كاتب الموضوع :
غموض الورد
المنتدى :
القصص المكتملة (بدون ردود)
الجزء الخامس عشر
*
*
*
*
*
في الحب تخذلنا الكلمات
وتظل عاجزة عن التعبير بما يختلج دواخلنا
لا لن اقول لك احبك
لن ارددها على مسمعك
فحبك ليس مجرد كلمات
وعشقك يسمو على كل العبارات
حبك يجري بشرياني مجرى الدم
احبك بعدد قطرات الندى
احبك بعدد آآآهـــــاتــي واوجاعي
احبك ازفها لك صدقاً ووفاءاً
ابعثر عمري وطناً لعينيك
واهبك روحي وقلبي وكياني
احبك حباً عذرياً نقياً صافياً لايعترف بلغة التلامس
فهو اطهر وانقى واعذب واصدق
بل يرتقي الى اعلى مستويات العشق
ليبقى مابيننا عشق الــعــيــون
احبك حبيبي بكل عبارات العشق والهوى
احبك بعدد اوراق الخريف
ونجوم السمـــاء
احبك من الآن وبلا انتــهــاء
احبك انت فقط
احبك انت فقط
احبك انت فقط
بعد شهرين مرت على ابطال قصتي ...تم زواج خالد
على شهد.. وسط حضور الاحباب والأقارب ...وغياب
عائلة عمها اللي معترضين على هالزواج شكلا ومضمونا
بليلة كانت من اجمل الليالي جمعت احلى عروسين
توجهو بعدها لفرنسا لقضاء شهر العسل هناك .....
واللي راح يقعدون فيها اسبوعين بس بحكم دراسة شهد
علاقتهم مبنية على الحب والاحترام .. خالد بطبعه حنون
والكل يحبه ... وشهد تقريبا نفس الشي حبوبة وطيبة
وماعمرها زعلت احد منها ...
خالد تعلق فيها بدرجة كبيرة ... وكان يتردد خوف بداخله
انه يفقدها .....مايدري ليش دايم يجيه هالشعور...
صاحين الصباح بدري ... الجو هالأيام بباريس ولا اروع
خالد: خلصتي؟
شهد: اي هذاني مخلصة
خالد: البسي ثقيل يمكن الجو بارد برا
شهد: ايه لبسي اوكي
مسك ايدها وطلعو من جناحهم ... ركبو اللفت نازلين
يفطرون ...
خالد: تبين نفطر هنا؟ ولا نروح كوفي
شهد: اممممم اللي تبي
خالد: اللي تبين انتي
شهد: زين نطلع كوفي احسن
طلعو من الفندق وقعدو يتمشون ... الجو فيه نوع من البرودة
لكن الدفء اللي في مشاعرهم ... يمحي اي برودة
خالد: يممم ريحة الكوفي تنعش
قعدو على احدى طاولات الكوفي .....وماهي الا ثواني والويتر
جاي لهم بالمنيو.. طلبو لهم كرواسون واسبريسسو ...
خالد وهو يناظر بعيون شهد :لبى عيونك ولبى الخد والشفه
وخشيمك اللي على صغره برى حالي
جيتك بثوب الغلا والحب والعفه
مشتاقلك واللي فبالك ترى فبالي
تقول لاشفت زولي صابتك خفه
انا ليا شفت زولك جاني اهبالي
شهد: ههههههههههههههه صح لسانك
خالد: هذا حلاك خلاني اتهور واقول شعر
شهد: تبي تنصب علي يعني وتقول انت اللي كاتبه
خالد: لا والله ما اقدر انصب كاشفتني
شهد: هههههههههههه ايه احسن عشان ماتسول لك نفسك
تلعب من وراي
خالد: افا شهودة تهقينها مني
شهد استحت وعضت شفتها خجل : لا
خالد: انتي تعرفيني صريح وماعندي لف ولا دوران واللي
بقلبي على لساني
شهد ابتسمت له بدون ماتعلق...
خالد: ادري كنتي بتقولين هذا اللي محببني فيك بس ماعرفتي
شلون تصيغينها
شهد: هههههههههههههههههههه لا استحيت اقولها
خالد ابتسم لها: يابعد عمري انتي
كملو فطورهم وسوالفهم وغزلهم ... وطلعو بعدها متوجهين لبرج
ايفل اشهر معالم باريس السياحية...
طلعو البرج وتمتعو بمنظر باريس من اعلى قمة فيها ... منظر
المدينة كان رائع ... والأروع وجوه الناس اللي من مختلف
الجنسيات والبلدان .... والأجمل انك تكون مع اغلى واحب الناس
لقلبك ....شعور السعادة اللي يغمر القلب في حضور من تحب
ينسيك الوقت اللي يضيع في غمرة السعادة .... نزلو من البرج
متوجهين لشارع الشانزليزية ....وكل خطوتين شهد توقف تشتري
هدايا لاهلها وصديقاتها واهل زوجها ....
قاعدة تتأمل عدد من الميداليات التذكارية ... تبي تختار لكل وحدة
باللي تعرفه يناسب ذوقها ... وخالد من اول بس يناظرها وساكت
الين حس انه بدا يجوع ويبي ياكل
خالد: ماتحسين بالجوع؟
شهد: اممممم مادري شوي.. انت تبي تاكل؟
خالد: اي والله بموت من الجوع
شهد: زين ..ممكن بس اخذ هذي ونمشي؟
خالد بابتسامة تسحر:ابشري
شهد بادلته الابتسامة : شكرا
حاولت تستعجل شوي ... اختارت اللي عجبوها على عجل
شهد: يلا خلصت
شبك ايده في يدها ... وطلعو رايحين لأقرب مطعم يتغدون
وعسى ايامهم كلها سعادة ... والله لايغير عليهم
**********************************
توه جاي من الشركة ... اليوم انضغط بشغله خصوصا
بعد اعتماد ابوه الكلي عليه بالشغل ... وغياب خالد لظروف
زواجه ...دخل جناحه ... لقى زوجته تنتظره بابتسامتها
الحلوة اللي ترد الروح ... بادلها الابتسامة : السلام عليكم
غادة تقرب منه وتحبه على راسه : وعليكم السلام
تركي: الله لا يخليني منك يارب
غادة خذت شماغة منه : احط لك عشاك الحين؟
تركي وهو يفصخ ثوبه: لا سلمتي يالغالية مابي الا راحتك
اكلت بالشركة
غادة: وش ماكل يعني؟ .. ماراح ينفعك الا اكل البيت
تركي ابتسم لها وحبها على خدها : اذا من هاليدين الحلوة
بقول اني ابيه
غادة: مسوية صينية مكرونة يحبها قلبك ... بس انت تسبح
وتطلع تلقى عشاك جاهز
تركي: على امرك وش تبين بعد آمريني فيه.. انا كم غادة
عندي؟
غادة : ابي رضاك علي بس
تركي: الله يرضا عليك دنيا وآخرة
غادة : وياك يارب...ونزلت تجهز له عشاه ....
بعد دقايق ... طلع من الحمام ( وانتو بكرامة ) وراح لها
بصالة الجناح: ياطيب ريحة الأكل والله
غادة : جعله هني وعافية يارب
تركي: يعافيك ربي..بسم الله وابتدو عشاهم..
بعد العشا نزلت غادة تودي الصحون للمطبخ وسوت شاهي
لتركي وطلعت له ...صبت الشاهي ومدت له البيالة : سم
تركي وهو يطالع التلفزيون : غادة
غادة: لبيه
تركي : محمد الحين كم عمره؟
غادة : اربع سنوات ونص تقريبا
تركي : يعني كبر خلاص
غادة: اي بس ليش؟
تركي: ابي اخو او اخت لهم...
غادة: وانت تشاورني ولا متخذ قرارك؟
تركي: وش دعوة عاد... هالأمور كلها بيد خالقها .. واحنا
ناخذ بالاسباب
غادة: اي بس الجناح مثل ماتشوف انت مايحتمل اعداد اكثر
تركي: ولا يهمك ندبرها .... البيت كبير ومافيه احد واغلب
هالغرف فاضية ... الا اذا جو خواتي وغرفة عبير من راحت
لبيت ابوي الثاني وهي فاضية...
غادة: يعني شلون
تركي: غرفة عبير بزينها واضبطها وتصير لريم
غادة: زين ومحمد؟
تركي: الغرفة اللي على يمين الدرج .. نوسعها ونزينها له
وهالجناح يصير لي انا وانتي بس... وهالغرفتين اللي فيه
نخلي وحدة منهم للطفل الجديد اذا ربي كتب لنا
غادة: ابشر يا ابو محمد ... انا بروح للدكتورة .. وراح
اوقف الحبوب ... وان شاء الله ربي مايخيب رجانا
تركي: اللهم آمين يارب
**********************************
قاعدين ببيت ابو راشد ... من رجعت لسعود وهي
تتحاشى اي احتكاك مباشر بغلا ... وهالشي من حبها
لسعود وتفادي لأي مشاكل ممكن تصير لو تكلمت او
تشكت ... وفضلت انها تحتفظ بجروحها وآلامها بقلبها
تواسي نفسها بنفسها ....
ونظراتها كل شوي تروح لبدر ولد سعود تحبه من حبها
لابوه .... وتدعي ربي مايحرمها
تجمعو الكل على العشا ... وقعدت غلا جنب سعود ..
اما فاتن ففضلت تروح بالجهة المقابلة ... وعينها كل شوي
عليهم ....نظرات الكل لغلا .. واهتمامهم كلها لها ..
خصوصا انها توها بالشهر الأول حامل بمولودها الثاني
كلن يقرب لها ... وفاتن محد سأل عنها ...
اصعب شعور لما بلحظة تحس انك تملك الدنيا كلها
بيديك ... وفي لحظة ثانية يضيع كل شي من يدك وتحس
انك مهمش .. مالك اي قيمة ... وكل اللي يصير لاحول
لك فيه ولا قوة... وللأسف محد يحس بجراحك ولو اشتكيت
تكون انت الغلطان وغيرك هذي ابسط حقوقه..
دمعة لمعت بعينها ... والحزن اللي بالقلب فاض واستعمر
الجسد كله ... لمحها سعود وعوره قلبه عليها ... هو وعدها
ماراح يتغير شي بس للأسف خذلها ... وهي من رجعت له
ساكتة وما اشتكت ومو من عادة فاتن تسكت عن حقها ...
بس وش بيدها تقول او وش تسوي وهي بكل الحالات
خسرانة... قامت بكل هدوء وراحت تغسل ايديها ... وقام
وراها سعود.....اول ماشافته جاي وراها فضلت تروح
لجناحها .. رافضة اي محاولة للإحتكاك الحين لانها ماتبي
تنهار قدامه...
دخلت الجناح وسكرت على نفسها... رمت نفسها على
سريرها تبكي... من كثر الحسرة اللي بقلبها صاحت مثل
الطفل الصغير... دخل عليها سعود وشافها تبكي ... وصوت
نحيبها يقطع القلب.. قرب منها ومسح على راسها:فتون
عمري..! وماسمع منها جواب ... كل اللي يسمعه صياح
ونحيب ماحب يضغط عليها اكثر ...خلاها تطلع كل اللي
بقلبها عشان ترتاح ...
استوت بعدها قاعدة مسحت دموعها اللي على خدودها
وناظرته بكل اصرار: سعود طلعني بيت لحالي
سعود: شلون؟
فاتن: مابي اشوفها تعبت من اول اتحمل عشانك بس ماعاد
فيني احتمال اكثر .. اكرهها واكره شوفتها
سعود: حبيبتي انتي هدي اعصابك الحين .. ولا هديتي
نتفاهم انتي الحين مو في وعيك
فاتن قامت وهي متنرفزة: سعود انا مانيب مجنونة ماعاد لي
قعدة بهالبيت.. ياتطلعني ببيت لحالي او ارجع لبيت اهلي
سعود: فاتن انتي ما اعترضتي من الاول
فاتن: بس الحين انا معترضة ومابي اقعد بهالبيت دام اهلك
يفضلونها خلها هي تقعد معاهم
سعود: زين انتي ارتاحي وانا بعدين اتناقش معاك بهالموضوع
فاتن: سعود مانيب بزر عندك تسكتني بهالكلمتين ... انا ابي
قرارك الحين يا إيه او لا .. عشان اتخذ انا قراري
سعود: ولو قلت لا وش يصير؟
فاتن: بروح بيت اهلي ومن بكرة تجيني ورقتي
سعود: فاتن؟ وصلتيها للطلاق؟ هذا حبك لي
فاتن: سعود انت آخر واحد تتكلم عن الحب .. شوف انت
شلون تعاملني ..مابي اظلمك واقول تقسى علي بس بوجودها
انا ملغية عندك وعند اهلك .. وكأني قطعة ديكور بهالبيت
سعود: والله يافاتن اني احبك ومحد اغلى منك عندي
فاتن : سعود مابيك تحلف لي بشي وانا اشوف شي ثاني
تراي طول عمري اصدقك ... مابي يجي يوم واحسك كذاب
خل اللي لك بعيني مايتغير .. مابي تنمسح صورتك الحلوة
وماعاد القى شي يشفع لك
سعود انصدم من كلام فاتن .. وحس الجرح اللي بقلبها اكبر
من اللي كان يتصوره قرب منها وضمها لصدره بدون اي
اعتراض منها : ابشري ياقلبي مالك الا اللي يرضيك من
بكرة غلا تجي هالبيت وانتي تروحين الشقة
فاتن ابتعدت عنه: لا مابي شقتها... انا ما انام بفراشها
سعود تنهد من قلب: فاتن الله يهداك وش هالكلام
فاتن: سعود هذا آخر كلامي ... طلعني لبيت ثاني اما
شقتها هي مستحيل
سعود: طيب ماتشوفينها هي بيتجي بنفس جناحنا
فاتن: على بالك ماراح تطلبك تغيره؟
سعود: وانا وش يقدرني هالمصاريف كلها
فاتن: انت اللي جبتها لعمرك .. انزل لأهلك ووصل لهم
كلامي واذا تبيك تغير الجناح ..... بروح بيت اهلي
ولاخلصت من شقتي ارجع معاك
سعود: اشوف حلت لك الشغلة كل شوي رايحة بيت
اهلك ... فاتن ترى اذا شريتك مرة او مرتين ولا حتى عشر
فلأني احبك بس لا تظنين اني كل مرة راح اجي اركض
وراك... ولا تحاولين تمسكيني مع اليد اللي تعورني
( لـآِ تظنْ صَمتيْ عنْ جُروحكْ رضاإ .. !
وشْ يفيدْ البُوحْ لـآ منِيْ إنجَرحتْ ... ؟ )
فاتن: مايحتاج تجرح اكثر... وانت جرحك كل يوم بخاطري
وفر كلامك كله وروح تفاهم مع مرتك واهلك
سعود قام وهموم الدنيا كلها على راسه ... كان يعيش بجنة
مع الإنسانة اللي يحبها ... كان راضي باللي ربي قسمه له
بس اهله حدوه يتزوج .. ومن بعدها وهو عايش بصراع ومو
عارف يكسب رضى احد....
****************************
اليوم الخميس مجتمعين على الغدا .... بمجلس الحريم ...
ام ناصر وهي مبتسمة : باركو للجوهرة تمت خطبتها لياسر
ولد اختي
الكل بفرحة : مبروووووك
الجوهرة والخجل معتليها : يبارك بعماركم يارب
ام تركي: عساه مبارك يارب.. من متى هالكلام؟
ام ناصر : من اسبوع والله .. والبنت مالقت احسن من ولد
خالتها
ندى: بصراحة والنعم فيه ناصر يحبه كثير وعسى ربي
يوفقهم
ام ناصر: اللهم آمين
ام تركي: ومتى حددتو الملكة ؟
ام ناصر: والله ياسر يبي الملكة والعرس بيوم واحد ان شاء
الله بعد شهرين
اريج: اووووف ليش؟ على الأقل يتعرفون على بعض عشان
ماتصير بينهم مشاكل
ام ناصر: هذانا اول مانشوف العريس الا بليلة العرس
والحمدلله حياتنا مستمرة
اريج: اي بس الحين الجيل متفتح وتفكيره تغير
ام ناصر: والله هذي رغبة ياسر والجوهرة ما اعترضت
ام تركي: ماشاء الله .. وش وظيفته؟
ندى: يكمل دراسات عليا ببريطانيا ... باقي له 3 سنوات
ويتخرج
ام تركي: وراه مستعجل؟
تكلمت الجوهرة بعد ماكانت مستمعة طول الجلسة : هالسنة
دخل الـ30 واكيد لازم يتزوج
اريج: عمره 30 ويدرس؟
ندى: اي هو تخرج من الجامعة وتوظف 3 سنوات وعقب
سافر يكمل دراسات عليا وهالحين يحضر دكتوراه
ام عبير: بس كيف يصرف على الجوهرة؟
ام ناصر: الحمدلله ابوه عنده خير وهي بتصبر عليه ولا تخرج
بيعيشها مثل ماتبي واحسن
ام تركي: الله يوفقهم يارب ويجمع بينهم على خير
الكل: آمين
بعد الغدا طلعو البنات للصالة .... يبون يقعدون لحالهم
وياخذون راحتهم اكثر بالسوالف والكلام
عبير: مبرووووك جوجو والله تستاهلي كل خير
الجوهرة: يبارك بحياتك يارب
اريج: بصراحة تنازلتي كثير .. زواج بدون ملكة ... وبعد
توه يدرس... ومصروفه من ابوه ؟
الجوهرة: اريج خلينا نكون منطقيين انا عمري 27 سنة
تبيني بهالعمر اتشرط؟
اريج: ايه هذي عشرة عمر مو لعب عيال ... افرضي انه
مو كفو ... وش تستفيدين من هالعرس؟
الجوهرة: وليش افرض الأسوأ .. ان شاء الله فيه الخير
والبركة ... واذا تبين الحق ماشفت غيره وتكبرت ...
كل اللي بعمري اعرسو وعندهم عيال بعد ..
فاتن: اريج لا تضغطين عليها ... هي فكرت واقتنعت
اريج: انا اضغط عليها؟ هي تدري وش كثر غلاتها عندي
وربي من حبي لها اقول هالكلام ...اذا هي تنازلت من
الحين ... راح تتنازل اكثر مادامها مستعدة لهالشي..!!
الجوهرة: يعني لو كنتي مكاني وش راح يكون موقفك؟
اريج: تكون لي كلمة او قرار على الأقل ارفضي ان ابوه
يصرف عليه ... شخص بالثلاثين ابوه يصرف عليه؟
اشرطي عليه يشتغل اي وظيفة تمشي حاله بس تحسين
انك متزوجة شخص مسئول عنك ويصرف عليك
الجوهرة: مابي اشغله عن دراسته والوظيفة ممكن تعطله
ان شاء الله يخلص دراسته ونرجع واكيد ماراح يقصر معاي
عبير: خلاص اروج خليها على راحتها
اريج: انتو وش فيكم علي؟ الواحد لا قال كلمة الحق ماعجبتكم
الجوهرة: انا ماقلت هالكلام بس الموضوع بالنسبة لي منتهي
وانا قلت كلمتي وماراح اتراجع عنها
اريج: بصرك هذي حياتك وانتي حرة فيها وتراي ماتكلمت الا
من غلاتك
الجوهرة ابتسمت لها : ادري والله جعل ربي مايخليني منك
اريج ردت لها الابتسامة : اللهم آمين
مشاعل تمازح اريج : الحمدلله يارب بغيتي تخربين علينا
فرحتنا... محد يجي ويتقدم لنا كلن يقول شلون نخطب الصغيرة
والكبيرة للحين ما اعرست
الجوهرة بققت عيونها : طالعي النصابة .... ماشفت احد طق
الباب
اماني: ايه محد طق الباب بس في ناس لمحو واللي يردهم انك
للحين ما اعرستي
الجوهرة اللي حز بخاطرها كلام خواتها: وانا عمري ما اعترضت
طريق سعادتكم ..
عبير: والله الزواج نصيب ... والانسان متى ماجا نصيبه محد
يرده
ندى: اكيد ... اوقات تشوفين بنت حلوة بس كبرت وماتزوجت
واوقات ثانية ممكن تشوفين وحدة شينة بس من هي صغيرة
تزوجت
فاتن: اي والله الدعوة كلها نصيب ... وكل واحد بهالدنيا بياخذ
نصيبه ان كان عاجلا ولا آجلا...
الجوهرة: اهم شي ادعو لي الله يوفقني
الكل: الله يوفقك يارب
اريج: يعني الحين يالخايسة بتروحين بريطانيا وتخلينا .؟
ندى: انا وربي اللي بفقدها ... تعودت عليها لازم اشوفها كل
يوم ولا احس شي بالدنيا ناقص
اماني: ايه لدرجة انه اوقات نشك احنا مزوجينها ناصر ولا
الجوهرة
الكل مات ضحك وندى تحاول توضح موقفها: اي وربي انها
نور البيت يكفي اي احد يحتاجها يلاقيها ...وقلبها على كل
البيت
مشاعل تقرب من اختها وتحبها على خدها: اي وربي اني
راح افقدها فديت قلبها
قعدو البنات مستانسين بجلستهم لليل .. وبعدها الكل استأذن
رايح لبيته ..........
************************
قاعدة بجناحها تقرأ قرآن ... دخل عليها وابتسامته علت
وجهه ماحب يقاطعها ...دخل يتسبح واول ماطلع شافها
مجهزة له ملابسه وتنتظره قرب منها وحبها على جبينها
وهمس لها بشوق: وحشتيني
فاتن اللي تموت بترابه .. ومتحمله كل اللي يجيها عشانه
وعشان حبه اللي بقلبها: وش كثر؟
سعود: آآآآآهـ لو اقول اللي بقلبي مايوفي لك الشوق اللي
احسه...
فاتن: بعد عمري انت والله احبك
سعود استانس من كلامها وابتسم وهو يقلدها: وش كثر
فاتن: هههههههههههههههه تقلدني يعني؟ صدقني عمر الغلا ماينقاس
سعود ابتسم لها وراح يلبس ثوب النوم اللي مجهزته له فاتن
وسحبها طالعين من غرفة النوم ... قعدو بالصالة وعيونه
تتأملها : حبيبتي
فاتن: لبيه
سعود: مادري وش ابدا فيه بس كل اللي ابي اقوله اني ابيك
تتفهمين وضعي وتأكدي اني مستعد اسوي اي شي لرضاك
فاتن : قول كل اللي بخاطرك ياسعود
سعود:انا لقيت لك شقة قريب منها اكون انا قريب من اهلي
وانتي بعد مابي ابعدك عن اهلك ... الشقة صغيرة شوي
بس هي الوحيدة اللي تناسب ظروفي .. واحنا اثنين يعني
بتكون مناسبة لنا ...
فاتن: وانا راضية بهالشي
سعود: حلو ... بكرة ان شاء الله تروحين معاي تشوفينها
واتمنى انها تعجبك وتناسبك
فاتن: سعود لأني احبك مابي اضغط عليك ... صح انا
ابي راحتي بس بعد مابي اشقيك
سعود مسك ايدينها الثنتين وحبهم: يشهد علي ربي اني دوم
اقول انك اصيلة... وابيك تروحين لاهلك هالاسبوع على
الأقل لاني بنقل غرفة غلا هنا وابيع اثاث الشقة ونروح
نختار اثاث شقتنا بهالوقت... وغرفتك هذي راح انقلها
لشقتنا ولا تبين جديدة؟
فاتن: لا كذا انا راضية وماعندي اعتراض
سعود: والله يافتون اني اعشقك ... بس وش اقول غير الله
يعين ...( أنت تريد وأنا أريد والله يفعل مايريد )
فاتن: سعود اللي صار صار .. والكلام ماراح يفيد بشي
انا قلت اللي عندي مستعدة اضحي بأي شي الا هي مابي
اشوفها ... يكفيني اني احس انها تقاسمني الغلا بقلبك
سعود: مليون مرة قلت لك محد له بقلبي غلا كثر اللي لك
وانتي تعرفين سعود عمره ماكذب عليك
فاتن: الحمدلله على كل حال
ليلة مثل كل الليالي ... جزء من وجع ... ولهفة وحب ...
ومشاعر عارمة تعتري الصدور ... قد نبكي وقد نتوجع
... وقد يرهقنا القدر بواقع مر ... ولكن يبقى الأمل...
ويبقى لكل ليل صباح يمحيه ... ولكل هم فرح يلغيه
.. ولكل غم وكرب وضيق رب يفرجه...
*****************************
طالعة السوق مع خواتها يتقضون ...وتعبو من الفرة
بالمجمع ... قعدو شوي يريحون ..
ندى: اووووف والله تكسرت رجليني
اريج: اي والله ماعاد فيني تعببببببببت
عبير: سبحان الله انا مسحبيني معاكم وراضية وساكتة
بس لما جا دوري كل وحدة مسوية تعبانة..
ندى: ههههههههههههههههه لا والله انتي شايفة شلون
فروس متعبني
عبير: طيب تعالو البيت عندي...
ندى: انا اوكي ماعندي مانع ناصر عند اخوياه
اريج: عوايده مو جديدة عليه نويصر الخايس
ندى: وجععععععععع رجلي مالك شغل فيه
اريج: من زينه عاد .. خليني اتصل في حبيب قلبي
استأذنه واشاوره واكيد ماراح يرد لي طلب فديته
ندى تكش على وجه اريج .. وعبير بعدت شوي ترد
على فهد اللي هذي ثالث مرة يتصل فيها وتوها تنتبه
لاتصالاته: الو
فهد: هلا.. وينك فيه؟
عبير: وعليكم السلام
فهد: عبير مانيب رايق جاوبيني ...وينك فيه؟ وليش
من ساعة اتصل وماتردين
عبير استنكرت نبرته الجافة بس ردت بكل برود
اعصاب: انا في السوق
فهد بنبرة صوت اعلى : وليش ماتدرين علي؟
عبير والعبرة خانقتها: فهد والله ماسمعته وما انتبهت
لاتصالك الا الحين
فهد: وش اللي مشغلك يعني
عبير: الجوال في الشنطة وازعاج وماسمعته
فهد: من ساعة تو تشوفينه؟
عبير بخوف وتوتر : فهد لا تصارخ عليه
فهد انبه ضميره من سمع صوتها المهزوز: حبيبتي
عبير بدلع: هممممم
فهد: لا تاخذين على خاطرك مني ياقلبي بس والله
اشغلتيني عليك ..
عبير: طيب
فهد: عبورة
عبير: هلا
فهد: قولي انك سامحتيني
عبير: سامحتك
فهد: يابعد عمري انتي .. طيب ممكن اجي واشوفك
عبير: ههههههههههههههههههه لا مو ممكن
فهد: عبورة يالله عاد جد وينك فيه؟
عبير: لا مستحيل ... اصلا الحين طالعين ورايحة البيت
فهد: تتغلين علي عبورة؟ هين .. انتي تغلي وماتدرين الا
انا طاب عليك بس صبري علي
عبير: هههههههههههههه انا رايحة البيت الحين بعدين
نتفاهم .. يلا باي
فهد: باي
راحت وهي تضحك : هااااه اروج كلمتي بندر؟
اريج: اي وعشانا اليوم عندك
عبير: اكيد مايبغى لها كلام
طلعو من السوق وركبو السيارة متوجهين لبيت ابو
تركي الثاني ... الطريق زحمة والسوق بعيد عن البيت
ويبي لهم حول الساعة عشان يوصلون ...
ندى طلعت رضاعة فارس وصارت ترضعه . واريج
ماخذه الدنيا كالعادة خبال ووناسة واستهبال
عبير تضحك على حركات اريج وسوالفها ... شوي
ودق جوالها ... ضحكت من قلب يوم شافت المتصل
اللي يفز قلبها من تشوف اسمه ورقمه ...: الو
فهد: هلا وغلا بصاحبة احلى الو بهالوجود
عبير استحت حيييييييييييييل: اهلين
فهد: بعد عمري اللي يستحون... عبورة عيوني
عبير: هلا
فهد: رايحة البيت الحين؟
عبير: ايوا ورايحين معايه ندى واريج بيتعشون
عندي
فهد: والله؟ حلو... زين ابي اذوق من طبخ يدك
عبير بدون شعور فطست ضحك: هههههههههههه
فهد استانس على ضحكتها: سلامات قايل نكتة انا؟
عبير: امممم لا
فهد: اجل؟
عبير: راح اقول لك بس لا تضحك عليه
فهد: قولي قولي الله يعين
عبير: ما اعرف اطبخ
فهد : ماشاء الله ومستانسة بعمرك؟
عبير: ههههههههههههههه لا مو كذا بس خليني
اتعلم اول بعدين اطبخ لك
فهد: ترى زواجنا باقي له حول الـ 3 اشهر وانتي
للحين ماتعلمتي
عبير بدلع عفوي : فهد والله مشغوووولة
فهد: ياااالبيه .. يازين اسمي من فمك
عبير : ههههههههههههههههه
فهد: الظاهر استخفيتي اليوم كل ماقلت شي ضحكتي
المهم ماعلي ابي اي شي من يدك اليوم
عبير: طيب عشان خاطرك راح احاول ... بس لازم
يساعدوني
فهد: يساعدونك ... يعني يعلمونك .. بس مابي احد يحط
يده باللي تطبخينه لي الا انتي ... وهذي امانة بيني وبينك
اذا تحبيني ماراح تخونين هالأمانة
عبير: طيب
فهد: طيب وشو؟
عبير: راح اطبخ لك انا
فهد: محد يلمس شي غيرك
عبير: خلاص اوكي
فهد: يعني تحبيني؟
عبير: امممم
فهد: وشو؟
عبير: ايوا
فهد: لا قوليها
عبير: بعدين
فهد: لا ابيها الحين
عبير: بعدييييييين والله ما اقدر
فهد: زين بس قولي وش كثر؟
عبير: كثير
فهد: ياااارب صبرني على هالبخيلة بس تعالي عندي
انتي والله لاطلع هالكلام كله من عيونك ..
عبير: ههههههههههههههههه طيب
فهد: احبك
عبير:.....................
فهد: عبوووورة احــبـــك
عبير وهي تحس بالحرارة بوجهها من الحيا: خلاص
بنوصل البيت اكلمك بعدين
فهد: اي اي صرفيني ... تمونين والله انتظرك تخلصين
وتدقين علي اذوق طبخ يدك
عبير: ان شاء الله
فهد: يالله فمان الله ياعمري
عبير: مع السلامة
اريج: مابغيتي تخلصين
عبير: وانتي ماعندك الا انا؟
اريج: لا بس احس عندك سوالف واجد... صار حشرك
الحبيب وملزم تطبخين له؟
عبير وهي تقلب بجوالها: ايوا
اريج: وبتطبخين؟
عبير: اكيد وانتو عاد خليكم معايه وساعدوني....وارسلت
مسج لفهد وحطت الجوال بشنطتها
اريج: ههههههههههههههههههه بعدي فهود واخيرا بتدخلين
المطبخ وتصيرين مرة سنعة
كملو ضحك وسوالف الين وصلو البيت ... اما فهد اول
ماوصله مسج عبير فتحه وقراه بلهفة ....
( كل مايسأل حبيبي:وش كثر عندي غلاه؟؟
أشهق وأرفع يديني كثر هالدنياا وزود....
يبتسم ويهز راسه ... ادري ...ويحرك شفااهـ..
آآآهــ ياااحلوهـ سؤالن ماايدور له ردود!!!!
ماسأل لجل إيتأكد.....يدرى مالكني هواهـ!!!!
كل مافيني نطق به والقصايد له شهود,,,,,
يدري من هالدنيا كلها ماملا عيني سواااااهــ.....
يدري ماسكن بقلبي حب غيره بالوجود.....
يدري,,,,ويدري,,,,
ولكــــــــــــــن....!!!!
رغم كل اللي دراه.....
كل ماوده يذوب بالغلا حس البروود......
يرجع ويسأل:
حبيبك قلتي وش كثره غلااااااااه؟؟؟؟
أبتسم......
ابتســــــــــــم وأحلف,,,,,,
أبتسم واحلف بربي!!!!!!
كثر.......
هالدنياااااااااا,,,,,,,
كثر هــالدنـــيــــــــــــــا وزووووووود...... )
تنهد بخاطره ... ياكبر حبها بقلبه وكل يوم يتعلق فيها
اكثر من قبل ...
( هالدنيا حلوة بشوف عيونك الحلوة
يامن غديت بحياتي كل مافيها
إن غابوا الناس عني قلت انا فدوة
إلا انت لا تغيب عن عيني وتجفيها
إن قلت أحبك ترا ماقلتها رضوة
من كل قلبي أحبك صدق واعنيها
لكن خذني حبيبي خطوتـن خطوة
بكرة الليالي تفسر لك معانيها
آنا تمنيت شوفك في العمر منوة
والروح تسأل عيوني وين غاليها
وأحلم بك ان كنت صاحي والا في غفوة
واليوم دنياي تتحقق أمانيها
ياقلب طيب أبد مايعرف القسوة
ياسنين شفت السعادة في لياليها
من نور حسنك غدت أيامنا حلوة
تحلا بشوفك ويحلا كل مافيها )
ارسل لها هالمسج ... وهو من قلب يدعي ربي يعدي
هالشهور بسرعة ويجتمع شمله معاها .....
****************************
وصلو البيت ودخلو وكل وحدة راحت مكان ...
عبير غيرت ملابسها ... ولبست لها قميص قطني
لونه ابيض ... ومرسوم بالنص ع الصدر صورة تويتي
بالأصفر ... قصير يوصل لنص الساق .. واكمام كت
لمت شعرها ونزلت للمطبخ..
اريج: هههههههههههههههههههه يمه بموت ضحك
عبير تناظرها وهي رافعة حاجب: خير ان شاء الله
اريج: من زمان اتمنى اشوف هالمنظر والحمدلله تحققت
امنيتي اخيرا
عبير: مررررة بايخة
ندى: هههههههههههههههه ياحبك للشماتة والله
اريج: والله هالفهد خطير ياحبي له بس
ندى: عبير وينها خالتي؟
عبير: معزومة عند جارتنا ام راكان
اريج: يعني البيت لنا بس؟
عبير: يب... انقذوني وش اسهل طبخة ممكن اسويها؟
اريج: اندومي
ندى: ههههههههههههههههههه عشان يطلقها فهد
عبير تطق ندى: عمى لا تتفاولين عليه
ندى: بسم الله عليكم يارب
اريج: ساندويتش جبن
عبير: اروووووج عن الاستهبال والله جد محتارة
ندى: صينية خضار
عبير: يعني اقطع خضار وبصل ؟
اريج: لا حبيبتي بس تصوري معاهم
ندى: ههههههههههههههههه الله يقطع سوالفك اسكتي
خليني اعلمها ترى البنت شايلة هم
عبير: ايوا ندو حبيبتي علميني
ندى: زين قومي المطبخ اعلمك
قامو البنات ودخلو المطبخ
اريج وهي مازالت مستانسة على الموقف وميتة ضحك
على شكل عبير: هههههههههههههههههه عبورة تكفين
صورة للذكرى
عبير: ههههههههههههههه مرة مبسوطة انتي
اريج: اي والله... الله يسعدكم ونستوني
قعدو البنات على طاولة المطبخ ... وعبير تستمع
لتعليماتهم وتتبعها بحذافيرها ... قعدت تقطع بصل
وهي تتأفف ومنزعجة وعبير تكلم فهد وتضحك
اريج: ههههههههههههههههه فهود ودي اصورها والله
حتى السكين ماتعرف تمسكه... ياخي خفف الحكم
خلنا على الأقل نمسك لها الخضار
فهد: اريجوه وجع تتشمتين في عبير
اريج: افاااا من قال اني اتشمت ..؟ انا اندب حظك
السيء اللي رماك على وحدة رفلا
عبير: اشوف فيك يوم يارب
اريج مطنشتها وتكلم فهد: والدموع اربع اربع من البصل
هههههههههههههه المهم تعشى انت .. وصينية عبير
اقلبها سحور وصوم بكرة اذا قمت شكر لله انك ماتسممت
فهد: تبين الجد؟
اريج بخبث: ايييه
فهد: بطلب لي عشى الحين
اريج: ههههههههههههههههههه والله لاعلمها
فهد يترجاها: لا اروووج تكفين والله تزعل علي
اريج: زين مو عشانك عشانها
عبير جاية لأريج: وش قاعدين تخططون من ورايه؟
اريج: ولا شي
عبير: والله انكم تتآمرون عليه ( وسحبت الجوال من
اريج)... فهد
فهد: لبيه.. عيونه ...آمري
عبير استحت وذوبها كلامه: وش قاعدين تتفقون عليه؟
فهد: انا ماقلت الا اني احبك وميت فيك
عبير: بايخ والله ورمت الجوال لأريج وراحت تكمل
اريج: هههههههههههههههه ياويلي مو قادرة اتحمل ضحك
اكثر
فهد: وخري بس انتي تبين تسببين بينا مشاكل قومي
ساعديها كسرت خاطري والله
كملت عبير طبخ ... وسط تعليقات اريج ... ومساعدة ندى
حطت الصينية في الفرن واتصلت في فهد: الو
فهد: هاه بشري خلصتي المفطح؟
عبير: ههههههههههه حتى انت تعلق عليه؟
فهد:طفشتك الخايسة اريج؟
عبير: لا عادي اتقبل منها اي حاجة
فهد: يااااارب تحبيني كثر ماتحبينها
عبير: ومن قال انه هي اكثر؟
فهد: يعني انا اكثر
عبير: امممم
فهد: اموت واعرف وش تعني هذي امممم؟
عبير: يعني ايوا
فهد: يااااقلبي انتي
عبير: طيب عشر دقايق وارسل لك العشا مع السواق
فهد: افااا وليش ما اجي اتعشى عندك؟
عبير: الوقت متأخر ... ومحتاجة وقت كمان عشان استعد
يعني ماينفع
فهد: مادري ليش تحبين تعذيبي
عبير: هههههههههههه واللي انت مسويه مو تعذيب يعني؟
فهد: ياحبي لك والله ...انا راحمك بس عشان تعبتي..
عبير: خلاص بشوف العشا لا ينحرق
فهد: زين
عبير: باي.. وسكرت وراحت ركض للمطبخ
جهزت العشا .. وارسلته مع السواق لفهد... اللي اخذ
منه الأغراض وهو مبتسم
البنات طبعا طالبين لهم عشى من برا .... راحت عبير
خذت لها دش سريع وجاتهم قعدت معاهم ... حطو
عشاهم وتعشو
ندى: تتوقعون فهد بيتعشى؟
عبير: هههههههههههه ما اظن
اريج: الحمدلله اعترفت
عبير: اول مرة في حياتي اطبخ ... انا اعرف الناس
تقطع الخضار شرايح دائرية انا طالعة معايه اشكال
غريبة مدري ليه
اريج: من الرفالة ياحبي
ندى: ههههههههههههه حرام لاتحطمينها محد يطلع
من بطن امه عالم
دق جوال عبير في هالاثناء وقامت وقلبها يرقع خوف
من ردة فعل فهد ردت بكل هدوووء: هلا
فهد: هلا حياتي
عبير: اخبارك؟
فهد: آخر اخباري؟
عبير: اكيد
فهد: الحين احبك اكثر من قبل شوي
عبير: فهد انت عارف انا ابغى اي اخبار
فهد: تبين اصارحك ولا اجاملك؟
عبير: لا اكيد الصراحة
فهد: كتجربة اولى تعتبر تجربة شبه ناجحة
عبير استانست: والله؟ حلو
فهد: لعنبو ابليسك انا من اليوم افكر كيف اصيغ الجملة
بطريقة ماتحطم آمالك واثاريك مستانسة
عبير: ايوا اكيد مبسوطة ...يعني مشيت حالي
فهد: تقدرين تقولين تجربة تشكرين عليها بس اتمنى
ماتكررينها
عبير: هههههههههههههه مرررة ماتحطم
فهد: عبورة تكفين ادخلي المطبخ كل يوم وربي كذا
بموت جوع
عبير: الشغالة موجودة مو انت كل يوم تآكل من يدها؟
فهد: اي بس لاصارت مرتي عندي مايهنا لي الأكل الا
من يدك
عبير: طيب ان شاء الله بحاول بس انت لا تضغط عليه
فهد: ماراح اضغط عليك بس حاولي جد مو تضحكين علي
عبير: لا والله بحاول
فهد: زين ياقلبي انتي ... تعشيتي؟
عبير: قاعدين نتعشى
فهد: خلاص روحي كملي عشاك وقعدي مع خواتك
عبير: اوكي... باي
رجعت عبير قعدت مع خواتها وكملو سهرتهم الين راحو
خواتها كل وحدة مع رجلها ....
****************************
اليوم مسوين عشا ببيت ابو تركي بمناسبة رجوع
خالد وشهد من فرنسا ....اللي وصلو امس بالليل
شهد اللي راحت المشغل من عصر ورجعت على
المغرب لبيتها ... قاعدة تلبس وتشوف اطلالتها النهائية
شلون راح تصير
خالد اللي توه راجع من صلاة المغرب دخل عليها
وشافها لابسة فستانها الفضي الحريري الناعم: حبيبتي
شهد التفتت له وهي تلبس الحلق: اهلين
خالد: لازم تلبسين هالفستان؟
شهد تناظر فستانها مستغربة:ليش مو حلو؟
خالد: الا حلو بس عاري شوي...
شهد: من جدك انت؟ لا عاري ولا شي كل البنات
يلبسون نفس الشي
خالد: انا ماعلي من البنات انا علي من زوجتي مابي
احد يشوفها الا انا
شهد: حبيبي والله ماينفع اغيره الحين ... نسقت مكياجي
وكل شي مع هالفستان
خالد: زين غطيه بشال او اي شي
شهد: امممم ما اتوقع عندي شال يناسبه
خالد: زين شوفي عند خواتك او خواتي
شهد: خااااالد ليش تعقدها ؟
خالد: لا صرت اخاف عليك اصير معقد؟
شهد: ماقلت كذا بس هذي المرة عديها عشان خاطري
خالد: اوكي حبيبتي ... بس مرة ثانية خليني اعرف
وش راح تلبسين قبل لا تقررين ..
شهد: من عيوني
خالد باسها على خدها: تسلم لي عيونك حبيبتي ....
اهم شي حصني نفسك ...
شهد: ان شاء الله
كملت اللي بقى لها .... ولبست عباتها وطلعو متوجهين
لبيت ابو تركي...
****************************
البيت زحمة وكل الأحباب مجتمعين .... ريحة
العطور والبخور فايحة بأرجاء البيت ... والكل ينتظر
اطلالة العروس عليهم ...
اريج: كللللللللللللللللللللوش هلا والله يالله حيها مرة اخوي
التفتو كل اللي بالصالة وقامو لها ... اللي تاخذ عباتها ...
واللي جاية لها بالمبخرة تطيبها .... واللي يسلمون عليها
عبير ضمتها بقوووووة : وحشتيييييييني
شهد: بعد عمري وانتي بعد والله
اريج تدفها : وخري بس تراها مرة اخوي انا بعد
سلمو عليها .... ودخلت لمجلس الحريم ... قعدو شوي
وبعدها صلو العشا ... وصارو يستقبلون الضيوف اللي
توهم جايين .. ومن ضمنهم اهل شهد ....
البنات قايمين على ضيافتهم على اكمل وجه .....
اريج توزع المهام على البنات : جوجو خوذي انتي وندى
وفاتن القهوة... وانا ومشاعل واماني صحون الحلويات
عبير: وانا؟ اقعد اتفرج فيكم؟
فاتن: خبري فيك ماتعرفين
عبير: ماتعودت بس على الأقل اعطوني صحن حلى
كذا شكلي مرررة بايخ
اماني: زين خوذيه .. وانا بالمرة الثانية .....وراحو
البنات يدورون بالقهوة والحلى ويرحبون بالضيوف
... مرت الليلة بكل فرح والكل احتفل بحضور عروس
العايلة شهد.... رقص ووناسة وضحك كان عنوان ليلتهم
ليلة اكتملت فيها كل وجوه الفرح ... وعسى هالفرح دوم
يارب...
قررو البنات ينامون ببيت ابوهم ... وعبير استأذنت امها
تقعد مع خواتها ...اللي وافقت على طول وما اعترضت
خصوصا ان ابو تركي الليلة راح يبات عندها ...
قعدو البنات سهرانين ... كان مجمل جلستهم وناسة ....
ماعكر صفو هالسهرة الا تنغيزات فاتن اللي تقطهم كل
شوي على عبير... اللي تضايقت من هالشي وماقدرت
تسكت اكثر...
عبير: فاتن ممكن اتكلم معاك لوحدنا؟
اريج وندى حسو بتوتر الجو بس انتظرو رد فاتن: ليش
يعني في شي تخبينه عن خواتي؟
عبير: لا ما اخبي حاجة بس ابغى الكلام يكون بيني
وبينك بس
ندى قامت بهدووووء: يالله انا بروح انوم فروس وانام
تصبحون على خير
اريج: انا بعد بطلع غرفتي لا صار شي ولا قامت
حروب دقو علي اجيكم مطامر
عبير ابتسمت بخاطرها .. وشافت خواتها وهم يرقون
لغرفهم... سمت بالله وبدت كلامها بهدوء: فاتن انتي ليه
تعامليني كذا؟
فاتن: شلون اعاملك يعني؟
عبير: محسستني اني عدوتك ما كأني اختك ...... وبعد
فترة بسيطة راح اكون زوجة خالك كمان
فاتن: انا ماسويت شي غلط
عبير: تتوقعين اني اكرهك؟
فاتن: يمكن ليش لا
عبير: بالعكس والله اني احبك .... يمكن يختلف حبي
لكل وحدة فيكم عن الثانية .. بس يكفيني انه اسمي
نفس اسمك واللي يجمعنا دم واحد
فاتن سكتت وماعلقت على كلام عبير
اما عبير استرسلت في كلامها : انا ما اطلب منك
تحبيني .. ولا انك تعامليني مثل اريج وندى .....
بس على الأقل احترميني مثل ما أنا احترمك واقدرك
فاتن: عبير انا مو سيئة مثل ماتتصوريني ....
عبير تقاطعها : انا عمري ماتصورتك سيئة والله
فاتن: مو مهم اللي تتصورينه بس انا من كبرت وانا
متعلقة في امي واللي يجرحها يجرحني ..... وانتي
وامك بالنسبة لها جرح ... وهالشي ينفرني منكم
عبير: انا ما اعترضت على مشاعر امك لأنه شعور
طبيعي واي انثى في الدنيا تكره اللي يشاركها في
اللي تحبه... بس انا غير وماما غير... انا وانتي
غير عن علاقتهم ... احنا اخوات
فاتن اللي كلام عبير صحى كل الجروح اللي بقلبها
وخلاها تتنهد وتنزل دمعتها : آآآهـ ياعبير ماتحرق
النار الا رجل واطيها ...
عبير تندمت على كلامها : فاتن انا آسفة ماكان قصدي
حاجة والله
فاتن: لا تعتذرين ابد انتي ماغلطتي .... كلامك عين
العقل ... انا فعلا اوقات اتصرف بغباء ... ومشاعري
بعد تكون غبية ... تصدقين اني احب بدر ولد سعود؟
عبير: بس هذا مو غباء .. انتي تحبين سعود ,, واي
شي منه تحبينه
فاتن تنهدت بوجع : تدرين عاد ... كلامك فتح عيني
على اشياء اجهلها ... طول عمري اعرف انك اختي
بس اول مرة احس هالإحساس... يمكن ماتناقشنا كثير
وماقلتي كلام واجد .... بس انا بداخلي اوقات اغار من
علاقتك مع خواتي ... لكن في شي بداخلي يمنعني
اجي لك واتكلم معاك مثلهم ... كنت اتردد لاني اخاف
انك تردين علي برد جارح ... يجرح لي كبريائي
بس تفاجئت من كلامك الحين ... يوم عرفت انك
تحبيني مثل خواتي
عبير: فاتن والله ما ابغى الا تتحسن علاقتنا لأني
ما احب احد يحقد عليه او يكرهني
فاتن بابتسامة صافية عذبة : ان شاء الله مع الايام
تتغير للأحسن ...
...عبير تبادلها الابتسامة وهم طالعين الدرج: الله
يسعدك يارب . ويعطيك على قد نياتك
اريج: يعيش الحب وتسقط العداوة يعيش يعيش
فاتن وعبير اخترعو : بسم الله
فاتن: مجنونة انتي؟ قلنا على انفراد وشوله قاطة
اذنك معانا؟
اريج: الحين انتو اللي صاحين؟ معقولة افوت علي
هاللحظة التاريخية؟
عبير وفاتن ضحكو على اريج وراحو لغرفهم ينامون
بكل حب وصفاء وراحة قلوب ....
ايام تلت الأيام ... فرح وحب وغرام .... وامنيات
تحققت واخرى في طور الأحلام ...
فصول تعددت ووجوه عاشت هذه الفصول بكل تفاصيلها
ضحكت فرحا ... وبكت حزنا... وتنهدت اشتياقا ..
وتمضي الحياة كما قدرها رب العالمين ....
يبقى للحب بقية .....
للحزن بقية.....
للشوق بقية.....
ولفصول روايتي وابطالها بقية....
مع الأيام ستظهر تفاصيلها
*
*
*
*
*
*
انتهى الجزء الخامس عشر
انتظر تعليقاتكم على البارتين
لقلوبكم اعذب واصدق الود
•غٌـمـوضٌ ـآٍْاْلٍْــورد•
|
06-07-09, 09:19 PM
جديد مواضيع قسم القصص المكتملة (بدون ردود)
العرض العادي
