تكفى بأمك تعتقـن كـان لـها شـان
وتكفى بأبـوك العتـق لا يقربوني
وتكفى أنا أرجوك فـي كـل الإثنـان
تكفـى تـرى تكفـى تهـز المتونـي
ارحم ضعفي يرحمك عالى الشأن
دربآ مشيته غصب هم اجبروني

دفها نواف برجله وبكل قسوه واحتقار : مو انتي جايه برجليك هنا خلاص تحملي اللي يجيك
دفت رجله جت على صدرها حست ان الهواء كله اختفى من حولها هي من غير شي مختنقه من الدخان اللي كاتم الغرفه ورهبة الموقف اللي هي فيه والخدر الغريب اللي تحسه بأطرافها بسبب استنشاقها لدخان الحشيش اللي يدخنونه سحبت نفسها بالموت ورجعت ترتمي على رجله وتبوسها : اسألك بالله ترحم ضعفي وتطلعني من هنا ورب البيت ان سحر كذبت علي وقالت انها جايه لصديقتها اقسم بالله العظيم اني ماكنت ادري
كان نواف يحرك رجله بقوه عشان يبعدها عنه وكأنها شي قذر ممكن ينجسه لكن هي كانت متشبثه برجله بقوه من شدة الخوف ولانها تأملت فيه بعد الله انه ينقذها مما هي فيه
شافت فارس وهي يقرب منها وكأن صبره نفذ وبيسوي اللي براسه صارت ترجف بشكل اكبر وتحاول تحتمي بنواف وهي ماعلى لسانها غير اللهم استر عورتي وآمن روعتي
وقبل لايمسكها فارس وقف نواف وبصوت شخص واثق من نفسه ومتعود ان كلمته تكون مسموعه : اتركها
فارس بجنون بسبب السم اللي شاربه : اشلون اتركها على جثتي تطلع من هنا قبل ماأخذ منها اللي ابيه
نواف بحده : بعد مااخلص منها سو فيها اللي تبي
لاااااااااااااااااااااااااااااااااا
كانت هذي صرخة لمى بعد مانهار املها في انه ينقذها للحظه حست بأمل لما قال اتركها لكن هالامل تحطم بعد جملته الاخيره صرخه مجروحه طلعت من اعماق روحها لكنها ماتجاوزت هالجدران تلاشت مع صوت الاغاني اللي يصدح بكل ارجاء البيت
حاولت تقوم عشان تهرب بتضرب على الابواب والشبابيك لعل احد يسمعها وينقذها حتى لو جت الشرطه او الهيئه ماعاد يهمها كل همها انها ماتسلم نفسها لــ هالوحوش وينتزعون منها اغلى ماتملك لكنها تعثرت بعبايتها وطاحت حست بيد تقبض على يدها بكل قوه حاولت تقام نواف اللي كتفها بيديه وسحبها معاه للدور العلوي جسمها كان منهار لكنها حاربت بكل ضراويتها لكن كل محاولاتها فشلت امام نواف وقوته الجسديه
دخلها للغرفه وسكر الباب بالمفتاح حست ان نهايتها قربت لانه اذا ضاع شرفها بتكون انتهت حياتها والموت ارحم واستر لها
رجعت ارتمت على رجله تبوسها وتترجاه بصوت ضاع من كثر البكاء والصياح
لكن نواف سحبها بكل قسوه ووقفها قدامه : محد قالك ماشي هالصديقات
وبكل قوته عطاها كف.. اختفت الدنيا كلها من قدام عينها وارتمت على السرير اللي كان خلفها ماكانت تشوف الا الظلام وحاولت تحرك جسمها لكنه كان بدون حياها وبعدها فقدت الوعي بكل اللي حولها
كانت جسد مسجي قدامه بلا حول ولا قوه يشبع فيه كل نزواته

ـــــــــــــــــ .. ـــــــــــــــــــــــ .. ـــــــــــــــــــــــــ

حست بشي يجبرها تفتح عيونها وينتزعها من عالم الظلام اللي كانت عايشه فيه فتحت عيونها لوهله وهي تحرك يديها قدام وجها بجنون كأنها خايفه ان الماء اللي ينصب فوق راسها يغرقها ويكتم انفاسها كل اللي قدرة تستوعبه بالثواني الاولى انها بدون ملابس وجالسه في بانيو واحد يصب عليها الماء ضمت يديها حول جسمها تحاول تستر اللي تقدر عليه شافت سحر ومنال هم اللي عندها وهم اللي يصبون عليها الماء ماكانت مستوعبه هم وش قاعدين يسوون او ايش اللي جابها هنا لكنها مجرد لحظات وتذكرت الكابوس اللي كانت فيه لثواني ضنت انه حلم الا كابوس بشع والحمدلله اللي صحت منه لكن وجه منال والدموع اللي مغرقه وجهها اكدت لها ان اللي مرت فيه واقع مو حلم صرخة بأعلى صوتها وهي تتمنى ماتسمع منهم رد يثبت شكوكها : وش صاااااااااااااار
سحر اللي متمالكه نفسها ولا كان شي صار : اهدي يالمى وانا افهمك كل شي
لمى : ماراح اهدى وقولي وش صار منال تكلمي اللي صار حلم والا حقيقه
لكن منال ماردت عليها كل اللي سوته انها جلست على ارضية الحمام وقعدت تصيح
سحر بعصبيه : منال ترى مو وقتك وقمي هاتي الروب خليني البسه لمى
سكتت لمى والدموع تحجرت بعيونها يعني كل اللي مرت فيه حقيقه مو حلم مثل ماتوقعت حاولت تصرخ تتكلم تقول اي شي لكن الموقف اللي هي فيه كان اكبر من ردت اي فعل
كانت مثل الدميه بين يدين سحر ومنال اللي تمالكت نفسها بالقوه لبسوها الروب وطلعوها من الحمام لغرفة نوم سحر
جلستها سحر على السرير وبكل هدوء : انا بروح اجيب لها شي دافي تشربه
منال اللي ماتحملت تجلس مع لمى وهي في هالحاله مو عشان لمى لكن عشانها هي اللي الان مو متخيله اللي صار لها
طلعت ورى سحر ولحقتها للمطبخ
منال بعصبيه : ضيعتيني حسبي الله عليك
سحر : منال انا متفقه معهم على لمى واخذه وعد منهم مايقربون لك انتي اللي رحتي مع مشعل برضاك ومحد اجبرك
منال : محد اجبرني ايه واضح مو كله من السم اللي خليتيني اشربه
سحر : منال خلينا نكون واضحين مع بعض انتي لو ماتبين تشربينه محد كان بيجبرك لكن انتي بداخلك اللي حبيتي تجربينه هذي هي لمى اجبرانها بالقوه تجلس ومع كذا حلفت ماتجلس الا بعبايتها حاولنا نشربها وماقدرنا لانها هي بداخلها رافضه فلا تجين تسوين علي دور المثاليه
منال وهي مو قادره تكذب سحر لان هذي هي الحقيقه لكن اللي خسرته مو شي سهل : بس هذا مايمنع ان خطتك دمرتني كنت ابي لمى ترجع لنا مو تضيعينا
سحر : منال وبعدين معك تراك مكبره السالفه على غير سنع وش يعني لو فقدتي عذريتك ترى راس مالها عملية رتق للغشاء وترجعين مثل اول والا ناسيه خوله صديقتي مابقت هي وحبيبها شي ماسووه ولما بغت تزوج راحت وسوت العمليه وهذي هي عايشه مع زوجها اللي طايرن فيها ومايشوف بالدنيا غيرها
(همسه خارج النص : شياطين الجن وشياطين الانس مايختلفون عن بعض لان كلهم يصغرون المعصيه بعينك ويسهلونها لك حتى تقع فيها واذا وقعت فيها اقنعوك بتكرارها حتى تنغمس بالرذيله والمعاصي والذنوب وبعدها يبتعدون عنك لان ماعاد لهم حاجه فيك كفانا الله وياكم شرهم << وه بس لبى قلبي وانا اتفلسف <<طسي كملي البارت>> تيب )

منال : ليه شايفتني مثلك اقدر اسافر بروحي عشان اقدر اسويها
سحر : ههههههههههههههههههههه وربي انك هبله يامجنونه مايحتاج تسافرين اعرف لك بدال الدكتوره عشر وهنا بالرياض ويسوونها لك بأقل من ساعه ولو الوقت مو متأخر كان اتصلت لك على الدكتوره اللي سوت العمليه لــ خوله واخليك تكلمينها وعشان يطمن قلبك اكثر انا اليوم بكلمها واحجز موعد لك على يوم الخميس ها ارتحتي
منال وهي ناسيه انهم بيرحون للمزرعه : لا خلينا نروح لها اليوم وشهوله نأجله لــ بكره
سحر : مجنونه انتي ليه ناسيه انكم بترحون للمزرعه والحين يله روحي هدي هالعله بنت عمك عشان تطلعون ترى ماباقي شي ويأذن الفجر
اخذت منال كأس الحليب من سحر وطلعت لــ لمى وهي خايفه من اللي بتواجهه
دخلت للغرفه وشافت لمى على نفس جلستها وتناظر بملابسها المتمزقه والمرميه بجنب عبايتها على الارض والدموع مغرقه وجهها
منال بــ حنيه : لمى اشربي الحليب واهدي واوعدك ان كل شي بيتصلح
لمى بهستيريا : وش اللي يصلح حياتي اللي انتهت وصار الموت اهون لي او شرفي اللي ضاع انا خسرت كل شي تفهمين وش يعني خسرت كل شي
منال : لمى خلاص اهدي ترى كلها عمليه وترجعين مثل الاول
لمى بأحتقار : عمليه وتقولينها بــ هالبساطه العمليه ياحقيره ترجع لك غشاء مزيف كله غش وخداع لكن شرفك وعذريتك ماترجعها لك كل العمليات
منال : لمى احترمي نفسك ولاتغلطين انا مثلك انخدعت وماكنت ادري عن شي احنا مارحنا للشي هذا برجلينا انجبرنا عليه والعمليه بتسوينها عشان ماتنفضحين بسبب ذنب مالك يد فيه
لمى بأستغراب : اسويها ليه وانتي مو هامك تنفضحين
منال بكذب : انا ماصار لي شي
لمى بأستنكار : اشلون ماصار لك شي وانا شايفتك طالعه مع واحد من هالكلاب ( لمى ماكانت تذكر ولا اسم حتى اشكالهم ماحفظتها بسبب الحاله اللي كانت فيها )
منال : طلعت معه صح لاني عرفت لو بعانده بيأخذ مني اللي يبيه وبالقوه لكن اخذته بالسياسه وجاريته وفهمته اني علي عذر شرعي ومو مستعده ووعدته ان لنا لقاء ثاني واعطيه اللي يبي لكن انتي عاندتي وتحديتيهم عشان كذا اخذو منك اللي يبونه وبالقوه
لمى بجنون : ياربي وش هالظلم انا اللي دافعت عن نفسي حتى اخر لحظة وعي فيني يضيع شرفي واللي ضحكو معهم وشربو ورقصو مايصير لهم شي ياااااارب ياااااااارب موتني ورحمني من هالعذاب
منال : لمى خلاص سيطري على نفسك لازم نرجع البيت الحين والا ناسيه عزيمة المزرعه اليوم واكيد بيمشون على 6 او 7 فــ لازم نرجع قبل لايحسون فينا
لمى : اي مزرعه واي عزيمه وانتي هذا اللي هامك ومو هامتك المصيبه اللي انا فيها واصلآ ليه تهتمين انا اللي ضعت اما انتي مازلتي الشريفه والعفيفه
منال بعصبيه : انا تحملتك اكثر من الازم اسمع معك 5 دقايق تجهزين وتلحقيني للسياره او وربي لا امشي واتركك ولو سالتني امك عنك بقول مدري عنها على المغرب طلعت من عندنا على اساس رايحه للبيت ولحظتها صرفي نفسك معها
خلصت كلامها وطلعت تاركه لمى مصدومه باللي تسمعه تعرف ان منال حقيره وممكن تسوي اي شي لكن هي مضطره تسايسها على قولة المثل ان كان لك حاجه عند الكلب قوله ياسيدي وهي الحين بوضع لاتحسد عليه كلمه من منال بتفضحها وتوديها بستين داهيه
حاولت تستجمع قوتها ولبست ملابسها المتمزقه وهي تبكي بدال الدموع دم على شرفها اللي ضاع منها وعلى حياتها اللي انتهت
لبست عبايتها ولحقت منال للسياره قبل لا تتركها وتروح
منال بعد ماركبت لمى : زين اللي رجعلك عقلك
لمى بهمس كانها خايفه احد يسمعها : منال انا مو حاسه بألم ولا حاسه بأي تغير يمكن اكون مثلك وماسوى لي شي
منال : لمى انتي كان مغمى عليك يعني جسمك كله بحالة استرخاء الالم يكون سببه الخوف وشد العضلات لكن انتي ماكنت داريه عن شي عشان كذا ماتحسين بأي الم
لمى برجاء : طيب خلينا نروح للدكتوره اللي تقولين عليها تكشف علي يمكن ماصار لي شي
منال : لمى انا شفتك بعد ماترك نواف حتى فارس كان بيدخل يأخذ اللي يبي بس حاولت امنعه وماقدرت واخرتها ترجيت مشعل وقدر انه يوقفه عند حده وشالك معنا للسياره
لمى من بين دموعها : يعني اللي ترجيته وكنت اظن هو اللي بيحميني بعد الله هو اللي ..... ( قطعت كلامها ورجعت تبكي وهي الى الان عقلها مو مستوعب اللي صار لها)
منال بحقد وبدون رحمه : لمى نواف الف اللي تتمنى منه نظره ولو كان يبي كان اختارني انا او سمر لانه بدون زعل احنا اجمل منك واجسامنا احلى بكثير لكن انتي عاندتي وهو شكله يستفزه العناد عشان كان اخذ منك هالشي بس عشان يكسر خشمك مو رغبه فيك (كان اكثر شي قاهر منال من كل الاحداث اللي مرت فيها هي عذريتها اللي راحت منها والشي الثاني ان نواف فضل لمى عليها ولو ان نواف هو اللي انتزع عذريتها كان ماحزنت عليها دام رأس مالها عمليه على قولة سحر )
ماردت لمى وكل اللي سوته انها غطت وجها بيديها ونهارت تبكي اكثر واكثر حتى وصلو للبيت
منال قبل لاتنزل لمى : اسمعي لو سألت خالتي قولي انه كنا عند وحده من البنات عشان اليوم كانت ملكتها
فتحت لمى الباب بالمفتاح اللي معها وتسللت بهدوء للبيت وهي تدعي ربها انها ماتصادف احد وفعلآ هذا اللي صار
دخلت غرفها ورمت ملابسها الممزقه على الارض واخذتهم خبتهم في اخر الدولاب عشان محد يشوفهم وبعدها فتحت الدش على البارد واكتفت انها تجلس في البانيو وتخلي المويه البارده تلسع جسمها لعل وعسى تقدر تطفي من النار اللي بداخلها

ــــــــــــــــــــــ .. ـــــــــــــــــــ .. ـــــــــــــــــ

ياقو قلبك على الصّـده ويـا صُبـرك
وياوسع صدري على صدك ويا صُبري
وياطـول عمـرك بذاكرتـي وياكُبـرك
وياشيب عيني بشيّب عـاد ذا كُبـري
والله لون حمل صبري فوقك..ان تبرك
والله ولو تعتذر منـت بعلـى خبـري
ان ما جبرك الغلا ما اقدر على جبـرك
ياللي على ارض الوفا ما شبرك بشبري
تزعل وترجع وتلقانـي علـى خبـرك
وانا انكسر لك واجيـك ادوّر لجبـري

صحت ليان قبل صلاة الفجر كانت تتحرك بالغرفه بهدوء عشان ماتزعج فيصل جهزت له الملابس اللي رايح يلبسها وعطرتها وتركتها معلقه في غرفة تبدل الملابس واخذت الشنطه الصغيره اللي محضرتها من امس واللي فيها ملابسهم اللي بيحتاجونها بالمزرعه ونزلت تحت
طلت على جدها وكان مازال نايم وبعدها راحت تجهز الفطور لهم كلهم برغم وجود طباخه وخدم مالين البيت الا انها كانت تحب تسوي كل شي لفيصل بنفسها
خلصت الفطور على اذان الفجر وطلعت لغرفتها القديمه اخذت شور ولبست وحطت ميك آب خفيف حيل وتعطرت وبعدها راحت لجناحهم شافت فيصل مازال نايم على الكنبه جلست على ركبها بجنب الكنبه وطبعت بوسه ناعمه على خده وبهمس : حبيبي قوم عشان تصلي وتلبس الفطور جاهز
فيصل كان صاحي فيها من قامت تجهز ملابسه لكنه ماحب يقوم كان بيشوف هي بتصحيه والا بتسوي نفسها زعلانه لكنه رجع غفى وماحس الا بــ بوستها على خده وبنفسه ( ياحبي لها والله وجاب معها الزعل نتيجه قبل كنت اسوي المستحيل عشان بوسه ومن البارح صارت توزعهم بالمجان وبدون لا اطلب بس ماعليه ياليان خلينا كذا كم يوم الين ماتأدبين)
قام من على الكنبه بدون لايناظر فيها او حتى يرد عليها وراح لدورة المياه
حست ان دموعها بتخونها وتنزل عمرها ماتخيلت ان فيصل بيصد عنها وبيعاملها بــ هالقسوه لكنها قاومت هالدموع وقامت تصلي عشان اذا طلع من دورة المياه تكون مخلصه صلاه
دخل غرفة تبديل الملابس بعد مااخذ له شور سريع وشافها قدامه
فيصل بقسوه : بدال هالوقفه روحي خلصي اشغالك واتركيني ابدل براحتي
طلعت من عنده ليان ودموعها بدت تأخذ مجراها على خدها الحزين توقعت انها ودعت هالدموع بعد حب فيصل لكن الظاهر ان هالدموع مكتوبه لها من صغرها وبترافقها طول حياتها
طلعو للمزرعه بعد ماخلصو فطورهم فيصل والجد وليان بسياره وماجد وامه وندى وام طلال بسياره ثانيه من غير السياره الكبيره اللي فيها دارين والخدم والممرض
شتان كبير بين السيارتين سيارة فيصل كان يعم عليها الصمت ماعدا اذا تكلم الجد وسيارة ماجد كانت قالبتها ندى لــ رجه واستهبال من فرحتها ان امها عزمت اهل صديقتها اريج بحكم الجيره اللي بينهم ولان حتى بسمه ونجلاء بيجون
ندى : ماجد ماقلت لي مافيه احد من ربعك بيجون اليوم
ماجد : بيجي كم واحد منهم ليه تسألين
ندى : يعني اقول لو تخلي واحد منهم يشوفني طبعآ بدون لا يدري انه قاصدين
مسك ماجد فرامل ووقف على طرف الخط من هول الكلام اللي اسمعه
ام ماجد بروعه : ماجد يمي وش فيك خوفتنا وانت تصدق كلام هالمهبوله
ماجد وهو يلفه رأسه لــ ورى وبتهديد : عيدي ماسمعت
ندى وهي تقلد صوت امها : ماجد يمي وش فيك خوفتنا وانت تصدق كلام هالمزيونه
ماجد مد يده عشان يمسكها بس هي تخبت ورى ام طلال
ندى بخوف : ماجد انما الاعمال بالنيات وانما لكل امرىً مانوى
ام ماجد بتلطف الجو : يالله من فضلك بنتي المهبوله تطوعت
لكن ماجد كان حالف الا يضربها عشان تتأدب بس قطع عليه طق فيصل للشباك لانه شافهم وقفو على فجاءه وقف حتى هو خاف ان يكون فيهم شي
ماجد وهو ينزل القزاز : هلا فيصل وش موقفك
فيصل بعصبيه : انتم وش اللي موقفكم كذا خوفتوني على بالي فيكم شي
ندى : فيصل الحق علي هالخبل بيقتلني
فيصل وهو واصل حده منهم : ماجد تكلم وش صاير
ماجد : هالمتخلفه اختك تقول خل واحد من اصحابك يشوفني بس لايدري انه قاصدين
ندى وهي عارفه ان نهايتها قربت وكلها من السانها هالمسحوب : فيصل عطني فرصه ادافع عن نفسي قسم ان كل هدفي استر نفسي بالحلال قلت يمكن لا شافني اعجبه ويتزوجني وان ماعجبته تكون نظره شرعيه وربي ماكتب نصيب
فيصل وهو يفتح بابها وبعصبيه : انزلي وحسابك معي بالزرعه ان مانسيتي شي اسمه زواج مااكون فيصل
ندى وهي تمسك بأم طلال : لا مايجوز اترك امي وخالتي ام طلال لحالهم مع ماجد هذي تعتبر خلوه
ام ماجد : اختلو الجنون بعدوك يالمهبوله (وهي تكلم فيصل) خذها معك يمي ترى النفس عليها شينه خطر مانوصل الا واحنا ذابحينها وندفن جثتها بمزرعتك
سحبها فيصل من يدها بالقوه ونزلها من السياره وركبها سيارته واول ماركبت السياره مسكت بكتف جدها اللي جالس قدامها : جدي داخلتن على الله ثم عليك فكني منهم ترى قررو يقتلوني
الجد : عسى هذي الساعه المباركه
ناظر فيصل بجده وابتسم على حب جده لندى الا انه دايم مكسر مجاديفها بعكس ليان اللي مايرفض لها طلب : ايه مو بعض الناس والا كان اجبرتنا ننفذ طلباتهم ودافعت عنهم
ندى مافيه امل تفوت هالفرصه : زين انك ملاحظ ياقلبي علي محد يحبني احيانآ احسن انهم لاقطيني من الشارع وقالو نربيها نكسب فيها اجر
فيصل : ليتك لقيطه كان لقيت سبب يخليني اتخلص منك
الجد بعصبيه : وش فيهم اللقطاء ناس حالهم من حالنا ويمكن افضل منا كل ذنبهم انهم جو للدنيا يحملون غلطة غيرهم والمجتمع مارحمهم متناسين قوله تعالى ولا تزر وازرة وزر أخرى
فيصل بهدوء : الله يهديك ياجدي نمزح انا وهالخبله وش فيك اخذت الموضوع جد
الجد : طالعين على اعمامكم ماعليكم شرهه
فيصل بعصبيه وحده لــ اول مره على جده : جـــــــــــــدي
الجد بسخريه مقصوده : امزح يافيصل وش فيك قلبتها جد والا المزح على غيركم عادي وعليكم لا
سكت فيصل لانه فهم مقصد جده بس حتى ولو جرحه انه يقارنه بأعمامه ويشبهه فيهم وهو اللي ماكره احد في حياته كثر كرهه لــ اعمامه اما الجد غمض عيونه وهو يتذكر اخو دنياه واكثر شخص وقف معه وساندنه ماكان يحب احد يغلط او يقول كلمة لقيط لان هالكلمه عذبت صاحبه كثير
ليان بمحاوله منها انها تغير السالفه : اقول فيصل ليه ماتزوج ندى لصديقك وليد احسهم يناسبون بعض
فيصل بحده : ليه صايره خطابه
كانت بتسكت عشان ماتسمع منه شي يجرحها اكثر بس خوفها ان جدها او ندى يحسون بشي هو اللي خلاها تكمل كلامها معه عادي وكانه يمزح معها : عشان ندى اصير خطابه وطقاقه دامني بفتك من حنتها كل يوم على العرس
فيصل بحده : مشكوره محد طلب خدماتك وياليت تكرميني بسكوتك
سكتت ليان وحمدت ربها انهم بالسياره ومغطيه عيونها والا كان شافو دموعها اللي غرقت وجها ام الجد مافاته حدت فيصل على ليان لكن ماحب يدخل عشان مايزيد النار بينهم
ندى اللي انقهرت من فيصل : وليه ان شاء الله تسكتها ولا عشانها تبيلي الخير وتبي تسترني بالحلال ماعجبك كلامها
فيصل كان وده ينزل ويجلد ندى الين ماتنسى اسمها مو بس العرس لكن هون بعد ماطرت في باله فكره وبكل هدوء وحنيه : لا ياقلب اخوها بس لاني ابيلك الخير اجل ترضين تزوجين واحد متزوج
ندى بصدمه : وليدوه متزوج ومن وراي
فيصل بضحكه : هههههههههههههه ليه من باقي اهله ولا زوجته عشان يقولك
ندى : لا بس المفروض اني اعرف .. وبعدين انا ماعندي مانع اخذ واحد متزوج المهم اني مااعنس
فيصل : حتى لو كان متزوج شغالتهم السيريلانكيه
ندى : وععععععععع وتصير ضرتي سيريلانكيه لا والبيت يوم علي ويوم عليها عشتوو .. بس مايخالف اهم شي اعرس ظل راجل ولا ظل حيطه
فيصل وهو وصل حده منها : حيطه تطيح على رأسك ياتعقلك ياتذبحك وتفكنا منك
(فيصل كان يضحك مع ندى ويسولف معها عادي وكله عشان يقهر ليان اكثر )
لاحظ فيصل نظرة جده له وعرف انه فهم حركته ركز نظره بالطريق اللي قدامه يتهرب من نظرات جده لانه فعلآ حس ان تصرفه طفولي وتافه
واستمرو على سكوتهم حتى وصلو للمزرعه

ـــــــــــــــــــ .. ــــــــــــــــــــــــ .. ــــــــــــــــــــــــ


صحى طلال مفزوع على صوت لين لكن اللي صدمه هو الظلام اللي يعم الغرفه حاول يشغل الابجوره اللي بجنبه لكنها ماشتغلت شال لين بين يديه وهي ترجف ومنهاره طلع من الغرفه وهو يصرخ على كاميليا اللي جت تلتمس طريقها في الظلام
طلال بعصبيه : بسرعه هاتي الشموع
مامرت دقيقتين الا وكاميليا مولعه كل الشموع اللي حصلتها وحطتها بالصالون عند طلال ولين
طلال وهو يحاول يهدي لين : حبي انا هنا معك مافيه شي يخوف الكهرباء طفى بسبب المطر بس
لكن لين كانت ترجف بقوه ودموعها على خدها وتناظر في طلال وكاميليا بخوف
حاول طلال يضمها لصدره عشان يبعد عنها الخوف لكن لين صارخت تصرخ وتحاول تبعده عنها
قرب طلال الشمعه من وجهه عشان تشوفه : حبي انا طلال خلاص اهدي مافيه شي
لكن هالشي ماخفف من خوف لين ولا من صراخها وسرعة تنفسها
ماقدر طلال يشوفها وهي بــ هالحاله بدون لا يسوي شي ركض للمدخل واخذ معطفه المعلق قرب من لين ولفه عليها برغم مقاومتها وصراخها عشان يأخذها للمستشفى لكن بلحظه توقفت مقاومتها وانهارت بين ايديه شالها طلال وطلع من الشقه يركض فيها وكاميليا اخذت معطفها ومفتاح سيارته وجواله ولحقتهم
ركب في المقعد الخلفي ولين معه وكاميليا هي اللي كانت تسوق وراحو فيها لــ اقرب مستشفى
وصلو للاسعاف ودخلو لين لــ احد الغرف وطلال يحاول يشرح لهم حالتها لانهم ماعندهم خلفيه عنها ويحاول يتصل بطبيب لين لكنه ماكان يرد بحكم ان الوقت الساعه 4 الفجر
الدكتور : ارسلنا فاكس للمستشفى اللي فيه ملفها وننتظر منهم الرد حاليآ هي بحالة فقدان للوعي وماراح نقدر نسوي لها شي حتى يوصلنا تقرير من المستشفى اللي متابعين حالتها
كان طلال يسمع كلام الدكتور وهو يحس بالعجز لانه مو قادر يساعدها بشي كره نفسه بسبب ظلمه وتمنى لو هالحرامي يطيح بين يديه عشان يشرب من دمه ويشفي غليله فيه
طلع جواله ورجع يتصل على طبيب لين النفسي وماصدق لما سمع صوت الدكتور اللي واضح انه ازعجه من نومه
طلال بلهفه : دكتور اسفه على ازعاجك بس محتاج تجي ضروري لــ مستشفى ... لين تعبانه بالمره وحاليآ فاقده الوعي
الدكتور بهدوء : هدى اعصابك وفهمني بهدوء لاني ماادري عن اي مريضه تتكلم
مسك طلال اعصابه بالقوه ومن بين اسنانه : دكتور مريضتك لين ابراهيم اللي تعاني من صدمه بسبب عملية السطو اللي صارت على بيتنا
الدكتور وهو يتذكر : آآه تذكرتها طيب وش اللي صار
طلال : حصل انقطاع في الكهرباء في البنايه اللي احنا فيها وانهارت وصارت تصارخ حتى انا خايفه مني ولما حاولت اهديها اغمى عليها وجبتها للمستشفى ومازالت في حالة اغماء
الدكتور : طيب هدي نفسك وانا بكون عندكم بخلال نص ساعه
قفل طلال من الدكتور ودخل غرفة لين شافها وهي على السرير الابيض وجهاز تخطيط القلب موصل لها وقناع الاكسجين مغطي نص وجها باس جبينها وجلس على الكرسي اللي بجنبها وحظن يدها بين يديه وهو يدعي ربه انه يشفيها ويحفظها له من كل مكروه

ـــــــــــــــــــ .. ــــــــــــــــــــ .. ـــــــــــــــــ


العصر بالمزرعه

كانت كل عائلة الجد عبدالرحمن موجوده ماناقصهم غير تركي لانه يرفض يحضر اجتماعات او مناسبات العائله اما الضيوف كانو الى الان ماوصلو
فيصل بــ همس لجده : جدي متى بتفاتحهم بالموضوع
الجد : اي موضوع يافيصل
فيصل : موضوع ماجد وخطبته لــ منال انا اشوف الحين انسب وقت قبل لا يجون الضيوف
الجد : سلطان
ابو تركي : سم يبه
الجد بسخريه : ماني قايل سم الله عدوك اخاف اكون واحدآ منهم
ابو تركي من بين اسنانه : محشوم يالغالي
الجد وبدون مقدمات لانه متأكد ان سلطان بيوافق : ماجد ولد اختك بيخطب بنتك وكان يبيني اروح معه لبيتك ونتقدم رسمي بس اللي اشوفه اننا اهل ومالها داعي هالرسميات
ابو تركي بفرحه : ماجد رجال والنعم فيه ومنال ماهي لاقيتن احسن من ولد عمتها
الجد : منال الله يرزقها باللي يستاهلها ماجد يبي رنيم وش قلت
فيصل بسرعه : جدي يقصد انه يبي منال مو رنيم
الجد بعصبيه : مابعد خرفت يافيصل وادري وش انا اقول غير اذا انت عندك رأي ثاني
ابو تركي : بس منال هي الكبيره ومايجوز اختها تزوج قبلها
الجد بسخريه : ماااايجوز وبشرع مين هذي المهم انا قلت لك طلبنا فكر وشاور البنت وامها والله يكتب اللي فيه الخير
ابو تركي بقهر : ان شاء الله
ماجد وفيصل كان كل واحد منهم في قمة غضبه جدهم يفصل على كيفه وماله الا اللي براسه انتظر ماجد حتى تغيرت السالفه وبعدها قام وطلع من المجلس ولحقه فيصل
ماجد بعصبيه : جدك هذا وش يحس فيه والا السالفه دكتاتوريه
فيصل بحده : ماااااااجد احترم نفسك
ماجد : وربي من قهري يافيصل نقوله يمين يقول يسار يعني طز فيكم وكلمتي هي اللي بيمشي
فيصل : انا مقهور مثلك ويمكن ازود وبعدين لعلها خيره تعرف جدي مايقدم على خطوه الا وهو متأكد منها ممكن انه شاف رنيم هي اللي انسب لك
ماجد : ماكنت ابي الزواج اقنعتني فيه وحطيت منال براسي بالقوه ولما خلاص صرت ابيه تجون تقولون لا هونا من الزواج كله
عرف فيصل انه ماراح يوصل معه لــ حل وانسب شي يقول لــ امه ام ماجد هي تتفاهم معه لانها تعرف تهديه
راح فيصل للجهه الثانيه من المزرعه واللي فيها الفيلا الكبيره او ماوصل لها شاف راما تلعب في الحديقه اللي قدام الفيلا تذكر انه شافها قبل كذا في بيت عمه ابو راكان وعرف انها راما اللي ياما حكت له ليان عن محاولاتها في معرفة لون عيونها
فيصل وهو يمسح على شعرها : انتي راما صح
راما : صح عليك وانت العله زوج ليان
فيصل بصدمه : وليه مسميتني العله
راما ببراءه : مو انا ماما وبابا اللي يقولونه
فيصل بقلبه (ماكرهتهم من شي هين جت على الاسم خلهم يقولون اللي يقولونه )
فيصل : طيب ياشطوره روحي نادي لي .... (قبل لايكمل كلامه كانت راما طايره للبيت)
طلعت ليان لمدخل الفيلا بعد ماقالت لها راما ان فيصل يبيها
ليان : هلا فيصل طلبتني
فيصل : لا ماطلبتك وابي امي مو انتي
(فيصل كان فعلآ يبي امه عشان تكلم ماجد وتهديه لكن ليان فهمت انه رافض اي شي منها ) نزلت راسها تداري دمعتها ودخلت للفيلا بدون ولا كلمه .. ماقدرت تدخل للصالون اللي مجتمعين فيه عشان مايشوفون دموعها وقفت على جهه من الصالون بحيث مايشوفها غير ندى واشرت لها تجي
ليان بعد ماطلعت لها ندى : ندى قولي لعمتي ان فيصل يبيها برا
ندى بخوف : طيب بس ليه هالدموع
ليان وهي كل مامسحت دمعه نزلت غيرها : مافيني شي بس مصدعه شوي وبطلع ارتاح روحي قولي لعمتي قبل لايعصب فيصل
ندى : ليان تكلمي وش فيك ولا تقولين لي مصدعه محد يبكي من صداع
ليان : ندى قلت لك مافيني شي (تركت ندى بحيرتها وطلعت لــ جناحهم فوق )
كانت ندى متأكده ان هالدموع بسبب فيصل هي لها يومين ملاحظه ان بينهم شي .. طنشت سالفة انها تنادي امها وطلعت هي لفيصل
فيصل وهو يشوف ندى : بديت اشك اني اتكلم بلغه مو مفهومه انا طلبت امي مو انتي
ندى بعصبيه : مافيه امك الين ماتقول لي ليان اشفيها
فيصل بأستغراب : ليه شاكيه لك والا انتي محامي الدفاع حقها
ندى بجديه : فيصل انت تعرف انك لو تقتل ليان ماجت تشكي بس لا تظن اني بشوف دموعها والحاله اللي هي فيه واسوي نفسي مااشوف شي او اطنش لانك اخوي
فيصل : وليان وش فيها وليه اصلآ تبكي
ندى : هالسؤال انت جاوب عليه حركة بالسياره مافاتتني بس دام جدي ماعلق فضلت اني اسكت ومن شوي جت راما تقول لها ان فيصل يبيك طلعت لك طايره واخرتها ترجع من عندك وهي تتحاشى الكل ودمعتها على خدها
فيصل بصدق : ماقلت لها شي كل اللي قلته نادي امي وبعدين بدال ماانتي واقفه قدامي تحققين معي سوي خير وروحي نادي امي
حست ندى ان مافيه منه فايده تركته ونادت امها له
رمت ليان نفسها على السرير وهي مستغربه من هالحظ اللي دايم معاندها في هالمكان عاشت مع فيصل اجمل ليالي عمرها وفي نفس هالمكان هذي هي تبكي قسوته وظلمه
سمعت صوت فتحت الباب وفزت بسرعه تحاول تسمح دموعها لا احد يشوفها وتفأجات بأن فيصل هو اللي جاي (بعد ماقال لامه عن اللي صار وان ماجد معصب ويبيها تهديه طلب منها تشوف له الطريق عشان يطلع فوق بحجة انه بيبدل ملابسه قبل لا يجون الضيوف لكن هدفه ونيته انه يتطمن على ليان )
ناظرت ليان فيه بعيون ماتشوف من كثر الدموع تنتظر منه كلمه قاسيه او جرح جديد
فيصل بحنيه وهو يقرب منها : ليه هالدموع كم مره اقولك ان دموعك تعذبني
ليان بهمس وبدون شعور : ضمني
ضمها فيصل بدون اي تردد وهي استسلمت لدموعها وكانت تبكي مثل الطفل بين يديها
فيصل بعد ماحس انها هدت : زعلتي لاني طلبت امي
ليان بهمس : لا
فيصل : لاتظنين اني طلبتها لاني ماابي اطلب منك شي انا طلبتها لاني ابيها تروح تكلم ماجد ولو لي خاطر عندك ماابي اشوف هالدموع اغسلي وجهك وانزلي لهم تحت (وهو يرفع وجها له) ماابيهم يشوفون دموعك ولا ملامح الحزن اللي كاسيه وجهك ابيهم يشفون ابتسامتك والسعاده تشع منك
رفعت يديها تمسح دموعها وهزت راسها بمعنى طيب وراحت لدورة المياه تغسل وجها وبعد ماخلصت وطلعت مالقت اي اثر له كانت تتمنى انه موجود وتعتذر منه عن الكلام اللي قالته بس بطيبة قلبها ولانها تعودت ترضى بالشي القليل اقنعت نفسها انه مشغول مع ضيوفه ويكفيها انه طلع عشان يراضيها .. راحت للتسريحه تعدل مكياجها وتخفى اثار الدموع عشان خاطر فيصل اللي لو طلبها عيونها ماراح تردد ثانيه وحده قبل لا تعطيه

ــــــــــــــــ .. ـــــــــــــــــــ .. ـــــــــــــــــــــ

يتبـــــــــــــــــــــــــــــــع

جاء طبيب لين وكان معاهم اغلب الوقت عرض على طلال انه ينلقها للمستشفى اللي هو يشتغل فيه عشان ماتزيد عليه المصاريف اجرة المستشفى من جهه واجرة الطبيب من جهه لانه يعتبر كشف خارجي لكن طلال رفض وقال انه هذا المستشفى اقرب لشقته وماتهمه التكاليف مهما كانت
خلال تواجد الطبيب صحت لين لــ دقايق معدوده وبعدها رجعت نامت وهي مو حاسه بشي ولا مدركه لكل اللي حولها لكن الطبيب طمن طلال انها حاليآ نايمه وانه ماشي يخوف واحتمال ان الموقف اللي صار لها يكون سبب لصحوتها من الصدمه اللي كانت تعاني منها
نام طلال على الكرسي بجنب سرير لين وهي يحسب بالتعب مافارقها طول اليوم حتى ملابسه لو ماجبتها له كاميليا للمستشفى والا كان مازال لابس بجامته

...

كان الظلام يزحف ويغطي بعتمته كل المكان اللي حولها وكل ماهربت منه شافته يتسلل لها حتى غطى كل شي ومابقت الا الزاويه اللي هي محتميه فيها ناظرت حولها تدور على مهرب لكنها مالقت قرب منها اكثر واكثر ووقبل لا يبتلعها هالظلام شافت وجيه مخيفه تطل عليها منه وتمسك بيديها تسحبها لعتمته
كانت تصرخ وتحاول تحرر يديها لكن الصوت اللي سمعته صحاها من هالكابوس شافت طلال قدامها وهو ماسك يديها ويهزها عشان تصحى
حاول يضمها عشان يهديها لكنها دفته عنها وهي تنظر فيه نظرات كره
طلال : لين انا طلال ....
لين اللي قاطعته وهي تصرخ : اطلع براااااااااااااااااااا
كان طلال مصدوم من تصرفها بس مايقدر يطلع وهي كذا جت الممرضه على صراخ لين وحاولت تهديها
لين بصراخ ودموعها بدت تنزل : خليه يطلع براااااا
كانت لين تصرخ وتتكلم بالعربي والممرضه مو فاهمه عليها
فهمها طلال انها رافضه وجوده معها وبيطلع عشان تهدى لكنه قبل لا يطلع طلب من الممرضه تنته لها على ماهو يتصل على طبيبها الخاص
رمت راسها على مخدتها بعد ماشافته راح واستسلمت لدموعها كانت الممرضه تمسح على ظهرها وهي تحاول تهديها
ولما حست بأنها هدت شوي ونوبة بكاءه خفت جلستها ومدت لها كأس الماء
لين بعد ماشربت ولبللت حلقها اللي جف من صراخها : وش اللي جابني هنا
الممرضه اكتفت انها قالت لها : اغمى عليك وجابوك هنا والحين حاولي ترتاحين حتى يجي الدكتور
كانت لين تحس انها تايهه مو عارفه وش اللي صار لها ولا شنو اللي جابها هنا كل اللي تتذكره لحظات الرعب اللي مرت عليها والبدروم المظلم .. ضمت يديها على جسمها تسكن رعشة الخوف اللي اجتاحتها واستسلمت لدموعها من جديد
وماكان قدام الممرضه الا انها تستدعي الطبيب المناوب عشان يعطيها مهدى يهديها حتى وصول طبيبها الخاص

ــــــــــــــــ .. ــــــــــــــــ .. ــــــــــــــــــــــ

وصلو كل الضيوف من مده اهل وليد واهل ابو فهد وجارات ام ماجد واللي بالنسبه لها اكثر من خوات ام مشاري وام محمد اللي بنتها اريج صديقة ندى الروح بالروح
استقبلت ليان كل الضيوف وقامت بخدمتهم على اكمل وجه لكن اهل وليد امه واخته الكبيره كان لهم استقبال خاص ومميز من ليان لانها تعرف اشكثر فيصل متعلق بوليد واللي يحبهم فيصل هي تحبهم من كثر حبها له
فقدت لين ودعت لها ان ربي يشفيها وهي تنتظر يوم الجمعه بفارغ الصبر عشان تشوفها
كانت بسمه ونجلاء ورنيم معها يساعدونها لما شافو ان مافيه احد قاعد يساعدها ندى مشغوله مع اريج ولمى حابسه نفسها فوق ورفضت انها تنزل وليان حلفت على عمتها ام ماجد وخالتها ام طلال انهم مايسوون اي شي وانا الخدم مو مقصرين وقايمين بالمطلوب .. ام امها ومرت عمها ومنال مافيه امل يتحركون من مكانهم خوفآ على برستيجهم ولان لو يشوفون ليان تموت قدامهم مافكرو يساعدونها
ندى وهي جايتهم طايره ومعها اريج : نجلاء رنيم اتركو اللي بيديكم وتعالو معنا
نجلاء : وش فيه ووين نجي معكم
اريج وهي قاطه الميانه من اول مادخلت المزرعه : سالفه خاصه بالعوانس ماينفع يسمعونها المتزوجات
نجلاء : مااقدر اخليهم لازم اساعدهم شوي واجي
رنيم : حتى انا
ندى : اقول امشو لا احوسكم الشغل والكرف للمتزوجات بس هذي ضريبه بسيطه على السعاده اللي هم فيها
ليان : ان صارت حالات طلاق جماعي اعرفو انه من عين هالمهبوله
بسمه وهي تبي تعرف وش السالفه اللي عندهم : انا عني عانس وسالفة زواجي اشاعه لا اكثر يعني اجي معكم
ندى : ايه صدقتك وهاللي واقف بجنبك
بسمه وهي تناظر في ولدها منصور : هذا سلمك الله احد الأثار الناجمه عن هالاشاعه
نجلاء بمزح : الوعد عن فهد ان ربي كتب
اريج : ايه تعجبيني ولا تتركينه الا وهو مطلقها
بسمه : هذي والله اللي بذبحها
ليان : نجلاء رنيم احنا خلصنا روحو معهم قبل لا نرتكب في هالثنتين مجزره
طلعت نجلاء ورنيم مع ندى واريج برا الفيلا
رنيم : ها شنو هالشي الخطير عندكم
ندى بهمس : اسمعو الشباب جالسين بالحديقه الخلفيه يلعبون بلوت وانا اعرف مكان نقدر نشوفهم ومايشفونا خلونا نروح نتمقل فيهم وكل وحده تختار لها واحد
نجلاء بصدمه : وشو
اريج : شوفو انا وندى اول من نختار لانه احنا اصحاب هالفكره وبعدين انتي ورنيم تختارون من الباقين
رنيم وهي تجاريهم بتشوف وش نهايتها : وبعد مانختار وش نسوي
ندى : وش تسوين يعني اكيد مالك الا اذا نامو الناس تقومين تهجدين وتطلبين ربك طول الليل انها يزوج منه وعاد انتي وحظك
نجلاء : واللي ماراح تختار خير شر ولا تبي الزواج بكبره وش تسوي
اريج : هذي تروح تكشف على قواها العقليه لانها اكيد يامهبوله او مجنونه مافيه سبب غيرهم
بعد حرب طاحنه وافقت نجلاء ورنيم يرحون معهم بعد ماحلفت لهم ندى ان الشباب مايقدرون يشوفونهم ولانهم محتاجين نجلاء تقول لهم من فهد عشان يكنسلونه من الحسبه لاتذبحهم بسمه
كان فيه في الجهه الخلفيه غرفه صغيره خاصه بأجهزت المسبح تسلقتها ندى واريج وساعدو نجلاء ورنيم عشان يطلعون معهم
نامو على بطونهم ووجيهم للجهه اللي فيها الشباب عشان يشوفونهم وهم لا
نجلاء : شفتو اللي لابس غتره بيضاء من بين الشباب الاربعه اللي جالسين هو فهد
ندى بحسره : وشفتو اللي جالس مقابل لفهد ويضحك هذا اللي مافيه امل يتزوجني (كان راكان وندى باصمه بالمليون انه مستحيل يتزوجها بعد كل مواقف النحس اللي شافها فيها)
اريج : اجل دوري غيره او اذا جاء رمضان ترقبي ليلة القدر (وبشهقه) ياويل قلبك يااريج هالطخمه انسي والا ملاك
ندى بشفاحه : اي واحد
اريج : شفتي الثلاثه اللي واقفين هو اللي بالنص وربي انه عذااااااب
اريج وهي تحاول تنقذ نفسها من ندى اللي انهالت عليها بالضرب والتكفيخ : وش فيك ليكون حاطه عينك عليه انا شفته قبل
ندى : ياحيوانه هذا فيصل اخوي وزوج ليان
اريج بحسره : دامه زوج ليان اجل الله يهنيهم خلاص (وهي تهز راسه بقوه) شلته من مخي خلاص طاح
كانت رنيم عيونها مركزه على ماجد اللي واقف بجنب فيصل وواضح انه يناقشه بشي وهو معصب للحظه تمنت تعرف وش اللي مخليه معصب كذا لكن بعد ماتذكرت موقفهم اللي بالمستشفى توقعت ان هذا طبعه على طول
اريج : اجل اللي بجنبه
ندى : اي واحد اللي على يمينه او يساره
توقفت انفاس رنيم لا شعوريآ وهي تنتظر اريج تحدد اي واحد
اريج : لا اللي على يساره وش ملحه وهو يضحك مو الثاني ياكافي معصب وكأن عنده النيه يقتل احد
ندى : توني عرفت من ناحسني في هالدنيا مافيه امل اعرس دامك صديقتي
اريج بصدمه : يعني انا منحوسه
ندى : اخترتي فيصل ومتزوج واخترتي وليد وبعد متزوج وحتى لو قلنا اخترتي ماجد اللي على قولتك معصب اليوم بس خطبوله
اريج : المعصب هذا هو ماجد اخوك
ندى : ايه خبل الشكوى لله والا احد اليوم خطبوله او بيخطبون له ويعصب انا لو منه كان احتفلت وصمت شهر شكر لله
اريج : ومن هالمسكينه اللي بليتوها فيه ياخوفي يقتلها ليلة دخلتها
ندى بمزح : خطب نجلاء
نجلاء بصدمه : صاحيه انتي
ندى : ههههههههههههه لا وربي امزح انتي المفروض تزوجين واحد من اللي شالوك لما انلدغتي وبما ان فيصل محجوز مالك الا خالد
نجلاء وهو شوي وتصيح : اسكتي لاتذكرين الله لايعيده من يوم
كانت رنيم معهم بجسمها اما عقله كان مشغول باللي خطبها ماجد ماتدري وش سر اهتمامها فيه ولا تدري ليه حزنت لما عرفت انه خطب حاولت تبعد هالافكار عنها لانه حتى لو ماجد ماخطب هي المفروض ماتفكر بواحد عصبي مثله مو كافي عليها اخوها تركي اللي عقدها بعصبيته حتى صارت من تشوفه ترتجف من الخوف
اريج : وهاللي بس فاكن خشته ويضحك تزوج خلاص والا بس خاطب
ندى : لا هذا متزوجن زواج يسود الوجه
اريج : اشلون
ندى : متزوج شغالتهم السيريلانكيه
اريج : افا .. طيب اسمعي انا بسوي فيه خير واخذه
ندى : غيرك كان اشطر قلت لفيصل هالكلام بس اللي فهمته منه انه يحبها ومتعلق فيها لكن انا بحاول بفيصل يقنعه يتزوجني
اريج : وانا وش استفدت
ندى : ياحبك للاستعجال يالخبله اذا تزوجني بحاول اأثر عليه انا وفيصل ونقنعه يطلق هالسريلانكيه ويأخذك اقلها تصير ضرتي سعوديه مثلي
اريج : اذا كان كذا اتفقنا .. بس خلينا ندور واحد انخليه احتياط لو مااقتنع زوج السيريلانكيه
ندى : معك حق بس مابقى غير راكان ومافيه امل يتزوجني ومشاري اللي عاطينا ظهره متزوج وعنده عيال وخالد ماينفع لنا هذا اللي شال نجلاء لما لدغها الثعبان وطبعآ شافها واذا اخذته بيجلس يقارن بين وبينها وانا اللي بطلع خسرانه (لان نجلاء احلى منها)
نجلاء : الخبله انا ورنيم اللي مطاوعينكم يله بس نزلونا من هنا مثل ماطلعتونا
نزلت ندى واريج بسهوله ولما شافتهم نجلاء بيرحون ويتركونهم (وهي تحاول ماتعلي صوته عشان مايسمعونهم الشباب) : وين تعالو ساعدونا
ندى : محد قالكم طاوعونا
عذبوهم شوي وخلوهم يعتذرون منهم (نجلاء ورنيم) اشد الاعتذار ويوصفونهم بأجمل الكلمات ويدعون لهم دعوات مخلصه وصادقه بالزواج حسب طلب ندى بعدها عفو عنهم ونزلوهم

ــــــــــــــــــــ .. ـــــــــــــــــ .. ــــــــــــــــــــــ

انتهت العزيمه وكلن راح لبيته ومابقى غير عائلة الجد عبدالرحمن
استغلت ليان هدوء الوضع وانهم مازالو كلهم تحت وطلعت فوق عشان تشوف وش قصة لمى اللي حابسه نفسها بالغرفه ولا طلعت وحتى لما منال طلعت لها رفضت تفتح لها
دقت على باب غرفة اختها بهدوء وجاها صوت لمى المتعب : مين ؟
ليان : انا ليان لمى لو لي خاطر افتحي
قامت لمى من السرير تفتح الباب لانها عارفه انه مصيرها تفتحه وان منال بتشاركها النوم بنفس الغرفه دامهم في المزرعه وكلهم موجودين فصعب انها تنام بغرفه بروحها لانها عارفتها مستحيل تشارك عمتها ام ماجد وندى بغرفتهم
ليان بحنيه : لمى اشفيك اذا تعبانه بقول لراكان يوديك للمستشفى مو حل حبستك بالغرفه
لمى ودموعها رجعت تنزل : مافيه مستشفى بيعالجني من اللي انا فيه
ليان بخوف : ليه اشفيك تكلمي لاتخوفيني اكثر
لمى : وليه تخافين على اخت ماشفتي منها غير العذاب والاذيه المفروض تكونين مبسوطه ياليان
ليان بصدمه : مجنونه انتي اختي سعادتك من سعادتي وحزنك من حزني واللي يمسك يمسني لمى ريحيني من هالعذاب وقولي اشفيك
لمى وهي تضمها وتصيح : مافيني شي بس ضيقه احس اني مخنوقه ومو قادره اتنفس
ليان بأصرار : اكيد فيه سبب لــ هالضيقه
لمى مالقت قدامها غير انها تتحجج بسالفة خالد : بقولك بس ماابي احد يعرف في هالموضوع انا تعلقت بخالد وحبيته (ولما شافت نظرات ليان ) لا تفهميني غلط مافيه اي شي بينا مجرد حب بقلبي محد يدري عنه حتى هو وامس عرفت انه طلب من اهله يخطبون له نجلاء وهذا هو سبب ضيقتي
ليان بحنيه : ياعمري انتي صدقيني لو هو من نصيبك ماراح لغيرك ولعلها خيره ياقلبي ولاتضيقين صدرك بالعكس تمني له الخير وادعي ربي يرزقك بأحسن منه
لمى وهي تتذكر منال وتخطيطها على فيصل : لو فيصل تركك وتزوج غيرك لاسمح الله هذا بيكون ردك
حست ليان ان قلبها بيتوقف من قو هالكلمه وهي مجرد كلمه اجل لو كانت حقيقه الله لايقوله وش ممكن يكون مصيرها
مسكت يد لمى وجلستها معها على السرير وبكل هدوء : ماراح اقولك انه انا غير لان بينا زواج وعشره لاني ادري ان هالشي متعب وصعب دام هالانسان سكن قلبك لكن بقولك شي ممكن يريحك هذا اذا ماكان اكيد
كنت لما اتعذب من امي وابوي اكره نفسي وتوصل فيني اتمنى الموت واندب حظي وليه انا كذا ومو مثل باقي البنات وبيوم فتحت على صوت القرآن وسمعت الشيخ يتكلم عن قصة ارمله مات زوجها وترك لها خمس اطفال بدون معيل ولا دخل يصرفون منه يأست من الدنيا وبكت ليلها ونهارها وندبت حظها وفي يوم سمعت الشيخ يقول اللي مهموم او عليه دين او ضاقت فيه الدنيا عليه بكثرت الاستغفار فقد قال الله تعالى ( فقلت أستغفروا ربكم إنه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا.. سورة نوح) وقوله صلى الله عليه وسلم (من أكثر من الإستغفار جعل الله له من كل هم مخرجا ومن كل ضيق فرجا) فصارت تكثر من الاستغفار ومامر عليها ستة اشهر حتى جاء تخطيط مشروع يمر بأرض لهم ثمنت بالملايين وهي ماكانت تسوى شي ولا فيه امل احد يشتريها وولدها الكبير صار الاول على منطقته وحفظ القرآن كاملآ وامتلا بيتهم من الخيرات وعاشو بأحسن حال بعد الفقر والجوع والهم اللي عانوه (قصه حقيقيه)
فقلت لنفسي ليه مااصير مثلها واكثر من الاستغفار والحمدلله يمكن ماتغيرت معاملة امي وابوي لي لكن ربي خفف وطئتها على نفسي ورزقني بفيصل اللي ماكنت حتى احلم فيه وحتى لما تدبرت لي مكيده مااعرف وش هي ولا من مين سواها لي وعاملني فيصل عليها بقسوه في بداية زواجنا ربي كشف براءتي وعشت بعدها بسعاده معه .. اكثري من الاستغفار وصدقيني يالمى ربي بيغير من حالك للاحسن ويرزقك باللي يستاهلك ويزيل الهم والحزن من قلبك
تركت اختها تفكر بالكلام اللي قالته لها وراحت لجناحها وشافت ان فيصل سبقها وبدل ملابسه
ليان : اسفه كنت عند لمى ومادريت انك جيت
فيصل وهو يوقف قدامها : عادي مالي الا خمس دقايق ( وهو يرفع يديها ويبوسها) تعبتي اليوم
ليان بأبتسامة خجل : شوي مو كثير وبعدين الكل ماقصر معي بالمساعده
فيصل : الله يعطيك العافيه حبيبتي ويلا بدلي ملابسك عشان تنامين
هزت راسها بالموافقه واخذت شنطتها اللي مجهزه فيها لبسها وراحت لدورة المياه تبدل .. لبست قميص من اللي شرتهم لها لين مره جرئ ولا عمرها فكرة تلبسه بس حبت اليوم انها تكسر حاجز الخجل عشان خاطر فيصل
طلعت من دورة المياه وهي بمنتهى الجمال لكن اللي شافته صدمها وخلى الدموع تتسابق لعيونها
كان فيصل اخذ له غطاء ومخده ونايم على الكنبه اللي في الصالون
رفع فيصل الغطاء عن وجهه لما ماحس بحركه وشافها مازالت واقفه عند باب الحمام وهي بقمة جمالها والدموع على خدها
حست انها اهانت نفسها بما فيه الكفايه وفرضت نفسها عليه فرض رجعت للحمام وفسخت القميص اللي كانت لابسه وجلست تقطع فيه بكل قوتها رمته بسلة النفايات بعد ماخلصت منه ولبست لها بجامه وغسلت وجهها وبعدها طلعت بدون لا تناظر فيه
ارتمت على سريرها تدور على النوم لعل وعسى ينسيها هالعذاب لو فتره لكن هالشي كان مستحيل وقضت ليلها ودموعها ماجفت
اما فيصل فــ جلس يشتم نفسها على غباءه ويوصف عمره بأبشع الصفات لانه زعلها وجرحها ولانه فوت على نفسه ليله كان ممكن تكون من اجمل الليالي << هذا هو تفكير الرجال >> خليك من تفكيرهم وطسي كملي البارت

ـــــــــــــــــــ .. ــــــــــــــــــــ .. ـــــــــــــــــــــ

طلع الدكتور من عند لين بعد ماجلس معها فتره كافيه وشرح لها شرح بسيط عن اللي مرت فيها وعطاها حبه عشان تساعدها على النوم
طلال بلهفه : كيفها الحين
الدكتور : عطيتها حبه راح تساعدها على النوم لكن رفضها لك محيرني غير اذا كان فيه شي انت ماقلته لي
طلال بضيقه : قبل لايصير لها هالحادث كان فيه خلافات بينا
الدكتور : مااتوقع انها خلافات بسيطه
طلال : معك حق
الدكتور بعد ماحس ان طلال مو حاب يوضح اكثر : على العموم هي تجاوزت الصدمه صحيح ممكن تعاني من كوابيس واحلام مزعجه وصعوبه في النوم لكن الشي الاعظم وهي الصدمه زالت .. هي حاليآ ماتذكر غير حياتها اللي قبل واخر لحظاتها في البدروم اما مامرت فيه طول هالاسبوع طبعآ ماتذكره
طلال : وسألت عن وضعها في هالاسبوع او لا
الدكتور : ايه سألت بس قلت لها انها كانت بحالة صدمه وغير مدركه للي حولها
طلال : بس
الدكتور : ايه لانه صعب اقولها اليوم وهي توها صاحيه من الصدمه عن كل اللي صار لها هالاسبوع لانه بيشكل لها صدمه جديده
تنفس طلال بأرتياح لانه ماكان يبي لين تعرف شي عن هالاسبوع مايبيها تحس بالشكر تجاهه او انها ممنونه له بشي لان كل اللي سواه لها ولا شي مقارنه بالعذاب اللي عاشته معه
انتظر حتى قالت له الممرضه ان لين نامت وتسلل لغرفتها بهدوء عشان يكون معها وقريب منها لين صارت الهواء اللي يتنفسه و حتى النوم ماعاد يقدر ينام بمكان هي مو فيه
اكتفى بضمة يدها بين يديه بعد ماكان ينام الا وهو ضامها هي على صدره وجلس على الكرسي اللي بجنبها يتأمل وجها حتى غلبه النوم

ــــــــــــــــــــ .. ـــــــــــــــــــــــــ .. ــــــــــــــــــــــــــــ

- هل بتعرف لين وش سوا لها طلال طيلة هالاسبوع او لا وشنو بتكون ردت فعلها تجاه طلال لو عرفت
- هل بيكنسل فيصل السفر لندن بعد مايعرف بتحسن لين او لا
- هل انكسرت شوكة منال بسبب اللي صار لها او بتستمر بخططها الشريره ضد ليان وهل بيكون لــ لمى دور فيها او لا
- وش بيكون رد رنيم هل بتوافق على ماجد او ترفض
- خالد تعلق قلبه بحب نجلاء هل جده بيساعده على تتويج هالحب بالزواج او انه بيفرض عليه وحده من اختياره مثل ماسوا مع ماجد
- والسؤال الاهم وش بيكون مصير منال ولمى بعد هالمصيبه






محبتي

’,

اتمنى يعجبكم الباارت

وياليت المشرفات يحذفون البارت الي بلون الحمر متكرر مرتين

وان شاء الله ارجع لكم ببارت جديد على حسب ظروف الكاتبه

تجيآآتي