إنت عارف يا محمد انت اتصرفت غلط في إيه؟ مش في رد فعلك لما البنت كلمتك
لأ .. قبل كدة
أنا اكتشفت إن دي طبيعة العلاقة بين الرجل و المرأة
بطبيعتي -التي اكتشفت مؤخرا إنها غريبة- عمري ما بصيت إن الشخص دا راجل أو بنت
أنا أتعامل مع الجميع بطريقة واحدة و مستوى واحد من الإهتمام
و لاعمري لاحظت دا لابس دبلة و لا مش لابس
و لا دا بصلي و الكلام ده
م الآخر كدة مش في دماغي
بتعامل مع الناس كبشر
ولد بنت بقى مبتفرقش
عمري ما فسرت إهتمام أي شاب بيا مثلا إنه إعجاب.. لأن أنا كمان مكنتش بافكر كدة .. فكنت تلقائي فاكرة الناس بتفكر زيي
بس مع الوقت إكتشفت إن دي حاجة غريبة و تكاد تكون عيب جوهري في شخصي أو نضج ما مفقود
لأن العلاقة بين رجل و امرأة لا يمكن ألا تمر بهذه الحالة
عمر ما في اتنين يقربوا من بعض راجل و ست و ده ميكونش له جانب عاطفي
من أحد الطرفين على الأقل
و أؤكد على هذا
حتى ده كلام الرسول عليه الصلاة و السلام و هو لا ينطق عن الهوى

إيه الغلط اللي أنا شايفة بقى إنك عملته؟!
هو إنك أبديت أكيد إهتمام ما
أعرف أنه أكيد بحسن نية بدليل طرحك للموضوع و تأنيب ضميرك هذا
ربما مكانش في بالك لأن البنت دي كانت بمية راجل زي ما إنت قلت فأنت فكرت إنها زي واحد صاحبك و ابتديت تعاملها على هذا الأساس

عمر ما في بنت طبيعية هتفهم ده
طبيعة خلق ربنا لينا إنها هتفهم إن ده إهتمام خاص بيها كأنثى

و طبعا كل تفكيرها إنك متردد
أو ظروفك لا تسمح علشان كدة خايف تفاتحها
اللي أقصده يا محمد أن البنتين دول لما جم يفاتحوك كانوا متأكدين 100% إنك بتبادلهم الشعور و إلا عمرهم ما كانوا يتجرأوا و يتكلموا

النقطة هنا : إزاي وصلهم الإحساس ده
هو ده الغلط بتاعك
مش رد فعلك

أرجو أن أكون أوضحت وجهة نظري

عارفة إني خرجت عن الموضوع لأنك بتسأل إزاي الواحد يتصرف لما ده يحصل مش إيه الأسباب
بس أحيان كثيرة لا يمكن فصل المشكلة عن مسبباتها

زهقتك برغيي
معلهش :)