعد معاها بنفس الغرفة وكأنهم اغراب ... لا كلام ولا سوالف
حتى المشاعر يحس انها باردة مثل الصقيع ...
يتأملها ويشوف بعيونها خوفها على فارس... هو يحبها يموت
عليها ... بس اوقات تصرفاته انانية .. تفكير بشخصه هو بس
بدون مايحسب حساب لمشاعرها ...
قام وهو يناظرها وطلع بدون مايتكلم ...راح شرى لها فطور
ورجع : ندى
ندى: هلا
مد لها الكيس : خوذي افطري
ندى: مو مشتهية
ناصر: بس انتي ما كليتي من امس
ندى:قلت لك مو مشتهية خلاص
ناصر تنرفز منها:تبين تعاقبيني اوكي بس مو على حساب
نفسك
ندى: لاتكذب وتقول اني اهمك لاني ماراح اصدقك...ناصر
واللي يرحم والديك مالي خلق اتكلم ابي ارتاااااااح
ناصر: وجودي يعني يضايقك؟
ندى: كلامك اللي يضايقني
ناصر: وش اللي تغير ياندى؟ ماتعودتك بهالقسوة
ندى: انت اللي اجبرتني ... وسكتو اول ماشافو الممرضة
داخلة تقيس حرارة فارس...: لا الحمدلله دلوئتي بئى كويس
ندى: يعني بيطلع اليوم؟
الممرضة: ان شاء الله ... نص ساعة كدا ويجي الدكتور
يشوفه
ارتاحت ندى .. ان ولدها صار بخير ... وانتظرت الدكتور
اللي جا ووصف لها خافض للحرارة ... ونصحها تهتم فيه
وماتعرضه لأي تغيرات في الجو ممكن تأثر عليه ..كتب
لفارس خروج ... لمت اغراضها وشالت ولدها طالعة من
المستشفى ومشت هي وناصر للبيت صلت الظهر ونامت ..
******************************
حياة روتينية ... الاجازة انتهت ... واللي عنده دراسة
رجع لدراسته ... واللي خذو اجازة رجعو لوظايفهم ...
وهذي صور مقتطفة من حياة ابطالنا
- فهد وعبير حياة مستقرة كلها حب واندفاع لمرحلة جديدة
من العمر يسعون انهم يستمرون فيها بنجاح... يعيشون
هالحياة بكل شوق وعشق وغرام نابع من قلوب صادقة
يملاها الحب ومايعكر صفو هالعلاقة اي شائب...
- بندر واريج حياة هادية يجمعهم حب كبييير وخبال اكبر
يعيشون حياتهم بكل براءة وعذوبة بعيد عن قسوة قلوب
البشر .. واللي يؤرق اريج بهالفترة سالفة الحمل وخوفها
انه يتأخر وهالشي ممكن يتعب نفسيتها وممكن بعد تصير
بينهم مشاكل ...
- سعود وفاتن تغيرت حياتهم للأفضل وسعود صار يميل
لفاتن اكثر من زوجته الثانية ويحاول يرضيها بأي طريقة
وهالشي ارضى غرور فاتن خصوصا انها تشوف سعود
العاشق رجع لها مثل اول ...
- خالد وشهد علاقة متذبذبة ... اوقات يكونون بقمة الحب
والرومانسية واوقات شهد تتضايق من تضييق خالد عليها
خصوصا ان غيرته شديدة وحبه لها حب تملكي نوعا ما
وهي تبيه يحبها بس بدون مايحرمها من الناس واهلها,,
ومازالو في وسط معمعة هالصراع....
- ناصر وندى علاااقة اقرب ماتكون للصقيع ... برود
تام من ندى تجاه ناصر وتعامله وكأنه مو موجود او
كأنه شخص ماله اعتبار عندها ..تجاهل تام وتطنيش
الا في حقوقها الزوجية اللي تلبيها له على اتم وجه..
- ياسر والجوهرة حروب طاحنة بين الطرفين ...اوقات
تكون الغلبة فيها للجوهرة ... واوقات لياسر بس مازال
على وعده اللي قطعه على نفسه انه مستحيل يأذيها او
يسوي اي شي يكدر خاطرها وهي رضت بهالشي بشرط
انه مايتدخل بحياتها ابد ويترك لها مطلق الحرية تتصرف
مثل ماتبي وهالشي اعترض عليه ياسر في البداية بس
يوم خيرته بين هالشي والطلاق رضى بكلامها كله ...
- تركي وغادة علاقة من اروع ماتكون ... حب محفوف
باحترام متبادل ,,, صدق يغلف علاقتهم مشاركة بين
شريكين فعلا يتقاسمون كل امور الحياة ...ويزين حياتهم
وجود ريم ومحمد ... وتوقعات هالايام باحتمالية طفل
ثالث في الطريق ...
ومازال للأحداث بقية.....
**************************
توها راجعة من الكلية محاضراتها اليوم مخلصة بدري
شافت ام فهد قاعدة بالصالة وتطالع برنامج بالتلفزيون
راحت لها وسلمت عليها وحبت راسها .:كيفك خالتي؟
ام فهد: والله اني بخير يابنيتي بس احس بخمول مدري
وش منه
عبير: يمكن السكر منخفض عندك
ام فهد: مدري والله
عبير: فطرتي اليوم تمام؟
ام فهد:كليت شوي بس ماش النفس ماتودي
عبير: ياخالة الله يرضى عليك لازم تنتبهين لنفسك انتي
عارفة السكر والضغط لازم تنتبهي لهم ولا ممكن يأثر
على صحتك
ام فهد: ماشاء الله عليتس يابنيتي تحتسين مثل الدكاترة
عبير: هههههههه هذا الكلام الكل يعرفه... طيب اجيب
لك اي حاجة تصبرين نفسك فيها قبل الغدى؟
ام فهد: جيبي لي فاكهة .. غيره ما ابي
عبير: طيب..وراحت المطبخ:سنتيا ماما وش اكلت اليوم؟
سنتيا: انا احط فطور هي ماياكل
خذت عبير لها تفاحة وطلعت لها في الصالة قعدت تقطع
لها وتعطيها ...
ام فهد مرتاحة ومستانسة حيل مرة الغالي وماخاب ظنها
فيها من جت للبيت وهي تهتم فيها وتراعيها وان شاء الله
ماتتغير عليها
رجعت عبير للمطبخ لقت الشغالة تقطع الخضار:سنتيا
ايش تسوين؟
سنتيا: سوي سلطة
عبير: خلاص قومي كملي الغدى وانا اسوي السلطة
سنتيا: جين
قعدت تحوس بالسلطة وهي كل شوي تسأل الشغالة وش
تحط وشلون تزينها ,,,
بعد ماخلصت وحطتها بالثلاجة راحت خذت لها دش
سريع بدلت وتزينت ونزلت تحت ...
دقايق قليلة وفهد جاي من شاف اغلى ثنتين على قلبه
قاعدين بالصالة ابتسم من خاطره لهم .. جا وحب راس
امه.. وحب راس عبير بعد اللي استحت ودنقت راسها
وام فهد ابتسمت : الله يخليكم لبعض وانا امك
فهد: آمين يارب ..ادعي يمه انها تحبني وتصير مجنونة
فيني وتهذري باسمي عند الرايح والجاي
ام فهد: والله لو تجننت لتعرس عليها خل عنك النصب
عبير تضحك عليهم وفهد يطالعها وهو مبتسم:احد عنده
القمر ويبدله بنجوم
عبير راحت للمطبخ تفاديا للاحراج خصوصا ان ام فهد
مرة كبيرة وتنحرج منها كثير..
وفهد قام طالع لجناحه..:عبورة حطو الغدى ببدل ونازل
عبير طلعت له مع باب المطبخ مبتسمة: طيب لاتتأخر
بادلها الابتسامة وحرك شفايفه يقول لها احبك ..ضحكت
ورجعت للمطبخ تجهز الغدى مع الشغالة... دقايق وكان
كل شي جاهز على السفرة ..قعدو وسمو بالله يتغدون
فهد وهي يستهبل على عبير: ماشاء الله عبورة مسوية
هذا كله؟
عبير وهي تدري فيه يبي يحرجها مع امه:لا بس سويت
السلطة
فهد يحسبها تمزح: اي شاطرة كيف مسويتها؟
عبير: والله سويتها اسأل سنتيا
فهد: لا ماشاء الله مرتي سنعة تعرف للسلطة
ام فهد: والله وانا امك بنات هالزمن درب المطبخ مايدلونه
بس عاد انت اللي بتخليها تطبخ لك
عبير انحرررجت مرة وبنظرات تتوعد فهد: شوية شوية
وراح اعرف اسوي كل حاجة ... اول ماكنت حتى اروح
اشرب موية
ام فهد: بزمنا البنت تطبخ وتغسل وتنظف وماتخلي امها
تشتغل وهي قاعدة.. والام من اول اذا جت تخطب لولدها
تدور له المرة السنعة ... بس الحين الشغالات غيرو بناتنا
وصارت البنت تعرس وهي ماتعرف تسوي شي لرجلها
فهد ميت ضحك على عبير اللي وجهها صاير الوان: اي
يمه علميها
ام فهد ماحبت تحرج عبير اكثر: عبير سنعة واذا هي
تحبك وتقدرك بتسوي كل شي عشانك
كملو غداهم .. وطلعو عبير وفهد لجناحهم
فهد: ياعمري انتي ياحبي لك
عبير وهي رافعة حاجبها: لا والله؟ الحين تحبني وقبل
شوية مبسوط عليه
فهد يقرب منها: بتسوين زعلانة يعني؟ ترى كل هذا
لمصلحتك ابي تطبخي لي انتي ابي احس اني فعلا
اعرست مو نفس الاكل اللي قبل آكله للحين نفسه
عبير: طيب من عيوني
فهد: ياااااعمري انتي تسلم لي هالعيون وصاحبتها
عبير: يسلمك ربي..
******************************
توها مخلصة اتصال من المدرسة الخاصة اللي مقدمة فيها
من فترة ومن يوم السبت راح تروح تدرس فيها بدل قعدة
البيت اللي تطفش وتضيق الخلق...ومن وناستها اتصلت
على بندر تبشره: هلا حبيبي
بندر: هلا والله
اريج: مشغول؟
بندر: لا عادي مثل كل يوم ساعة شغل والاغلب سوالف
اريج: بندر اليوم كلموني بالمدرسة يبوني ابدا دوام السبت
بندر: والله؟ حلو ماشاء الله تونسين عمرك بدل قعدة البيت
اريج: اي والله وبهالمناسبة السعيدة اطلب تدلل وش تبي
على الغدى اليوم؟
بندر: ههههههههههه اي شي؟
اريج: انت اطلب وشوف
بندر: والله مشتهي كبسة
اريج: الحين كل هالتفكير وعلى بالي بتطلب شي صعب
وآخرتها كبسة؟
بندر: تعرفين سعودي مايشبعني غيرها
اريج: ابشر من عيوني.. كم بندر عندي
بندر:يازين الاخلاق والكلام ليت كل يوم يقبلونك بمدرسة
اريج: هههههههههههه ياويلك من الله وربي اني مدلعتك
بندر: ايييييه صادقة ذابحتني بهالدلال مو مخليتني احرك
شي
اريج: رجال مايملى عيونكم شي
بندر: شفتي على طول قلبت الاخلاق
اريج: هههههههههههههه يقطع سوالفك وخر بس بروح
اسوي لك كبسة
بندر: تكفين ضبطيها.. لا يجيني ملحها زايد
اريج: وربي اني عطيتك وجه ليتك يوم تتشرط لاشفت
شي ماعجبك ماتآكل ... لو مدري وش قدامك تآكله
بندر: ههههههههههههه لا تنظليني عاد الحمدلله ما اعاف
نعمة ربي
اريج:الله يزيدك ولا يضرك.. يلا بقوم اسوي الغدى
بندر: اوكي .. مع السلامة
وسكرت منه وقامت تسوي له كبسة على طلبه...خلصت
غداها وقصرت النار عليه شوي وراحت تتسبح
وهي نازلة على دخلة بندر اللي جآي مبسوط <<كعادته
ربي موسع صدره: هلا والله يالله حيها
اريج: هلا بك انت منور بيتك
بندر: بمووووت من الجوع وين الغدى؟
اريج: هههههههههه روح غسل يدك بالاول وربي تقول
بزر
بندر : زين
قعدو ع الغدى سوالف كالعادة ... اريج: تدري عاد
بندر رفع راسه وناظرها: وشو؟
اريج: حاسة اني حامل
بندر طير عيونه: والله؟ وش اللي حاسته
اريج: مادري كذا جاني هالاحساس وخاطري اروح بكرة
احلل واشوف
بندر: ليش ماتشوفين بجهاز كشف الحمل اول؟
اريج: مو كل مرة تكون النتيجة دقيقة ومابي ابني آمال
وتخيب ظنوني
بندر:زين بكرة استأذن من دوامي ان شاء الله ونروح
اريج: على خير يارب
بندر: ولو طلعتي حامل بنحتفل بهالمناسبة
اريج: ياااااارب ..بس شلون نحتفل؟
بندر: اللي تبين
اريج: اروح الشرقية من زمان مارحنا
بندر: ابشري اذا ربي كتب لك تحملين اوديك المكان اللي
تبين
اريج: يعني بس لاصرت حامل نروح؟ غيره ماتمشيني
بندر: افاااا رورو عمرك شفتيني مقصر معاك؟
اريج: لا حبيبي والله مايجي منك قصور بس حسيت اني
تحمست للروحة
بندر: اجل تمت ان شاء الله هالاربعاء ماشين للشرقية
وش تبين بعد؟
اريج: جعلك سالم يارب..الله لا يخليني منك
بندر: ولا منك يارب
*************************
من بكرة استأذن بندر من دوامه ومر على اريج رايحين
دخلو المستشفى وصادفت فاتن اللي طالعة من المستشفى
بعد ماخلصت مراجعتها
اريج: فتوون وش عندك هنا؟
فاتن: مراجعة انتي اللي وش عندك؟
اريج: بسوي تحليل
فاتن: حامل؟
اريج: مادري بسوي التحليل واشوف
فاتن: الله يكتب لك يارب
اريج: اللهم آمين ... شلون التوأم؟
فاتن: الحمدلله الحين الوضع احسن ..
اريج: يلا بروح اشوف التحليل ادعي لي
فاتن: الله يرزقك اللي تتمنين ...
وراحت اريج تشوف نتيجة التحليل,,, دقايق وبشرتها
الدكتورة ان النتيجة ايجابية
اريج: شلون يعني؟
الدكتورة: يعني حامل.. الف مبروك
اريج طارت من وناستها: الله يبارك فيك يارب
وصفت لها الدكتورة فيتامينات وعطتها مجموعة
نصايح وكتبت لها موعد تجيها فيه ...
بندر واريج حمدو ربهم اللي تمم عليهم فرحتهم بهالخبر
السعيد... طلعت من المستشفى وراحت بيت اهلها وهي
مستانسة ومبسوطة واخيرا تبدد خوفها وربي كتبها اللي
تمنته ... وصلت بيت اهلها وبشرت امها واهلها كلهم
والكل فرح لها ...
دخلت اريج عند فاتن: قولي لي مبروك
فاتن: الف مبروك... والله توني افكر فيك
اريج: فتون انتي تتوحمين؟
فاتن: مو مرة يعني خفيف اوقات احس اني ما اشتهي
الاكل ... بس اغلب عطوري كرهتهم
اريج: جد؟
فاتن: اي والله كل اللي شميتهم هالفترة كرهتهم
اريج: الله يعين يارب اصير مثل ندى وحمها خفيف
فاتن: ان شاء الله
اريج: نفسي بشوربة
فاتن: ههههههههه الناس تنسد نفسها وانتي تبين تاكلين
اريج تكش على وجه فاتن: قل اعوذ برب الفلق فعلا
لا قالو الرازق بالسما والحاسد بالارض
فاتن: وربي ما احسدك امزح
اريج: لا جبتي ولد وانا جبت بنت بنحجزهم لبعض
فاتن: وعععععع مابي بنتك... ولدي ماراح اخطب له
الا ازين بنت
اريج: من زينه عاد يوم تتشرطين
غادة: ههههههههههههههه من جدكم تتهاوشون وعيالكم
ما جو؟
فاتن: انا ادري عن هالخبلة
غادة: مبروك اروج
اريج: يبارك بعمرك .. قالت لك امي؟
غادة: ايه
فاتن: تخيلي تتوحم تبي شوربة
غادة: تستاهل بنت عبدالعزيز انا بنفسي اسويها لها
اريج قامت تحب غادة على خدها : بعد عمري والله
ياناس هالانسانة غير
فاتن: ابوك يالمصالح
اريج: لا وربي لو ماسوت شي اقولها كلمة حق وهي
تدري ودايم اقوله لها ..اصلا عمرك شفتي احد زعل
منها ولا عمرها غلطت على احد
فاتن: لا والله انها تنحط على الجرح يبرى
غادة: بس لاتزودونها بيكبر راسي
اريج: هههههههههههههههههه ياحبي لك
غادة: بقوم اسوي لكم شوربة
اريج: لا اقعدي خلي الشغالة تسويها
غادة: لا والله مايسويها غيري .... يمكن تدعو لي
واحمل انا بعد
فاتن: تبين تحملين؟
غادة: اخوك يبي
فاتن: الله يكتب لكم يارب
غادة: آمين ... وقامت رايحة للمطبخ
اريج: تتوقعين مرة ماجد بتصير بطيبة غادة؟
فاتن: والله مدري الا صح متى رايحين يخطبونها؟
اريج: علمي علمك بس هالاسبوعين مو اكثر
فاتن: يارب ان كان فيها خير تكتبها من نصيبه وان
كان فيها شر تصرفها عنه
اريج: اللهم آآمين يارب
قعدو كملو سوالف ... وجو سعود وبندر وتغدو الكل ببيت
ابو تركي .. وبعد العصر رجعت اريج لبيتها
******************************
هالأيام اوضاعها مستقرة ... ياسر مخليها على راحتها
تروح وتجي بدون مايتدخل فيها ...الجوهرة مستغربه
سكوته مع انه كان بالأول رافض رفض قاطع طلعاتها
وروحاتها من غيره ... بس هالفترة صايرة تطلع مع
بشاير كثير وتعرفت على اهلها وحتى المعهد اذا مامرتها
بشاير تروح مع السواق بس ياسر مستحيل,,, جياته لشقتها
كثرت بس اغلب الوقت مطنشته ...
توها راجعة من المعهد تسبحت وتكشخت ... وقعدت
بالصالة تعرف ياسر هذي حزته يجي ...وبالفعل بعد
حول الثلث ساعة جاها: السلام عليكم
الجوهرة: وعليكم السلام
قعد بدون مايتكلم وماتدري ليش حست انه في شي بخاطره
بس مو عارف يقوله...طنشته وقامت تجيب الكوفي...
مدت له الكوب وخذاه منها وهو يناظرها... وماقدرت تمنع
نفسها اكثر وماتسأل: وش اللي بخاطرك قوله
ياسر: ابي نرجع مثل اول
الجوهرة: مثل اول شلون؟ ترميني وتهينني؟
ياسر: انتي ليش مافي بالك لي الا هالصورة
الجوهرة: لاني بهالشقة وبهالبلد اي صورة ثانية تبيها تكون
في بالي؟
ياسر: زين وش اللي يخليك تغيرين هالصورة وانا من الحين
اسويه
الجوهرة: تطلقني
ياسر:قلت لك مليون مرة طلاق مانيب مطلق
الجوهرة: مو هذا كلامك لي اول ماتزوجنا وانا مو عاجبتني
هالحياة ولا ابيها ابي ارجع لبيت اهلي اكرم لي
ياسر: اول ماتزوجنا غير والحين غير
الجوهرة: وش اللي تغير؟ لا تقول انك حبيتني لاني ماراح
اصدقك
ياسر: مو مهم ليش تغير كلامي المهم اني ابيك
الجوهرة: لاتظن اني ما وراي احد تمشيني على كيفك
ترى كل خوفي على سمعتي .. ولا من زمان كان رميتك
اقدر باتصال واحد اخلي ابوي ولا اخوي يجون ياخذون
من هالهم اللي اعيشه وياك
ياسر: الجوهرة لا تختبرين صبري انتي زوجتي ومحد
بالدنيا يقدر ياخذك مني
الجوهرة استانست للي سمعته هي تبي هالشي من الاول
بس ماراح تمكنه من نفسها الا برغبتها ولا زم تسوي فيه
مثل ماسوا فيها ...دق جوالها وراحت ترد وعيون ياسر
تتبعها لوين ماراحت ,..
قعدت حول الساعة تكلم ورجعت شافته بعده موجود
والاكيد انه ينتظرها : مين كنتي تكلمين؟
الجوهرة: اهلي
ياسر: شلونهم؟
الجوهرة: بخير
سكتو اثنينهم وبعد تفكير طويل : ماقلتي لي وش رايك
بكلامي؟
الجوهرة: اي كلام؟
ياسر: ابي نرجع مثل اول
الجوهرة: ياسر انا قلت لك انا ماشفت معاك يوم حلو
عشان افكر ارجع لهاليوم بس..
ياسر: شلون تبيني اعاملك ويرضيك
الجوهرة: كذا انا راضية ومرتاحة
ياسر: بس انا مو مرتاح
الجوهرة: مو مهم ترتاح انت .. لانك اخترت هالطريق
من الاول وانا كيفت نفسي على اللي يرضيني ومرتاحة
فيه..
ياسر انقهر منها وقام قبل يعصب عليها ويتنرفز لانه
حلف لها عمره ماراح يغلط عليها .. رجع لشقته وهو
مولع نار منها ...
انتظر زوجته اللي كل يوم تتأخر وهو ساكت لها ,,,
بدل ملابسه وراح لها دوامها ... دورها بمكتبها مالقاها
سأل عنها قالو له طلعت من ساعة..
اتصل فيها وهو معصب: وينك ؟
جمانة: بالشغل خلاص دقايق وبكون عندك
ياسر: الحين اتركي كل اللي بيدك وتعالي..وسكر منها
راح للبيت وهو يهدد ويتوعد فيها ...
مجرد مادخل جات بعده بشوي مسكها من يدها بقوة
وسحبها لداخل الشقة: وين كنتي؟
جمانة وهي تتألم من مسكة يده: حبيبي قلتلك كنت بالشغل
ياسر ماسك فكها ويضغط عليه بقوة: انا رحت الشركة
وقالو لي طالعة من ساعة وين كنتي فيه؟ ومع مين طلعتي؟
جمانة انصعقت من كلامه: ياسر شيل ايدك مشان اعرف
احكي
ياسر بصراخ: وش تبين تقولين؟ بسرعة تكلمي قبل
اذبحك مكانك وين كنتي فيه؟
جمانة: طلعت اتعشا مع رفقاتي
ياسر وهو فاض فيه الكيل خلاص وصار يطقها بدون
مايحس بنفسه وبصراخ : انتي كذاااابة
وهي تصارخ من الالم .. واصواتهم واصلة عند الجوهرة
اللي خافت في البداية بس ماقدرت تستحمل اكثر ماتبي
ياسر يسوي شي ممكن يضره خصوصا انه في هالبلد كلهم
اغراب ومحد راح يرحمهم ومهما كان هو ولد خالتها ومايهون
عليها ... راحت ركض للشقة ومسكت ياسر تبعده عن جمانة
الجوهرة: ياسر تعوذ من الشيطان
ياسر بعده مو حاس في نفسه ..قربت الجوهرة ومسكت جمانة
وصار تبعدها عنه : ياسر اذكر الله
ياسر فك جمانة بعد ما استوعب الموقف : الجوهرة وخري
عنها باذبحها ...
الجوهرة سحبت جمانة اللي الدم ينزف من فمها وخشمها
وودتها غرفتها: قومي غسلي وجهك وغيري ملابسك
ورجعت لياسر: انت هدي نفسك وكل شي
بالتفاهم يصير
ياسر: اي تفاهم وهي تطلع من وراي؟؟
الجوهرة: يمكن انت ظالمها .. ليش ماسمعتها
ياسر تفاجأ من كلام الجوهرة: انتي تدافعين عنها؟
الجوهرة: انا ما ادافع عن احد ... انا ابيك تحذر الظلم
اسمع بالاول قبل تتصرف ..وطلعت من عنده راجعة لشقتها
قعد مكانه مصدوم من هاللي صار كله ...
حياته كلها ملخبطة ... من دخلت الجوهرة حياته وكل شي
تغير .. هو صحيح متزوج من كم سنة جمانة بس عمره
ماحس نفسه متزوج ماتهتم فيه ولا تراعيه اغلب وقتها مشغولة
عنه... ومع كذا يحبها ومعطيها كل حقوقها ...
والجوهرة اللي من تزوجته ماصار لها الا كم شهر بس عمره
ماطلب منها شي مالبته وكل ماجا لقاها تستقبله حتى ولو هي
زعلانة منه ... لهالدرجة الحب اعمى؟؟ ماتشوف عيوب
اللي تحب... بس ليش الحين بشوف عيوب جمانة؟ معقولة
يكون حب الجوهرة... ولا مجرد المقارنة بين الثنتين وضحت
له الفروق الشاسعة بينهم ...
شاف الفرق بين الطهر والعفة والصدق والطيبة والاحترام...
اللي شافهم في الجوهرة... وبين الكذب والخداع والسفور اللي
من عرف جمانة وهو يشوفهم فيها ...
راح لشقته الثانية وشاف الجوهرة لابسة بيجامتها وترتب الشقة
قبل لا تنام...
ياسر: الجوهرة
الجوهرة: هلا
ياسر: ليش تسوين معاي كذا؟
الجوهرة: وش مسوية انا؟
ياسر: ليش احس انك تعاقبيني
الجوهرة: وانت غلطت عشان اعاقبك
ياسر: وجودي بحياتك كله غلط
الجوهرة: وجودك بحياتي مقدر من رب العالمين وانا راضيه
بالقدر
ياسر: وربي تعباااااااان وضايع ولا ادري وش اسوي بحياتي
احس همومي اكبر من عمري ...
الجوهرة: اذكر ربك ... وصدقني بحياتك انت محتاج لقرار
ولازم تملك شجاعة انك تتخذ هالقرار...
قالت هالكلام وماتدري اذا هو فهم عليها او لا ...
ياسر: انا طالع تبين شي؟
الجوهرة ودها تصرخ وتقول ابيك انت ...
(( مابي جرح..
ولابي خوف ..
ولا احزان..
ابي موقف ..
ابي كلمة ..تهز اوطان
دخيل الله..ابي انسان
ابي انسان
واذا في يوم انا ناديت
يحس فيني قبل لا اشكي
يواسيني قبل لا ابكي
ومن قلبه اذا حنيت
الاقي بداخله احضان
دخيل الله ابي انسان
ابي انسان ))
الجوهرة: سلامتك بس
وطلع من عندها وهمومه تسبقه ومن قلب تدعي له ربي
يسهل اموره ...
*************************
قررو يطلعو اليوم الشرقية ... واتفق بندر مع خالد
وفهد يطلعون معاهم ..مشو من بدري الجو بعده فيه
حرارة هالايام .. بس اخف من ايام الصيف الحارة
خذو لهم شاليهين جنب بعضهم .. نزلو وهم مستانسين
من زمان ما اجتمعو مع بعض .. يمكن من تزوجو وكل
واحد فيهم له حياته ,,ولا قبل كانو دايم مع بعض طلعاتهم
وروحاتهم وجياتهم .. ولازم يتقابلون كل يوم بالذات خالد
وفهد اللي كانو مايفترقون ابد..
خالد: اليوم نبي نشوي ..
فهد: خل الشوي علينا وباقي التجهيزات على البنات
اريج اللي ماخذة راحتها كل الثلاث ماتغطي عليهم: كان
خليتوها بكرة اليوم نريح
بندر: هي كلها يومين .. وبعدين قلنا البنات مو انتي ...
اريج: ليش ان شاء الله شايفني ولد؟
بندر: لا انتي حامل ومابيك تتعبين
فهد يطق بندر: اقول وخر انت والخبلة هذي اذا ما اشتغلت
مرتك مرتي بعد ماراح تشتغل
خالد: الحمدلله والشكر بيشتغلون غصب عليهم مو برضاهم
بعد
اريج: ههههههههه احنا ماتكلمنا هم اللي تكلمو وقالو بروح
للبنات واشاورهم ...
رجعت اريج للبنات وقالت لهم واتفقو بعد صلاة العشا
يقومون يجهزون السلطات والمقبلات ..
بعد ماصلو العشا .. فرشو لهم جنب البحر وقعدو سوالف
وشوي .. خالد طبعا اللي كان مسئول عن الشوي
بندر واريج يحارشون الكل وانواع الخبال ...عبير وشهد
طاقينها سوالف واحيان شهد تقوم تساعد خالد وتقرب له
الدجاج المتبل ...
اما عبير وفهد يكتفون بمساعدات بسيطة .. هي بطبعها
ماتعودت تشتغل كثير ..والاخ نفسها دايم معتمد على غيره
وكل ماقال له خالد شي ذله انه خاله ولازم يحترمه
اريج: خلود خل شهد بحالها شوف الدجاج وربي بناكله
اليوم محروق
شهد انحرجت ورجعت قعدت جنب عبير ..
خالد: مركز والله مركز ... اصلا انا اتبع احساسي متى
ماحسيت انه استوت قلبتها..
بندر: والله ماعندك الا الهياط خل احساسك على جنب
وانتبه ترانا ميتين جوع
خالد: لا تخليني احلف الحين انكم ماتاكلون منه شي
فهد: لا تكفى احلف واللي يرحم والديك
خالد: ههههههههههههه ياخي لا تحرجني خلني اسوي
شخصية قدام زوجتي شوي
عبير تكلم اريج: عارفة اروج
اريج: وشو؟
عبير: نفسي بعد العشا بآيس كريم
اريج: اي والله بس ماجبنا حسافة
شهد: اصلا اذا اكلتو وشبعتو بتنسونه
عبير: انا قصدي واحنا سهرانين ....
فهد: تبين اقوم اجيب الحين؟
عبير تفاجأت انه سامعهم : والله؟
فهد: ايه بس قومي معاي
اريج: لاااا غش غش محد يطلع من هنا يا كلنا نطلع
ولا بس واحد اللي يروح .. اما غراميات من ورانا معصي
فهد: وليش ان شاء الله تبين تحكمينا؟
اريج: لا بس احنا اللي مقترحين عليكم هالطلعة عاد انتو
لازم تحترمون قوانينا..
خالد: ابوك يالذلة .. وانتي بتقعدين تمنين علينا يعني؟
بندر: هههههههههههههههههه ياخي خلها تستانس
خالد: ياخي تستانس بس مو تنكد علينا
اريج: افاااا خلود ماعاش من ينكد عليك
فهد: اخلصو الحين علي احد بيقوم معاي ؟... قالها وهو
يناظر بعبير
اريج: كسرتو خاطري روحو بس ياويلكم لو تأخرتو اكثر
من نص ساعة.. وجيبوه كثير تراي حامل يعني يمكن
اشتهي آكله بأي وقت
فهد: واحد قال لك اني مسئول عنك؟
اريج: لا ادري فيك تحبني وماترفض لي طلب
فهد: ههههههههههههههههههههه بندر اسألك بالله هذي شلون
تقول لها لا؟
بندر : صاحي انت ؟ لو قلت لها لا بتبيتني برا البيت
الكل ضحك واريج تناظر بندر بتهديد: ياويلك من الله يالظالم
انا ماراح اتكلم .. حقي عند اللي الحق عنده مايضيع
بندر: افااا زعلت الغالية .. ترى الدعوة مزوح
اريج مبتسمة: زين
خالد: احس سكوتها وراه مصيبة
اريج: ههههههههههههه دايم ظالميني.. وتناظر بفهد: روحو
ياكناري الحب العشا بيجهز وانتو مارحتو
راحو فهد وعبير متوجهين للسيارة
ركبو السيارة ومسك فهد يد عبير: ياحبي لك والله
عبير ابتسمت: ريحتي كلها شوي
فهد: ههههههههههه عادي انتي بالسيارة انا اللي بنزل واشتري
الحين
عبير: مادام انت اللي بتنزل ليش ماخذني؟
فهد: وحشتيني
عبير: طيب انا طول الوقت معاك
فهد: بس في ناس وانا ابيك لحالك
عبير: مالنا الا ساعتين ونص من يوم وصلنا
فهد: وتظنين اني ما اشتاق؟
عبير نزلت راسها مستحية من كلامه
فهد: للحين تستحين مني؟
عبير: لا عادي
فهد: والله انك تموتين حيا مكانك بس لا تسوين قوية
عبير: ههههههههههههههههههه وتأشر له على يساره: شوف
باسكن روبنز
اخذ الريتيرن فهد ورجع له ..: تبين تنزلين؟
عبير: ايوا
نزلو واختارو لهم من كذا نوع ومشو راجعين للشاليه ..
لقو العشا خلاص جاهز وقاعدين يجهزون السفرة
اريج: بندر بعدو شوي عشان ناخذ راحتنا
بندر: يابنت الحلال بعطيكم ظهري يعني مانيب شايف احد
اريج: اي بس بعد بعدو شوي
سحبو العيال فرشتهم بعيد شوي ..حطو عشاهم وتعشو ...
وبعدها قعدو يشربون الشاهي... وسوالف لآخر الليل
فهد: عبير جيبي الآيس كريم للي يبي
بندر: كلنا نبي
فهد: انت ومرتك مايحتاج اسأل معروف ماتفوتون شي
24 ساعة تبلعون
خالد: هههههههههههههههه وربي انك صادق
بندر: استغفر الله سديتو نفس الواحد خلاص مابي
اريج: هههههههههههه لا تسوي حساس اعرفك ماتفرط
خذ كل شي بروح رياضية
فهد: خالد تتوقع يجيهم طفل دب؟
خالد: مايبي لها كلام شوف ابوه وامه وتلقى الجواب
عبير: حرام عليكم
اريج: ماعلي فيهم انا زايد وزني لان بداخلي طفل
فهد: هههههههههههههه توك باول شهر يعني وش يزيد
خالد: ياخي خلها ترقع
عبير قامت وجابت لهم على عددهم .. وحطتهم ومدت
لفهد وبعدها لشهد والباقين خذو لهم
خالد: الله لنا بس الدلع كله لفهد ولا احنا ناخذ ولا عمرنا
ما اخذنا
عبير استحت من كلامه: لا مو كذا بس هو قريب مني
خالد: اي يعرف يمد يده مثلنا
فهد: ياخي خلها بكيفها تسوي اللي تبي ... بعد الحلال
حلال ابونا والقوم شاركونا
خالد: واحد يمن على الطلعة والثاني يمن على اللي جابه
ياشيخ الشره مو عليكم على اللي يزيد يطلع معاكم
بندر: ههههههههههههه تحس انك مهان صح؟
خالد: قسم بالله ذليتونا
قعدو طول الليل يسولفون ... وصلو الفجر وكلن توجه
لفراشه يبي ينام ... طبعا كل واحد بغرفة مع زوجته ..
خالد وشهد وفهد وعبير بشاليه واحد .. وبندر واريج
بالشاليه الثاني...
فهد: تعالي نتفرج على شروق الشمس على البحر وعقب
ننام
عبير: انت مثلي تحبه؟
فهد: انا لانك تحبينه احبه
عبير استغربت: بس ما اذكر اني قلت لك
فهد: اشياء عرفتها عنك قبل تقولينها لي
عبير ابتسمت: وكيف عرفت؟
فهد : بطريقتي
قعدو على البحر وبداخلها فضول تبي تعرف: حبيبي
فهد: عيونه
عبير: قول لي كيف؟
فهد: قلت لك بطريقتي
عبير: فهووود عشان خاطري
فهد: بوسيني بالاول
عبير قربت منه وباست خده وهو ابتسم لها : تذكرين
اول مرة جيتو هنا؟
عبير: امممم مادري
فهد: اول ماجيتي للرياض ... طلعنا كلنا للشرقية
عبير تذكرت: ايوااا
فهد: كنت اشوفك كل يوم تطلعين هالحزة وتقعدين على
البحر.. مرة انتي واريج ومرة كنتي لحالك؟
عبير: كنت تشوفني؟
فهد: ايه
عبير شهقت: من فين؟
فهد: من الشاليه
عبير: ومن سمح لك تشوفني؟
فهد: قلت لك معاك انتي كل شي يصير بدون تفكير مني
مدري شلون اتصرف ,, احس نفسي ارجع طفل من اول
عبير: بس مو مبرر
فهد: انتي الحين زوجتي
عبير: بس مو حلو تسمح لنفسك تشوف ناس انت مو محرم
لهم
فهد: علمي قلبي اللي مادري شلون لا شافك يضيع
عبير: كنت وقتها تحبني؟
فهد: بوقتها لو سألتيني بقول لك مادري وش هو احساسي
بالضبط ...بس كنت ابي اشوفك .. ابي اي شي يقربني
منك
عبير: يعني كنت تحبني؟
فهد:بعدين عرفت اني مجنون فيك مو بس احبك ..
عبير: كنت احس من نظراتك انه في حاجة تبغى تقولها
لي
فهد: والله العظيم كنت ادري ان عيوني فاضحتني .. والدليل
خالد واريج عرفو من وقتها وهددوني ابعد عنك
عبير تفاجأت من هالكلام اللي لاول مرة تعرفه : تبعد عني؟
فهد: ايه ... يقولون اذا تبيها اطلبها من ابوي
عبير: ومو ندمان؟
فهد: وش عليه؟
عبير: انك اخترتني
فهد: مستحيل اندم .. انا كل يوم عن الثاني اشوف فيك اشياء
كنت اجهلها بس اكتشفتها وحببتني فيك وزادت غلاك بقلبي
عبير: الله يخليك ليه يارب
فهد: ويخليك لي ولا يحرمني منك طول العمر..قومي الشمس
صارت حارة
عبير: يلااا
مسكها فهد من يدها وقامو متوجهين لغرفتهم ... يجمعهم حب
كبر هالدنيا واكبر... يومين مرت عليهم بالشرقية كانت كلها
وناسة وسعة صدر..
يوم الجمعة بعد المغرب .. مشو راجعين للرياض .. كلن رجع
لحياته وبيته وروتينه ...
*
*
*
*
*
انتهى الجزء التاسع عشر
اعذرووووني على التأخير وان شاء الله هالبارت يرقى لذائقتكم
لعيونكم اعذب الود
•غٌـمـوضٌ ـآٍْاْلٍْــورد•
|
22-07-09, 08:52 PM
جديد مواضيع قسم القصص المكتملة (بدون ردود)
العرض العادي
