كاتب الموضوع :
no123
المنتدى :
الارشيف
في بيت ابو خالد
كان الكل متجمع في المطبخ عشان فيه عزومة عشا بمناسبة خروج اخو ساره "عبدالله" من المستشفى بالسلامه ووصول عمها وعياله من الرياض
كان راكان في المجلس مع خالد وسامي ومندمجين بالسوالف والضحك
راكان:اقول خالد انت منت ناوي تتخرج كم لك ياخي وانت بهالجامعه
خالد:سبع سنين ولله الحمد ..
سامي بتفاجئ:اجل ماشاء الله تدرس طب
خالد:ههههههههه اي طب الله يرضى لي عليك..انا بكلية المعلمين قسم عربي ..لكن تعرف الظروف ماتساعد..
راكان:تكفى ياللي مسؤول عن عائله ..ووراك التزامات ..اي ظروف اي خرابيط..!
خالد:ياخي انت لازم تضيع برستيجي قدام خويك ..
سامي:ماشاء الله ..تخصصك عربي.. اجل بالله سمعنا شعر لأبو العتاهيه..
راكان: ايه ماشاء الله على خالد حفيظ ..سم الله عليه.. والدليل ان له سبع سنين ماتخرج خخخخخخ
خالد:اي شعر الله يهداك..اقولك مااعرف من المواد اللي ندرسها الا مسمياتها ومانيب ذاكر اغلبها تقول سمعني بعد ..هههههههه
سامي:عادي..شفني قدامك ..طالب طب..ومااتخيل منظر الدم قدامي..
راكان:افااا يالحساس ..اقول استح تقول كلام مثل هذا قدام الرياجيل
سامي:ليه استحي من شي فيني..والله اني ادوخ ان شفت دم..لكن مصيري اتعود ..
خالد:ماشاء الله انت طالب طب
سامي:هذي ثالث سنه لي والحمدلله الأمور ماشيه تمام
خالد:ياخي سلفني مخك هالسمستر بس ..خاطري اتخرج واتسدح فالبيت براحتي
راكان:انت مامليت تسدح ..ياخي انت طول العمر منسدح..اخاف عليك تنسى كيف الناس يمشون
خالد:اقول ..شفناك يالمهندس وين شغلوك بعدما تخرجت..
راكان:الحمدلله راضي بشغلي ..ودخلي ممتاز
سامي:بلعكس وظيفة راكان ممتازه..هو صحيح تخصصه مايدعمه..بس غيره مالقى اللي حصل له
راكان الحمدلله على كل شي
سامي:اقول خالد مانت بناوي تعرس بعد ماتتخرج
خالد:الفال لأخوي راكان..انا توي صغير ..ويقلد صوت بنت"اول شي أخلس ديراستي"
راكان كان يعرف ان خالد يقلد اخته ساره اللي رفضت تتزوج ولد خالها عشان على قولتها تخلص دراستها..
سامي:ههههههههههه حلوه ..بس كم بينك وبين راكان
راكان بتأفف:اووووهوووو بدينا بسوالف الحريم ياخي اهم شي الاخلاق ..العمر مايهم
خالد:هههههههههههه ..مستحي يالشايب والله مانيب قايل تطمن..
كان راكان يفكر في ساره اللي شافها صباح اليوم..تذكر صراخها عليه ..وتمنى لو انه طوّل شوي .. عشان يسمع اي كلام منها له حتى ولو كان قاسي
.
.
.
لمياء:ههههههههههههههههههههههههههههههه
ساره:تضحكين علي هاه ..:(
لمياء:اسفه ساره بس صاير وجهك كأنك وحده عربجيه مع هالكدمات اللي فيه
ساره:تصدقين مااحس فيهم الا اذا ضغطت بأصبعي
لمياء:تكفين قولي لي بالتفصيل وش صاااااااار من أول ماسمعتوا بالهوشه الين اخذتوا انذارات بالفصل
ساره:وش اقول وش اخلي..والله ياني تصفقت تصفيق ..المشكله اني ماكنت ادري مين اللي تضربني من الزحمه..كنت ماده ايديني واسحب شعر وحده منهم
ولا أدري كيف شكل البنت اصلاً
لمياء:وبعدين
ساره:شوي الا اسمع صوت نوف تصاااااارخ آآآآآآآآآآآآآآآآآآآآآآآآآآآي...انا انتبهت اني كنت اشد شعرها هههههههههههههههههههههه..التفتت نوف وشافتني ..قالت "لعنبو بليسك نتفتي شعري
روحي طقي هذيك"
لمياء:ههههههههههههههههههههههههههه من جدك تطقين صديقتك؟!
ساره:اقولك مدري وين انا فيه ..انا خذتني الفزعه وخشيت اضارب ..ولا ادري مين معاي ومين ضدي
لمياء:المهم وبعدين ..
ساره:انا يوم شفت اني ضيعت مجهودي وطاقتي في شد شعر صديقتي نوف.. قررت اني اركز وانا أضرب عشان مااطق وحده ثانيه من ربعنا
وبدون ماانتبه الاقي وحده تحذف شنطتها بوجهي..وانا توني مااستوعبت الا وغرشة مويه تجيني هنا"وتأشر على عينها اليسرى"..
لمياء:هههههههههههه ياقلبي ..والله انك منتي بقد الهوشات ذي
ساره:انا وصلت معاي وقلت مدامها خاربه خاربه ..والله لآخذ في ذيك المسترجله إعدام..
لمياء:وش سويتي؟؟
ساره:مسكت يدها اللي كأنها شاورما..اعوذبالله ..وعظيتها حتى صارت تسحبني من شعري تبي تبعدني عن يدها وانا حالفه يمين ماافكها
لمياء وعيونها تدمع من كثر الضحك:ههههههههههههههههههههههههههههههههههههههه واااااي ساره بطني والله خلاص جاني شد عظلي من كثر ماضحكت..
ساره:اسمعي بس النهايه..
ساره:فجأه كل الازعاج هجد..واسمع صوت ندى وهي تقول ساره اتركيها الأمن دخل..وانا خاشه جو مع صراخ البنت وتوجعها وحالفه لأبكيها..
..شوي الا وتسحبني سمر بكل قوتها..واشوف مكان العظه يالمياء صار ازززززززززززرق خخخخخخخخ
لمياء:يمممممممه منك يامتوحشه مو باين عليك كل هالشر
ساره: هههههههههههههههه..الاا اللي احبهم لا احد يغلط عليهم :)
لمياء:ياحظ اللي تحبينهم فيك ..بس بأمانه راكان مو منهم
ساره ووجهها انقلب احححمر بسرعه فضيعه :يالله يالمياء انتي وش تبين..؟
لمياء:ابيك تشوفين راكان بقلبك..
ساره بفضول وهي تتذكر شكله اليوم الصباح:هو قال لك انه يحبني
لمياء:يهمك ..تعرفين
ساره :اكيد يهمني أعرف..
لمياء:لانه زوج المستقبل ..صح!
ساره وهي تهز راسها بإيجاب وخدودها حمرا
لمياء: امممم ..طيب عندي سؤال..مدامك موافقه ليه كل هالثقل عليه..حرام عليك والله انه مايستاهل منك كل هالجفاوه
ساره:وش تبيني اسوي له ..انا ماتعودت اركض ورى احد
لمياء:انا ماقلت لك قطي روحك عليه..انا اقول ماله داعي في كل مجلس وكل جمعة بنات تقولين "وع مااحبه مااطيقه" وكأنه حشره عندك..ترى هالكلام يجرحني انا
قبل مايجرح اخوي..
ساره:ومن قال لك اني قلت كذا
لمياء:وصلني وبس..مومهم مين قال لي
ساره:مو كل شي اقوله اكون قاصدته
لمياء:يعني موافقه وتبينه..
ساره تبي تضيع السالفه:يالله ننزل تحت بالصاله في فيلم هندي جديد الحين يعرضونه
لمياء:يالله خلينا ننزل نساعدهم عيب نقعد نطالع بالتلفزيون وهم يكرفون بالمطبخ بلحالهم..
ساره:ياعيني ع اللي يعرفون الواجب..
وهم نازلين بالدرج بخفه ومرح سمعوا صوت خالد ينادي على أمه
خالد:يمه وين الشاهي فشلتونا الضيوف بيطلعون وانتم ماطلعتوا شي للحين
نزلت ساره ولمياء للصاله متجاهلين صراخ خالد
خالد:يممممممممه وين ساره هالعله ماتجي تساعدك
ساره بغضب وهي ترفع صوتها عشان يسمعها اخوها :هييييه ترى سمعتك وش فيها ساره..؟
خالد مشى ناحية الصوت حتى وصل للصاله
كانت لمياء تقلب التلفزيون وماسكه الريموت بيد واليد الثانيه على خصرها ومندمجه مع الفيلم الهندي
دخل خالد الصاله وهو يقول:انتي هنا ياسويره وامي تشتغل بالمطبخ
انتبه خالد لوجود لمياء
التفتت لمياء لخالد ورمت الريموت وركضت ع الدرج بسرعه فضيعه
خالد وهو يكلم لمياء المنطلقه ع الدرج:شوي شوي لاتطيحين من الدرج ونبتلش فيك خخخخخخخ
ساره:انت ماتستحي..خير ان شالله ..مابقى الا اجيب لك دلة قهوه واجلس سولف معاها ..هيييييييه أنت ..ترى هذي تروح فيها رقاب
خالد:ياحليلها استحت مني..والله حسبتها بزره..ماشالله كبرت واجد ..
ساره بخبث:وش رايك فيها؟
خالد:أنا لحقت اشوفها ..مامداني ادخل الا وهي منحاشه تقل شايفتلها جني..!
ساره:ماألومها انت لو شايف وجهك قبل تدخل كان انحشت من نفسك بعد
خالد:اقول ع شحم
ام خالد:خالد حبيبي هذا الشاهي خلص
ساره:طيب يامدلل العيله..رح ماتسمع امي تناديك
خالد:وللحديث بقيه..ابيك بعد المغرب
ساره: هيهات ..هيهات
خالد :وش هيهات؟
ساره:مدري خخخ بس قلت اتفلسف عليك بالفصيح ياأستاذ العربي
ام خالد:يمه وينك ..بسرعه خذ الشاهي ابوك لايقلب الدنيا على راسي
خالد :ابشري ياحبيبة أنفاسي..
.
.
.
.
تولين:زهق ..طفش..ملل..اعوذ بالله هذي موحياه..يآه كيف أكره ايام الإجازات ودي افهم ليه البنات ينبسطون عليها..اكيد لأنهم مايعيشون الوحده اللي انا عايشتها
الحين ريناد تتهاوش مع فيصل
وساره مشغوله ببنت عمتها وعريس المستقبل
وندى بمشاكلها مع اهلها
ونوف بأختها غيداء
وسمر بأولاد خالتها..
وأنا..مع مين
لمين أشتاق..ومع مين اتهاوش وبمين أنشغل
حياتي كلها فراااااغ..وهم ..كذب..
دست تولين وجهها بين المخدات وبكت..تذكرت "حبيب الريم"وكيف حاولت تسرق لحظات الدفا من حب غيرها..
لكن كان حبه لريم أقوى.والديل انه مادق عليها من فتره..ولايرد على رسائل تولين الاستفزازيه له..
نامت وهي تحس ان عيونها ذابت من حرارة الفقد والغياب..
صحت الساعه االتاسعه مساءا..اخذت لها شاور سريع ..وجلست تتأمل ووجهها في المرايا
ابتسمت للمرايا عشان يبتسم لها انعكاسها..
التفت للجوال واخذته ببرود تبي تكلم ريناد عشان تروح الصباح لبيتهم
لقت فيه أربع رسايل ومكالمتين
تولين برجاء :يارب يكون هو
الرساله الأولى
من:نوف
تولين فاتك اليوم اثنين شباب كل واحد احلى من الثاني لحقونا للبيت أنا وندى اذا تبين تفاصيل الأكشن دقي
الرساله الثانيه
من:ساره
تولي..حياتي..أرسلي لي إسم ورقم كريم الأساس الللي تستخدمينه عندنا اليوم عزيمة عشا بإستراحه وابي واحد مثله ..مره كان روعه عليك..وتعرفين وجهي وش صاير فيه عقب الهوشه
بدأت تولين تشعر بالإحباط..وهي تقلب رسايل زميلاتها
الرساله الثالثه
من:رقم غريب
وينك
مافقدتيني
غفا قلبي على بابك
وانتي غافله عني
وانا تعباااااااااااااان بغيابك
فتحت عيونها تولين واعتدلت في جلستها وقامت تقرى الرساله يمكن ثلاث مرات عشان تستوعبها..
الرساله الرابعه
من:ريناد
حسابي معاك بعدين
.
ابتسمت تولين وهي عارفه ان ريناد مابتقدر تسوي شي لأان قلبها طيب..
.
.
كانت عيون تولين بالجوال وتتمنى تعرف مين صاحب الرقم الغريب معقول هو نفس الشخص هذاك ..طيب ليه مادق كل هالفتره..وش ذكره فيني الحين..
ماني برداه عليه حتى يدق أو يرسل مره ثانيه..على كيفه أنا..يطنش ومتى ماحس بالفراغ ارسل رساله يتسلى فيها ..
شوي وتسمع صراخ ميري من الصاله وهي تنادي بأعلى صوتها تولييييييييييييييين تولييييييييييييييييييييييين
فزت تولين من مكانها وفتحت الباب وطلعت من غرفتها وطلت من الدور الثاني على الصاله لقت ابوها ممد على ارضية الصاله وباب الفيلا مفتوح ع الآخر وميري تصيح وموداريه وش تسوي
رمت جوالها ونزلت تركض وكل جزء في جسمها ينتفض من الخوف
تولين:ميري بابا وش فيه ..بابا رد علي..
ميري ودموعها تخنق صوتها:انا مايدري انا يجي "cleen"صاله شوفي بابا نوم هنا ..مافي كلام ..مافي صوت
تولين وبصراخ سمعوه الجيران:جيبي تلفون بسرعه ..
وقربت من اذن ابوها وصوتها يرتجف وهي تترجاه:بابا تسمعني..بابا شفيك الله يخليك رد علي..
وقامت تسحبه ثوبه بعجز وهي تصيح :قووووووووووم يامحمد قوم ..قوم مابقولك بابا لأنك تكره هالكلمه....ليه ساكت هاه..ماتقدر ترد علي..عاجبك شكلك كذا قوووووووووووووووووووم..
جابت ميري التلفون وباب الفيلا كان يدق..طلعت تفتح للجيران اللي راعهم صوت تولين وميري والصراخ اللي سمعوه
دقت تولين ع الاسعاف اللي وصلو بعد عشر دقايق من المكالمه..
كان جارهم ابو سعود ومعاه زوجته دخلو لحوش الفيلا ..دخلت ام سعود الفيلا وقالت لزوجها ينتظر بالحوش حتى تاخذ البنت عن ابوها ويدخلون المسعفين يشيلونه
ام سعود يوم شافت"محمد الجابر "هذاك الجبل اللي ماتهزه اي قوه بالدنيا ممد ع الأرض وبإستسلام ..وعلى وجهه آثار دموع وكأنه يودع الحياه على صوت بنته وحيدته اللي شقت ثوب ابوها
وهي تترجاه يقوم من مكانه..
ام سعود ودموعها تسبق كلماتها:تولين حبيبيتي قومي ندخل المقلط ..الاسعاف وصل ادخلي خلي الرجال يدخلون
تولين:ولاتسمع اي شي ..الا أنفاس أبوها اللي كانت تتلاشى على نحيبها وصراخها
اخذت ام سعود شرشف الصلاه اللي موجود بالصاله وغطت تولين فيه ونادت على ابو سعود يدخلون هو والمسعفين..
ضمت ام سعود تولين اللي كانت تنتفض بشكل عنيف لدرجة ان ام سعود صارت تبكي بصمت على حالة تولين
ام سعود:يابنتي اذكري الله ابوك مافيه الا العافيه ..تلاقينه هبوط في الضغط ..او إرهاق ..لاتسوين بروحك كذا ياقلبي..
تولين التفتت لأم سعود وطاح الشرشف من على راسها
تولين :ربي مايخليني صح
التفت ممرض الأسعاف وأبو سعود ناحية تولين وأم سعود متفاجئين من كلمتها..
ام سعود قالت وبإيمان وعقيده راسخه:لا ياتولين ربي مايخلي أحد
لاحظ ابو سعود إرتباك ممرض الإسعاف بعد ماانتبه له انه كان يناظر تجاه زوجته وتولين
.
.
.
وفي سيارة الإسعاف
كان ابو سعود موجود فيها وسأل الممرض
ابو سعود:طمني عليه كيف حالته الحين
الممرض:مانقدر نقول احنا اي شي الحين..اذا وصلنا يعطيك الدكتور الافاده
ابو سعود:الله يشفيه ويعافيه
نزل راسه ابو سعود بحزن :من للبنت المسكينه بعد الله غيره ..
الممرض وعيونه فيها إنكسار: مافي شي بعيد على الله ..ان شالله يقوم بالسلامه
حس ابو سعود ان حالة ابو تولين ماهي سهله
.
.
في بيت تولين كانت ام سعود تحاول تتصل على ولدها سعود عشان يطلع من شغله ويوصل البنت وام سعود للمستشفى
تولين كانت منكمشه حول نفسها وحاظنه ارجولها لصدرها .. وتسمع لها صوت يشبه الأنين وتنطق بكلمات متقطعه محد قادر يفهم بالضبط وش هي
ام سعود:سعود ..واللي يسلمك حبيبي ..استأذن الحين وتعال لبيت جارنا محمد الجابر..
سعود:عسى ماشر وش موديكم عنده
ام سعود:الرجال بالمستشفى وبنته محترق قلبها عليه وابوك راح مع الأسعاف وللحين مادق يطمنا
سعود:خلاص ..الحين بجيكم
بعد مرور ساعه وتولين ماحركت نفسها من مكانها
سمعت ميري صوت سعود بالحوش ينادي على امه
ميري:مدام في واحد يبي انتي برى
ام سعود قامت للباب
سعود:هلا يمه انا بالسياره اذا خلصتوا اطلعوا
ام سعود :يالله جايين بس دق على ابوك شف وينهم الحين
راحت ميري وجابت عباية تولين ولبستها اياها وجابت لها الشنطه وحطت فيها جوالها ..وقامت تولين تمشي وهي مستنده بثقلها كله على ميري
ام سعود:يلا يابنتي سعود برى ينتظرنا ..وان شاءالله تقر عينك بالوالد
تولين تتمتم بصوت منخفض:ربي مايخلينا ..ربي مايخلينا
ركبو كلهم السياره..ماعدا ميري اللي جلست تبكي بالحوش
.
.
.
وفي السياره كان سعود يسأل امه.. وش صار؟.. وكيف لقوه؟.. ومن متى ابوه راح ؟....وكم للأسعاف ماخذينه؟..
وكانت تولين في عالم اللاوعي ..كانت دموعها..تنزف بدون إنقطاع ..مع كل نفس يدخل لصدرها تحس النار اللي فيه تزيد اشتعال
كانت تتمنى انها هي بمكانه..تمنت انها عاشت لحظة الاستسلام من الحياه ..اللي شافتها وابوها متمدد على الارضيه الرخاميه البارده
غمضت عينها ورفعت راسها تناظر سقف السياره..وحالها يقول:مين يعطيني جناح وأطير وأنسى هالجراح...
.
وصلوا المستشفى ودخلو الطوارئ كانت تولين تمشي بطريقه غير متزنه
ولما شاف سعود أبوه جالس على كرسي الانتظار وحاط يدينه على راسه وعيونه بالأرض ..
التفت على امه وقال لها بصوت حازم:خذيها تجلس هناك بسرعه
مسكت ام سعود يد تولين ..لكن تولين دفعت يدها بقوه وقالت لها:ابعدي عني..وصارت خطواتها سريعه وهي تمشي بدون ماتعرف لوين..ولما شافت ابو سعود
راحت له وهي تصارخ من آخر السيب ..:ابو سعووووود وين ابوي؟؟
وينه بأي غرفه ؟
ابي اشوفه ..بسرعه قول وين؟
.
.
رفع راسه أبو سعود وهو يناظر لتولين القادمه من آخر السيب وشهقاتها تقطع انفاسها من كثر مابكت
قام ابو سعود واتجه لزوجته وقال لها أن "محمد" مات واعلنوا ساعة وفاته من نص ساعه..ووقع على الاجراءات كلها..وطلب منها ماتقول للبنت حتى يرجعون للبيت..
اختفت ام سعود لفتره...
وهي كانت تبكي بوحده من دورات المياه حتى قدرت تتماسك وتقدر تمثل على تولين عشان ترجع للبيت
كانت تولين واقفه وتسأل كل شخص يمر عن محمد الجابر ووين غرفته..
جات أم سعود وأقنعت تولين ترجع البيت عشان تجهز غرفة أبوها اللي بيرجع بعد شوي
ام سعود:يلا حبيبتي..نروح للبيت ومثل ماقلت لك ابو سعود بيجي معانا هو وأبوك
كانت تولين مثل الطفله اللي تبغى تصدق اي شي..تبغى اي أمل تنتنفسه عشان تقدر تعيش...
ريناد كانت جالسه في الصالون عند أمها ..وتحاول فيها انها تقص شعرها عشان الحفله اللي بتصير الخميس الجاي عند نوف
ام ريناد:انا قلت لا..
ريناد:حلوه ذي لا..كيفي شعري اسوي فيه اللي ابي
ام ريناد:اجل ليه تسأليني
ريناد:ابيه برضاك وموافقتك
ام ريناد:وأنا مو موافقه
ريناد:يوووووه ..انتي لازم تعقدين كل شي
وشوي الا تلاقي سمر داخله الصالون هي وأختها
ريناد وهي طااايره من الفرح:سمر!!
التفتت سمر ببرود وهي تطالع مين اللي تناديها
سمر بتفاجئ:مين ريناد..عاش من شافك ..وش جابك هنا؟!
ريناد وهي تأشر على الصالون بأصبعها:هذا لنا
سمر:انتو أصحابه
ريناد:يس ..ليه ماتعرفين؟؟
سمر:لا والله ..اذا انتي ماقلتي لي من وين اعرف
اخت سمر:يالله عاد نبي دسكاونت عشان المعرفه
ريناد:وش دسكاونت اليوم كل اللي تبونه Free بدون مقابل ..
سمر:ههههههه ..لاعاد مو لهالدرجه
طلعت ريناد وسمر لغرفة المانيكير
وتركوا "نوره" اخت سحر تقص شعرها تحت
سمر:والله منتي بسهله عندكم صالون ولاتفكرين تسوين له دعايه عند البنات ..
ريناد: مااحب اهايط قدام البنات
سمر:ههههههههه..المهم انا الحين اكتشفتك من بكره بنجي انا والبنات وبقول لهم انك بتسوين لهم كل شي ببلاش
ريناد:هههههههههههه والله تامرون على عيني
دق جوال ريناد..
التمثال يتصل بك
ريناد:ياليييييل ...وش يبي ذا؟
سمر:مين؟
أرتبكت ريناد وقالت :رقم غريب يدق علي..
واستمر ابو سامر يدق عليها حست ريناد ان فيه موضوع مهم ..
ريناد:سمر حبيبتي ثواني بس أروح اشوف وين "ميرال "تجي تسوي لك أظافرك..
.
.
ريناد:نعم
ابو سامر:وجع ان شالله ليه ماتردين؟
ريناد:مالي خلقك
ابو سامر:عاد انا اللي ميت عليك..
ريناد:اقول لا يكثر بس..وش تبي
ابو سامر:دقت على البيت وحده اسمها أم سعود تبيك ظروري
ريناد:مين أم سعود مااعرف وحده اسمها ام سعود
ابو سامر:الا تعرفين ..لانها داقه من رقم بيت تولين
ريناد:وانت وش عرفك برقم بيتها
ابو سامر:خخخخ صداقات قديمه
ريناد:وش تبي مني هالحرمه؟
ابو سامر:شوفي..انا لو ماحسيت ان الموضوع موهيييييييييم ماكان دقيت عليك..وخربت يومي الجميل بصوتك النشاز..
ريناد انقبض قلبها :تكلم بسرعه قول وش كانت تبي؟
ابو سامر:تقول تولين تعبانه حيييييل ياليت تقدرين تزورينها بكره
ريناد:تعبانه؟؟!
ابو سامر :هي تقول كذا..
ريناد:طيب طيب..
ابو سامر:وجع حتى مافيه شكراً
طوط..طوط..طوط
نزلت تولين بسرعه لأمها وقالت لها كل شي
ام ريناد:يعني شلون تبين تروحين لها والساعه 11 الليل صاحيه انتي
ريناد:يمه تكفين تولين تعبانه ..والله لو الموضوع تعب عادي ماكان دقت وحده مااعرفها تطلبني اجي..
ام ريناد:بكره تروحين اليوم مستحيل وين قاعدين فيه احنا ..وش تبين الناس يقولون عنا
ريناد وبإنفعال:اشوفك مااهتميتي لكلام الناس يوم تزوجتي واحد أصغر منك بسبع سنين ..والحين يوم ابي اروح لصديقتي اللي مالها احد بالدنيا غيري تقولين الناس وكلامهم ..!
ام ريناد:ريناد..بلاطولة لسان انا قلت لا وانتهى الموضوع
ريناد:آسفه يمه بهذي ماراح انتظر رضاك
لبست عبايتها وطلعت خارج الصالون..وقفت لها سيارة أجره ..وراحت لبيت تولين
.
.
.
كانت لمياء وساره ونجود وبعض من بنات جيرانهم قالبين الصاله كازينو
رقص وإستهبال ووناااااااااسه لآخر حد
قامت لمياء تغير شريط رابح صقر.
لمياء:خلاص مانبي خليجي الحين نبي نرقص مصري..
تصفير وتصفيق ويشجعون لمياء اللي اخذت شال نجود عشان ترقص الشرقي على أصوله
وحطت شريط حسناء اغنية "حب ولا"
كل يوم بتقول حبيبي
وتضحك عليا
كل يوم بسمع كلام
واشوف حاجه ثانيا
قولي ايه قصدك معايا
ولا ايه اخر الحكايه
لعبه يعني ولاحب ولا حاجه تانيه
كانت ترقص بخفه وجمال وعيون الحاضرين كلهم عليها
وام راكان تسمي على بنتها خايفه من عيون الناس
ام خالد كانت مندمجه تصفق بقوه وساره تناظر لأمها اللي كان الأعجاب واضح عليها ..
نجود:قومي ارقصي مع لمياء
ساره:ماأعرف..اصلا بعد لمياء محد يعرف يرقص..
ويوم وصلت الأغنيه عند مقطع..
هات عنيك قدام عنيا >>>قربت لمياء لساره وحطت عيونها بعيون ساره
وهيبان كلامها
لو صحيح باقي عليا
حشوف دا فحنانها
اما لو بايع غرامي >>هنا بعدت عن ساره ودارت على نفسها بدلع وشعرها الكستنائي يتمايل معاها بكل عفويه
خذها مني اسمع كلامي
رح بعيد خليني فحالي
وشف لك وحده تانيا
..ولما انتهت الأغنيه..
الكل قام يصفق حتى العجايز اللي كانوا متضايقين من صوت الاستريوالعالي ..كانو مبسوطين ويصفقون لها..
راحت لمياء المطبخ تشرب مويه .وكانت خدودها حمرا ..رفعت شعرها ..وهي تحس بالحر..من بعد المجهود اللي بذلته في الرقص
وكان خالد متخبي ورى الثلاجه وياكل الفطاير اللي بيطلعونها للحريم بعد شوي..بشغب طفولي جميل
راحت لمياء للتلاجه ومعاها كاسه..
ولقت خالد طالع من ورى التلاجه وماسك بيده صحن الفطاير..
لمياء:يمه هذا من وين طلع
التفت خالد وشاف لمياء عن قرب..هو ماقدر يكمل بلع من اللي شافه..كانت قمه في الأنوثه والجمال والحيويه..كانت رافعه شعرها ومنسدله خصل رفيعه منه على خدودها الورديه..
لمياء وقفت مكانها من المفاجأه..يعني شي مااحد يتوقعه ..رجال عمره25 سنه ..وش يجيبه هنا..!
غطت لمياء وجهها بيدينها
خالد:لاياشيخه تغطين وجهك والباقي عادي اشوفه
لمياء:انت اعوذبالله مدري من وين تطلع لي
خالد وهو متجه لباب المطبخ ويناظرها:اقول خلاص ..درينا انك حلوه مالها داعي كل شوي تطلعين بوجهي ..
لمياء عصبت من كلمته اللي اعتبرتها اهانه لها وكأنها تقصد تطلع قدامه..!
لمياء:وانت لاتتخبى ورى الثلاجه عشان لا أنفجع فيك
ضحك خالد عليها وطلع من المطبخ وهو يحس ان في داخله حاجات كثير تحركت ناحيتها..
.
.
.
ام ابراهيم:روحي كلميه والله ابوه بيسوي سالفه ..
رنا:يمه قلت لك مايبي يطلع
ام ابراهيم..ياويلي ويلاه من ابوه ..والله ليحطها براسي أنا
رنا:وانتي وش دخلك هو مايبي يجي
ام ابراهيم:ابوه حالف يمين ,,لو ماجا لعند عمته ..ليرجعني بيت اخوي
رنا:الله الله..وليه كل هذا
ام ابراهيم دمعت عيونها وهي تحاول تخفي لوعتها عن عيون بنتها..
ام ابراهيم:صرت رخيصه عند ابوك على اقل شي يبي يطلق.>!
رنا:يمه عاد انتي لاتصدقين كل شي يقوله ابوي ..بس ماعليك انا بروح أكلم ابراهيم..وعلى الله يسمع مني
دقت رنا باب غرفة اخوها..ودخلت
ماعرفت كيف تبدا معاه الموضوع مالقت الا طريقه وحده
ابراهيم :نعم ..بغيتي شي
رنا:جات وجلست جنبه وقالت له:تدري مين كلمت اليوم؟
ابراهيم التفت لها ببرود:الحمدلله والشكر..لايكون كلمتي كونداليزا رايس تشوف لي وظيفه في الكونجرس
رنا:هههههههه ..لا كلمت وحده ثانيه..كلمت ساره
ابراهيم:مين ساره؟
رنا:بنت عم لمياء
فز ابراهيم من مكانه ورمى الجريده اللي بيده:متى كلمتيها؟
رنا:اليوم المغرب..
ابراهيم:ولمياء كلمتيها؟
رنا:لا..بس سألتها عن لمياء ..قالت لي بخير وطيبه ..
ابراهيم بإهتمام:وايش بعد قالت؟
رنا:بس ..ولاشي ..بس سمعت صوتها وهي تنادي على ساره
ابراهيم بغى يسأل رنا كيف صوتها من كثر اشتياقه لها ولأي شي منها:سمعتيها؟
رنا:ايه ..
ابراهيم:طيب وش بعد قالت لك ساره
رنا:ولا شي بس..
حس ابراهيم بإحباط كان وده يعرف أكثر عن حالة لمياء وده يشوفها يسمعها يحس بشعورها
رنا:ايه ابراهيم بغيت انسى
جاوبها ابراهيم بسرعه:وشو نسيتي قالت لك شي ثاني
رنا وبعيونها حزن على اخوها اللي صار مايفكر بأحد الا بلمياء:متى بتروح عند عمتي
اختفى الاهتمام بعيونه ورجع انسدح واخذ الجريده بيده :ماني برايح
رنا:ابراهيم لازم تروح والله أبوي ليزعل..تدري انه هدد يطلق امي لو مارحت
ابراهيم:وبعدين مع هالشايب ..لازم يمشيناعلى كيفه..قلت له ماني متزوج بنت عمتي ..ولاني بطاب بيتهم ..غصب هي ..
رنا:ماقلنا لك تزوجها روح لبيت عمتي اليوم..وبس
ابراهيم:اذا رحت اليوم ..بيتعود على هالحركه ..ويصير ع الطالع والنازل يهدد...
رنا:روح إكراما لأمي هالمسكينه اللي احترقت اعصابها..
ابراهيم بعد تفكير وصمت طويل:خلاص طيب بس ماني بقاعد ع العشا واللي براسه هالشايب يسويه
رنا بفرح:لاتقعد ع العشا سلم واطلع قول عندي شغل ولاترجع
وفي بيت عمة ابراهيم
كان الكل متجمع ويسولف ومبسوط الا رنا اللي كانت خايفه وكارهه نظرات عمتها لها ..وتلميحاتها المتكرره..لخطبتها لولدها
رنا تقول بينها وبين نفسها :ماباقي الا ابو ظروس اتزوجه ..خليه يعدل أسنانه اللي كأنها مفك قواطي ..بعدين يفكر يتزوج
قامت رنا من مكانها ونزلت تحت تبي تكلم اخوها ابراهيم عشان تروح معاه
نزلت مع الدرج كان "ناصر" ولد عمتها داخل مع الباب الخارجي اللي قبال الدرج
كانت رنا لابسه تنوره جينز قصيره لتحت الركبه..وبلوفر بنفسجي وفتحة الصدر واسعه..
لقت ناصر واقف وماكانت تشوف في وجهه شي الاضروسه المتقدمه وهو يبتسم لها بإعجاب وحب شديدين
طالعت فيه تبيه يستحي على وجهه ويتحرك من مكانه..
ومازال متسمر في مكانه يتأملها ..
ركضت رنا لمجلس الحريم...وهي تردد بصوت عالي..وجع ان شالله ..مو ناقصنا الا هالاشكال نشوفها بالليل عشان يحوشنا أرق أسبوع كامل
ناصر نزل راسه بحزن وإنكسار وهو يشوف كره رنا وبغضها له..
.
.
.
وفي بيت تولين
كانت أم سعود جالسه تصلي بالصاله وتدعي ربي لتولين اللي نايمه بغرفة ابوها
دخلت ريناد البيت بلهفه وشافت ام سعود تصلي بعبايتها..
نادت على ميري ومحد رد:
قالت: أنتظر حتى تخلص الحرمه من الصلاه واسألها وينهم شكلها هذي أم سعود اللي كلمت فيصل
خلصت ام سعود من صلاتها وقامت تسلم على ريناد
ام سعود:كيفك يابنيتي ان شالله بخير..ماكان ودي اروعك والله..كان جيتي في الصباح
ريناد:وين اجي الصباح وصديقتي تعبانه..انتي ماتعرفين تولين وش هي بالنسبه لي..بس وين هي مو موجوده هنا؟
ام سعود نزلت راسها:انتي مؤمنه بقضاء الله وقدره..وسبحان الله الواحد مايضمن يعيش بكره
ريناد قامت من مكانها وحطت ايدها على قلبها اللي كان بيطلع من مكانه:تولين صار عليها شي؟
ام سعود:لا تولين بخير..بس ابو تولين عطاك عمره من تقريبا 3 ساعآت ومحد قادر يقول لها شي
ريناد :لاحول ولاقوة الا بالله..الله يغفر له ويرحمه ويسامحه على كل اللي سواه
ام سعود شافت ريناد ماتأثرت مره..استغربت منها
ام سعود:هي نايمه فوق بغرفة ابوها اطلعي لها يابنتي ..تراها طلبتك بالأسم عشان كذا دقيت عليك
ريناد:وليه مادقت على جوالي
ام سعود:شنطتها تركتها بالمستشفى تعرفين الوحده ماتنلام بهالمواقف ممكن تنسى روحها من الضيم
.
.
.
طلعت ريناد بخطوات هاديه وهي تحس بأن جدران هذا البيت قاعده تتهاوى من غياب بانيها وصاحبها
راحت لغرفة ابو تولين وفتحت الباب ويدينها ترتجف لأنها أول مره تدخل هالغرفه او حتى تشوف بابها من بعيد
لقت تولين نايمه على سرير ابوها وأمها وهي حاضنه شماغ أبوها ..
ماقدرت ريناد تتحمل هالمنظر وهي تشوف تولين حاظنه اشياءابوها بعد موته ..يآآه هالبنت انحرمت من ابوها وهو حي..كيف تعيش الحرمان مره ثانيه...
شهقت ريناد بصوت عالي وهي تبكي وصحت على الصوت تولين
تولين :بابا انتا جيت
ريناد:انا ريناد ياروح ريناد وقلب ريناد
وراحت لتولين وحظنتها وهي تبكي
تولين:يووووه ..الحمدلله انه حلم ..الحمدلله ياربي انه حلم
تصدقين ياريناد شفت حلم يخوف مره..تحلمت ان ابوي مات فجأه بدون سبب ..وكان ممد في الصاله..وكان يقول لي :أناأبوك لاتصدقين اللي يقول لك غير كذا
ريناد كان قلبها ينعصر وهي تشوف الطمأنينيه بعيون تولين وهي تشرح الحلم "الواقع" لها
يبه وينك ..ترى اشياءك ..تذكرني بهالجفوه
شماغك ثوبك وكل الزوايا تشهد غيابك
تعال وأرجع ونكّد حياتي وزيدني قسوه
تعال اتنفس انفاسك تعبت اتنفس ثيابك
.
.
.
كيف تقدر ريناد تقول لتولين هالخبر..المفجع
وش قصة خالد ولمياء ..هل ممكن ينسيها خالد ابراهيم..؟
ساره واعترافها الاخير هل بيساعد راكان انه يتجرأ ويخطبها رسمي
كل هذا وأكثر تعرفونه بالبارت الجاي
|
13-03-10, 01:29 PM
جديد مواضيع قسم الارشيف
العرض العادي
