الجزء السادس عشر :


الروتين اليومي له مزايا لا يعرفها إلا الذي كان يكره بشده هذا الروتين , ماذا لو أستمرت حياتنا

كما كانت .. يتيمات و فقيرات بدون مستقبل واضح .. لكن كلنا كنا في نفس القارب ...

الرجل في حياتنا لم يوجد و اعتقدنا انه لن يوجد لكن خالد أول رجل يدخل حياتنا و يعقدها ....


.................

مناير : يعني شسوي خلاص هي تبيه و هو يبيها .

خالد : و أنا مالي راي .

مناير : الراي رايها وانت بس زوج أختها .

خالد : انا اللحين ولي أمرها .

مناير : شكليا بس , لكن الواقع ان اللي يحل و يربط هي لأن هالشي يخصها .

خالد : الظاهر انتي عاجبج ان اختج تزوج يوسف .

مناير : شفيه يوسف ؟

خالد : مايناسبها .

مناير : مايناسبها كلمه فاضيه ما تعني إلا الرفض بدون سبب.

خالد : يعني كلامي فاضي ؟!

مناير : لا تقولني كلام ماقلته , أنت فاهم قصدي .

خالد : أوكي خليها تزوجه بس مسألة ان الخاله سلمى و البنات يعيشون في بيته مستحيل .

مناير : هذا راجع للخاله سلمى اللي بختيارها تبي تعيش في بيت ولدها و من المنطقي أن خواتي

الصغار يعيشون معاها .

خالد : و خواتج راضيات ؟

مناير : خواتي أمرهم بيد خالتي سلمى و بيعيشون في المكان اللي راح تعيش فيه لين كل وحده

يجيها نصيبها و بعدين هم ماراح يعيشون في بيت غريب راح يعيشون في بيت أختهم .

خالد : انا وعدج اشتري لهم بيت و يعيشون مستقلين بدون منة أحد , ومن حقهم عليج تعلمينهم

بهالشي .

مناير : هم يدرون , حتى الخاله سلمى تدري بوعدك بس مثل ماقلت لك هي تفضل تعيش في

بيت ولدها .

خالد : ولدها اللي نبذها كل هالسنين , ولدها اللي يشك في شرفها ؟!

مناير : بس قصر حسك , ولدها و هي امه هذي حقيقه ماراح تغير ومهما ضرها بتم تحبه .

خالد : تدرين ان يوسف الخبيث قال لفواز عن كل الأفكار المريضه اللي معششه في مخه و امس

فواز كان عندنا منهار ونام عند سلمان .

مناير : فواز مو صغير ومرده بيعرف الحقيقه من أمه وقتها يقرر منو يصدق وحنا مالنا دخل .

خالد : شلون مالنا دخل ؟

مناير : مو ملاحظ ان الخاله سلمى صايره محور حديثنا دايما .

خالد بتهكم : الظاهر نسيتي سبب زواجنا .

مناير : لا مانسيت بس الظروف تغيرت .

خالد : فعلا الظروف تغيرت و قمت أشك في قراري .

مناير : يعني شايف ان زواجنا ماله لزمه ؟

خالد : بالظبط , إذا ما أقنعتي الخاله سلمى تجي تعيش في البيت اللي راح اشتريه لها هالزواج

ماله لزمه .

مناير بتحدي : اجل اسمعني عدل خالتي سلمى بتعيش في بيت ولدها و خواتي وأنا بنعيش معها

في بيت يوسف .

خالد : يعني تبين تطلقين قبل عرسج .

مناير : قبل أحسن من بعد العرس , واضح ان المسأله كلها فاشله .

خالد : أنا ماراح أطلق بخليج معلقه لين أطيحين اللي براسج و تسوين اللي أبيه .

مناير : لا تعاند يا خالد ماراح يخسر إلا أنت .

خالد : تحديني ؟

مناير : حنا مو مراهقين ندخل في لعبة تحدي حنا كبار و مدام ماتفقنا خلاص ننهي كل شي بهدوء .

خالد : مثل ماقلت لج ماراح أطلق و العرس ملغي .


....................

لا تعتقدو ولو لثانيه أني أستسلمت , إن كان يريد لوي ذراعي و إجباري على عيش حياة

المعلقة بعد أن نجحت بالهروب من حياة عانس غير متعلمه , فهو مخطأ سأكون زوجه له برغم

عنه ...

عجيب أمر الغضب كيف يحث الجرئه على الظهور ...

...................

مضاوي : مناير شقاعده تسوين .

مناير : مثل ما انتي شايفه أشيل أغراضي بالجنطه .

مضاوي : شايفه بس ماني فاهمه .

مناير : أفهمج , أنتي بعد يومين بتكونين في بيت زوجج و خواتي والخاله سلمى راح يسكنون

معاج و أنا مو حابه أطلع من بيتي إلا لبيت زوجي .

مضاوي : يعني اللحين أنتي بتروحين لبيت خالد .

مناير : ايوه بروح لبيت زوجي .

مضاوي : والعرس ؟

مناير : العرس و مظاهره كلها شكليات , يعني نقدر نسوي العرس بنفس الوقت او نلغيه مو

مشكله .

مضاوي بقلق : مناير شفيج ؟! .. أحس من طلع خالد من عندنا وانتي مو طبيعيه ... لا يكون

اصر انج تكونين معاه في بيته اليوم .

مناير ضاحكه : ضحكتيني يا مضاوي وانا مالي خلق اضحك , لا السالفه مو جذيه..

مضاوي : مناير مهما صار بينا انتي اختي و تعرفين ان اي شي تقولينه لي مايطلع , إذا في شي

قولي لي .

مناير : خالد بيعلقني .

مضاوي : شلون يعني بيعلقج .

مناير : يعني لا متزوجه و لا مطلقه .

مضاوي بدهشه : ليش ؟ .. شنو السبب ؟

مناير : ما في سبب بس تهاوشنا و عصب و قال العرس ملغي و انه بيخليني معلقه .

مضاوي : واضح انج ماتبين تعلميني بالسبب , بس على كل حال يمكن هو معصب اليوم اكيد

باجر بيجي و يعتذر و بتزوجون في موعدكم .

مناير : لا هالشي ماراح يصير .

مضاوي : والحل انج تقطين نفسج عليه .

مناير : الحل اني اكون واقع في حياته .

مضاوي : ماني فاهمه .

مناير : راح تفهمين بعدين اللحين لازم اروح السايق برى .

مضاوي : اي سايق ؟

مناير : دقيت على شوق وقلت لها ادز سايقهم .

مضاوي : مناير طلبتج لا تهورين وتروحين راح يطردج لا تفشلين نفسج و تهينين كرامتج .

مناير في محاوله للهروب : شرايج تضميني و تعطيني دعم معنوي .

مضاوي تحضن مناير : طلبتج لا تروحين .

مناير : دايما كنتي تثقين برأيي , حيل تغيرتي و كل شي أقوله تشككين فيه .

مضاوي : مو صحيح للحين أثق برأيج حتى لو ماطعتج .

مناير : أثبتي لي .

مضاوي مستسلمه : روحي الله معاج يا أحلى عروس .

........................

لم تريد مناير ان تصرح بما حدث بينها و بين خالد لكن يمكنني ان أخمن سبب المشكله ..من

المؤكد زواجي من يوسف أصاب خالد بلوثه عقليه !

خائفه على مناير جدا .. لم أردها أن تذهب ولكن أي حق أملك عليها , أنها تفعل ما تريد كما

فعلت ما أريد ...

في النهايه ها هي تركتني في مواجهة الخاله سلمى و أخواتي في مهمه تعرف جيدا أني لا أجيدها

..............

الخاله سلمى : شلون يعني راحت مع خالد ؟

مضاوي : زوجها ويبيها في بيته .

الخاله سلمى : ما هقيتها من مناير تروح معاه وهم للحين ماعرسو .

مضاوي : ياخاله تراها زوجته على سنة الله و رسوله و العرس شي شكلي ما يقدم و لا يأخر .

الخاله سلمى : و لو الأصول أصول , ليش أجل من الأول رتبو لعرس و مددو في الوقت .

مشاعل : اي و الله ليش تسوي جذيه عن جد سخافه .

منيره : للأسف مناير طاحت من عيني .

الخاله سلمى : لا يا منيره عيب تقولين عن أختج جذيه , أكيد عندها اسبابها و بالأخير مثل ماقالت

مضاوي هي زوجته على سنة الله و رسوله و العرس بس شكل قدام الناس .

مضاوي : خلاص عاد لا تكبرونها وبس يامشاعل مسحي دموعج خلونا ندعي الله يوفقها و

يهنيها .

الخاله سلمى ترفع يديها لسماء : يا الله أنا طالبتك أنك توفقها وتسترعليها .

البنات : آمين .

.........................

منيره و هي تبكي : بسج يا مشاعل بجي .

مشاعل : حتى أنتي تبجين .

منيره : اكيد ببجي هذي اول ليله ننام فيها في البيت بدون ماتكون مناير معانا .

مشاعل :خلاص أجل لا تقولين لا تبجين , احس قلبي يتقطع , تكفين منيره دقي على جود اسأليها

عن مناير .

منيره : لا فشله بهالليل , باجر بكلمها .

مشاعل : شيصبرنا لباجر .

منيره : الله يعينا , عن جد مناير حركتها سخيفه ليش ما كلفت نفسها وودعتنا على الأقل.

مشاعل : يمكن مابغت تروح و عيونها متفخه من البجي .

منيره في ضحكه تخالط البكاء : هههههههه هذا تفكيرج مو تفكير مناير .

مشاعل كأنها تحدث نفسها : ليتها خلتني اسوي لها مكياج و اسرح شعرها عندي احساس انها

راحت مبهذله , عن جد فشيله قدام زوجها .

منيره : شوفي مناير فعلا ما تهتم بنفسها بس أكيد بتكشخ له مهما يكون هي اللحين زوجه و

عارفه اللي مفروض تسويه .

مشاعل : ياااااربي ياشين اليتم .

منيره : شجاب الطاري ؟

مشاعل : تخيلي امي و ابوي عايشين اكيد اختلف الوضع , يعني اكيد ما تجرْء خالد و غصب

مناير تكون في بيته الليله قبل العرس , و اكيد ماكنا راح نشيل همها لأن امنا بتقوم بهالدور

و بتنصحها .

منيره : معاج حق , حتى من دون سالفة زواج مناير ليتهم كانو حيين جان اللحين قاعدين في

الحوش نتعشى و نسولف و نضحك .

مشاعل و منيره دخلو في نوبة بكاء مر ....

.....................

تبا تكاد رئتي ان تتقطع أثناء محاولة التنفس بين شهقه و الأخرى , بكاء مر يعتصرني ...

لا أكاد اصدق ان اليوم ودعت مناير , كم قضينا من الوقت في غرفتنا هذه نتسامر ونضحك

و نبكي و نتأمل و نخطط و ننجح و نفشل , كم وكم كانت أختي و رفيقة روحي ...

رؤية فراشها خالي تبث كل ألم أختزلته طوال هذه السنين , لم أحزن على فقد أمي و أبي

بقدر ما أنا حزينه الآن على فقد مناير حتى لو لم يكن فقدا أبديا ... كيف لا أحزن .. كيف لا

أبكي .. و أنا أريد الآن أن اضمها بقوه لصدري لكن لا أقدر فهي الآن في أحضانه ..

...................


أبدو الآن كطفل يعرف أنه سيعاقب لا محاله على خطأ لم يقصد أرتكابه لكن شقاوة الطفوله

أعجوبه ...

أستقبلتني شوق و هي غير متأكده مما أفعل و لما أنا هنا , أدعيت أن خالد هو من أراد تواجدي و

كل ما عليها فعله هو ان توصلني لجناحه و هكذا فعلت ...

والآن أجلس على هذه الكنبه المريحه بوضعيه غير مريحه أبدا أنتظر بفارق الصبر وصوله ..

.................


جود تتثاوب : يعني اللحين مقعدتني من نومي عشان تقولين لي انج مو مستوعبه إذا كنتي بحلم و

لا بعلم .

شوق : اي ..

جود : بعلم قاعده و مبققه عيونج , يله لو سمحتي سكري اللمبه و الباب وراج لأن النوم سلطان .

شوق : يااااربي جود صحصحي معاي ماتبين تعرفين ليش مقعدتج .

جود : ليش ما طلعين زوجة أبوي من مخج و تريحين نفسج .

شوق : اللحين اللي في مخي زوجة اخوي مو ابوي .

جود : منو زوجة اخوج ؟

شوق : قومي غسلي وجهج عشان تصحصحين حتى زوجة اخوج نسيتي اسمها .

جود بنفاذ صبر : اخلصي شفيها مناير ؟

شوق : اللحين هي بجناح خالد .

جود : شنو ؟ ... ليش ؟

شوق : ما ادري دقت علي قبل ساعه و قالت دزي السايق و ماناقشتها ودزيت عليها السايق

حسبالي بعني يبونه بشغله بس تفاجأت فيها قدامي و تقول خالد موصيها تكون بجناحه قبل

مايوصل .

جود : شعنده خالد بهالحركه الجريئه ؟ّ!

شوق : ما أدري للحين قاعده اقلبها في مخي .

جود : يعني الأخ بهذلنا و كل يوم بالسوق و آخر شي زوجته في البيت بدون طقطقه و لا عرس

حتى ماكلف نفسه يجيبها للبيت بنفسه و الله عيب .

شوق : شرايج تفتحين مخج شوي و تفكرين , هي اللي دقت و قالت دزي السايق و خالد ماراح و

جابها .

جود : شقصدج ؟

شوق : فكري معاي , لو هو اللي يبيها تجي حتى بدون مايجيبها على الأقل طلب منا نستقبللها او

حتى نرتب غرفته و نجهزها , يعني لازم على الأقل يعطي خبر من اي نوع .

جود : يعني قصدج هو ما يدري بوجودها .

شوق : ما ادري كلها تخمينات .

جود : أنزين روحي نامي و خليني انام و اليوم الخبر بفلوس بس باجر ابلاش.

شوق : وشيصبرني لباجر .. على كل حال تصبحين على خير .

.............................

يوسف دائما كان كقطاع الطرق كلما اردت أن اصل و جهتي أجده يقطع علي طريقي , اتمنى لو

أقدر على دق عنقه و سحقه إلى أن يتبقى رماده لتذروه الرياح إلى الفناء ...

وتبا لك أيضا يا مناير , انت مشكله خلقتها لنفسي و الآن علي أن احل العقده ...

...............

خالد متفاجأ من وجود زوجته : مناير ! ... انتي شتسوين هني ؟! صاير شي ؟

مناير تحاول ان تواري خوفها : مو صاير شي الموضوع كله بالمختصر أني زوجتك و هذا

مكاني .

خالد : لحظه خليني استوعب ..

يعني اللحين أنتي جايه لبيتي عشان تفرضين وجودج بحياتي ؟!

مناير : مااني محتاجه افرض وجودي انا اصلا موجوده بحياتك .

خالد : تعتقدين بوجودج هني في بيتي انج انقذتي نفسج من حياة المعلقه .

مناير بتحدي : انا زوجتك و في بيتك و ماراح اطلع من هني إلا إذا طلقتني .

خالد : راح تطلعين من هني بأختيارج وبدون ما أطلقج وعد .

مناير تستفزه : تعشيت يازوجي العزيز او تبيني اجهزلك العشى.

خالد وهو يتفحصها ببطء : اللحين اللي أفكر فيه هو الحلى ...

..............

من المرعب ان يفرض شخص أقوى منك نفسه على مساحتك الشخصيه ليصبح أقرب لك جسديا

بشكل مستحيل تجنبه ....

.............

مناير المرعوبه : دخيلك خالد بس بعد عني .

خالد بتهكم : وين راحت الشجاعه اللي جابتج لحد عندي ؟

مناير تلتقط أنفاسها : ما جيتك لأني شجاعه أو لأني أبيك .

خالد : أدري .. أنتي جيتي لأنج خفتي فرصتج تضيع .

مناير تحاول الأفلات من يده : أنت فعلا مغرور إذا شايف نفسك فرصه لي .

خالد : و أنتي للحين ممتازه في الجذب...

مناير : أنت اللي جذاب سويت لي قصه عشان تقنعني اتزوجك قصه هدفها الظاهري انك ترد

الخاله سلمى لعيالها بس انكشف جذبك هاذي هي بترد لبيتها مع عيالها وانت راح تنجن وتحاول

تدوس علي عشان تمنع الخاله سلمى تجتمع مع عيالها ! ..ابساطه انت ممثل بارع ..

....................

عجيب كيف أصبحت يدي غريبه و تحركت لا إراديا لتستقر على خد مناير في صفعه قويه

طرحتها أرضا ...

مناير لها لسان حاد كا سكين يشبه ذاك الذي تملكه أختي شوق ...

تبا لها و لهم ... أنا لست ممثلا !

...................

خالد : ياويلج يا مناير إذا طولتي لسانج علي مره ثانيه , انتي في بيتي اللحين و ماابي اسمع منج

إلا اللي يرضيني ....

مناير مازالت تضع يدها على خدها المتألم و تصارع رغبه قويه في البكاء ...

خالد : و إذا مو عاجبج تقدرين من باجر تروحين لبيت أهلج أو خليني اصحح لبيت زوج أختج

.... ليش ماتردين ؟ ... لا يكون عضيتي علي لسانج بعد الطراق اللي أخذتيه مني .

....................

تجاهلتني و أكتفت بوضع رأسها بين يديها لتخنق عبراتها ... و تجاهلتها بالمقابل و غادرت هاربا

لأصطدم بالأخرى ....


.....................


خالد : أنتي للحين ماشربتي حليبتج و نمتي ؟

شوق : تطنز علي .

خالد : اي اتطنز عندج مانع .

شوق التي احست بمزاجه المتعكر : لا ما عندي مانع , إلا شلون مناير ؟

خالد بعصبيه: وانتي شعليج في مناير ؟

شوق : أنا بس أسأل إذا ناقصها شي ؟

خالد : لا أنتي تسألين لأنج فضوليه و الظاهر حابه تنامين باجيه .

شوق تتفادى المواجه : تصبح على خير .

....................

غبيه يا مناير .. فعلا انتي غبيه .. كيف ربطتي مصيرك بأخي المجرد من المشاعر ..

وضحت الآن الرؤيه ... أنتي هنا بدون تصريح ! ... يا ترى ماذا فعل بك ..

لماذا أتسائل .. هاهو خرج من المنزل و كل ما علي فعله هو ان أذهب و أكتشف ....

دخلت جناحه بدون ان اطرق الباب لم ارد ان اعطيها فرصه للأختباء ...

ووجدتها ... هاهي طريحه على الأرض تبكي بحرقه ....

...................

شوق تجثو بجانب مناير : مناير شفيج ؟

مناير تنهض متفاجأه من وجود شوق : ما فيني شي .

شوق : لا تخافين طلع .

مناير : أنتي شتقصدين , وبعدين شلون تدخلين بدون ما تستأذنين .

شوق : هدي نفسج و قومي غسلي وجهج و خلينا نتكلم ...

..................

شوق رحمه حلت علي .. فعلا انا كنت بحاجتها لأستجمع قوتي من جديد ..

لكن أنا خجله من نفسي لأني مدركه أن شوق لا تحتاج ذكاء خارق لتخمن بسهوله اني موجوده

هنا من دون رضى خالد ...

................

شوق : الحين هديتي ؟

مناير : اي هديت .. شوق ماابي اتكلم عن شي و ماابي احد يعرف بشي.

شوق بصوت المتضامن : أيده طويله و أنتي مو أول ضحيه .

مناير تفاجأت من تخمين شوق الصحيح : يعني حتى انتي مد ايده عليج ؟!

شوق : على ابسط شي يثور و يعصب أهم شي لا تقولين له يا ممثل أهني ممكن يذبحج .

مناير : ليش ؟

شوق : ما أدري هذا الكلمه تنرفزه .

مناير : مو خايفه يجي و يلقاج هني .

شوق : مدامه طلع من البيت بهالوقت ما أظن راح يرد .

مناير : أنزين وين ممكن يروح بهاليل .

شوق : ما أدري يمكن عند واحد من ربعه ... يهمج وين بينام ؟

مناير : اكيد لا خاصه بعد ما مد أيده علي .

شوق : ترى ماراح يعتذر إذا كنتي ناطرته يعتذر .

خالد يفاجأهم ويوجه كلامه لشوق : انتي الحين اللي ماراح تطلعين من هني لين تعتذرين .

شوق المتفاجأه من وجوده ترد بإضطراب : أنا كنت جايه لمناير عشان اشوف إذا تبي شي .

خالد : جيتيها لما شفتيني طالع يعني من وراي .

شوق بهجوم المدافع : وراك و لا قدامك شفيها إذا كلمت مناير .

خالد بتحدي : أنتظر اعتذارج .

شوق بأستسلام : أنا آسفه .

خالد : قبلت اعتذارج يله هوينا .

شوق بصوت الملهوفه على الحريه : تصبحون على خير .

خالد : و أنتي من أهل الخير.

...

خالد يلتفت لمناير : أنت شقلتي لشوق ؟

مناير ببرود : شنو اللي يرضيك أقوله ؟ .. ما أبي أغلط مره ثانيه .

خالد : للحين ألسانج طويل , جاوبي شنو قلتي لها ؟

مناير : قلت لها اني تعبانه و بنام , تصبح على خير .

خالد : وين تبين تنامين ؟

مناير : واضح من سؤالك أن عندك أقتراح .

خالد : أقترح عليج تنامين هني بصاله لين تردين لبيت أهلج.

................

وهكذا وجدت نفسي مستلقيه على الكنبه بدون حتى غطاء ..

لكن لم أستطع النوم فقد داهمتني الهلوسات ...

..............

خالد : شفيج ؟

مناير : مافيني شي .

خالد : تتكلمين مع نفسج و مافيج شي ؟! .. صوتج قعدني من النوم.

مناير بخجل : كنت نايمه ويمكن كنت اتكلم .

خالد يتأملها : تبين تنامين عندي ؟

مناير بخوف : طبعا لا .
....

لا شئ أختياري مع خالد ...

لم يكن صوتي سبب خروجه من غرفته بل كانت رغبته بتسليه مجانيه

.. نعم يبدو أني غير مكلفه , ها أنا أتيت لمنزله كفتاة رخيصه تعرض نفسها مقابل مكان للمبيت

فيه ! ..

لكن أنا زوجته ..

إذا لماذا لا يعاملني على هذا الأساس ..

لماذا تبدو "عدم رغبتي" غير مهمه ! ... لماذا لا يحترمني ..


...................................


حل المساء ولم نسمع من مناير أية أخبار إلى الآن ... فعلا أنا قلقه ..

............

مضاوي : منيره قومي دقي على جود و سأليها عن مناير .

منيره : مو من الأول قلنا .

مشاعل المتلهفه : لا طولينها يله روحي دقي عليها .

.....

جود : يعني لو اختج مو عندنا جان ما سمعت صوتج يا القاطعه .

منيره محرجه : آسفه جود بس تعرفين دوام و سوق ألخ ..

جود : معذوره .

منيره : أنزين ممكن أكلم مناير .

جود : مناير بغرفتها و الصراحه مستحيه أزعجها.

منيره : أنزين شلونها ؟

جود : الحمدالله بخير , بس شكلها مستحيه منا, بالموت تغدت معانا اليوم ..

منيره : انزين .. امممم ماتقدرين بالمره تروحين لها و تعطينها التلفون .

جود : خالد عندها و الصراحه مو حابه انزف .

منيره : تكفين جود بموت وكلمها .

جود : اسم الله عليج خلاص و لايهمج بخاطر بحياتي واروح للخطر برجليني.

منيره مشجعه : انتي قدها و قدود .

...................

خالد : نعم شتبين ؟

جود محرجه : أنا ماابي شي بس منيره تبي تكلم مناير .

خالد : مناير نايمه .

جود ببراءه : نايمه هالحزه ! .. عسى ما شر فيها شي ؟

خالد : لو فيها شي بقعد اسولف معاج .. قولي حق منيره انها نايمه و هذي آخر مره اشوفج هني.

جود بخجل صبغ خديها : حاضر.

..

ليست نائمه .. هذه كذبه خلقتها رغبه بتملك ثارت فجأه في كياني , لم أرد ان يشاركني أي

شخص في مناير , حتى لو كانو أخواتها .. أنا بالكاد أستطعت أحتمال مشاركتها مع عائلتي عند

تناول الطعام , وهذه أول مره أغضب من تهذيب شوق و جود المبالغ فيه , أردت ان يتجاهلانها

كما يفعلن مع زوجة أبي , لكني أدرك ... ليس كل ما يتمناه المرء يدركه ! ...

ألتفت لأجدها امامي تتأملني و الحزن يغشاها , كل ما أريد فعله الآن هو ضمها وتطبيق كل فعل

للأعتذار اجيده ..

...

مناير : بتمنعني أكلم خواتي ؟

خالد : تبين تكلمينهم ؟

مناير : أكيد .

خالد : أقنعيهم يسكنون معاج و بتشوفينهم و بتكلمينهم كل يوم .

...

لم أعرف بماذا أرد عليه , لكن كل ماعرفت فعله هو تحريك يدي بسرعه بتجاه خدي لأمسح

دمعه أختزنتها بكبرياء لتسقط ذليله..

...

دمعتها كانت الضربه القاضيه لم أتحمل و اتجهت لها مسرعا لأواسيها بكل جوارحي ...

..................

مر هذا الأسبوع و أنا في شد و جذب مع خالد أكتشفت أنه مريض نفسيا .. نعم أكيد مريض

وإلا كيف لشخص أن يكون للحظه في قمة العنجهيه و الؤم و فجأه يصبح في منتهى الحنان

و الطيبه ! ... لكن لأصدقكم القول يمكنني ان اشهد أنه كل ما كنت أحلم به في عاشق !



............................................................ ...... نهاية الجزء.

الجزء السابع عشر :


العشق مرض يتلبس الأنسان و يولد كريات الضعف و الوهن لتسري في كل إحساس مدمره

مايقابلها من ذرات الكبرياء و السمو و عزة النفس ...

مرض لذيذ مازلت أبحث له عن دواء ...

.....................

ميساء : يوسف دخيلك لازم أشوفك اليوم .

يوسف : شلون يعني تشوفيني اليوم ,نسيتي أو تناسين ان اليوم عرسي .

ميساء : ما نسيت بس بشوفك.. بكلمك مو معقوله ما عندك خمس دقايق فاضيه قبل الزفه .

يوسف : ميساء اللي بتقولينه لي بوجهي تقدرين تقولينه لي بالتلفون , تكلمي شعندج .

ميساء : يوسف شفيك ؟ .. أفهم أبي أشوفك .

يوسف : ميمو يا قلبي باجر راح أكون عندج .

ميساء : وشيصبرني لباجر ؟

يوسف : بتصبرين لأنج تحبيني .

ميساء تنخرط في بكاء مر : بس أنت ماتحبني .

يوسف : يعني ماتبيني امرج باجر .

ميساء : أنا ماقلت جذيه .

يوسف : تبين اجي باجر او ماتبين ؟

ميساء : شفيك يوسف اكيد ابيك تجيني باجر .

يوسف : خلاص اشوفج باجر .

......................

هكذا أنا دائما و هكذا هو دائما ... أطلب منه تلبية رغبه ليجبرني بذكائه على استجدائه المغفره

على هذه الرغبه ...

........................................



تبدو اليوم مختلفه .. هاهي تستيقظ بنشاط لتجمع حاجياتها و ترتب مواعيدها عبر اتصالات

مختلفه بأخواتها و صديقاتها .... فاليوم هو عرس يوسف من مضاوي ...

..............

خالد : وين رايحه هالصبح ؟

مناير : وين بعد بروح .. اكيد لبيت اهلي .

خالد : أستاذنتي ؟

مناير : خالد انت عارف ان اليوم عرس مضاوي و اكيد لازم أكون معاها من الصبح.

خالد يكرر : أستأذنتي ؟

مناير تستأذن مرغمه : ممكن أروح لبيت أهلي عشان اساعد أختي العروس ؟

خالد : لا مو ممكن .

مناير : أنزين .

خالد : شنو يعني أنزين .

مناير : يعني اللي تامر عليه بسويه .

خالد : مافيه روحه لعرس أختج .

مناير : خلاص مدام ماتبيني أروح ماراح أروح .

خالد : يعني شنو تاخذيني على قد عقلي .

مناير : محشوم , بس أنا مااني حابه اتهاوش معاك على شي سخيف.

خالد : يعني انتي مثلي شايفه عرس أختج من ولد خالي سخيف.

مناير : لا , أنا شايفه أن من السخافه أن نزعل من بعض ما في شي يستاهل.

خالد : يعني أنتي بتفهميني أنج مو زعلانه لأن ماراح تروحين عرس أختج .

مناير : أكيد متضايقه و الصراحه ودي حتى ابجي , دايما كنت أحلم في اليوم اللي اشوف فيه

مضاوي عروس .. بس مدام الله مو كاتب مافي ايدي شي .

خالد : ماراح يطوفج شي اول مايردون خواتي من العرس اضمن لج انهم بيعطونج تقرير مفصل

.......................

لم اتمالك نفسي و انهرت باكيه , اعتقدت انه سيلين عندما ادعي الطاعه لكن هيهات يبدو غير

مكترث .

...............

خالد : لما تخلصين بجي حطيلي الريوق .

مناير من بين دموعها : شنو تبي اسويلك .

خالد يحاول أخفاء أبتسامته : اي شي من يدينج حلو .

.....

زفاف مضاوي يذكرني أن مناير لم تحضى بليلة الزفاف التي تتمناها اي فتاة , لم يكن ذنبي هي

من جنت على نفسها , أحيان اتذكر بغضب جرئتها التي ألهمتها ان تأتي لمنزلي من دون دعوه

تلك الليله .. وأحيانا لا أقدر إلا على الأبتسام عندما أتذكر أنها باتت بين أحضاني منذ تلك الليله

....

مناير تضع الأفطار أمامه وتهم بالمغادره : تفضل الريوق.

خالد : ماراح تريقين معاي .

مناير : مو اللحين بروح ارتب الغرفه .

خالد : قصدج بتروحين تكملين البجيه با الغرفه .

مناير تتجاهله : عن أذنك .

خالد يسرع ليقطع الطريق أمامها : مناير يله عاد توج تقولين مافي شي يستاهل تزعليني عشانه.

مناير الغاضبه : وانت صدقت اني ماابي اروح لعرس اختي عشان ماتزعل !

خالد : هههههههه اكيد ماصدقت ... تبين تروحين ؟

مناير : سؤال سخيف أكيد ابي اروح .

خالد بلؤم : أقنعيني ..

....

أكره الأبتزاز لكن خالد يجعل من السهل أختيار الخضوع ...

لكن لا تعتقدو ولو للحظه أني نسيت صفعته القاسيه , لن أنسى ابدا أنه سلب مني حلمي الوردي

بزفاف حميمي يجمعني بأخواتي و صديقاتي وكل من أحب من حارتنا الضيقه , لن انسى قسوته

علي في اول ليله لي في منزله أبدا !

....

محتار .. هل تستسلم لرغبه أم تستسلم لواجب .. فعلا أحترت معها ..

متأكد من شيء واحد أني نادم على تلك الصفعه , وأتمنى لو لم أفرض نفسي عليها تلك الليله ..

يبدو أن مايحدث لي الآن من أضطراب في مشاعري ماهو إلا أستجابه لدعوات أختي شوق .

................................................


رؤيته عريسا كان أول امنيه تمنيتها عند رؤيته لأول مره , وعلى مر السنوات كنت كل يوم

أرسم تفصيلا جديدا ليوم زفافه ..

للأسف كل تلك التفاصيل هجرت مخيلتي عندما أجبرت على الرحيل من حياته ...

الآن أقوم بدور أم العروس لمضاوي , دور سعيده بتأديته على الرغم من معرفتي أن مضاوي لا

تتقبلني بأي دور .. لا ألومها .. أعرف أني تنازلت عن كل الأدوار بأختياري منذ أن وطئت قدمي

هذا المنزل لأول مره ..

لكن أنا الآن سعيده يرؤيتها عروس هذه الليله تبدو فعلا كاملاك بملامحها الرقيقه ..

وفي نفس الوقت .. لا يمكنني تجاهل شعور الخوف الذي يجتاحني .. نعم أنا خائفه على مضاوي

من أبني ! ..إن كان يوسف اصبح نسخه عن ابيه.. إذا فالويل لمضاوي .. سيحطم قلبها لا محاله !

رؤية وجه يوسف تقلب علي المواجع ... تقاسيم وجهه تذكرني بتقاسيم وجه ذلك لرجل الذي

وقعت في حبه على الرغم من فارق السن بيني و بينه .. معه تعلمت أبجديات العشق ومعه تعلمت

قسوة الهجر و مرارة النبذ ... أبو يوسف قتل كل أحاسيسي .. قتل إحساس المرأه العاشقه فيني ..

وقتل إحساس الأمومه فيني .. وقتل كل أحلامي البريئه ...

.........................................

مناير : خالتي سلمى عسى ماشر ؟

الخاله سلمى : ما شر , أنا بس فرحانه في مضاوي و فيج .

مناير : وبتفرحين إن شاءالله في خواتي و فواز .

الخاله سلمى ودعاء صادق : آمين .

..

منيره : مناير يله تأخرنا جود أشغلتني من كثر ماتتصل تقول تأخرتو .

مناير : خلاص بنمشي اللحين روحو ألبسو عبيكم على ما أغطي مضاوي .

.....................

أجلس على الكوشه كأبنة العمه التي تلعب دور الأخت السعيده بزواج أخيها .. لكن في الحقيقه

هذا الشعور أبعد مايكون عني اليوم ... تتسائلون لماذا حضرت إذا ؟

في الواقع لم أريد أن أحضر هذا الزفاف أبدا , وتضاهرت بالأعياء هذا الصباح ...

.........

جود : أمس مافيج إلا العافيه .. يعني فجأه صرتي مريضه ؟!

شوق في فراشها : والمرض له وقت ؟

جود : شوق قومي اكلي حبيتين راس وصحصحي ترى موحلوه ماتحضرين عرس ولد خالج .

شوق : انا تعبانه و أهم شي صحتي يله اطلعي خليني انام.

جود : شتبين الناس يقولون عنج .

شوق : يقولون اللي يقولونه مايهمني .

جود : يعني عادي إذا باجر كل الناس يقولون تحب ولد خالها وهو مايحبها و تزوج غيرها.

شوق : شسوالف الماصخه ؟

جود : الناس مالها إلا الظاهر , قومي لا تفشلينا .

شوق : خلاص خليني انام شوي عشان اكون مصحصحه حزة العرس .

جود : بس مافي وقت , لازم نروح اللحين و لا يروح علينا حجز الصالون.

شوق : انتي روحي انا بتصل على اللي دايما تجينا في البيت .

جود : شوق تكلمين عن جد ؟ .. شغلها حيل عادي مو حلوه ماتطلعين طلعه بعرس يوسف ,

وبعدين جواهر بتروح معاي انا وندى وتعرفينها بتبدع بنفسها .

شوق : أف هذي دايما حاشره نفسها معانا , ليش تقولين لها ؟

جود : ماقلت لها هي عرفت من ندى وراحت حجزت بنفسها .

شوق : ياصبر الأرض اللي تمشي عليها هالمغروره .

جود : ها شقلتي بتقومين تروحين معاي ؟

شوق : طبعا راح أروح .

....

وها أنا في كامل أناقتي أجلس مبتسمه أراقب الباب لأرى تلك السارقه !

...................................

لم أتصور أن يكون زفافي كا المأتم , الكل حزين ! ..


خالد العريس و أبن العمه يبدو مكتئبا , لكن هذا شيء متوقع منه , لم يكن سيسعده إلا زواجي من

شوق , فازواجي من مضاوي بتأكيد عباره عن فشل لجميع مخططاته .

عمتي من جه أخرى تصنعت السعاده و هي تودعني هذا الصباح لكن عيونها فضحت خيبة املها.

ميساء من الركب الحزين أيضا , لم تتوقف طوال النهار عن الأتصال بي و محاولة رؤيتي قبل

الزفاف , متألمه من قلبها المتمزق هي الصفه التي أطلقتها على نفسها لتصف ماتشعر به , بكت

بكاء مرا لإقناعي بالعدول عن هذا الزواج و بالطبع لم تفلح ..

الآن يمكنني أن أتخيلها في غيبوبة رثاء ..

مضاوي يمكن أن تكون على رأس القائمة ..

كيف ولا .. فا قبل اسبوع تزوجت اختها من حبيبها و اليوم ستكون زوجة لرجل لا تحبه و لا

يحبها .. يبدو مستقبلها حزينا جدا !

لكن من يهمني بينهم و لا أحتمل حزنه هو الجالس على يميني.. أخي فواز ..

فواز يبدو مكتئبا جدا و لا يقدر حتى على رسم إبتسامه مصطنعه , الأحدايث الوديه التي يجيدها

ببراعه يبدو الآن انه غير قادر على أصطناعها حتى لو مجاملة لضيوف ..

..........

يوسف : فواز عسى ما شر ميت لك أحد .

فواز : عرسك و جيته , بعد لازم أمثل أني فرحان .

يوسف : يعني أنت مو فرحان لي ؟!

فواز : أنت فاهم قصدي .

يوسف : أوريك راح أردها لك بعرسك .

فواز : و منو قال أني بتزوج من الأساس .

يوسف بثقه : بتزوج أن شاءالله .

فواز : يعني اللي يتزوجون لازم يخلون كل العزابيه يلحقونهم .

يوسف يبتسم بصدق : أنت أسأل بالأول منو العروس بالأول يمكن بعدها تقول بتزوج الليله .

فواز بفضول : و منو هذي اللي مختارها لي ؟

يوسف : منو غير جود .

فواز بصدمه : جود ! .. لا يمكن جود بنت عمتي و حسبة اختي .

يوسف : وهي شايفتك حسبة اخو ؟

فواز : أكيد .

يوسف : شدراك داخل قلبها ؟

فواز : و لا انت داخل قلبها .

يوسف : أنا لي الظاهر , فكر بالموضوع ترى كل شي ممكن .

...

لم يكن ينقصني إلا هذا الحديث حتى أكتئب أكثر ...

...

سلمان يقطع عليه تفكيره : شفيك تكهربت بعد ما كلمك يوسف .

فواز : اصلا أنا متكهرب من العرس كله و بالموت متحمل القعده هني .

سلمان : أنا فعلا مستغرب منك , اللحين دريت ان امك حيه و بترد تعيش معاكم و زعلان و

متضايق ؟!

فواز : سلمان ارجوك لا تقعد تعيد و تزيد بالسالفه مالي خلق.

سلمان : على راحتك.

فواز : إلا أنت اللي اشفيك هاليومين ؟ .. شكلك متضايق من شي.

سلمان : تتخيل .. ما فيني إلا العافيه .

فواز : علي سلمان .. خلص شفيك ؟

سلمان متهربا : شرايك نقلط الرياجيل على العشى , ترى تأخرنا .

فواز لا يريد المضي بإزعاجه : يله أنقلطهم.

...........

سلمان أيها العزيز والصديق الصدوق ماذا أصابك .. لماذا تعابير وجهك تغرق في الحزن ؟

أم كنت دائما حزينا ولم أرى ذلك من قبل ... نعم لابد انك كنت دائما حزين .. الآن أفهمك !

كلانا حظي بأم تخلت عنه ! ... وكلاهما كانت خائنه على طريقتها !!

..........................................


أقوم بدور السندريلا اليوم بشكل حقيقي .. ها أنا أتزوج الأمير ! .. وأي أمير ..

لا أحبه و لا يحبني ..

كان من الممكن ان يتغير شعورنا بعد الزواج لو لم يكن يعرف أني كنت أكن مشاعرشاذه تجاه

خالد ! ..

من الغريب اني أجلس هنا في هذه القاعه الفخمه و أنا أبدو كأميره متزينه بأفخم فستان ومتقلده

هذا الألماس , لكن لا أشعر لا بفرح او حزن كل ما أشعر به هو الغضب .. نعم الغضب من

نفسي .. كيف رحلت متخليه عن كل أحلامي و وصلت إلى هنا !

.................................... إلى اللقاء في الجزء القادم

شاااااااااااارمي.. مبرووك ياا قلبي.. من هاللحظه بنكوووون حناا والجيراان اصحااب..هخهخخهخه

الله يعطيتس العافيه ياارب.. ونشووفتس بكره باذن الله بجزء جديد جداااا على النت..

مااقصرتي شاارمي..

السلام عليكم...

الضحكه.. احداااث في ظااهرهااا الفرح وفي داخلهاا الالم والحزن والاهاااااااااانه بعد..
ايه صح الضحكه مشكووره انتس نزلتي البارت بدري.. ومشكوووره اوي اووووي لانتس نزلتي باارتين بدال واحد.. صاادقه ان الاجزاء مرتبطه ببعضها..
والحين عاد نجي لشخصياتنا اللي صرااحه منقهره مررررره من اثنين منهم..
مناير وخالد :: .. منااير تدرين اني عااذرتس لانتس ارخصتي بنفستس كذاا؟؟ والله العظيم تعااطفت معتس ولقيت لتس الف عذر وعذر للتصرف اللي سوويته.. اعتبره صرااحه موقف قووه مو ضعف.. شفتس اليوم بصووه عمري مااشفتس فيها من اوول ماابدت القصه.. أمرأه قوويه.. قووويه مرره و تداافع عن حياتها.. اعجبتني حركة الامر الواقع اللي سوويتيها بخالد.. يستااهل هالحيوان هالمريض النفسي.. هالممثل>> اخاف يدخل علي ويعطيني طراق..هخهخهخه ..
صراحه مناير اعتبر هالحركه قوويه وخصووصا بعد تهديده بانه يخليتس معلقه.. احسن شي انتس شلتي قشتس ورحتي لبيته يااا انه يرضى في وجودتس او انه يطلق وانتي موو طالعه من البيت الا مطلقه.. حركه قوويه.ز بس مع هذااا بتتعبين كثير معه.. وش تتعبين ؟؟ الا انتي بديتي التعب فعلااا.. الله يعينتس عليه ياارب.. واتمنى ان الله يهديه وخصووصا انتس زي ماتقولين كل شيس تمنيتيه بالعاشق لقيتيه فيه.. بس مشكلته مو انتي.. مشكلته يوسف.. وهو المريض النفسي الثااني بقصتنا؟؟؟ عموماا مناااير اتوقع تحملين ويكون حملتس مفاجأه اوول واحد بيتفاجأ هو خالد بس ماا ادري باي قسم اصبفها بمفاجاة حلووه والا مفاجأه مفجعه وسيئه.. وخصووصا انه لما تزوجتس كان لهدف معين وهو انه يقهرر يوسف ويحرق قلبه على امه.. بس انه فكر بانتس تحملين اتوقع انه ماافكر ابداا.. ويمكن لو حملتي تتغير حيااة خالد نهااائياا ويصير يفكر باسرته وبس ويترك يووسف وماعاد يعتبره عدووو يبي يشووفه يمووت حسره وضيقه..
اما انت يااخالد.. ياا انا ودي وخاطري اجي اصطرك واكفخك لين اشبع.. جعل يدك بالكسر ياا حمار.. والله انك المريض اللي يبي له علاج.. والا فيه واحد صااحي يعطي زوجته كف بااول يووم يجمعهم حتى لو كان غصب عنهم كلهم؟؟؟ والله انك مريض والا كيف تضربها وبعدين تسووي نفسك عادي.. شكلك بس تبي تكسر رااسها وتهينها وتذلها ومستغل بقووه عدم وجةود اخو والا ابوو والا سند وظهر لها.. يعني انت مستقوووي عليها ياا الدب .. رووح عاااااالج نفسياا ولاا تنسى ولد خالك خذه معك وعالجوا عند دكتوور واحد..

يوسف ومضااوي : والله انت ياايووسف تخررررع مررررررره. يعني بالضبط وش تخطط له ماا ادري.. صراحه شفت فيك حقااره وخصووصا وانت تكلم ميسااء وتواعدها تجيها من بكره.. من بكره يااظااالم؟؟؟؟ من بكره ياا حماااار؟؟ خلااااااااااااص انا ماااعاااااد ابيك بمجمووعااااااااااتـــــــــــــي متبريه منك ياا عديم الاحسااااااااااس...
والله مضااوي ماتستااهل هالمعامله ابداا.. وش شاايف نفسك انت ولد عمتك عليه يووم مستقوووين على هالبنياات.. لاا واخوك الثاني بكره بيفضح منيره.. والله انكم عصاابه مو عاائله. كل واحد بس عشاان مصلحته يبي يرتكب جريمته والوسيله ببنات ابو منااير حسبي الله عليكم.. هه شفنا هذاك المريض وكيف عامل مناير بااول ليلة اجمعتهم .. عاد عسانا نشووف شي يفتح النفس منك وغير ولد عمتك..مع اني والله مااهقيت هالشي. شكلك بتدخل مضاوي حجرتها وتطس عند ميسااء ترااضيها .. الله لاا يرضى عليك.. والله قااهرني قهرررررر.. وماافيك حسنه للحين الا خووفك على فواز.. مع ان فواز حمار مثلك.. بس اتمنى ان مضااوي تقدر تجيب رااسك وتنسى ميسااء وسنين وايام ميسااء ومااعاد تقدر تفاارق مضااوي.. بس انا الحين خااطري اعرف وش خطتك بالضبط؟؟ وش بتسووي بعدين انت متزوج مضااوي عشان تقهرر خالد وزي ماقال خالد عنك انك تشبه قطاعين الطرق كل شي بيكون بيد خالد الا تخطف وتااخذه.. والحين خطته بانه يجيب سلمى عنده رااحت هدر لانك انت اللي بتنفذها.. وبعدين ؟؟ اذا نفذت هالخطه وش بتكون خطوتك الجااايه؟؟؟؟
تدري يوسف مرات اقوول ان وجود مضاوي وامك ومنيره تحت رعايتك بيخليك تشووف اشيااء مااعمرك شفتها وبتحس باشيااء مااعمرك حسيتها.. ومرات اقوول لااا هذاا قلبه بلك قلبه حجر ومااعنده احساااس مااراح يهتم باي احد الا انه يحرق قلب خالد..

فواز وسلمان : الحزن ياا فواز تعتقد انه يخليك تشووفه بوجيه الاخرين .. ؟؟؟ هل فعلاا سلمان دااائما فيه حزن وانت ماااكنت تشووفه لانك لااهي بملذاتك؟؟ صراحه لو كان كذاا بانت حمار ثالث بهالقصه؟؟ شلون هالسؤال تووك تسأله لنفسك؟؟ ليش عمرك مااشفت هالشي بوجه سلمان.. انا مااا كد شفت وجه سلمان بس يكفي ان امه تااركته وهوو الاولى براعيتها ومهتمه فيك انت ومهملته هذاا اكيد بيزرع القهرر والحرقه والحقد بقلبه على امه؟؟ طيب مااعمرك فكرت ان قرب سلمان لك.. يمكن لانه يبي شي من حب امه لك يناله؟؟

شوق : والله ماااحد ربح بهالقصه الا انتي ربي فكتس من هاليوسف؟؟ ولااتزعلين عليه والله من شااف برودته وبيشوف وش بيسووي بمضااوي بيقوول ياا حظ شووق فكها الله منه>> هااه عسى قدرت اخفف عليتس...؟؟هخهخهخه

مشاعل ومنيره : ليله صعبه بدووون مناير.. ومن هالليله صاار لاازم كل وحده تكون مسئوله عن نفسها.. حبيت مرره مشااعركم وخووفكم عليها.. وخصووصا وانتم كل شووي تتصلوون على جود عشان تتطمنون عليها..

ام خالد:: صرااحه اوول مره اعتبر ان انتي سبب مشااكل هالقصه الطرف الرئيسي فيها بدون مااتظهرين على السطح... انتي سبب الحقد والمكره اللي بين يوسف وخالد وانتي سبب الحاله النفسيه اللي يمر فيها خالد وانتي سبب احسااس سلمان بالحزن.. صراحه انا الحين ماا الومهم على عدم حبتس لانتس انتي اللي تخليتي عن هالحق باراادتس؟؟؟

سلمى : اتمنى ومن كل قلبي انتس تلقين الراحه وان براائتس تظهر وانتس تقدرين تعيشين بين عيالتس وقدام كل العالم وانتي رااستس مرفووع.. والله يهدي فواز ويوسف غصب عنهم.. اعجبتيني صراحه وانتي تدعين لمناير ان ربي يوفقها وحبيت وجودتس بين البنات حتى لو كنتي بالاوول مااتحبين هالوجود بس الحين اتووقع بيكون لتس في حيااة البنات تأثير كبير وهذي بشاااير هالتاثير بدت تهل..خهخهخهخه..

ضحكه. مشكووره على هالجزئين الحلووين وتسلمين والله ماااقصرتي ويااليت تعيدين هالتجربه.. انا شخصياا اعجبتني انتس تنزلين جزئين مررره وحده. عسااهم دووم..
ايــــــــــــــــــــــــــه صح الضحكه نسيت اقوولتس.. شووفي انتي خربتي خططي مرره ومااااراااااااح اسمح لتس انتس تخربينها مرره ثاانيه.. المره الاولى لما كنت ابي مناير ليوسف ومضااوي لخالد وانتي قلبتي الشخصيات.. والحين مااارااح اسمح ان سلمان يااخذ جواهر. سلمان لمشااعل وبــــــــــــس.. ساااااااااامعه ياا الضحكه والااااا لااااااااااا... وقد اعذر من انذر.. >> خاطري بس اعرف وش فيدي على كل هالتهديد..هع هع هع..

واخيييييييييييييييييييييييرا خلصت قراءه ...

بصراحه ياشارمي قصتس تهبل ادري قديمه بس ماعلي من احد ههههه

كان ودي والله ارد على كل جزء بس والله مشغووووله وتاركه شغلي

وقاعده مبققه عيوني في قصتس ..بس ان شاء الله من ارد من العاصمه

راح اصبح عليتس ..

اتركس في حفظ المولى ..

سوري شارمي على هالمداخله ..


زويييييييييييييره وثول تراني زعلانه منتس ليش ماقلتي لي عن هالقصه ..؟؟

بس حسابتس بعدين ..يالقاطعه ..