الجزء الثامن عشر



...: ناصر انت ما تفهم تدري وين نوت فيه
ناصر بصدمة : وين يا طويل العمر
...: بفندق لوذان النسائي
ناصر بستغراب واضح : شلون عرفت
...: عرفت بطريقتي الحين حاول ومابي أي اخطاء وجيب لي نوت من تحت الأرض وهيف وش صار عليه
ناصر : مدري الاطباء عنده مختبصين
...: والله ودي نعطيه ابره ونرتاح منه بس مابي نسبب مشاكل حنا في غنا عنها ويتوصلون لنا المهم مثل ما قلت لك روح للفندق تدخل تهجم تقتل اهم شي تحضر نوت عندي

" قربك من الله حماك يا نوت استمري تقرباً " غيوم :)



فتوون : يمه الله يهديك ما قلتي ان سعد ابو الدعله شهد موجود
ام بندر وهي تطالع فتون راحمة حالها وما ردت عليها لأنها تفكر وش بيكون ردة فعل فتون اذا درت انها زوجه ومن زمان يعني حرمتها من التفكير بزوجها المستقبلي واختياره من ابسط حقوقها حرمتها امها بس وش تسوي كانت من لهفتها عشان سعد وتبي تعوضه يوم توفت زوجته ما لقت نفسها الا تقول ترا فتون جتك والله ثم والله ان تملك عليها هذا اخوها وهو ولي امرها وهي بزر واذا صارت مرتن يشد بها الظهر تعال وخذها صح كان سعد وقتها فاقد زوجته وحرجته خالته وعطته وطاوعها وتملك ونسى ان له زوجه وعاش لبيته ولبنته الي توفت امها وعمرها اربع سنوات

فتون : يمه بسم الله عليك وش فيك وين رحتي
ام بندر : مارحت ديره وتراتس صجيتيني جيبي لي القهوه وترا غدانا اليوم محدن مسويه الا انتي
فتون وهي متضايقه : والشغاله وين راحت وش جايبينها له
ام بندر بعصبيه : واذا رحتي لبيت زوجتس بتقولين جب لي شغاله
فتون بدلع : اصلن من ضمن شروطي لزواجي شغاله
ام بندر وهي تعصب عليها او يمكن معصبه من نفسها : قومي قومي قبل اقوم عليتس
فتون : ههههههههههههه شوي شوي يمه امزح معتس بروح اخبص وترا مالي شغل اذا ما اعجب خويلد

راحت فتون وقعدت ام بندر تدعي انها ما تكون ظالمه لبنتها وان سعد يستاهلها وهو الي راح يقدرها بإذن الله تبي تطمن نفسها لكن ما تدري وش شعور سعد وش يحس من ناحيتها



سمر بصدمة : ما لقيتوها وين راحت يعني وبشهقة ليكون احد خطفها
ابو سمر بعصبيه أقول سمر ألفتي قصة وصدقتيها
ام سمر : اذكري الله يا سمر
سمر على طول صورة بندر طلعت في راسها هو ليش جا هذاك اليوم وليش حذرني وصارت توقف وتفرك يدينها ببعض لالا مقدر اقعد يبه لازم ندور عليها لازم نشوف وين راحت
ام سمر : يمكن بالمستشفى
ابو سمر : الله العالم انا بروح وشوف
سمر : تكفى يبه طمنا
طلع ابو سمر وجلست سمر تبكي يمه توقعين شي صار لنوت
ام سمر : لاحول ولاقوة الا بالله اذكري ربك ولا تفاولين عليها
سمر : طيب وين بتروح يعني يمكن الحرامي الي جانا يكون خطفها
ام سمر : والله قلبي يقول ان الحرامي مباحث والله العالم بس دبرته وانه جاتس وحذرتس شي استغربه وش قصده
سمر بحيرة : مدري يمه يمكن مو مباحث يمكن حرامي
ام سمر : لالا العلم فيه أن بس يا خبر اليوم بفلوس بكره ببلاش








نوت بتوتر : والله اني منحرجه مدري وش ببر خروجي
سعدية : ترا ما طولنا كلها يومين
نوت : عندك مو كثيرة بس اكيد هو دورنا والمشكلة الحين بيجي المغرب وهو ما جا
سعديه : انتي عارفه انه يتأخر بالدوام
نوت : مدري قلبي مو مطمن









كان الوضع هادي عند هيف كان يوجد كسر في رجله اليسار من عند القدم وكسر باليد اليمنى وباقي جسمه سليم وضربه طبعا في الرأس سببت ارتجاج لكن الحمدلله مو الصعب لكن هيف مستسلم لغيبوبته او خلونا نقول النومه مايبي يفتح وهذا الي خلا سلطان معصب مره

آدم : ارحم نفسك لك فوق اربع ساعات تكلمه
سلطان : قاهرني يا آدم يحس فينا ويدري انا حوله ومو راضي يكلمنا او يفتح عيونه ليه هو ما درى اني راح اموت لونه مات مادرى اني صارت الدنيا في عيوني مو سودا بيضا بياض غريب بياض شفاف استوت الاشياء عندي حتى مثايل تعبانه و مارحت لها خفت أروح وارجع وفقده وكذا يجازيني بس الشرهه مو عليه الشرهه علي الي جالس وابكي عند راسه مثل الحرمه

جا صوت يشوبه التعب صوت كانه جاي من بير بعيــــــد : وش المذله هذي
التفت آدم على هيف وسلطان ما التفت خاف يلتفت ويكون يتخيل وصار يلف راسه بشوي شوي وانصدم بالعيون المرهقة الي تحمله ابتسامة لكن اختفت عيونه عشان جسد آدم الي غطاه وصار يبوس راسه ويديه ويتحمد له بالسلامه
كان يتفرج عليه وهو بصدمة على فرحه على عبرة خانقته ويردد داخل نفسه الحمدلله يارب لك الحمد استقبل القبلة وسجد لله وطول وهو ساجد يحمد الله نزلت دمعه بسيطه من عين هيف تعلقت في رمشه وما رضت تنزل لخده حس بمدى خوف سلطان عليه ورفع سلطان راسه من على الارض وناظره وهو يقول : مابغيت والله لو ما فتحت كان تجيك وهو يأشر على جيك موجود على طاوله عندهم : على راسك
هيف ضحك :آه
آدم : بسم الله عليك
سلطان بزعل : خله يتوجع شوي عشان يحس فينا شوي
هيف وهو يرجع يغمض عيونه مازال يحس بالالم
سلطان كان خايف بس مرضى ينطق باي حرف الي خلا آدم يتكلم : هيف مالك
هيف : ولاشي دايخ دايخ مرره
سلطان : اكيد بتدوخ لان الضربه على الراس الحمدلله الي جت على كذا بس قولي كيف صار لك الحادث
هيف وهو يتذكر نوت ويرجع يغمض ما يبي يتذكر موقفه لكن خوفه عليها خلاه ينطق :آدم وش صار على نوت
سلطان : لا تخاف أكيد سعدية عندها
هيف : اتصل يا آدم على البيت شوف وش اخبارهم متأمل انهم بالبيت وناظر سلطان محتاج لسلطان محتاج يطلع الي بقلبه لكن عجزة وتعبه ومرضه خلاه يأجل الكلام لوقت ثاني
دق آدم على البيت الي كانت سعدية جنبه وعلى طول من اول رنه ردت
سعديه هدوء : الو
آدم : السلام عليكم
سعديه : وعليكم السلام هلا خالي
آدم : وش أخباركم و أخبار نوت
سعدية : الحمدلله كلنا بخير
آدم : الحمدلله يالله اشوفك على خير


سلطان : ماقلت لها عن حادث هيف
رد هيف وهو يحس بفرح وشعور حلو : لالا تقولون لهم الحين
سلطان : بس اخاف يتباطونك
هيف : خلهم يتباطوني ماعليه
استغرب سلطان من هيف تصرفه بالعاده هيف حريص ودقيق بكل شي بس اكيد له اسبابه وبيوضح له او يمكن عشان البنت مجنونه الله العالم
سلطان : اقول يابو الشباب الله يعيني الحرمه اكيد زعلانه قطعنا شهر العسل وتعبت ولا رحت يمها وش السواه علمني كيف اعتذر منها
ضحك هيف :آه سلطان ارحمني تراني مريض تعرف تدبر عمرك
سلطان : والله الي رقدت برى الغرفة
آدم وهو يطلع ويخليهم عشان ياخذون راحتهم
هيف : يعني بتروح وتخليني
سلطان : وش ابي في مقابلك عافتك نفسي
هيف بابتسامة : ما أصدقك من الي يصيح مثل البزر قبل شوي
سلطان بضحكة : لالا هذا مريض الغرفة الي جنبنا مهوب انا تراك منغر في نفسك
هيف : روح اجل لمثايل قبل تلقاها مقفلة الحين الغرفة
سلطان وهو يحك راسه : الله يعين يالله اشوفك على خير وآدم بيجلس عندك ومارتحت إلا لاني شفته
ابتسم له هيف ولا علق على كلامه سرح بنوت وش بيكون ردت فعلها اذا درت عنه يا ترا بتزعل وتهتم وتخاف عليه كان خاطره يشوف ردة فعلها بس شي داخله ما خلاه يخلي آدم يقولهم







بندر وهو يمضغ اللبان ويتفخه ويدخله جوا فمه ويرجع يتفخه من جديد كانت اعصابه باردة عكس اعصاب مؤيد الي محترقة
مؤيد : وين حنا عايشين كيف يبونا ندخل الفندق
عبد الحميد : ياكثر الحريم نعطي أي حرمه فلوس ونخليها تساعدنا
بندر بخوف وحذر : وكيف تثق باي حرمة
عبد الحميد : البنات الخربنات واجد ياخي ترا تضيع شرفها عشان بطاقة شحن
" والعياذ بالله " الحمدلله الذي عافانا مما ابتلاهم غيوم
مؤيد وعجبته الفكره : خلاص من بكره نشوف حرمه تدخل وتشوف الجو لنا وكيف نقدر نتوصل لنوت
هشام وكأنه في مكان مو مكانه : ما تلاحظون شي عجيب
الكل التفت عليه يبي يشوف وش بيقول
هشام : حنا ونوت مثل القطو والفار نروح في كل مكان ما نلقاها تنجى بأعجوبة رهيبة
بندر بضحكة : يمكن تقرا الأذكار
مؤيد ويناظر بندر وما اعجبه روقانه الي خلا بندر يقوم يمشي ويبتعد عنهم شوي مايبي يلفت الأنظار له وخاف مؤيد يشك فيه
يمشي وهو يكلم عمره عالم غريبة تقتل ولا تحس بتأنيب الضمير عشان كم فلس حرمتوا بنت من امها وابوها وشتتوا حياتها يا ترا وش انت مخبي يا شيخ محمد يخلي العصابه تطاردك وسعد يكتم على الموضوع ما يعطيني إلا رؤؤس أقلام بس

ووش تسوي التفت بندر لقى مؤيد يناظره : ناظره بندر بنظرة حادة ورد بهدوء اتمشى
مؤيد : لا تبعد عشان ما تلفت لنا الانظار
كان بندر يحس انه مخنوق من ذا الجو وما يريح فؤادة وقلبه الا ذكرى سمر وهي لافه الجلال على وجهها ذكراها بس يخلي جوه يتعدل ويبتسم غصب عنه ويحس بفرح بسيط يتغلل داخل قلبه




كان ابو سمر يمشي بسرعه وقابل سلطان عند بوابة المستشفى وعرفه
سلطان : هلا والله
ابو سمر : السلام عليكم بشر شكل وجهك يبشر بالخير
سلطان : ابشرك هيف طيب وبخير وتوي طالعه منه
ابو سمر : تكلم معكم
سلطان بفرحه : أي الحمدلله
ابو سمر : الحمدلله وبتردد طيب اهل بيته وينهم عندكم
سلطان بتلقائيه : لا توه متصل عليهم في بيتهم
ابو سمر : متأكد
سلطان : أي متأكد ليه عسى ماشر
ابو سمر : ما شر ان شاء الله بس لاني مريت الصبح ولا لقيتهم
سلطان : يمكن طالعين مشوار
ابو سمر : احتمال ودع سلطان ورجع لسيارته تردد يروح لبيت هيف او يروح لبيته وكان انه يروح لبيته افضل خاف يترك اهله بلحالهم يكفي الي جاهم












ام سلطان : مبارك تراك صدعت راسي مطولن على ذا التلفزيون واذا رحنا وخليناك اظعجتنا رحتوا وخليتوني قصر عليه
ابو سلطان : ابي اسمع تحسبيني مثلتس اسمع دبيب النمل
ام سلطان : لا اله الا الله قول مشاء الله
ابو سلطان : عيني بارده مانيب ناظلتس
وجتهم نوف : مساكم الله بالخير
قصر ابو سلطان على التفزيون : مساتس بالرضى والعافيه
ام سلطان : ما قصرت الا يوم شفت نوف
ابو سلطان وهو يبي يقهرها : ليه حتسيتس مثل حتسي نوف حتسي نوف يرد الروح
"

السلااااااام عليكم.
مرحباا مليااراات. اسفرت وانورت . غيوومه للحين ماطاحت عيني الا على الترجمه..هههههههههههههههههههههههههه. والله انتي ابدااااااااااااع.. عليتس ترجمه مدري كيف تلقينها..؟؟هههههههه.




غيوووووووومه ياامرحباا ملياارات بام غيث.. احلى الاسم من ام مطر صح؟؟ وهـ بس يكفي ان فيه طاري غيث..هخهخهخه
غيوومه الف الحمد الله على السلاامه.. ونوورتي مكاانتس يااقلبي.. وتستااهلين كل التشجيع والحمااس ياازعيمه..
واحب اقوولتس الله يطمن قلبتس ورووحتس على كل احباابتس مثل ماطمنتيني على ابونا هيف.. يااااااازينه زينه وهو قاايم يهاوش على سلطووني..
عسااها دووم هالمحبه ياارب..
نوت : خاايفه اجل هاه؟؟ يستااهل ابو سعوود من يخااف عليه.. اصلاا مااباقي لتس الا هوو بهالدنيا.. بس ياليت تبينين له شوويه عقل يااعسل.. الحين انتي مطلووب القبض عليتس تم التصريح بهالامر.. والله يعينتس ياارب.. يمكن لما يعرف ابو سمر انتس برووحتس بالبيت يجي وياخذتس عنده.. وهنااك مااندري الا ابو البنادر ناط عليكم مره ثاانيه ومعطيتس العلوم كلهاا وهو عيوونه على سمووره.. ياليت والله خاطري يشوفها ثاانيه..ويمكن ماعاد فيه طريقه الا هذي..؟؟

سلطان ومثايل: نعم الاخو ونعم الصديق ياا ابو مباارك.. اما انت وانت تبي تشخص لمثايل تحفففففففه.. يااحلوك انت وهي والصراحه اليوم مثايل اعجبتني .. من زمان ماحسيت انها حرمه عاقله.. بس اليوم اثبتت انه مو داايم هي خبلا.. اهم شي انها تفهمت موقفك .. والاهم من هذاا انها مشتااقه لك وتمووت عليك وصرحت بهالشي لك.. خلك تستاانس وتنبسط لما تعرف انها فقدتك الايام اللي راحت الله لاايعيدها..
بندر : يااعيني عليك وانت مااتبرد خاطرك الا بذكرى يتيمه عن سمر.. الله يجعل لها الذكرى اخت ياارب قريبا..
امممم تدري والله يمكن تروح مرره ثاانيه وتنط على بيت ابو سمر عشان تبلغ سمر بانها تبلغ نووت انها تنتبه ولااا توثق باحد. منها تخليها تحذر نوت ومنها تملى عيونك بشووفتها.. يعني حج وقضيان حاجه..هخهخهخه
فتون : والله ارحمتس وانتي تدربين رااستس وماتدرين وش الدنيا فيه؟؟ صدق من قال ياغافلين لكم الله.. امتس هذي غلطتة اكبر غلطه وهي تبي ولد اختها ينسى مرته بتزويجه لبنتها الصغيره اللي توها مااعرفت الدنيا.. باي حق تسمح لنفسها بهالشي وكيف بندر يوافق على هالشي ويزوجتس بدون ماتدرين الا اصلا كيف يزوجتس وانت بذاك السن الصغير..؟؟
اتوقع ان وقت الحقيقه قرب وقريبااا بتعرفين بموضوع زواجتس من ابو الدعله شهد بس السؤال كيف راح يكون استقبالتس للخبر..؟؟ هل بتصرخين وتقلبين الدنيا فوووق تحت؟؟ والا بتستقبلينه بحزن وبعدين بترظخين للامر الواقع؟؟ والا انتي اللي بتفاجأينا وتقولين ان سعد حلم حياتس وهو الرجال اللي تمنين انتس تزوجينه من عمرتس كله.. وبتلومين امتس ليش من زماان مخلته ياخذتس؟؟ههههههههه اما لو يصير هالشي الصدمه بتكون لنا حنا مو لتس انتي..هخهخهخهخه
الدكتوور هيف.. الف 1000 الف 1000 الف 1000 الحمد الله على السلاامه.. طهوور ان شاااء الله يااا داك.. اووووف والله مااتخيل وشكثر فرحت بشووفتك وانت طيب وتكلم وجالس تفكر بنوت وماخذه قلبك وفكرك معها.. وبعدين ياليت فعلا تقولها عن اللي صاار لك.. اممم تدري يمكن تخلي آدم يجيبها للمستشفى بدون مااايقولها عن الحادث واذا جت ووصلت عندك بالغرفه تشووف ردة فعلها على الموضوع لاايف. ياليت والله عشان تشووف كيف بتنهار من الخوف عليك وبعد خلك تشوفها بشكل ثااني غير عن شكل الخبله اللي داائما تذكرها فيه..اتوقع انها لو جت عندك بيجون العصابه مره ثانيه للبيت ويلقونها مو فيه ومايكون لهم رجعه مرره ثاانيه له.. ويمكن اذا رجعت لبيتك ترجع مره ثانيه للمخزن وتشووف هناك عاد وش ممكن تلقى يرتبط بقضيه نوت وتعرف سبب الحلم اللي انت تحلمه؟؟

غيوومه .. الاحداث احسها بدت تسخن والنهايه قربت على المجرمين..وانتي ابدعتي الصراحه.. وخصووصاا بالترجمه..ههههههههه الصراحه احب اشووف ترجمتس للكلمات المحليه .. هههههه.. اجل تدفرني تزئني..ههههههههههههههه.. والله توقعت تقولين تدفني بس.. اما تزئني على قولة المصريين اللزااز.ماتوقعت..بس رووعه..هههههه
مشكووره على هالجزء الرهيب اللي شال همنا على هيف وارتحنا من ناحيته.. ونستنى اذا الله احيانا البارت القادم بكل شوووق..
دمتي بكل الود ياغاليه..

السلام عليكم اختي غيوم انا متابعه جديده للقصه واحب قرائت القصه اللي متواصله الكاتبه في كتابتها صحيح اني من زمان وانا اشوفها
وحاسه انها من القصص اللي تمتعني بس ولله ماقدرت اقراء لروايه الا اذا شفت الكاتبه متواصله بالكتاب خاصه اني سبق وقريت الغريبه وبيتن الطين وعجبتني بالمره
اللي اعرفه ان تغيبتس كان بسبب ظروف مريتي فيه جعله اخر الاحزان ان شاءالله واسكن والدتس وجميع اموات المسلمين الدرجه العليا من الجنان
اتمنى اكون من المقبولين والمتابعين للروايه وجعلها اخر الغيبات يارب


هيف شخصيه اعجبتني خاصه بالموقف النبيل اللي سواه يوم وافق ياخذ نوت خاصه انه يعرف بوضعه وبجنونها

نوت كان فيه الف طريقه وطريقه تخفين فيها بدون ماتدعين الجنون لو انا مكان هيف حتى بعد ماعرفت انتس سليمه كل ماتذكرت شكلتس والشوشه بسم الله الرحمن الرحيم تروعت وجيتي على بالي نوت الخبله

اتوقع بيربط هيف ونوت قصة حب قويه وبيكون هيف ضحيه الذا الحب بسبب اذية العصابه له

تدرين روعه الاسمين لهم رنه وهيبه لانوت ولاهيف


عائلة ابوسمر عائله حبوبه من الام والاب وسمر نفسها تحاول قد ماتقدر مساعدة نوت من غير تعريض انفسهم للخطر

رائعه جدا عائلة ابوسلطان لبي قلبتس يام سلطان والغيره اللي تحاولين تخفينها يعجبني ابو سلطان في ذباته ماجا سلطان من بعيد ومبارك ابوه صدق انك ملح القصه انت ومثايل
تعجبني طيبت نوف وامها وتعاملهم مع نوت على معرفته بحالتها ماحاولو يستخفون بها بالعكس عاملوها اطيب معامله حتى انها معهم نست انها مجنونه

آدم وسعديه يسلمو على هيك حب واخلاص

هل ام لمى هي صديقة ام نوت حصه بس على حسب علمي ان زوجها صديق لمحمد وش صار ابو لمى شكله هو رئيس العصابه <<<خطيره

شخصية بندر عجيبه بس اللي مخوفني حبه السمر اخاف يفضحه قدام العصابه خاصه اذا حاولو يتعرضون السمر
موقف فتون صعب من وهي صغيره مملكه على سعد قويه خاصه ان البنت في مراهقتها تخيل فارس الاحلام وكيف حياتها وزاد عليه شكلها ماتطيق سعد
بس بعد راحمه سعد اكثر منها لانه هو اللي بيتعذب معها وبيحاول يسايرها لانه عاقل وفاهم وبيصبر على تهورها ودلعها وبيحاول يروضها بدون مايأذيها لانها بنت الغاليه ام بندر واخت بندر ولا يبي يخون الامانه


هذا اللي جا معي الحين غيوم وان شاءالله اكون من متابعين كل بارت بكل شوق أسأل الله لنا ولك الصحه والعافيه وحسن الختام

يعطيك العافيه غيوم

بارتك اليوم صغنون بس اهم شي طمنتينا على هيف

ننتظرك ياقلبي

جــ,ــ,ـــودي