الجزء الخامس


من صحت صلت الفجر و هي ما هي قادره تنام في إحساس بداخلها مختلف ما هي عارفه كيف تميزه ما عندها إلا فجر بما إن اليوم خميس راحة لها الغرفه و صحتها
فجر\ يالله صباح خير الساعة خمس و نص دوام مدرسه
أريج\ قومي و بلا كسل و ربي ملانه
فجر\ على حسابي روحي أرسمي
أريج\ مالي نفس و نص الألوان مخلصه
فجر\ يووووه
أريج\ قومي نطلع الحوش الجو حلو
فجر\ إذا بتخلين أبو صالح يجيب لنا فطور
أريج\ هههههه سخيفه مسويه سندوتشات لبنه و زعتر
فجر\ مغريه
أريج\ يالله قومي طيب
فجر\ بس عشانك كسرتي قلب معدتي
طلعوا أريج و فجر الحوش الجو كان خيال على بداية الشروق و فيه سحب بسيطه
فجر\ فعلا الجو رهيب
أريج\ و أول ما تبين تقومين
فجر\ لو عندنا أخو بس
أريج\ ليش ؟
فجر\ كان طلعنا الأن يا ذكيه
أريج\ ضحكتيني تلقينه لسى ما رجع البيت و إلا توه ينام
فجر\ يعني زين ما كفخني
أريج\ قلتيها
فجر و هي تطالع الباب\ و لا كلمة شوفي المشهد بس
أبو أريج\ وش عندهم بناتي جالسات هنا ؟
فجر\ هلا يبه ما شاء الله من وين جأي ؟
أبو أريج\ المسجد
فجر\ إيه تفضل أفطر معنى الجو رهيب
أريج كانت تطالع فجر مبهته هي متأكده أن تحت رأسها شي
أبو أريج\ إيه بس ما قلتولي ليش صاحيات و أنتي بالذات يا فجر العاده الخميس تعوضين نوم أسبوع ؟
فجر\ الملل يا يبه كله نوم و دراسة نوم و دراسة ما فيه تغيير روتين ممل
أبو أريج\ ما باقي لك إلا ثلاث أسابيع و تخلصين الدراسة بعدين الدراسة و التعليم هي إلي ترفع قدر الإنسان بدل ما يكون جاهل بس يأكل و يشرب و ينام
فجر بهمس\ تكلم الإستاذ عبدالرحمن
أبو أريج\ وش تقولين ؟
فجر\ أقول كلامك صحيح طال عمرك بس يضل لترفيه و الترويح عن النفس دور في العطاء و التفوق
أبو أريج\ إيه و المطلوب ؟
فجر\ كلك مفهوميه إستاذ
أبو أريج\ و أنا أقول فجر ليش صاحيه تبين تطلعين ؟
فجر\ أنا و المزيونه إلي جنبي يعني فطور على البحر لفتين بالسياره و نرجع ما نطول
أريج\ من قال أني بروح ؟
فجر\ و غصب عن غمازاتك بعد بعدين ترى الفنانه ألوانها مخلصه و مستحيه تطلب
أريج\ لا يبه بس تعرف إذا بروح المكتبه لازم تكون فاضي تعرفني أطول شوي
فجر\ و أبوي الأن فاضي و المكتبه أحلى شي الصباح تلقينها فاضيه و تأخذين راحتك
أبو أريج\ أجل فجر دارستها صح
فجر\ تلميذتك طال عمرك
أبو أريج\ خلاص ما أردكن قومن ألبسن و تعالن السياره
فجر\ فديتك يا أحلى أبو بالدنيا
أريج\ مشكور يبه.....

*************

صحى و طالع الساعة شافها عشر و نص بدري على أي شي ممكن يسويه حاول يرجع يكمل نومه لكنه كان مكتفي نام أمس من الساعة سته و نص المغرب يعني له ست عشر ساعة نائم تأفف و دخل الحمام [ أكرمكم الله ] بدل ملابسه و طلع الدور الثاني كان هادئ بدون و لا حركة و الدور الأول نفس الهدوء مع حركة خفيفه من الشغالات أخذ الجريدة في يده و طلع السياره رماها جمبه على السيت [ المقعده ] و ولع سيجارة و مشى ما كان عارف وين بيروح بس أهم شي يطلع من جو البيت إلي يسبب له الضيق أمس قبل ينام جلس فتره يفكر في أريج و الخطه إلي برأسه كيف ينفذها؟ و كيف يقنع أمه و أبوه ؟ بس يالله إلي برأسك يا مشعل لازم يمشي و في أقرب وقت لو شو ما صار أخذ لفة البحرين و مشى بطريقه....

*************

في المكتبه أخذة كل إلي تحتاجه من فرش و ألوان و التفتت أدور فجر إلي كانت منسجمه مع الكتب هـ البنت تحب تقراء روايات بشكل جنوني
أريج\ يالله تأخرنا على أبوي ترى
فجر\ شو رأيك أخذ هـ الروايه و إلا هذي ؟
أريج\ أظنك ثانويه عامه و الأن قريب أختبارات يعني ما هو وقت الروايات
فجر\ ما راح أقراها إلا بعد الإختبارات وعد بس أيت أحلى ؟
أريج\ و أنا شو عرفني قالولك قريتها
فجر\ من العنوان يا فنانه
أريج أشرت لها على وحده\ هذي
فجر\ اوكيه أجل بأخذها و قولي إنها لك عشان أبوي تكفين
أريج\ أبشري بس بخبيها لين بعد الإختبارات
فجر\ اوكيه....

**************

دخل البيت و هو مقرر يكلم أبوه اليوم خلاص أحسن شي يدق الحديد و هو حامي شافهم مجتمعين بالصالة و هذي نادرا ما تكون بس هي فرصته
أم مشعل أول ما شافته أستلمته\ أنت من وين جأي الشغالات يقولون شافوك تطلع من الصبح وين رحة لين الحين العصر ؟
مشعل\ طلعت مشوار صغير
مرام\ يالله صباح خير
مشعل\ خلك في حالك أنتي بس
أبو مشعل\ طيب أحترموا وجودي أنا و أمكم بينكم على الأقل
مشعل قام من مكانه و جلس جمب أبوه\ على رأسي
أبو مشعل كان يعرف له هذي حركاته من هو صغير لبغى يطلب شي\ وش طلبك فلوس ما في توك صارف بلبنان مبلغ يكسر الظهر
مشعل\ الله يطول لي عمرك هو الطلب فيه فلوس بس ما هو سفر
أبو مشعل\ وش هو ؟
مشعل بدون مقدمات\ أبي أتزوج
لحظة صمت يستوعبون الكلام مشعل بيتزوج !!
أم مشعل بفرح\ و أخيرا بتريح قلبي يمه خلاص يا عبدالله بكره تروح لأبو مها و تخطب البنت منه و الله لسويلك فرح تتكلم فيه الشرقيه كلها
مشعل تجهم وجهه من هـ المها\ وش مها ما مها ألف مره قلت هـ البنت ما أبيها
أم مشعل\ بس أنا مكلمه أختي من زمان أني أبيها لك بتكسر كلامي يا مشيعل
مشعل\ والله ما قلت لك كلميها قبل ما تأخذين رأيئ
أبو مشعل\ لحظه يا حصه هبيتي في الولد يمكن هو بخاطره وحده نخطبها له
مشعل\ هذولا الناس الفاهمه وصلت يا أبو مشعل
أبو مشعل\ و من بنته ؟
أم مشعل\ و تسأله بعد أكيد وحده من الشارع ضاحكه عليه
مرام لا شعوريا فكرت بالكلام إلي قالته لها مها و المكالمه إلي سمعتها
أبو مشعل\ خلي الولد يوفي هرجه يا حصه
مشعل\ ماهي من الشارع يمه ريحي رأسك البنت كلكم تعرفونها
أبو مشعل\ و من هي ؟
مشعل\ أريج بنت عمي عبدالرحمن
أم مشعل ما أستوعبت\ أريج لا عاد هذي إلي ناقصني بعد أنت أكيد منت صاحي
مرام\ أنت عارف من هي أريج .؟
مشعل\ إيه عارف و أنا ولد عمها و أولى بها من الغريب
مرام\ أي غريب هذي ممكن تتزوج واحد قد أبوها و ممكن ما تتزوج من الأساس
مشعل\ ليش وش ناقصها مهي من لحم و دم زيك و إلا أنتي و بنت خالتك مطليات بذهب
ريم\ مشعل أنا ما أني مستوعبه يمكن لو قلت فجر يهون
مرام\ جأتك الثانيه وش فجر بعد
أم مشعل\ من بنات عبدالرحمن ما أنت متزوج و لا حتى تفكر
من أول ساكت و يسمعهم كيف يتكلمون في أريج ممكن رافضينها عشان إعاقتها بس الأن الرفض شامل حتى فجر\ وش فيهم بنات أخوي ماهم عجباتك ؟
أم مشعل\ أنا ما قلت فيهم شي و صراحة من الأخير بنات أخوك ماهم من مستوانا
أبو مشعل بعصبيه\ أجل بنت أختك من مستوانا و إلا ناسيه من أبوها و إلا ليش طلق أختك
أم مشعل\ البنت أختي إلي ربتها و نعرف أخلاقها
أبو مشعل\ و يعني بنات أخوي إلي ما تعرفون أخلاقهم و الله أنهم يسون بناتي بأدبهن و إحترامهن لبوهن
أم مشعل\ أدبهم لهم ولدي ما يأخذ منهم لو ما يتزوج
أبو مشعل كان يحب أريج و يتمنى لها الخير لكنه عارف إنها ما راح تكون سعيده مع مشعل لإن طبعها تتقبل كل شي بصدر رحب و ما تحب تناقش\ أريج ما تصلح لك تبي فجر أروح أخطبها لك الليله
رمى الشماغ على كتفه وقام مشعل\ والله عاد قلت لكم أبي أريج و أنتم ما تبونها أجل بطلنا ما نبي زواج و تذكروا أنا ألي جيت من نفسي و قلت لكم بتزوج
قال كلامه و مشى عنهم للإستراحة مع الشباب و تركهم وسط تفيكر أبو مشعل في ردت فعل أخوه لو عرف أنهم رافضين بنته و أم مشعل وشو بتقول لأختها ولدي ما يبي بنتك....!!!

*****************

طلعت لمرسمها بعد ما صلت المغرب من أمس ما رسمت بسبب نقص الألوان فيها رغبه قويه ترسم شي مميز أخذة الفرشاه و مزجة ألون الأحمر بالأصفر طلع لها لون تحبه كثير وتتفأل فيه بدت تخط خطوط لشمس لنور الأمل مهما كانت الحياه قاسيه و صعبه تدرك أن الله ما يأخذ من الأنسان شي إلا يعوضه بأفضل منه حب أمها حنان أبوها علاقتها القويه مع أختها فجر قلب جدتها كلها أشياء الله عوضها فيها و تعيشها بسعاده و رضاء و ما تبي أكثر من كذا أبتسمت و كملت لوحتها
فجر\ بسم الله شو هـ الإبتسامه ؟
أريج\ بسم الله منك متى جيتي ؟
فجر\ من سبع عشرة سنه
أريج\ هههههه سخيفه تعالي أحضنيني
فجر\ عيب بقول لماما عنك
أريج\ هههههههههه ما تقدري بتخاصمك أنتي لأني أبي أحضنك بحب و أنتي لا
جأت لها فجر وحضنتها\ أحبك يا الدبى.....

*****************

من طلع مشعل و هي القهر بيذبحها كيف تقنعه يتزوج مها و كيف طلعت أريج في رأس هـ الولد فجاءه
أبو مشعل\ تراك صدعتي برأسي خلاص سكري الموضوع
أم مشعل\ كيف أسكره ولدك ما يجي من وراه خير
مرام\ أصلا مستحيل أصدق أنه يبي أريج أكيد قال كذا لانه عارف ما راح نوافق فـ يسكر على موضوع الزواج
أم مشعل\ بيدخل الثلاثين بعد سنتين و هو ما يعرف مصلحته
أبو مشعل\ خلاص سكروا السالفه الأن و أنا أتفاهم معه بكره و لا أسمع كلمه تطلع من هـ البيت.....

***************

..
..
..

الجزء السادس


للمره المليون دقت على رقمه مقفل رمت الجوال بقهر و غيض ممزوج بخوف منه و عليه من وقت شافته بالمكتبه و أعطته الفلوس قالها أكلمك أول ما أرجع البيت و لا عاد دق و جواله ما أنفتح من ثلاث أيام حاولت تأخذ كتابها تذاكر شوي لكن تركيزها كان مشتت تركته و طلعت من الغرفه شافت مشعل يدخن في البلكونه و راحت جهته
ريم\ لو أدري السيجارة تريح كان أخذة وحده
مشعل بإستخفاف\ تبين
ريم\ بس قرف الرائحه ما أحبها
مشعل\ ههههههه عادي تعودين
ريم\ اممم مشعل
مشعل\ هلا
ريم\ أنت ليش تبى تتزوج أريج ؟
مشعل\ لإنها بنت عمي
ريم\ بس أمي و أبوي ماهم موافقين
مشعل\ و أنتي ؟
ريم\ هي طيبه و أنا أحبها و أحب رسمها بس سمعتها مره تقول إنها ما تفكر تتزوج مره
مشعل حس بالإحباط و سحب الدخان لصدره بقوة و طلعه\ ممكن لمن تعرف من خطبها تغير رأيها
ريم\ بقولك سر
مشعل\ قولي
ريم\ أنا موافقه تأخذ أريج بس لا تفكر تأخذ مها مره ما أحبها أصلا أريج أحلى منها
مشعل لو تدرين أني أكرهها أكثر منك و حافظ ملامحها\ أجل أقنعيهم معي أخذ أريج
دخلت عليهم الشغاله و قطعت كلامهم سليسا\ مستر مشعل بابا يبغى أنت في مكتب...

*****************

ليوم الجمعه طعم مختلف في بيت أبو أريج كله نشاط و حركه كانوا مجتمعين على الغداء و بين السوالف و الضحك
أبو أريج\ هااه يا فجر ختمتي المناهج ؟
فجر\ باقي بس الفيزياء و الإنجليزي
أبو أريج\ أسمن المواد هذي متى بتبدينها ؟
فجر\ فيه وقت يبه لا تهتم
أم عبدالله\ بنيتي شاطره ما شاء الله عليها
فجر\ فديتك جدتي بس دعواتك هذي عاد خلاص أخر سنه
أبو أريج\ مذاكرتك قبل شدي حيلك أنتي و ربي يوفقك
فجر\ أبشر بس عاد حضر لي هديه تستاهل النسبه
أبو أريج\ خليني أشوف النسبه أول و بعدين نقرر الهديه وش تكون
فجر\ من فوق الـ 95 سفره
أريج\ هههههههه أحلى التخطيط على وين ؟
فجر\ أفكر باريس عشان تتعلمين لرسم زين
أم أريج و هي تتذكر سفراتهم لعلاج أريج\ الله لا يعودنا لها بلاد الكفار...

***************

دخل المكتب و سكر الباب وراه عيون أبوه فيها كلام و هو كأنه واثق وش بيقول
مشعل\ هلا يبه بغيتني ؟
أبو مشعل\ إيه أجلس
جلس مقابل لأبوه مشعل\ و هذي جلسه
أبو مشعل\ أنت صادق بكلامك إلي قلته أمس .؟
مشعل\ أي كلام ؟
أبو مشعل\ زواجك من بنت عمك
مشعل\ إيه و مستغرب ليش رافضين
أبو مشعل\ يعني لو وافقنا ما راح تغير رأيك و تقول معاد أبيها ؟
مشعل\ و ليش أغير رايئ يا يبه أريج وش ناقصها هذي هي عائشه من كم سنه و ما ماتت عشان ما تمشي عادي أنا راضي و إذا على البيت أنا بحط لها لفت [ مصعد ] و بدل الشغاله ثنتين و بنعيش
أبو مشعل\ و أنت ليش تبيها إلا هي ليش ما تأخذ فجر و إلا بنت خالتك أو أي وحده نخطبها لك ؟
مشعل\ يبه بنت خالتي أنا ما أواطن خلقتها مستحيل أخذها و فجر لسى صغيره بيجيها نصيبها لكن أريج لو ما أتزوجتها أنا ولد عمها إلي فاهم وضعها و مقدره لمن بتجلس ؟ لواحد يأخذها حرمه ثانيه ما ترتاح معه بعدين أنت فكر بعمي عبدالرحمن أكيد شايل همها و نفسه يتطمئن عليها
أبو مشعل\ و أنت بتريحها يعني يا يبه أريج مهي زي أخواتك و إلا بنت قابلتها قبل هـ البنت و ضعها غير و طبعها ما تتكلم و لا تشكي قوة صبرها عن ألف رجال
مشعل إستانس على كلام أبوه و أتشجع أكثر\ و أنا ما راح أطالبها بأي شي إلي تقدر عليه تسويه
أبو مشعل\ خلني أفكر في الموضوع لكن حط بالك أمك ما هي موافقه و أنا ماراح أروح لأخوي و يسمع بعدين إنا ما نبي بنته.....

*************

طلعت بكتابها من الغرفه تدور على أريج تسمع لها مرت غرفتها و ما حصلتها ( هـ البنت ما تجلس في البيت من فتحوا لها الملحق مرسم تطلع من الصبح و ما ترجع إلا لللأكل أو النوم )
فجر\ يمه وين أريج ؟
أم أريج\ أكيد بمرسمها
فجر\ بروح لها تسمع لي
أم أريج\ لا تطلعين أبوك عنده ضيوف
فجر\ و أريج كيف جالسه هناك ؟
أم أريج\ هي من أول هناك و لا طلعت
فجر\ طيب و أنا من بيسمع لي قواعد النحو ؟
أم أريج\ هاتيه أسمع لك
فجر\ بس عاد خلك زي أريج تلمح إذا نسيت شي
أم أريج\ أنتي ما مدلعك غير أريج أنا ما عندي غش بسمعلك و خل أشوفك منتي حافظه بس.......

*************

متمدد على السرير و كل تفكيره كيف يقنع أمه توافق يحس أبوه بداء يلين معه و في أمل يقنعه لكن المشكله الأكبر أمه و رأسها اليأبس و مها كيف يزيحها من طريقه قطع عليه أفكاره صوت الجوال
مشعل\ هلا والله
سلطان\ هلا بك وينك فيه الشباب كلهم بالإستراحه إلا أنت ؟
مشعل\ فيه قريب جأي لكم بعد شويه
سلطان\ فيك شي ؟
مشعل\ لا والله بس تعرف اليوم جمعه و الوالد موجود
سلطان\ اهااا أجل ننتظرك لا تطول

قفل مشعل من سلطان و أخذ مفتاح سيارته و البوك [ المحفضه ] و طلع بطريقه شاف مرام هـ الإنسانه تنقهر من مشعل في كل شي و لازم يتخاصمون بشكل دائم
مرام\ طالع ؟
مشعل\ يس
مرام\ طبعا وش هامك رفعت ضغط أمي و لا حتى سألت عنها
مشعل\ رفعت ضغطها بشو ؟
مرام\ بسالفة زواجك من هـ الأريج
مشعل\ بكره بينخفض عادي
مرام\ شو هـ الأمبالاة إلي عندك أنت ؟
مشعل\ تشبه تطفلك في أشياء ما تعنيك
مرام\ أصلا ما يعنيني لو ما تتزوج طول عمرك لكن أمي هي إلي تبي تفرح فيك
مشعل\ و هذا أنا أبي أتزوج ليش ما تفرح ؟
مرام\ كيف تفرح و أنت كاسر كلمتها و مصغرها قدام أختها ؟
مشعل\ إيه قولي إنك بتؤصلين هنا أسمعيني من الأخر البنت إلي ما عندها حياء و تتكشف قدامي هنا و هناك ما يشرفني إنها تدخل بيتي فاهمه.....


( سلطان عمره 28 سنه صديق مشعل المقرب من أيام الجامعه يشبهه في كل تصرفاته و هو أكثر واحد يرتاح له مشعل لأنه متأكد إن صداقتهم ما هي لأجل فلوس و المركز مثل باقي أصحابه إلي يتقربون منه )

****************

خلاص صارت تحس بالإختناق من كم ساعة و هي بين أربع جدران ما طلعت و الظاهر ضيوف أبوها مطولين تأففت بملل و تركة الفرشاه من يدها لازم تجيب للمرسم وسائل ترفيه أكثر تذكرت الروايه إلي أشترتها فجر أمس من المكتبه أخذت الكيس و هي تدعي ربها أن فجر ما أخذتها غرفتها (( الحمدلله الروايه موجوده خلني أجلس أقراءها و أضيع وقتي لين يرحون الضيوف ))

..
..
..

الجزء السابع

ضرب بريك بنص الشارع كان راح يسبب حادث يروح هو ضحيته لكنها شغله راحة عن باله و توه الأن يتذكرها جدته أمله الوحيد بموضوع زواجه متأكد من موافقتها و متأكد أن لا أبوه و لا عمه و لا أمه حتى بيرفضون طلبها باقي أريج بس و راح توافق حتى لو أضطريت أكلمها بنفسي..
رفع جواله و دق عليه مشعل\ هلا سلطون
سلطان\ أكرهك فوق كرهي لك مرتين لأقلت سلطون
مشعل\ ههههههههههه و أنا ميت فيك المهم ترى ما راح أجي الإستراحه اليوم
سلطان\ لاه وش غير رأيك توك جاينا ؟
مشعل\ طلع لي مشوار ضروري
سلطان\ ما يتأجل ؟
مشعل\ نوووو
سلطان\ اوكيه براحتك
مشعل\ أكيد براحتي أجل أطلب الإذن منك ؟
سلطان\ ههههههه لا العين
مشعل\ روح بس وأحد فاضي
سلطان\ أحلى يا الوزير مشعل تلاقي مشوارك مخطط فاشل
مشعل\ هـ المره غير و قول مشعل قال....

**************

دخلت عليها بكوب كافي يصحصحهم للمذاكره من بعد ما سمعت كلام مشعل أمس عنها و هي نائمه عندهم بحجة المذاكره و إستدراجها بالكلام و ش كان قصده بكلامه (البنت إلي تتكشف قدامي ما يشرفني تدخل بيتي) معقول مها كذا من وراي مع مشعل لهدرجه سخيفه في حبها [ مرام من نوعية البشر إلي ما تعترف بشي أسمه حب و لا تؤمن به ]
مرام\ اممممم ريحتها تغري
مها\ طبعا من يدي
مرام\ غرور
مها\ لا ثقه
مرام بقرف\ ثقة مشيعل
مها\ نفسي أفهم أنتي ليش تكرهينه ؟
مرام\ ما أكره بس أكره تصرفاته
مها\ ممكن هي تصرفات عاديه في نظر غيرك
مرام\ تفاهه مو أكثر
مها\ ياربي منك تعرفيني أحبه و أحبك لا تخليني أتشتت بينكم
مرام وهي تتذكر تصميم مشعل على زواجه من أريج\ حبي لك متأكده منه بس حب مشعل ما أظن
مها\ شو قصدك ؟
مرام\ يعني أنتي تعرفين مشاعر مشعل تجاهك ؟
مها بخوف\ لا
مرام\ و مع كذا مستمره بحبك له حب من طرف وأحد غريب
مها سرحت بخيالها لبعيد عمرها ماحست من مشعل أي حب أو حتى شي بسيط يدعوها لحبه أكثر بس القلب و حكمه.......

****************

جالس معها و ما هو عارف كيف و من وين يبداء الموضوع يحس إنه مرتبك و ممكن السبب وجود عمه معهم لكن جدته أختصرت عليه الطريق
أم عبدالله\ و أنت متى بتركد و تفتح لك بيت إلي بعمرك عيالهم بالمدارس لين متى أهلك يترجون فيك؟
مشعل\ والله يا جدتي أبشرك لي كم يوم أنا أترجاهم يزوجوني وهم مالهم نيه و إلا أنا خاطري أتزوج اليوم قبل بكره
أم عبدالله\ مالهم حق وش ما سكهم أجل و الخير عندكم لو تقول لأبوك زوجك اليوم
مشعل\ ما هي مشكلة زواج مشكلة البنت إلي بتزوجها
أم عبدالله\ و من هي ؟
أبو أريج\ حاط وحده في بالك و أنا عمك
مشعل إنتبه لدخول أبوه لمجلس عمه ( أبو مشعل يمر بشكل يومي بيت أخوه لجل يسلم على أمه و مكان عارف بوجود مشعل )
أبو مشعل\ أنت هنا ؟
أم عبدالله\ إيه و جاي يتشكى عليك أبدا مالك حق
أبو مشعل\ أفى تشكى على أبوك يا مشعل
أبو أريج\ أجل ليش ما تبي تزوجه ؟
أبو مشعل إنصدم لا يكون مشعل قالهم يبي أريج\ محد رافض غير هو
مشعل فكر يجيبها بطريقه ذكيه بدون ما يحسس عمه بشي\ أنا رافض الزواج من بنت خالتي ما هو الزواج كله
أم عبدالله\ بنت خالتك ليلى ؟
مشعل\ إيه جدتي ما أشوفها إلا زي أخواتي
أم عبدالله\ أجل مالكم حق تغصبونه عليها يا عبدالله
أبو مشعل\ محد غاصبه بس تعرفينها حصه لألزمة على أمر
أم عبدالله معصبه\ و عشانها تضيع حياة الولد حرمتك ذي محدن سنعها و ما بيسنعها غيري قوم هات تلفونك و دقلي عليها
أبو أريج\ هدي يمه لا يرتفع ضغطك خلاص مشعل ما هو بزر يعرف يتصرف مع أمه
أم عبدالله\ أبدن دامه ما يبيها ما يأخذها و رأسي يشم الهواء لين متى و هـ الحرمه تسيركم بكيفها
مشعل\ الله يطولي بعمرك يا جدتي والله أني كنت عارف ما بيفكني من هـ المها غيرك
أبو مشعل\ أجل دوري له عروس أنتي يمه و شوفيه يوافق و إلا يتحجج لك
أبو أريج\ مشعل هذا ولدي و إلي يباها أنا أروح أخطبها له
هنا مشعل جأت فرصته قام من مكانه و جلس جمب عمه\ الله يخليك يا عمي أجل ماله داعي نروح لغريب و بناتك فيه أخطب بنتك لولدك
أبو أريج\ والله ياولدي ما يغلن عليك بس أنت عارف الله ما عطاني من الدنيا غير هـ البنتين وحده متكلم عليها ولد خالها و البنت موافقه و معطينهم كلمه و الثانيه أنت تعرف بضروفها
مشعل إستانس يعني فجر معاد هي في طريقه\ وش ناقصها يا عمي أريج أنا ولد عمها و أولى منها بالغريب و أنت قلت أدرى بضروفها و حالتها يعني محد بيستر عليها و يداريها غيري
كان يسمعه و هو منصدم خلاص مشعل خطب لنفسه و حطه الأن قدام الأمر الواقع
صحيح الخبر فرحه و هذا إلي كان يتمناه إنه يتطمئن على أريج قبل يموت لكن سكوت أخوه مشككه بالسالفه أبو أريج\ و الله يا ولدي أنا ما عندي مانع و أمنيتي إني أشوف بنتي متزوجه و مرتاحه في بيتها لكن ما أبي راحتها تجي على مشاكل و سبب تفريق بينكم
كلام أخوه في محله و كل كلمه قالها صح الأن هو وقته يحسم هـ الموضوع و ينتهي منه أبو مشعل\ و الله يا عبدالرحمن حنا ما خطبنا رسمي من أبو مها و لا يدري بالموضوع و هو كلام بين حصه و أختها و هذا هو مشعل قدامكم ما يبي البنت و إن كان على أريج فهي يشهد الله أنها بنتي الثالثه و أبي لها الراحه و الستر و الحق مشعل جأني بنفسه و قالي إنه يبيها له زوجه و أنا ما عندي مانع أنه يأخذها هو ولد عمها و أنا أمّنها لك معه ما يجيها قصور....

***********

في الغرفه المجاوره للمجلس كانت ترسم و هي ما تدري بالمصير إلي ينتضرها و الكلام إلي دار حولها أحيان تكون الجدران نعمه تستر إلي يدور خلفها (( أريج عمرها ما فكرت بموضوع الزواج و شايله هـ الفكره من رأسها بالمره حياتها مستقره كذا و تحبها كذا ما عندها إستعداد تغيرها و تبعد عن أهلها مع رجل هي متأكده أنه أخذها من باب الشفقه و الستر مو أكثر ))

**************

خلاص الخوف سيطر عليها لازم تشوف لها حل غير المسن و الجوال لجل تشوف شو قضية غيابه الفجائيه هذي بأصابع متوتره ضغطة على رقم صديقه إلي طلب منها عادل تحفضه عندها في حالة فصل جواله تسأل عنه و صديقه بيوصل له الجوال لجل يكلمها رفعت الجوال لإذنها بأعصاب مشدود سرعان ما أرتخت و هي تسمع نفس الجمله إلي تسمعها على جوال عادل ( عزيزي المتصل إن الهاتف المطلوب مغلق حاليا ) رمت جوالها بقهر و حضنة الدبدوب إلي أهداه لها عادل بعيد ميلادها و بكت بفقد و خوف و حب...

**************

دخل البيت و هو مبتسم يطالع أبوه بفخر خلاص إلي يبيه صار و الأهم إن جدته بالموضوع يعني مع أمه بيمشي سلام سلام بس باقي عليه رأي أريج
أبو مشعل\ السلام عليكم
أم مشعل\ و عليكم السلام ما شاء الله أول مره تدخلون مع بعض
مشعل\ جأيين من مكان وأحد
أم مشعل\ الشركه ؟
أبو مشعل\ لا بيت أخوي
أم مشعل\ وش عندكم رايحين لهم مع بعض
أبو مشعل\ رحة أسلم على الوالده و لقيت مشعل هناك
مشعل بثقه\ و أبشركم خطبة من عمي
أم مشعل بصدمه\ شو تقول ؟؟؟؟
مشعل\ خطبت أريج و عمي و جدتي موافقين
مرام\ صحيح يبه ؟
أبو مشعل\ إيه يبه
أم مشعل\ أنت أكيد تمزح كيف تروح تخطبها و أنا ماني موافقه و أنت صرت مالي كلمة عليك مكني أمك
مرام\ لا و مبسوط الأخ عبالك ما أعرف ليش تبي أريج عشان تسافر و تسهر من غير ما أحد يقولك شي
مشعل هذي إلي بتورطني قدام أبوي\ لا عشان أقهرك أنتي و بنت خالتك و من اليوم أريج خطيبتي ما أسمح لأحد يتكلم فيها
ريم إلي من أول تراقبهم بصمت و تخفي فرحتها\ مبروك مشعل
مرام\ جأتك هذي تبارك عبالك هو حتى فيه عرس زي الناس
مشعل\ يبارك فيك ريومه و الله عاد إلي تطلبه أريج أنا موافق عليه
أم مشعل\ يا مشعل أنت ولدي و فرحتي الأولى أستهدي بالله و فرح قلبي فيك أريج ما تصلح لك تبيها لأنك ولد عمها و بتستر عليها أنا ما عندي مانع بس خلها لك زوجه ثانيه بعد كم سنه و فرحني فيك أول
مشعل هو أنا ناقص وحده لجل أتزوج ثنتين\ الفرحه بالقلب مو لازم نسوي عرس و تبذير
مرام\ أنت واحد....
مشعل قاطعها قبل تكمل\ بس أنتي شي ما يخصك لا تكلمين فيه
أبو مشعل\ بس أنت و ياها و هـ الموضوع خلصنا منه خطبنا البنت و أنتهينا كانها من نصيبك بتأخذها و أن سمعت منك يا حصه و إلا بناتك كلمة لبيت أخوي و الله ما تشوفين خير
مشعل\ إن شاء الله يبه أنها من نصيبي دام جدتي الغاليه موافقه ما يهمني أحد


..
..
..

الجزء الثامن

الخبر نزل عليها مثل الصاعقه أخر شي توقعته بالدنيا تسمع هـ الكلام من أمها الأن في أسوا حالاتها كانت تظن بتسمع شي زي كذا و هي على أبواب الثلاثين لكن تسمعه الأن و هي لسى ما وصلت العشرين...!!
أريج\ يمه أنتي وش تقولين ؟
أم أريج\ يمه مشعل ولد عمك و هو ما طلب شي حرام يبي يتزوجك على سنة الله و رسوله وش فيها ذي
أريج\ بس أنا ما أبي أتزوج
أم أريج\ وش إلي ناقصك ما تتزوجين هذا أنتي ما شاء الله بنت زي القمر و ولد عمك تارك البنات و جأيك
أريج\ جأيني شفقه قولوا له أريج ما تبي تتزوج من أي حد و مشكور لأنك فكرت فيها
أم أريج\ ما ظنيت بسمع منك هـ الكلمه يوم يا أريج أنتي منتي مقطوعه من شجرة عشان يشفق عليك
أريج\ يمه أنا أسفه ما هو قصدي إلي فهمتيه بس مشعل هذا من متى صار يفكر يتزوج و يبيني أنا من بين هـ الناس كذا فجأه
أم أريج\ و الله عاد هذا كلام أبوك أنتي فكري و لا تستعجلين برفضك يمكن ربي كاتب لك معه نصيب ما تدرين..


**************

في السياره تراقبها و هي شاكه أن فيها شئ من الصباح و هي تحس إن في عيونها كلام ما هي عارفه كيف تقوله
مها\ أنزلي معي
مرام\ لا والله تعبانه بروح أنام
مها\ نامي عندنا وش ورآك الإختبارات و خلصناها ؟
مرام\ عشان كذا بنام و ما أظمن متى بصحى
مها\ يالله عاد بلا حجج واهيه
مرام\ معليه مهاوي مالي نفس
مها\ يعني ما بتقولين وش فيك ؟
مرام\ ما فيني شئ
مها\ عيونك فيها كلام
مرام\ تتؤهمين
مها\ أتمنى يالله وصلت أكيد أمي تنتظرني عند الباب عادتها كل أخر أختبار و لو حسيتي أنك تبين تتكلمين تعرفين جوالي
نزلت مها لبيتهم و كملت مرام طريقها و كل تفكيرها في مها و خالتها لسمعوا بخبر خطبة مشعل شو بيصير لهم.....

***********

ألتفت له ماهو مستوعب صديقه وش يقول أكيد أنجن صحيح بنت عمه ما قلنا شئ بس هو كيف غير رأيه عن فكرة الزواج به السرعه و قرر الإرتباط بوحده ظروفها مختلفه
سلطان\ أنت متأكد أنك صاحي ؟
مشعل\ طبعا
سلطان\ ما أظن مع أحترامي يعني بس بنت عمك ما راح تريحك و يبي لها زوج بمواصفات خاصه ما تنطبق عليك
مشعل\ من قال أني أدور عندها راحه ؟
سلطان\ و ليش متزوجها لا تقولي الكلام إلي مسمعه عمك و أبوك ترى أن مشى عليهم ما يمشي علي
مشعل\ شوف الزواج هم و مسئوليه و حرمه تقعد لك على الرايحه و الجايه وين رايح؟ ليش تأخرت؟ لين متى بتسهر؟ ليش أتعب نفسي بكل هذا و بنت عمي فيه ما راح تفتح فمها بكلمه بتعيش حياتها في بيتها معززه مكرمه و بعيش أنا حياتي زي ما أبي و محد بيقولي يا مشعل أتزوج
سلطان\ توقعت منت خاطبها للـه بس عشان تسكتهم بس تخيل ما توافق
مشعل\ وين بتلقى مثلي
سلطان\ بدينا بالغرور عاد يا سيدي ربنا يهنيئك و يسلم المسكينه من شرك....

************

بغرفتها مندمجه بالمذاكره لإختبار بكره هـ الماده بالذات تكرها و ناقصها درجات كثير فيها عشان تنجح قطع عليها صوت الجوال أخذته بدون نفس و طالعت الشاشه و أبتسمت أخيرا
ريم\ أنت وين رحة حرام عليك كيف قدرت تسوي فيني كذا و ربي زعلانه
عادل\ أول شئ السلام عليكم و معك حق تزعلين بس أسمعيني و بعدين أحكمي
ريم\ شو ؟
عادل\ تذكري اليوم إلي قابلتك فيه بالمكتبه
ريم\ إيه
عادل\ أنا طلعت و صار لي حادث
ريم بخوف\ حااااادث
عادل\ و من يومها و أنا بالمستشفى أمس إلي طلعت
ريم\ يا روحي و ربي كنت حاسه فيك شي طيب ليش ما طمنتني من يومها و الحين أنت بخير فيه شئ يعورك ؟
عادل\ ما بغيت اقلقك و أنتي داخله على إختبارات و ما كان عندي جوال لأنه أتكسر و اليوم صديقي إلي طلع لي الشريحه
ريم\ أنا دقيت على رقم صديقك إلي عندي كمان مقفل
عادل تلعثم و كمل كذبته\ إيه هو كان معي بالسياره
ريم\ طيب أنت الأن بخير
عادل\ والله مكسر و تعبان بس سمعت صوتك سرت كأني حصان
ريم\ أيوه بكش علي
عادل\ افى حبي صار بكش بدل ما تجبرين بخاطري لجل الكسر إلي بيدي
هنا ريم صاحت كسر يعني عادل يتألم
عادل\ ريوم ليش الصياح حبيبي خلاص و الله أنا بخير
ريم\ كيف و أنت يدك مكسوره
عادل\ أسبوعين و أفتحها و كأنه ما صار شئ
ريم\ و ما راح تسوق و لا تطلع من البيت أسبوعين فاهم
عادل\ من عيوني حبيبي خلاص أنتي الأن ذاكري و أنا بنام شوي و بكره أكلمك
ريم\ طيب
سكرت ريم و هي تطبع بوسه على الجوال الأن فيها ترتاح بعد ما تطمنت عليه ... في الجهة الثانيه عند عادل أرتفع صوت الضحك
عمر\ صدقة
عادل\ أكيد
عمر\ تكفى عويدل عطنيها فترة شكلها صيده ما تعوض
عادل\ لا عاد هذي صيدتي الملكيه أنا أكلمها و بس
عمر\ مالت بس دبر لنا كم ألف من عندها خل نسافر نعيش الحياه
عادل\ أركد عاد تونا راجعين تبي أبوي يفتح لي قضيه على هـ الفلوس
عمر\ عادي قوله أعرف وحده فلوسها زايده بلا رقيب و لا حسيب..

**************

مجتمعين على العشاء بإستثناء أريج إلي رافضه تأكل بحجة أن مالها نفس و جالسه بمرسمها من العصر لوحدها
أم عبدالله\ و ينها أريج ؟
أم أريج\ تقول ما تبى أكل هـ الحين يا خالتي
أم عبدالله\ و ليش ما تبي هي وين من العصر ما شفتها ؟
أم أريج\ بالمرسم برى
أم عبدالله\ روحي يا فجر هاتيها حنا ما تعودنا نجتمع على سفره ناقصين
أبو أريج\ ما عليه يمه خليها على راحتها هـ المره
فجر\ إيه جدتي خليها يمكن بتفكر براحتها
أم عبدالله\ تفكر بشنو حد يشاورها على قصاص هذا ولد عمها و يبيها زوجتن له
أبو أريج\ إيه يمه بس هي لها حق توافق و إلا ترفض خلوها تفكر براحتها لا أحد يضغط عليها أريج عاقله و تعرف مصلحة نفسها...

************

في المرسم كانت ترسم و تمزق رسوماتها بشكل عشواي و تفكير مشتت الغرفه كلها أوراق و ألوان على الأرض دخل و شاف حالها كيف مبهذل
أبو أريج\ أروجه يبه وشفيك قالبه الغرفه مزبله ؟
أريج\ هلا يبه لا بس ما أني قادره أرسم الأن أرتبها
أبو أريج جلس على الكنبه و أشر لأريج\ تعالي هنا عندي
أريج حركة كرسيها جهة أبوها\ نعم يبه
أبو أريج\ أظن أمك كلمتك في موضوع زواجك صح ؟
أريج\ أيه
أبو أريج\ أسمعيني يبه و فكري بكلامي زين أنا و أمك لا يمكن نغصبك على شئ ما تبينه حتى لو كنى نشوف فيه مصلحه لك
أريج\ أعرف يبه
أبو أريج\ لكنى نتمنى اليوم إلي نشوفك فيه في بيتك و عندك عيال يعزونك لأكبرتي
أريج\ بس
أبو أريج\ خليني أكمل يبه
أريج\ أسفه يبه
أبو أريج\ الواحد لاصار أب وإلا أم و شاف عياله يكبرون قدامه تكبر أحلامه معهم و أكبر حلم أنه يشوفهم متزوجين و يجيبون لهم أحفاد
أريج\ يبه فجر بتتزوج بعد كم سنه و تجيب لكم أنا ....
أبو أريج\ أنتي شو إلي ناقصك ما تجيبين يا يبه اليوم إلي أشوفك في بيتك هو أسعد يوم في حياتي لأني بكون مرتاح و متطمئن عليك قبل أموت
أريج\ لا يبه لا تقول كذا أن شاء الله يومي قبل يومك
أبو أريج\ أنتي عارفه أن الموت حق علينا جميع
أريج\ إيه يبه بس لا تفكر فيه الأن الله يخليك تبيني أتزوج مشعل أتزوجه بس لا تجيب طاري الموت
أبو أريج\ ما قول لك هـ الكلام أغصبك تتزوجين يبه بس أبيك تعرفين ما في شئ بيريحني زي يوم أشوفك مع رجال يحفظك و يصونك و مشعل ما هو غريب علينا نعرفه و من دمنا
أريج\ و ليش يباني إلا أنا ؟
أبو أريج\ وش قاصرك أنتي ما يبيك هذا النصيب
أريج\ ما أعرف شو أقول يبه
أبو أريج\ لا تقولين شئ فكري زي ما تبين و تعالي قوللي لقررتي....

****************


جالسه مع أمها و كل تفكيرها في مرام اليوم أبد ما كانت طبيعيه مها تعرف لها و تفهم عليها من وقت هم صغار دوم عيونها تفضحها
أم مها\ وشفيك أنتي اليوم سرحانه على طول ؟
مها\ أفكر في مرام اليوم مره ما كانت طبيعيه
أم مها\ سألتيها طيب ؟
مها\ تقول ما فيني شئ بس عيونها فاضحتها
أم مها\ غريب حتى خالتك اليوم ما جأتني زي العاده دقيت عليها تقول تعبانه
مها\ يعني فيهم شئ ؟
أم مها\ لا أن شاء الله ربي يستر
مها\ يمه قلبي ما هو مرتاح
أم مها\ تعوذي من أبليس ما فيهم إلا الخير

..
..
..

الجزء التاسع




رمت الروايه من يدها و صرخت بعجب هـ الإنسانه أكيد تخبلت و ما هي مستوعبه إلي تقوله
فجر\ صاحيه أنتي بتدقين عليه تقولين له بالله ليش بتتزوجني ؟
أريج\ هدي صوتك لأحد يسمعك
فجر\ خلهم يسمعون بنتهم العاقله وش بتسوي
أريج\ يعني إلي يطلبه هو عقل
فجر\ إيه عقل و ستين ألف عقل يبي يتزوجك تفهمين معنى زواج
أريج\ يعني حياه مشاركه في كل شئ و أنا ما عندي شئ أشارك فيه مشعل
فجر\ و بترفضين ؟
أريج\ أبوي قالي كلام نسيت بعده معنى الرفض
فجر\ كلامه صحيح أريج لا تعذبين أمي و أبوي يبون يشوفنك مرتاحه
أريج\ مدري
فجر\ وشو مدري بعدين تراك طولتي على الناس لك أسبوعين خلاص يا أختي قولي إيه و فكينا خليني أستمتع بالبيت شوي
أريج و هي ترمي المخده عليها\ سمعت خالتي تقول فجر خلصت ثانوي بنزوج ماجد هـ الصيفيه
فجر\ لسى ما طلعت النتيجه و هو خليه يخلص جامعه أول
أريج\ أستحي مستعجله على عرس و وجع رأس
فجر\ أحسن من بعض ناس موافقين و يتغلون يا ستي وين بتحصلين عريس زي مشعل و إلا عمه زي حصه
أريج\ مشعل ما أعرفه عشان أحكم عليه بس عمه سُكره
فجر\ خذي دروس من جدتي في كيفية قهرها قبل تروحين
أريج\ إلي يسمعك وافقت أنا عاد.....

*************

دخل البيت و هو مواصل و واصل حده تعب و طفش ماله نفس يكلم أحد و إلا حتى يشوف أحد
كانت طالعه من غرفتها و شافته مرام\ اوووه مراحب تصدق من أمس ما شفتك
مشعل\ عادي
مرام\ طبعا عادي
مشعل\ طيب وخري من خلقتي بنام
مرام\ شو هـ النفسيه العدم من مضايقك ؟
مشعل بدون نفس\ مواصل
مرام\ اهااا عبالي عشان أريج
مشعل ألتفت لها بنظره\ شو فيها أريج ؟
مرام\ لا بس مو تحسها طولتها
هو خلقه مقهور من هـ السالفه لأنها فعلا طولت مشعل\ براحتها
مرام\ مدري أحسها تتغلى و إلا وين بتحلم بواحد زيك
مشعل وهو معصب\ أطلعي من خلقتي لأسوي لك معلم بوجهك طول العمر......

**************

من اليوم إلي عرفة بخطبة مشعل و هي لا تأكل و لا تكلم أحد كل أحلامها ماتت قلبها أنجرح مشعل فضل عليها وحده معاقه شلي ناقصها هي قدام أريج هي أحلى منها هي جامعيه و مع كذا مشعل تركها و خطب أريج
أم مها\ مها يمه خلاص لا تعذبيني قومي كلي لك شئ
مها\ مالي نفس
أم مها\ يا يمه الزواج قسمه و نصيب بكرة يجيك إلي يسوى مشعل
مها\ و ينه يمه هااه حتى مشعل الأمل الوحيد راح أنا محد يبيني لأن أبوي خريج سجون
أم مها\ أنتي ألف وأحد يباك وش ناقصك جمال و تعليم بعدين أريج لسى ما وافقت خليه بكره بيجيك ندمان لعاش مع أريج و شافها كيف ما تقدر تريحه
مها بمكابره\ ما أبيه يرجع لي و خلي أريج تنفعه بكره يشوف من هي مها
أم مها\ خلاص يمه خلك أكبر منه إلي ما يبيك مره لا تبينه عشر.....

****************

يا كثر ما توصي أمها لبغت تطلع مكان تحس برأسها بينفجر كل كلمة تقولها صارت حافظتها عن ظهر قلب
أريج\ طيب فهمت يمه و الله حافظه كل إلي بتقولينه
فجر\ هههههههه و ربي معك حق
أم أريج\ هذي جزاة خوفي عليك يا يمه
أريج\ لا ياست الكل بس أنا جالسه مع جدتي و الشغاله يعني ما أني لوحدي ليش كل هـ القلق عليه
أم أريج\ و ذكر أن الذكرى تنفع المؤمنين
أريج\ حاضر كل إلي قلتيه بسويه بالحرف الواحد بس أنتي أنبسطي و لا تفكرين فيه
أم أريج\ لو بس الله يهديك و تروحين معنى
فجر\ يالله أريج عشان خاطر خالتي المره الأخيره لمن جأتنا وعدتيها تروحين لها
أريج\ معليه هـ المره حيل تعبانه و الطريق لين الجبيل طويل
أم أريج\ طيب أنتي هالحين حرارتك نزلت يوم نروح عنك
أخذة أريج يد أمها و حطتها على جبينها\ ألمسيني بنفسك و الله صرت زينه
أم أريج\ زين لو بغيتي شئ و إلا حسيتي إنك تعبانه أتصلي فيني على طول
أريج\ أبشري من عيوني
فجر\ اممم تبين أجلس معك ؟
أريج\ ضرابة العصر وين راحت عنك
فجر\ هههههههه زين يمه منك خلاص بروح
أريج\ طيب يالله يا حلوات أبوي مل بالسياره......

**************

هـ المره كابرت على إحساسها و دخلت بيتهم الكل عارف إن إنقطاعها عنهم بسبب خطبة مشعل لكنها اليوم قررت تقهر مشعل و تبين له إنه ما يعني لها شئ
في الحوش الكبير كانوا جالسات على العشب بين سوالف و ضحك ريم إلي من فتره ما خالطة حد
مها\ منتي طبيعيه اليوم ؟
ريم\ ليش إن شاء الله عادي الضحك ببلاش
مرام\ بس بسبب
ريم\ مبسوطة
مها\ من شو ؟
ريم\ سر
مها\ الله يهنيئك
ريم\ أكيد
مرام\ افف الجو حر تعالوا ندخل جوا
مها\ بالعكس حلو ملينى من جو البيت
ريم\ لي أول مره بحياتي بتفق معك يا مها الجو هنا و نااااسه
مرام\ لو رحنا مع أمي و خالتي السوق أبرك
مها\ يمكن لقينى مزيون يطير عقلك
مرام\ أنا يطير عقلي بسبب رجال ما جأبته أمه لسى
ريم\ معقده
مرام\ نعم شنو قلتي ؟
مها\ هههههه و هي صادقه يا ماما الحب شئ حلو بس محد يصونه
مرام\ يعني ليش أجرح قلبي بلا حب بلا هم
ريم\ مو كل حب نهايته تعيسه
مرام\ أيه حب الأفلام و بس

.
.
.
.
.

بالدور الثاني كان يتقلب بملل من وقت دخل الغرفه و تفكيره في هـ الأريج إلي ما جاء منها خبر خاطره يطلع يشغل سيارته و على بيت عمه على طول يشوف وش قضيتها معه رمى الفراش عنه بقهر ( مشعل لما يعصب تكون تصرفاته بدون تفكير و نتائجها سلبيه 100\100 ) بدل على السريع و نزل و هو معزم يروح يسأل عمه عن رأي أريج و ليش طولت كذا طلع و هو يسمع أصواتهم و ضحكهم بخاطره ماله أي نفس يشوف هـ المها أو يسمع كلام مرام إلي يقهره نأدى على ريم بصوت بأين فيه الغضب\ ريم أبي طريق لسياره
مها و بدون أي مبالأه رمت الشيله على شعرها و أعطت الباب ظهرها\ خليه يمر متغطيه
مرام\ متغطين خذ طريقك
مشعل كان يمشي لسيارته و بخاطرة لو يروح يكفخ مها كف يعلمها الأدب سيارته ما كانت بعيده عن جلستهم فقط كم متر يعني متأكد إنها تتفحصه بوقاحه هـ اللحظة رن جواله و أبتسم و هو يشوف المتصل أكيد معها البشاره مشعل\ هلا بالغاليه فديتها
للحظة تجهم وجه مشعل و أرتفع صوته\ أريج .... شو.. طيب طيب خلاص هدي أنا جأيك .. لا مسافة الطريق بس
هذا ألي سمعوه و بعدها صوت سيارة مشعل إلي أرتفع و كأنه يمشي بسرعة 190 بدون ما يفهمون شئ
مها\ أريج تكلم مشعل ؟؟
لحظة صمت
ريم\ لا مستحيل ما تسويها الظاهر فيهم شئ
مها\ سمعتيه بنفسك قال أريج
ريم بقهر منها\ قال أريج يعني مو شرط تكون هي إلي على الخط......

..
..
..